DUMB AND DUMBER-8

 

DUMB AND DUMBER-8

"In va rei ve. Rosy inu a lokal a, a nghak beidawn ţhak che" inchhung kan luh rual a Rintei thusawi kan hriat chuan kan in en he haw a, zanah lehnghal, engti tur a rawnkal nge maw a nih le? 

"Eng nge a rawn tih?" 

"Ipa nen an leng a, a ning deuh niang a rawnkal kawi a, hmuh che a chak hmel nen inrei zek a, papuia'n a lo kawm thiam hlauh zawk a" thil awmdan hrethiam ve lo ta na na na chuan a thil hmuh leh hriat ang ang chu ngaihţhat lohna nei miah lo hian min lo hrilh vek a, kan rilru tibuai tu mai mai. Ka pa diktak ka khawngaih a, ka nuhrawn a hmangaihzia ka hrechiang si. Chiang deuhin manchhuak mah ila ka pa hnen a hrilh a huphurhawm khawp ang. 

"Min hmuh duh chhuanlamin a rawn la kal fo ka ring reng a ni" ka inbual zawh hnuah ka mu meng kar a, Sawmpuia rawn mut ve veleh ka ngaihdan ka lo hrilh nghal. 

"Kal fo ang. Ka pa in awm remchan apiangin"

"Chumi a duhvang chiah chuan aniang kan pahnih a min inneih tir. An inhriatna a lo rei tawh awm hle mai" thinrim ţeuh chung hian ka ti a, Mazualtei kha chu ka rilruah a awm tawh lo hrim hrim. Awm tur pawn ka thik miau lova, a mizia chiah kha ka ngei a, Sawmpuia nen an inkar a thil awm tih velah ka buai lo. 

"Vei run lo la, inthup tum viau mahse a langchhuak zel dawn tho a, nghak phawt ang" tih pah hian min kuah a, min kuah ngun tawh lutuk a ngaiah ka nei tawh. A banah ka lo vuan a, a mutthilh theih nan muangchangin ka chul. Kei aiin a ngaihtuahawm fe zawk. 

"Ka nu thihna ala reiloh nen inhmuh leh an duh hma khawp mai. Kan ringhlel dawn tih te chu hriat ve awm ania. Keini aipawn an mawl daih zawk a nih hi" ka ti leh hram. Mi mawl tak turah min ngai a, engkim kan manthiam ve vek sia. Ka nu Rri berkher hi chuan min ngai lo tawp ang. 

Sammy nen college a kan inhmu chiah chu kan ri leh chel chul. Nitin kan inhmu chung pawn inhmu ngai miah lo ang a awm chang kan ngah. 

"Inpa in Bawihi a tih vel che kha ka lo ţim sung sung thei. A duat dan em em che kha i kutkawr i buntir tawh ni hrim hrim" a nui zui her her a, a rapawm mah zawk. Nupa nun kan hman a ring bur tawh a, peh hel deuh deuh hian min zawt chiah. 

"I zaktheilo. Engmah kan la ti lo. Kan mu tawp. I ngaihtuahna bawlhhlawh lutuk hi ka hne aw" a lu ah ka nem pah sawk. A thle buk a, a dah ngil veleh mai. 

"Nih leh i awmphaw tal kha a khawih tawh em?" 

"Hmh" tih pah hian na zetin lehlam ka hawi nghawng. Mahse college ka kal tirh aţanga ka lo duh ve char char tawh ka hmu ta tlat. 

"Sammy" hawilet chuang lo hian a malah ka kheuh neuh neuh a, amah zawk chuan min rawn hnaihin ka darah a khabe a rawn dah. 

"Timothy maw? I lerh e, i kutkawr pawh ila buntir hma hauhin i uire nghal ringawt dawn ni maw?" ka beng bulah a rawn phur sur sur. Keilahin Timothy ringawt ka lo en. Inkhelh a thiam tawp a, a inkhel lai ka hmuh hnu phei kha chuan ka duh lehzual. 

