DUMD AND DUMBER-9

DUMB AND DUMBER-9

SAWMPUIA-9

"Ka ţhiannu in lo be rawh a ti che a, model lehnghal. A birthday a nih vangin an ţhian ho a shooting neih mai mai an duh a, a ţhiante pawh an chhe lo viau ang. Ka lokal dawn" Bza a phur khawp mai. Hetiang ti tur hian min ko ve zeuh zeuh. Dawr hi vil ţhat ka duh vangin ka lo pawm vek ngai lem lo. 

"Chhelo i hmuh theih viau chuan Sammy a lungawi lo ang e" 

"Sawi ve ziah lo teh" a ti hluk. Ka hmaa chair ah rawn ţhu thla hnawkin dawhkanah a kiu a nghat a, school naupangin xerox tur an rawn dah ka ti zo chiah a, keipawh ka intih hahdam ve lai tak. Ka vannei a, kawn an lun lai a awm ka nih vangin zirlai naupangin min pan nasa. 

"I thil sawi chu ka ti lo mai dawn mawnle"

"In nu i hlau a ni maw?" min kawk zawk a, a nui zui vur vur. 

"Hlau hran love. Kal hlat a ngai em a a peihawm loh"

"Model dang te a lo hruai maithei sin. Inkawp kher lo mah ila hmuh an nuam ve hrim hrim a, an mal ringawt pawh a hmuhnawm alawm. I nupui tereuhte ai chuan" a ti a, a nui zui hawk hawk. 

"Tikhan ti suh a hlauhawm ania, a hriat vaih chuan vui liam nghal rum rum i ngai maithei" ka ti fiamthu a, hmeichhia ang hian a che khat khawp mai. Kan inneih hlim kha chuan ngainatna ka nei hran lo. Ka enliam mai a, ka nu khan ţhat chhuah turin min ngen nasa ţhin. Ka nu kiang a ka awm apiangin a chanchin min zawt a, 'a phalna la hmasa lovin a zalenna kan laksak a, i rilru pe thei lo mahla ţhat chhuah hram hram rawh' a ti ţhin. Châk lo chung chung a ţhat chhuah luiin ka belchiang zel a, hmeichhia a nihna theihnghilh ţhak a awm chang a ngah. A nu ve zem lova, intih nalh leh mipa mit lak tum hrim hrim a a khawsak a a inchei lai ka hrengai lo. A rilru a awm ang ang a sawichhuak phawng phawng a, ka nu damloh zual hnu aţang phei kha chuan kan inpawh lehzual. 

Thiam lo viau mahse min hnem dan a zawng ve reng a, ka nu lah a theih tawpin min enkawlpui. Keimah chiah a ka tawrh hlauin ka hnaihah a awm ve hram hram a, ţhat a chhuah ve a, min ngaihsak ve tak hnu kha chuan amah hian min hip hret hret. Nileng a kan inhmuh loh te hian ka ngai a, a duhzawng ka hmuhin ka hrechhuak ziah. Thla tlem te chhung a min hip nghal thei mai hi a makin a awihawm loh rum rum. Mahse min hip miau sia, ka hmangaih leh hmangaih loh inhre lo mah ila ka duh tih ka hria. Ka bul hnaia awm reng turin ka duh a, ka hmuh phak loh a a bo daih ka hlau ber tawh. Min duh let ve se ka tih viau laiin a rilru ka la sawhsawn sak thei rih lo. A pasal angin min en ngai lova, a chung a ka thil tih leh ţhat ka chhuahna te hrethiam turin a ngaihsak ngai lo. In ngaihsak tir deuh dan lah ka thiam der lo. 

"Tihsak hram mai teh. Hey ka thusawi i ngaithla em? Veng vung che hian" a hmai zawnah a kutphah a vai lauh lauh a, ka nupui hlir ka lo ngaihtuah. Ka duhna lai ber sawitur hre si lo hian ka duh a ni tawp mai. 

