BROKEN (COMPLETED)

BROKEN-1



"Nizan i rawn haw tlai lehpek em ni?" choka a ka nu ka hmu hlawl chu amak ngei mai. Chaw kan eirual lohna chin pawh ka lo hre tawh lo. Zan ah zu ruiin a muhil a, a hnathawh dawn ah a tho chauh ţhin a nia. Class kal tur a ka chhuah dawn ah ka hmu hman ngai lo.


"Nangmah ang tho in ka duh duh hun ah ka haw ve mai. Zan lamah ka tan hun a pawimawh ve lo" ngaipawimawh lo zet in ka ţawngliam puat a, kan nula thilsiam rimtui tak tak te chuan ka hnar an verh viau na a ka eichak ta lo khawp mai. Ka thleng tur an lo dahna zawn a chair pawt chhuakin ka ţhu ve ta thova.

"Ching tawh suh" a tih chuan ka lo nui hak a, ka nu hi ka zahlo in ti maithei. Ka nu ang nu nei hi chuan tuman an zah bik lo ang.

Hmingthansangi ka ni a, Sangsang min ti mai ţhin. College ka kal ve ţan mek a, school ka kal laiin ka nu laka ka lungawi loh vangin kum khat ka chawl a, ka kum rualpuite aiin ka tlai ta deuh a ni. College a ka ţhiante pawh kei aiin an naupang a, pawi ka ti hran lo. Ţhian in kum a thliar hleinem. Ka nu hi Cardiologist a ni a, ka pa hian ka hriattheih hmain min chhuahsan. Ka pi min hrilh dan a ni. Ka pi vek chuan ka nu hi doctor ţha leh lar a nih ţhin thu min hrilh bawk a, ka hriattheih tirh aţanga a awmdan ngaihtuah chuan awihawm loh tak a ni. A rawn rui haw zantin a, phun na tur a zawng ţhin. A rawn ruih haw loh pawhin a ţhiante an lokal khawm a, kan inah an in tho ţhin. Reitak chu ka palzam ve a, ka tlin loh chin ah khawlaiah hlimna ka zawng ve ta a, ruih pawh ka chin ve phah bawk.


Ka nu hian a thil tihsual zing ami ka nih thu a sawi ţhin a, chu chuan min ti na ngawih ngawih ţhin. A rui hmel ka hmuh a min hauh vak vak chang te hian ka hlau in ka na a, ka naupan deuh lai chuan ka pindan ah inkalh khumin ka ţap ţhin. Ka nu hi ka ngaina ngai lo. A ţhiante chu hlawhtling tak tak an ni tawh a, doctor chu miten an chung en ve laiin ka nu erawhin sawisep a kai reng a, a nun in a zir lo bawk nen, keilah ka rilru natna leh thinrimna te theihnghilh nan a hnung ka zui leh ta mai bawk a, min hauh hian hlau miah lovin ka chhang let bawng bawng ţhin. Ka hlim ve na tur zawng zawng hi ka la hmuh miah loh ka pa nen hian min laksak vek niin ka ngai a, ka lakah ţhat an chhuah ngai bawk loh vangin an pahnih hian ka dem em em ţhin.


"Tunge i kawm ţhin ka hre lova, ţhian ţha an nih loh chuan thlah la, in ah awm tam rawh" a ti leh a, a vin hauh lo na in thu min pe tih ka hria. Ka fian kenlai nghet takin ka hum a, chu chuan ka thinrim tawh zia a lantir.

"Ţawng reng lovin min eitir mai mai rawh" ka ti khur khur a, a ngawi mai dawn emaw ka tih laiin "I nundan sim turin ka hrilh che anih chu" a ti nawn leh kher.


Ka fian kenlai dawhkan ah ka nghat chawrh a, ka dahna bula plate a thil awm phei chu a nghawr per nghe nghe. Baw vek mahse pawi ka ti lo. Thinrim tak in ka tho a, chair a tluk hlau a dim te a tho ka nih loh bawk vangin chair tlu ri pawh zingkar ah chuan a ring bik khawp mai.
"Hmingthansang" a ti tuarh a, choka ka chhuahsan hnu ah ţhutkhawmna pindan a sofa a ka bag dah ka la a, ka chhuak nal nal. Ka chunga a thinrim na te chu a duh duh hnen ah lo hrithla ve mai rawh se. Inhau ngailo pawh kan ni hleinem.


Gate chhuah chiah a step ah ka ţhu hnawk a, ka ţhiannu ber Brenda biak ka tum ngial a, a la thei lo. Min lam turin a rawnkal mek a nih ka ring. Brenda hi engkim a ka thurualpui theih a ni. Ka nu nen a kan inkar pawh ani hian a hrechiang ber a, min khawngaih thu a sawi ţhin. Pa ka nei lova, ka nu in keimah chiah fa a nei, min hmangaih a, ka hlim loh hlau ngawih ngawih zawk tur a nia sin.


"Rawn biak che ka tum kha ngaihven ve ta che" ka hmazawn a scooty a rawn din rualin ka ţhiannu chu ka lo vin nghal tuarh a, a nur ve nang mai.
"Ka tlan laklawh ve a ni mai lawm. Inu nen in in hau leh tawh a ni chiang"
"Min hrechiang khawp mai" tih sep pah in a hnung ah ka ţhu kai tharh a, a tlanchhuah rual in ka awm hnaih a, a dar ah dim te in ka khabe ka nghat a.

"A phun pawn ngawi la, engmi pawh nise inu a ni thova, in thunun ţhin rawh"
"Ve che. I tawrh ve loh vang anih kha" ka ti let hrep a, ani chuan chhungkaw ţha tak a nei a, an in a ka kal chang pawh in tuman ţawngkam vin an hmang ngailo. An inkawm a, an nui ho dar dar ţhin.


"Sang party naa kal ve chhin i chak em?" a ti leh daih a, chhan pawh ka chhan hma in "Diktei birthday ania, kal ve chhin ila, kan pahnih a in dun rek rek ai chuan a nuam zawk daih ang" ka lo nuih hak hak takah ani pawh a nui ve mai. Intih thawven nan chuan a nuam reuh phian ang.
"Kan kal dawn nia" ka ti ve nghal mai.


La naupang viau mah ila ngaihzawng hi vawihnih ka nei ve tawh a, min bum ve ve lehnghal. Ka lak thutak ţhin vangin anni aiin ka na daih zawk ţhin. Min bumin midang an kawp lehnghal thei a, an na ve miah lo ang. Ka thil tawn engkim hi min ti na tu ah vek ka ngai ţhin. Brenda leh Abigail chauh lo chu. Abigail hi colleg a kan hriat chawp a ni. Keini aiin a naupang a, school a luh hma thu a sawi ţhin. Kei kum khat ka chawlh vangin ka tlai a, kan ţhianho a upa ber ka nih phah ta a ni. Abigail hi chuan Brenda nen a kan tih ţhin ang hi a ti ve ngai lo a, zan ah a chhuak ngai lova, college ah erawh kan hnen ah a tal chawt thung.


"Abi pawh class ala kal thei dawn lo" ka ngaihtuahna hria ni awm takin a rawn ti leh khauh a, a damlo a, ni thum vel a chawl tawh.
"Ava pawi ve. Ka na vak lo a ti maw ka tia, chanchin ka zawt ngai miah lo a" tiin ka inthiamloh thu ka hrilh a, ani a bengvar reuh nen.
"Zingah khan ka bia a, ka hre chauh. Class kal lo in an in ah kan kal daih dawn mi?" a tih leh phei chuan ka lawm ru khawp mai. Ka nu ka rilru ah a awm reng a, class kal ka phur hlawl lo. Ka thinchhe leh vek ang.


"Tun ah chuan ala hma e. A chhungte an la chhuak kim lovang"
"An chhuah hun awm ah kan kal dawn nia" ti chungin Abi te veng lam a pan tho a, Abi te in ah hian ka la kal miah lo. Brenda hian vawikhat chu a thlah tawh a, an inchhung a luh bikloh thu a sawi a, kan inkawmna ala rei em em lo bawk a, kan la kallo hi a awm ve tho. Hmun reh deuh lai ah hun nghah tlai nan kan ding a, college a mi hrang hrang hmuh ai chuan a nuam zawk daih.

"Keipawh ka nu in haw tlai tawh suh min tia, mahse a ho e, kan pahnih chiah in kan leng ziah tho a, mipa kan kawm pawh a nilo a" a ti nang nang a, chhungte thu ang hian kan awm khat ve khawp.
"In a haw hi ka chak ngailo hrim hrim. Kapi te in ah awmsan dawn ila amah chiah phei chuan a ngaihtuahawm lehzual dawn a" ka thaw zui hawk a, ka nu ang mai hian keipawh nakinah ka la hmingchhe ve ang. Kan veng ah phei chuan min en hrek hrek duh tawk chauh an awm fur tawh.


"Ipi te in a i awm daih ten zan ah kan leng thei tawh nang. Inu hi chu a pawi e, a hmelţha si, a uihawm"
"Sawitawh lo teh" ka lo ti hmak. Nileng a ka rilru a awm tur ka duh lo. Midang ang lo tak in ka nu ka ngaihtuah hi chuan khawvel hi a thim in a pik mup mup niin ka hre mai.
"Peka pawn nupui a neih dawn kha" mak ti in ka mengphar nasa a, ka ang pham bawk. Ka nu chanchin ai pawn ka sawipeih lo zawk. Ka bialpa hmasaber ania, kei aiin a upa daih.


"Vawin chu ka hlimna tur lam sawitur inei miah lo anih hi"
"Tihpalh" a chip zui hmak a, a hmui charphui nghal anga kut zai zir a a lantir chuan ka lo nui a, a thil hriat zawng zawng hreve tur a min duh ţhin hi a buaithlak. Rei tawk kan ţhut hnu ah Abi te in a kal tur bawk in kan in buatsaih leh a, ţhiante in a kal pawh hi ka phur lo. Nu leh pa ţha tak an lo neih phei chuan ka insit a, ka na zual ţhin.


Kawngpeng zawl ah kan tlan a, in hmuh tur a awm tawh lo. Kan sir tawn tawn ah thingkung a ding thluah a, kan in bul chu nise hla tak tak a leng lo a ka awm duhna hmun tur a ni. Gate lian tak hma ah a ding chawt a, "Hmanni khan gate an khar si lova, avan buaithlak tak" tih nuah nuah pahin phone a phawrh a, Abi a bia ni ngei tur a ni. Kan chhevel mawi lutuk chuan ka mit ala a, thildang ka ngaihtuah thei lo. A mawina zawng zawng hmuh kim vek tum a ka hawikual ruai laiin gate a in hawng a, hmalam ka en chiah chu "A ropui" tiin ka phun sep a.

In lian leh mawi tak chu thuhran nise, gate chhunga thil awm chuan ka mit an la hle. Huan mawi tak ang mai a ni. An kawt zawl a nawm em vang anih hi Abi pawn in a hawn a nghahleh em em ţhin ti a ka ngaihtuah laiin ka nu bawk a lo lang leh a, ka nu ang hi anu nive sela chuan kawtzawl mawi ringawt hi chuan a hip bik kher lovang. Kan tlanlut a, kan tlan na sir lam ve ve a grass hring mawi tak a awm a, pangpar mawi tak tak a awm bawk. An in leh a chhehvel hi an enkawl uluk hle tih a hriat.


"In va fel ve. Bren tah khan dah tawp rawh. Sang lo chhuk ve em em la" Abi-in a rawn tih tak ah chuan ka chhuk vat a, ka nui lui hak hak bawk. Ka hawikual nasa sia mi â ka ang viau maithei.
"Chanchin zawh nachang che pawh ka lo hrelo a" ka ti ţha leh a, ka inthiamlo ve tak tak.
"A ho lutuk. Ka khawsik lo chu na ka nei tawh lo. Vawin pawh duh chuan class ka kal thei reng, ka thatchhiat vang mai mai" a ti nghal luam a, a ţawng char char mai ţhin. Rei vaklo hnuah Brenda in min rawn zawm a, Abi a lai ah kal in kan pathum chuan an kawngkharpui pawh na step ah kan chho a.


"Class kal taima ve ber ini sia, i na viau tur ah kan ngai a" tih pah in sofa ah Brenda a ţhu hnawk a, a bul chiahah amah si chet a ka ţhut ve laiin a hran ah Abi a ţhu thung.
"Ka kallo rei a ka peihlo tulh tulh. Naktuk aţang chuan ka kal tawh ang. Eichak in nei em?"
"Nei rih lo. Tui ka in duh a nimai"
"Damlo hnen a lam lo khan nangmahin va la ve mai rawh" Brenda in min lo ti hlak a, a lu a nem pawp pah in ka ding tho.
"Khalam kha choka aw" Abi in a kawhna lam en in ka bu nghat a, an choka awmna chu a biru ve deuh. Ţhutkhawmna aţang phei kha chuan a chhunglam a hmuh theih miah loh.


Ka la kal ngai lohna anih vangin muangchang in ka pen a, rah chim hlau ni awm tak ka ni. Ka luh veleh mipa pakhat min hnungchhan zawng a ding ka hmu hmasa ber. Tap a in herh haw a, a kut a sil a nih ka ring. A palian emai Abi pa anih ka ring. Thawm dim thei ang ber in fridge ka hawng a, bottle ka ban a tlem ka chawi hman tih in "Ilo tho peih ami?" a rawn ti sup a, ka bottle lak kan tawh ka nghat leh chawrh.


A din na lam ka hawi a, a rawn lehhawi ve chiah. An choka a midang daih hmuh a beisei bik loh hmel kher mai. A sam a ther sung a, tshirt var leh kekawr bul a ha a, a tho chiah a ni ngei ang. Tun ang hun a thawh chiah chu ka ti rilru nghal. A makti hmel kha a bo a, thinrim hmel in a thlakthleng daih. Hawisan ka tum miah lo chu mak ka in ti. A naupan hmel em a Abi pa a nih ka ring lo hmiah tawh a, a hmelţha kher mai tih bakin ka ngaihtuah thiam lo. A mitmeng mawlh te chu Brenda nen a kan duhthusam kan lo sawi ţhin a ni.


"Tunge inih?" a tih tak sup ah chuan ka harhchhuak chawpchilh nghal. Engtia rei nge ka lo en tawh ang? Ka sen ap ap in ka ring.
"Abi...ania...Abi ţhiannu...a damlo sia" ka ti nawk nawk a, bottle ka la chhuak rawk rawk a, lek kan va pah in "Hei ka lo la dawn a" ka ti leh. A bu nghut a, a in her leh daih. An driver pawh a ni maithei, kut sil na vel a tifai a nih ka ring. A inher rual chuan hmanhmawh tawk in ka chhuak nghal.


Ka ţhut rual in tui ka in nghal khawlh khawlh a, ka hawichhuak chiah chu ka ţhian ten mak tih hmel tak in min lo en reng.
"Ka tui a hal ka tih kha"
"I rei sia choka ah i in nghal amaw ka tia" in awmpui hmelţha leh pa tak mi â ang maiin ka thlir reng mawle tih ka chak khawp mai mahse "Ka rei pawh ka hre hleinem" ka ti daih.
"Ka room a awm in duh zawk em? Mut pah a ti ti mai mai"
"Tehreng mai" Brenda nen kan lo ti rual a, nuih hak hak pah in Abi kan zui leh a, room lam hi a rawn tifai tawh em lo ang chu. A thawhtlai ngam chuan a tlangnel tawh viau a ni ngei ang.


Khum ah thatchhe deuh in kan mu a, Abi in lawmthu a sawi leh zeuh ţhin. Min kawmna ala reilo a, ala inthlahrung ah kan ngaihsak mai. Kan ngawih vang vang laiin kawngkhar a ri rak a, choka a ka mi hmuh pa rawn lut lai kan lo thlir ţhap. Choka a ka hmuh ang lo tak khan a felfai thlap tawh a, a ţha daih zawk bawk ka ti leh hram duh.


"Ka chhuak dawn nia" a ti liam puat a, min rawn en vangin keimah min bia emaw ka ti hial.
"Atea bulah ami?" Abi in alo ti vat a, khum atangin a chhuk pah a.
"Aw"
"A birthday khan ka kal thei silo a, kamis ka leisak a, lo nghak lawk aw Damon" tih pah in wardrobe a hawng a, awmdan tur ka hrelo chu Brenda ka en ringawt. Ani lah in Abi leh choka a ka mi hmuh pa chu lo en tawn zak zak a, ţullo deuh in ka phone ka en.


"Hei hi pe rawh aw. Ka pawisa khawl a ka lei ve ngat a nih hi"
"Eng nge i an tawh?" a aw ka hriat veleh ka hawichhuak leh. Abi chu ngaihtuah hmel tak in a en ve ngei a, an in pawh hmel viau mai.
"Ka ţha. Atea chu pe ngei ngei ang che. Chuan zan a haw tlai tawh loh tur an ti aw" keimah ang tho a nih hmel ka ti rilru a, nuih loh ka tum nasa. A chhuah thleng in a lam ka hawi leh ta lo.


"Awileh...Abi, tunge kha kha?" Brenda in in benkar ur ur pah in a ti nghal hluai a, a thaw ngam ve chauh ni awm tak in a thaw huai huai bawk.
"Damon. Ka u anih kha" ka lo nui hak. Driver emaw awmpui emaw anih ka lo ring a, a u tih ka hriat hma pawn ţha ka ti em em tawh a nih kha.
"In chhungkaw chanchin i sawingai lo lutuk a kan hawi hu hu mai lawm. Bialnu a nei em?" a ti zung zung a, Abi chuang chhang lem lo in a nuih liam a, ka ţhutna bulah a rawn bawk veleh a.


"Zan ah a chhuak ţhin a mi? Hmun fal deuh a ţhutna remchang ah phawt hi chuan Sangsangi nen hian kan kal ngun sia, ka hmu ngai miah lo" Brenda chu mitmeiin ka lo khap a, a hrethiam der lo lehnghal. Abi hmel ngui nghal lap kha ka lo hmu hman.
"Chhuak ve ţhin e"
"A rui ţhin ami?"
"A buaithlak ve a" Abi chuan a ti leh sep a, Brenda chu ben pawp mai ka duh tawh. A sawichak lo tih hriatthiam tawh mai tur a nia.
"Engti zawngin?" ala ti deuh deuh a. Thil a hrechak in a hrethei a, college a thil thleng kan hriatna ber pawh Brenda tho a ni. A sual e ka tihna a ni chuang lo.


"Unau ah chuan danglam bik an awm ve lawm. Thil dang sawi ang u" a ti ta ngei reng bawk a, Brenda ka melh rawm rawm a, "Eng nge?" ala ti hu zui. Ka nu ţhatlohna ka sawi reng peihlo ang bawk in Abi pawn sawi chak loh thil a nei ve a ni mai.



"A nawm viau chuan party awmna apiangah kan kal dawn nia" Brenda in nui awr awr chunga a tih laiin kan kal na hmun chu ka enkual a, party na atan chuan rem tak a ni. Pawn lam a awm an tlem a, a chhung ah chuan an tam viau ka ring. Brenda in phone a hmang a, a dahţhat hnu deuh lawk ah hmeichhe pakhat a rawnchhuak a, ka la hmungai lo.


"Eh..iva nalh ve. Ka ţhiannu hi Sangsangi a nih hi"
"In va fel ve" tih pah a a kut a rawn dahchhuah chu ka lo vuan a, inchhung a birthday lawm ai chuan hetiang hmun ah hian a nuam zawk a ni chek ang chu. Inchhungah min luhpui a, ka rinlawk ang chiahin an zi nuaih nuaih tawh. Brenda te in a kan awm leh chhung a rei lutuk a, kan tlai deuh phah. Diktei chuan in tur min rawn pe a, kan hnar loh zawng tak a ni. Mi awm lohna deuh tur ka melh a, awmlohna tak tak pawh an nei lo. A awl lai ah Brenda nen kan ţhu ve a, ţhenkhat chu an lam suau suau tawh.


"Nuam iti em?" a mitmeng aţangin a rui tawh tih ka hria, keipawh ka bang bik lo.
"Peka chuan engtikah maw nupui a neih dawn a?" tih pahin ka in ban la awm chu ka in leh a, ka ţhiani chuan min rawn thlit sak lehnghal vat.
"Karleh ah niang....nilo thlaleh ah...ka hrebik lo" a khup a kiu nghat in a kut in a biang a dawm a, min melh khai khai a, "Engahmah ngai suh khatiang a phu lo che" a ţawng nawk nawk in ka hre mai.
"Hmela chu ţawngkama min hmangaih vei nen. Ngaihdam min dil pawn pasal ineih hma chu nupui ka neilo ang a ti vel a" za lo deuhin ka nui hak a, ka in belh reng bawk.


"A ho lutuk ka tih chu. Theihnghilh rawh" tih liam puat pah in zawi deuh in a kut a vei a, ka thil in hnathawh a lang ţan. Ka thinrim a, ka tawt up up mai bawk.
"Ka lam ve dawn nia Sang. An chhe lo hlawm lutuk" a ti chul a, ka chhan na pawh nghak lo in min thawhsan.
"Kan ti ti dawn maw ka tia"
"Nakin ah. Tunah chuan chhelo deuh pakhat tal ka lampui phawt dawn" tum bur in mipui tam zualna lam a a akal chhut chhut chu ka en reng a, ka nin hnu ah ka in leh a, tuman min ngaihsak loh vangin ka ning leh vat tho.


"Pawn ah chhuak thawveng ang" tiin keimahin ka phun sep a, ka ding chiah chu ka pai nawk. Ka rin aiin ka rui, ka awmdan chu ka in nuihzat a, nui vur vur in kawngkhar ka zawng a, "Thli in chhemtir ila, tlem in ka harh deuh ang a, tun ai hian a nuam ang" keimahin ka phun bul bul a, rui vek lo sela chuan nuihzat rawn ka ni ngei ang.


"A nuam lutuk" pawn ah ka chhuak a, a kawt hnaivai ah mi an awm pheuh pheuh vang in ka kal hla hret a, car pakhat nghengin ka ding a, a chhung ai chuan nuam tak a ni.
"Brenda chu min kalsan vel a, Peka ang mai" ka ti sep a, ka thinrim leh ţan tawh. Mit ka chhing a, ka duh aiin ka in hnem. A chhung kha a lum lutuk vangin hun dang a ka in aiin ka rui a ni maithei. Ka awn riai riai a, ka in thunun thei lo. Mut tawp mai ka duh tawh.


"A ninawm chi bawk maw?" aw ri ka hriat rualin ka meng kawk a, ka hmazawn a ding ka hmuh phei chuan ka harh kawkin ka hria, mut mai tum a ka awn deuh na lam kha a vuan run lehnghal, min thlah thut a, ka tlu lo chauh. Din ngil pah in "I mawl ami?" ka ti tuarh a, min vawn lohna lam khan beer a keng a, rui pawh a ang ve lo.


"Min tih tluk ţep kha" ka ti leh a, Abi unaupa Damon kha helai hmun a ka hmuh hi ka ring lo hrim hrim.
"I thil in a nih kha"
"Ka in chhan pawh i hrelo" ka ti hlar a, ka thil in hnathawh bawk. Ka zak lo a, ka hlau lo bawk a, sawihreh ka neih pawh ka ring lo.
"Hrelo e"
"Min chhang hmuk hmuk suh" ka tih chuan a nui hawk a, a nuih phei chuan ţha ka ti lehzual. A nelawm lohna a bo vek.


"Tu nen nge in kal?" pangai deuhin min zawt ve ngei.
"Brenda. Lam turin a kal daih, tupawh hian min kalsan ziah. Ka ning, khawvel hi a ninawm e" ka ti duah a, harhfim ila kan sawi dawn loh nen. Tunah pawh sawi ka duh lo, ka inthunun theilo a ni.
"Ţhut ka duh. Khawnge ţhutna?"
"Saw" kan piah lawk a kawk a, chair pahnih a awm. A chhunga mi an lakchhuah sa aniang, tu lakchhuah pawh nise ţhut ka duh. Chair awmna lam ah ka kal chhat chhat a, rui vaklo ang a awm ka tum ve ţang ţang.


Ka ţhut veleh ka bulah a rawn ţhu ve. Ţhian te pawh a nei velo em maw ni.
"Nangpawh kal rawh" ka lo ti hlak a, a lam ka hawi tho si. A beer kenlai a in a, chumi hnu ah a hmui a liak leh zeuh a, ka hawisan thei lo.
"I ţhiannu chu phone la, kochhuak rawh. Haw a hun tawh iti ve em? Hmeichhia ini sia" min ngaihtuah hmel takin a ti ve tehmial a, ka phone awm na pawh ka hrelo.
"Ka peihlo. Engkim theihnghilh vek khawp in ka awm dawn. Ka in dawn ka tihna. Duh leh Brenda pawn min kalsan rawh se. Enteh khawvel hi i ning ve ţhin em?"
"I ţawngreng chuan nangmah zawk kha ka ning ang che"
"Chuvang chuan alawm kal tur a ka tih che. Tupawn min kalsan vek hi. Tuman min duh hleinem" ka ti zawt zawt a, mahni in khawngaihna ka nei chawpchilh nghal a, ka awm a tawt a, ka ţah te a chhuak.


"Peka pawn nupui a nei dawn a, pasal ka neih hma chu nupui neihlo turin a intiam ve a" ka ti leh a, ka sawi tawp thei lo.
"Ava sual ve"
"Sual, a nunrawng a, midang infiamnan a hmang a, ka hua, a in ti fel si tenawm si. Ka ring ve thei em em a" ţap ţuau a amah enrun chunga ka tih lehzel tak ah chuan a mangan ve hmel tawh.
"Ţap miah suh" a ti hluk a, awmzia a nei hlawl lo.


"Ka hua alawm. Ka haw ngawih ngawih. Ka palzam lui a, mahse tunah chuan ka thei lo. Engtin emaw tal ti rawh" hepa bula ka pangchang te hi a mak, ka mit a phe ram tawh. An inneihni a a hlim hmel tur te ka mitthla thei vek tawh.
"Ka hria. I ţah chuan engmah ka ti lovang" a tih tak ah chuan beisei nei taka melh pahin ka mit ka nuai a, ka hmuchiang leh thei tawh. A sam thur lam lek lek chu a tuai puat a, a beer kenlai a in leh hnu ah a ţhutna piah ah a dah a, a nui lova, a nelawm leh tawh loh.


