DUMB AND DUMBER-13

DUMB AND DUMBER-13

"Khaw nge nizanah i kal daih a, min ti mangang alawm. Zan rei tawk thleng ka nghak che a,ka mutthilh hnuah tho i lo haw a" ka ti tan tan. Zingah lah ka thawh hmain a tho a,hauh hun hi ka nghakhlel lutuk tawh. A nui ruh ruh a,ka thinrim a ti zual. 

"Chu min lo ngai a ni maw?"

"Ka ngai lo che. Nangmah chiah i inngaihtuah a nih kha,ilo haw nawm nan engkim ka lo ti ve a" ka tum zui bar. Ka lawm loh zia hre ve reng reng teh se. Ka thil tih ţhat pawh a hmu ve thei hleinem. 

"Class i kal laia lo hruai ţhin tu che niminah dawrah a lokal a" a tih takah chuan ka melh ralh a,tu tak ni maw?

"Sammy maw?"

"Ni lo. A hming ka hre lo. I ţhian tho chu anih hmel" Sammy lo min hruai tu chu Timothy, chupawh nikhat chiah. 

"Timothy a nih chu. Nikhat kha chu min lo hruai a,kan veng hi a kal pel dawn tho a,ka kal tawh leh tawh loh min rawn zawt a,ka la kal bik loh vangin min rawn lam kawi. A hrilh che mi?" dawt tlem belhin ka hrilhfiah. Ka duh ţhin tih kha chu ka hrilh duh lo nasa,a duh ţhin tu nih pawh ka zak tawh bakah a thik veleh khanglang ang a.

"Nikhat chauh maw?"

"Ni e. Nikhat bak bak a ngai a mi? Sammy a awm reng alawm. A hrilh che mi ka tih chu?" a hma aia vin zawkin ka ti leh. 

"Hrilh lo e"

"Engtin nge i hriat?"

"Ka hre ve tawp. Khawnge ka kawr hak tur kha?" ka zawh zui loh nan a kawr hak tur a hak daih tawh si chu a zawng kual ruai. Khum a thawmhnaw pho tur awm ho a hai lai mekin a kawrah ka lo pawt lawp.

"I hak daih tawh hi. Ka zawhna pehhel tum lo mai teh. Tu nge hrilh che? Khami ni khan U Biaktei ala biak tlak loh a,a pindan pawnah takngial pawh kan kal ngam lo a,Rintei chiah a awm ve. Rintei a ni em?" khami ni kha ka chhuilet leh pawhin Rintei bak rinhlelh tur a awm lo. Ka pa a kal daih tawh a,kan pahnih chauhin kan awm. 

"Ni lo"

"Nih leh engtin nge i hriat theih?"

"Ka hmu che u. Ka kal dawn, min ngaih viau tak leh chhunah i lokal mai dawn nia, eitur ka lo leisak ang che" zung zung chuan. 

"Ka ngai hlawl lo vang che. Mihring dawheh ka ngai peih lo. Kan inah ka kal daih dawn?"

"Engti turin?"

"Ka zawhna che kha dik tak a min chhan hma loh chuan ka hrilh bik lo vang che" ka ti lui ve ngat. A thinrim ve lai pawn min ţhen aiin lenchhuah a duh zawk a,min ţhen phal tak tak lo. Ka nu a awm tawh lo a,U Biakte in pasal a nei dawn lehnghal. Keimah bak neih a nei tawh lo. 

"Zep i nei dawn ţan a ni maw? Min duh tak tak pawh ka ring tawh lo" ka ti vel a, rilru buai awlsam leh tih der nuam tak ka pasal chu a rilru a buai leh nuaih nuaih tawh ang.

"Rintei hmuh turin i inhruai tir a,chuan engmaw i va tih dawn?" a ti nghal zat.

"Ka pa hnenah ka nuhrawn enthla turin ka ti dawn. Keiin engmah ka hmuchhuak ve thei si lo va,ka pa talin lo enthla ve rawh se" 

"A lo hau let nghek zawk ang che"

"Ka chhang let ve nghek mai ang. Hlauh ka nei vak hleinem ka pa ngat phei chu. Kal tawh rawh,thudik min hrilh tawh bawk a ka lo tlawh kawi ang che" ka ti ta nge nge. Ka kar thiam bawk a,ka chanchin lo hrilh ru tu pawh ka hre thei ta e.

"Leh lawk,vawi engzat nge a lo hruai a tih?"

