DUMB AND DUMBER-10

 

DUMB AND DUMBER-10

"A la na em?" a dar hmeh mawlh mawlh pahin lu a lo thing. Vanneihthlak takin a na lutuk lo hlauh. A ke ruh a khi a, a lu tlem a kak hlek bawk. Hospital a awm ngaiin a awm lo a, in lamah kan inenkawl. 

"Han hnawl ve mai la chuan tunah pawh in a tawm kur lo in dawrah i awm thei tur a nia. Mi rinloh hlauh vang mai maiin i kal lui a, a hlawk loh zia hi" ka ti hmarh hmarh. Ka hlauhthawn em vangin ka hau nasa tawh. A nui liam vel mai mai. Vawiin pawh chawlh nilo se chuan class ka kalsan daih ang a, amahin a awm reng dawn tihna ni mai. 

"Sammy chu a lokal dawn mi?"

"Aw tukin ah min lo bia a, ka lo leng dawn a ti" nui ver ver hian ka ti a, kan inbe leh thei tawh a, ka hahdam huai. A bulah ţhu ve mah ila tih vak tur ka hre chuang lo. Damlo enkawl leh ngaihsak vel chiam hi ka thiam loh zawng tak. 

"Sammy kha engtin nge a rawnkal ve theih a? Hospital ah khan ka hmu ve hlawl sia"

"Zamzami ţhiante vek an nia, lokal ve turin ka ti che a i duh lova" 

"Lokal ve ila chuan kan pahnihin che thei lovin kan awm dawn sin" ka lo ti vat. Hospital a kan inhmuh pawn Sammy chuan min la hrelo der hmak tho a, min ngai ve tawh aniang biak ka tum tawh loh hnuah min rawn bia. 

"Hei ka chet theih hi" tih pahin min kuah a, ka nuih a za angreng. 

"I style a hman lai tawh emaw aw"

"Hman lai chuan fa neih vat an duh ţhin kha" tih pah hian min kuah nghet sauh. A awmah na zetin ka nem a, min thlah duh chuang lo. 

"Rai puar pur chunga class kal turin min beisei a mi?"

"I zawh ţep tawh hi, naupang ball tiat vel bak a ni hman nang" a ti ve vel ngei. A inhmeh hlawl lo. A hmui a ka nghawng a chhui kual lai chuan ka za ti lutuk ka nuichhuak ta vak vak. Dek ka huat zia ala hrelo a ni maithei. 'Dek' tih paha an kutzungţang an tih pir tawh chuan ka za ti lutuk ka tal nghal tawp tawp thei. Ka chak lohna ruk a hre ve ta chiah chu a hma aia nasa in fawp chiah silo hian a za tur tawkin a ti lui zel a, thawsa phung a ka tal hnuah min thlah ve hram. 

"Ivan sual tak e aw. Ka thi mai tur asin" fiamthu hian ka ti a, min lo nuih veleh mai dawn maw ka tih laiin thutak zet hian "Engtin pawn ti che ila min hnar ngai lo" a ti ta daih. 

"Tunah ka hnar reng che kha, ka nam ţawng ţawng reng che kha"

"Za itih vang chauh. Lokal teh"

"Min dek tawh miah suh" tih pah hian inveng ru ran chuangin ka hnaih a, min lo kuah leh lai te chuan ka ţang ţung tawh. Min lo dek ta bik lo na a ka hmuiah min fawp thung. Reilote chauh ni mahse nuam ka ti tho. 

"Min duh ve miah lo tak tak maw?" a tih chuan ka mitmu ka ti che kual ralh ralh a, min kuah nghet vak tawh lo mahse ka taksa dang chu tihchet nachang ka hre tawh lo. A mitah phei chuan ka en ngam lo nasa. School naupang ngaihzawng nei hlim ang vel ka ni. 

Ka duh nge duh lo ka chiang bik tlat lo alawm. A accident tih ka hriat khan ka hlau takzet a, na a tuar hrep ang tih ka hlau a, hospital an rawn thlen hlim te khan harh reng mahse ka hlau em em reng tho. Timothy khatianga ţhing deuh a a awm a min kuah thuak thuak lai te khan Sawmpuia hi ka ngai ve deuh a, ka mangan tawpah chuan ka hrechhuak ve tho. Mahse ka mangan lai chauh a ka hriatchhuah vang hian ka duh tihna a ni thei ngawt si lova. Ka mawl vang aniang ka rilru put hmang lehzel pawh ka hrethiam thei lo hi. 