"Ka thlah ang che" a ngawih vang vang hnu a a thilsawi chu ka awih lo zawk.
"I mawl ami? Ţhian inei ve lo pawh a ni maithei. Keichuan ka ţhiante ka phatsan ngai lo" ka ti hrawk a, Brenda ka hmuh hma chu ka haw lovang.
"Anih leh ka hawsan mai ang che" tih pahin a banrek a a sana bun a en a, eng a awm riai riai chauh a, a hmuh theih pawh ka ring lo. A din rual in a jacket hak pan tak hmawr ah ka lo vuan vat. Eng nge ka tih hi?


"I haw dawn pawn ka ţhiannu min zawnsak phawt rawh" ka ding veleh a, a hma khan ka lo chik miah lo a, kan in sanhleih viau tih tun ah ka hria.
"Hmeichhe rui buaipui turin ka kal lo" a ti nghut a, ka la run hle bawk.
"A ţha lawm. Min buaipui lo tawp rawh. Abi u inih vangin kawm che ka tum ve em em a" ka ti nawi niaih a, ka awmdan hi ka harhfim hun ah chuan ka in zahpui viau ka ring.


"Damon hetah law ilo awm daih. Haw kan tum a, kha tunge?" an rawn tih rualin min din hliah nghal.
"Ka hmelhriat anih hi. Ka rawn um ang che u"
"I bo vang vang kan ti reng a ni. Mangţha aw, Jason-an min chah nasa bawk a, haw har suh" a tih leh hnu ah car kawgka in hawng ri ka hre zui zat a, thawm a awmchhung zawng chuan min din hliah tlat.


"Thlah iduh loh chuan ka hawsan tak tak dawn che" thawm a reh rualin a ti nghal khur khur a, a sawi ang chuan a awm dawn tak tak tih ka hre bawk.
"Mahse Brenda"
"Mangţha le. Kan inhmuh tawh loh ka beisei" min kalsan zui nghal a, Peka ang tho anih hi.
"Ka phone pawh a chhungah ala awm daih alawm" ti chungin ka um. Ka nel em em chhan hi ka ruih vang leh Abi unaupa anih vang chauh anih hi.


"Hey Damon" ka ti leh a, a ding ve hlauh e.
"Brenda min zawnpui la min hawsan dawn nia" ngen ngawl takin ka ti tawh. Keimah chuan ka zawng hmu tawh lul lovang. Ka pum a in let but but a, ka luak a chhuak ut ut bawk.
"Washroom" ka hmui ka hup nghal. Ka hriat phak loh in a phun sup a, min kai dawr dawr. Chak takin min kalpui a, tuemaw in min su zeuh se chu ka luak nghal ang.


A chhung kan luh rualin ka luak nghal bawrh bawrh a, kawngkhar pawh ka khar lo. Ka luak zo chu ka zawi hnawk a, harh deuh ka inrin nen ka harh chuang lo. Mut mai ka duh takzet tawh. Khapa khan min hawsan daih tawh ka ring. Washroom chhungah hian min theh lut nawk nawk a, a kalsan nghal daih ka ring. Ka hmai ka ti huh a, ka chhip ka ti huh lep lep bawk a, ka thinrim vangin ka in ţeuh a, khatianga tam kha chu ka in tawh lovang.


Zawi deuhin washroom aţangin ka chhuak a, Brenda zawn pawh ka huphurh tawh.
"Kha" tih pah a ka awm zawn a tui bottle a rawn nemchilh rawp rawp chuan min ti hrilhhai letling zawk.
"Lo awm reng ang che" a ti leh a, ka bul hnai ah awm an awm lo bawk nen, min kalsan chuan hlauh rukna ka nei nghal. Hawikual rulh rulh pahin bottle chhin ka hawng a, ka thlamuang hlawl lo.


A reh vang vang a, ka ding ning lutuk chu lei ah ka ţhu thla hnawk a, ka harh deuh hun ah haw dan ka ngaihtuah mai ang ka ti tawp tawh.
"Hmingthansang....Sangsang" Brenda aw ka hriat veleh ka hawichhuak a, min rawn hmuh ve veleh ţap pur in min rawn pan nghal.
"Kan ţhut naah khan ilo awm tawh silo a, ka mangang alawm. Hetah ilo awm a, ka lawm lutuk" ti chul chungin min kuah a, lo nemsawn pah in "Min khawih che vak vak lo teh" ka ti sep a, ka luakchhuak ala reh tak tak thei lo.


"Abi u khan min rawn hmu hlauh a i awmna min hrilh alawm"
"Khawnge amah chu?"
"Ka hrelo. Ka ti thinrim aniang a kal daih" a ti chuai raih a, dingchhuakin ka in siamţha a, naktuk ah chuan zak viau dawn mah ila lawmthu sawi hrim hrim ka ba khawp mai.


CONT.....(Chapter-1 na hi chu a phuailuai duh khawp mai. A rei anga, hmasawnna a awm zel turah ngai ang. Chhiartu leh comment min pe ţhin tute chung ah lawmthu ka sawi mawlh mawlh e)

---

BROKEN-2



Ka lu na ngut ngut in min ti harh a, rum ţuah ţuah chungin mit ka meng diar diar a, ka pindan chhunga nizung lo lut tawh vangin ka chhing leh vat. Ka mit a vai ram ram hman tho. Friday a ni tawh a, class kal a ngaih tawh bawk vangin ka mit meng miah lovin ka ţhuchhuak a, ka puansin ka pawt hlim zui zat bawk.


Ka men leh rualin zan lam a thil thleng chiang takin a rawn lang nghal uarh uarh a, ka zah em vangin ka lu pawh ana lehzual in ka hria. Ka sam kar ah ka kutţang rawlh lutin ka in dawm vang vang a, khapa khan engkim ala hre ve ngei anga, min va han ngainep dawn em tih ka ngaihtuah daih. Chhungkaw chhuan tlak ka neihloh tehlul nen khawlaia ka awmdan pawh a zahpuiawm ţan anih hi. Hmuh leh ka duh tawh lova, hmu leh mah ila fiamthu thawh nan min hman tawh ka ring. Abi unaupa a ni kha a pawi lehzual a, loh theih loh a ka hmuh leh ka hlau a ni.


Peka chanchin thleng thleng a hrilh tur ka ni miah lo, ka rilru leh ka taksa khan thunun tu dang a nei tawh a, ka chhia leh ţha hriatna a bo zo va, ka hriatchian miah loh hnen ah ka in bunruak ta vak a ni. Lawmthu sawi ka duh rualin min deuhsawhna ţawngkam ngaithla turin ka in ringtawk chuang silo. Ka in zahpui a, ka rilru a buai nuaih nuaih a ni ber. Harhfim a ka tih ngam miah loh tur ka ti ţeuh a ni.


"Hmingthansang" ka pindan kawngkhar a ri zui dawt dawt a, ka nu hmaisa ka tawn leh a ngai dawn anih hmel. Engmah ni mang silo hian ka ţhatlohna lai a hmu thei em em ringawt mai a ni. Muangchangin khum aţangin ka chhuk a, thawm na tial tial chu ka haider. Hawng mai lovin bathroom ah te ka lutkawi leh rih a, thawhfuh loh ni phei chuan ka nu hi ka hmupeih lo ţhin.


"Iva rawn hawng har ve" kawngkhar ka hawn rualin alo ti nghal a, en miah lovin ka kalpel lui. In hnuai pan na kailawn a ka chhuk pawn ka tlan ti tih.
"Ka hrilh tawh che ni lawm ni? Zirlai ngaihsak miah lo a zan chhuah i hrat a nih chuan ka kalh khum hmak hreh miah lo che" min um hlawk hlawk pahin a ţawng mawlh mawlh a, ka palzam lui zel. Ka chhan ve chuan kan inhau leh vak ang. Choka ah lut tlang in fridge ka hawng ţhuai a, a chhunga thil awm pawh a in sawi nasa, bottle la chhuakin tui ka in khawlh khawlh a, ka nu a rawn luh ve veleh bottle kengin ka chhuak leh daih.


"Min zahlo tak hian awm kual vel tawh suh. Ka chawm lai mai mai ila nih hi hrereng rawh" a tih lai mekin a pindan kawngkhar a in hawng a, mipa pakhat ka la hmuh ngai miah loh a rawn chhuak a, mit nuai nuap nuap pahin "Irene zingkarah bengchheng siam lo teh" chupa lak aţanga ka mit lasawn in ka nu zawk chu ka en ha a, zanrei tak tak thleng mipa an rawn leng ţhin. Tumah an riak ngai lo.


"Sual rawngbawl bak thiam neilo ka zilh mek anih hi. Va mu leh rawh" zak miahlo in ala ti ngam.
"Nu" ka aw ki a zawi hle a, mak ka tih lutuk vangin sawitur ka hre lo.
"A rawn awm ve rih dawn. Thildang i hriat tur a awm tawh lo. Ka rilru iti hah lutuk hi ka tum loh deuhin ka awm phah anih hi" hnung zawnga tawlh hlat hret hret pahin ka nu mikhual a pindan ţawmpuitu leh ka nu chu ka entawn zak zak a, a ruih reng chhan hi ka pa in a kalsan vang anih ka lo ring ţhin a, mipa dang a riahpui duh em chu ka lo ring ngai lo.


"Hetiang chu iti theilo ang. Min hmangaih chuan ti suh" ka thusawi chu atthlak ka ti. Ka nu hian min hmangaihna a lantir ngai miah lo. Duat taka min kuah lai pawh ka la hrelo. Ka thin a phu dup dup a, ka kawchhung a lum pup pup bawk.
"Min hmangaih chuan ka duh ang hi min pawmpuiin ka thu angin awm rawh" muangchangin lu ka thing a, ka pawm thei hlawl lo. Vawikhat pawh ka la hmuh loh mipa ka chenpui duh lo. Amah enin zu a duh ve tih a hriat ngawih ngawih a, zak hmel a pu duh hek lo.


"Nangmah chiah i in ngaihtuah a, tunah ka khawhar hnemtur ka hmu a, chupawh chu min pawmpui duhlo leh a maw? Inu hi i thu thu a awm turin min beisei a mi? Nileng zankhuain i bo va, thu min pe theiah ila in ngai maw?" a tih chuan "Eng nge inih bik?" ka ti tuarh a, a bialpa nen chuan mak tih hmel takin min en ve ve.


Ka mittui tla tur chu duh lovin ka banin na takin ka mit ka tuai thuak a, ka thawh hlim phat aţangin hlimna hian min hmuak ngailo.
"Pawm lo mahla ka thu angin ka kaldawn tho. Pawn lamah eng angin nge ital vel kan hrebik hleinem"
"Ka duh duhin ka awm ang. Hriatngai loh i rawn hruai lut a, ţhenawmte pawh i hmu ngam dawn mi? I zaklo anih pawn keimah hi ka lo zak ţhin tih hre rawh. Hetiang ini chung hian min la zilh ve zui a, ka rilru tihnat reng hi nuam iti viau ami?" ka ti tuarh tuarh a, a thinrim lutuk vangin a meng sen ram tawh. Thudik ka sawi a, haw thei a ni bik lo.


"Chaltlai lutuk. Ka fa inih hi ka ring lo hial ţhin. Nu te zah nachang hrelo, lo neihloh tawp tur che ania"
"Anih chuan min pai lai khan min paih daih ta che" ka ti vin leh vak a, a kut ka melh zawk a, a in humruh nasa tih ka hmu. La duhtawk mai lovin "Khawvel a ka awm ve leh i fa ka ni kher kher hi pawi ka ti. Nangmah vangin ka zak fo. Ka khawngaih che a ka chhuahsan lo mai mai che anih hi" ka ti leh kher a, zah duh viau mahse zah a phu thlawt lo.


"I duh leh min chhuahsan rawh. Fa sual ka mamawh lo. Ka hlimna min ţawmpui theilo hi ka mamawh lo che" a tih chuan ka nui lui hawk hawk. Ka nu chu a ni ve sia, school ka kal laia pakhatna ka nih pawn a hlim hmel ka hmu ngai lo. Ka ţhiante an pass lawm tura an nu leh paten an hruaichhuah ţhin laiin keichuan ka nu rui ka buaipui ţhin. Krismas hi hlim taka hman ka nei ve ngai lova, eng emaw vang talin na takin ka hmang liam ţhin.


"Awle. Ka chhuahsan ang che. Ka pite hnen ah engkim ka sawivek ang"
"I chanchin ka hrilh vek tawh. An lo lawm kher lovang che" chhanglet tawh lovin an pahnihin rum deuhin ka melh a, inthlak turin ka pindan lam ka pansan leh daih. Zantin rawn rim a inkawp sa pawh an nilo. Tun hnai a inchhar chawp mai mai bak an ni lovang. Kan in a a rawn luh nachhan tur pawh ka hrelo. A hma aiin ka nu a bawraw lehzual phah ka ring.




"Nangpawn i zir bik lo em a ni" ka pi min chhan na avang chuan mak ti in ka ang pham a, zingkar a thil thleng kha ka sawivek. Ka nu hi an la dem phal chuang lo. An hmangaih tih ka hria, a ti lawm thiam em em bawk.


"Inchhung nuamin a siam lova, zu in in an ri dur dur reng a, ka awm peih hleinem" ka ti pawr hlar a, ka pu chuan en pawh min en lo. Ka nutei khan pasal la nei lo sela chuan engkim hi a danglam vek ang. A pasal te in a a awm tihbuai ka duh silo.
"Inu aia hmangaihtu che an awm lo tih hre phawt la, a khua a har ve em a, hnemtu a mamawh ve a, i enliam mai mai dawn nia, va haw leh phawt rawh" a ti nem duai a, ka awih theilo zawk. Anni hian ka nu aiin min hmangaih zawk daihin ka lo hre ţhin a, ka tisual leh dawn anih hi.


"Ka haw duh tawh lo. Thla khat vel tal hetah ka awm duh" ngen ngawl taka ka tih laiin ka pu in "Inu in eng harsatna nge a paltlang i hrelo. A thuzawmin tih lungawi tum ringawt rawh" a rawn ti hmuk a, ka ţawngzui ngam ta lo. An nula in thil ei turin min hruai hrang a, ka thil ei chu tui tihna ka nei lo. Ka lem lui ţawk ţawk a ni ber.
"U Nu, ice cream a awm em? A lum e tiraw?" ka ti kual nuaih a, thupek tawp ka hreh vang a ni. Nidang angin ka thil ei ka pi in min awmpui tawh bawk silo.
"Awm e. Ka rawn pe ang che" a ti a, a che nghal zung zung a, ka naupanlaia min awm ţhin tu ania, ka ngaina takzet.


Fian khat tlata suakin ka hmawm a, U Nu-in "Nakinah nangmah hmangaih tak tak tu ila tawng mai ang. I pite pawn an hmangaih che a, inu lak aţanga lakhran che an duhloh vang mai mai niin ka hria" dam dap a a rawn tih chuan ka awm a tawt up up. Ka ţah loh nan ice cream ka in barh lui pah zel bawk.


"Chuan maw Sang, i nun hi sim la Pathian lam hawi rawh. Ruihhlo hian a chhawk lo che a, ţawngţai tam la, i zangkhai hawk zawk ang. Tuman an hmangaih lo che angin in ngai mahla Pathian chuan a hmangaih reng che" lu ka thing vut vut a, Pathianin min hreve lo. Amah ringtu inti tam tak pawh hian ka ţhian nih an duh lo.


"Ipite an zin dawn a, an zin hunah i rawn awm dawn nia. Keichu i lam ka ţang tlat tih i hrereng dawn nia. I nun hnawk nuaih ata hruaichhuak tu tur che ila tawng ngei ang" a ti leh a, chu chu tunge niang? Min hruaichhuak tu tur ka nghahna a rei tawh. Ka bialpa neih ve te khan min hmangaih amaw ka ti ţhin mahse ka taksa chiah an duh. An duh ang ka duh ve lova, pasal ka neih hma a mipa in khawihtir ka duh loh vangin min kalsan leh ţhin. An duh an hmuh miau loh chuan lem an chang reng peih ţhin lo.


Min hmangaih a, ka pian ve avanga lawmthu min hrilh tu ka mamawh. Ka khawvel thim tak min tih en sak tu tur ka mamawh ve takzet. Min hmangaih turin tumah ka tilui thei silo.




DAMON'S POV


"I chhuak dawn mi?"
"Dawn anih hi" ka pindan chhunga sofa sei pakhat awm ve tlawng ah ţhu in Jason chuan min en run a, darthlalang hma a ka sam ka siamţhat mawlh mawlh laiin ka hnunga ţhu ani bawk a a ner nang hmel ka hmu thei.


"Ka hnunglamah min ner khum vel a, darthlalang a hi ilang ania" ka nui zui hawk a, ka unaute fiam hi nuam ka ti. Ka nundan min ţawmpui miahlo pawh hi a lawmawm. Misual ka inti phal lo na a ruih erawh ka hrat ve. Ngawi chut chut chi ka ni lova, ka kawp lawr hran lo bawk. Bialnu nghet ka nei, min ţhen thut a, neih let ka tum mek.


"Zan a chhuah hi sim a ţha iti ve lo maw? Khawlai a him lo bawk nen"
"A himlo lai chu ka kalpel daih zel" ka hawilet a, beidawng tih hriat zelin thawk a la vang vang. A nawmzia hre turin a chhuak ve ngai tlat lova, a mi tak run ringawt. Puitlin lamah ka tluk lo. Ka rilru a puitling ve thei lo.


"Atea hi pui la, thil ţangkai ti zawk rawh. I zirna nen pawh a inhmeh a, ka sawi awmzia i hria em? Lenkual mai mai aiin" a ţawngpahin ka kut a vai kual sek a, ka nuihsawh hlauin a zam leh tawh tih ka hria. Mcom ka zo deuh chiah a, Jason erawh MBBS a zir zo a, internship pawh a ti zo ţep tawh. Ka pa in zir ve turin min nawr nasa a, ka hnial fithla ţhak. Vawikhat pian ve manah ka tuiloh zawng ka ti dawn lo. Bcom Delhi ah ka zir a, nuam ka lo ti lutuk nge Mcom chu Delhi a chhunzawm an phal ta lo.


"Ka la pui ang chu. Zanin chu lokal ve ta che"
"Min sawm lo law law zawk teh" kuangkuahin a hawisan hmak. Bialnu lem deuh pakhat a nei ve tawh a, ka nu zahloh taka a be lai ka hmufuh a, Jason lem a changin ka ţhensak hmak. Lawmthu min hrilh lo na a khata ţang khan bialnu ala nei leh lo. Jason ka nilo tih a hriat loh nan thim zingah ka ţhen anih kha. Jason-a phone pawh ka hmanruk sak tak e.


"Nizanah hmeichhe thuhruk inei ni maw? Cindy-in a rawn sawi a"
"Nei ve e" ka nui zui suk a, Abi ţhiannu Hmingthansangi bula ka awm laia lokal kha Cindy cousin leh Jason-a ţhianpa ni bawk a ni. Keimah ang chiaha party ngaina a ni ve a, kan inhmu leh hlawl ţhin. Cindy hi hmeichhe fel, kohhran a inhmang tak, inkhawm ţhulh duh miah lo chi a ni. A hla zir ka nghah chang lah a tam. Kan nundan a in ang lo emai tiin min ţhen a, Hmingthansangi kha a thik leh si a ang.


"In inţhenna ala rei loh nen. A thik tur chuan awm lo teh"
"A thik maw?" ka hrethiam lo der. A thik khawp mai. Ngawichawi deuh thikthu chhe zet anih ţhin reuh kha.
"Mipa dang bulah awm se engtin nge i tih ang?"
"A awmpuipa chuan a awmpui nawn duh tawh lovang" ka ti nghut a, ka duh em a, mipa dang nen a awmdun turin min ţhen hnuah pawh ka la ngaihtuah ngailo.


"Kha kha a ni mai. In siamţhatna hun a pekah che hian insiamţha vat rawh"
"Ka nundan duh lova min ţhen tu hi ka mamawh bik love" dawt ka sawiin ka hria. Ka la mamawh reng. Ka hmangaih leh hmangaih loh ka hrelo. Ka duhzia erawh ka in hrechiang. Kum thum kan inkawp hnuah min ţhen thut a, khawhar awmzia te ka hriat ve phah. Mahse nuam ka tih angin ka nung a, ani pawh ka enliam a, a inkhawm leh rei tak tak hla a zir pawh ka sawisel sak lo, min sawisel thei a ni bik tlat lo.


"Ehe...i chhuak dawn a?" kawngkhar vuan ran chunga ding Sandra melh pahin ka bu nghut a, "I rei angem?"
"Ka hrelo. Ngati nge?"
"Naktuk ah karkhat cham turin ka zin dawn a, chhuak lo la ka ti deuh"
"I kal dawnah airport thleng ka thlah che nga i haw hun ah ka rawn lam leh ang che" ka ti a, ka thil tum ţhulh ka tum lo. A zin dawn tih pawh a sawihma khan ka hre daih tawh.
"I tih tlat chuan le. Fimkhur la" Sandra chhuah rualin Jason-a bulah "Ka nu leh pate an pindan ah an awm teh em enfiah lawk teh" ka ti zui zat a, a che eih lo. A hmai zawnah ka vut ka vai a, na zet in alo beng sawn.


"Nu leh pa phalloh chu tih loh mai tur"
"A nuam apiang an phallo a, thuawih lo kan nih phah fo anih hi" tiin ka hnial a, a nin tawh zia hria in ka ti lui mai mai. Ka patea pawn ka pa a hnial fiam ngun. A hlimawm hmel ka ti ţhin a, ka patea tihdan ka zir a, a lo nuam tak tak bawk.
"Ila inchhir khawp ang"
"Ka inchhir hun atan ka hman tur pawisa lo khawl rawh aw Dr. Jason" min chhan ngaihna a hriat loh vangin a nui ve mai. Doctor nih hi nuam a ti ve hrim hrim bawk. Natna hrang hrang nei an enkual reng a, ka awt lo. Sandra pawh hi doctor tho a ni. Rin aiin an hna hi nuam an ti phian.


"Damlo pakhat ka rilruah a awm reng a"
"Nei daih rawh"
"Patling ania Damon. I hriat ve mai mai atan"
"Nei tho rawh" ka pindan ka chhuahsan rualin min zuichhuak ve nghal. Inhnuai pan na kailawn a chhukthlak pahin ţhutkhawmna lam hmuh chian tum in ka hawi thla zeuh zeuh va, an lo la men chuan chhuah a har leh dawn.


Ka hlauh ang chiah. Tv an la en. Min hmuh rualin ka pa in "Zan lam hna neih hi a buaithlak ania" a rawn ti dam thluam a, ka nu erawh chuan tv a en ngur ngur. Min en lo se ka duh zawk. Nu te hi chuan lem an chang thiam em a, mittui an ngah bik bawk nen.
"Hnathawk tur a chhuah ka tum asin" ka pa thusawi hrethiam takin ka lo ti ve. Khawtlai reng thei ka ni tawh lo.


"Nangmah ang rual ka nihin ka party ve ngailo Damon" a awki a chang tawh khawp mai. Rilru puitling neilo mah ila hauh rual ka ni tawh lovin ka hria.
"In hun laiin party ala awm lo" ka bula ding Jason chuan min rawn nghawk a, min tih ang chiahin ka ti let ve.
"Dar10 ah rawn haw ang che"
"Awle"
"Rui lo bawk la"
"Yes Boss" ka ti fiamthu a, tunah dar9 a ri dawn tawh. Dar12 hmain ka haw hman lo sa. Party ah ruilo tura min beisei pawh a mak. Ka kal vat theih dan anih miau vangin ka aw liam puat puat ringawt. Ka intiamna ka bawhchhe dawn tih ka chhungte an nihna angin an hriat ka ring.




Sana ka en a, dar11 alo ni leh tawh. A chhunga thawm bengchheng ka nin tawh vangin ka chhuak thawveng a, a bengchhen lutuk hi chuan darkar khat lek pawh a rei. Thawm awm lohna a awm ka duh vangin ka kal hla angreng a, thawm a reh chian hmak hnuah step ah ka ţhu thla hnawk. Tlemin ka luhai ve a, ka rui chuang pawn ka hre lo. Bike khalh leh tur ka nia, ruivak lo ila a ţhat ka ring mah zawk.


Ka awmna hmun a reh em vangin pen ri ang tak ka hriat chu a sual dawn lo tih ka chiang. Ţhureng chungin ka hawilet a, step tawn tawn a eng a awm vangin a hmel pawh ka hmuchiang. Hmingthansangi bawk. 'Khawngaihin zanin ah chuan ni tawh love' ka tih rilruk reng laiin ka ţhutna bul a rawn thleng chawpchilh nghal. Min chhuk en run a, ka dak chho ve thung.


"Nang bawk maw?" fiahlo deuh a tih pahin a kut a vai thuak a, a ruih lai pawn min hrethei viau mai. Ka hmuh tirh aţang tawh khan vei nei reng hmel a pu reuh va.
"Min hmuchiang thei hmel pawh ipu tawh hleinem" tawi te a nui chungin a rawn ţhuthla ve a, ka lam a rawn hawi reng bawk. Zan hmasa lamah a inpuang vak tawh a, tunhnaia nupui nei mai tur Peka a awm tih ka hriat phah.


"Khawnge i ţhiannu? Kan inhmufuh thei khawp mai" ngawihreng aichuan tiin keiman ka be hmasa.
"Ka hrelo. Ka phone tlang thei lova, thil min tihsak thei angem?" ngenngawl taka a tih chuan 'engtak ni ang maw', tiin ka ngaihtuah hman.


"Riahna tur hotel min biaksak tur i hria em?"
"Hria e. I haw ngam lo mi?" ka ti ţha ve mai. Hotel a mamawh chhan a zirin ka patea hotel ah pawh a awm thei ang.
"Zanin chu riah chhuah ka duh a, khawngaihin min hruai thei angem?" a ti lehzel a, zan hmasa aiin a ţawng a pangai phian.


"Ka hruai ang che"
"Ka lawm e. Khawvel hi a ninawm anih hi tiraw?" lu ka bu nghut na a khawvel ka nin lai ka la hreve lo. Cindy nen a kan inţhen hlim khan hrehawm chu ka ti ve. Tunah pawh hrehawm ka ti in neihlet ka la duh tlat tho.
"Inu in hrilh lawk lo che in a pasal tur rawn hruai haw thut se engtin nge itih ang?"
"Ka hrelo" ka ti nghut a, ka nu fel ka tih vang nge chutiang chu ka ngaihtuah naah ala awmchhin eih ngai lo.


