DUMB AND DUMBER-5

DUMB AND DUMBER-5



Class ka kal ţan leh tawh. Ka zo ve ţep tawh sia, min uipui vek a, a tichhe pawlah ţang mah ila ka zawh hrim hrim an duh vek. Karhnih lai kan innei ve tawh. Tun hi a kar thumna chiah. Kan thil enthlakah hlawhtlinna ala awm lova, inţhen leh vat tur a kan inrin laiin tun thlengin nupa angin inkhatah kan la cheng dun. 


"Kha i ei ve duh em?" shikhar bawm lian chi a phawrh leh luai tawh. Sammy leh shikhar hi ţhen hran theih a ni lo. 
"Min pek tum ve ziah suh ka ei peih lo. Ka rui sual leh nga sin" 
"Tunlai hi i rilru hah mi a? Biak hlek che hian i vin hlur zel a, inpa nen in inhau a mi? Nge Puipuii zawk?" min thlek ha a, a ngaih a ţhat loh hmel kher mai. Sawmpuia nen a kan thil tum kha ka la hrilh ve rih lo. Nakinah ka hrilh tho ang. Engkim ka ning leh vek tawh. Ka period dawn ni hrim hrim. 


"Puipuii chu a la ngai reng. Sawmpuia damloh ni a ka hauh aţang khan min nel lo sawt. Pawi ka ti lo, kan pindan a a lo lut ve reng te hi ka hne. Class ka kal leh thei tawh hi ka thawveng huai zawk" 
"A ţha engahmah ngai suh. A hmuh lai ngei khan Sawmpuia bulah hnar phe hawk hawk khawp khan nui uarh uarh zel la maw, hrehawm a ti viau ang" shikhar ţhap hliau hliau pah a a tih lai chuan rum zetin ka lo melh. Ka nui mawi lo tih hre mah ila ka hnar nen an sawizawm ziah. 


"Ka hnar a phe tel kher lo" 
"Phe tel e, darthlalang ah in en la nui vak rawh. I nuih nasat tak tak chuan a che et et zel. A ho lutuk, hnar leh hmui te chu a inhnaih emai, a lo inpawt palh ve a ni mai lawm" a ti sam et lehnghal. Ka manbet thut a, a thil hmuam pawng purh chu a hawlh rem hmain ka tawkin ka nem. A ţe chel chul a, ka nui vur vur thung. Ka pawisawi tu te thungrulh hi nuam ka ti ve hrim hrim. 


"I pasal tan hi chuan hmuh ţhat i har ngawt ang. Chhiat sa nak lai hian i mizia hian a tichhe zual che" ka manbehna lamah a beng a sen leh hlar tawh. Darthlalang te phawrhin a sam a tuai hliau hliau. 
"Ţha hi i inti ve sia"
"In ti e, ka ţha miau a. Hmelţha min ti tu an tam theih zia i hriat kha" min runluih nan a hmui hupin a nui uarh uarh. 
"Hmeichhe ho bakin ţha an ti lo che. Tunah chuan anni pawn ţha an la ti mai mai che a, i upat hunah an ten vek tho ang che. Mipa ka ngaizawng e itia, mipa phei chuan tun aţangin an ten tawh che hi" a nui tawp hmak a sin le. 
"Bza pawn a duh lo che" ka tih zawm zat. 


"Ho teih teih, khapa hnawl nih kha e, fanghmir damlo seh ai pawn a na lo zawk" hmui kawh vu in a hawisan zui hmak. An hnawl ngun lutuk a ngaiah a nei tawh. 
"Vawiin chu lo leng la, Sawmpuia lu nat ni aţang khan i la rawn lang leh miah lova" 
"Ka peih lo, college a hmuh che hi ka duh tawk. I pasal pawn hnawk min ti nga sin. Engtinmah in la awm chuang miah lo mi?" ka lam rawn hawi leh pah hian a ti a, engtin vak nge awm se min tih ni. 


