DUMB AND DUMBER-12

 

DUMB AND DUMBER-12

SAWMPUIA 

"Ipa hlawh hi i khawih pui em?" ka dawr a Rintei awm lai laiin ka pa te office a thawk ve a rawn leng lut hlawl. Hetiang thil hi Rintei hriat ve ka duh lem lo. 

"Nu Maram, ka dawr thlang deuhah hian eitur an siamtui thei a sin. Lokal rawh i lo len ve manah ka leisak ang che" langsar vak lo vin Rintei ka melh zawk a,a hrethiam em em tho. 

"Nia nilengin office ah ka buai a thil ei hman pawn ka khawsa lo. I sawi takah chuan ril a ţam alawm,kal ila" tih leh din a rual a, Rintei hnen a lo awm rih tur a ka hrilh hnuah kan inzui chhuak a, ti ti na hmun rem ber tur anih vangin kan kawmthlang dawr chu kan pan ta tho a,haw a hun dawn tawh a,thil eivak a chakawm tawh lem lo. Engmah ei loh aiah a in chi kan chah ve a, Nu Marami hi ka pa leh Rri awmdan min hrilh hre tu kha a ni. 

"I pa hlawh hi i hmuhpui ţhin em?" a ti nawn leh a, hriat eng eng emaw a nei leh ni ngei tur a ni min hmu tur a a rawnkal vang vang danah.

"Aih pawisa pawh ka dil ngai lo. A hlawh ka mamawh hleinem"

"A ngaihzawng ni a ka sawi Rini kha office ah perfume man to chi ka zuar e a tia a rawnkal ţhin a,ipa nen an indawr ziah. Perfume man chauh lo pawh a pek ţeuh ka ring tlat. Mahse innu te hi an khawsa thei a ni law mi?" a ti a,a inngaihtuah nasat hmel khawp mai. 

"Aw an pangngai ve chuan ka hria. Ka nu leh pate min neihtir a nia, Rosy lah hian a nu leh pate hi a thlahlel ve bawk nen,an chanchin chiangkuangin ka hre lo" 

"Mi hian thil an hretheiin an sawi peih a,tun a an pa pawh hi a pawisa vang chauh a nei a nih thu thlengin an sawi leh tawh a, pasal hausa nei chung a perfume a zawrh kual reng peih ka ring lo. Kan office ah bak a zuar lovang. Ipa bula a awm rei deuh lah hian 'chhungkhat kan ni tawh a,fanu leh fapa kan inţawm tawh a,fate chanchin ringawt pawh hi sawi tur a tam ţhin' tiin kan hnen thleng hian a rawn sawi ţhin a,tuman kan lo awihsak lem hlei lo va. A chhuanlam a ho ţhin em a,tu rin mah a hlawh lo. Kan office phei chu hmeichhia kan tam a, mi chanchin sawi kan peih tlang a,ipa leh Rini chungchang hi an sawi nasa thei khawp mai" a ti a, en liam harsa tak chi thil a thlen chuan buai chung chung pawn min rawn hmu ngei ngei. Lo dawnsawn dan ka thiam ţhin lo va,tun a a thusawi pawh hi engtia dawnsawn chi nge ka hre chuang lo. Min ţhawng lo va,ka thin a rim lo. Ka nu ka khawngaih takzet a, mahse thil dang a awm thei lo. Ka rinlawk dan ang vek a thil a thlen vang a ni pakhat ang mak tihna ka nei tawh lo. 

"An mawl kan ti vek. In inneih hma lahin chhungkhatah kan insiam dawn an tia,in han innei a chhungkhat kan nia an ti leh a, rinhlelh an kai ring miah lo hian langsar deuhin an inhmu reng a,hmeichhia zawk a zak lo si,mipa lahin a lo hnar thei si lo. Ka thawhpuite hian mimal takin hreve che sela chuan ka hrilh ang chiah che hian an hrilh ve ang che" a ti hmarh hmarh. A thinrim khawp mai,nu ang chiah a ka entheih min duhsak tu ka nei hi ka vannei takzet. 

