DUMB AND DUMBER-1

 DUMB AND DUMBER-1

"Kha thil vang mai mai khan maw hetiang hian min tih a?" ka thinrim lutuk chu ka au a ni ber. Ka sa pup pup a, ka pa phen a ka nuhrawn min nuihsawh hmel te chu hmuh hrehawm ka ti. 


"I ţhatna tur zawk a ni. Inngeih tlang takin kan awm ho thei si lova, hei inu hian a ţhian hnaivai nangmah ang tho a nupui neih tir an duh ve tho a hrefu hlauh a, chhungkaw zahawm tak an nia, hrehawm iti lovang" ka pa in a ti nem duai. A va han pa lo tak. Nupui naupang te a nei a, a hlau ve em em ringawt. 


"In la inchhir viau ang. Engtinpawn awm ila min rawn ngaihsak reng reng suh ang che u. I fanu ah pawh min ngai tawh suh" ka awki a ngai reng. Ka la au nghek nghek. Ka aw rawl a hriat rual a mitmu pawng hlawt hlawt chunga kan ţhenawmnu kan in lama rawn tlan phei dawr dawr tur lah ka ngaimawh zo tawh hek lo. 


"Rosy inbeng dai phawt teh. Ţha deuhin sawi ho tlang ila, i tan a ţha lo tur chu ipa ka nih ang hian ka ti hauh lo ang" tih pah a ţhut a tum lai chuan "I ti mek anih hi. Ipa ka ni ti tawh bawk suh" ring zet a ka tih chuan a phut nasat vangin a ding leh zawt. Thinrim hmel zet hian min melh a, a thinthawk a chhuak phut ang tih hlauin ka inher a, ka pindan lamah ka kal tau nghawng nghawng. 


Ka awih thei lo hial zawk. Chhungte chawhmeh siam tuiloh vanga FIR thehluh nghal rum rum duh mai rual lek ka la ni chungin ka chhungten pasal min neih tir an tum. Ka hmelhriat loh nei duh lovin thih tha pawn ţang ila awmzia a awm chuang lovang. Ka pa hmelah khan a lang vek. Ka nuhrawn thu hnial ai chuan inawkhlum mah ila pawi a ti lovang. Dawih de du lutuk. Amah angin thau ve ila chuan ka pawnfen ka fentir duh ngei ang. 


Thinrim zetin ka pindan chhungah ka vei tawn sek. Ka tihfai leh tho tur anih vangin bungrua erawh engmah ka tichhe buai duh ting tang lo. Darthlalang hnek keh chuaihin thi pheng phung mah ila engahmah an ngai tawp nang. Hmeichhe verther zet vangin kan chhungkua kan darh zo tawh a nih hi. Ka unaute lah he inah hian an awm ve peih tawh lo. Ka pi leh pute an fin vek a, a luhlul leh sual berin ka awmchilh lui ngat a, ka tisual ta anih ber hi.


Heng zawng zawng hi kei aia u awrh ka nuhrawn nen kan buai reng vanga rawn irhchhuak a ni. Kan buai naah ţawngka mai nilo tharum nen kan beih dun tak vangin thil ti thei zawk leh ka pa rilru kuai her thei zawk a nihna a lantir ah ka ngai. Ka pa lah hi, ka nuhrawn tirhna anih phawt chuan tual pawh a that duh hial ang. Hmeichhe dang aia a ţhat bikna lah ka hre hek lo. A mitmu lian kel kawl leh a hmui tetakte hmuh tham mang loh te hi a inrem hlawl lo. Ka haw lutuk hian ka hmu chhe zo vek. Ka pa a neihchhan lah a chiang reng. A pawisa duh vang bak a ni lo. Zanthum vel patling pui pui inleng kan nei ţhin a, ngaihpawimawh duh lovin ka mutsan mai zel. An rawn lenchhan chu tunah, engkim ka tello a an rel fel vek hnuah min hrilh ve ta chauh. Ka puak keh lo chauh a ni ber e. 