"Ka chanchin ka sawina a ni miah lo ania. Zanin chu nizan aiin fel ka ti daih zawk che" a ti a, a nui zui sen sen a, hmeichhe hmelţha tak nun khawlo laklawh a nih hmel. Lu thin pahin ka nui ve mai. A ruivak lo emaw ka ti hman dawn a, a rui viau tho mai.


"Chhungkaw ţha tak inei sia...ih...ngatinge hetianga i awm a"
"Nuam ka ti a"
"Keichu nuam ka ti lo. Ruih neih te hi ka ning tlat. Chhawk turin ka duh a, a chhawk lo thei si" tiin a phun sep sep a, a sam a hui kian chuan a hmel ka hmuchiang lehzual.
"Hmelţhat leh ruih chu a inhmeh lo reng a ni" ka tih chuan min en ha a, ka thusawi a awih chiah lo a nih hmel. Dawt ka sawiloh thu ka hrilh duh lem lo.


"Hmelţha min ti maw?" a ti hu a, midang pawn an tih ka ring. Ka ngaizawng tihna a ni chuang lo. Cindy chiah ka la ngaihtuah.
"Umm"
"Ka chhungril kehchhiat nasat zia i hrelo mai mai" a ti zawi sap a, ka hriatloh mai bakah ka hrethiam lo. A kun ngul tawh a, engtiang taka kehchhia ni ang maw?


"Ka chhungril hi na lo lai pawh a awm lo" tih pahin a rawn hawichhuak a, a mittui a tling leh pam tawh. Eng ut lo mahse a hmuh chian theih viau.
"Nang te hi party naah i ţap ziah ami?" nuih hawk paha ka tih chuan a hmai a hup a, a dangdai khawp mai. Hmeichhe ţap ka thlem thiam loh vangin kalpui vat ila a ţhat ber ka ring.


"Hotel ah chuan ka hruai ang che" tih pahin ka ding a, a ding ve tur ka lo vuan vat. Ka ngaihsak viau chhan hi ka nauah ka chan vang chauh a ni. A ţhiannu a ni bawk a, an awm anga ka nau a awm ve hi kei ve tehlul hian ka hlau ru ve khawp mai.


Bike la tura kan kal lai pawhin ka kawr ah pawtin ka hnung deuhah a kal det det reng a, ka ruala kal ngam lo khawpa inthlahrung hmel a pu silo. Ka bike dahna kan thleng a, helmet ka la kang chiah tihin Cindy cousin haw tur ka hmu leh. A hun lo khawp mai. In her in ka helmet chu Hmingthansangi ka khumtir vat a, a inrin lawk loh vang leh ka chet thut vangin a pai nawk nawk. Vuan lo phei ila chu a tlu maithei. A hmel an hmuh ka duh lo.


"I nun anga nung ve thei khawppui i hmu tawh a ang khawp mai" ngeiawm lek lek a a tih chuan ka nui suk a, a unaunu zawkin min ţhen tih a hriat ve tho ka ring.
"Min fak naah ka ngaihsak ang che. Ka lawm e"
"Ţap chunga min ţawngţaipuitu chu awm ve se ka insiamţha chiang viau ang" ngawi rengin an kal liam ka thlir tlawk tlawk. Cindy beng a thleng leh vat ang. Cindy pawh a reh rei tawh lo tawp ang.


"Tu te nge? Ngatige min hliah daih zel?" helmet ka lak rual a lo tih nghal pahin a sam a hui mam pah thuak thuak a, enzui ve bawk mahse an hnunglam bak a hmu lovang. Helmet ka khum ţha a, bike ka tih nun hnu ah chuang turin ka hrilh leh tawp a, ka puihna mamawh zawk anih miau vangin zawhna min zawt zui bik lo.


Ka tlanchhuahpui hnu ah ka kawr ah bawk a pawt leh a, hmeichhia ka kawp kual tam lo bawk a henu hi Cindy thik tur atan chuan a ţha reuh khawp ang. A cousin kha party a kal ziah a, ka naute college ah a cousin tho pakhat a luh thu a sawi ţhin bawk. Tu ber nge ka hrechuang lo. Hmeichhe buaina ngah hmel tak hman ţangkai hi ka duh ngai hauh lo. Reilote chhung mahni hmasial ve lawk chu a pawi em lovang chu maw.


"Min kuah rawh. A pawilo" ka tih hnu ah ka kawngah muangchangin a ban a rawn dah kual a, min kuah nghet ngam chuang lo. Cindy cousin Afaka khan min umzuiin ka hre bawk. Nidangah pawh kan inzui ziah a, tun ţum erawh tum a neih ran ka ring. Keipawn ka nei.


"Ka pui ang che"
"Engmaw?" a rawn ti ha a, puih a ngaihna erawh a sawiloh chuan ka hrelo. Buaina a ngah hmel emai, amah puih chu a remtih ka ring.
"Min mamawhna ineih chuan ka pui hreh lo che. Hmelţhat leh lungngaih pawh a inrem chuang lo" tihnat duh leh neihlet duh a neih chuan ka puih a remti khawp ang.
"Ka lawm e" a tih ri ka hrepha chang chang. Inthiamlohna ka neih rualin ka pui anga, ani pawn a hriat lohin min pui let ve a ni mai tia in hnem chungin thiam ka in chantir.


Garage a bike ka dah hnuah a dar ah kuahin ka kalpui a, ka car hriat ţhan tak min hlat vaklo a ding ka hmuh chuan ka nui suk. Kan awmdan chu hmuh nuam an tih ngei ka beisei. Hotel chhunga kan luh hnuah ka thlah chauh. A hrilhhai hmel lek lek a, insawifiah a ţulna ka hre miah lo. Kan inpui tawn ang. Chu zawng chu.


Reception ah ka kalpui a, tunhnai te a room ruak a awm ngailoh thu an lo sawi a, ka room hman ţhin erawh englai pawn a awl. Ka thawmhnaw tlem ala awm bawk ang.
"Ka room ah pawi iti em? Riahchhuah iduh chuan ka room lo chu awl a awm lo anih chu" ţawng tumin a ang zuau a, tlem a thle deuh hlek chungin ka hnunglam a en leh ta zawk a.


"Atea chu, tun ang huna hmuh che ka in beisei hleinem"
"Keipawh hian tun ang huna hmeichhia i rawn hruai ka beisei hleinem" ka awki ang chiahin a ti ve. Ala hmuhngai loh a nih vangin hrilhfiah vek a phut bawk ang. Ka pa aipawn ka pawh daih zawk a, atea bulah sawihreh ka nei em em lo.
"Room ruak alo awm tawh lova"
"I room ah riahtir la nangchu haw ang che" a ti hmuk a, ka hmeichhe hruai en in a nuisang thung.


"Damon hian a room a kian dawn che anih chu. Zui rawh naktuk ah kan inhmu dawn nia" a ti a, min kalpelh pahin "I haw hmain min rawn hmu ang che" ka beng zawn ah a rawn ti sup bawk. Hotel aţanga hla vak lovah ka pi nen an awm a, ka pi alo mut tawh ka beisei.



Room chhung kan luh rualin khumah a ţhu thla nghal tawp a, ala zawi viau tho mai.
"I phone min lo pe" tih pahin a hma zawnah ka kut ka dahchhuak a, min en vang vang hnuah a phone chu min rawn hmehbel. Ka phone number ka chhutluh hnuah pek let pahin "I haw duh hunah min rawn hrilh dawn nia, ka rawn hruai ang che" ka ti leh a, min chhan nan lu a bu nghat nghat a, ka hman ţangkai chhung chuan ka ngaihsak khawp ang.


"Ka lawm e. Damon" kawngkhar ka hawn tawh hnu ah hawilet in tawi te in ka nuih a, keimah anglo takin lem deuhin a nui ve lo. A lawm tak tak zia a lang thei.
"Kan inhmu leh dawnnia" ka tih sup hnuah ka chhuahsan a.


Min ngaidam rawh reilote chhung chauh a ni ang. Infiamnan ka hmang rei lovang che.



CONT....

---

BROKEN-3



"Ka rei em?" inthlahrun hmel takin a rawn lut a, lo nuih sang pahin "Rei love. Ka insiamfel ve deuh chiah" ka lo ti vat a, rui miah lo a inhmuh chu a nuam lo ve deuh. Zan lama a thusawi kha ka hrechiang em em vek a, min chhanchhuak tu tur ka beisei reng ţhin kha ni se ka ti ru takzet a ni.


"Ka u ka thlah hmasa a, i muttui em?" tih leh pahin ka bulah a rawn ţhu a, a hma aiin ka zam lehzual.
"Aw. Nangmah vang ania, ka lawm lutuk" ka ti sep a, ka mal pahnih inkara ka kut rawlh lut in ka che sek a, hetianga zam hi ka nei ngai lo.
"Lawmthu i sawi ngun tawh khawp mai" a ti sup a, ka lo nui tawp. Brenda te inah ka riak ngam dawn lova, hmu lo ila chuan riahna tur ka nei kher lovang. Lawmthu sawi mawlh mawlh tur ka ni ve hrim hrim.


"Vawiin chawlh ani thova, iduh chuan hetah hian i hahchawl nileng thei ang" zam deuh taka a tih chuan lu lo thingin "Ka haw ang a, zana ka riah leh duh chuan ka lo hrilh ang che" ka ti tlat a, a pindan bikah ka awm a, chhunah hahchawlh nan te a hmang ve duh ang. Ka haw peihloh vang ngawtin ka chuhpui thei lo. Thil min tihsak reng bik chuan ka inthiam thei lovang.


"I duh duh hunah i riak thei ang. Min rawn hrilh hmasa la ka rawn hruai ang che"
"Eng vang nge?" ka tih sep chuan hrilhhai hmel lek lekin min en a, ka tihlau anih ring a nui lui chungin "Min ngaihsak a min puih chhan hi?" ka kut ţang khal niap niap pahin ka phun sep a, amah pawh ka en ngam lo.


"Ka hrelo" a ti mawl tawp a, min chhanchhuah a tum thu sawise ka duh. Ka lo beisei sang mah mah maithei mahse ani tal hi ka hlimna thlen tu nise ka duh.
"Zan ah party naa kal lovin hetah hian ka awm zawk thei angem?" hlau chung chungin ka en lui.


"I thei ang" a ti nghut a, min thawhsan in tukverh lam a pan a, a in ngaihtuah muk hmel khawp mai.
"I remtih chian loh chuan ka tan pawh a nuam chuang lova"
"I thei ang. Zanin pawh awm rawh" a ti nawn leh a, chhunah ka pite awmloh hlan a an in a ka thawmhnaw awmsa ho lak a chhuah leh kha ka tum dan a ni hrim hrim. Kan inah ka haw duh miah lo bawk a, ka zirlaibu erawh lak ka ngai tho mai.


"Zan khat riah man engzat nge?" ka tih chuan nui hawk chungin ka lam a rawn hawi a, "Pawisa a ngai lo"
"Nuam ka ti lo"
"I tih angai anih chu. Pawisa a ngai lo" tiin chiang takin min hrilh leh a, lawmthu ka sawi leh hman ţep a, ka lawmthu sawi ngaithla peih hmel a put tawh loh vangin ngawih ka chuh leh ta zawk.



Kan in kawta a din dat rualin ka chhuk tharh a, kan gate neih ve lianvak lo ka hawng ri rak a, kawngkhar in kalh ka hmuh chuan thlamuang deuhin ka thaw huai thei. Tunah tak chuan ka chhungte ka hmuchak lova, ka ţhiante ka be peih lo bawk. Damon awmna lamah ka leh hawi a, gate pawna ka nu hming in ziahna zawn a melh run ka hmuh veleh ka let leh a, ka nu chanchin ţhalo lai a hreve tawh a ang. Mifel tak nilo mah ila min hmuh dikloh a, min puih duh tawh loh ka hlau a ni.


A zawn ka thlen veleh "Dr Irene maw?" alo ti sup a, ka nu hming ziahna lai chiah a la en.
"Ni e. Ka nu ania, min ring rawh kan inang lo" tiin thiam ka inchantir nghal zung zung bawk.
"A hming hi hriat tawhna ka nei" a ti leh a, a inngaihtuah muk hmel em em mai lehnghal.
"Cardiologist ania, ani aia doctor thiam an tam mai" ka nu ka lo zahpui takzet zia ka in hrechhuak uarh uarh bawk. Tupawn a chhe lamin an hrevek tawh tlat alawm.


"Ka lo lut thei angem?" a ti a, ka phalna a hmuh hma hauhin bike aţangin a chhuk fel der tawh. Lu ka bu zeuh a, ka inher zui zat. Ka hnungah min zui a, kawngkhar kalhna ka hawn laite chuan zam tak ka ni. Ka hnungah a ding run a, ka hawn lawk theihloh phah.


A kalhna ka hawn hnu ah ka pawt hawng leh a, inchhunga kan inzui luh veleh "Lo ţhu rawh. Lehkhabu vel ka han la ang a, eitur ka siam ang che" ka tih lai pawn min en lovin inchhung uluk takin a en kual zawk a, kan nula zinlai a ni bawk nen ka nu in an thil in na ruak a lo dah mai mai ang tih ka hlau ru khawp mai. Lehkhabu la turin ka chhohsan a, an hotel ah khan ka awm rih theih chuan a ţha ngawt ang. Duhlo mahse pawisa pek luih ngei ka tum a, a thlawn ringawt a ka awm chuan nuam ka ti miah lo ang.


In hnuai lama ka chhuk leh veleh ka nu leh mipa pakhat a hming pawh ka hriat ngai miahloh thlalak lian tak in tar alo en reng a, ka nu hian a ngaihlu in midang tihfai pawh a phal lova, amah hian a hrufai hliau hliau ţhin. A rilru lakpen tumin aw ka thian kharh a, alo hawi veleh ka lehkhabu lak khai kan pahin "Ka hman tawh a" ka ti zui sep a, eitur ka siamsak miahlo tih ka hrechhuak lehnghal vat.
"I rilţam em?" ka ti leh hnuhnawh a, lu thin pahin thlalak lam bawk a hawi leh.


"He thlalak hi ka thlalak aipawn a duh zawk a, tikeh ila chu min that duh hial ang" a bula din pahin ka ti fiamthu a, "Ka nu nulat lai a nih hmel" ka tizui leh sep bawk.
"A dinpuipa nen hian eng inzawmna nge an neih?" a ti chang fak a, a dinpuipa chuan a kuah a, an hlim tih a hriat. Ka nu in hlim taka thla a lak lungawiloh hmel taka a en chu mak ka ti ru khawp mai.


"Ka hremiah lo. A tana mi hlu ber anih thu chiah ka nu in a sawi" tiin ka hriatdan diktak ka hrilh a, a ngaihven em em nachhan pawh ka hrechuang lo. Thlalak a enlaiin keiin amah chu chik deuhin ka lo en ve thung a, zan lama ka thil in vang nge pawh ka hrelo ka chauin ka lu a hai em em bawk. A sir lam aţanga ka en pawn a hmelţhat zia ka hmuh hmaih chuang lo. A hnar phei chu a sir zawng hian a nalh zawk mah amaw tih tur a ni. A sam duhdah taka tuai thur amaw tih mai tur te, palian leh pian nalh tak a nihna te pawh ka hmuh hmaih lo. A rawn hawi thut a, hawisan ka tum laiin "I hnar a thi" a ti sup a, a che zui vat bawk. Ka hnar ka hup vat a, a thi nasa lo aniang ka hrelo emai.


A awmdan ah zawn a nei tih hria in kan piah deuha drawer ka kawk a, ka kut ka lathla ngam tawh lo.
"Mu rawh" tih nghut pahin a hawng a, lapua lian ve tawk tak a lakchhuah hnu ah choka ah a lut tlang leh a, a hlauhthawn hmelin a chiai nasa a, keipawh a thuzawm in sofa ah ka mu hlan. A thi zui lo tih hre mah ila ka kut ka lasawn ngam chuang lo. Ka thisen a chhuah vang nge ka chau lehzualin ka hria a, ka mit pawh a phe ruai tawh. Mit ka chhing ta ringawt.


Choka aţanga a lo let thawm hre mah ila ka meng duh chuang lo. Thawm alo hnai zel a, ka mutna zawna a tawp hnu deuh lawkah dimte in ka kut min laksawn sak a, lapaw huh ni awm takin a hnar bul vel a rawn hru zui thuak thuak a, hetianga ngaihsak ka nih ngai loh vang hian ka mittui a hnai lehpek. Huaisen viau emaw ka intih laiin ka rilru a no viau tho mai. Ka vun a duk a awm leh zeuh ţhin tih loh chu insawiselna ka nei lo a, ka hnarthi pawh engahmah ka ngai lo. A awmdan hian min tihlau daih zawk. Reipawh kan la inhre lo a, ka hnarthi vang ringawt in a phili chuk a.


"Sangsang" ti a min koh ri chu ka hre ruai ruai a, ka hnarthi hma khan ka chau viau tho na a a thi hnu hian ka chau lehzual. Thi tlem a chhuak a, ka ngaimawh lutuk anih ka ring. Ka meng riai riai a, ka hmuh chian theih veleh a mitmeng fiah tak ka hmu hmasa ber a, a mangan hmel takzet bawk.
"A thi tawh lo em?" ka tih chuan a bu nghut a, "In entir la a ţhat ka ring. Inu hrilh rawh" a ti zui zat bawk. Ka hmuh tirh khan ngeng leh sualthiam ve tak a nih ka ring. A sual loh zia tunah hian ka hria, min ngaihsakna pawh hi a der mai mai a nih ka ring ta lo.


"Vawikhat hnar thi vanga in entir chu a ho emai. Min lo nuih ang. Ka nu phei chuan nep min ti viau ang" ti chungin ka nui lui a, a nuih a za ve hauh lo thung. Min entlang vek tum ni awm taka chikin min en a, ka zam em vangin thawk pawh ka thaw ţha ngam lo. Ka ban a pawt sawk a, engtiklaia awm nge pawh ka hriat loh duk lianpui lo awm chu min hmuhtir pahin "Hei hi i hmuhtir bawk ang" a ti leh bawk a, ka insum thei leh tawh lo chuan "Ngatinge min ngaihsak em em?" ka ti sep a, chhanna erawh ka hmu lo.


Ţhut tuma ka in bengkan ur ur laiin min lo nam mu leh a, ka inrin hma in ka phun chhuak sep nghe nghe.
"A thi leh palh ang" min en mang lo a tih pahin ka kut a vuan a, a hum zui vang vang.




DAMON'S POV


Ka hmuh tirh aţang khan a dâng ka ti tawh. A vun a no in a ngo a, tam tak phei chuan an hrelo ang. Anu leh kapa thlalak intar ka hmuh khan rilru mumal ka pu thei lawk lova, min enreng a ka hriat vangin a dinna lam ka hawi chauh va, a hnar aţanga thichhuak ka hmu a, Hmingthansangi anih vanga ngaihsak ka ni lo. Unau zinga sual bik, nu leh pa thuawih duh miah lo, min hauh changa runluih duh tlat chi ni mah ila puih ngai ka hmuh chuan ka pui ţhin. Min duh der ve tu te ka chhan na avangin thinlung vawt tak angin min ngai mai ţhin. A vawh loh zia hria erawh an tlem. Anni kha tihnat ka duh lo mai a ni.


Ka buaipui lai khan a ban duk ka hmu a, hmun hnih laiah a ni lehnghal. A ban ka hmuh khan ka ngaih a ţha thei tawh lo. Hman ţangkai tumin ka hel a, ka buaipui leh ta vak anih ber hi. Lawmthu sawi na ah ka ngai tawh mai ang. Party naah a ban hmer sak tu an awm a ni maithei tiin ka ngaihtuah leh a, in entir a duhloh chuan tihluih ka tum hran lo. A taksa ania, a thu thu ni rawh se.


"Ngatinge min ngaihsak em em?" a tih lai khan ka hman ţangkai duh vang che tiin ka chhang thei. Hman ţangkai mai mai atana a in phal ka rin loh vang leh min hua anga, ka hmang ţangkai theilo zawk ang tia ka ngaihtuah leh vanga ngawih chuh ka ni. Cindy cousin Afaka hmuhlaia ka bula awmtir reng ka duh. A tho tur ka nam mu leh a, a hnar a thi leh mai ang tih ka hlau. A kut ka vawnsak a, hmeichhe chaklo tak infiam nana ka hmang mai hi ka la inchhir ngei ka ring. Cindy neihlet duhna in min tur ut ut tho si. Rei a ni hauh lovang. Ka chhuah zalen vat thei ang.


"Muhil rawh ka lo veng ang che"
"Mahse ka nu te" a ti hman chauh va "Ka lo sawifel ang" ka tih sup hnu ah a thlamuan nan a nuih pahin dim te in a mit ka hup a, damlo thei a nilo. Hmeichhe hmelţha tak a ni a, tun a a nundan hi kalsan turin ka duh. Ka ngaihsak vang ni lovin ka nau in a tih ve mai ka hlauh vang zawk a ni.


A muhil lai ka thlir vang vang a, a mit a lungngaihna leh khawharna lang ţhin kha a chhing bo vek a, veng tura ka inpek vangin a thlamuan hmel bawk. In sum theilo in a chal ah ka fawp zeuh a, kalsan pahin Jason ka call zui zat.


"Ward round tur ka zui dawn nia, engmah ka tihsak dawn lo che. Nangmah lema ka chan pawn ka nu chuan min hrechhuak zel tih i hriat kha" engmah ka sawi hma hauhvin a rawn ţawng nghal zung zung.
"Jason hnar thi leh kut a duk awm vel hian eng nge in zawmna a neih?"
"Rawn haw rang rawh. Nilo hospital ah rawnkal la, engkim test nghal vek ang" a rawn ti leh hluai a, a ţhutna aţanga a din pah hluai ka ring. En nawm a siam mai mai ang.
"Keimah ka nilo"
"Tunge? Cindy ami? Abigail nge ka nu? Abi a damlo leh tawh mi?" a rawn tih leh chuan ka nuichhuak ta hawk a, phirpui hmeichhia ka nei tih ka hrechiah.


"Hmingthansangi" a reh zui vang vang a, harsa tih hmel taka a thaw hrawk ri chiah ka hre thei.
"Jason" ka ti leh a, ka nu a chhun khawp mai.
"Bialnu thar i nei ami? Tupawh nise taksa a pangai lo deuh hlek a awm chuan hospital a kal zel a ţha" a ti hmuk a, hmeichhe dang hming ka sawi chu a lungawi vak lo a ni. Cindy leh Damon te awmdun reng tura duh ber tu a ni miau a.
"Doctor inih chuan i chhungte leh i ţhiante ang bawk khan midang pawh ngaihsak rawh"
"Min zilh tihna mi?"
"A ni mai ang chu" ka tih hnu ah ka hmet tawp a, ka pa ka zawt mai ang.


Hmingthansangi hnen a ka let leh lai chuan alo ţhu at tawh a, a muhil reilo hle mai.
"Hospital ah kal rawh. Hmelţha leh damloh pawh a inrem lo" ka tih hnu ah a nui sak a, a biangsum a lang kalh bawk.
"Hmelţha min ti viau ah ka ngai tawh mai ang mahse ka ţha tak tak. Tun kha ka hnar thi vawikhatna anih kha. A thi nawn tawh lovang" awlsam zet a a tih chuan ka bu zeuh a, ka ngaihzawng pawh a ni lova, nawr luih theihna ka nei lo. A hriat miah lohin ka ngaihzawng lema chantir ka tum a ni zawk.


"Kal tawh ang. Ka nu in min hmuh ka duh lo. Mipa nen min hmuh phei chuan a thusawi tur i ngaithla ngam lovang" tih zat zat pahin a lehkhabu dahna bag bawk a ban leh a, a ban duk lai chiah ka lo en.
"I ţha tak tak maw?"
"Tehreng mai. Ka pi haw a hun tawh a, an in ah chuan naktuk ah ka kal mai ang" a ti leh a, thawmhnaw ni awm tak awmna bag kawh pahin "Thawmhnaw tlem ka la tel a, a theih chuan hotela awm rih chu ka duh tak tak a" a ti nuah nuah a, a inthlahrung ve a ni.
"Pawisa ka pe ang che u"
"A ngai lo" ka ti hmuk a, a hriat miah loh a min puih na hi min rulh letna a ni mai.


A bag pahnih ka khaisak a, a tam lem lo bawk a, a pahnih pawn a rit tham vak lo. Kawngkhar a kalh leh laiin bike bulah ka lo nghak a, a rawn chhuah hnuah gate a kalh leh thlap. Dr. Irene tih inziak bawk chuan ka mit ala lehpek a, kapa in a sawifiah thei ang. A thlalak hlut ngawih ngawih tu chu a hre khawp ang. Kan naupanlaia ka nu nen an awmhran chhan kha em mawni dawn le tih thlengin ka ngaihtuah hman a, ani hlauh anih chuan ka nu ti hrehawm tu fanu fiamkual hi pawi ka ti lo ang a, thiam ka inchan tir thei zawk ang.


Hotel ah ka hruai let leh a, kan thlen rualin khumah a bawk nghal thlawp. A awmdan te reuh hi a mak riau.
"I duh chuan i kal thei tawh ang. Min pui ţhin a---"
"I lawm" ka lo tih khalh a, nui hak chungin a mu zangthal a, a kawr a in hlim deuh a, Cindy aiin a nalh mah amaw tih mai tur a ni. A thik viau pawh hi a awm lo lem lo. Ka enreng tih hria in a kawr a siamţha a, kawngkhar a ri zui zat.


Tho vat chungin mangan hmel takin min en a, a hmel a phelh phang mai.
"Atea aniang" tiin hlauthawng lo turin ka hrilh a, Atea leh Abi bak an rawnkal vak lo. Zim te a hawngin ka dak hmasa a, Abigail ka hmuh chuan ka lawm lo khawp mai. Phone kengin a veitawn sek a, Jason nen an inbia tih ka hria.


"Eng nge i rawn tih?" ka ti khur khur a, rawn lut lo a haw vat turin ka duh.
"Bazar a ka awm laiin Jason nen kan inbia a, ka damlo leh tawh ah angai a"
"Haw rawh"
"Tu Hmingthansangi nge i sawi? Kawngkhar hi hawng zau rawh ka lut duh" tih pahin kawngkhar rawn pawh a tum a, a ban ka lo vai per.
"Haw tura ka hrilh che kha"
"Atea ka ko dawn" phone a hmet zui mawlh mawlh a, a call tak tak hma in a banrek ah ka hmer a, room aţanga chhuakin kawngkhar ka khar zui zat bawk.


