DUMB AND DUMBER-4

DUMD AND DUMBER-4


"Hey tho teh midang an tho leh vek tawh" a inthlahrung tawh vak lo niang min sawi nasa nawk nawk emai. Min nawr vial tup tup a ni ber. Ka meng duar duar a, khum mawng bang a sana ka melh pah. Dar6 chiah a la ni. 
"Thawh ivan hre em em. Dar6 chiah ala nih khi. Va mu leh rawh" lo tih liam puat pah a mutthilh leh mai ka tum chu ka lu ah dawmin min tung tho lawp. Harh chiang kek kawk tak ka ni. 


"An tho vek tawh. Puipuii a rawnkal tawh a, ka pa nen a an awmdan endik rawh" ka dar a dawm rualin a kut ka lo beng pawp.
"Ka thawh hma te chuan lo en ve la a ni mai lawm. Heng zawng zawng ti vek tur hian ka nei lo che" ka ti vin hlar. Mo awmdan tur min hrilh tu ka nei ngai lova, inzir lawk miah lovin pasal ka nei bawk. Ka pasal ber lahin mi enthla turin zing hma tawkah min kaitho a, thin a rim hlur thei. 


"Ka hrethiam lo" a ti sup. Ka awih lo lutuk chuan dak vahin khum bula a ding chu ka en a, min lo en ve reng mahse eng nge a ngaihtuah ka ring thiam lo. 
"Engmaw i hriatthiam loh?"
"An inmelh dan aţangin engmah ka hrethiam ve ngai lo. Tho vat mai teh, a nih loh chuan vawiinah i hnarkaw inlen hleihna lian tawkin ka print ang" engtik laiin nge chhuat ka thlen ka hre lo. Kan indin chilh ran tawh. 


"Ka hnarkua a inlen hleih ngai lo" fiah kelh kawlh a ka tih chuan "Ngai e" a lo ti ve zat. 
"Engtik laiin?"
"I nuih apiangin. I hmai va phih la ka sawi ang chuan ti rawh" ka lu ah bawk min nem pawp. Ka inring hman lo bawk nen duh aia thui ka tlan. Rum zet a meng chung hian ka hawi let a, min lo la nuih zui. Inţhen vat duh lo ila chu ka pui lo chiang viau ang. 


Kan pindan chhungah hian bathroom tetakte a awm ve a, zan a zun a chhuah chang a thawmdim deuh a chhuah ngailo tur te hi a ţha ve hrim hrim. Kawţhat loh changin a ţangkai lehzual. Ţhut zawng a tui herh haw leh khuh der vel a ngai ve lo. Te viau mahse kan pindan a bathroom awm ve hian zahna tam tak lo thleng thei chu a la bo dawn chiang alawm. 


Thinrim rilru a inhrosa kuk kuk chunga hmaiphih ka ni bawk a ka hnar hi thlawn awlsam tak chu ni sela a thlawn daih tawh ang. Ka ha nawh laklawh laiin min rawn tur sek lehnghal. Tum kawh luk chung hian ka chhuak a, min lo la nghak ran. Mawl si, mi chezia aţanga engmah hrethiam lo rual a ni lo hrim hrim. 


"In lo tho ve thei maw? Rosy pawn thawh a hai ta bik love" Sawmpuia pa (a ni pawh ka pa ni ve tawh mai rawh se) chuan alo ti sawk sawk a, zak deuh chungin ka nui sak.
"Ngatinge ka nu a lo la thawh loh?" keipawn ka nu ka hmu lo chu mak ka lo ti ve. Midang an tho vek tawh a ti ve sia dawt min hrilh a ni pek ang. 