"Sammy zanin chhuak ang. Kan chhuah loh chuan ka puak keh thei takngial dawn. Ka lum pup pup tawh. Min rawn lam ang che. Kalna tur i hriat hriatah kal tawp teh ang" chhuah harh ka duh vangin ka ţhianpa ber a hming chauh a mipa ka be ta tawp. Ka kut a ka hmai zapin ka thaw hulh hulh. 


"Ava buaithlak, sam colour ka lo tum a, kalna tur te chu hria e, puak hman lo tur khan lo ip tlat la, ka insiam anga ka rawnkal nghal" a rawn ti no duai a, insiam vat se ka duh vangin a ţawng leh hmain ka off hmak. Ka thawmhnaw bawm ka hawng a, scooty a ţhutpui hahdam tur ka thlang. Tawt lutuk hak hi chuan khawng deuh a ţhut awt a awl ţhin a, duh duh dan a inthleh kual pui theih tur ka thlang chhuak. Ka inthlak zui mawlh mawlh a, hmeichhe dang ang bawkin ka hmai ka hnawih leh hliau hliau. Mawi tawk a ka inhriat hnuah ka pindan ka chhuahsan. 


Ka pa in min lo hmuh chuan a ter at. Ve lutuk hian. 
"Laldinpui khawiah nge kal itum leh tak" a lo ti khur khur. A zu in ve zeuh zeuh ţhin leh a thinrim inkawp bawk vangin a sen hlur. Khu vut vut thei hmel a pu. 
"Hmh...highway to hell" ngeiawm thei ang ber hian ka ti ve ngat. Reilote ah pasal ka nei dawn tho alawm. Ka hlau peih vel tawh lo. Ka chhan dan lah khi a hla a ngaihthlak fuh apianga a duh theih zia a sawiziah vangin a huat turin ka tilui. 
"Hmeichhia inih kha i hre lawm ni? Zan a chhuah hlauhawm zia te hi hre ta che. Ho te ah i mualpho der thei asin" 
"Pawi leuh. Nangmahni vangin reilote bak ka nula tawh dawn lo. Chumi hun chhung chu ka chen ve duh a ni mai" tv remote leh ashtray te a rawn thlawh pawp pawp hma in ka chhuak nal nal. An mut hnu ah ka haw leh thak ang a, kut ka tuar lo turah ngai ang. 


"Awii mate ngatinge a? I rawn au pung pung zel a, phone leh beng kan nemchilh tawh ţhin sia bengdar a invaw ri rum rum zel alawm" helmet hlip a no deuh a a kut ţang tih chet vel pahin ka thinrim chhan min zawt. A hnungah ţhuin ka bet rawk rawk a, kan in lam ka melh zawk zawk. 
"I lo thleng har lutuk. Ka pa in min rawn umzui ang tih ka hlauh nak laiin. A biru laiah ka lo ding hram hram. Tlan nghal rawh" dawhthei lo zet hian ka lo ti tuarh. 
"Aw ngawrawh ka helmet kan khum phawt. Hmanhmawh viau si phelh kher lo tur a min tih tur che lawm" a ti duh lek chauh. Ka rin aiin a lo thleng hma a, jail chhung hrehawm lutuk kan chhuahsan thei chu ka thawveng huai mai. 


"Sammy khawnge kalna tur i hriat chu?"
"Mawimawii te inah. A nu leh pate an awm lova, chu chu an lawm dawn niang. Chhunah khan min lo sawm a, ka lo hnar vek tawh a, an in a fal bawk nen ka kal hreh deuh a"
"A ţhat chu. Tlan bo vang vang teh ang. Engkim hi pumpelh vek ka duh. Mangchhia ni awm tak a ni. Khawvel ka hne zia hi aw" ka ti vang vang. Boruak a nuamin van a thiang ruih a, arsi leh thla lah chu an eng zual bik emaw tih mai tur.


