TRUE LOVE

 

TRUE LOVE

"I mak e, mipa dang i hmuzo hlawl lo em ni? Tlawmah te hian la ve em em tawh la, a sim thei lo. A lerh te, a ruihhlo tih te hi a sim thei lo. I ngaidam a, hun ţha i siamsak a, a hun ţha neih pawh bawhchhe zel duh a nih hi" ti a ka ţhiannu Afeli ang bawrh bawrh chu lo khap ka tum lo. Min khawngaih vang zawk a ni. Mipa pakhat lek vanga ka hrehawmna hi tawp tawh turin a duh a, a ti tawp thei ber kei lahin ka tawpsan thei si lo. Ngaihtuah tawh loh a duhtawh loh ka tum apiangin ka hriatna ah hian a aw ri te, a thil tih ţhat ve chhunte a lo langchhuak leh ţhin. 

Ni e, ka bialpa Lalhriatzuala hi mifel tak a ni lo alawm. Ruihhlo a duhin lerh ve zeuh a hrat a, a ruih pui theih ţhin te a rukin a lo kawp veleh zeuh ţhin. Ţhen ka tum lahin harsa ka ti tlat a, Afeli'n min khawngaih ang bawk hian ka khawngaih a ni. A hnaivai a awm te hian kei angin an hmangaih ve lo. 

"Tunah pawh kan ţhenawm lawk a Manuna te inah a hmeichhe kawp nen an awm leh tawh saw. Saw mite in lah saw a zalen a, an rui luih luih a" a la ti tan tan a, ka beng a verh lehpek khawp mai. Afeli te nen hian kan inhlat lova, zanrei a la ni lo bawk nen, keimah ngei hian hmu ve ila ka duh. 

"Va kal lawk ang" tih leh kan in aţanga tlanchhuah ka rual a, duhthlan tur dang a nei lo. Min ngaihtuah vang liau liauin min rawn umzui. Manuna inah chuan kawngkhar kik buai lovin ka lut tlang a, min lo en ţhap. Hriatzuala ka hmu ve lo. 

"Khawnge Hriata?" ka tih lai mekin Afeli a rawn thleng ve chiah. 

"Kan hre lo. A rawnkal zuai a, a haw lehnghal" an lo ti a, hawihhawm lo nih huamin an pindanah te ka en a, ka hmuzo lo. Ka awmdan avang chuan lawm vak lo mahse ka ngai pawimawh peih lo. Ka hmuh duh ber ka hmuh tak loh vangin beidawng zetin ka haw leh. 

Hetiang em em a nasa a Hriata ka buaipui hi ka chhungte ngei pawn mak an tiin min zilh ngun phah hle. An sawichhiat nasat poh leh ka khawngaih ting a ni mai. Keichuan a nun ka hrechiang a, a ruk a a hrehawmna ka hriatpui. 

Nu leh pa a nei tawh lova, a ute nen an cheng. Doctor ka ni a, ka zirzawh hlim internship ka tih lai hian apa damlo a rawn awmpui ţhin. A taksa a hruksak hliau hliau ţhin a, a thiam ang angin duat takin a enkawl ţhin. Khatih hunlai khan a rui ngai lova, fel kan ti ru viau ţhin zawk. 

Ka duty zo ka haw dawnah canteen ah ka chawl kawi a, chutah chuan amah chiah a a ţhu ka hmu a, a hmaa eitur inchhawp chu khawih lovin rei tak a dah a, a inngaihtuah muk hmel hle. Puih theihna ka neih takin tiin ka plate chawiin a hmazawnah ka ţhu a, min lo ngaihsak lem lo. 

"I eitur kha a dai ang. Dai deuh i eipeih a mi?" ka tih takah chuan ka awm ve tih a hrechiah a nih hmel. Apa a buaipui nasa bawk a a chauh hmel khawp mai. A mit a sen ram a, a sam a tuai thur nasa hle. A hmel rum tak phenah chuan lungngaihna a inphum tel ve a ni tih tu tan pawh a hmuh theih ngei ang, an chik phawt chuan. Jacket pan te a hak ban chu uluk lo deuh hian a inthlep a, a banrek a a sana bun man to tak chuan an rethei zawk zawk lo a ni tih a lantir. 

"Ipa i enkawl lai ka hmu ziah che a, ivan fel em em. Nangmah ang rual mipa lehnghalin itih ang diak diak khan an ti ve vak miah lovang" tiin ka fak a, ka hmuhdan diktak a ni. 