"Eng tia tih chi nge niang?"

"Ipi leh pu te an la dam a,thil awmdan ka hrilh ringawt che a,inrawlh thuk ve ka duh lo. In awm zel dan tur chu chhungkuain sawikhawm rawh u. I mit ngeiin hmu ve lo mahla an awmdan ka thlir hian a chiang tawk viau. Finfiahna an zawh che pawn ka hming hi sawilang hreh suh" 

"I hlau lo mi? I hna in a tuar ang e?"

"Ipa in ka hna chungchangah tih theih a nei lo. Kan dikna ah hlauhawm a awm lo. Inu thihna kum khat em pawh ala ni lo va,a khawngaihthlak emai,tih dan i ngaihtuah vat dawn nia. Ipu ten min hmuh duh kher leh min lo hriattir la,ka lokal zel ang" sana a bih pah deuh reng vangin a hmanhmawh tawh anih ka ring. Kan thil chah man ka pe a, thlah ka tumin a duh tlat lo. Min hnial ţang ţang a,ka phallo chungin taxi in a haw lui.

"Iva rei ve. I dawr hi ngaihsak ve ta che" 

"I awm tho a, haw dawn hnai ila" tum bar chungin a tho ţuah ţuah.

"Hei min lo xerox lawk" mi pahnih an rawn lut a, Rinte in ning tawh viau mahse ka tihsak ta tho. Pawisa tlem lo lut pawh a hlu. Ka tihsak zui mawlh mawlh a,anni pawh an ti ti ve reng. Party leh picnic tih vel an sawi deuh ber a,pawisa thawh khawm a zu lak thlengin an sawi. Ka hrephak tih an hre dawn sa a,ka hriat pawi an ti lo a nih ka ring,nui ruh ruh chungin ka ngaithla. Ngaihthlak a nuam phian a,duh aiin ka zo hma. Pawisa min pek pahin hmeichhia zawk chuan lawmthu min hrilh luam. A rui deuh tawh a nih hmel.

"Mipa zawk khan Rosy a rawn hruai ţhin" an kal rual a Rintei thusawi chu mak ka ti khawp mai. 

"Sammy bak ţhian a neih ka hre lo"

"Ka hmu ţhin. In a ka awm tam lai khan ka hmuziah lawm. A hmasa ber niah chuan phone a hmang reng a,kan in awmna a sawi nasa. Inleng a nei dawn maw ka tia mahse a inchei tho sia. Dawr kal tur a i chhuah veleh an inbia lawm. In pindan kawng in khar loh chuan ţawng lawng lawng chu a hriat ve em hi. Ka ngaithla ru pah deuh bawk a, hlauthawng suh khami ţum bak kha mi thusawi ngaihthlak ruk ka nei lo" min rawn en in lei a chhuah zeuh a,a hawisan leh rang kher mai. 

"Vawi engzat nge i hmuh a?"

"Rosy aia i kal hma apiangin a ni mai. In a ka awm tam lai a ni bawk sia,ka hmu lo thei lova,a ni lahin kan inbul kherah a rawn nghak ţhin bawk sia. A chang leh Rosy aiin ka lo hmu hmasa a" nui hak hak chung hian a ti leh.

"Rosy in i hmu tih a hria em?"

"Hre nang. Ka bih zawk a tui tawk a tv en angin tv hnaih tawkah ka ţhu leh daih zel" 

"Ka lo zawtfiah dawn nia. I hman tawh em?" ti a kal mai ka tum chu ka kawrah nghet zetin a pawt a, "Ka sawi tih hrilh miah suh" hlauhthawn hmel tak hian a ti a,ka hrethiam lo letling khawp mai. 