"Tukin chu mut a duham deuh a, a ngaihtuahawm loh a harh reng tawh. In nupa khan rawngbawl mai rawh u. In inneih hma deuhin kan nula a haw a, Rosy pawh i hah deuh rih a ngai dawn nimai. Thlaleh lamah chuan a rawn let tawh ang" a ti dap dap a, a ni pawh a zaidam hmel khawp mai. Puipuii nen an inbe lo hrim hrim a, a ruk a ka en reng chung pawn an inmelh lai takngial pawh ka hmu lo. Dawt min hrilh vang khan ka la ngei hlur reng. 


Ka pa chu ka nu ngaihven turin a kal leh tawh. Kan awmlaiin a ngaihven em em a, kan hmuh loh lai hian a ngaihven tho angem tih te ka ngaihtuah ta vel mai mai. 
"Sawmpui vawiin chu i rualin ka chhuak lawk ang. Rosy a awm tho a, ka kal duh naah min dah zuai la, ka let leh dawnah ila haw bik loh chuan ka rawn sawm haw ang che" Puipuii chuan ro a rel zat zat. Ka pasal ve lah hian awlsam zetin a lo "Aw" veleh mai bawk. Sawmpui a ti duai duai reng a, a ngaizawng em maw ni tih mai tur a ni. Sawmpuia aiin a upat hmel zawk a, mahni ai naupang chu a ngaizawng bik em lo turah ka ngai. 


Dawr kal tura a insiam laiin thlalak bawk ka lo en leh a, ka lungawi thei hlawl lo. 
"Khang ho kha vawiinah ka nu lo entir ve rawh aw" a la ti tak deuh deuh a, ka lungawi lohna takngial pawh a hmu ve thei lo. Ka tum len theih leu luau nen. 
"Ka lanţhatna bak ka entir lovang" ka ti ve tlat. A lian berah hi chuan amah hi ka chei chhe ve khawp ang. 
"A ţha vek. Entir vek rawh" ka nui lui vak. Ka fiam chak tlat, fiam a nuam viau ang. 


"Engtinpawn awm ila hmelţha min ti tihna ni maw? Ka lanchhiatna a tam ka ti chung pawh a ţha min tih vek chuan" la nui vur vur reng chungin a lam ka hawi a, a hawihai kher mai. Ka rinlawk dan vel chiahin a awm. 
"Ti hran lo e"
"Aa..itih reng kha. Keimah ngei ngei pawh ka inzahpui lai a ţha min lo la tih em em te chu" ka ti a, min chhanglet chak min chhan ngaihna hre bawk silo chu a mitmeng thlengin a buai vek tawh. Kan inneih ni ah zam khawpin min siam ve tho a, ka zah rukna lai ber ka ruih zan a min fawp tur a ka tih denchhan khan min han vau ve vel a, ho te a chhaih fiam ve pawh dawl leh tawp si lo hi. 


"Ka rawn haw ang lo ang" tih leh tlanchhuah a rual a, camera lah hi a awrh ve ziah lehnghal. Thla la thiam ber ang zia zang hian a awrh lang ziah a, a thiam chin chu tupawn kan thiam ve deuh vek ang. A tlanchhuak chu ka umzui ve vat a, pawnah Puipuii nen an lo ding dun. Zingkar a a thawmhnaw hak ang kha a ha tawh lo. Chhuah dawn meuh chuan inchei ve tak a ni. 


Bang ngheng a kawizawi tawk a ding chung hian an che vel ka en reng. Puipuii phun sep sep te chuan eng nge a sawi ang tih thlengin ka lo ngaihtuah. Sawmpuia chuan bike a lachhuak a, Puipuii chu intihtheih hmel tawk hian a bet vung. An kal dawn tak takah ka pasal chuan min rawn bye bye ve ngei. Ka awm tih hrerengin a hrelo der a lo ni. 


Keimahin ka tei ka tei ringawt. Bang a thlalak intar ka hmuh vek tawh hnu te ka enkual ţha leh vel a, Sammy chuan class a kal tawh dawn bik a, class ţhulh ngailo berin ka ţhulh ta reng zawk a nih hi. Lehkhazir lamah insawitheihna tur nei vak lo mah ila class kal ka taima in college hi nuam ka ti khawp mai. Kan inchhung boruak ka hne ţhin em vang khan college chu ka tan chuan vanram ang vel a ni. Test kanneih vel hian hrehawm ka ti ve deuh a, chutiang anih loh chuan hrehawm ka ti ngai lo. 


