DUMB AND DUMBER-3

DUMB AND DUMBER-3


"Awiiii....ana lutuk....ka thluak thlengin a fan vek...Rosy lokal tehh" Sammy au nasat lutuk vang chuan ka thiltih lai ka dah a, hlauthawng tawkin ka phei a, khumah a kap hupin a lo vial ngawl ngawl. 


"Min ti hlauthawng alawm. Khatiang a na rei lovang. Au vak vak suh midang iti phawk lek ang" ka ti duh chauh ringawt. Khum bulah eng eng emaw ala inchher chhuan luk a, chhuat nawh pahin a hmawr zumah a tauh pek aniang. A tauh na deuh nge ni a sen ţawl ţawlin ka hria. A vun a ngo bawk a, rawng inthlak a langsar bik tlat zel. Ţhen tlak tlak chunga rei ngial a vial a vial hnuah a zia ta deuh aniang chu pawng phungin a rawn ţhuchhuak leh luau tawh. 


"A natzia kha. Ka pangti chawr ka hne zia hi chu. A hnawk ropui si" tlan thla deuh phung hian a ti zui hluam hluam. 
"Pathianin mipa inihna a rawn hriatchhuah tir leh zawk che anih kha"
"Hmeichhia pawh nila va tauh ve chhin la, a na ve tho ang"
"Keichuan ka nihna ka hria a, ka tauh nat leh nat lohin awmzia a nei lo" ka lo ti then. A tauhna bawk aniang bungraw inchherchhuan lai pawh a awn bawi mai. 


"Ka ning a chang chuan paih daih mai te hi ka duh ţhin. Leggins hak ve duh lahin a buaithlak si"
"Buai buai suh. Pangang tiat lek ineih tho kha. Nawt fai zung zung rawh vawiin a tih zawh vek ka duh ania" a thil sawilai ngaipawimawh lo zet hian ka ti a, Pathian siam danah lungawi lovin a insawisel reng a, thlakthleng theih a awm der si lo. Mipa angin a piang a, engmahin a ti danglam thei lo. Thlakthleng engang mahse mihring siamchawp sak a ni dawn tho tho a, danglamna a awm thei lo hrim hrim. A ni lah hian a hrethiam duh der lo. 


"Min hrethiam lo tu berkher hi ka ţhianţha ber inia, kan inkawmngeih vang tal pawh hian min hrethiam ber tur inia, ţawngthei zet zawt si, Rr-in a ngaithei miah lo che hi a demawm loh" ti a phun mawlh mawlh chungin chhuat a nawt nawk nawk. A thinrim hian a mipa tha a chhuak a, ţha ka ti fe. Thinrim lo a nawh hni hne ai chuan a nawtfai leh daih zawk tho ang. Tuai leh patil tih vel ngaithei lo viau si hi vanduaithlak takin ka ţhianţha ber a tuai hlauh a, ka sawichhe chiam chiam zel tho. 


"In van la buai ve? Thingpui ka siam kep cheu a, in lo in lawk hman em?" muangchanga rawn luh pahin Puipuii chuan kan pindan chhung a enkual nasa. A la lut ngai miah lo em maw ni tih hial tur a ni. 
"Nimin khan ka hmu hman lova, i chhawm ţhat hlawm hi. Chhungte in ngah a ni hrim hrim" ka bungrua vel en lawr den den chung hian a ti leh a, kei ai pawn ka bungraw neih theih dan a chhut nasa zawk. 
"Ngah ve bawk ang chu. Bakah vawikhat chiah pasal a nei dawn a, a chhawm tur chu theihpatawpin an buaipui ve alawm" Sammy zawkin a lo chhang. Inhau zo chiah mah ila ka chhian thiam miah loh min chhan sak leh vek tho. 