"Ka kal hnuah nang leh U Biaktei te nen chiah in awm ţhin a,sawi lo mah ila a hre tho ang chu"

"Zawh kher a ngai lo. Class a kal tawh ngai chuang lo va,inah leng dawn pawh nise U Biaktei a awm ve tlat a,nunhlui chu nunhlui ania,tikhan hre tawp la i rilru pe lutuk lo mai rawh" a ti zat zat. Nu Marami thusawi kha hrerengin "Kan dik naah hlauhawm a awm lo" ka ti ve ngat. A awmdan cheng chung hian ngaih a ti ţha lo. 

"A kawlh em hi. Ka duhsak vangin ka hrilh che a,i fimkhur nan ka tia,inu ang a awm turin ka duh hleinem che. Ipa chiah a hmangaih a,a duh tlat a,a rilru a nat reng kha. Tiang khan i awm ve mai tur sin. Ka hming i hrilh chuan dawt sawiah min puh ang a min lim nek ang" 

"Ka nu ang ka ni ve dawn lo. Ka ring vak lo bawk che. Ka lo zawtfiah phawt ang"

"I mak ţalh ţalh. Hrilh man i awm lo emai hmeichhia ang mai. Ngawi reng a inven tawp kha a har viau a mi?" a ti vin tâk tawh. Thinchhia hlir hian min hual vel a,hahthlak.

"Ka nupui a nia,a chhan sawi lova ka inlak hran tawpin a dik nang. Sawipui miah lova tihtauh ve tawp chu a hmeichhia ka ti daih zawk. Hlau duh suh ka chhan ang che" a darah ka hmer zawk a,ka chhuah hnu chuan duhthlan tur dang nei lo,khar hnan a hlau ve tho sia phur lo tawkin a rawn chhuak ve hna hna. 

"I sawi vaih chuan i chak lo khawp ang" inchhung luh dawn thlengin min la vau.

"Dawt i sawi a ni lo maw?" tiin ka zawt hial.

"Teuh lo,amah khan dawt a sawi zawk ang. Min lo hruai lo a atih chuan dawt a sawi ni mai" 

"College a a ţhian a nih dawn chu. Ngaihţha deuhin awm rawh,midang kawp chu nise tun thleng thlengin a inthup thei lo vang" ka ti a,ka ngaihdan hi a dik chiah ang. Midang reitak bum tur chuan rilru neih ve deuh a ngai. Pasal te ngat phei chu bum harsa deuh tur a sin, Rri ang anih ngawt loh chuan.

Inchhung ka luh rualin ka hawikual a,Rosy ka hmu lo. 

"Rawng ka bawl tir. Lo kal rawh inkawm lawk ang" U Biaktei awmdan teh thut chu. A pindanah min hruai a, khum a ka ţhut veleh stool a la sawk sawk a,ka hmaah nui sângin a ţhu. Thu lawmawm a ni phawt ang. 

"Hrilh che ka duh na a rei tawh a,ka hrilh ngam lawk lo che a, Rosy chu ka hrilh tawh. Keimah ngeiin hrilh che ka duh vangin Rosy hnenah zep rih turin ka tia" a ti a,a hawikual leh te te phawt. Ka lo ngaichang ran a, ka nghakhlel viau na a ka tur duh lo. Rei tawk a ngawih hnuah "Pasal ka nei dawn" a ti a, vawiin a ka thu hriat zing a min ţhawng ber tu a ni.

"A ngai lo"

"Deuh teh tawp che chuan" a nuih a za khawp mai.

"Ka ti tak tak. Pasal la nei suh,ka la phal lo" naupangchhia pawh min ti se pawi ka ti lo. U Biaktei a awm loh chuan a khawharthlak lehzual ang.

"Rosy a awm tawh a,i mal dawn hleinem. Min en ta che ka upat tawh em hi Malsawmpui,ka tar thleng a pasal nei lo turin min duh mi?"