"Keichu Sawmpuia ţha ka ti zawk. Sawpa ve saw bialnu a ngah tawh si. Tumah a kawp rei thei ngai lo. A lerh lutuk, a biak leh che pawn be ţha tawh miah suh. Hmanah pawh a bia che a, i beisei dawn veleh a reh hmak kha"

"Kha thil kha sawi ve ziah suh. Keimah zawk beisei theihin ka awm lo anih kha. Min duh ang deuh a a awmin ka hmu hreh zel a, college kan kal ţan tirh vel ania, ka la zak ve lawm"

"I zah ve lai ka la hre lo. I biak leh vaih chuan inpa ka hrilh ang" a ti deuh hmak. Tupawh bia ila kan inneih dan kan hre tlang vek a, a thinrim awm chuang lo e. 

Min hmuh veleh Timothy chuan min rawn panin ka bul chiahah hian a rawn ţhu ve a, ka zam lutuk chu ka mawng thlengin a mur chem chem. Ka awm ang hian in awm ve ţhin chiang. 

"I dam maw? I chawl ngun riauin ka hria tunlai hi" a ti a,  hmana kan lo inbiak ve tawh vang khan min rawn nel nghal surh. 

"Nia buaina neuh neuh a awm a, ka chawl tawh lovang. A hma khan ka chawl ngai lova,ka vanneihpui. Dam chuan ka kal leh char char tawh ang" ka lai lutuk chu ka eu ka eu ringawt. 

"Nang Sammy i dam em?"

"Dam aniang chu ka ţhut luau hi" 

"I hmui a sen lo em a i damlo anih ka ring a"

"Lipstick rawng hrang hrang an siam chhan hi eng nge? Englai pawn hmui hi a sen reng tur a ni bik lo" a rukin ka kheuh zeuh a, na tawk hian min lo sik. A ti zahthlak thei e, a chang chuan keimah zawk hian nuam lo ka ti ţhin. 

"Rosy hi vawiin tlai chu ka lo hawh lawk teh ang a"

"A teeuuh lo. Kan haw ţep tawh. I incheina leh i thil neih te, i thiam thil te avang ringawt khan hmeichhia hi infiamnan hmang mai mai suh. Field a football i pet lirh mai mai ang kha an ni lo. Mihring an nih hi. Luck tih vang a bialnu nei duah hi e kan ngaisang hlawl lo" a ti ta zek. Timothy a lo nui hawk a, hua ang pawn a awm duh bik lo. Sammy hi chu mipa phawk zual ţhenkhat ten an chhaih nasa ţhin. 

"Lalsammy hi a uikawm emai, Rosy zanah ka rawn bia ang che" a ti a, a kal veleh Sammy malpuiah ka beng sawk. 

"Ţawngthei zet zawt lutuk. Khati khan lo ti kher lo la chuan tun aia rei kha kan bulah hian a ţhu ve ang" ka ti hrawk. Tun ţum a awmdan chu ka ngei ve thlawt. 

"I tenawm. Pasal ineih tawh kha. Timothy kha i kawp lui anih chuan i inchhir viau ang. I rilru a tih hah hunah min rawn be reng reng suh" ala ti zat zat ngam tho. 

"Bza i hnaih duh vangin Sawmpuia i ţan. Ka hrethiam vek. Timothy ka duhzawk tho tho, a chhelo ka ti zawk fe" hmalama ka sawm rawn uaithla chu Sammy hmai vaw thei ngei turin hnunglamah ka dah deuh sawk a, a vaw pha aniang chu a che hrut. 

"Iva sual kher kher tak"

"Ka mipa duh ve min duhpui lo hi i sual fe"  kan inhnial chho zel a, ngawi zawk nih kan duh lo ve ve. Mahse kan ban hnuah Timothy-a min thlah a hlau a, kan in thlengin min thlah ta tho. 