"Sangsangi a ni em? Party naah in in hmu tih ka hria. I umzui ami? Chuan engtin nge a awm?" a ti zat zat a, ka ning khawp lehnghal.
"Hre tur a ka duh che anih chuan ka sawi mai ang. Ka mi hmuh lehzel buaipui suh u" fel viau mahse a luhlul zia ka hria. Ka luhtir hma chuan a haw dawn lo. Min en dan ah hian ka hmuthei.
"Ka ţhian anih kha. Ka ţhian chu eng nge a an ka hrethei lo mi?"
"Hnarthi satliah. Thildang a nilo" in her a luh leh mai ka tum chu ka kawr ah a vuan bet a, aw khur dar dar in "Ti na suh. I awmpui kha ka ţhiannu Sangsangi anih chuan tina miah suh. Ana tam tawk tawh" a ti tham ţiak a, a hriatchian hmel reuh hle.


"Cindy ila duh. Ka hrevek. Cindy ila duh reng chuan ka ţhiannu kha engatan nge itih?" a ti vin ţhak a, ka ruih a a pawi ka sawi pawn min vin ngai miah lo.
"Ana tawh sa anih chuan nat belh tur a awm tawh lovang"
"Ka ti tak tak. Hrehawm a tuar nasa, a hmelţhat vang ngawta kawp inih chuan bansan lehnghal ang che"
"Nang te hi" ka ti hman chauh tihin Atea a rawn lang hlawl. Jason ka be kher kher kha ka inchhir ta khawp mai. Ţullo deuhah ka buai phah ngei dawn a nih hi.


Kan dar ah min kuah ve ve a, nuisawng chungin min entawn zak zak.
"Hotel hi en nawm siamna tur a ni hleinem"
"Min thlah teh" tih nghut pahin a ban ka dahsawn a, naupangchhia anga en tur a ral ah chuan ka upa tawh lutuk.
"Abi min lo call a, ka lak khan in in hau thawm ka hria a" a call hman lo emaw ka tih kha a lo call hman tho anih dawn chu. Cheng chawng hian.


"Lo inrawlh lo ula ka lawm khawp ang. Kawngkhar chu in peih chen chen beng ru. Ka lo ngaithla ang" ka tih hnu ah Sangsangi an hmuh hlau tak chungin zim te in ka pawt hawng a, saisirin ka in zep lut. Abigail leh Jason ten an hria a, midangin an hre harlo ang. A ropui khawp mai.


Ka luh rualin "khawngaihin room hran a awl veleh min ngaihtuahsak rawh aw. I room ţawm reng hi nuam ka ti dawn lova, bakah awmreng na tur pawisa ka neilo bawk a, kanu laka ka lungawilohna te hi a zia deuh hunah ka haw veleh mai ang" alo ti nghal duah. Kan thusawi a hriat leh hriat loh ka hre lova, venthawn neih a duhloh vang a ni bawk ang.


"Aw chhuak vat rawh. Ka room hi midangin min ţawmpui reng ka duh lo. Riahna tur i neihloh vangin ka hawhtir che anih hi" ka din na lam a rawn thlek chho ha a, a rilru natzia a lang. Khawngaihna pawh hrethiam hlawm lo. Hmeichhia mahnia hotel a awm ngam ngat.


"Awle. Ka lo ngaihven dawn nia, ngaihven sak pawh ka ngai kher lovang" a ti veleh salh a, a thawmhnaw a ban nghal ruai. Ka insum a ngai tih ka hria, ka hman ţangkai duh chuan ka dawhtheih angai. Party na a a rui hmuh tur awm ve ziah, min zui haw chawt ngam, engpawh ka tih puiin ka tih tir thei ang.


"Hetah awm rawh" ka ti nghut a, a nui hmel phen ah chuan elhsen na a hmuh theih.
"I rilru iva thlak hma ve. Ka tibuai lutuk ang che. Hruai kual vel pawh ka ngai tawh lo. Ka chau a inhnial ka peihlo bawk. Keimahin ka in ngaihtuah thei" tiin min mamawh lohzia a lantir a, "Hotel dang awm lo pawh a nilo" a ti zui sep bawk.


"Inu lakah chuan ngatinge i lungawi loh?"
"Min hua a, ka haw bawk a, chuzawng chu. Zanhnih vel lek riahchhuahna tur chu a awm ţeuh ang. Lawmthu ka lo hrilh hma mah mah che a ni" a thaw hak a, chau tih hriat zet in a chal dawmin mit a chhing zui vang vang.
"I ţha em?" ka tih mek laiin ka phone a ri a, Cindy hming ka hmuh chuan ka nui suk. A che rang khawp mai.


"Thlakhat em pawh a ral hmain hmeichhe dang hotel ah i hruai nghal thei niin ka lo hria a"
"Thil harsa a ni hleinem" a reh zui vang vang, ala tih tawp loh vangin ka la vuan reng a, min rawn biak duh chuan lawm takin ka lo dawngsawng ang. Neihlet tumin hmeichhe awmţha duhlo satliah ka buaipui hrep phah tawh.
"I insiamţhat mai ka ring a, ka lo ringsual a nih hi. I hlim chuan a ţha a ni mai. Ka ţawngţaipui reng ţhin thovang che" a aw a khur dar dar a, a zawi sep sep viau bawk. Min be chhunzawm reng dawn emaw ka tih laiin a ti tawp ta daih. A bulţan na chiah ala ni. A rawn let khawp ang.


Hmingthansangi awmna lamah ka hawilet a, chhuata a ke dahreng chungin khumah a bawk a, zawi deuhin a kut a dah uai hnuang bawk. Cindy ka biak khan tukverh lam ka pan a, ka hnungchhawn daih vangin a chetdan ka lo hmu miah lo. Rang takin ka pan phei a, a kut ka vawnsak vat. Ala lum vangin ka thaw ve huai. Thi tura ka ngai pawh amak hrim hrim e. Nunna neilo ang maiin lawm a mut le.


"Hey muţha rawh. Zanin awmla naktuk ah i haw dawn nia" tih pahin ka sawi a, a damloh hmel emai enkawl tu tur 'nu' a mamawh. Ka thil tum ka ţhulh thei lova, damvat turin ka duh. Ka sawi chet reng hnu pawh a a harh theihloh vangin ka kuai zangthal a, awmzia a nei chuang lo.


Buaipui vak dan ka thiam lova, buaipui thei tur a rin ber pakhat chiah ka nei. Hmanhmawh takin phone ka hmet mawlh mawlh a, a la thei lawk lo lehnghal. Ka ţhianpa nikhaw hrelovin a awm a, a hnu lawkah natna hlauhawm tak a nei tih hmuhchhuah a ni. Henu hi ka hriatna ala reilo chung pawn khatiang kha a chunga thleng ve turin ka duh lo. Ka hman ţangkai duh vanga buaipui ah ka la indah tlat bawk.


A lak theih loh hnu pawn ka ti nawn tlauh tlauh a, Jason ka ringtawk lo. A ri a tawp a, a aw ka hriat chuan ka thaw hawk a.
"Ka Pa"



(Hmingthansangi awmdan hi ka u (cousin) awmdan ka hriat aţangin ka ziak a, min chhiarsak ţhin tu te hnen ah lawmthu ka lo sawi nawn leh pah bawk)


CONT....

---

BROKEN-4



Phun sep sep riin min ti harh a, hmeichhia leh mipa an ni. An ţawng zawih em vangin an thusawi ka hrethei lo a, Damon leh hmeichhe dang an nih ka ring. Ka thil hriat hnuhnun ber pawh Damon phone bia kha a ni a, ka mit sulh a, a thim mup mup kha ania, min enkawl tur koh a nei em maw ni le.


Ka meng riai riai a, ka mit phe ram ram tihfiah tumin ka khap fak fak a, chunglam ka hmuchiang thei chiah chu ka room a ni tih ka hrenghal. Ka muttheih loh changin zangthala mu in inchung ka en ngat ngat ţhin. Ka mutna ţhin hi ka hai thei lo.


Phun ser ser ka hriatna lamah ka thle a, engin min chhun khalh vangin ka hmuchiang thei lo. Ka harh tawh a ni tih hriattir nan thawm ka siam a, an rawn hawi rual nghal vat bawk. Khum bul chhuata ţhingţhit rawp pahin ka nu in ka kut a rawn vuan a, midang awmve pa chu ka mutna bulah a rawn ţhu thung. Ka en vang vang a, nelawm taka min nuih chiah chuan hriatchhuah ka nei. Ka meng kawk kawk maithei. Ka nu thlalak hlut taka a dinpuipa kha a ni. Thlalak ai chuan a upat tawh hmel na a a hmaifang leh a nui hmel, a inang lutuk ringawt.


"I ţhianpa pa anih hi" ka nu in a rawn tih veleh harhchhuak zawk ni awm takin min vawnna aţangin ka kut ka phih thla a, hepa awm lai chauha mangang leh min ngaihsak der hi a nih ka ring hmiah.
"Ka pu ngatinge hetianga ka awm? Ka taksa chakloh vang a ni em? Nidangah in sawiselna ka neih awm ka hre ngai lo a, nisa a ka awm nasat vangin ka hnar a thi a, ka ban ka tauh duk a, ka taksa chakloh vangin nikhawhre lovin ka awm tiraw?" ka sawi zo chiah chu ka thaw nghal hawk. Ka nu lemchan hmuhnawm loh tak hi bo vat se ka duh vang a ni. Ka ţha tih hria sela min kalsan vat teh se. A pasal thar khan an pindanah a nghak reng tawh ang.


"Chiang taka sawi dawt theih ka la neilo. Damdawi inah lokal la, test te kan ti ang a, chiang deuhin ka hrilh dawn che nia" a ti dam thluam a, ka kal miah lovang. Keimah avanga ka nu mangang hmel ka hmuh vawikhatna a ni. Lem a chang lo anih chuan ka awm thut dan hi thil ţha lam anih ka ring lo a, rilru natna tam tak ka nei reng a, ka neih belh zel lai hian thil ţhalo dang hriat leh ka duh tawh lo.


"Ka lokal ang" ka ti ban charh a, min buaipui tura heti chen chen lokal chu thudik hrilhlo mah ila a lawmna tur tal ka sawi angai. Damdawiin min pan tlang pui lo hi ka lawm a, damdawiin ka huatzia an hria a ni maithei.
"Na i nei em? Ila chau em?" ka nu in a rawn tih chuan elhsen zetin ka nuih khum chiam ţep a ni. Doctor pa hi awmlo sela chuan nuihsawhin ka ankhum chiam ang. Kan pahnih chiaha kan awm hunah a mize diktak a lang leh ngei bawk ang.


"I ţhianpa pawn ala nghak che" a tih mek laiin "Min chhuahsan rawh" ka ti bul hmuk a, a hmel pawh ka hmu peih lo. Ka pi leh pute nen lam tumah ka hmu peih lo.
"Sangsang khawngaihin......"
"Min chhuahsan rawh ka tih chu. Ka hmuduh lo che" ka ti nawn leh a, min ngaihsak derna awka vel hi ka hrepeih hlawl lo. Hreh hmel takin a chhuak a, kawngkhar a in khar phui chiah chu ka thaw huai. Eng ang pawn chau ila ka nu nen a awm ai chuan keimaha awm ka duh. Ka hmuh apiang hian a thil lo ti tawh min tina tak tak tu hi a indawtin a rawn lang zut zut ţhin.


"Inu nen hian in in pawh lo a ni maw? Ka sawidik em?" ka bu nghauh nghauh a, ka nu nen a an in laichinna hi ka hrechak khawp mai. An thlalak dun na ka nu in a hlut em em danah hian inzawmna engemaw tak an nei tawh ţhinin ka ring.
"Eng thilin nge inu huat tir che?" min tih chuan ka meng kual ralh ralh a, engkim hian ka nu min huat tir.


"I hrethiam lovang. Sawivek sen a ni lova, sawisen loh khawpa tamin ka hua" ti a ka hrilh duh nachhan pawh hi ka hrelo. A mitmengah ngilneihna ka hmuh tel vang a ni ngei ang.
"Damon nen a heta kan hruai che khan inah alo awm hlauh a, a hlauthawng takzet a ni. Thil chhe ber kan tawh hian nu hmangaihna alo langchhuak ţhin"
"A chhe ber ka tawk a mi? Eng vang chiahin nge hetianga ka awm nachhan hi? Doctor inia, rin lawk chu i nei tho vang. Ka nu takngial pawh a mangan chuan a chhe viau a mi?" ka ti mawlh mawlh a, ţha vek ni ila engmah test a ngai lovang.


Min chhan lawk loh vangin "Mawh" tih leh pahin a kut ka vuan bet a, ka ti che hret bawk. Min lo vuan let a, min en vang vang hnuah "Hriatchian phawt angai. Kan hriatchian veleh enkawlna i dawng anga, i ţha mai ang. Hlau suh Pathian a awm alawm" a tih chuan ka nui hul hak a, ka nu nen a kan inchhungah hian zawng vak mahse Bible an hmu lovang. Ka hriat theih tirh aţangin biakin ka kal awm ka la hrelo. Pathian thu pawh tlem tlem chiah ka hria, ka mangan ber laipawn Pathian kher chu ka beisei ngai lo. U nu-i hian min awm laiin biakin a min kalpui ţhin thu a sawi a, ka tet zual lai a nih vang nge ka hrepha lo. Ka nu in min indan pui a, school ka kal anih loh chuan pawnchhuah a phallo. Hnamdang awmpui kan nei a, chupawh chu inkhawm ngailo bawk a ni. Nu leh pa kaihruaitu ţha nei ve ila chuan hetiang hi ka ni bik lo maithei.


"Damdawiin a ilokal ka lo beisei reng ang. Damon khan min tur hmanhmawh vangin ka inring lawk lova, tih theih a tlem a, khawngaihin i hriselna ngai pawimawhin i lokal dawn nia" lu ka bu leh nghauh va, kal ka la tum chuang lo. Ka hlau ngawih ngawih a ni ber.
"Min mamawhna ineih chuan i duh hun apiangah min rawn ko dawn nia, ka lokal zel ang" a ti leh a, mak takin ka thlamuanpui khawp mai.


Reitak min awmpui hnuah min hawsan a, ka pindan chhung a reh nghal vek a, ka nu in min hmuh a tum ţhin a, ka duh lo. Chaw ka ei lova, zan thlengin keimahin ka awm. Dar sarih velah Brenda hnen aţangin call ka dawng a, chhuahpui ah min sawm a, kalna tur dang ka neihthu ka lo hrilh a, ka awmdan hi a hriat ka duh lova, tunah na ka nei miah lo bawk nen, ţul lova midang tih mangan ka duh lo. Pawn chhuah ka peihloh vanga lo hnar ka ni.


Ka lukham sira ka dah ka phone nghawr det chu ka la kang leh a, message a lo awm a, Damon min ka hmuh chuan ka awmdan a danglam. Ka lum deuh pup mai ten ka hria a, nilengin a reh vang vang a, ka beisei loh lutuk vang a niang.


[Ka lokal dawn nia] tih hi a rawn thawn a, min puih char char hnu a min ning ang a a awm leh te kha ka thinrim a, tunah pawh ka la ngai. Kan inhmuh a, kan inhriatna ala rei miahlo chung hian kan inzui nasa khawp mai. Chhang let duh lovin lukham hnuaiah ka rawlh lut a, mutthilh tumin mit ka chhing zui zat. Zantin chhuak ţhin chhuah loh thut chu khua a har ve veng veng mai. Ka hriat loh karin ngaiah ka lo nei hman a ni.


"Sangsang i ţhiante an lokal" ka pindan pawn lam aţanga ka nu ţawng ka hriat chuan ka tho kang zawt a, a tih tak tak ka ring miah lo.
"Lo luhtir mai rawh ka lo chhuak peihlo" tiin ka au let a, ka nu hmel ka hmupeih lo a ni zawk. A pasal thar a awm ve phei chuan ka rilru na ka chauh pui leh thei mai ang.


Kawngkhar a in hawng riai riai a, Damon a rawn lut a, a hnungah mipa pakhat ka la hmuh ngai miah lohin a rawn zui.
"Afaka anih hi" ti a min hrilh hnuah chupa lam chu hawiin "Sangsangi. A damţha lo a awmpui ka tum a, i duh hunah min kalsan mai dawn nia" a tih zawm zat a, chair pawt hnaiin ka khum bul set ah a ţhu nghal tharh. A ţhianpa erawh Damon hnungah a ding a, min enduh viau bawk.


"Nilenga rawn awmpui che ka duh viau na a ka pa a rawnkal tho sia, a ngaina takzet che in ka hria" a tih lai chuan ka lo thlek ha a, apa vawikhat ka hmuhna ania, ka nu ka tihdan zawng zawng nen, apa khan min ngainat ka ring miah lo. A fate ţhian ka nih vang leh ka nu fanu ka nih miau vangin min ngaihsakin min khawngaih anih ka ring zawk.


"Anih chu. Lo leng leh vat rawh se" ka ti ban charh a, khumah ke hlang a ka ţhut leh hnuah chair a rawn dah hnai lehzual a, in hmatawnin kan ţhu ran a, sawitur a vang viau thung.
"I loleng ve thung ang" ka buai hmel a hmuhin a nui hawk a, "Zanin chu ka awmpui dawn che. Nidang ka sawina anih kha" tiin a in sawifiah a, a ţhianpa chu ngaihsak nachang pawh a hre leh tawh lo. Rui hmel a pu lova, rim danglam engmah a awm lo.


"Damon ka kal mai ang. Min nghak tawh a, Sangsang lo dam rawh aw. Ka rawn kan leh ang che" zam hmel taka a tih chuan lo nuih ver ver pahin "Ka dam nghal" ka ti uang a, kalbik lo turin ka duh ru kher mai. Damon nen chauh a awm ka huphurh. Harhfim kar chung phei hi chuan ka zam ţhin tak tak.


"In a min dah kher loh tur ania, ka nu in a hriat phah a, a buaithlak vek" ka ti nang nang a, sawitur dang hre hek lo.
"Hotel ah ka pa ka ko a, in in ah kan kal leh. Inu ania, hriat a phu ber"
"Nu angin a awm ngai miah lo tih ka sawi tawhin ka hria"
"Aih i sawi miah lo" alo ti vat a, ka huatzia chu a hriat tho ka ring.


"Nih leh engvang nge?" ka ti leh a, min umzui reng chhan hi ka hreduh.
"Ka smart vak lo a, sawichiang teh" min nuihzat hmel deuha a tih chuan ka ngei ru khawp mai.
"Min ngaihsak chhan hi. Min pui a, min zui a, min hruai kual a, engvanga ti nge inih?"
"I bula ka awm duh vang" min chhang awlsam lutuk chu a awihawm loh zawk. A ţawng liam puat ni maiin ka hria.


Hmeichhia hi kan dilchhut aniang keipawn hriat zel ka chak tlat.
"Ka bula i awmduh chhan chu alawm ka hriat duh. Kan la inhmu tam lova, chuti chunga hetianga i awm hi ka hrethiam lo" ka ti ta zat zat a, ka vin hle bawk. Min fiam kual mai mai ang tih te ka hlau.
"Duhzawng chu kan umzui ţhin" awihloh lutukin ka lo nui hak.
"Ka fiamthu lo" a ti zui nghut bawk.


"I duhzawng ka nih ka ring miah lo. Min ring rawh, ka nundan avang hian mipa hian infiamnan bak min duh lo. Kawp tak tak tur chuan mifel bawk an duh" thutak deuhin ka ti leh ta zawk a, midang ang anih ve chuan nat chiah ka hmabak leh dawn tho.
"Ka fiah thei ang"
"Engmaw?"
"Midang ang ka nih lohna" a mit aţang hian a chhungril ber thlenga hmuh tlang vek theih ka chak. Fiamthu hmel a pu lo na a, a ti tak tak em tih ka hrethei tlat lo.


"Ka hrelo. Ka hrethiam lo takzet. Ka ruih laiin ka hmu che a, party naah lehnghal. Min hmuhsan vak ka ring lo. An tihziah dan a ni"
"I nundan a buai ve lo awmchhun ka nih dawn chu" a ti leh sup a, ka rit bur pawh a kiang uarh thei. Ka nundan a buai lova min pui thei tu alawm ka duh ţhin. A thusawi hi a ti takzet anih chuan ka tan hian ani aia ţha hi an awm thei lo. Zan lama a chhuak ve ţhin chu thuhran nise, chhungkaw ţha tak a nei a, a pian leh hmel thlengin ka duh chi vek a ni. Mahse thil a thleng thut thut hian min ti hrilhhai a ni.


"I bula ka awm chu i remti em? I remtih chuan ka awm reng ang" a ti a, "I nin thlengin" a ti tel pah lehzeuh bawk a, ka khawhar hnem tur khan ka ţhiante kha ka lo duhtawk em em ţhin a, Damon telh ve hi pawi ka ti ta lo.
"Ka hlim reng angem?" ka zawhna atthlak zia hria in hmui ka chip zui hmak. Hmalam hun hrethei a ni bik hleinem.
"Aw, ka ring" a ti tawi tak a, ka awmzel dan tur hi mumang lamah tal hmuhlawk ka chak ngawt mai.


"Ka enchhin ang che" ka ti ta nge nge a, ka remti ah a ngaih theih ang.
"Min enchhin dawn chuan ka awm reng a ngai anih chu" ka lo nuihsang a, ka rilru hahna pawh ka theihnghilh ve lek lek. A sawi anga a awm anih chuan ka la theihnghilh vat ka beisei.


"Zana chhuah a party kal te hi ka ning ka tih tawh kha"
"I kal tho sia"
"Duhthlanna ka nei lo" ka tih hnu ah ka thaw hawk a, ka in bunruah ve na hmun ber a ni.


"Ka pa hi a thih leh dam pawh ka hre lo. Ka nu lah fa a nei tih hre lek lovin a awm a, ka hmuh laiin zu a in a, a ţhiante a rawn hruai haw dul dul reng a..." tiin bul ka ţan a, uluk takin a ngaithla tih ka hria.
"A rui ţawng ri ngaihthlak ringawt te hi ka kham hluah hluah. Hmun danga awmsan daih duh chang ka nei ţhin a, ka nu anih miau vangin ka ngaihtuah tho si. Min ti hlim thei tu annih ringin ngaihzawng ka nei a, ka nu vanga ka mangan changa ka ruih ve ţhin vangin min thlauhthla leh ţhin. Min hrilh lawk miah lovin midang an lo kawp daih a, chuvang tak chuan ania enchhin phawt che ka duh" ka ti duah a, ka harsatna tawh ţhin zawng zawng ka hrilh kim duhlo zawk. Ka nundan ngaipawimawh lo angin a insawi bawk a, hei te lek hi chu hriat a phu a ni.


"Tupawn an hauh leh che chuan min lo ko rawh, chhan tur che in ka lokal vat ang" min ngai naupangchhia lutuk chu ka nuih te a za.
"Tehreng mai. I lokal theih dawn phawt chuan"
"Eng hunah pawh" a ti sup a, ka thinlung kehchhe vek tawh a ka ngaih min thawmţhat saktu a nih ngei ka beisei tlat a ni.




[Ka awm tawh] message ka hmuh rualin ka pindan aţangin ka tlanchhuak a, kailawnah ka tlan thla leh dawt dawt. Kawngkharpui a ka chhuah laite chuan min lo dan tum pawh nise tuman min dang hman kher lo ang.


Ni thumna a ni tawh. Damon ka zui tak tak aţanga ni thumna. Damdawiin ah ka la kal duh chuang lova, Abigail pawn min tur nasa, ala hlawhchham rih. College thlen hma thlengin min dah a, ka haw dawnah a rukin min lo hruai leh ţhin. Brenda ka la bum thei a, Abigail chuan engmah a sawi lo. Party naah ka kal ngai lova, zanah Brenda nen kan leng ngai lo. Damon a rawnkal ziah a, ţhian hrang hrang a rawn hruai zingah Afaka kha a tel ve ziah. An awm rei ngai lo a, a ţhiante bula kal ve lova ka hnen a awm a thlang ringawt pawh ka lawmin min ngaipawimawh ve tu hmu ta ah ka in ngai.


In kawp tak tak kan la ni lova, ka la enchhin rih a ni. Gate ka hawng rawp rawp a, bike bula a ding ka hmuh rualin a ban ka vuan chawt a, tlem a kun deuhin ka thaw hlawp hlawp bawk.
"Hahdam rawh ila tlai lo" ka hawichhuak a, ka hnar aţanga thil lum chhuak pup ka hrezui leh a, ka dara min dawm paha "I ţha em?" a tih laiin ka hnar ka hup a, a thi hunlo lutuk chu ka thinrim hlur ringawt.


Min pawm nawlh a, ka ţang eih lo. Ka insilfai loh chuan class ka kal thei dawn chuang lo. Inchhung lamah min pawm lut a, ka nu hmuh hmaa intihfai vat vat ka duh vangin inchhung kan luh rualin ka tal thla nghal. In hnuai a bathroom ka pan tlang a, kawngka khar ka tum laiin a kut a rawn rawlh a, a keu hawng leh.
"Khar suh" a ti sup a, hnial na hun ka neih tawh loh vangin ka inher a, tap ka herh haw hnuah ka hmai ka phih a, thinrim leh hlauhna nen, ka kut pawh a khur der der hial.


"Damon khawnge?.....ngatinge? A thi leh a mi?" ka nu ţawng ri ka hriat chuan ka ning nghal hluah hluah. Min ngaihsak der mai maiah ka la ngai tlat a ni.
"Kha towel. Vawin chu chawl hahdam mai rawh" tih pahin ka nu in min rawn kuah a, a kut ka lo bengsan rang khawp mai. A towel min pek erawh ka mamawh vang chauhin ka la. Zana ka chhuak lo te hi min ngaihsakna a lantir vanga ka lawm naah a ngaih ka hlau leh hnuhnawh.