"Ti tur dang an awm lo" min chhan ka beisei miah loh lai a chhanna ka dawng chuan min ti phur sawt. 

"Ipa nen chiah a mi in awm? Khawnge i nu?"

"A thi tawh" 

"Ka tihpalh. A pawi hle mai. Min mamawhna a awm chuan min hrilh la, ka pui ţhin ang che. Tunah pawh hian ka awl tawh" ka ti a, boruak tih zangkhai tumin ka nui lui zui hak. 

"Tumah ka mamawh lo" dawhkanah pawisa a dah a, a chhuak nul nul. Nui sak chungin a pawisa dah chu ka la a, ka ei man nen counter ah ka pe rual. Ka puih vawikhatna. 

Ka duty zawh apiangin a ţhian ang a insawiin apa khum bulah reilote ka ţhu ve a, apa erawh chuan mumalin thil a hre tawh lo. Hriatzuala chuan min ngaitheilo ţhin viau mahse ka tilui zel a, min hnar ngaihna a hre tawh bik lo. An pafa chiah a an in awm reng ţhin chu ka khawngaih em a, zahtheihloh ka chhuah lui ve ngat ngat. 

Tlaiah nidang ang bawkin ka kal leh a, nutling pakhat a lo awm ve hlauh. Chhawk tu a neiah ngaiin ka lawmpui hman viau a mahse Hriatzuala nu thi ta ţhiannu a lo ni. A chanchin ka zawh ka zawh takah chuan "A ţhian ini sia, a chanchin engmah i hre lo a maw?" a ti a, mak a tih hmel takzet. A ţhian ka inti chu min rinhleh hmel lek lek tawh zawk. A ruk a ka en ţhin thu leh doctor ka nih thu te ka hrilh takah chuan min fak leh hnuhnawh. 

"A ni chuan a hrilh lo tawp ang che. A tan sawi a nuam lovin a zahthlak ve a, a pa hi contractor ania, Hriatzuala hi a sawn a ni. Hriatzuala naupanlai hian a nu in a boralsan a, apa hian a enkawl turin a la a, chumi hnu reilote ah a nupui nen an inţhen, tunah chuan pasal dang a nei tawh. A fa ten a nu an zuichhuak vek a, tun thlengin tuman an rawn ngaihsak lo. A nupuiin a pasal damlo a ngaihsak miah lo thei hi mak ka ti a, a faten an pa an buaipui duh lo hi ka dem khawp mai. Hriatzuala vekin heti hian a buaipui a, mahse tun an pafa chauh a an chenna in saw neihsak an tum ran thung. Lo en reng rawh, hei aia anat zual leh chuan an lo lang sup sup mai ang. Hetiang em em a mihring hmangaihna nei lo hi ka la hrengai lo. A nupui hlui chuan a pasal mitmei a veng a ni thei a, hriatthiam theih dan dan a awm. A fate lehzelin an ngaihsak lo hi an mak thlawt" a ti a, mak ka lo ti ve khawp mai. Ka pa hian min lo ti na fo ta sela, damlo buaipui ngaia a awm chuan ka buaipui reng tho ang. 

A chanchin ka hriat hnu phei chuan ka ngaihven lehzual a, ka theih dan danin ka pui ve ţhin. Kei aiin kum khatin a naupang a, min hnial apiangin "Nang aiin ka upa a, upa zawk an hnial an hnial ngai lo" ka ti fiamthu ţhin a, chutianga thla thum vel ka kal tak tlauh tlauh hnu chuan a ni pawn min pawh ve sawt. 

Apa ICU a an dah luh ni chuan a hmel hmuh a hrehawm lehzual. Mi tam takin an rawn tlawh zut zut reng a, a unaute pawh Hriata chuan min kawhhmuh. An awm khawm tel tel a, an phun ser ser zel. Mi in luah a awm reng ţhin a ute chu an inah an insuan lut leh tawh a ni awm e. An zak lo ka ti nasa. 

Apa thih ni pawn ka awm ve. Ruang phur tur an ngah laiin ruang dahna ah an dah hmasa a, Hriatzuala chuan apa chu a kuah a, mahse a ţap lo. Pawn aţangin a rukin ka lo thlir ve reng a, motor rawn thlen hma zawng chuan apa kha a thlah lo. 