"Ni ve tho mai. Tun bak chu an leisak thei tawh awm silo che a, i pasal kutah i awm tawh dawn sia" a ti a, ala nui sang reng tho. 
"Chuchiah. A pasalin engkim a leisak vek a ngai tawh dawn a, Sawmpuia ten engmah a ngai lo, mamawh tur ang chu kan nei vek an tih pawn Rosy chhungte hian an ngai ngam lova" 
"Aniang, chhungte hi chuan min ngaihtuah ve ţhin sia, lokal ru a dai hman ang. Sawmpuia pawh a lo thleng ţep ang" a tih chuan phawk hra hian "Chhunah a lo haw dawn maw?" ka lo ti a, kan la tifel tlem ropui si. A mutna sofa phei chu a hma aiin a hnawk zawk. Suitcase thlengin sofa chuan a chhawm vek tawh. 
"Dawn e. A hrilh lo che mi? A nu a ngaihtuah ţhin a, chhunah a lo haw ziah lawm" 
"Henu haihawt zia hi. Niminah pawh a sawi reng kha. I pasal thilsawi hi ngaihven ve ţhin rawh. Nizan thil thlengin a theihnghilh tir vek che mi? Awiii hriatna bo ţhakin mi in chet a? " nui uarh uarh chunga Sammy-an a lo tih leh chuan hnuailam bihin ka nui ru put put a, ţhahnem hi ava han ngai ţhin em. Puipuii awmdan ka sawi vang khan a ngaih a ţhalo te pawh niang dawt a sawi hnem phah emai. 


Zing thawh ka hai vangin tupawh ka hmu hreh vek. Chuti chung chuan Puipuii kan zuichhuak hna hna tho. Sawmpui a nu (Ka nu tiin ka sawi ve tawh mai ang) pawh a lo ţhu reng tawh a, min hmuh veleh min lo nuih. Chauh hmel deuh chung pawn a nui reng peih a, a fel viau ang. 


"Rosy chhun a eiduh zawng deuh ineih chuan Sawmpuia chah la, rawn leikawi sela"
"Ngai lo. In ei ang ang ka ei ve duh vek" ka ti vel a, in lam a ka phunchiar theih nen. 
"I in a ni tawh a, inthlahrung miah suh aw. I mamawh ang apiang i lam zel dawn nia" a tih chuan ka lo bu nghat nghat. Dam vek vawk se ka ti kher mai. Tunah hi chuan kan vawikhat chhem pawh a dawl kher lo ang tih tur velin a awm a, ka khawngaih thar leh. 


Kan inzo dawn tawh tihah Sawmpuia a rawn lang luau. A nu bulah ţhu chatin "Eng nge ilo an?" a ti a, ka bula a awm dan nen a in ang vel lutuk chu ka lo ner nawk. Ka bulah Setana boss ang chiah anih laiin anu bulah erawh Vantirhkoh thianghlim ber ang chiah. A nu bula a awm lai chuan beer pawh pe se tui tam tawk pawlhin a in ang. 


"Kha aw Sawmpui. A lo dai deuh a, ka tilum leh zuai a"
"Awle ka lawm e" Puipuii chu engtik laiin nge ka pasal thingpui tur siam a a thawh leh ka hre lo hrim hrim. An nufa inbuaipui vel en chunga ka rilru ka kawm melh melh laiin a siam zo der. A mawngah balloon thlawk thei a vuah emaw tih hial tur khawpin a mawng a zang. Ka nu buaipui tur chauh a rawn thawk a nia, thil dang zawng zawng nen a kawp vek. A fel khawp mai. 


An inzawh vek hun ka chang a, pindan an pan sap sap hnuah no ruak vel ka sil. Sawmpuia khan ka nu leh Puipuii a zui lut a, Sammy erawh kan pindanah a lut. Tumah an awm lo bawk a tiin chhuar vel ka hawng lawr den den a, nakinah an awm laia ka chet a ngaih hunah pawh ka buai loh nan a ka tih a ni. 


