BAD BOYS Chap1-13

BAD BOYS-1
.
.
"Jenn tun ang hunah khawnge ikal dawn?" Ka unaunu, kan upa ber aw ri ka hriat chuan kawngka bulah ka ding chawt a, ka lukhuhna lakthlak pahin nui sang in ka hawilet a, "Thenawm dawr ah"ka ti sam et a. Dawt sawi pawh ka nilo. Zan rei ah ka ril a tam ngei ngei ziah a, dawr ah pawh ka kal fo mahse ka chhungten tha an tih loh vang in tlai ah min lei lawk tir thin a, tun tum chu ka lo lei theihnghilh palh ani.
"Kalpui i ngai em?" Ka lu ka thing vat a, thil tui aia a hrisel ei thin ka u chu dawr a kalpui atan ka duh ngailo.

"Rei suh"ati a, min melh ram ram hnu ah in chung ah a chho leh a.

.
Jennifer Lalrinkimi ka ni a, unau pathum kan ni. Kan upa ber Mary Lalrinpuii hi doctor niin private hospital pakhat ah a thawk a, ka u chiah John Lalrinfela hi college kal lai ani thung. Kan unau ah ka naupang ber a, tunah hian class-11 zir tur ka ni. Ka nu leh pate hi doctor ve ve an ni a, anni chu Civil Hospital ah an thawk thung. Mary chiah in an hnung a zui a, John hi zir peih vaklo a zir duh a thiam tak si ani a, kei erawh chu designing lama tui bur chi ka ni thung.
.
Pawn ah ka chhuak a, dim te in kawngka ka khar leh a, dar11 a rik tawh vang in khawlai a reh viau tawh a, kan in awm na hi a fal hrim hrim bawk a, kan thenawm dawr pawh hi hnai te a awm chu anilo. Boruak a nuam angreng viau a, keipawh muangchang in dawr lamah ka kal a, ka ngam tlak a an mengrei thin tih ka hriat bawk vang in ka hmanhmawh lem lo. Pawn boruak nuam tak ka hip vang vang lai chuan ka piah thim lai deuh ah hian na tuar rum ri ni awm tak ka hria a, ka dawih lem loh vang in ka hlau lem lo. Ka kal hnai a, thawm chu ka ngaithla chiang a.
"Tunge?"pawr taka arawn tih chuan ka thawm a hreve ani tih ka hre mai.
"K-khawnge i awm? Ka t-tanpui ang che" aw khur lek lek in ka ti a, hlauh na tlem chu ka nei ve ani. Ka din na thlang lam thim zual lai atang in arawn chhuak a, a hmel hmu lo mah ila a sang lam pian nalh tak ani tih a hlimthla ringawt atang pawh in a hriat. Min rawn hnaih zel a, ka bul a rawn thlen chuan ka meng ngam tawh lo.

"Haw rawh tun ang hun ah chuan helai vel hi a him lo. Min tanpui duhna rilru i put vang hrim hrim in thurawn ka pe ve che anih chu"ati a, amah en tuma ka hawichhuah veleh min kalsan ta deih a. Hliam na tak chu a tuar lo anih hmel. Tupawh nise atha em ang chu.

.
Ka tum aiin dawr ka thleng har a, an lo mu dawn tawh a, hmanhmawh takin ka leitur ka lei zung zung a, kalkawng a thim lutuk hmaa in thlen hman ngei tum in ka kal hlawk hlawk a.
"Hmeichhia kha" tih ri ka hriat chuan ahma aia chakin ka kal a, ka hlauh vang in din tumna pawh ka neilo. A aw atang chuan ahmaa ka mi hmuh kha anilo tih ka hria, ka hnung ah a rawn tlan a, keipawh tlan ve mai in ring in ka awm tawh. Mary ka lo hruai lo kha ka inchhir tawh hle.
"Ding rawh ka umpha dawn tho tho che" ati a, ka din loh chuan thil pawi zawk a thlen ka hlau ve tho si. Ka inti huaisen chawp a, amah pawh en lo in ka ding a "Nachin ah helaiah hian mipa hliam tuar ihmu em?" Tanpui ka tum pa kha a sawina ani tih chiang takin ka hria. Ka lu ka thing a, hrilh ka tum miah lo. Ka lu khuhna a pawt thla a, ka hmai bulah arawn kun a mahse ka sam in ka hmai a hliah hneh hrim hrim vang in ka hmel a hmuh ka ring lo.
"Haw rawh" ati leh tawp a, hrilh nawn ka ngai lo. Kan in lamah chak takin ka tlan dawr dawr a.
.
In ka thlen chuan thutthleng ah ka let tawp a, zan dang ah khatiang kha ka la tawng ngailo. Zan dang ah chuan ka ril atam anih pawh in in ah siam chawp tur ka zawng tawh ang. Zanrei a khatianga an awm kha a chhan tur awm pawh ka ngaihtuah thiam lo. Ka unaupa khawlaia khatianga awm ve chi anilo chu ka lawm rilru hle. Ka riltam zawng zawng pawh a reh vekin ka hretawh. Dawr a ka kal hah vang talin chak vak tawh lo mah ila ka thil lei chu ka ei ta tho a, nktk mai hi school tan ni anih tawh vang in ka intifai a, ka mutna lam ka pan a, ka mutdawn thleng in ka tha ala khur in ka hria.
.
.
"Uniform thar chu i inhmeh kher mai" ti chungin ka nu in mn en vang vang a, duat rawn ka nih avang in ka inhmeh vak loh pawh nasa takin an fak tho thin. Kan in chhak lam dawr awm na lo lam pang ah tet te atanga ka kawm thin Cindy te an awm a, school in ang ah kan lut char2 a, school thar ah pawh kan lut dun leh dawn ani. Zing tin min lo sawm thin a tun ah pawh ka in peih hma hauh in alo awm leh reng tawh. Kan pawnfen hi fual ltk a fen chi ani ve lo a, Cindy te ang thau tak tan chuan fen nalh har tak ani. Cindy rawn luh tirh atanga John-a nuihza insum pawh a khawngaihthlak tawh zawk ani.
"Cindy i chhelo"tih pahin John chuan Cindy lamah a mit a siai a, a tak2 emaw tiin Cindy chuan alo siai let vat a. Ka u hi hman atanga a mipa duh ber ani thin a, chu chu hria in ka u hian a theih ang ang a tih lawm dan a ngaihtuah thin.
"In hman chuan ka kal pahin ka thlah ang che u" Maryn atih veleh ka bag ka la a, Cindy pawh a thutna atang in inthazo lo tih hriat takin alo tho ve tuah2 a, kan tih jiah dana kan in kaih hnu ah pawn ah Mary car lak chhung kan lo ding a, school thar chanchin te kan lo sawi mai mai a.
.
"Kan thleng ta. Fel deuh in awm ula chanchin thalo hriat ka duhlo"
"Tehreng mai" tiin Mary kan chhanglet vat a, car atangin kan chhuk a, Mary tlan liam hnu ah gate lianpui chunga Hope Academy tih intar chu kan en dun reng a, kan in vawn ngheh sauh dan ah kan huphurh ve ve anih hmel.

"Haw leh mai ka duh" ka ti sap a, Cindy chuan min chhang lem lo. Kan uniform ang ha ve tho ten min kalpel zut zut a, a then an tlangnel tawh hmel rual in a then chu zah ve hmel tak tak te pawh an awm.

"Piit.. Piit" tih rualin bike pakhat kan hmaah a ding chut a, horn pangai pawh awmreng a, Cindy phu nasa lutuk chuan mn kuah nghet lehzual sauh a, bike lah chu kan hmaah ala ding reng a, a helmet a phelh a, "Gate ah hian ilut leng lo mi?"tiin Cindy a fiam a, "Bike inti nei nalh ve si, a horn pwh neilo mahni a pit pit chawp ngai" Cindy atih zah vang in tih zah ve ka tum ani. A nui suk a, a bike hma bawh pahin ka hmel a enchiang a "Hmuh tawhna che ka nei" ati a, zan lam ka hrechhuak zawk mai. Zamlo ang deuhn ka hawi vah a, "I hresual aniang"
"Ka hmutawh che" ati leh a, Cindy chuan mn en tawn zak zak tawh. Keichuan nizanah mipa pahnih ka hmu a tuzawk nge an nih an hmel ka hriat loh vang in ka hre lo hrim hrim. A ipte a zen a "Hei hi ita ani em?"ti chung in bakilh a lek va va a, ka ta ngei ani. Nizan khan ka thlauh ani ngei ang. Ka hmel a enchian em vangin ka hmel ah danglamna lantir loh ka tumruh hle.
"Nilo"ka ti nghat a, bakilh a dahthat leh hnu ah bike a ti nung a "Dawt isawi tlat a hriatna ka nei" ati a, engmah dang sawichuang lo in mn tlanpel a, school khat ah kan lut dawn anih hmel. Tanpui ka tum pa kha nge a hnu a khapa rawn zawng leh tu zawk kha ka la hre chuang lo.
Cont....... (Ka vawikhat ziahna ania. Mithar chauh ka la ni. Min lo chhiarsak ve duh chuan a lawmawm ngawt ang. Sawisel tur in hriat chuan in sawisel pawp pawp dawn nia in siamthat nan ka lo hmang ang. Ka lawm e)

BAD BOYS-2
.
.
"Jenn saw a hnung ber ah sawn zinga kan hmuh kha a thu"
"Anih chuan hawi let tawh suh" Cindy bulah chuan ka lo ti ve hmak a. Dawih lutuk a sawitur nilo mah ila buaina tlachhiatsan zel duh chi ka ni. Hepa hi ka hriatchian hma hauh atang in buaina anih ka ring a, tlanchhiatsan ka duh chi pawh ani. Teacher te an lokal loh vangin an ri nuaih nuaih a, lut thar an tlem zawk ani maithei an hming ngat a in ko nghal thei an tam emai. Engemaw chhinchhiah ngai a awm huna ka buai loh nan tiin note pakhat ka phawrh a, pen ka zawn laia classroom a reh duak vang in teacher te an lokal ta emaw tiin ka hawichhuak a, kawngka bulah mipa pakhat sang deuh alo ding reng a, a kekawr ipte a zen a, a dar pakhat ah duhdah takin a bag a uaitir a, thutna tur zawng ni awm takin a hawikual pah bawk. A mit hnuai ah egemw a inbel var va a, a hmui sir lam a pem bawk. A sam a ti buk angreng a, a kamis nghawng a kilh phui lo a, a necktie a dah loose hle bawk. Hei pawh hnaih loh chi tiin ka rlru ka lo siam nghal vat vat ani.

"Hetah lokal rawh" tia lo au lang lang na lamah akal a, duhlo mah ila ka en zui lo theilo. Amah lo ko tute bul a thlen chuan a nui ve suk a, nui tam deuh se ka lo ti hle. A hmeltha ani. Tukverh bul an lo kian a, a thut veleh pawn lam a thlir ta deih a, pawi ka lo ti ru hle. Hnaih ka duh lo mahse ka insum theilo ani. Mipa in hmeichhe nalh tak hmuhnawm an ti ang mai ani. Amah a nalh in a hmeltha a hmuhnawm tak ani.
"John ala tluklo e" Cindy in atih chuan ka ngaihtuahna atangin ka harh chhuak hlawl a, engtia rei nge ka lo thlir ang le? Ka zak leh hnuhnawh viau mai. Teacher te pawh an lokal a, ni hmasaber anih avangin engmah zir lo in hma takah min haw tir a, ka zep lo pawi ka ti ru viau ani.
.
.
Nitin school kal ka nghakhlel a, khapa chanchin kha ka ngaihven lo lui tlat a mahse amah hmuh chu nuam ka ti reng ani. Tunah chuan kan luh tirh a ahmai a hliam awm pawh a dam ve ta. A hmeltha lehzual sawt in ka hria. Break lai ani a, Cindy toilet ah akal a, midang pawh pawn lam boruak dawng turin an chhuak vek a, keichu ka nawm loh vang in classroom ah ka awm thung.
"Hei bakilh neitu" ka thaw hak a, hepa hi kalsan ka duh em em kha ani. A hming pawh ka hre tawh. Joseph ani a, zana hliam tuar tanpui ka tum pa awm na min zawt tu kha ani.
"Enge iduh?"ka lo ti bul hmuk a, mn ngaipawimawh lo ni awm tak in a nui sung zui.
"In pawm mai rawh. Zana ka hmuh kha ini tiraw? "
"Chupawh chu ngatinge i vei em em? "
"Ka buaina chinfel anih hma chu ka rilru ah a awm reng zel" ka hmaah a rawn thu a, ka awm a nuam lo telh telh. Diktak chuan ka hlau ani tih ka pawm tawh.
"Ka ni ka ti mai ang" tlawm hreh deuh chung in ka ti ve a, Cindy rawn let tawh se ka ti kher mai. Ka bakilh bawk kha a rawn phawrh leh a ka sam a dah a tum laiin ka lo awmsan a "Min khawih suh" anui hak a, a thin a rim hmel viau thung.
"Mipa tihbuai ngam inei ta lo mi?" A hmel a dur khup khup a, a thutna atang chuan a in perh tho ti ila a dik ber ang.
"Ka tlanchhe ve ngailo Christopher" ati zawi sap a, a kut a hum ruh nasa hle.
"Christopher" ka lo ti nawn ve sap a, a hming ka hreve ta. A rukin ka thli thlai reng thin a, buainaah pawh a tel ve fo. A hming erawh an sawi ka hrengai lo. A hming min hriattir avang in Joseph hi lawmthu hrilh ka ba in ka hria.
"Khami zana school dang a i thiante zawng zawng i koh khawm zana ka tlanchhia kha ami ila sawi? "Ka hrechiah. He Christopher ngei hi anih hi puih ka lo tum kha. School luh tirh khan hliam a nei reng a, engtinge ka lo hriat loh theih zawk le? An pahnih chuan an in en run run a, an insual thut ka hlau kher mai. Tleirawl tha za rual leh huai ber nih duh hun lai ve ve an ni a, buaina nasa zawk a chhuah ka hlau ani. Joseph zawk chuan nui chung in min rawn en leh deih a, keipawn hepa awmdan hi ka hrethiam lo. Mize engzat tak nei ang maw?
"I bakilh hi ka kawl rei ta khawp mai. Kawl ve tawh rawh" laksak ka tum veleh a kut a la san a, "Keiman ka kilh tir ang che" ati deuh kher a. Min ngaizawng ta a manle tih tur khawpa mitmeng nem in ani tun ah hian min en ni.
"Ka duhlo" ti mah ila ka sam a rawn khawih leh tho a mahse a duh ang chu a ti thei biklo Christopher a awm ve vang in.
"Duhtawk rawh. Hmeichhe hlauhna isiam chuan mipa inilo ah in ngai rawh" alo ti a, Joseph chuan muangchang in a kut a la san a, ka bakilh pawh min pe let lo in a kalsan a,pawn lama a chhuah dawn ah na takin Christopher a su lui kher bawk.
"Mi mawl anih kha" ti chung in Christopher chu a nui huk a, "Misual bum awl ber" ati leh kher bawk.
"Mahse isawi kha a dik alwm"ka lo ti ve vat a, a thusawi kha amah pawh in a rin hmel loh mahse dawt a sawi silo.
"Zanah i chhuak tawh ngailo mi? " ka enchho ha a, engtin nge zanah dawr a kal ka duhtawh lo tih a hriat? Ka hmel a hmuh in a nui suk a "Ka hria che. Mihring hi aw ringawt atang pawh hian alo in hriat hran ve theih a?"ati a, hepa hi chu hlauhna pawh ka nei chuang lo. Ka thlamuang zawk ni ten ka hria.
"Chhuak tawh suh khalam kha misual mawl deuh deuh zalenna ania" nui chunga tih pahin Joseph thutna lam a melh a, "Jenn ka zung nasa--ah" Christopher ahmuh veleh Cindy hlau a ding chawt a, ani hi chuan insual leh insual hrat hrim2 a ngaina ngailo.
"Hmanzan avang khan ka lawm e" ati a, a chhuak zui nghal a, ka ruak huaiin ka hria. Cindy ka duh aiin alo let hma mah mah. Ral atanga ka lo hmuh thin aiin a hnaiah a hmeltha zawk deih. Mipa ah chuan a lian pawl ani maithei. Ngo lampang ani bawk a, a sam dum hlap leh a vun rawng te chu ka hmu inrem bik in ka hria.
"Engtin nge in in hriat?" Cindy zawhna chu ka chhan chak zawng tak ani. Ka hmuh dan zawng zawng ka hrilh vek a, uluk deuhin alo ngaithla a.
"John a tluklo" tih chu engkim ka sawi zawh a min chhanna ani. Thurawn enge maw ka beisei ve mahse ka thiannu hi Cindy ka unaupa chiah mipa a tha tih neitu ani.
.
.
School kan bang a, school ban hi ka huphurh tan riau tawh. Min be em em lo mahse class a Christopher hmuh ringawt pawh kha nuam ka lo ti ve em em ani. A lerh leh lerh loh ka hrelo a, ruihhlo atih leh tih loh pawh ka hrelo. Engpawh lo ti se a hmelthatna a bo phah lo aniang engti hawi zawng pawh in atha tawp mai ani. Ka u in tha deuha awm turin min duh a, rei pawh school thar a ka la luh hma in ka chhungten sual an tih lutuk tur ka hnaih chak tlat chu ani sia, an hriat chuan min hau ve nasa viau ang le..
CONT...