"Kan awm pangngai reng kha ni mai. Eng thil dang nge i beisei a? I rilru leh thluak zawng zawng a bawlhhlawh leh tawh mi?"
"A pa thei em?" zawi sap hian a lo ti daih. 
"Ka hrenang. Theih ve awm tak chu nia" ka lo ti ban charh. 
"Chuti si ngatinge engtinmah ala tih loh che? I itawm lo viau mawn le? I ţha ve beng buang tho sia" min han thlek kual vel a, a ţhahnemngaih ve na lam hi a dik lo deuh ţhin. 


"Ninawm e in nupa nun chhunglam nilo pawn lam ril deuh hlekin ka hrechak a sin le. Itawm deuh hlekin awm ve tawh rawh, i awm mai mai a hmuh ringawt pawn a king kong kha inhrosa kuk kuk rawh se. A nih tur ang ni vat vat ula, zahmawh thar lam sawitur kan nei nimai" nuam ti lutuk a a nui chu ten zet hian ka melh ngawt ngawt ringawt. Zahmawh sawi lam a specialist, a neih ve chhun hman na hre mang si lo a nia, hetiang lamah hi chuan hnial lo ila kan tifuh zawk ang. 


Ka class bang ke in ka haw hnak hnak. Kan in thleng bus a kal thei si lova, taxi hman lahin an ti to thei ropui si. Pawisa ka heh lutuk chuan an ngaihdan a nih loh ka hlau sia, chau chung chungin ke in ka haw ziah. Midang mitmei veng reng reng a awm ngai te hi ka ning. Chhuahsan vat vat ka chak tawh. 


Ka hnung lawkah horn a ri tuarh tuarh a, thil thleng eng emaw a awm a nih ring mah ila ka hawilet peih lo. Vawiin bik hi ka chau hluah hluah. La thianghlim sar lo ila chu rai emaw ka inti ngei ngei ang. 


"I beng a ngawng a mi?" Sawmpuia aw ka hriat chuan ka ding chawt. Ka piah lawkah a rawn ding a, motor tamna a ni tawh lo hlauh. 
"Thil ri apiang ngaihven a hawi nghal hu hu zel turah min ngai a mi? Mood fuh loh lai laiin" ka lo ti let hrep. 
"Lo lawn rawh" 
"I haw dawn mi? Ala hma em hi" ka sana bunlai ka en a, a haw hun a la ni lo. Ka nu a buai deuh em maw ni ka ti rilru hman rum rum. 


"Kan hotunu a rawn haw a" a ti ta hlauh. An nula rawn haw ni a ni tak e. Ka hriatna te hi a chhe sawt. Ka lawn dawnah ka bag min lo laksak a, min pe leh mai dawn maw ka tih laiin a camera duatlai a awrh ţhin ang chiahin a awrh ve. Mak deuh maiin hetiang a a tih vel hian ka thinlung neih ve chhun hi a ti danglam pha tawh lo reng reng. An chhungkuain min uap hneh lutuk leh mitmei ven reng ngai te, ka zalenna bo hneh lutuk vang te hian ka rilru a bet nghet hleithei lo. Duh duh hun a ka chhuah theih hun lai te leh class ban hnu a kan lenkawi ziai ziai ţhin laite kha ka ngai a, inţhen vat a, khatianga awm leh theih kha ka duh ber. Mahni inah chuan tho tlai mah ila a inthlahrunawm ve loh a, engkimah a nuam zawk vek. 


Kan thlen veleh a indah fel nghak buai lovin ka lut nghal daih a, an lo ţhukhawm laih. Chau viau mah ila pindanah ka kaltlang ngam lehpek lova, a mawi ah tiin remchang laiah ka ţhu ve. Rei pawh ka ţhut hma in ka bag la awrh reng chungin Sawmpuia a rawn lut ve a, an nula lo haw ta chu a lo rak hlut. Ka bula a rawn ţhut ve hnuah chiah ka bag a la thla. Ama ta ah a ngai nge a pawm daih lehnghal. 