"Lokal rawh ti thuai thuai ang. Sawmpuia a lo haw si a rawn hau ang che. A ţhianpa ka star a, chungte chu ka hrilh suh, che sawk sawk ang" ka luh ve rualin Sammy a lo ţawng leh zawt zawt tawh. 
"I zaktheilo. Mipa inih kha mipa i ngaihzawn chuan ka kawm tawh lovang che" tiin ka vau khur khur. Engmah nilo mah ila mahni anpui kawp hi ka ngaithei der lo. Ka ten tlat. 
"Mi hi ka vau e inti ve vel a, ka tello a awmthei der si lo" 
"I hremai ang"
"Hre reng ang. Kan duhzawng lehzel hi chu insawichhiat sak lo teh ang" a ti zuap zuap a, ka nin em vang leh dawhkanah phone ka theihnghilh vangin pindan ka chhuahsan leh rih. Ka chhuak thawveng fel erh awrh tihin Sawmpuia'n min rawn la su pawp zui. A hma a thil awm zawng zawng, bang leh mihring, kawngkhar thlengin a su pawp pawp zel a nih ber hi. 


"Kawng en ta che. Ka vir nawk kha" ka ti hlar a, min su thlu lek lek a, min vuan hman lo se chuan ka tlu hrim hrim. 
"Lokal teh" tih pah hian min kai dawr dawr lehnghal. Pawnah kan ding dun ran a, a hawikual thuak a, a chezia mak zet chu phawk hru in ka lo melh ve rulh rulh. 


"Engtik thleng nge i chawlh theih dawn?" tehdaih chuan. A ţawng zawi ropui si. 
"Ka chawl thei lo hrim hrim. Nawr luihna ka tawrh mek vang hian ka chawl mai mai anih hi" ka tih chuan rilru buai hmel deuh hian a sam a tuai thuak a, vei nei a ang khawp mai. 
"Eng nge a?"
"Chawl reng thei la ka ti e" a ti leh tawp. A hmui a liak zeuh a, a mitmeng a buai nak. 
"Eng nge sawi la" ka ti chung tawh. 


"Ka nu damdawi zingah mutthilhna damdawi ka hmu a, na a neih a a muthei lo anih loh chuan kan hmang ngai lo. Kan hman khat bakah damdawi dang nen pek pawlh ka hlauh ţhin vangin keiman ka kawl ţhin" a tih chuan mak ka ti ve ţan tawh. A nu endik tur a min tih te kha ka hrechhuak uarh uarh. A tir aţang khan sawi ve mai tur a nia. 


"I ringhlel tihna mi?"
"Aw. An sual e ka tihna ni lovin i nuhrawn--" a ti a, a chawl det. A hming sawi mai tum siin a hrelo a nih ka ring. 
"Rin Ramhuaii, Rr-i timai rawh" a hmui a pet zawk a, a nui vur vur. Hmui seh vel hi tih ţhanah a nei ve anih dawn hi. 
"Rr-i leh Puipuii te hi ţhian an nia" 
"A ni maw?" ka lo ti hluai a, lu a bu zeuh. 
"Vawiinah ka pa te thawhpuinu in min hrilh. Ka hriat ngailoh thil a sawi ţeuh. Nimin khan Puipuii hi a awm rei duh lova, ka nu pawh keiman ka buaipui vek kha. A awmzia chu ka pa leh Rr-i hi an inngaizawng a, Puipuii hian a pui ţhin. An inţhianna midang hriat an duhloh vangin nimin khan mi hmuh a mawi atan chauh Puipuii kha a lokal. Rindan ka nei a, ka pa hi office aţanga haw hma chang a nei ţhin a, an inhmuh duh hunah Puipuii hian ka nu hi mutna damdawi a pe ţhin anih ka ring" a tih takah chuan ka mak ti lutuk chu ka ang phuau ringawt. Pasal nei turin min nawr a, an kawng ka dal thei tih hrereng chung chuan min nawr luih ka ring lo. Sawmpuia thil sawi hi a dik lo ve thei tlat. 


"In ngaizawng sela chuan heta ka awm a duh nang. An inngaizawng em lovang" ka ti ta nge nge. Ka pa a hmangaih hmel thei bawk sia, ngaihzawng a neih em chu ka ring thei tlat lo. 
"Nu Marami sawidan a nia, Rr-i hi ka pate office ah a kal ţhin a, a hmuh ngun deuh hnuah chiah min hrilh. Rr-i leh Puipuii inzawmna zawng zawng nen. I chawlh chhung chu ka awmloh hlanin ka nu hi lo ngaihven reng rawh" a ti a, a nu chungchang a inbia kan ni bawk a a ţawng hnem ve tawh khawp mai. 