"Engtikah nge an duh? Midang biak tur an tam tho sia, i hmuhchak vang mai mai a ni lo maw?" 

"Ni pakhat e. Ka hmuchak, an han ding ing euh vel lai te hmuh a chakawm a, awm pho lah khan hnunglam an han dah er tan ang a, an kawchhungah ramhuai a lut em mawni tih mai tur khawp a an han awm ing euh ngat phei hi chuan a hmuhnawm ting" a tih chuan ka nui chhuak ta hawk. A hmangaih a a duat theih pur pur nen, bialnu a nei rei thei reng reng lo ringawt. 

"Kan ti dawn nia. Nupui tur zawn nan lo hmang keuh la"

"Teuh lo. Nupui ka la nei ve peih reng reng lo. Min thunun tu an awm tawh dawn a, min koh duat poh leh kan hah ting a ni mai. Fa innei ang a, i hremai ang. Pa-a a tih hnap tawh chuan a ţul ang ang ti vek rawh a tih naah i ngai tawp a i ngai sual lo khawp ang. Ka thawmhnaw bal an suk dawn a nauten aw an then kharh kharh pah a an kawng an chum zeuh zeuh hma chu ka nei dawn lo" a ti a, a pawr chhur chhur khawp mai. Kan ţhianho zing a hnathawh mumal nei lo awmchhun a nia, a rilru a hah ngai lem lova, a awhawm phian. A pa hi doctor lar ve tak ţhin a nia, tun thlengin zah ala kai. Clinic a hawng a, damlo a ngah phian zel. A unaute ngaihtuahawm tur an awm lova, Bza hi a ni mai. Rinchhan tur nu leh pa leh unaute ala nei a, kei ka pa ring a nun ka tum lo khawp. Ka inren a, ka thawhchhuah ang ang ka khawl ve ţhin. 

"Chutia nupui neih i duh loh viau leh pasal nei mai la, Sammy a awm hi" ti a ka fiam leh lai chuan a nur nang. 

"I duh leh nangman nei la ti nia"

"Nupui ka neih tawh hi. No deuh i duh nilaw mi? Duhthusamin a no alawm"

"No thuah chuan a no khawp mai. Ka bula a awm ngat phei hi chuan samzai pakhat pawh a vuak thluk tawp theih ang chu" ti a a nuih vur vur thuah thutak deuh hian "A mak ngawt mai. Mipa mi ve si hmeichhia ang a an awm châk tlat ţhin hi. Mipa an nihna chhinchhiahna lah hi an nei ve tih midang aiin an hrechiang awm sia, an zing thawh apiangin an hmu ang a, zanah an hmu ang a, inbual lai lahin a fai ve tho a ngai sia, heti chung a mipa an nihna an pawm duh tlat lo hi thil mak ve tak pakhat a ni" a ti a, ka pawmpui zawng tak a ni. Enkawl danin a zir te a ngai ve a, vulh lian lo bawk ila a ţha. 

Tlai lamah Rosy chauh hmel tawkin a rawn lang hlawl. Bza a haw hman chiah chiah a, haw hman lo se chu birthday present an inţhing ngei ang. Bza ţhutna chair kha chawisangin ka bulah ka hung a, muangchangin a rawn pan chhat chhat. 

"Iva lungawi loh hmel ve" ka tih lai mek mekin ka chair dahah a ţhu hnawk. Chhuatah a bag a nghat chawrh a, hetiang a mi an awm hian thil thleng tur awm ang ka chhuizawn thiam ţhin lo. A lungawi loh zia erawh a lang chiang thawkhat. 

"Sammy an a lo bia che em?"

"Be nang, class a kal na nge?" tiin ka lo zawt let. Zawi zetin muangchangin lu a thing ne ne. 

"Ngati nge i haw tlang loh?"