"Eng nge awmzia?"

"Rintei chuan vawi engzat nge ka ţhianpa chuan min lo hruai ang a a sawi mawla? I thluak kha eng nga tan nge itih?" ka ti a, hman a min tihdan kha ka la hre ve reng miau a. 

"A zat a hre lo. Nang aia ka chhuah hmasak apiangin" ka nui hak. A chak lo khawp ang, fel hmel deuhin a awm vel a,dawt hlir a lo hrilh. 

"A kareh zim zim nen a va ţawng tam ve. A thil sawi engmah lo awih tawh suh. Dawt a nih chu a sawi. Khapa kha a lokal leh chuan iduh leh i lo zawt dawn nia, vawikhat bak min lo hruai lo"

"Awle,ka ring che. Min rawn tlawh kawi rawh aw" min rawn hnaih deuh a,a tihtur hria in ka lo fawp hmasa,nuam a ti sin aw. Tunah chuan zahpah vak ka nei tawh lo. Ka pasal hi kei aia hrechiang an awm tawh kher lo vang. 

"I va dawheh ve a" Rintei chu a chhuah hmain ka hmu hman hlauh. 

"Ringawt che hian. Eng dawt nge ka sawi?" a ti pawr ve chhar. Min hlau ru tih erawh ka hria. 

"Sawmpuia chhuah hmasak zawk apiangin nimin a in hmuh pa khan min lo hruai ţhin maw? Nikhat chiah a nih kha min rawn hruai chupawh a remchan em vangin. Zet zawt che hian,hmelţhat vak loh hi chuan rilru tal tih ţhat tur. Nga ti nge chutiang a i lo sawi hrim hrim? Sawmpuia hi i ngaizawng a ni lo maw?" ka melh kar laiin a ni chu a meng kual rulh rulh,vai phakar zet te pawh a ang.

"Teuh lo mai. Ka unaupa a nia,eng tin nge ka ngaihzawn theih ang? I duh duh a i chaih kual hi ka hne"

"Lehkhachaih lo chu ka chaih ngai lo. Ka chaih emaw iti mai mai anih kha. Ka nu biral hnuah i rawn awm ve chauh a,Sawmpuia rilru ţhatna leh a felna chiah i hmuthei a,a tan a ka thil tih engmah i hreve lo anih kha. I unaupa pawh nise nupui a nei tawh a,thil dangah i inrawlh anih pawn kan nupa inkarah lehzel chuan lo inrawlh tawh suh ang che" ka ti salh salh a, a sawitur hre lo chu mitmu tiat vel lekin a ang. A ang zim lui pawh a nilo a hmui a tawi ve hrim hrim. A chip te hi a chip chiang bik ania.

"Rosy eng nge ni bawrh bawrh?"

"Misualnu ka hau a nih hi. Kei lehzel hi chuan misualnu hi ka hlau ve peih lo hrim hrim. Misualte thangah awh ka tum lo. Lo inrawlh duh suh U Biakte, kan nupa kar a inrawlh tum hi chu a tawp thlengin ka nawr nawk nawk zel dawn" ti a U Biaktei ka hrilh hnuah Rintei awm a kawh pahin "Lo inrawlh tawh miah suh. Ka pasal a nia nang aiin ka kar thiam zawk a nia aw. Nikhat min lo hruai kha chu hrilh la ka hrethiam dawt a ni lova, vawi tam tak min lo hruai ang a i sawi kher kher kha chu ka hrethiam thei hlawl lo. U Biaktei hnenah pawh i sawi a,engahmah ka ngai lo. Duh aiin i ţawng peih mah mah" ka ti leh a, ka dikna ka hrechiang bawk a hlau lo salh salh tak ka ni. 

"In nupa inkarah ka lo inrawlh hman lo. Nangni lo buaipui tur ka ngah lutuk. I sawi uar anih kha. Sawmpuia hian i eng lai nge a duh ka hre nek lo ve. Infiamnan bak i hmang lo"

"Engkim a duh. Keimah ka induhna ai mahin Sawmpuia min duhna hi a nasa zawk. Thil eng emaw ilo sawi leh anih pawn ka hre leh tho dawn nia,ngawi hmak tawh ang che. Thil ţha lo ka hre leh anih chuan ka phin darh vek tawh ang che. I chhungte thlengin ka hrilh vek tawh ang. Ka duh chuan ka ţawng thei tehmai nia,chanchinbu thlengin ka chhuah tir chuai chuai duh mai ang. Infiamnan mai mai ka hmang lo. Ka duh lutuk hi ka la ei zo vek ang tih a hlauhawm zawk. A sam zai thleng hian ka chhiar chhuak vek tawh ania,fimkhur ang che. Rini tih ka hriat pahnih hi insual ruai. Rin Ramhuaii 2 inih hi" ka ti fiamthu vel mai mai tawh. 