BAD BOYS-3
.
.
"Nimin tlai ah Christopher leh Joseph an insual leh tawh a" ka thuhriat chuan min deng kher mai. Cindy pawn hlauthawng takin min lo en vat a, anni pahnih chung ah hian enge thleng ka hrelo a, enge an in huat chhan pawh ka hrelo. An in haw lutuk tih zawng hi ka hriat chhun ani mai. Bell a rik pawn an rawn la in lan lo ve ve a, Christopher thutna lam chu ka en leh zeuh zeuh thin. A awm loh chuan ka kim lo riau in ka in hre thin. Ngatinge alo in sual kher kher ni. Nileng in an rawn lang lo ve ve a, ban a in ka thlen thleng in amah bak ka rilru ah a awm lo. A engmah nilo mah ila ka ngaihtuah takzet ani. A chhungten an hau aniang tih thleng in ka ngaihtuah a, a thiamloh ni mahse tuman hau lo se ka duh. A inthlak zawh hnu in Cindy a rawnkal a, "Lokal rawh" ati a, min pawt lawp a, a thau vang in a chak aniang min pawt zo hle. Ka room ah min pawt lut a, kawngkhar a kalh zui nghal a. Ka inthlak na tur min laksak vek hnu ah muangchang in ka inthlak a, engmah tih ka phur lo. Insual naah a tel tih ka hriat hnu ah nileng in ka hmu lo leh a. Amah lah in egahmah min ngai ve awm der silo kei lah in ka lo ngaihtuah ve em em ringawt a. Zaktheilo ka inti mahse ka rilru thleng in ka control thei bik hleinem.
"Christopher biak theihna ka nei" Cindy chuan ati hluai a, ka beng verh zawng tak anih vangin a phone en lai pawh ka enpui vat a "Engtin?"
"Ben-a ka dil" ka lawm lutuk chu ka tah a chhuak zawk. Keimah min hrelo mahse ka call anga atha tih tal hriat ka duh. Hepa hian zún anei aniang heti tak a ka vei hi amak ka ti. A number ka la chhawng a, ka phone atang zawk in ka call a, vawikhat naah chuan a la lo. Ka beidawng mai bik chuang lo. A chanchin ka hre duh lawm tiin ka call nawn leh ngat a, ala dawn lo amaw ka tih hnu ah "Hello" arawn ti. Mutho hlim a ang a aw atang chuan.
"Christopher"
"Aw.. Keimah" sawitur ka hretawh lo. Ka ngawi char char a, a dah biklo. Mipa in sual ti mahse hmeichhe lakah chuan a dawhthei ve in ka hria.
"School ilokal lo a" anui a. A nui ri hriat ringawt pawh a nuam ka ti. Ka thlamuang huai bawk in ka hria.
"Ngatinge?"
"Nizana ka mu tunah khan ka harh chauh a" a aw atang chuan a nuih a zat hmel ka tia mahse ka chiang chuang lo.
"Vawin ah thil thar kan zir asin" ka sawitur hrelo chuan ka ti leh tawp a. A ngaihsak ka ring lo a, ka ring dik chiah bawk.
"Naktuk ah ilokal tawh angem?" Keimah hlir ka la tawng in ka hria.
"Ka lokal angem?"arawn ti let a, mn fiam ve a ang.
"O lokal ngei ngei rawh"ka lo ti vat vat a, hemi tum pawh hian a nui leh a, a hmel ka hmu chak lutuk.
"Anih leh aw. I lokal ngei ngei tawh dawn nia" min channa pawh nghak tawh lo in phone ka dah a, Cindy ka kuah chuk chuk a "Atha tih ka hria. A be tu kha keimah ka ni tih a hrelo bawk" ka ti a, damlohna anei lo chu ka lawm hle. Mahse amah be tu kha keimah ka ni tih a hriat chuan ka zak ve ngawt in ka ring.
"Min hre ta se"
"In insual sia ina viau amaw ka tia iti dawn nia" Cindy chuan alo ti zung zung a, ka u ringawt a ngaihtuah loh chang chuan kei aiin thil tih dan tur a hre deih zawk thin. Ka bula Cindy awm hlauh chu ka lawm thian atana ka lo nei pawh tun ah chuan vannei ka in ti rih hle.
.
.
"Chuan ka lokal a"ka hmaa Christopher nui vur vur chung a ding chu dak vah in ka en a, amah be tu kha ka ni tih a hrechiang ani.
"An insual an tia, i lokal silo a, ina viau amaw ka tia"
"Min ngaihtuah mi?"sawitur pawh ka hretawh lo. Ka ngaihtuah zia a hriat chuan amah ngaihtuah tawh lo turin min ti ang tih ka hlau si. Ka phone ve ringawt pawh kha zaklo min lo ti ru viau tawh maithei sin hmeichhia zawk ka ni lehnghal.
"Insual tawh suh ihmai ah hliam a awm reng mai" ka ti ta daih a. Tunah pawh a hliam a dam chiah a a dang a awm leh tawh.
"Zanah chhuak tawh suh" ka tih zawm leh a, inlaichinna kan neih hma hawt in amah control ka tum nghal a ang. Min hnaih duhlo lehzual ngei ang.
"In in ka hretawh" ka mak ti hmel a hmuh in za vaklo in a nui a, "Ka loleng dawn tihna pawh ani chuang lo hlau duh suh" mak ka ti hmel kha pawi ka ti amaw alo ti ani ngei ngei ang. Kan in a hria chu pawi ka ti miah lo mahse alo len chu ka duh lo bur. Ani ang hliam nei reng lehnghal. Alo len chuan ka mark a chhe nghal dawn.
"Engtin nge i hriat?"
"Thluak ka nei ve a, mahse in in ka hria chu a tangkai vak dawn lo a ang. Ka kal" tih leh kal a rual a, min be duhtawh miah lo ang. Ngatinge ka ngaihtuahna hi ka hmel ah ka lanchhuah tir tel kher thin le? A ho lutuk ani pawh hmeichhe in a leng rual ala ni hleinem ti ten ka in hnem a awmzia phei chu a nei chuang lo.
.
.
Ka mu thei lo ka in let reng a, zan mut hi ka harsat ve hrim hrim. Chhun a Christopher nen kan in biakna te ka ngaihtuah let a, kan in thleng thleng a alo hria se min duh ve a niang tih te thleng in ka ngaihtuah a, chutiang em chu ni theiin ka hre silo. Ngatinge mipa leh hmeichhia hi inhip tawn tur a tih kan lo nih kher kher le te ka ti leh ringawt thin. Ka whatsapp ka en a, tun ang zan rei ah tumah ka thian te biak tur an awm tawh lo. Thian ka kawm tam lo hrim hrim bawk. Christopher number ka neih vang in a dp ka en a, a thlalak alo dah lo hlauh. Ka hmuchak a sin le. Beidawng deuhin ka phone ka dah a, banga sana intar ka en a, 12 ari dawn tawh. Mutthilh ka tum pauh leh ka harh tulh tulh mai si. Ka phone ri chu rang tak in ka en a, Christopher-a hming ka hmuh chuan ka thin a phu dut dut thei hial in ka hria. Ka lum pup pup bawk. A message ka hawng vat a "In in bulah ka awm" tih zawng alo in ziak a, ka beisei loh lam daih ani.
CONT..

BAD BOYS-4

.
"Ka mu tawh. Haw rawh" tih ka thawn let a, ka message chu a hmu nghal min rawn reply tawh lo. Mi ti chung chung chi anilo tih ka hria mahse ka duhlo vawikhat tal arawn tih ve ka ring a. A induh ve tho anih hmel keichu duh ka neih chuan induh har ka ti tawh. School arawn kal loh a ka biak hmasak hma chu min rawn be lo a, ka number lo nei lo pawh nise keipawn Cindy hmang in ka nei tho a, mipa zawk tan phei chuan bul tan hmasak thil har anilo. Tunah kan in bula a awm min hrilh a, ka vawikhat hnar na ah a beidawng a. A bialnu tur pawn min sawm se hmeichhe nihna avanga duhtho si a atir a lo hnar mawi kha a thiang dawn miah lo tih na ania. Lo duh nghal ta ila hmeichhe awlsam nih ka hlawh awm tho si. A chang chuan mipa a pian ve te ka chak thin. Hepa ang hian ka in duh ve thei maithei. Ka in ngaihtuah thin rim a, ani ang insual reng leh lehkha pawh zir peih lo hian min phu lo te ka ti leh ringawt thin mahse min be tawh lo tur anga ka ngaihtuah in ka ngai ngam bawk silo. Ka let ka let a, ka lo muhil ani ngei ang ka harh chuan ni alo sa ut tawh. Ka phone ka en nghal a, Cindy message lo chu message dang a awm chuang lo. A induh takzet ani. Ka inbual fai a, ka zawh hnu ah darthlalang hmaah uluk takin ka in chei a, teacher te hmuh phak loh tur khawp a tlem makeup ka hmang ru. Mipa duh ka neih tawh vang in atha thei ang ber a lan ka duh ve ani mai.
"Jenn i thiannu alokal tawh" ka nu au lang lang ka hriat veleh hmanhmawh takin inhnuai lamah ka tlan thla a, engmah pawh ka la eilo. Ei pawh ka eichak lo. Ka chhungte ngaihthat nan tlem tal ka ei a ngai tho thin. Thut pawh thu lo in ka ei thuai thuai a, Mary nghak lo in Cindy nen kan kal a, sawitur ka ngah a, Mary rual a kal chi anilo.
"Ka hah" ding meuha Cindy thaw hluam hluam chu ka khawngaih leh hnu hnawh.
"Mary kan nghak mai lo a, ala hma tho si" lungawilo deuhin ati nang nang a.
"Sawitur ka nei lawm" ka tih chuan "Eng nge" alo ti vin ve hlar mai.
"Nizan ah Christopher-an min lo bia a"
"Eng tin?"ahmaa a lungawi lohna zawng zawng kha a bo leh vek tawh. Keimah ai pawh a phur zawk hmel a pu.
"In in bulah ka awm atia mahse ka mu tawh haw rawh ka tia min reply tawh lo" ka ti a, Cindy pawh a hrilh hai ve hle. Sawitur a hrebik lo niang ngawi reng in kan kal dun a, min hnem dan tur a ngaihtuah pawh ani maithei. Sawitur hria se chuan ngaihthlak sen loh khawp a tam a sawi tawh ngei ang.
.
School kan thleng a, gate kan luh rual in tuemaw hian min rawn kuah a, tlan pah a min rawn kuah anih vang in ka bu dawrh thei. Ka hawichhuak a, Joseph-an min lo nuih vur vur a.
"Min ti phu lawm"
"Kan in hmu khat hle mai Jenn, min lo ngai em?" Ka ngailo aniang, an insual tih ka hriat hnu ah vawin hi school arawn zawm leh hmasak ber ania, a kal lo tih pawh ka lo hre ve lo.
"Ka thiannu kuah ve ringawt suh"
"Lo ngawi mai mai rawh i thau si" Cindy chuan rum takin a melh a, Joseph chuan engahmah a ngaih loh hmel.
"I bakilh--"
"Min pek tak tak dawn loh chuan ka bakilh kha sawi ve ziah suh" ka lo ti ve hlar a, hepa hian min fiam kual reng a, ka bakilh a sawi ve ziah bawk a inpek awm ngai silo ka ning tlat tawh. Nui chunga uang deuh a a awm dawm pahin "Ka phu lawm min seh dawn mi Jenn?"ati nem duai a, ka chhang peih tawh lo. Hepa ang hian Christopher khan min zui ve peih se ka ti ngawt mai. Mahse ka thiannu thau nuihzat tur chuan ka duh chuang lo.
"Min zui reng suh ka ning che" tiin tlang deuh in ka hrilh a, ala nui tho. A ngei zawng nih pawh ka thlang fe. Tlanchhiat san ka duh ber in min zui reng a, ka hne hluah hluah. Kalsan tum mah ila a theih loh vang in class room kan luh thleng in min kuah a, hmeichhe lam chuan min lo en deuh thap a, mipa ho an bengchhen phah hle. Christopher-a thutna lam ka en a, min lo en ve chiah tih ka hriat veleh Joseph an ka dar a a kut a dah chu na deuh in ka paih thlaksak a. Ka awmdan chu Joseph an a hriatthiam ka hlau hle. Christopher nen an in millo si Joseph hian a runluih char char duh ang tih ka hlau ve tho ani.
.
.
Break anih veleh a tam zawk an chhuak a, classroom pawh a reh leh vek tawh. Cindy nen class ah kan thil pai kan ei a, kan ti ti pah a. Joseph pawh a thiante ruala a chhuak ve ka hmu a ka thawveng huai mai. Christopher chu a thutna ngai ah kuangkuah in a thu a, pawn lam a en reng a, eng nge a ngaihtuah ve ang le ka ti thin.
"Ka zun a chhuak lutuk" Cindy in dawm chungin a tlanchhuak a, a zunchhuak chu kal suh tih chi ani tawh lo midang aiin a chhuak bik amaw tih mai tur ani. Cindy awm loh hnu phei chuan tih tur a vang hle. Kan thil pai ka eizo vek tawh a, iduh ve em tih tur pawh ka neitawh lo. Ka biak hmasak loh chuan min rawn biak ka ring bawk silo. Engemaw chhuanlam tha deuh ka duh ngawt mai. Ka be chak ropui si.
"Christopher" alo hawi a mahse sawitur ka hre lo. Sawitur ka ngaihtuah vang vang hnu ah "Nizan kha a tlai tawh lutuk a" ka ti tawp a, a hriathiam ngei ka beisei. Min chhang dawn tawh lo amaw ka tih hnu ah "A pawilo" ati sup a, a lam ka hawi a, min en reng mahse enge a ngaihtuah ka hrethiam lo.
"Eng nge kan in bul ah itih reng2? I tlanchhe leh ami?"
"Mi in ngaihdan kan neih tawh chuan a chhan diktak sawi mah ila kan ngaihdan hmasa kha thlak har kan ti tawh thin" ati deuh duah a, sawi mah ila tlanchhia ah min ngai tho ang a tih na ah ka ngai.
"A chhan diktak chu ka hrechak tho a"
"Hmeichhe dilchhut deuh hi an lawmawm rualin a ninawm chang pawh a awm ve tho" a thutna atangin a tho a, ka bulah alokal dawn amaw ka tih laiin kawngkhar lam a pan deih a, a mize mak lutuk hi keipawn hriatchian ka chak rualin nin chang ka nei ve tho.
.
Cont..

BAD BOYS-5
.
.
Ni a liam a kar a liam a, Christopher nen pawh mumal in kan la in be leh lo. Min hel dan ringawt a zawng ni ber in ka hria. Joseph chuan min la tibuai peih reng a, ahah ve lo mawni te ka ti thin. Hau hrep hrep mah ila awmzia a awm chuang lo. School ban veleh Joseph hmuh loh turin Cindy nen a ruk in kan haw a, Christopher chuan min hmu reng min ngaihsak duh chuang lo. In ka thlen veleh ka inthlak a, ka inbual leh hnu a tv ka en a, tlaiah chuan lehkhabu ka phawrh ngailo. Ka awm mai mai tawh chuan Christopher bawk ka ngaihtuah thin. Nktk saturday ania, school kan kal lo anga, monday ah chiah ka hmu leh thei anga, zan khat lek pawh rei ka tih laiin ni2 ngawt ka hmuthei dawn lo nia. Min ngaihtuah ve thin angem le nge a mi huat zawng te tih hrehawm dan chiah a ngaihtuah ang? School ah nise mipa pawn an hlau a, tihsual an neih pawn an zep sak bik char char zel a, sual vanga midang hlauh nih chu thil mawi leh in chhuan na chi anilo. Ka chhungte an lo haw a, kan buai nak nak a, amah ngaihtuah hman lo a awm ka duh ber. Ka hman lutuk chuan ka lo ngaihtuah leh veng veng thin. Kan nula in rawngbawl a peih hnu ah chaw ei turin min rawn ko a, kan buai em vang in awmpui hi neilo thei kan ni lo. Chhung inkhawm hi kan nei ngei ngei bawk thin. Neih loh chu kapa hian a remti lo bur ani. Ka hun ani tih ka theihnghilh a, chawpchilh deuh in Bible ka keu chawp chuk chuk a, chhiar tur ka zawn kual laiin "Ngatinge John-a em em hi?" Ka nu in atih ri ka hria, ka hawi chhuak a, ka unaupa alo la haw ve lo.
"Phone rawh tun ah haw loh a hun tawh lo" kapa chuan ati hluk a, ka nu chu a mang ang tan tawh ani tih a hmel a tang pawn a hriat ani ka khawngaih viau mai fate ngaihtuah chi a ni si.
"A switch off" ati hnual raih a, keipawh in ka u chu ka ngaihtuah. Nidang ah alo haw tlai ngai si lo.
"Kan tihsan mai dawn ami? A tlai zel si. College ah laklawh te pawh a awm thei a" tiin Mary chuan ngaihdan thar anei a,kanu leh pate pawh in an tawmpui aniang tihsan mai turin min ti a, Bible ka chhiar a, ka tawngtai a, ka u ka tawngtaipui uluk lehzual hle.

Ngui riai in chaw kan ei a, chhungkaw in pawh leh chhungkua a engkim ti ho thin kan nih avangin ka u awm lo chu hrehawm kan ti tlang hle ani. Mary a tho hmasa ber a "Thil ka eina ala reilo a, ka eitui vak lo" tiin chhuanlam a siam a, John vang bak anih ka ring lo.

"Ka hau hrep ang engmah sawi lawk lo in a tlai a" ka pa chuan ati hluk a, a hau phallo tu ber tur ani leh awm tho sia. A fapa neihchhun chu engtin pawn awm se a en liam mai mai tho ang. An duat em em a, ka u hi a sual chi ani lo hlauh a, kan vannei niin ka hria. Sual chi niin sual duh sela chuan sualna chance hi a ngah ve in ka hria.

"Aaahh.. Ka duhlo.. Nu lokal teh u John-a hii" tia Mary au ri kan hriat chuan kan kut kan sil sawk sawk a, kan doctor nu ber pawh a phili anih chuan ka hmu ve ngam lo maithei.

Kan va kal ve chuan keichuan ka rap leh hman tak tak. Ka unaupa chu chhuat ah a mu tawp a, alu ah Mary chuan a dawm a, a hnar a thi a, na atih athen vel na lamah a ha vel a thi tih ka hmu bawk. A pum a dawm vang vang a, a then leh tlawk tlawk thin. Ka lainat kher mai.

Ka nu leh Mary chu doctor tih takah an chi ai rei lo. An buaipui zung zung a, a bek atang pawn thisen te alo chhuak chu niin, ka rin aiin a serious daih mai. A vun kak nasa thui ngai em chu a awm lo. Thutthleng ah kan mut tir a, a hmai pawh a duk nasa angreng. Rilru no tih takah ka u ka khawngaih vang in ka mittui alo tla leh hman tawh.

"Bawiha tunge hetianga ti che" ka pa chuan sehchilh deuhin a ti a, a thinrim insum tum viau mahse a langchhuak lo thei lo aniang.
"Ka lo haw khan mi pahnih lo indin chilh ka hmu a" Christopher leh Joseph chiah ka rilru ah an awm.
"An insual dawn a manle ka tia, an bulah bike ka ti ding a, helmet ka phelh chiah tih in engmah ka sawi hma in bike atangin min tlawh thla a, min sawisak rawn nghal a" ati a, ka chhungte chuan thinrim hmel an pu vek a, keipawh ka thin a rim ka hlauthawng tel bawk.

"An hmel ihmu chiang em?" Ka pa bawk chuan ati leh a, "O hmu chiang e. Uniform pawh an la ha. Mahse kamis leh kekawr chiah an hak vangin eng school nge ka hrelo. An school chhinchhiahna tur an in bel tel lo" ati a, a hliam tawrh avang leh a then leh sak thin. Keichuan ka u sawisa tu te chu tute nge an nih ka hria in ka hria.