Khami ni aţang khan kan inhmu lo vang vang a, phone number inpe mah ila min rawn be ngai lo. Chanchin ka zawh lahin min chhang ngai bawk si lo. Ka call in ka la duh lova, thla tam tak chhung chu a chanchin ka hre lo. A chang chuan ka ngei lek lek ţhin. Ka duty zawhah haw nghal mai lovin a khawhar hlauin a kiangah ka awm hram hram zel a, min hre zui duh miah lo a thla hauh hrep chang ka ngah. Mahse ka duh vang a ţhat chhuah ka nia, dem thei ka nih loh zia ka inhre thar leh ţhin. 

Ka hmuh leh na hmasa ber chu khawlai a ni tawh. Afeli nen kan bazar khaw thim hnuah kan haw a, kan bawr vak lo bawk a ti ti pahin ke in kan haw. Vanapa hall bul kan thlenin rui phur ţhenkhatin min lo chhaih a, phun nang nang chungin ka hawi phei kher. An zing a lo awm ve pakhat vang chuan ka ding chawt. 

Midang an nuih ham ham laiin an zingah ngawi rengin a ţhu ve a, a sir zawng chauhin hmu mah ila Hriatzuala a ni tih ka hria. A pian leh a inchei duh dan engkim ka hai lo. Kawngkal an la tam bawk a tuman min lo tihnat ngam ka ring lova, a lo ţhut ve na lam pan chuan ka kal ta hlawk hlawk. Afeli'n min ko zui reng a, ka hawilet miah lo. 

"Lalhriatzual" a rawn hawi chhuak a, a lo cher ta deuh. Midangin min lo chhaih ve sek hlawm vangin a banah ka pawtin ka kalsawnpui. Ţang eih lovin ka kaihna apiangah a lokal ve mai. 

"Hetah eng nge itih?" ka ti chang fak. Kei aia a san zawk daih vangin dak vah hian ka en a, a hnar a tuai zeuh, a zawi em em mai lehnghal. 

"Ka ţhu. I dam maw? Iva ngaihawm ve a"

"Min ngai der vel lo mai teh" ram hmak a ka tih leh lai chuan a ţhen sak a, a in thiam loh hmel ve nasa. 

"Ngai e"

"Ka rawn be ngun lutuk che. Min chhan duh ngai miah loh kha, chu chu ngai tihna maw? Thla li vel lai kan inkawm ve hman kha" ka ti leh a, a la nui sawng reng zui. Midang chu awm lo se harh hawk khawpin ka ţham bawrh bawrh duh ang. 

"Ka phone kha maw an ru a" ban zawi tawk hian a ti leh a, ka van ngei mai mai tak. 

"A dang inei leh tawh em?"

"Aw ka ru ve tho a"

"Eng nga? Engmaw i ruk? " ka ti tuarh a, a nui chhuak ta hawk. 

"Ka ti mai mai. Ka pa pawisa in ka lei thlap. Kha i phone number dah leh la, ka ngaih chang che in ka lo be ziah ang che" tih pah hian a phone kenlai lum vung vung chu min hmehbel chawt chawt. Ka phone number ka dah rualin ka in call nghal zat. Amah chiah hi chu ka ringtawk lo. 

"Nunu lokal vat vat teh" Afeli'n min lo ko leh tawh. Ruihhlo ti ho hi a ngaithei lovin a ten a, a lo hnai ve duh lo. 

"Haw rawh. Hetah awm tawh suh. Ka rawn bia ang che, haw vat vat rawh" ka ti chung chung. 

"Nangmah zawk hi kal tawh rawh. Zan dangah chuan ke in kal tawh suh aw" a ti a, ka darah vuanin min kuai her a, na vaklo in min nem. Ka ţhiannu in min nghah vangin hreh chung chungin ka kalsan a, diktak chuan a awmzui zel dan zawh ka chak khawp mai. 

"Khatiangah khan kal tawh reng reng suh. I hmelhriat ţha deuh pawh hmu la ding kawi tawh suh. Mi khawlo ho awmkhawmna ania, miin anmahni angah an ngai ve mai ang che" tiin Afeli chuan min hrilh nghal mawlh mawlh. 

"Afel mihring hi an duh vang reng a sual kawng zawh chu an awm teh meuh mai. Mahse duhvang reng ni lo, an thil tawnin a zir loh em vanga sual kawng zawh hi an awm ve nawk i ring ve tho em?"

