DUMB AND DUMBER-11

DUMD AND DUMBER-11

Nitin peih lo zet a class ka kal ve ţang ţang hnuah BA chu ka zo ve hram. Ţan ka khawh ve nasa. A tir a awm mai mai,a tawpkhawk a zir vak ve tho chi ka ni a, ka zir nasat poh leh hriatthiam loh ka lo ngah zia ka inhrechhuak a, ka buai ţhin hle. Ka pa leh Rri phei chu ka ngaihsak hman lo tawp a,pass ve ngei ka duh ve tho si vangin ka inkhung hrang deuh reng a,ka zo ve thei hram hi kei aiin Sawmpuia a lawm mah zawk. 

"Fashion designing ka zir ve ang a,ka zawh hnuah dawr ka siam ve ang" tiin duhthu ka sam a,a mutna lam hawiin saisirin ka mu a,kan inpawh ve tawh sawt hle. Ruata pi boral an tlaivarpui ţum khan ka ngai tlat a,ka be deuh reng. Phone hmangin ka duh thu ka hrilh a, ka tho â anih a ring tlat a, keimah aţanga khatiang hriat kha a inbeisei lo. Zing hma tawkah rawn haw in min kaitho a, hmai min phih tir vek hnuah kawtlaiah min zawt ţha leh. Ka ngaihtuahna a fim loh hlauin pindan boruak lum deuhna laiah min zawt duh lo. Kawtlai thli thaw laia min zawh khan a ngaih a ţha bik tlat. Fim kek kawk a 'Ka duh che' ka tih ţum a a lawmzia kha ka ngaihtuah let hian ka nuih a la za ţhin. Khami ţum kha chuan a lu chung lamah min theh vir nawk nawk lo chauh.

"Sammy nen bawk a mi?"

"Umm..kan tuina a inang a,ka pa hian a phal chuan Sammy nen kan zir dun leh thei ang"

"Ka pa phalna aiin ka phalna a pawimawh zawk" 

"Nia i phal ve bawk chuan" nui chung hian ka ti a, thunei deuh ang a awm a tum ţhin hi ninawm chang awm ve bawk mahse nuam tih riau chang ka nei tel. 

"I tuina thil i zir anih chuan ti hne hne tawh lo la, i hma hun a hril tel dawn a" ka sam chul pah a a tih chuan lu ka lo chet zeuh zeuh a, ka puitlin ve tak tak a ring emaw tih tawh hnuah "Sammy vang chauh a tui chawp hi ilo ni ang e" a la ti hram. 

"Teuh lo. Ka thu thu a awm ţhin chu Sammy zawk alawm. Amah aiin ka tui hmasa,nurse nih a tum char char zel a, mahse a mitthi hlauh a reh thei lo va, thisuk nei a inti bawk sia" ka tih chuan a nuih a za ve khawp. School kan kal lai kha chuan nurse nih a doctor chhe lo deuh deuh chhai thluk a tum ve nasa ţhin a,kei doctor nih ka tum thung. Ka ngaihtuahna hria ni awm takin "Nang? Eng nge nih itum ve ţhin?" tiin min zawt a, kan rilru put hmang kan inhriat tawn bak chu mimal nun kan sawi tam ngai lo.

"Doctor"

"Ngati nge i zir zawk loh? Zir la chuan pasal ila neih a ngai awm si lo va"

"Pawl10 ka pass ţawk ţawk a,zir thei ka ni lo lawm. Bakah pasal neih hi hrehawm ka ti tawh lo. Kan in aiin nuam ka ti tawh zawk" ka ti a, Rri nen ka pa ti lawm tu zawk nih tum a in el mai pawh ni lo in er reng ai chuan a nuamin a hahdam zawk fe.

"Nuam itih phawt chuan ka bulah i awm reng dawn nia"

"Min duh tawh loh hunah khawiah nge ka awm ang?"

"Ka duh tawh loh hunah che chuan iduh leh hetah i awm zui ang a, i duh leh pasal dang inei leh ang a" 

"Eng nge awmzia? I tlanbo dawn tihna mi?" ka lo ti hu. Ngaihzawng nei ngai mang lo tih takah hriatthiam harsa tih deuh deuh ka ngah ţhin.