"An rui amanle? Chutyga midang lo tih ringawt" ka nu in atih veleh ka u chuan "An rui maithei" alo ti vat a. Mary dar ah alu a dah a, a mit a chhing vang vang a, Maryn a sam a lo khawihsak pah in "Tunlai naupang sual zia hi. Ruihhlo an khawih hma si. Fel hmel tak tak a ruk a ruihhlo lo khawih te hi an tam ania. Bakah an ruih hian a then chuan midang kutthlak te an chak tlat a" ati bawrh bawrh a, a enkawl nual tawh a, a hre deuh anga, asawi pawh chu a dik maithei.

Ka pa ngawi ta reng chuan ka ngaih a ti tha lo. Engemaw thil pawi zawk a thlen tir ka hlau. Ka u sawisa tute a chhuichhuah tir te ka hlau. Mahse ka nu in a khap anih chuan engmah a tih tir lo ang a, ka u chungchang ah kher kher hi chuan enge a tih zel ang ka hrethiam lo ani.

"Ka han intifai ve nge" tih pah a din mai a tum chu a lu a hai deuh vang in a tlu leh a, ka pa leh Mary ten an lo dawm vat a, ka unaupa hi mipa ka hriat ah chuan a zaidam pawl tak ani ngei ang. Tunah pawh thinrim leh huat nei hmel a pu lo. Tumah hi ka hua tih ala nei lo a, mi a rel ngai lo a, mi chhiatna a ngaithla duh ngai lo. Ka hriat ve theih chin ah ka naupanlai atangin ka u hian vawikhatmah min la hau lo. Hetiang mi anih vang hian ka nu leh pa leh Mary te pawh hian an duat zual ni in ka hria.

Amaha kal a harsat vang in ka pa in a room lamah a kuah lut a, "Anmahni hi hria ila chuan an chhungte bulah ka sawi ngei ngei ang" Mary chuan ati a, ka u sawisa tu hi Christopher anih ka hlau lehzual. Joseph chu nise a zia Christopher chu sual ve tho mahse anmahni tibuai hmasatu lo chu alo khawih hmasa duh dawn mi tih te ka ngaihtuah leh a, tlem chuan ka thlamuang deuh a, a daih rei chuang lo.
Khum ah ka bawk a, ka hmaah ka zirlaibu ka pharh a, lehkhazir ka rilru ah a awm lo. Ka ngaihtuahna ka kawm a, vawin a thil thleng te ka ngaihtuah a. Ka phone ka tuai kual reng a, Christopher hi ka zawt mai duh angem tih te ka ngaihtuah a, zawh tumin a number ka hmetchhuak a, ka zam vang in ka dah let leh thin. Ani ang misual lakah ngatinge ka zam viau le tiin infuih mawlh mawlh mah ila Christopher anih chhung chuan ka zam lo theilo ani.

Zingah school kal turin Cindy in min lo sawm a, ka u hliam vel a hmuh chuan a au buai nasa hle. Ka nu in pangai tak in thil thlen dan a hrilh a, Cindy chuan min melh kar a, ani pawn engemaw rin chu anei ve ani mahse kanu leh pate hriat ah engmah a sawi bik lo.

Nidang aia kan tlai vang in Mary rual in kan kal a, kan school bul ah min dah a, mak deuh maiin gate bulah Christopher ka hmu. A ding khawmuang ngai silo a. Kalpelh mai ka tum laiin ka ban ah vuan a "Kal rual ila" ati a, ka lawm vang in ka auchhuak lo chauh ani. Nui ver ver chung in ka bu nghat nghat a, ani pawh a nui ve, a nui mawi viau lehnghal.
"Ka lova kal ang" Cindy chuan ati a, tih nachang a hriat pawh ka rin lo ati ve chu ka lawm ru khawp mai. Christopher-a hmel ka en zawk a, hliam thar ka hmuh chuan ka nur nang a, engmah ka sawi lem lo.

"Ngatge min lo nghah ve tehmial a?" Hrethiam lo takin ka ti a, a chang in min bia a, a chang in min hrelo der a, a mizia hi hriatthiam a har em ani.
"Hrilh tur che ka nei a" ala hma avangin a sir ah min din pui a, chiang deuha min en chuan ka zam angreng hle. Min enreng avangin ka zak lutuk chuan ka pawnfen hmawr ka tham ngawt ngawt a, ka sa pup2 a, thli thaw chuan mn chhan ka ti mai hmuh theih khawp in ka thlan a tla lo.
"Englo nia" ati leh a, a peh hel rei em avangin thil thalo deuh a sawi ka ring tawh zawk. A sawihreh hmel si. Joseph nen an sawisak kha ka u tih a hria mi? Ka u a sawisa tih min hrilh dawn aniang, mahse ka beisei lo deuh in, zawi te in "Ka duh che" ati sup a.
.
Cont

BAD BOYS-6

"Maw?"ka ti deuh hu a, ka nuihzathlak ngawt in ka ring. Christopher pawn lai deuh chung in a sam a tuai thuak a, mawi deuh a nuih pah in "Ka duh che" ati nawn leh a.

"Engtik atang in?" Hmeichhia nih chuan dilchhut chang neih ve angai thin.

"Ka hrelo. Alo awm ve tawp aniang" ati a, za vak lo in ka nui a, ngaihthlak nuam deuh zawk asawi ka lo beisei a. Duhna te chu tu ah pawh a awm ve tawp thei vek alawm.

"Min duh ve em?"min en reng chung in ati leh tawp a, a tawng tam tawh lo a, a sawitur chu tlang deuh in a sawi thin ani maithei. Ka chhan nghal loh chuan kei aiin a in duh thei ani tih ka hre lawk sa vek bawk. Duh chu ka duh lutuk mahse sawi tawp chu ka hreh ve deuh hlek ani.

"Nakin ah ka hrilh ang che"
"Mi nghak chi ka ni ve lo a" ka rin dan chiah ani tho mai. Ka in nghah rei tir theilo ang. Midang a duh daih ang tih ka hlau ve tho. Tunah pawh in be em em lo mah ila ka bul hnaih a a awm loh chuan ka khua a har thin.

"Zanah kan in bulah lokal la ka hrilh ang che" a bu nghat a, alokal dawn chiang tih ka hria.
"Nangni pahnih kha" kan lam pana Joseph lokal chu hun lo ka ti lehzual. Christopher pawh a phun hlak a, enge a sawi phei chu ka hrelo.
"Christopher dawih zep tak leh a bialnu thar tur tihna mi?"a nuih dan chu Christopher-a tan chuan ngeiawm tak tur ani. A kut a hum ruh nghal tih pwh ka hmu ru reng mahse ka hmuh lai chuan an insual tur anilo ka tive tlat a, an inkar ah ka ding a "Joseph mi buai naah inrawlh suh" ka lo ti chang fak a.
"Hmeichhe thupek ka zawm ngai lo. Christopher nen hian enge kan buaina i hrelo a, lo inrawlh ve lo zawk rawh" min ti a, ka la na angreng hle.
"Chuan hepa hi ring suh ala tlansan ve ang che" ati bawk. Christopher ka en vat a, engmah sawilo in min kalsan a, "Ka sawi kha" intithei tak chung in Joseph chuan alo ti bawk.
"I tel na hi chu englai pawn a buai" ka ti a, Christopher ka umzui vat a, ka hmu hman chuang lo.

Class a ka luh a ka thil hmuh chu ka awih lo hial zawk ani. Kan class a fel ber ka tih thin, pa vak lo Kevin chu Christopher hmaah tap pur chung in alo thing thi a, midang chuan alo en thap a, tuman thawm an chhuah ngam lo anih hmel.
"I dawhkan ka ti bal lo. A bul a ka kal hnaih lai takin ilo lut anih kha" ati a, Christopher-a ke a vawn a tum chu a dar ah na takin ani chuan alo tlawh a "Va tifai rawh" ati sup a, Kevin pawh rang takin a tho a, Christopher-a thutna lamah akal dawr dawr a, a uniform kawrlum a phelh a, a dawhkan a hrukfai lai chuan ka rilru alo na hle.

Kut beng ri kan hriatna lam kan en thap a, Joseph bawk ani. Hepa vang hian Christopher mood pawh a daglam vek in ka hria. Cindy bulah ka thutna ngaiah ka thu a "Arawn lut chiah a Kevin kha a rawn sawisa nghal ringawt alawm. A nunrawng e" alo ti nghal bawrh bawrh a, keichuan a nunrawng awm pawh ka hre chuang lo. Cindy chu ka chhang lem lo a, Joseph a ka melh rum hle thung. Engkim kha amah vang vek ni in ka hria.

Nileng in Christopher nen kan in be tawh lo a, Joseph chu a theih ang a tam ka bulah a awm. Ka hne takzet ani. A hmel chu atha mahse Christopher a tluk lo emai. An ni pahnih hi chuan duhtu pawh an nei thei. An ngaihsak peih miah lo thung.

School kan bang a, ka tih thin pawh a ngai reng. Ka inthlak a, ka in bual a, thil ei pahin tv ka en leh a.
"Ka eitur siam hi i u han pe lawk rawh" kan nula in atih chuan "Ole" ka ti vat a, plate nen John-a room lam ka pan a. Alo mu bam ka hmuh chuan ka khawngaih angreng hle.
"Thil ei la" thawh a tum a, amah chuan harsa atih vang in ka lo pui vat a.
"A sawisatu te che chu an hmel ihria em?"
"Hria e hmu leh pawh ni ila ka la hria ang. Nang phei chu hmeichhia ini si fimkhur rawh" atih zawm zat a.

"I hua em?"ti a ka zawhna chu min chhang lem lo. Haw lo se ka ti. Christopher alo tel ve palh chuan a pawi dawn emai. Ka duh telh telh a, ka chhungten an huat ka duh lo. Ka zawhna chhan a hreh aniang thil dang sawi tumin "I ei ve duh em?"ati ta daih a, ka lu ka lo thing vat a, a hua ani maithei sin. Ka u hi thil sawi tam lutuk chi ani lem lo a, mahse haw miah lo chu nise awlsam taka a sawi theih ka ring a, tunah lah min chhang duh der silo. A hua anih chuan ka rilru ana viau ang. Ka hnual rawih rawih theiin ka ring.

"Ka lo thleng" Christopher-a message ka en hnu ah sana ka en a, dar7 chiah ani. A lokal ngei a, a tlai lo bawk. Ka nu leh pate an thianpa fanu birthday lawm naah chaw eiin an kal a, Mary a room ah a awm daih bawk a, chhuah ruk chu a harsa lem lo tur ah ka ngai. Harsa pawh nise chhuahdan kawng ka zawn angai tho tho. Tun hun hi ka tan a pawimawh lutuk.

Thawm neilo thei ang ber in ka chhuak a, ka rilru chu anuam lutuk thei chuang lo. Gate ka pelh veleh amah hmuh tum in ka hawikual a, ka hmuh mai loh vangin ka beidawng tan tawh. Min tihder anih te ka ring rum rum tawh mai. Bum theih a ka awm chuan min nuihzat ru viau bawk ang.

"Jenn" ka piah thim laiah chuan alo ding reng a, tunah pawh ka hmu reng sia ahma khan engtin nge ka lo hmuh
Loh theih Zawk? Min hmutu an awm ka hlauh vangin a dinna lamah ka kal thuai thuai a, a bul ka thlen veleh a hmel en tum in ka dak deuh va a, ani chuan nui vur vur in min lo en ve a, chhun lam a a hlauhawm na leh nelawm lohna zawng zawng kha tun ah chuan a awm tawh lo.

"Min hrilh tur inei a"ati a, a lokal chhan chu a sawi lehnghal a, keichu ka hmanhmawh hran lo. Tunah chuan Joseph an min tibuai theilo a, ka hrilh vat chuan min kalsan leh vat ka hlau ani ber.

"Sawi rawh" dawhthei deuh amaw anih ka tih laiin dawhtheih lohna chin chu a nei ve tho anih hmel.
"O ka duh ve che a" zawi te in ka ti a, amah pawh ka en ngam lo. Ka zah vang in amah en in ka sawi ve ngam lo. Ka duh takzet ani tih erawh ka hria. A nui ri ka hria a, ka la en ngam chuang lo a, ka hnung ah a ding a, ka dar pahnih a vuan chung in ka lu ah a khabe a nghat a "Min duh tak tak em?"
"Tehreng mai" ka ti vat a, ka zam lutuk na pawh a bo ve deuh chuan ka hria.
"Ka nundan hi i enliam thei angem?"
"Ka hrelo" a reh ta vang vang a, ka hrelo tak tak. Zanah chhuak reng lo se ka duh a, Joseph nen intibuai reng lo se ka duh bawk a, school naupang dang hlau takin siam lo se ka duh bawk a, a bik takin ruihhlo tilo se ka duh mahse engmah ka sawingam lo.

Tun ah chuan ka bulah ding in min kuah a, kan insan hleih vang in min kuah pil hneh hle. Min kuah lohna lam a kut in ka sam a tuai zauh a, ka ning hmel a hmuh chuan a nui zui hak hak a. Ruihhlo bawk ka rilru ah alo lut leh thin. Ruihhlo ti ve tur chuan ka phal ngang lo ani.
"Christopher"
"Aih" a nak ah ka kiu in ka nghawk a, na tih hmel takin a rum hak a, a ti der mai mai ani tih ka hre tho.
"Ruihhlo ka duhlo" ka ti ta tawp a, engmah a sawi lo. A tih ve thin ka ring ta tawp a. Ka hnual rawih a, ka duh loh phah chuang silo.

Kan gate bulah in kaiin kan ding a, a kut thlah hreh viau mah ila ka haw tlai lutuk chuan ka chhung te ka hlau ve tho si. Ka haw anga keimah in ka awm anga ka ruak leh huai dawn tih ka hre sa vek.
"Lut la" ati sup a, thawk la hak chung in ka in her a, amah zawk in min ti ding a, a lamah min kuai her leh a, ka biang ah dawm in ka chal ah a fawp a, a bak engmah a ti lo.
"Lut rawh an hau palh ang che" a tawp nan ka zahna dah bo chawp in a hmel ka en leh a, a hma zawng aiin a hmeltha lehzual in ka hria.

Inchhung ah ka lut a, ka room ka pan tlang nghal a. Khum ah ka bawk thlawp a, nuam ka ti veng veng nang a a nawm dan a kim thei lo. Hlauhthawn tur leh ven tur ka la ngah tih ka hria. Kan in duh ve ve a, kan sawi ve ve a, kan in ngaizawng ah ka ngai ve tawp. Chutiang chiah chuan Christopher pawh in a ngaih ve ka ring. Mahse a awmdan ang ang en liam tawp chu harsa ka ti dawn em ani. Ka la ti telh telh bawk ang.

A tir atang in buaina ringawt ka ngaihtuah nghal a, buaina a awm ka ring hrim hrim bawk. Buaina anih chuan Joseph atel ngei ngei bawk ang. Christopher hian hlauhthawn anei ve angem? Nge kan chung a thleng engpawh lo pawm tawp zel a tum zawk ni ang. Thil ngaihtuah vak vak ching mi ka ni a, a thalo lam thleng te pawh ka ngaihtuah vek thin a, ka rilru a hah phah vak thin.

"Muttui aw" ti a Christopher-a message min thawn chu ka en vang vang a, amah anih chhung chuan thu thlum tak ka beisei lo a, tawngkam tha lutuk pawh ka beisei ngam chuang lo. Min duh thu sawinawn leh turin ka beisei lo a, a message tawi te pawh lawm taka lo dawnsawn mai hi ka tum tur ani. A nundan enliam zel turin min duh a, engtiang chin chiah nge ka enliam zel theih ang le? Tunah pawh enge a la tih tih te ka hrechak a ka zawt ngam mang silo. In ngaihtuah hah vak ka duhloh vang in la hma viau mahse mu turin ka insiam a, ka mut hma in Bible ka chhiar a, ka tawngtai bawk a, nidang a ka tih ngai miah lo in Christopher-a tan ka tawngtai ve a..
.
Cont

 

BAD BOYS-7

"Ka duh pui lo che" Cindy chu ka ngei tep ani. Min ngaihtuah vang tih hre mah ila Christopher ka duh zia a hre ve tho si. Mifel ni lem lo mahse min pawmpui chu a har viau a manle.

"Ala in siamtha em em ang" ti mah ila a lu ala thing tlat. Rum deuh a min melh pah in "Mawl viau suh. Kalsan ala awlsam lai hian a bula i sawi kha sut leh ang che. Hetiang mi an in siam tha thei ngailo. Ila inchhir viau ang" ati a, keichu ka thin a rim tawh. Ka thian tha ber hi a vawikhat nan ka hua ani.

"Cindy iti mah mah ani" ka ti a, school compound a kan awm tawh vang in min en hrek hrek tu pawh an awm tan tawh. Nidang a inkual chial a kal thin kan in melh no loh tak viau vang pawh ani maithei.

"John-a sawisatu ah i ngaih vang tiraw? "
"Chutiang vang anilo. Amah tawp hi itan a thalo"
"Ka kalsan dawn lo. Ka duh lawm" ka la ti ve talh a, ani pawn min ngei hmel viau tawh. Cindy hi Christopher min duhpui lo hmasa ber tu ani. Tu tu in nge min la duhpui lo zui zel ang?
"Ila inchhir em em ang. Saw alokal. Class ah ka lo va kal ang" ati a, a kawhna lam ka en a, kan din na lam pan a Christopher lokal ka hmu a.

Ka hahdam huai in ka hria. A hmel ka hmuh ringawt pawn ka thlamuang thin. Ka bula a din veleh ka sam a tuai a, lo ner vel pah in "Ka siam uluk nen" ka ti sup a. A nui suk ringawt.

"Joseph an engpawh sawi se nileng in min biakloh phah tawh lo ang tro?"
"In biak na hun a awm leh awm loh" ati a, school bak awmdun na hun kan nei lo asin le. A thiante min kalpel tute chuan an aw an thian kharh kharh a, ka zak lem lo. Anmahni ka nel vek tawh bakah mifel leh kawm nuam tak tak an nia, rilru nuam lo in min siam dawn lo tih ka hrechiang.

"Bell rik hma thu hrih ila" ati a, compound chhung hi a hmun a zawl a, a zau bawk a, thutna tur an dah thleh thluah a, a dai lai tur ber ka thlan ah kan thu a. Bihruk na a awm miau loh vang in a rawnkal apiang in min hmu thei a, hmeichhe thenkhat chuan an hmel atang in min lawmpui lo ani tih an tilang nghal.