Aw ka then kharh hnuah muangchangin ka inla hrang. 

"Ka hre lo le" zawi sep hian ka ti a, ka rilru puthmang tak hi ka la hrethiam lo. Ka duh che lo ti ta ila, nakinah rilru dang pu leh si ila, amah bawk hi ka tina zawk ang. 

"Hmanhmawh suh. Hriattir dan che ka thiam bik si lova, ka nghak ang che" ngam leh ngam lo hian ka melh dek dek a, ka awmdan a hmuh chuan a lo nui suk. 

"Rosy i nu a lokal. Sawmpuia damlo a rawn kan ve duh a, ka lo luh tir dawn mi?" kawngkhar bulah Rintei a ding teu a, min ngaichang ran. 

"Aw a hmuh tur ber pindanah a awm sia, lo luh tir mai rawh" tih pahin ka ţhu ţha sawk sawk. 

Remchang a hre khawp mai chair nen a rawn lut thlap. A rawn nui lut ver ver a, khum bulah a inhung rem nasa mai. 

"Ka ngaihtuah lutuk cheu a, in la naupang ve sia, Sawmpuia ber a chetsual chuan Rosy a thlaphang lutuk dawn a ka tia, chanchin ka hriat veleh ka rawnkal anih hi"

"Tunge chanchin hrilh che? Ka hrilh bawk si lo che a" ka ti ve ngat. 

"Ipa in min rawn hrilh a, a ni pawn a ngaihtuah cheu a, i theih chuan lo va leng rawh a tia, ka lokal vang vang"

"Iti lawmawm. Leng ve reng rawh" Sawmpuia chu ka melh hrawk a, a ngaih a ţhat hmel nasa mai sia, a chang hi chuan kei ai pawn a mawl ţhin zawk. 

"Ipa leng pawh a rawn haw ţep ang. Chanchin min lo hrilh chuan ka lo hau a, chawlh anih ro ro chuan awmpui ta che ka lo tia, a nachang hi a hrelo thei lutuk a" hei pawh mi mawl. Kei aia mawl chhah lehzual hi an kat nuk reng a ni. Sawi zuah zuah lo se kan ringhlel nep deuh mai tur. 

"Ka pa nen chuan inva inpawh awm ve" Sawmpuia'n a tih chuan a meng phawk ta hra. A ţawng thui lutuk tih a inhre ve a ni ngei ang. Mahse a buai rei lo khawp mai. 

"Nia in inneih na tur vel kan sawifel hnu khan inu leh pate nen hian kan inpawh thar a, anni pawn min ngam tlak. Mi hrang kan ni lova, inpawh deuh a awm hi a ţha ka tia" a ti zung zung a, a insawi buai teuh khawp mai. 

Ka pa a rawn haw a, thil pawimawh sawi tum ni awm fe hian an inzui chhuak a, umzui chi an ni der si lo. An inkawp ru anih pawn ual au tak chuan an tihlan ngam ka ring lo hrim hrim. 

"An thil sawi va ngaithla ru teh"

"Ka duh bik lo min lo hmu ang a sin. Eng vak nge sawi se itih? Rintei leh U Biaktei an awm an awm ve ve a"

"An tawm bo daih ang. An hmuh che leh bang vel i hru der ang a, puanchhia nen va kal rawh" a ti mauh mai sia, hreh chung chungin ka tho ţuah ţuah. 

"Ka ti der anih kha" a tih rual rualin ka inher vut a, a nui hmel ka hmuh leh ngat phei chuan ben sawk mai la duh. 

"Puanchhia tak kha chu. An hmu lovang che. An awmna tal va enchhin teh" ala ti ţalh. 

"I ke dam hunah ka duh apiang min tihsak ve ang" ka ti hlak a, ka chhuak nal nal.

Ţhutkhawmna pindanah Rintei chiah a lo awm a, Rri te kalna ka zawh chuan pawn lam a kawk vu. He nu hian ngaihţhat lohna a nei ve ngai lo. Kawngkhar phen aţangin ka bih dek dek a, hmuh phakin an awm lo. Ka chhuah ve chuan keimah zawk min lo rinhlelh ka hlau ve tho sia, let leh ka tum lai takin gate chhunga Sammy rawn tlan lut ka hmufuh a, ka lo nghak leh rih. 

A rawn lut dawn chiah tihin a darah ka lo vuan a, a phu nasa em em lehnghal. 