"Ka rawnkal kawi chuan i bula awm ka duh a ni mai lawm mawl lutuk" vin zet a a tih hnuah a tum zui bar. 

"I rilţam em?"

"Ţam lo ka eihnem lutuk Sammy vangin. A chah ţeuh a engmah a ei leh duh der si lo. A kal daih lehnghal a, pawisa ka sen ţeuh phah. Ka ning hepa hi, a tihtauh lah hian hrehawm ka ti zel bawk si" ka darah a lu dahin min rawn ngheng a, a awm zawi hnak. 

"In inhau mi?"

"Hau e, mahse a nasa lo. Kan thu a inhmu lova, va be miah suh. A lo biak che pawn lo chhang reng reng suh"

"A phone number ka nei lo" ka ti liam satliah a, ka nupui mah nise a ţhiante nen a an inkar lehzelah chuan ka inrawlh ve châk hran lo khawp mai. 

"A ţhat chu. A lo biak che pawn Sammy a ni tih i hriat chuan dah daih rawh. Keiman naktukah ka sawifel leh vek thei tho ang" a ti zat zat. An buaina ber hrelo mah ila a ho leh viau tho ang. 

ROSY

"Naktuk tih tur ka nei a, chaw eikhamah ka chhuak ang a, ka lo haw tlai ka ring" a ti a, Sammy nen an lo inbe lo chu a lawmawm. A dar a ka lu nghatin nuamsa deuhin ka ţhu der der a, a thusawi ka hriat chuan ka melh chho ve tak na a ka lu ka tihchet ţhat peih loh vangin a hmel ka hmu thei lo. 

"Khawnge i kal dawn? Avan pawimawh awm em em. In picnic dawn mi?" dawr khar meuh a a tih tur chu a pawimawh ka ring ve tawp mahse a tih tur min han hrilh chiah chuan ho ka lo ti viau thung. 

"Dawr hawng la i hlawk daih zawk ang" 

"Inzirna zel. Rilru ka siam fel tawh a, Bza'n anmahni lam a lo hrilh tawh bawk a, ţhulh theih a ni tawh lo" a ti deuh hmak. 

"Ka khua lo sik ta che" 

"Damdawi leh ka chhungte an awm a" nem sawk pahin ka inla hrang a, thinrim ang deuh a awm chungin ka melh run bawk. Ka lam lo hawi ve in a hmui a liak zeuh a, a inthlahrun ve deuh ka rin laiin ka awmdan a hmuh chuan a nui daih. 

"Min nuih vel lo mai teh aw" 

"Lokal ve la, a hmun a nuam asin. Nalh deuh deuhin thla ka laksak dawn che nia" 

"Peih lo. Ka kal ngun tawh emai" ka lo ti duh lek. Timothy kha kan veng thleng a inthlah tir ka duh si lova, Sawmpuia dawrah ka kal ta ringawt. A ni lah model thla a laksak dawn vangin a lo lawm em em lehnghal. 

"Kal leh tho la"

"A nuam lo emai, hmelhriat loh hlir an ni dawn a ka kal peih lo. Rilru nuam deuhin va kal rawh" ka ti ta zawk a, a dik lo zawk ka nia, ka thunun theih a ni lo. Tunah phei chuan kallo turin ti lawm lawm mah ila a kal tho ang. 

"Kal dawn e. Kal a ngai tho tho sia rilru nuam lo deuh a kal ai chuan rilru nuam deuhin ka kal ang. Kal ro ro ah a in nawm hleih dawn emai" 

"Dikchiah, rilru kha a pawimawh" ka lo ti vat. Sammy ker kawr vangin rilru nuam lo tawkin ka awm nileng a, ka biak leh vang maiin inngaizawng ngei ngei turah min ngai ringawt. 