"Ka duh tawh loh hun che chu ka thih hun tihna nih chu. Thluak hi eng nga tan nge i hman ve" a la ti zek zui.

"Thil ei nan chuan ka hmang lo phawt a, hrethiam ve mai la, bialpa nei miah lo va pasal nei nghal buaih ka nih hi" lungawi lo lek lek hian ka ti a, ka tih tauh san phal rih bik chuang lo.

"Awle ka hrethiam che. Muhil tawh rawh hma deuhah U Biatein a lo kai tho leh dawn che nia" 

"Ninawm thei si" ka ti nang nang. U Biaktei hi a inla khirh thar a,min kaitho hma thei. Ka pa thingpui lumsak hman a tho turin min ti ţhin a, ka pa lah a tho hma thei nasa mai si. Class kal a ngaih tawh loh hnu hian ka hahdam ve tawh ang chu tih nak laiin ka hah zual sauh. Ka exam vanga ka ngaihsak hman loh lai pawn Rri chu keimah chhuanlam a hmangin a rawn leng ziah. Sawmpuia awm loh chang a nih phei chuan ka hne thei hle. Reilote min be lum lam turin ka hnaihah a ţhu ve zuai a, ţha deuh a zir tur a min hrilhin a kal leh daih zel. Chawlh nikhua leh inrinni leh chawlhni te hian a rawn lang nawlh nawlh zel. Kan ringhlel ţhum tawh. U Biaktei phei chuan a ngaithei lo lehzual hle. Mahse kan in piah lawk a dawr neitu chuan 'nuhrawn si a ngaihtuah che e' tiin a fak daih. An hmuh reng chuan mak an tih hlauin a lo va insawikhalh ţhin a ni maithei, chung thleng thleng chuan ka hre ve tawh lo. Mutchhuakin min zem chiai chiai a, blanket min khuh ţhat hnuah Sawmpuia chuan ka chalah a fawp a,nui vur vurin ka muhil a ni ber.

"U Biakte min kaitho tel kher lo hian thingpui chu i siamsak thei tho sia, dar5:30 ah min kaitho zat zat a,a vawt tawh si,dar6 tal ti la" meng mang lo hian ka ti a,vawt ka tih em vangin ka thingpui tur a rawn chhawp rualin no sa ka lo dawm vat. 

"Meng rawh, midang hriat lohin thil ka hrilh ang che" 

"Eng nge?" mit ka nuai nawk nawk chung pawn men luih hram hram a ngai tho. Ka bul chiah a chair pawt chhuakin a rawn ţhu ve a,a pawimawh hmel nasa.

"Pasal neih ka tum hnai a"

"Maw?"

"Ka sawi dawn lawm. Lo dawhthei ve deuh ta che" ka kut a ben pahin a ti a, ka chip hmak.

"Sawmpuia hi khawngaih viau mah ila ka awm lui peih tawh lo. Chubakah mi ţha ka hmuh lai a ka neih loh chuan ka chân leh mai ang. Ka upa ve tawh a,fa neih thlengin ka harsat zel ang a" thutak fe hian a ti a, a sawidik fu mai.

"Ngaihzawng i neih awm ka va hre lo ve"

"Nei ve e,ka nu pawh khan min hriatpui thlap. Sawmpuia ngei pawn a hria ang. Khaw dangah a awm a,a lo leng lo mai mai a nih hi. Aizawl a lo zin chuan a lo leng ziah alawm" 

"Eng nge a tih ţhin?"

"Zirtirtu a nia,pathlawi. Fa pakhat chiah an la nei a,an inţhenna a rei tawh"

"A ţha lawm. I duh chu ka duhpui vek che" nui ver ver chungin ka ti a, mahse a ngaihawm dawn.

"Sawmpuia hi ka la hrilh ngam chiah lo va, a nu in a boralsan a, ka awm loh lehzel phei chuan a khuahar dawn a, ka hrilh huphurh, a hlim lo hmel hmuh hi hrehawm ka ti ţhin a, ka la zep rih a nih hi" dawhkanah a kiu nghatin a biang a dawm a,a ngui ve nghiai mai.