"I mawl zia hi chu aw, ka thlawk lo chauh anih kha" 

"Rri te i hmu em? Heta ţanga ka hmuh phak loh chinah hian an awm mial em?" Rintei hriat phak loh tur hian ka ti a, a hawi let leh vut. 

"Ka en hleinem. Scooty dahţha tur ang deuhin ka enchhin dawn mi?"

"I dahţhat vek tawh saw. Theihnghilh nei ang deuhin kal leh zawk rawh. Sawmpuia pa nen i hmu dun em min lo hrilh dawn nia" a taksa pumpui ka kuai her a, ka nem pawp. A lo inrin hman ka rin nen a inring hman lo nasa. A eu dawrh a, a ruk a tih tur hrilh lo ila chu min rawn ankhum nasa ang. Theihnghilh lak tum ni awm tak a a hawikual vel hmuhnawm ti zet hian ka lo thlir a, he mihring hi chuan zei loh pawh a nei ve lo. 

"An awm lo" a tih takah chuan Rintei bawk chu ka zawt nawn leh. Pawn a an kal thu bawk a lo sawi leh a, hrilh vek chi lah a ni der si lo. Rilru nuam zan lo chungin Sammy chu kan pindanah ka hruai lut. Sawmpuia hnenah chanchin ka hrilh zung zung a, a ni pawn tih ngaihna vak alo hre lem lo. 

"I nute pindan hi pawn lam aţangin a luh theih em? A theih chuan chuta ţang chuan an lut aniang" tiin Sammy chuan a rindan a lo sawi ve a, tukverh aţang chuan an lut pha kher lo maithei. 

"An lut thei lovang. Khawiah maw an kal aniang" Sawmpuia pawn a lo ti ve chiah. An van tenawm dun mai mai tak. 

"Rri te ringawt ngaihtuah tawh lo ang u an ninawm. Engtikah nge naute neih in tum a?" phawng phawng zel a. 

"Chutiangah lo buai ve suh. Nupui nei ve phawt la naute kan nei chauh ang" uangthuang zet hian ka ti a, chhaih pa theih ni sela ka ti ţhin

"In thih thlengin fa innei dawn lo tihna nih chu. Min en la ka chhiat loh em hi. Hmeichhe tam tak hian min tluk lo aw"

"I upat hunah chuan an ten ang che ka tih kha. Thau dulkiar tawk chungin no deuh deuhin ikal mai tur sin. Pa ber tan chuan khatiang kha a pawi vak lova, an uar mah tawh zawk a"

"Sawmpuia hi thau dulkiar pung, benrik kung kung theih ang kha nei turin iduh nimaw?" min ti let zek. Za em em hian bu luk lukin ala nui zui. 

"Teuh lo. Entirna ka pe che nih chu"

"Inchhung chuan khuang in mamawh dawn lo reng reng. Naupangin zai ang u an tih veleh pa berin a dul hlim se" ala ti deuh deuh. Sawmpuia pawh za lo deuhin a lo nui ve suk suk. 

"Shooting chu nuam iti em?" thildang ka zawt daih. A sawizui zel ka hlau. 

"Ti e. Sawmpui i camera kha a chhe lo tiraw?"

"Aw motor a chuang ho kha ka kentir a, a vanneihthlak"

"Ţhat hlauh chu. Ka enchak tawh tehmai nia, thli a thaw reng a, a vawt deuh kha a ţha hlauh anih kha. Ka pangti chawr a biru deuh hmak a, engti zawng pawn a din kual vel theih" khum a fel at a ţhu si kha ka che hrut a, Sammy malpui a ri nghal chawrh. Kan nupa a fa neih chungchang kan lo sawi lai laiin a hram tlahawlh thei lutuk hi ka ning. 

"A puam hik zui mum mum. A nat dan chu. Sawmpui innu ve hi a chhaw mawl tawh nak lai hian midang kutthlak a ching sia, fimkhur viau ang che"

"Keichu kut min thlak phal ve hleinem. Ava dim lo bik che ve" a lo tih chuan intithei fe hian Sammy ka en a, Sawmpuia hmuh lohin lei ka chhuah. A tum zui bar a, biak ţawng a har leh tawh viau ang. 

"Ipa in inu pangpar vel min enpui a, kha Sammy a awm tawh tho a, kan haw hmasa ang e. Ka haw har chuan Rosy pa khua a lo har ang" Rri a rawn lang leh hlawl. Tim miah lovin ka pa te a la sawilang lehnghal. 