"Chiang deuhin engmah ila hre bik lo tihna a ni maw?"
"Hre lo. Rinthu vek chiah a la ni. An inngaihzawn ka ring a, Puipuii kaltlang a engkim an tih ka ring. I tan chuan ramhuai pawh nise ipa nupui a ni tho a, kan manchhuah veleh kan inţhen thei tihna a ni mai. Lo enthla char char rawh" sawifuh a intih hmel khawp mai. Keimah ang tho in inţhen dan a lo ngaihtuah ve char char tho a nih hi. Rri thil tum hailan a ţhen leh vat kha keipawh in a ka duh ber a ni. 


"A ţhat chu. Inţhen leh vat theihna anih phei chuan tunkar ka chawl dawn a, tunkar chhung zawng ka lo enthla ang" ka ti ve ta a, ka phur sarh sarh khawp mai. Tha tho deuhin kan inzui lut a, a ni pawh a thawmhnaw hak a lum deuh vangin inthlak leh lawk a duh a ni awm e, pindan a kan inzui lut chu hmeichhe naupang ang maiin Sammy a lo nui har har a, a hrengai lo tu Sawmpuia chuan mak a ti khawp mai. 


"Ka nu lo ngaihven zeuh zeuh la, sofa a thawmhnaw hi in dahfel chuan a tawk mai. Vawikhatah a tih zawh vek theih loh" a ti ve tehmial a, ka ţhianpa awm vangin ţhat a chhuah der leh chiang lutuk. 
"Sawmpui, Bm-a khan bialnu a nei em?"
"Nei e" tiin a lo chhang hmuk a, Sammy hmuh tur bik a leichhuahin intithei zetin ka nui var var. 


"Nih leh bialpa a nei duh em?"
"Engnga tan?" a lo ti hu. Sammy hi tuai a ni tih a hmuthiam ve tho awm sia, ka rin aiin a chhaw daih. Sammy awmna sofa ah ka phei ve a, a thil thleh lai ka thleh pui. 
"Engatan nge ti vak se itih? Bialpa leh bialnu te chu nuam kan tihzawng apiang tihpui atan kan duh ve bawk ang chu. A chhe lo ka tia, a phone number ka duh tawp" Sawmpuia hrilhhai hmel ka hmuh chuan ka nuichhuak lo chauh. A tshirt hak tur pawh ha mai lovin a keng reng. 


"Nakinah a phone number min pe rawh aw. Ka be ve hrim hrim chak. E...tunah min pe rawh khawi" milim ang maia ding kha ka ţhianpa in a hnaih chilh meuh chuan a tawlh dawrh. 
"Engmaw i duh?"
"Bm-a phone number ka duh. Engtinmah ka ti dawn lo. Ka be ve mai mai dawn. Nangpawh chu i gym ve ţhin a mi?" tih pah hian a hnaih leh a, a dulah a beng ri thlawrh. Kawr ha vat sela a pumpelh ni mai tur. Tupawh ţhian ang vek a nel em em thei zel Sammy hi pumpelh theih a ni lo. 
"Kha hei copy rawh" a phone a pe ta ringawt. A hlau deuh ni maiin ka hria. 


A kal dawnah "Min lo thlah rawh" a ti a, a nu chungchang sawi belh tur a nei a nih ringin sawibuai miah lovin ka zui.
"Khawnge bike i dah a?"
"Gate pawnah. Bm-a khan bialnu a nei a nia" ka lo nui hak. Rin ai daihin a ngai thutak. 
"Ka hria, hmeichhia anih loh kha. Bma pawn a duh nang. A beidawn nan be ve hrim hrim sela a nimai" ngaihsam zet hian ka ti a, a mipa biak ten an hnawl zel tih ka hresa vek bawk a ka ngaih a ţha khawp mai. 
"Ka kal. Ka thil chah che kha aw. Puipuii hnaihah lo awm reng rawh" 
"Awle" ka ti duai. A rindan a sawi ve pawp pawp a, a dik maithei a, a diklo thei bawk. Pasal nei lo, zalen ka nih leh theih nan ka puih ve a ngai. Rri leh ka pa an inţhen theih phei chuan nuam dawn lutuk. Mahni inah duh duh danin ka awm leh thei dawn ni mai. 


