KEIMAH, THINGTLANG NULA (FINAL SEASON) 28

KEIMAH, THINGTLANG NULA (FINAL SEASON) 28

"Thingpui kan in dun lohna pawh a rei tawh alawm tiraw?" tiin Nu Partein thingpui min rawn pe a, ka bulah bawk lo ţhu lehin Zochhura pa chuan, "A ni leh lo ka en sual a nih hi. Kumthar lam atan admission an la hawng leh rih lo, hawn chu an la hawng leh tho ang a" a tih hlut hnuah, "Zorama khan eng emaw hria e a tih ve ni" tlema zawi deuh zawk a ti lehin nu Partein, "Eng nge maw i buai reng le? A theih hunah ama'n a ngaihven mai ang. Pu Chala damlo lah nangmah vangin a thi emaw kan ti ringawt tawh bawk. I sawi hmain chhiar zo vek phawt zel rawh" a ti hlak hlak a, a nui pah reng thung. 

"A tana ţha tur ka duh vang a buai alawm le ka nih le" Zochhura pa, nu Partein, "'Pa Reng' ti rawh" a tih mai chuan, "Hmasawn lo zawnga a awm ka hlau riau a ni. A ţhatna tur duh lo ila ka buai ka buai nang..ka chhiar nawk nawk phah kha" tiin a nui huk huk a, awm ve lo se chu nu Partei hi a ang leh hlak hlak tawh maithei a ni. 

"Helamah nuam a tih te chuan awm hlen se a ni mai a, in buai peih. Nupui fanaute nei duah se, vawk chaw chan chem nen a fate han um kual vel se, sawi tur te pawh a ngah ve deuh ang chu" uar zetin pa Hmunan a lo ti ve tun tun a, nu Partei nen kan nuih a lo za. "Thu i awih loh vang a nih hi nang pawh i lak tlak loh em em. A nih tum ang a nih hma chu awm tawp rawh se, hmeichhia leh thil dang ngaihven a ngai rih lo" Zochhura ni, u Maliani ti a koh tur chuan a lo ti ve hlak hlak a, "Tlangval leh thil dang ngaihsak lo lekin i nih tum nih i tum a, i senior daih kha. Tual upa te pawn an u vek tawh che" tiin pa Hmuna chu a nui huah huah a, nu Partei sawi kha a dik, an chhungkua hi an langtlang a nih hi. Ka awm ve reng laiin an inhnial a, an duh dan an sawi bawrh bawrh hlawm mai. 

"'Aizawl nula hawi zau ve deuh, mahni lu zo vah leh inringtawk tak, ţhenrual kawm thiam tak' nei se in ti ziah a, synod in chutiang chu an pe tawp a nih loh chuan Zorama hian a zawng chawp lo tawp ang. Ani aiin in duh tui zawk, mahni ta tur hmu zo mang si lo midang ta tur i lo duh tui sak ve em em a" fiamthu a ti lehin pa Hmuna chu a nui huah huah reng a, a awki ah u Maliani chu a deu hmel hle bawk. "Lo ngawi mai mai rawh, nangmah vanga helai thlenga rawn kal ve ka nih hi" tiin u Maliani chu a hawi sawn hmak a, "Zorama ve hi zawng...zawnpui tawp lo chuan a nei lo ang" ţhutthleng bana a ban dah pahin Zochhura pa chuan a lo ti ban ve charh a, an manganpui hmel lutuk chu mak ka ti zawk, keini lah kan lo inkawp rei ve tawh si, an ngaih ang hi a ni hlawl lo a ni. 

Thingpui ka in zawh ruala silhmun a no ka va dah chuan Nu Partein, "Lo sil suh aw ka rawn sil ang" a ti tak na a ka sil lui tho. Dawhkan lama let leh pahin Zochhura pa leh a ni te chu ka en kher a, u Maliani zawk chuan uluk deuha min lo enin a mitmeng a thip ram a, min ngei hauh lo mah se min ngei hmel. A tum deuh bar reng bawk si, a sam ti buangin tlereuh a inbel nasa a, amah tak chu a lian lem lo, a cher ve reuh hle bawk. 

"Ka thil lo hawn che chu ka va la ang e" tiin nu Partei a tho nalh a, a la har ka ti reng a ni, ka haw vat vat chak. Nu Partei leh pa Hmuna ang vek turah ka ngai a nia rin aiin an mi uap a na. An bulah hian awm reng ta ila ka thi hma viau maithei a ni. "I duh zawng a ni angem aw" tih paha min rawn pek chu ka lo en nghal a, tshirt var sar mai hi a ni a, a hmaah milem mawi deuh a inziak bawk. 

"A va mawi ve...Aizawl kal leh hmasak berah ka ha ang, ka lawm e thank you" phur deuha ka tih chuan, "I duh zawng a nih chuan a ţhat chu. Sangkhuma leh Fawnvela te pawh kawr ka hawn sak a, a ban nei lo chi, Sangthanpuii chu kawr fual deuh ka hawn sak, a duh ber a ni sia. Nutei pawh tshirt tho ka hawn, fapa chiah ka nei a hmeichhe thawmhnaw ka lei thiam vak lo a" a ti zung zung a, ka kawr thar chu ka en a, a mawi viau rualin hakna hun ka nei tlem viau ang. Aizawl kal apiangin ka ha tawh mai ang chu. 

Lawmthu ka sawi leh thlap hnuah inchhung aţangin ka chhuak a, ka dam sawng sawngin ka hria. Pa Renga leh u Maliani te khan min be ve hauh lo a, a awm ve tho. Kan vawikhat inhmuhna a nia, ţawng tam lo chi an nih phei chuan min biak vak ngaihna an hre lo ang. Nu Partein, "Zorama chawhmeh an suah reng a, an lo duh sak ţhin a, thla an ti muang tak tak a ni" a tih pawh khan min melh kur ringawt a, a ţul tawpah lo chuan an ţawng ngai lo aniang.

In ka thleng chu ka nuin nu Partei thil min lo hawn a lo en ve nghal a, "A va var ţha em em ve...dah ţha viau rawh, hak zen zen chi a nih loh hi" a ti a, Zochhura a fak zui char char a, "A pa chu a lo fel em? Eng nge a an?" a tih chuan, "Ka hre lo e a, phone a en reng ringawt a, min be lo a ka be bik lo, ţawng mawh hlawm tak an ni" ka ti hlak hlak a, "In la in nel hleinem, an ţawng nghal zuah zuah bik nang" a ti mai a, "Nel har chi an nih kha...mi be lo a en reng chi, an meng rum rapthlak lehnghal" ka ti leh a, engah vak a ngai lem hlei lo va, pa Khawtean, "Remkalam" a rawn ti leh lauh lauh tawh. 

Bathlar a chhuak a, "Eng nge?" ka tih chuan, "Engtikah nge kan facial dawn? Kan nu feh hlan hian ti ila" tih pahin a khabe leh biang vel a tuai a, "Ka hman hunah ka tih kha, pa Khawtea chu i ti chung chung zel" ka tih chuan, "Kan nu awm loh lai ka chang a nih hi, induh hun hre viau zel suh" a ti daih a, melh ram ram mah ila, "Pawisa i neih loh hunah facial ţhat zia min hrilh leh chung ang a" a ti leh tho. 