"Awm nuan lo vin kan siam che mi? I awm peih tawh loh thu i sawi zeuh sia"

"Ni lo ve. In nupa chungah hian vuina tur ka hre lo. Mahse ka pu awmdan hi ka hmu peih tawh lo. Ka ten hluah hluah" a ti ta mai. Ka ngaihven lehzual sawt. Sawmpuia nen kha leh chen kha hriatchhuah tumin kan bei a, U Biaktei a inkhung chawt lai pawn kan chik ru ve reng ţhin a nih kha,mahse kan rinhlelh theih turin an awm ngai lo va, naupang zawk leh tlem a la â deuh zawk chu min bum hneh khawp mai. Midang lahin an fak letling daih lehnghal.

"Sawi nuam a ni hran lo. I nuhrawn nen hian an inngaizawng a, ka nu nen a an pindanah ngei sawn an awmdun fo. Nang lah i tawm tlat a, chhuak tur ang a insawiin ka enthla ţhin a, vawihnih lai chu an pindan aţanga an lo chhuak lai saw ka hmu ru tawh" ka beisei sa ni mahse min ţhawng tho. Ka pa te pindan hi a langsar lo va,a puk deuh laiah a awm. Mahse an pindan a kal dawn hian U Biaktei pindan kal tlang ngei ngei a ngai thung. Ka nu khan a bul hnaihah a awm tir tlat ţhin. 

"Sawmpuia i hrilh lo mi?"

"Aih rilru natna a neih belh ka hlau. Keipawn tawrh harsa ka tia tlan bo san daih ka duh lai hian Sawmpuia, kei aia kum tam fe a naupang zawk phei chuan tawrh har a ti dawn lutuk. A nu a hmangaih zia i hriat tawh kha, ka hrilh ngam hlawl lo. Sawmpuia hi engmah ka hrilh ngam lo a ni ber. Nangma pa ngei pawh a rukin hrilh a,i nu hi enthla deuh rawh se"

"A ring em a,a mit ngei a a hmu anih loh chuan ka thusawi mai mai chu a awih teuh lo. Rintei hian engmah ava sawi ve lo ve" 

"Nia, Rintei'n thil awmdan a man thiam ve thei lo hi keipawn mak ka ti. Pawi a sawi lo em a,khatiang a an awm theih kha a ring lo niang. Bakah a sumdawn ve na hi chhuah tam ngai chi a ni sia,a chhuak ve deuh reng bawk a" 

"Ka pa te chu an tenawm hle mai" ka ti ve vang vang. An inhmuh ruk duh vang lek anih hi pasal nei tur a ka nuhrawnin min nawr luih nasat em em. 

"Ni e, thudik chu a la langchhuak em em ang. Thil sual ti a inthup reng theih loh. Mawia hian palai rawn tirh a sawi reng a, ka pu ka nin tawh em vangin ka lo remti tawh a,palai hmel inhmu vat ang. Ka awm loh hunah pawh rawngbawl vel i buai loh nan leh thawhhma hi tih ţhanah i neih theih nan zing tin ka kaitho hma che a nih hi. Ka khawngaih ve lutuk tho che nia,mahse ngaiah inei vat mai ang. Rintei a chhuah reng hnu phei hi chuan chau a in tia,rawngbawl a tum tawh si lo va,i kutah engkim a awm ţep tawh a nia" nui ve mahse a mit a thleng zo lo. A hlim tak tak lo tih ka hria a,a nau tak tak ang a a en Sawmpuia leh ka nu a khawngaih vang a nih ka ring. 

"Min kalsan lo la ka ti e"

"Kan inţhen darh hun ala thleng tho tho dawn. An thilsual tih hi a lanchhuah hunah phei chuan an innei duh maithei. Nupui a neih vaih chuan Sawmpuia hi a pa bulah a awm duh dawn lo hrim hrim"

"Keipawn ka duh bik lo. Rri thuhnuaiah ka awm peih tawh lo hrim hrim. Engkimah hniang hnar mah ila Rri thuhnuaia awm ai chuan rethei deuh a Sawmpuia nen chauh a awm pawh ka duh zawk" ka ti ta hmarh hmarh.

"In rethei lovang. Pawisa te hi a khawl ve reng a,nangpawh inren thiam la, hman a mipa lo hruai tu che kha inhruai tir tawh lo la" a nuih zui hak hak laiin ka hrilhhai khawp mai.

"Tu mipa maw? Engtikah?"