An nula chu ka vawikhat hmuhna a nia, a la ţawng char char. Sawmpuia ka melh ru reng a, an nula ti ti ngaithla in a nui deuh reng. Tuman min ngaihsak lo emaw ka tih laiin "U Biakte hei Rosy anih hi. Rosy helai nula chhelo deuh hi kan hotunu U Biaktei anih hi" Sawmpuia chuan a ti a, fiamthu a a fakna dawn chu a hlimpui phian. 


"Ka choka in lo ti danglam nasa em? Vawiin aţang chuan Tawte-a duhzawng tui deuh deuh kan siam leh tawh ang" a aw a ring thum ţha sia, a ri huah huah a, a taksa dang pawh a lian, a kezungpui te phei chuan min cho ur ur duh hmel mahse a bula awm a nuam phian. An ti ti ka zawm thei vak lova, Sawmpuia Tawte-a a nih tak daih dan lah ka hre pha ve lo. Mut hahdam ka chak ber. 


"Ka lo haw tawh chung hian ka la ngai tho che u. Khawiahmah ka kal tawh dawn lo reng reng. Zinkawng a chhe si, ka insawh na lamah ka inherh lo chauh. Tuman an siamţha thei bawk si lo. Hetiang anih te chuan kan chesual reng ang tih te a hlauhawm a sin" a ti a, an khua a haw a sim viau a nih hmel. 
"An va sual ve ngatinge in khaw kawng an lo siamţhat duh loh a? Kan va inthlak ang a, kan sawizawm leh dawn nia" Sawmpuia chuan a ti ta hlauh. Ka lawmzawng hi a sawi khat a sin. Inbe miah lova awm chang lah kan ngah. A changin midang kan enthlak dan tur kan sawi chiam a, a chang leh sawitur engmah kan hre leh lova, nupa inpawh lo tak kan ni. 


Khum a ka ţhu chiah chu ka nuam huai huai thei hial. Mut ka chak a, ka inthlahrung deuh bawk si. 
"Inthlak la mu daih rawh" 
"Eng nga?" ka lo ti hu. Ka ţhutna bulah ka bag a rawn thleh thla a, mak tiin ka lo la hawi hu tho. 
"I nawm loh hmel kha. U Biaktei a rawn haw tawh a, tih tur vak a awm lo. Ka phal lai hian mu mai mai teh" za lo tawkin ka lo nui hak. Ka mut leh mut loh te thlengin a thu maw a ti vek tawh. 


"I thu lo e. Phallo mahla ka duh duh hunah ka duh dan danin ka mu ang" ka ti ve ngat. Ka pheikhawk ka tlawh phelh sawk sawk a, zangthalin kak tawkin ka mu nghal suah. Vanram hi a ni ringawt. Mahse hnuailamah eng emaw a rawn chhuak lum pup. Rang zet hian ka tho vut a, chapal bun sawk sawkin bathroom ah ka tlan lut. Ka in endik vel a, ka lo period tak tak. Inven na tur engmah ka lo lei lawk mang si lo. Thla tawp lamah ka buai ţhin tih ka hrereng sia. Bathroom a ka towel dah chiah chu ka invenna awmchhun a ni mai. Hreh viau mah ila Sawmpuia ka tihbuai leh nge nge a ngai dawn a nih hi. Ka che ţha ngam tawh der lo. Ka hriat loh hlan a lo chhuak lawk sa a awm nual tawh a, ka kekawrah a kai tawh hial maithei. Hmeichhe dang pawh an nih ve tho ka ring. Kan inringhlel ţung reng mai ni. 