"Aw...mikhual, naktuk zana haw tur buaipui ka ngai alawm. Ka khawih zawh veleh ka hrilh ang che. Nu Zonuni chu naktukah pawh a feh leh awm tho emai" ka tih chuan, "Ka thlangra hralhna kan hman zawh hma hian min rawn tih sak ngei ngei ang che" a ti a, ka nu lahin, "Fawnvela te hian thing an phur angem le?" a lo ti ve sek bawk a, ka pa a thawk rim bawk a chawhmeh hi kan lei mang ngai lo, sa hi kan lei ve awmchhun a ni mai a, thlai na na na chu kan hralh zawk ţhin. Thing erawh han buai zeuh chang kan nei ve ţhin a, keipawhin ka phur nasa, hna dang ti buai lo zawngin ka pa'n a lo dah sa hi zingkarah te kan phur mai zel. Leilet buh kan ei reng thei bawk a, kan pi leh pute hunlai ang kha chu la ni se mi ţha fa an tih tur ang hi ka ni ve ang mawle. Ka to vet vet ang chu aw. 

"Pa Khawtea hi chu a...Pa Duhsanga te inneih naah a lan mawi loh a hlau a facial ang a ti reng mai. Thlalehah daih a nia an inneih dawn" ka ti lut bawrh bawrh a, ka nu pawhin, "A nupui pathumna tur a nia, ka ngai ho zo vek tawh. Vaihlo zial sem pahin an inah lut kawi mai mai ila ka duh tawk" lo ti vein Pa Duhsanga hi chu nupui a hmu thei a, amah lah hi engahmah kan han ngaih loh hlawm nen nupui a hmu thei phian a, nupui pasal hmu thei bik deuh chi hi an awm ve aniang, pakhat a ţhen chauh emaw tih laia a dang lo nei leh hman daih te an awm ţhin. 

"Vawiin chu ka pi Binladari dawrah ka phei lo mai ang. Pa Khawtean facial a ti reng tawh sia, nu Partei ka bia ang a, tih tur em em a neih loh chuan vawiinah a kut tin ka hnawih sak mai ang" ka nu hnena ka tih chuan, "A khawih tu tur a nia i thu thu" tih zawnga min chhangin vaihlo a la chhuak a, a tam tham emai a pho leh tawh dawn aniang. 

Haw chiah mah ila nu Partei chu ka phone leh ang lawi a, "Nu Parte, vawiinah eng nge i tih dawn?" ka ti hmasa te te a, "Ka hre lo...tih tur vak a awm pawn ka hre lo, inchhung a fai a, tlai rawngbawl a ni mai" a tih chuan, "I kut tin chu i hnawih duh tak tak em?" ka ti a, a duh hlauh chuan ka tan a ţha dawn emai. "Duh e...kan tihna kha a rei tawh e ngaihtuah la, Zorama rawn awm hlimah daih khan a nia, thla engzat nge liam tawh chhut rawh. Ka la ti leh miah hleinem" a ti a, ka ngaihtuah rauh rauh a, Zochhura school naupangte pawh an exam an exam tawhin ka hria. 

"Hnawih ngai loh ang chiah a ni leh tawh dawn a nih chu" ka tih veleh, "Ni e...tih tur dang i neih loh chuan duh leh hnawih ila, kut tin tal a lo mawi ve hian a nuam lawm" tiin a rawn nui leh har har tawh a, "Ka hman veleh ka rawn phei ang" tiin phone ka dah a, dawr hlui aţangin hmanrua vel ka la vek tawh a, hetiang hunah tak hian a nia dawr neih ka chak ţhin, Zochhura pa te kha hmu peih tawh lo tak ka ni. Ka huat vang pawh a ni lo, an boruak ken kha ka hip ve chak lo. 

"Hna i hmuh chuan han ti zel la, khawl buru pui pui la lei ve thei lo mah ila i tih bek bek zel chuan i la lei ve thei mai ang, Aizawlah i la awm ve hluai thei maithei a sin" ka nu'n dam deuhin a ti ve mial a, "Nang lah hi a chang leh pasal nei turin min tia, a chang leh Aizawla awm hluai turin min duh leh a" ka ti a, a ruka ka nui chu min hmu lo aniang, "Nei duh hek lo che...'ka la naupang chuti khati de de dei dei' i ti zel alawm. Nei duh la chu ţha deuh nei la kan ti, i nawmsakna tur kan duh ber. Ţha deuhin thil han sawi ila mi lo hnial kalh ziah" a ti leh hlaih hlaih tawh. 

"Nih leh ka hnial kalhna che kha ka hawng leh si" fiamthu a ka tih hnuah pawh, "Ti ţang ţang la Aizawl awm te tum ve rawh. Kan khuaa awm reng hian hmasawnna a awm lo. Keipawh vaihlo ka zial nitin reng hi. Hetiang lam hi i tih dawn rau rau chuan Aizawl a awm te tum ve ran la, i thawk chhuak hnem zawk ang" a la ti hlak hlak a, a duh tawk mai dawn emaw tih tawh hnuah pawh, "I duh loh miau chuan pasal nei rawh intih reng chi pawh a ni lo, kan hah mai mai. I u Bawiha lahin tukinah thing a ek ang chu tih nak laiin a ek hman lo leh a, keimah vekin ka tih leh a ngai dawn a nih hi" a la ti chho ţan chauh a, a an apiangin 'keiman ka tih vek a ngai dawn' a ti ziah a, amahin engmah a ti ngai chuang lo. 

"Nu te ang ri block thei earphone ka duh" ka ti a, nui chunga pindanah lutin nu Partei kut tin cheina tur vel ka la khawm nghal zung zung a, Fawnvela te biak tuma phone ka lak chhuah chuan Zochhura message a lo awm. 'I haw tawh em?' tih zawng a ni leh nghal a, 'Haw tawh e...ka kal leh ang, i nu kut tin ka chei dawn' ti a chhang letin Fawnvela ka phone zui nghal a, Sangkhuma hmui pawh eng nge a an zel ka la ngaihven leh lo.

"Hello" a rawn tih veleh, "Sangkhuma ka phone hmasa leh si dawn" tiin phone ka dah a, a la reh vang vang a, kan ngaihsak a phut ru leh viau tawh ang. Ngaihsak hman loh chang te hian a vui na thei ropui sia, Sangkhuma lel lawl hi chu ngaihsak loh theih a ni lo. "Hello...aiah" a rawn ti nghal a, "I hmui chu eng nge a an tawh a?" ka tih veleh, "Nimin aiin a lian kawh zawk, a phu uih uih thei" a rawn ti a, ka lo nui duai mai, "Awi..what a very hmui phu uih uih...i inhmeh phian ang chu khatiang design kha" uangthuang zeta ka tih chuan, "Kawh ţha tak a ni...ka dar chen lek lek ho hi ka hmaah kal ta se nihliap aiah ka hmui hi an hmang thei ang, Thartei nihliap thar a nih hi" a rawn ti a, a ţawng ţha peih emai a na vak lo aniang. 