"E...Rosy hei ka kal tawh dawn a, kha pawisa hi lo kawl ve la, thil lei duh thut ilo neih takin leh inven nan hrim hrim. I neih loh hunah min dil leh ţhin dawn nia" tih pahin ka pa chuan a pawisa kenlai tam tham ve tak tur chu min pe a, ka inthlahrung ve deuh hlek mahse college kal lai mai ka ni tih an hria a, min chawm huamin min nei ve tho.
"A ngai lo. Sawmpuia ka dil mai ang" ka lo ti mawi ve a, ka pa diktak kut a mi chu nise ka ban nghal pawp ang. Tunah chuan lo hnar mawi ve a ngai tlat. 
"Dawr a ti ţan ve mek chauh a, pawt buai rih lo la, heti hian amahin inkhawl ve rih rawh se. Ka pek che hi la la, i neih loh hunah min hrilh leh ţhin dawn nia" a ti a, ka la ve ta nge nge. Purse te pawh ka hmang ţangkai ve deuh tawh ang chu. 


"Puipuii a awm si lova, inu lo ngaihven reng rawh aw" ti a min chah thlap hnuah office turin a kal. Thlalak hum ran chungin ka nu hmu turin ka kal a, damlo bula awm hi ka thiam tehchiam lo. Khumah a lo ţhu a, a hnungah a nghen tur an dah ţeuh. A tihziah danin a lu a tuam a, nelawm zetin min lo nuih leh ver ver tawh. 


"Thlalak hi tlem viau mahse ka lo entir tho dawn che" ka ti a, ka nu ti pawn ka ko lo. A la zahthlak ve a, ka tim tlat. 
"A ni maw? Siam hman a inring chiah lo na a ka lan na bik chiah kha print hram turin ka tia" phur deuh hian a lo ti a, a dang ka pek hnuah a lian ber chu ka pek ve hma in ka en nawm hram a, a nu leh pate min lakpuina a lo ni. A nu thu ang thlapin a lanna chauh a lo print sak a, kei lahin ka lanchhiatna a thlang bik emaw tiin ka lo la thinrim zui. Hmelchhia ka intih tirh a a sawinghal lo kha a thiam loh a ni ve hrim hrim. 


"Avan nalh hlawm ve aw. In inhmeh khawp mai. Pasal ka neih hian keipawh ka la naupang. Fa neih ka harsat a, tupawn ka nei thei tawh dawn lo emaw an tih hnuah Sawmpuia hi ka nei a, a dang beisei viau mah ila ka nei thei tawh lo" a tih chuan ka lo khawngaih ru angreng khawp mai. Pasal neih ve si a fa neih theih loh hi chu a beidawnthlakin rilru a hrehawm duh dawn emai. 


"Ka natna hi nangpawn i hretawh ang a, inhretawn lo leh inngaizawng hmasa miah lova innei ni mah ula ka thih hma ngei hian fa neih tum rawh u. Sawmpuian nupui a neih a fa a neih ve hun hi ka nghakhlel ţhin a, ala naupangin a ngaihven ngai lem mang si lova, ka duhdan chu hria in apa hian min tih hlawhtlin sak a, la naupang viau mahse pa ţha tak a nih theih ka ring tlat" a ti a, ka pawmpui thei chuang lo. Fa neih dawn a tih hmasak ngai awm te hi tupawn an hria. Inhrengai miah lo chung chuan har ve tak a ni. 