"Thih te kha ilo ngaihtuah ange aw. Thih ai chuan a theih chhung chu tawrh sawk sawk mai tur" 
"Pasal min neih tir an tum a, min neih tir an tum ber lah chu ka hre ngai miah lo. Ka nuhrawn remruatna vek. A tan a ţha tur anih vang chauh a min neihtir tum aniang" ka ti a, ka ngaihdan diktak. A tan a ţha tur nilo se min neih tir miah lo ang. Tum fel tak a nei leh ran tawh ang. 
"Laldinpui i fiamthu a sang emai. Lungphu pangngai kara vawikhat rawn phu nasa bik dawrh vang a ka thih vaih chuan accident a ni mai aw" a la ti fiamthu zui. Ka chum pawp a, a eu dawrh. Buaina nasa kan tawk ta em lova. 


"Ka fiamthu lo. Zanriah eikham khan ka hrechiah. Ka pa in min ko a, min hrilhfiah a tum viau na a ka nuhrawn nawrchhuah vek aniang. Kan inngeih lovin kan inhau ve reng bawk nen, min ning tawh a ni mahna" ka ti a, ka inkhawngaih chu ka ţap lek lek. 
"Insualpui kher lo la ţha tur ania, i thinchhe lutuk a, thleng phawt ila kan sawiţha leh dawn nia" a ti a, ka ţhianpa chu ka kuah a, ka rilru a vak kual nasa. Hetiang thil hi mizo ah hian a thleng ve fo tawh. Mi hriat vak loh a thleng hi kan vengah pawh ka hre zeuh zeuh. Inngaizawng ni miah lo chhungte sawirem an awm ve. Mahse ţha ka tih loh zawng tak a ni. Keiphei chuan ka pasal tur takngial pawh ka la hmu miah lo lehnghal. An in hmangaih chawp ţhin tiin an sawi tak na a, ka chhe tih chi tak, en reng reng pawh a phak chuap hmel pu te a lo nih chuan hmangaih chawp har ka ti dawn lutuk tlat. 


Thui tawk kan tlan vang vang hnuah ding dawtin "Kan thleng e" a ti lauh a, ka chhuk chawpchilh nghal. Ka hawikual a, kan awmna hmun chu basketball khelhna hmun a ang. 
"Khawnge an in chu?"
"Ban hian a hliah. Kal ang, i rilru hahna theihnghilh vek khawp khan a awm awm i in ţeuh dawn nia" tih pahin ka banah a kai a, ka tan hian a van hlu ţhin tak. Khawiah pawh awm ila min lo hruai tur a ka tih chuan a lokal zat zat. Ka dinhmun engkim min hriatpuitu a ni a, min pui nasa ţhin. 


Inchhung kan luh hmain Sammy a ding chawt a, a kekawr kawng a vuan. Hrethiam lo fe hian ka lo melh hu. 
"Ngati leh si nge?"
"Ka pangti chawr kan sawh bo lawk. Ka ha tight sia, ka la insiam rem lo" a ti a, a kekawr a sawi kual a, a ten tu tan chuan a tenawm ve khawp ang le. 
"I rawn chhuah hma khan bilh bo hmasa vek ta che"
"Kan tlan thui em kha. Ka ţhut reng peih bik hleinem" a ti a, a duhtawk a a sawh kuah vel hnuah min luhpui chauh. Tuman min lo ngaihsak lo. An ţawng sup sup a, zu rim a nam huam, meizial khu nen. Thar lam deuh a kal tan chuan a hrehawm rih hle. Sammy a bo ta hmak. Ka hawikual hrek hrek a, kawm tur ka hriat mai loh vangin dawhkan bula chair ah chuan tim dai hian ka ţhu. Ka bet lo bawk a ka mawng leh chair a insi mang lo a tih theih. 