"Remkalam, u Zorama pa te an lo kal tawh mi?" a rawn tih leh takah chuan, "Kal ang chu...nu Partein kawr a lo hawn sak cheu kha. An inah i kal peih em? Mi thil pek an la duh lo ngai lo" ka ti nghal zung zung a, keimah a Zochhura pa te boruak rawn ken ka hip peih tawh loh vang vek. "Heh...sawm pawh min pe se ka la ang chu, ka insiam nghal" a tih hnuah, "Nu" a ti vak a, "Ka leng dawn nia, len i phal loh leh in a awm angah min ngai mai rawh, kei ve tehlul hi inchhungah ka ţangkai chuang lo" a ti leh lung lung a, a hmui a na lo tawp a nih hi. Na se a au vak vak thei lo tawp ang. Phone ka dah veleh Fawnvela ka phone leh a, "Aw...Remkalam, Sangkhuma aia i biak peih loh zawk pa hian sachek ka vil mek" a rawn ti kher a, nu Mawisachekin, "Kun hnai vak kher mah ta che Fawnvel, bel chhungah khan i thlan a far anga sin thel thul pa" a ti hlak hlak a, Fawnvela te inah pawh ka leng phei khat tawh, ka buai em a ni. 

"Mi hauh vak vak zel le...ka chawk tawh bik thel thul lo vang" a ti a, "Fawnvel" lo ti ve sek mah ila, "Please waiting" a rawn ti a, a va han chhe tak. "Sachek in vil ve hlekin in phun nghal zel. Nitin ka siam a, ka phun ka phun ve lo. I vil peih loh leh kal sawn rawh keiman ka vil mai ang. Naktuk aţangin ramah riak ang che" nu Mawisachekin a ti ta hlaih hlaih a, a ţawng rin zia chu keimah min rawn hau a ang zawk. 

"Fawnvel, ka dah dawn a nia" ka tih leh chuan, "Remkalam, Remmawi, zanin tlaiah chaw rawn ei rawh u aw vawiin hi ka piancham a ni ve a nia" nu Mawisacheki zawkin a rawn ti a, Fawnvela biak hi chu thuruk sawi nghal a hlauhawm, loud speaker ah a dah ziah. "Ka lo hre reng reng hleinem nu Mawisachek, happy birth to day" ka ti uang a, a nui har har mai. 

"A piancham thilpek atan a birth certificate ţhui par sak a ngai, ration card nen a hriatpawlh ziah" Fawnvelan rawn tiin ka lo nui kar kar reng a, ipteah ka thil ken tur ka khung pah mawlh mawlh bawk. "Ka chhan hmain min chhan khalh zung zung mah ta che. Remmawi, chaw chu lo ei rawh u aw...i nu te kha hrilh rawh, ani pawh khan ka piancham a ni tih a hre tawp nang. Zorama chu a chhungte an lo kal si a sawm ve lo mai ang" a tih zung zung hnuah, "Kal sawn rawh Fawnvel" a ti vin leh ţhak a, chhungte rengin min la naupangchhe chei hlawm mai, han puitlin viau a har a ni. 

"Ngati nge hna i thawh loh?" Fawnvela hnena ka tih chuan, "Ka youtube channel a dah tur zing aţangin ka cover kual tawh, hna ka thawk char char zawk. Ka exercise la lai ka ti mai ang, keimah chu ka lang mang lo nain ka tlan ri vel a hriat theih vek tho" a rawn ti a, a phur viau emaw tih nak laiin, "Naa...Aizawl ah ka chho ang a sumdawnna tur ka dap mai ang" a ti leh daih a, nu Partei thil hawn sak vel ka sawi chuan, "Ka hria...kal tum rengin ka la hman lo a nih hi. 'Ka thau sia, thawmchu eng size nge min lo hawn?' ka tia, 'Full size' a rawn ti, a ngeiawm thiam ve khawp mai" tiin a nui huk huk a, "Ka ning tawh ka dah dawn, ka chhuah hmain tih tur neuh neuh ka la nei nual. Sangkhuma nen lo inbe rawh u" ka tih rualin ka dah nghal a, Fawnvela biak chuan dah hmak zel a ngai, a hlim phei chuan a tawp thei ţhin lo. 

Ipte ak a pindan aţanga chhuakin ţhutthlengah fimkhur deuhin ka nghat leh rih a, "Vawiin hi nu Mawisacheki piancham a nih chu aw. I hriat loh a hlau a nih chu" ka nu hnena ka tih chuan, "Status ah ka hre daih tawh. Piancham chibai ka tia min la chhang lo a nih kha" tiin a phone a phawrh a, whatsapp bawk en lehin a hawrawp lah chu a dah lian, tlar khatah hawrawp pakhat bak a leng lo ang. Ţhenawmte inah leng daih mah se tukverh aţangin ka nu phone ziak hi chu kan chhiar pha tho ang, chutiang khawp chuan a lian a ni. A dah eng thei pep pup bawk si, current thim laia a phone a rik thut te hian camera a de zawk emaw tih awl tak a ni. Ka pa pawh a phone ziak a te deuh e tih lohah chuan ka nu phone nen danglamna a awm chuang lo. An phone en sak chuan mit a vai rum rum thei zel. 

"Sachek a siam a a buai aniang" ka ti mai a, ka nu lahin, "Kumtir a ka message pawh a la en chuang lo. A whatsapp a hmang ngai miah lo aniang" a ti a, emergency ah ngei ngeiin whatsapp a an inbiak a ngaih a hlauhawm khawp mai. "Status te hi a en thiam lo aniang a en ngai lo reng reng. Mi pawn 'sumdawng ve si whatsapp ngaihsak reng reng lo mai' an tih kha. Sachek order dawn pawn call zel a ngai, nakinah tih dan ka la hrilh ang" a ti ve ngei a, ani pawh, "Whatsapp a kan inbiak hian kan inbe tak tak em?" ti ve reng ţhin kha a nia, ka pi Binladari phei chuan, "Lam awlsam deuh zawka a hming thlak theih dan a awm lo maw le?" a ti ziah. Kalvari kha a zak thei a nia aw. Tunah chuan an hrethiam ve vek tawh a, thinrim ţun a hrilhfiah deuh reng an ngai tawh lo. Mi status delete tawh te, "Nichin khan ka hmu reng sia" an tia, an zawng ruai zel a nia, hmasawn ve tawh tak an ni. Ka nu phei chuan status ah vaihlo zial leh aieng a zuar thiam tawh. 

'Chawhma bak kan kal dawn lo a, ka lo haw har lo ang' ti a Zochhura message min lo thawn chu, 'Aw le' tih tawpin ka chhang let a, a pa thusawi khan rilru a luah ve reng a, han hahpui chiam chi nge lawm zawk chi a nih pawh ka hre chuang lo, M.th an tih kha ka hrechiang ve tlat lo a, admission tih kha M.th an tih ai khan ka hrechiang zawk. Chutiang vel chu ka ni. Ngaihven loh zawng hi chu hriat a har ve em bawk a, ka hna ang hi Zochhuran a thiam bik teuh lo, khatiang kha a ni mai. 

