NEVER REGRET (COMPLETED)

A bul inţanna chu kan in pelh dawn laia min sut palh ţum kha a ni. A hmanhmawh a, min lo hmulo a, min su nawk a, ka petek nawlh a, lei a tlu lovin amahah ka tlu a, min lo dawm a, khami ni kha ka tlinlung pawh amaha a tluk luh ni a ni a, a nun a ka tluk luh ni a ni. Khalai hmun a ka kal kha tun thlengin ka la inchhir lo.
.
.
Kan intawn ve chuan ka lo tlai tawh. Bialnu nghet alo nei hman tawh a, kan in ngainat tlat tho vangin ţhian anga awm reng turin thu kan ti tlu a, kan inhmuh chuan sawitur kan ngah thei hle a, kan nui dun a, ka thinrim changa ka ankhum buan buan pawhin min chhanglet ngai lo. Mipa ţha tak ka tawng kha ka inchhir ngai lo.
.
.
Kha pindan zimte kha, a inluahah leng turin min sawm a, coaching a kal lai a ni. A ţhiante an lokal ţeuh vangin pindan zim takah kan inkalh khum a, kan hmui a inhnaih a, kan mit a in tawng a, kan thinlung pawh a rualin hunbi neiin a phu a, kan inhip tawnna chuan min ti â zo a, in thunun tur ka ni tih ka in hriat laiin ani chu a ni ve lo. Min awmhnaih lui zel a, khami ţum kha kan hmui a in sikna hmasa ber a ni. Ka vawikhatna anih vangin thawk ngaihna ka hre lova, chuti chung chuan kha pindan chhunga ka awmpui kha ka inchhir ngai lo.
.
.
Nau ka pai a, a makin a hrilhhaithlak. Ka ţhianpa, bialnu nghet nei ni bawk fa ka pai a ni. Lehkha ka zir lai a ni a, ani pawh doctor ţha tak nih tum mek a ni. A tumna ka tihchhiat sak thei lova, ka thil tum ka chhunzawm thei ta lo thung. Ka naupai lai ti tla turin huaisenna ka nei lova, ka tih theih awmchhun chu bihruk a ni mai. Fa ka neih thlengin ka awm bo a, ka fanu hmel ka hmuh khan a pa ka hrechhuak nghal a, pianghlim a ni chung khan tunge a chhun zawk dawn ka hrethiam nghal. Ka natna mai mah nise kan lo intawng kha ka inchhir ngai lovang. Fanu duhawm tak min pe miau a ni.


NEVER REGRET-1



"Nu min hruai ve tawh la" ka hmaah rawn dingin a lawmawm tawk lekin a thle ngiai a, ka fanu Lalruatfeli hi Bawihte tiin kan ko mai ţhin. A pian hnuah private ah nurse ka zir a, kan zirtirtute bulah khan dawt ka sawi nasa ţhin. Ka zirpuite erawh chuan min hrechiang hle. Apa Jason hi ka la hmu leh lova, a chanchin pawh ka hrengai lo. Delhi ah lehkha ka zir lai khan coaching kalin a awm ve a, kan intawn hma lawka bialnu alo nei hman te kha thil mak tak a ni. Aizawl ah hian khawi vengah nge an awm tih leh eng ang chhungkua nge annih pawh ka hrengai lo hrim hrim.


A zir tluang anih chuan specialist a ni daih tawh ang a, mahse ka hmu ngai miah lo. Nurse ka zir lai khan sawrkar hospital hrang hrangah kan duty kual ţhin a, ka zawng ru ve reng ţhin na a hmuhtur a awm ngai lo. Ka zir zawh hnuah sawrkar hospital ah tho mi ai ka kal leh a, ka hmu ngai lova, a hming an sawi pawh ka hrengai lo. Mi ai kal reng ka peihtawh loh vangin hmanni lawkah hna ka dil a, ka tling ve hlauh a, tunah chuan private hospital ah ka thawk ve dawn a ni. Hlawh pawh a zia ve deuh a, mi ai kal ai chuan ka duhzawk hrim hrim.


"Hospital a i lokal ve chuan natna i kai mai tur a sin. Inah ipi bulah lo awm rawh aw" ka ti a, amah chen tawk turin ka ţhuhniam a, a dara ka dawmsak lai chuan min lo en kiau a, a mit leh hnar te, a hmui thlengin apa a ang takzet a ni. A mitmeng a fiah a, a mit hian nalh tih a hlawh fo ţhin. Kan intawn tirh a Jason-a mit nalh ka ti ang chiah khan. Hmeichhe mit a ang tiin ka fiam fo ţhin anih kha.


La thle ngiai chungin a khabe a dawm a, chunglam melhin a inngaihtuah vang vang a, kum7 a ni tawh a, school chawlh lai anih vangin min zui ve chak ţhin a, ka hna ţan ni chauh anih vangin ka hruai thei rih lo a ni.
"Nih leh eng nge min lo hawn ang?"
"Eng nge niang aw?" ka ti vang vang a, hetianga ka tih hian amah zawkin a duhzawng a rawn sawi leh nalh ţhin.
"Chocolate aw"
"Ha a chhiat duh em kha. I ha a chhia anga, a dum vek ang a, i hmelţha thei nang"
"Cashew nut a ni mai" a ti leh a, ka remtihna lantir nan phur takin ka lo bu nghat nghat a.


Kawngkhar a inhawn rualin Bawihtei mit chu hlimna in a ti de sar a, "Api" ti a ko in api bazar rawn haw chu alo lawm a, bawihtei a hmuh rualin ka nu pawh a nui ve nghal sang a, nurse ka zirleh chhung zawng pawha awmdun reng ţhin annih vang hian an inngaina hle a, ka nu hian a chang chawt mai ţhin.
"Inu ngen i tum deuh em ni? Vawiin chu nilengin kan infiam ang ka lo ti asin"
"Aih. Ka ngen dawn lo" a lo ti vat a, min ngaih em em rual hian api amah chiaha awmtir hi a duhlo ve ţhin a, a khuahar ang tiin a khawngaih ţhin. Naupang fel leh harhvang tak a ni a, asthma hian a tibuai leh zeuh ţhin tih lohah chuan insawiselna a nei lo. Thil thlum a duh em vang hian a ha ana veleh ţhin bawk a, chutiang tih lohah chuan a fel fai a, hmuh a nuam em em reng a, naupang hlim thei leh ţawngduh tak a ni. Tupawn an lawm ti ila ka sawisual lovang. Naupang te si hi mi pawisawi a hlau thei em em a, mi inthlahrung chi a ni bawk.


Ka kal dawnah a sam ka ţawn ţhatsak a, midangin an ţawnsak ve hi a duh meuh lo. A pawr deuh anih pawhin a bula ka awm theih hun alo nghak ngat ngat mai ţhin. Min ngen zui lem lo bawk a rilru nuam deuhin ka chhuahsan a, ka nu leh paten min la dampui a, an duh ang ka ni thei lo hi nuam lo ka ti ţhin a, ka rai hlim pawhin ka nu chu a ţap zawih zawih reng a ni. Mahse Bawihtei ka neih vang hian vawikhat pawh ka la inchhir ngai lo.


Hospital ka thleng a, private ve si ah chuan lian ve thawkhat tak a ni. He hmun hi ka hun tam zawk ka hman na hmun tur a ni a, hrehawm ka tih ka ring lem lo. Lalruatdiki ka ni a, Dikte tiin min ko ţhin. Hnasang tak thawh ka tum ţhin a, Jason ka tawn hma kha chuan lehkha ka zir nasa ţhin. Kan han intawng chiah a, ka zirlaibuah thleng thleng khan a hmel a lo lang a, ka hawina apiangah a hmel ka hmu ti ila a sual lo ber ang. Ka ngaihtuah ngut ngut reng a, bialnu a nei tih ka hriat apiang khan kei tleirawl rilru nem tak kha ka lo ţap leh ţhin. A mizia leh a hmel ah khan sawisel tur ka hre thlawt lo ţhin a ni. A zaidamin min duat thiam thei em em a, mipa dangin ka rilru an luah ngai lova, ka ţhian chauh a ni kha a pawi ta ber a ni a, ka ţhianpa nen a fanu kan nei mai hi a hria apiang ten mak an tih tur a ni.


Ka duty na hmun tur chu hmeichhe awmna bik a ni. A nuam dawn khawpin ka hria. Ka zirpuite kha hmun hran hranah an thawk kual ve a, he hmuna thawk hi an awm ve lo a ni maithei.
"I tlangnel vat mai ang. Maremi ka nia, thla hnih ka thawh ve na chiah" nurse duty chuan alo ti thuai thuai a, ka vawn tur a kut a rawn pharchhuah chu lo vuan chatin nui ver ver chungin kan inchibai a, nelawm ve tak ka hmu hlauh chu ka vannei dawn khawp e.
"Ka hmu che chu ka lawm khawp mai. Hriatloh ka la ngah a, min hrilh zel mai aniang chu"
"Tehreng mai. Midang chanchin a nih loh phawt chuan ka hrilh zel ang che" a ti a, midang nun a inrawlh buai peih vaklo chi a nih hmel bawk a, chu chuan min ti lawm lehzual. Midang chanchin ngaihven a, an tihsual hrethei deuh nih hi ka duhloh zawng a ni ve tho a ni.


Veikual pahin kawngkharah ka dakchhuak zawk a, corridor a lokal phei pahnih ka hmuh chian chuan ka meng kawk a, ka thaw thlengin a buai. Ka awm ka dawm a, ka mit ka lasawn thei si lo. Ka fa neihna pa leh kan inkawm laia a bialnu, a ţhian ringawt ka ni pha ve chung pawh a min thik em em ţhin tu Betty te an ni. Ani chuan ka neihloh zawng zawng a nei vek a, Jason-a thinlung a nei a, a bialnu a ni bawk a, min duh ve viau a ka hriat lai pawh khan a bialnu hi ţhen a tum thu a sawilang ngai lo.


Ti ti bawrh bawrh chungin an rawn nui phei a, an inchhaih fiam vel a ni ber. Jason nen a kan tih ve ziah ţhin dan tho kha a ni. Ka zawn an rawn thlen dawnah ka inher a, hnungchhawn mah ila min kalpelh lai chuan ka ţim ur ur a, ka hnungzangte a za mur mur hial a ni. Engtia rei nge ni tawh? Ka hre lova, dik taka sawi chuan ka hre duhlo a ni zawk. Jason ka hmuh aţang khan hlimna in bul ka ţan a, nitin hian hlim hmel ka pu reng thei ţhin. Mahse ţahna in a tawp ka khar veleh tho. Ka fanu hi awm lo phei sela chuan tun dinhmun hi ka thleng thei hauh lovang.


A sam tih ţhin dan kha ala ngai reng a, a inzuah buk ve tak deuh vang khan a lang upa deuh angin ka hmu. A rei ve tawh em a, a kum a tam ve zel a, chu chuan a ti lang upa tel ve bawk. A mitmengin min la hip reng a, kan intawn hlim ang mai kha ka ni leh tawh.



A bul inţanna chu kan in pelh dawn laia min sut palh ţum kha a ni. A hmanhmawh a, min lo hmulo a, min su nawk a, ka petek nawlh a, lei a tlu lovin amahah ka tlu a, min lo dawm a, khami ni kha ka tlinlung pawh amaha a tluk luh ni a ni a, a nun a ka tluk luh ni a ni. Khalai hmun a ka kal kha tun thlengin ka la inchhir lo.


Amah vang khan ziaktu nih ka chak phah a, kan thawnthu te kha ka ziakchhuak chak ţhin. Amah vek hian thawnthu bu thlengin min ngainat tir a ni. Ka hmuh apiang hian 'ka hmangaih takzet em?' tiin ka inzawt ţhin a, ka chhanna chu 'aw' tih a ni ziah. Ka hmangaih hmasakber a ni a, ani lo hi hmangaih ka la nei leh lo. Kan awmdun ve hunchhung kha reilo viau mahse kan pahnih khan kan hlim ve ve ţhin a ni. Ka hmuh a a hlim der anih pawhin keichu ka hlim tak tak ţhin.


A naupanlai aţanga a tih ţhan anih vangin zirna piah lamah chuan baksetball a ngai na a, inchhung zim takah khan khelh tumin a bei nasa ţhin. Ka nin thu ka sawi ngai lova, a sirah lo ţhuin thawnthu bu ka lo chhiar ţhin. Ka thil chhiar amite in hmangaihna chu ka awt hle ţhin a, ka thil chhiar a changtute kha keimahni a ka lo chan laia kan in melh fuh te hian ka zak ru chem chem ţhin. Kan inkarah a thleng ve dawn si lova, hmangaih ngawih ngawih mah ila ţhian ang bakin min en ve si lova, duhthusam chauh hi ka tih theih tawk a ni.


Kan intawn ve meuh chuan ka lo tlai tawh. Bialnu nghet alo nei hman tawh a, kan in ngainat tlat tho vangin ţhian anga awm reng turin thu kan ti tlu a, kan inhmuh chuan sawitur kan ngah thei hle a, kan nui dun a, ka thinrim changa ka ankhum buan buan pawhin min chhanglet ngai lo. Mipa ţha tak ka tawng kha ka inchhir ngai lo. A thinrim ve theih miah loh vang te khan ka hau hrep ţhin a, a bialnu in a thinrim khum changa a ti let ve ngai miah lo te kha ka huat tawk a tling a, ţawngkam na tak takin ka hau ţhin a, ţawngkam chhe tinreng ka hman pawh khan min hau let ve ngai miah lo. Engtiklai mahin min la thinrim khum ve lo. Ka thinrim tawpkhawk lai te hian alo nui mai zel a, chutiang mihring chu a ni. A fel khawp mai a, a ngilneiin a nun a dam a, a fim kak reng a, engmahin a tibuai zo ve lovin ka hre ţhin. Amah kha a ţha famkimin sawisel bo a ni a, ka duhzia a hria a, bialnu a neireng chung khan min tihnat a hlau em em ţhin.


Amah ka hmuh chiah khan kan thil lo tih tawh te, kan hun hmandan zawng zawngte kha nimin mai a thleng ni awm taka chiangin a rawn lang leh a, nui mah ila ka mittui a rawn hnam a, ka ngai takzet a ni. Ka hmuh chiah khan ka ngaihzia ka hria. Ka ngai lutuk hi min rawn kuah se ka ti ru vawng vawng. Ţhian chauh kan ni a, kan tana ţha tur mi dik tak kan tawng ve ve a, kan intawnna hmun pawh park nuam tak a ni a, kan intawn hunin a zir lo a ni. Midang bialpa alo ni tawh a, ka tan hun ţha a inhawng ve hman lo.


Keimah chauhin thil ei turin ka kal a, midangin min zui ve ka duh lo. Keimah chauha awm a ka rilru kawm melh melh ka chak a ni. Hospital hrang hranga ka duty kual ţhin naah ka zawng ru reng ţhin a, a hmel hmuhtur awm lo leh a hming hriattur pawh awm lo khan min ti lunghnur ţhin anih kha. Reitak ka bihruksan, tlai khawhnu a ka zawn ruk leh reng ni bawk si ka hmuh meuh kha chuan ka va in thunun zo lo teuh em.


"Vawiin chu a khat hneh riau. Nangmah a ţhu awmchhun inia, ka lo zawm ve thei che ngem?" ka dakchhuak a, ka lungphu hi a tawp mai dawn emaw ka ti hman. Jason ngei mai alo ni a, ka dawhkan bawhlai hmaah dingin min lo en chhun run a, ka hmel a hmuh chiah chuan mak a tih ve zia a lang thei. Phalna ka pek hmain ka hmazawnah tak a rawn ţhu thla a, ka kut a vuan nghal chawt bawk. Ka khawng awt a, chhan awm hlei lovin ka thinrim nghal ţun.


"Khawnge i bo daih? Ka zawng nasa che. I college kalna thlengin ka zawng che" a ti a, min rawn melh a, ka hmel a hmuh chuan zam takin chil a lem khawlh a, a hma anga thlemsam leh lungawi hma thei tak kha ka ni tawh lo a ni.
"Ngaihdam ka ngai, ka hria. Exam ka neih lai, zirlaia ka insawrbing laiin i bova, ka duhreng vanga ngaihsak lo che ka nilo" tia a insawithiam lai chuan ka lo melh kar a, dawtsawi hmel a pu lo. Kan inhmuh tawp loh hi chuan phone in kan inbe tam ve ngailo. Zirlai kan nia, kan inhmuh loh hi chuan lehkhazir ang a ti ţhin.


Ka kut ka lasawn a, chhuanlamah "Mi an tam" ka ti daih a, min vuan turin ka duh lo. Beiseina ka nei leh anga, ka beiseina a thlawn leh mai dawn si a.
"I uniform chu i inhmeh khawp mai" a ti a, a nui zui suk a, ka ngaihtuahna a buai em a, inthlak nachang pawh ka lo hre lo a ni.
"Fakna ah ka ngai. Ka lawm e"
"Fakna ni e. Nangchuan i inthuamna apiang i inhmeh zel a" min ti leh a, college ka kal ţan tirh khan a ni chu MBBS zo vek tawh, a sang zawk ti leh tur a coaching kal mek kha a ni a, min ngai naupangchhia thei hle ţhin a, min duat phah ţhin.


"I hlim hmel ka ti Jason, a lawmawm ah ngai ila" ka ti kher a, ka bo hmak vang khan mangang deuh a a awm te ka ring ve a, a bialnu nen hlim taka an inchhaih vel ka hmu leh a, a tan engmah ka ni lova, a hlim viau pawh hi a mak lo. Ngai viau chung hian ka thinrimin ka haw hluah hluah tho si.
"Landan leh chhungril in persan theihzia kan hriat ve ve kha. Engtin nge i awm zui zel? Nurse nih itum ngai lovin ka hria a" a ti a, a thil ei duh a ziak pah a, min rawn en veleh "Ka pe tawh" ka lo ti a. A thil ziah chu a pe veleh a, a hma kha chuan sawitur kan ngahin ţawng hmasatu zawk nih kan inchuh ţhin a, tunah tak hi chuan sawitur ka hre hlawl lo.


"Ka zawhna kha?" a rawn ti leh a, a bula awm hi midang tan chuan ala hahdamthlak reng ang. Keichu ka hah ngawih ngawih tawh a, nuam tihna erawh ka la nei tel tho.
"Ka tum ka thlak a, chuzawng chu a ni mai"
"Pasal inei tawh em?" min ti leh a, ka awmdan chipchiar tak a hriat a chak leh tawh anih hi.
"Nei love. In innei tawh zawk em?"
"La innei lo. Kan la buai ve ve rih a, pasal ineih daih tawh ka lo ring a"
"I ring sual a nih chu" ka ti hmuk a, biak zawm zel ka chakawm loh khawp ang.


Kan eitur chah an rawn dah a, ka soup chah lo thleng chu ka suak a, hawp nghal mai ka tum laiin "Nghak rawh a sa ang" a rawn ti sup a, min ngaihtuah deuh anga a la awm te chu ka huat tawk a tling.
"Ka naupang chhe zawk zawk tawh bik lova, keimahin ka in ngaihtuah thei. A sat leh sat loh pawh ka hria" ka ti leh hmuk hmuk a, alo nui hawk a, chu chuan min ti hrilhhai leh pek.
"Ila ngai reng. Tui deuhin ei rawh aw" min ti a, a nui hmel ka hmuh hian ka thinrimna leh ka kawchhung tawt up up hi a zia huai huai ţhin.


"Betty nen in la inkawp tluang em?" ti a ka zawh chuan a kut min entir a, zungbun ho lam tak nalh tak si hi a lo bun vang a, a kut nalh bawk si nen a inrem thlup mai.
"Kan inhual a,zungbun kan inpe a, chu chu inhualna ah kan ngai mai a" soup sa tak chu ka hawp bawrh bawrh a, ka kawchhung a kang thla riai riai zelin a hriat.
"Lawmpuina thu ka va dawng lo ve" a ti zui a, ka rilru puthmang a hrevek a, hmalam pan tawhah min ngai a ni ngei ang. A fa ngei ka pawm a, hmalam ka pan hleithei si lo. A fanu ka en apiang hian Jason ka hmu ţhin. Hmalam pan chu khawilam, nitin ka hrechhuak ziah zawk. Ka ngaih deuh chang ni phei chuan ka ţap leh ringawt ţhin.


"Ka lawmpui che u" ka ti sep a, ka mittui a tlak pawh a chhuanlam tur atan ka thil ei ah hmarcha ka telh ţeuh a, ka ei chiah chu hmarcha hlang ei ang mai ka ni.
"Kan lawm e. I pum ana ange" a ti a,thil ala ei tlem reng thin anih dawn hi. A plate ruak nawr tawlhin dawhkanah a kiu a nghat a, a kutah a khabe nghat lehin min thlir vang vang a, ka en ve apiangin a nui hmel min lo hmuh tir ţhin. Ka thil ei pahin ka in ngaihtuah lungpuam a, ka ngai em em a, ka hmangaih em em rualin ka haw lutuk bawk si. A bialnu nen hlim taka awmin an inhual hial tawh a, min hmu a min hrechhuak leh chauh a ang.


Ka mittui a tlak veleh ka nui lui vak vak a, mi anglo ka ang viau ang.
"A thak mah mah a ni maw?" alo tih chuan phur hmel takin ka bu nghat nghat a, ka chhungril ka van thup thiam tak em. Tissue paper la in ka hmui vel min hruksak a, hmana a naute ang mai khan ka in ngai thar leh a, midang awm miah lo se, min kuah sela chuan naupang lungchhe tak ang maiin ka ţap hluam hluam thei ang.
"An hmarcha hi a thak lutuk. Ka mit te hi a sen vek em?" ti a ka zawh lai mekin tissue paper dang a la leh a, ka mittui min hruksak a, a hmel a tak run tawh a, zawhna mak tak tak dawn ka in beisei a ni. He hospital a thawh ka thlang hi ka la inchhir zel maithei mahse a bialnu nen a an awmzui zel dan ka hriatchak lutuk vangin ka thawk chhunzawm reng duh dawn thung.


"I ţha chiah maw?" ka rindan chiah a ni. A ngaih ka ti ţhalo tawh.
"Ka ţha e"
"Hau tu che an awm amaw tih mai tur alawm" a ti dam dap a, a landan pa tak leh a mize dam tak si hi inhmeh lo ka ti ţhin. Delhi a ka awm lai kha chuan ka nu leh ka pa leh ka unaupa nihna te hi a nei kawp vekin ka hre ţhin. Ka thlamuanpuiin ka hlimna ber a ni ţhin. Bialnu a nei tih ka hriat hma kha chuan.


"Min hau mahse hau let ve ngam rual ka nih tawh hi. Ka rilru hi a dawihin a nem vak tawh biklo ania" ka ti a, a thak lutuk chu a ruk deuhin ka lo si leh ţhin.
"Hmun khatah kan awm leh tawh a, min mamawhna ineih chuan min hriattir ţhin dawn nia" keiin ka mamawhna aia nasa daihin a fanu in a mamawh zawk a, pa a awt ve em em ţhin. Ka hriattir rualin a hlimna ka laksak a ni ringawt dawn a, chutiang em chu ka ti thei lo.
"Keimahin ka inenkawl ve thei tawh" ka ti ram hmak a, ka awmdan chu mak a ti tih pawh ka hrereng, ka haider mai zawk a ni.


"Ka hria e. Pawi itih loh chuan kan kal mai dawn mi? Tih tur ka la nei nual a" min vengthawng tak chungin a ti a, a ding pah tho. Ka dakchhuak a, en ran chungin "Kal hmasa rawh. Kan kalna tur a inang chuang lo" luhlul chhuahin ka ti leh tho.
"Kan inhmu leh dawn nia" a kal hmain ka darah a rawn vuan zawk a, reilote chiah min khawih ringawt pawh a danglamna ka la nei tlat hi a mak a ni.


Kan thil eina aţangin ka chhuak a, corridor a kal hlawk hlawk pahin "Ka lei ka ti kang nasa lutuk" ka ti pah mawlh mawlh a, kum tam tak hnuah ka hmu leh a, min ngaihsak hmel deuhin ala awm a, a thusawi tam takin min ţhawngin tuar thiamlo mah ila mahni inti na tur ka nilo a sin. Kan inhmuh loh vang vang chhanah te hian thiamlohna a nei lo. Nau ka pai tirh khan ka bo hmak ngei alawm. Hmelhriat hmuh hlau reng rengin ka biru kual reng anih kha. A bialnu ka ni lova, bialnu a neih thu chiang takin min hrilh ţhin. Mahse rinawm zo lovin khati khan min awmpui ta si a, min duhna a neih ka ring tlat ţhin a, vawiin a a bialnu nen ka hmuh hnu kha chuan min duhna a neih ka ring ta lo. An inhual thu thlengin a sawi leh anih kha. Kan pahnih hian hun remchang nei leh ta ila a rinawm lo leh mai angem? A bialnu pawh rinawm lohsan duh chu ka ring tak tak thei tawh lo a ni. Rinawm lohna hi tihpalh ni lovin duhthlanna a ni si a.


"Ţap zo hlim iva ang ve" ti a ka thawhpui Marem in min lo fiam chuan za lo takin ka nui ve a, ka nuihmel lang mahse ka chhungril a rum a, a ţap a, thih daih maite ka chak rum rum. Fanu ka nei a, engkimah ka ngaihtuah tel angai tawh si a ni.
"An hmarcha ka zuam sual deuh a"
"Fimkhur a ngai sin, a changin a thak vak a, a changin a thak lo leh a, keipawh ka eisual tawh a, ka sen nileng tawh lawm" ka dinhmun hre miah lovin alo ti a, ka lei kang nasa tak te chu ka sawi duhlo law law.


Jection lei chawp ngai ka ziak chhuak a, hun reilote ah ka haw thei anga, Bawihtei ka hmu leh thei tawh ang.
"Nachin khan i phone i ken theihnghilh a, a rawn en chang apianga naupang lo lang kha a hmelţha lutuk a" a tih chuan ka hlim ru veng veng a, Bawihtei hi chu ka fa mah nise ka chhuang ve em em ţhin. Hmelţha ti tu hi a kalna apiangah a nei ţhin.
"Iva ti lawmawm ve. Ka mitah hi chuan a ţha reng a, ţha ilo ti ve chu a lawmawm"
"I fanu mi?" ka thilziah lai ka tawp chawt a, pasal neilo a fa nei ka nih vang hian sawi neuh neuh a tam ţhin a, ka chhungte hnenah lehzel pawh naute pa ka sawi duh silo. Sawi neuh neuh pumpelh nan a ka zep chuan Bawihtei ka zahpui ta maiah ka in ngai tlat ţhin. Chuvang chuan Maremi pawh "Aw ka fanu ania" tiin ka chhang a, a hmelţhat thu min hrilh nawn leh bak thildang min zawt zui lo.


"Jason i hrengai em?" ka ti a, ka insum zo ngang lo a ni.
"Hria e. Paediatric Specialist ania, a thiam viau ania, naupang chhawnchhaih a thiam bawk a, an fak nasa. I fanu tan i mamawh deuh mi?" alo ti let a, ngaihţhatlohna dang a nei miah lo chu ka lawm ngawt mai.
"Aw tunah chuan ngai rih lo. Nakin zel atan. Naupang hi chu an hritlan ringawt pawn a manganthlak a" ka ti daih a, an hrechhuak tawp anih loh chuan sawi mai mai ka tum lo.
"Ni ngawt mai. In mamawh hunah in rawn dawn nia, naupangin an ngaina thei lutuk" a ti z*ng vah a, Jason chu naupang enkawl tu bik a lo ni tawh a, a zirchhuah ngei kha ka ring tlat ţhin reng a ni.

Ka duty zawh rualin ka inthlak a, ka fanu ka ngaihtuah chhuak a, a thil min chah pawh ka la lei lo. Apa chanchin min zawh leh hunah dawt ka la hrilh thei angem ka hre tawh lo a ni. Apa nen kan inhnaih leh ta hle a, hospital inang ah kan thawk a, duhlo mah ila ka hmuh zeuh zeuh a ngai tawh dawn a ni.


Ka hmangaih hmasa ber a ni. Hmangaih hmasa ber, thinlunga kumkhuaa hmangaihna bei reng tawh tur. Natna nasa tak min lo thlen tawh pawh nise, mittui nasa tak tlak phah tawh pawh nise la, ka hmangaih hmasa ber hian kumkhuain ka thinlung a chhuahsan tawh lovang.


CONT.... (Zankhat dan zelah ka lo dah anga, ka buai loh chang chuan zan zawn pawn ka dah thei maithei a, ka intiam ngam chiah lo. Ka thawnthu ziah te in lo chhiar duh a, comment leh like min pek ţhin vang hian thinlung takin lawmthu ka sawi mawlh mawlh)

---

NEVER REGRET-2



JASON'S POV


In ka thlen veleh ka pindan ka pan ding a, ka chhungte min koh leh biak na ka ngaihsak lo. Ka nu takngial pawh ka kalpel ve a ni. Engtia rei nge ni tawh? Kum tam a liam tawh a, a bo hmak ni leh kum kha chiang takin ka la hria, ka chhinchhiah a, a rawn lan hun ka nghak reng ţhin. Kan hun hman dun zawng zawng kha nimin mai a thleng ang maiin a la chiang. Ka la chiang.


Ka naupan lai aţangin tupawn chhungkaw sawiselbo ka neih thu min hrilh ţhin. Ka pa doctor ţha leh lar niin hospital lian tham ve tak a nei a, fak a hlawhin damlo kan ngah reng. Ka nu lah mi zawng zawngin fel an tih a ni. Kan upa ber doctor a ni a, ka phirpui lahin a nun thlakin hotel a enkawl a, kan hospital a lun ang chiahin a hotel enkawl lai pawh a lunin mikhual an ngah ţhin. Kan naupang ber lah hi lehkhazir atchilh chawt chi a ni bawk a, ka nauin lehkhabu a chhiar ka hmuh hian Diktei lehkhabu chhiar lai ka mitthla ah a rawn lang ţhin. Kan inchhungah hian ţawngkam vin kan hmang khat hle a, tupawna an fak leh hmuh san kan ni a, ka rualpuiten an awh ve ţhin ka ni. Kan chhungkaw chanchin an hriatin hmeichhe tam takin min ngaihzawn phah a, a tu a mah hi hmeichhia angin ka lo en thei lo. Hei hi em ni khawsak nuam leh sawiselbo chhungkua an tih ţhin? Hausakna leh hmingthanna ka pa aţang tawh a kan lo neih tawh vang hian em ni midangten min awh ţhin? Ka nundan an awt a, keimah ang nih an duh a, keipawh hian a chang chuan anmahni ang nih ka duh ve ţhin.


Doctor nih hi ka thil chak ber a ni ţhin. Ka tleirawl chhuah hlimah hospital ah ka pa ka zui a, khataţang khan doctor nih a, midangte ţanpui a, an nun chhanhimsak kha ka tum ber a ni ta a ni. Tuna ka bialnu hi ka pu ţhianpa tunu a ni. Minister fanu a ni a, ka pi leh puten an tana ka tih theih ţha ber chu Betty ka hnaiha ka awmtir reng hi a nih thu min hrilh ţhin. Ka nu leh pate chunga thleng kha ka chungah a thleng mek a, ka nu leh pa leh kei chauh lo chuan kan hre lo. Ka unaute chuan ka bialnu hi ka duh takzet ah an ngai a, ani aia pawimawh midang an awm tih an hre lo.


A hmelţhain a pian pawh a nalh a, mipa tam takin an thlir zui vawng vawng tur a ni ve. Tupawn inhmeh min ti a, ka hmelţha an tih laiin Betty chu a mawi an ti ţhin. Khuanu samsuih diktakah min ngai a, chutianga min ngaihtheih mai nachhan chu inhmeh min tih vang hi em ni? Kan chhungril inpawh loh zia an hria em? A pawimawh ber hmangaihna ve hi? Ka hmangaih em? Ka hre lo. Reitak kan inkawp tawh a, ka bialnu anihna hi miin an hrelo ang tih hlauin a phi ruai ţhin. Ka tana hmeichhe awmchhun nih a duh vangin ka ţhian ka ti chung pawhin Diktei kha a thik tlat ţhin. Tunah hian kan inkarah hmeichhe dang an awm tawh lovin a ngai a, ka hmeichhe fawh hmasak berah a in ngai a, amah aia engkim a hmasa zawk vek hmeichhia a awm tih a hre lo.


Diktei, ala mawiin a landanin pawi ala sawi lo reng. Ka hmuh tirh khan ka thinlung hian min thlawhchhuahsan mai dawn emaw tih tur khawpin a phu rang a, midang awm ve lo sela chuan a phu ri kha a hrepha hial ta ve ang. Vanneihthlak zetin ka in thunun thei hlauh. A mawina hi hmeichhe dang nen ka tehkhin ve ngai lo. Tehkhin rual a ni lo a ni. A mit khan ka thinlung leh thlarau thlengin a entlang vek thei a, a nui hmel hi ka ngaihsak lo lui thei lova, ka thinlung a dek bik zar ţhin. A hmui, englai pawh a ka fawh chak ţhin leh ka fawh tawh chuan hun tih din mai ka duh phahna ţhin te kha.


Kan intawn hmasakber kha chiang takin ka la hria. Ka hmanhmawh vangin ka su chawrh a, keimah vangin na takin a inhliam lo chauh a ni. A tlu tur man ka tumna lamah ka inchhuih a, keimah zawk leiah tluin ka chungah ka pawmbet a, a hlauh a reh hnu khan a rawn mengchhuak a, kan mit a in tawng a, reitak kan in en a. Kan lungphu a rang dunin kan awm te chu a na vek thei hial ang. Khami ni kha ka thinlung min ruksak ni a ni a, tun thleng hian min la pe let leh lo. Amah leh kan hun hmandun tawh te ngaihtuah a ka nuih ţhin lai hian chhungril aţanga na ka la nei tel a ni.


Ka pi leh pute duhber ka kawp chunga Diktei ka kalsan theilo kha duham ka in ti. Kha kan awmdun hun chhung tawite aia tam daih kha a kianga hun hman ka duh. Kan ti ti reng ţhin a, ho mai mai a sawi pawhin uluk takin ka ngaithla ţhin. Kan nuidun a, hmun reh taka kan pahnih chauha nuih vak vak te kan hrat a, min vin vak vak ţhin bawk. Ka chunga a thinrim chang hian chhanglet lovin ka nui mai ţhin a, a chhan tak chu englai pawh a a dik zawk anih reng vang a ni. Hmeichhia chuan diklo zawk nih an duh lo. A thinrim hmel te, a hmui a ti pawrh lui ţhin lai te kha hmuhnuam ka ti ţhin a, a thinrim chang apiangin a biang a sen hlar a, ka awmhnaih chang apiangin zah vangin a sen lehzual ţhin. A duhawm a, a luhlulin ka tana sawiselna tur awmlo hmeichhia a ni. Lehkhabu ka leisak ţeuh ţhin a, inhmangaihte chanchin inziahna bu ka hmuh tawh phawt chuan ka leisak ngei ngei. Basketball hi hmuhnawm ti lovin a khelh dan kalhmang hrethiam miah lo mahse ka khel lai kha chu a rukin hmuhnawm a ti tho ţhin. Inhnaih tak chungin kan inhlat a, inmil tak chungin inmil lohna a awm bawk. Kan inkar kha a hnawk nuaih a, hnawk tak chung khan siamţhat tur lai ka hre der lo.


Hun a liam tam pauh leh kan thinlung inpawhna kha a khauh a, ţhian chauh kan nihna kha in awihtir kan tum tlat a, mahse thudik a ni em? Ţhian chiah kan nih loh zia kan hre ve ve a, kan sawichhuak miahlo ve ve thung a, ţhian kan nihna kha kan inhrilh nawn tlut tlut mai ţhin. Hmeichhe pakhat bialpa ka ni a, kan tina tur a nilo tiin min hrilh nawn tlut tlut ţhin a, dikna chen a nei chungin rinawmloh kha ka thlang a ni. In hlat kan tum a, keimahni ve ve in thunun kan tum a, thununtu dang kan nei tawh tih kan hrelo a ni.


Exam ka nei a, ka tana exam pawimawh ber a ni. Ka hmu hman rih lova, ka be hman rih lo tih nen lam ka hrilh a, min lo nghah tur thu a sawi. 'Ka ţawngţaipui che anga, i zawh hun thleng ka nghak che ang a, i tih ţhat viau chuan eitur min leisak ang' a thil sawi hi ka bengah a ri nawn tlut tlut a, a ti ţha zawkin eitur ka chawi zawk dawn vanga ka nuihna te kha. Mahse exam ka zawh chuan hmuh tur a awm tawh lo. Ka be tlang thei lova, an ţhianho a in an inluah ţawmah a awm ve tawh lova, a ţhianten zing an thawh hlimah a thawmhnaw zawng zawng nen alo bo vek thu min lo hrilh. An college ah kalin hnamdang a kawm ţhin zawng zawng ka zawt kual a, khawlum hnuaiah kan kal dunna ţhin zawng zawngah kalin ka enkual a, lehkhabu zawrhna zawng zawng ka enchhuak vek bawk. Ni tam tak ka zawng a, a reh hmak mai si. Min kalsan a, chhuichhuah theih miah lohin a bo a, khata ţang khan keimah ka ni thei tawh lova, englai pawn keimahah kim lo a awm tawh. A bo rual khan ka thinlung a bo pui a, khingbai zetin ka la awm reng a nih hi. A nunrawnthlak takzet.


Ka kiangah Betty a awm reng a, a bula awm nuam ka ti a, a thikthu a chhia tih lohah chuan sawiselna ka nei lo. Ka hmangaih theih loh vang hian ka inthlahrung a, hmangaihna hi nawrluih leh duh duh pek theih a ni si lova. Kum tam tak liam tawh mahse Delhi ka kal apiangin ka zawng ru reng ţhin. Lehkhabu zawrhna ka kalpelh apiangin chik takin ka la en ţhin. Kan inhriat hunchhung a reiloh vang khan thil tam tak kan inhrilh hman lova, mizoram lama kan awmna kha kan inhrilh loh lian tak a ni.


Tunah ka hmu leh tawh a, alo upat hmel ve ta deuh. Kan inhualna zungbun ka hmuh tir laia a danglamna kha ka hmu a, ka khawngaih kher mai. A luhlul zia ka sawi tawh. Midang pasal hual ka nihna a hre leh tawh. Midang tihnat ai chuan amaha na tawrh a thlang leh dawn a ni. Mahni in hmangaih ve lo ang mai hian a awm ţhin a, luhlul tak ni chunga a inngaihtlawmna te kha ka duhna a ni ţhin. A engkim ka duh a, a bo vang vang lai pawh khan min hip bet tlat tho a ni.


"Betty a lokal"
"A muhil tiin hrilh mai rawh" tiin ka nu chu ka lo chhang. Hmuh chakna ka nei rih lo. Diktei hmuh leh thuai thuai a, a biakpawh theihna neih te ka duh zawk mah.
"I awmdan a dik miah lo. Buaina ineih chuan min hrilh thei ang"
"Ka nei a, ka sawichak tlat lo. Keimaha awm ka duh" ka lo ti hmuk a, ka rilru a buai hi chuan tumah ka mamawh lo. Kha hmeichhia bawk kha a ni harsatna ka tawh chang pawh a ka kianga awm tur a ka duh chu.


"Chaw ei ve nghal a tumin ka hria"
"Ka eichak lova, ka ei ai lo ei rawh se" ti a ka hrilh hnuah bathroom ah ka luhsan a, kum tam tak ka zawn kha a rawn inlar a, min hnaih takah a awm leh tawh. Ka hmuhdan diktak leh ka hmangaihzia hrilh ka chak ţhin a, mahse a rem ve lo. Awmdun ve thei miah lo tur kan lo inhria kha a pawi a ni.



A duty lai hi nitin ka en ru ziah ţhin. Karkhat lai chu a rukin ka thlir ţhin a, a biakpawhna ka la dil ngam lova, biak ka tum lahin min be ţha duh tawh lo. Hun reilote min pe tur a ka dil pawhin a buai thu chiahin min chhang a, chelh hman loh khawpa rangin min kalsan leh ţhin.


Damlo ka en zawh a thil ei tura kal nghal mai ka tum laiin hmeichhe naupang thlaphan hmel taka hawikual ruai ka hmu a, a hritlan vanga an rawn entir ve kha a ni. Damlote hi ka chhinchhiah thlap thlap ngai lova, he naupang hi chu chhinchhiah a awl riau.


"Bawihte tunge i zawn a? Khawnge inu leh pate?" ka tih chuan ka lam a rawn hawi vat a, "Engtin nge ka hming i hriat?" a ti ta reuh a. Nuih pahin ka ţhuhniam a, naupang koh duat nan a ka hman ţhin kha a hming alo ni reng anih dawn hi.
"Thil ka hrethei alawm. Khawnge inu leh pate?" ka ti nawn leh a, mihring awm an awm tawh mang lova, a chhungte chuan an zawng ve khawp ang.


"Api ka nghak a, thil min leisak dawn a, a rei sia" a ti sep a, a ngui nghiai a, kun lap chungin a thaw halh a, a kut ţang khalh niap niap pahin a hmui hnuailam a ti pawrh deuh a, a lawmawm takzet a ni.
"Ka lo nghahpui dawn che nia, ipi chu hetah a lokal leh dawn tih i chiang amaw?"
"Aw lokal dawn e. Apu doctor kha ini tiraw?" min ti a, min koh dan avanga mak ti a ka men kawk hnuah insiamţha leh vatin ka nuichhuak ta hawk a. Ka lo upa ve ta a nia nge.


"Ka putar tawh viau a mi? Min pu lo la, engtin nge min koh ang aw" ka ti vang vang a, ani pawh chunglam melhin a inngaihtuah ve nasa kher mai.
"Doctor ka ti mai ang che" fiah leh fim takin a rawn ti a, pu a tel loh phawt chuan ka pawm vek mai e.
"Awle. I doctor ka lo ni ange" ka tih lai mekin "Bawihte" tih ri kan hria a, rawn kal puitu nu upa tawh lam kha a rawn lang a, min hmuh chuan mak a tih hmel.


"Mi an tlem tawh sia, a lo mangang deuh a, kan lo inkawm a" ka ti a, Bawihtei en pahin ka nui a, min lo nuih ve sen sen.
"Ka lawm e. Damdawi ka leinghal a, duh aiin ka rei ta deuh a"
"Ka kalsan ang che u. Lo dam tawh rawh aw Bawihte" ka ti leh a, a ban a vei lauh lauh a, naupang lawmawm ve tak a nih dawn kha. A bula awm a nuam riau.


"Inu ka hmu pah lawk a"
"Anu bulah chuan ka kal ve duh"
"A buai a, bakah i hritlan belh ang. Damlo tam deuh a buaipui a, nakinah i damchian hunah ila zui ve dawnnia" ka hawilet leh a, api nen chuan an la inthlem. Kan awmna reh ruih tawhah chuan an ţawng chu a ring a, anu chu he hospital a doctor anih loh pawhin nurse emaw a nih ka ring thiam. Tu pawh chu lo ni sela fanu duhawm tak a nei a, a vannei khawp mai.