"Kha le, in chhungkaw buaina kha ngaihtuah loh tum la" no min pe a, a intur rawn pai ruk chu phawrhin min thlit sak zui zat. Keipawh ka buaina theihnghilh rih tum ran a kal ka ni bawk a ka lo in ve mai. Tui lo ka tih vangin ka uak leh ţhat ţhin. Ka vawikhat in na erawh a ni lova, ka inchhir ziah a, buaina ka neihin ka zawng leh chung zel tho. 
"An thil tih chu sut leh ngaihna a awm tawh miah lo mi? BA kan zo ţep tawh a, chupawh chu an nghak thei lo maw?"
"Thei lo chu anih hi. Ka enthla ve kar ang. Ka nuhrawn hian eng thil nge tih a tum i rin? Ka enthla ang a, ka hriatchhuah veleh ka pa ka hrilh ang. Ka phen a biru chung hian engtia rei nge a duhzawng ang a a tal vel theih kan en dawn nia" tumruh zet chung a ka tih hnuah ka in leh khawlh khawlh a, a tui lo takzet. 


Kan zahtheih loh deuh hnuah midang zingah kan ţhuphei ve a, tuman min lo hnar lo. An zing a awm ţhang ni awm takin min lo be bawrh bawrh thei vek. 
"Khawnge Malsawmpuia hi? A awm ve reng maw tia?" hmeichhe pakhat hian a ti lang lang a, a ring fanin a hawikual nasa. 
"A awm lohna a rei tawh. Apa in nupui neih tir a tum a, fianrialah a mittui a in a niang" nui hawk hawk chung hian a piah a ţhu pa chuan a lo chhang. 
"Ka khawngaih e, hetianga fate han tih, a pa pawh hian a ti mak e, anu lah a damlo nasa sia, ka rap zawk e a(h)" ka bula ţhu nu tereuh te chuan a lo ti ve bawk a, an sawizui ta nak nak. 
"Anu thih hmain an fapa nupui nei lai hmuh tir an duh te pawh a ni mahna, an thil tih chhan hrelo hian midang mak lo tih ve ngawt chi a ni lo"
"Hriat ngai miah loh neihtir chu an ti ve mah mah alawm. Kei ni ila ka duh teuh lo"
"Sawmpuia chu apa in a vau nasa ni lawm ni? Amah lah hian engmah a sawiţha duh mang si lo"
"Sawi reng a nuam bik nang" an ti ti nak nak lai chuan inchhung lum ka tih em vangin a rukin ka chhuak ve ta daih. 


Pawn ka chhuah chiah chuan ka dai huai huai. An ţhianpa an sawi nen chuan kan inang hle mai ka ti rilru a, inngaihtuah neuh neuh chungin an kawtlaiah chuan ka teikual sek. Boruak a dai nuamin ka thil in khan min ti zangkhai bawk a, tlemin ka awm a nuam ta deuh. 


Van lam ka thlir a, tu tan pawh a inang vek. Van a kan hmuh theih chin a inang vek chung hian vanduai leh vannei bik erawh kan lo awm ngei a ni. Mahni chauh a awm chu tih tur vak a awm lo. Luh leh mai tum a ka inher lai takin kil khat a mihring awm ve reng ka hmu. An kawtlai ti eng tur a an eng chhit chuan a chhunpha chang chang chauh a, a lang pha lo lek lek zawk. An ţhianpa an zawn luih luih kha a nih ringin ka pan hnai a, ka bih duk duk laiin a rawn hawi ve chiah. Ka tawlh dawrh a, ka pai chhat chhat, ka tlu ta ngei. Grass an phahna chinah ka tlu a, ka na lutuk lo hlauh. Mahse a zahthlak. Ka tlu tur hmel a lo hmuh phei chuan ka mengphar vel tur hmel phei chu a chhe dawn nasa. 