"I chhe emai a" a tih sep hnuah min nek pawp a,a chhuak nul nul.

"I chhe fe,i hang paw phuk lehnghal,Sawmpuia unaunu pawh i ang lo" tiin ka au zui a,ka naupangchhia palh leh ţhin. Inhauh hi chuan naupanchhiatna a chhuak thut zel. U Biakte nuih a za em em mai lehnghal a. 

"Engtin chiah maw a lo sawi a?"

"Sawmpuia chhuah hmasak zawk chang apianga mipa dangin min lo hruai ţhin angin a sawi a,zep zuap hian. Chinese ho mit tiat lek kâ a nei a,thil ţhalo sawi nan a la hmang zui. Ţhui pin a harsat dawn loh tehreng nen" ka ti bawrh bawrh a, ka ngei ve thlawt. Kan nihna lo ang a min sawi hi chuan tupawn kan haw vek,kei hian ka haw bik. Timothy hriatchhuah duh tawh loh nak laiin loh theih loh a hriatchhuah leh a ngai ringawt pawh hian ka thin a ti rim lehzual. 

"Ngawihsan mai mai rawh. Sawmpuia hian a duh em che a,an inkawmngeih si a a thik a ni mahna. Ngawih hi mifing zia a ni ngai"

"Ka thiamna ngei ngei a ngawih ai chuan mi mawl nih ka duh fe. Dawt a a puh kual mai mai theihin ka awm dawn lo hrim hrim" ka ti a,a puitling zawk bawk a min nuih liam ta vel mai mai. 

Kan inah chuan ka kal ngei a, ka pa a lo ţhu hnur. A thau dan a la ngai reng a, mei a zu khu rum rum. Rri erawh hmuh tur a awm lo.

"Khaw nge ka nuhrawn-i"

"Sawmpuia dawr ka la hmu ve lo a bazar kal pahin ka tlawh kawi ve ang a tia,a chhuak anih kha" ngaihţhat hmel fahran hian a ti a, ka ngei thei ngawt mai. 

"A chhuahna a rei tawh em?"

"Rei tawh e. Inpa dawrah a awm tawh ang. Ka nu tiin ko ve mai rawh ka tih ţhin che kha" a ti leh hnuhnawh.

"Teuh lo. Nu pakhat bak ka nei lo. Bakah kei aia i awrh tur hi ka nu dawn lo hrim hrim. Pa ka nuhrawn-i hian a bum che nia aw" 

"Thu awm lo tak tak rawn sawi tum suh" a ti hmuk. Ka rindan vel a ni. Fing inti viau si hian hmeichhe tereuhte in a bum kual char char. 

"Sawmpuia dawrah a kal teuh lo mai. Kan zawt ang nge" tih pahin phone ka phawrh a,Sawmpuia ka be nghal. Rri chu a dawrah a kal lo tak tak mahse ka pa chuan "A la thleng lo deuh aniang" a ti tlat tho.

"I awih loh viau leh amah kha bia la,ka dik leh dik loh i hremai dawn lawm"

"Biak a ngai lo. Pasal inei bo tawh a,rawn khei reng tawh suh"

"Sawmpuia pa nen an inngaizawng. I awih loh chuan Sawmpuia leh U Biaktei pawh zawt rawh" ka ti chiah chu a kuhva seh mek phel lehlamin min vawm keuh. Thil dang a rawn vawm tel a hlau viau na a a tel lo hlauh. 

"Ţawng lawng lawng suh,hetianga midang puh hi lei chawi theihna a sin. I pasal pa leh i nu lehnghal"

"Ka nuhrawn"

"Lo ngawi rawh. Nasat leh mawl i fawm a, tumah i hlau reng reng lo mai. Sawi awm leh awm loh tal hre rawh. At huai suh. Inu boral hnu a ka hnen a awmchhun inia,i ute aiin ka duhsak zawk che. Ka lawmna tur tal hian awm ve teh"

"Min duhsak ni la ka nuhrawn aiin min dah pawimawh ang chu. Pasal pawh min neih tir tawp nang. Insawithiam duh suh ka ngaidam vek che. Mahse tun a ka rawn sawi hi thudik vek. I lak a ka lungawi lo chung chungin i rilru nat ka hlau a ka rawn hrilh che a nih hi. Zawt nghal tur leh ţhen nghal turin ka ti lo che a,enthla rawh. Sawmpuia hi a pa te office a miin a hrilh ru ţhin a,ka nuhrawni hi an office ah perfume zuar angin a kal ţhin" ka tih chuan a tum ta hmuk a, inngaihtuah harh thuai thuai se ka ti. 