"Teuh lo. An duh vang vek. Tuman an nawr lui lo. An duh vanga sual an nia, tumah khawngaih an ngai lo. An dawheh a, lem an chang thiam hlawm bawk si, ka ten hlawm tehmai nia" 

"Mahse hetiang a awm hi chu an tum lawk ngai bik lo ang tiraw? Sim duh ngawih ngawih puitu nei ţha silo engzat tak awm ang maw?" ka la ti ţalh a, min ngei hmel kher mai. 

In ka thlen veleh ka intifai a, chhuanlam siamin hma tawkah mu turin ka kal. Ka hriatchian duh ber Hriatzuala chu ka call a, min lo hrelo der tawh bik lo. 

"I haw tawh em?" ka ti nghal tawng. Ka ngaihtuah takzet. Midang zinga ngawi reng a a ţhu ve mual mual te kha ka lainat. 

"Aih, mi ka nghak a, min ngaihtuah anih kha. Nang aiin naupang deuh mah ila mipa ka nih hi" 

"Ve lutuk che hian" ka ti hlak na a keimahin ka nui ver ver. 

"I chau em? Ka u"

"Min u kher suh ka upat hmel vek. Chau lo e, i ţha zel em? Engtin nge i awm tak zel?" ka ti a, ka kuttin seh niap niap chungin min chhan hun ka nghak ran. 

"Inhmu ila, ka ngai ve che a, min hmuh leh duh chuan ka hrilh vek ang che" 

"Hmu duh lutuk e. Naktukah ka hman veleh ka lo ko ang che. Min lo ngaichang reng dawn nia" 

"Ok. Tun aţangin ka ngaichang nghal che" ka nui vak a, rang zetin ka hmui ka hup. A mizia a lo danglam ta hle mai. Ţawng ngai mang lo, biak pawh a a rul tawk lek a min chhang ţhin tu khan min chhaih ta reng zawk a, khang thla liam ta zawng zawng chhung khan eng thil tak thleng ang maw? 

Tlaiah restaurant ah kan inhmu a, a hmel ka hmuhchiah duh vangin a bulah ţhu duh lovin a ep chiahah ka ţhu lui. 

"I cher ta deuh a nih hi. Eng thil chiah maw thleng a?" ka ti a, a mitmeng dik lo chu ka ngaimawh lo lui. 

"In ah ka awm, a ngaiah. Ka ute an rawn awm ve a, tumah min hmu thei lo" a nui hul hak a, a hmel a lungngaihna inphum ru ka tih kha a la awm reng. A pawi ka ti. Hlim ve tawh tur a ka duh tehreng nen. 

"An ngaihven lo che tihna mi?" a bu nghat a, min en duh lovin plate a eitur a thai a thai. 

"Pawisa an pe ţhin che em?" lu a thing leh ringawt. 

"Engtin nge pawisa itih?"

"Ka pa khan a damloh tirhin ka nu ţhiannu bulah a lo dah nual a, a changin chhunah ka inhlawh" sawi nuam a ti lo tih ka hria. Mahse hriat vek ka duh. 

"Hna i zawng lo mi? Company thawhna tur te a awm ang. Chutiang te chu ngaihven la" ka ti a, lu a thing leh mai. Bike a nei a, incheina ţha ala nei thei a, a uten pawisa an pe ngai bawk si lo. Bike chu a nu ţhiannu khan a leisak niin a sawi a, a ngaihsak zia ka hmu a, awm lo ka ti lem lo. Sumdawng a ni tih ka hre bawk a, pasal fanau nei anih vangin a la lut thei bik lo a nih hmel. A pasal a thikthu a chhia in Hriatzuala han thik mai te a ching a, a ngaihven vak ngam tawh lo. Chu chu tun a min hrilh dan a ni a, a tan chuan kawng a ping vel vek a ni ber. 

"I ute chuan an be ve ngai che em?"

"Min hmu thei lo. Mahse min hmu thei tu an tam mai. Nizan pawn i rawn hmuh vek kha" a ti a, lu ka thing ve thung. 

"An ţha lo. Thlah vat rawh. Ţhian iduh chuan ka awm reng a, khatiang zingah kha chuan awm tawh suh" ti lawm lawm mah ila "A theih tawh loh" a ti bur. A unaute lawm loh zawng a awm luih ve nuam a ti laklawh tlat tawh. 