Ka rilţam em vangin choka ka pan chat. Beisei loh deuhin Sawmpuia a lo haw ve tawh a, thil a lo ei mek. Rintei chuan rawng a lo bawl mek a, midang ka hmu lo. Chair pawh chhuah pah hian "Iva rawn haw hma ve" ka ti a, plate a a cake dah a rawn nawr phei. 

"Ka dawng a, i duh ve ka ring a, ilo awm si lova" 

"I kal leh dawn mi?"

"Aw ka la khar lo. Jerry leh Ruata an awm" 

"Min pe ve turin i rawn haw vang vang maw?"

"An rawn keng a, keimahin ka eiseng lo" a ti na a min duhthu a sawi ve ting tang tawh sia ka ringhlel zo vek tawh. Ka duh let ve thei lo hi hrehawm ka ti letling zawk. Timothy nen kan inhmu fuh leh tawh lehnghal. 

"Duat vel tawp che. Ei ve ka tum a, a phallo reng reng. Ruata nu siam anih kha, cake siam a thiam tehmai nia a tui ngawt ang ei ţeuh rawh" Rintein a tih lehzel takah phei chuan a inpekna vang hrim hrim pawn eitui loh a har tawh. Ei mawlh mawlh pahin Sawmpuia ka va en hram. A nui hmel chu hmuh a nuam viau na a a zah ve hmel. Kei ve mai mai hi zahtlak ka ni lo ropui sia. 

Zanah Sawmpuia a lengchhuak a, a ţhiante zinga a kal ve duh tawh chu ka lawm zawk. Min sawm lui leh tlat ang tih ka lo hlau a, chaw eikham aţangin ka muhil der ngat ngat. An ţhian ho zing a awm kha nuam pawh ka ti lo. 

A sawi ang ngeiin Timothy chuan min rawn call a, a phone number ngai reng a la hmang. Ka lak hmain aw ka thian te te phawt a, ka phurna dahţhain pangngai thei ang berin "Hello" ka ti vel ţat. 

"Min hria em?"

"Hria e" nui ver ver chung hian ka bawkkhup a, min lo biak tak tak ka ring ngam miah lova. 

"Pasal inei tak tak a mi? I chawl ngun em a, i chanchin ka ngaihven a, pasal a nei an ti che a, vawiin khan ka zawt ang che ka ti na a a hranpa a rawn zawh che ka duh leh zawk a" a ti a, kan inneih dan hi ka la hrilh thei bawk si lo, dawt a sawi chi bawk si loh. Chhan thiam avan har tak. 

"Nei a ni mai"

"Eng nge awmzia?"

"Ka nei ve tawp. A thleng phut a" ka ti nawi niaih. A ngawih vang vang hnuah "Ih, nau ipai a mi?" tiin min zawt a, min zawh hreh hmel em em lehnghal. 

"Teuh lo mai. Naupai ila class ka kal zawm reng bik nang. Ka nei ve tawp ka tih tawh kha. Ka pasal neih thut dan chu sawi mah ila i awih kher lovang" 

"I sawi anih chuan ka awih vek" 

"Naktukah ka hrilh ang che. Phone a sawivek theih a ni lo" ka ti ta nge nge. 

Mi hi ka ring nghal ngawt ngai bik lova mahse hepa hi chu ka duh. Ka duhthu reng a pasal neiah min ngaih ka hlau hlur  a, min lo bia se ka tih ţhin ve vawng vawng ţhin kha a ni bawk a, min lo be ta tak tak a, engkim a hriatthiam loh leh thil kal dan zawng zawng hi hrefiah vek se ka duh a ni ber. Midangin min zawt se chuan ka sawibik kher lovang. Ka duhvang a nei ang a min ngaih chuan min lo be uk siin a reh leh daih ka hlau a ni. 