"A hriatloh nupui neih hi Sawmpuia hian a duh lo ropui sia, a duh miah loh intih tir hian inhlim phah tho em? In duhzawng ang a awmtir in nia, in hlim tho ka ring" ka thinrim lo ve teh tlat. Rri chuan khatiang kha sawi sela chuan ka thinrim khawp ang. Mahse damlo bulah em chuan thinrim chi a ni tlat lo. 
"Ni tho mai. Mahse a mallo tih hriat ka duh a, lo thi ta ila a tuar thiam dawn lo. A pa awmreng mahse ka ngaihtuah dawn tho. Amah ngaihven thei tu leh a ngaihven tur awm se ka duh" ka hrethiam ve neih nuaih love. Puitling hian an duh ang tih puitlin nan keini hi min hmang. Chu chu ka ngaihdan neih ve awmchhun. An hmanrua chauh kan ni. An duh ang hi anmahni chauhin an ti thei tawh lova, an thuhnuai a kan la awm theih lai leh, an thuzawm lo thei lo a min la siam theih lai hi chuhin min hmang ţangkai a ni mai. Fa ka neih hunah chuan ka ti ve lo tawp ang. An duh chen chen ka nulat tlangval tir ang. Miin an "Pi" luih luih hnu a an la nulat pawn a pawi lo. Keichuan ka thil tawn hrereng hian an duh dan ka ngaihpawimawh sak ber dawn. 


"Sawmpuia hi chu thu a awih a, ka sawi ang apiang tih zel a duh. A naupanlai aţang tawh hian mi hi a dahsangin min duat em em reng a, ka hriat theih chinah ka hauh laia min chhanlet awm pawh ka la hre lo. A pa nen remruatna kan siam pawhin a pa hian ka fapa in min huat phah hlauin inrawlh ve lo turin min ti a, Sawmpuia hian ka tel ve tih a hre lo. A pa hian min sawihmuh a, ţha ka lo tihpui em em" a ti lehzel a, an chhungkua hi an mak khawp mai. Pangngai ber leh fel ber tur a ka ngaih ka nu pawh a lo tenawm ru ve tho mai. Sawmpuia tak hian hria sela a rilru a na ve viau ang. 


"A zaidam a, mi pawisawi hlau chi a nia. A rilru a ţha bawk a, heivang hian an bum nasa ţhin. A dawr pawn hma a sawn mawh em hi. Pawisa puk dil se a neih chuan a pe zel a, Sawmpuia hi irin aiin buaipui a ngai nasa ang. Puitlin lam pan se ka duh a, fa te nei ula zawi zawiin a puitling ve mai ang. Nawrkal tu a mamawh. A naupanlaite hian an vel bik reng a, thil a neihin an rawn kawm leh a, an vel bik ţhin tih kha a theihnghilh chawp chilh leh nghal a" a hah deuh a niang a thaw halh a, mit a chhing diar diar. A ţhut rem vel lai chuan ka lo pui ve nasa. 
"Kan naupanlai chuan inhmu ila min ngam dawn lo anih chu" ka lo ti hmanhmawh. Ka chak ber ţhin miau a, mi velh ka hrat a, ka ţhiante hian 'Anuten kawm an phallo che' an ti ziah a, velh a ka vau chuan a rukin min kawm leh zel tho. Ka nu khan min hau nasa ve ţhin. 


"Rosy ilo awmreng a ni maw? Iva fel ve, ka rin aiin ka rei a, Sawmpuia ka rawn nghak kawi leh bawk sia, inneih thlalak a buaipui a" Puipuii ka hmu chiah chu lawm vangin ka zuang zawk lo chauh. Damlo awmpui hi a lo ninawm em anih hi. A changin a muhil sek a, a harh veleh eng eng emaw a lam a, a ti ti ang ang ngaihthlak char char a ngai a, ka la nelloh vangin ka duh ang ka sawi ve ngam bawk si lo. Ka nel deuh hunah chuan kan inkawm tui ve thei deuh tawh ang. Puipuii ang a mi kawm nel zung zung ka thiam ve si lova, ka ngawi rei tawh rapthlak. 