DIKTEI POV


"Vawiin aţangin school in kal leh tawh sia, eng nge in zir a" ka ti a, chhun a ka duty hi chuan zanah ka mutpui hma a, ka titi pui ţhin.
"Nu khawnge apa hi?" a tih chuan ka ţang nghal ţeuh a, a zawhna min zawh chu ka beisei loh berte zing ami a ni. A kut tereuhte a vawnsak pahin "Ngatinge ipa awmna min zawh deuh thut?" ka ti a, ka ban pakhata inbeng kangin a hmel chiang zawkin ka en a.


Zawite a thawk a lak halh hnuah "Miss in in pa te awmdan ziak rawh u a tia, ka ziakthiam lo a, min hau a" a tih chuan ka na nghal vawng vawng a, a la tawn zel tur a ni a, naupangte chauh ala ni bawk a, chutiang ziahtir an tum chu mak ka ti hle mai.
"Nu ngatinge apa hi min hmu tur a alokal loh? Min duh ve lo ami? Thu ka awih ţhin sia, min hmu duh lo a" a ti nang nang a, hriatchian zel a chak a, thudik hrilhna hun ţha tak a ni.


Ka fanu ka en a, ka lainat lutuk chu ka mittui a rawn hnam a, ka ţawngchhuak thei lawk lo chuan ka hmui ka pet fan fan a, min lo en kiau a, ka chhanna tur chu dawhthei takin a lo nghak a. Pa tello a fa pawmte hian hetiang harsatna hi an tawng ve angem ka hre lova, an tawng ve anih chuan ka dinhmun khirh zia min hriattiam pui ber tu tur te an ni.
"Ka tihpalh a ni" tih sep pahin nghet takin ka kuah bet a, ka mittui a rawn luan takah chuan lehlam hawiin ka hru hul vat vat a, chhel tak anga awm ka duh a, nu chak tak a nei tih hria se ka duh vangin a hmuh laia ka mittui tih tlak ka duh lo.
"Hmu tur che a ipa a rawnkal loh chhan chu a ngaih loh vang che leh a hmangaih loh vang che a ni lova, i awm ve tih a hriat loh vang a ni" ka ti a, a sam ka tuai pah hauh hauh a, a mut a chhuak ţan a, a menglui hram hram a.


"Ka thiamloh vek zawk ania, hlauh ka ngah luatah hma ka sial a, ipa chuan englai pawha min puih a duh ţhin a, thil engkim hi hria sela chuan min pui ngei pawn ka ring. Mahse engkim ka zep a, ka thukru che a ni" ka ti leh a, a puitlin huna a hriat chuan min hua anga, tun hun hi engkim hrilhna hun a ni. Ka fanuin min huat ka duh lova, tunah hian hrevek sela, nakinah a pawmthiam zawk ang.
"Ipa chu miţha tak ania, hma hun eng tak a nei bawk a, nang leh kei hi a tana hnawksak leh a phur ti rittu mai kan nih ka hlau a, duhthlanna dang ka nei biklo a, ka bihrukpui ta ringawt che a ni. Kan that zawkna tur a ka tih a ni. Kan vaia kan hlim theih nan" ti a ka hrilh chuan a nguai lutuk pawh a reh a, ka fanu hi keimah ang bawk a midangte hlimna siam nuam ti chi a ni.
"Apa in min hre lo a, min hria se chuan min duat ang tiraw?" beiseina sang tak nei chungin min zawt a, chhungril rit tak chungin ka fanu hmuh turin ka nui lui a.
"Tehreng mai. I awm ve tih a hriat chuan a hmangaih che anga, a duat bawk ang che" ka lo ti vat a, a thaw huai a, a rilru a nuam ta a ni ngei ang.


A teddy bear let nghat chu la in a kuah a, "Apa anih hi" a tih chuan ka lo nui leh a, diktak chuan ţah vak vak a, inpaih thawl hawk ka chak ber.
"Lungngai suh bawihte. Ipa chu kan bulah awm lo mahse inu hian ka hmangaih ber tho che a, ipa chuan a hrelo che a, mahse nangchuan pa inei tih i hria a, kan ngaih chang apiangin amah kan ngaihtuah ţhin anga, awm ho lo mah ila kan thinlunga a awm chuan a tawk a ni mai tiraw?" ti a ka zawh chuan mit chhing chungin a bu nghat nghat a, a ham zui bai bai a, ka zawhna kha a hrethiam kher pawhin ka ring lo. A hnungah ka chul a, a teddy bear kuah chung rengin a muhil a, fanu duhawm tak a nei tih hria sela chuan a hlim ve dawn mange, anih loh pawhin a lo pawm duhlo maithei. A chhe lam hlir ka ngaihtuah a, hlauhna ka neih phah ţhin.


Min fiam reng ţhin a, min chhaih thinrim a, kan thu a inhmuh lohin a ngawi zawkah a ţang a, ka phun char char pawh nui chungin alo ngaithla reng ţhin. A thiam naah pawh thiamlo zawkah ka puh ţhin a, a thiam zawk tih inhre reng chungin a thiamloh a nih thu a sawi ţhin. A fel em a, a kianga ka awm chuan ka hahdam em em ţhin a, chuti chung chuan kan awmdun ve thei si lo a ni.


Phur lo takin hna ka kal a, ka fanu in zawhna min zawhte kha ka ngaihtuahna aţangin ka la paihchhuak thei lo. Zik mar al al paha ka ham bai bai laiin ka hriat ţhan tak nui ri ka hria a, ka thiltih lai ka tawp chawt a, thawm lo chhuahna lamah chuan ka in her vut. Ka hmuh apiang hian a thar var reng zel mai.
"I mut ala chhuak awm bai bai hle mai. I in zawk duh chuan ka pe phal che" a coffee kenlai a leng kang zawk a, ngaipawimawh lo takin ka hmui hnuailam ka ti pawrh a, he ka thil chin ţhan hi ka bansan hleithei lo.


"Duhlo nge duh?"
"Ka duh chuan ka lei ve mai ang" ka ti a, ka awmdan mawilo tak vang hian tupawn min hrethiam mai rawh se. Ka neih theih loh tur hi hnaih ka duh tawh lo. A hriat miah lohin thuruk ka nei lehnghal.
"An hralh zo vek tawh"
"Ka in peih vak chuang lova, pawi loh tawp chu" ka awmdan naupangchhia tak chu ka zahpui zawk.
"Chhunah eitur ka lei ang che, iduh chuan"
"Ka duhlo haw hma ka duh zawk" ka bul hnaihah a rawn ding a, ka be ţha duhlo chung pawhin min tih tlangnel leh phet a tumna hi a bansan duh chuang lo.


"Min kalsan nachhan ka hriat hma chu min ning mahla ka zui zel thovang che" tumruh taka a tih chuan ka lo ner suk a, ka nat zat ve pawh na ve lo hian chhanna hmuh ala in beisei ngam ania, a fanu hi a rawn hriatchhuah ka hlau lutuk tawh. Mi â a ni lova, in lam thlenga min umzui a hriatchhuah a neih ka hlau a ni.


"Ka ţhatna turin ka kal bo. I kianga ka awmreng khan hmasawnna ka nei dawnlo tih kha ka hrechhuak a, ka tan a ţha tur ka um ve ta lawm lawm mai anih kha. Ka kalsan nachhan che i hre ta bawk a, min umzui tawh suh" a hmel ka enloh theih nan phone ka phawrh a, ka hmet eng chiah tihah rang zetin ka phone min rawn phihthlaksak. Ka kal lohna lam turah a kalpui hmawk hmawk a, ka umzui vat. A zawn ka thlen chuan ka tlai tawh. Ka phone aţangin a in call a, ka duhloh dan berin ka phone number a nei ta anih hi. Inzawmna neih leh ka duh tawh loh zia ka sawi ngun tawh. Hmanah chuan ka thusawi te ngaithlain a zawm ţhin a, hun a liam a,thil tam tak a danglam rualin Jason pawh a danglam ve zel a ang. A zaidamin ala dawhthei reng em ti a ka in zawhna erawh chhanna ka la in pe thei rih lo.


"Hei hmana mi kha" nui vur vur chungin hmana ka number ţhin uangthuang taka Boss ti a a dah ţhin kha min hmuh tir a, ka hmuh lai renga paihin ka phone number a neih thar tak chu hming ngai chiahin a dah thar ve thung. A phone hmanlai thlak reng chungin ka phone number a dah thar ve zel anih hmel. Chutianga a tih chhan chu amah chauhin a hria ang. Hna ka ţan a hun dawn tawh a, hetianga a kianga ka la awmreng chhan pawh hi ka hre love.


Kalsan tuma ka inher laiin "Ka ngai ţhin che" a ti sup a, ka hawilet leh rang kher mai. Chiang taka kan in en veleh "Ka sawi awmzia chu, ka ngaih ve theihna tur che in hun ţha a awm angem?" a ti ţha leh a, eng hun ţha mah siamsak ka tum lo.
"Min hrelo ang hmakin awm la ka duh ber. Inzawmna kanneih ve ţhin zawng zawngte tih tawp tuma kal bo ka ni. Kan inţhianna thleng khan" chiang taka ka sawi lai chuan a hnual ve rawih niin a lang. Ka luhlul leh thuduh zia hrechiangtu a ni. Min umzui reng a tum chhunzawm tawh lovang.


"Ka hriatna hi a ţha riau ania, mi ka theihnghilh mang ngai lo" ala ti ţalh a, ka beidawng chu ka lo nui tawp. Ka inhnaih tir leh chuan kei chauh nilo midang pawh an nat belh ang a, chutiang em chu thleng turin ka duh lo. A nupui hual Betty khan hria phei sela chuan Aizawl zimte ah hian min chhuichhuak rang dawn lutuk. Buaina ka neih chuan Bawihtei a tel ve zel tawh dawn a, a theih anga ranga tih tawp ka duh ber.


Min rawn dinhnaih lehzual lai chuan ka lo zam leh hman pek a, min si deuhthaw a a rawn din lai chuan a perfume duh leh hman ţhan tak rim chu ka hnarin a lo la hai lo. A duhzawng a lo la thlak lo tihna a ni.
"Min lawm lo viau mahla i rawn inlan leh avangin ka lawm e" kan in awmhnaih viau chung pawh a buai ve lo ni awm taka thil a sawi leh thei te chu ka hua. Ka hlimna ni ţhinah hian huat tur ka lo va ngah ta em.


Min kalpelh dawn pahin midang hriat mang loh tur khawpa rangin min kuah zawk a, chutiang a a ti te chu ka hua. Umzui a, kuah reng ka chak phah a, hlimna leh natna min neih tir tu a ni a, ka huatna aiin ka hmangaihna ala lian zawk daih. Amah vang hian ka nun hi a buai nuaih nuaih a, chuti chung chuan kan lo intawng hi ka la inchhir der lo. Mahni nawmna pawh ngaihtuah hleithei lo khawpa hmangaihnain a tih at te hming an sawi lan chang chuan ka hming hi an sawi langsar pawl a ni ngei ang.


Hmangaihna hi chu a hnawk nuaih reng a, mahse inhmangaih tawn kan tum a ngai tho si. A changin kan thinlung a kehchhe vek a, a changin hlimna nasa tak min thlen a, thinlung kehchhiatna hian thil ţha pakhat entir a nei ve, thil engemaw tih tumin kan bei ve tihna a ni. Keipawn ka bei a, tunah kehchhe mah ila engtik niah emaw chuan ka lo kehchhiat tawhna hi ţangkai taka ka hman zui theih ka beisei.


CONT...(A hma khan ka sawichiang tawh a, zankhat dan zelah ka dah ang)

---

NEVER REGRET-3



"Tlai lamah chiah tiraw i kal dawn?" ka pindan a inthlahrung deka Sandra lo lut chu ka thil chhiarlai dah meuhin ka lo en a, a pasal nen an inţhen vangin in lamah a rawn haw a ni.
"Ni e. Vawiin chu in entir ni a ni lova, ka lo hmanhmawh lem lova"
"Cathy school bang i hruai hman angem? Vawiin ka buai ni a ni ve thung a" a ti a, Catharine, a fanu hi Cathy kan ti mai ţhin. Kum7 a ni ve tawh a, a hmelţhain a duhawm takzet a ni.


"Hruai hman e. Rawn ngaihtuah lo mai rawh" ka tih chuan a thaw huai a, pasal nei rawn let leh anih vang hian kawng tam takah a inthlahrung a, mahni in ngei a inthlahrung taka awm chu ţul ka ti lo khawp mai.
"A lawmawm ngawt ang. Ka nu pawn a hreh lo nang a nuam ka ti chiah lova"
"Awle. Keiman ka lo hruai ang" ka ti nawn leh a. Rilru nuam deuhin a kal tak kha.


Keimaha ka awm leh hnu chuan Diktei bawk ka ngaihtuahnaah a rawn lut leh. Ka hmuh hnuhnun ber ni kha. Kum tam tak a liam leh hnu pawh hian a hmel ngui nghiai kha ka la theihnghilh lo. Exam ka neih dawn thu ka sawi kha chuan min lo nghah tur thu kha phur takin min hrilh a, kan awmdun zui reng a, min nghah tur thu a sawi bak kha thildang a sawitam tawh lo. Lehkhabu min chhiarsan a, a thil chhiarlaiah a rilru a pek lohzia erawh ka hmu chiang.


Keimah vang a ni. A hlimloh nachhan leh thawm nei miah lova a bo nachhan kha. Hmangaih viau chung khan hlimna ka thlensak thei tlat lo. Ka pi leh pute hmeichhe duhtak bulah ka awm angai a, ka bialnu anga ka lantir angai a, Diktei nen a kan inkar thup ka tumna lamah khan hrehawm a tuar ve tih ka lo hre lova, ka hmasial luatah hmeichhe pahnih ka tina a ni.


Cathy hruai turin ka chhuak a, an ban hun anih hmain school bulah ka awm tawh. Nutling tam tak an fate nghak ve ho chuan min en hrek hrek a, ka vawikhat kalna a ni. Bell a ri ral ral a, naupang thawm riin a zui a, rei pawh kan nghah hmain an rawn tlanchhuak ţak ţak a, an nu te ţheuh an hmuh chuan an hlim khawp mai. Naupanlai ka ngai thar riau. Ka nu kianga ka awm khan ka hlimin ka lungawi a, tunah erawh engkim a danglam zo ta a ni.


"Apute" Cathy aw ka hriat rualin ka bul a rawn thleng chawpchilh nghal. A bag ka laksak a, a rawnchhuak har pawl anih ngei dawn hi. Ka nau nghahpui ho pawh an fate nen an kaldarh zo tawh.
"Iva rei bik ve" ka ti a, min chhan hmain tui bottle a rawn lir a, Cathy in "Ruatfeli" a tih laiin keiin bottle rawn lir chu ka lo chhar a, kan buai khawp mai.


Bottle keng chunga ka hawilet veleh naupang leia lo la bawk reng ka hmu a, ka thil kenlai pawh hi a bottle ni awm tak a ni. Cathy a kun khut khut laiin rang takin ka kaitho a, ka hmuh hnu a ni tlat.
"Doctor" min lo ti a, a ţap pur lehnghal. A biang a sen hlar a, a kut a bal kai chu a pawnfen ah a tat zui a.


"Ana em? Bawihte" ti a zawh pahin ka bengfai a, muangchangin lu a bu nghat nghat a, ka ţhu hniam a, a pawnfen tlang ka tihfai laiin a khup aţanga thi rawn chhuak ka hmufuh a, ka pawm nawlh a, kan piaha lungremah ka ţhutpui.
"Khawnge i nu leh pate?" hospital a ka hmuh laia ka zawhna ang tho a ni. Mahni chauh a haw rual ala ni lova, an kalsan leh ta em ni?
"Api in min lo hruai ţhin" a ti a, a khup aţanga thi chhuak khawih mai a tum chu lo phal lovin "Sawlai lawkah sawn damdawi dawr a awm a, hetah hian Cathy nen lo awm ula, damdawi ka lei anga kan hnawih dawn nia" tiin ka hrilh a. A mangan lai ka tawng fuh thei riau.
"Doctor ana dawn em?"
"Ana thei lo chi ka va zawng ange aw. Cathy i ţhiannu kha lo awmpui reng rawh aw" ti a ka hrilh leh hnuah ka kal lama damdawi zawrhna ka hmuhna lamah ka let leh. Ka hna ka tlai phah em lo ang chu maw.


A hla lem lo bawk a, ka thleng thuai a, lapua leh a tuamna tur ka lei tel a, ka let leh vang vang. Hun rei tak chhung naupang damlo ka lo enkawl tawh chung hian an na tuar hi hmuh hrehawm ka la ti reng. Rilru thianghlim leh pawisawi lo takin na an tawrh hi chuan kan lo na ve ni maia hriatna te a awm ţhin.


Cathy nen lungrem chunga ka ţhut tir naah lo la ţhu rengin an ke an then lauh lauh a, Bawihtei chuan a ke na lam chu a then ve ngam lo ni awm tak a ni. A pilh nasa lem lova, thi a chhuah belh tawh lo.
"Ipi a lo la thleng lo a ni maw?"
"Aw kan in a hla a" a ti ve mai a. Cathy ai chuan a fin hmel deuh. Ţhuthniam leh pahin a ke ka vuan a, thisen chhuak sa ka hrufai thuak thuak a, damdawi ka hnawih leh dawn lai chuan ka kut a lo vuan.
"Ana thei lo chi anih hi. I hlauh chuan Cathy kha vuan tlat la, ana miah lo ang" tiin ka thlamuan a, a kak thuk lem lova, a na kher lovang.


Cathy nen an inkai a, chuveleh damdawi ka hnawihsak a, ka hnawih lai velin a hmel ka en a, na a tilo tih hriat takin min lo nuih ver ver a, Cathy zawkin alo hlau a nih hmel.
"A zo tawh e. I huai hle mai"
"Na ka ti miah lo" a ti a, a intithei khawp mai.
"Ipi phone number i hria em?"
"Aih. A lokal ngei ngei dawn lawm" tih pahin ice cream zuar min rawn kalpel mek tu chu a enzui a, min kalpelin kan piah deuhah a ţhu a, naupang tan chuan a itawm bawk a ni. Kan naupanlai khan ka pa in min rawn hruai apiangin min leisak ţhin a, pink a tel zel vang khan ka unaupa khan a duh ve ngai lova, a ei ai ka ei vek ţhin. Diktei nen khan kan ei reng ţhin bawk a, phai khawlumah kan awm a, kan lenchhuah apiangin kan ei ziah a, a thinrim thlem nan a ţangkai bawk.


"Ka pu kan lo dawr ang che" ti a ka koh chuan hrilh nawn ngai lovin kan bulah a rawn insawn phei a, "Pahnih aw. Cathy leh Bawihtei tan hian" ka ti a, a siam phur khawp mai.
"Doctor ka enlai i hmu mi?" a ti leh reuh a.
"Hmu e. I eichak tih kha ka hrevek a, i eichhungin ipi pawh a lo thleng mai ang" ka sana bunlai ka bih zawk a, ka la insiam lova, ka let leh vat loh chuan ka tlai ang. Hetiang lai hmuna naupang han kalsan ngawt lah thil tih chi a ni si lova, a sawi anga an veng a hlat phei chuan a ngaihtuahawm riau.


Ice cream an ei laiin hmanni a ka hmuh nu upa tawh lam kha a rawn thleng a, an veng a hlat thu leh traffic jam ah a tan thu a rawn sawi a, "Ilo awmpui a, ka lawm lutuk" a ti bawk a, ice cream an ei zawh hun kan nghak a, ka tlai deuh tawh vangin ka thlah ta lo. A pi in a kai a, an kaldun hnak hnak a, an liam hma zawng a ban a rawn vai a, an kal liam hnuah Cathy ka hawpui veleh nghal. Haw kawng tluanin a ti ti a, Bawihtei nen khan an ţhudun a, an inkawm char char ţhin thu te a sawi a, Cathy hi a nu ang maia inthlahrung leh zakzum chi a ni a, ţhian a nei ve hlauh chu thil mak anih rualin a lawmawm.




DIKTEI POV


Chawhnu lama ka duty hun a ni tawh a, tihtur dang ka neih bawk vangin Bawihtei school bang pawh ka nghak chhuak hman lo. Bus in duty turin ka kal a, hospital ka thlen chuan ka tlai deuh vangin ka kal hlawk hlawk a, ka sana bunlai ka bih chhen bawk.


Ka duty na hmun ka thlen hma deuhin ka hmuh duh loh ber ka hmu lehnghal. Betty nen kan intawk a, kan inhmuh thut vangin mak a tih hmel ve deuh. Kal leh mai ka tum laiin ka hmazawnah kuangkuahin a ding a, ngeiawm tawk lekin a thle ha bawk.
"Kan va inhnaih leh ta ve" min ti a, a mitmeng a huatna awm chu ka hmuh hmaih lo. Min huatna ala reh miah lo a ni ngei ang.


"I dam ţhin maw?"
"Jason nen in in hmu tawh em?" a ti a, henu nen hian ţha deuha inbiak lai kan nei ngai lo.
"Hmu e"
"Kan inhual tawh thu a hrilh che em?" tih pahin a zungbun bunlai chu ka hmuh turin a rawn dah kher a, min thikna hi a reh thei meuh lo.
"Hrilh lo. Kan inhmuh apiangin ka chanchin ringawt min sawipui a" dawt ka sawi. An inhual thu ka hre daih tawh. Ka chunga ţhat chhuah ngailo tu lakah hian ţhat chhuah ka tum bik vak lo. Tihnat ka duh loh vangin Jason ka kalsan a, lawm nachang a hre chuang lo.


"Thil sual rapthlak ti nei niawm taka bo daih te chu a chanchin hriatchian a chakawm a lawm le" ka thusawi pawiti miahlo angin a awm lui a, ka thusawiin a tihbuai nasat turzia erawh ka hria.
"Ka chanchin hriatchian tum lovin hlim tak khan awm zawk teh u"
"Tehreng mai. I tello a awm leh i chanchin hre miah lova awm chu a nuam khawp mai. Tereuhte chhan ho deuh deuh vanga ţap nghal pur ţhin kha chu a ninawm hrim hrim" induh tawk tak chungin a nui zui sak a, kan upat deuh tawh hnu hian a hlauhawm lehzual tawh zawk anih hi.


"Min hrethiam la ka tlai dawn tlat" ka ti ta daih a, henu hmachhawn reng hi ka peih reng reng lo. Chesawn eih lovin hmusit takin min la melh ran a, keimah zawkin kalpelin ka su lui kher nghe nghe. Ka sut lai chuan a nui hak a, buaina siamzui lo mahse buaina a siam zel ang. Min hmuh apiangin ka tana ngaihthlak nuam lo tak tak a sawi leh anga, ka hmuh laiin Jason a kuah leh vel ang a, min runlui reng rengin hun a hmang leh ngei ang. Chutiang a tih loh chuan Betty a ni nang.


"Kan hna hi chu tlemte pawha tlai chi a nilo asin" ka inthlak hma hawtin Maremi pawn min lo khak zeuh. Vanduaina ka tawh hian a in la lawn kual vek thei. Hman aţanga anih dan ve hrim hrim.
"A hun hmain ka rawn thleng a, tih khawtlai ka nih vang mai mai"
"Mimal thil chu duty loh hun atan dah tawh la a ţha ang" sawrkar damdawiin zawka ka thawh lai pawn ka duty puite hetiang em em hian an khirh ngai lo. Nidangah pawh hian min khak fek fek a hrat hrim hrim a, thinlung takin ka pawh theihloh phah. A changin a fel em em a, min ti ti pui bawrh bawrh a, a chang leh a khirh leh em em a, kawmdan tur ka hre chiah lo. Ka inthlak sawk sawk a, Maremi kiangah bawk ka let leh a, ngawi ngal chungin a tih tur a ti mial mial. Ka enreng chuan min hauh leh ka hlauh vangin tih tur dang ka zawng ţhin a, a chang chuan a vang thei khawp mai. Damlo ven tawp ngai kan nei lova, kut awl hun a awm lo thei lo a ni.


Kan hman veleh "Thil kan lei lawk" ka ti a, chhuanlam siamin ka chhuah tur thu ka hrilh a ni.
"Awle, nia ei ţeuh ţeuh rawh i cher riau" tih pahin min thleng vang vang a, tunah hian ka nu ang maia a awm leh tawh hi.
"Tehreng mai" ka ti a, ka inher zui hmak. Dawrah pawh kal lovin ward pahnih inkara ţhutna an siamna lam chu ka pan daih a, damlohna nei miah silo hian ka awm hi a tawt up up reng a, engahmah rilru ka pe tak tak thei lo. Reilote pawh nise hetianga thlifim han dawn zeuh hi ka mamawh hrim hrim.


"Lalruatdik" ka aw hriat ţhan tak a ni. Ani lo chuan ka hmingpum in min ko lawl lawl ngai lo. Ka ţhian neih vechhun. Ka nunna hial lak ka tum lai pawh a min chhanchhuak tu kha. Ka hmaa a rawn din rualin ka lo kuah chawt a, ka zuan a ni zawk mah. Nui hawk hawk chungin ka hnungah alo beng thak thak a, nitin inbiain kan hun hman dan kan inhrilh ţhin a, alo let dawn thu erawh min hrilh hauh lo.
"Ka ţhawng viau che em?"
"Tehreng mai. Ka lungphu a tawp lo chauh anih hi"
"Ţhawn che ka duh a, karkhat lai ka awm tawh" a tih chuan a awmah ka lo chum a, na vaklo mahse na ber ni awm takin a kun a, a dawm ngawih ngawih a, "Lemchan i thiam lo emai. Nangmah vanga thi ţep pawh ka la din ngil at hi" tiin ka fiam zui a, a rilru a ţhat ang bawk hian a landan pawh a ţha a, hmeichhe tam tak ngaihzawn rawn a ni ve ţhin. Doctor ţha tak anih zel ka beisei.


"I kutthlak natzia ka sawiziah kha Lalruatdik. Damlo chu ni ila ka in vih tir duh lovang che" naupangchhia taka a tih chuan ka lo nuih a, ka kianga a awmdan leh midang bula a awmdan chu inpersan tak a ni.
"Tak takin ka ngai lutuk che" ka ti a, Marcus chu ka kuah nawn leh a, khang kum tam tak liamta chhung khan ka kiangah awm tlat lo sela chuan tun dinhmun hi ka thleng lovang. Ka tlanchhiat na lam a ka tawn a ni a, ka ţhian neihchhun a ni chung hian ka fa paina ka hrilh duh chuang lo. Min zawtlui ngai lova, i inpeih hun ka nghak ang a tia, tun thlengin hre miah lovin a la awm.


"Nangpawh ka ngai che. Ka lo let leh ang ka tih kha. Ka sawidik em?"
"A dik a, mahse i lolet leh har ka la ti tho" nitin kan inbia a, ka fanu pawn a hmuchak tawh viau ang.
"Zanah ka lokal ang. Bawihtei kha lo mut hma tir lo la"
"Ilokal dawn tih a hriat chuan a mu duh teuhlo mai" ka lo ti a, Bawihtei hian pa ang maiin a en a, 'pa' tih hlirin a ko bawk a, Marcus hian ka fanu min enkawl pui a ni ber mai. An in ngaina takzet.


"Jason chu a rawn thleng ve chiah manle" min enkanin ka hnunglam a thlir a, a hming a sawi ringawg pawh khan ka lo ip chawih thei hial. Ka phone number ka phallo chungin ala a, min rawn be leh chuang lo.
"Jason" ti a a koh te chuan lo khap ka duh a, hriatthiam loh a neih hlauin ka ngawi reng zawk.
"Iva hahdam awm ve" a rawn ti a, min hmuhchian veleh a ding chawt.
"Awmna ngai renga awm a ninawm a"
"I ţha em? Dikte" min ti daih.


Min biak ve vang leh ka hming a hriat vangin Marcus chuan mak a tih hmel khawp mai.
"Ţha e" ka ti sep a, an pahnih chuan ka en ngam tawh lo ve ve. An lo inhria hi ka tan pawh thilmak a ni. Khawvel hi alo zim a nih dawn hi.
"Ka kalsan ang che u. Kan inhmu leh dawn nia" a tih chuan ka hawichhuak leh hnuhnawh a, kal tur a a inher pahin chiang takin min rawn en a, ka in thunun zo lo ţhelh a ni. Mak tak maiin ka hmuh apiang hian ka na tlat zel.


"Jason nen khan engtia inhria nge in nih?" a kal liam veleh a zawhna dawn ka in beisei kha a ni hrim hrim.
"Chutiang chiah chu ka zawt ve duh che"
"Ka ni fapa anih kha. Nang ve le?"
"Kan inhre mawl ve tawp. Kan inhmuh fuh chang hian kan inbe ve a, chuzawng chu" ţhiante dawt hrilh hi a har a, tunah pawh hian inthiamlohna ka nei chawpchilh nghal. Marcus hian min ring a, ka thusawi apiang hi thudik ah a ngai hmiah zel.
"A endanah che leh i awmdan ka hmuh khan hmelhriat satliah in nih loh hmel" ka lo hresual a ni. Tun ţum hi ka thusawi awlsam taka a pawm nghal loh awmchhun a ni.


"Min rinloh chuan i thu thu le" ka ti hmak a, sawizui zel ka chak lo a ni. Ka lo tawrh tawhna te kha ka chhuikir peih tawh lova, a bul aţanga sawichhuah leh vek ka peih tawh lo.
"Ka ringlo che ka tih loh kha. I hmuh chiah khan i nguai vek a, rinhlelhna ni lovin ngaihţhat lohna zawk anih kha. Engpawh chu lo nise ka hmangaih che" mak ka ti vangin ang phamin ka lo en. Ka hmel a hmuh chuan a nui vur vur a, ka dara min kuah pahin "Ka ţhiannu ber ka hmangaih loh ten le" a ti leh ta zawk a, dimte in ka lo thaw huai.


"Kal tawh ang" tih leh kal ka rual a, min kuah reng chungin a lokal ve zel.
"Zanah chuan loleng ngei ang che aw" tiin ka sawm nawn leh a, Jason ka hmuh leh hnu phei hi chuan ka chhungril rit leh uap lutuk chhawk zangtu tur ka mamawh a ni.
"Leng ang. Min lo va ngaitawh awm ve" a ti a, min kuah nghet sauh a.
"Ka ţhianpa ber ka ngaih loh ten" a sawi ang chiah ka sawi ve. Nui dun hak hak chungin ka duty na hmun kan thleng a, kawngkhar bula kan din hnuah min kuahna a la thla a, kan inhmuh lohna rei ve tawh viau mahse kan lo la inpawh reng. Min hriatthiamna anneih nasat vang leh kan thuruk pawh a him ţhat bik vang hian mipa kawm hi nuam ka ti ber ţhin. Chutiang a ni chung chuan ka fa neihna hi tu hnenah mah ka la sawi chuang lo.


Duty hun a zawh veleh haw turin ka insiam a, ka fanu in min nghakhlel ţhin em a, khawiahmah ka pengkawi ngai lo.
"Han ban meuh hi chuan a nuam ţhin tiraw?" Maremi'n a tih chuan ka lo bu nghat a, Jason leh Marcus te inchhung hnai tak an lo nireng chu mak ka tiin ka ngaihtuah zui neuh neuh a.
"I rawn thawh tirh aţang tawh khan vei nei ang hian i awm reng mai a. I rilru tibuai tu an awm hrim hrim" min ti leh a, nuih luih hak hak pahin ka ban ka vai a "Teuhlo mai" ka ti zui a, a awih hmel lem lo. Ka lo inngaihtuah leh ut ut ţhin a, min rinhlelh phah ta a ni.


Kan inthlak zawh hnuah kan inthlah fel a, kan veng awmna a inan loh em vangin kan haw dun thei ţhin lo. Gate ka pel dawn chiah tihin ka piah chiahah bike a rawn ding a, min tai lek lek a ni mah zawk. Ka ţe ţhat nghe nghe. Hauh tuma ka an zuau laiin a helmet a phelh a, Jason alo nireng a.


"Ka thlah ang che" min ti a, ka chenna a hriat ka hlau ngawih ngawih tih hria sela chuan min umzui hauh lovang.
"Min nghaktu an awm a, penkawi na tur ka nei bawk a"
"Hawtir la, ka penkawi pui ang che" a ti lehzel a, min thlah anih vaih chuan kan inchhung rawn luh a tum leh kei anga, kum tam tak thuruk ka lo zep tawh kha hailan a ni mai ang tih ka hlau a ni.
"Thlah ka ngailo ka tih tawh kha" ka ti leh ngat a, ka zam lutuk vangin ka bag hrui ka hum a, ka hum nasa bawk a ka kutchang te chu a var pap theiin ka ring. Khua ala thim loh hi chuan Bawihte in khawlaiah min lo hmuak ziah ţhin a, min hriatchian zel a chak phah ang tih ka hlau a ni.


Gate bula security awmte chuan min melh ralh ralh tawh hlawm. Ka kal lui leh a, ka rual zelin a rawn tlan ve. Mi mit kan la ţan a, thinrim taka thawk halh pahin a lam ka hawi leh a, zawhna min zawt leh niawm takin a mit hmul alo san ak a, "Thlah ka ngai lo" tia ka hrilh nawn chung pawn 'min nghak rawh' tih ang vel ala ni tho. Kawnglai taka ding anih vangin a hnungah car a rawn ding a, "Midang kalna tur kawng i dal ania"
"Lo chuang vat la kan dal reilo a ni mai" a ti tlat tho a, kan in thlenhma deuhah ka chhuk mai ang ti ru ran chungin ka chuang kai a, car kha kaltlang thei sela chuan min thlem chhuak zo chuang lovang.


"Khawi lamah nge?" kan veng awmna ka hrilh a, a hla bawk a a sim chiang khawp ang. Midang inluah lova mahni in ngeia kan awm duh vangin veng hla chu kan pawi sa lo. Inluah man chawi leh a neitute mitmei ven ngai reng ai chuan a nuam hrim hrim. Traffic jam a motor ding tlar tuarh kan tlanpelh dawn chuan ka duhthu ni miah lovin ka hlauh vangin a kawngah ka kuah a, ka la thlakhlelhzia ka inhrechhuak. Harsatna ka tawh chang te hian min hnem vak dan a thiam ngai lova, rilru no leh na hma chi ka lo ni ve ţhin bawk nen. Ţhiante vanga ţah changte ka nei a, chutianga ka awm chuan a tan ka pawimawhzia min hrilhin min kuah ţhin a, thu tam sawilo mahse min kuah ringawt pawh khan ka thlamuang em em ţhin.


"Ibo hnu khan engtin nge hun i hman zel?" tia min rawn zawh thut chuan ka hamhaih ve deuh a, kum tam tak chhung chu amah vang hian ka ţap ţhin a, ka mumanga ka hmuh changte hian ka harhchhuah chuan ka ngai ngawih ngawih ţhin.
"Ka hmang ţha. Nurse ka zir a, ka zir zawhah ka thawk leh a, chuzawng chu" ka la ti ţalh tho. Bawihtei hi a hriata sawilan ka duh lo.


"Kei aiin i hmang ţha zawk anih chu"
"Engtin nge i hman ve? Ka hmang ţha a, i hmang nuam thung a nih dawn chu. Nupui hual thleng thlengin ilo nei tawh a"
"Anih dawn chu" a ti a, kan sawizawm ta lo. A bialnu ka sawirik apiang hian lung rit deuhin min delh ang mai ka ni ţhin. Kan hmangaih ber te neihtheih loh hi a na duh a, theihnghilh kan tum poh leh kan hrechhuak nasa zual sauh a, thinlung hi ve lo ila, ka fanu vang chauh hian dam hram hram ila ka ti ber.


Kan veng kan thleng a, a tawntirh kan thlen veleh "Ding rawh hetah hian ka lo chhuk ang" ka ti tuarh a, a tlanluih zel vanga ţawngring lui ka ni.
"In in bulah ka dah ang che" a ti a, a thil tum ka hria. Kan in awmna hriat ve hrim hrim a duh vang bak a ni lovang. Kan in thlen hma deuhah "Hetah hian" ka ti leh a, a ding ve hram. A kawr pawt chungin rang takin ka chhuk a, naupang infiam laih laih zingah chuan ka fanu a tel ve dawn tih ka chiang. Ka nu in a tel tir veleh ngei ngei ang.


Kal nghal mai ka tum laiin ka banrekah min lo pawt a, "Khawilai tak nge?" ala ti ţalh. Beidawn mai a tum lo khawp mai.
"Helai hi"
"Lut la" tih pahin kan dinna bula in awmna lamah a thle zeuh a, ka mangang leh ţan tawh. Ka lo hnial ţang ţang mai lo kha ka inchhir rum rum.
"Hmun danga kal phawt ka ngai"
"Kal ve na hun ka la nei" chhan ngaihna ka hriat loh hnuah ka kut lak let tumin ka pawt a, la vuan reng chungin min pawt let a, puitling pahnih in pawt tawn reng chu mak tih pawh kan hlawh ang.


"Nu" ka khawng nghal awt. Ka lam pana phur tak maia Bawihtei lo tlanphei chu ka en ngawt ngawt a, ka duhloh ber a thleng mek a ni. Ka banrek a hmerna a thlah a, kan awmdan chu a inang vel ang.
"Nu ka lo nghak che a" ka awmna a rawn thlen chuan a thaw hlawp hlawp a, a sam a chul pahin "Hahdam rawh. Tlan vak vak loh ka tih kha" tiin ka lo hau pah a.


"Bawihtei chu khawiah nge in awm a?" a rawn tichhuak phawng a, Bawihtei a hria chu mak ka ti lehzel. Ka chiai in ka huai nuaih a ni ringawt.
"Sawlaiah saw kan in ania" a kawk pah vah a, a infiam hah avanga a thlan thla chu a kutin a tuai thuak thuak a, a nui ver ver bawk.


"Bawihtei hi i---" a ti hman chauh a, "Ka fanu" ka lo tihkhalh a, a mangang hmel chu a khawngaihthlak zawk. Fanu ka neih hi a thil beisei loh ber pawl tur a ni.
"Ka fanu anih hi" ka ti nawn leh a, Bawihtei banah kaiin ka kalpui hlawk hlawk a, min umzui loh hram ka beisei. Ka thuruk tlem a hre tawh a, hre lo tura ka duh tam tak la awm hi ka thup tlat a ngai tawh a ni.


CONT....

---

NEVER REGRET-4



"Bawihte khapa nen khan engtinnge in in hriat?" a sam ka khuihsak a, ka zawhna min chhan tumin ka lam hawiin a rawn inher a.
"Doctor kha maw?" a ti ha a, ka lam a lo hawi vangin lu ka lo bu nghat a.
"Damdawiin ah min hmu a, school ah nen"
"Engmaw?" ka ti hluai a, ka awmdan chu mak tiin khap fak fak chungin min en a, ka buai leh ta nuaih mai.


Bawihtei te school a kal nachhan tur tlem te chiah a nei. Bawihtei hi a fa tih a hretawh ti dawn ila tlaiah khan ka fa ani tih kha a hrechiah a, Bawihtei vanga kal a ni lo phawt.
"Naupang alo hruai ve mi?"
"Aw ka ţhiannu kha"
"Tunge i ţhiannu chu?"
"Cathy" a ti a, a samţawnna a milem awm a khalh a, min ngaihven zui tawh lo.


Bawihtei vanga kal ani lova, bawihtei ang rual vel naupang a hruai ve thova, Betty kha alo rai ve tho em ni? Nge midang lakah fa a nei tawh zawk? Rintur ber ka hrethiam lova, naupang nu tur chu rin ngaihna ka hrelo. Fa a nei ve tawh anih ka ring bur a, a fa neihna pawh Betty ah ka puh thlu a, ka rit nulh a, ka thuhriat chuan ka thinlung a tihnat belh leh ta. Fa nei reng chung chuan min umzui tur a ni tawh lo asin. Nge a ţhian ang chauhin min lo en ţhin tak tak zawk? Ka hnual rawih a, engtihmah ka phur tawh lo nak laiin ka phur lehzual. Hringnun chu hetiang mai mai hi a ni ngei ang. Ka hmangaih ţhin a, ka la hmangaih reng bawk mahse fa kannei ve ve tawh a, a fanu in nu leh pa a neih laiin ka fanu chuan pa a nei ve lova, chu chu kan danglamna awmchhun a ni. Hua angin in ngai mah ila, ka hmuh apiangin a tana biak hrehawm takin awm ţhin mah ila beiseina ka lo la neireng tih ka hriatchian phah khawp mai.


Ka fanu muhil lai kuahin rilru ka kawm leh melh melh tawh. Ţhian ang ni lova kan in en ţanna ni kha ka la hrereng. Kha pindan zimte aţanga inţan kha a ni. A inluah laiah leng turin min sawm a, coaching a kal lai a ni. Sawilawk lovin a ţhiante tam tak an rawnkal ve a, hrehawm ka tih a hlauh vangin a pindan zim teah min luhpui a, kan inkalh hnan a. Inhnaih deuhin kan ţhudun a, kan hmui a inhnaih a, kan mit a intawng a, kan thinlung pawh a rualin hunbi neiin a phu a, kan inhip tawnna chuan min ti â zo a, inthunun tur ka ni tih ka inhriat laiin ani chu a ni ve lo. Min awmhnaih lui zel a, khami ţum kha kan hmui a insikna hmasaber a ni. A nem thep a, a dimin a thlum chek a, ka che eih lova, chet duh mah ila ka ngam lova, ka thiam hek lo. Amah zawk chuan zak leh ţi tak chungin a hmui a ti che a, ka vawikhatna anih vangin thawk ngaihna ka hre lova, chuti chung chuan pindan chhunga ka awmpui kha ka inchhir lo. A tan pawh a vawikhatna ve tho a ni. A inlak hran chuan a hmai a sen ve awp awp thei hialin ka hria, khatih lai khan kan la naupang ve ve a, a awm lo lem lo. Min rawn melh lai chuan alh but butin ka inhria. Amahah chuan ka pil ruai ruai a, ka thawk thlengin a buai vek thei. Ka thil hriat theihna a rawn let leh veleha ka hriat hmasakber chu nghet taka min lo kuah kha a ni. Engmah kan sawi lova, engmah kan ti tawh lo. A ţhiante haw dawn thlengin kan inkuah a, an haw hnuah chauh pindan kan chhuahsan a. Kan thinlung chuan kan inhip tawnna chu kan pawm ang nge pawmlo ang tih duhthlanna siam turin min nawr a, pawm ru reng chungin ngaihsak loh luih a, hawisan kan thlang a ni. Khata ţang khan ţhian ang chiahin kan awm tawh ngai lova, kan thinlung a thil awm kan haider a, ţawngka chuan ţhian ni mah ila, ţhianin an tih tur baka nasa kan ti tho si a ni.