Bel nawh tura ka dah ho ka nawt mawlh mawlh a, bel nawh kher hi chu ka ning ve ţhin, tha hman nasat a ngai si, bel nawh leh darthlalang nawh tih loh chu han nin em em ka nei lo. Hlim lai tak a nih phei chuan phur deuhin ka ti thei vek. Bel ka nawh zawh vek hnuah chhuat nawt lehin in ka chhuahsan chauh a, inchhung hnawk nuai a chhuahsan hi ka peih lo reng reng, in a haw a hahdamthlak loh ka ti. Ka ti fel reng chung hian thlai vel kan dah ţhin vangin kan choka lam hi chu a hnawk ve reng tho a, chhuat nawh fai ţhat pawn kan inchhung hi vaihlo rim nam tlat chang a tam zawk ţhin bawk. 

Nu Partei te inah Fawnvela leh Sangkhuma an lo awm der tawh a, Sangkhuma hmui chu a sawi ang em em a kawh nasa a ni lo tak tak. Sangbollywoodi pawhin a kawr thar lo ha chhinin, "Thui deuh kal ila chu a tlang ka rap dawn a nih hi" a ti a, a sawisel ngam chiah si lo a, a duh ang zan a ni lo tih chu a hmelah a lang vek. "A tlang kha tlem tan tir la, a dang chu siam a ngaih loh kha" nu Partein a tih lai chuan Sangkhuma bulah ka ţhu ve a, fimkhur deuhin chhuatah ka ip ka nghat bawk. Huma an thlung a, vawiin kawngkapui an hawng ve tlat. 

A inthlek a inthlek hnuah Sangbollywoodi chuan, "Nu Parte, ka lawm lo tihna ni loin i kawrfual min lo hawn sak hi vainu mut kawr a ang ka ti" a ti ta nge nge a, Fawnvela nuihzain a hmui pet fuat chungin ka lam a lo hawi a, keichu ka insum thei, nu Partei hawihai hmel leh Sangbollywoodi lungawi chiah lo hmel chu enin mipa pahnih te erawh an nui ruh ruh mai. 

"A an loh tawp hi...bollywood i ngaisang em a ka tia tlem a bollywood rawngkai ka rawn hawn sak thlap che a nih hi" Sangbollywoodi kawr pawh rem sak sauh sauh chunga nu Partein a tih chuan, "Bollywood ho mut kawr ang ni si lo mawle. Hei chu a kurta lo, a mut kawr ka tihna" tiin Sangbollywoodi chu a nui hul hak a, keipawhin mawi ka ti bik lo, tshirt lianpui, a ke rek chen vel ha a ang ka ti. "A mawi reng tiraw Remkalam?" nu Partein a rawn tih chuan, "Ka hre lo le...mawi hi ka hre vak bik lo a" ka ti daih a, Sangkhuman, "Mawi lutuk, pen bawm mawi deuh a ang" a ti a, nui dar dar mah ila Sangbotei a nui ve thei tlat lo. 

"Keini chu kan hak duh zawng tak a nia aw i lo lei nu Parte, i lei thiam teh mai a nia" Fawnvelan a tih laiin u Maliani kha pindan aţangin a lo chhuak a, pa Hmuna leh pa Renga te kha chu ka hmu ve leh tawh rih lo. "Kolasib aiin boruak a nuam lo lehzual a nih hi, a hrehawm emai" ti chungin bualinah a lut a, nu Partein a kawih her a kawih her hnuah Sangbollywoodi chuan, "Ka duh tho a nia...ka ha ziah dawn tho" tiin a kawr thar chu a hlip a, u Maliani lo chhuak leh lah chu a lo en chiang em em mai leh nghal.

"Zorama hi a tui laklawh mai mai a, chawlh a neih leh veleh lo haw zawk se a ţha ang" kan mitmei pawh veng lem lo a ti lehin, "A pa thusawi a bengkhawn ţha duh lo riau mai" a ti leh vel a, "Nawr lo ila...ama'n a duh hunah a ngaihven mai turah ka ngai, tlangval a ni ve tawh alawm le" nu Partein a lo ti mai a, "Vur ka zuar dawn pawisa ka nei tawh lo" tiin Sangbollywoodi lah a chhuak ve nghal bawk si, Fawnvela leh Sangkhuma te an la tho ve em lo a, nu Partein, "I lo phei har si, thingpui in hmain ka ke hi ti fai ang" a tih tak hlutah chuan keipawhin ka ip ka ban nghal a, "Eng nge i tih dawn?" u Malianin a tih ve chuan, "Ka kut tin vel ka'n hnawih mawi tir ang e" a ti liam mai a, "Aww...Kolasib ah pawh a tih theih reng sia" a ti kher chu ka ngei angreng hle. Ka hriat laia sawi chi pawh a ni lo. 

"Theih tho mah se ti hian inkawm pahin kan tia, a nuam ve ţhin a" nu Partein a tih laia a ner deuh te chu ka hmu reng. Min ngaihnep hmel lutuk chu a ngeiawm riau a ni. Mahni lo maha hah ve nak laiin, hman lo chung chungin ka phei leh a, nu Partei hi fel viau lo se chu ka haw leh daih ang. 

"Engzatin nge in khuaah hian in tih ve a?" a tih chuan, "Mihring a zirin. Nu Partei chu ka tlawm ang" ka ti ve kher a, inlengte awm laia chhungkaw buaina phawrh ching leh an pawi kan sawi lo chung pawha mi hmaizahna nei miah lo a tih bawi bawi ching ang hi chu ka haw tlat. Pa Hmuna zawk chu nise engpawh sawi se ka hrethiam ang. Ani hi chu ngaih khata ngaih chi a nia, Zochhura takngial pawhin a en liam vel mai mai ţhin kha a ni. Pa Hmuna sawi tur awm tawk lek an sawi nasa ka ti. Ka ngaihdan diktak a ni bawk. U Maliani chu tui bottle inchhawp ran chungin dawhkan bulah a ţhu a, ţhutthleng hniama ka ţhu rem sawk sawk laite chu min en reng tih en ve lo mah ila ka hre thei. U Lalhuma emaw pu Taipuian ngaizawng tlat se, ching ho zo vek se ka ti a nia. 

Rei vak loah Zochhura lo hawin u Malianin dawhkan hnuai aţangin ţhutna a pawtchhuak a, "Lo ţhu rawh Bawiha, i va leh si ve" lo ti sawk sawkin Zochhuran, "Khawiah nge ka pa?" a ti ve thung a, "I patea nen an leng chhuak a nih kha, mipa hi chu inah in awm thei lo. Tu inah mah an va leng awm si lo" nu Partei zawkin a lo tih laiin u Malianin, "Admission kha i pa'n a lo en sual a, an la hawng rih lo aniang. Kum tawp lamah an hawng leh mai ang. ATC ah tho hian i han luk chho leh rup mai ang a tiraw?" nui chung hian a ti ve thung a, "Ehe...u Zoram, u zir zawm leh dawn elo?" Fawnvelan a ti ta chiah reng a, ka lawm zia chu. 