"Fimkhur rawh aw. Nula te kha va melh nasa lutuk lo la" tih pah hian ka kuah a, chaw kan ei hma a, tlai a hlau bawk aniang a insiam zo hma khawp mai. Min lo kuah let ve vat a, nupa induh deuh kan ang ve. Mahse ka tih ţhan ania, ka bula awm te kuah thuak thuak hi nuam ka ti ve hrim hrim. Ka duh dan tak phei chuan kuah pah hian han uai ngei ila, chutianga tih theih law law chu kuah an nuam Sawmpuia ang hi. 

"Nula rim te kha i rawn nam haw rum rum ang e" 

"Ka tih tur chin ka hria, nangpawn lo hre rawh" min ti a, a tak run a, hriat ruk nei a ang zawk. Thil ţha lo kan tih hi chuan ho te te ah pawh kan hlauthawng nghal zel mai anih hi. 

"Tehreng mai. Ilo haw vat dawn nia" rilru nuam lo ru deuh chungin kawt lai thleng ka thlah. Sammy bakin Timothy chungchang a hre lova, zanah lah Sawmpuia'n a ţhianpa Bza bak a biak lai ka hre lo. A ţha lam zawng hlirin ka ngaihtuah lui tlat. 

Class kal turin keimahin ka chhuak a, Timothy ai chuan Sammy hmuh hmasak ka duh. Kan la inbe leh miah lova, ka ţhianţhaber a nia, a tihtauh hian nuam ka ti hlawl lo. Gate bulah kun ngul chung hian ka ding a, kal thawm ka hriat apiangin ka hawichhuak zel. Mi tam takin min kalpel tawh a, ka nghah ber Sammy a lo lang ve thei lo. 

"Biak iva har ve?" phur lo tawkin ka hawichhuak leh a, Timothy a lo ni. 

"Min lo bia maw?" ka ti ha a, bag ka zen nghal ruk ruk. 

"Be love, biak che ka tum. Biak theih la chuan ka bia che ni mai tur"

"Uang lo teh, rilru hah nak laiin"

"Sammy bawk a mi?" 

"Ni e. A lokal thei si lova, a lokal hma chu hetah hian ka lo nghak dawn" ka ti a, zanah ka call nasa a la duh lo hrim hrim. 

"Vawiin chu kan ti ti thei tawh ang ka lo tia"

"Sammy lungawi hunah" ka ti bung nghut. Ka pasal neihdan ka hrilh ang che ka tih kha hrilh lovin ka la awm. Sammy kal hnu khan ka ko ngei a, a ni paw'n min zawt ngei mahse engmah ka sawi lo. Ka ţhianpa ka ngei viau chung khan ka hnual rawih tho a, Sawmpuia hnen a a sawi hlauhna zawng zawng nen, rilru khingbai deuhin ka awm nileng zak a, class a ka awm ve pawn eng thil mah ka ngaithla tui lo. 

Timothy chuan min nghah puiin ngawi rengin kan ding dun a, ka rilru ka kawm pah melh melh. 

"Ţhu teh ang. Kan nghahchhuah loh hmel si, din rei aiin ţhut rei a nuam zawk" a ti a, midang dal si lovin step ah kan ţhu a, Sammy chu biak ka tum leh. Vawikhat a ring a a busy nghal zel. Whatsapp ka en a, a last seen a lang va bawk si. 

"Hepa ka ngei zia hi call ah min block hmak" thinrim zet a ka tih chuan Timothy pawn ka phone a rawn bih ve vat. Message ka thawn a, a thlang chiang kuang em em mai sia, min block duh khawpin a thin ka lo ti rim anih dawn hi. Tih tur dang awm hek lo, tun dinhmun a ka pasal neih dan han sawivel lah ka peih der lo. Whatsapp bawk ka en leh a, Sammy status ka zawng. Beisei ang ngeiin a rilru nat thu vel te a lo hmang kur ngei nguai a, mahse a tawp ber a ka hmuh erawh ka beisei loh ber te zing a mi a ni hial ang. A rilru na kha zing nichhuakin a em bo vek a ni ngei ang. Scooty nge bike ka hrelo, eng zawk zawk emaw hnungah chuan a chuang ngei. Hmui ti pawrhin a chhing sung a, caption ah 'Vawiin chu camera inkah det tir chuai chuai teh ang. A nuam dawn lutuk hi phurthak sawm velin min bawm mek' tih hi a dah a, emoji a dah tel nual. Sawmpuia te kalna ka hrechhuak nghal a, hmun inangah an kal tak mialin tiin Sawmpuia biak ka tum a, phone a la thei lo. A beidawnthlak duh khawp mai. 