Ka inlet thawk a, nupui hual anei a, hmalam a pan laiin kei chuan hetiang hian zantin ka fanu enreng chungin nunhlui ka chhui kir ţhin. Keichuan amah vangin zanin a Marcus rawn leng pawh ka lo kawmţha thei lova, hmalam ka pan theih miah lohna hi ka inhuatna a ni. Ka lukham hnuaia ka phone dah nghawr dat dat chuan min ti phu zawk a, zanrei lam anih tawh vangin mi pangngai chuan min lo biak an tum tawh lo tawp ang tih ngaihdan nei mah ila lak tumin ka zen rak rak tho. Min rawn biak tum tu chu ka hriat ngai a ni lova, hospital a ka thawh aţang hian ka number hriatloh pawh ka la lo ngai tawh lo.


"Hello?"
"I nun leh dawt hi a inthlunzawm tlat anih dawn hi"
"Jason" ka ti sep a, phone number ka pek aţanga min lo biak vawikhatna a ni.
"Khawnge i pasal?" min tham lohna awki zawng zawng nen a rawn tih chuan ka na nghal zawk. Kan in a a rawnkal ka duhloh chuan pasal nei anga ka awm a ngai leh si dawn a ni.
"A muhil tawh"
"Pasal inei tawh takzet em?" a rawn ti ţha leh a, a rilru put dan tur ka hriatthiampui a, khawngaihna erawh ka nei thei rih lo.


"Nei tawh e. Mi tam takin an hriat ka duhloh vangin neilo angin ka insawi anih kha" dawt ka sawi hnem tawh a, ka thuruk tam zawk la thup nan chuan dawt a tel angai tawh. Anih loh chuan a bialnu min ţawngkhumna nasa tak tak kha ka ngaithlak leh a ngai dawn a, ka peih tawh lo.
"I bo hnu khan ka hmuh leh hma che chuan nupui neilo turin ka intiam a"
"Min hmu tawh a, inei thei tawh lawm"
"Ka hmuh leh che hian nupui neih a harsa lehzual zawk" a rawn ti a, tleirawl te kha la ni ila chuan lawm vangin ka zuang nasa leh viau ang. Tleirawl ka ni tawh lova, fa ka nei tawh a, kan inkar hi engtikahmah a fel thei dawn tak tak lo tih ka hre tawh a, lawmna chhan tur ka neihloh zia pawh ka hrechiang.


"Ţhian chauh kan nih kha hrereng rawh. Pasal ka nei tawh a, nupui nei ve vat rawh" thupe deuhin ka hrilh a, thu ka pek tawh chuan a zawm zel ţhin anih kha.
"Ka tawn aţang che khan hmeichhe dang ho hi hmeichhia angin ka en thei tawh lo. I kalbo hma khan lo chelh ta che ila min kalsan lui tho angem?" a thaw halh riin a zui a, a hma hun tihchhiatsak ka duh loh vangin ka rai thu pawh ka hrilhngam lo a ni.
"Ka thil tum tawh tuman min dan theihloh zia hrechiangtu inih kha"
"I pasal chu a vannei khawp mai" a rawn ti sup a, hnual taka a awm tur ka mitthla zawm zat a, khawngaihna ka nei thei lo ka tih kha a dik leh lo. Ka khawngaih ve takzet a, mahse a rem lo. Keini pahnih hi chu awmdun thei kan ni ve lo.


"Muhil tawh rawh"
"I lochhuak lawk thei angem? Zanin ah inhmu ila, naktuk aţangin iduh ang takin ka awm ang. Hmelhriatloh angah ka ngai tawh ang che" banga sana lian intar ka en a, dar12 a ni tawh. Ka duhdan anga a awmtawh dawn chuan ka chhuak hreh hauh lova, a rawnkalna tur ka ngaihtuah zawk mah.
"Kan veng a hla sia, lokal duhlo mai rawh"
"I rawnchhuak thei dawn anih chuan ka lokal ang"
"Tlaia min thlahna kha i thlen hunah min rawn hrilh dawn nia" ka ti a, awlsam taka inhmuh ka remti hi ka nep vang a ni lova, a chhan erawh ka sawithei miah lo.


Bawihtei chalah ka fawp a, a tam zawkah hi chuan apa a chhun a, lehkha a thiamin amah hrim hrim hi a felfai a, la zirsang lo viau mahse an zir chhun chhun hi a thiam viau ţhin a ni. Kei ve thung chu ka nu leh pa ten an neih ang ang lakhawmin phaiah min dah a, nau ka pai haw a, an inseng thlawn chiang lutuk kha an rilru ana a, keimah chiah fa annei a, an beisei a san ve tehlul nen heti mai mai hian ka awm leh si. Kan awmdun chhung reilote ah khan Jason-a felna tam tak ka hmuchhuak a, a ţhiante hnen aţangin duh duh nei thei a nihzia ka hria a, keiin ka neih ve loh vang khan ka awm angin a awm ve a, restaurant manto deuhah kan chawl ngai lova, ice cream kan ei pawn a man to kan ei ngai lo. Ka hriatah an chhungkaw dinhmun a sawi ngai lova, ka dinhmun hniam zia hriain chhungkaw chanchin min sawipui ngai lo. Nuam ka ti dawn lo tih a hrevek. Ka awmdan ang zelin a insiamrem zung zung a, a bialnu a ţhen miahlo kha ka tana thil ţha a tih loh awmchhun a ni ngei ang. Ţhen tum hialna a neih changin ka phallo a, keimah vanga a hmahun a chhiat zel ka duh lo. A milpui nei sela a hlim zawk ka ring.


Ka phone rawn nghawr leh ta dat dat chu lak kan pahin ka tho a, Jason tho anih vangin ka la duh lem lo. Ka hmet tawp nghal daih a, thawm dim takin kan inchhung chu ka chhuahsan a. Vawi tam tak ka lo nat phah tawhna leh khawvela hlimna nasa ber min pe tu ni ţhin bawk chu ka hmu leh dawn a ni. Ka tleirawl lai ang khan ka phur tawh lova, a tawpna tak tak tur anih vang nge min delhtu lung lian tak bawk kha a rawn let leh a, ka rit nulh a, ka thlen hmain vawi tamtak thawk ka la halh halh hman hial.


Tlaia kan dinna ka thlen chuan alo awmreng tawh a, car a rawn keng a, ka thlen rualin chhunglam aţangin ka chuanna lam tur kawngkhar a rawn hawng a, mi ţhenkhat meng an la awm ve chuan min lo hmuh ka hlauh vangin ka ţhu lut vat a, kawngkhar ka khar rik rual chiahin a tlanchhuak lehnghal a, min hruai a tumna pawh zawt chuang lovin ka ţhu hle hle. In hmelhriat kan nihna tawp zanah hi chuan inhauh ka duh lo. Naktuk aţang chuan mikhual mai mai kan ni ve ve tawh ang.


"I pasal chuan a hmangaih chein i hria em?" a ti a, hmalam a en run a, a thutak viau mai.
"Tehreng mai" ka ti ve sep a, dawt ka sawilai hi chuan ka en duh ţhin lo. In awm lohna chinah min dinpui a, zanrei tawh lam anih vangin a reh vung vung a, thla a eng viau thung a, hawikual chuan lunglen veng veng na tham a ni.


"Pasal ineih duh vang em ni i tlanbo daih?" a ti sup a, a awki ah chuan tawrhna a lang tel ve hial. A bialnu ţhen chuang lova a ruka inkhawp reng te kha ka ning ve.
"Hmeichhia te hian mipa thiltih ngaihdam theih mahse theihnghilh theih miah loh kan nei ţhin" ka ti a, inhmuh puia ka sawm ve ni khan a damloh a chhuanlam a, kal ngei ngei ka ngaih vangin ka kal lui tho a, Betty nen a an inzui ka hmu leh si a, kha thil kha ka la sawichhuak lova, ka chungah ţhat a chhuahzui reng bawk nen, vawikhatna a ni bawk a tiin a rukin keimahin ka lo ngaidam ve tawp a, ka theihnghilh thei chuang lo.


"Ţhian chauh kan nih lohzia kan hre ve ve. Kal bo lo la chuan ka nei daih tawh ang che"
"Betty ve hi le"
"Ka ţhen mai ang" a ti awlsam et a, hei hi alawm ka duhloh ber ţhin chu. A ţhen anih chuan a tuar nasa ber tu tur ka ni a, ka tawrh chuan ka fanu pawn a tuar ve ang. Tuna kan awmdan ang ang pawm mai hi ka duh ber.


"Lo inhre lo ta ila i ţhen tho angem? I ţhen lovang tiraw? Ka hmuhdun cheu pawh hian hrehawm ti hmel ipu ngai lo. A kianga awm nuam iti a, i haw lem lo. Keimah vanga i ţhen kher a ngai lo" he thu hi vawi engzat nge ka hrilh tawh ang? Inzawmna thuk lehzual min siampui a tum hian a bialnu ka sawichhuak ţhin. Mihring chuan mahni inhmangaihna leh khawngaihna kannei vek a, chhia leh ţha hriatna kan nei bawk. Hmeichhe nasa ve tak nen a mipa inchuh ka duh lo bur.


"Pasal inei tawh takzet maw?" a ti nawn leh a, ala awih duh chuang lo. Thleng tura kan duh miahloh alo thlen chang hian awih mai a har a ni maithei.
"Nei tawh" alo nui hawk a, ka ţan lutuk vangin ka kawr hmawr ka ţham tawn tawn a, zan chu nilo se ka zam zia a hmu ang.
"Eng vang nge? Ka neih theih nan che a engpawh tih ka huam lai khan duh lovin min tlansan a, mi nupui niin i rawn inlan leh a" min biak ţhindan aiin a awki a chang deuh tawh a, a thinrim niin a lang.


"A chhan chu ka hmangaih tawh lo che a ni mai lawm. Ţhian atan pawn ka duhlo che tihna a nih chu" dawt bawk ka sawi leh tawh. Ka hmangaih a lawm mahse Betty thusawi kha ka ngaihtuahchhuak leh ţhin. 'A hmangaih lo che. A tawn vang che a a thathona leh phurna hi a reh hunah a kalsan thovang che. Keini pahnih hi phuarzawm kan ni a, engmahin min ţhen thei lo. A hma hun tur te hi? A naupanlai aţang tawh a anih chak em em nih tumin a bei mek a, a kawng lo dalsak suh. A chhungten min duh em em chungin keipawn ka la hlat lui tlat a nih hi' he thu hi ala ri nawn tlut tlut a, thildang pawh a tam mai. Betty nilo hmeichhe dang min tawn vang hian a phur a, hmangaihna ni lovin duhna leh thathona chauh a ni.


"Min hmangaih leh turin ka nawrlui theilo che---" a tih hman chauh laiin "Naktuk aţangin mikhual ang chiahin min en ang che" ka lo ti hmanhmawh. Jason hian ka pawisawi a nei hauh lo. Vawikhat dawt min hrilh bak kha min bum awm pawh ka hrelo.
"Min mamawh chuan min hrilh ţhin dawn nia"
"Aih" ka ti sep a, ka kun ngul a, mit ka chhin rualin ka mittui a rawn tla a, ngatinge englai pawh a kan inkar hi a hnawk buai nuaih zel bik le? Kan inkawp theihna daltu an awm zel chung hian Pathian hian hmun khatah min dah dun zel tho si.


"I hmangaih tawh miahloh vanga ila ţah duh ka ring lova, kan awmdun hian i ţap reng a, ka tihlim ve zo lo che a, naktuk aţangin mikhual hriat ngailoh ang chuan ka en ang che" a ti a, ka hmangaih tawh miahlo tih hi ka lo theihnghilh leh ţhin. Ka la hmangaih rengna hi ka hrechiang em em thyng. Ka la kun ngul reng a, ka hnungah a rawn chul chuan ka khawng lah a, ka ţang ţyng nghal a, ka taksa thleng hian ka chunga thil a la tih theihzia an hrilh hre leh ţhin.


"Englai pawhin ka duh ang hlir hian i awm mai a, pa lo an ti mai tur che asin" ka ti uang a, ka hnung a chulna a tawp chawt a, kan boruak rit lutuk chu ka hne em a ni.
"Kan duhzawng ve ve in ngaihpawimawh sak tawn hi a ţha"
"I hmangaih miahloh thlengin i ngaipawimawh vek ţhin a mi?" ka ti sap a, ka ţah a chhuah em vangin ka aw a lian hle. Vawikhatmah min hmangaihna thu ala sawi lo. Hriat ka inrin em em lai pawn a sawi ngai lo.
"Aw" tih chiah a min chhan laiin beidawng takin ka thaw chhuak hawk a, engvanga min ko nge anih ka hre ta lo. Vawikhat tal a hnen aţanga ka hriat ve chak hi ka hrelo hlen takngial dawn a nih hi.


Pawnah a chhuak a, a hmalam aţanga rawnkal kualin ka ţhutna lam min rawn hawnsak a "Lo chhuak ve rawh boruak nawm lai tak a ni" ka duh leh duhloh pawh ka sawi hmain ka banah a pawt a, ka chhuah rualin kawngkhar a nem khar a, car nghengin kan ding dun a, thla a eng bawk nen, naktuk aţanga mihrang kan nih tawh dan tur te ka ngaihtuah a, ka tawt leh up up tawh.


"Bawihtei kha ifanu anih vang ani ang chhinchhiah a awl bik riau" a ti a, ka fanu ni lovin kan fanu a ni. Pa a awh em em laiin a hnaih takah awmin alo ţanpui a, ice cream a leisak thu thlengin Bawihtei khan min hrilh a, mutchhuak chung chungin fiah mang lovin chhum bung deuh deuhin min hrilh malh malh anih kha.
"I fanu nen ţhian an nih thu alo sawi a"
"Fanu maw?"
"Ni e, fanu" a ngawih vung vung hnuah a rawn nui hak a, bang bo zetin ka lo en a, thla eng hnuaiah chuan a nui hmel pawh ka hmu thei.
"Ka u fanu anih kha" a ti a, ka lo thaw huai a, midang laka fa nei lo tura ka lo duh ve em em te hian hmalam ka la pan lohzia a lantir.
"Bawihtei chuan alo hresual anih dawn chu" zak takin ka ti leh hnuhnawh a, ka sawichhuak kha ka lawm tho mai, thudik ka hriat phah a.


"Pasal ineih leh neihloh fiah duh a lokal ka nia, ka awmrei a, ka ring lo tulh tulh"
"Ka fanu hian a tichiang ngei ang" ka ti ban charh a, thudik a hriat loh nan ka ţawngţai ru mawlh mawlh.
"Ka hmangaih che" ka rinloh lutuk vangin lo dawnsawn dan ka thiam lo. Hman aţanga sawitur a ka duh kha tunah ka hreve chauh a, hlim viau tur ka nih laiin ka hlim loh lehzual phah daih.
"Hmelhriatloh kan nih hmaa hre turin ka duh che. Be miah lo che a ka kalpel che anih pawn ka hmangaih che tih i hrereng thei ang. I duh angin ka awm dawn a, min dem suh ang che" a ti a, na viau mah ila kan tawrh angai si anih hi.


"Tehreng mai. Kan inhmuh pawhin min hrelo angin min kalpel la, mal leh khawhar vanga thi mai thei ang renga ka lang anih pawhin i awmdan tur hrilh tu che ka nihna leh, kalsan tu zawk che ka nihna hi i hrereng dawn nia. Ka thinlung kehchhe rum rum ri i hria anih pawhin nangmah vang a nilo tih inhrilh nawn la, buaina kanneih chuan keimahni in tuar mawp mawp ila, engtikahmah awmdun theilo tur nichung si a in ngaina lehzual tawk lek a awmreng ka duh lo" ka ti a, a hma anga hnungtawlh zawnga kal ka duh tawh lo.


"Hriatchian duh dang ka la nei. Min hrilh la kan tawp dawn nia"
"Eng nge i hriat duh?" ka ti a, ka thin a phu dep dep a, zawhna chhan har deuh a ni ang tih ka lo hlau hman.
"Kan awm naah khan i pasal hi a awm ve em? Bawihtei kum ngaihtuah hian a awm ve ngei niin a lang a" a ti a, a dilchhut lutuk chu in rinhlelna a nei em maw ni ka ti hial. Ka chhang thei lawk lova, dawt hmang bawk a phat mar leh dan ka ngaihtuah laiin amah bawk chuan "In tlanbo dun a in innei zui nghal anih loh chuan i tlanbo hma khan i rai daih tawh tihna a ni" a ti a, ka lo buai chhe lo chauh a ni.


CONT....

---

NEVER REGRET-5



Hna kal turin phurlo deuhin ka insiam a, zanah khan ka pasal nen a kan tlanbo a kan inneih zui mai thu ka hrilh a, a chhut theih loh nan Bawihtei pianni leh thla ka thup tlat a ngai dawn a ni. Ka tlereuh bawm ka hawng a, silver zungbun ho lam tak chu phawrhchhuakin ka bun a, min hmuh leh hunah min hmelhriat angin awmtawh dawn lo mahse min lo chik reng tho takin inven nan pasal nei anga ka lan law law a ngai ang.


Ka insiam zawh hnuah darthlalang hmaah dingin ka thaw halh a, a harsa dawn takzet. Ka rilru put dan diktak a hria a, chutih rualin pasal fanau nei angin min hre bawk. Min lo duh ve a, keimah vanga a rilru a na ve thei anih chuan nizan khan ana zo vek tawh ang a, keihian a bialnu nen a an awmdan tur zawng zawng ka hmu ngam angem? An pahnih a ka hmuhdun ringawt pawhin na lovin ka kalpel thei miah lova, inneih hial an tum hunah chuan hrehawm ka va ti dawn em.


'Nangni ang mai mai hi chu a chhungten an duh teuhlo mai che. Mi hausa chu hausa dang nen bawk an inzawm ţhin' he thu Betty in min hrilh lai khan hrehawm ka ti a, mi hausa tak fa ka ni velo kha pawi ka ti em em. Kha thil kha kalbo ka thlan nachhan pakhat leh a ni. Chhungten an duhloh vanga tlawm taka ka awm hnu a inţhen leh tho tho ai chuan ka fihlim zawk. A hmahun ka ngaihtuah vang leh a zahawmna hum nan ka kalsan a, a tana ka inhlanna chu hre lovin a ngaihah chuan rinawm lo leh phatsantu ka ni ta zawk a ni.


Ka bag chu ak peih lovin ka khai a, taxi remchan hmuh inring ranin muangchangin ka kal a, ala hma deuh bawk a ka hmanhmawh vut peih lo. Horn ri tuarh ah chuan ka phu zawk a, ka kat nawk nawk hial maithei. Ka awm ka dawm vang vang laiin nui ri ka hria a, ka hawilet chu "Marcus" ka ti hrawk a, thil ho te ah pawh phut zawk hi ka hrat hrim hrim a, chu chu he mihring hian hmuhnuam a ti ve hrim hrim.
"Ka zuiru che tih hrelo khawpin eng nge i ngaihtuah?"
"Engmah. Helai velah hian hmuh che ka inring lo lutuk zawk mawle"
"Ka rawn sawm ang che ka tih kha"
"Ani maw?" ka ti hu a, Marcus lam reng reng ka lo ngaihtuah tawh lo.
"Ni e. I remtih vek kha" inthiamlo tak chungin a dinna lamah ka let phei leh a, ka thutiam chu hre tur ka nia sin le.


"I ţha maw?" a zawn ka thlen veleh alo ti nghal a, reitak kan inkawm tawh a, keimaha danglamna awm hi ka nu ai pawn a hrethei zawk. Ka nu chu inchhungah a buai a, ka fanu buaipui a ngai bawk nen, ka puitling tawh tho bawk a, min ngaihsak tak tak hman lo.
"Ţha ka tih chuan dawt sawi ah min ngai awm tho sia"
"Dikchiah. Eng thil nge thleng a?"
"Nakinah" ka ti sep a, a hnungah ka ţhu kai a, kan inkarah ka bag ka dah a. Hospital kan thlen hma zawng kan inbe leh tawh lo. Buaina nei deuh ni a min hriat hi chuan heti hian min phur a, inngaihtuahna hun min pe ni awm tak hian min be ngai mang lo.


Bike a ti ding dawt a, ka bawh rawk rawk loh nan amah rinchhan bawkin ka in nemkhalh a, ka insiamrem fel hnuah ka chhuk a, "Kan va thleng hma ve, i duty ţan nan darkar chanve dawn ala awm" awmze nei taka a tih chuan kal nghal mai tuma ka inher tawh chu ka ding leh chawt.
"Tunah chuan nurse thinchhe deuh kha ala awm a, i pumpelh duh em?"
"I buai nachhan hriat ka duh ti ve mai mai teh" ka ti hlak a, min nawrlui chiam ngai lo. A helmet a phelh a, darthlalang hmaa uluk taka a sam a tuai chuan ka lo ner vak a.
"Ţhianpa sam mumallo deuh neih iduh loh chuan khatiang hmel kha pu suh" a rawn tih chuan ka nui hak a, inhrilh nawn pawh ngai lovin dawr lam kan pan a.


Dawrah chuan thil kan lei pawh a ni hran lo. A piaha ti ti theihna hmun ţhutna nuam tak awm chu kan kalchhan a ni ber. Ka bula rawn ţhut pahin a piahah dim te in a helmet a nghat a, "I duat ve ngawt mai" ka tih takah chuan chul hliau hliau pahin "Ka bialnu lu anih hi. A taksa ka kalsan mai pawh a" a ti fiamthu a, keimah vanga a duty a tlai loh ka beisei. Tunah tak chuan min kalsan turin ka ti duh rih lo.


"Bawihtei pa a rawn inlan a, mahse pasal ka neih thu ka lo hrilh a" ka zungbun ka hmuhtir lai chuan nasa lo te a luthin pahin alo nui a, "Bawihtei hi a fa a ni ang tih rin ngaihna a hrelo hrim hrim" ka tihzawm leh.
"I pasal ka lo ni ta a"
"Engvangin?"
"Zungbun kha ka leisak che" mawl ka intih lutuk vang chuan ka inhau ru mawlh mawlh. Kan en rei si a lei loh tawp ai chuan a mantlawm zinga mi kan leisak anih kha. A zuartu hmaizah vang liau liau a min leisak a ni.


"Keimah ngeiin ka lo buntir dawn che mi?" tih paha a rawn awmhnaih chuan na tawkin ka lo nem dawrh. Ho te te ah ka lai mai ţhin tih hriain hetiang zawng hian min fiam ziah.
"Ka sawitur pawh ila ngaithla zo lo"
"Sawizawm la"


"A tawp nan nizanah kan inhmu a, a tawp nan tak tak. Vawiin aţang chuan mihrang, inhmelhriat ngai miahlo kan ni tawh"
"Ka lawmpui dawn che nge?"
"Lawmpui leh tawrhpui ka ngailo ve ve, zalenah ka in ngaih rualin na ka la nei tho. Engtikahmah a dam thei tak tak lovang. Bawihtei ka hmuh hian ka hrechhuak lo thei bawk si lo" a dara ka lu nghatin mit ka chhing a, ka nu hnena ka awm ai pawhin Marcus nen a kan awmdun hian ka hahdam zawk. Ka thinlung hi midangin lo neitawh lo sela chuan hepa hian a nei daih tawh ang.


"Hmeichhe mawl kan tih zingah i tel ve anih hi. Neihtheih loh tur vanga tawrh char char aichuan hmalam pan rawh"
"Sawi ang ai hian a harsa ve a"
"Nih leh neih tum rawh. Venthawn nei miah lo khan neih tum tlat mai rawh" a ti bul hmuk hmuk a, ka hrilh fo tawh a, ka tana ngaihthlak nuam chiah a sawi ţhin a, tun ţum chu alo dawnsawn dan a dang ta deuh a ni.


Ka awmdan ka la ti danglam duh chuang lova, a lungawi lo ni a ka hriat chuan ka hnaih sauh sauh zawk ţhin.
"Ka neihtheih miahloh tur zinga mi alawm a nih. Tum nasa viau mah ila ka neithei dawn chuang lo. Nupui a nei ţep tawh ang."
"A tawp tawhah ngai tel rawh. Phum bo tawh rawh. Nupui a neih hmain hmalam pan hmasa la, iduh chuan ka pui ang che" nem deuh zawkin a ti leh a, min pui tur duhthlan tur ka nei lo. Ani bak hi rinngam ţhian ka nei lo.


Kan ngawih dun vang vang hnua kut beng ri ka hriat chuan mit ka meng a, kan hmaa ding te chu ka hmuhchak loh ber te an ni rih. Ka ţhutdan ka siamţhat phah sawk sawk tho. Jason leh Betty te an lo ni reng a, Betty chuan elhsen deuhin min nuih sawng a, Jason chuan thinrim hmel a pu.
"Lo ţhu ve ru" tia Marcus-an alo sawm chuan nuam tih lohna ka nei nasa lehzual.


"Kan ţhu hman lo. Marcus i ţhiannu hi ka hria, fimkhur rawh aw" Betty chuan a ti deuh kher a, zawhna ka dawn belh leh phah ngei ang.
"I hrechiang lo anih dawn chu"
"Chu in lo in hrechiang viau tawh tihna ni maw?"
"Kal teh ang Betty" Jason chuan a rawn ti ta hlauh a, keimah aţangin a mit a lasawn chuang lo.
"Ni e, kal ang. Kan awm ve chuan an hun ţha kan tih bahlahsak mai mai" a ti a, min tih el taka nui chungin min melh pah ram ram a, min ngainatlohna hi chiang takin a tilang ţhin.


"Betty pawh ihria maw?" min hawisan rual deuhthaw in zawhna ka dawng lehnghal. Thawk ka lak halh hnuah "Hria e" ka ti sep a, midang zawng zawng aia hrechiangtu ka ni ngei ang. Ka hnenah chuan midang hriatloh tura a thup tlat a mize chhe lai zawng zawng pawh a tilang vek zel alawm. A awmdan zawng zawng sawi ila chuan tuman an awih lovang a, min huat phah hial zawk ang.
"Jason leh Betty i hria a, a mak hle mai" a ti leh ringawt a, sawitur dang a nei vak chuang bik lo. Hlauhthawnna in ka khat a, Betty hnen aţanga ka chanchin a hriat vek chuan keiman a ka hrilh hriat aiin a haw zawk ang. Thup tam tak ka la nei a, Betty chuan tlem te phuah belh a hrilh kha a duh dan zawk a ni ang.


Hlau deuh chungin ngawih ka chuh leh a, Jason nen a mihrang hlak anga kan awm chuan Betty pawn ngawih a chuh ve ka ring tlat a ni.
"Ka hrechiang hran lo" ka ti mawl veleh tawp a, min rinlohzia a langchiang hle bawk.
"Bawihtei pa chu i kalsan thei takzet angem?" tiin min zawt let daih. Betty nen a kan inhriat dan a chik vak lo chu ka lawm ru khawp mai.


"Mangţha tih leh kalsan tih hian awmze hran daih a nei a, mangţha tih hi chuan i kut vuan tur a ka inrintawk hunah leh ka kut vuan ve thei tura i inpeih hunah hmu tur chein ka lo inlan leh ang tihna angin ka ngai ţhin a, ka kalsan a, ka kaltir bawkna hi chuan a kut vawnreng kha ka la duh a, a hnaih a awmreng duhin ka ngai em em reng a, mahse ka ta tur a nilo tih ka hrechhuak a, engtikahmah ka vuan tawh lo anga, ka kalsan hlen hmak ang tihna ang vel a ni. Ka dinhmun a zirin ania ka hrilhfiah ni"


"I mangţha nge i kaltir?"
"Tunah hi chuan ka kaltir tawh niin ka hria, a hma khan kalsan ringawt mah ila, amah hmu miah lovin kal mah ila mangţha tih mai kha ka duhtawk a, ka hmuh leh hnu hian kaltir tak tak ka duh tawh a ni. Hmeichhe dang kei aia a thinlung luah nasa zawk tu a nei tawh. A nei reng ţhin a, a nasa tawh zawkin ka ring" ka ţawngkam hi chuan kumkhua atan ka thlah ţhin a, ka thinlung hian min pawmpui ngai si lo.


"Bawihtei pa hi tunge?" a zawhna avang chuan ka hamhaih deuh a,ka hrilh loh chhan chhuanlam siam dan tur pawh ka ngaihtuah hman lo.
"Kan hnaihah a awm ve em?" ala ti lehzel a, ka melh zawk a, min lo en ve reng vangin kan mit a intawng a, a thutak run a, thudik tak hrilh turin min duh a ni. A hawisan hmasa zawkah ţangin ka hmui ka chip tlat a, a theih chhung chu thup tlat ka duh a ni.
"Ngatinge i hrilh mai loh? Nangmahin hah deuhin i pawm a, hna i thawh reng a ngaih phah a, Bawihtei enkawlna tur i phut ve a thiang a, tlangval ang maiin lentir reng bik mah ta che." lungawi vak lo chungin a ti leh a, keimaha ka tuar vek bik hi min khawngaih ţhin a, nau ka pai hlim khan lo hrilh ta ila chuan Jason hi doctor hlawhtling tak a ni miah lovang.


"Kan nufa hian kan hlim tawk"
"I fanu hian pa a mamawh. Nangmah chiah in ngaihtuah suh"
"Vawiin chu i bula awm a hahthlak riau" tih pahin ka ding a, ka bag la tur a ka kun leh laiin "Inneih zungbun hi buntir duh tak tak che ila min hnial angem?" min lo ti a, ka zungbun bunna lam banrekah lo hmerin zungbun leh kei chu min entawn a, ngaihtuah theihna mumal ka neihloh laiin ka chhanna a lo nghak ran thung.


"Ka duty hun a ni tawh. Ka kal phawt" min vawn ngheh loh vangin ka talchhuak thuai a, khathu kha uang miah lovin a sawi a, lo dawnsawn dan ka thiam lo. Kal hlawk hlawk pahin ka ngaihtuah neuh neuh a, ka makti hmel kha a hmuh hmaih bik lovang. Jason beiseu tur a awm tawh lo tih hrereng chung hian mipa dang laka rilru pek harsa ka ti tlat si. Ka tan chuan Marcus aia ţha an awm lo mahse Jason nen unau an ni. An nu leh an pate unau an ni a, boruak kanneih deuh chuan Jason pawn a hreve thuai ang a, pasal ka neihtawh thu ka hrilh vang khan laktlak loh leh rinawm lo takah min ngai lehzual ang. Kha thu a sawi lai khan chet nachang ka hre lawk lo anih kha. Ka chunga ţhat chhuah char char ţhin leh ka chhiat ber lai pawha min kalsan ngailo tu hi hnar har ka ti ngei dawn a, chuvang chuan khatiang thil kha sawi tawh lo se ka duh.


Rilru mumallo deuhin ka duty a, ka chet reng laiten ka lo in ngaihtuah leh ngut ngut ţhin. He hospital hian hlimna leh zangkhaina min neihtir ka ring a, ka buai lehzualna mai mai a ni. Jason nen a kan inhmuh leh hunah chuan kan inhmuh loh chhung a kan hun hmandan te kan inzawt anga a tawp ve mai ang ka lo ti ţhin a, hmuhleh ka inring lo hrim hrim tawh zawk. Chutiang chu alo ni hauh lo, ka thinlung ka lo la thunun thei chuang lo.


Ka duty puite chuan min ning deuh aniang min be peih pawh an awm lo. Min en hrek hrek a, ka bulhnaia an mamawh a awm fuh palh chuan min dil a, ka lo pe a, min be lo chhunzawm leh mai a, ka buaina hi keimah chiaha sutkian theih anih vangin midang ka mamawh lova, pawi ka ti lem lo.



JASON'S POV

Marcus nen hian eng in laichinna nge an neih? Ka thiamloh leh bawk em ni? Ka kiangah khan nuam a ti lovang a mipa dang a tlanpui ta em ni? Vawileh khatah a bo pil hmak a, tunah fanu leh pasal neiin a rawn let leh a, a thusawi kha ka rin a beisei viau ang mahse henu hi ka hrechiang a, dawt sawi a thiam ve lo. Pasal a nei lova, naute pa hi a la zep tlat tho. Pasal ka nei atih khan dawt a sawi tih ka hmu thei a, a fa neihna erawh chiang takin a sawithei lo.


Ka hmangaih a, ka hmangaih takzet a ni. Amah vang khan Betty kha ţhen ka duh ţhin a, amah bawk khan min dang ziah a, ka hmangaih em vanga a kianga awmreng ka duh vangin ngaihtuahna fim ka hmang ngai lova, a kianga ka awm theihna tur ang apiang kha ka ti tawp mai ţhin. A kalbo dawn tih kha hrelawk ila chuan chelh tumin ka bei ang. Tunah a rawn inlan leh a, hriat ngailoh anga en turin min duh a, a duhdan chu ka zawm thei lo. Ka hmuhphak loh a awm turin ka duh tawh lo. A hma ang bawkin Betty ţhen hi pawi ka ti leh ta lo.


A fanu kha tunge a pa tih lamah ka buai lo. Ka lunghlu bo tawh hmu leh ang mai ka ni. A hlutna ala bo lova, a landan chu a thar lai ai khan chul deuh tawh mahse ka la hlut ber tho. Chair hnung nghengin ka ţhu awn a, zawhna tam tak ka nei. Min chhang thei tu tur ber lahin dawt chiah a sawi a, naupang hi ka fa anih te ka ring rum rum a, a ni thei lo deuhin ka hre leh a. Ka fa anih chuan min hrilh ka ring tlat a ni. Ka kiangah khan hlim lo mahse ka fa chu ka lakah a thup thei lovang.


Kawngkhar kik ri ka hriat chuan ka ţhu ţha a, lut turin ka sawm zui a. Doctor dang annih ka rin laiin Marcus a rawn lang hlawl.
"Sawifiah teh" a rawn ti lut a, ka hmazawn a chair ah duhdah taka ţhu chungin min melh run a, keimah ang bawk a hriatchian loh ngah a nih duh hmel.


"Sawifiah tur ka nei lo"
"I bialnu chapo zet lei ila vensak hneh lo reng anih dawn kha, reilote chhung pawn midang tana hriat nuam lo a sawi leh tak ţeuh kha"
"Khatianga Betty awmchhan kha sawifiah turin min duh a maw?" ka lo ti a, dawhkana pen awm tuai vir vel pahin "Ni e" a ti leh sup a, a maksak khawp mai.


"Amah zawt rawh"
"Lalruatdiki hi i hre ţhin a mi?"
"Hria a ni mai ang chu" inzawmna thuk tak kan nei zawk a ni.
"Nupui ah ka nei dawn" min la melh run a, ka hmelah danglamna a zawng a, a hmufiah khawp ang. Tun hun hi thudik ka hriat theihna hun tur a ni.
"Pasal a neitawh"
"Mipa dang bula a sawi ziah ţhin anih chu. I ngaihruat thiam em? Pakhat a rinawm duh vanga midang hnarna ţawngkam tur kan thlan ţhin hi" nui hmel pu reng chungin a sawi a, ka putea fapa mah nise chutiang a thlen chu ka phallo a ni. Vawi tam takna atan hma ka sial leh tawh.


"Duhsakna ka hlan che u" sawichhuah a harsa khawp mai. Pasal a nei tawh ni a a sawi khan dawt tih ka hriat vangin ka la na tehchiam lo. Marcus nen a an awmdun dan ka hmuh hnu a an inneih tur thu hriat hi chu dawnsawn dan hriat a har.
"Min lawmpui hmel iva pu silo ve"
"Ka chhungril ka lanchhuahtir ngai lo" ka nui suk a, ka lawmpui lohzia ka lanchhuahtir lo reng a ni.


"Hun ţha kan nei ve ve a, kan hunţha neihchhung kha kan hmandan a in ang lo deuh a"
"Min hrilhfiah thei em?"
"I hunţha neih tihnat nan i hmang a, ka hunţha neih kha tihdam nan ka hmang a" Marcus hi mi â a nilo. A fing mah zawk. Chhan na ka pek lawk loh vangin "Ka ngaihruatna kalkual vel hi a dik anih hmel" a tihzawm leh a, muangchangin a ding a, a awmdan hi ka hrethiam lo tawp mai.


"I hmangaih anih chuan thup tum nasa mahse a natzia i hrethiam ang. Lalruatdiki i hmangaihna ai chuan nangmah i inhmangaihna a nasa zawk" ti a min hrilh hnuah ka office a chhuahsan. Keimah ka inhmangaih zawk vang ni lovin duhthlanna ka neih loh vang a ni. Hrilhlawkna ka dawn hmasak loh vang leh a kalbo dawn a hunţha min pek loh vang a ni.


Ka haw dawnah a haw tur nen kan intawk a, kan inhmuh veleh tlemin kan kalmuang deuh a, awmdan tur kan ngaihtuah ve ve ni awm tak a ni. Kalmuang mah ila rang takin kan intawk tho. A duh angin mikhual angin ka kalpel a, zawhna ka ngah a, zawh tur ber ka ngaihtuah chhuak zo lo. Vawiin ah ka kalpel a, naktuk aţangin neih let ka tum ang. Pasal ala neih lohzia finfiah a ni tawh a, keimah lo chu pasal atan a nei lovang.


CONT...

---

NEVER REGRET-6



"Bawihtei hi a khawsik a sang reng a, a thaw a rang bawk sia, ka rawn hruai mai ania" ka nu in a rawn tih chuan ka tha a khur ti tih. Hmanah thawhah vangin ana vak tawh a, khatiang khan a awm leh mai ka hlau a ni.
"Ka lo chang ang che u" ka ti a, phone ka tih tawp rualin ka bula awm ve ho chuan min lo en ţhap.


"Ka fanu a damlo a" tiin Maremi bik chu ka hrilh a, "School a kal maw ka tia" a lo ti duh lek chauh. Zan aţangin a khuasik tawh a, school kan chawlhtir a, hnakal tura ka kalsan dawnlai pawn api nen an la mu reng.
"Vawiin chu a chawl" ka awki chu ngaihthlak a nuam vak bik lovang.
"Ava zialo ve" midang zawkin an rawn ti a, an rawn thlen huna ngaihven turin min ti liam liam a, midang harsatna hrethiam lo deuh hi chu harsatna tawk ngai lo ang mai an ni.


Ka duty hun ala zawhloh vangin ka la inthlak lova, chuti chung chuan casualty bulah ka lo ding. Ka awm hle hle thei lova, motor rawnkal apiang ka lo thlek hman ziah a, Marcus hrilh ka tum zet a, ka ţhulh leh. A beisei a ti sang zel ang tih ka hlau a, hnar em em lo mah ila aw ka la pawh chuang lo.


"I mi zawn kha helaiah a awm lo" ka piaha Jason rawn ding chu ka lo en zawk a, kawngkal ka en chhunzawm leh daih.
"I sawi awmzia ka hre lo"
"Marcus, ward ah a awm" a ti sup a, nidang ang khan min kalpel leh mai mai se ţha zawk tur.
"A ţhat chu. Nangpawh i mei ka va hmu tel love" ka ti ve ngat a, Betty nen an inzui nasa lehzual. Hmuhdun loh chu thilmak a ni zawk. Kan inkarah engmah a awm tawh lo chung hian mi hriat si lohin kan inrunluih zak zak zel. A naupangchhia ngawt mai.


Kan hmaah taxi a rawn ding dat a, a hnunglam kawngkhar a inhawng a, Bawihtei pawmin ka nu a ţhu a, kei aiin Jason a che hmasa zawk. Ka nu pawh be hmasa lovin Bawihtei a laksak ringawt a, ka nu chuan mak ti hmel pawh a pu lo. Ka nu nen pawh an lo inhre tawh a ni ngei ang. Bawihtei a pawmchhuah hnuah thawmhnaw tlem bag a kengin ka nu a rawnchhuak ve a, Jason chu casualty ah kan zui lut.


An buaipui zung zung a, damdawi lei ngai an tih lei turin kei ka kal a, ka nuin a awmpui thung. Damdawi lei tur an intlar ve nual a, uniform ka hak vangin min lei hmasak tir a, ka mangan em vangin ka tlawmngai duh ta lo mai. Ka damdawi lei chu casualty a nurse duty ka pe a, keiman a ka tih theih reng kha ka ti duh tlat lo. Jection hi a hlau em em a, a na tuar mah hmuh hrehawm ka tih nak laiin a tawrh tirtu ka ni duh lo. A ţul tawpah lo chuan ka ti ngai lo.


Ka rin ang chiahin an admit a, a enkawltu pawh Jason a ni. Inhnaih lo se ka duh a, inhmu tawh miahlo mahse pawi ka ti lo. Chuti chung chuan a khum awmna tur thlengin a pawm a, a pawm kan apiangin Bawihtei lahin alo kuah chial reng a, venflon an vuah dawn lai pawhin Jason chuan a thlamuan a, a kut a vawntir a, a fak mawlh mawlh a, nidanga ţap ziah si kha a ţap miah lo.


"Ka inthlak chhung lo awmpui la, ka inthlak zawhah ka lo awmpui ve thung dawnnia" ka ti a, ka pa hi buaipui reng ngaiin a awm ve thova, ka nu tello chuan a awm thei lo.
"Awle. Muangchang lo la" min ti ngei reng bawk a, ka let leh a, ka duty hunchhung ang pawh awmtluan thei lova awm chu ka inthlahrung ve a, Bawihtei chanchin min lo zawt liam liam a, "Vawiin ah chuan tihtur ka lo nei tawh a, naktukah kan lo kan dawn nia" an ti vek a, ka lo aw liam vek mai mai a, lo kallo mahse ka dem lo. Min hriatthiamna an neih hian min ti lawm tho tho. Ka duty hunchhung tur chu ka awm tluan law law a, a laklawh a ka kal daih vang khan tih tur awm ang ang chu an tih ai ka ti vek. Ka rilru a hmanhmawh bawk a ka che rang khawp mai. A hun ka zawh chuan ka thaw huai a, inthlak turin ka lut zui nghal.


"Eng na nge?"
"Ka la hrelo. Xray te ala ngai a, thisen pawh test ve hrim hrim se ka duh. Pneumonia a ang" ka ti a, Jason khan ka nu bulah enge a sawi ka hre lova, xray pawh naktukah lo chuan a tih theih loh ang. Tlai lam a ni tawh a, tihna hun a awm tawh lo. Hospital pumpuia roreltu ka ni anih loh chuan a hun lo ah tumah ka nawrlui ngam lo. Ka hlauhthawn lutuk loh nan leh ngaihţhat nan a test theih ang ang chu test vek nise ka ti.
"A ţha leh mai ang. In hrechhuak hma a, damdawiinah in kalpui hma bawk a, a ţha turah ngai ang"
"Ka beisei" ka ti sep a, kan inbiak zawm lo. Mipa duty ve ţhin Ben-a zawk chuan "Nu tan hi chuan hlauhthawn a awl a, mahse tunlaiah doctor te an thiam tawh a, lungngai lutuk duh suh. A dam leh vat mai ang" min ti a, lu ka lo bu nghat a.


Bawihtei awmna ward lam panin keimahin ka kal hnak hnak a, damlo dangte chimbuai duh lovin cabin-ah te dah ve duh mah ila a to lehzual dawn a, private hospital phei chu sumdawng annih vang hian a to hma si. Cabin a a awm lo chung pawh hian bill a tam viau thovang. Ka pa lah accident vangin a ke a hmang thei tawh lova, keimah hi a thawkchhuak tu ka ni ve mai a, an neih zawng zawng senga lehkha min zirtir lai khan zirlai chiah lo ngaihtuah ila chuan ka nu leh pate nuamsa deuhin an awm ve tawh tur ania. Ka nu in ka pa a tifai lai ka en te hian ka lainat ngawih ngawih ţhin. Ka dinhmun hre miah lovin keimah aia sang daih, an dinhmun milpui nupui zawng chi lakah ka lo in ham tang lehnghal a, tih at in ka awm a ni.