"Perfume chu a kawl ţeuh a,a ţhiannu Puipuii nen an chah a a duh lo lei mai theih turin" a ti ban charh. 

"Dawt an hrilh che nih chu. Sawmpuia pa te office ah a keng ţhin. A chhuanlam a nih kha. Midangin an rinhlelh loh nan keimahni hi chhuanlamah an hmang ţhin a,chuvang chuan alawm Sawmpuia nen min inneih tir. Kan inneih hma khan an inhre daih tawh. Tlawn huam huam che mahse a rukin enthla deuh rawh. I manchhuak thuai mai ang. I zin hlan te hian a leng nasa thei ngawt ang. Ţhenawm te pawn sawitur annei ang ka ring" duhthawh zet hian ka ti a, a ruh labg rawt a hrilh a ngai tawh. A tlai hma hian hrechhuak vat vat se ka ti. 

"Ka lo ngaihven dawn nia,i huat vang hrim hrim a thudik lo min rawn hrilh anih chuan ka lawm lo khawp ang"

"I hriatchhuah hun chuan ila lawm khawp ang. Dawt ringawt sawi turin ka rawnkal peih i ring a mi? Hrim hrimin i thih hnuah in hi tu chanah nge i tih?"

"Thi vat turin min beisei deuh em ni?" a ti a,a nui deuhin ka hria,mahse a insiamţha rang lutuk a ka hmuzuai ringawt.

"Ti lo ve,ka nuhrawni kut a i dah ka hlau. Mi pawn a pawisa vang chauhin a nei an tia, Sawmpuia pa pawh a pawisa vang bawk a kawpah an ngai. Hna chiah ngaihtuah lo la hawi harh ve deuh rawh. Buaipui ngai berin pasal ka nei tawh tho a,hna chiah buaipui lovin hawi harh ve deuh rawh. I chik phawt chuan a danglamna i hre em em ang" tiin ka la hrilh mawlh mawlh reng. A ţhat der na in a hneh leh ka hlau em a ni. 

"Ka ngaihven ang ka tih tawh kha. In hi chu i hmingin ka dah ang chu le. I uten min kalsan pawh a min kalsan ve duh lo tu kha inia,inu vang hrim hrim pawhin i hmingin ka dah ngei ngei ang" 

"Maggie leh Melody te pahnih pawh ngaihtuah tel tho rawh. I bula awm an duh ve reng tho a,an ngai ve tho che. Mahse ka nuhrawni hian a hnawt darh vek alawm. Nang lahin i ţan hlur a" ka ti a,kan unauah chuan ka pa hi ka hlau lo ber reng a ni. Ka nu leh ka unauten a thinrim laia an chhan ţhat ngam loh pawn ka chhang zat zat ngam. 

"Ngaihtuah dawn e. Ka ngaihthah te chuan i nu a lawm nang. Ka fate vek alawm innih. Keichuan inmil deuh a awm tlan vek ka duh a,maggie leh Dy-i te an hel tlat sia,ka chelh ngial pawhin an chhuak lui a,in nuhrawn mah nise ka nupui tho ania,nu ang a in pawm a ngai a"

"Fel se chuan kan pawm em em ang. A fel hlawl lo a,bakah tunah phei chuan nangmah thlengin a phatsan tawh che hi. Sawmpuia leh U Biaktei te nen chuan kan chiang tawh. Mi pawn an sawi sup sup tawh. I hrechhuak thei lo a nih chuan i nep ka ti khawp ang"

"Tan tan che hian. Nang te hi chu i nasa reuh a,inu leh i ute an zaidam nen. I pasal hi dim deuh rawh aw" a ti a,a nui ve hawk hawk. Rri chuan a rilru a kap ve reng tho ang. Kan inhmu khat a min ngai a,a tilang duh lo mai maiah ka ngai.