"Kei aipawn ila naupan hmel zawk. I lang upa thei hleinem. I tar thleng a nei lo tur chuan ka ti lo che a,mahse tunah rih chuan la nei rih suh" 

"Ka upa zel ang a min enkawl tu ka mamawh ve dawn asin. Tunlah la upa lutuk lo mah ila ka la upa dawn tho a, chutih hunah chuan tunge min enkawl ang? Ka nu a awm tawh loh hi" a ti a, boruak a uap churhin ka hre mai. 

"Enkawl tu ringawt ai mahin hmangaih tu che nei la ka ti. Pu Mawia kha anih chuan a fel a,a hmangaih ang che mahse fa a nei tawh a,nakinah buaina innei a ngem? A lo fel viau a,nu ang tak tak a a en che anih chuan a ţha. In buaina thlen tu a nih a, Pu Mawia'n nang aia a fa a thlang anih chuan ka awm reng dawn tho a,chutiang sawi duah ala ngai lo. Khuarei thil a la ni rih,mahse kum khat tal min la awmpui la" ka la ti fan. Mahni hma ka sial a,a duh naah ka kal tir thei lo. Mahse ka nu in min hmangaih ang a min hmangaihtu awmchhun a ni a,kum khat tal la chelh rih ka duh. 

"Mawla nangmag leh nangmah i inhnial vak vak ringawt a,bakah Pu Mawia ti kher zel suh ka tih kha,a upat hmel vek. Ka tar hun a min enkawl tu tur an awm loh leh tar chawmna te ka pan tawh nga ni mai lawm" a nui na a a mittui a tling pam. Inhmachhawn a ţhu kan nia,kan inhnaih bawk nen thup a tum viau chungin ka hmuh hmaih lo kher mai.

"I tar hun kher a ngai hleinem. I la tar loh pawn ka chawm char char ang che. Pasal ineih hunah pawh hna hahthlak deuh deuh thawk suh"

"I phal tawh tihna mi? I phal hun hunah palai lo tirh a duh a" lu ka thing a,chhan ngaihna vak ka hre tawh lo. 

"Rosy leh Rintei an awm hi"

"Nangmah an ni hleinem. U Biakte vawiinah Nu Marami a rawnkal a"

"Eng nge a sawi?" a lo ti vat a,a ngaihven khawp mai. 

"Rri leh ka pa hi an inngaizawng a, Rri hi ka pa te office ah a kal ţhin a ni awm e"

"Tu nge Rri chu?"

"Rosy Nu,a hming lem min hrilh hi ka lo hmang leh ţhin" thawveng zet a a nuhrawn min lem min hrilh phawr phawr ni kha ka la hre ruai ruai,kan la innel loh nen. Ka thil ngaihtuah avang chuan ka nuichhuak ta hawk a,hun hi a kal chak khawp mai. 

"Midang a lo kawp leh hman emaw ka ti lawm. Engtia tih nge i tum?"

"Ka hre lo. An hmuh phak loh a awm a chakawm i ti ve em? Kan inzawmna hi chhu chat se,mi hrang angin awm law law ila" 

"Eng thil pawh ti se ipa a nihna a bo dawn lo hrim hrim. Ipa hi engtia awm zel nge a tum le aw" a ti vang vang a, ka ngaihdan chiah. A lang chhuak ţan der tawh a,eng tin nge a tih zel ang? 

"Chhuak phawt teh ang,ipa chanchin sawi chuan thaw a pik duh emai. A hmeichhia hian a pawisa chiah a duh ang. A hrethiam der si lo. Ka rin aiin a lo â daih. A thawhpuite pawn tuman an zah tawh nang" a tih bawrh bawrh laiin kawngkhar an rawn kik a, ka pa a nih ka ring. Chhungkua ve si a rukin kan inenthla fur. 

"Chaw ei hun tawhah eng nga ti nge in tawm reng? Biakte, Sawmpuia rawn haw a nupui pawh a hmuh hma in i lo kheuh hrang a, Rosy a hrilhhai ang a sin" a rawn ti khur khur. Rin lawk ang ngeiin ka pa ngei a ni. Ka tho nalh a, ka chhuah dawn a kal pelh pahin "Rini perfume zawrh chu ava rimtui ve" ka ti a,a tawlh hrut. Hahdam deuhin awm tawh bik suh se. 