"Lokal teh. I rilru lakpen nan ka ţhianpa te inah kal mai teh ang. An nupa an indang ve a, inthar lawm pah a ni mai" 

"Kan rei angem?"

"Rei lovang. Ţhut reng ai chuan a nuam hrim hrim" a ti a, min kai a ka zui ve hna hna. Rilru nuam vak lo chungin ka hawi let a, class kal loh leh ringawt zel chu thawven vawk a har ve em a ni. 

A ţhianpa te in chu rin aiin a lo lun zek. In thar lawm tur annih thu an lo sawi na a ka awih lo khawp mai. An hmeichhiate lah chu ka hmuh ngai loh hlir. Anmahni enin an changkang lo tih a hriat. A ţhianpa nupui chu a mi pangngai ve hmel ber a, mahse a ni pawh a rui chiang. Timothy chu ka melh leh zawk ţhin a, a ţhiante ho nen an phun sur sur. Kil khatah ţi dekin ka ţhu ve a, amah leh a ţhiante chu inrem lo tak an ni. 

Mi pathum vel pindanah an inzui lut a Timothy a tel ve, ngawi rengin ka hawikual hrek hrek. An ri dar dar reng a, min fiam zuk zuk hlawm. A tenawm zawng a an ţawng phei chuan ka chhang let ţep zel. An rui tawh sia, an thin ka ti rim ang a ka mualpho ka hlauh vangin ngawih ka chuh mai mai. 

Ka bula rawn ţhut pahin Timothy chuan min rawn kuah a, zu rim a nam. Midang ho lawm tawk a lo tling em em lehnghal. An upat hmel tawh hlawm em em mai lehnghal. Sawmpuia te ţhianho nen ka tehkhin lo thei lova, an fel fai a, min fiam ve luam ţhin mahse ka ngaihtheih loh tur zawngin an ţawng ve ngai lo. 

"I in ve duh em? Va in ve la, Sammy ngaihtuah reng lovin min hrilh duh zawng zawng i sawi par par tawh mai ang" a ti a, min hnaih sawt khawp mai. 

"Ka inpeih lo. Zu i in dawn tih hria ila chu ka lokal ve miah lovang. In thar lawmna pawh a nilo. Zu zawrhna hmun a ni ringawt" tih hlak hlak pahin inlak hran ka tum ve ngar ngar. 

"Min zui tawh tho a, i nin loh nan va in ve la" a ti leh a, ala rui lutuk lo na a hlauh rukna ka nei ta tho. Inkawm khawm pahin an in pah zel a, a nghak tu tan chuan rei duh tak a ni. Sana te chu a kalmuang riauin ka hria a, Timothy pawh ka ning sawt hle. 

Chaw ei turin min ti a, lo hnar nasa viau mah ila ka kalpuipa in a lo remti hmak. Khua a thim thet thet tawh a, ka chhungte ngaihdan a ni tawh lo khawp ang. 

"I duh chuan ei la keichu ka haw dawn" ka ti a, nileng a kan hun hman dan kha ka ngaihtuah let peih tawh lo. Min fawh a tum a, ka mal te a chul a, kekawr chhanah mah nise midang hmuh laia khatianga min ti kha ka thinrim hlur. Ka duhna a rei ve tawh nen ka lo hrechiang lo khawp mai. College a a landan phen a a nun duh dan hi a ţhing ngawih ngawih. Haw ka tum hlekin midang upat hmel deuh deuh awm ve ho khan min au lawng lawng reng a, a ţhenin min pawt bet thul. Tun thlengin ka la awm ve phah. 