Ka ngaihtuahna avang chuan ka mittui ka hru zauh a, ka kal lai a bahlah chuang lo. A dinhmun chhe zawk hian a hmalam hun lo thlirpuiin doctor ţha tak anih theih nan ka kiansan zawk lehnghal a. Min ngaihsak zui ve loh zia lah nupui hual hial alo neihtawhna aţang hian a hriat reng. Haw viau mah ila ka hmangaih tlat tho si. Lo inthiarfihlim hma lo ila chuan ka na lehzual zawk ang.


Ward chhung ka luh chuan Jason ka hmu hmasa ber a, khum mawng lamah dingin Bawihtei muhil lai alo thlir reng a, ka nu chu khum bulah a ţhu ngui lap a, fa pakhat chiah min nei a, fa ka neih veleh hnuah pawh an rilru hahna kan la siamsak reng mai anih hi. Jason chu kalpelin ka nu bulah ka ţhu a, ka bula ka bag ahlai dah pahin ka nu chu haw turin ka hrilh a, ka pa a ngaihtuah bawk a, a insiam nghal mawlh mawlh.


"Doctor khian rilru tihah lo turin min ti a, a nasa vak lo aniang. Hlauthawng vaklo phawt mai rawh" tiin ka nu in min hrilh ru sur sur a, ka lu buk zeuh pahin Bawihtei kut ka vuan a, a khawsik pawh a reh tawh a nih hmel. Ka nu in min kalsan hnuah khumah ka bawk a, Jason awm ve chu ka haider char char. Bawihtei a buaipui em em a, lawm tur ka nih laiin a awm ve chuan min ti hahdam lo. Ka ţang ţeuh reng a, misual vengtu nei ang mai niin ka inhria.


"Kan sawidun ţha leh thei angem?" a ţawng ri ka hriat chuan muangchangin ka dakchhuak a, min lo dinhnaih deuh tawh a, hrelo niawm takin "Min bia mi?" ka ti ha a, ka awmdan chuan a ti lawm vak lovang.
"Dawt min hrilh nachhan kha---" a ti hman chauh a "Ka hlat duh vang che" ka lo ti vat a, kan bul velah midang an awm ve vangin ka ţawngzawi viau tho.
"Pasal inei lo a?"
"Ka nei ţep" dawt bawk ka hrilh leh tawh. Hnaih miah lo ila buaina tam tak pumpelh thei angah ka inngai.
"Marcus a ni em?"
"Ni e"
"Bawihtei kut kha i tihnat sak ange" min tih takah chuan ka thlahdul a, ka chhanlet lai khan Bawihtei kut ka hum nghet viau tih ka lo hre lo.


"I thutiam kha ila hria ang chu maw? I thutiam angin i awm miah lo tih zawng zawng nen"
"Dawt sawi nen a inang chiah" Bawihtei a rawn harh hlauh a, harh lo sela chuan sawitur ka hre tawh lo. A rawn harh hi engkimah a lawmawm vek mai.
"Ilo harh maw?" nuisangin ka lo ti a, ka fanu hian ka nui hmel lem lutuk hi a hrethiam em lovang chu.
"Tui" a tih veleh tui ka la sawk sawk a, amah a ţhut a tum chu Jason chuan alo pui vat a, a pawmtho a ni mah zawk. An inbuaipui vel chu a hmutu dangte chuan pafa amaw an tih ka ring. An inang a, pafa an ni tak tak bawk a.


Tui kan intir a, Jason chu ka ţhutna lo lamah kalin khumah, Bawihtei hmazawnah a ţhu a, a chal leh biang vel a kutphahin a dek a, a insiamrem a, khumah chuan a kiu nghatin awn takin a ţhu a, Bawihtei en pahin a nui deuh suk a, "Cathy in a ngai viau dawn che a nih hi. Cathy i hmuh leh vat duh chuan dam vat vat a ngai ang" a ti a, sana ka lo en a, damlo dang a enkual pawh a hun leh ţep tawh ang.
"Khawnge Cathy chu?"
"School a kal a, tunah chuan inah a awm tawh ang. Eichak inei em? I neih chuan Cathy in alo thawn dawn che anih chu" a duhzawng a ngaihtuah apianga a tihziah danin a khabe dawm meuhin a ngaihtuah leh a, inhnaih lo tura ka duh laiin Bawihtei lahin a nel phian a, a school kalna sawn thlengin ka rilruah a awm tawh.


Damlo dang a enkual leh vek hnu a a haw dawnah "Ka lokal leh dawnnia" tiin Bawihtei chu a hrilh a, chumi hnuah "Nangpawh" min ti a, midang tello a hmuh leh ka duh reng reng lo. A kalsan hmain Marcus a rawn lang hlawl a, a hah hmel em em mai lehnghal. Min si chetin ka bulah a rawn ţhu hnawk a, min dil miahlo chungin tui intur ka lo pe. Jason ala ding reng tih hriain ka ngaihsakna ka lantir lui ve a ni.
"Bawihte ilo damlo a, inu hi a ţah leh ka hlau a ka lokal vat anih hi"
"I tlai lutuk" ka ti a, ka nui zui hak a, ka hrilh miah lova, ka nu hnen aţangin a hria a ni maithei.
"Min rawn hrilh har anih kha" awmze nei deuhin a ti ve a, Jason nen a min rinhlelh deuh hnu hian runluih turin min pui fo mai.
"I buai ka hlau a, i mangang ţhin bawk sia, ka rawn tibuai duhlo che nih kha. Rei deuh min awmpui rawh aw" ka tih ruala Jason kalsan chu ka hmu ru reng a, Marcus makti lahin min chhan lawk nachang a hrelo. A nupui turin min la duh reng a, Jason kan runluih dun reng bawk a, ţhianţha tak zawng a ni ve.


"Min chhang duh kher suh. Khatianga ka tih chhan kha i hria" ka ti leh hmak a a rawn ţhuhnai lutuk chu ka nemsan pah bawk. Hmu tura ka duh ber a awmtawh chuang hleinem.
"Rei deuh awm tura min duh chuan ka awm ang"
"A ţullo. Hna i ngah. Rawnkal kher pawh a ngai hleinem"
"Chawlh ka dil hreh lo" a ti hman chauh a, a darah ka chum a, Bawihtei alo nui ver ver a, min khap miah lo.
"Engatan nge zungbun kha ila bun? Thudik a hretawh"
"A ti beidawng turin. Ka lawm e aw, kan runluih reng chuan a tak tak emaw tiin min hnaih a tum tawh lo mai ang" ka ti a, Bawihtei a fin em vangin ka sawithui duhlo a, Marcus pawn thil a sawizui tawh lo. Thildang sawipui leh ka tum pawn a rul tawk chiahin min chhang a, a maksak thei ngawt mai.


A haw tur ka thlah laiin "Ka thik" a rawn tichhuak sup a, a sawitum ka hria a, reitak ka ţhian lo ni tawh hi ţhian baka en harsa ka ti tlat si a ni.
"I runluih duhna leh i hmuh apianga i danglam ţhinna te hi ka thik vek. Jason hi a mawl ngawt mai. Keichu min kalsan ve nila chuan ka hmuh leh hunah che nangmah pawh rawn lo chein palai ka rawn tir ang mawle"
"Mawl viau suh. Ţhian kan nih hi, a diklo zawngin min en tlat suh" ka ti hlar a, "Jason a awmhnaih chiahin i bialnu angin min en la, kan hmuh phakah a awm lo anih chuan ţhian ang bakin min en suh" ka tih zawm leh a, a na tih ka hria a, ka rilru ka thlak thei chuang lo.


"Pasal nei lova awm reng itum a mi?"
"Aw, mipa leh hmeichhia inhmangaihna anga ka hmangaih theihloh chu pasal atan neih ka tum lo. Ka tihpalh Marcus, ifel ber ania" ka nui lui leh a, Jason ka hmuh leh tak hnu hian ka van nui lui ngun tawh tak em.
"Hnawl ka ni tihna a nih chu. Jason hian a tihnat leh che chuan min hrilh rawh aw, ka hnek hrep mai ang" zangkhai vahin a ti leh thei tho a, hepa pawh hian ţhian kan nihna hi a dah pawimawh zawk ka ring.
"Min tina leh tur pawn inzawmna kanneih tawh loh hi. Lo hlauthawng lo la, mipa nen a inzawmna neih leh hrim hrim ka duhtawh lo"
"A tina tu che chu ka sawisa hrep vek dawn" a ti fiamthu leh a, ţhian aia nasa zawk inzawmna kanneih chuan kan inţhianna hi a bo kumkhua mai ang.


"Jason chuan ka pasal turah a ngai che a, chutiang chuan awm tlat rawh aw"
"Ka chak zawng tak" alo ti vat a, min kuah pah thuak a, "Naktukah ka lokal leh ang" a tih hnuah a kal nul nul. Vawikhat pawh a rawn hawilet tawh lo. Jason a zaidam em em lai hian Marcus chu tharum thawh hreh vaklo chi a ni thung a, a nihna leh a mizia a inhmeh lo khawp mai. Buaina chhuahnaa a inhnamhnawih ţum a 'i nihna i hrelo' ti a ka hauh lahin buaina a siam chhunga a nihna a theihnghilh daih zel thu a sawi mai ţhin a, mipa pakhat min hai vanga min rawn kuah ringawt tu pawh a sawisa hrep tawh. Ka thlavang a hauh nasa ţhin a, ka tan hian tih hreh a nei ngai lo. A duh anga ka awm ve theilo pawh hi ka inthiam lova, ka thinlung hi ka thunun thei bik silo a ni.


"Ka rawndah leh lawk. Chaw sem hun a pel tawh sia" ka bulah a thil khai a rawn dah a, a chhuak lehnghal daih. A hnunglam enin ka nui vur vur a, Marcus leh maksak hi chu a inzawm tlat hrim hrim.
"Nu enge a?"
"Ka hrelo. Kan en ange" ka ti a, ka enchiang zui zat a, eitur alo pack tir ţeuh a, chips leh intur vel a rawn dah tel bawk.
"A che rang hle mai" ka ti sep a, a bike dahna a thlen ka la rinloh vangin lawmthu sawi tumin ka call nghal.


"Keipawh ka lawm e" ka ţawng hma hawtin a rawn ti leh a, ka lo nui hak ringawt.
"Kan lawm e aw" ka ti ta tho.
"Bawihtei kha a muttheih chuan mengrei duh suh aw"
"Ka hrelo le. Mutna ngai lo ah hi chuan mutthilh a har thei lutuk a, a khawharthlak dawn khawp mai"
"I khuahar chuan i duh duh hunah min lo be dawn nia, biak theihin ka lo awm ang"
"Dar4 velah chuan i muttui viau ang"
"Darkar tinah alarm ka set mai ang" a rawn ti a, a uang pawn ka hre lo.
"Bawihtei dam veleh chaw eiah ka sawm ang che, i fel zel chuan"
"Awle. Kan ei ho dawn nia. Ka haw hunah ka rawn bia ang che u. Lo in eipuar ula, Bawihtei pawh thil ilo eitir dawnnia" a ti a, a dah hnuah ka phone chu ka bih ngur ngur a, ţhat a chhuah nasat poh leh ka inthiamlo lehzual zel dawn anih hmel.



JASON'S POV


Nithumna chiah a ni. Bawihtei an rawn kalpui aţanga nithumna. Pneumonia vang a ni a, a lainatawm takzet. Nitin ka kal a, ka haw dawn apiangin ka kal nawn leh tur thu ka hrilh ţhin.


Hunawl ka neih veleh Bawihtei awmna lamah ka kal leh a, nurse ho pawn mak min ti deuh ţhin niin a lang. Tun ţumah pawh nurse pakhat chuan file a lo ban vat a, "Damlo ka tlawh lawk dawn a, a ngai rih lo" ka tih vang chauhin a dah let leh.


Api in a taksa langthei chin a lo hru mek a, min hmuh veleh Bawihtei chu alo nui sang a, "Doctor ilokal leh tawh law?" min lo ti a. Ka hmuh apiang hian hlim hmel a pu ţhin a, ka tluk lo khawp mai.
"Aw, ka lokal leh ang tiin ka tiam che kha. A dik em?" ka tih chuan lawmawm tawk lekin a lo bu nghauh nghauh a, mak tak maiin he naupang hian min tihlim tlat ţhin.


"Diktei maw ka ti dawn che a, ka hmanhmawh thu kha ka hrilh a, a rawnkal vat ka lo ring a"
"Iduh chuan kal rawh. Ka lo awmpui dawn nia"
"A ngai chuang lo a, ka sawichhuak mai mai"
"I chau tawh awm sia, ka lo chhawk ang che" ka ti a, kal se pawi tihna ka nei lo. Bawihtei thil zawhchian na remchang tak a ni ang a, ka tan a ţangkai hriat a neih ka ring tlat a ni.
"I buai awm sia, i awm chuan Bawihtei chuan nuam a ti tho ang a, mahse tih tur dangte ineih takin"
"Nei love. Iduh chuan i kalsan thei" kal nghal mai chu nuam a ti lo deuh nge a tawi a tawi a, ka thlem leh fe hnuah a insiam ve ta hram a, a kal tak tak dawnah pawh vawi tam tak a rawn hawilet a, a awm a nuam chiah lo a ni.


A kalbo fel hnuah khum bula ţhut pahin ka nui a, he naupang bula ka awm hian ka nihna diktak vek ka lantir ţhin. Diktei nen a kan awmdun laia ka awmdan ang mai kha niin ka hria.
"Vawiin lam eng nge ilo an? I khuasik leh em? I chau em?"
Lu a thing ne ne a, a ner suk hnu ah "Ka khuasik a reilote" a ti a, a chau vak tawh lo nih hmel.
"Na inei miah lo maw?" a lu a khawih leh a, chumi pah chuan "Tlem te" a ti zawi sep a, sawifiah theih siloh hian na a sawi chuan lo na ve deuhin ka inhria a, dimte in a biangah ka chulsak phah nghe nghe.


"Bawihte khawnge ipa hi?" ka zawhna avang chuan a hawi phawk hra a, hriat chu a nei chiang a ni.
"Ka hre lo" a hma aia zawi lehzual zawkin a ti a, mak ti hmel pu tawh lovin hrehawm ti hmel a pu leh tawh zawk.
"I hrelo tak tak amaw?" khuma ţhut chhoh pahin a kut ka vuan a, naupang damlo hetianga thil ka zawt vak mai hi a dik ber lo nang a hriat vat ka duh si a ni.


"Aw ka hrelo. Apa pawn min hrelo" a ti fel fak a, a zam viau pawn a nu angin a buai ve nuaih lo.
"Ngatinge? A duh lo che nge?"
"Duh e, mahse min hrelo a" a ti leh a, a pa chu Marcus a ni lo tih a chiang ta. Diktei hi mi awm khawlo a ni lova, kei hi a pa ka ni thei mai angem?


"Doctor ka zawt ve ang che aw?" a tih chuan ka lo nui mai a, ka zawhna kha a tana hriat nuam tak a ni lo a ni. Rilru a neiin a puitling reuh phian mai.
"Awle, eng nge min zawh duh chu ni a?"


A kutin a khabe a dawm a, chunglam melhin a in ngaihtuah vang vang a, keiin hmuhnawm ti takin ka lo enreng thung.
"Anu nen hian in in hria a mi?" naupang fing var tak hnen aţanga ka zawhna dawn chu mak ka ti lo khawp mai. Kan chevel a lo chik viau tihna a ni.
"Hre tehreng e"
"Engtin?"


"Delhi ah daih ania, vaiho zingah mawle. Public library ah ka kal ţhin a, chutah chuan ania...." kan inpal tluk lai vel ngaihtuahin zawi takin ka nui a, ala chiang khawp mai.
"Kan in su palh a, kan tlu dun a, ka chungah a tlu a ni zawk mah. Khatah khan kan inhria a, kan inhmu zeuh zeuh a, kan inhre zel a, zirlai te kan sawidun ţhin a, college a a hun hman dan te thui tawk tawk ka ngaithla vek ţhin" tiin ka hrilh a, mutchhuah chang pawh a min hrilh luih ziah ţhin te kha nimin lawk a thil thleng ang mai a la ni.


"A fel em? Lehkha a zirpeih ve em? A pass ţhin em?" a ti leh a, anu in a la hrilh lo ni awm tak a ni.
"Aw fel e. A mawl lo a keimah ang em chuan a fing lo thung" a lo nui vak a, a nui hmel ka hmuh chuan keipawh ka nui ve a, anu chanchin chu ngaihnawm a tih hmel kher mai.
"A ţawng duh a, a nui reng a, a rilru a na hma a, a ţahbelh bawk a, a ţah chang chuan kuah a duh ber" a lo bu nghauh nghauh a, a ţahbelh tih lai hi chu Bawihtei lawm tur a ka phuah belh a ni. Ala naupang a, a hrethiam chiang fak hran lo ang.


"A thinrim chuan ka min chum a, min beng bawk a, kut min thlak kha nuam a ti ber" awih loh hmel taka min en ka hmuh veleh "Tak tak" ka lo ti a.
"Midang chunga a thinrim pawn min hmuh veleh min chum vak vak ţhin. Inu chu mi hlim thei tak a ni bawk" ka ti a, kan inhmangaih hnu khan kan hlimna kha lakbosak kan ni ve ve a, Betty a rawnlan hnu phei chuan hlimna awmzia hre ve kan ang tawh lo. Mahse chu chu naupang bula sawi kher a ţul ve lo.


"Anu chu a ţap ţhin a" a ti chuai raih a, ka hmuh hmasakber khan hlim takin hun a hmang zui biklo tih ka hmuthiam. Hlimna ka thlensak ngai lova, fanu duhawm leh fing tak a neih hnuah pawh keimah vang bawkin a hlim lo chhunzawm zel a ni.
"Ka mu duh" a tih veleh khum aţangin ka chhuk a, a mu tur ka lo dawm laiin a ţhi awrh ka hmufuh a, Diktei piancham lawmpui nan a ka pek nen khan a inang chiah. Midangin an neih ve ka duhloh vanga ka siam chawp tir a ni nghe nghe.


"I ţhi chu a nalh hle mai" a ţhi awrh lai khawihin a hma ang chiah khan a nui ver ver a, chair a ka ţhut leh hnuah ka lam rawn hawiin "Anu min pek anih hi" a ti a, ka thuhriat apiang hi a mak vek. Midang laka a fa hnenah ka ţhi pek kha a hlanchhawng duh dawn em ni.
"Apa pek ania" a ti leh reuh a, naupang bulah dawt a sawi lovang, a fanu hnenah lehnghal. He naupang hian min nel a, a tan chuan a doctor bik ka ni a, sawitir ngei tumin thiam takin ka zawt a, naupang rilru thianghlim tak hian a hriat ang chu min hrilh a ni mai. Naupang thusawi hi dawt a ni thei lo.
"Doctor" ka hmai zawnah a kutphah tereuhte a rawn vai lauh lauh a, a kut chu ka lo vawnsak a, ka hriatduh ka hriatfiah tak avangin ka lawm a, ka hmangaih ber nen a kan fa ngei ka hmuh vangin ka hlim a, ka hlimna aiin ka thinrimna a nasa zawk daih thung. Vawikhat nan Diktei chu ka haw kher mai, vawikhat nan tak tak a ni.



CONT...

NEVER REGRET-7



"Khawnge i pi?" Jason lo awmreng chu hmulo derin Bawihtei zawk ka bia a, a ţhut lohna lamah ka ding a, Bawihtei kutphah a hum tih ka hmu ru reng tho.
"A haw tawh" a lo ti awlsam et a, api in a kalsan chu a vei vak loh hmel. Jason nen a an awm hi chuan a thlamuang tlat a, chu chu kei hian ka lo duh lo. Damţha se, school pawh kan veng lamah ka kaltir daih tawh ang.

Damdawi kan pek leh hnuah Bawihtei chu a muhil a, Jason pawh ka mitmei ru a, a chetsawn awm pawh ka hre lo. Bawihtei kut hum reng chungin a awm ngaiin a awm reng a, pakhat lahin a kut a vawnsak reng chu ning hmel pawh a pu chuang lo. In anna lai an landan leh mizia ah an ngah a, hrechiangtu ţhenkhat awm sela chuan an ringhlel ngei ngei ang.


"Inbia ang" a rawn tichhuak sup a, a ţhutlohna lamah zawk ka la awm reng a, min biak a duh nachhan tur awm ang pawh ka hrethiam lo.
"Kal tawh rawh. Bawihtei pawh a mut tawh hi"
"Min rawn zui loh chuan ka rawn pawtchhuak lui thovang che" tih leh kal chhuah a rual a, vin miahlo mahse a thusawi kha zawm loh chi a ni miah lo thung. Nurse duty pakhat ka nel ve deuh hlek bulah ka fanu min lo ngaihven sak tur a ka chah hnuah ka kal chhuak ve a, hlauhthawnna ka nei hran lo. Marcus nen a kan chungchang leh pasal ka nei ti a ka hrilh vang bawk kha a ni leh thovang.


"Bawihtei hi tu fa nge?" ka rinloh lutuk zawhna ka dawn avang chuan ka hamhaih deuh a, kan kalsan daih tawh ah ka lo ngai. Min melh run run a, nelawm tihna ka nei tawh lo. A hlauhawm zawk mah.

"Ka fa anih hi" ka ti a, zamlo ang taka lan ka tum ve. A fa a nihna hi sawichhuah ka tum miah lo.

"A pa ka zawt che" a ti leh nghut a, nangmah kha ti a hrilh a thinrim deuh a ankhum phiar phiar ka chak zek zek a, mahse a thiamlo zawk ka ni. A hmahun ka ngaihtuahsak vangah inngaiin thiam ka inchan tlat tho. Kei nilo midang te chuan thiam lo zawk min ti vek ang.


"Pa a nei lo" ka ti sep a, min huatzia chu sawilo mahse ka hmuthiam ve vek. A inrawlh peih mah mah.
"A ţhi awrh lai kha a pa in a nu a pek ni awm tak a ni" a tih chuan vuak chawrh ang mai ka ni. Ka nghing lawih a, ka mitsulh ni maiin ka inhria. Min ţhawn em vang chuan chet nachang pawh ka hrelawk lo a, chhanlet dan tur ka ngaihtuah lahin a bo duak mai si. A ţhi min pek ngei chu a hrechiang khawp ang le. Dangdai bik tur a a tihtir kha a ni hrim hrim.


"Engvang nge?" a ti a, a hmel en ngam tawh lo mah ila a aw aţang ringawt pawh chuan tuarna a langthei. Ka inti paukhauh a, nghet taka ka kut hum chungin ka dakchhuak a.
"I fanu a ni lo angah ngai rawh. Khatih hunlai khan i dawihzep em a, min venhim tumna leh min chelh tumna inei ngai lo. I chhungte i hlau a, an lungawi loh hlau reng rengin i awm a, an lungawi lohna tur pumpelh nan ka tlanbopui a, lawm viau zawk rawh. Hlawhtlinna i chan lai leh fakna i dawn mawlh mawlh lai khan nasa takin ka lo tuar a, khatih hunlai khan lo hrilh che pawh ni ila min mualphopui ngam chuang lovang. I chhungte hriat hmain min paihtir daih ang" ka ti ve salh salh a, beihletna neiţha ka inti khawp mai.


"Ka chhungte i ngaihdan kha a diklo. Min hrilh la chuan hrehawm i tuar lovang. Mawhphurhna ka la ang" ti ve bawk mahse ka ngaihdan ka sawhsawn chuang lo.

"Tuna i rilru ang hi a hma khan i pu lo. Mawhphurhna la turin i huaisen tawk lo. I chhungte vang a ni law mi Betty pawh i ţhen ngam miah loh?" ka hrechiang miah lo. Jason hi an nawrluih leh nawrluih loh ka hre lova, a duhvak loh ţhin lai pawh a a ţhen chuan lohna khan hetiang ngaihdan hi min neihtir a ni. An chhungkua chu ropuiin hausa viau mahse hmanlai zia an la kalpui anih dawn hi.


"Bawihtei hi ifa chauh ni lovin kan fanu a ni ta bawk a, enkawl ve theihna ka nei...."
"A ţullo" ka ti nghal tuar. An in a hruai phei chu ka phallo bur. Min hlat theih dan tur ber ngaihtuahin "I chhungten an lawm dawn chuang lo. Cathy intih kha lungawi takin enkawl zawk rawh u" ka ti a, a thinrim chu puak keh mai lo turin a insum nasa a ni. Kei ka nih chhung chuan Jason hian min tina dawn lo. Ka thinlung vawi tamtak tina tawh mahse a thinrim ber lai pawn ka him tih ka hria.


"Naupang duhthlanna a ni tawh ang chu" tih nghut paha kal nghal mai a tum chu tlawm thlak viau mahse a banah ka lo man bet a, ka hma ka sial aniang ka fanu hi tumahin min ţawmpui ka duh lo.
"Tum buai duh suh. Khawngaihin i ngaihven zui lo ang tih min tiam rawh. Kan nufa hian kan tibuai biklo ang che" ti lawm lawm mah ila a ban ka vawnna chu min lakthlaksak a, "Ka tiam thei lovang. A pawi khawp mai" a ti sup a, pawi ti tak tak hmel pawh a pu lo. Thinrim reng ang kha a la ni reng. Min kalsan a, tlanbo leh turah min ngai anga min veng nasa tawh viau maithei. Ka puitling tawh a, tlawm zawk nih duh tawh lovin ka tlanbo tawh biklo ang. Ka hmachhawn vek tawh ang.



Zanah Bawihtei ka riahpui a, bathroom ka lut zawk anih loh chuan khawiahmah ka kalsan lo. Zingah chuan nidang aiin a tho harh a, zankhuain a khawsik pawh a awm tawh lo. Hetiang reng anih chuan kan chhuak thei harlo ang. Buaithlak lo sela chuan damdawiin dangah awm daih se ka duh a, motor hman man nen in senso tur a tam leh dawn lutuk a, pawisa khawl lo ngah ila chuan ka sanchhuak daih tawh ang.


Hma takah Marcus a rawnlang a, ka lawm khawp mai. Jason lokal leh pawh nise a duh angin a awm thei bik lovang.

"In muttui maw?" hlim hmel pu tak chungin a rawn ti lut a, a tih ziah danin ka bul setah a rawn ţhu zui zat.
"Zankhuaa i biak theihloh chhante pawh hriat a chakawm alawm le"
"Min rawn biak itum a mi?" a ti hu a, thudik hrilh tumin vawi tam tak biak ka tum ngei alawm.
"Tehreng mai"
"Pawi ve. Zana ka ngaihthlak ai tunah ka ngaithla mai ang"
"Nakinah zawk le" ka ti daih a, Bawihtei a harh tawh a, Jason pawh a inhriatchhuah phah thei anih chuan a hriatah thilsawi vak theih a ni tawh lo. A hrethiam lo maw ka tih laiin hriatthiam chin alo nei ve nual a ni.


Jason pawh a rawnlang har lo. Bawihtei thil tur a rawn kensak a, ka lo ngaihven chiam duh lo.
"I haw chak tawh em? Bawihte" a ti dam thluam a, a samah a chulsak pah bawk.
"Aw hetah ka awm duh tawh lo"
"I loleng chak em? Cathy in lo leng rawh se atia" a tih leh takah chuan ka lo melh hrawk a, kei aia mak ti lehzual tur chu Marcus anih laiin mak ti hmel a pu hran lo. A awm ngaiin a awm reng a, a hmelah hmutheih a awm lo.
"Aw tunah aw" Bawihtei lahin phur takin alo ti ve bawk a, damdawiin hi a ning ve takzet tawh a ni.
"Nilo e. Vawiin kan enchhin che anga, i ţha zel anih tak leh naktuk lamah ka hruai dawn che nia" chhanlet ka chak zek zek a, Bawihtei leh Marcus vang chauhin ngawih ka chuh a ni. Ka thinrim ru ţun ringawt.


Duty turin Marcus nen kan inzui chhuak a, hetianga awm reng chu ţha ka tih loh vangin "Bawihtei chungchang ania" tiin bul ka ţan a, sawizawm dan ka hre chuang lo. Ka ngam chiah lo a ni ber.
"Jason khan a hretawh mi?" phawk hra in ka en a, "Fing min ti em?" tih pahin a nui vur vur a, "Chhan awm lovin i ţhian ka ni hleinem. I danglamna ka hmuh aţangin ka chhut thiam. Naute pa hi ka hmuh hunah ka hnek hrep ang ka tia, ka u ngei alo ni sia, ka ţhulh leh mai" zangkhai vahin a tih zawm leh a, a la lap thiam khawp mai.

"Ka rilru ka thlak chuang lo. Jason hi neih tumna ka nei chuang lo. Nupui hual a nei tawh lehnghal. Nun buai nuaih leh hahthlak lutuk kha hman ka peih tawh lo" tiin ka hrilh nawn leh a, ka la hmangaih reng a, Jason ang hian mipa dang ka hmangaih tawh dawn lo. Mahse ka tuarchhuak ţep tawh a, ka tuar ţha leh peih tawh lo.
"I thu thu le"
"Min pui char char rawh aw. Ka lamah ţang reng la, Jason-a hmuh lai chuan inhmangaih em em mai ila" ka sawilai chuan ka nui pah a, Marcus ka nei hi ka vannei khawp mai.


"A lem lem a inhmangaih chu thiam a har khawp mai. Ka hmangaih che a, ka hmangaihna che hi a lem ve si lova" muang ban charh a a tih chuan inthiamlohna chhe te ka nei ve. Mahse ţhian a tan chauh ka duh si a ni.
"Ţhiante chu kan inhmangaih vek alawm. Keipawn ţhian ang chuan ka hmangaih lutuk che" ka ti a, ka haider char char mai dawn a ni. Min puitur a ka duh chuan ka hlat thei si lo.
"Jason hian Bawihtei min laksak a tum ang tih ka hlau a, Bawihtei tello chuan ka awm thei lo" ka sawizawng pawh chuan ka hlau a, ka ngaihtuah thui ngam lo.


"A la lovang. Chutiang mi a nilo. A fanu anih angin a bula awm te duh ve bawk mahse laksak tumna che a neih ka ring lo"
"Betty in a hriat phei chuan a pawi khawp ang"
"A hre vat ang" ala ti zui a, min hnem lo chiang ania.
"A tina duh mai ang. Bawihtei hi ifa angin lantir mai rawh" ka ti a, ka hmeichhe hriata nasa ber pawlin a pasal hualin fa alo nei reng tih a hriat chuan afa nen a an inzawmna tih tawp a tum ngei ngei ang.


"Jason hian a hrechhuak tawh a, ka fa anga ka lantir chuan chhungkua kan buai vek ang"
"Eng chhungkua nge maw inneih bik le? In chhungte in hlau lutuk hi mak ka ti zawk" thinrim takin ka lo ti hlak hlak a, fate vau beh ching hialah ka ngai tawh.
"Kan chhungte chu an fel. Ka fa nilo ka fa anga lantir chu ka thei lo. Ka nupui nila chuan ka fa tak angin ka pawm thei ang mahse ka unaupa ngeiin a hrechhuak tawh a, ka fa ka lo tih ve chuan buaina lian zawk kan tawk ang. In ngaihtuah chiang rawh" min ti a, Bawihtei ţhi ka lo awrh tir kher kher kha a pawi em a ni.


"Min phatsan nghal ringawt a" ka tum zui bur a, ka thinrim ţun reng ringawt.
"Ka tana i pawimawh ang chiah hian Jason pawh hi ka tan a pawimawh. Mipa ve ve kan nihna angin kan lantir ngai lova, kan inngaih pawimawhna a nep chuang lo. Chhungkua kan ni a, a fanu chuhpui theihna ka nei lo. Bawihtei ka hmangaih loh vang ni lovin Bawihtei chungchangah chuan ka inrawlh ve a thiang lo. Min hrethiam dawn nia" ka kawchhung tawt lutuk chu ka thaw chhuak halh a, ka tan ţangkai zawm zel dawn lo sela chuan ţhian kan nihna tih tawp duh hial khawpin ka thinrim. Ho te te ah ka thinrim a, ka rilru buai lutuk vang a ni ngei ang.


Tui lo deuhin ka duty tluan ve zak. Damlo ho pawn ka hmel hmuh nuam an ti miah lo ang. Ka thiltih duh ka tih dawnin ka chhungte mitmei ka veng em em ngai lo. Tihsual kan neih a min ngaidam hmasa ber ţhin tu te an nia, tawp chin nei lova min hmangaih tu awmchhun an ni. Bawihtei min chuhpui ngam loh nan a ka sawi anga tih zawk kha a har miah lo. Ka diklo tih inhre mah ila ka indem duh chuang lo. Reitak ka lo thup tawh awlsam taka a hrechhuak hi ka haw hlur. Ka duty hun chhung zawngin hmel hlim ka pu lui thei miah lo. Ka hmangaih che min ti reng chunga hmeichhe dang bialnu anga nei tho tu hi ka hnaih peih tawh thlawt lo a ni ber.


Duty zawh veleh Bawihtei bulah ka kal leh a, nautelem lianpui alo pawm a, a harhvang leh tawhin a hmel a hlim a, a mitmeng pawh a nung sarh tawh.
"Tu lei che nge? I pi in leina a nei lova, Marcus a lokal rihlo bawk anga, tunge lei che?" ka ti khar khar a, ţhutthlengah ka bag ka thehthla hnawk a, ka dim loh em vanga a chhung a ka thil dah chhuata tla chu ka nu in a chhar nghal mawlh mawlh.
"Ka doctor khan" ti a ţi dak chunga min lo hrilh veleh "Thil a pek leh dawn che chuan lo la tawh suh. An in a hruai a tum che pawn duh miah suh. Ka sawi chu i hrechiang em?" ka ti ram hmak a, min hlau deuh chungin ban charhin lu a bu a, naktukah ka hruaichhuak anga, a school pawh ka sawn ang.



Zankhuain a khuasik lo leh a, a thaw pawh a pangai vek tawh. Muttheih loh a nei tawh lova, kan chhuah theih ka beisei tlat tawh. Zingkarah Jason leh nu tling pakhat an rawn inzui lut a, ka bula an rawn ţhut ve veleh Bawihte in min rawn melh nghal a, lu ka lo thing.
"Bawihte nizan i khuasik tawh lo nimaw? Cathy nen in inkawm thei tawh anih hi"
"I hmelţha hle mai" nu pakhat lokal ve chuan alo ti ve bawk.
"Dikte hei hi ka nu anih hi" Jason awmdan vel chu boruak ţhalo kan nei lo ang hmiah a ni mai. A nu chuan nelawm takin min lo nuih a, nuih let ve chuang lovin a kut a rawn pharchhuah chu ka lo vuan a, ka chibai rei lo.


"Bawihte ipi ka nih hi aw" a ti zui lehnghal a, ka duhloh ang hlirin thil a thleng mawlh mawlh reng ringawt. A chhanlet hmain Bawihtei chuan min rawn melh leh te te phawt a, ka lo tum bar reng tho.
"Ipa i ang hle mai"
"Duhtawk teh u" ka ti hmak a, an fapa midang neih tir tum reng chunga ţhat an chhuah vel reng hi ka hne.
"Bawihtei hriata a pa chungchang sawi reng ka duh vak lo" ka tih zawm leh a, mak min ti mahse pawi ka ti lo. Tun bak hi min hmu tawh dawn chuang lo.


"Bawihtei nen a in eitur Diktei nen kan va la ange" ka banrekah a hmer a, a hmer na khawp mai.
"Aw...le" a nu chuan alo ti ban charh a, keimah aţangin a mit a lasawn mang lo. Ka hnial hma hauhin min chhuahpui a, min hnukchhuak a ni zawk mah.


Corridor kan thlen veleh min paih lawp a, zingkar a ni a, mi an la awm lo hlauh.
"I awmdan avang hian Bawihtei chuhpui che ka chak zek zek phah. Thiamlohna tam tak ka nei, ka hria, min dem la, iduh leh min hau rawh. Ka laka i thinrimna midang chungah hrithla suh" a tih chuan ka lo nui hak. Ka lo nat tawhna ţhin tam tak hmu thei hle siin a nu hamhaih ringawt pawh a hmuthei lo chu anih kha. A nu aiin min hmangaih se ka ti miah lo. Eng ber hi nge ka beisei pawh ka inhre love.


"Min chuhpui mahla i chang chuang lovang. Inkhin rap rap iduh pawn ka ngam vek tawh. Bawihtei hian englai pawn min thlang zawk reng ang"
"Engvanga hlau thar ta viau che nge a nih? I fanu ngei kha i lo vau em ni?"
"I hriat vek a ţul lem lo"
"Thlak thleng vek tu che hi ka hrechak khawp mai"
"Natna. Natna hian engkim min zirtir, inrintawkna chenin min pe vek. Bawihtei kum6 chhung ka enkawl tawh a, ka dam chhung chuan ka enkawl reng thei ang. Min hmangaihna pawh lantir ngamlo tu hi ka ring theilo che. Lawkin, min lo hmangaih ţhin reng reng em?"
"Chhungte rinchhan takmeuh a ka awm lai kha chuan ka dawihzep, tun thleng hian ka inthiam thei lo a nih hi. Keimah vanga dem tur i zawngkual reng hi bansan rawh. Bawihtei leh midang nuam tih lohna turin awm tawh suh"
"I chhungte hnena fa ineih thu hrilh kher angai em ni?"
"Ka nu chiahin ala hria. Mi tam takin an hre thuai ang"
"He damdawiina ka thawk kher kher hi ka inchhir tawh khawp mai"
"Ka fanu ka hmuhchhuah theih nan a Pathian remruat ka lo ti mai a sin" a nui suk a, chumi hnuah ka hnung lamah awmin ka dar a vuan a, min nem kal a, dawr kan thlen thlengin chutiang chuan min nem a, dawrah midang an lo awm ve tak avangin min thlah chauh.


A leiduh a sawi zung zung a, a bulah ngawi rengin ka lo ding mawl ve tawp.
"Duh inei em?"
"Nei lo"
"Rilţam kha a nuam zawk a ni maw?" ka thinrim lutuk laiin sawitur dang a zawng a, ka thinrimna kha thil lian tham anih chuan ka lungawi hnuah ţha deuhin min sawipui ţhin a, ho te anih chuan a ngawih bopui ţhin. Chu chu hmana a awmdan ţhin a ni. Tunah hian tih leh a tum anih chuan a hlawhchham chiang viau tawh ang.


"I duhzawng tel ve lo mahse min kenpui tho a ngaih hmel"
"Ken senloh tur chu lei loh mai tur alawm" ti chungin a ken sen bak chu ka kenpui veleh tho. Tun ang hunah chuan Betty kan hmu dawn lo bawk a, a ruala kal ka hreh hran lo. A hmaihnawih nan ringawt pawh darkar tam tak a duh anga, a rawn thleng hman teuhlo mai.


"Ka sawi kha aw. Bawihtei leh midang nuam tihlohna turin awm suh"
"Ka awmdan tur lehzel min hrilh turin ka engmah ini lo"
"Ka ni tawh lo a, nih leh ka tum mek" zawhchian tumin ka ding det a, min kalsan nul nul thung. A kalchak bawk nen um dat dat pahin "Ini thei tawh dawn chuang lo a, tum buai duh suh" ka ti leh hram. A rawn leh hawi a, ka lo en dan chu a hlauhawm ve viau ang.
"Lut vat teh ang. Kan thil ken hi a dai ange Bawihtei nu" ka rinloh lutuk a sawi a, min koh dan te chu? A inher dawn laia a nui hmel te kha ka hmuchiang lutuk. A thinrim a reh leh hman tawh bik em ni? Hrechiang viauin inhre mah ila hriatchian loh ka lo nei leh ţhin.


Bawihtei ka hrilh chiang tawh bawk a, rilru nuam deuhin ka duty san. Zuilo turin ka ti a, ka thusawi angin a awm em ang chu maw.
"Mipa pa tawk hmuh hi chuan kan ţim sung sung mai alawm" duty zinga a mipa ber Ben-a chuan a ti mauh mai. Kan lo ner khum nang nang a, a zak der lo. Darthlalang te a inen in a hmai a chul hliau hliau reng a, mihring rilru putdan leh duhzawng hi alo in ang lo thei khawp mai.


"Marcus nen hian party naah kan inhmu zeuh zeuh lehnghal. A rilru hi hah hmel thei ropui sia, ka la kuah chial chial ang" a ti leh a, midangin an nuihpui laiin hriatchhuah ka lo nei daih thung. Ka biak theihloh zan te khan party naah chuan a awm a ni ngei ngei ang. A duh naah hi chuan a zahawmna chhe vek mahse pawi a ti lo tawp anih hi. Marcus chungchang chu an zawt zui nak nak a, Maremi takngial pawn "A hmelţha vur lo na a,a landan hi a pa a" a ti ve hial. Kan ward ah chuan a lar khawp mai. Ka lo intithei ru ve em em.


Bawihtei awmnaa ka kal leh dawn chuan Jason leh a chhungte tu emaw an lo awm loh nan ka rilruin ka ţawngţai mawlh mawlh. Ka thleng chiah chu ka lungphu a tawp lo chauh. Bawihtei ngei pawh a lo awm lo. Ka nu in khum a lo ti fel a, "Khawnge Bawihtei?" ka ti vak a, ka hawikual nghal vak vak.
"A doctor khan a hruai lawk anih kha"
"Khawiah? Khawiah nge a hruai?" ka ti chul a, ka nu pawh chuan mak a tih hmel deuh tawh.
"Ka hrelo. A him ang. Bawihtei khan a chak em a, ka kaltir ta mai anih kha. Hlau duh suh...." a tih mawlh mawlh laiin ka tlanchhuak. An inah hruai a tum tak kha. An inchhung a luhpui hma ngeia hmuh hman ka duh. Bawihtei pawh chu chiang deuhin ka hrilh lawk tawh sia.


Marcus ka bia a, "Bawihtei hmu turin ka rawnkal mek" alo ti hlauh.
"Garage ah lokal rawh. Keipawh ka kal mek. Bawihtei umzui ang. Jason khan a hruai daih, an in i hria tiraw? An thlen hmain nan hman tum ang" ka ti mawlh mawlh a, ka thaw zui hlawp hlawp. Tlan hah chungin ka ţawng nasa a, ka thin te a thip.
"Aw ka rawnkal" phone ka dah a, garage ka thlen chuan a lo la awm lo.


"Umzui kher a ţul em ni? Nuam a ti phian ang"
"Kan in aia midang in nuam a tih ka hlau" ka ti a, mahni hmasial tak chu ka ni. Ka inthunun thei tlat lo. Bike a ti nung a, a che reng reng chu muang ka lo ti.
"Kan umphak hunah eng nge itih chuan ang?"
"Ka la let ang. I awmdan tur kha hrereng ang che" tiin ka hrilh nawn a, Jason te in awmna lam pan chuan kan kal a, ka phal na la miahlo a an lo hruai ringawt chu ka lawm lo hle a ni. A pa ni mahse a enkawl tu leh enkawl lai mektu ka ni.