Sammy haw hnuah chaw ka chhum a, ka thiam dan danin rawng ka bawl ve. Puipuiin min pui ve bawk a, Sawmpuia pa pawh dar5:30 velah a rawn thleng. 
"Rosy inu a lo ţha em?" a rawn ti a, a ngaihtuah hmel. 
"Aw tunah chuan a muhil a, a harh ve ţep tawh ang" 
"A ţhat nasat chu. Ka va awmpui rih a nge" a ti a, an pindan lamah a kal a, a dam thlup a, Sawmpuia thilsawi nen khan hmeh bel dan ka thiam lo. Ka zing thawh hai pawh kha a sawi tawh miah lo. 


"Nimin khan Sawmpuia bialnu kha ilo hmu em? An ţhian ho zingah a awm ve reng kha" Puipuii bawk. A ţawngpeih lutuk hi ka hne. Thil ţangkai sawi tur nei bawk si lo. 
"A bialnu ka hre hleinem"
"Chhun a a rawn haw hian a rawn hruai tel zeuh zeuh a, pangngai deuh a a lokal ve thei te kha a puitling ka ti. A bialpa in nupui a nei thut a, a rilru a na ve viau ang. Kan hma hun tur hi tuman kan hre lawk si lova" a ti sep sep a, ka alu vel lai lian leng lawng chu nghet zet hian ka hum a, a chunga ka thil tih sawi leh thei dawn lo sela chuan ka vawm pawp ang. 


"Ni e. Bakah keichu mi chanchin an ngaihzawng te thleng thlengin ka ngaihven ve lova, mi chanchin lo ngaihven tur dang hi ka ngah khawp a, ka tan a ţangkai tur lo phei chu ka hrepeih lo reng reng" ka ti ve hrep. Ţawngna ve viauin inhre mah ila a awm ngaiin a awm reng. A hmul pakhat lek pawh ka la ti tho zo lo. 


"A rawn hruai reng takah chuan hriat loh pawh tum ila a theih loh. Mahse in innei tawh a, nunhlui vang mai mai chuan inţhen miah suh u. In chendun reng chuan in inngaina ve mai ang" a ti leh daih. Hriatthiam har deuh hian a awm lui tlat a niang. 


Chaw eikham veleh mu turin ka kal a, Sawmpuia rawn lut ve chu "I leng dawn lo mi?" tiin ka lo zawt. Keimahni zawkin inleng kan nei vaklo te chu mak ka ti. Kan inneih hnuah tumah an cham zui lova, chawhma lam a inleng kan neih bak tumah an rawnkal leh tawh lo. Chupawh Puipuii bawkin a lo chhawn vek aniang chaw ei laia an sawi hmang aţangin ka hre chiah. 


"Dawn lo. Beer ka nei, indun ang" a ti ve tehmial a, ka tho rang khawp mai. Beer mai mai chuan ka hriatna a tibuai bik em lovang chu maw. 
"A to to nen iva lei thei zawk ve" tih mual mual pahin sofa ah a bulah ka ţhu ve a, keitak hi chuan ka lei ngai miah lo. 
"Ţhian ten min pe a, ka kal hnu khan a pangngai vek em?"
"Aw pindanah ka lut ve zeuh zeuh a, chumi hnuah rawng kan bawl dun leh" 
"Ţhat chu. Inţhen leh vat dawn mah ila kan inţhen hma chu ţhian angin awm ang. Thil tih dun tur kan nei bawk a" 
"Tih dun tur ni lovin ka tih tur a ni zawk mah. Ka kutah idah vek hi"
"Aw nih leh i tih tur" nui chung hian a ti a, zan hmasa lam ai chuan a nelawm ve ta deuh. 