Ding vatin ka vawn turin a kut min rawn pe a, "A na em?" a ti zui sap. 
"Na lo e. A dup deuh a, engmah a na lo" a kut ka vuan a, ka nui lui zui hak hak. Min kaihthawh veleh min thlah a, ka inben fai vel laiin a ţhutna ngaiah a lo ţhu leh daih hman. Ka thil in vang kha nge ka zak vak tawh lo bawk a tlangnel zet hian a bulah ka ţhu ve a, kan insi lek lek. 


"I ţhiante sawi ka lo hria a, nupui neihtir che an tum niin an sawi a, an thusawi kha a dik anih chuan kan inang dawn hle mai. I tlangval hun chhung i thlahna a nih hmel a, keipawn ka thlah ve dawn mek" tiin bul ka ţan. Ka biak loh chuan min biak a tum hmel si loh a. Tlem a tawlh hnungin bang nghengin a ţhu a, a tih ang chiah chuan ka lo ti ve zel. Min chhang tawh dawn lo emaw ka tih hnuah "Engtikah nge ineih dawn?" a rawn ti a, ka phu zawk lo chauh. Ka phur thar leh. Kan thil tawn a in an chuan ti ti a nuam deuh a, a tawng ve lo chuan an hrethiam tak tak thei lo. 


"Ka la hre lo. Ka hre hman lo a ni mah zawk. A hun an sawi hma in kan inhnial a, ka rawn tlanchhuahsan. Ka pa berkher chuan hetiang thil a tih duh hi ka ring miah lo tak tak. Tupawn lo fuihpawrh se, ka nuhrawn hi hmangaih viau mah sela, ka duhthu ngei lo chuan tumah min neih tir ka lo ring ngai lova, tunah lah ka rin phak ngai miah loh ka chungah a thlen tir mek chu a ni sia" kan thinurna kiang ţan mek kha rawn let lehin ka thinrim ţha leh a, ka ngaihtuah chian hnu phei hi chuan ka rilru a na tel tawh. 


"Ava pawi ve" a rilru put hmang te min hrilh ve dawn maw tih laiin tawi te chiahin min chhang. Mipa a nia, hmelhriat loh bulah inphawrh lo mahse ka hrethiam. Min ngaihthlak peih chuan a ţha tho tho. Nawr luihna hmanga nupui nei ve tho tur a nia, min hrethiam ber tho ang. 
"Ka pa fanu ka ni nge ka pa thil neih satliah, duh duh hun a a hralh mai mai theih ka ni tih pawh ka hre tawh lo. Hetiang hunah hi chuan ka nu ka ngai ţhin. La dam sela chuan hetianga ka tawrh hi a phal miah lovang" ka ti a, ka nu hming ka lam rik hnu chuan kan chhungkua a kan awm ho laite, chhungkua kan darh mai hlau a huikhawm a tum ţang ţang ţhin lai te ka ngaihtuah a, ka mittui a tling pam. Ka zu in vang mai mai a lungchhia ang a min ngaih ka hlauh vangin ţah loh hram hram ka tum. 


"Kha hei in rawh" a beer inlai min rawn pe. A hawnna a rei tawh phei chuan a kha tawh ngawt ang. Min duhsakna lo hnar ka hreh vangin ka la ve mai mai. 
"Sawmpuia chu a haw ta daih em maw ni le?"
"Rosy pawh hi. Ka hmu tawh lo reng reng. Ka tello chuan a haw awm bawk si lova" kan ţhiante phun ri ka hriat chuan ka chhehvel ka melh kual rulh rulh. Ka bula ţhu a ngawih reng vangin thawm ka chhuah bik lo. Midang tihbuai a duhlo anih ka ring a, ka ngawi ve ran. Reivak lo hnuah an lut ve mai. 
"Tlan ang" 


Nghet zet a inkai a nui zui vak vak chungin midang hriat loh turin kan awmna hmun kan chhuahsan. Thui lo te kan tlan a, a vir zui muai muai. Min thlah rualin bang rinchhanin ka ding thei ţawk ţawk. Ka phar hiang a, thli thaw heuh heuh chuan min chhem harh zo lo. Basketball khelhna ang ka tih deuh zawlah khan kan ding a, ka ban dahthlain thawk ka la a, eng ber nge kan nuih ka hre lo. Tlanchhiat a duh lai khan ka banrekah hmerin min pawt tho lawp a,ka inrin hman loh vangin ka beer ken lai ka thlauh a, ka la rap zui. Kha mi ri kha kan nuih ni berin ka hria. 