(Ka lo sawi nawn leh lawk. Ka dah hun hi ka sawichiang thei tawh lo a, ka hman chuan zan zawnin ka dah a, ka buai changin zankhat te ka awl a, zankhat aia tam awl ka la nei lo. Ka dah hman dawn loh chuan ka lo sawi ţhin a, a theih anga zinga dah ka tum anga, ka buai vanga ka hmanloh chuan min hrethiam ţhin dawn nia. Min lo chhiarsak tu te zawng zawng chungah ka lawm e ❤)


CONT.....

---

NEVER REGRET-8



"An hruaichhuahna a rei tawh awm hle mai, kan umphak mai ka ring ania" tih pahin motor engpawh chik takin ka en vek. Kan tlanrei tial tial a, motor hmuh tur pawh a vang tual tual. Ka lung a phu dup dup a, Bawihtei hian kan in aiin Jason te in nuam a tih zawk ka hlau a ni ber. Kei aiin thil ţha leh a lawm zawng a leisak tam thei zawk ang a, a sawi apiang a tihsak duh ang a, ka bulah awmchin tawk a hrelo ang tih te ka hlau.


Ka hawikual nasa bawk a, a sawh thut chu hmalamah ka bu dawrh a, helmet ah na takin ka intauh lehnghal. Marcus nui ri ka hre zawm zat a, ka tleirawl lai kha chu nise ka zak ve ngawt ang le.
"Fimkhur ta che" ka chal dawm reng chungin ka ti hlar a, tunah phei chuan motor dang tlan pawh a awm tawh lo. Hmun nalh leh nuam tak kan thleng a, ding khawmuang lovin gate lian tak lo inhawng huau ah chuan min tlan luhpui a.
"Khawilai nge?"
"Bawihtei pa te in"
"A pa a nilo" tih pahin ka chhuk a, alo nui ringawt.


Kawngkharpui panna kailawn a kan kal lai chuan a banah ka kuah a, a ţang nghal ţeuh ni maiin ka hria. Jason-a nu hi a ni ngawih ngawih a ni a, a hmuh laia ka kuah vel chu a duhlo pawh a ni maithei, ka thlah duh der lo. Inchhung kan luh thlengin ka kuah a, an lo ri laih laih a, Bawihtei an ţhut bial a ni mah zawk. Kan lut tih hria awm pawn an awm lo.


Marcus chuan aw a thian kharh kharh a, an lo hawi ta ţhap. Min hmuh veleh Bawihtei chuan hlau hmel a pu leh a, thu a awih lova hlau tur pawh a ni.
"Bawihtei kha a nu hian a ngaihtuah a, a phalna la hmasa lovin in hruai bawk a" a sawizawh rual rual chuan Marcus chu lawmthu hrilh mai ka lo chak khawp mai.
"A pi kha a awm tho sia, kan dil kha a tawk maiah kan lo ngai a, kan thiamloh anih chu. Lo ţhu ve phawt rawh u" an nu ber chuan alo ti a, ţhutna awl a kawk pah bawk.


An nu ber leh Jason te chuan Marcus ka kuahna chu an enduh bik riau niin a lang. Kan ţhut thlengin ka kuah a, kan ţhut hnu reivaklo ah ka thlah ve chauh. Bawihtei chuan en pawh min en ţha ngam tawh lo. Thilsual ti anihna a inhria a, a kun ngul tawh mai.
"Ala damţha silo a, rawn hruai ka tum a" muangchangin fiah fai takin ka sawi a, min hnial chi a nilo tih an hriat phah mahna.
"Ka pa rawn haw hunah ka rawn dah ang" Jason chuan lo ti ve bawk mahse ka ngaithla peih lo. A thusawi chu hrelo ang hmiahin ka awm a, bengkhawn duh lo luiin Bawihtei chiah ka en.


A rawn hawichhuah a ka mitmei a hmuh chuan min rawn pan vat a, ka malchunga rawn ţhut a tum chu phal lovin keimah zawk ka ding a, a banah kaia kalpui mai ka tum chu "A hmu ve duh a, lo nghah pui rawh" a rawn ti leh a, a chhungte ho chu awm lo sela kan inhau nasa viauin ka ring.
"A damchian hunah ka rawn kalpui leh ang" luhlul chhuahin ka ti ve tlat a, ka phalna la hmasa miah lova an hruai hi ka haw ber. A enkawl seilian tu ka nih angin min zah ve tur a ni.


"Ruatfel hei i nautelem" hmeichhe naupangin ţi dak chung leh min melh hrek hrek chungin a rawn pe a, min dan tum an awm tawh lo bawk a, ka chhuahpui hmawk hmawk. Nula pakhat lo awm ve lah khan huat hmel tak khan min melh a, an unaupa fa anih vang maiin an duh duh a an lak kawi theih tur a ni lo.


Ka hnunga rawnkal ve char char chu Marcus amaw tiin a bike dahna bul kan thlen veleh ka hawilet a, Jason zawk a lo ni.
"Khawnge Marcus?"
"A hlau che" ka inher leh hmak a, ke pawn ka kalpui tawh mai ang. Pen thum vel ka pen hman tihin min rawn kuaiher lawp a, min dim vak peihtawh biklo anih dawn hi.


"Eng nge ka tih ngai? Bawihtei ka awmpui ve theih nan hian eng thil nge ka tih ang? Inneih iduh em? Min nei duh em?" tiin vawikhatah zawhna tam tak min zawt mawlh mawlh a, thinrim hmel pawh pu tawh lovin mangang tak hi a ang tawh zawk.
"Inneih ka duhlo. Bawihtei hi rawn hmu tawh suh" ka ti hmak a, a beidawng lutuk chu ka khawngaih ve ţep hial a ni.


"Ka fanu ania, ka duh hunah ka hmu ve thei. I phallo reng anih chuan palai ka rawntir ang" a ti a, a thutak viau lehnghal.
"A rem dawn chuang lo. Engahmah hian kan inrem ve lo" ka ti a, Bawihtei kalpui tumin ka inher leh a, "Inrem lohna kannei lo. Kan la naupang a, kan dawihzep vang chauha inţhen kan nih kha. I induhna kha dahbo la min nei mai rawh. Ka hmangaih che, englai pawn, ka hmuhtirh aţang che khan tun thlengin" a ti bah nawk a, a reh vawng vawng a, hnathel thli in a chhem len thawm bak hriattur a awm lo. A thusawi zawha a thaw ri hrawk thlengin ka hre vek a ni.


"Min hmangaih emaw iti mai mai anih kha. Phurna leh thathona ka pek vang chauh che a nih kha min hmangaih emaw i intih. Betty ka nihloh vang chauh anih kha"
"Ka ti tawp ang. A chhe ber pawh huamin Betty hi ka thlah ang a, nang leh Bawihtei hi ka la lut ang che u. Laklawh deuha awm hi kan ning ţhin a ni lawm ni khah? Naupang rilru kan tihbuai hma hian innei mai ang" a tih chuan lu ka la thing a, ţawngka chuan hnar ngaihna ka hre tawh lo. Jason hi a thinrim ve vak ngailo ka tih tawh kha. A nupui chu tupawh nise an nuamsa ngei ngei ang.


Hnunglam atangin min rawn kuah a, chutih lai chuan car nalh tak hi a rawn tawlh lut riai riai a, min kuahna aţanga talchhuah ka tum a, ka thei miah lo. Car chhung aţanga kan thawhna damdawiin nei tupa ngei a rawn chhuah chuan min thlah chauh a ni. Kan lam hawiin nelawm takin a rawn nui a, mak ti a ang pham a ka lo en laiin Jason chuan "Ka pa" a ti sup a. A hma ai daihin ka inhmu hniam zawk. Thil mak a ni lo.


Kan dinna bulah a rawnkal a, Bawihtei hmaah ţhuin a biang ah a piai a, a hnar hmawrah a khawihsak zeuh bawk a, khuk ral daih mai ka duh tawh a ni.
"I hmelţha hle mai. I haw tawh dawn mi?"
"Aih damdawiin ah" tih pahin a bana venflon la invuah reng chu a hmuhtir a, a pu ka ti tawh mai ang, a diktho bawk a, apu chu pawitih hmel takin a lo chek tlak tlak a, venflon vuahna bawr vel chulsak heuh heuh chung chuan "Zanah i mut hlanin vantirhkoh alokal anga, a rawn tidam mai ang che. Naktuk ah in ah i haw thei tawh ang" a ti a, bawihtei dinhmun chiang takin alo hre tawh a ni.


"Ka kalpui tawh mai ang. A tlai zel a, a khuasik leh palh ang" ka ti a, ka theih tawp a ţawng nem ka tum ve. Kan hotupa ka be miau alawm. Heivang hi anih hi Betty pawn Jason neihloh alo hlau em em ni.
"Ni e, letpui mahla a pawi lo. In rawnkal ziah dawn nia, ka tunu tih a hriat hle mai" a ti fiamthu a, tihluihna takmeuhin ka lo nui a, "Jason va thlah rawh. Uluk taka i zirchhuahte an nia, duat viau ta che" a ti a, nui sun sun chungin in lam a pan a, a zir chhunga fa nei kan nih vangin fiamthu nan min hmang a ni.


"Lo nghak ru, a rei lovang" a kalsan rualin Bawihte in "Nu...ka doctor kha apa ami?" a ti nghal chat a, pha thei pawh ka ni tawh lo. Ka thuruk hi tupawn an hre ta vek dawn anih hi.
"Ni e. Ipa a nih kha" nui ver ver chungin dak vahin min rawn en a, "Ka ţhiante pawn min nuih tawh dawn lo ami?" a ti leh a, pa a neih loh vangin pa te chungchang an miss in ziak tur a a tih khan a ziak ve thiam lova, tunah chuan a thiam ve tawh dawn a ni.
"Nuih tawh lovang. Ipa chu doctor ţha tak alawm a nih" a kuta ka kaihna lam chu a then lauh lauh a, a hlim takzet a ni. Duham tak ang maiin ka fanu hlimna ber hi ka um lawm lawm mai dawn em ni?


"Lokal ru le" a hma lam seat kawngkhar a chhung aţangin a rawn hawng a, ka ţhutluh hnuah Bawihtei rawn lut ve in ka malchungah a ţhu a, chhungkaw pangngai kan ang ve khawp mai. Kan tlanchhuah dawn laiin Marcus ka hmu a, Bawihtei chuan apa a hmu a, midang a ngaihven tawh lo. Inchhung pawhna kailawn tawpah dingin min lo thlir reng a, motor tukverh darthlalang phen aţangin ka en a, ka khawngaih takzet. Keimah vangin helai thleng hi a kal a, keichuan ka kalsan leh daih si. Zanah ka bia anga, ngaihdam ka dil ang ka ti rilru a, chutianga ka tih hunah chauh chuan rilru nuamin ka awm ve thei ang.


Damdawiin kan thlen veleh ka chhuk sawk sawk a, Bawihtei ka kai a, Jason pawh be leh tawh chuang lovin ka kalpui nal nal.
"Nu...apa kha..."
"Ka phalna la lovin zui tawh suh ipa pawh nise" ka lo ti hmak a, min chhang zui lova, a ngui nghal bur bawk. Kan luh leh lai chuan nurse duty ho pawh chu makti awm pawn an lo awm lo. Bawihtei an lo chhawnchhaih a, Bawihtei pawn hlim deuhin alo chhawn a, apa a chhunna lai ve a ni. A thinrim khat khawp mai. Apa ang maia zaidam leh khawngaihna ngah a ni. Keichu ka zaidam ve lo.


Ka mut ţhattir a, a chhuak thei dawn tawh tih a hre bawk a, a zangkhai vah tawh mai. A rawn inlan leh ka rinloh laiin eitur kengin Jason a rawn lang veleh a, damlo awmpuitu dangte pawh hian mak min ti zozai tawh ang. Nitin a rawnkal a, Bawihtei nen lah an inpawh em em a, ngaihdan diklo leh maksak tak tak an lo neih te a hlauhawm.
"Nangpawn engmah ila ei loh kha. Haw tawh rawh" ti chungin a thil rawn lei chu ka laksak tho.
"Naktukah a chhuak thei tawh ang a, zingah ka rawnkal hma dawnnia" Bawihtei mu lai samah a chul a, ani chuan alo nuih ver ver a, a chhuahsan hmain a chalah a fawhsak leh a, Bawihtei chu a lungawi khawp mai.



Kar khat chawlh ka la a, Bawihtei damkawr in lamah ka awmpui rih a ni. Chawlh ka dil pawhin min lo phalsak nasa khawp mai. Ka nu leh pate ka nutei te inah chaw eiin an kal a, bawihtei nen a chaw kan eifel ve chuan a thim tawh. Current a awm lo bawk nen duh angin a chet zung zung theih tlat loh.


Kawngkhar a ri reng a, lut tur a vawithum vel ka sawm hnuah ka kalh tih ka hrechhuak. Hawng turin ka kal vat vat a, Jason a ni tih chu hria ila ka hawng lo maithei. Haw rawh intih chi anih loh vangin kan inzui lut a, kan in hi a len loh vangin choka leh ţhutkhawmna pawh a inhnaih. Ţhutkhawmna lamah kan kal a, bati pahnih kan chhit chu eng awmchhun a ni mai.


Nidanga a inchei loh dan deuhin a inchei a, lukhum te a khum bawk nen, ka hrechiang chak chuan "Khawnge i kal a?" tiin ka zawt ta tawp.
"Kan picnic a, ka nauin min sawm lui a, ka kal ve mial a" Bawihtei chu a malchungah a ţhu fel than tawh.
"Nau engzat nge i neih a?" kan inhriatchian loh dan chu hetiang vel hi a ni. Kan pahnih hian kan inhre hlur a ni mai.
"Pahnih, ti ila pakhat hi ka phir pui, min sawm tu chu. Ka u leh kan te ber hi hmeichhia"
"Nih chu. Cathy kha tufa nge kha?"
"Sandra, kan upa ber" ka zawt zui duh lem lo na a, pasal nei kir leh aniang tiin ngaihdan ka lo siam. Hetiang hi hrawn an hrehawm duh zek.


"Betty a lokal ve em?"
"Kal lo e"
"I hruai ve ka ring a" in hmatawn a ţhu kan nih vangin awmdan ka hrelo chu ka che sek a, ka mal inkarah ka kut ka rawlh a, current kan nei lo hlauh chu ka lawm angreng.
"Ka thlah dawn"
"Thingpui iduh em?" ka ti leh daih. Kan inkawp ţan tirh lai ai pawh khan awmdan ka thiam lo zawk. Kan inhau miau lova.
"Duhlo. Khawnge i nute?"
"Chaw an ei chhuak" kan ngawi vang vang a, vanneihthlak takin bawihte in a school chanchin leh a nautelem ho hming leh an nihna te a hrilh mawlh mawlh.


A fanu thil sawi chu uluk takin alo ngaihthlaksak a, an pafa a ka enreng lai chuan chhungkaw nih ka chak phah a ni. Ka mut hmapui ţhin vangin Bawihtei mut a chhuak tawh viau a, a sawi laklawh laite chuan a chhing leh diar diar ţhin. Sawitur ala ngah zia ka hrereng mai si.
"I mut a chhuak ami? Muhil phawt la, naktukah i sawizawm leh dawn nia"
"Kan bulah ilo riak dawn mi?"
"Dawn love, mahse ngaithla turin ka lokal leh ang" a ti dam thluam a, Bawihtei pawh a insiamrem a, Jason-a malchung lukham ah hmangin ţhutthlengah a mu a, reilote ah a muhil thuai.


"Khawi hmunah nge i tlanbo? Tu nen nge?" min zawh nawn leh ka rin tho kha a ni.
"Ka cousin bulah ka kal, chennai ah" ka ti a, Bawihtei ber a hrechhuak tawh a, engmah ka zep tawh dawn lo.
"Marcus awm ţhinna anih chu"
"Ni e, kan inhriatna pawh a ni lawm" a zungbun min leisak ka bunlai chu ka khal niap niap a, Marcus hi ka tana miţha ber a ni.
"Bawihtei hi fahrah tir reng kan duh lo ve ve in ka ring a"
"Neih che pawh ka duh chuang lo" ka ti ţha leh. Ka ngaihtuah nasat pauh leh pasal neih hi ka hreh a ni.


"Ka thiltih engber kha nge i ngaihdam theihloh hriat ka duh?"
"Ka sawi tawh kha. Hmeichhia te hian kan chunga mipa thiltih ngaihdam mai theih, theihnghilh theih miahloh kan nei ţhin" ka ti a, Bawihtei ka pawm a, pindan ah ka suan lut a, chianglo ruaiin apa a la lam tho a, a lainatawm khawp mai.


Ka chhuah leh chuan hahdam takin alo ţhu a, a bulah pawh ţhu duh lovin a ngaiah bawk ka ţhu leh.
"Keimah vanga Betty i thlah hi a ngai miah lo. Nei la, kan rawn tibuai lo ang che u"
"Ka thlah tawh" a kut a rawn dahchhuak a, zungbun a bun tawh lo. Amah hian thlah mahse Betty chuan a thlah ve dawn chuang lo.
"I ngaih ang hian engmah a awlsam lo" ka ti leh hrawk a, "Kan innei thei lovang" ka ti zui leh a, ţhutthleng hnung nghengin a lukhum hma a pawt hniam a, a rilru a buai ve hle ni tur a ni min chhan ngaihna a hre lawk bik lo.


"Kal tawh rawh. Engtikahmah kan sawifel dawn chuang lo" ka ti sep a, a ţhutna aţanga a thawh nghal mai vangin a kal tak tak turah ka ngai a, mahse ka ţhutna bul chhuatah a rawn ţhu. Ka malchungah a kut a dah a, ka lo ip chawih chawih thei.
"Ka hmuh leh ni aţang che khan nanglo chu midang neih ka tum lova, midang neihtir che ka tum lo bawk. Fa ka nei tih ka hre lehzel a, pa nei lova kum tam tak lo awm tawh ka fanu chu pa neihtir ve ka duh. Nangmah chiah inngaihtuah lo khan Bawihtei ngaihtuah la, min nei mai rawh. Bawihtei vang chauh pawh hian min nei rawh"
"Bawihtei vang tho hian mi min neih i duh?"
"Nilo. Ka hmangaih vang che in"


A tihziah danin a hmui sir lam a pet zeuh a, "Ka hmangaihna che hi a dik. Ka mutthilh dawn thlengin ka ngaihtuah che a, enchhinna leh harsatna tam tak kan paltlang tawh a, Bawihtei i thuhruk vanga ka huat viau che pawhin ka thawhhlim a ka ngaihtuah hmasak ber ini leh tho. Kan intawn tirh aţanga tun thlengin, nanglo hmangaih ka la neilo" a thutak run a, kan inkawp lai pawh khan hetiang hian thil a sawi ngai lo. Dawt a sawi ka ring lova, kan inneih theih nan a a phuah kual vel mai mai a nilo tih a langchiang reng. A awmdan a sawi ang chiah chuan ka awm ve a ni. Enchhinna tam tak kan tawk a, harsatna leh inpumpekna thlengin kan paltlang vek, chuti chung chuan zing ka thawh hlim aţanga ka mut dawn thlenga ka ngaihtuah ţhin chu amah hi a ni.


"Ka ngaihtuah nasat pauh leh hlauhna ka nei nasa a, i chhungten min pawm angem? Kan dinhmun inthlau tak avang hian harsatna kan tawk angem tih te thlengin?"
"I hmaah ka ding ang. Hlauhna leh natna thlen tu che chu ka hmachhawn ang. Inneih a chhungkaw din ka duh" a ti bur tawh a, a chang chuan a luhlul ve theih zia ka hrechiang.
"Hunin ala hril ang chu"
"Hun rei nghah a ţulna a awm lo. Palai ka rawntir ang. Lo inngaihtuah buai tawh suh. Ka lo tifel vek ang" a din rualin ka ding ve nghal a, haw a tum tawh niin ka hria.


"Inu leh paten eng nge an sawi?" inneihna pawm tawh ang maia ka awm chu ka inhau ru nghal mawlh mawlh. Awlsam te in ka pawm thei lovang.
"Ka thu thu. Ka thuthlukna an pawm vek. Lo mangang suh" ka kawnga kuahin ka chalah a fawp a, hetianga kan awmlohna pawh hi a rei ve ta.


Pawn lamah thawm a awm a, ka nu te an rawn lut zui a, ka pa a kai a, kan dinna piahah a ţhut tir a, Jason pawh a ţhu veleh. Haw tawh mahse pawi kan tihloh nen.
"I loleng alaw? Iva fel ve, thingpuite ilo in tawh em? Current a awm bawk si lova, a hrehawm khawp mai" ka nu in a ti nghal siam siam a, ka pa bulah a ţhu ve nghal zat.


"Ka rawn lut kawi a, chaw in lo eichhuak daih lehnghal a, in puar bawk maw?" ka nu a biak dan vel avang chuan ka lo ner suk.
"Puar khawp mai. Bawihtei amu tawh mi?"
"Aw ka muttir tawh" ka lo ti vat a, ka nu hmelah chuan zawhna tamtak ka hmuthei.
"In lo haw chauh na a ka haw mai ang" a din rualin ka lo ding veleh nghal. Ka che reng reng chu a robot vek. Jason hian min thunun vek rih. A la hma alawm ti mahse a haw ta tho a. Kawngkhar thleng ka thlah a, a kal dawn ah "Ka thusawi kha a tak tak vek anih kha. I chhungte lo sawipui rawh. Palai in an rawn ţhawn thut hun a an lungphu a pangngai theih nan" a ti leh kher a, chhang lo mah ila lu ka bu nghauh nghauh tho.


A kal liam hnu chuan ka ngai ta tlat a, nidang zawng aiin ka ngai zawk daih. Inchhung ka lut a, ka nu chuan "In inkawp ve deuh em ni? Bawihtei a ngaihsak ka ti reng a" alo ti ngei a, pindan a lut tlang mai lovin ka ţhu veleh rih a, mit chhing tlat chungin "Bawihtei pa anih kha" ka ti ta nge nge a. A reh ruih vangin ka meng riai riai a, rin aiin ka hmu pangngai. Ka nu phei chuan "Ka ring reng a" a ti duh lek chauh.


Inneih chungchang thlengin ka sawipui vek a, neih ka duhloh thu ka sawilang tel bawk. Ka pa in "Bawihtei pa chu inei tur a ni. Pa a neihloh vanga a hlimloh ţhin zia te i hrevek. Damdawiin aţanga inrawn chhuah hnu chuan a hlim em hi. Mahni chiah an inngaihtuah ngai lo. Nu leh pa chuan kan nawmna aiin kan fate nawmna leh hlimna kan ngaipawimawh zawk tur a ni" a ti a, ka chhangzui ngam ta lo.


Rit luk chungin ka mu lut a, Bawihtei muhil lai chu ka thlir reng a, khum bula engin a chhun phak chin a hmel chu ka en vang vang ringawt. Ka fanu hlimna aiin ka hlimna tur ka lo ngaihtuah nasa zawk em ni? Mahse reitak ka lo tuar ve tawh a, hlim hi ka phu ve tho a ni. Ka nu leh pate chuan nei turin min nawr ngei dawn a, ka fanu ngei pawh hian nu leh pa bula awm chu a duhzawk ngei ang. Keimah leh keimah bawk hi a ni ka buaina chu.


CONT....( Ka tlai hret a, zankhat dan ai chuan tlai hret hi a zia zawk intih ka ring hehe)

---

NEVER REGRET-9



JASON'S POV



"Inneih tawh chuan inţhen leh mai mai a thiang tawh lo a" ka nuin a ti ban charh a, Diktei awmdan a hmuh khan a ngaina chiah lo a ni. Ngaina lo mahse a neitu tur berin ka duh chuan eng nge pawi? Anneih ve loh tur ah duhthlanna siam an tum ve sek ţhin hi a ţul ber lo.


"Ka nei ang ka tih chuab damchhung a daih turah ngai rawh. Naupang awmpui iduh chuan a nu pawh i pawm tel angai"
"Ipi leh pute chuan an remti chiah lova" a ti leh a, kapa erawh ala ngawi reng. An pindanah sawipui turin ka kal a, hmasawnna em em hmulo mah ila beidawn ka tum chuang lo. Hmeichhe pakhat ka tichhe vek thei lo. Ni lawm ni?


"Betty an duh a, ka hmangaih miah lo. Hun reitak an mi duhber hi ka kawp lui tawh. Neih chakna pawh ka neih theih miahloh hi" ka tih laiin kawngkhar a rawn intheh hawng rawp a, Damon a rawn lang hlawl. Ka mamawh khawp mai.
"Hriat ve loh ka nei ami?" ka bulah rawn ţhu thla hnawkin ţhutthleng nghenchhanah a ban a kham duai a, nui vur vurin min en a, hriat thawi chu a nei.


"Palai tirh a duh a, kan hriat lohin fa alo nei reng" ka nu bawk a ni. Rikru buai hmel zet chungin a meng khup lap a, Diktei a hriatchian hma kha chuan a phur ve khawp kha. A hrechiang tawk lo mai mai a ni.
"Tir ula nimai lawm. In va hreh hmel ve, a nupui neih vanga intihlum tur an awm ami?" Damon chuan a ti khar khar a, fiamthu mahse a vai erawh chuan a ni lo.


"Ipi leh pute kan ko a, an rawnlang duhlo a"
"An telloin mo kan lawm dawn anih chu. He thilah hi chuan in thu ber. Midangin in fate chunga thuneihna annei lo" sawifuh inti takin a rukin min rawn siai a, ka lo nui ve suk. A rawn haw lo ang tih a hlauhawm takzet.


"Upa zawkte thu ngaihchan a ţha, nghak phawt ang" ka nu in a tih leh laiin Damon chuan "Ru mai rawh Jason. Chhungkua leh hospital a hmingchhe hluai a ni mai. An duhzawk aniang ru pawp rawh" a ti leh a, ka pa in "Damon ţullo tak tak kha sawi suh" tiin a khap vat. Ka nu in Diktei mizia ţha atih loh vangin ka fanu tak tak anih loh te a ring kual leh a, Diktei dawtsawi thiamlohzia ka hre chiang. Thuthlukna siamtur chu keimah ka ni. Ka nei phawt ang a, an mil loh leh indan pui mai ka rilruk a ni.


"Palai intirh duhloh chuan ruk mai loh chu tihtheih awm hek lo. Jason rukru a nih loh nan palai tirh a ngai anih chu" ngaihsam zeta tih pahin a ţhu ţha sauh sauh a, ka unaupa hian ngaihzawng leh nupui neih lam a ngaihsak tawh lem lo a, a chhan ber pawh kan hriat tlan tawh kha.


"Ipi leh pute chu lokal lo mahse ka be leh ang a, palai turte pawh ka be dawn nia" ka pa in a tih laiin ka nu chuan a chal dawmin lungngai awm takin a awm a, ka nu ka tih lungawiloh ţumkhatna a a ni awm e. Kei lahin ka hmangaih hi chan nawn leh ka tum tawh lo bur. Ka nei anga, ka tum rilruk reng ţhin angin chhungkua ka dinpui ang.


Ka pa thuthlukna kan hre tawh bawk a, Damon nen kan inzui chhuak a, ka darah kuahin inhnuai lamah min chhukpui a, kei aiin a hlim anih hmel.
"Kha kha ni mai lawm. An phalloh zel leh ru hmiah la, inei a ni mai. Kan hmangaihte hi kaltir mai mai loh tur. A theih chhung chu chelh ang che. Ka nu a zah vaklo a mi?"
"Bawihtei laksak a hlauh vang a ni ber. Rawn awm sela chuan a inthlahrung duk reng ang. An ngaih ang hi a ni dawn lo"
"Ţhat chu. A sual tak leh zan mutnaah i kuah duhlo anga, a sim mai ang" a thusawi avang chuan ka nuichhuak hawk a, Abi leh Sandra kan zawm ve a.


"Iti lui tlat ami? Kan ina alokal laia a awmdan te kha, Marcus nen khan an in ngaizawng amaw ka ti zawk a, khatiang hmeichhia, Sandra nangpawh awmla ngaihdan i siam thiam vek ang" a ti zat zat a, chhungkaw tinah hetiang hi chu a thleng chawk ang, mizo kan nih chuan kan farnute hian sawitur an ngah thei riau.
"Lo buai lo ula" ka ti sup a, an thinrim zawk mah emaw tih tur a ni.


"Marcus nen an inkarah khan eng emaw a awm chiang alawm. Sandra damdawiin velah i hmuhdun chuan ilo chik dawn nia" ala ti tho.
"Engemaw i hriat reuh ni, i pawmlo anih chuan inhnamhnawih lo mai rawh. Ngawirengin thlir liam rawh" ka tih hnuah chuan min chhang ta lem lova, a tum zui bar thung.


"Nei rawh. A lerhsan tak che leh i tawrh tur alawm. I unaupa ngei pawh chhungte hmuh laia kuah tlat ngam te chu" Sandra in bul a ţan veleh. He thilah hi chuan ka thu ber a, engpawh sawi se ka pawisa lova, ka rilru ka thlak dawn lo.
"Sawisel sak reng suh u. Abigail nangpawh mi ina la awm ve tur inih kha. Marcus a kuah tih mai mai a ho e, hmeichhia chuan in ţhianţha te chu inkuah thuak thuak vek alawm. Nangpawn i kuah ţhin tih ka chiang" Damon thusawi vanga an hmel danglam chu hmuh a nuam khawp mai. Ka tum tawh chu ka ti tlang ang. Englai pawha ka lamţang turin Damon ka nei bawk.


Zanah ka pindan a ka awm tawh hnuah Betty a rawn lang hlawl. Rawn luhtlang tir ţhin lo turin ka hrilh ngun tawh.
"Midang pindan a luh tlang tawp hi a mawi lo.."
"Sawifiah rawh" a vin nghal tuarh a, a ling ţha hlarh hlarh khawp mai.
"Zalen tumin rilru ka lo siam a"
"Eng anga zalenna nge i sawi? Ka dah zalen tawk tawh viau che iti lo em ni? Min ngaihsak duh miahlo chang pawn ka enliam mai mai che a, ka thinrimna pawh ka tilang duh ngai lova" a tihlai mek chuan a thinrim bawk aniang, hah taka tlan hrep ang maiin a thaw hlawp hlawp mai.


"Inţhen ang. Nupui ka nei dawn" a ding khawng auh a, chawp leh chilhin a mittui a tla ti ila a dik ber ang. Kan awmdun chhung hian sawiselna tur ka nei bik lova, ka hmangaih ve thei lo hi thil pawi ber a ni. Amah hmangaih tak tak tu a phu ve a ni. Harhchhuak thut ni awm takin ka hnaih lehzualah rawn dingin ka ban a vuan a, ka huphurh ber hun a thleng dawn niin a lang.


"Inţhen ka duh lo" a ti a, a aw pawh a khur nasa.
"Kan inţhen a ngai. Nangchu ka unaunu ang chiahin lawm ka en che. Sandra leh Abi te ang hian" ka ban chu kuah nghet lehzualin ka mitah min en a, "Mahse ka duh che lawm. Ka kianga i awm hrim hrim hian nuam ka ti. Ţhian leh unaupa ang chiahin ka en ve lo che. Chutiang ringawt chuan ka en ve thei lo che. Ka kawppui ni turin ka duh che. Kan thih hma zawnga awmdun char char ka duh. Inneih a fa neih thlengin" a ti mawlh mawlh a, unaunu pahnih lai ka neih vangin hmeichhe khawngaihna leh hriatthiamna ka nei nasa. Ka nep vang a ni hran lo. An kianga ka awm tam avanga ka zirchhuah a ni. Betty pawh khawngaih mah ila ka hmangaih ten ka rilru an luah hneh zawk tlat tawh.


"Min duh vang ringawt a ka kianga awm duh ini lo. Hospital neitu fapa nilo ta ila, doctor ni lovin mi mai mai ni ve ta ila, en pawh min en duh lovang. Ka hrechiang che a, min hauh bur a, min ta neih bik mai mai a ni. Hnehtu nih iduh a, Diktei leh mi zawng zawng hmuhah ita bik ni awm takin min lantir a, min duh takzet anih chuan min hriatthiam i tum tur a ni. Mahse hriat inei lo. Ka duhzawng leh ka ngainat zawng thil ho te te pawh hriat inei lo. Keimah leh ka nihna bak ngaihven inei lo" thawk lak hrawk pahin a biangah ka dawm a, a mittui tihfai sak chungin "Nangmah ah hian hun khawhral ka duh tawh lo. Ka thil sawi zawng zawng kha kan inneih hunah kan la hrechhuak dawn thova, chutih hunah chuan ina lehzual zawk ang. Ka tihpalh a ni" min kuahna aţanga inla hrangin ka din hlat a, a insehruh nasa viau mai.


"I fa a ni ngei em tih i chiang a mi? Fa inei tih i hriat hma kha chuan i kalpel ve mai mai tho a ni law mi?"
"Sawitur ţul chu kan sawi zo tawh. Diktei leh ka fanu i enliam theih ka beisei" ka lehkhachhiar na dawhkan bula chair ka pawt tawlh a, ka ţhut rualin lehkhabu hnai ber ka keu a, min chhuahsan vat turin ka duh ber. Dawhkana Bawihtei thlalak intar enin ka nui suk a, a thlalak ka tar thlap tawh. Ka cherang ve viau mai.


"Tupawh hmu la, Diktei leh i fanu pawh ni sela nupui hual inei tih hre tur inia sin. Innei ula, in hlim leh hlim loh kan hria ang chu" a pen ri ka hriat tawp rualin na taka kawngkhar inkhar thawm ka hre leh. Ka ritphurh lakbosak ang huai ka ni. Ka pite (ka nu nu leh pate) chuan ka ngaihdan min ţawmpui ţhin a, ka pa nu leh pate hi a harsa tur an ni. Puitling ka ni tawh a, hna ka nei tawh bawk. Rawnkal duh lovin min vau zam tum mah sela ka thu kaltlang pui tho ka tumruh hle.




DIKTEI POV


Palai an rawnkal a, ka rin aiin an cherang daih. Ka nu leh pa thuthlukna chu naute pa chu pasal atana neih a ni mai. Ka nutei te thlengin ka nu leh pate thu chu an pawmpui a, ka tlanchhiatna ka cousin, a remti lo ber tur a ka ngaih pawh a phurin lo haw ngei ngei a tum thu a rawn sawi.


Jason a lokal reng a, Marcus a reh em em thung. Damdawiinah kan inhmuh fuh chuan pangngai takin min bia a, a hranpain min zawng chuk tawh ngai lo. Phone aţang pawhin min rawn be ngai lova, thil kal vel dan hi engmah ka la sawipui lo. Ka hmuh leh veleh sawipui ka tum ru ran thung.


Bawihtei a phur em em a, a pa rawnkal reng te chu nuam a tiin a chang chuan a mutsan phal ngai lova, an inawm chawt a, Jason lahin ning hmel a pu bik chuang lo. An inthlahlel em em reng zawk a, a rawnkal ngun a, min ngaihsakna a lantir thar leh hnu chuan keipawn zawi zawiin ka ngaina thar leh a, ka hmangaih tawh ţhin a, ka la hmangaih reng bawk vangin ngainat leh a harsa lo. Ka thinlung a luah leh hma bik ka ti mai, hriatloh karin ka lo ngaina leh reng tawh. Bawihtei a hruaichhuak leh tawh lova, an in lama hruai tumna pawh a nei lo. A hun a nghak tawp a, a dawhtheihna chu ala ngai reng a ni.


Hun tam pawh a liam hmain inneihni tur chenin an tifel der mai. Jason chu rawnkal reng turin ka duh tawh rih lo a, phallo mah ila Bawihtein a phone leh ţhin a, zanin pawh hian a rawn lang leh a, Bawihtei leh ka nu leh pate a kawm kawp a, an piahah ngawi rengin ka lo ţhu mawl ve tawp. Ka haw tawh lova, ka ngaina ka tih tawh kha. Chuti chung chuan a hma ang khan ka la pawh lutuk thei rih lo. Kan inhmuh leh tirh vel ai kha chuan zia tak hi a ni tawh.


Marcus hnen aţanga ka message dawn chu ka hawng vat a [Lo chhuak lawk. In in chhakah ka awm] tih zawng hi alo ni. Ka ding nghal hluai a, min lo en ţhap lehnghal.
"Dawrah kan kal lawk ange" tiin chhuanlam ka siam a, reilo tura min tih hnuah ka chhuak a, kan in leh ţhenawmte in inkara a bike chu ka hmu nghal chat. Kan inbe mumal lo rei tawh a, insawifihlimna hun tak a ni.


"Ilo lut mailo anih kha" ti mah ila a rawnluh loh chhan ka hreve tho. Jason-a car inhung reng chu keimah ang bawkin a hrechiang. Bike ah ala ţhureng a, a bulah lai deuhin ka ding ve. Kan inhnaih bawk aniang a rim pangngailo thlengin ka hrethei vek mai.
"Christy alo haw dawn em?"
"Haw dawn e. Ka nu leh paten nei turin min ti a, ka fa neihna anih vang hian ka neih hi ţhain an hria a" ka ti sep sep a, diktak chuan inthiamlohna ka nei ve tho. Nuam lo ka tiin hmeichhe dangah tal a rilru pe se ka ti.


"Engtik aţangin nge chawlh i lak ang?"
"Ka hrelo. Chawlh ka dil hma lovang"
"I phur tawh em?"
"Aih, ka sawi kha, ka duhthlanna a nilo" ka ti ve ţang ţang. Duhlo tak tak ila chuan tuman min tilui thei lovang, chu chu Marcus pawh hian a hrechiang a, chuti chung chuan insawithiam dan mawlh ka la ngaihtuah tho.


"Lenchhuah iduh em?" a ti leh daih a, kan in ka en a, ala inkhar ţha thlap.
"Ka inchei bawk si lova, bakah zanah chuan kalna tur em em pawh a awm lo" ka ti nawi niaih a, "Inchei lo mahla i nalh reng. I pasal tur hi a vannei takzet. A phi chung hi ka dem lem lo" a ti fiamthu a, min nei dawn chung chian phur surh angin a awmbik chuang lova, a sawi el ni berin ka hria.


"Tunlai chu party ah te an hmu fo che a, irim hi a diklo zeuh zeuh bawk a, doctor nihna nen a inrem hranpa lo ania"
"Doctor te hi an fel famkim thei bik hleinem. Ka thlahna che ah i ngai dawn nia, ka felfai duak hunah hmalam ka pan ve tawh tihna a ni ang" a ti a, ka ngawihreng vangin "I huphurh em?" a ti leh a, ka ngaihtuah zawng ringawt pawhin ka hik chuai chuai theiin ka hria.


"Tehreng mai. Biakin hawngin a ni dawn bawk silo. Kan chhungkua aţanga kal tur chu tlem te chauh an ni anga, Jason te hian hmelhriat an ngah hmel sia, lokal an tam phei chuan a zahthlak lehzual anga, ipa te pawh an lokal anga"
"Ka unaute nen" alo ti zeuh a, nau hmeichhia pahnih a nei tak e. Marcus hi an mipa neihchhun a ni ve.
"Nia, engkim mai hi ka huphurh vek" ka thaw zui hawk a, min nuihzat deuh chungin hmalamah a bawk a, mipa nge nge chu an nat pawn an insum thei khawp mai.


A rilru puthmang tur ka hriatthiampui a, Bawihtei min enkawl len puitu zawk ang a ni a, a fa tak tak ang chiahin a hmangaih ve bawk. A nupui ni tura min sawmna leh ka hnar felna pawh ala reiloh laia hetiang thil a thleng leh rum rum mai hi pawi ka ti.
"Ţhian kan la ni thei tho ang tiraw?" ka ti a, ka inthlahrung ve a ni.
"Thei e."
"Betty i hmu ngai em?" ka hmungai miahlo hian ka ngaih a ti ţhalo letling zawk. Ka hmaa dinga min ankhum bawrh bawrh ka ring ţhin a, tawrh huamin nitin ka kal ţhin.


"Aw, ihlau deuh a mi?"
"Hlau e. Betty ber ka hlauh loh ten. Mualpho deuha min siam ka hlau ţhin a"
"Siam bik lovang, mualpho nachhan tur ineih loh te chuan a hlauhawm loh. A huat che pawn i enliam ve ang chu a hmangaih neitu tur ini miau a" ka kut a rawn ban a, a zungbun min pek ka la bun reng chu mak a ti deuh niin a lang.


"Inneih zungbun diktakin a thlakthleng ţep tawh a, phelh tawh rawh"
"Kan inneih dawn ţepah chiah ka phelh ang. Pawisa kan neihloh dun lutuk laia min lei kha ania, a hlu ve alawm"
"Lut tawh rawh, an ngaihdan alo ni lo ange" tih pahin a insiamţha a, ka thusawi zawmlo deuh deuhin a ţawng a, a mak thei thut thut ania.


"Kan inneih dawn ni ah chiah ka phelh ang" ka ti leh ţalh a, Marcus ka hmuh hian inneih ka huphurh lehzual daih. Jason ka ngaina leh tawh hle si. Ka ngaina mai ni lovin ka hmangaih alawm. Mahse Marcus ka khawngaihna hian hrehawm min tih tir. Ka rilru mumallo lutuk hi ka hrethiam tawh bik lo. Ka awmdan inthlak thleng thut thut hi amak lutuk. Ka pasal neih ni ah ka phelh anga, ka phelh rualin rilru maksak leh mumallo deuh deuh ka put ţhin hi ka tireh nghal vel bawk ang.


"Dam chuan naktukah kan inhmu dawnnia, lawmpuina hlan hmasabertu che ka nih duh vangin engkim a fel tih ka hriat veleh ka lokal"
"Ka lawm e. Nia kan inhmu ngei ngei dawn nia, chuan ka tihpalh" ka ti a, a ţhut ţhat rualin ka tihziah danin ka kuah thuak a, min lo kuah let ve chuan ka thawveng huai. Harsatna ka tawhin a ni pawn min thlamuan nan min kuah ve ziah thova, tunah ka pasal neihtur hi a tuar tih ka hria a, a tih angin ka ti ve a ni mai.


Min namsawn a, mak ti deuha ka awm laiin kan inlam a en reng ka hmufuh a, kan awmna hi kan in nen a inhlat lova, pawnlam light in min chhun pha chang chang bawk. Ka hawiphei ve a, Jason ka hmuh chuan ka khawng awt theiin ka hria.
"Anih aw" ka tih hnuah hmanhmawh takin ka kalsawn a, keini chuan kan inkuah khan pawisawi ah kan inngai hran lova, Jason-a lo ngaihdan tur chu ka hre lo le.