"U Biaktei nen khan eng nge in sawi? Finfiahna inei tawh mi? Ka theih tawp a ka enthlak ve pawn engmah ka hreve thei lo reng reng" ka inthlak laiin a tei kual sek. Mit a hmuh phawt a thil hrethiam chauh ţhin tan chuan a har ve bawk ang. 

"Nei vek tawh" ka thil hriat ang ang ka hrilh chhawng veleh. 

"Chu chu maw U Biaktei nen in sawi? Thil dang a hrilh che em? Tlem a ti hnual thei tu che?" 

"Pasal leh palai tih angreng a nih chuan hrilh e" 

"Chumi kher lo pawh chu" zawi sep hian a ti leh a,ka bo tawh takzet.

"Eng thil nge?"

"Rri leh ipa an pindan aţanga an chhuak a hmuh vel kha" lehzel chuan. An kal thui sawt khawp mai. 

"Hrilh lo. Chhuak tawh rawh ka inbual zawhah ka rawn chhuak ve ang" 

"I rilru a hah leh tawh chiang. U Biaktei vang a ni hrim hrim. Naupangchhia emai, rawn haw tlai tawh nak laiin ila ngui bur zui a, pindan chhung bungkua ka rem danglam te hi i hmu miah na nge?" a danglam vek tak tak a,ka thawmhnaw hak tur pawh khumah a lo awm thlap tak e. Ngaihtuah ka lo ngah deuh a ni. 

"Dawr ka khar har a, vawiin chu ka chau deuh"

"Mawl emai,midang thil tih fak nachang pawh hre lo. Naupang pawh inih tawh loh kha,U Biaktei pasal neih dawn vang mai mai a khatianga awm a ngai a mi? Naktukah a ngai ang chiahin ka dah leh nga ka siamţha tawh miah lovang" a ti zui bawrh bawrh. Vawiin hian thu lawmawm ka hre tlem khawp mai. A vai a remkhawm vek dan lah ka la hre lo. Ka inbengdai hram hram zawk a ni.

"Ka tan U Biaktei mai mai a ni ve lo. A hlutna i hriat tawh kha. Kal tawh rawh"

"I mawl tho tho. Inţhen hlau hle si mi fakn der nachang takngial pawh i hre lo. Min fak chu sawi loh,ka sawi hma chuan hmuh pawh i hmu lo nia. Eng berin nge hetiang a awmtir che a?"

"Nang ve hi? Engin nge i thin ti rim? Ka chauh thu ka hrilh hnuah che min demna tur ila zawng char char a,eng ber nge i huat?"

"I mawl lutuk hi ninawm. Inţhen i hlauh viau te chuan min ngaihsak la min hlut ve ta che" a ti vin hlar a, zawk za mah hian.

"Ka ngaihsak lo ngai lo che"

"Ngaihsak lo niang ka thil tih i hmu thei ve lo emai. I lo haw aţangin biak theih lohin i awm char char a,ka biak ve che leh min chhang hmuk hmuk a,ka chau iti leh daih a,nidangah tun aia ilo haw tlai pawn i chau ngai lo" 

"Min hriatthiam tum lo vin ka ngaihsakna chiah i phut anih dawn chu" inthlak zo chiah mah ila bike chahbi leh helmet ka la a,ka inkhalh chhuak lehnghal. Min en ha hlawm a,tuman min dang lo. Kalna tur ber ka hre lo va, ka ţhianpa ber Bza ka pan chawt. Inchhung ah ka awm peih rih lo. Ka inthununna hlohin ka thinrimna ka bengdai zo lo vang tih ka hlau a ni. Buai angin awm duh lo mah ila thil thleng zawng zawng hian rilru a tibuai angreng khawp mai.

CONT