Bathroom kawngkhar ka hawng de de a, ka lu chiah ka dahchhuak. 
"Hey Malsawmpui lokal vat teh" ring leng lawng hian ka ti a, ka zak ve deuh bawk si. Ka thaw a sa vek a, ka lum pup pup. Ka ko ring tuarh tuarh bawk a a rawn inlan vat. 
"Thil min lo tihsak teh. Tun bak hetiang kher kher hi chu ka tih tir lovang che. Lo inrin lawk nachang ka hre miah lova, ka thiam loh takmeuh" ka ti hmasa te te a, dawhthei deuhin min lo ngaichang. 
"Nu Maremi dawrah pads min la lei teh" 
"Engatan?" a ti deuh hu. 
"Tuipui sen kan nan. Tunchiah, khawngaihin" ngen ngawl tak hian ka ti a, ka manganzia hrethiamin min hnial khawtlai ta bik lo. 


Inbual nghal law law ka duh vangin a thang chhung zawng kil khata ding zum zat chung hian ka lo nghak a, awm hle hle mah ila ka rilru ka kawm nasa. Kan la innei rei lova, ka zak ve reng. Ka nu awm tawh lo mahse ka ute pahnih tal khan a rukin lo zep zeuh se ţha tur. Keitak pawh hi ka inringhlel sa reng sia lo in lei lawk ve mai tur a nia. Ka tai a na riai riai a, zanah a na leh vak ang. 


Kawngkhar a rawn rik det det takah chuan ka hawng thuai thuai a, ka mamawh ber min rawn pe thei ta. 
"U Biaktei ka tir a"
"Tupawh tir la min rawn hmuhsak a a lawmawm" ka ti a, ka khar zui hmak. Mipa tan chuan lei a nuam lo reng a, tirh tur an awm hlauh chu a tihzia khawp mai. 


Ka inbual zo chu chhuak lovin ka hawikual te te phawt. Towel chiahin ka intuam sia Sawmpuia a lo awm ka hlau. Ka ko a, min chhang thei lo. Hmun tur a awm lo bawk a ngaihţha tawkin ka chhuak. Ka inthlak sawk sawk a, towel leh ka thawmhnaw suk ka pho leh vek hnuah khum ka pan. Ka chhungte ho chu lo thinrim dawn mahse ka mu tho ang. Lukham a chocolate ka hmuh chuan ka nui seih a, ka haw hlim khan ala awm lova, ka lei loh zia ka chiang. Sawmpuia'n ka inbual hlanin min lo dahsak ve ngei a ni hrim hrim. Vawiin chu min ngaizawng ta emaw tih mai turin a awm. 


Ka lo muhil ni ngei tur a ni ka harh chuan kan pindan a lo thim ruih tawh. Tep chep chep chung hian ka inlet thawk a, ka piahah Sawmpuia a lo mu ve reng. Khua ala thim chiah loh vangin ala inhmuh theih. A la muttui hmel bik khawp mai. Thil min tisak nasa bawk a, ka hriat loh a ka bula a lo mu pawh chu ka hau duh lo. Ka tai a na nget nget a, ka kawng a kham em em bawk. Ka inthlak zawk a, ka mu lehnghal mai. Ka nuam lo em a ka inthlahrung buai peih vel lo. Tumah buaipui ngai an awm loh bakah Puipuii leh Biaktei anmahni pui turin an awm a, chu chu ka hre ve ran. Ka chet sek takah chuan a rawn harh ve a, a hmai a tuai puat hnuah min be lovin a tho daih. A sam a delh kawih nasat neih nuaih danah inbual zawh hlimah sam ro ţha lovin a mu tih hriat reng. 


"Ngatinge khumah i rawn mut ve a, i damlo mi?" tshirt a hak mek laia ka tih chuan a rawn leh hawi a, ala meng phelh phung. Chhun mut hi chu mut kan kham mawh a sin. 
"Ka chau. Ka mutna aiin a hahdamthlak deuh a" 
"Nih chu. Chaw ka ei peih lo nia aw, ka lo tho peih kher lo. Min lo sawisak rawh. Ka tai a na ka mu rih dawn" tih leh mut lehnghal mai ka rual a, lu a bi zeuh a, a chhuak zui nul nul. Ka hriat laia min ngaihsak der vel hi a hreh ve ngawt mai. 