"I haw dawn mi?"
"Ka ngaihtuah deuh che a, rawn ngaihven che ka tum deuh. Mahse i ngaihtuahawm loh kha" a ţawngdan chu a ngeiawm lek lek a, ka chhungte mitmei ka ven vangin ka nuiliam mai mai ringawt.
"Anih leh lut ila" thil thleng ka hrelo der hmak hmak chu hmeichhe nasa tak pawh ka ang. Jason hian insawifiahna a ngaithla duh tih hrereng mah ila pawisawi ah ka in ngai tlat lo.


"Khatiang thil kha ka hmuh chhunzawm loh beisei ila"
"Ka ţhianţha neihchhun i thik dawn chuan min nei lo maila" zawi sepin ka lo ti let a, kalpelin kawngkhar ka hawng zui zat bawk.
"Ka awmdan hmuhnuam itih tur chiah nangpawn min hmuhtir rawh" a ti hriam hrak a, min pawt let nawk dawn maw ka ti hman mahse a ni chu kei aiin a upa in a puitling tawh zawk a, a che ve rum rum lo.


Inthurual ni awm takin kan lut dun a, engmah ka lei lo tih ka hrechiah. Kan kut ruak vek chu ka nuin a en tih ka hmu reng a, hnunglamah ka thukru ringawt. Kan inneih hma lehzel chuan tumah hian min thunun lo se ka duh khawp mai. Ka ţhian ngaitheilo tur pasal ka duh miah lo bawk.


(Ka patea te an lo zin a, a fate an harh bawk si, rilruah a lut mawh khawp mai. A phuailuai anih chuan min lo hrethiam dawn nia )


CONT.....

---

NEVER REGRET-10



Inneih a zo a, rilru hmin zan lo chungin Jason te inah ka lawi lut ve ta. Ka mi hmuh apiang ten hlim hmel an pu vek a, keimah ber ka la buai tlat si. Ka nu leh pate hlim hmel ka hmuh khan min khawih bik a, vawikhatnan an hlimna tak tak ka thlen ve ni ah ka in ngai. Nau ka pai thu an hriat a, ka pa thinrimzia leh ka nu manganna zawng zawng te kha, an duh ang ni thei tur a ka hun ţha neih a bo vek tawh ah ka ngai a, min hmangaih em vangin ka tana awm nuamlo turin an awm chhunzawm miah chuang lo, an beidawn zia erawh ka hria.


Mahse vawiin ni khan an hlim a, min chhuan zia ka hmu veleh thei a ni. School naupang ka nih laia, a ti ţha ber ka nih ţhin laia chhuang taka min en ang mai khan min en leh a ni. An fanu in mite ngaiha mi ţha chhungkua ka neih vang em ni min chhuan em em? Jason chiah ka hrechiang a, an chhungkaw mize diktak ka hrechiang miah lo. Ka fanu nawmsak nana hrehawm tuar tur ang maiah ka inchan a, Jason nen a kan intawn avang leh Bawihtei ka neih vang hian ka inchhir lova, ka inchhir ngailo bawk ang. Pasal atana ka nei hi ka inchhir leh si mai angem ka hre lo a ni.


Tupawhin hlim takin hun an hmang liam a, khua a thim tak hnuah min hawsan duak a, tlem a zawng an la awm. Kan pindan turah ka ţhu ngui lap a, ka dinpui Christy erawh bungraw ţhenkhat remfelin a buai hle. Bawihtei awmna ka hre lova, an la lawr kual nasa viau niin an sawi. A hah lutuk chuan a thawhah a chhuak leh mai ang tih ka lo hlau khawp mai.


"Lalruatdik hei an hmuduh che a, chhungkaw thlalak khawm naah chiah an tel tir a, an lungawi lo" ka ţhutna bulah Marcus hmeichhe pahnih kuahin alo ding reng. Ka in ngaihtuah nasa lutuk a, an lokal lai pawh ka lo hre lo. An la upat loh hmel a, ka hmuh awm pawh ka la hrelo.
"Ka nau duhtak te annih hi" dinglama ding zawk kuah hnaih pahin "Rebek" veilama mi pawh a hma ang chiahin a ti leh a, "Ruthi" a ti a, camera a keng bawk nen, an thil tum ka manthiam kuarh tho. Suit nen a inthuam zaih a, a lian bawk nen, a inhmeh khawp mai.


"Inneihni a thlalak loh tawp chu nakinah sawitur kannei ve lo palh ang. Thlalak kan duh a, Mama kan lo inhruaitir" Rebek-i zawk chuan alo ti bawk a, mama an tih chu Marcus ni awm tak a ni. Ka sir ve ve ah an rawn ţhu a, thla min laksak tu tur Marcus a ni bawk nen, ka zam ru khawp mai. Ka bana an vawn ve ve lai chuan ka nui lui a, thlalak alo chhuah hunah chuan ka nui lui tih an hre kher lovang.


Thlalak zawh hnuah hmeichhe pahnih chu phur takin an inzui chhuak a, an intiat bawk nen phir ni awm tak anni. Phir erawh anni lo.
"I nalh khawp mai" a naute tlanchhuah hnuah pawh ka hmazawnah camera kengin ala ding reng a, thil remfel malh malh tu Christy mit pawh kan la tawh.
"Ka lawm e. Dahthla ve tawh em em la" ka kut vai paha ka tih chuan camera a en a, lai deuh a nui chungin a thukru vut a, sawitur a vang lutuk tak tak.


"Marcus chu iva nalh vel ve a, naktuka neih ve nghal mai tur pawh vawiin hian i hmu nual ang a" Christy a rawn inrawlh ve ta hlauh a, ka thaw nghal huai thei.
"Hmuh ka lo tum miah lo a" a ti tawi tak a, min rawn melh leh zawk hnu ah "Ka naute hruai haw hma an ngai a, naktuk lamah ka rawn lang leh ang" a ti a, a inher vut a, a chhuak nghal nul nul.
"Bawihtei chu awm lo se Marcus hi ka duhpui zawk ngei ngei ang che"
"Thil thleng theilo tur leh awmze neilo sawi suh" ka lo ti hlar a, mi pakhat chauh ta ka ni tawh. Ka hmangaih ber ka tih ve char char ţhin ka nei a, ka van hlim si lo em. A chhan sawitur pawh ka hre chuang lo. Kan hun lo la awm zel tur ka ngaihtuah nasa lutuk hian min ti lungngai niin ka hre ta ber.


Jason te lamin hmelhriat an ngah bawk a, thilpek kan dawng hnem kher mai. Chutiang a hmuh chuan Bawihte in nuam a ti lehzual a, a nui hmel a bo mang lo. Mi an haw rem hnu ah Bawihtei muhil pawm chungin Jason a rawn lut a, "I bula i muttir duh ka ring a"
"Duh e, ka fanu ka mut hran tir daih ten"
"Amah hian a duh chuan pindan hran a siamsak theih ang"
"A ngai lo" Bawihtei a muttir rualin ka mu ve a, ka kuah hnuah mit ka chhing a, ka mut a chhuak miah lo.


Bathroom a luh rualin ka meng leh a, pindan chhung ka hmuhtheih ho ka enkual a, Bawihtei thlalak intar ho pawh ka hmuh hmaih lo. Nakin lawkah chuan kan nupa thlalak pawh a intar ve tawh ang a, keimah chiaha Bawihtei ka lo enkawl rei tawh avang hian awmdan ka thiamlo ang tih ka hlau khawp mai.


A inbual zo bathroom aţanga a lo chhuah chuan ka lo hmulo der a, college ka kal hlima ka duh ber leh ka ngaih em em ţhin, englai pawha min ngaihsak reng ţhin tu kha ka nei a, biak pawh ka be ţha duh si lo. A ruk chuan a na ve vawng vawng maithei. Mi vannei tak ni chunga lawm nachang hrelo mi angah ka inchan a, chutiang mi nih chu ka duh chuang der lo.


A rawn mut ve hnuah Bawihtei chalah a fawp zeuh a, min be peih biklo nge ka awm ve lo ang hmiahin min ngai niin a lang.
"Ngatinge min neih? Ka zawt ang che ka ti reng ţhin a, kum reitak i kawp tawh nen a in inhualna pawh pawisa lo khawpin palai irawn tir rum rum a" light a off a, dim light ala en tho vangin a che vel ka la hmu thei tho.


"Pa nih ka duh. Ka fanu tana pa ka nih ve theihna tur kum6 chhung min dan sak a, ka hriatchhuah veleh min dang thei tawh lovin ka siam che anih hi"
"I bialnu hi i ţhen chiang meuh maw? Buai leh nuaih tur a inneih ka peih lova, chutiang a awm leh anih chuan ka kalbosan leh hreh lo che" ka ti a, Betty reh hmak hian ka ngaih a ti ţhalo a, chawlh ka lak ni ah ka hmu a, ka rin anga ka hlim loh tur thu min hrilh a, ka hmuh zawm leh ta lo.
"Bawihtei vang chiah a innei ah kan in ngai rih anih ber hi. A dikna chen a awm ang. I mize danglam tawhna hi pawm ka zir mek a, ka hah lehzualna turin awm suh" min ti let daih a, ka danglamna hi amah vang chiah a ni.


"Rin bur che a har tawh. A hma ang bawk khan min venghim zo leh dawn lova ngaihna ka nei tlat. Ka nei che hi ka inchhir ang tih ka hlau khawp mai. Nei lo theilo chein min siam miau a"
"I inchhir loh nan theihtawp ka chhuah ang. Tun ţum chu ka rin ngam" a mut lohna lama ka inher laiin "Muttui le" a ti a, zawite in ka lo 'umm' ringawt. Min kuah emaw min khawih a tum lova, ka remti dawn lo tih a hria a ni. Mipa dawhthei an sawi chuan a hming hi a lang ve zel theiin ka ring.


Zing nichhuakin pindan chhung a rawn chhun lum hnuah keipawh ka harh a, banga sana lian intar ka melh hmasa ber a, dar7 alo ri tawh. Ka zuangtho zawk a, ka chau ve deuh bawk a, thawh ka lo hai palh a ni. Bathroom ah ka tlan lut a, zingkara inbual hi nuam ka tih ţhin vangin hmanhmawh deuhin ka inbual tho. Jason leh Bawihtei te thawh lai pawh ka lo hre lo.


Ka ni hmasaber tur a ni a, zam ru deuh chungin inhnuai lam ka pan a, ka thlen dawn aţangin an thawm ka hre tawh a, an thovek tawh aniang. An tho hma hlawm lutuk chu ka mak tih tawk a tling. An ţhutkhawmna hmun ka pawh thlak lai chuan Jason-a nu (ka nu ka ti ve tawh mai ange) chuan min lo nuih ver ver a, keipawn ka nuih let ve. Ka tih hrilhhai ţhin dan te kha ka ngaihtuah naah a rawn lang a, ka zak ru chem chem.
"Bawihtei chu apa nen an walk a, an kal hla lovang. Iduh leh khawlaiah khan lo hmuak rawh. A phur khawp kha" alo ti a, Bawihtei pu pawhin "Nizan a mutthilh dawn thlengin a sawm a, a kalpui anih kha. A sim phah em lovang chu maw" a ti ve bawk a, ka phalna la hmasa lova an hruaichhuah changa ka thinrim theih zia an hria nge ni an lo sawi vat vat mai.


"Choka lam kan pui zawk ange, an lo haw ve mai ang" ka ti a, midang inah hi chuan kan lai huih vek anih hi.
"Sawmi a awm a, i puih duh ţalh chuan a lawm ngawt ang" ka nu in a lo tih leh takah chuan choka lamah ka kal ta zawk a, an awmpuinu mai bakah Jason-a farnute pahnih an lo awm a, thingpui no dawmin an lo ti ti ni awm tak a ni. Sawmi chuan "Lo ţhu rawh ka lo siam ve ang che" a lo ti vat a, hmeichhe pahnih chuan hriam hrakin min lo melh a, min ngaina lo tih a chiang khawp mai.


"Bawihtei khan track suit a lo nei miah lova" a upa zawk, Cathy nu Sandra chuan alo ti a, leisak ka tum pawhin a duh ngai lo.
"A duh ngai hleinem. A ngaina lo"
"Zingah Cathy hak a hmu a, a duh leh sia, leisak rawh. Duhlo mahse inven nan chuan kawl ve tur alawm. Cathy ta kan haktir ringawt anih kha. A thawmhnaw hi a ui vw thei sia" nin hmel lek lekin a ti leh a, leitur zawn nghal rum rum ka duh tak tak. Midang thil neih awt ngawih ngawihin ka siam ngai lo.


"Awle vawiin ah leisak dawn nia, Cathy thawmhnaw pawh chu ka sufai anga, ka rawn pe let ang" ka ti ve ta nge nge a, an pahnih chuan a hma aiin an mitmeng a rum zawk. Ka hlau eih lo. Sawmin thingpui a rawndah takah chuan chair pawt tawlhin ka ţhu ve a, an naupangber Abigail chuan "Sandra hei nimin a ka lak ho chu. Ka phone camera hi a laktlak a sin. Betty hi nalh vel tawp" ka huat tur tawk lek a tiin a nui pah hak hak a, ka hrelo der hmak.
"A langsar alawm nimin khan. A nuiduh sia, fel reuh bawk sia"
"Nia Betty chu a bula awm anuam e" ka hriatphak ngei turin engkim an sawi. Betty an ngainat vanga min hua nge an nih an unaupa in fa a neih thut vang pawh ka hre love. Nikhatna aţangin in hrang chan mai ka duh nghal rum rum hial.


"Sawmi tihtur a awm em? Ka lo pui ang che"
"Aih angai lo. Ka tizo thuak tawh. Ka pu hi a kalhma duh ţhin a, bakah i chau hrih ang. I hahdam hunah min pui chauh dawn nia" alo ti zung zung a, a fel hmel khawp mai.
"Chau hran lo. A reh vek tawh" ka tihlai mekin Bawihtei aw ngei maiin "Nu" a tih ri ka hria a, apa in a pawm a, choka ah an rawn lut ve mek a ni. A thawmhnaw haklai ka lo en a, an hmuh lai ngei a phelhsak ka chak khawp mai.


"Jason vawiin i chawl dawn tiraw?"
"Aw karkhat ka la chawl thei" tih paha ka bula chair a rawn pawh tawlh ve lai chu a farnute chuan an lo enduh viau a ni.
"Bazar ang" ring leng lawngin ka ti ve ngat. Mi runluih te chu ka thiam ve tawh lutuk alawm.
"I peih te chuan. Eng nge ilei duh a?"
"Track suit Bawihtei ta tur lei ka duh. A hak lai hi Cathy in a ui viau a ni awm e"
"A ui kan tih loh kha. Cathy ta a hawh kan ti anih kha" Sandra in a rawn ti vat a, inneih tukah hetiang hi mi chhungkuaah a thleng miah lovang. Kei lah ngawih mai mai ka lo tum bik si lova. Tumah hi an farnuten chaltlai takin an lo ţawngkhum ve nghal miah lovang. A hma daih aţangin min haw tawh tih hriat reng reng.


"Bawihte lokal rawh ka bual ang che. I thawmhnaw pawh hi kan su nghal dawn nia aw" ka ti a, thingpui ka in zo tawh tho bawk nen Bawihtei ka kai a, Jason chu a khawngaihthlak zawk. Hetiang hi a beisei lawk bik miah lovang. Ka khaikhawmna chu a farnute pahnih leh kei hi tumah thiam bik kan awm lo tih hi a ni. Nimin lawkah kan innei a, kan inneih tukah ka huat tur deuhin an lo awm nghal a, keiin ka runluih ve zel bawk a, Jason anga mi rilru tluang tan chuan thubuai rem a har viau ang.


Bawihtei kan pindanah ka kalpui a, a thawmhnaw hlihsak pahin "Midang kawr ha tawh suh aw. I awt ve anih chuan min hrilh mai dawn nia aw" ka ti a, a bu ve nghat nghat a, thil awmdan kha a manthiam ve deuh a nih hmel hrehawm a tih ve hmel tlat. Ka bualfai a, a thawmhnaw kan phawrh sa ho ka hai a, a haknuam tur ka haktir a, a sam ka khuihsak laiin Jason pawh a rawn lut ve. Thiamlo mah ila thiamthu sawitur ka neih ve tho vangin in hauh ka cho nghal at.


"Chhunah nge tlaiah bazar itih?" pangngai taka a tih chuan ka lo hawi phawk hra a, a farnute ka tihdan avang khan min hauh ka lo ring deuh a.
"Tlai dai ah ni rawh se. I farnute hian min ngaina lo tih sawilawk la chuan inneih kan lo remti miah lovang" keimah zawkin bul ka ţan leh ta.
"An ngaina mai ang che, an awmdanin awm ve lo la, nge i sual let zel dawn" a nuih vur vur laiin ka lo tum hmak. Ka bul hnaihah a rawn ţhu ve tehmial a, ka darah a ban a dah bawk.


"Ipi leh pute kha an la dam iti sia, min hmelhriattir lai khan an awm ve lo reng reng. Ka sawi awmzia tak chu inu nu leh pate chauh kha ami la dam?" ka ti a, thinrim pawn ka sawi tawh lo. Ka hmu ve si lova ka hrechiang chak mai mai.
"An lokal ve lo"
"Ngatinge?"
"Hmundanga an zin lai ania"
"Nih chu. An rawn haw hunah a hranpain inleng kan nei ţha leh dawn a ni maw?"
"Anih hmel"
"Peihawm loh ve" ka ti nang nang a, zin pawh nise inneih ni chuan rawn haw ve mai tur ania ka ti rilru tho.


Chaw ei kham hnuah tih tur nei chu an chhuak sap sap a, a farnute khan min be leh tawh lo hrim hrim a, a phirpui a unaupa erawh kha chuan min be reng. Bawihtei a fiam reng bawk a, Bawihtei pawn a ngai tih a hriat. An inang em em a, a farnute ang lo takin a fel bik khawp mai.


Chhunah Christy a rawnkal leh a, kan pahnih chiah a kan awm hnuah zingkar a thil thleng kha ka hrilh vek.
"In va sual hlawm ve" min ti a, thawmhnaw kan la phawrhchhuah loh te min phawrh pui leh.
"Khatianga min lo ti ringawt kha mak ka ti lutuk a, ka beisei lo hrim hrim"
"Itih let ve zel duh dan kha nangpawh mak an ti ve tho ang che. Mo sual nih hi a zahthlak ania, inzir nasa rawh. Dawhtheih te a ngai a, loh theihloh tawpah lo chuan chhanglet tawh suh" min ti a, ka pawm zawng a ni ve lo.


"Mo sualna chiah an hria a, kan mi hrawn te a zir hi lawm anih ve. Kan awmna ngai miahloh ah kan lawi lut a, kan insiamrem ve zel zawk ania, ţha deuhin min lo dawngsawng se keipawn ţhat ka chhuah mai ang chu"
"Chutiang chiah chuan an sual pawn ţhat chhuah char char la an sual rei peih lovang"
"I tawn ve loh vang anih kha" ka ti hlak a, ka thlavang a hauh lo lutuk chu ka thinrim hlur mai.


"Thuruk ka hrilh ang che. Ka hriatdan min zawt miah suh"
"Sawila" a hawikual te te phawt a, chumi hnuah zawi sepin "Sandra hi midang fa anih hi. Thisen inzawmna pawh annei lo"
"Maw..."ka tih rualin ka ka a rawn hup chawt a, ka thaw a sa vek thei.
"Engtin nge i hriat? Inu aţangin mi? Tu hnen aţangin nge i hriat? Ka awihlo" zawi deuh zawkin ka ti zung zung a, a nu hnen aţangin anih loh chuan hriat theihna a nei lo.
"Mi hi an ţawngthei. Chubak ka sawi dawn lo. Jason te hian an hriat leh hriat loh chu ka hrelo mahse thudik a ni"
"Chuti si khati khan min lo ti vel vak vak a"
"A chhungte laksak a hlau tawh tihna a ni mai. Unauten amah aia midang an ngaihsak zawk ang tih hlau chi kha aniang. Chuvang chuan ngawirengin dawh tawp tawh ang che" a ti a, mak ka ti lutuk chu ka la pangngai thei chuang lo.


A ngailo kan ti chung chungin Jason chuan min rawn pui lui tlat a, a rit zual deuh a sang a dah angaih chuan kan tih tir a, thleh fel tur chu Christy nen kan ti vek. Jason ka hmuh apiang hian ka thuruk zep tur kha ka hrechhuak ziah a, zawtchiang chak viau mah ila a lo hre biklo anih chuan a thil hriatloh ka hrilh tihna ania nga, an chhungkua ka tibuai lehzual mai mai.


"Hei zungbun...." a ti hman chauh a, "Khawi" tih pahin a kenlai ka pawhthlaksak nghal. Marcus min leisak kha a ni. Kan inneih zungbun ka bunna bulah ka bun ve a, bun reng pawh ka tum bik chuang lo. Ka phelh rualin engkim ka theihnghilh ang kha ka tia, tunah ka bun lehnghal chu a ni sia. Ka phelh lai pawh khan ka theihnghilh chuang lo.
"Ava hlu awm ve" a ti nghut a, a lawm chiah lo a nih hmel.
"A bo ka hlau alawm" ka ti daih a, ka hlau tak tak bawk.


"I rilru hruaipeng thei chu bo rawh se, a pawi lo" a ti a, thildang min tihsan a, he zungbun hi chu a hre hneh viau tak ang. Pasal ka nei ka tih khan ka hmuhtir ngun emai. Thinrim nan a hman ve dawn chuanloh vangin ka bun lui tlat tho. Marcus hian ka tan a pawimawh ve tih hria sela ka duh vang a ni ber. Ka ngaizawng e ka tihna a nilo. Ka ţhian anih anga a pawimawhna lantir ka duh a ni. Ka phatsan dawn lo a ni tih hi lantir ka la duh reng tho.


CONT....

---

NEVER REGRET-11



Choka ah Sawmi ka puih mawlh mawlh laiin Abigail a rawn lut a, kan la inbe lo chhunzawm reng a, pawi ka ti em em chuang lo. Hna ka zawm leh thei ţep tawh a, hnazawm vat a, intih thawven vat ka duh. Ka inkhung â lo chauh tawh.


Fridge a rawn hawng rawk a, tui a in hnuah a bag aţangin pheikhawk a rawn phawrh a, dawhkana dah chawrh pahin "Bawihtei lo pe rawh" a ti a, school a kal a, hruai turin Jason a kal mek a, a hmuh hun chuan a lawm viau ang mahse "In sawi leh reng dawn chuan a ngai lo" ka ti a, a hrilhhai lek lek niin a lang.
"Ka u fanu chu engpawh leisak ila ka tha a na lovang. Chhuah lehnghal ka ngaih vangin lo pe mai turin ka ti che. I pe duhlo anih chuan zanah keiman ka pe mai ang"
"I thu thu le" min melh hrawk chungin pheikhawk a la let. A chhuak zui nal nal a, kan inhmu ţha hleithei lo a ni. A huat kha a ho ve tho.


Bawihtei leh Jason an rawn haw a, Cathy pawh a tel. Thingpui ka lo lumsak a, Bawihtei chuan nidang ang bawkin sawitur a ngah leh khawp mai.
"Abi a rawn haw tawh em?"
"A kal leh tawh"
"Pheikhawk a dah em? Min rawn hrilh a?"
"A keng leh" ka ti tawi tak a, ngaihdan lo siam ve mai rawh se. Min chhang zawm duh ta bik lova, kan boruak a hrechiang a, a manthiam vek ang.


An in zawh hnuah inthlak turin Bawihtei ka hruai a, Jason pawn min rawn zui.
"Cathy i ngaihven tel ve thei angem?"
"Kei aichuan Sawmi ngaihven a duh zawk alawm" ka ti a, ka hnungah a kal a, thawk a la hrawk tih ka hria, a zaidam a, a thinrim ve chuan thinchhe pangngai thinrim aiin a nasa daih zawk dawn tih nen lam ka hria a, mahse Cathy hian min nel ve lova, a thawmhnaw ka thlakin nuam a ti lo.


Bawihtei ka thlak mawlh mawlh laiin "Hna hi chawlh hlen i duh em? In lama Bawihtei ilo buaipui hi ţha zawk dawnin ka hria" a ti hman chauh a "I nupui ka nih vang hian min thunun vek tum suh" ka ti nghal hlar a, hna kal vat vat ka chak tawh nak laia.
"Keimah ka thawk tho sia, lehkha lo zirtir te, i awm chuan nuam a ti zawk dawn bawk a, ka chhungte bula awm tam i mamawh tel"
"Hna neih ve ka duh zawk. Bawihtei ka enkawl theihloh phah chuang lo. I hriatchian kha" ka lo ti hmak a, nawrluih chi ka ni lo reng a ni.


Cathy thawm a hriat tak vangin Bawihtei a tlanchhuak a, Sandra vang pawn ngainat har ka ti. An chhungkaw zinga mi ni ve miahlo inti neitu taka a awm te chu ka laka ngeiawm a chhuah chang phei chuan sawichhuah mai ka chak ţhin. Sofa ah a rawn ţhut ve lai chuan phone ka lo khawih a, min hnaih veleh ka hmet thim daih. A hmuh tur khawp a pawi engmah a awm chuang lo.


Ka ke hlang chho va amah hnungchhawn zawnga ka ţhut veleh ka kawngah a rawn kuah a, reitak hnu a ka hmuh leh hnukhan min kuah leh se ka ti ţhin anih kha. Ka taksa ţang lutuk pawh ka inthlahdul a, ka duh ţhin ang taka kan awm chu nuam ka ti.
"I inpeih fel hmaa ka nei lui che hi ka thiamloh a ni. Kan inneih chuan i inhawn chhoh mai ka ring a. Chawpchilh taka thil thleng zung zung hi i pawmthiam hun ka nghah vangin mipa zawk hi hmeichhia zawk ang maia ka awm chang a awm a, i awm ang angin ka en tawp bawk che a, heng thil ka tihchhan hi ka hmangaih vang che a ni. Nang leh Bawihtei, nuamsa takin awm ula ka duh vang a ni. Mahse ka dawhtheihna in a tlin loh ţep chang te a awm ve a, khawngaihin insiam rem tum rawh. Hna i thawh duh pawn ka khap lovang che. Nupui leh mo fel inih chuan a tawk mai" min ti a, ka lo nawr nasa mah mah em ni?


"Midang in a awm hi ka thiam chiahlo aniang. Ka dawhtheilo tih te chu ihria alawm"
"I dawhtheih loh dan hi a lawmawm tawh lo tlat. Lo hawi teh" a tih leh chuan muangchangin ka inher a, a nuihmel ka hmuh chuan ka thawveng hawk. Ke hlang reng chunga ţhu ka la nih vangin a lamah min pawt hnai a, "Kan chunga thil thleng leh kan tawn ang ang hi a ţha lamin ngaihtuah zel ila a ţha a ni mai. I hlim ang a, fel nih i hlawh bawk ang a, ka chhungte pawn kei aiin i bula awm an chak vat zawk mai ang" ti zawngin min thlem a, beidawng deuhin ka lo thaw halh ringawt.


"Insiamrem vat vat tur pawn ka la awmrei loh hi. Min hrethiam ve ula, mahni inah ka duh duhin ka awm ţhang a, tuman min be duh lo ngai lova, min biak ve chhunah pawh min ţawngkhum ve fek fek ngai lo"
"Ka lo hau dawn nia, nangpawh i danglamna hmuh ka lo beisei ang" a ti a, thil awmzia a hrethiam ka tih reng kha. Tum bar chunga ka melh run lai chuan ka hmuiah a rawn fawp zeuh a, "Tumah hi kan inţhen theihna tur chhuanlam ţha neihtir ka duh lo" a ti a, api leh pute an la reh vang vang reng a, an zin a tih kha awih lohna chin pawh ka nei lo. Phone aţanga rawn biak leh chanchin rawn ngaihven pawh annei lo. Mak ve tak a ni.


"Ipi leh pute reh vang vang hi mak ka la ti reng. An zin rei tawh e"
"An lo haw tawh"
"An rawnkal miah si lova"
"Inchhungah hian fel deuhin awm la a ni mai. Thildang chu ka kutah i dah dawn nia" ka bo tulh tulh. Api leh pute hian min lo duhlo reng em ni? A unaute pawn min duh lova an tilang mai a, min duhlo ve anih dawn hi. Ka hmuhah pawh an rawn inlan duh hleinem.
"Zep nei i ang riau mai"
"Nei lo ah ngai ang" ka chal a min fawh leh hnuah min thawhsan a, towel nen bathroom ah a lut. Engemaw zep chu a nei chiang a ni.



Hna ka ţan leh tawh a, chawhma lam ka duty anih vangin Jason nen kan kal rual. Bawihtei chu ka nu in a kuta dah turin min hrilh. Kan inneih hma pawn ka nu diktak zawk pawn a thlahin a hruai ziah thova, a harsa lutuk turah ka ngai lo. Motor annei zawk lehnghal a, keini chuan kannei hleinem. Bus awmlohna laiah taxi in a kal a, bus tlan na chinah bus in a kal leh mai a, ka nu kha alo hah ţhin awm khawp mai.


"Hospital a dawr siamtu sawn a chhunzawm thei dawn lova, ka pi ka bia a, a chhunzawm duh takin"
"Tu ipi maw?" ka tih chuan a nui hawk a, an chhungte an hausa hlawm a, hospital ah tuman dawr an rawn nei peih lul lovang.
"Inu ka bia a, a chhunzawm duh a ni awm e"
"A ţhat chu. Nitin ka nu ka hmuthei dawn anih chu" phur takin ka ti a, lo biak nachang a hria chuan min ti lawm khawp mai. Ka nu tan lah hna hahthlak a ni dawn bawk si lo.
"Chuan ka lawm e" ka ti leh sep a, hmeichhia hi chuan pasal kanneih hian kan nu leh pate kan la ngaihtuah reng a, ka pasalin ka sawingai miah lova ngaihtuah nachang a hreve hi a lawmawm em a ni.


Garage ah a tlan lut a, a din veleh amah pawh ngaichang lovin ka chhuk a, a rawn chhuk ve hun ka lo nghak tho. Ka darah a kuah a, "Nula inih tawh loh kha aw" min ti a, pasal nei chunga ka hna kalna hmasaber tur a ni.
"Ka hria, nangpawh tlangval inih tawh loh kha aw" ka ti let ve a, midang awm ve na chinah chuan min kuahna a lathla a, ka lawm lo hran lo. Mi tam naah chuan a mawilo ve bawk a, min hmu reng reng chuan min nuihsang vek a, nidanga ka hna kal nen a inang lo khawp mai.


"I rilţam hunah min rawn hrilh dawn nia, Bawihtei nu" ka pen dawn a a tih chuan ka ding chawt a "Tikhan min ko ziah suh" ka ti vin hlar a, a nui suk duh chauh lehnghal.
"Ka rilţam ngun dawn tehmai nia"
"Awle" tih pahin a phone a rawn lekchhuak zeuh a, ţam lo mah ila tihbuai nan ka ti ţam lui reng maithei ni.
"I inhuam te chuan"
"I tan te chuan" ka awki ang chiahin a ti ve a, ka inher hnuah a hmuh lohin ka nui ver ver a, a buai theih zia a hrelo mai mai a ni, mawl lutuk.


Ka duty pui ţhin ten min lo hmu chu zawhna an ngah khawp mai. Vannei min tih zia an sawi cham chi a, an chhungkaw kalhmang min zawt uluk hle bawk.
"Hna ivan la thawk peih. Keichu ni ila ka awm mai mai ang" Seni lah hi a. Englai mai pawh hian awm mai mai hi a chak reng a.
"Harsa deuhin ka zirchhuak a, ka pasalin min chawm theih vang ngawtin ka bansan phal teuh lo" ka ti ve ngawt a, Maremi nen kan awmdun tawh dawn lova, nuam ka ti mah zawk.
"Ni ve tho mai. Marcus nen unau anni lehnghal a, Marcus hi ka duh e" a ti a, a awm dawm pahin mit a chhing a, a nui ver ver bawk a, a lantir thiam khawp mai.
"Hnathawh loh i chak bawk a nei ve mai rawh"
"Min tihpui la" a la ti deuh deuh a, ka lo nuih liam mai mai. Ala naupang ve a, vei em em a nei lo bawk a, hman a ka awmdan ţhin ang vel a ni. Tlawm ngawih ngawih leh midang aiawhtu mai mai ni anga ka inhriat hma. Ala â ve bawk a, a ngainatawm phian.


Betty leh ka hriatngai miahloh hmeichhe pakhat an rawn lut a, ka lo melh peih lo. Kan ward ah hian a damlo enkawl lai an lo awm a ni maithei. Seni nen an in buaipui a, pawimawh awm takin thil ka ziak mawlh mawlh a, an chevel pawh ka lo ngaihven lo. Damlo en turin a kal a, Seni bawkin a zui. A rawnkalpuinu kha a chhuak leh ta nge pawh ka hrelo. Seni hi che pawlawh deuh chi anih ve vangin Betty chuan a vin khar khar reng maithei ni. An rei zek lehnghal, hrehawm a ti viau ang.


An rawn let leh hnu chuan ka awm ngaiin ka lo awm leh a, ka ngaihsak lo der leh tihna a ni mai. Ka ngaihsaklo tak tak bawk.
"Sandra leh Abigail te hnen aţangin i chungchang ka hre ţhin a" ka hawichhuah chuan alo nui sang a, Seni awm vang mai mai aniang.
"A ţhat chu. Ilo zawt zel ţhin dawn nia"
"Midang chanchin ka ngaihven ngai hran lo. An sawiduh hian ka lo ngaithla a, chuzawng chu. In inneih ni chu nuam ka ti khawp mai" Seni hriatthiam loh turin ngeiawm deuhin min nuih a, henu hi chuan tun thlengin min la ti nguai nghulh reng thei tho anih hi.


"I pasal nen an inkawp ţhin sia a rilru ana niang a nui te kha a lem riau in ka hria" Betty chhuan veleh a ti nghal a, a lo hrethiam ve anih dawn kha.
"Na ve ang. Kan buaina a ni hleinem tiraw?" ka tih chuan alo bu nghat nghat a, min nei rawh ka tih luih vanga innei kan ni lova, ka inpeih lo chunga min nei lui zawk a ni. Chuvang chuan Betty alo na anih pawn thiam lohna ka nei lo.


Chhun thil eihun a ni tawh a, Jason biak ka tum lai mekin a rawn lut a, Marcus leh Betty ka hmuh tel lehzel vangin mak ka ti ru angreng. Nurse dang pahnih leh doctor dang an tel bawk a, Sandra pawh a tel ve nghe nghe. Betty lah chu a ţap pur lehnghal.
"Helai ah hian ka kalsan a" tih pahin ka ban dahna dawhkan hmun awl lai a rawn kawk a, hrethiam lo deuhin ka lo en ha ringawt.


"Dikte hetah hian zungbun ihmu em?" Jason enreng chung chuan muangchangin lu ka thing a, Seni an zawt veleh a, ani pawh keimah ang tho.
"Ka awihlo inhmu ang. Hetah hian ka dah lawm. Jason nen a kan inhualna zungbun kha ania" atih laiin Bena a rawn lut ve mek bawk. Betty chuan alo zawt veleh a, keini aiin a bang bo lehzual. Seni chuan lungawi chiahlo tih hriat deuh hian "I duh leh kan bag check rawh. Ka rawn la ang" tih leh inthlakna pindana luh a rual a, ka la lo lutuk hi ka lo ngaihven ţha peihlo zawk.


A rawn lakchhuah veleh Seni chuan a bag a bunruak vek a,chumi hnuah ka bag a bun veleh "Hei hi anih hi" ka ţhutna aţang chuan ka zuangtho zawk a, ka ding khawng lah. Ka thiamthu sawi ka tum a, ka ţawngchhuak thei thlawt lo. Seni leh Bena te chuan mak min ti dawn lutuk chutiang bawkin Jason leh Marcus te pawn. Damlo awmna leh duty awmna hmun hi a in pingdang hlauh a, a chanve chin glass a ni a, chutianga a awm chu ka lawm khawp mai. Ka mualpho nasat loh phah a. Midang chuan rapthlak tih hmel zetin min en a, nurse lokal ve te lah lo thawk senior tawh tak an ni bawk a, thiamthu sawi ve tur pawh tun dinhmun ah hian engmah ka sawithei rih lo. Ka hrawkah hian min rek tu an awm ang mai a ni a, ka awm a tawt tlat bawk. Ka ţah a chhuak miah lo.


"I pasal a ni tawh tho a, kan inhualna zungbun hi ka tan ala hlu reng a, heivang hian ka chhuhsak dawn che pawh a ni hleinem. Hetianga in dahbo sak kher hi a ngai em ni?" a ti a, ka kut ka hum ngawt ngawt a, ka tha a khur der der bawk. Hetiang taka thinrimna hi ka la nei ngai lo.
"Jason i nupui hi ka rin aiin alo mak. Kan luh hlim khan a chesawn duh miah lova, a bag ah alo dah hman daih a nih hi. Vawikhatna a ni bawk a, ka ngaidam ang che" a tih hnu ah a chhuak nal nal a, Jason chuan ka dar a rawn hmer zawk a, min thlah leh vatin Betty a zui a, min thlamuanna thu engmah a sawi lo. Nurse senior pakhat chuan "Thik thu vang hian duh ai thui kal a awl ţhin a, khatiang kha chu tih tawh loh a ţha. Nangmah chauh nilo ipasal leh i pasal a pa thlengin an mualpho dawn a, hospital hming iti chhe vek thei" min ti a, ka hmui ka seh ngawt ngawt a, a thi hialin ka hria.
"Lalruatdiki hian zungbun kha a dahţha lo tih ka sawi ngam a, chhuahsan tawh ru. Hrehawm a tihna turin tumah hi awm hlek suh u" Marcus chuan a ti khur khur a, an chhuah hma chuan min melh ram ram hlawm.


An chhuah vel hnuah Marcus chuan ka bag aţanga an thil bunchhuah ho chu a rutkhawm hmawk hmawk a, "Rut suh dah rawh" ka tih pawhin hrelo ang hmiahin a awm.
"Rut suh ka tih chu" ring deuh zawkin ka ti leh a, min ngaithla duh lovin ka bag chhungah a thun chhunzawm zel a, a thun zawh veleh a ti phui a, min rawn en chungin tawite in a nui a, hmui phunin "Ka ring che" min ti bawk.


Ka zak ngawih ngawih a, Bena leh Seni te hmel pawh ka en ngam lo.
"Amak e. Betty chu a lokal ngei a, hmeichhe pakhat a rawn hruai a, file ka lak hnuah Betty kha ka zui a, U Dikte a hmeichhe rawnhruai kha a kal lehnghal a mi?" Seni chuan a ti zat zat a, "Ka hrelo" ti chungin ka kun lap a, ka tha khur a reh thei lo.
"In ring tiraw? Bena nang Lalruatdiki tih anih i ring em?"
"Ring lo. Betty in Jason a neih theihloh vanga a tih anih ka ring"
"Kan hria ang chu. I chhelo bawk a, i thluak pawh a ţha anih kha" Marcus thusawi avang chuan Bena a nui kur kur a, keichu ka din ngaiin ka la ding reng.


Marcus chuan min rawn kuah a, phu zawk chungin ka hawichhuak a, ka lungphu pawh a dik thei lo. Ka bag a ak a, min kalpui dawn chuan ka ke thlenga a khurh vangin ka tlu ţep a, min kuah sa reng anih vangin min lo dawm hman. Inthlakna pindanah min luhpui a, ţhutthleng awmchhun a min namţhut hnuah ka bulah a rawn ţhu ve a, min rawn kuah leh chungin ka hmel en thei turin a ţhu a, min thlek deuh a.
"Thudik chu a langchhuak leh ţhin. I dikna a langchhuak vat ang" min ti bawk.


Ka hmui ka pet leh a, a hma khan ka seh thi a ni ngei ang a thip hlar mai. A kut awl lamin ka kut khur der der a rawn hum a, ţhianţha tak ava ni em.
"Khatiang hmel kha pu suh. Min ti lungngai ania" a tih leh chuan a lam ka hawi ve a, nuih ka tum viau na a ka nui hleithei lo.
"Ka bag ah an chhar a, ka lak a ni mai lawm tiraw? Midang pawn min hlauh hmel em kha. Ngatinge ka bulah ila awm a?"
"Ka ring che ka tih kha. Mi zawng zawngin an hawisan che pawn keichu hetiang hian ka awm reng thovang. Khatiang thil iti duhlo tih hretur khawpin i bulah ka awm nasa a, ka ring che. Kha ai nalh kha Jason chuan a pe tawh che lawm tiraw?" a ti dam thlup a, ţah vak vak mai ka chak tawh.


"Engtin nge alo awm ka hre lova, engtin nge midang ka hmachhawn leh ngam ang ka hre lo. Mahse midangin rukru anga min en laia ka thlavang i hauh vangin ka lawm e" ka ti a, ka aw a khur a, ka khawhmuh a phe ruai a, ka mittui chu tla lo turin ka duh kher mai. Mahse ka dang thei ngang lo a ni. Ţah hi ka hreh ngawih ngawih a, zahthlakah ka ngai a, chak lohnaah ka ngai a ni. Ka mittui min hruksak hnuah min kuah a, keipawhin kuah let ve in a coat var hakah nghet takin ka ţham a, ka mittui tla pawh a hma ai khan a nasa zawk daih maithei. Chuti chung chuan ţap ka la inti duh chuang lo.


"Eng nge ka tihsak ang che. Ka doctor nihna leh hmeichhia an nihna theihnghilhin ka va umzui anga ka sawisa hrep ang nge, police ko in tharum nen thudik sawi turin ka dawp tir zawk dawn. Nge heti hian ka kuah reng ang che? I rilru damna tur apiang ka ti ang" a tih chuan lu ka thing a, hmeichhia anni emaw mipa pawh nise Marcus hi insual turin ka duh tawh lo.



MARCUS POV


A hahdam deuh hnuah "Thil tih lawk tur ka nei a, ka rawn let leh ang. Ka thlah haw ang che. Tumah hmu hreh suh, i kiangah awmin i rualin ka kal zel dawn" ka ti a, mittui tling pam chungin a bu zeuh a, he hmeichhia hi ka nupui a ni lova, khawvela ka hmangaih ber a ni thung. Humhim nan chuan engpawh ka ti ang.
"Chhuak duh suh. Tikhan awm la, i ţhiante saw ka lo hrilh ang"
"Awle" a natzia ka hmuh chuan ka kuah nawn leh a, ka chhuahsan zui a, a ţhiante hnenah pawh tibuai lo turin ka hrilh a, an hmu anih chuan hnem zawk turin ka hrilh. An rinzia an sawi chuan keipawh min ti lawm a ni.


Hmanhmawh deuhin Jason-a office lamah ka kal hlawk hlawk a, midang zinga mahni nupui ngei thlavang pawh hauh duh lo. Ka nupui chu a thiamloh naah pawh mi zinga a mualphona hliahkhuh vek ka tum thovang.