"Sawitur i hrelo thei e"
"Sawitur a vang thei e" alo ti ve chiah a, mi tawng tam lutuk anilo ka tih tawh kha. Nge engemaw vang in a mize tha lai alo dah bo mai mai zawk. Joseph hian engkim a hriat ka ring.

"Joseph nen hian ege in in kungkaihna"
"Hmelma" ati hmuk a, zawh zui vak chi niin ka hrelo.
"Zanah in in ah tunge awm thin?"ati a, rawn len a tum anih chuan a theih loh bur.
"An awm vek zel tumah a tul ah lo chuan an lengchhuak lo" ka ti a, pawi ti hmel a pu ve in ka hria.
"Ka lo leng ang" atih chuan chhan dan tur ka hrelo. Ka chhungte vang anih chuan nuam lo atih ka hlau a, ka phallo ka tih chuan a rilru anat ka hlau si. Rawn leng mahse Mary a awm bawk chuan nuam ati dawn lo tih ka hria.

"I phal chiah lo anih hmel" a hmel chu a khawngaihthlak zawk. A rillru ka hrechak bawk.
"Kan in kawt ah lo awm la" ka ti leh ringawt a, ka nu leh pate an awm chuan ka tan pawh chhuah a har viau ang.
"Kan hnam dan ah chuan mipa chu hmeichhe in ah a leng tur ania, mipa in hmeichhia a kohchhuah reng chuan thil thalo a tihpui tur ah te a ngaih theih a" ati duah a, a fel na sawitur tam lo mahse hmeichhe chung a a rilru put hi chu ka dik ani.
"A dik alawm mahse ka chhungte ka la hrilh lo a, nuam itih loh ka hlau a, ka lo hrilh ve chhin dawn nia" ka ti mawi ve na a ka chhungte hriat chu ka hlau takzet ani. Kan la naupang tho a rawnlen kher angailo sin.
"Lo len chu ka chakna arei tawh" nui vur vur chung in ati leh a, vawikhat alo len naah a sim nghal hrim hrim. Mary a awm phei chuan nuam ati dawn lo lutuk. Ka ngaihtuah thui peih lo zawk.

Bell a ri rang rang a "Ka van peihlo tak" ti nang nang chung in ka tho a, ka pawnfen ka siamthat chhung in ka bag alo la a "Ka kensak ang che" ati a. Cindy i ngaih ang ngawt chu anilo hepa hi. That a chhuah der lo a, tilang lo mahse a rilru hi chu a sual lo niin ka hria.

"Ka ban ah lo vuan rawh" atih chuan ka nuih a za angreng. Tuk in ah ringawt pawh amah nen a inhmeh lo tak tak thil ati teuh tawh. Tih lungawiloh ka duh loh vang in a ban ah ka vuan a, anin ka bag a keng a, chuti chung chuan class ah kan lut a. A thiante au ri chu a ring ngei ma. Hmeichhe thenkhat chuan thinrim hmel an la pu reng a, an zing ah ka thiannu Cindy pawh a tel ve mahse ani chu a thin a rim rei ve lo ang.

Ka dawhkan a ka bag a dah hnu ah nui deuh hlek chung in "Ka kal aw" ati a, ka sam tuai a tum veleh ka lo awmsan a, hemi tum hi chuan a nui huk thung. Cindy bula thut pah in "Hun pe rawh i ngaih ang kha anilo" ka ti lehnghal a, kan inhnial na kan tan leh dawn a ang hle mai.

"Lo bum ta che sela. I rilru lo tina ta se" ati a, min ngaihtuah vanga min pawmpui lo ani tih keipawn ka hria. Nghet deuh in ka kuah a "Chutiang chu a thleng lo ang. A sual hleinem. Hun pe rawh. A fel tih i hre mai ang" ka ti a, a bu nghat a, ka ngen na chu hnawl reng harsa ati thin. Kei aiin a thla in a upa a, a chang chuan min nau chei thin mahse keimah hian ka naute chei ve thung.

Break anih veleh ka dawhkan ah Joseph arawn thu nghal a, a ke ala hlang zui "A bal ange" ti mah ila awmzia a awm chuang lo.
"Christopher i bialnu dawhkan ka rap bal a engtin nge min tih dawn?"ngeiawm taka nui chung in ati a, Christopher an arawn chhanlet ka hlau hle. Engmah arawn sawi tak loh ah chuan ka thaw huai mai mahse "Duhtawk rawh Joseph" Bena zawk chuan arawn ati a, Bena hi Christopher leh Joseph a thianpa ni kawp ani. A fel a, kawm anuam em em bawk.
"Mi bialnu tihbuai chu a thing ania" Damian pawn arawn ti ve a, Joseph pawh ka dawhkan atangin a chhuak a, Bena leh Damian te awm naah akal a. An eitur a chuhpui zui nghal a.

Christopher chu Joseph awm loh veleh kan bulah arawnkal a "Ei ve rawh" tih pah in a hmaah ka thil pai ka dah a,ka tih ang chiah in Cindy pawn alo ti ve bawk.
"Ei rawh u keichu canteen ah ka kal ang" ti a thawh a tum chu a kawr ah ka lo vuan a "Ka paikep pah che a, eirawh" ngen ngawl taka ti chungin ka ei luihtir a, break ah hmun danga a akal deih chuan inhmuh na hun kan nei tlem lutuk palh ang. Ka ngai ngawih ngawih a, a bul ah ka awm reng chak.

Kan pathum in kan thil pai kan ei ho a, Christopher chuan Cindy leh eitur a en tawn zak zak a, a tawp ah nuihza insum tih hriat tak chung in min lo en a, ka mitmeiin ka lo khap vat bawk. Cindy tiffin box lian lutuk chuan a nuih a ti za ani maithei. Kan tet lai atang tawh in Cindy chuan thil eitui loh lai a nei ve vak ngailo.

"I eitui em Cindy"
"O tui e, nag i eitui em? Kan paihnem sia eiteuh rawh" Cindy pawn alo ti ve a, hun chu a pe dawn tak tak anih ka ring.
"Jenn te nen hian in in hlat em?"
"Hlat lo e. An in chhak lawk ah khan kan awm. Jenn te in a inkal ngam loh chuan kan in ah in lo inhmu thin dawnnia" ati zung zung a.
"Kal ngam lohna chhan tur a awm lo ang" Christopher chuan ati a, in la pa ve tak ani. Thil atih hmaa ngam loh nghal chu a duhlo ani ngei ang.

Kan ti ti mai mai laiin Joseph a chhuak tur chuan Christopher arawn su lui a, a thutna a tlawh zui leh a, a chhuah veleh Christopher an a zui chhuak bawk. Hemi tum hian Christopher chu kan dang hman lo. Boruak an hrethiam ani ngei ang Bena leh Damian pawh an chhuak rang hle a, an chhuah hma in lung ngai lo tur leh keini chu class a lo awm turin min hrilh. An chingfel thei dawn ani ngei ang.

Ka ngaihtuah lutuk a, ka thil ei pawh a tui tawh lo. Cindy ka pe vek a, anin alo ei vek a, kan tiffin kan khung that mawlh mawlh laiin tuemaw hian ka dawhkan arawn beng a, kan phu zawk nghe nghe. An hming ka hrelo hmeichhe pathum anni a, class12 amite anni tih ka hria.
"Christopher nen in in kawp ami?"ka bu nghat a, ka hlauh bakah keini aia an class a san vang in ka zah bawk.
"Ka bialpa anih kha. Lo hnaih tawh suh"

Thil rit deuh in min deng dawt ni maiin ka hria. School luhtirh atang in hmeichhe bula a awm ngai awm ka hre lo a, bialnu anei ti a an sawi thin lai pawh ka hre chuang lo.
"Rachel ka nia, irawn luh ve hma khan kan in kawp char char" a bialnu ni a rawn in chhal nu chuan ati a, ka khur ru der der in ka hria.
"Kei aia a naupan vang in ka then a, a sual phah vek hi. A rui thin tih ka hriat phei chuan ka rilru ana asin aw. Tun ah chuan ka inchhir tawh. Christopher hi ka duh let leh a, ka neilet leh dawn. Lo inrawlh buai ve suh" ati piap piap a, a zam lo a, dawt sawi hmel pawh a pu lo.
"Thla3 vel irawn lut ve a, bialpa inei nghal ringawt i zaktheilo lutuk" a thian pakhat zawk chuan alo ti veleh a, classroom ah awm an awm loh lai ani chu ka lawm kher mai. Midang awm ve se chuan ka mualpho lutuk ang.

"A duhtawh lo che ani mai lawm. Tupawn ngaihzawng hlui chu kan nei vek. Min duhloh hnu ah kan umzui reng kher lo" Cindy in ka thlavang a hauh chu ka lawm rual in amah a hrehawm phah ka hlau a, inrawlh lo se ka duh zawk.
"Nang kha lo ngawi la. Aman min la duh ve vang bawk in neih let leh ka duh animai. I thiannu hian lo tibuai lo se kei leh Christopher a tan atha. Christopher a hian khawhar hnem atan leh a ruih chang a hmuh atan bak a duh lo che" a tawngkam na tak tak te chu ngaihthlak a hrehawm takzet. Hetiang hi ka la tawng ngai lo. Buaina ka tlanchhiatsan thin a, tuman min hau ngailo a keipawn mi ka hau ngai lo. Mipa vanga buaina neih phei chu ka duhloh ber ani thin.
"Kal ang u. Ka sawi chu hrereng ang che" thupe aw tak in ati a, ka zak a, tlawm ngawih ngawih in ka in hre bawk.

Break a zo a, Christopher leh Joseph chu an lo let leh tawh lo. Teacher ten engtinmah an ti lo thin nge midang hriat loh in an hau thin ka hrelo a, tuna alo let lo chu lawm na chin pawh ka nei. Zawh tu tam tak neiin ka in hria a, ka hmu hreh hrih tho bawk. Kan in kawp vang hian eng eng nge la thleng zel ang ka hrelo a, amah ka duh em vang in engkim huam in ka kawp ni ber in ka hria.

CONT.. 

BAD BOYS-8


Ban veleh Cindy nen class atang in kan inzui chhuak a, kan in be lo. Ka hnual vek a, sawi tur pawh ka nei lo. Rachel inti nu thil sawi vang khan ka na lutuk pawh ani maithei. A bialpa hlui alo ni anih pawn kan in kawp hma khan neih let leh chu tum mai sela. Tha deuh leh felfai deuh a in kawp kan tum veleh khanu kha alo in rawlh leh a. A rui thin tih thleng in a rawn sawi a, a bialpa hlui ania, a duh tak tak anih chuan chung te chu zep pui tang tang zawk awm ania. La duh viau mahse a ti mualpho duh tho chu anih kha.

"Jenn" min koh na lam ka en a, bike bul ah Christopher alo ding a, min rawn hui a, ka kal lo. Ka din na ngai ah amah en in ka ding reng.

"Cindy ka thlah ang che" Ben an arawn ti a, kei chuan Cindy vawn nghal pah in "Angai lo kan haw rual thin"ka lo ti hmak a, Rachel hmuh laia Christopher-a bula kal ka hreh vek tawh. Min lo enthla ru reng awm si. Kan din rei deuh vang in kan bulah Christopher arawn kal a, ka bag min laksak a tum a mahse ka lo vuan bet tlat.

"Ka thlah ang che"
"Ka duh lo" a hrilh hai hmel chu ka khawngaih zawk.
"Jenn inthlah tir rawh" Cindy chuan alo ti a, ka rilru a hrethiam lo ani ngei ang.
"Bena hian min thlah rawh se mahse Bena bike ah ka chuang duhlo ania" Cindy in bike chuan a hlauh zia leh a chuan thiamloh zia hrechiang ber tu ka ni. Bena pawh a hawi lawl lawl in ka hria.
"Cindy nen kan haw rual mai ang. Christopher zan ah ilokal dawn nia, dar7 ah pawn ah ka lo awm ang. Kal ang Cindy" min dan hma in Cindy ka kai a, ka kalpui hlawk hlawk mai. Zanah engkim hriatchian vek ka duh. Ka zawt fiah vek ang. Rachel khan min hau leh anih pawn inven ve nan tal thil hriatchian ka ngai ve in ka hria.

"Inthlah tir mai la, i thinrim amaw ati nga sin"
"Ka thinrim deuh bawk in ka hria"
"In ngaihzawn tirh atang in in buai nghal ania. In ngaizawng lo ula ka la duh tho tho" Cindy chuan ati tha leh a, keitak hian ania in ngaihzawn chu duh leh lo. Mahse amah ka duh lutuk a, min then pawh tum se ka duh ka ring lo. A nih na ang ang hian ka pawm aniang. Engtin pawn awm se, min engtin pawn sawi mahse ka duh na a nep phah chuang lo. Lo rui thin pawh nise ala naupang a ala sim thei lutuk. Nakin ah ka inchhir anih leh keimah ka in mawhpuh reng tawh anga ani mai. Ka duhthlan na anih hi. Ka that na chiah duhtu Cindy in thil tha chu min hrilh tawh. Christopher hi chu ka chhungten mipa sual an tih, hlat tur a min hrilh thin ang ani. Midang tibuai thin, lehkha zir peihlo, class a awm tha peihlo leh ruihhlo a fihlim lo. Keipawn ka neilo ang ka tih thin ani. Kan hma hun hi kan va hrelo tak. Ka duhthusam a tel ngai miah lo mipa ka duh ta tlat ania. Ka hmuh hmasak ber zan pawn hliam a tuar a, khawlai ah kan inhmu a, mi fel panngai ani dawn lo tih hriat sa ani.

"Ka lo lut kawi lo mai ang" Cindy tawng ri ka hriat chuan in kan thleng tawh tih ka hre chiah. Ka ngaihtuahna ka lo kawm nasa deuh ani.
"Nktk ah min lo sawm rawh o. Kan in text dawn nia"
"Ole John-a lo duat la" ati a, min en vang vang hnu ah min kalsan a. Ka thiannu rilru pawh ka ti hah tel ve in ka hria. Ka hlim loh chuan a hlim thei bik lo.

In chhung ah ka lut a, tumah an la haw lo aniang ala reh vek. Johna room ah ka kal a, alo muhil a, a hliam ala dam lo a, college pawh ala zawm theilo. Lehkha zir peih lem lo mahse college nuam atih ve nen a khawngaihthlak reuh. Muhil lo se chuan ka bialpa neih chungchang sawipui ka tum a sin le. Mary ai chuan thil ka sawipui nasa zawk thin. Mary hi chu hetiang lam hi a sawipui theih vak loh. Tun thleng a pasal ala neih loh dan ah hian a hriat vek.

Ka u a kawm theih loh vang in ka room ah ka let a, khum ah zawi deuh in ka mu a, vawin a ka thil tawn ho khan min ti zawi zo vek. Zanah ka zawt fiah vek anga ka rilru pawh a nuam leh vek mai ang. Nunhlui neilo mihring a awm theih loh a, fel leh tha famkim pawh a awm theih loh. Kan duh a kan hmangaih chu an chhiatna lai zawng zawng nen a kan pawm angai ani mai.

Dar7 ari chiah a, ka chhungte an la meng vek. Ka chhuak dawn anih chuan chhuanlam ka siam angai tawh ang. Kanu leh pa leh Mary ten tv an en a, chhuahruk ngaihna a awm lo. Reivak lo an bul ah ka thu a "School enge a an? " ka nu in atih chuan a tha vek tiin ka chhang a. Christopher a chungchang ka hrilh dawn lo. Kan in a alokal thut anih leh hre chawp mai rawh se. Mi aia hmeltha leh pian nalh ni lo mah ila ka chhungte chuan atha ber min duhpui ve tho ani.

"Cindy te in ah ka kal lawk dawn" Mary arawn hawi nghal. Ani khawlai ngaina lo lutuk hian thiante in a len pawh a remti vak ngai lo.
"Eng nge itih dawn? "
"Vawin ah a khuasik a, ka tlawh ve lawk dawn" tiin dawt ka sawi a, ka rilru in Pathian hnen ah ngaihdam ka dil nghal mawlh mawlh. Chhungte dawt hrilh hi thil nuam anilo.
"Kal rawh a damlo anih te chuan" kapa in ati dam duam a "Reilo la" ka nu in alo ti ve bawk a, kanu leh pate hnen atanga phalna ka dawn vang in Mary chuan eng mah a sawi tawh lo.

Kawngkhar ka hawn rual in gate a Christopher ding ka hmu nghal. Midang in an lo hmuh ve chuan a tha lo ngawt ang. A dinna ah ka tlan phei a, gate ka khar leh hnu ah rang takin ka pawtsan dawr dawr a, Cindy te in lamah ka kalpui a, phun miah lo in min zui ve zel tho. Cindy te in kawt zawl ah ka thutpui a, a thim vek na a thla a eng hle thung.

"A vawt ami?"tih pahin min kuah a, ka lo in ha lum deuh lo chu ka inchhir tan tawh. Mi aia vawt ti chi nih nak laiin.
"Engtinge ilo chhuah theih? "
"Cindy damlo kan tur angin ka insawi a".
"A damlo ami?"
"Teuhlo" min chhan tawh lo vang in a hmel ka en a, a mitmeng ah chuan a harhfim lo tih a hriat mahse rui tur chuan ka phallo a, a ruih ka la ring chuang lo. Ka thil zawh tur te ka ngaihtuah kual neuh neuh a, eng nge ka zawh hmasak ber ang ka hrelo ani.

"Rachel tih ihria em?"peh hel takin ka ti a, ka sawi zo chiah a ka hlauthawng nghal. Ka rilru natna tur ani leh si ang tih ka hlau ani.
"Aw" ti chauh in min chhang a, ka duhkhawp lo thin hle.
"I bialnu hlui ami?"
"Aw" ka nghing dawt in ka hria. A bialnu hlui chu alo ni ngei anih kha.
"Ka hriat dan pawh min zawt dawn lo mi?"
"I hriat ka rin na arei tawh zawk" ati sam et a, ka sawivek tho ang.

"Class ah alokal a, aman min rwn hrilh a, neih let leh che atum anih kha" anui hak a, "Rachel chuan bungrua ah min lo ngai aniang a" ati fiamthu a, keichu ka fiamthu thei rih lo. A bialnu hlui pawh nise ka thik a, an nih leh deih ka hlau em em ani.
"Ila duh em?"
"Ka bialnu hmasa ber ania" ati a, duhna chu ala nei ve anih ka ring.
"Rachel runluih nan amaw theihnghilh nan min hmang anih chuan ka ngei ngawt ang che" ka ti hlak a, ka ti mai mai lo tih a hriatthiam ka beisei.

"Chutiang chuan ngai duh suh. Rachel chu nunhlui ani twh" ka thaw huai mai.