"Kal ang Damon" ka hmai ka hruk zawh chuan Damon bawk ka vuan leh a, ka nu nen min entawn zak zak. Nuam lo a ti ve deuh niin a lang.
"Kalpui mai rawh. Rawn thlah leh thlap la aw" ka nu in a tih veleh buk nghut pahin min venhim tum ni awm takin ka darah min kuah a, "Ngaihtuah suh" ka nu hnen a a tih hnuah min chhuahpui a, pawn nisa lai kan thlen veleh min kuah reng chungin ka chal zawn ah a kutphah a rawn dah a, nisa ka mit hlangin ka en loh phah a, ka mit vai mum mum ţhin pawh a awm lo.




DAMON'S POV


Engtin nge ka puih let ve theih ang? Ka ngaihtuah nasa ţhin. Ka len dawnah Afaka ka hruai ve ziah a, Sangsangi ka ngaihsak dan vel Cindy a hrilh ţhin. Chu chu ka thil duh ber a ni reng chungin inthiamlohna in ka khat tlat thung.


A chanchin a sawi loh pawh ka farnu hnen aţangin ka hre ţeuh. Chhel a tihzia pawh min hrilh a, ti na lo turin min hrilh nawn mawlh mawlh a, ka chhuah dawn apiangin min chah a tih theih. Ka nu in damdawiin a hruai lui turin min nawr tlut tlut thung.


Ka insawi anga ka duh vanga umzui ka ni lova, ka hman ţangkai duh vang zawk a ni. Afaka khan hmeichhe dang nen min lo hmudun zawk sela chuan ani hi he ka infiamnaah hian ka hnuk lut lo tur. Amah hi ka duh ka hre lova, ka khawngaih tlat thung. Hmeichhe hmelţha tak a nihzia ka pha lo. A hmelchhiatpui te ngei pawhin ţha an tih ka ring hial. Cindy nen kan la in be fuh thei lova, in be ţha thei tawh ila chuan ka ti tawp vek tawh ang. Ka duh aiin ka lut thuk sawt viau lehnghal. Cindy aia ka ngaihtuah tam zawk chang lah a tam. Ka inthiam loh na hian amah min ngaihtuah tir reng a, ka ngaihven telh telh nachungin ka la pawm duh chuang lo. Ni reilote chhungin Cindy aia ngaihven nei thei ka ni lo.


Ka kawngah dimte a a ban rawndah kualin ka hnungah a bawk zawi hniang a, ka tshirt hak a pan vangin a taksa sa var pawh a hriat hle. A chau ngawih ngawih ni maiin ka hria. Ngaihţha tak a awm mai mai a har tawh a ni. Hospital-ah kal ila chuan an admit ka ring tawh. Rang vut vut lo mahse zawi zawiin a rawn lang dawn a nih hmel. A hma zawnga a hnar thi ngai miahlo pawh ni reilote chhungin vawihnih lai a thi tawh hi.


"I ţha ang maw?" tiin college kan thlen hnuah pawh ka la zawt.
"Aw ţha ang. Min ngaihtuah suh. Ka haw dawnah ka lo hrilh dawn che nia" a ti z*ng vah na a a meng ngui lap thung.
"Class i ţhulh hreh em?" ka tih chuan min en ha a, ka patea nen kan zin thut dawn a, zingah sawmna ka dawng ve chauh. Ka mi ngainat ber pawl anih vangin ka hnial ngai lo.


Min chhan lawk loh vangin "Atea nen naktukah kan zin dawn a, i chauh hmel thova, vawin chu mu hahdam la" ka ti kual leh duah a, college lam a thlir thla vang vang a, chumi hnuah ka lama rawn hawi lehin "Awle" a ti ve nge nge a. Kan intawn hma pawn class ţhulh a hreh ngailoh zia a sawi tawh. Ka la hre ran ve bawk a ni. A ngaiah bawk kan in phur let leh a, an inah anu a awm vangin hotel lamah ka kalpui thung.


Luh veleh a tihdan ngaiin sofa a a ţhu hnawk a, a bula ka ţhut ve a kan taksa a insik pawn ala sa vur. Hrethiam lo mah ila a chal ka khawihsak mawl ve tawp a, ka hmai ka khawih leh a, kei aiin a sa zawk.
"Khawlum lai chuan ka sa vur zel. I ngaih ti ţha lo ngawt suh"
"I duh chuan mu hahdam rawh. Ka tibuai lo ang che" a mitmeng fiah tak chuan min en vang vang a, sawi sual ka nei em maw ni ka ti hial.


"In cham rei dawn em?"
"Kar khat vel bak a nilo ang"
"Awle" tih pahin a kun a, a kut ţang a khal niap niap a, hmeichhe awmdan hi chu hriatthiam a har ţhin. Anu nen an inrem hleihtheih loh vangin in a awm a hreh a nih ka ring. Hotel-ah hian a awm thei reng. Harsatna engmah a awm lo. A hriselna hi ngaihmawh a ngai ber zawk. Amah chiaha a awm chuan thil pawi zawk a thlen ka hlauhpui ve a ni.


"Thil ka lo hawn ang che" kum thum zet ngaihzawng nghet nei ve tawh ah chuan hmeichhe biak thiamlo ber ka ni hial ang.
"Dam taka ilo haw leh chuan a ţha a ni mai" a ti sep a, a zawi reuh em vangin min rawn ngheng a, pawi ka ti hran lo. Kan inkar hi a ngai thutak lutuk ang tih ka hlau ber zawk.
"Ngatinge maw ka chauh em em zel ni?"
"Hahdam rawh" ka lo ti vat a, thildang sawitur a vang. A awmdan hi Jason leh ka pa an ngaih a ţha lo a, chu chuan keimah thlengin min nghawng anih hi. Dam leh vat turah ka ngai a, a hnar thi a reh vang vang te khan ka ngaih a ţha hman a, vawinah a ngai te bawk.


"Hmangaih inei ve tawh em?" min tih chuan "Aih" ka ti vat. Cindy pawh hi ka hmangaih leh hmangaih loh ka hre lova, nupa nih hma chuan hmangaihna a awm theih ka ring lo.
"Nei rual ini tawh mawle"
"Ka la nei ve mai ang" ngaihsam zetin ka ti liam puat a, vei nei vaklo leh luhlul ve satliah ni mah ila henu vang hian in ngaihtuah ngut ngut leh mahni in demna te ka neih ve phah a nih hi.an


"Ka kal hlanin lo in entir la, lo haw ka chak theihnan result ţha deuh lo nei rawh" tih zawngin ka thlem a, hmangaihna lam kha ka sawi chak tehchiam lo.
"Ka hrelo le" a ti sep a, ka hmuh hmasakber aţang khan harhvang tak a ni lo hrim hrim a, reitak natna alo pai ru tawh maithei. Ka ngaihtuah nasat chuan ka thil tum hi ţhulh leh ka duh rum rum ţhin. Infiamnan chauh a hman tum si hi amah hmuh huphurhna ka nei ngai lova, a bula awm hrehawm tihna ka nei hek lo. Zan lama ka chhuahpui ţhin te pawn ka chhuah loh chhan min zawt sap sap tawh. Dawt ka lo hrilh ţhin. Hmeichhia vanga chhuaklo nih ka duh bik lova, ka tel ve lohna chhan hi tlem te chiahin an hria.


Min delhna a rit tial tial a, a muhil tawh a ni ngei ang. Tih harh hlau takin ka pawm a, khumah ka mut ţhat tir a, a ban ka en nawn leh a, a la duk riai a, a vun a dâng lep bawk. Ka zinsan anga, ka hmu chhunzawm lo ang nge ka infiamna hi ka chhunzawm dawn ka hre ta lo.


(A tawi viau maithei. Ka hman changin a sei anga, ka hman loh changin a tawi ang hehe. Min chhiarsaktute chungah ka lawm e )



CONT...

---

BROKEN-5



Ka phone a rik veleh Damon a nih ringin ka en vat a, Abigail zawk a lo nih chuan ka hnual rawih. Vawiin hi a zin ni tur ania, hma takah thovin min lo biak hun ka nghak reng tawh.
"Abi" ka aw aţang chuan ka beisei loh zawk bia ka ni tih a hriat maithei.
"A insiam mek. Iduh chuan kan thlah dawn mi? Karkhat lai i hmu lo dawn a, in tih harh pah a ni mai. I thlah duh chuan lo insiam la, ka lo lam ang che" a rawn ti nghal mawlh mawlh a, ka thawmhnaw dahna lam ka melh nghal.


"Amah khan pawi a ti angem?"
"Teuhlo mai. Kan thlah ringawt dawn a, a lawm zawk daih ang" a rawn ti takah chuan ka thaw huai a, a kal hma a hmuh leh lawk chu pawi ka ti lo. Karkhat chu reilo viau mahse nitin inhmu kan nih vangin ka tan chuan a rei dawn. Ka khuahar viau ang.
"Ila awm em?" a rawn ti lang lang a, ka lo theihnghilh leh hman.
"Aw ka insiam dawn"
"Ka rawnkal nghal" a tih hnu ah a ri rawk rawk a, a tawp zui nghal.


Ka mutna thawmhnaw ka hlip a, darthlalang hmaa ka ding chu ka chau lehzual vek thei. Ka taksa ah duk thar a awm leh tawh a, ka hmaiah engmah ka la hnawih loh vangin ka mithnuai a val kual ruih bawk. Ka thil ei tuiloh vangin cher sa tho mah ila a hma aiin ka cher lehzual a, ni reilote chhung pawn ka tla kawk hman.


Kawr ban tlawn ka lachhuak a, taksa khuh tam apiang ka hak a ngai tawh. Ka taksa duk vanga midang ka tih mangan ka hlau a ni. Jeans ka ha leh tawp a, ka sam pawh ka ţawn ngam lo. Ka ţawn chuan ka lang cher lehzual a, thlah ila ka lang lian ve deuh. Ka hmai tih lan en nan eng eng emaw ka in tat kual a, ka zawh meuh chuan min hrechiang lotu phei chuan damţha pangai ah min ngai ang. Ka chau ngawih ngawih tih ka landanah a hriat loh. Damon erawh chuan a hrengei ang.


Reilote chhung leka min hrechiang em em tu leh ka bula awm tam ber, ka rilru chhungril ka phawrhchhuah ve ţhin na a ni. Ka chauh pawn ka awmdanah a hria a, min ngaihsak em em bawk vang hian ka tan chuan ngainat loh a har ve a ni. Zanah ka mutthilh hma zawng min awmpui a, zingah hma takah ka hmuh turin a awm lehnghal thei a, hetianga buaipui tu hi ka neih ve theih ka in ring ngai lo. Pathian thu hretam lo mah ila Pathian thiltih theihzia erawh an sawi ka hre fo. Ka chungah Pathianin a thil tih theihna a hmang a ni ngei ngei ang tih hi ka ngaihdan a ni a, hriatchian zel ka chak phah a ni. Chupawh chu Damon, midangten awmţha duhlo an tih ve ţhin vang chauh a ni. Mifel te vang chauhin Pathian kan hriatchian chak phah lova, misual kaltlangin keichuan ka hrechiang chak daih.


Ka chhuah dawnah ka nu ka hmu hman a, ka ţhat leh ţhat loh min zawt a, chhang lovin ka kalpel. Amah vanga ka rilru hahna ka taksa ah a langchhuak angin ka ngai hmiah. Ka rilru hah vanga chau ngawih ngawihah ka in ngai. Gate pawnah Abi ka lo nghak a, nisa hnuaia awm hi hrehawn ka ti thar em em. Ka chauh a ti zual a, ka vai mum mum ţhin. Damon nghak lova Abi zawk ka nghak daih chu ka awm thiam lo rum rum. Ka beisei tlat tawh a ni.


"Min nghak rei em?" lu ka thing ne ne a, a nuisang a, hmuh a nuam em em reng mai. A hnungah ka ţhu a, a kawngah ka kuah nghal zat.
"I muttui em? I khua alo har lawk anga i muthei lo ang a" min ti fiamthu a, a dara ka khabe dah pahin ka nui ve mai. A unaupa nen a kan chungchang a hriat dan ka zawt ngai lova, a hriat laia sawivak ka duh lo zawk. A zahthlak ve a, kan inkawp hi a remtihloh hial ka ring zawk a, thlah tur a min lo sawm te khan mak ka ti em em. A rilru ţhat zia hre mah ila hetiang taka hriatthiamna ngah a nih hi ka ring ngai lo. A unaupa hi ka ngaihtuah reng a, ka mumang thleng thlengin a inlar tawh anih hi.


"Airport-ah kan tlang dawn mi?"
"Aih kan inah kan kal phawt ang. Ka la insiam ve loh hi" a nuih hak hak laiin ka taksa a ţang ţeuh thung. Nidang ang chu nise ka hreh miah lovang. Mahse tunah chuan ka lai tlat tawh a ni.
"Tu tu nge awm ang?"
"An awm vek ang. Ala hma deuh a an la chhuak hlawm lo a, airport kal chu ala hmanhmawhthlak loh" a ti tak deuh deuh va, sawitur hrelo leh zam bawk siin chil ka lem khawlh a, ka vuan nghet sauh bawk.


"Zam duh suh. Kan inah chuan ka ute ho ţhiante pawh an rawn tlangnel. Kan awmna a fal deuh bawk a, len nan tak hian an rawn hmang a" ka hreh zia a hrethiam a ni chiang mai. Brenda tal lokal ve se ka ti rilru a, a rawnkal ve dawnloh zia ka hrechiang thung si. Gate chhunga kan tlan luh laite chuan bo daih mai ka chak a, ka ţhu nghet tawh lo. Damon ka hmu hreh a, ka nu awmdan a hrechiang tawh a, a chhungte hmu turin min duh ka ring lo. Ka insit em vangin ani pawn min zahpui ka ring a, a chhunte hmuh a inlan turin min duh ka ring lo. An in a ka kal hi a lungawi loh ka hlau a, ka kutphah pawh a thlan dap thei.


"Chhuk la, kan dahţha lawk ange. Hei hian kan kal dawn si lova" Abi-in a tih takah chuan ka chhuk a, ka khur der der ni maiin ka hria. Damon hian an in a kal turin min sawm ngailo. Hotel-ah hlir kan kal ţhin a, let leh mai ka duh rum rum. Ka hlauh ang ngeiin a rawn chhuak a, ka lo enţha ngam lo.


"Khawnge Abigail?" a tih chuan garage lam ka kawk ringawt a, a ţawng bung vak lova, ka kal chu a haw em em lovah ka ngaih phah a, ka lawm ru viau.
"Min lo biak hun ka lo nghak a" tih sep paha hawichhuakin a hmel ka en a, min hmuh vanga hlim hmel a pu miah lo chuan min ti zam thar leh.
"Biakna chhan tur che ka nei mi?" a tih chuan min ti hamhaih zawk.
"Nei love. Ka let leh mai ang. Nakinah ilo haw hunah kan inhmu leh dawn nia" ka tih chuan a nui hawk a, ka hrethiam lo a, ka en ngam tawh hek lo. Min nuihsawh ni berin ka hria.


"Jason ka nia" a tih leh takah chuan ka meng kawk a, min tihder anih ringin zam chung chungin chiang leh zuala hmuh tumin ka en nawn leh a, an mit, an hnar leh sam thlengin a inang.
"Kal ang le Sangsang. I kal tawh dawn mi Jason" a rawn ti zat zat a, ka hrilhhai lutuk chu ka in khawngaih zawk.
"Damon amaw min ti anih hmel. Min hai fo, nangmah chiah inih loh vangin zahna tur a awm lo" a nau hmaizah miah lo in a rawn kun deuh a, ka hmai bul set a min en pahin "Min enchiang la, chhinchhiahna i siam thei ang" a ti sup a, a fiamthu tih hre mah ila ka nui thei lo.
"Ka tihpalh" ka tih sep rualin Abi-in min rawn kuah a, ka zah em vangin ka ţahchhuak rum rum.
"Tih tlangnel itum dan a dangdai emai. Kan lo hrilh miahlo che a kan tihpalh zawk. Damon phir pui anih hi. Damon aiin a hmelchhe zawk a, chutaţang chuan i chhinchhiah thei ang. Chuan eng ti turin maw i rawn chhuah Jason?"
"Tukverh aţangin in rawn tlan lut ka hmu a, i ţhiannu hi ka fiam chak mai mai" zep miah lova a tih chuan ka lo ip chawih a, ka thinur thar thut. Min fiam a chak vang mai maiin ka hai theih turin a awm chawp ania, ka hmuh hmasak ber naah fiamthu thawh nan min hmang a, Damon chuan ka hmuh hmasakber aţangin min ţanpui.


"I fiam ţap ţep anih hi. Phir te hi chu an awm ang angin en tawp rawh. Lo kal rawh lut ang" a tih nem duam laiin "Ching tawh miah suh Jason" a ti chang bal thung. An in a ka kal kher kher hi ka tihsual a ni.
"Garage a i awm chhung ava rei ve. Buaina ka tawk hman ţep anih kha" tiin ka chhuahchhal a, Jason a awm hnai ta lo bawk a, ka ţawng vin ve ngam tawh.
"Ka dahţha nghal vek ka tih kha. Engahmah ngai duh suh. An sualthiam a, an rilru a chhe lo. Jason phei chu pawi a sawi lo lehzual" a ti zat zat a, inchhung kan lut zui bawk.


Kan thawm an hriat chuan an lo hawi ţhap a, hotel-a ka hmuh pa pawh kha a tel ve. Hmalamah kut ka suih a, tih tur ber ka hre lo. Kan inbiak lai khan an kal hun tur zawh nachang ka lo hre lova, zawt ila chuan an kal paha min lo lam turin ka ti mai tur. Damon ka melh zawk a, phone a bih run a, min hmu ang pawn a awm lo. Ka lo beisei sang ţhin tih ka hria. Ka dinhmun hre lek lovin hetah hian tel ve ka tum a, min lawm loh ka rin rualin a tak tak thleng tur chuan ka duh lo.


"Ka ţhiannu Sangsangi anih hi. In ti ti muk hmel emai room ah kan han chho ange" a tih lai mekin "Eng nge i an?" tih ri ka hre zui a, Abi nu ni awm tak chuan nuisangin kan lam a rawn pan. Thei tui ni awm tak hi tray in a chawi a, choka aţanga rawnchhuak ni awm tak a ni.
"Ka ţha lutuk"
"Ava lawmawm ve. I nawmsam loh chuan inu a awm remchan loh pawn min rawn ko hreh miah suh" a ti dam thlap a, kan pahnih chauh chuan awm ila ka kuah anga, ka in bunruah vek duh ka ring. Tlema rawn awmhnai in ka beng bulah "Ka fapa sawn ţhat a chhuah ka beisei. Rui lova hmuh ringawt pawh hi a nuam. Ka lawm e aw. Nangmah vang a ni ngei ang" a rawn ti sur sur a, awm hlat pahin ka hmuh tur ngeiin uang takin mit a siai zeuh bawk. Ka lo nui mawl ve tawp a, Damon hi enkawl harsa an ti a ni ngei ang.


"Nu i thil ken kha an in chak tawh ang. Sangsangi nen hian room ah kan awm dawn. Chawl hahdam rawh se" Abi-in a tih hnuah chauh a thil ken chu a hrechhuak leh a nih hmel.
"Lo leng ziah rawh" a tih hnuah an ţhutkhawmna lam a pan a, Abi-in ka banah vuanin inchung chhohna kailawn lamah min kalpui a, Damon en tumin ka hawi let hram. Min lo en ve chiahin a nui suk a, a phone a lek kang zeuh bawk. A bula ţhu hmeichhia chu tunge a nih ang tiin ka ngaihtuah leh daih. A sam a kirin a hmaifang a dik hle. A mitmeng a thip lek lek a, Damon chezia a en uluk hle. Mizo ka nilo pawh tise an awih thovang. Tupawh chu nise a hmelţhatna chu ka hmuh thiam dan a ni.


Abi pindan a kan luh rualin phone ka en nghal a, Damon hming ka hmuh chuan chawp leh chilhin ka nui hmel a lang nghal.
[I dam hmel deuh. Hmuh i nuam khawp mai] tih message ka hmuh chuan ka nui nasa lehzual. Ka nui ri ngam lo thung.
[Ka rawn chho ang] tih a awm bawk a, ţhut pahin alo chhoh hun ka lo ngaichang.
"Kan inbual lawk ange. Iduh chuan khumah sawn mu rawh"
"A ngai lo. Ka chau hleinem" ka ti vat a, Damon ka nghakhlel tawh khawp mai.


Rei pawh ka nghah hmain a rawn lut hlawl a, pindan chhung a melh kual laiin bathroom ka lo kawk va, hrethiam ni awm takin a bu zeuh a, ka bulah a rawn ţhu zui zat.
"Ka nu khan a ngainat hmel che. Min nei mai ta che" a ti uang a, tum bar chungin "I bula ţhu kha tunge?" ka lo ti thung.
"Kan upa ber. A zin ve thova, a cham hun tur a sawi ai hmain a rawn haw anih kha"
"Anih chu a hmelţha khawp mai"
"I hmelţha zawk" ka lo nui hak a, min fak hian nuam ka ti bik ţhin.


"Ka zin hlanin eng nge ilo tih ang?"
"College leh mut"
"Leh min biak"
"Ka sawi tum chiah" min biak loh chuan ka be hmasa ngai lo. Min nin mai ka hlau va, min biak hmasak hun ka nghak char char ţhin.
"A luhna a rei tawh em?" tih daih pahin bathroom a kawk a, lu ka thin veleh lo awm hnai lehzual in min fawp thut a, ka inrin lawk loh vangin a tir chuan ka hamhaih a, awmdan vak ka hrelo. In la hrangin kan chal a insik tir a, ka huaisenna zawng zawng sawmkhawmin keimah zawkin ka fawp leh. Ka tihdan avang chuan a nui deuhin ka hria. Kan vawikhatna a ni. Rui deuh chunga kan inhmuh pawh khan hetiang hi a thleng ngai lo. A tihdan chiahin a inla hrang hmasa zawk ah ka ţang ve thung a, kan in en a, kan nui leh ringawt ţhin. Ka lai ve takzet a ni.


"Ka nau chu awm lo sela kan kal hma chu ka thlah lovang che"
"Ilo haw hun ka lo nghak reng ang" ka ti veleh a, kan inhmuh ngun em vangin nikhat lek pawh a rei dawn ka tih tawh kha.
"Kar khat chhung lekin engtiangin nge hma i sawn ka lo en ang" ka ner nang hmel a hmuh veleh "I hriselna ka sawi. Ngai kawi suh"
"Engkimah hma ka lo sawn ang. I rawn haw veleh test result ţha deuh ka lo hmuh bawk ang che"
"Test iduh tawh maw?"
"Aw chianglo deuh a awm chu a ninawm mai mai. Keipawn hriat vat ka duh a" ka tih chuan a hlim hmel khawp mai. A hlim reng theih nan result ţha deuh hriattir ka duh. Buaipui ngai reng leh ti thlaphang tu nih ka duh lo. Hetianga ka awm reng chuan hnawksak ka ni vat ang.


Abi a rawn chhuah tak vangin kan sawi chhunzawm lo. Damon a hmuh chuan nui seih pahin "Ka reilo inti viau ang a" a ti fiamthu a, Jason nen a kan inhmuh dan a report nghal zung zung a, "Phuba a la" ti a Damon thusawi chu ka hriatthiam loh viau laiin Abi nuih a za em em thung.


Driver hruaiin airport kan pan a, an patea kha a hmaah a ţhut laiin keini chu a hnungah kan ţhu tlar ţham.
"Cindy in ka cousin thlah turin kan kal ve a ti" a phone en paha Abi-in a tih chuan Damon ka melh vat a, a hming ka hriatngai anih loh vangin an hmelhriat satliah ah ka ngai.
"Umm" tih ringawt in ngaihpawimawh loh hmel takin a chhang a, Abi hmuh lohah ka kut a rawn vuan a, kan inkarah a thukru. An unau hi ţhian ang mai a an awm chang a awm a, pianpui unau neih ve ka chak phah mahse ka tawrh ang hrehawm tuar ve turin ka duh hauh lo.


Damon nen a kan awmdun vangin kalkawng a tawi a, reilote ah kan thleng vat. Motor a din veleh kan chhuk sap sap a, chutah chiah chuan a ni ka la hmuh ngai loh bawk ka hmuh leh tak. Keimah ang lo takin a fel hmel a, Abi ang chi a nih ka ring. Nui ver ver chungin an bulah a rawn ding a, Damon chuan ka dar a kuah pahin "Sangsangi anih hi" a ti sup a. A nui hmel a ral riai riai a, kan thlen ve hun phur taka lo nghak tu lung ngaihna siamsak chu a hrehawm duh ngawt mai.


"Hei hi Cindy" a ti leh a, mi be zung zung chi ka nih loh vangin ka nui a, ani pawh in ngaihtuah harh niawm takin a hma ang chiah khan a nui veleh tawh.
"In in hmeh lutuk. Sangsang hepa hi a sual ania aw" tih pahin Damon a kawk zeuh va, chhan letna tur ka ngaihtuah lai mekin "Mahse a duh chuan midang zawng zawng aiin a fel" tiin a fak leh a, a hriatchian hmel khawp mai.
"Ka lo hrereng ang"
"Hrereng rawh. A sual vaih chuan min lo hrilh rawh, ka lo hau ang. Ni a sa sia, kal tawh rawh u. Mi kan nghak lawk a" a ti zung zung a, Abi nen pawh an in be luam.
"Kal ang, i luhai palh ang" tih pahin Damin chuan ka chhipah a fawp zeuh a, nuam lo ka tih viau laiin Cindy an tih chuan "In in duat bik emai" tiin min fiam zeuh va, mifel tak anih ka ring. Ka ring sual lo bawk ang.



DAMON'S POV


Kan thlen hlim aţangin Atean min chhuahsan nghal. Ka pa bulah hna vang anih thu a sawi a, kan thlen hnuah a bialnu hlui hmuh a duh vang chauh anih thu min hrilh. Upa tawh viau si hi ala hrat khut khut ania.


Cindy biak ka tum a, min be duh lo. A inpeih huna min biak a tum thu min hrilh a, a inpeih hun chu ka nghah leh a ngai dawn a ni. Sangsangi ka bia a, a khawhar thu a sawi a, ka lo hmu ngun mah mah a ni.