Kawngkhar pawh kik duh lovin ka nam hawng rawp a, chair ah ţhuin Betty a lo la ţap a, a hmazawnah Jason a ţhu. Dawhkanin a dai dang.
"I remruat tiraw?" Betty kawrah ţhamin ka pawt tho a, hmeichhia pawh nise pawi tihna ka nei lo. Ka hnek hrep lo a a vannei zawk. Kut ka thlakna tur hi a hmeichhe nihna tho hian a dang anih hi.
"Thlah rawh Marcus"
"Lo inrawlh suh. I nupui aiin he mihring verther zet hi i ring zawk maw? I nupui kehchhe vek leh zak a kun tlawk tlawk saw ngaihven tumna pawh nei lovin he nu ţap ri leh dawt hmanga a zualko vel hi ilo ngaithla mai mai maw?" ka ti tuarh tuarh a, Betty ka pawih lawp a, a kat dawr dawr a, dawhkan ah inbeng khalhin a indawm ding hram.


"Chinfel ka tum mek. Ka nupui vang zawkin anih hi Betty ka la sawipui. Ka chinfelsak dawn. Ka nupui hi keipawn ka ring. Tharum in engmah a chingfel thei lo"
"A ni maw?" tih pahin Betty in a dawm mek dawhkan ka tlawh chawrh a, a phu dawrh a, sawitir a awl khawp ang.
"Engvangin nge itih? Engvang nge? Itsikna mi? Jason ineih theihloh vanga a nupui tih mualpho i tumna a mi? Lalruatdiki zahawmna a bo ah i ngai a, i zahawmna a bo vek zawk. Khita awm ţhin kha khutah i awm tawh. Chhuak rawh, he office ah hian lut leh tawh suh. Mi pasal hmu tur hian kal leh tawh suh"
"I hmangaih thlavang hauh iti na hle mai" min tih hnuah nui chungin a chhuak a, a tawpah a ngai maithei. A remruatna anihzia a sawihma chuan ka tawpsan lovang.


"Seni leh Betty damlo enin an kal a, Diktei chiah alo awm a, zungbun kha Diktei bag ah a awm leh a, mak tak chu a ni ve"
"Betty khan hmeichhe dang a hruai a, lalruatdik in a lo en si se tawh lova, a bo hmak a, Betty bula kal ve kha thlahrang ami Jason?"
"Hmeichhe dang maw?" a ti hluai a, a hrelo tak tak anih dawn hi.


"I rilru tluang purh mai hi Betty hian remchangah a hmang reng anih hi. Betty kha i hauh vanga ţap anih ka ring a, a rukin midang hriatloh lai chuan i nupui thlavang ilo hauh ve a ni maithei. I awmloh hnua nurse nu in a rinlohna te kha i ngaithla ve lo a nih kha. He damdawiin a thuneihna nei ve chu ni ila vawiina thil thleng hmutu ho kha ka ban vek ang" ka coat ka hlih hnuah chair awl ah ka ţhu hnawk a, Lalruatdiki awmdan ka mitthla ah a awm reng a, ka thinrim so buan buan hi a reh hleithei lo.


"Lalruatdiki ka thlah anga, thildang lo buaipui ang che. Ipa hnenah a dikna lo sawi la, nupui atan inei tawh a, venhim chu i tih tur a ni. Anih loh chuan i ai ka awh hreh miah lo" a hmel inthlak danglam ka hmuh chuan ka nui suk a, Lalruatdiki a hmangaihzia ka hria, ka hrechiang lutuk tlat.
"Sandra a awm ve vangin ka pa beng a thleng khawp ang. Ka lo sawipui ange. Ka ai i awh theih loh nan" min rawn enin ani pawh a nui suk. Keimah ka nih zawk lohna chhan chu Lalruatdikin min thlan zawk loh vang a ni. Bawihtei pa ka nih ve loh vang a ni.


"Betty hi?"
"Hmundangah thawk se kan fihlim zawk ka beisei. Boruak ţhalo hi ka kham riau tawh" a ti a, a lawmawm. Jason pawn a kham chuan a ban ka beisei. A laka ka thinrim vak lo hi a mak a ni maithei. Mahse Betty kha ngawirengin a awmpui dawn lo. Thudik hriat tum ran chungin a awm ang a, Betty kha a hauin a zilh bawk ang. A dawhthei a, a rilru a nghet a, Lalruatdiki a hmangaihna hi a dik bawk. Jason hi ka unaupa nilo sela chuan awlsam zetin ka inla hrang hauh lovang. Lalruatdiki a hlim lova ka hriat chuan ka unaupa a nihna ka ngaihpawimawh tawh lo maithei. Maithei?


CONT...

---

NEVER REGRET-12



"Ka lo lut ve lo mai ang" gate pawnah kan ding a, rawn luh ve a duh tlat lo. A mawilo a ti a ni maithei.
"Hlauthawng suh, inpa khan Betty chu bantir theih dan a ngaihtuah dawn a nih hmel"
"Bang suh se. Miin thudik an hriat huna a hrehawm tih hmel hmuh ve ka chak" ka ti a, keimah chiah a tuartu ka ni duh miah lo.
"Hrilh rawh. Betty bantir lo turin hrilh a, hrehawm a tuar lai i hmuhchak thu sawilang tel suh. Jason ni lovin ipa i hrilh dawnnia. Jason chuan bantir a tum nghet bur tawh a, a thil tum tawh a thlaktir mai mai theih ve loh. Nangpawh a neih daih mai che hi"
"Inneih chungchang sawilang suh" ka ti hrawk a, alo nui hawk a.
"Kal rawh. Bawihtein alo ngai tawh ang che. Chanchin kan inhrilh dawnnia" keipawh ka chhuk ve mai a, ka chhuk rual deuhthaw in scooty a rawn ding ve a, Abigail a ni.


A duh chuan a tlan tlang thei reng a, min thlah tu hriat a duh a nih hmel.
"Marcus loleng la" nuisang chunga a tih chuan a rukin ka lo ner vak a, a awmdan a thlak danglam thiam khawp mai.
"Ka nauten min ngai lutuk a an ţap tawh a"
"An ţap kher lovang. Englai mai pawh a i bula an awm chawt te chuan pasal annei thei nang"
"In inang chiah. Damon tireng lo khan nangpawn pasal nei tawh" an infiam kual vel chunga lo din ve reng chu nuam lo duh tak a ni. Aw ka thian kharh a, a bul maia ding ka nih vangin Marcus chuan ka hnungah a kut a rawn dah a, "Nidangah ka loleng ang Abi" a ti pah bawk.
"Awle. Lo sawilawk la aw, kan ngai ve che nia" a tih hnuah a tlan lut a, min hmuve ang pawn a awm lo reng reng.


"Marcus an chhungkaw thuruk hi hriat inei em?"
"Nei nang. Thuruk annei mi?" min zawt let zawk daih. Marcus-a nu leh Christy nu te hi tleirawl lai aţanga inkawm tawh anni a, Sandra chungchang kha Christy hian Marcus hnen aţang chuan a hre dawn lo phawt. A nu in a hrilh aniang.
"Sandra hi an fa diktak a nilo tih i hria em?" ka ti a, Christy hrilhtu kha Marcus hi a ni maithei bawk. Ka bulah chuan a hrelo der daih thei alawm.


"Engmaw? Sandra chu tumaw? I fiamthu mi?" a ti nawk nawk a, za lo deuhin a nui pah hawk hawk bawk.
"Aw ka fiamthu. Amak dawn elawm tiraw? An fa chu nilo se i hre daih tawh ang" ka ti kual leh vel a, kal nghal mai ka tum chu min pawt let leh dawrh.
"Sawichiang teh" a ti nghut a, Christy sawi kha ka hriat chhun a ni mai. Christy khan a hre dik biklo anih hmel.
"Sawitur ka nei lo"
"Sandra kha, i sawizawh chiah ang kha tuman an la sawi lo. Tunge hrilh che? I awih biklo ang chu tiraw?" a tih chuan lu ka bu zeuh a, ka awih leh awih lohna a inzat vel ang.
"Thudik a ni lova, an fa diktak a ni. Kha thu kha sawichhuak leh tawh suh aw. Thiam i chan theih nan in lamah buaina a thlen loh a ngai ania"
"Ka hria"
"Jason pawh tunah hian a pa a biak mek ka ring. Theihtawp a chhuah a, i huat loh ka beisei"
"Ka haw khawp mai" tawi te a ka nuih suk hnuah ka kalsan a, Marcus awm lo sela chuan ka mualpho chhe hle dawn anih kha.


Inchhung ka lut a, Bawihte in min lo lawm viau na a "Bawihte ka damţha lova, ipi bulah hian lo awm rawh aw" ti a ţha taka ka hrilh hnuah pindan ah ka kalsan a, keimaha awm ka chak ber. Ka inbual harh a, ka harh tak tak chuang pawn ka hre lo. Tukverh bulah dingin pawnlam ka thlir a, he inchhunga ka lut hi ka inchhir ngei dawn niin a lang.


"I khuasik a mi? I sam kha ti ro la, damdawi ei la mu hahdam daih rawh" ka nu rawn lut mek chu ka en zawk a, pawnlam ka thlir leh daih. Hawisan tawh lo mah ila ka bulah a rawn ding tih ka hre tho.
"Thil thleng ka lo hria a"
"Ka sawichhuak leh chak hran lo"
"Ka ring che hi mak iti em? Nu te chuan an fate chu an ring ţhin a ni lawm ni?" mak ti tak chungin a din na lam muangchangin ka hawi phei a, nui var var chungin min lo en a, a mitmeng te chu a nemin khawngaihnaa khat niin ka hmu.


"Jason hi ka fapa ania, nupui ah a nei che a, ka fanu ini mai. Mak ti viau duh suh"
"Ka lawm e. Mahse hriat duh ka nei a"
"Min zawt la"
"Jason-a pi leh pute hi ngatinge an rawn inlan duh miah loh?" ka zawhna avang chuan a danglam deuhin ka hmu. Min duhlo anih ka ring ka tih tawh kha. Zungbun chungchang an hriat phei chuan min duhlo lehzual ngawt ang. Chiang taka thil ka hriat hma chuan ka hrezel chak ţhin bawk.


"Nu te chuan fate dawt an hrilh lo ang chu tiraw?" thudik hriat tum ranin ka ti ve a, hriatchian vek ka duh.
"An lungawi lova, Jason hi Betty nei turin an duh a, chuvang mai mai chu. Rei a daih lovang. Mihring hi ţhatna in a hneh vek theih a, i lung an tih awihloh pawn ţhatchhuah lui tlat la, anmahni zawkin hrehawm an ti mai ang" a ti a, min duhlo tute min duhloh chhan chu Betty an duhpui vang zawk vek alo nih dawn hi.
"Awle, ka lo tum ang" ka ti sep a, ka nu pawh hian ka chungah ţhat a chhuah char char a, ka haw thei miah lo. A pawisawi ta ila hrehawm ka ti viau maithei.


"Mu hahdam rawh. Bawihtei chu ngaihtuah suh. Vawiin chu ni ţha tak a ni bawk si lova, engkim theihnghilh iduh chuan mutthilh tum mai rawh" a nui hmel ka hmuh chuan ka lo nui ve a, ka nui lui miah lo. Ka nu hnen a nuih tak tak a ka nui ve thei tawh hi keipawhin mak ka ti. A fanu tak tak anga min ngaih vang a ni mahna. Keipawn nu tak anga ka en ve a ţul a ni.




JASON'S POV


Ka pa hmu tura ka kal laiin Betty haw tur ka tawk. Kalpelh mai ka tum laiin hriatchhuah zawk ka nei.
"Diktei duty na hmuna ikal khan tunge i hruai?" a ding chawt a, hruai a nei ngei a ni.
"He damdawiin a thawk hi a ni lo. Kan zep lo mai ange, Diktei a mualpho khan nuam ka ti tlat a nih chu" pawisawilo awm takin a nui a, a remruatna alo nih ngei dawn chu.


"Damdawiin dangah nuam i chen chhunzawm a ngaih hmel"
"Contract kannei tih te hre ve la, chuti maiin ka bang thei hleinem"
"A bawhchhe tu i ni. Duh ila chuan ka nupui itih aia nasa hian ka ti mualpho thei che. Ka pa ka hmu dawn a, he hospital ah hi chuan kan inhmuh tawh loh beisei ang. I rilru tina tu leh ţhen tu che chu keimah ka ni. Ka nupuiin tihsual a nei lo" ka kalsan a, min umzui dat dat. Tlawm a hun tawh viau a ni.


Ka pa office ka thlen dawnah "Ipi leh puten ka kalsan che an hlau ngawih ngawih tih i hrelo em ni?"
"Nupui ka nei tawh a, rilru pangngai pu tan chuan inthiarfihlim hun hriat a ţha. Ka unaute fuihpawrh bansan la, kan thawk ho theilo tih pawh i hriat tawh ka ring" kawngkhar hawnna ka ban lai chuan ka kut a rawn vawn chilh a, a nuihmel leh chapo ram mai hmel te kha hmuh tur a awm tawh lo.


"Hetiang ringawt chuan a tawp thei lo"
"A tawp thei chu a nih hi. Tu leh fate kawppui tur duhthlak sak chu a hmanlai tawh lutuk tiin ka pite chu ka hrilh mai dawn nia. Pawi itih loh chuan ka pa biak a haw vat ka duh, nupui leh fanu nghaktu ka nei sia" min vawnna lai ka melh a, muangchangin a kut a la thla riai riai.
"Kan thawk ho lo anih leh buaina siam theihna hun ţha ka nei ngah zawk tihna a ni mai" a ti hlak a, a thimrimna mitmeng bawk a rawn let leh a, thip taka min melh ram ram hnuah a kalsan ve hram. Theihtawp chhuah mah ila kan ta nilo tur chu kan nei thei chuang lo. Hetiang thu hi a hreve lo a ni.


"Sandra a che rang zawk anih hmel" ka pa dawhkanah a purse theihnghilh a lo let nghat a, mak deuh maiin Betty nen an inmil phian.
"Inu in min rawn bia a, Diktei ring turin min rawn hrilh a"
"Ilo ring lo em ni? Betty khan hruai tel a nei a, he damdawiin a thawk ve hi a ni lo. Dikte in alo ngaihsak lo kha a pawi ta ber a ni. Khanu che tla kha a hmuh hmaih hlauh a, Betty hi ban theih a ni"
"Sandra lahin bantir lo tur leh buaina hi vawiin la la a tawp tur a a duh thu a sawi a" a ti bauh a, Sandra hian hriat a nei ve tihna a ni angem?
"Mi diklo i kawl reng thei lovang chu tiraw?"
"Thei lo. Finfiahna a awm phawt chuan ban theih a ni. A mualpho viau thei bawk. Mahse reitak kan lo hre ve tawh a, a nu leh pate an zahawm bawk nen. Mualpho lova amah zawk a ban mai theih kha a ţha" a kut pahnih suihzawmin dawhkan chungah a nghat a, a rilru a buai ve a ni. Betty hi an chungah a sual hran lova, ka farnute phei chuan an ngaina takzet. Hmalak rum rum harsa an tih phah a ni.


"A bang lo anih chuan keimah ka bang ang" a phawk hra a, ka pa hian a hlat a awm turin min duh tawh lova, keiin ka nupui leh ka fanu chan leh ka duh tawh lo thung.
"Chutiang itih a ţullo"
"Ka awm ţhin naah ka let leh anga, hlawh pawh a ţha a, ka nupuiin hna a nei bawk a, school pawh a ţha zawk a, Bawihtei tan pawh hmasawnna zel zawk. Ka kalsan tawh ten min umzui reng hi ka kham. Keimah min bei lovin ka nupui zawkah a ni lehzel a, ka rilru ka siamfel tawh chinah chuan ka hawilet mawh khawp mai" uluk takin a ngaithla a, ka pa nen hi chuan kan tuina a in angin kan inhrawn nasa a, ka thil tum thlak danglam ka harsat zia a hria ang.


"Betty kalsan turin thutlukna isiam a, iti ngei bawk a, a tuar nasa ve dawn a"
"Sandra sawi apiang hi a dik vek lo" ka lo ti hrawk a, Sandra in min khalh a, ka pa a lo hmin hman a ni mahna.
"Ka hria. Diktei hian khatiang thil kha a tih ka ring lova, Betty thiamloh a nihzia ka hria"
"Ka thawhpui chak tawh lo. Ka hmuh apiangin vawiin a thil thleng hi ka hrechhuak leh ţhin anga, chutiang bawkin ka nupui pawh in"
"Ka hrethiam e. Lungngai lo la, ka lo buaipui dawn nia"
"Ka lawm e. Buaina avang hian pawi ka ti"
"Ipiten an hmuchak khawp mai che" a ti ta daih a, ka lo ner suk.


"Min hmuh chak chuan lokal rawh se. Hmu tura kal ka chak hran lo"
"Bawihtei pawh an hmuchak a"
"Keimah leh Bawihtei maw?" buk nghut pahin "An sawi dan alawm" a ti a, ka lo nui chhuak hawk. Ka fanu chu an hmuchak khawp ang. An tupa chhuan ve ţhin pawh hi.
"Bawihtei leh kei chuan hmuhchakna kan nei hran lova, an hmuhchak loh ber ka nupuiin a hmuchak khawp mai" min chhanglet lovin a nui suk ringawt. An duhthusam mo atan annei ta si lova, anni pawn duh apiang kanneih theih lohzia hreve se a ţha. Kei hi an sal, duh duh a an tihkawi tur leh an duh apiang an neihtir tur ka nilo bawk.


Ka office a ka luh chuan ka phone a lo ri a, ka keng lo tih ka hrechiah. Diktei nu anih vangin ka la vat.
"I buai a mi? Ka vawithum rawn tihna a ni tawh"
"Ka pa ka hmu lawk a" ka ti a, buaina awm ang ang hi a dawr rawn siam hma ngeiin tawp se ka duh a, midangin an hriat tam loh nan ka ti buan buan duh lo reng a ni.
"Anih chu. Pawisa chu a lo lut e aw. A ngailo asin mawle aw, kan lawm lutuk" a rawn ti a, an pa enkawl reng angai a, a chetsual avangin hna a thawk thei tawh lo bawk. Pension angin an kaltir a, chumi pawisa thlatin lut chu a ni mai. Dawr bulţanna tur annei lova, ka pu damdawi man a to a, lei reng ngai chi a ni. Bawihtei damlo leh Diktei nen a kan inneihnaah an seng tho bawk nen, an ziaawm nan dawr rawn siam ngei se ka duh vangin pawisa ka thawn ta tawp a ni.


"Lawmthu sawi angai lo. Ka pu kha i kalsan thei lovang tiraw?"
"Thei e. Chhunah hi chuan a fel lutuk alawm"
"A rilţam vel ten" ka tih chuan a ngawi reng a, a ke a hmang ţha thei lova, a tan chet vel a harsa a ni.
"Ka pi ka thawhpui pakhat hian nula fel deuh a hria a, chhun lamah ka pu chu alo awmpui thei maiin ka ring" ka ti a, chhuna Bawihtei school kal buaipui tur a min sawihmuh zawk a ni.
"Lehlanga kal turin maw?"
"Ni e"
"Nikhatah engzat?"
"Ka lo zawtchiang dawn nia"
"Awle a remchan khawp chu" phur takin a ti a, dawr chungchang ka sawihmuh pawn a hlim viau anih kha. Ka pu chu chesual lo se dinhmun panggai tak tur an ni.


"Ka pi pawisa chungchang kha Diktei hriat ka duh lem lova"
"Awle ka lo zep dawn nia" kan inbiakna kan ti tawp a, a nu pawisa ka pe tih a hriat chuan amah hmu hniam ang zawnga min ngaih leh ka hlau a ni. Ka rin loh dan deuh deuhin a awm a, a danglam tawh takzet. Ka hmangaihna erawh a ngai reng thung.


In ka thlen chuan khua a thim dawn ruai tawh. Ka lut chiah hi boruak duhawm lo takin min lo hmuak nghal a, Diktei leh Sandra an indin chilh a, ka hmuh phat aţangin an boruak ţan zia ka hrethei. Ka nu leh Abigail ten an lo en tawp a, ka pa a lo la haw lova, vanneihthlak takin naupang pahnih an awm lo.


"A zahthlak alawm nu, hei Jason pawh alo haw hi. Thil thleng kha a hmuchiang alawm. A bag ah Betty zungbun bo an chhar a, doctor leh nurse senior te mit a hmutu ah an ţang ve lehnghal"
"In buaina bul ka hre lova, mahse duhtawk rawh u. Diktei thiamloh a awm lo"
"I mawl a mi? I hmuhchian kha" Sandra chuan a ti tuarh a, Betty in a fuih hneh viau a ni maithei. Abigail ve thung chuan "Hriatsual palh a ni maithei a Sandra, mi thil ruk em em chu, chutiang chu a ti dawn mi?" a ti nawi ve niaih a, an buaina hi ho te a inţan leh bawk a ni ang.


"Kal ang" tih paha Diktei kalpui mai ka tum chu a lo duh lo nasa mai.
"Tv kan lo en ho mai mai laiin buaina a rawn sawichhuak leh ringawt a, theihnghilh kan tum vek tawh. Betty bantir i tum a mi? Ka pa nen Betty bantir in tum a mi a? Bantir miah suh u. Awm ve reng rawh se. Awm ve reng sela inchhunga inhauhna tur tam tak kan pumpelh a ni mai" a ti hlak hlak a, Sandra beng alo thleng leh tawh tihna anih chu. Betty nen an inkawmngaih ka tih tawh kha. Betty hi chu..takzet hian.


"A tuartu zawk ban theihna a awm lo hrim hrim. Chiang deuhin kan hmu vek a, Marcus leh Jason te ngei pawn an hmu. Eng hian nge in rilru ti danglam pawh ka hrelo"
"Dikna. Thudik kan hria a, a tawk mai. Ka nupui hian thiamlohna a neilo. Sandra upa zawk inih kha ngawi tawh rawh" tiin ka khap a, kan chhungkua kan inhau ngai lova, Damon a buaithlak ve deuh hlek laia ka nu leh paten an hau anih loh chuan kan unau pawh kan inhau ngai lo. Hetiang thil hi ka nu leh pate hmuh tir reng ka duh lo.


"Betty khan rawn hruai ve a nei tih vawi engzat nge ka sawi dawn? Khanu kha a bo leh daih a ka bag ah a dah a ni mai lawm"
"I phuahchawp. A rawn hruai ve nu chuan i bag pawh a hretawp nang"
"Ka kal lamah min enthla niang chu ka hrebik nang"
"Betty in hruai a neih kha thudik a ni. Sandra thudik kan hria, ngawi tawh rawh. Sawichhuak leh tawh suh u" ka ti leh a, nuih suk pahin "Ka ring chuang lo" a ti tho. Thildang hrechiang miah lova zungbun awmna chauh hmutu tan chuan Diktei rinloh hi a awm a, vawiin a thil thleng a ni a, sawifiahna hun a awmloh bakah finfiahna hmuh tir tur ala awm lo.


"Ka nu pawn min ring a, midang pawn min ring vek. A mihrang berin min ring lo anih hi"
"Engmaw i sawi?" Sandra kal tum tawh a ding chawt a, "Mi hrang, thisen zawm loh berin min ringlo a nih hi" a reh zui vang vang a, tuman engmah kan sawi tawh lo. Diktei chuan a sawi sual tih inhria in "Ka tihpalh" a ti sep a, a inthiarfihlim zui zat a, kan chhungkua chiahin kan hria emaw kan tih kha midangin an lo hreve a ni. Thinrim lai hi chuan duh loh deuh deuh sawi a awl a, midang kan tina hma a, midang tihnat a awlsam angin tihdam leh a harsa ţhin hi a buaithlakna a ni.



CONT...

NEVER REGRET-13




Ka sawi tum a ni lo. A rawn haw a, ka pasalin Betty ban chungchang thleng a sawi vangin a rawn thinrim a, khap tur ka nihzia leh ka thiamloh a nihna te a rawn sawi a, a tir ah chuan ka ngawi. Ka nu leh Abigail te thuhretu an ni. Bawihtei leh kei kan awm ve hnua buaina awm zeuh zeuh thlenga a sawi avangin ka chhanglet a, ka nu leh Abigail ten kan thlavang an lo hauh ve bawk vangin a thinrim zual zel a, kan boruak a sang chho zel a, ka thinrim em vangin ka tum loh deuhin ka sawi chhuak a ni. He inchhunga mite hian min huat vek tawh ka ring.


Jason a rawn luh pawh chuan ka ţi dek a, ka thlavang a hauhloh vanga ka thinrim dawn laiin Betty bantir a duh hial vangin a rukin thil a ti a nih ka ring a, Sandra chungchang ka sawichhuak leh bawk nen, a thin ka ti rim in ka hria.

"Vawiin ni chu a harsa khawp mai tiraw?" a ti a, a necktie a pawt thawl a, kamir kawrkilh chunglam a phelh leh hnuah ka bulah a rawn ţhu a, zep miah loh chuan ka thilsawi vang khan hrehawm ka ti ve.


"A rilru ana em?"
"In na ve ve. Ni lawm ni? Thinrim ber lai pawh a ngawih chuh a ţhatna in hre tawh ang a, a ţha phian lo mi?" zangkhai vaha a tih chuan ka ngaih a ţhalo letling zawk.
"Min haw lo mi? Thil pawi deuh ka sawichhuak sia, mahse ka tum lawk dan a ni bik lo" ka ti nawi niaih a, ka inchhir ve takzet.


"Khawi aţanga i hriat nge?"
"Ka sawi thei lo" ka lo ti vat. Ka thinrim vanga ka thilsawi khan Christy min rinna pawh ka tichhe vek dawn a ni. Zing aţanga ka hun hman dan hahthlak lutuk vang vek.
"Ka chetdan kha min hrethiam dawn nia, Betty zawhchian ka duh vanga umzui ka ni. Ka theihtawp ka chhuahna erawh hria la ka duh"

"Ka hria. Ka sawitur ka fimkhur tawh ang. Chuan ka lawm e" ka ti a, thil awmdan ka hriatchian hmaa ka lo dem ringawt kha ka ti dik biklo a ni.


"Awle. Hna ikal hreh phah em lovang chu maw"
"Hreh love. Mahse ka nu hriat ve ka duh miah lo"
"A hrelo turah ngai ang" a tih chuan ka thlamuang deuh. A hriat vaih chuan a rilru a na khawp ang le.
"Betty bantir kher angai lo. Keimah min demtu an tam lehzual mai mai. Thudik chu sawi ngai lovin kan hria a ni lawm ni?"
"A lehpek a thlen loh nan a pumpelhna zawn a ţha zawk"
"Inven dan ka thiam ve tawh ang chu" ka ti tlat a, ka mualpho thup nan a bantir tih zawnga thu an lak ka hlau. Ka pasal an hria a, a nihna zawng zawng nen, keimah vekin ka tuar leh thovang.


"Kan sawiţha dawnnia, kan intifai ange" a ti a, bathroom a luh hlan chuan a lehkhachhiarna dawhkan ka remfel a, Bawihte in a ţawmpui lui tlat a, Bawihtei lehkhabu a let rum mai. Pawhdawh tlem a inhawng deuh a, nidangah a kalh tlat zel sia, a rawnchhuah thut hlauin bathroom lam ka melh leh te te phawt a, chumi hnuah fimkhur deuhin ka hawng.


Thil pawimawh em em hmuh tur a awm hran lova, ka hmuhchhun erawh ka tana pawimawh em em a ni. Pride and prejudice, ka chhiar nasat theih deuh kha. Ka kalbo lai khan ka keng tel lova, Jason-a inluahah a bulah ka theihnghilh a, ka chhiar nin theih ţhin loh vangin khatih hunlai pawh khan ka ui hle a, lak leh ngaihna a awm lo nen, ui deuh chungin ka kalsan ta ringawt a ni. Jason chuan a chhiar ve ngai lem lova, a ngaihthlak ve theih tur a min chhiar rik tir ţhin lai pawhin reilote ah a muhil mai ţhin. A tihral daih ka ring tawh a.

Ka duh ber ţhin ka hmuh leh chuan lung a ti leng a, ka la kang a, reitak hnuah ka keu leh ta chauh. Ka hming leh ka neih ni a inziak kalh a, ka kutziak ngei a ni. Alo rei ta khawp mai. Jason a rawnchhuah thut ka hlauh vangin ka keu puat puat a, ţhenkhat chu duhbik ni awm takin a inrin a, ka lehkhabu duh chu engmah ka thai rang ve ngai lo. Ka tih a nilo tih a chiang. Jason zawk hian alo chhiar ve anih dawn hi. Ka keu puat puat lai chuan engemaw hi a rawn tla chhuak nawlh a, chhar turin ka kun vat a, kan pahnih a thlalak a lo ni. Kan la naupang a, keiphei chu ka naupang lehzual, midangte ang bawk a college kal ţan tir chiah ka la ni.


Kan nui hmel te chu a lem a nihloh zia a chiang. Kan inkawp hnu lawk a mi a ni. A inah chaw ei turin min sawm a, chuta ka kal tur min lo hruai laia mi chu a ni. A nghawngah kuahin keimah chen turin ka kuai kun deuh a, kan hmai a insi lek lek. A ngaihawm khawp mai. Enghelh em em a awm ngai lova, kan hlim chhung kha a rei vak lo thung. Kan invuan lui ţang ţang a, harsatna inhneh tir lovang kan ti a, kan infuih tawn a, buaina engemaw a awm pawh khan kan awmdun chuan kan hlim tho ţhin. Kan awm hrang leh chiah hi ka tawt leh up up ţhin a, nau ka pai hnu kha chuan ka tibuai zui ngam ta lo a ni.


"Kum19 chauh ila nia" ka hnunglam aţanga a rawn ţawng thut chuan ka phu nasa lutuk a, ka thil kenlai ka thlauh lo chauh. Hawi let ka tum laiin min kuah a, hmachhawn a ngai rihlo chu a ţha hlauh e.

"Kan awmdun hunchhung kha kum khat leh tlem te chauh a ni maithei, chuti chung chuan tawp chin nei miahlo turin ka hmangaih hman tho che a, tun thleng hian ka mitah chuan ila mawi ber" a ti a, ka hnunglama awm anih vangin thlalak a keimah zawk chu a kawk zeuh a "Hetiang chiah hian nui leh tawh rawh. Midangte pawisawi hlau leh an hlimna thlensak nuam itih ţhinna te kha, natna hian mihring a siam danglam thei a, a ţha zawnga danglam tum a ţha" min kuahna aţanga talchhuakin ka hmachhawn a, a sam ala hnawng chup a, bathroom aţanga alo chhuahna ala reilo tihna a ni.


"Tunah hian ka sual itihna mi? Insiamţha tur a min nawr tut tut chuan iti harsa zawk mai mai. Ka insiamrem vel mek chauh anih hi."
"Insiamţha turin ka nawr lo che. I nihna ang anga ka pawm vang che in ka nei che. I mize hlui kha a ngaihawmzia ka sawi naah ngai mai rawh. Bawihtei nangmah chiahin i pawm a, harsatna i tawk dawn, a chiang reng. Chhel itum luat vanga i mize chhar thar hian buaina a thlen ka hlauhpui mai che a ni" tiin a insawifihlim a, chaklo deuh kha la nireng ila chuan tunah hian hna pawh thawk thei lovin nu leh pa thawhchhuah ringin ka la indawm kun tlawk tlawk ang.


"Ka tan chuan chhel taka awm kha a ngai miau a, naupangte a fa pawm ka nih kha hrereng rawh. Chhel lo ila chuan nangpawh hian min hmu leh tawp nang" ka ti a, ka tawrh tawhna kha ka sawichhuak peih tawh lova, hriatreng pawh ka duh tawh lo.
"Tunah chuan nangmahin i tuar tawh lo. Ka awm tawh a, ka chhungte leh i chhungte an awm a, Bawihtei kan enkawl pui thei che a, natna siamsak che kan duh lo vek. Keiphei chuan i natna tur siam ka tum tawh lo. Min rinchhan la, ka farnute pawh i khin chuan an hua ang che, i lawm lohna min hrilh la keiman chinfel dan ka lo zawng ang. Inpui tawn ila, kan mawina tur intihsak tawn ila, hetianga inpawh lo taka kan awmreng chuan Bawihtei hian nu leh pa neihloh a thlang daih thei, kan fanu hlimna chu a pawimawh a ni lawm ni?" lu ka bu nghat a, ka tan chuan Bawihtei aia pawimawh an awm lo. Fa ka neih aţang chiah hian nu leh pa min hmangaihna ka hrethiam ve thei chauh a ni. A thuk em a, sawifiah thiam chi pawh a ni lo.


"I farnute chuan an pawisawi lo mah ila min lawm lo sa reng. Betty lawm an duhpui che"

"Keiin nang ka duh che a, duhthlan ve theihna annei lo. Ka lo sawipui ang a, ka sawipui hnu a i rilru tina thei zawnga ţawngkam annei leh anih chuan khing let lovin keimah min hrilh dawn nia. Engkim a ţha vek em?" a nui ka hmuh chuan tawi te in ka nui ve a, diktak chuan mo nih hi a harsa a ni.


"Bawihtei nen hian ka hmangaih cheu a, in awmdan ka chik reng a, ka farnute pawh. Sandra pawh a insiamţha tawh turah ngai ang. Nangpawh ka ring ang che" a ti a, min kuah nawn leh chuan ka lo kuah let ve a, ka khin let ai chuan an unaupa ngeiin an thiamlohna hrilh se an tan pawh dawnsawn a nuam zawk ngei ang.
"Ka lawm e" ka ti leh a, ka samah a chul a, hmana kan awmdan ang mai kha a ni leh tawh.
"Ka hmangaih che" a tih chuan "Nangpawh" ka lo ti vat a, kan pindan chhung uap churh ţhin kha a awm tawh lo. Nupui ţha tak ka nih ve theih ka inring tlat tawh a ni.



Nidang ang lo takin Bawihtei a tho tlai ve a, ka harh hma ve vang nge pawh ka hre lo. Ka ţhutchhuah rualin Jason bathroom aţangin a rawnchhuak ve chiah a, min hmuh rualin "I muttui em?" tiin min zawt nghal a, mit ka nuai a, ka ham zui bai bai a, ka awmdan chu hmuhnawm a tih hmel khawp mai. Sana ka en a, dar6 alo ri dawn chauh. Ka hma ve deuh a nih dawn hi.


Sam ther fur chungin Bawihtei a rawn ţhu ve hlawl a, mit pawh ala meng ţha lo. A tep chuap chuap a, a mit a nuai dawn veleh a kut ka lo man bet "Mit nuai a ţhat loh kha" ka ti a, Jason chu kan bulah rawnkal veleh in "Tuemaw pawn a nuai zo chiah" a rawn ti a, ngaiah ka nei tawh a, Bawihtei chu ngaia neihtir ve ka duh lo. Keimah nilo in Jason zawk a ban a, a mitmeng pawh a fiah ta deuh. Jason chuan duat taka lo kuahin a malchungah a ţhuttir a, "Ka mumangah chocolate thlawk thei a awm a" a tih chuan kan lo nui a, mumang hi a nei mak thei viau mai.

Kan inkarah a ding a, a kut pharchhuakin a hum a, "A chungah ka chuang a, ka eichak chuan ka eipah zel a" a ti a, a mumang ngaihtuah let niawm takin a ngawi zui a, a khabe a dawm a, a dang a sawi leh tur chu phuahchawp a ni tawh ang.
"I chuan na ber i eizel chuan i tla daih lo mi?" Jason chuan a lo ti a, Bawihtei lah chuan lu thin mat mat pahin "Aih ka ei ang chiah kha alo awm leh zel" a ti mai a, nui hak hak chungin ka thawhsan. Tukin pawh kan chhungkaw boruak a nuam khawp mai.


Hnakal thei mai tur a inpeih sa atin chaw kan ei a, kan inbe tam lo hle. Ka nu leh pate an danglamna ka hmu lova, Sandra erawh a mit a bui lak a, a ţap nasa ni ngei tur a ni. Jason nen bawk kan kal rual leh a, car aţanga kan chhuk hnu a midang kan pawh chiah chu min melh relh relh tawk an awm reng mai. A tih ngai miahloh danin midang hmuh lai chuan min kuah tlat a, ka bula a kal leh ka pasal a ni chu zak hmel a pu lo. Thurik hrelo ho ngaihdan chuan kutkem nei ka ni a, Jason awmdan pawh chu mak an tihzia an phunpui sap sap hlawm ka ring.


Kan inţhen hran dawn ah "A nasa zual i hmachhawn tawh a, vawiin hi chhel tak chunga i tluan thei anih chuan a zatve i tuarchhuak ang a ni mai. I bulah ka awm dawn ka tih tawh kha. I bag a zungbun dahtu chu ka zawnchhuah sak ang che. A rei lovang" a hawikual thuak hnuah ka biangah a rawn fawp a, zahawmna a pawimawh vangin thildang a ti lo.
"Kha kha engvang nge?" nui chungin ka biang ka dawm a, ka kianga awm a ka lam ţang tlat tur ka neih phawt chuan ka tuar thei vek ang.
"Ka thusawi nemnghehna. I haw dawnah min rawn hrilh rawh. Damlo buaipui lai ka neih loh chuan ka thlah ang che"
"Tehreng mai." a ban a vai zeuh hnuah kan inţhen hrang a, ka thawhna hmun pawh hi nimin lam aia boruak a zangkhai zawk ka beisei.


"Ka thlen khalh che" Seni awki zangkhai vah ka hre hmasa ber.
"Nimin pawn i hma zawk tho lawm"
"Chuchiah. Tih phut che ka duh vang mai mai nih kha. I muttui maw?"
"Tehreng mai. Kan inthlak ve ange" ka ti a, inthlakna lamah ka kal a, nimin lama thil thleng vang khan min tih hlim a tum nasa niin a lang. Min ring nge zungbun kha ka lakah a ring ka hre lova, thil tisual tu ah min rinloh hram ka beisei.


"Nizanah ka mumangah ka hmu che a, keipawh ka inhmu. Inpa hriatlohin kan lo lengchhuak a" a ti zat zat a, min hnaih takah a ţhu bawk.
"A hriatlohin kan la lengchhuak tak tak dawnnia"
"I duh tak tak maw? Scooty hlui ka hralh a, a thar ka la a, i chauh hnawk thleng ka lenpui peih che..mahse...."
"Enge mahse?"
"Marcus min tihpui ang" a nui zui uarh uarh a, hmana keimah ang mai, enghelh a nei vak bik lo a ni.
"A duh dawn che mi?" ka ti uar a, a lo nur nang a.
"Duh ang i zei viau chuan. Marcus hi chu chhelo e, i pasal nen an in cousin lehnghal. I cousin ve ang a ni mai. Bialnu nei ta se a zei angem le? Keichu englai pawh hian Marcus a ni deuh tawp mai?"


"Ngatimaw?" kei aiin Seni a phu nasa zawk. Marcus aw ngei mai kan hria a, Seni zah tur zia ka ngaihtuah thleng pha hman. Kan ţhutna lam pana rawnkal pahin "Ngatimaw Marcus anih deuh tawp?" nui chungin a rawn ti lehzel a, ka mal rawn ţham tu Seni kut chu dahsawn ka tum a, a theih miah loh. Na ti chung chungin ka tuar tlawk tlawk a, Seni lah milim ang mai a ni tawh bawk.


Kan dawhkan hmaah a rawn bawk a, "A ziaawm em Lalruatdik?" a rawn ti a, ka mal na pawh a zia riai riai.
"Ka hre lo le. Jason nen kan lokal a, keimahin ka la awm lo"
"I awm lovang. Min mamawh chuan ka awm reng. Jason pawh a awm a, nangmaha i hmachhawn ngam loh chuan hmatawn sak tu tur che kan awm reng. A ţha vek mai ang"
"Ka lawm e"


"I bula mi kha nautelem a mi? Ka rawnluh aţangin mit ala khap miah lo. A thawk pawh ka hrelo" boruak tih zangkhai tuma a tih chuan nui hak chungin Seni lam ka hawi a, ngil auhin a ţhu a, ţap mai tur hmel a pu.
"Anih hi i kuah chhin chak em?"
"Ka lo hawn ang chu" a tih lai chuan ka mal a rawn na leh ţan a, mawl lutuk. A naupanchhiatna hi a lang leh ţhin.


Damlote awmna pindan aţangin Bena a rawn chhuak a, Marcus a hmuh chuan a rawn kuah chawt a, a awm ang chiaha rawn awm vein an hmai a in si lek lek.
"Tunlai party naah hmuhtur iva awm tawh lo ve, hmuh che ringin ka kal ve em em a"
"Tuman min sawm duh tawh lo. I lam lai vel enleh a chakawm nen" Seni a rawn hnai tual tual a, ka beng bulah "Ka zak" a rawn ti sep a, kan pindan chhung ang maiin duty na hmun tawh vawiin chu nuam ka ti khawp mai. Engkim hi a thar vek ni maiin a lang.


Marcus nen coffee in pahin kan ţhu chawl a, khua a lum vak lova,a vawt lutuk lo bawk a, a nuam tawk chiah.
"I hlim hmel ka hmuthei a, a lawmawm khawp mai. Hlim reng rawh. Hlim i phu ve tawh alawm tiraw? Bawihtei pianghlim ţap chunga i pawm laite, a thawhah nasat deuh changa ţap chunga a thawhah tireh vat tura doctor i ngen ţhin laite, ipa chetsual lai zawng zawng nen, khanghun kha a liam vek tawh a, pasal neiin chhungkua in din tawh a, ka lawmpui che Lalruatdik" a ti a, keipawh ka hlim leh thei hi mak ka ti. Kim lo huih a ka inhriat ţhin na te, Bawihte in pa nei ve se ia tih rual a ka hrilh ngam siloh hun lai te kha, engkim a liam tawh. Hlim reng ka duh ve tawh.


"Ka hlim reng thei angem? Mihring ka nia, khawvelah ka awm a, chutiang chu a theih loh ang tiraw?"
"Ka sawi thei lo. Hmahun hriat theihna ka nei bik tlat lo. Mahse ka sawi tawh kha, hun chhe ber i tawh pawhin i kiangah ka awm zel ang. Lungngaihna khur a i pil tak tak hmain i kut ka vuan hman zel ang"
"Ka dawngsawng zo lo ţep ţhin" tih fiamthu pahin ka awm ka dawm a, tlu tur ang deuha ka awm chuan min lo vuan betin "naupangchhia" a ti sup a.
"Chhanchhuah zel che ka tum laiin ka ţawngkam ilo thihpui hlauh ange" a tih zawm leh a, harsatna ka tawh apiangin ka ban phakah a awm a, min chhanchhuak ţhin tu a ni tak tak.


"Seni hi eng angin nge i ngaih ve?"
"Seni a ni deuh tawp mai" Seni ţawngkam a hriatphak chin ang kha a sawichhuah chuan ka lo nui vak a, a thusawi kha a dik anih chuan min lo hmangaih tak tak a ni thei a, pasal ka nei a, na takin ka siam a, kei chauh nilo Marcus pawh hian hlim a phu ve tawh a ni. Ka hlimna ringawt a buaipui lai hian ala na reng em ka hreve si lova, a inthup thiam em a hriatpui theih pawh a ni ve lo.
"Kawppui ţha tak anih ka ring asin. A rilru a ţha a, a hmelţha bawk a, chhunglam leh pawnlam ţha ve ve te chu engtikahmah i inchhir lovang" ka ti a, hmalam a pan a hun tawh a ni. Keimah ringawt min ngaihsak lo hian amah a in ngaihsak ve a hun tawh. Amah leh a hma hun tur.