"Class i kal ţhin lai khan. Rintein min hrilh alawm" a tih leh takah chuan Timothy kha a nih ka ring. Min hmu tu an awm tih ka hre lo hrim hrim. 

"Ka ţhianpa nih kha. College kal a ngai tawh lo a,kan inkawm tawh ngai lo" ka tih lai mekin ka pa a rawn tho a, thingpui lum turin ka tho vat. Ka ngei lutuk a a hmuh lohah ka tum nasa. Thingpui siamsak pawh ka phur lo lehzual. Patling pui si a la lerh peih hi taimak thlak lutuk. Rri pawh hian a duhtui lo ve hrim hrim. Mi pasal ngaihzawn reng ringawt mai. 

"Rosy in a awm reng i nin deuh leh Sawmpuia dawrah kal ve ţhin la, nupa awmdun tam loh te hi a ţha lo a nia" ka pa in a tih chuan hmui hnuailam ka ti pawrh a,ngawih reng ţha ka tih loh vangin nui sângin ka inher.

"Dawr a a awm hun a tlem zawk a, kan awmdun tam lutuk alawm. Min ngaihtuah duh suh,in a awm hi nuam ka ti zawk. Class kal kha ka ning ţhin fe zawk" uar fe hian ka ti a.

"Tih tur a awm chuang lo va, dawr a i kal ve chuan Sawmpuia pawhin nuam a ti sawt dawn a sin" 

"Nia lokal ve daih rawh" a rawn ti thum chhur. A sam a ther fur a, hmelţha ve thawkhat lo sela chuan a zing tho hlim hi a hmuh tlak bik lo tawp ang. A mawl ropui si,in a ka awm chuan an duh ang a an awm theih dawn loh nen,ka pa thusawi a rawn ţawmpui daih a,a la phur em em mai lehnghal.

"Ka peih lo. I dawr a tih tur nei miah lo va awm kha ka peih lo nasa. Wallpaper lei rawh,pindan chhung bangah ka bel dawn. Min pui turin Sammy ka sawm mai ang" ka ti zat zat. 

"Engtikah?"

"Vawiinah. Chaw eikhamah dawr a i kal hmain lei dun zuai ang" ka ti a,min hnar thei lo ta reng reng chuan "aw" min pawh hma khawp mai. Tihfuh inti fahranin ka khi suk suk a,nuih rik ngam lah a ni der si lo. Ka la phawk dawn khawp alawm. 

"Vawiin kher i tia,Sammy a hman dawn mi?" ka thawmhnaw ka thlak zo vek tawh. Inchei peih lo mah ila mutkawr nen chiah a kal ka duh bik lo.

"Inchei hlarh hlarh bak tih tur a nei lo" 

"Bel ngai ka ti vak lo. Rawng kan hnawihna ala rei lo va" muangchang a tih pahin a enkual a, ala nalh vek. Mahse ka duh tho tho.

"A rawng hi ka duh hleinem. Kan pindan a nia,ka duh angin ka chei ve ang chu" ka ti hmak tawh,tih ngaihna vak a hre leh chuang lo vang. Nitin tlem tlem a bel ka duh. Dawr a zui ka tum lo bur, min hring tu pa ngei thu pawh ka awih lo ngam a, ka pa tak pawh ni lo, zahawm bawk si lo thu mai mai ka awih peih lo. Ka theih chhung chu ka hnial dawn. Sawmpuia erawh a pa tak a nia,haw viau mahse a hmangaih dawn tho tho. 

"Aw i thu ber. Kal ang"

"I thinrim a mi?" tum burin ka melh hraw a,thinrim ka cho at laiin a nui hawk thung.

"Ka hnial hma hauh che in i chak zawk ka tihna ang a nih kha. Kal ang le Bawihi" a tih chuan ka thaw hawk a, nui duh lo mah ila a ruk chuan ka lawm tho. 

"I sam a buk mah mah ţep tawh. Vawiinah tlem met rawh mahse ti kawlh miah suh ang che" tih pahin a sam ka khawih a, uluk deuh a a siam ve thlap tawh kha ka tuai nawn leh. Ka kawngah a lo hmer a, kan chhuah dawn ţepah pawh a nupui duhtak hi nilenga a awm nawm nan min fawh a theihnghilh lo. Kan la naupangin kan inneihna ala rei lo bawk a,kan la in duat hliau hliau khawp mai. Hetiang reng hi ni thei se la ka duh ber. Mipa dang ka mamawh tawh lo rapthlak.