"I nupui tur chu i hua em?" tiin ka zawt leh a, zawhna ka ngah. Ka piah chiahah awm reng mahse a lam ka hawi lo.
"Aw"
"A englai ber?"
"Engkim" ka hmai hupin ka insut hraih. Ka pasal tur pawn min haw ve ngei ang. Hriatngai loh inah ka lawi lut ang a, min haw tu ka pasal tur nen, ka ngaihtuah thui ngam lo chu ka inthing nawk nawk. 


Bang nghengin kan ding a, thla lah chu a eng tulh tulh emaw tih mai tur a ni. 
"Mipa inia itan chuan a zia alawm. Hmeichhe tan hian a huphurhawm lehzual. Kan in chhuahsan ka tum ngai lo hrim hrim a, naupangber ka nia, ka ute zawng zawngin min chhuahsan pawn ka awm lui ngat ngat. Ka nu thih thlenga a awmna a nia, ka nu sulhnu tlem la awm te hi hmuh ziah ka duh. Mahse ka thu ber si lova" ka kun lup a, ka mittui a tla tak tak tawh. Ka dang peih tawh vel lo. 


"I nupui chu i hmangaih theih i ring em?" ka ţah rik mai hlau in thildang ka zawt daih. 
"Ka tum lo" a ti sup a, ka lo nui hul hak. A duhthlanna ania, ka sawibuai sak thiang lo. Rin loh deuhin ka nu chanchin min zawt a, ţha deuhin ka hrilh. Natna em em nei lova a thih thut dan te sawiin khatih hunlaia ka hrilhhai zia te kha ka ngaihtuah let a, mittui bawk. Ka va inten tak. Ka thil in hnathawh nge, zanin a ka mi tawn pa lah chu ka bula a awmreng chungin ka ngai em em lehnghal. 


Ka hma a a rawn din chuan min hnem tumah ngaiin ka dakchhuak a, ka lo ţhen sak. Kan harsatna tawh a in an chiah vangin ka hmuh vawikhatna aţangin ka ngaina hle. Zu ka in kher kher bawk nen. Min rawn hnaihin ka ban a rawn vuan a, kan hmai a insi lo chauh. 
"Ka tan chuan mikhual chauh ni mahla ka ngaina che a, mikhual ve tho ka ngainat miah lohin min fawh hma hian min fawp rawh" zawi sep a tih pahin a awmdan ka en reng. Thla engin a chhun fuh em vangin ka mittuiin a hmel a hliah zo lo. 
"Chu chu iti thei em? Reilote ah ka hriat ngailoh leh min hmangaih miah lo tu pasalah ka nei dawn a, zanin chu hmangaih tu nei ve ang a awm ka duh" ţah aw ţuau hian ka ti a, a hmui hnuai seh chungin min en vang vang a, ka ban ka chet veleh rang zet a manbetin chung lamah a nembet a, a kut lehlam chuan ka mittui min hruk hulsak thung. Ka dil ang min tihsak thei dawn lo emaw ka tih hnuah ka hmuiah min fawp vang vang a, nghet zet a mitchhingin ka lo dawh tawp.


A inlakhran hnuah pawh chet nachang ka hre lo. 
"Mangţha le" ka chalah rawn fawp zeuhin a nui zui hawk. Mit ka men meuh chuan thui fe a lokal tawh. Sammy nen a scooty kan dahna kha a thleng ţep tawh a, thlahna eng emaw sawi ve ka duh vangin ka che ta phat. 