"Awle. Zingah ka lo lam kawi dawn che mi?" 

"Ka pasal neihna hmun i hre ngawt ngawt a mi?" nui chung hian ka lo ti a, ka lawm ru viau thung. 

"Min hrilh ang a"

"Awle i lokal hun tur nen ka lo hrilh ang che. Midang chhuah hun a ngai dawn a"

"Zingah class inei lo mi?"

"Nei tho a, a hma lutuk lova" ka ti leh a, midang hmuh lai chuan ka duh bik lo. A bikin Sawmpuia. Min duh thu min hrilh zo chiah a, a rilru puthmang tlang takin min hrilh zo chiah a, duh let ve thei lo mah ila a hmuh laia mipa dang zui chu ka duh kher lo. 

Darkar khat dawn kan inbia. Kan inbiak rei hnu phei chuan ka tihdan ngaiin ka ţawng leh char char tawh a, dawhthei tak a ka thilsawi apiang a lo ngaihthlak theih zel vang te chuan nuam ka ti. Kan inbiak zawhah message min lo thawn zawm zat lehnghal. Hlim viau mah ila Sammy engmah ka hrilh ngam lo. Sawmpuia rilru ţhatna a hmu ve tawh nge a lam a ţang tlat tawh a, ala ţang zel bawkin ka ring. Hrilh mah ila hun dang angin min lo phurpui chuang lovang. Kei lahin a rilru ţhat vang ngawtin ka duh thei bik si lova, thinlung hi kan ta a ni chung hian thunun a lo har viau mai. 

Sawmpuia a rawn haw chuan ţha deuhin ka lo chhawn a, a inbual hlanin Timothy ka mangţha. Ka inmanchhuah tir dawn lo reng reng. Mawl chhah ve viau ţhin mah ila thiltih ruk hi ka thiam ve riau a, midangin an hrilh anih loh chuan min manchhuak mai mai lovang. A hming pawh 'Pu Thangkhuma' tihin ka save daih. 

"Iva mengrei leh si ve" ni dawn tak. Mutchhuak awm deuh a ka awm leh ka mutthilh der vel kha ka lo theihnghilh daih. 

"Ka harh leh laklawh a, a mak lutuk, chiang tawkin ka harh hlawl" 

"I mit kha chhing lui tlat la i muhil leh thei mai ang" ka piah a a rawn mut chuan keimah zawkin ka lo kuah a, tih ţhanah kannei tawh a, inkuah mai mai chu ka zak vak tawh lo. 

"Ka lensan che sia hrehawm ilo ti em?"

"Ti love, ka muhil char char a, i rawn haw hma lawk khan ka harh a, zanrei a ni tawh turah ka ngai a mahse i lo la haw si lova, a la tlai chhe lo turah ka ngai ve tawp a" ka ti a, dawt sawi ka thiam lutuk chu ka inzahpui rum rum. 

"Ka naupanlai hian ka pa hi zantin a lengchhuak a, ţhianhoin card an deng a, zu an in a, ka nu khan hrehawm a ti ţhin a, zanrei tak tak thleng a nghak a, keiphei chu a lo haw hma in ka lo muhil hman ziah" a ti a, thildang pawh min hrilh ţhin. Kan inneih aţangin thla tam la liam lo mahse a inhawng sawt hle a, a thil vei leh hrehawm a tih deuh te hi min hrilh chang a nei ţhin. A pa anga awm ve hi a tum lo bur a, chu chuan min ti thlamuang. Kan inneih reng loh a hmeichhe dang a nei leh anih pawn, Sawmpuia nupui anih chhung chuan hrehawm a ti lovang. A nu khan hmeichhe ropuina a hriatchian tir a, a nu ngaisang em em tu chuan a nu thusawi chu dik berah a ngai vek a, a pawi ka sawi anih ngawt loh chuan dik lo deuhin min enkawl lovang. 