Sammy a lokal chuan a ri hluai a,a rimtui leh chem chem tawh. 

"Awii a sang lai hi engtin nge kan bel ang a,chair ah ding kang mah ila a la sang tho tho. Min tih tir leh awm sia ka ring ka herh ang e aw" a phunnawi nghal char char a,a enkual a a huphurh em em ringawt. 

"I sang zawk alawm. Vawiinah chuan a sang lai kan ti phawt ang. I dinna chair ka lo dawm sak ang che"

"Nidangah kan la ti dawn maw? A zat ve ka tia nga,a zat ve dang i ti ve ang. Mawl hle si hian mahni tan a ţha tur hi i hre zet zawt lutuk" theihpatawpin vin ve mahse uite naute chik ngher ngher angah bak ka ngai lo. 

"Ka hrilh tawh che kha,mi mo ka nia,hei kher lo hi tih tur ka ngah. Kan inneih hlim ang kha a ni tawh lo. Class kal ziah a ngaih loh hnu hi chuan engkim zawng zawng ka ti vek tawh" tiin ka lo hnial a,ka tlawm duh bik lo. Ni hnih liam ta vel khan darthlalang ka nawt a,a tam si,tha pui thawh a nawt ka ni bawk a ka ban ka ti che ţha ngam lo reng. 

"Ka khawngaih ve tho che sia mahse phar harh a dah vah hi khumah lo chuan ka peih vak lo asin" nui har har chung a a tih chuan ka ten kher mai. Ka ţhianpa mah nise hetiang a sawi hi chuan ka ten tlat zel. A mipat pui bak a mitthla leh awm tawp si lo. 

"I tenawm. I ngaihtuahna hi chu hria se mipa pangngai ho hi chuan an vawhlum duh ang che" 

"Ka uang anih kha, khumah tunge phar harh a dak kher ngai? I lo inngaihbel a ni maw? Engtin tak nge i awm ve ţhin a" hmui hup a a nuih ker ker laiin a hnungzangah ka chum pawp. A ka aţangin eng ri emaw a rawn chhuak a,a er zui ngang ngang. 

"A na viau ang,ka tihpalh aw. Khati em em a chum nat che kha ka tum lo. A chang chuan i ţawng thui mah mah zel anih kha" ka ti a,thupha chawi chungin ka dem tel tho. Min la chhan duh loh vangin a hnungzangah ka tuaisak a, a khat tawkin 'ka tihpalh' ka ti deuh reng. Vanneihthlak takin a hnang lo hlauh.

"Min beng mai la,min chum kher zel suh"

"Tihpalh ka tih tawh kha. Fa ka neih veleh a hming kan koh duat dan tur i phuah dawn nia" ti a ka thlem laiin ka ban a lo man bet a,a paih sawk.

"A hming pangngai tu nge phuah dawn?"

"Puitlingin an phuah ang chu. Kan koh duat dan tur i phuah ngei ngei dawn nia"

"I rai a mi?" tiin min zawt a,ka ngawi ve ta daih thung. Thu lawmawm ngaihthlak a beisei tih hriat zet hian min en a, inthlahrung deuhin "Rai lo" ka ti sep. Beidawng zet hian a thaw halh.

"Lungngai suh ka rai ve mai ang"

"Nia han dawh fan fan phawt la" a ze ngai a chhuah leh takah chuan a dinna tur zawnah chair ka dawh sawk sawk a, pawnchhia ka hmehbel chawt chawt bawk.

"Ngaihtuahna bawlhhlawh pu hman lek lo khan han ti tak tak teh"

"Ka nawhfai tur bawlhhlawh zia khi. Hmun tinah hian bawlhhlawh tlem a zawng a awm ziah mai. Hriatna a lut lo chi zia zang a ni lo" a ti leh hram a,ka chum leh hlauin chairah a lawn zui sawk sawk. Ti hian hnathawk ang a lang reng chungin ka pa chevel ka enthla pah reng mai dawn ni. A duh dan angin ka awm dawn lo reng reng.

(Inchhung remdan kan thlak a,ka buai nileng. Zan dang aiin a tawi aw,dah hram ka duh sia, tawi te ka lo dah hram😂)

CONT...