Nitin zantin ka bia a, min chhang ve zel. Harhfim lai a nei mang lova, chuti chung chuan ka ngaihven em em reng tho. Zankhat chu kan in kawt a a awm thu min hrilh a, kan inhmuh leh a min thlah ni aţang khan kan in hi a hre ve tawh. Chhungte hnenah chhuanlam siamin ka chhuak ru a, kan inpiah step thim laiah kan ţhu. 

"Ngatinge i lokal ve tehmial a?"

"Min hmu peih vak nange?"

"Teuh lo mai. Hmu peih lo che ila ka lokal nang" ka ti sawk sawk a, a nuih a za nasa. 

"Ka fiam che nih kha. Ka ngai che a, ka lokal" tih pah hian ka sam a rawn tuai a, min hmu thei lo bawk a lawm vangin ka nui ver ver. 

"I duh hun hunah lo leng rawh. Thingpui tui tawk ka lo lumsak ziah ang che"

"Umm" a vawh deuh vangin ka ban ka tuai ka tuai a, ka inha lum lo kha ka a pawi. 

"A vawt a mi?" 

"Tlemin. Kan veng hi chu a dam lutuk a, zanah hian a vawt ţhin a" 

"Jacket hi i ha duh em?" 

"Aih, a ngai lo. Tikhan ha rawh, kan insi reng a, ka lum pha tho" ka ti a, vawt tuar turin ka duh lo. Ka bula a awm hi chuan eng hrehawm mah tuar lo se ka ti. 

"Ka lo kuah lum ang che" tih leh min kuah a rual a, a chet dan teh thut chuan min ti hrilhhai a, ka nui ta ringawt. Rei tak kan ţhudun a, inhawng deuhin kan ti ti reng. A haw hnu chuan ka khuahar. 

Khata ţang khan ka rilru ah a awm reng ţhin a, ka duh niin ka inhria. Min ngaihven em em chungin engmah a sawi duh der si lo. Min duhna a lantir nasat ţhin nen ţawngka in min hrilh ngai miah lo. Pawn lamah kan inhmu zeuh zeuh a, zanah kan inhmu ngai lo. Ka inzep theih tawh loh hnuah zah pawh dawn lovin ka duh thu ka hrilh a, min lo pawm thlap. Min duh ve tho a, a insit vangin a sawingam lo a lo ni. Insit tawh miah lo turin ka hrilh nasa ţhin a, inhmuh loh a hrehawm ti zawk pawh keimah ka ni tawh. 

Kan inzui nasa a, ka chhungte beng hial a thleng. Ka bialpa nihna an hriat chuan min hau nasa hlawm kher mai. Hmusit leh ngainep zet hian a chanchin an sawizui a, chung zawng zawng chuan min ti nghing eih lo. Ka dinna ngaiah ka ding tlat a, a thlavang hauh zawngin ţawng pung pung ngam lo mah ila ka duhna a bo phah lo. 

Kum khat kan inzui tlin hnu chuan a mizia a danglam a, hmeichhe dang nen a an inphur hmuh tur a awm zeuh zeuh. Keitak chuan hmu lo mah ila ţhiante hian an lo hmufuh ţhin. Ka zawh pawn a pha ngai lova, a ruihtur duh vang niin a sawi. Mite hmuhah chuan sualin laktlak loh viau mahse dawt min hrilh ngai miah lo. 

Vawikhat ka thinrim tawpkhawkin ka be duh lova, ni thum vel a reh ve vang vang. Ni lina zanah a rawn lang hlawl. Kan chhungkua a tv en a kan ţhut khawm laih laiin door bell a ri ral ral a, ka tan thawh a awlsam ber bawk a kawngkhar hawng tu ah ka ţang. Beisei loh lutukin Hriatzuala a lo ding run. 

"Ka lo leng ve tawp dawn. I chhungten an phal angem?" inthlahrung zet hian a ti a, a rawn len hmasakna ber tur a ni. 

"Phal e. Lo leng rawh" ka ti a, ka nem leh nghal vek. Ka hmuh tirh aţanga ka khawngaih kha a nih vang nge a inthlahrung lutuk te chuan ka thinrimna a ti reh. 

Kan inzui lut chu ka chhungten min lo en ţhap. 

"Hriatzuala anih hi" ka ti a, an tum hmak hlawm. Tuman an lo lawm lova, an kiangah phei pui duh lovin choka ah ka luhpui daih. 