"Awle. Tluang deuhin i haw dawn nia" Sawmpuia chuan a lo ti a, kei ve thung chuan engmah ka sawipeih lo. Ka lo en tawp. Thup tum nasa viau mahse engtik ni ah emaw chuan a tenawm zia hi ala langchhuak em em ang. 

Class ka kal leh tawh a, Timothy ka hel zak zak. Hmanni a hmun ţawp deuh a min hruai aţang kha chuan ka hlau deuh reuh tawh a, ţhing ka ti ru tlat bawk. Sammy nen canteen ah thil ei tumin kan ţhu ran a, a awl phawt chuan a hnung berah hian kan ţhu ziah. 

"Ka hrilh che a i awih lo vel a, tunah chuan engtin pawn lo sawi che sela i pha thei tawh lo hrim hrim. Ka zu in naah ka hruai a a tih che pawn thinrim thei i ni lo. I zui miau a" sawichhuah ka duh tawh loh nen Sammy bawk chuan a sawichhuak lehpek. Timothy nen a kan kalna vel leh a awmdan ka hrilh a, keiin ţhing ka tih ai mahin ţhing a ti zawk. 

"Sawi ve ziah lo teh. Ka nghak char char che a, i lokal thei lo anih kha"

"Ila duh em?"

"Hmelţha chu ka ti mahse ţhing ka ti ngawih ngawih"

"Hmelţha nunrawng ni lovin hmelţha tlabirh a ni maw?" nui ţhaw chung hian a ti a, a hmusit ve khawp mai. 

"Ruih hi a ţha lova, rui rawh ka tihna ni lovin kan bulah i awm anih chuan eng ang pawn rui la kan veng vek thei che. Sawmpuia lah nise beer lo chu induh der lo. Beer chiah chuan a ruichhe dawn lo sa. Rawnkal ve zawk la chuan rui chhum hmawk mah la awm nuam lo khawp a siam lo che in kan vengin kan buaipui tlat zawk che ang a, Timothy chu i hrechiang tawh em tikhan. I rui lo chung pawn a kuah lui ţawng ţawng duh che a, i mal a a chul te kha ka ten lutuk. Rui phei la chu a mutpui ngei ngei ang che. Sawmpuia inei hlauh hi i vannei ka tih mawlh mawlh kha. Timothy iti deuh tlat a, keichuan ka hriatchianna a rei tawh"

"I hriatna a rei tawh maw? Engtin nge ilo hriat leh bik?"

"Ţhian ka kawm nasat hi. Mi hian min ring a thil min hrilh ve ţhin. A bialnu hluiten ţhing an tih theih em hi" ala ti ta deuh deuh a, ka lo hreve lehpek lo. 

"A tirah khan min hrilh vek ta che"

"Ngaithla duh hek lo che. I pasalah hian lungawi la a tawk. Inţhen te kha ngaihtuah tawh reng reng suh. Hmeichhe dang lakah a inla hrang thiam tehmai nia, entawn rawh" min ti deuh hrep. 

"Engtin nge a awm? Model mai bakah a ţhiante chhelo deuh deuh thlalak sak chu nuam a ti viau lo mi?"

"Nangmah ang turah ngai ve kher lo la. Tumah a hnaih tak tak duh lo. An nel tur chuan awm tho mahse a chintawk a hre tawp. Keiman ka hnaih thei ber. Bakah a fel a, tunlaiah chuan mifel leh mahni ke a din tum tlat te hi an luck tawh zawk aw. Nang angin ţhing deuh deuhin an hnaih ve lo. Nang aia changkang leh nihna sang leh chhelo zawk ten an hnaih ve deuh dawn pawn a inla hrang thei zel a, a hmel a lo chhelo bawk nen, chuvang chuan ţhing ve hrik hrah deuh deuh ho kha chu lo hnawl ngam teh" a duhloh zawng hi chu a sawichhe thiam ve ţhin asin aw. Min hau ringawt a min ngei tawh lo chu ka lawm tawk a tling viau tho. 

"Ka pasal neih hnuah Timothy bak ka la zui lo. Chupawh ka star na a rei tawh a, ka lo hrechiang lo bawk nen, ka be ve zuai ringawt a"

"Keichu maw Timothy-a list a awm ringawt pawh kha ka duh lo. Bawkbawn thar vur a chhung nget huam ang vel a ni. Hmelţha ve vur si hian a tawm duhna hmun hi a ţhing thei riau. Sodom leh Gomorra mawng tawpah hian a tawm bik ţhin" a la ti duah a, a nui pah har har reng lehnghal. A ngei duh tan chuan ngeiawm tak tur a ni ve hrim hrim. 