"Mahse a chhelo" ati uang a, min en paha twi te a lei a chhuah zeuh hnu ah a tum hmuk a "Chhelo itih chuan nei leh la" ka lo ti ve hmak. Fiamthu mah nise ngaihthlak nuam ka ti chuang lo.
"Ayh ka duhlo. I chhelo zawk" atih chuan ka lo lawm leh hman em em tawh.

"Zantin pawn ah i chhuak a, i chhungten an phal ami?"a hmel dur khup khup chu ka hrethiam lo hle. Huat tur ka sawi awm ka hre silo a.
"Chhungte ka neilo" ati a, a aw ki atang chuan ka tan zawh zui leh chi niin ka hre tawh lo. A ngawi run tawh a, ka zawt sual ve chiang ani.

"Vawin ah break zawh khan irawn lang leh lo a"
"Class chu a ninawm" ati a, chiang deuh in ka en a, a mit hnuai ah pem a awm leh tawh ani tih ka hmu. Khaw eng ah chuan a lang chiang viau in ka ring.
"I nundan hi i ning lo mi?"
"Min en liam mai mai rawh" ati hmuk a, ka bialpa ka duh ve em em sual rawngbawl enliam chu thil har tak ani. Ka in rawlh nasat chuan min duh loh phah vat ka hlau ve tho si. Thli arawn thawt chuan ka khur ti tih nghal. A hria ani ngei ang, a jacket a phelh a, min haktir hnu ah min kuah nawn leh a, thil sawi ve vak lo mahse a rilru tak chuan min ngaihsak ve in ka hria.
"Nangmah khan vawt iti lo mi? Kan veng hi chu zan ah chuan rin aiin a vawt thin a"
"Vawt vak lo" ati ringawt a, ka tan sawi zui tur a vang tawh hle thin.

"Kal tawh ang. I chhungten an ngaihtuah ang che" ati a, a ding nghal hluai a, muangchang in ka ding ve a, a bula awm hrih ka la chak ka sawi ngam lo mai mai zawk. Vawikhat hauh chu ka tuar ve mai ang ka ti rilru tawh zawk a mahse hepa hi chuan a sawi chu ati ngei ngei thin si.

Muangchang in kan in lamah kan kal a, Cindy te leh kan in inkar hi inhlat deuh nise ka ti thar leh.
"I haw tlang angem? "
"Aih" ati vat a.
"Eng nge ila tih dawn?"
"Ka thiante bulah ka kal ang" ka tah a chhuak ut ut a, a chhan ka hre bik lo. Hepa hian min duh tak tak angem tih thleng in ka rilru ah a awm hman hial tawh.

"Lut rawh" kan in bul kan thlen rual in ati nghal a, a jacket ka phelh a, ka pe let a, "Nktk ah kan inhmu dawn nia. Ka kal phawt" atih rualin chak deuh in a tlan liam a, ka hmuh theih loh hnu pawh in a tlan liam na lam hawi in ka la ding reng tho. Cindy sawi ang khan ka rilru tina tu tur mai mai ani angem le? Nge Joseph a sawi ang chiah in hepa hian min la kalsan ang? Ka rilru a insual nasa hle. Min duh tak tak chu nise ka lakah hian a in hawng anga, a chanchin pawh kimchang deuh in min hrilh ve anga tih chu ka ngaihdan ani. Mi chu bialpa an neih in an hlim a, mahni a an awm pawn an ngaihtuahna ringawt pawh an nuih pui ver ver a, kei ve thung chu ka ngaihtuah nasat poh leh ha hah ni mai in ka hria. A hmel chu atha mahse in nghah na tlak chu ani mawlh lo ani.

In chhung a ka luh chuan ka chhungten min lo en thap. Thil hriat an nei ta amaw tih mai tur ani.
"Cindy chu eng nge a an a?" Ka nu in atih chuan ka dawt sawi kha an awih tih ka hria, ka thlamuang huai mai.
"Atha naktuk pawh school akal thei ang" ka ti a. Cindy chu phone in dawt ka sawi dan ka hrilh tawh mai ang.
"Ka mu nghal mai ang" ka ti a, ka room ah ka kal a. Ka mu ngei a, ka muhil theilo chiang hle. Christophera message hmuh tur a awm ngai lo a, zan rei tawh tak a muttui arawn tih bak chu chanchin in hrilh pawh a awm ngai lo. A online ngailo ang tluk ania, a last seen te hi ka check ve reng thin.

Inchhung aia pawn lam nuam ti zawk bialpa ka nei a, ka rilru ala hah dawn choh ni ten ka hre thin. Ka tawngtai a, ka bialpa pawh ka tawngtaipui leh a, hetia lo tawngtaipui bak chu tih theih ka nei lo. Ka siamtha thei dawn lo a, ani ang inla pa tak chuan ka thu a zawm duh dawn chuang lo. Engkim ala tha vek mai ang tiin ka inhnem ziah dan in ka in hnem leh ta ringawt a.
.
Cont

BAD BOYS-9


"Ila bansan chuang lo tiraw?" Rachel in min din chilh leh ran tawh. Christopher nen pawh amawi tawk a rei chu kan in zui ve tawh a, thil danglam a tha lam engmah a thlen belh lo. Rilru hah na hlir ni mahse ka bansan thei chuang lo ani.


"Hun ka pe rei viau tawh che in ka hria" ati a, chhan let vak ngaihna ka hre lo. Diklo ka inti biklo. A bialpa ka chhuhsak ani lo a, a bialpa hlui ka lo ngaizawng ve a, chu zawng chu ani mai.

"Rachel buaina inei ami?" Joseph ani. Nidang a ka nin ngawih ngawih thin ni mahse tun tum kher kher chu ka lo lawm ngei mai. Joseph lokal lo sela chuan buaina ka tawk ngei ang. Anu zin tur an thlah dawn vang in Cindy school a lokal thei bawk silo.

"Henu hian ka bialpa min chhuh sak" ati a, intih khawngaihthlak tum tak hmel a pu. Chutiang chu Joseph a rilru ah engtinmah a thawk dawn lo tih ka hria, Joseph hi ka hrechiang lutuk tlat. Hmeichhe tap pawh in amah ah awmzia a neilo. Ka rin ang ngei in alo nui suk duh chauh.

"I bialpa hlui zawk anih kha Rachel zak ve deuh teh" ati a, ten hmel tak a a melh hnu ah a chek tlak tlak a, Racheli a en dan hian min en ve se Joseph hi ka ngei ngawt ang.
"Mahni bestfriend thin hmelma a siam ching ka ni ve lo" Joseph hmel a inthlak danglam chiang hle. A mitmeng a dur khup khup a, a vawt nghal raih mai. Joseph a thutak deuh lai hi ka hmu khat a, midang in an hlau em em te hi mak tih chang pawh ka nei. Tunah chuan keipawh in ka hlau.
"Sawitur engmah i hriat loh kha" cho takin Rachel chuan a ti leh a, "Hmeichhia kut ka thlak duhlo hi lawm viau ang che. Nilo se la chuan kha thil kha isawi nawn tawh lo ang" Joseph chuan sehchilh rap rap in ati a, Rachel nui riin a zawm nghal. Henu hi alo hlauhawm anih hi. Thil a hriat hnem hmel phian lehnghal.
"Tuna kan buai naah pawh hian lo in rawlh lo law law rawh" ati a, a awki pawh duhthusam in a ngeiawm ani.


"Iduh anih chuan Christopher hrilh la, tuna a bialnu pawisawilo hi engmah tawrh tir suh" nem deuh zawk in Joseph chuan ati a.
"Henu hi itan vel a, mi bialpa chhuhsak ching"
"Bialpa hlui"
"Tan tawh suh Joseph" Rachel chuan ati tuar a, mi mit pawh kan la tan ta.
"Tibuai tawh suh. In bia ang lokal rawh" ati a, Rachel ban ah a vuan a, ani chuan alo thing thla vat thung. Joseph chu rum deuh in a melh a, a haw hle tih a hriat "In be mah ila tibuai lo turin min ti tho ang. Midang hrehawm ti hmel hmuh chu nuam iti ani law mi? Tuna a hrehawm tuar hi en ta che" ati a, ka awm ah a kutzungchal in min kawk sawk a, milim ang mai ka ni. Ka tawng lo a, ka ding khawng reng bawk.
"Ka duh let leh lawm. Neih let leh ka duh"
"I á tawh anih hi" Joseph chuan ati sup a "Ni e. Henu vang vek hi. Kan inkar siamthat ka tum laiin alo in rawlh a. Vawin atang chuan Christopher hi bansan tawh ang che. Ka enthla reng dawn che" atih hnu ah min kalsan a, a thiante pahnih in an zui a, min su lui ve ve bawk.

"Kha kha ni mai i tawrh reng tur chu" Joseph chu chhan pawh ka chhang let lo. Ka din ngaiin ka ding reng a, ka dar a rawn vawn pah in "Eng ah mah ngai suh. Mi à tawngthei anih kha. Bakah ka lo chhan vang che khan lawmthu te min hrilh la min kuah vel ta che" ati a, a uang leh tawh.
"Min chhan lo mah la pawi ka tilo" ti mah ila ka rilru tak chuan ka lawm ani.
"Khawnge Christopher. Puih i ngaih hun ah a kalsan ang che ka tih reng kha"
"Puih ka ngai tih a hre hleinem"
"Hria pawh ni se a inrawlh lo ang"
"Iva inti hrechiang ve"
"Irin aiin ka hrechiang maithei" ka thut naah ka let a, sawm pawh ngailo in ka bulah arawn thu ve nghal.

"Christopher chuan chhungte ka neilo ati a" tih in bul ka tan a, enge maw tal chu min hrilh duh maithei hrechiang a inti bawk a.
"A nei. He school pawh hi an ta anih hi" ka meng zau kawk kawk thei in ka hria. Chuvang aniang a duh duh a a khawsak.
"Kan headmistress hi anu ania. Chhungte neilo ah a in ngai a, an ngaihsak hman vaklo a, an hnathawh vang pawh aniang. A u hmeichhia a chhelo rap" ati a, anui zui vak vak a. Heipawh hi miten misual ti mahse misual hmuh in ka hmu ve thei lo.
"Ngatinge in in huat?"
"Ka hrelo" ti mahse a sawiduh loh vang zawk ah ka ngai.
"Zanah te hian in chhuak reng a, eng nge in tih thin?"
"Chhuah mai mai. A chang chuan race te. A chaklo han tih hlauh vel te hi anuam a, mahse Christopher chu zan tir lama bo a hrat a, a lokal ani em lo maw?"ka lu ka lo thing vat. A lokal tih ka sawi chuan a rukin arawn zui ve ka hlau. Christopher tibuai chak reng reng a awn thin ani sia.
"Dawt i sawiin ka hria"
"Lokal chhan tur a neilo. Ka u a hlauhawm lutuk" ti mah ila ala awih chuang lo tih a hmel ah a lang vek. A at rualin midangte dawt sawi hi hriat theihna pawh a nei tel ve aniang.

Class a Christopher rawn luh rual in "Mahni bialnute chu puih an ngaih lai em em chuan kalsan lo la" alo ti a, a rukin ka nghawk zeuh a awmzia erawh a nei lo. A dak vah a, a nui sun sun bawk a. Christopher chu a bang bo hle ani tih a hriat.
"Nge Rachel lam ah i tang? "
"Rachel maw?"
"Ni e, i bialnu hlui kawlh tawk kha" ati deuh kher a, Rachel chungchang a sawi lai chuan a ner kual vel a, ka nui tep.
"Eng tin nge atih che?" Christopher chuan ati a, uluk deuh in min enkual a, amah ang a insual ve nghal zel tur ah min ngai aniang.
"Joseph a awm a, min hau nasa lo"
"Nia ka awm a. A bialpa in a kalsan laiin ka lo veng tihna a nih chu. Lawmthu min hrilh duh suh ka zak palh ang. Ka va in hnawh puar ve ange mi bialnu ka chhan na lamah ka ril atam vek tawh" ati duah a, Christopher a din na bul a thlen veleh "Venhim theih loh ai chuan bialnu neih loh ka thlang fe. I nun buai nuaih ah hian Jenn hruai lut suh" ati a, a awmzia pawh ka hre chuang lo.

"Rachel hnaih ah awm mah ta che" Joseph chhuah veleh a a thil sawi hmasak ber ani.
"Ka awm lo amah arawnkal zawk anih kha" ka thin a rim takzet. Engmah hrelo in min mawhpuh nghal ringawt mai.
"Bakah ka nei let leh dawn ati reng a, in in zawm lehna dal tu ah min ngai a, i duhtawh lo anih chuan nangmah khan chiang deuh in hrilh rawh. Keimah vang ani lo tih hrilh rawh"
"Joseph an a puih tho che kha. In awmdun reng theih phah kha"
"A dik. Joseph a awm lo sela chu kha ai nasa khan min hau ang"
"Anih chuan Joseph a chu in puih tir reng rawh" a thutna lamah akal zui nghal deih. Puih ka ngaih laia ka bula a awm lo kha ngaihdam min dil zawk ka rin laiin a thinrim zawk daih a. Chupawh Joseph nen kan lo thutdun vang anih ka ring. Awm ve sela Joseph a puih ka ngai kher lo ang. Engkim kha ama thiam loh zawk vek. Min puh thei anilo hrim hrim.
"Rachel lakah ka thlavang i hauh ngam lo anih chuan amah chu kawp leh zawk ta che. Ila hlauh tlat chuan ila duh tihna anih kha" tiin ka au zui a.
"I thinrim laiin engmah sawi suh"
"Ka duh leh ka sawi ang. Rachel itan zawk vang anih kha. Ila duh anih kha" a ngawi reng tawh. Min chhanglet lo a, min en lo bawk. Ka thin a rim telh telh thung.
"Engmah sawilo in i bo deih zel bawk si. Zan tin i message ka nghak a, mut dawn ah pakhat ka dawng a chuzawng chu ani mai. Min ngaihsak hlawl lo. Ka rilru pawh a hah ve thei"
"Bialpa dang nei mai rawh" ka nghing dawt thei. Ka lum pup pup bawk in ka hria. Midang an rawn lut sap sap a, engmah sawi theih ani tawh mang silo. Amah ka en a, tukverh ah a dak deih. Engtin nge awlsam te a midang nei tur a min tih theih zawk?

Rilru bet lo deuh in chawhnu lam chu ka awm tluan thak. Zirlai pawh ka ngaihsak theilo. A thil sawi kha ka rilru ah awm reng a, ka ngaihtuahna a mumallo vek. Ka rilru chuan ngaihdam min dil ka la phut tlat a, ka beisei san lutuk vang aniang tun ah hian rilru hrehawm deuh a ka awm phah nachhan hi.

Bell a ri a, a tawp ah chuan ban a hun ve ta hram. Ka lehkhabu hawn tur ho ka bag a ka khung mawlh mawlh laiin ka bul ah arawn ding a, ka lo hmulo der ve tlat a. Ka bag ka tih phui veleh ala a, a keng chhuak daih. A zui loh theih loh. Chak deuh in akal a, kei in ka um dawr dawr a, a bike dah na bulah min lo nghak. Ka thlen ve veleh "Ka thlah ang che" ati a, bike ah a lawn nghal a, a hma lamah ka bag a ak a hnial theih pawh anilo. Hreh deuh chung in ka lawn ve a "Akal theih em?"
"Aw"
"Min vuan rawh ilo tla ange aw. I tlak chuan ka chhar dawn lo che nia" ama fiamthu thawh ah amah chiah a nui. Ka ngei ve em vang in ka nuih a za ve lo a, amah pawh ka vuan peih lo. Bike chuan chu ka thiam ve ka tla awm bik lo emai.

A hnung ah ngawi reng in ka thu a, ani pawn min be tawh bik lo. Restaurant bulah a ding thut a, ka inrin loh vang in ka bu dawrh a, helmet ah ka in tauh bur a, anui ri ka hria anat vang in ka nui ve theilo.
"Chhuk rawh chawl lawk ang" ka la thu reng.
"Ka bun dawn che mi?"ka in tauh na tuai vut vut chung in ka chhuk a, arawn chhuk ve veleh "Khawi ka lo enchhin" tih pahin ka intauhna arawn khawih a "Ana em?"
"Na e"
"Ka tihpalh" ati sup a, restaurant ah chuan kan in zui lut a.

"I bialnu mi?"counter a lo awm chuan nui vur vur in ati a, a chhanglet lem lo. Min chhuang vaklo pawh ani maithei. Thutna awl kan hmuh ah kan thu a, menu min pek pah in "I duh duh ei rawh" ati a, a duh zawng a ziak nghal a. Ka duh ang ka hrilh ve bawk. Kan thil chah an siam chhung rei deuh chu inbe lo in kan thu a, in hmatawn a thu kan nih vang in tlem chuan ka lai ve deuh.
"Ka thianpa ta ania, an siam tui thei. I zawngchhang ang. I ei zawh chuan i tum lian lutuk pawh a zia ka ring" ati deuh duah a, ka tum vak pawh ka hre tawp silo. Ka hmui tih pawh pah in "Hmh" ka tia ka hawisan deih a. Ngaihzawn a harsa ropui si.
"Ila thinrim ami?"
"Rachel itan tlat vang hian ka ngei che" tiin chiang deuh in ka hrilh a, ka sawichhuah loh chuan ka rilru anuam dawn chuang lo. Thil sawifel loh chu vei reng a awl emai.
"Ka tan lo. Khing duh suh. I khing hneh lo ang"
"Ka khing lo. A bulah hian min tibuai tawh lo turin hrilh la ka duh ani mai"
"Ka lo hrilh ang" tlem chuan ka thlamuang ve deuh.

Kan thil chah an rawn dah a, a sawi ang tak tak in an siam tui khawp mai. Ka ril atam tawh bawk aniang ka ei bawrh bawrh mai. A thianpa ni awm tak chu kan bulah arawn thu ve a, a hmel hmuh anuam a nui reng mai.
"Bialnu inei chhelo" ati fiamthu a, keichu ka lo nui mai a.
"Keipawh ka chhelo" Christopher chuan alo ti ve vat a, a thianpa nen chuan eng eng emaw sawiin an nui reng a, hetiang a anui nasa hi ka la hmu ngai lo. Hmuh nuam tak ani.

Kan in thleng min thlah a, ka chhungten min hmu lo hlauh a, nidang aia ka tlai na chhan zawhna chu ka dawng tho. Thiante nen kan chawlh kawi thu ka hrilh. Min ring ve mai bawk.