"Thingpui iduh em? Ka lum ang che aw"

"Awle" a ti sup a, dawhkanah a kut pahnih dahin a kun lup a, hrehawm a tih hmel khawp mai. 

"Kan in a vawt ka tih kha. Thawmhnaw lum te rawn ha ta che. Tshirt nen chauh i lokal a"

"Ka haw thei rih lo a" zawi te hian a ti a, a tshirt hnung te chu a paw phuk. 

"Kha thingpui in rawh. An hnawtchhuak che mi?" keilah hi. A chhe ber ka lo ngaihtuah hman ziah. 

"Aih. Min duh lo mahse min hnawtchhuak ngawt thei hleinem. Ka u bialpa in palai a rawn tir a"

"Chuan chhuak rih turin an ti che mi?"

"Ti lo e" ti mahse ka awih chuang lo. Thingpui no a ban lai chuan a kut khur ka hmu a, hritlang ang deuh hian a awm bawk. 

"I hritlang a mi?"

"Aih. Zawhna ngah viau zel suh" nui chung hian ka chalah min nem dak awrh. Ka rinhlelh vangin a hmai ka khawih kual ta tho a, a thlan dup lehnghal. 

"Nghei ka tum a, ni thum chhung ka mu tawh. Taima min ti em?" a la ti uang zawk mah lehnghal. 

"I nghei theih chuan a ţha lutuk. Pindanah i mu bo daih awm tho sia ngatinge i ute chuan an chhuah tir kher che? An thlawp tlat che chuan i tan pawh nghei a awlsam zawk dawn a, an mak ve ngawt mai. Hmangaihna chhete mah annei lo" ka ti nghal bawrh bawrh a, awmdun tawh ni ila chuan theihtawp chhuahin ka pui ţang ţang tur. 

"Keimahin ka lo chhuak. Min hriat tirh aţangin i rilru tina zawng hlirin ka awm a, thil kal tawh theihnghilh la min be tawh rawh. Sim ka tum ang. Ka tum tawh tak tak ang. In be leh ang aw" ngen ngawl tak a ti chungin ka kut a vuan a, nui chung hian ka lo bu nghat nghat. Insiamţhat tum mek hi ka lo hnar thei lo. 

A vun a dâng lehzual a, a mut khur a thuk leh ram tawh. A hmelţhat theih tehlul nen ruihhlo in a eichhe mek zel chu a nia, mahse ka tan chuan a la hmelţha ber reng tho. Hmangaihna hian mit a lo ti del thei tak tak anih hi. Ka fuih mawlh mawlh a, harsa chung chung pawh a nghei a tum thu sawiin a intiam ve. 

"Nunu inleng neih chintawk hriat a ţha. Dar10 a ri tawh a, naktuk hna kal i ngai a ni law mi?" ka nu a rawn au lang lang. Hriatzuala chu a lo nui suk a, a tho chawpchilh nghal. 

"Min thlah duh suh an hau ang che. Ka thlen veleh ka lo sawi ang. Lo la muhil lo la" a ti a, ka tho ve tur min nem ţhu leh a, a kal daih. A chhuah fel hma in "Engkim kha uluk tawkin tifai vek rawh" ka nu bawkin a rawn ti leh. Ka sa ve ta phat. 

An ţhutkhawm lai naah chuan pheiin "Inthlahrung tawkin a rawn leng a, a hriatlai a khatianga ţawng kher a ngai lo. Duah deuh deuhin i ţawngţai a, tun a i hmuhsit ngawih ngawih kha anih kha ţawngţaipui ngai chu. A chawrchhuahna hre hlek lovin in dem ziah lehnghal. Nau mipa pahnih ka nei a, tunah chuan an la naupang. Eng angin nge an ţhanlen dawn i hre lo. Khang aia nasa kha an la ni thei, i ţawngkam fimkhur tawh rawh" ka ti ve nghek. Kan inhnial zui a, ka pa in kut min thlak lo chauh. 

Mut pahin ka ngaihtuah a, kei ngei pawn kalsan ka tum nasa ţhin. Hmeichhe dang nen a an hmuh dun thu ka hriat pawn ka tum nasa mahse ka hmangaih em vangin ka kalsan thei lo. Keiin ka hmangaih lohin tunge hmangaih ang? Tunge a thinlung diktak ngaihven sak ang? Tu in nge hlim takin a nui ve a ni tih hriatchian sak tum ang? Keimah ka nih loh chuan tuman engmah an tihsak lovang. 