"Ka ute pahnihin ka nu an chhun a keiin ka chhun thung che tihna a nih chu"

"Thingpui han lum teh. I thingpui lum ka inkhat tawh emai" a tih chuan ka tho vat. Thingpui ka chhuang a,a rukin ka pa chu ka bihthla,a inngaihtuah muk hmel takzet. Min hau nasa ţhin a,haw viau ţhin mah ila ka khawngaih letling tawh zawk. Ka nu a chân tawh a,a nupui pahnihna lahin a bum leh bawk si,a vanduai ve khawp mai. 

Ka pa nen chuan inhawng deuhin kan ti ti a,ka nu diktak chanchin te a sawi ve duah. A inhmeh lo. Thil a sawi tam  ngai lo va, mahse vawiin chu a sawi ve nual. Ka haw dawn pawn kawtlai thlengin min thlah thlap. 

"Rri chu a lokal miah na nge?"

"Kal miah lo" a rem laiah bag ka dah a,chair a ka ţhut hnuah ka tihziah danin ka ngheng ar ar.

"Dawheh lutuk. Ka pa hnenah bazar pahin ka kal dawn a ti ve a" 

"A lo hau che em?"

"A tir chuan a thinrim ţep a mahse hrechiang ka inti ve em a, ngaihven chu a tum ve kha. Midang rintlak deuh te zawt se la,a hre em em ang. Ka duh ber ka chhui chhuak thei ta. Ka hahdam huai mai" ka ti a,ka thawveng huai tak tak. Ka pa hrilh ka huphurh a,ka ngaih ang aiin a lo tuar thiam daih bawk si. A hlimawm ve riau,ka ute pahnih kan in ngeiah ka pa hnenah an awm leh thei vat turah ngai ang.

"Kan chhuichhuah nge i chhuichhuah nge midang chhuichhuah an hrilh hre ve che?"

"I ţawngthei hmeichhia ang mai" tih hlak pahin a banah na vak lo in ka beng. Ka la duh tawk mai lo "I chhaw si,Nu Marami'n hrilh lo che sela chu engmah i hre lo vang. Ngaihţhat loh nachang pawh i hriat tawh loh kha. Awm lo ila chuan i tawp san daih tawh ang" ka tih chhunzawm zat.

"Chhaw min ti ziah. I chhaw ve tho kha" thinrim chuang miah lo hian a ti a,chhaw ka ti ngun lutuk a ngaiah a nei tawh. A nihna a pawm tihna a nih ber chu. 

"Min duh tho lawm. A ho e,mental hospital ah pawh awm ila ka khum bulah i awm ve tho ang" 

"Duh tho e. I dangdai riau a"

"Engti zawngin?" ka lo ti vat. Hmeichhe tan chuan mipa in hmeichhe dang aia kan dangdaih bikna an sawi hian ngaihthlak a nuam thei em a.

"A chhaw zawngin" a ti daih. Thu lawmawm hriat ka inbeisei ve nen. 

"I zei lo emai"

"Ka zei em kha" a nui ruh ruh a,ka ngaihven peih lo. 

"Ka pa nen kan ti ti a,Rri kan rinhlelhna hi a dik a an inţhen anih chuan let leh rih turin min duh a nih hmel" a dar a ka lu awm hle hle lai chu a nam kang lawp a,a lam hawi zawngin ka chair a her. 

"I ute pahnih an let duh a ring tawh lo mi?"

"Aw ka ute hian an haw em a,amah chiah a a awm chuan a khuahar dawn bawk si,pa te na na na chu ka hmangaih lo thei bik si lo va" a hlauthawng hmel ka hmuh chuan ka nui lek lek. 

"Be chhin la i ute chu"

"Ka pa nen kan be vek tawh. An duh lo hrim hrim. An thinrim hlur zawk,Dy-i phei chuan min rawn vin nghek" tiin ka phun sep sep a,ka meng zim lui vel.

"A ţha lawm. I pa berin a mamawh che chuan i duh leh i let leh dawn nia. I let duh phawt chuan ka dang lo vang che" a tih chuan ka phawk ta hra. 

"I phal tak tak maw?"

"Tehreng mai" a ti sam et a,a buai zawk ka ni leh tawh.

"Takzet?"

"Takzet" a ti ve zel mai si. Ka nui lui ta vak a.

"Ka tihder che nih kha"

"Keipawh"

"Eng maw? Min fiam maw?"

"Tu nge mawl zawk ta le?" a nui suk. Ka va han ngei ţhin tak. 

CONT