Zanah kan chhung in tv kan en a, John pawh college te pawh akal veleh thei tawh a, a hliam pawh hmuh tur a awm tawh lo. Tuman kha thil kha kan sawichhuak leh tawh lo. Kan en tui lai takin door bell ari a, kan nula a mut hma thin vang in ka naupang ber a, ka hawn tur ah an dah tawp tih ka hria.
"Ninawm ve" ti chung in ka tho a, kawngka ka hawng a, kei pawh in ka mi hmuh chu mak ka ti a, ka awih lo hial zawk "Christopher"
.
Cont

BAD BOYS-10

"Christopher"
"Ka loleng" loh theih loh a luhtir angai a, min hrilh lawk miah lo a alokal chu ka ngei. Ka chhungte bulah engmah ka la sawi bawk silo. Ka sawi chuan then rawh an ti dawn chiang sa bawk.
"Ka chhungte an awm vek a"
"A pawilo" arawn lut a, midang thutna lam ah ka kalpui a. Mak an ti tih an hmel atang in ka hria.
"Christopher anih hi" ka ti a, ka nu a pangai hmasa ber a "Lo thu rawh. Iva fel ve, ilo leng vang vang a" alo ti sawk sawk a, thutna awl awm ah a thu a, a zah ka hlauh vang in ka thutpui a. Mary chuan an veng leh anu leh pa hnathawh thleng in alo zawt a, ka bula a sawi duhloh pawh Mary bulah chuan a sawi vek. Ka bulah chuan chhungte ka neilo ati anih kha. Mahse a chhungte chanchin a sawi laia a nuam lo ti hmel kha ka hmu ru ve reng tho.

"Exam a hnai tawh sia izir nasa tawh em? "
"Aih zir lo" tiin Mary chu alo chhang a, Mary chuan a ngaisang lo leh ang chu.
"Tuna in luhna hi in school maw? "
"Aw"
"In school a iluh vang ami izir loh? An ti pass dawn che mi?"
"Ka zir peih lo ve hrim hrim" ka pa anui huah huah a, Mary a ner suk thung.

A thu ve reng a, a rukin ka kut alo vuan leh zawk thin. Ka en apiang in min lo nuih a, rawn len chu nuam atilo ang tih ka hria, a bik in Mary vang in. Exam hnaih loh deuh ah tal rawn leng se a zia deuh ka ring. Tunah a awmdan chu Mary duhloh zawng ani tlat.

"Ka kal mai ang" ati a, a din rual in keipawh ka ding ve nghal.
"Ala hma lawm" ka nu chuan ati mawi ve na a haw mahse pawi an tilo tih ka hria. Inleng nei turin min la beisei lo a, an phal pawh ka ring lo. Kawngka thleng ka thlah a, a chhuah hnu ah thawk ala vang vang a, a zam ve anih ka ring.

"In in chu anuam khawp mai"
"Iti mai mai"
"Nuam ka ti tak tak" ati a, nelawm deuhin anui a, keipawh ka rilru a nuam ve huai mai. Hrehawm ti deuh a a awm reng kha ka hlau ru reng ani.
"Ka lo len vang khan an hau che angem? "
"Hau maithei hau lo maithei. Ka hre lo le" tiin tlang tak in ka hrilh a, min hau ka tih pawh a a rilru a hrehawm loh nan leh kan in a alo len arem tawh loh pawh a alo in puahchah lawk theih nan.
"Anih leh ka kal. Ka lo bia ang che"
"Aw min lo be tak tak tawh ang che"
"Ole" ati a, a inher a, gate atanga a chhuah dawn ah alo hawi let leh a, ka khawngaih angreng. A kal liam thleng ka awm a, ka hmuh theih loh chin ah khawngka ka khar a, ka chhungte bulah ka va thu phei ve leh a.

"I bialpa ami?" Mary aw chu a chang fek fawk hle.
"Aw ni e"
"Then ang che" ka rin dan tawk ni tho mahse min deng na lutuk tho. Min duhpui dawn lo tih chu kan in ngaihzawn tirh atang in ka hre deih tawh.
"Ngatinge?"ka ti ta tawp a. An neih tur pawh anilo a, an ni vanga ka bialpa ka then na chhan tur ka hrebik lo ani.
"Kan duhlo. A inchei dan leh a sam tih duh dan thleng in. Amah kha a harhfim lo hrim hrim. Lehkhazir ngaihsak bawk silo a hma hun a eng lo emai" ati bawrh bawrh a, "John a pawn lehkha a zir peih biklo" ka ti vat a. Ani pawh a duh deuh chu midang in tha tih puilo mahse a then awm bik lo emai.
"Bialpa rual ila ni lo deuh in ka hria. Class12 tal zo rawh" ka nu in ati bawk a, hman lai hlawm lutuk ka ti rilru neuh neuh a. An duhzawng chu nise a hun min tihpui tawh ang.
"I then lo anih chuan ama bul ah khan then tur che in ka ti tho ang"
"Mary ka rin aiin ilo sual" ka ti hrawk a, ka ute pahnih hi inthlau viau mah ila ka u ngai lo. Kanu chuan itet lai pawn u rawh kan ti thin a, iduh ngailo ati. Ka u lo hlen ta anih hi. A chang chuan a mawi lo viau a, mahse han u that leh vel kha ka thiam tawh lo.
"Keipawn ka duhpui lo che. Tha deuh a sawi theih anih lai hian sawifel mai atha. Luhlul chhuah lo la. Chhungte thuawih hi tuman an inchhir ngai lo" ka pa ani ve thung. John a chuan engmah a sawi ve lo.
"Then ringawt theih pawh ani bik lo. Ka duh lawm. Bakah a rui ngei tih pawh in chian loh kha" ka la ti talh a, ka duh naah chuan luhlul tak ka ni ve tho.
"Then la ani mai. Sawikual duah angai lo. Mi ka enkawl hnem tawh. Rui leh rui lo pawh nang aiin ka hria" a vawikhat nan Mary ka unaunu ani kher hi pawi ka ti.
"Ka then dawn chuang lo. Ka then bawk lo ang" tih leh thawh ka rual a, ka room awm na in chung lam ah ka tlan chho nghal a, ka bialpa lehzel tur ah thuneihna an nei lo. An neih tur pawh anilo. Ka neihtur ania ka thu thu. Ka phone a rik veleh ka en vat a, Christopher a message anih vang in ka hawng vat [Ka ngai che. A chhan ka hrelo] thinrim viau mah ila message ka hmuh chuan ka nui ver ver mai.
[Ka ngai deih zawk che] tih ka thawn let a, min rawn chhan leh hma in Johna alo lut. An rawn tir ani ngei ngei ang.

"I bialpa khan min la hria em?"
"Eng nge awmzia?" Ka ti hu a, ka bula rawn thut pah in "Amah leh a thianpa vang in hliam ka tuar a, college pawh ka kal theilo reng tih a hria em?"ati leh a, ka hrechhuak ve chauh.
"Christopher hi maw hman ni a sawisa tu che kha"
"Ni e. Bike atanga min tlawh thla tu kha amah ani" ati a, ka unaupa hliam na tak tawrh tir chu ka haw duh mahse ka haw chuang miah lo.
"Ala naupang a, hrethiam rawh John" ka ti ta zawk a.
"I duh viau ami? "
"O ka duh lutuk"
"Pasal tlak anilo tih i hria ang tro? "
"Ala in siamtha ve mai ang" ka ti tlat a, an thlem kual mai mai theih in ka awm dawn lo. Vawikhat chiah arawn leng a, ngaihdan an lo siam ringawt. An ngaih ang em em a sual pawg anilo.

"I lam ka tang dawn lo ania Jenn" tawngkam vin hmang lo mahse ati tak tak tih ka hria. Mary nen kan inhauh apiang a ka thlavang hauh tu leh ka lam tang tlat thin ani.
"In belh chian hma in tikhan in ti vek ringawt a. Nangni pawn tihsual te chu in nei vek. Alo tihsual ve vang in hetiang in inti ringawt theilo ang" ka ti a, ka mittui tling pam vang in ka hmu phe ruai tawh.
"Kan hmangaih che a"
"Min hmangaih chuan min phalsak rawh u" tap tuau in ka ti a, Johna bul ah hi chuan ka pangchang tlat thin. Min duat em vang in ka no zo vek niin ka hria.
"I tan a tha tur chu nise kan phal ang"
"Ka tan a tha tur anih leh nih loh in hrelo. Vawikhat bak in la hmu lo"
"Muttui aw" ati a, min chhuahsan ta daih a. An sual vek. Tuman ka rilru na pawi an ti lo.

Ka phone ka en a, message alo awm leh reng tawh vang in ka mittui ka hru sawk sawk a.
[Zan dang ah alokal leh theih angem?]

A ho emai. In hauh chhung lek a reilo. Min hau mai mai rawh se. Ka chhungten an duh lo tih ka hrilh dawn teuh lo mai.
[In in bul ah ka la awm. Tukverh lo hawng teh] ka room awm na zawn kha ka hrilh tawh tak e. Rang tak in ka tho a, parda ka keu sawk sawk a, tukverh ka hawn hnu ah ka dakchhuak a, thim zing ah a ding a, a phone eng ka hmu thei. A ban arawn vei a, a hmel chu ka hmuchiang thei lo.

A rawn call a, nui vak chung in ka la a "Ngatinge kan in bulah ila awm char char? A vawt lo mi? Kan veng a vawh em hi. Iduh leh Cindy te in ah han leng ve rawh. I thiante ihmu dawn lo mi? Haw tawh rawh a tlai tawh. Ka hmu tha thei miah lo che. Kan in chu a nuam tak tak maw? "Ka ti zung zung a, a nui ve hak hak mai.
"Eng ber nge ka chhan ang Jenn" ati a, zawhna ka zawt hnem lutuk tih ka hre chiah.
"Min chhang lo mai rawh. Ila haw dawn lo mi?"
"O ka thiante ka hmu dawn. Min puih itum zan a ka lo awm naah khan min nghak a, Joseph a pawh a tel ani awm e"
"In sual suh u o khawngaih in"
"Yes. Naktuk ah ka taksa ah hliam ihmu lo ang. Ka kal dawn Jenn, nang chuan lehkha lo zir rawh. Keimah ang in awm ve suh" a tawng hnem ve phian mai nidang ah chuan ka zawhna pawh bung deuh deuh in min chhang thin ania.
"Ole nangpawn tha deuh a awm zir rawh"
"Kan kal ange min lo enliam dawn nia" phone a dah zui a, a kalna chin chu a phone eng atang in ka hre thei. Ka en reng a, eng a hla tial tial a, ka khua a har telh telh bawk.

Ti tur a min hrilh ang in lehkha ka zir a, mahse amah hlir ka ngaihtuah. Ka theih tawp in ka zirlai ngaihtuah ka tum a, har viau mahse ka tum em vang in reilote chhung pawn ka thiam hman nual mai. Ka chhungten sual an ti em em a, ani chuan ka thatna tur chiah min duh pui ve tho si. Kan pahnih chiah a kan awm pawn a thiang lo chin a min khawih tum na anei ngai lo. Ka thianghlimna ka ven rual in ani pawn min venpui ve tlat ani. A sual lo tih keichuan ka hria. Perfect turin an beisei a, chutiang tur chuan a tlin bik lo ang. A nihna ang ang hian ka pawm a, a tan ka awm reng bawk ang.

Ka school kal tur phur taka ka insiam laiin ka room ah Mary a lokal a "Kan duhlo ani tih i hrilh loh chuan keiman ka hrilh ang" ala rawn ti. Ka chhang buai peih lo. Ka hrilh dawn chuang lo. Pasal nei vat se ka ti lehzual. A upa telh telh a, a khirh telh telh. John a mipa zawk hi chu ka nawrlui ngam mahse Mary hi chuan min ti zam thin.

Cindy in min lo sawm a, arawn luh veleh ka chhuah pui lehnghal. Mary rual in ka kal peih lo. Ka chhungte min hauh dan zawng zawng ka hrilh vek hnu ah "U Mary hi chu aw" ati ve vawng vawng mai.
"A sual ania ka ngei tlat. Mipa pawn an ngaizawng peihlo niang. Bakah an hmu ringawt a, thuthlukna an lo siam nghal ringawt a" ka ti a, ka thim ala rim hle.
"Ngawi tawp rawh. An hauh che pawn chhanglet lo la"
"Chhanglet lo mah ila ka then dawn chuang lo. Tunlai ah inthen tir tih vel an uar tawh lo emai" ka ti nang nang a, an thilsawi ka ngaihtuah ringawt pawn ka ngei vek. Ka chhungte chu an rilru a zau ka tia ka lo fak ve thin tehreng nen.
"Engtin nge in awm zel ang le? Christopher a hian hre ta se"
"A tlawmngai anga min then deih duh ang" chu chu ka ngaihdan dik tak ani. Min duhlo tu chu ka duh biklo ti chi ani ve maithei.
"Aa.. Inthen lam pang kha chu, a duh tak tak che anih chuan a then miah lo ang che"
"Min duh tak tak alawm"
"Anih chuan chhungte vang mai mai in a then lo ang che. Lungngai lutuk lo phawt rawh. Thil tih dan kawng hi chu a awm zel. In ngaihzawn hi chuan buaina neuh neuh hi chu a awm ve thin alawm" tiin min hnem ve a, keipawh ka thla a muang ve huai mai.

School kan thleng a, gate bulah Christopher a alo ding. Min hmuh veleh min rawn pan a, ka hmai si chet a rawn kun in "Ka hmai ah hliam ka nei em?"
"A hnai mah mah a ka hmutheilo" tih pahin ka nemsan a, a hmai chu uluk deuh in ka thlek kual a.
"Neilo nizan i insual lo" hlim rilru tak chung in ka ti a, ani pawh anui ve.
"I bag ka lo keng ang" ka pek pawh nghak lo in ka ah lai a pawt thla a, Cindy sam a tuai pah in "Nang chu i ak thei tro?"nui vur vur chung in ati a, Cindy chuan a hmui alo ti pawrh vak a.
"I duat bik. Keipawn ka bag hi rit ka ti"
"Saw Joseph" atih pahin Cindy bag a pawt thla a "Hey Jo, kha i bialnu hual bag" Joseph a bulah Cindy bag a vawm phei a, lo dawn a, kensak mai loh chu Joseph tan tih theih a awm lo. A keng chak vaklo tih chu a hmel ah a lang reng.
"Ka hmeichhe duhzawng chu keiman ka hre ber. Ka bialnu hual pawh tumah ka la hrilh lo. I ngaihdan ang ang kha sawichhuak ringawt suh Chris. Kal ang Cindy. I thiannu la kalsan mai thei tupa hi ka hlau"
"Engmah thil hrechiang lo a midang te ringchhe ringawt thin hi hnaih leh ka duh tawh lo. Kal hmasa ang Jenn" ka ban ah a vuan a, classroom lam pan in min kai a, ka hawi let leh a, Joseph leh Cindy ten muangchang in min rawn zui a.
.
Cont

BAD BOYS-11


"Ngatinge Joseph nen hian in in huat a? "
"Remchang ah ka la hrilh ang che" ka thut naah ka bag a dah a,a thutna lam ah akal a. Lehkhabu vel ka lakchhuah mek laiin Cindy leh Joseph pawh an rawn in zui lut. An lo chhaih sup sup a, Cindy a sen ap ap laiin Joseph chuan amah chhaihtu a thiante a na tak tak in a nem pawp pawp a. A thin a rim ti tih laiin ka nuih alo za. In ngaizawng deih se a mak ngawt ang.
"Joseph nen khan eng nge in sawi? " chhaih pah in Cindy ka nek talh talh a. A kut a a hmai sa zah pah in "Eng vak mah. Ka kg Zat te min zawt. Ka hrilh a, rit min ti rap mai" dawhkan beng meuh in ka nui. Ka thinrim na pawh reilote chhung chu ka theih nghilh ve.

"Nuihzathlak vak eng nge awm? Tupawn rit min ti vek alawm"
"Joseph chuan ngatinge i kg zat berkher a zawh che? "
"Amah zawt la" ahma aiin ka nui nasa zawk. Christopher ka hrilh chak tawh. Ani pawh a nuih a za ve tho ang. Cindy a tum bur tawh a, nuih chi nitawh lo mahse ka ngaihtuah chian poh leh ka nuih a za. Zawh tur dang a tam tehreng nen Joseph kher kher pawh chu.

Teacher te awm lai pawn ka ngaihtuah chhuah chuan ka nui Zel tho. Cindy chu en mai pawn a rit dawn tih hriat sa reng. Cindy in check up a ngaih vang in a laklawh ah haw a dil a, apa in alo lam dawn ani awm e. A awm loh hnu chuan kawm tur ka neilo a, class pawh a nuam lo leh zo tawh. Christophera nen inthut hnaih tal ila a zia ve deuh tur ania. Kan inthut hlat phian bawk si.

Keimah in thil ka ei dawn maw ka tih laiin ka bulah Joseph arawn thu leh tlat tawh. A tui hmel atih apiang a ei ve a, "Ka pai kep lo che" ti mah ila "Hetiang zat zat i pum ah a leng lo. Ka ei ve loh chuan i puak ang" ti chung in min eipui lui tlat tho.

Joseph a bul chep deuh ah Christopher arawn thu ve a, ani chuan a eitur lei arawn keng.
"I bialnu hual a haw sia ka bialnu ilo awmpui leh tawh ami?"
"I bialnu hian i dawih vang in a duh tak tak lo che" an ti leh tan dawn. An inhnial nasat chuan tun ah emaw zan ah emaw an insual leh mai ang.
"In hau lo in ei rawh u" an in melh rawm rawm a, kei chu min hlau lo dun dawn nasa mai.
"Jenn hepa hi iduh reilo ang. Hman atang tawh in bialnu anei rei thei lo. An then zel. Chian lohna anei a"
"Tuman ngaihzawn en ah an en lo che. Nang aiin ka dinhmun atha fe"
"Min ngaizawng tu te hi duh ve zel ila chuan khaw lian deuh siam tham fa ka nei tawh ang"
"Fa nei duh suh misual â deuh deuh an pung vak ang"
"Ka â nang chu imawl"
"In naupangchhia lutuk duhtawh rawh u a ninawm" ka ti vak a, ka au ring deuh nge an pahnih in min en hau mai. Christopher pawh a mizia tak tak a lang tan mek in ka hria. A sual ka ti lo telh telh bawk.