CONT.....

---

NEVER REGRET-14



Ni leh thla a liam a, Sandra nen kan la inbe lova, biak ka tum pawn biakna hun min siamsak lo hrim hrim. Ka thawhna hmun pawh a pangngai. Min en hrek hrek hnu a inhrilh ru tawk erawh an la awm. Betty pawh a la thawk ve a, Sandra nen an la inkawp reng a, kum inthlau viau siin an inkawp nasa viau mai.


Jason pawh a insawi angin min vil hneh khawp a, Marcus pawn min fiam leh zeuh ţhin. Han ruih zeuh hi ala sim lova, hmalam a pan hunah chiah sim a tum thu a sawi kha ka la hrereng a, hmalam a la pan chiah lo ni ah ka ngai. Seni pawn nitin Marcus chanchin min la hrilh a, a mumanga a hmuh thu thlengin a sawi chamchi reng a, a rawn hriatfuh leh a hlauh vangin a sawi dawnah a fimkhur ve viau tawh thung.


Haw tura ka insiam mek laiin Abigail a rawn lang hlawl a, Sandra lamţang char char anih vangin thil ţha ti tura rawnkal a nih ka ring lem lo.
"Ka hriatsual loh chuan i hun a zo ţep tawh tiraw?" dawhkanah bag a dah a, a rem laiah tlangnel takin a rawn ţhu ve.
"Zo ţep"
"Tih tur dang ka nei tawh chuang lova, haw rual ang aw" a ti a, ka beisei loh lutuk anih vangin mak pawh ka ti.
"Awle. Min nghah lawk a ngai ang" phone a phawrhchhuak a, a hmet mual mual a, min nghah hunchhung pawh rei a ti lo deuh ang chu.


Ka inthlak zawh hnuah inmil ve hmel deuhin kan inzuichhuak a, Jason emaw Marcus pawh ka haw tur thu ka hrilh duh ta lo.
"I rilţam ve em?"
"Tlemin. In ah law law nimai"
"Noodles lei haw ila" a ti a, ka nu hmuh pah a ni mai tiin ka nu dawr lamah kan kal a, min hmuh chuan alo hlim khawp mai. Nitin ka nu ka hmu thei tawh a, helai hmuna dawr anei thei hi keipawn nuam ka ti.


"Abigail kan va inhmu khat ve"
"Nia ka lokal em lawm. In dam em? Ka pu eng nge a an?" a ti ve tehmial a, ka pasal a chhungten ka chhungte an en dan hi ka lo ngaihven ngai lem lo.
"A ţha e. Ani pawn a hmuchak leh tawh viau ang che"
"Karkhat vel chiah ka lokal a, min ngaina hman vak dawn mi?"
"Ngaina tehreng mai. Fel a ti khawp che sin. Lo tlawh leh ngei ngei rawh aw"
"Awle. Min lo biak dawn nia" a ti a, noodles a lakhawm pah mawlh mawlh a, an thusawi awmzia chu pakhatmah hriatthiam ka nei lo.


Bawihtei leh Cathy thil tur kan lei tel a, in kan thlen a kan thil hawn an hmuh chuan an lo lawm khawp mai. Kan inthlak a, kan intihfai hnuah thil kan ei ve hman chauh a ni. Kan thil ei laiin ka insum thei lo chuan "Abi, ka nu nen a in thusawi kha eng nge awmzia?" ka ti ta nge nge a. Ka buai buaiin ka buai a, kan inbe tam lo nen, ka ngaihsak lo ka tih tawh kha.
"Ka u in a hrilh lo che mi?"
"Hrilh lo"
"Inu kha dawr a neih dawn chuan lehlanga in in a kal tur an ngai a, Jason hi a ţhianten a hma in an lo sawihmuh tawh a, an rin vek tawh laiin midang inah alo awm leh daih a, kal tur dang an zawn leh chhungin ka unaupa duhtak hian keimah min kaltir" ngaihpawimawh loh hmel takin a meng kual vel a, ka lo inthlahrung khawp mai.


"Chutiang chuan a ti maw?"
"Ti chiang e. Hlawh ka pe ang che min tia, naupangber ka nih vangin ka nu leh paten min duat a, pawisa min pe vek tho mahse min nawrlui tlat a, ka hnial zel a, a thinrim dawn takngial vangin ka remti anih kha" ka zak a, nuamlo ka ti bawk. An hausa a, an duat rawn ve a ni bawk. Heti hian a duh ang ang leh a tuina zawng an tih tir a, a tui zawng a thlak ngun viau bawk niin Jason pawn a sawi. A duh apiang an tihsak chunga keini ang in a awmpui ang maia alo kaltir chu keimah zawkin nuam lo ka ti.


"A hrehawm em?"
"Teuh nang"
"Chhunah eng nge in tih ţhin?"
"A thawnthu sawi ka ngaithla ţhin. A tlangval lai te, i lehkhabu hlui pawh ka hmu ţeuh. Hmanah chuan lehkhabu ka chhiar nasa ţhin a, ziaktu nih ka chak ţhin. Mahse ka tuina ka thlak a, ka ţhulh leh a, tunah chuan ka tum leh tawh. Ipa in min fuih ţhin a, ziaktu ţha ni turin ţan ka la leh tawh dawn" a nui zui ver ver a, he inchhunga ka mo hnu a inhau miah lova kan ti ti dun ve theih vawikhatna takmeuh a ni.
"I unaupa in chutiang a tih tir che chu ka awih thei lo. Engtin nge a tih theih?"
"Makpa ţha anih duh vang bak a ni nang. A mi zawnsak a remloh takah chuan thutiam tawh tih hlawhtlin loh a duh si lova, inu dawrsiam ţan hun a ni tawh bawk nen, nula an la awm silo bawk nen, min tir lui ka tih kha. Ka kal hmasakber dawn pawn ka tlanbo a hlau a min thlah thlap. Ţap lek lekin ka kal a, nuam ka ti ta phian"
"Ka lawm e" ka ti a, thildang sawitur ka hre lo.


"Ka tuina thar ka hmuhchhuah phah chu. Ka u hnenah lawmthu sawi zawk rawh. Bakah a rei tawh, thla a liam leh tawh hi" a ti nang nang a, kanu leh pate nen pawh kan inbe ngun viau a, engmah an sawi ngai lo. An inbiakna kha hrelo phei ila chuan engmah ka la hre tawp nang. Ka pasal ber, a remruattu ber lahin engmah a sawi bawk silo. A duh chuan a nau chu a lo thunun theih khawp hi. Abigail pawn Jason thinrim alo hlau ve viau bawk a, Sandra chiah a ni ka la buai na chu.


"Enteh ka hmuh hmasakber che khan Marcus nen in inngaizawng amaw ka tia" a nui zui kur kur a, min ngainatloh chhan kha ka hrechak ţhin reng a ni.
"Ka ţhianţhaber. Marcus chu ka ţhianţhaber"
"Ka hria. Ka lo hresual anih kha. Ka u mah nise Jason hi a fel a, i vannei tehmai nia aw. Ka rinloh lai che a ka tih tauh ţhin vang khan min hau hrep lehnghal" vui aw deuhin a ti a, chutiang thil thleng pawh chu ka hre chuang lo.
"Ava pawi ve. A hau che tih ka hre hleinem"
"Nimaw? Sandra nen min hau. Awm ho loh thlengin a sawi lawm. Sandra hian hnawk kan ti anih a rin phah a, ala biak duh miahloh che hi. Thil ka chik ve lawm" ngaihsam tak chungin a ti leh lawi a, kei aia a naupanna a tam hauh lovang, naupang anga an en rei vang nge ala â phuang thovin ka hria.


"Ka thil sawi vang kha maw ka tia"
"Ni tho e, khatiang te nge i sawichhuah vel" a ti hlak a, a nuih tho vangin a thinrim lo ah ka ngai.
"Ka insum hman lo tak tak. Ka inthiam lova, hrehawm pawh ka ti"
"Jason chuan a phu ve tho atia, a khak zeuh zeuh bawk vangin inrem lohna siamtu ah angai che a, nangmah zawk hi inthlak danglam daih lo la chuan in insual ziahin ka ring" a tih takah chuan ka lo nui vak a, a ni maithei.


Ni e ka danglam tawh. Ka chenpuite anni bawk a, an hmuthiam vek ang. Jason nen nupa diktak angin kan awm tawh a, pindan a inkhung daih lovin midang bulah ka awm tam ve tawh a, Bawihtei leh Cathy angkhat rengin ka en a, thil ho te te ah thinrimna ka zawng tawh lo. Ka pasal a nu ngei pawhin min fak em em tawh a, mo fel nih hi alo har lo mahse kan mona a zir ka la ti fan. Ka mo na te hi fello sela chuan hetiang ka nih hi ka ring chuang lo. Tin, ka pasalin min ţawiawm ţhain ka inzir zel nan a ţangkai em em bawk.


Ka nu nen pangpar kan remţhatna bulah Bawihtei leh Cathy te an infiam a, ti ti paha tifel vel kan ni bawk a hah pawh ka hre mang lo.
"Tumah hian min khawihpui ve ngai lova, pangpar hi mawi an ti ve lo nge pawh ka hre love" tiin ka nu a phun a, tuipui lo tan chuan a peihawm loh ve em a ni.
"Mawi ti naran tan pawh khawih vel hi a peihawm loh a, tuipui lo tan phei chuan han ngaihtuah la"
"Saw sawn engahmah angai lo" pipu a ţhu chunga Abi lehkhabu chhiar lai a en a, chips ei pahin a bih ngur a, kan noodles ei ringawt pawh khan min la ti puar. Ka nu in a eiduh lutuk a thau vak a hlauh laiin a tuina a thlak leh mai ka lo hlau thung.


Tlai lam anih chuan an rawn haw sap sap hlawm a, ka nu nen kawtah kan lo la awm. Abi chuan a pindan a chhiar chhunzawm duhin min luhsan daih tawh a, Bawihtei leh Cathy te pawn lemziah an duh leh tawh zawk. Ka pa rawn haw chu ka nu nen a min biak zawk hnuah pangpar chu "In buaipui peih mai mai a tlai tawh rawn lut ru" tiin min luhsan leh mai a, Jason thung chu kan bulah a rawn awm ve.


"Pangpar dang in phun nge a ngai kha in ti fai?" a rawn ti a, ka pot chawi lai mek chu min laksak in "Khawiah nge?" a ti leh sup a, dahna tur ka lo kawk a, a dah ve mai bawk a, a rawn haw lam a ni tawh bawk a balh a hlau lo aniang chu.
"Pot kan tifai a, hnah ro awm hi paih a ngai ţhin bawk a. Diktei rawn awm hma phei chuan keimah chauh hi ka ni mai a, in ngaihsak ve si lova" ka nu zawkin a lo chhang.
"Nia a par kha chuan kan ngaih a ţha mai a" a ti veleh sup a, inchhungah hi chuan nu te chuan phun na tur te an hre thei a, ka nu a phun hlak hlak chang pawh a a chhan ţhin dan te leh a unaute a en dan pawh, fapa ka neih chuan Jason ang hi ni sela ka duh a ni. An upa zel anga, nupui anneih thleng pawhin kan nuam sa zel dawn tihna a ni.


A awmna tur hmun aţanga pot kan dahchhuah vek vangin Jason chuan a dah let leh vek a, dah let leh lam tal min awl thei a, a lawmawm khawp mai. Pangpar leh pot aţanga a bal kan tih tlak ho ka lo phiat thung.
"Nidangah chuan in nupa pawn tihdan inhriat tawh dawn kha" tiin ka nu in min luhsan a, a hah hmel khawp lehnghal.
"I haw dawnah min rawn hrilh lova, phone ila thei bawk si lova, Seni ka hmu hlauh a"
"Abi a rawnkal a, kan haw rual"
"A ţhat hlauh chu" ka phiah zawh hnu chuan ka ţhu leh rih. Rawn ţhut ve pahin ka kawr ngap nasa zual lai a rawn bengfai ve bawk a, a kut pawh a fai em em bikin ka ring lo.


"Kan inah Abigail ilo kaltir a, ngatinge i kaltir kher a?"
"Tihtur a nei chuang lo. Nuam a tih em kha, kal leh rawh pawh ti ila a hnial nang" a ti duh lek chauh.
"Ka zak alawm. Ka tan a nawm loh dan tur te ngaihtuah ve la"
"Hman lutuk a ţha lo. A hunawl a hmanţhat theih kha a ţha, tunah pawh a tum a thlak leh tawh a"
"Lehkha a zir reng tho lawm" ka ti hlak a, Abi hi a tum a thlak reng e tih lohah chuan lehkhathiam tak a ni. A zirpeih phian bawk a, henu hi a mak riau ania.
"Duh se chuan a tan hian thawh tur a tam. A peih lova, hnathawh tur ka siamah ngai mai ang" khua a thim lek lek tawh vangin a ding a, min kaitho zui ve zat bawk.


Ka ngap lutuk vang chuan ka inbual nawn leh a, ka inbual zawh meuh chuan chaw ei a hun leh a, an lo haw kim vek tawh bawk. Jason nen a kan luh hnu deuh lawk khan Sandra a rawn haw ve a, a ngai reng. Kan inbe chuang lo. Chaw eikham hnuah Bawihtei lehkhazir reilote ka enpui a, chumi hnuah ka mutpui leh a, kan hun hmandan pawh a hma ai daih chuan a mumal tawh.


Jason a rawn luh ve meuh chuan Bawihtei a lo muhil daih tawh. A unaupa a rawn haw khat a, apatea a awmpui a ni awm e. A rawn haw ve zan ania, an inkawm rei a, bakah Sandra pasal hlui Muankima a rawnkal bawk nen, sawikhawm duh anneih ka ring a, Abi nen kan kal kiang vat a ni.


A rawn mut luh laiin "Sandra te chu?" ka lo ti a, a zavaia hriat ve vek ka tum chuang lo.
"Ka hrelo le. Muankima hian hunţha dang pek leh a phu rualin Sandra a hel a, puitling an ni tawh a, an sawifel theiin ka ring. Sandra thutlukna ang ang a ni mai ang chu"
"Nupui neih hnua lerh leh hi ţhalo e. Sandra chu ni ila ka neih leh ka ring lo" thutak deuhin ti mah ila a nuih a za hle thung.


Ka kawnga a kuah lai chuan ka zangthal a, "Tak tak alawm. Duh ber neih tawh te chuan lerhsan leh vel kher angai tawh hleinem"
"A ţhatloh rualin engkim hian chhan a nei vek. Sandra a ngaihawm thiam loh vang a ni thei a, Makiman a hmangaih tak tak loh vang leh a lerh ve hrim hrim vang a ni thei bawk"



JASON'S POV


A tumzui bar a, a ngaihdan a nilo hle a ni. Lerh ve ta ila ka chan a chhe khawp ang. A sawidik tho bawk a, hmangaih ber neih tawh chuan lerh a ţulna a awm tawh lo.
"Pasal lerh lo tur inei a, i vannei bik kher mai"
"Nia i lerh vaih chuan ka awmdan tur i hria lawm" sawifuh inti deuhin a nui suk a, a hmel ka hmuh apiang hian, a danglam emaw, a inchei leh chei loh pawn ka hmuh hmasak ber laia hmelţha ka tih ang reng khan hmelţha ka ti. Mihring kan nia, danglam thei kan ni. Keipawh ka landan a danglam lo bik hleinem. Kan ţhatlai a reilo tlang a ni.


A hmuiah ka fawp a, ka khawih a, ka fawh pawh hian englai mai pawhin a vawikhatna ang rengin ka ngai ţhin. Ka nupui ah hian ka lungawi tawk tih hriat theihna a ni. Anihna ang angin ka hmangaih a, a nihna lehzel tur nen, a landan lehzel tur te nen lam ka hmangaih vek.
"Muttui...ka hmangaih che" ka ti a, a mutchhuak tawh chu mengmang loin zawi tein a lu a ti che zeuh ringawt. A mut a chhuak tawh sia nangpawh a tihnaah ka ngaihsak mai ang, a harh chian lai chuan a sawi ve ziah tho. Ka lawm thove.


Kan intawn tirh khan naupangte kan la nia, khati chung khan chhungte nawrna leh duhlohna, harsatna tam tak ka hmachhawn a, naupang viau mah ila ka tuar thei vek tho. Min kalbosan daih lo mah sela ka tuar chhunzawm zel thei tho in ka ring. A kalbo hnu phei kha chuan ka nupui a nih theih ka ring tawh lova, ka zawng a, ka hmu lova, oa beidawn hnuah phei chuan hmuh leh ka inring tawh lo.


Ka bula a awm hma khan nitin mai hian ruak huaiin ka inhre ţhin a, zanah lah nise a thil neih hlui ka kawl ţhat ho ka en a, ka ngaih zual deuh chang phei chuan zan a rei ţhin. Mi ril ve deuh phei chu ni ila hla ţha tak tak ka phuahchhuak tawh ang. Chuti chung chuan ka bula a awm tawh hnu pawh hian a lawmna tur ka sawichhuak thiam lova, ka hmangaih thu ka hrilh a, thildang sawiduah ka thiam lova, lantir dan pawh midang angin ka thiam ve lo. Ka hmangaihzia ka chiang a, keiin ka chian hi a tawk zo ţhin si lo a ni.


Ka hmuh apiang hian nakin zel thlenga ka kianga awmreng turin ka duh thar reng ţhin a, ka hmangaihna hi a chak a, hmeichhe dang ka ngaihtuah tel ngai lo. Ka rilru put hmang chu thiamlo tak chungin Muankima ka hrilh ve nghe nghe. Nupuite iai leh tur leh inchhir tur chuan neih loh mai a ţha zawk lo maw? Ţullo ah fahrah kan siam hnem emai. Ka nupui ka hmangaih anga hmangaih ve hi chuan chhungkaw duhawm tak an din ve ţheuh ka ring.


A muhil lai ka thlir a, fa a neih tawh vang leh a kum a upat hret tawh vangin a danglam ve ta deuh. Ka hnaih lehzual a ka muttir lai chuan harh miahlo chungin amahin min hnaih ve hrut hrut a, a samah chulin a chalah ka fawp a, ka thil neih hlu bo tawh, harsa tak chunga ka neih let leh hi ka vawngţha kiau tawh ang.


Bawihtei ţap riin min ti harh a, pa ka tihna a lang nge ka tho rang kher mai.
"Ngatinge?"
"A intauh. Harhchiang mang lova chhuah a tum a, a intauh a nih hi. Min kaitho hmasa ziah rawh ka tih kha"
"In harh theilo anih kha" kum6 mi pawhna vin ve hlar mai.
"Fimkhur tawh rawh. Ţap suh a dam phah dawn chuang lo"
"Ana lawm" zingkar aţangin kum inthlau tak inhau ka hrethei a, keimah ai pawha ka hmangaihte anni a, an inhau ri ka hria pawh ka vannei ti tawh mai ang.


Bawihtei chal ka enchiang a, tlemin a pawng ve, naupang tawrh atana na khawp a ni ve.
"Iva su na awm ve. Sim tawh tur tihna anih kha. Inu ila sawi nasa lo deuh aniang. Sawi vak vak la a harh mai ang"
"Ka zunchhuak tawh a" a ti a, bathroom ah nge khawiah tak intauh ang maw?


Ka nupuiin Bawihtei school kal tur a siam laiin hnakal turin ka lo insiam ve a, "Khawnge?" ka tih rualin kamis in min rawn vawm a, inthuam ţup ngaina lo chi ni mah ila ka nu in a zahawm a tih dan a ni.
"Zingkarah pawh robot ang zar zar, Bawihtei nen hian kan vannei khawp mai"
"Robot ka nilo" a ti hlar a, darkar reilote chhungin engkim a peihvel hman a, robot a ni ber alawm.
"Special Robot" ka diriamna a ni hauh lo. Ka fak thiam ve dan zawk a ni. A chang chuan a thinrim hmel hmuh zeuh hi a nuam ve a, a thinrim tak tak lo hmel. Thinrim tak tak se ka ti chuang lo.


Kan fanu tlanchhuah hnuah ka kuah a, "Insiam ve ka duh" a ti chung pawhin ka thlah duh chuang lo. Ka thlahlel a, nitinin ka thlahlel zual tulh tulh emaw tih tur a ni.
"Ka nu leh paten an fak khawp mai che. I chanchin ţhalam an sawi laia ka chhuan ţhin zia che chu. Nupui dang ka duh ti ila chuan min vawhlum duh tawh ang"
"Inu vuak hlum i hlauh vang chauha duhlo inih dawn chu"
"Nangmah chauh a ka lungawi vang zawk" a tal phat a, ka lamah rawn hawiin ka rinloh takin min kuah ve tehmial.


"Min fak tak tak em?"
"Fak e. An ngai che a, kan in i chhuahsan veih chuan ka nu kan be ţawng zo tawh kher lovang. An fanu ini sia, thinrim lai leh thuruk liantham a awm pawhin in kalbosan tawh lovin kan sawidun thei tawh ang chu tiraw?"
"I mawl. Nuam ka ti tawh a, ka bo peih tawh teuhlo mai. Chhuak rawh pawh min tila ka chhuak teuh lo"
"Chhuak rawh ti che ila chuan kan chhungte hian keimah zawk min hnawtchhuak ang. An rilru ila vek tawh. Engtin nge itih bik a?"
"Min hrilh ang khan" a inla hrang a, nui sangin min en a, "Keimahin engmah ka tuar tawh lova, min hrilh ang khan ka awm a, keipawn nuam ka ti zawk" a chhanna tur chu ka hre sa. Ka sawipui hnu a danglam a ni. Abi pawh a duhloh zawng deuh ka tih tir leh hlauin a insiamţha vat vat a, hrem ka tum deuh a, ka hrem tumna hmun nuam a ti ta phian a, ka nupuiin mahni chauh a damdawiin huam chhunga kalvel hrehawm a tihzia hriain chhuanlam siamin a haw tur a lam vang vang duh tawh. Thla a liam tawh a, a hrehawm tihna a la reh lo.


Damdawiin lamah kan kal dun a, tuman an deuhsawh ngam loh nan ka ta anih zia ka lantir ţhin. Ka ngaihsakna ka lantir a, ka la venghim zel thei niin a lang. Diktei nen a kan inţhen hran hnuah Marcus ka hmu nawlh a, kan inhmu tam lo. Keimahni tawkah kan buai ve ve a, inhmuhna hun kan nei mang lo.


"Iva hlim ve, innu a rai a mi?"
"Nupui leh fa ineih hunah i hrethiam ve mai ang" ka ti a, office lama ka kal hnu pawhin min zui ve reng.
"Lalruatdiki pawh a hlim. A lawmawm, innu tih hlim dan pawh i hreve tawh lawm"
"A hlim loh palha min chhuhsak tum tu an awm vang a ni mahna" ka ti hluai a, office ah pawh min zui lut leh zel. Coat ka hak lai chuan chair ah a ţhu hnawk a, a hmelma ber a awm lo bawk a, thawm a nei lo deuh e.


"Chhuhsak che ka tum reng reng lo. A hmangaihzia che ka hria. I vannei lel lawl ngawt mai. Lalruatdiki chiah i ngaihven theih nan a ka tih anih kha. I ngaihven meuh chuan a hlim mai hi. Ka unaupa ni khanglang lo la chuan ngaihven hun ka siam lovang che mawle"
"Ngaihven tu i neih kha ngaihven hle hle rawh, ute nupui an awt ngai lo" ka ti fiamthu a, a rawn nuichhuak ta hawk.
"I vanneih zia i hretawh ah ka ngai. Ka ţhianţhaber hi i tihnat leh veih chuan"
"Chuan..?"
"Fa nei theilo a siam che ka hreh hauh lovang" min vauna naupangchhia zet vang chuan keimah zawk ka nui hawk thung.
"Ka lawm e Marcus. Naute hmelţha deuh deuh kan lo nei dawn nia" a pen ken laiin min vawm a, engtikah nge a puitlin ang?
"Tak tak a ka lawmpui che u" a ti a, thildang sawi tawh lovin min chhuahsan a, ka nupui hian ţhian thlan a thiam khawp mai.


CONT....

---

NEVER REGRET-LAST



"Pa reilote chauh aniang. Cathy lawm ka kalpui tur. Kan ţhiannu u pasal neihna tur ania"
"A theih loh. Exam a hnai, Cathy chu bia la, lehkha izir tur thu hrilh rawh"
"Mahse pa"
"Thu tawp anih chu" Bawihtei leh apa inbiakna bulah ka awm ve reng a, a rukin ka lo nui reng ringawt. Kum13 a ni ve tawh a, pawnlam a intihhlimna aia lehkhazir lam ngaipawimawh zawk tu pa a nei chu pawi a ti ve viau ţhin ang.


Kum35 ka ni ve tawh. Awihawm loh zawk tak a ni. Upa ka la inti duh chuang lova, fapa kum11 mi Anton kan nei bawk. Kum8 lai a liam leh tawh a, ka pasal nen a kan inhmangaihna erawh ala ngai reng. Ka hna ka bansan tawh a, ka nu nen kan inkawm melh melh mai ţhin. Abigail pawn pasal a nei tawh a, Sandra pawh a pasal hlui nen an innei leh tawh. Mak tak maiin kan in ngaina ve tawh phian a, Betty pawh pasal neiin nau a pai mek. Engkim a danglam vek tawh.


"Ka ţhianten ka kal ve an ring vek a, ka exam tur te chu ka thiam vek tawh"
"I thiamloh deuh hlek zir belh nan hmang mai rawh" Bawihtei ning leh thinrim hmel ka hmuh chuan ka lo nui hak a, nileng pawn dil sela a dilchhuak zo chuang lovang. Ka pasal chuan kan fate hi chhawrtlak loh annih a hlau ber a ni.
"Pa a chang hi chuan ka ngei thei ngawt mai che"
"Ka lawm e, keipawn ka hmangaih che" Bawihtei tihngaihna hrelo pawh a nui ta ringawt a, kan pindan aţanga a chhuah chuan a per nasa tawn tawn viau tho mai.


"Kal tir ve mai la, a rawn haw tlai dawn pawh nilo"
"Naktuk tuk leh mai hi an exam ani tawh a, boruak dang hip ka rem ti lo. I hriatthiam ka beisei" min ti a, thu min pe a ni zawk mah. Picnic tur leh thildangah pawh a phalloh hnua chhuahtir ka hrat a, min hrilh lawk a ni mah zawk.
"Hrethiam e, tun ţum chu ka tilui dawn lo"
"A hmahun ka thlir vang anihzia i hrethiam ang chu" a ti leh a, ka lo bu nghat a, pasal a neih hun zelah pawh zahawm takin awm se a duh a ni.


Ka nu leh pate an ţhiante inneih cham lawmin an kal a, kan chhungkua chiahin kan awm. Chhun thil ei a hun chuan kan ţhukhawm ţhap a, Jason a damţhat loh vangin hna a chawl tih kan sawitel hram ange.


"Phone ka duh" Anton chu Bawihtei nen kan melh hrawk a, Bawihtei pawn a pualin phone ala nei lo.
"Ţha deuhin zir zel la ila nei ang chu"
"Pa keimah ang rualin annei vek tawh"
"A neilo bik nih kha a dangdai" Bawihtei alo nui vak a, Anton erawh hlauhawm khawpin a hmel a rum thung. A puala phone neih chu Jason chauh nilo kei pawhin ka remti chuang lo.


"Leina tur chu min pe thei tiraw?"
"Thei lo pawi khawp mai"
"Ka sawi awmzia chu pawisa zawk"
"I zir zelna tur chu ka ngah mai" a fapa a tih thinrim leh chhaih kual vel hi a nuam tih pawl a ni.
"Lehkhazirna tur ka dil loh che hi"
"Ava lawmawm ve, nangmaha thawhchhuah itum a mi?" Anton a insehruh nasa tawh khawp mai. Kum naupangte si hi a rilru a lian reuh a, Jason chuan anu a chhun a ti mai ţhin. Luhlul min lo ti ve viau aniang chu.



"Hna ka la thawh theih loh hi. Phone ka duh, min lei la lehkha ka zir ţha ang" ala ti ţalh tho a, leilo tur tih hriatsa a dil buai peih ka lo ti khawp a. Jason chuan chhan enah a en tawh lo nge a ngawihsan ta hmak.
"Ka ţhiante pawn min nuih, ka neilo bik a"
"I puitlin tak tak hunah keimah ka lei dawn che nia" thlem ti tihin ka lo ti ve a, a duhthusam chhanna a hmuh hma chu a tawpsan duhloh ka hlau a, chu chuan Jason a tih thinrim ka hlau bawk.


"In sual si" dawhkanah fian a nghat chawrh a, a plate a mi pawh eizo lovin a tho nulh a, keimah zawkin vin ţhakin "Ti tau suh rawn ei zo rawh" tiin ka au zui a, ka thinrimzia hre chungin a rawn hawilet duh chuang miah lo.
"Rilţam a tuar thei bik dawn aniang chu" Jason chuan alo ti sup a, a fapa lungawilo chu haiderin a ei zawm mawlh mawlh tho.


Ka tho tharh a, Anton ka umzui. Kan fate kan hmuhlaia an tih tauh bur bur hian ka haw tlat zel. Tv hmaah a lo ţhu tum hmuk a, kum11 chiah ania, phone lei ngen a ti tau rual pawh ala nilo.
"Khatiang khan vawikhatmah awm tawh suh. I u pawn ala nei lova, a hunah chuan kan lei em em ang che" ka tih chuan thip deuhin min melh a, a mitmeng te chu vawt ram ram tak a ni.


"Ka sawi chu i hria tiraw?" ka ti leh ngat a, fapa ngeng enkawl hi har deuh sin.
"Ka beng ala ngawn loh hi" a ti hluk a, kum11 lek ala ni tih hi kan sawitel leh hram ange. Kan tihdan ang ang a Bawihtei zawk pawh a awm laiin a naupang zawk lehnghal.
"I hriat chuan a ţhat chu. Ngen nawn leh tawh suh. Thil i eiduh lo vel kher lehnghal a, chaw ei hun hmain rilţam sawi reng reng suh" ka tih hnuah choka lamah bawk ka let leh. Ka thusawi ngaithla ang pawn a awm lova, a thinrim chhung chu a hnaihah ka awm peihlo. Kan inhau thinrim lehzual mai mai dawn.


Tlai chaw eikham thleng pawhin Anton kan be ţawng zo mang lo. Jason lah chuan a enliam thei zek lehnghal a, a ţul tawpah lo chuan a fate a hau mang lo. A hauh tawh chuan an chhanglet ngam miah lo thung.


An unauin pindan hran an nei ve tawh a, Bawihtei a dawih em vangin anau nen inţawm mai sela ka ti a, Anton zawkin alo duh lo bur. Hlauh a neih nasat lai chauhin a mutpui duh a, an unau pawh an inhau ve reng. Chhungkaw dang aiin kan danglam biklo khawp mai. An naupanlai zual lai deuh phei chuan thubuai kan inrem chhawk ve zak zak ţhin. Kei hi ka thinchhia a, kan fate hian min hlau zawk turah ka ngai a, a ni chuang hauh lo. Kei aiin Jason an hlau a, chhuahna tur anneih pawhin a phalna lo chuan an kal ngam lo. Keive thung chuan phallo mah ila kal luih chang annei ţhin. Nu te nge nge chu kan nem leh hma ni ngei tur a ni.


Bawihtei mutthilh hnuah light off sakin ka chhuahsan a, Anton erawh chuan a pindan a chhung lamah a kalh. Chaw eikham veleh lehkha pawh zirlo in a inkalh khum nghal.
"An muhil ve ve tawh mi?"
"Bawihtei a muhil a, Anton chu ka hre lo"
"Ala ti tau a?" lu ka bu nghat a, alo nui hawk thung.
"Hrem chawp ngai lovin amah a inhrem a ni mai. Nithum pawh a daih nang" a ti a, a lamah min pawthnaiin min kuah a, ka kumzat chu engpawh ni sela ka pasalin min kuah hian nuam ka tiin ka thlamuang ţhin a, ka hahdam sawng sawng zel a ni ber. Ni ţha lo deuh ka hmang ni a ka inhriat chang pawhin ka pasal hian min ţawiawm reng thei a, ka rilru damna tur a sawi tur a hre ţhin a, ka taksa dam nan min kuah ţhin bawk.


Harsatna nasa tak tawk ve ţhin mah ila Jason ka nei hi inchhirna ka nei miah lo. Hetianga pasal fel hi phulo ka inti zawk hial. Fa pahnih kan nei a, kan duh ang thlap thlapin awm reng theilo mah sela Jason nen a kan fate annih vang hian an hlu a, ka hmangaihin anmahni enkawl hian theihtawp ka chhuah ve a ni. Hetiang chhungkua ka nei hi vannei ka inti a, hmeichhe tam tak duhthusam, taksa leh rilru hahdamna tur pasal ka nei bawk a, tunah chuan ka nun a nuamin ka hlim takzet a ni.



JASON'S POV


Bawihtei kum16 a tlin na chiah a ni. A ţhiante sawmin chaw an rawn ei a, an haw darh meuh chuan ka fanu pawh a chakna zawng zawng bo ta vek ang mai a ni. Anton kum14 a ni tawh bawk a, ka fapa aia luhlul hi rawn inlan rawh se ti ila an vang viau maithei. A nu ang maia luhlul leh ngeng ngalh a awmthiam a ni.


A hahdam deuh hnuah a ţhiante present rawn ken a hawng diat diat a, Anton pawh a ţhu ve reng tehmial a, beisei a nei ve deuh ni tur a ni. Zan dangah a unaunu bulah a awm tam ngai lo.
"Ka dawng ţha hlawm e. Ka ţhiante hi an van fel tak"
"Sana pahnih i dawng a, a pa deuh zawk kha min pe ve rawh" ka ring sual love, a sana beisei anih ngei hi reitak a awm ve.
"Ka phallo ţhiante min pek ve anih hi. I birthday hunah i dawng ve mai dawn lawm" tih pahin Bawihte in a awm zawnah a bawm chawpin a pawm bet a, a unaupa neih chhun chu a melh ram ram bawk.


"Uikawm. Ka duhlo a ţhing emai. Original pawh a ni lovang" a unaunu thil dawn pawh a faksak thei lo leh tawh. Ka nupui fanaute kianga ka awm hian ka hahdam ţhin a, ka fate pahnih inhau reng mai te hi hmuhnawm tih chang ka nei a, ka nupui a hrisel loh vangin fa dang neih belh kan tum tawh lova, kan neih chhun te hneh taka enkawl hi kan tih tur a ni tawh.


"Nizan ka bula i mut vang maiin ka thil dawn ka pe thei hleinem che"
"I dawih vang anih kha ka mut. I hlauh leh hunah min rawn kaitho tawh suh" a tho nalh a, a pindan lam a pan. Hetianga a tawp kan khar hi ka rin sa a ni. Anton leh tih tauh hi a inzawm tlat a, ka ngaihtheihloh chin a thleng dawn a a hriat hunah a inti lungawi chawp leh mai ang.


"Hepa hahthlak zia hi chu. Hetiang a chin hi tih tawp tir angai. Inleng neih lai te a ni ang tih a hlauhawm. Tu hmai mah a zah leh dawn lova" ka nupui pawh present tuamna lakkhawm pahin a phun ve hlak hlak reng. Anton hmu turin ka kal a, a thinrim lai hian a nu aiin ka be ţawng thei deuh.


A pindan kawngkhar ka kik karh karh a, min chhawn lo. A reh vang vang tak si ah chuan ka nem hawng a, ka kik tawh a, phalna la tawhah ka in ngai. A lehkhazirna dawhkan bawhin a lo ţhu a, a piah deuh a chair pawt hnaiin a hnaih takah ka ţhu ve, a hmel en pawhin a lungawilohzia a hriat.
"Hmeichhe bun tur bun daih te chu pa lo iti ve lo mi?"
"A thilphal nge thil phal lo ka enchhin anih kha. Khatiang ka bun duh iring a mi?" dawt a sawi. A mitmeng ah kha sana kha a awh zia a lang.


"Sana te chu i ngah e. Marcus ringawt pawn a lei ngun che" ka ti a, Marcus hian a ngen apiang a leisak a, lal fapa anga in ngaih tir tu pakhat a ni.
"Ka awt lo ka tih kha. A nalh lo si"
"I awh miahlo vangin i titau peih mai mai e a"
"Ka ti tau lo" a ti ve tlat. A tihtauh apiangin titau lo a ni reng ţhin.
"Hmeichhia hi titau se mipa hian thlem ila a inhmeh zawk daih. Tih tauh bur bur i chin chuan pa lo an ti mai tur che sin" ka tih chuan a ţhu ngil a, chair hnung nghengin min en uluk khawp mai.


"Inchhungah bak hetiangin ka awm hleinem"
"Inchhunga i awmdan hi pawn lamah a langchhuak vat dawn. Inu i hmangaih em?"
"Ngatinge?"
"Min chhang la" a hawikual hmasa te te a, midangin an lo ngaihthlak ruk a hlau ni ngei tur a ni. Tumah a hmuh tak lohah chuan "Hmangaih e" ati zawi sup.
"I sim angai lehzual a nih chu. Miin Diktei fapa an ti che ang a, hetiang i chin chuan nang aiin inu a hmingchhe dawn sin. A enkawl thiamlo an tia nga, inu an nuihzat mai ang. Chutiang chu iduh mi?"
"Aih duh lo"
"Tih tauh bur bur hi sim kan tum tawh ang chu tiraw?" chil a lem khawlh a, a ngaihtuah vang vang hnuah a bu nghat a, a lawmawm khawp mai. Hetianga lo tih daih tawh tur hi ania.


"I u zahthiam izir anga, chutianga itih chuan in inmil har lo khawp ang. In inmil hunah chuan a thil ui ber ber pawh a pe phal tawh che anga, a hlauh changin phun miah lovin riahpui tawh la, eitur tihtauhsan tawh lo la, inchhungah leh pawn lamah fel deuhin awm la, miin inu an fak sup sup ang a, an awt bawk ang a, inu a lawm dawn sin" lu a bu leh nghat a, ka nupuiin a vin pawng pawng ţhinna ai kha chuan a ngaithla ţha deuh.


"Ka enthla dawn che nia, mipa chuan an thutiam an hlen ţhin aw" ka tih hnuah ka chhuahsan a, Bawihtei pindan lut tur ka tawk. A in pawm bawr ţun a, a hlimzia lantir nan a mitmeng a nung sar bawk.
"Pa min lo hawn lawk" a kut a awl miau loh vangin a ke in kawngkhar a tlawh a, a theih tak lohah chuan ka hawnsak a, ka ken luhpui bawk.


Khumah a dah ruih a, hmuhnawm a tih hmel khawp mai.
"Anton pawh fel a tum tawh a, a inzir chhung hian nangpawn dawhtheih deuh hlek izir ve angai dawn a, nangchu i fel a, engkim i hrethiam zel a, i dawhthei sa bawk a, dawhtheihna leh nauzawk dawm thiam lehzual chu i tih theih ka lo ring ringawt a. Fate hi rin an lo awl anih hi" ka thusawi chu a ngaihven hle a, a naupanlai ang thovin ka ţawng lai chuan chik deuhin min lo en a, a khabe dawmin a in ngaihtuah pah vang vang bawk.
"Min zahlo leh ta se"
"Thinrim ve duh lo la, zirlai a nihna i hriatsak anga, naute chuan ute kan entawn ţhin a, i dawhtheihna kha a entawn anga, unau inkawmngaih deuh inni mai dawn lawm a har lo e" zangkhai vahin ka ti a, ka thusawi chu min pawm pui hmel viau.


"Inau tan entawn tur ţha deuh ni la, a fel zel chuan i fel tihna a ni mai. A entawn dawn che ka tih tawh kha. In inkhawmngaih chuan miin an awt sup sup mai ang cheu. Nang aiin a lian tawh a, nakinah chuan i thlavang hauh tu tur ber zawk a nih hi aw"
"Awle, ka lo zirtir ang. Ka awm ang zela a awm dawn chuan tun ai hian fel a ngai nimaw?"
"Tunah pawh i fel. Mahse inau vin hlak hlak te hi sim la, i hauh loh chuan a zah telh telh mai ang che" ka ti a, Anton ang bawkin a bu nghat nghat a, ka thusawi hi an hriat dun reng ka beisei. Nu leh pa dangte ang thovin fa sual neih ka hlau ve a, an rilru ka hmin ngei ka beisei.


Kan pindan chhung a lo thim ruih tawh a, ka nupui pawh a lo mu leh der tawh. Kawngkhar ka hawn ruala a chet hrut vangin a muhil lo tih erawh ka hria. Mut ve pahin a kawngah ka kuah chawt a, ka lamah ka pawt hnai zui zat.
"Iva rei ve"
"Ka ti ti pui a, naktuk ah an danglamna kan hmu mial mahna" ka ti sup a, ka fate nungchang inthlak hmuh ka duh a ni.


"A chang hi chuan an buaithlak thei ngawt mai. Fa enkawl hi tupawn harsa an ti vek ang" a tih chuan ka lam hawi turin ka kuai her a, amah pawh lo insiamrem ve in ka awm ah hmai a phum a, a hnungzangah ka lo chul a, sawilo mahse hetianga awm hi nuam a ti ţhin. Ka nupui hi ka laka a rilru put hmang sawichhuak vak chi a ni tlat lo.
"Vin pung pung lo la, i vin ţhan lutuk chuan i thinrim tak tak laia i vin pawhin engahmah an ngai tawh lo mai ang. Hrilh la, hrilh nawn leh ţhin a, an zawm duhlo anih chuan i vin chauh dawn nia, fa enkawl a harsa a, anmahni zirchiang ila, a awlsam deuh ang" ka lo ti a, tuman fa enkawl thiam kan inti lo, ka fate len hnu hian keipawn a harsat zia ka hreve. Kan hmangaih vang tak hian a harsa lehzual ţhin.


"Ka hah deuh phei chuan ka insum hman ţhin lo. Insum hram hram ka lo tum dawnnia"
"Ka duh anga i insiamrem thei zel te hi i felna ania, piang nawn leh pawh ni ila nang lo chu nupui dang ka duh chuang lo" a nui ri hriat hi nuam ka ti ţhin. Ka nupui fanaute nui ri ka hriat hian chhungkaw hlimawm ka nei ve niin ka inhre ţhin a, ka nu leh pate ang chiaha fate hmuh a inhau ngailo nih ka duh bawk. Ka nupui nen hian inhnial chang kan nei ve zeuh zeuh a, a tam lem lo thung. Kan thu a inhmuh loh pawhin kan fate hmuh lai chuan pangngai takin kan awm ţhin. Chhungkua ka din ve hi ka damchhungin ka inchhir lovang. Nupui ţha tak ka nei a, fate nen, ka khawvel thim mup ţhin pawh a eng veleh ta.



END....(NEVER REGRET MIN CHHIARSAK TU TE LEH COMMENT LEH LIKE MIN PE ŢHIN TU TE BULAH THINLUNG TAKIN LAWMTHU KA SAWI E)

---