A thlalak siam dang entumin kan pindan lamah ka tlan phei vat vat. Zawi tawk hian khumah a lo bawk a, a bulah a camera a dah leh run tawh. Kei min nei lo hian camera hi nei se a hlim zawk ang. 
"Khawnge i thil siam thar chu?" phur zet hian ka ti a, khum a a mu ve pawh chu ka hau lo. Tam deuh hmuh ka inrin laiin pakhat chiah ka hmu. A hmaa a siam len bik ang tiat chiah kha a nia, pakhat chiah a nih vang a nur nang chungin ka la kang a, ka hmuh chiah chuan ka nui ver ver thung. Ka hmel pangngai aiin ka langţha zawk. Ka nui miah lo na a ka landan chu fuh tak a ni. 
"Ka van langţha em em? Kan tar dawn ro ro chuan hei ngei hi tar tur a nih hi" ka ti a, nisa laiah te kengin ka en leh ţhin. Khawi hmunah pawh en ila ka lanţhat dan a ngai reng. 


"I kal leh dawn em?"
"Aih ka peih tawh lo" a zangthal a, a chal a hmet mual mual. 
"I luna law?"
"Na lek lek"
"Damdawi ka va zawng ang. Thlalak i siam nalh bawk a damdawi kan laksak ang che" 
"Ngai lo ka dawlh thei lo" 
"Engmaw?" tih hu pah hian a mutna bulah ka ţhu a, thlalak ka la pawm tlat. Kan inneih ni a ka lanţhat ve na ber ania ka dah mai mai phal lo. 
"Damdawi mum ka dawlh thei lo"
"I leiah dah la, tui i in leh anga a tla rual mai dawn lawm" tiin thurawn ka pe ve ngei. 
"A tla ve thei lo"
"Anih chuan ka eidan ka hrilh ang che. Tui ka in hmasa a, chumi hnuah damdawi ka dahlut a, ka lem pawp a, a tla vek zel" ka ti a, ka dawlh ţhin dan hian a awlsam ber. 
"Tui chiah ka lem zel. Ka tichhin vek tawh" a tih chuan ka lo nui vak a, mitchhing tlat chung hian a nui ve tho. 
"Inchiu zel i ngai dawn nih chu"
"Ka hlau" a tih leh takah phei chuan ka hawi hu hu tawh. Pasal damdawi dawlh thiam lo leh inchiu hlau ka nei a, tichung hian keini aia fing leh thilti thei zawk chhuichhuah kan han tum ve ngei chu nia. 


[News tlang ţha leng lawng a awm. In kawtah ka awm a, ka rawn lut zak] Sammy message ka hmuh chuan ka tho vut. 
"Sammy a rawnkal a, hruai pahin i lu dehna tur ka lo la ang. Damdawi i eithiam bawk silo, tui vawtin det tawp mai rawh" tih leh tlanchhuah ka rual a, in kawtah ka awm ti siin kan pindan kawtah kan intawk. 
[I rei lutuk a ka nghak thei hlawl lo che" a ti a, a zak lo khawp mai. 


"Choka ah kal ang" ka ti sep. A thil min hrilh tur chu engpawh nise Sawmpuia hriat ve ka duh lo. Fridge tuivawt lachhuakin bowl ah ka bun a, ka kut a hik mum mum thei hial. 
"Sawi vat rawh kan luh leh hma in"
"Bza chu ka bia a, ka ngei tawh rapthlak. A tir chuan ţha deuhin min be ve a, ka insawi hnuah min reply duh tawh lova, msg ka thawn rualin a seen zel a, pakhatmah a reply duh tawh lo" lawm viau mah ila ka tilang duh lem lo. A thinrimin min ankhum chiam ka hlau. 