"Jenn hetiang thil tui deuh deuh i pai ziah vang anih hi i hmelthat em em" Joseph an atih chuan engahmah ngailo ang in awm mah ila ka zak ru ve tho.
"A lawmawm. Ngatinge tukin khan Cindy rih zawng i zawh a"
"Khanu kha maw? Ka hmeichhe hriat ah ala rit ber" ati hluai a, Christopher alo nui huk.
"Hei vang hi lawm tuman an duh loh che. Tunge hmeichhe kg zat zawt chut chut ngai"
"Hmeichhia ah pawh ka ngailo. Vawkpui anih kha. Vulh pun atan a it awm" Cindy in hria se a thin a rim khawp ang le. Christopher a pawn chhan ngaihna a hretawh biklo. A nuih a za tih chu ka hria mahse ka hriat laiin Cindy fiamthu thawh nan a hmang ve lo ang. A landan ang zawng ngat phei chuan. Joseph hi chuan sawi hreh vak anei lo a, hriatthiam chin neih angai. A sawi zawng zawng hi huat a lak chi pawh anilo.

Thil ei chhung chuan buaina lian tham a thleng em lo a, an inhnial zui lo na a ka ngaihsak zawk nih an in chuh a, Christopher a thik tur tawk a awmdan Joseph an a thiam a, a runluih reng a, mahse Christopher a chu a insum thei zawk anih vang in a zawng zawng ah a khinglet ve chuang lo. Thik chin chu a ngah ve tho mai.

Ban ah Christopher a rual a haw ka tum teh lul nen anu in a ko a, akal a ngaih leh si vang in keimah in ka haw angai ta zawk a. Joseph a chu bell rik rual in a tlanchhuak a ka hmu zui leh lo. Hmu pawh ni ila a rual chuan ka haw kher lo ang.

Keimah in ke in ka haw a, in ah tih tur a awm chuang lo bawk a ka hmanhmawh lem lo. Muangchang in ka kal a, Mary alo haw tawh phei chuan in ka thlen hma chuan min hau hma mai mai. Chanchin min lo zawt ngei awm sia a duh anga thil ka tih loh chuan a thin a rim leh amaw a niang nga a buaithlak.

Kawng fal deuh ramhnuai ang deuh ka thlen veleh "A lokal" tih ri ka hria a, reilote chhung in mipa rual in mn hual nghal khup mai. Ka hlau a, ka khur ru hial a, ka tawp na tur ni ngei in ka hria. Hmeichhia an pawngsual a an thah thin dan te ka ngaihtuahna ah alo lang nghal zut zut a, ka hlauh lutuk vang in ka tap bawk.

"Christopher a bialnu" pakhat in ati a, an hmel pawh ka en ngam lo ka mit ka chhing tlat.
"I bialpa min sawisak vang in i chung ah hian eng nge maw tak thlen tir ve ila atha ang kan lo tia" nui ri in a zawm nghal a, pawngsual ai chuan min sawisa hrep se ka duh zawk.
"Bialpa nunrawng deuh ineih vang in ituar angai sia, kan khawngaih che mahse i bialpa kan tihnat theihna tur awmchhun anih hi. I taksa duk thleh thluah leh i thisen chhuak te a hmuh hun a rilru na hmel ka hmu chak tawh" ahma aiin ka hlau tawh zawk. Min tihdan tur ka hre lawk vek. Pawisak annei dawn lo. Ka chung ah engpawh thleng dawn se Christopher a rilru natna tur anih phaawt chuan pawi an ti dawn lo.

"Khawngaih in min kal tir rawh u" ka ti a, ka aw a khur nasa a, ka tah nasat bawk vang in ka sawi tha hleithei lo.
"Him pial chuan ikal dawn lo tih inhre sa la" ka rindan chiah ani. Awlsam tak chuan min kaltir miah lo ang. Christopher a rilru tihnat nan ka taksa ah engemaw tal an hnutchhiah ngei ang. Bike ri ka hria a, ka thaw huai a, mahse an lam tang anih chuan ka tan a hlauhawm telh telh thung ang. Lo thlamuan vak chi pawh ani lo.

"In kalsan loh chuan ka chil ang cheu. In per vek ani mai" Joseph a aw ka hria chu ka thlamuan nghal zia leh ka lawm zia ka sawifiah thiam lo. Ka mit pawh ka meng ngam ve ta. An tlanchhe nghal thuai thuai a, bike a thu chung in Joseph chuan min lo nuih a, ka lawm takzet ani. A bula kal in "Ka lawm e" ka ti nawn mawlh mawlh a, ka tha khur pawh ala reh lo.


"Lokal lo la chuan ka chung ah thil thalo deuh a thleng ngei ang"
"Bialpa vanga buaina tawk reng nu hi ah" min ti a, a sawi dik chiah. Christopher vang in Rachel in min hua a, ka chhungten min hau a, mipa rual in ka haw na lamah min lo chang leh a. Ka bialpa vang chu ani mahse ka duhloh phah chuang lo. A nihna ang ang in ka pawm tawh a, ka duhloh phah anih chuan Christopher a tan a fair dawn lo emai. A tawrh tur ang chu ka tuar tlawk tlawk anga a ni mai.

"Lo chuang rawh ka thlah ang che. Nangmah a haw chi pawh inih tawh loh kha. I mittui te kha hrufai vek rawh. Min ka vel che maw an ti palh ang. I tah belh hrim hrim. An bula i awm lai khan tap lo in police te phone zawk ta che" duh aiin a tawng hnem mah mah zel mahse ahma ang em em kha chuan ka ning tawh lo.
"Ka tiffin ka phallo chung min rulh let naah ka ngaihsak ang che"
"Eng chu"
"Min tanpui hi"
"Tanpui che ka chak pawh anilo. Midang te hlauhna siam hi nuam ka ti ve hrim hrim. Bialpa nei lai umzui duan duan leh tanpui reng tur ah min beisei lo la" nui chung in bike ah ka lawn a, ka inrin hma in a tlanchhuak nghal a, ka tlak phah tep. A hnung ah na tak in ka chum a "Ka nemthla deih mai tur che nia" ti mahse chutiang chu ka chung ah ati dawn lo tih ka hria. Ama sawi dan tak ah midang tih hlauhthawn nuam ati.

"Bialnu te hi nei ve tawh la"
"Hmeichhia chu tuemaw bialnu hlui an lo nizel a, ka nei duh lo. Bialpa la nei ngailo ka nghak dawn. A then chu tun ah an nute pum chhung ah an la awm ang. An pian hlim atang in ka rim tan anga pasal ah min nei hrim2"
"Hepa hi chu aw"
"Avan zei in avan hmeltha tak tih i tum chutiang em em chu ka nilo ania"
"Zakthei lo"
"Zak ve thei lutuk" ka ngawi daih. Ka hnial chhunzawm peih tawh lo. Kei aiin mn hnial dan a hrethei daih zawk. Kan in awm na ka hrilh a, alo hre daih tawh. Zantir a Christopher a bo thin kha eng nge a chhan tih a hriat duh vang in kan in a alokal kha alo zui ru thin.

"Anih leh aw. Pui che mah ila in in a thil tui tak tak rawn ei tur a sawm ka phut lo" ati duah a.
"Iduh chuan rawn ei la. E.. Kan chhak lawk khi Cindy te in anih khi. Iduh chuan han ei rawh" ka ti hluar a, alo ner nasa hle.
"Amah zawk in min lo ei ang" ka nui vak vak a, engmah pawh sawi tawh lo in a tlan deih. A thin a rim ani ngei ang.

Inchhung ka luh rual in Mary nen kan in hmachhawn nghal. A van haw hma em em. Lo haw lo mahse pawi ka tih loh nen.
"I bialpa chu kan duhlo ani tih i hrilh lo tiraw? "
"Hrilh lo" John a pawh a awm mahse a sawi ang tak tak in ka lam a tang dawn lo anih hmel min ngaihsak tehchiam lo.
"Chu chu ka rin vang ania keiman ka hrilh"
"Eng nga?" Ngeiawm deuh in a nui a, min haw hluah hluah hmel a pu.
"In school ah ka rawnkal a, in headmistress, i bialpa nu ni bawk bulah engkim ka hrilh. A fapa kan duhlo tih ka hrilh" ka inring hman lo. Na deuh in Mary chu ka nem a, chhuat ah a tlu nuaih a, John an a buaipui vat. Ka thinrim lutuk chu ka thaw pawh a rang vek.
"Amah pawh hrilh lo in anu i hrilh a, ka bialpa ilo duh loh ve viau pawh angai lo" ka ti a, Christopher khan headmistress hnen atang in kohna a dawng reng a, anu pawh chu a tlawmngai ve ngawt ang le. Ka unaunu rapthlak lutuk vang vek.

"Ka hua che. Tunah chuan nang aia huat ka neilo. Inau pawh ka ni duh tawh lo. Inau ka nih duhtwh loh vang in inau ang in min en tawh suh. Ka bialpa chungchang ah pawh lo buai tawh suh. Pasal nei la kan in atang hian chhuak vang vang tawh rawh" ka ti tuarh tuarh a, ka thinrim em vang in ka sawingam ngailoh thil ka sawiteuh tawh mai.
"I tawngkam kha fimkhur rawh" Johna pawh chu rum tak in ka melh a, an neih loh top tur an duh loh ve ringawt vang a an kal thui lutuk hi ka haw hlur ani mai.
"I bialpa vang hian i a vek tawh anih hi. Engtinpawn awm la ka remti dawn chuang lo. I kawp ka phal chuang lo" Mary chuan ala ti fan a, sawisak hrep ka chak ber.
"Bialpa ineih loh vang hian i a zawk anih hi. Khirh em em ringawt. Tun atang chuan ka u atan pawh ka duh tawh lo che. Ka u ang in ka en tawh lo che tih hria la ka nun ah lo in rawlh tawh suh. Ka bialpa chungchang ah pawh ilo buai angai lo. Ka u ini tawh lo tih hrereng ang che" in chung lamah ka tlanchho nghal deih. Tuna ka thil sawi kha ka la inchhir maithei mahse tun ah chuan kha ai tam kha ka sawi chak. Amah vanga ka hrehawm na leh ka zah na zawng zawng ka sawi vek chak. Ka room kawngkhar ka kalh a, ka mu deih. Mary hi tha deuh in ka be leh thei har viau ang. Ka u pawh nise, ka bialpa lo duhlo pawh nise a kal thui mah mah ani.
.
Cont

BAD BOYS-12


"Kawngka lo hawng rawh" ka nu leh pa ten ti lawm lawm mahse hawn ka tum lo. An rual in engmah pawh ka ei peih lo. Mary tel ve na tur ah eng ah mah ka tel ve peih lo.
"Lo hawng rawh ka tih chu" kapa chu a thinrim hmel tawh hle a, ka luhlul ka la chhuah tlat tho a. Earphone ka la chhuak a, ka beng ah ka vuah a, hla ka play a, volume pawh a full in ka dah a, tunah chuan an thawm ka hre phak tawh lo.

Christopher a message ka ngaichang reng a, dar8 vel ah pawh engmah ala rawn sawi loh vang in ka ngaih a tha tawh lo. A online reng tih ka hria pawh nilo ka hmu vek bawk si. Ka chhungte an beidawn tawh vang in ka earphone ka la thla tawh a, an peih rei ka ring lo reng ani.

Dar9 ani chiah. A online mahse message ka dawng lo. Engkim hi Mary vang vek ani. Keimah zawk in ka biak hmasak mai angai ang. Ka hreh lutuk chuang lo.
[Min lo be lo a..?] Ka thawn atanga reilote ah a hmu nghal. Min reply miah lo. A thin a rim anga, a tlawmngai bawk anga min then a tum tak tak anih ka ring. Hlauhthawn na in ka khat tawh a, Mary ka haw zual telh telh bawk.
[I room ava eng rei ve. Muhil tawh rawh] message ka hmuh rual in tukverh lam ka pan nghal rawk rawk mai. Kan in bul ah a awm chiang lutuk. Tukverh ka hawng a, Christophera hmuh tum in ka hawi kual nghal ruai a.

Ka phone rik veleh amah ani tih hria in ka la nghal.
"Khawnge i awm? " a rawn ding lang a, ka lawm lutuk a ka tah chhuak zawk. Min then tawh tur a ka ngaih laiin kan in bul ah ka hmu leh a nilo kan in bulah arawn kal a. Ka beisei miah lo. Min haw viau anih hi ka lo ti hman tawh a.
"Mary vang khan pawi ka ti. Inu bulah khan khatiang kha sawilo tur ania sin male"
"A ho ltk. A ngaihdan a sawi ve chu a pawina awm lo. Kanu chuan thu ka awih dawn lo tih a hre sa a. I u in hrilh rawh atih vang chauh in min hrilh"
"I rilru chu ana ve tho ang tiraw?"
"Ka hrelo. A thilsawi kha ka theihnghilh vek tawh a" a dinna lai ka en vang vang a, a theihnghilh vek dawn lo tih chu ka hrechiang ve lutuk. Ka rilru nawm nan a sawi mai mai anih ka ring.
"In chhungkua kha a nawm hmel. Thutkhawm a ti ti khawm te, tv en ho te, thil ei ho te. Chuvang ania lo len kha anuam ka tih" ka khawngaih angreng hle.
"Khatiang kha kan ti ve ngailo a, kan in ah chuan chhungkaw awm kim lai a awm ve lo. Lo len leh ka chak vang ania tun ah pawh ka lokal. In chhungkua kha anuam em a" ka room hnaih deuh ah alo ding a, keipawn ka hmuchiang thei deuh tawh ahma ai ngawt chuan.
"Heti hian ka lo leng ang ani mai"
"Ka lo chhuak duh angem?"
"Angai lo. Keimah vanga i chhungte thu i hnial fo ka duh lo"
"I din na ah khan lo ding reng rawh" phone ka dah a, ka room kawngka ka hawng a. Kan in ah hian chhuah na pahnih a awm a. Kawngka pui bakah store room bul ah hian kawngka lian vak lo a awm tel a, kan hawng ngailo a, ka hawn theih chuan ka chhuak ru ang. In hnuai ah thawm dim tak in ka chhuk a, tv atangin ri ala awm. An la meng tihna. Step hnuai a store room ah ka kal a, ka thut rem hnu ah kawngka kalh na ka pawt a, vawikhat naah chuan a ri vak a, tv an en rin vang in an hrelo ani ngei ang. Ka ti nawn leh a, sak deuh mahse ka kuai tang tang tho a. Naktuk ah an awm loh laiin ka siamtha ang. Saturday ania bazar turin an chhuak leh vek ang. Kapa chu hna akal ngei anga. Thlan tla phunga ka beih hnu ah a inhawng hlawl a, ka lawm zia chu. Kawngka han tih ah tukverh a ang mah zawk. A tet vang in ka vakchhuak a, ka chhuah theihna awmchhun anih vang in ka tana thil hlu ber te zing a mi ani.

Christophera din na bul ka thlen chuan mak alo tih hmel hle.
"Engtin--"
"Ssshhh" a ngawi ve vat a, hmun biru deuh zawk ah ka kalpui a, kan compound hi chu ka hrechiang lutuk. Kan tet lai atang tawh a kan infiam na thin ania, bihrukna tur pawh a tam.
"An man che nge"
"Min sual an ti hle che sia, tunah i hlauthawng deih zawk a"
"Sual ve turin ka duh lo che. Ka awm ang in awm ve suh ka tih tawh kha" thutak deuh in a ti a, thingkung nghen pah in kan thu a, kan hlauhthawn na a reh hnu ah min kuah pah in "Tlai ah an lo man che mi?"
"Joseph an a sawi ami?"
"I bialnu misual in an man a, ka chhan atia, a sawisa nasa viau ami?" Ka nui vak vak mai. Joseph a mawl atia, ani pawh hi Joseph a chuan mawl ati ve tho ang.
"Sawisual ka nei mi?"
"Tumah a sawisa lo. In kalsan loh chuan ka chil ang cheu a tiin ka hria"
"Hmela chu" ati sup a, ani pawh anui veleh mai a.

"Joseph nen hian enge in zawm na in neih thin? Dik deuh in min hrilh tawh rawh. Min hrilh loh chuan ka lut anga ka be tawh lo ang che" ka ti a, a sawi hreh hmel viau na a ka hriatchak na a rei tawh em vang in sawitir dan ka ngaihtuah angai.
"School kan kal tan tirh atang in thian dang kawm lo in kan pahnih chiah in kan inkawm thin" a uang amaw tiin a hmel ka en a, alo thutak run mai. Thil mak tak ani.

"Tak2 ani em?"
"Dawt hrilh che ka tum reng reng lo"
"Sawi zawm rawh" a lam ah min pawt hnai a, a awm zawn ah ka lu ka dah a.
"Kan inzui char char a, class8 kan nih chuan a ruk in kan rui dun thin" anui hak a, amah pawn thil sual tih nachang a hre hma tih a inhre ve ani ngei ang.
"Naupang te kan nih lai kha anuam zawk"

FLASHBACK

"Jo uite thar ka nei"
"Peih deih rawh"
"Ngatinge?"
"Kei aiin i kawmngaih zawk palh ang" kum6 mi lek an la ni. Joseph a thikthu a chhe em em a, tuman Christopher an hnaih ve a phallo. Christopher chuan a uite thar chu a peih duh bik lo a, a pawm reng a, duat takin a chul heuh heuh thin. A neitu hmuh loh apiang in Joseph an a lo sawisa thin thung. Uite chuan a thianpa a chhuhsak ah angai tlat ani.. School ah thian dang kawm lo in an inzui chawt a, an thudun a, naupang dang ang tho in an harh em em thin.

"Chris lighter ka chhar a, kawrawh Cigarette zu ru ang" an pahnih in nui vur vur in an in en a, kum10 mi chiah an la ni. Dawr ah kal in cigarette an lei a, an zuk tirh chuan khuh bawrh bawrh mahse mi luhlul ve ve tih tak ah an zu lui zel tho a, zirtir chawp pawh ngailo in an thiam thuai a, zuk reng chakna an nei vat bawk. Reilote chhung in cigarette chu an addict thuai ani. Kum naupang te ni mahse chhungte hmuh phak loh a an awm hlek tawh chuan an zu reng tawh mai thin.

Class-8 an nih chuan cigarette chiah an duh tawh lo. Midang ka atangin ruihhlo hming an hria a, tih ve chhin zel an chak a, naupang te ni mahse an lakah chuan weed pawh a mikhual lo vat mai. An rui a, an thin a chhe em em a, midang tihbuai an hrat a, an class a mipa zawng zawng chu sawisak loh pawh an nei lo. Tupawh an thuhnuai a kun turin an duh a, midang in an hlau em em a, midang sawisak vel chu nuam an ti em em thin.