"Ka hre lo le" tiin u Zorama chu nu Partei bulah a rawn insawn phei a, a nu hmaa ka ţhut vang a ni ngei ngei ang. Nu Partei lahin, "I chau hnûp hnûp em?" duat deuh hian a lo ti a, an duat hmel hlawm zia chu a, hetah lem keiin ka lo u en a, a nute chuan naupang ang tak tak alawm le an la en le. "Chau hran lo, ka ti ţhang tawh a" ti a nuih pahin ka keah a rawn tlawh zeuh kher a, "Remkalami hi a fel a nia aw" a nu bula zawitea a ti ri ka hriat chuan ka hawi chhuak a, nu Partein, "Nia...hei, ka kut min cheisak turin a lo kal leh vang vang a" a tih veleh, "A hmelţha bawk" nuihza aw deuh hian a ti leh a, hrilhhai hmel fe a nu Partei ţhu ngawi ta ran leh keichu chu pawi sawi loh hmel deuha nui chung hian min en tawn zak zak a, Sangkhuma leh Fawnvela te chuan rawn hmu se pawi ka ti lo, u Maliani mitmeng fing kar mai khan a rawn hmuh hmaih ka ring lo a, chu chu ka duh lo ber. 

"Ka nu'n min lo phone...nu Parte, ka nu ka pui zuai ang a kan rawn chho leh ang" Fawnvelan a tih veleh an ţhutna lamah ka va hawi let a, mitmeiin haw lo turin ka ti ngang ngang a, nu Partein, "Thingpui kan lo lum har deuh a ni maw? Kan han lum ang" a lo ti ve bawk a, dar 12 a pel duai tawh tak tak. Haw lo turin a ri loin theihtawpin hrilh ve mah ila an haw tho tho, min en tawh lo hrim hrim. 

"A zia lo emai Fawnvela te chu a. Remkalam, nang i ril a ţam em?" nu Partein a tih chuan, "Ţam lo...tih vat vat ka duh zawk" ka ti a, nu Partei chu ti ti leh par par tawhin u Maliani pawhin pindan kawngkhar a pawt phui ri bur a, "Ka patean 'Aizawl nula nei se in ti em?' tih kha a sawi tawh em?" Zochhuran a ti ri chu hre mah ila hna ka thawk zawm mawlh mawlh tho. "Sawi ang chu mawle. An inhmukhawm chauh a an inhnial leh nghal a nih kha. I pa te unau ve hi chu engtikahmah an puitling lo ang" nu Partein a tih hlak hlak laiin, "Aizawl hmu tawh hrim hrim in pawm em?" tiin Zochhuran ka chhipah a kut a rawn nghat a, ka thil tih lai ka tawp leh chawt rawh. "Nang hi, 'ngah nge Remkalami i rawn fiam char char a? I lo ngaizawng ve deuh te a ni lo maw?" nu Partein a ti chhuak phawng mai. 

"Min ngaizawng ve duh lo, hau hrep rawh" Zochhuran a tih chuan a thusawi awih lo lutukin ka hawi chhuak ve ta nge nge a, nu Partei lahin ka haua min lo en leh tawhin Zochhura chiah a nuih a zat hmel. "Khatiang kha mi 'ka nu lo kal hunah chuti khati' i tia i sawi ziah kha?" ka tih chuan, "Engmah ka sawi lo" a ti leh daih tawh a, a nu bulah hahdam hmel deuha ţhuin min nuih zat reng te chu ka huat tawk a tling. Nu Partei lahin, "A awm ve tho alawm...in inţhenawm hnai e" a ti sam et a, engmah a sawi zui lo. 

"I ţhutthleng hniam neih ve chhun lah hi a buk nasa si" zahzel a tih pahin ka ţhutna ka siam rem a, Nu Partei ke bawk chu khawih lehin Zochhura ţhutna hnaih lam zawk ka ti fai ziah chu ama khupin min dal nasa zawk a, "Tawlh ta che i dal a nih kha" nu Partein a tih pawhin a tawlh duh ţhak lo. A pa leh a ni te an han awm lo chiah chu a nu a pawhna a ti lang zualin a awm ang hian awm ve ila chu ka nu'n min sawk tawn tawn tawh ang. "Zoraman min duh ve lo hau rawh" han ti ve phei ila chu fiamthu pawh nise tuikawhna nen ka nu chuan min um ţe rawng rawng ngei ang. 

"Huma hi chhuah ila kawngka khar ang u" Zochhuran a tih veleh, "I niin a ngaithei lo a nih kha. Tikhan hawng rih mai rawh" a nuin lo ti thuaiin a pa te an lo haw leh chiah phei chu ka hnual vek. Vawiin chu hnathawh loh te ka duh rum rum tawh a ni. Zorama pawh ţhu ţha sawk sawkin a pa chuan, "A va lum ve le...tu inah mah kan lut mang si lo a mit a vai chum chum mai" a ti bawrh bawrh a, a ţawng duh ve deuh dawn aniang tih laiin, "Zoram, tukinah khan ka lo chhiar sual reng a, i pa Ţhasanga ka bia a, a lo ngaihven reng dawn a nih chu aw" a ti leh tawh. Thil ţul bak a sawi ve peih tak tak lo a nih dawn hi. 

"Kuminah ka vannei tawh maithei" Zochhuran a tih chuan, "Vanduai zinga ţan leh tak hlauhin tih thuah mawle. I ni sawi ang khan thil dangah i rilru seng vak rih lo la a ţha, kan ţang ve thei si a" a lo ti leh a, a ţawng a dam viau nain a ti ti chu ka ngaihthlak peih chi a ni ţhak lo. Nu Partei pawhin a hrethiam aniang, "Vawiin chu ka ke bik chauh ti ang aw" a ti a, a pasalte unau vang hian a ruk chuan a zak ve ngawt ang chu. Keipawh ni ila ka zak tho ang.

Thingpui in lai pawhin Zochhura chu a pain a ti ti pui a, a ni in lo zawm ve zeuh zeuh bawkin nu Partei nen chuan kan ţawng tam lo. Ka ţhiante tal kha la awm ve se chu sawi tur a tam deuh ang, miin thu pawimawh an sawi laia inrawlh ve sek a nuam bawk si lo a, nu Mawisacheki hian min rawn ko vak vak se ka ti. Thingpui in puar veleh hmanhmawh deuha tih zawm leh sawk sawkin ka ţuan a rang viau lo nen, duh anga hmaah ka zo thei chuang lo. Ka zawh veleh erawh, "Nu Parte, a man chu naktukah a hlawmin aw, nu Mawisacheki piancham a nia ka hmanhmawh tawh" tiin haw thuai thuai dan ka dap a, min ui der ve viau nain a ţhu muang lui duh ta lo. Zochhura pa khan Zochhura lehkhabu ţhenkhat te a en tawh a, chhungkua chauha awm an duh ang. 