Zingah a chhuah hnuah Timothy chuan min rawn lam ngei a, kalkawng inhrilhin kan buai rei hle. Sammy hnenah min kalsan turin ka hrilh a, ka thil tum a rawn hre nghal chat. Rin ang ngei ngeiin a lawm lo kher mai. Reilote kan inbiak chhung pawn min rawn vin hrep hman a, a ţawngthui hmain ka dah hmak. 

"Lokal rawh le, in in awmna i sawithiam lo si" tiin min fiam a, Sawmpuia nen an bike a inang chiah lehnghal. 

"Thla thum thla li vel chiah ka la awm a, hre bel han tur chuan min beisei bik lo la" tih nang nang pahin ka lawn ţawi ţawi. Ban hun a inhmuh dan tur vel sawiin rem kan ruat a, Sammy pumpelh kan tum nen gate bulah tum vuau chungin a lo ding. Timothy chu kal hmasa tur a hrilhin ka nam dawr dawr a, kan ţhiandun a kan thil sawi hreve vek lo se ka duh. 

"Ka tlai tawh tho tho. Lokal rawh canteen ah kal lawk ang" tih leh a kut a kaih ka rual a, ngawi rengin min zui ve hnak hnak. Sammy ka thlem thluk theih phawt chuan ka rilru a nuam ve deuh ang. Ka ţhianţhaberin min tihtauh san daih anih chuan min kap run tu a awm reng dawn a, ka tlawm bik vang ni lovin ka rilru nawm nan chauh a ti ka ni. 

"I duh duh chah rawh ka treat ang che"

"Tehreng mai" a thil chah ho ka en chiah chu ka meng phar nasa. An thil neih to to panga vel a chah. 

"I eiseng dawn mi?"

"Chaw ka ei lova, tlaiah leh chhunah thil ei ka tum lo. Chumi ai chu tunah ka ei vek ang" a ti mauh mai si. Pawisa ui viau mah ila a lungawi nan chuan tiin ka chah a, ka ta tur thingpui cheng10 man ka chah tel. 

"Thawnthu ka chhiarah leh drama ka en zawng zawngah pawh induh reng vang ni lova chhungte tihluih naa innei reng reng hi a mipa in an tiduhdah a, nuam sa in an awm ngai lo hrim hrim. Nangchu i pasalin a duat che a, mipa zawk lehnghalin hrehawm itih a hlau em em a, a bialnu hlui doctor lai lehnghalin la duh em em mahse a be duh lo hmak a, a duhna che hi a pianchhuah hma pawn a ti hrehawm chuang lo che. A duh loh vang ngawt chein hmeichhe dang a biak phah lo. Hmeichhia leh a nupui inih angin a zah em em che a, a tih theih ang ang chu a tive in ka hria, chuti chung chuan ila lawm zo chuang lova, i bialpa pawh nilo i star mai mai, duh duh hun a be duhlo tu che i pan leh dawk dawk a, chupawh vawikhat 'i dam em?' a tih mai mai vang chauhin. I lo nep khawp mai. I mawl chi thuhran, i chhaw, engmah i hmuthiam lo" a ti duah a, ka ngei ru kher mai. Thinrim viau mahse hetiang em em a sawi ka ring miah lo nia. 

"Ka chhaw lo, nang aiin ka fing fe" ka uang lui. Kan boruak a san hlauin fiamthuin ka chhang lui zaih. 

"Fing a i inngaihna tak kha i chhaw lehzualna anih kha. I mawl hlum lo chauh. Timothy hian a ngainep ru viau ang che. Nakinah chuan Sawmpuia hi ila ngai ngawih ngawih ang. I tlai ka hlau hlawp mai. I mualpho hrep hnuah i tihsual hi i hrechhuak chauh ang nge aw" 

"Chutiang sawi duah angai lo. Timothy nen a inngaizawng tawh ang maiin alawm min sawi le. Nangphei chu ka ţhianţhaber inia, ka duhzia i hrevek a, min hrethiam ber tur inia sin" ka ti a, a kut vawn ka tum chu a lasawn hmak. 