A unaunu pasal neih ni ah pawh thlalak laiin dinna tur a hre ve lo. A pianpui unaute an ti kher a, a dinpui ve loh lai pawn tuman an ko lo. Tupawh hian an enhrang vek a, an chhuanlam turin a ni lahin ruihhlo a lo ti ve ting tang bawk nen. Engkim hi a buai nuaih vek a ni ber. 

Sim tum ve ţang ţang mahse a tlu leh. A ngaiah bawk a tlu leh tawh. Ka ngaihven duh lova, ngaihdam min dil nasa. 

"Tumah ka dem thei lo. Ka hnar zo lova, ka thu ngeiin ka ti leh. Min ngaidam rawh, i tan a zahthlak tur thil ka ti lovang. Ka rawnleng tawh lo ang a, mi zingah ka hmu tawh lo ang che" a ti hial. 

"Zahpui ah che min ngai em ni? Zahpui che ila chuan hman aţang tawh khan ka zui duan duan reng lovang che" ţap chungin ka ti a, engkim hian ka rilru a ti na vek. 

A unauten thil ru ah te an puh a, a upa ber mipa in kei thleng thlengin min rawn bia. Zamlo tawkin ka thawhna hmunah min rawn kal chilh. Mahse Hriatzuala thlavang ka lo hauh tlat. Ka hrechiang a, thil a ru ngai lo. Sual viau mahse dawt min hrilh ngai lova, tu thil mah a ru ngai lo. Dawt a puh tawh lo turin ka lo hrilh a, lungawi chiah lo chungin a haw. An sualna hi haw ve viau mah ila an puhchhiat chuan a ni aiin ka na daih zawk. 

Afeli nen a Manuna te in a kan zawn zan hian min hmu turin a rawnkal. Kan inhmuh tawp berna ni turin. Kum hnih leh tlem kan inzui der tawh. Kan inzui hun chhung reilote pawh hi a kawng a bumboh takzet. A rawnkal hmasak ber a kan awmna kan in bul step ah bawk khan kan inhmu leh. A thimin a biru ber a, mitmei ven a ngai lo deuh. 

"Manuna te inah i lokal a mi? Pindan zawng zawng thlengin a lut an tia, iva pa ve a" nui hawk hawk chung hian a ti a, ka nuih a lo za ve lo nasa. 

"Tu hmeichhia nge i hruai a?" ka ti hmuk. Ka lawm lohzia hre ve reng reng se ka duh. 

"Manuna cousin anih kha. Bike ka tichhe sia,an ta ka hmansak duh a, khanu kha a kal duh naa hruai phawt turin min tia, Manuna te inah theihnghilh a nei a kan rawn let leh laiin Afeli khan min hmu"

"Chhe reng ang chu. I dim lo em anih kha"

"Ka phurh apiang ka bialnu maw ti zel bik lo ula" step ah ka ţhu hnak a, ka bula rawn ţhut ve pahin min kuah. 

"Rinhleh tur hian i awm leh ţhin a, ngaihtuahna siam thar rawh. Min hmangaih ve chuan sim tum leh rawh. Ipa nen a in awmna pawh nise in in saw chhuahsanin in luah tur zawng la, hna awm ang ang thawk la, sim tak tak tawh teh khawngaihin" ngen ngawl zet hian ka ti a, amah tihnual thei ho kalsanin nunthar nei se ka duh a ni. 

"Hmangaih e. Nang lo chu khawvelah hmangaih ka nei lo. Min hmangaih tu awmchhun ini bawk a, hnathawh tur te chu mipa tan chuan a tam e. Lungngai suh, naktuk aţangin inhlawhna ka zawng ang" awlsam fe hian a ti leh bawk sia, sawi tur hi ka haihchham leh zawk zel. 

"Zawng ngei ngei rawh. I felloh chuan ka chhungten inneih an phal miah lovang"

"Ka tum ang ka tih kha. Ka tum ţha leh ang. Ka bulah awm tlat la, min be duh lo ringawt tawh lo la, insiamţhat ka tum ngei ngei ang" a ti mawlh mawlh. 

A haw dawnah pawh min thlahlel tak a min kuahin min fawp a, min thlah hleithei lo. A tlanliam thlengin ka thlir a, hau vak vak ţhin mah ila min kalsan hi chuan ka ruak huai zel tho. 