In a haw tlang loin Fawnvela te inah ka lut a, ka rilru a hah tehreng nen chhuat a an pher phah chunga Sangkhuma nen an lo mu hahdam ar ar ka hmuh chuan, "In va sual ve...kal suh u ka tih mawlh mawlh kha" ka ti nghal a, an tho sawk sawk mai. "In pawh zual nan a ţhat em kha, kan lo awm ve zelin in inpawh thei nang" tiin Fawnvelan a hmai a tuai tawk tawk a, a tep leh chap zel bawk a, an puar hmel nasa. 

"U Maliani leh pa Renga te an nelawm loh em kha. Min awmpui ve char char ta che u. Zochhura kha lehkhazir hlir an sawipui a, an thusawi kha a vai pawn ka hrethiam lo" tih hlak hlak pahin pherah chuan ka ţhu ve sawk sawk a, "Zingah khan u Zorama pa chu ka bia a, ka be lo emaw a ti aniang min chhang lo. An haw hunah a nuam leh mai ang an chamrei dawn lo emai" Fawnvelan a tih puat puat laiin, "Lehkhazir tir an la tum chauh chuan nupui a la nei har duh awm" Sangkhuman a lo ti thung a, "A zir tum hi nakinah amah ka zawt chhin ang. BD a zir dawn pawh khan a bialnu hmasa nen an inţhen daih. Tunah chuan M.th an ti" ka tih chuan, "A va hlauhawm...in inţhen ve dawn tihna a ni maw?" Sangkhuman a lo ti a, a hmui kawh lai bik chu liak huh zauhin, "Ngati nge a zir dawn vanga bialnu a ţhen kher zel?" a tih leh chuan, "Ka hre bik nang" ka ti daih a, "Vawikhat chiah a la ţhen chu. Thil nihna ka sawi mai mai aw" ka tih laiin Fawnvelan, "Tun ţum hi i tluan loh leh chuan rim deuhin hna thawk la, fa la ţeuh mai rawh" a lo ti ban charh a, min va han hnem lo dun tak.

"Diktak chuan u Zorama chu a thikthu te hi chhe ve deuh se, tumah a thik ţha peih bawk si lo. In thikthu a chhe lo dun e...." pawr fahrana Sangkhuman a tih chuan, "Thik tur a neih lo, rinawm tihna a nih hi" ka ti hmak a. "Nangin i nei thung lawm, in la Aizawl nula tawk saw" Sangkhuman a ti chiah chu, "Pimpomi maw? Awii...ka thi ţhaks" ka ti duai a, biakinah kan vang dun em a, buai lai nen a in nang bawk si, a lo haw leh tawh tih reng reng ka lo hre lo.

"A thau chhia kha a bo vek a, a vun a nung mawi a, a chhiat loh reuh zia aw, khatin nuihzat reng reng suh. Duh ngat se chu u Zorama hi a chhuhsak thei ngei ngei ang che" Sangkhuma bawkin a tih leh laiin Fawnvela chu a hawi â huih a, a hre bik miah lo a nih hi. Pimpomi hi chu 'in la Aizawl nula' ti loin 'in la Aizawl mi' an ti mai zel a, kan la inbe zeuh zeuh a, ka chungah a sual ngai lo. Kei ang hian a ri ve bawrh bawrh tawh lo a tih a ni mai. 

"A duh dawn lo chiang sa, Zochhura hian ngaizawng ta se a lo hau hrep ang. Pimpomi te chu mi fel a nih hi. Bakah, Zochhura hian midang a melh dawn lo tih ka chiang ve e...thikthuchhiat luih tlat a har ve zia aw" ka ti pang pang a, anni lahin an hmel lo siamchhe kual velin, "Ani pawn thik tur a nei bik lo" ka ti leh hram a, "A neih reng kha, in inngaihzawn hmain keipawh min thik a min keh hrep kha. In buai dawn lutuk a tumah in thik hman lo a nih hi. A rilru a pe tawk lo che tih a chiang reng" Sangkhuman a tih veleh Fawnvelan, "Aw...lehkhabu chhiar pah ten a ngaihtuah vel ţhin aniang chu....a rilru a pe ang Sangkhum, Remkalami a hah ve em hi chhaih buai suh" a lo ti dap dap a, Sangkhuma hi midang kalh zawngin a awm leh pek tawh dawn aniang chu, unau zinga dangdai hlang hlak bik an awm ang mai hi a ni. 

"Hetiang chen chen inzui tawh thik tur tumah hriat loh tawp hi a mak ka ti. Thartei ve lem, a tv remote hum lai thlengin ka thik lo chauh a, lehkhabu lehkhabu a ti reng a, a zawng zawngin a la ngaihtuah lo che. A la block ţhen che" tiin a hre ber awm ang zia zangin a ţawng leh tawh hi. 

"Block ţhen bik lo ang...a nih tum a la puitlin bik a alawm Sangkhumte" dam thluama Fawnvelan a tih chuan, "I phakar aw Fawn lem, Remkalami rawn kal hma te chuan ka ngaih a ţha lo i tih kur duai kha, a rawn kal veleh khati khan ti leh daih suh. An inngaihzawn dan hi a ho si, inkhawm tur pawn an la kal dun lo. Kalkurtaii leh u Rinchuta takngial pawh in tluk lo aw. A zahpui che mi a?" Sangkhuman a ti pung pung a, a ţawng ri chu midangin an hriat phak a hlauhawm zawk. Fawnvela pawhin a kawrah pawt ţang ţangin keiin a ţawng zawih deuh theih nan ka kutin ka lo zap chung a, "Dawra a lo len ve in a awm rei lo thei si. Remkalam, a ruk chiaha min duh tute hi chu pastor pawh ni se an ţha chuang lo a nia aw. Ka sawi ţhaih vang che pawh ni loin an ţha lo ve tawp. Kan khawpuma thang hat khawp zel a star nei ţhin kha a nia, i danglam tawh zia hi, pawisa lakluh hnem i tum luatah nun nawmna tak tak i chân palh hlauh ange aw. Nula kan rim ho zan te khan nuam in ti ka hre vek. A chhe lam zawng a nih loh chuan nuam in tih zawng ang chu la ti reng tho rawh u a ho mai mai ka khua a har" a ti hluk hluk reng a, "I hmui kha a na miah nange? I va ang nasa tun tun ve" Fawnvelan a tih chuan, "Na se a na ka ti ang chu. Remkalam, inchei kawr te hi ha ve leh tawh rawh. Ka pi te i buaipui a i inla nutling ringawt" tiin Sangkhuma a la phun tho a, "An fapa chut lai nak laia anni an lo nelawm loh leh zel chuan e...awi awi awi, ka ngaihtuah peih lo. U Zorama bulah hian sawi rawh, 'kan kal dan hi thlak danglam ang' ti tawp rawg" a ti a, amah ber a nuih takah chuan Fawnvela nen pawh lo nui vein nu Mawisacheki awmna ka zawt a, "Sachek a zuar chhuak daih, piancham a mahni in a awm chu chaw rawn ei tum an duh a buaithlak a ti deuh tlat a nih kha. Sangkhuma nen lo ei ula a tawk mai, Sangbollywoodi chu Msa nen vur bawm an khai a 'tlangah kan zuar dawn' an ti. Chaw chu an rawn ei ve tho maithei" Fawnvela chuan a ti duah a, Sangbollywoodi a awm chuan vur hralhna chu a himah turah ka ngai. Msa ringawt chu keipawhin ka la ring zo bik lo. 