Nikhata chu nilengin hotel-ah ka awm. Atean min chhuahsan nileng leh a, zui ka tumin a phallo. A bialnu hlui thinrim reh hunah chauh ka hmu ve thei. Amah anga upa deuh tawh bawk anih ka ring. Sangsangi nen kan inbe reng a, tlai lam aţangin min chhanglet tawh lo. A chau a muhil anih ka ring. Ka chhungril hi pawm duh ila chuan ka ngai ve veng veng tih ka sawitheih ka ring. Mahse ka infiamna angah chauh ka la ngai lui tlat si. Tunah chuan a hlim hmel hmuh nuam ka ti em em ţan tawh. A chauh chang hian hmuh harsa ka ti ve a, a taksa danglamna pawh ka en tawp hian ka hrethiam tawh. Ka lo chik mah mah ţhin tih pawh ka la pawm duh chuang lo.


[Sangsangi hospital-ah kan kalpui a, an admit. Chanchin ka rawn hrilh zel ang che] ka nau thil rawn sawi avang chuan ka thin a phu dup dup a, mipa ka nih vang ngawtin ka chiai lo thei lo. Chanchin zawh chian tumin ka call a, ala thei lo. Tihngaihna dang a awm loh vangin ka nu ka be ta ringawt.


"Sangsangi eng nge a an?"
"College ah alo tlu a ni awm e. Tunah chuan a harh tawh an ti. Nangmah i ţha maw? A lum em?"
"Ka chanchin sawi hun a nih loh hi"
"Min vin ziah suh" a rawn ti ve hlar. Hetianga a awm apianga buaipui tu ka nih vangin ka awmloh laia a lo tlu chu ka mangang ve a ni. Ka nu lah hian sawitur leh zawhna a ngah thei si.
"Tunge awmpui dawn?"
"I nau in. A nu pawh a awm a"
"A nu a ngainat loh em kha"
"Ka hria Damon. Mahse a nu ania, an in mil a ngai. A theih chhung chu inau awm rawh se. Thil i ei tawh em?"
"Aw"
"Min chhang hmuk hmuk suh. I rilru buai mahse inu ka nih hi aw"
"Thil ka ei tawh e. Ka ei chi hrang hrang i hretel vek duh em?" runluih nan ka ti leh kher.
"Duh lo. Min ngai em?" a nui zui hak hak a, ka ti tawp zui hmak. Atea hian thil pawimawh tak a tih dawn loh chuan haw vat ka duh. Ngatinge ka lo buai viau ni? Ka infiamna anih thu ka in hrilh nawn leh a, ka hlauhthawn na a reh chuang lo. Ka ţhianpa nen khan an awmdan a in ang chiah. Chu chuan hlauhna min pe nasa lehzual a ni.


Zankhuain Sangsangi ka be lova, a hmuh turin thu tam tak ka hnutchhiah tho. Anu ang mai alawm ka nih le. Ka insum a ngai a ni. Hmeichhe hmelţha satliah anih hi, i duhzawk chu Cindy tiin inhrilh mah ila awmzia a awm chuang lo.


[Test kan ti dawn. Lo ngaihtuah suh. A nu nen an in hau bawk nen, a inpeih hunah ka rawn biaktir ang che] ka thawh veleh a ka nau rawn thawn ka hmuh chuan ka thinrim nghal ţun. A fanu damlo chuan engpawh sawi se ngawi mai mai tur anih laia lo in hauh pui kher. Hmeichhia chu nilo se Sangsangi lawm nan vawikhat tal ka sawisa hrep mai tur. Haw vat ka duh rum rum laiin result ka hriat hma chu haw loh pawh pawi ka ti lo. Helaia ka awm ai hian amah ka hmuh phei chuan ka hlauthawng lehzual ang.


Nilengin ka nghak a, chanchin engmah ka hrelo. Atea lah hi ka bulah a awm hman lo tluk a ni. Leng ve turin min hrilh a, phurna ka nei lo. Ka infiamna mai mai ka ngaihsak em em hi fel ka in ti khawp mai. Kan awmna a inhlat hi chuan in ngaihtuah ana a, Abigail lah hi phone call a la duh ngai miah lo lehnghal. Message tawi te te a hnutchhiah a, zawhchian theihin a awm lo. Ka nu zawt dawn ila ţullo deuh deuh a sawi leh duah ang a, ka rilru buai viau lo sela chuan ka ţhian hluite ka hmu ang a, party nen nuam ka chen thei mai tur. In thiamlohna awm ve sek vang pawh hian ka eng tih mah a tui lova, mihring chut tak leh fel ber ang maiin hotel-ah ka tawm hlawm reng a nih hi.


Zanah, ka beisei loh deuhin min rawn call a, ka lak rualin "I ţha em?" ka ti nghal. Ni hnih chhung amah ngaihtuah reng rengin hun ka hmang a, lawmthu sawi a ba.
"Min ngaihtuah suh. Test ka paltlang tawh e"
"Ana em?"
"Aw na lutuk" a ti zuai raih a, ka khawngaih angreng. Ka ţhianpa khan na a ti viau va, ka pa in test theih tur a sawi khan a na dawn tih ka hria. Abigail talin alo enkawl ţha ang chu. A dam leh vat tur thu hrilh ka chak takzet a ni.


"Ka nu nen kan in hau leh a"
"I awm a nawm loh phah dawn chuan sawi duh suh. Min lo biak tawh hi" ka ti ve mai. Min lo biak loh rei vanga insawifiah tum aniang.
"Min ngaihsak der ve sek hi ka ning. A ngaihsak ka duh loh vangin kan in hau alawm. Min ngaihsak a tum tawh lo a, mahse a lokal leh tho" a ti melh melh a, ka hriatthiam ve zawng a ni lo. Hmeichhe rilru ka hrethei lova, a no ve zia erawh ka hria. Ka nu hrilh se sawipui dan a hrezawk ang.
"Lo in hau tawh suh u. I dam hunah kan lenbosan daih zel dawn nia" tih phur tuma ka tih laiin a thaw halh a, a beidawng ang tih ka hlau khawp ang. A damlohna hi sawichhuak reng tur ka ni lo mawle.


"Hospital aţanga chhuah hi ka duh. Ka muhil char char a, ka harh veleh Jason ka hmu a, nangmah emaw ka ti lehpek a" a tih hnu ah a nui hak a, a chauh hmel viau thung.
"Ilo kuah vel lo maw?"
"Ka kuah hman ţep a"
"Ilo kuah chuan ka lungawi kher lovang. Keimah ka ni dawn si lova, kei chu i duh hun apiangah min kuah thei ang" tih hlim tum a ka thusawi chuan inthiamlohna min neih tir leh a, dawt pumhlum erawh a ni lo.
"In in ang ngawt mai"
"A rualin kan piang miau va"
"Nia...chuan in cham belh lo ang tiraw?"
"Atea thu thu a ni mai. Nuam a ti khawp mai" ka tih mek laiin a rawn tum lut bur. An in be ţha hleithei lo a ni phawt ang.


"An inbiak ţhat hma chu min hawpui a tum hmel si lova, tuna a hmel hi rawn hmu la chuan cham belh hret turah min ngai maithei" ti a Sangsangi ka hrilh laiin hmui phunin 'inu ami' a rawn ti a, Sangsangi thusawi ka ngaihthla leh tawh zawk.
"Nuam inti dun awm mange" a ti sep a, a lungawi chiah lo a ni.
"Nuam ka ti lo. Ka ngai che a"
"Nangpawh ka ngai che"
"Muhil rawh. Naktukah rei deuh kan in be dawn nia" ka tih hnuah min mangţha ve mai. A chauh hmel khawp mai. A taksa a danglamna awm a ngaihthah rei a ni maithei. Hetiang rum rum a a awm nghal hi mak ve deuh a ni.


Phone ka tih tawp rualin Cindy message ka hmu zui zat.
[I bialnu hospital-ah a awm ami?]
[Aw. Buaina inei mi] tih ringawt in ka chhang. A duh hunah chiah min bia a, ka duh hunah biak theihin a awm ve lo.
[Zanin ah ţhianho a biakin a ţawngţai tura kal kan tum a, ka lo ţawngţaipui ang] mak ka ti lutuk chu ka zuang zawk lo chauh a ni. A fel tak tak nge a in ti fel pawh ka hre lo. Zanlaia biakin a kal ţhin pawh ka hre love. Airport-ah a thik zia hmuh theihin a lang a, a ţawngţaipui tur thu a sawi leh a, ka haw takzet.

[I hlimna hi ka buaina a ni. I hlim leh hlim loh ngaihven reng reng hian ka buai anih hi. Sangsangi vang khan i hlim a, dam turin ka duhsak ve a ni] za lo deuhin ka nui hawk. Neih let tumin hmeichhe dang ka umzui a, a chaklohna leh mangan lai remchangah la in ka hmang ţangkai a, he hmeichhe mawl lutuk hian ka hlim naah ngaiin in mihran hlen hial a duh tak hi. Lemchan ka thiam viau a ni ngei ang. Sangsangi hian ka thil tum hi hre ta se min ngaihdam thei kher lovang. A hriselna thlengin a tawrh ka ring. Ngaihtuah chiang mang lova thil ka tih vanga thleng a ni.
[Engkim ka pawm thlap tawh. Ka na lutuk a, kan inţhen hnu lawkah midang i nei lehnghal khan min ti na. Mahse Pathian hnenah ka thlen a, ana zawng zawng min laksak theih loh pawhin min tih nep sak turin ka dil. Sangsangi nen ka hmuhdun cheu pawh khan nui thei turin chakna ka neih phah a ni] min ţhen tu zawk a nihna hre duh miah lovin a rawn ti leh. Amah ka neih let duh vanga in siamţha turah min beisei a, ka nun ţhin dan zawng zawng aia ţhalo zawk ka tih phah a nih hi.



Atea te an inbe fuh hleithei lova, haw turin ka nawr nasa. Luhlul chi anih vangin a duh tlat lo. Hmeichhia vang mai mai a hetianga kan kal leh kan cham hi ho ka tiin ka hne tawh. Ka pa ka hrilh dawn em maw ni ka ti rum rum tawh. Sangsangi ngaihtuah lo ila chuan Atea aiin haw ka peihlo zawk ang. Tunah chuan haw duhna in min tur ut ut tawh. Kan cham tur aia tam kan cham tawh. Vawikhat pawh hotel aţangin ka la penchhuak ve lo. Zana a rawn haw lah hian a hmel leh rim a diklo ziah. Ka pa ai pawn ka ngaina a, naupanlai aţangin a bulah ka awm chawt. Ka duhzawng chu ning chung chung pawha min tihpui reng peih tu a nih vangin a thu hnial ka hreh phah a, ka sual changa ka pa in min hauh pawh a ka thlavang hauh ţhin tu a ni. Ka nu leh paten rui suh min tih laia rui mahla fimkhur rawh min ti ţhin tu ania, hmeichhia vangin kan zin a, hmeichhia vang bawka haw leh thuai thuai duh ka ni.


Atea a chhuak leh a, nidang aiin a chhuak tur a phur a, kan haw theih vat ka beisei. Chhun lai anih vangin Sangsangi a mutthilh ka ring a, phone khawih reng mah ila ka be lo. Ka cham rei hi a lungawilo hrim hrim a, a rul tawk bakin min chhanglet ngai lo. A damloh miau vangin ka dawh hram hram rih. Damlo khin ur ur chu ka ti ve deuh. Abigail message rawn thleng chu ka enchak lo khawp mai. Sangsangi chungchangah bak min rawn be ngai lo. Thu ţhalo dawn ka hlau a ni ber.
[Thisen cancer. Thil dang test leh an tia, amah hian a duh tawh lo. Kan la hrilh lova, hriatchian lehzual nan a test leh ka duh a, a bulah ka sawi ri ngam tawh lo]
Sangsangi chungchangah dawt a sawi dawn lo. A nui hmel te a rawn lang zut zut. Ka infiamna hi ka tih tawp a ngai a ni. Sangsangi chuan result ţha tak nen ka haw min lo hmuak thei dawn lo anih hi.



CONT...

---

BROKEN-6



Damon lo haw ni turah hospital aţangin ka chhuak ve hram e. Apatea pawh a thil tum a hlawhtling a nih hmel. Thil thleng zel tur erawh a hrelo. Min test na kha result ala chhuak lo a, a chhuah hma aţangin a dang test leh turin min duh a, ana em a ka duh tawh lo. Tunah pawh an test tawhna hnu hma kha ala na ut ut reng mai a ni sia. Ka ngam tawh ngang lo. Tuman min ti lui theilo bawk ang.


"Hmuak lo mai ang aw. Lo haw tur an ni tho va, in in ah a lokal dawn" tih pahin Abi-in bag ah thawmhnaw a khung mawlh mawlh a, kan in a haw pawh ka peih tawh lo.
"Hmun danga awmna tur awm se a ţha tur"
"I haw ngei angai alawm. I haw anga, i dam chian hma chuan i mu hahdam ang" thupe aw takin a ti a, ka nu leh a ţhiante ka hmu peih lo a ni.
"Brenda hi a lokal ve dawn em?"
"Ţhian dang a nei. I damloh thu ka sawi ngun. Ka rawnkal ang ti rengin a rawnkal duh lo. Be miah suh" a ti hmuk hmuk a, dam vat tur a min duhna ţawngkam tlem te pawh ka la dawng lo. Min kawm peih tawh lo a ni ngei ang.


Discharge card la tura Abi kal hlanin ka pi ka call a, ka damlo bawk nen an in a awm min phalsak se ka ti a ni.
"Hello?"
"Pi khawngaihin khalamah khan ka awm thei angem? Ka chau ngawih ngawih zel a, kan in lam boruak ka tawng peih rih lo" ngen ngawl taka ka tih hnu chuan a reh vang vang a, a phallo mai dawn a ka rin laiin "Lo haw rawh" a rawn ti hlauh a, ka lawm ngei mai. Ka nu hnenah ai chuan ka pi te awmpui, min awm ţhintu U Nu-i bula awm ka duhzawk a ni. Ka pi leh pute ka thlakhlelhna a bo tawh a, U Nu-i ka ngai em em thung.


Abi lolet veleh ka pite in a ka kal theih tur thu ka hrilh a, lawmpuina min hlan rualin mask min pe. Ka en he haw a, mask a ţulna ka hrevak lo.
"Vuah rawh. Hospital chu natna hrang hrang nei an ni sia, in ven a ţha" a tih takah chuan khum aţanga chhuk pahin ka vuah pah mawlh mawlh a, Damon bula awm reng ka chak tawh bawk nen, natna hrim hrim pumpelh ka duh tawh a ni.


"Hetah hian inu a thawk ţhin a, ka pa te nen an thawk ho ţhin. An admit hnu che khan ka nu in min hrilh" tih luam pahin bag a ak a, a khai bawk. Puar viau mahse ka puih a duh lova, laksak luih tum pawn a theih loh.
"Ipa leh ka nu inzawmna hi ka hrelo"
"Ţhianţha tak an ni ţhin. Mahse nupui pasal an neih hnu chuan an in hmu reng thei lova, rei deuh chhung chu an in be tawh lo. Pathian ruat ni awm takin i damloh khan Damon khan ka pa a be hlauh va, in in ah an hruai cheu a, inu nen an inhmuh leh phah a, ka lawmpui tak tak a ni" a ti siam siam a, ţhian ni lovin nupa lo ni zawk sela chuan pa ţha tak ka nei ni mai tur.


"Khawvel hi chu a zim anih hi tiraw? Ka unaupa nen inzawmna innei a, inu leh ka pa ţhian an lo ni bawk a" ti a min zawh chuan chhan dan tur hre lovin ka nui ringawt. Ka nu in ţhian pangai leh fel a neih ve ka lo ring ngai lo. Motor kan thlen hma zawng a ti ti char char a, awmlo sela chuan hospital hi ka ning lehzual ang. Abigail vang chauhin ka nuih reng theih phah a ni. Keimah vangin class a ţhulh nual a, kal luih tir chang pawh ka nei. A nu khan min rawn tlawh zeuh zeuh a, an chhungkaw chungah ka lawm khawp mai.


Ka pite in kan thleng a, ka rin aiin min lo lawm phian. Ka pu pawhin min lo be luam a, ka duh chen chen ka awm theih tur thu an sawi. Ka pindan tur an lo siamfel sa vekah kan lut a, ka inbual zawh hnuah Abi-in thawmhnaw a dahfel vel puih ka tum leh a, a duhlo nasa mai.
"Ka inthlahrung ve a, ka pui ve duh che"
"Mu hahdam rawh. Ţhian karah inthlahrunna tur a awm lo" a ti leh tlat mai bawk a, duh viau mah ila ka tilui thei chuang lo.


Khumah bawkkhupin phone ka hmet eng a, tihtur dang a awm ngang lo.
[Ipite in ka va hreve lo ve] ka harhchhuak thut. Damon kha ka pite inah ka la kalpui lo tak e. Thawh ka tum lai takin Abi-in damdawi mum leh tui min rawn pe a, ka eipeih lo chu ka ner nang nang a, "Ei nghal tur a nia" a tih vang chuan muangchangin ka ban. Ka awm mai mai chung pawh a ka chau reng hi mak ka in ti. Ka chhungril thleng hian a chau em em vekin ka hre mai. Damdawi ka ei zawh ah Damon bia a ka pite in hrilh turin ka ti a, ka thusawi a zawm awlsam ber a ni ngei ang.


Ka mu leh a, mut reng takah chuan mutchhuakin min zem chiai chiai a, Damon pawh ka lo nghakthleng zo leh dawn lo anih hi.
"Abi alo thlen veleh min kaitho rawh aw"
"Tehreng mai. Tui deuh khan mu phawt rawh" a ti a, lehkhaphek kenga a thleng vang vang lai chu phe ruaiin ka hmu a, min awmpui reng ţhin tu chu han kawm ve a, ti ti pui ka duh ve mahse ka chau em a, ka meng peih ngang lo a ni.



"Airport a i awmdan kha ka hrethiam. Cindy runluih nan a Sangsangi i ngaihsak der vel a" Abi thusawi ka hriat ruai ruai lai chuan ka ţang ţeuh a, ka la muhil nghet viau ah a ngai ani ngei ang.
"Sawi tawh suh. Chutiang engmah a awm lo" Damon pawh a lo let tawh anih ngei dawn chu. Hmuhchak viau mah ila ka ngaihthlak duh avangin mit ka la meng ngam lova, thawm ka nei ngam hek lo.
"Ka hrechiang che. Cindy hrehawm ti hmel ihmuh a i lawm hmel te kha ka hmu vek. Chhan awm lovin inau ka nilo tih hre rawh. Khang zawng zawng vang khan chanchin ka rawn hrilh ţha peih ngailo che. A pawimawh chin chiah ka rawn sawi. Cindy vang chauhin Sangsangi hi i hnaih tiraw?"
"Duhtawk rawh ka tih chu Abigail" ti a Damon a rum hrawk lai chuan a hmuh lohna lam tur bedsheet ka ţham khawm a, ka hik mum mum hialin ka hria. Min ngaihsakna kha hmeichhe dang vang chauh maw? Kha hmeichhe fel tak kha.


"Sangsangi awm ve lo sela chuan i chaklo ngawt ang. Inau nih pawh a zahthlak. I rilru tenawm zia ka hre miah lova"
"I duh leh i ngaihdan apiang sawi ringawt suh"
"Ka hmuh dan ka sawi a, a dik bawk tih ka hria" Abi in a tih chan fak lai chuan thawm ka nei a, a reh zui vang vang. An in hauh nasat chuan ka natna tizual tur thil dang ka hriat tel ţeuh ka hlau a ni. Tunah hian engtia awm tur nge ka hre lova, ka rilru pawh a mang vek. Hau hrep duh mah ila sawitur ka hre rih chuang lovang.


Ka hmuh chak ber kha tunah chuan hmuh ka hreh ngawih ngawih tawh. Rilru tihnat nan hian hun rei a ngai lo, tihdam leh erawh thil har tak a ni thung. Hun pawh a duh rei viau ţhin. Chak lo deuh chungin mit ka meng riai riai a, ka mutna piah deuhah an unau in hrehawm tih hmel takin an ding. Ka awmdan aţangin an thusawi ka hre hman tih hria ni awm takin Damon a tawlh hnung hret hret a, min hlat mai lovin a dik lohzia min hrilh se ka duh. Mahse chutiang chuan a ti lo, mit khap kar lehah ka hmuh phak loh ah a awm lehnghal anih hi. Ka lo ngaih ve tawh tehreng nen.


Ka nun chu hetiang hi a ni mai. Ka mutthilh lai hi ka hahdam ve lai ber a ni. Ka harh a, nikhua ka hriat hian natna chiahin min hmuak ţhin. Mutthilh hlen daih chak chang ka ngah ţhin.
"I hre hman em?" tia min zawh pahin ka bulah Abi a rawn ţhu a, min hnem na ni awm takin ka kut a vuan pah.
"Aw a tawp lam chu. In sawichhuah dan chu hre hman love" ka ti thawp sap a, ka aw pawh a ri chhuak theilo ţep a ni.
"Damon aiawhin ngaihdam ka dil. Ka sawichhuah kher kher avang khan keipawh min ngaidam rawh" a tih tak tak zia ka hria a, hrehawm a tihzia ka hmu bawk. Thiam a inchan tir theih nan nui lui chungin "A pawi lo. Ka haw hleinem" ka ti sep a, ţah vak vak ka duh a, ka ţap thei silo. Midang ang bawkin Damon chuan min lo bum ve reng a lo ni. Ni tam pawh ala liam lo a sin.


"Chhel deuhin awm rawh aw Sangsang, na ineih pawn hneh tum tlat rawh. I chauh deuh pawn in ti harh la, engkim hi hneh vek rawh aw" tiin min ngen lawm lawm a, ka thei ngei dawn tih ka tiam thei lo. Damon, a unaupa ngei vangin ka chau hluah hluah a nih hi. An sawi lai khan tui takin la muhil ila ţha mai tur.


Tlai lamah min hawsan a, U nu in min vil chawt thung. Ka thawh a phal lova, ka mamawh tur apiang ban kualin a che reng a, ka inthlahrung letling zawk.
"I pian hlim hian i lian lutuk a, hmelţha tih i hlawh bawk a, tupawn an lawm che" a tih chuan ka nui sak a, pian ţhat leh a, len theih loh ka chak rum rum. Tunah chuan min lawm tu pawh ka nei tawh lo. Ka ţhianţha anga ka ngaih Brenda pawn a duhzawng ka tihpui theih loh hnu chuan ţhian dang a zawng a, ka tello a a hlim theih zia a lantir mek a ni.
"Ka muttir dawn che hian ka ţawngţai ţhin a, ka tih ang hian ilo ti ve ziah a"
"Thil mak tak a nih chu" ka ti sap a, ka nu nen hian kan ţawngţai dun ţhin awm ka hreve lo.
"A mak reng reng lo. Naupang inia, ka tih ang khan i thiam ang angin iti ve a ni mai. Ka zirtir leh dawn che mi?"
"A ngai lo" rang lutukin ka lo ti hmak a, an biak ţhin Pathian hian min hmangaih ve ka ring lo. Min hmangaih ni sela ka hlim ve em em ang. Ka mi tawn te apiang min ti na tu ah a siam vek zawk.
"I inpeih hunah kan la ţawngţai dun leh dawn nia, thlamuanna tam tak inei thei ang tih ka tiam che"
"Eng mahin min thlamuan thei lo. Abi leh nang chiah hi thinlung taka min hmangaihtu awmchhun in ni. Na tur hrim hrim a piang ka nih hi" beidawng tak chungin ka ti a, ka natna min tihdam saktu tur ka la beisei reng tho mai. Ka damchhung hi chuan beidawn na leh beiseina hi ka nei tawn zak zak reng mai dawn anih hi.


Kawngkhar a ri rak a, U Nu-i nen kan hawiphei a, pawr phangin Damon a rawn lut. Khua a thim tawh a, nidanga min awmpui tura a lokal hun vel chiah a ni.
"Lo inkawm ru. Coffee tui deuhin ka siamsak ang che u" a ti a, U Nu-i a tho tharh a, ka lamah muangchangin a rawn pen a, zam lo thei ang berin ka lo en ve ran. Khum lu lama U Nu-i chair dahsa ah chuan rawn ţhu in min en run a, a in ngaihtuah muk hmel viau thung.


"Eng nge i an?" a ti sup a, nidang ang chu nise ka kut a vuan ngei ang. Tun ţum chu amah zawk hi a in la hrang tlat a ni.
"Ka ţha. Cindy te inah ikal dawn lo mi?" ka lo ti let a, ka ţhuchhuak pah sawk sawk. Kekawrbul ka hak vangin ka kekawr in a khuh phak loh chin chu blanket in ka khuh a, amah hmachhawnin ka ţhu.
"Kal nachhan tur ka nei lo"
"A tan chuan i hmeichhe duh miah loh pawh i kawp thei sia tiraw?" ka aw chu zawi viau mahse a ngaihnatawm miah lo thung. Ka engkim hi a vawt raih vek ni maiin ka hria.


"Sawi tawh suh. Ka nau thusawi i hrepha anih chuan a ngaihdan ang kha a nilo" tiin in sawifiah ve mahse ka awih chuang lo. Ka harh hlim a a awmdan aţang khan diklo eng emaw a awm tih ka hria. Abi ngaihdan mai mai ni sela chuan khatiang khan a awm miah lovang. Rei tak a in thiarfihlim hnuah a rawn lang leh ngam chauh anih hi.


"Ka damlo min khawngaih vanga lo let inih chuan ti duh suh. Hei aia na hi ka tuar tam tawh lutuk. Keimah chiahin ka tuar chhuak vek thei" tiin ka phun sap sap a, keimaha tawrhchhuah ka ngah tawh a, mahnia tawrh zel ka zuam lo zawk a ni. Ka hlauhna tilang thei ka ni tawh lova, chhel tak anga awm zel ka duh a ni.
"Ka khawngaih vang che a nilo. I bula awm ka duh vang anih hi" a tih chuan ka nui hul hak a, midang hmuh a min ngaihsak laia ka hlim lutuk te kha ka zak leh hnuhnawh.


"Midang runluih nan a hman tlak ka ni lo. Test result ala chhuak lo a, natna ţihbaiawm tak pawh ka lo nei maithei asin. Ka chhiat chak zia ka hai bik lo"
"Chutiang sawi suh" a ti nghut a, min vawn a tum a, ka lo thing thla. Ka inkhawih tir leh tawh ngai lovang. Cindy hmuh laia lemchang ang lek kan ni mai dawn asin. A ţawngkam leh min ngaihsakna te kha a lem vek. Nat vak ngaihna pawh ka hre tawh lo.