"Hey, i nupui tur chu hmelchhe deuh, lu kawlh, hnute tereuhte, mawng dep leh dul kiar zet ni rawh se" nupui chhe zet nei tur a ka duhna aupui tuarh tuarh chungin ka umzui. Thui phei zawng ka tlan lo. Lirthei an dah tlar dalna hmun a thleng a, a insiam vel chu ka en ta ringawt. A bike a tih nun hnuah "Nangni pawh nupa hlim lo ber ni ang che u" a rawn ti ve a, a tlan liam tak daih vangin ka insawh tau nghawng nghawng. Ka ţap min thlem a, ka ti ti dawhthei tak a ngaithla a, duat tak a min fawp tu kha a bo nghal vek. Min thlem pawh a nilo ka mittui min hruksak ringawt. Mipa in a an thil tih ho te hi hmeichhia hian kan ngai uar mah mah zel. Engpawh nise ka ruak huai tho. 


Midang awm naah ka let leh a, Sammy chu rawn thoin min kai hrang nghal dawr dawr. 
"I rui buai pek em ni? Eng nge iva tih? Ngatinge imit zawn thla hi a dum vek?" zawhna min zawh mawlh mawlh pahin ka hmai min hruksak a, ka chal leh hmui erawh ka lo hup bet tlat. Hrukfai ka phal rih lo. Awm ve chi ah min ngaih tawh loh vangin rang takin min hawpui. 


Kan haw kawngtluanin khapa kha ka ngaihtuah a, keimah ang tho anih vangin ka khawngaih takzet. Mipa anih vangin kei ang hian sawi zuah zuahin ţahpui ve lo mah sela a ruk chuan na a ti ve khawp ang. Chhungte hian min hmangaih lo emaw tih mai awl tak a ni. A ni phei chu a ţhiante sawi hmangah a nu a damlo lehnghal. Sammy a ţawng char char a, a thusawi engmah ka hre lo. Khapa bawk kha, ţhian a ngah hmel em vangin mahni a awm chut chut chi a nih ka ring lo. Chuti chung chuan a inla hrang hmak. A thil tawnin a nghawng ve viau tih a hriat. Ka va hmuh hlim pawn a lo inngaihtuah muk em kha. 


In ka thleng a, ka chhungte an lo mu reh ţhap tawh. Zawi tawkin peih lo chung chungin ka inbual a, ka mut hnu reilote ah min ţhawng thut tu theihnghilh rih turin ka muhil nghal. 


"Hey tho rawh. Pasal nei mai tur si inbuatsaih ve ta che" lu na ngut ngut chunga ka nuhrawn hmuh chu nat lehzualna mai a ni. A mit a lo hnawih dum leh kuau tawh a, ka mu mai mai pawhin a thin ka ti rim aniang chu min melh rum khawp mai. 


Muangchangin ka tho lui ve ngat. Satel ang mai a ka che vel chu khum bul a dingin min lo nghak ngat ngat peih. 
"I pasal tur ila hmulo kha i thinrimpui a, inhmuhna hun kan siam ang cheu. Vawiinah inhriatchian nan han leng kual vel teh u" ngeiawm deuhin a nui zui. Naupangte si a nasat dan em em hi ramhuai a pai emaw tih mai tur a ni. Kan inhnial thinrim leh ka hlauh vangin ka chhang duh lo. Ka insum ve ţang ţang laiin ka nu thlalak uluk tak a frame a ka dah chu a khawih kher. 
"Hei hi ka lo la hmu miah lo. I siamthar tir a mi? Engzat man nge? A to viau lo maw?" a banrekah vuanin na tawkin ka hmer. 
"Zet zawt che hian. Ka pa pawisa hi i ta vek a ni lo. Ka pindan chhunga mi hi eng thil mah khawih ve suh" ka ti a, a ban ka paih dawrh. Ner nang chungin a tuai vut vut a, kan in menrum siak leh tawh. Ka huat sa nak laiin a duh duh a rawn khawih kual lehnghal. Ka mit a min en chhung zawng ka en ve reng vangin a hriat phak lek tur a a phun sep hnuah min chhuahsan. Henu ka hmuh apiang hian ka awm a tawt nghal up up zel. Pindanah ka inkhung lui ngat ngat a, ka pa in chaw ei tur a min koh pawhin ka kal duh lo. 