Nu Mawisacheki te inah zanriah kil ve nghalin ka pi Binladarin, "Zanah dawr min rawn nghah chhawh rawh" a tih avangin rei pawh awm lo vin in lamah ka haw nghal mai a, Zochhura nen kan la inbe leh miah lo a, engmah ka la zawt zui lo bawk. Ka chhungte lah an buai buai a lo buai vein ţhutthleng seiah Nutei a lo muhil der tawh a, a chau leh pek viau a nih hmel. 

"Lalhuma leh Taipuia te in sawm ve nange? An rawn kal ngam chiah si lo a, 'ka chil ka lem ka lem mai' an tih an tih kha" ka nu'n a lo ti a, an sachek duh zia ka hre bawk a ka nuih a za kher mai. "Ka pi Binladarin min ko a ka rawn haw hma phah a nih hi. Ka chau thei lo emaw te in lo ti ange aw...chau chung chungin chau lo angin ka awm mai mai a nih hi" ka tih chuan ka pa'n awm hahdam turin min lo ti thuai a, ka duh leh chuang der lo. In a awm chuan ngaihtuahna kawm a awl emai dawrah ţhu chungin va buai ila a nuam zawk ang. Ka aieng thlengin ka la dah vek a, dawr kal apiangin an lo pir te ka hlau. Aieng hmanga hmai hnawih siam hian ka sumdawnna a rei ve tawh nen ka ti lian deuh thei har ngawt mai. Ba phei chu ţhin ngei ngei a ngai tawh. 

Ka pi Binladari dawr lama ka phei lamah pa Hmuna ka tawk a, ka hlauh deuh vangin sir tawkah ka kal. A thusawi ngai a sawi peih aniang Zochhura pawhin a sawi tur awm ang a rawn rin dik thlap kha. "Remkalam, kha, khawi lamah nge i kal dawn?" tiin pangngai fe hian min lo be leh reuh a, "Ka pi Binladari dawrah" ka tih chuan, "Zorama rawn sawm ve ta che" a ti a, "Ka hman lo kal vat vat ka ngai" tih leh tlan ka rual a, a pa te awm chhung na na na chu inah awm ve teh se. 

Thaw hluam hluam a dawr ka thleng chu ka pi Binladarin, "I hlau ve pek em ni a? Naupang hoin 'u Kalvari pu thla a chhuak an tia intih ţhaih nan an hmang e' an ti mai a, ka lungawi lo teh a nia" a lo la ti zui. Chutiang a nih chu ring lo mah ila thla kher kher chu ka hlau ve em a, damlai thla phei chu hlau lehzual tak ka ni. "Ti hian lo awm la i pu ke vung ka han hmeh sak ang e" ka piin a tih chuan, "Ngati nge thla i lo sawi ringawt a?" ka ti a, ka pu ka sawi tel duh ţhak lo thung. 

"Aww...i hlauh hmel em a ka lo zawt che. I hlau pek em ni?" a tih chuan, "Hlau lo" ka ti bul hmak a, ka hma lam chu dawr kawta bulh in chiin a en thui bawk si lo, "I hlauh loh leh ti khan lo awm rawh, i pu ka han buaipui ange pu Hruaia te an lo leng bawk si" a ti a, a kal dawn tak takah a kawrah ka lo pawt leh a, "Zanin chu eng a va dul ve" ka ti a, ka pi chu en pawh ka en ngam tawh lo. "Zanin chu electric current zawng zawng a dim dawn an tih kha. I hlauh leh Fawnvela te ko phei rawh" a ti a, min kalsan nghal daih a, damlo na deuh an sawi hran chiam chiam laia mahni a awm chu nuam lo duh deuh a ni. Ka pi khan lo sawi kher lo se ka hlau lo ni mai tur. 

Zochhura lah a la reh vung vung a, biak hmasak ka duh bik der lo. Min dawr tu an lo kalin rei deuh deuh ka lo be ding lui a, 'ning mah se a ho' ka ti tawh mai a, Sangkhuma te rawn lam hma chu kuhva lo ţheh tlut tlut mah ila pawi ka ti lo. "U Remkalam" Sangbollywoodin a rawn ti ta hlauh a, ka va han lawm kher em. Ka pu ka hlau a ni hran lo, ka pi khan min sawi ţhaih miau a, thla hrim hrim hlauh lai taka a rawn lang hlawl chu ka hmu hmelţha sawtin ka hria. 

"Tlaia kan inhralhna u Zochhura va pek ka tum a, mah se a pa khan ho a ti deuh hlek a, nangman lo kawl rih teh. Msa kan kawl tir chuan zaninah la la a zo nghal a ni mai" ti a min hrilhfiah chunga a pawisa min pek chu ka chhiar a, 250 chiah chiah a ni, a la nawi rapthlak zui. "250 man in va hralh thei zawk ve in zawrh tlai nen" ka tih chuan, "Mi inah kan lut kual alawm. U Zochhura hian engzat nge a la kawl ang le?" tih niah niah pahin herhsawpah a ţhu a, a ngaihţha lo hmel chu lo hmu vatin, "An lo khak che mi?" ka ti a, ani hi chu lo khak mah se a ngaihtuahawm lem lo. 

"Khak nang aw..mikhual zawk an nia, tumah khak thei an ni hleinem. U Zochhura bulah 'khatiang leh zel chu kawl suh' a lo ti kher a, pawisa ka la let a ka chhuak nghal nal nal. A thir tam lutuk kha a duh lo aniang" a ti a, a kut zungţang chu ulh niap niapin, "Chhungkua an ang pawh ka ti lo e a. An hmel a in ang lo hlawm si, tum ţha duh pawl din an ang mah zawk" a tih chuan ka lo nui uar a, "In inhralh hnem tehreng nen Zochhura pawh chuan lo lak luih ve mai tur alawm. Kan bia ange" ti a phone ka phawrh chiah chu Sangbollywoodi chu thawk lawkin ka phone min rawn chhuh sak rawk rawk a, "Lak a tum a keiman ka lak let sak a nih kha. Mahse u Remkalam, a pa hmel saw ka ngei ve thlawt, a hmui awmdan te saw mi chuk tum reng a ang ka ti. Hmeichhia chhia hi an sual tiraw?" a tih chuan chhang tawh lo mah ila, "Engtinmah min ti lo nain a hmel saw ka ngei. An nula lah saw a sam a zut reng, u Zochhura hian a awmpui peih zawk ka ti" a la ti hlak hlak a, "La hauh hrep tur a nih chu" a rilru nawmna tura ka tih chuan, "Hauh chhan tur a awm lo. A hmel kha ka ngei mah se la hau hrep tho rawh. Pa Hmuna lah saw patling ve si a naupangpangchhia si, a â deuh aniang" a ti a, phone min pek hnu lawkah Zochhura pawhin min rawn be ve ta nge ngein call pangngaiah ni lo, message ah hian ka awmna min rawn zawt a, 'Thil ka lo lei zawk ang' a rawn ti a, ka chhang lo. 