"Min kalsan rawh. Ka hmuduh lo che. Ka damlo zual zawkin ka hria, khawngaihin in ngaihtuahna hun tal min pe rawh" ka ti ta ringawt. Ka ţap lai a hmuh ka duhlo a ni ber. Ka chaklohna hmu lo se ka duh. Ka lantir tam tawk tawh a, ka lantir leh tawh tur a ni lo.
"Kalsan che ka tum lo"
"In ngaihtuahna hun ka duh"
"Tunah ngaihtuah rawh" a ti leh sup a, thil nihna diktak zawh ka duh rualin ka ngaithla ngamin ka ring si lo. Thudik sawi turin ngen ta ila thudik chuan min tihnat belh ka hlau si. Ka mangangin ka rilru a buai takzet a ni.


"Keimah vangin i runluih mawlh mawlh tawh a, thudik tak hriat ve ka phuin iti ve lo maw?"
"Sawitur ka nei lo" a tih lehzel takah chuan ka sa phat a, vin vak vak mai te ka duh rum rum mahse amah en hian vin mah ila awmzia a nei chuang lovang.
"Khawngaihin min kalsan rih rawh" ka ti sep a, ka duh loh loh sawilo turin ka la insum hram hram rih a ni.
"Lawmthu min hrilh a hnekin thinrimna in lo zawng a, chau chung chungin anih hi ka lokal" tiin thiam a in chantir a, ngaihdam min dil ka lo beisei ru ve deuh zawk a.
"Lawmthu hrilhna tur che ka nei lo"


"Nangmah pui ţhin tu che lawmthu i hrilh thei lo maw? Mi mak tak inih hi. Nikhaw hrelo a i awm khan awm lo ila chu i ruang an chhar mai mai ang" a thusawi mak ka tih lutuk vangin ka lo en ha ringawt. Ka nui hul hak a, cho deuh a min melh khur khur lai chuan zam lutukin ka hawisan.
"Ka hmupeih rih lo che" ka ti zui sep.
"Ni rei lote ka puih vang che leh i damloh vang hian i thusawi apiang zawm turah min ngai suh. Min hmuh peih loh chuan ka rawn in lan tawh lovang" thinrim taka a tih hnuah min chhuahsan a, kawngkhar a rawn nemkhar dawt ri ah ka phu zawk a, awm dawm vang vang chungin thawk ka la a, ka thawven huai rualin ka ruak huai bawk.




DAMON'S POV


"Nangmah vang anih hi. I tana ţullo i sawi peih lutuk a" ţhutkhawmna a Abi tv en lai ka pawt tho va, a hamhaih rei lo. Amah chhan tur a ka nu leh pa leh ka unaute an awm ve vangin a thinur hmel pawh min hmuhtir ve ngam a nih hi.
"Naktukah chiang zawkin ka hrilh vek ang. I phu hlawl lo"
"Lo inrawlh suh" ka ti hrawk a, dinhnaih lehzual ka tum laiin ka pa in min lo pawt let leh rawk. Thil sawi tam ka tum lo. Ka chhungten engkim an hriat kilh kelh ka duh lo. Tih ţhaih ka tum mai chauh a ni.


"Eng nge ni khur khur a? I rui pek em ni?" a tih chuan min vawn na phih thlain min dan beh hmain ka pindan lam ka pan. Min umzui tu an awm tih ka hria, ka hawilet duh chuang lo. Jason bak a nih ka ring lo.


Pindan chhunga ka luh rualin a rawn lut ve a, kawr ka hlip a, chhuata ka paih dawrh hnuah sofa ah ka ţhu. Ka inthiam lo a, amah chiah ngaihsak zui a, ka thiltum kha upbeh hlen tum ka ni. Ka nau ţawngduh luatah a buai zo vek a nih hi.


"Abi hnen aţangin ka lo hre tawh a" Sandra a ni. Ka bulah rawn ţhuin ka darah a vuan a, ka indemna tur bak sawi a nei leh chuang lovang.
"Thisen cancer. Engkim a chiang vek tawh. Thil mak a thleng anih loh chuan rei pawh a dam tawh lovang. A taksa na itih damsak theilo anih pawn a rilru tihnat sak suh" ka pa ka tih ang bawkin a kut ka dahthlak sak a, min vuan nawn leh kher. Ka nu pawh min hmu turin a rawnkal leh ţep tawh ang chu.


"Ka sawi tawh kha. Lo buai ve suh u"
"Hmunpui lama kalpuiin awmzia a neih ka ring tawh lova, hetah kan enkawl ang a, a tlin loh hun a thlen hunah hahdam deuh a kaltir tum rawh"
"A thi dawn lo" tih hrawk pahin a lam ka hawi a, natna nei zawng zawng an thi vek hleinem. A thih phei chuan keimah leh keimah hi engtikah mah ka in ngaidam thei ngai lovang.


"A thih leh dam kan sawi thei lo. Pathian thu thu a ni mai"
"Pathian a awm tak tak chuan tihdam tir ula, in vaiin biakin ah in kal ziah kha. Abi ţhiannu ani bawk a, tihdam tir ula" tiin ka cho va, thiam ka chan theih nan tal a dam a ngai a ni. Tunah hian ngaihdam dil chakna ka nei lova, ka thusawi awih lova Abi ngaihdan a ţawmpui kha ka hua. Abi a dikzawk tih hre mah ila min ringlo kha ka hua. A mamawh laiin Abi in a pui lo. Engkima pui a hruai kual tu chu keimah ka ni. Min rin na tlem tal nei ve tur chu a ni.


"I naupanlai aţang tawhin biakin ah i kal ţha ve duh lova, hetiang hian pawn lamah hun i hman mai mai phah a nih hi. I nundan hi a zahthlak"
"Lo zak duh suh. Tih theih i nei chuang lo. Ka nun hman dan tur chu ka thu"
"Ila inchhir mai ang. Sangsangi ngaihdam dil la, in pahnihin Pathian bel rawh u. Tun dinhmunah phei chuan nangni pahnih aia Pathian mamawh tu an awm chuang lo"
"Midang vei ve sek lovin iduh ang chuan awm mai rawh" ka ti leh a, ka duhlo chung min hruai lui ţhin a, tunah chuan an tilui thei tawh lo. Nuam ka tih angin ka nung a, an sawisel leh vei theih ka ni lo. Pawisa pawh ka dil tawh ngai lo.


"Ka nau inia, i bo thuk lutuk ka hmuh hian ka rilru a hah ţhin. Thil ţhalo tak thleng thut ta se a pawi dawn lutuk"
"Kal tawh teh" ka ti nghut a, min zilh tawh chuan tawp chin a awm ngai lo. Thu ngai hlir an sawinawn tlut tlut ţhin.
"In ngaihtuah chiang ang che. A rei lutuk tawh Damon. Hetianga awm hi a hun tawh miah lo. Ţha phawt la, Sangsangi pawh hi kawng dikah hruai rawh. A hmelţha si a uihawm emai" a chhuah hmain a ti leh ţalh. Ka duh duhin ka awm a, ka duh duh ka nei thei tho. Pawi an tih ber damdawi em ka la khawih ve hleinem.


Zan rei hnu thleng pawhin Sangsangi thawm ka la hre lo. Nuam lo ka ti ţan a, pawn ka chhuak peih lo bawk. Amah vang hian engtihmah ka phur lo. Ka ngaihtuah lo thei bik lo a ni. Ka ngaihtuah zia ka pawm thlap. Ka duh ka la ti ngam chuang lo. Engkim hi khawngaihna vang chauh a thleng vek a ni. Ka muhil thei lova, kan inhau a, be hmasa tu zawk nih ka duh lo. A hmaah ka inlan tawh dawn loh thu kha ka sawi a, ka hmuh leh theih dan chu kawngkhat chiah a awm.

Cindy.


Ka call a, reipawh a ring hmain a rawn la hlauh, a mengrei ve hle mai.
"Sangsangi kha i hmu duh em?" ka ti a, in ngaihtuah ni awm takin a reh vung vung. Dawhthei takin ka lo nghak a, "Duh e" a tih chuan lawm vangin ka nui suk. Cindy vangin ka hmu leh thei dawn a ni.
"An in ka hre lova"
"Ka hruai ang che"
"Awle. Min lo hmuduh em ang chu"
"Duh dawn e. In hmu rawh u" hlawhtling inti takin khum ka pan a, ka z*ng ve hawk.


Zingah ka tih loh dan deuhin hma takah ka harh ve tehmiah. Ka phone ka en vut a, ala reh vang vang. A duh chuan a awm theih khawp hi a. Rilru mumal pawh min put tir thei lo. Ngaihsak loh tum mah ila ka ngaihtuah reng tho. A natna vang pawh a niang, kalsan tak tak tumna ka nei lo. Ka thinrim laia ka thilsawi mai mai kha chu a hriatthiam ka beisei. Amah vangin Cindy ka biak a ngaih phah hial a, thinrim thei a ni tawh lo.


Chaw ei laiin ka nu leh paten min zilh malh malh reng a, an tihziah dan ania, ngaiah ka nei tawh. Ţhu mai mai mah ila kei ka nih chhung chuan min hau thovang. An ngaihah chuan misual leh tling lo tak ka lo ni. Ka tleirawl hlim kha chuan ka runluih nasa ţhin. Zinga an sawidan kalh zelin tlai lamah ka awm ţhin. Tlemin ka lo puitling ve ta deuh a, khatiang kha ka bansan a, chuti chung chuan ka sualna kher chhuah tur an la hre tho. Nizanah ka nau kut ka thlak ţep tih loh chu an hmaah thilsual pawh ka la ti lo. Unau insual mai mai chu sual anih na ka hre lo.


Chaw ei khamah hmanhmawh takin ka insiam a, hmeichhia ang maiin nidang aiin inchei felfai loh ka hlau ve ta deuh. Ngaihdam dilna thu ka sawichhuak thiam dawn lova, ka chezia in ka lantir mai ang chu. Cindy awm laiin min dang bet ţunh ţung ngam dawn chuang lo.


Ka nau hnenah ka nu in hun min siaksak turin a ti a, a ţhiannu hmu turin a kal dawn lo. Hun ţha ka neih hi bawhpelh ka tum bik lo bawk. Helmet kenga ka chhuah dawn pawhin min lo melh ram ram a, ngaipawimawh lo deuhin ka nuih suk a, kuangkuahin tum burin a hawisan hmak. A bulţan ania, min sawifel sak leh tur anih laiin min kalh ta daih. Sangsangi ka ngaihtuah ta ro ro bawk a, ka inthiamlohna bo ţhak tur khawp a ţhat chhuah ka duh a ni.


Cindy inpeih veleh lam turin an in lam ka pan a, a hmaa inlan tawh lo tura in tiam kha amah hmu turin ka kal leh hma khawp mai. Tu hnenah pawh nise ngaihdam dil ka hreh a, ngaihdam dil ngai lova engkim a kal tluan ka beisei.


CONT...

---

BROKEN-7



"Inleng inei ania" nui sanga U Nu-i a rawn luh hnuah Cindy a rawn lang a, Damon a tel ve bawk. Cindy nen ka hmuhdun loh pawn ka rilru ana em em tawh a, hmuhdun phei chu ka zuam chiah lo a ni.
"Lo leng rawh u" ka ti mawi ve a, ka chau em em a, ka chau tial tial amaw tih mai tur a ni. Ka rit luk a, ka zawi ngawih ngawih reng ringawt. Ka awm mai mai pawn ka hah em em ţhin.


"Ka hmuh hmasakberna ang chiah che khan hmuh ila nuam reng mai. I hmelţha takzet anih hi Sangsang" Cindy in a tih chuan zak deuhin ka lo nui a, hmaichhan a min fak hi an tlem viau ţhin a sin.
"In in ka hre silo a, Damon hi ka rawn zui tawp a, pawi iti lo ang chu. I ngaihţhatlohna tur thil engmah a awm lo ania" a ti zui siam siam a, a awki a nemin ngaihthlak a hahdam khawp mai.

"Pawi ti love. Pawi tih nachhan tur ka nei hleinem" tih pahin Damon ka melh ralh a, khum mawng lamah ţhuin phone a hmet malh malh a, kan thusawi a ngaihven hran lo.


"Lungngai miah suh. Pathianin tihdam theihloh a nei lo ania, i natna pawh hi a hriatpui che"
"A tawk Cindy" a rawn ti sup a, min ţhuthnaih zui zat. Result engmah ka la hreve lova, Cindy hian natna nei awm takin min sawi leh si.
"Eng natna nge i sawi?"
"Natna i nei lo. Taksa chakloh vang anih hi" ka zawh loh zawkin min lo chhang daih. A nihdan lo takin a hlauhthawn hmel riau lehnghal. Engkim hi, eng thil pawh hi ka ringhlel vek tawh.


"Cindy eng natna mah ka neilo tak tak em? Nge ka lo nei reng a in zep mai mai?" tiin dawtsawi lo tura ka rinzawk Cindy ka zawt a, nei mah ila pawi ka ti lo. Dam hi ka thlahlel tawh lo a ni. Pathian thu ka hriat loh vang leh biakin pawh ka kal ngai loh vang hian Kristian ka inti ngam lova, chuti chung chuan mahni intihhlum ka hreh tlat si. Ka huaisen tawk lo a ni. Ka nunna ngei hi keima lak ngai lova natna hmanga lak a nih dawn chuan, chu chu ka duh lutuk. Cindy chu a ngawi ta reng a, Damon pawn engmah a sawi tawh lo. Eng natna emaw chu ka nei chiang a ni. Damon lak aţang hian thil ţha ka beisei ngam tawh lo. Ţhat a chhuah a, thu mak tak tak leh ngaihno bei lo tak tak a chhakchhuak leh a, bum ka ni tih ka hre lehzel bawk nen. Ka in ngaihtuah vak vak pawn rin leh ngaihna ka hre tawh lo a ni.

"I ţha vek. I dam ţep tawh" tih pahin ka tho tur min lo pui a, ka ţhutchhuah veleh min kuah a, Cindy hmuh tur bawk a a tih a nih ringin ka tha neih ve zawng zawng sawmkhawmin ka nemsawn. Ka chaklo takzet a, min kuahlui sela chuan ka tha in a tlin lovang, vanneihthlak takin min thlah ve mai bawk.
"Ka ngai che a, ka kuah chak che anih kha" a tih chuan ka ngei zia lantir nan ka ner nawng a, lemchan a thiam emai.
"Ka ngai tak tak che" a ti nawn leh a, Cindy pawh a nui veleh tawh a, kan boruak uap lutuk pawh a reh ţan.
"In kuah tir rawh. A ngai che anih kha. A zinsan rei che sia" a lo ti a, hmeichhia ka nih angin Damon awmdan chu hmuh nuam a tilo tih ka hria a, lantir duh lova min lawmpui zawk ni awm taka a awm thei chu ka ngaisang bawk. In thunun thei tak a ni ngei ang.


Cindy thil sawi a hriat hnuah uang deuhin nui chungin min kuah nawn leh a, ngaihpawimawh loh hmel takin ka meng kual vel a, tu ve ve mahin an hmu lo thung.
"I cher chak tlat. Min ngaih ve vang a ni em?" min kuah reng chungin ka beng bulah a phun sup sup a, ka beng hmawr a pet zeuh bawk, za ka tih vangin ka thle zeuh a, a nui zui hawk a.
"Ka ngai peihlo che. Ka bula awm tur pawn ka duh tawh lo che"

"Ngaihdam ka dil che beisei suh. Tihsual ka nei lo" ala ti tlat tho. A unaunu ngeiin a sawi ka hriat hnu pawhin a thil tihsual hi ala pawm duh chuang lo.
"Thilsual lian tak iti a ni. Hmeichhe pahnih thinlung infiamnan i hmang anih hi" zawi sapin ka ti ve. Kan paih lawkah Cindy a ţhu ve reng a, a hriat phak ka hlau a ni.


"Ngaihsak che hi thilsual anih chuan thil sual ka ti reng dawn anih hmel"
"Hrelo der suh"
"Eng ti turin nge min duh? Ka taksa ah i hming ka ziak chhuak vek dawn mi?"
"Min thlah leh" tih pahin ka thaw halh a, min la kuah reng vangin "Ka chau ania, ka thaw iti buai mai ang" ka ti leh a, chau lo mah ila hetianga a awm hrim hrim hian ka thaw a buai.
"Ka thlah phal tawh lo che"
"Cindy runluih nan chauh a min kuah inih chuan duhtawk rawh. A hmu hnem tawk tawh" ka ti leh a, kan piah lawkah a ţhu a, keini khumah inkuahin kan phun ser ser reng bawk si. Hriatphak chin pawh a nei ang.
"Cindy vang a ni lo. Ka kuah chak vang che anih hi" ti mahse min thlah ta tho.


Cindy ka en nghal vut a, earphone vuahin mit a chhing a, ka lainat khawp mai. Damon hian tumah a tina hreh lo anih hi. Keipawh min duhloh ve hunah chuan Cindy a tih ang chiah hian min ti ve ang. Chung zawng zawng ngaihtuah chuan ka hlau a ni.

"Min hmu tur hian lokal tawh lo la a ţhat ka ring" nawrluih mai mai chi ka ni tawh lo tih hreve rawh se.
"Ka rawnkal ziah ang"
"Awmdan tur ka hrilh che anih chu. Ka hmu peih lo che" ka ti hrawk a, ka thinrim ve tawh zia pawh a hmu thiam ang. Min ngaipawimawh lo deuhin "Thupek ka zawm ngai lo" a ti nghut duh tho.


"Cindy a awm. In hnial lovang"
"Kan in hnial a mi?" a ti fiamthu a, a nui hmel ka hmuh hi chuan mi fel ber ang mai hian ka lo ngai hman leh ţhin.
"Haw tawh rawh. Cindy ka be duh"
"A biak peihloh che saw" tih pahin Cindy a kawk a, a awm ngaiin ala awm reng.
"I awmloh chuan min be peih ang. Pawnah tal lo va awm teh" ka ti ta ringawt. A awm ve reng hian min tibuai. Ka hriat duh pawh Cindy ka zawt thei lo. Ka rilru hria ni awm takin "Min zawt la, keiman ka hrilh ang che" a ti sup a, ka rinloh zia hre tel se ţha tur.


Ka ngawih tak reng hnuah ka ban rek a rawn hmer a, a kut a lasawn leh vat tho.
"I cher ta khawp mai"
"Ka thil ei tui tih ka nei lo a, ka cher ve bawk ang chu"
"Min ei mai dawn mi? Ka tui deuh ang a" a tih leh chuan a darah na vaklo in ka beng a, theihtawp pawn beng ila ka beng na zo mang tawh lovang.


"Ipi kha a khawhar hmel e, ka lova kawm ange aw" tiin Cindy in chhuanlam a siam a, ka inthlahrung khawp mai.
"Umm...a kawm duh chi inih kha, kan haw hma zawng inkawm ru. Min va fak char char la" thildang a sawi leh hmain ka nghawk sawk a, Cindy chu a nui ve mai. Ka tihţhan tak a nih vangin a nuihdan lem zia ka hmu. Ka nui lui fova, chutiang chiah chuan a awm ve a ni.
"In makpa tur saw a fel ania ka lo ti dawn nia"
"In tunu sawn a ngen tlat a, a lo la chhuak ve thei lo ti rawh aw" a ti leh hram a, Cindy nui chhuak hak hak enin ka thaw halh a, ka thinrimna a hrethiam duh tlat lo.


"Min kalsan tur a ka tih che kha" kawngka in khar rualin ka au ţhat.

"I runluih zo tawh em em lo mi? Ka damloh hi, midang runluih nan ka tlak tawh loh" ka tih chhunzawm leh a, ka vin zawm hran lo.
"I ngaih ang a nilo ka tih tawh kha. A tirah kha chuan ka tum a"
"Engmaw i tum?" ka lo ti hmanhmawh.
"Hman ţangkai che. Tunah chuan a ni tawh lo. Ka nunah hian nangmah bak i awm tawh lo"
"Dawt i sawi. Khang hun reilote chhung khan chutiangin i rilru i thlak zung zung thei lo"
"Chu chu i ngaihdan ni tawh rawh se. Nawrluih che ka tum lova, ngaihdam dil che pawh. Ka rilru puthmang ka hrilh che a, ka rin luih tir thei lo che" a ti a, a ţawng ve duah.


"Min hmang ţangkai a ni. Ka rin em em lai chein nang chuan milem ang lekah min lo ngai a, eng nge i tih lehzel dawn ka hre lo mahse i hlawhtling tawh lovang. Thinlung kehchhe sa a piang ka ni maithei. Ka thinlung ţhalai zatve tawp hi ka pianhlim aţanga laksak nghal ka ni. A ţha thei tawh lovang. Tunah khan Cindy nen inthik tawn tir min tum anih pawhin engtinmah ka awm phah lo tih hre rawh" infiam nan min hmang mahse kehchhe lehzual tur ka neih tawh lohzia ka sawi tumna a ni. Damon lak aţang hian thil ţha ka beisei ngai lo. Ka beisei ţhin a, ka beisei tawh lo a ni zawk.


"Min ring rawh. A kehchhiat belh lovang. I kalna apiangah ka kal ve anga, min koh apiangin chhang tur chein ka awm ziah ang. Min mamawh hun a thlen chang apiangin ka awm zel ang" thutak deuha a tih chuan awihlo lutukin ka thle ha a, ka ring lo lutuk chu ka nuih te lam a za.
"In rin luihtir che ka tum lo ka tih kha" a ti bung nghut a, min melh khul bawk.
"Cindy a hmanhmawh tawh ang hawpui tawh rawh"
"Ka riak nghal duh sia, va thlah lawk la" a fiamthu tih ka hria, a awmdan hi a reilote chhung lek lekin a inthlak hman ziah.


"Eng natna nge ka neih?"
"I hmelţha lutuk a, i taksa in a zo lo anih kha"
"Ka fiamthu lo" ka lo ti hmak a, a insiamrem a, ka mal chungah a bawk al al lehnghal. A hmel ka hmu thei tawh lova, hetianga a awm ka phalsak ringawt pawh hi mak ka in ti.
"I dam vat ang. Dam vat ang che. I dam vat tur a ni" a ti mawlh mawlh a, ka rinhlelhna a sang tial tial bawk. Natna chu neilo ila hetiang hian Damon a awm hauh lovang.
"Min hrilh la ka hahdam zawk ang"
"Hrilh tur che ka nei lo"
"Khawngaihin"
"Hrilh tur che ka nei lo" a ti tlat tho. A unaunu ngeiin a luhlul zia min hrilh tawh a, ka sawi luihtir thei chuang lovang.


"I infiamna mai mai bulah iva awmrei peih ve"
"Ka infiamna hi ka hmangaih tlat zel"
"In in fiampui nasa tawh lutuk a, a chhe vek tawhah ngai la, paih tawh rawh"
"Ka duhzawng chu a chhiat pawn ka remkhawm leh zel" a tih lehzel phei chuan a lu ah na takin ka nem a, a thu ang zel a min kalpui a tum tlat ang. A duh duh a tih theih a awm ka tum bik lo.

"I dam dawn tawh niang i chak emai" tih pahin na ti awm takin a lu a dawm a, ka en duh lo lui.


"Ka delh reng che a, mu leh tawh rawh. I chau ang" a ti mawi ve a, a thawh hnuah ka mutna tur min siamrem sak a, a thiltih a unaunu ngeiin a sawi kha ka awih lo rum rum thei hial. Ka in dawibeh tir leh hmain he a thiltih pawh hi lemchan vek a ni leh thovang tiin ka ngaihtuah leh hman a, ka vannei takzet a ni.
"Ţhat i chhuah nasat poh leh ka hlat telh telh ang che. Ka sawi tawh kha. Tum buai duh suh. I infiamna hmanrua ka ni lo"
"Mu mai mai teh" a ti sup a, min kuai mu lui a, nuih vur vur paha ka bula rawn mu ve in min kuah nghal zat bawk. Ka tal laih laih a, ka hah deuh ni a a hriat hnuah min thlah a, min thawhsan duh chuang lo.


"Tho rawh midang an lo lut ang"
"Muhil rawh" a ti leh daih a, a hmel en tumin zawi muangin ka in her a, mit a chhing a, pawi a sawi loh hmel ve khawp mai. An unauah chuan Abigail hi a hmelţhalo ber a, fel ka ti ber thung. Rilru zau leh thianghlim tak a nei a, khawngaihna ngah tak a ni bawk. Damon anga midang tihnat ching a ni ve lo. Hetianga ka en ringawt pawh hian ka hahin ka na ngawih ngawih, a ţhatna te hi min bum nan a hmang a, ka hnaih lehzual theih nan a hun hlu tam tak ka tan a khawhral bawk. Tunah chuan ka hmelma leh min tina tu a ni tawh a, ka duhlo chunga min hnaih lui tlat tu a ni bawk. Ka damlo chung pawn a bialnu hlui runluih nan a hmanrua ah min la hmang zel duh a nih hi. Hmelţha tak nunrawng tak si a ni.


"Ka hmuhnawm awm veng veng hle mai" a khi zui suk a, a meng pah riai riai bawk. A mutna lo lamah ka inlet nghal thawk a, ka tawlh sawn hmain min kuah leh chawt a, ka che ngam tawh lo.
"Khatianga min thlir reng chuan ka muhil thei nang"
"Ka khumah hian muhil ve suh" tiin naupangchhia takin ka hnial a, min la fiam kual zel ni ah ka ngai a ni.
"Sangsang i khumah hian ka lo muhil ve" a tih hnuah a nui zui hawk a, a hmuh loh ah keipawh ka ţhen ve sang tho. Ka thinrim erawh ala reh chuang lo a, ka pawm tawh ka tihna a ni chuang lo bawk.
"Ka phallo. Kal tawh zawk rawh"
"Ka damlo. Ka haw thei tawh lovang" a lam hawiin ka in let leh a, kan in melh ren rawn hnuah ka chalah a fawp a, mit ka chhing tawp. Nemsawn a ankhum hrep ka duh a, ka ti thei lo. Ka bula hetianga a awm hian nuam ka ti a, hnar duh viau mah ila hnar har ka ti tho si a ni. Ka ngaidam a, ka pawm leh ta emaw a tih ka hlau ve tho va, hepa vang hian rilru mumallo tak nih ka hlawh ngei ang.