Rei vak lo hnuah rawn lut lehin no a rawn chawi lut a, ka mutna bulah a rawn hung. 
"Chaw ei an siam a, i ei lo tak tak ang maw?" tiin ţha deuhin min zawt a, ngaihdan ka siam hma leh mah mah tawh a nih hmel. 
"Aw ka eipeih lo. Mut rih ka duh zawk. Awm ngai reng a awm hian nuam chuang lo mahse mut ka duh tho" nui ver ver chung hian ka ti a, ka pasal berin a sawifiah chuan min hrethiam awm emai. 
"I rilţam lo mi?"
"Ţam lo. Eichak ka nei lo reng reng"
"Ka nu a tho peih lova, chaw eikhamah ka awmpui dawn. Kha thei tui kha lo in rawh. Ka rawn let har deuh ang" a tih chuan ka ngaih a ţha zan bik lo. 
"Tlaiah khan ala ţhuchhuak peih sia a nuam nange? Ka lo awmpui dawn mi?"
"A zia leh mai ang. Tih theih ineih chuan ka rawn hrilh zawk ang che" a ti a, a ngui riau te hian ka hre leh hnuhnawh. 


"Hospital ah kan kal dawn a, U Biaktei a awm ang. I rilţam hun hunah thil ilo ei ve tawh mai dawn nia" zan dar 9 vel a ni tawh. Ka tho sawk sawk a, a chhuak ka umzui. An thawm engmah ka lo hre lova, nuam lo ka ti ve reng. 


Ka hmuh tum ang aiin a chau daih. Motor ah an hlang lut a, ka pa aimahin Sawmpuia chu a hlauhthawn hmel zawk. Buaipui pahin a be pah mawlh mawlh reng a ka khawngaih khawp mai. An kal dawnah ka pa chuan "I damţha si lova in lo nghak la, eng em a ti lovang. An admit a nih leh Puipuii nen kan riahpui ang a, Sawmpuia chu ka rawn haw tir ang" a ti a, an buai ka lo hreve lo chu thupha ka chawi ve luam. 


U Biaktei nen ţhutkhawmna pindan ah ţhu dunin chanchin kan ngaichang reng a, kan rilru lo hah ve chu kan thaw leh halh ţhin. Hospital a kal te lah an reh vang vang a, zan a rei duh kher mai. 
"U Biakte a damlohna a rei tawh mi?"
"Rei tawh e. Amah hi a chhel ve hrim hrim a, a fel bawk si, dam leh se ka ti e" a ti vang vang. 
"Engtik aţangin nge hetah i awm?"
"Sawmpuia naupanlai aţangin ka awm tawh. Ka awm tirh chuan kum15 ka nia, Sawmpuia chu kum5 chauh. Ka nu hi kan khuaah a lo zin a, kan rethei sia, an bula awm turin min hruai a, school min kaltir a tum a mahse ka kal lo laklawh sia ka kal duh lo a, pawl4 thleng chiah ka kal a, kum15 ve tawh pawl5 a ţhut kha ka zak a. Tihian ka la awm char char. Ka awm tirh chuan ka pi ka ti ţhin a, mahse min 'nu' rawh a tia, ka nu ang tak takin ka ngai. Sawmpuia pawn a u diktak ang chiahin min en a, a pa hi a danglam ber a, tun thlengin ka la pu. Kan inpawh ve dawn tak tak hian a inla hrang leh daih zel. Mahse a fel tho. An fel vek. Ka nu ber hi a awm loh chuan a hrehawm ngawt ang. A damlo hma chuan a hmelţha thei asin aw. A fel bawk sia hmuh hmelţhat a awl lutuk. Kan khuaa ka chhungte thlengin a buaipui a, keiman ka hlawh ka thawn bak te hi a lo thawn belh ţhin a, keimah min hruai hnuah ka naute lehkhazir na thlengin a tum vek" a ti a, a naute chanchin thlengin min hrilh luam. An naupanlaia an retheihzia an sawi tak tak chu a awihawm loh rum rum. Mihringin nun kan hman chhoh dan hi a lo in ang lo thei khawp mai. 