[Nizan khan khawnge i bo daih?] Sammy message ka hmuh chuan ka hrechhuak uarh uarh. Ka ţah lai te, min fawp tur a ka tih lai te kha. Ka van zak tak em. Ka lungchhe laklawh leh ka rui inpawlh kha, ka ka ka veng zo lo leh tawh. Khumah bawk thlawpin lukhamah hmai ka phum a, ka ke ka leng buan buan. Ka chhaw lutuk hi a chang chuan inentir mai te ka duh ţhin. Ngatinge khatiang kha ka lo sawi? Mizoram zimte ah hian kan inhmuh leh hun a awm ngei ang a min ngainep tawh viau ang. Ka thianghlimzia sawi mah ila a awih tawh lo chiang sa. 


"Rosy insiam rawh a rawnkal ţep ang. A pa hnenah kan in awmna ka hrilh vek tawh" pawnlam aţangin kan ramhuainu pawh a rawn au leh lung lung tawh. A thil tum hi hriatchhuah vat vat ka chak a ni. Zan lama ka awmdan kha ka rilru ah a awm reng a, ka zakin nep ka inti ngawih ngawih. Vawikhatmah zu in leh tawh lo turin thutiam ka siam nghal thlap. 


Rilru buai lai laiin Sammy lahin min rawn call ve sek. Ka nin tawpah ka la ve chauh. 
"Eng nge i duh a? Ka lak loh chuan ka hman lo tih hreve mai ta che? Rawn call nawn sek a ngai a mi?" ka ti tuarh tuarh. A ring ţha leng lawng khawp mai. Ka zahna min hriatchhuah tir tu mai mai. 
"Awii i hnuailam khawhar ve zia hi hrelo ila chuan i rai emaw ka ti ngei ngei ang" a ti nang nang a, ka be chhunzawm peih lo. Ka pasal tur ka hmuh hunah zahzel a tan ka duh. Chumi hunah chuan ka be chauh ang. 


"Lo chhuk rawh. I muhil leh em ni?" kawngkhar ri dawt dawt ah ka harh zawk. Khumah ka tal ka tal a, ka lo muhil leh daih. Kawngkhar a rawn inhawn dawt lai chuan ka lo la ham bai bai. 
"Rawnkal rawh, a rawn thleng tawh. Ţha deuhin awm ang che. Hmelhriat loh min neih tir tiin phun tawh miah suh. Ka thlansak ţhat zia che saw va hmu ve rawh" ka beng bula ka nuhrawn phun sur sur lai chu ka hnek chawrh chak zek zek. Thil ţha lo zawk a thlen hlauin ka insum mai mai. 


Phur lo tawkin ka pen chhet chhet a, meng mang lo hian ţhut khawmna pindanah ka lut. 
"Hei a lokal alawm. Rosy lo ţhu teh, hei Sawmpuia a nih hi" ka pa min kawhhmuh lohna kherah ţhu luiin ka pasal tur an sawi ve sek chu ka melh a, ka meng ta kawk. Ka khap sawk a, ka en nawn leh ngial hnu pawn a la ngai reng. Min lo melh ve run a, mak ti hmel a pu ve miah lo. 


Zankhat rui zet a ka awmpui, ka thuruk tam tak ka phawrhna, min fawp tur a ka ngen hial kha ka pasal tur a an ruat a ni tih hi tunge ring thei ang? 


CONT (A boring maithei. Chapter hmasaber ah hi chuan sawifiah ngai a tam ţhin a)