Ka piin inlengte hmeh tur chhang rawn lain Sangbollywoodi chu, "Thingpui min rawn lumpui lawk rawh" a ti a, a kheuh hrang leh ta daih a, ka rilru nawm loh ber lai pawh hian thla ka la hlau. Sangkhuma leh Fawnvela te lah nu Mawisachekin belpui a la sil tir aniang thawm an la rawn nei leh lo reng reng. Sangkhuma lah hi mi sawi ţhaih chiam chi tho a nia, Sangbollywoodi kha chuan min la khap ve deuh zawk a, Sangkhuma chuan Pimpomi hmang ten a nawrin a nih kha min nawr. Mi ngaihţhat loh rukna lai tak sawi chhuah a ching si. 

"Nu Mawisacheki te inah ka en hmasa che" a rawn ti lut a, a tih ziah dana ka bulah lo ţhuin ka lo uksak vak lem lo. "Min hmuh duhna i nei mi?" ka tih chuan, "Dawrah kal ang ka ti duh" a ti a, min rawn be hauh lo nain nu Mawisacheki te inah chaw ka ei tih a hre ru ran tho a nih hi. 

"I zir tur vel chu in sawi fel thei ta em?" awmze nei zet hian ka lo ti a, an buaipui nileng ţhak niin ka hre mai. "Sawi fel lo" tih zawnga min chhangin kuhva bawm a ban daih a, nu Partei khan kuhva a lei ve ţhin tak e. "M.th chu BD zir zawhah an zir leh ţhin em ni?" ka tih chuan, "Umm" tiin tawi tein a nui a, amah tak pawh hi a chauh hmel riau, a tawm nilen nen. 

"Pastor nih a awlsam deuh tihna mi? I tlin hma phah dawn tihna maw?" ka tih leh chuan, "Thiamna a san chuan a awl deuh mahna" a ti a, a nih tum ber a nih theihna tur a nih vangin ka sawi buai hran lo. Hlauh ruk erawh ka nei tho. A bialnu hlui lah kha zirlai a ngaihtuah theih loh hlauin a ţhen hmak a, khatiang khan min han ti ve teh se, keichu ka dam reng tho dawn. Mipa vanga mahni nunna lak hian hlawkna sawi tur a neih awm ka la hre lo. 

"I zir leh chak hrim hrim tihna mi?" ka ti a, zir suh ka ti dawn miah lo. Lo ţawng ve vak vak ta ila min puh let leh daih si se, awmzia a awm dawn lo emai. "Chak lo ka la inngaihtuah" a ti a, pawn a thawm a awm veleh ka ţhu ngil auh a, Sangkhuma te an nih ka rin nen veng dang tlangval daih an lo ni. Zial vel min rawn dawrin an kal leh mai a, Sangkhuma te chu Zochhura a awm tih an hriat phei chuan an lo lang har viau maithei. 

"Pastor nih hma hian kawng a hautak ve a ni maw?" ka ti a, synod ah phei chuan luh a harsa zual niin u Rinchuta khan a sawi ţhin. "Hautak ve e. Sangbotei a lo kal" tih chiah a sawi hman tihah, "A lo kal tawh...ka pi Binladari nen thingpui an lum mek" ka ti a, a thaw deuh hak a, a chauh hmel ka tih tawh kha, an chhungkua chiah buaina tur te pawh a nia nga, min pawh tak tak hma chu engmah min hrilh ve kher lo ang. 

"Ka awm rei hman lo ang" a tih lai mek mekin a phone a ri a, phone a biak zawha, "Kuhva an ei chak tawh a nih chu" a tih chuan, "Kal rawh ka lo en liam ang che" ka la ti thei tho a, ka inngaihtuah chian hnuah chiah thutlukna ka siam tawh dawn ka tih kha. Thil ka ti rum rum tawh dawn lo. 

A kal zet tawh hnuah, "Hey" ka ti leh thut a, a rawn inher rang teh a sin. "I zir peih loh viau chuan ka bulah sawi la, i pa ka hrilh dawn chuang hleinem. Tukina zirlai an sawi aţangin i hmel a la dik lo char char a nia aw, a ţha ber turin ka beisei ve kher lo che" ka ti a, ani hi chu thla ka hlauh vanga chelh ka ni ve kher lo. "Ngui bur reng kha i peih mai mai. Pathian rin loh vang tihna a ni chuang si lo a" ka tih leh chuan, "Aw, ka zir peih lo" a ti sup a, "Ka chhungte i hmu tawh a i duh apiang ka sawipui tawh ang che" tih zawmin, "An haw veleh" a ti leh a, min dawr tum tu an rawn chhuk leh tak avangin hmeh en nen a chho a, a mi tawh te chu a hmu chiang lo nge an biak hma chu a be lo. Tukin a a pa'n admission a sawi aţang khan a hmelah dik lo ka hmu tawh a, fate na na na chu nu Partei khan a hmu ru ve reng maithei bawk. Sawipui a duh ta bawk a nakinah ka la sawipui vek ang. 

Sangkhuma te an rawn lang lo ţhak a, ka pi Binladarin kawngpui thleng min thlah phah. Min la hau chho char char zui. Ka nuin, "Nutei kha ti harh suh a mut luhna a la rei lo" a lo ti a, ani pawh hi dawr lam hlira Nutei a awm ţhin lai khan 'haw rawh se' a ti reng a, a feh velehna duat leh a, sawi ila min ngei leh awm sia, chhaih nan pawh ka hmang ngam lo. 

Zan dang ang lo taka rilru nuam engthawl vek vawk a mu ka ni bawk a ka lo mutui viau aniang ka nu'n min rawn sawi nawk nawkin, "Tho thuai teh" a ti pah mawlh mawlh a, "Bawiha, i pa pawh a phei chiah a nih kha" ti leh ka meng ţan diar diar tihah ka nu'n min tung tho lawp mai. 

"Ka tho dawn ka tih ka tih kha...thawh ka hai khat tehreng nen" ka tih niah niah laia ka nu'n ka pu chanchin min lo hrilh chu khum aţangin ka zuang thla rang teh a sin. "Engtikah? Ehe...thawh ka hai nange? Min kaihthawhna emaw ka tia" mumal lo zet hian ka ti nawk nawk a, ka mumal lo reng bawk tak tak a, tih hmasak ber tur pawh ka hre lo. 

"Tun lawkah khan. Ka phei ve dawn a nia, Nutei kha lo kaitho la rawng lo bawl thuai thuai ru" tih leh ka pindan aţanga chhuah a rual a, ka nu ka zui chhuak uk a, ka phone ri vangin pindanah ka tlan lut leh thuai a, tukin a ka thu hriat meuh chuan awm dan tur mumal min ti hre lo a ni ber mai.

CONT...