Kha zan khan "Kan inhmu leh dawn nia" tiin thlah mah ila zing ka thawh meuh chuan min ţawng dawt tu ka hre ta tho. Lalhriatzuala a ţhiante inah a OD a lo ni. Kaihthawh an tum chuan a lo thi fel der tawh. Chu thu ka hriat chuan ka mit sulh a, ka vai ruai a ni ber. Ka thawh hlim a biak ka tum laiin midangin min lo chhang a, a thih thu min hrilh. 

Ka tawt up up a, boruak tlachham ang mai hian ka thaw ţha thei lo. Min kaitho tur a ka nau lo lut chuan min sawi nawk nawk a, ka hnunga a chul chuan ka thaw kawk kawk. Ka ţah rin hlauin ka blanket sinlai ka seh a, ka nu ko chul chung a ka nau tlanchhuak te chu ka mang hriat ruai tawh. 

Mu leh mal nei lova rei tak ka awm hnuah Hriatzuala te inah ka ţhiannu Afeli'n min hruai. Haw viau mahse a thih meuh chuan a buai ve chung a, keimah zawk hian mi zawng zawng chu ka haw hlur. A sual vang leh ama dikloh vang liau liau a thi ni mahse ka huat loh phah chuang lo. 

Thlanmual thlengin ka zui a, a tawp thlengin ka phatsan lo. Khami ni, amah chauh a apa a buaipui lai ka hmuh hmasakber ni aţang khan ka vuan ţang ţang a, min thlah hmasa tu zawk chu amah a ni. Mahse ka dem lo. Min kalsan a duh bik lovang. 

A thih aţanga thla tam a liam leh hnuah pawh nitin zantin ka la ngaihtuah reng a, awmzia a neih dawn leh dawn loh hrelo mah ila a thlarau tan ka la ţawngţai ziah ţhin. A damlai aia a thih hnu a ka ţawngţaipui tam zawk ringawt te hian inthiam lohna min neihtir a, dam a ka hmuh theih hrim hrimna khan ka ngaih a lo ti ţha ţhin em a ni. A ruangin ţah tu a nei mang lo te khan min ti na ngawih ngawih. Tun thleng hian ka la nat phah ţhin. A thihni ah pawh ţah tu a nei mang lo anih chuan a damlai phei chuan engtin nge a chungah ţhat an chhuah der theih ang? A nu ţhiannu, a bike duh em em a thihni thleng a a kawl leisak tu kha a ţap nasa a, tun thleng hian Hriatzuala chanchin sawiin rei tak tak min lo be ţhin. A baihvai zia a sawi chuan ka ngaithla ţha duh ngai lo. 

Tun thleng hian a tel lova awmdan ka la thiam lova, hmu thut turah te ka inngai ţhin. A thlanah ka kal fo a, pangpar mawi tak tak ka kensak ţhin. Ka hmuh tirh aţanga ka mit la nghal tu a ni a, ka hmangaih ber a ni bawk. Engtinpawn awm se ka hmangaihna a bo thei lova, ka thih hma zawng chuan ka hmangaih reng tawh ang. 

Sual man chu thihna a ni tih kan hrevek a, Hriatzuala pawh khan a harsatna tawh kha ruihhlo nen a tawrh thlang lovin Pathian bel zawk sela chuan a la thi lovang a, hlim deuhin kan la awmdun reng mai tur. Ruihhlo hian eng natna mah a chhawk lova, a tirah nuam mahse thih thlenga min eiral tu a ni. A pawizia kan hriatchhuah chuan a lo tlai tawh ţhin. Hriatzuala pawn sim a duh takzet a, a tum nasat zia ka mit ngei hian ka hmu. Mahse a zunin a phuar hneh tawh em a, sim duh viau chungin a tlu sual leh ţhin. Ruihhlo nunrawng tak chuan mi baihvai, hmangaih tu tlem te chauh nei chu khawngaihna nei hauh lovin a thih thlengin a umzui a, belhtlak avan ni lo tak em. Rilru hahdam nan an bel a, an nunna a tawi phah a, belh tlak ber Pathian kan theihnghilh ţhin hi a pawi takzet a n

END (Whatsapp link

https://chat.whatsapp.com/LaAMPSvMmJm8Gv6P2tQvaJ

https://chat.whatsapp.com/I6qUxY6prAmKo85pBXlcPN