"Sawmpuia pawn bialnu a nei a tih mawlh mawlh kha. Be duh tawh miah suh" ka ti ta zawk a. 
"Be tawh dawn lo nasa mai. Ka be tawh miah lovang. Nizanah ka be ţan chiah a, nizan ah la la thutawp ka thawn. Min duh lo mahla ka la confi tho ka tia, ka block hmak" 
"A ţhat nasat chu. In neih a in ang reng a, a tuiawm loh e. Lo innei mah ula eng nge in tih ang a? Pangang tiat chiah pawh nei la mipa neih ang inei ve tho a, pangang leh rul a insual nawk nawk mai dawn sin" tih pahin bowl ka chawi a, min ngei viau mahse kan pindanah min zui lut tho. Perfume leh shikhar rim a nam pawlh a, ala ţial nuap nuap zui. 


Towel ka zawng rak rak a, ka chhawm ngei mai ka la hman loh tetakte chu chiah huhin a chalah ka dah a, a nuam ve huai ang. Rri tihdan ka hriat ania, ka pa a lunat in hetiang hian a ti ţhin. 
"A nuam deuh em?"
"Umm" ka ngaihsakna chu ka duh vangah a ngaih hlau viau mah ila ka dehsak reng tho. Amah hi duhna nei miah lo mah ila na nei reng a awmtir chu a khawngaihthlak. 


"Rosy eng nge kan siam ang? Chow kan kang dawn mi ei mai mai a chakawm e. Ehe Sawmpuia law? Ngatinge a?" pindan chhunga dak de de chunga min rawn be si kha Sawmpuia a hmuh meuh chuan a rawn lut rang nasa. 
"A lu na a, zan menrei vang aniang a ngaihtuahawm loh" ti mah ila rawn kun hniamin Sawmpuia chu khawih ve a tum a, a banrekah ka lo man chat. 


"A ţha ka tih kha. Ka nu eng nge a an zawk a? Ka nu bak chu buaipui duh suh i hah lutuk ang" ka ti a, ka mitah tak min en chung hian a kut chu tiche ve eng ang mah sela ka thlah duh lo. Sawmpuia lah chu harh reng chungin inrawlh a tum der lo. Chutiang bawkin Sammy pawh. 


"Nurse ka nia, a khawsik leh sik loh en ka tum a ni mai. Thildang a awm lo"
"A khua chu lo sik pawh nise damdawi a ei thei chuang lo. Tih tur dang iduh chuan chow chu lova chhum rawh" ka ti a, a kut pawh ka thlah ve ta. A tuai vut vut. Ka lo hmer na leh viau a ni ngei ang. 


Lungawi chiah lo chung hian a chhuak a, a hawi vah lehnghal. Zak zawk tur a nia, lungawi lo ngam tur a nilo hrim hrim. Kei takngial pawn ka zia ka la thup ania, a zia a chhuah hma bik khawp mai. 


"Ka ţhiannu hi chu a pa nia aw. Sawmpui i nupui chak zia kha i lo hmu em? Nupui atan Hulk inei a, fimkhur viau ang che. Beksam a min khai phei chuan a na duh tehmai nia" Sammy chuan a ti ta chul a, mitmeiin khap mah ila awmzia a nei lo. Sawmpuia pawh lu na lo ang mai a ţhuchhuakin mak tih hmel tawkin Sammy chu a en. 
"I beksamah a khai kang zo che maw?"
"Aw mahse kan naupanlaiin ania, tunah chuan zo tawh bik love, amah aiin ka lian tawh zawk a, naupanlai kha chuan ka sin sia, ka te sia, kan inţhenawm ţhin bawk sia,min vel ziah lawm. Ka hnar a nawhreh a thun phei kha chuan ka nu pawh a mangang a" a tih zat zat lai chuan lukhamin ka vawm dak awrh. Lukham chu chharin a pawm hmak. Meng phelh phung chung hian a tep zui chuap chuap a, a ngawi hmak. Ka pasal ve thung chuan tun maia ka awmdan leh a thu hriat chu mak a tih hmel khawp mai. 


CONT..