"Ţhian kan nih dawn chuan ka duh duh ka zawt phawt ang che. Kha han hawng teh" beer min pek tawh chu ka pe let a, ka thu angin a ti veleh mai. 
"Min zawt la" tih pah hian min rawn pe veleh a, ka in hmasa te te. 
"Khawnge i unaute. Thlalak intar ho ka en lahin inu leh pa leh nangmah chauh vek a ni sia"
"Ka nei lo. I hmuh ang chauh chu" 
"Nih leh i bialnu nen khan in inţhen a mi?"
"Chupawh kum khat ka nei tawh lo" a nui hawk a, min tihder a nih ringin a darah ka nem pawp. 
"Dawt inhrilh lovang"
"Dawt a ni lo"
"Puipuiin a rawn hruai ziah a ti che sia" ka ti a, khanu kha dawt min hrilh chuan a chak lo ngawt ang. 
"Ka nu zawt mai la, keimah chiahin ka haw ţhin" a ti lehzel a, kan inhriatna la reilo viau mahse Puipuii ai chuan ka ring daih zawk. Puipuii kher kher chu enthlak ngun lehzual bik ka tum. 


"A van dawheh tak. Ka zawh leh che a ring awm reng sia, bialnu nei angin a sawi tho bawk che sia"
"A ti mai mai nih chu" zawh tur dang ngaihtuah chungin ka in pah reng a, ka biak loh chuan min biak a tum bawk si lo. Heti chung hian ţhian ni ang te a ti ve vel a, a boring emai ka kawm peih lo. 


"Inu hi cancer tiraw?"
"Umm" ka bu nghat a, a nu natna chungchang chu ka zawt zui duh lo. A lu a tuam reng a, sam a nei tlem anih ka ring. Thildangah chhun vak lem lo mahse an mit erawh a in ang khawp mai. A vaia lakkhawm chuan a pa a ang mah zawk. 


"E..taka vawiinah thlalak ka siam a, siamzo lo mah ila a ţhen ţhen. Ka nu duh danin pakhat ka ti lian bik a" a tih chuan phur fe hian en ka dil. Nui ver ver chung hian ka en a, a tam leh lo. Ka rin ai daihin a print tlem kan lak hnem tehlul nen. Inneih thlalak ai chuan ka chhuak hmasa lo phawt. Chu ringawt pawh chuan thla a ti muang. Kan inţhen hun a ţhiante min chhaih duh dan ber tur ka pumpelh pha tlat. 


"Khawnge a lian ber chu? I frame nghal em?"
"Aih nikhatah ka ti vek seng bik lo. A tam em kha" a tih lai velin a thlalak rawn hawn ka enkual a, sawm pawh a tling dawn mawni. Hetiang anih chuan a dawr ka hmuhpui chak khawp mai. 


A siam len berkher ka hmu chu ka lawm lo. Tum bur hian thlalak a ka mit zawn ka kawk sawk. 
"Enga tinge mit ka chhinna berkher hetianga i siam? Miin min nuih se iti mi?" ka ti tuarh. Ka au ring bawk aniang ner nawng chung hian min hlat deuh a, la sa ţha ham ham tak ka ni. 
"I men reng kha"
"Ka men loh hi ka meng dere anih hi" a thil min entir chu amah vawm nan ka hmang a, lungawi lo tawkin ka mu hmak. Ka inlukhup hma in "In diriam naah ka nga. I thil min tih tur tum pawh kha ka ngaihtuah ţha leh ang" a hriat phak ngei tur hian ka ti a, a hlauthawng viau ang. Ka inkhuh zui hmak. 


"Hey" ka blanket a che det det. Ka hmingin vawikhatmah min la ko lo. 
"Hey" a rawn ti leh a, ka la pawt che reng. 
"Naktukah ka lo siamţha ang" a ti ta nge nge a, inhaihawng duh chuang lo mah ila hnehna chang zawk ka nih hrim hrim vangin ka nui ta ver ver. Blanket pawt zawm lovin min ko dut dut tawh lo mahse a siamţhat dawn vang hrim hrimin ka lawm. Ka meng pangngai leh ka meng dere pawh a hre hrang lova, min chik lohzia a hriat khawp mai. 


CONT...