"Engkimah ka hrethiam zel che. Mi mitmei ven nachang hrelo khawpin i thlavang ka hauh ţhin a, min hruai rawh i tihna apiangah ka hruai ţhin che a, tun ţum a i thiltih berkher hi chu ka pawmpui thei lo che. Sawmpuia hi i chungah sual viau chu nise midang nei daih mahla pawi ka ti lo. Mahse ţhat a chhuah nasa a, a nu in a boralsan lehnghal. A mamawh lai takin nangchuan mipa dang i melhsan a, ka hrethiam thei hlawl lo. Timothy hian a duh lo che. Eng nga tan mah a ti lo che. Tunah pawh a ngainep ru viau ang che. A mutpui che ang a a ţhen lehnghal ang che"

"Chutiang chuan mi min lo hmuh a? Mipa in an duh hun hun a an mutpui theih turin min lo hmu ţhin maw?"

"Ka hmu ţhin lo che. Mahse Timothy hian chutiang chuan a hmu ang che. I inpek hma poh leh a kalsan hma ang che" 

"I mi ngei zawngte hi i hmuchhe ve ţhin hrim hrim. Timothy min ngaihdan tur thleng thlengin eng tin nge ilo hriat theih bik a? Hmanah khan kan inbe nasa ţhin a, chutiang mi chu a ni lo. Mipa leh hmeichhe inkawp reng reng mu dun nghal zel turah i ngai vek alawm" ka ti ve ta nge nge. Ka insum zo tawh bik lo. A thinrim hian a duh duh sawitheiah a inngai bik ziah. 

"Nih tak chu. Kan la hria ang. Ala ti na dawn khawp che. I inhriat chhuah hunah Sawmpuia hian a pawm thei tawh lovang che tih ka hlau ngawt mai. I nihna leh dinhmun te hi hreve rawh. Ipa in nupui dang a nei a, a nupuiin a ngaihtheih loh vang che in an hralh che a, an hmuhsit theihna tur che in awm mah ta che"

"Khanglang a, hmeichhia nge mipa ini tih i inhriat bik tawp loh kha. I mipa nihna kha pawmin hre hmasa phawt rawh. Chumi hnuah chuan min zilh chauh dawn nia, miin an hmuhsit leh sit loh che i hrebik ngawt a mi?" ka ti ve ngat. 

Min melh ram ram hnuah a tho thut. 

"Ila inchhir khawp ang. Timothy nen chuan inkawp ula, nuam itih dan ber khan han tal kual vel teh mawlchhahnu. Kan thil chah zawng zawng te kha eivek rawh. Chaw ka ei ţeuh, i pawisa tih hek nan a ka chah a nih kha. Ka ţhiannu chu nilo la ka beng hrep ang che" a tih hnuah a chhuak tau nghawng nghawng. 

Kan thil chah lah chu keimah chauh a eizawh sen rual a ni hlawm lo. Timothy bawk chu ka ko leh ta ringawt. 

"Sammy chah vek anih kha. I eichak zawng a awm chuan ei rawh"

"Khaw nge amah hi?" ti a min zawh pahin a hawikual a, ka lo thaw halh. Ka thawpik a reh thei chuang der lo. 

"A titau a, eng emaw thilah kan inhau a, a lungawi leh mai ang. A titau ziah a, a titau rei ngai lo. Reilote chhung chu ţhian kawm tur ka nei dawn lo anih hi" ka ti a, ka nui hul hak. 

"Ka awm hi" nui chungin a awm a dawm a, "Kan inkawm dawn nia" a tih zawm a, tlem chuan ka rilru a nuam deuh. Mahse Sammy tello chuan eng thil mah nuam ka ti tak tak ngai chuang lo. 

CONT..