"A ngai lo. Reilote awm leh ila ka thlah ang che"

"A ngai lo. I phurh ka ngam tawh lo. Tikhan iduh chen chen awm la, engang pawn min dang ula ka kal lui tho ang" ka ti ve tlat a, 'haw mai bik lo ang' an lo ti leh sup sup tawh, hmelchhe hlawm ropui si. Timothy lah a zawi nguai tawh a, haw pawh a haw thei lovang. A inhnem bawk em a, ka khap ve lahin awmzia awm lo nasa. 'La awm ve rawh kan haw rual dawn nia' min ti char char tu hmeichhe hmel pangngai deuh awm ve lah chu pindan lamah a chatthla hmak. Ka chhehvel a awm te ka enkual a, Sawmpuia ka ngai ve lek lek tawh. 

Ka phone kenlai a rawn nghawr der der a, Sawmpuia a lo ni. An bengchhen em vangin bathroom ah ka tlan lut. 

"Sawmpui ka ţhiannu te inah ka awm. A nuten chaw eiah min sawm a" ka ti nghal zawt zawt a, lehlam aţangin ţawng nuaih nuaih ka hria a, ala haw bik lo anih ka ring. 

"Rosy, inpa hi a accident a" an rawn tih chuan min ţhawng kher mai.

"Engmaw? Min rawn tihder miah su aw, khawiah nge amah hi?" ka ti a, ala ri mur mur reng. 

"Tihder lo. Mahse ngaihtuah suh, hei kan buai zual a zo tawh a, a na vak lo, an na lo ve ve, i chhungte lo hrilh la, hospital ah kan tlangpui ang"

"A biak theih loh mi? A harh em? A biak theih chuan min lo biak tir teh" ka ti mawlh mawlh a, ka thinphu a rangin ka kut thlengin a khur der der a, hlauhna hlirin ka khat a ni ber. 

"Hey Bawihte, ilo hlauthawng ang nge aw" a aw ka hriat chiah chuan ka ţah a chhuak ut ut. A chhan ka hrebik lo. 

"A na em?" ti a zawh pahin bathroom kawngkhar nghengin ka ding a, ka aw a khurh hlauin ka hmui hnuai lam ka seh ngat ngat. An buaipui zawh vek hnuah min rawn hrilh ve chauh a ni ngei ang. 

"Na love, ka luhai deuh a, a reh vek tawh. Lo mangang lo ula, kan lo thleng har lovang" a ti a. 

"Ka kal nghal, ka lo nghak ang che" min chhang let tawh lo. Midangin min rawn bia a, hlauthawng lo tur bawkin min rawn hrilh leh. 

Bathroom aţangin hmanhmawh tawkin ka chhuak a, ţhutthleng a ka bag dah ka lak laiin Timothy chuan ka banrekah a lo vuan a, na zetin ka phih let dawrh. 

"Tikhan nangmahin iduh chen chen awm rawh" ka ti a, midangin min lo dan tum ve mah sela ka tawn pawp pawp, a hma ang dem dem kha ka ni tawh lo khawp mai. Midang mitmei ka veng buai peih tawh lo. 

Taxi ka la a, kan veng hming ka sawi hnuah nghenchhan nghengin ka ţhu awn diai a, ka hlauhna ala reh thei lo. Ka kut khur der der chu ka invawn thlak chhen a, a na lai ber min rawn hrilh duh lova, hosp ital kal ngai an tih vangin ka ngaih a ţha tak tak thei tlat lo. Min rawn bia in a aw ngei hre mah ila eng emaw min hrilh tel duh loh a awm ka ring ru tho. 

CONT..