"Bza nen eng nge in an?"

"Min la duh lo. Min duh pawh ka ring lo. A ho emai, min duhlo mahse tihbuai reng hi nuam ka ti ve hrim hrim. Min duh lo ngam tu te hi nuam sa in an awm tur a ni lo. Min duh loh rual khan misualnu ah ka ţang nghal" hawi vah vah chung hian a ti a, a fiamthu thawh dan hi haw tawk an awm ţhin. A nihna a hai tih lovah chuan mifel tak a ni. 

Class kal reng ngai hi ka ning tawh. Nuam ka tih ţhin ang khan nuam ka ti thei tawh lo. Tunah phei chuan hel ngai ka nei tawh lehnghal a, zawh vat vat ka duh ber. Jail hrehawm ber chi a tang ang velah ka inngai tawh. Sammy hian min la haw reng phei se chu hrehawm ka ti lehzual viau ang. 

Chau inti deuhin ka haw a, kawtlaiah Sawmpuia a lo ţhuchhuak. Gate a ka lut lai te chu nui chung hian min lo thlir reng a, a chang chuan ka hmuh hian ka hahdam ve huai ţhin. 

"Kawtlaiah eng nge itih?"

"Ka lo hmuak che" a ti na a inchhung a tawm reng a ning ve tawh anih ka ring zawk mah. 

"Iva chau awm ve"

"Ka ning tawh. Bansan daih ania ka duh tawh ni" ti nuap nuap chungin a ţhutna bul remchang laiah ka ţhu ve. Lei a ni chuang lova ka ngaipawimawh duh lo. 

"I zawh ţep tawh hi. Nang te chuan hrehawm iti ve vak dawn mi? I nuam tih zawng tak aniang chu"

"Eng angin nge min hmuh a?" ti pahin cho deuh hian dak deuh vahin ka en a, chhe deuhin min sawi leh mai ang. 

"College kal nuam ti ve si lehkhazir peih lo pawl" nui ruh ruh chung hian min lo en ve thung. A nu boral a tawrhna a zia ve ta deuh aniang a mitmeng a nung ve sar tawh. A nui hmel te pawh lem deuh ang kha a tel tawh lo. 

"Ka rilru a chak tehmai nia aw. Ka zir duh chuan ka thiam lutuk, mahse designing lam hi ka zir chak ber"

"I kutchhuak a phuai luai awm e" a lo ti leh zeuh. Min duh ve si ka ţhatna lam sawitur a nei miah lo. 

"Ka englai ber hi nge iduh a? Ka thil sawi apiang infuih phurna pawh awm lovin a chhe zawngin i sawi zel a, mi chu an infuih tawn a ni ngai a, a mawl thlak e" tiin ka zawt ta tawp. 

"Ka duh ber lai sawi tur ka hre lo. Ka thil sawi dang ho kha chu ka hmuh dan che aţanga ka sawi. Engtin nge ka fuih ang che?"

"Fuih ka ngai lo. Ka tuizawng anih chuan keimah pawn ka inti phur thiam lutuk" ka ti hmak. 

"Tuina ineih ve chuan a ţha"

"Tuina nei ve lo turah ten min lo ngai ţhin maw?" a lawmawm loh tial tial. Min lo ngai ropui awm lo kher mai. 

"I zir tluan peih dawn mi? I zaidamna te khan a tlin ve lo ang e" a ti leh a, ka chhang peih tawh lo. Ka hawi tau hmak. Mi chuan an nupuite an fuihphurin an tuinaah an tuipui em em a, patling pui pangpar tui pe lawp lawp lah an tam. Kei ve chu a thim zawng hlirin thil min thlir sak. Mi pawn hria se mawl an ti ve tho ang. 

"I nihna ang ang khan ka duh vek. I ţhatna leh ţhat lohna zawng zawng nen. Duh loh lai ka nei lo zawk" a ti a, kan awmna hmun lah kan thilsawi nen a inrem lo nasa. Zah zelah ka sam ka khawih a, a chang leh ka bengah te ka zep thul, lo dawnsawn dan ka thiam lo khawp mai. Ka chhan let ve theih vat ka beisei. Kan intawn tirh aţanga tun thlengin ţhat a chhuah tluan parh a, kei ang mai mai min duh ve anih chuan hnar reng harsa ka ti thuai ang. 

CONT...