Zanreiah Sawmpuia a rawn haw a, chanchin kan lo zawt vat. An admit thu a sawi. Keini pawh kan lo hnual ve rawih. 
"Coffee ka lo siam ang che. I chau anih kha. In la i harh hawk mai ang" a tih hnuah U Biaktei chu a tho tharh a, kan pahnih chauhin kan awm leh ta. 
"Civil ah mi in kalpui?"
"Aw an doctor zingah ka pa ţhiante an tam a, ka nu hi chu civil bak kan panpui ngai lo" 
"I lo haw dawn laiin a muhil em?" ka tih chuan "Aw" tih chiahin min chhang. 


"Naktuk inrinni a ni tho a, kan awmpui dawn nia, hospital ah a awm tawh a, Puipuii awm ve kher a ngai tawh chuang nang" 
"Awm dawn. Zanin pawh ka pa nen an awmpui ang" a ti a, kan duh dan lo hian thil a awm zeuh zeuh a, tih theih kan nei tlem ve ropui si. 


"Lo mu ve rawh. Rilru buai lai chuan mahni hian awm lo ila a ţha zawk. Ka bulah lo mu zawk rawh" ka ti a, mipa leh hmeichhia ni si inhip tawnna nei lo ve ve kan ni bawk a, nu ber a damlo bawk nen eng thil mah a thleng dawn lo tih ka hrechiang. 


A mutna aia khum nawmzia hrechiang tu a ni bawk a sawm nawn a ngai lo kher mai. Kan mu dun ran a, puan kan sin hrang thung. 
"Eng nge i an tawh? Kan kal hlan khan i lo ţhu ve reng a mi?" a ti a, a ban lukhamin ka lam a lo hawi a, a mutna lam hawisa reng ka nih vangin kan inhmachhawn ran. Kan inhnaih khat a, hetianga kan inhnaih hi chuan a zam awm lek lek ţhin. 


"Aw, ka zia. U Biaktein nachhawkna min pe a, ka ei hmiah. Muhil rawh i chau lutuk ang" ka lo ti ve a, a mitmeng a dul ruih a, a chauh hmel takzet a ni. 
"Zingah ka kal ang a, tlaiah ka rawn lam ang che. Nangchu inah lo awm rawh. Ka pa rawn hahdam ve thung rawh se" a tih chuan a sawi awmzia ka hrethiam mai. A pa awmdan vel enthla turin min duh leh tawh aniang. 
"Ka lo awm ang a, isawi ang chuan min rawn lam ngei ngei ang che. Kal ve loh chu ka tan a nuam dawn miah lo ania" 
"Lam ngei ngei ang" 


U Biaktei nen a chaw kan ei laiin ka pa a rawn haw a, min be lo ve ve. An pindanah a kaltlang a, a rilru a hah ve a nih ringin kan tibuai duh lo. Kan eikham hnuah a hranin kan siamsak leh ang lawi a, ka nu chanchin a sawi luam a, a zia leh deuh hlek a ni awm e. 


Beisei loh deuhin ka nuhrawnin min rawn be hlawl lehnghal a, ka nu damloh thu a hre veleh der tawh. Keichuan ka hrilh miah lova, Puipuii emaw ka pa in an hrilh a nih ka ring hmiah. Hospital a ka kal ve hun tur min zawtin ka kal veleh a a lokal be tur thu te nen lam a sawi a, a bengvar vang nge thildang a awm ka hrethiam rih lo. Chawhnu lamah ka pa hospital ah a kal lehnghal bawk nen, Sawmpuia thu min hrilh kha a dik a nih ka ring rum rum tawh. Min nin vang ngawr ngawr a pasal min neih tir anih bakah hmanrua a min hmang lehzel anih chuan ka enliam thei bik miah lovang. Min ţanpui tur a hmingin pasal ti a sawitur ka nei ve tawh alawm le. 


CONT...