"Ka thian nilo la khawvel hi a boring awm" Joseph a thilsawi vang chuan Christopher chu alo nui mai a, ani pawn Joseph a tello a awm tur chuan ala in ngaihtuah ngai biklo.
"Min phatsan chuan ka sawisa nasa dawn che nia Chris, nag aiin insual ka thiam zawk"
"Kan pahnih a midang sawisak nuam ka ti zawk"
"Anih chuan min phatsan suh"
"A chang chuan min ngaizawng amaw ka ti thin Jo"
"Ngaizawng e ka bialnu inih kha, nu-i nge ka tih ang che duat zawk. Kan la in fawp miah lo. Lokal teh infawp ang" Joseph chuan Christopher man beh a tum a, nui vak vak chung in an in um kawi a, an pahnih chiah pawn an tlei thei hle thin. Thian dang an mamawh lo a, tumah an awt bik lo. Joseph a awm naah Christopher a awm ve a, Christopher a awm naah Joseph pawh a awm ve ngei ngei thin.

Class9 an nih chuan school dang mi thleng in hmelma an ngah tawh hle. An rui reng a, lehkha pawh an zir ngai lo. An pass veleh mai zel chu an tan pawh thil mak ani. Tlai khat an school bang school dang naupang in an lo chang a, an in huat tan na pawh ani.

An pahnih in mi sawm aia tam mah in an sawisa a, hliam an ngah a, thisen pawh a chhuak nasa. Hmun fal, rui tura an kal ziahna thin anih vang in puitu tur pawh an hmu lo. An theih ang ang in an beilet ve a, Christopher chu a talchhuak hmasa zawk ah tang in puitu tur zawn tumin Joseph a tlansan a. Hla deuh a thlen hnu ah "Chris ikal chuan kan in thianna a chhia ang. Puih ka ngaih laiin min kalsan dawn maw? Dawizep lutuk" ti a Joseph a au ri a hria a, a hawilet a, Joseph chu an lo la sawisa nasa hle a, a sawisa tu thenkhat ten an hmu a, man beh tum a an um veleh a tlanchhia a, puitu tur zawn a tum ngei ani. An class a an kawm ve te pawh hemi kawng ah hian an kal ve fo vang in a hmuh a ring a, midag nen a Joseph a tanpui tur a let leh chu a tum tho ani. A hliam anat angreng vang in a tlanchak theilo a, midang puitu a hmuh hma in ahma ai mah a tam school naupang amah lo changtu a hmu ta zawk a. An lo man a, an khawih nual a, hemi tum pawh hian a vannei nge a talchhuak leh thei mai. A kal fona anih vang in a hmun a hrechiang a, an hmuh lohna tur ah a biru vat a, an zawng luih luih a, a then in dawihzep tiin an ko a, a then an in hrosa nasa hle bawk. Hlau em em lo mahse amah chiah chuan an vaiin a beilet seng dawn lo tih a inhria a, bihruk rih chu a thlang zawk a.

Khawthim thet thet hnu ah an beidawng an haw a, Christopher pawh a bihrukna atang in a chhuak a, puitu tur chu a hmuh a beisei tawh lo. Joseph a ngaihtuah vang in bai chhat chhat chung in Joseph an sawisak na hmun ah a let leh a, vanduaithlak takin alo awm tawh lo. Hmun dang ah a zawng kual a, a ko pah reng bawk a, chhangtu an awm lo a, Joseph pawh a hmu chuang lo.

An in ah pawh haw tlang lo in Joseph te in ah akal a, Joseph a nu in alo hmuh chuan "Inkawm tawh rih suh u. Buaina in chawkchhuak hnem emai. I lokal tih hi ka hrilh dawn lo. Joseph pawh kan hau hrep tawh. Apa in chhuah a phallo rih reng ang. Lo lut la i hliam ka lo tifai ang" Joseph a nu chuan a hliam te a tihfai sak a, a zilh pah reng a, Joseph a chu en laia a haw thu leh ani aia a hliam nasat thu a hrilh a "In rilru a puitlin tak tak hma chu inkawm tawh suh u. Thil sual tih in chak a, in in thurual zel bawk a, kan remti lo. An la sawisa hlum mai ang cheu" ati a, a haw tur pawh Joseph a nu chuan a thlah thlap a, khami ni kha Joseph nen a an inthianna a tawp ni leh Joseph an amah phatsan tu anga a ngaih ni ani.

An taksa hliam a dam a, an rilru a hliam erawh a nasa tulh tulh thung. Christopher zawk chu school kal hmasa thei ah a tang a, kar khat hnu vel deih ah Joseph pawh school akal ve a. Nidang a an inhmuh chuan an infiam a, an in kuah thuak thuak thin. Hemi tum hi chuan engkim a danglam vek ani.

Christopher ahmuh rual in "Phatsan tu" tiin Joseph chuan kut a thlak a, a tir ah chuan Christopher chuan a dawh tawp a, kut pawh a thlak ve lo. A rei a, a duhtawk har em avang in amah in ven nan ati let ve a, insual tak tak in an insual zui a, an zirtirtu pakhat lo chuan tuman an thelh theilo. An classmate te zawng zawng in mak an ti a, in kawmngaih em em leh reilote pawh awm hrang theilo te in hua tih hriat taka an inmelh chu zirtirtute ngei pawh in mak an ti ani.

Khami ni atang khan an thu hrang a, thian dang an kawm a, ho te te ah an in sual a. Thiantha ti a min an hriat thin kha hmelma tia hriat an ni tawh. A ruk tak chuan la in ngai viau mahse an chapona an dahsang zawk a, an khawharna pawh mipa takin an tuar a, an inthianna kha an la nei let leh thei rih lo ani.

END OF FLASHBACK

"A har em? Thiantha te hlat angai thut chu a har em?"
"Atir chuan har e, tunah chuan a zia tawh mahse ka ngai tho" a khawhar zia a hmel ah pawh a langchhuak hial reng ani. Atir atang khan an inkar ah engemaw in thup a awm kha ka ring ru thin reng a, inhau reng mahse in ngaihtuahna an neih tel kha ka hmuthei ve thin in ka hria. Rachel thilsawi avang pawh khan ngaihdan chu alo siam theih deih tawh. A thiamlo zawk ka hrelo a, a thiam zawk pawh ka hre chuang lo. Hmeichhia ang mizia pu sela chuan an inrem lohna zawng zawng hi an sawifel deih tawh ka ring. Mipa annih avang in sawi aiin tawrh an thlang a, thil thalo tak ani.
"A tlai dawn. Let tawh rawh i awm lo ani tih an hriat chuan an hau palh ang che" ati a, ka hmui ah a fawp pah zeuh a. Keipawh ka tho vat a, ka chhuahna ngaiah ka vak lut leh a, inhmu leh vat tur a kan intiam hnu ah kan inthlah liam a, van neihthlak takin tuman ka chhuak ru tih an hrelo.
.
Cont.

BAD BOYS-13


Saturday anih vang in zing ah nidang aiin ka mu rei a, ka room ka kalh tlat vang in min kaitho turin tumah an lo lut thei chuang lo. Rawn luh tum mahse ka hawng dawn chuang lo bawk. Mary ka tih dan vang khan ka nu leh pate an thinrim dawn tih ka hre sa a, inchhir na ka la nei miah lo hi keipawn mak ka ti.

"Rawn chhuak rawh, thil ei rawh" John ani. Kawngka arawn ti ri reng a, chhuak turin min ti reng bawk.
"Ka nu leh Mary an bazar a ka pa a hna ah akal tawh. Ihmuh duh loh chuan an rawnhaw hma hian thil ei rawh" arawn ti leh a, min ngaihtuahna tlem chu ala nei ve anih hmel.
"Ka rawnchhuak dawn lo" ka la ti tlat a, ani pawh thinrim ve mahse pawi ka ti lo. Ka bialpa an duhloh chhung chu an thu ka awih dawn bik lo.
"Jenn" Cindy aw ka hriat chuan ka harh kawk in ka hria. Min thlem turin an ko ani ngei ang. Tupawn min thlem se ka rilru ka thlak dawn chuang der mai silo. Cindy a awm ve vang in kawngka ka hawng a, ka eitur ni awm tak a keng tun mai.
"Lo lut rawh" ka ti a, John chu melh pawh ka melh lo. Cindy ka pawt lut a, kawngka ka kalh lehnghal.

"A pangai reng in awm rawh ka tih che kha. Tumah nawr lui suh. Nang mah i in hrem mai mai"
"An vaiin ka ngei" tih ringawt in ka chhang. Min en reng ringawt.
"I thil lo ken chu a tui lutuk. Nizan ah ka chhuak ru a" a meng zau nghal kawk a, ani ang dawih lutuk chuan a ngam ve teuh lo mai.
"Khawi atang in nge i chhuah ruk?"
"Store room bul atang in"
"I awmdan hi tha ka tilo"
"Tha in lo tih ve zel kher angai lo" ka ti hrawk a, ka chhungte lam a tang anih chuan ka dem ngawt ang le.
"Then mai rawh. Chhungte aia min hmangaih tu an awm lo"
"Khatiang kha ka ngaithla peih lo. Ka then bawk lo ang" ka la ti tlat tho. Ka then na chhan tur ka hrebik lo ani.

Cindy pawn beidawng in min haw san a, ka room ka kalh leh tlat tawh. Christopher a sual loh zia tuman an hrelo. Kei chuan a landan ang ngawt anilo tih ka hria a, a rilru a chhelo ani tih pawh ka hria. Joseph pawh a sual chuang lo. Ka chung a an that em vang nge ka hrelo. An sual na ka hmu ve thei lo. Kanu bazar haw pawh in min thlem a tum nasa a, ka room ka chhuahsan duh lo tlat a, tih ngaihna a hre bik lo. Ka tha tih a hria a, a rilru chu anuam deuh maithei.

Monday zing a ka insiam chu nidang aiin ka phur. Kan in chhuahsan na anih phawt chuan engpawh ka ti duh vek. Ka insiam zawh ah in hnuai ah ka chhuk a, min lo en thap.
"Vawin ah school dang kan be dawn a, han inthlak leh rawh. Kan kal dun angai" Mary thil sawi vang chuan ka ding chawt a, min nghak reng tu Cindy pawn mak ati ve tho.
"I over mah mah ania, ka insawn dawn lo"
"A school atha a, hmeichhe hlang luhna ani bawk" ati a, kanu leh pa ka en a, min tanpui tum hmel pawh an pu lo. Ka bialpa a duhloh vang maiin ka school luhna thleng min sawn sak a tum a, a ti mah mah in ka hria.
"Kal ang Cindy"
"Ikal dawn lo ka tih chu" ati tuarh a, ka bag ah a vuan a, ka kal tur min pawt let dawrh a, ka insum thei tawh lo. Ka hawilet a, a rem ber a sam ah ka tham a, ka pawt vat a, chhuat ah a tlu a, John an min lo vuan bet vat a, ka hnung ah ka nu in min beng bawk. Ka nu min ben vang hrim hrim in ka tap a, Mary ka haw lehzual bawk.
"Min van zahlo ve. I u chiah pawh nilo i u u leh ka nih hi. Kut min thlak vel a, i zaktheilo lutuk"
"I zaklo fe zawk. Ka u ni tur pawn ka duhlo che. Ka nun ah hian thuneih tum phet suh. Iduh leh hmeichhe hlang luhna school ah chuan nangmah kha lut rawh" ka ti a, ka hlau miah lo.
"I room ah chho la han inthlak rawh. I bialpa hi vawin atangin ihmu leh tawh lo ang. I phone kha rawn la rawh" ka pa in atih phei chuan ka thin a rim lehzual. Ka pe lo ngam lo a, hreh deuh chung in ka phone chu ka pa kut ah ka dah a, ka room lam ah ka let leh a, Cindy in min zui bawk.

Khum ah ka bawk thlawp a, ka tap nasa hle. Cindy in ka hnung arawn chul a "School ka kal dawn lo ka awmpui ang che" ati a, hriatchhuah thut ka nei. Kawngka ka kalh a. Cindy hmaa ka kut dawh pah in "I phone" ka ti a, ani pawn min pe ve mai. Christopher a number ka zawng a, alo neilo. Ka hriat tho vang in a number ka ch$ lut a, ka call a. A in ring char char a, a la dawn lo amaw tih hnu ah "Hello" ati a, a aw ka hriat ringawt pawn ka tah chhuak.
"Keimah"
"Jenn"
"Ni e. Vawin ah chhuah an phal lo a, ka pa in phone min laksak a"
"Keimah vang ami?"
"Nilo e. Mary vang" a thaw halh a, amah vang ani tih ka hrilh thei lo. A rilru ana lutuk palh ang.
"Hei hi Cindy phone number anih hi"
"Phone ineih loh chuan eng tin nge kan inbiak ang? I chhuak thei bawk silo"
"Zanah lokal rawh. Dar7 ah ka lo chhuak ru ang" ka tih chuan a ngawi vang vang a, ka chhuah ruk a duh lo pawh ani maithei.
"Christopher"
"I chhungte thu awih rawh. Ka lokal lo ang"
"I lokal ang. Ka lo nghak ang che. Irawn kal hma chu ka lo awm reng ang" ka ti ve tlat a. Alokal dawn tih ka hria.
"School ikal dawn em?"
"Ikal dawn silo a ka kal peih lo" arawn ti a, a kal bik dawn lo tih ka hre nghal. Ka kal dawn lo atih chuan a kallo tak tak ang.
"School danga min sawn an tum a"
"Zanah ka lokal anga kan sawi tha dawn nia"
"O i lokal ka ring reng ani"
"A hrehawm viau em?"
"Zep loh chuan hrehawm ka ti. School dang a luh pawh ka duh lo"
"Jenn khawngka an lo kik ania"
"Ka dah phawt zanah kan inhmu dwnnia" min chhan na pawh nghak tawh lo in ka hmet tawp a. Cindy phone ka hmang tih an hriat chuan Cindy nen lehzel pawh inhmuh an phal tawh lo palh ang. Cindy in kawngka a hawng a, kanu hmel ka hmuh chuan ka ner nghal nang mai.
"In siam rawh"
"Khawi ah mah ka kal dawn lo"
"Thuawih rawh"
"Ka duhlo e ah. Ka mu dawn. Chhuak rawh" ka ti chang fak a, ka duhloh chuan min tilui thei dawn lo tih hrechiang ber tu ani. Thinrim tak chung in min chhuahsan a, ani aiin ka thinrim fe zawk.

Dar7 rik dawn ah thawmdim deuh in store room lam ka pan a, engpawh tawk dawn ila ka chhuak ru tho ang. Ka phone thleng in min laksak a tullo lutuk. Angai bawk atangin ka vakchhuak a, pawn a ka awm chu ka thaw huai mai. Boruak a nuam bik. Tlaia chaw ka eiloh vang in ka ril atam angreng hle mai. Ahma zan a Christopher nen kan kal naah ka kal a, alo awm reng tawh. A bul a ka thut rualin nghet deuh in ka kuah a, ani pawn min lo kuah let ve vat a.

A insiamtha a, a bag atang in bawm lian vaklo a phawrh a "Kha" tih pah in min hmeh bel chawt chawt a. Ka hawng a phone ani tih ka hriat chuan sawitur mai ka hrelo.
"I thiante i biak theihloh chuan hrehawm ati ang. Kha kha a rukin kawl rawh"
"Ka lawm e" ka ti sap a, ka mamawh em vang in duhloh der vel chi ani lo. Ka la chhuak a, a bawm ruak chu a bag ah ka thun leh a.

"Keimah vang vek tiraw hetia an tih chhan che hi"
"Ni lo"
"Keimah vang tih ka hria" ati a, "Ka nun ka uluk loh vang in i tuar ve anih hi"
"Chutiang lam a nilo. An hriatchian loh vang che lawm. Hrechiang che sela chuan sual an ti miah lo ang che. An la hre zel anga, an la inchhir vat ang" tiin ka hnem a.
"School chu i san dawn tak tak ami? "
"San loh dan ka ngaihtuah char char ang. An ti mah mah tawh a, ka ngaihdan ani biklo"
"An thu ang chuan awm rawh. School ban ah ka thlah ziah tho ang che. Thuawih phawt la, inhmuh dan chu a awm ve zel mai ang. Iduh loh chuan school kal an phal chuang silo a, kan inhmu theilo zawk ang" ka ngaihtuah chiang a, a sawi chu a dik ve tho.
"School dang a luh a hmelhriat loh zinga bul tan leh kha a peihawm loh e. Cindy awm tawh dawn bawk silo" ka ti nang nang a.
"Inthen mai tha tih zawk chang inei ve thin em?"
"Aih inthen lam ka ngaihtuah ngailo. I ngaihtuah thin ami? "
"A chang chuan ngaihtuah thin e. Tuna i chhungte nen in in rem lohna chhan pawh keimah vang ania. School danga iluh angaih phah dawn a, hrehawm i tawrh reng ai chuan inthen pawi tih loh chang ka nei"
"Ka duh ve lo. Kan inthen chuan kan na ve ve dawn a, hetiang hi chu ka tuar thei lutuk. Kan inthen loh phawt chuan engpawh ka tuar thei ang" ka ti a, ka rilru tak tak ka sawi bawk. Hun khirh ber ka tawh pawn inthen kher chu ka ngaihtuah ngailo. Kan la tuarchhuak ve em em ang, a bik in keimah, Christopher hi ka lam a a tan chhung chuan engpawh ka tuar thei.

Ka pum a rik chuan a nui hak a "I riltam ami?"
"O chaw ka ei lo a"
"Hetah hian lo awm la. Dawr ah ka kal anga thil ka lei ang che. Kan pahnih a kal chu a chi loh. Buaina kan tawk palh ang"
"Rei suh o"
"Aw enge i ei duh?"
"Puar theihna chu engpawh ka duh"
"A tui tur ang ka lo zawng ang. Lo awm reng rawh" a kal veleh ka lu ka khuh a, ka mit ka chhing a, ka awmzel dan tur ka ngaihtuah neuh neuh a. School dang a luh hi ka ngaihtuah chhin ringawt pawn ka thaw a hah dawn ten ka hre thin. Ka huphurh ngawih ngawih a, tih vak ngaihna ka hre chuang silo. Ka chhungte hi chuan a tlai hmaa min pawh then an tum tih ka hrereng. Ka hmuh loh reng chuan ka theihnghilh theih an ring bawk ani ngei ang. Keichuan ka theihnghilh theih ka ring lo a, theihnghilh pawh ka tum chuang lo.

Ka lam pan a lokal thawm ka hriat chuan ka nui ver ver mai. Ka rin aiin a dawrkal alo let leh hma. Ka hawichhuak duhlo lui a, ka bulah a ding reng. Lo thut ve nghal mai awm. Ka hawichhuah kher a phut aniang. Ka lu khuhna lakthlak pah in ka hawichhuak a, ka thin a phu nghal dawt dawt in ka hria. Ka bul ah chuan ka unaupa Johna zawk alo ding reng a..
.
Cont