An haw dawnah Cindy in amaha a rawnkal leh tur thu min hrilh nawn leh a, Damon chu sawi ngai lovin zanah a lokal leh dawn tih ka hria. Tunah pawh Cindy a hmanhmawh vang chauhva haw hma ve a ni. An kal dawn ţepah pawh min kuah leh hram a, awmdan tur min ti hrelo lek lek tawh a ni. Huat viau ka tumin ka thei lova, ngaihngam zanin ka awm thei tawh lo bawk.


"Eng nge ilo an?" ka nu inthlahrun hmel dakin a rawn lut a, khumah pawh ţhu ngam lovin chair ah a ţhu a, a kut ţang a khawih kual niap niap a, a zam zia lanna a ni.
"Ka ţha" ka ti bung hmuk a, zandang ang lo takin a rui lova, a kiangah mipa hmuh tur an awm lo bawk.
"Min ngaidam dawn nia" ti a a phun sep lai chuan mak tiin ka in bengkang awk lo chauh a ni. A tihsual ngei ngei pawh a pawm duh ngai silo.


"Nangpawh hian ka natna i hretawh ang tiraw? Zep miah lovin ka natna hi eng nge a nih min hrilh ta che u" ka ti vin tuar a, ka nu alo in dawm kun lap thung.
"Hrilh che ka duh lo viau na a, i hriat ngei a ţul si a ni. Thisen cancer inei tih hmuhchhuah ini a" ka puan sinlai in ka in khuh a, dan rual lohin ka mittui a sur zung zung. Natna engemaw tak ka nei tih ka hria, hetiang em em ka beisei pha lo. A hma lawk kha chuan natna nei ila, thi daih ila tih kha ka ngaihtuah ngei a, ka nei tih a chian meuh chuan pawm har ka va ti leh si em.


"Kan enkawl danah che i hre dawn thova, ka hrilh tlang mai che. Engkim hi ka thiamloh vek" a to chuai raih a, ka in khuh thlan dup tawh a, ka ţahna mittui zawng zawng nen ka hmai zawng zawng a huh vek tawh. Ka inkhuhna puan chu ka nu in min rawn hlim sak a, inkhuh leh tumin ţang ve mah ila a dam zawk chu ka hneh lo.
"Ţha takin ka enkawl ang che. Nu ka nihna anga ka tih ngailoh zawng zawng ka ti vek ang. Khawngaihin chutiang ka tih chu min phalsan rawh. I kianga awm min phalsak tawh rawh" a ti a, keimah vangin ka nu pawh a ţap ve a ni. Keimah vang a ka nu meuh a ţah chuan a nasa tawh hle a ni ngei ang. Min chhan thei tawh dawn lo a ni ngei ang. Thihna hi alo hnaih meuh chuan a lo hlauhawm em anih hi. Ka rilru in Pathian hming ka lam ve mawlh mawlh mai.


"Kum19 chauh ka la nih hi. Test ţha leh rawh u. Na mahse ka tuar mai ang. Thisen cancer berkher chu ka ni thei lo" ka ti mawlh mawlh a, Cindy awm lai khan mahni intihhlum ai chuan natna vanga thih ka thlang tih velin ka ngaihtuah ngei. A tak alo thleng a, ka intihhlum duhloh chhan pawh thih ka hlauh lutuk vang tih ka hrechhuak chauh a ni.


Ka ţhutchhuah veleh ka nu in min lo kuah a, thlamuantu ka mamawh a, ka nu chu ka lo hnawl tawh lo. Ka kuah let ve a, aw rawl chhuah meuhin ka ţap a, thisen cancer chu ka beisei loh ber a ni. Duh pawh ka duh lo. Ngatinge ka nat reng bik? Pathian hian min duhlo bik anga hrehawm tuar tur a min siam ve mai mai a nih ka ring. Ka hnungah muangchangin a chul a, a changin ka sam a chul bawk. Ka hahdam deuh hnuah a in la hrang a, ka en ngai ka en tlawk tlawk a, ka ţah loh hnuah pawh ka mittui luang a reh thei chuang lo.


"Ipa kha a kalbo aţanga kum hnih hnuah a thi a, engkim kha ka hua a, ka ngaihtuahna tih chawmawlh nan a ruih kha ţha berin ka hre ţhin. I pian hlim khan khawvela mihlim ber ka ni hial ang. Mihring rilru danglam theih dan hi mak tak a ni. Ho te ah kan nun a chhe vek thei bawk. Buaina sutkian ka tum dan a diklo a, harsatna awlsam taka paltlang ka tumna khan harsatna nasa lehzual min tawh tir a ni. Ka ngaihsak ngailo che a ni maithei mahse nanglo chu neih ka nei chuang lo. Nang aia hmangaih ka nei lo. Ka nundan a diklo laklawh ve a ni" a ti dap dap a, ka nu in min vin vak vak lo hi a nuam a, min hmangaihna thu hriat pawh a nuam mahse engkim hi ka natna vang chauh a ni.


"Min ngaidam la, bulţan ţha ang. I dam leh dawn alawm. I dam anga, hlim deuhin kan awm tawh dawn nia, i hlawhtlinin kan lawm dun tawh ang a, kan lengchhuak dun ang a, thawmhnaw thar kan lei dun ang a, i dam hunah tih tur tam tak kan nei. Chhel deuhin awm rawh aw. I dam leh ngei ngei dawn a ni" ti lawm lawm mahse ka hnualin ka chau a, eng thu mahin min fuih phur zo lo.


"Min ngaidam thei ang tiraw? Inu anga ka awm min phalsak tiraw?" ti a min zawh chuan keimah ka in let chawpchilh nghal a, ka nu siamţhat tum aiin amah anga awm ka thlang a, kan inchhunga thil lawmawm loh thleng zawng zawng kha ka nu bulţan ni mahse keipawh ka tel ve a ni. Ka nu ka dem pumhlum thei lova, fanu fel tak angin ka awm ngai biklo a ni. Tupawn hun ţha neih leh an phu a, ka nu pawh min enkawlna hun ka siamsak ve tur a ni tih thlengin ka ngaihtuah tawh a, ka thih hma ngei hian thil ţha tam tak ka ti ve ngei tur a ni. Ka natna hi ka pawm lova, ka hrethiam lovin ka na em em bawk mahse ka nu lo hi khawvelah nu dang ka nei chuang lo. Ka chet theih loh hun thlenga min enkawl thei tu tur a ni. He natna ka ngaihtuah hian ka thinur a, min pe tu hi min tidam tur a ka mamawh em em lai hian ka haw tel bawk. Pathian hian amah ka hriat loh em vang hian min hmangaih ve lo ah ka inngai tawh a, mahse ka duh reng vanga hlat ka ni lo. A chanchin mumal takain hrilh tu ka nei ve ngai lo a ni.


"Ka ngaidam che" ka ti sep a, a awih lo lutuk hmel chu a khawngaihthlak zawk. Min kuah thlawp a, a ţap tih ka hria. Ka nu in min kuah hnuhnun ber pawh ka hretawh lo.
"I dam theih nan theihtawp ka chhuah ang. Rei tak kan dam dun ang a, mite awh khawp a nufa in hmangaih leh inlungrual nih kan tum dawn nia" a ti a, a ţah vangin a aw pawh ala chher deuh.
"Khawngaihin min tidam rawh" ka ti ve a, nu neih awmzia ka hreve chak a ni. Nu hmangaihna reitak dawn ve ka duh a, ka nu thil min leisak ka ha ve chak a, ka nu nen a chhuahdun pawh ka chak ve.
"Ka tum ngei ang" tumruh takin a ti veleh a, natna hlauhawm tak nei mah ila ka nu in min hmangaihna a hriatchhuah phah a, reitak hnuah min kuah leh phah a nih hi. Nu te hi engpawh lo tisual tawh se ngaihdam harsa lo ber zinga mi an lo nih dawn hi. Tunah chuan nu tak tak ka nei ve dawn ta a ni. Ka taksa rit luk, thil rit takin min delh emaw tih mai tur kha a z*ng hawk tawh a ni.


(Zan khat danah ka lo dah ţhin ang. Min chhiarsak ţhin tu te chungah thinlung takin lawmthu ka sawi e. Han type meuh hi chuan hun a duh reiin a sei hma khawp a, tun ami pawj hi chhiar tute tan chuan a tawi maithei mahse keichuan tawi ka ti miah lo hehehe)


CONT...

---

Show post links

Top

Ngaia

Site Admin

Post May 19th, 2019, 4:00 pm

BROKEN-8



"Lokal ve ziah hi i eng nge anih?" ka nu nuihza hmel chu ka lo hmu hman. Damon nen kan inkar ala fel chiah lova, ka be ţha peihlo chung pawn nitin a lokal tho. Ka hnar ve nasa a, ani luhlul ve tho chuan a awih duh lo a ni. Ka sawi loh ang kherin a awm a, min loken duh suh ka tih apiang a lokeng ţhin.


"Infiamnaa min hmang tu anih kha. La infiam rih rawh se" ka ti fiamthu a, ka nu erawh a thutak hmel tawh khawp mai.
"Infiam nan a hmang che maw?" a ti vin tak reng bawk.
"Chutiang deuh chu a ni mai. Ka ngaina a, nilo ka duh em em zawk. A bialnu runluih nan mai mai a min hmang angin ka hria a" zak chung chungin ka ti a, nu ka nei thar a, hetiang thil ka sawi hi ka demawm lutuk in ka ring lo.


"Chutiang mi chuan a phu lo che" a tih laiin "Mi ţha famkim ka phu biklo" ka lo ti thung. Ni e, ka nun ka en let hian mifel tak hi ka phu miah lo a ni. Keimah anga khawlai mi leh mi lerh, chhungkaw mumal neilo ho hi ka phu tawk an ni a, Damon chu ka tan a ţha zawk lutuk a ni.
"I phu lutuk. Mi ţha ber pawh i phu. Midang infiamna mai mai ni duh mah ta che"
"A infiamna hi ala chhunzawm nge a ti tawp tawh tih ka hre lo" ka ti sep a, ani chu a insawifihlim ngei a, ka ring tawh si lo a ni. Ka chunga ţhat a chhuah poh leh ka ringhlel nasa ting mai a ni.


"Hmeichhe fiam nuam ti hrim hrim hi chuan an bansan mawh khawp a sin. A duat em che a, fel ka lo ti hman viau a, ka thu hriat chuan min ti lawm lo khawp mai" a nui deuh na a a thinrim ru viau tih ka hmu. A thinrimna thup hi keimah ang bawkin a thiam tehchiam bik lo a ni.
"Sim turin ka ti lo. Min kalsan turin ka tia, min hnaih telh telh rawh tihna ang vel a ni" tih pahin ka nui hak a, min hlat tur a ka tih nasat poh leh min hnaih lehzual zawk zel.
"Apatea hian a naupanlaiin vawikhat chu a lo hruai tawh a"
"Kan inah maw?" ka lo ti hu a, ka hawi phawk hra bawk.
"Ni e. Kum hnih vel chauh ila ni. I hnaihah a awm duh miah lova, khanglai kha chuan a chetdan te kha a lawmawm a, tuna ka thil hriat kha i sawi nilo sela chuan ka awih hauh lo ang" tiin Damon chanchin ka hrilh bawk chu a rawn sawichhuak leh a, ama nu ngei pawn a awih ka ring lo. Damlo pangai pawh nilo thisen cancer nei lehnghal a fiamkual thei a, thinlung nei ve lo hial ah a ngaih theih a ni.
"Tuna a awmdan ka en hian, kei ngei pawh hian ka ringhlel rum rum tawh" ka ti ve sap a, tunah chuan min hmangaih ber ang maiin ni a awm ni.


"I ke a kham leh tawh em?" tia kan thupui a thlak chuan ka lawm ru khawp mai.
"Kham ve deuh" ka tih rual deuhthawin a thova, khum mawng lamah ţhuin ka ke a hmet nghal sawk sawk a, ka nu hmangaihna hi dawn rei loh ka hlauin ka nu vang tal pawh hian reitak la dam ka chak a ni. Mit chhin riai riai pahin ka thaw halh a, ka natna ka hriat vangin ka in ngaihbel nge nitin hian ka chau zual zel zawkin ka in hria.


Ka pindan kawngkhar a ri karh karh a, Damon bak inleng ka nei ngai mang miah lova, ani lahin kawngkhar a kik ngai miah lo mai bawk a, tu tak ni ang maw ti a ka ngaihtuah rauh rauh laiin ka nu in lut turin a sawm a, kawngkhar a in hawng riai riai a, Damon ding run ka hmuh chuan ka in rin hmain ka nuichhuak hak. A rawn pen luh hmain ka nu in "He pindan chhung hi infiamna hmun a ni lo. I infiam duh chuan khawlaiah kal rawh" a lo ti vin tak a, Damon a hamhaih a, kei ka lo ip chawih chawih thung. Ka lo hrilh kher kher kha ka inchhir leh hnuhnawh.


"Ka bialnu awmpui turin ka lokal infiam tur ni lovin" a tih let ve chuan ka biang a lum pap pap a, a sen chhuak hial ang.
"Bansan tawh rawh. Mihring thinlung hi ball ang maia pet kual mai mai tur a ni lo. Laktlak loh lutuk mai" a tih laiin ka hmuh phak loh lam aţangin "Laktlak loh itih kha ka fapa anih kha" a rawn ti lauh a, Abi nu ani tih ka hre mai. Damon a rawn nemlut nawk nawk a, amah pawh a rawn lang chawpchilh ve nghal zat.
"A hnungah ka ding a, kawngkhar pawh ka kik tir anih kha. Irene khatiangin inleng te an ti ngai lo" a ti nghat a, Damon banah a kuah pah a, Damon chuan 'min chhan rawh' ti ni awm takin min rawn melh a, nui chungin kut ka vai zauh a, ka duhlo ka tihna a ni.


"I fapa hian ka fanu infiam nan mai mai a hmang a, chu chu ka remti lo. I fanu saw mipa infiamnan i phal a mi? A damţhat lai pawn i phallo ang. Ka fanu phei chu a damlo lehnghal" naupang ţawngkam ni awm tak nen ka nu chuan ţan a la khawh tlat.
"Damon hian a fiam mai mai lo. A ngaihsakzia ka hria in ka hmu vek. Lokal teh hmun dangah inkawm zawk teh ang" Damon ban a kuahna a thlah a, ka nu zawk kutah a vuan tawh thung.
"I fapa hi ka fanu hnenah ka kalsan dawn lo"
"A seh lovang, lokal mai mai teh" ti tlat chungin a kai lui a, hreh tak chungin ka nu pawn a zui dat dat tho. An chhuah dawnah nui vur vur in Abi nu a rawn hawilet a, kawngkhar a pawt phui zui zat bawk. An thawm hriat tur a awm lo chiah chu kan thaw huai mai.


"Ka nu kha kawm tur chein a lokal a, sakei in alo veng che sia, a kawm leh theilo che anih kha" tih sup pahin khumah a rawn ţhu a, a tlangnel nasa tawh. Tlangnel tur khawpin a rawnkal ngun tawh bawk a.
"Sakei huat chi inih vang anih kha"
"A ten chi ni zawk ila min hnaih duh lo hrim hrim se"
"Hauh leh ka hlau ti ve mai mai rawh. Hau tawh lo tur chein ka lo hrilh ang"
"Min hau tih pawh ka hre hleinem" a ti leh daih tawh. Chakloh zawk nih hlau reng reng hian a awm a, ka sawizui pui duh ta lo. Ka nun a hauh lai chuan a ngawih ve duk kha maw.


"Mu leh tawh rawh. Ka nu hi a zei ania, sakei pawh kha a in hmangaihtir mai ang" tih fiamthu pahin dim te in min nam mu a, a ţhutna lam hawia ka saisir veleh chhuatah ţhu thla in khumah a rawn bawk a, a tih ziah dan a ni. Kan inhnaih zawk a ti tlat a, a duh zawk.
"Ipa a fel si a vannei e. Nangni pawh in vannei. Nu leh pa in la nei a, in chhungkua in awh awm bawk sia" tiin ka fak duah a, ka hmuhdan diktak a ni bawk.
"Ka patea hotel hi ka enkawl dawn a, engkim ka kutah a dah vek ang. Chhungkaw ţha tak ka la pe ve ang che" a uang anih ringin ka en vang vang a, fiamthu hmel a pu lova, a thutak run zawk.
"I mawl a mi? Ka thi mek anih hi. Hmun pui lama min kalpui loh danah te hian ka hrethiam ve vek. Beisei tur la awm ila chuan hmunpui lamah min kalpui dawr dawr ang" ka ti chuai raih a, thih ka hnaih a, min hmangaihtu an pung tual tual thung. Heivang hian thih ka hreh a ni.
"Hetah pawh an enkawl dam theih vang zawk che a nih hi. I dam leh vat ang. Hlau suh" ti a thiamlo chung chung a min thlamuan ve te hian nuam ka ti. Ţawngkam bungrua a nei ţha lovin midang ngaihsak pawh a thiam lutuk lem lo. A thiam ang ang a min ngaihsakna a lantir hian hlu ve ah ka inngai thei a ni.


"Damlo i buaipui peih loh vanga doctor zir ve duhlo ini tih ka lo hria a" ka ti a, Abi hnen aţanga ka hriat a ni. Pawl sawmpakhat an zir dawn khan apa in science lak luih tir a tum a, interview ni ah a bo nileng a, an tilui thei ta lo a ni. A duh naah chuan nu leh pate pawh a nawrlui ngam khawp mai.
"A dik. Ka peihlo, nang chu i danglam. Ka buaipui chak zawk rual chein dam vat turin ka duh bawk che"
"Ka tiam thei lo che" ka ti sep a, a hmel hmu ngam lovin mit ka chhing zui.


Ka chalah a fawp a, ka hmuiah a fawp zeuh bawk. A lamah ka tawlh hnai lehzual a, ka kawngah a lo kuah a, chemo ka lak hun a ni leh ţep tawh a, a hma ang bawkin ka huphurh leh kher mai. Ka damna tur niin an sawi a, ka hmanhmawh lutuk nge tun thleng hian ka dam phah pawn ka hre lo. Ka cher zia ka hria a, darthlalangah pawh ka in en ngam lo. Ka chauh zual chang chuan Damon ka ngai ngawih ngawih a, ka kianga a awm reng lai pawn ka ngai tho ţhin.


"Damdawiin a luh leh ka peihlo tak tak a ni. Ka luh leh chuan cabin ah ka awm duh tawh lo a khawharthlak emai"
"Cabin kha a ţha zawk" a lo ti vat a, damlo dang kianga ka awm an duh vak lo a, ka nu phei chuan mi hrang hrang in a min chim pawh a duh lo.
"Engtikah nge kan len ang? Damdawiin leh ka pindan chhung ringawt hi chu ka kham tawh emai"
"Kan leng vat dawn nia. I dam ţep tawh. Tun dinhmunah chuan inu in a phallo" a ti a, ka nu chuan chhuah a phallo tawp. Natna dang ka kai awlsam dawn a, ka zual phah a hlau a ni.


"Min fiam mai mai tawh lo tiraw? Rin che ka duh a, harsa tih chang ka nei ţhin" ka ti sep a, ka la meng ngam chuang lo.
"Fiam lo. Ka fiam lo bawk ang che. Ka rilruah i awm reng ţhin ka tih kha" a ti nghat a, min hmangaih thu min la hrilh miah lo thung.




DAMON'S POV


Ka hmangaih em? Ka inzawt nasa ţhin. A natna hmuhchhuah anih aţangin thla khat aia tam a liam tawh. Hmasawnna engmah ka hmu lo. Kumkhua atana min kalsan tur anga ka ngaihtuah chang hian ka hah ţhin. Kal tir ka phal lova, ka nupui ni turin ka duh. Cindy kha ka duh zual ber lai pawn ka nupui tur angin ka ngaihtuah chhin ngai lo.


Chemo a la leh tawh a, a chauh deuh vangin damdawiinah ala awm reng. A vun ngo tak ţhin kha a dum tial tial a, thisen a neih tlem zia a hriat thung. A ţawngring peih mang lova, len harh a chak zia a sawi bang thei chuang lo. A nu phallo chung ka hruai chhuak thei lo. A na a zual phah anih chuan a chungah engpawh thleng se min dem kumkhua tawh ang.


Ka nauin a riahpui a, damdawiin aţanga ka haw ve hnuah pawh muthei lovin kan kawtzawlah ka la awm. Party ka kal lohna a rei tawh a, min nuihzat tu pawh an awm. Pawi tihna ka nei lo, Sangsangin na a tawrh laiin nuam ka chen thei bik lo. A dam hunah kan la kal dun leh ang chu.


"I muthei bik nange"
"A nih hi" kan naupanlaia pipu kan dahna ţhinah ka ţhu a, a chhiat tawh vangin a tharin kan thlak a, naupang ka nih tawh loh vang leh mipa ka nih vangin hlutna a nei tehchiam tawh lo.
"Min mamawh laia kalsan che a ngai hi pawi ka ti" a rawn ti sep a, Jason hian MD tih leh a duh a, chumi ti tur chuan coaching a kal leh phawt dawn a ni. A tlin theih chuan ala zir leh ang. Internship a zo ve tawh a, reilote chu a thawk hman. A zawh ţep thu kha ka sawi tawh tak e.


"Kal la, min kalsan chhan ngaihtuah chungin ţha deuhin zir rawh"
"I nun inthlak mek ka hmu a, ka lawm khawp mai. Hmundang daihah awm mah ila ka ngaihtuah dan che a nep tawh ang a, a hma ang khan i ruang an chhar thut hlau reng rengin ka awm tawh lovang" a tih chuan ka nuichhuak hawk a, phir mah ni ila danglamna tam tak kan nei a, kan in ngaiin kan in ngaihtuah reng tho.
"Class neih a khat deuh changin i rawn haw ţhin dawn nia"
"Ka pa in a phallo" a ti zawi leh sup a, chumi hnuah "I rawn haw chuan i rilru lapeng tu an awm ang a, i zirlai i ngaihsak lo ang a tia, coaching kal chhung hi chuan pawi ka tih loh nen. A phalloh chuan ka nawrlui duh chuang lo" a tih zawm leh a, khawhar takin a awm leh melh melh dawn a nih hi.


"Sangsangi hi a dam leh theih iring em?"
"Mihring thiamna leh theihna ringawt chuan tihdam theih a ni tawh kher lo maithei. Chemo hi lak nawn leh chi anih pawh ka ring tawh lo. Pathian thu thu a ni tawh ang chu. I nun thlak thleng hlawk tu a nia, dam leh se ka ti khawp mai. Ka ţawngţaipui reng ang"
"I kal hma hian i thiamna zawng zawng sawmkhawmin i tidam thei dawn lo mi?"
"Atthlak" tiin a chek tlak tlak a, ka â vek tawh a nih hi.
"Ka pa, Sandra leh kei, kan vai hian Sangsangi tidam turin ngen suh. Pathian hnenah thlen la, keini aiin thil a tithei zawk"
"Ka nu leh pate pawn an dilsak ang. A zual zel chu a nih hi" za lo deuhin ka nui zui hawk a, tupawn ţawngţai turin min ti a, a ţawngţai tawh sa ho chhan na pawh a la lang chei si lo.


"A nu pawh kha a inkhawm ve tawh ţhin an tih kha. Sangsangi chu damchhuak lo mahse amah vanga a nu tal pawh a insiamţhat phah chuan a ropui lutuk"
"A damchhuak dawn" ka ti hrawk a, hun rei tak hrehawm a tuar tawh a, a tuarchhuak thei zel. He natna pawh hi a hneh ang. Thi tur chuan ka ngaihtuah phal lo a ni.
"A chungah engpawh thleng se Pathian hi dem miah suh. Kan ţhatna tur chiahin ro a rel. I nun a inthlak a, kan lawm vek a, a chhe ber thleng ta se, i chhiat leh phah ang tih ka hlau khawp mai" a ti duah a, Sangsangi ai chuan min la ngaihtuah zawk tho a ni. A ngaihzawng a ni ve lova, a awm ve tho e.


"I mangan chang leh puitu i mamawh apiangin min rawn be ţhin dawn nia. Tun hun hi min mamawh zual lai tih hre mah ila ka hmalam hun tur ka ngaihtuah ve tho a ngai a"
"Hmeichhia ka nih loh hi. Keimahin ka tuar thei" ka ti hluk a, fiamthu thawh miah lo mah ila a nuih a za khawp mai.
"I ţawngkam leh i landan ah hi chuan misual tak i ang ve ngawt mai"
"Sual min tih vangin in buai vek reng a nih hi"
"I thinlung ţhatna ka hria, a tawk viau a ni. Sangsangi hi enkawl ţha la, engpawh thleng se mipa takin i tuar dawn nia" ka dar a hmer vang vang a, naupang kan nih lai ang khan kan in kuah thuak thuak ta bik lo. Tunah tak hi chuan min kuah mahse pawi ka ti lo. Thi turin phallo mah ila beiseina sang tak neih a har tawh a ni. Ka ţawngkam chuan thi lo turin ti mah ila thil thleng zel tur ka hre lawk bik lo. A rukin ka mangang a, thlamuan tu ka duh ve a, ka tilang chhuak hreh si a ni.


"Ka pa in kalturin a tilui che nge i duhthlan na?"
"A ni ve ve. Ka sawitawh ang khan ka hmalam hun tur ka ngaihtuah a ngai. Mipa ka ni ve sia, nupui te ka la nei ve duh ang a, min ngai dawn mi?" a ti a, a nui zui hak hak a, zanrei tawhah chuan a ring duh khawp mai.
"Ka thawveng hawk zawk ang chu" ti mah ila ka ngai ve dawn khawp chuan ka hria. A kal tur pawh ka thlah dawn lo. Lunglen a zual duh.
"Ilo ţap ang e aw" tih ten min fiam zui zel a, ka bul chiaha ţhu a nih vangin ka nem pawp a, ka nem na deuh nge a in ring hman lo a awn ruai ruai a, hreh deuh chungin a tlu a, a tho leh rang kher mai bawk. Min rawn bawh a, naupang ang maiin kan kawtzawl ah kan let dun tap tap a, a rei tial tial a, kan thawm a ring tial tial a, kan naupang ţha leh a ni ringawt. Pawr phangin ka ţhu chhuak a, "Hahthlak hle mai" tih pahin zawi deuh chungin min kuah a, ka mamawh tak anih vangin ka lo kuah let ve. Mipa pawn thlamuan tu kan mamawh ve tho va, ka phirpui a ni a, midang bulah fiamthu thawh nan min hmang dawn lo tih hria in ka zak duh ta lo a ni.


"A dam leh dawn tiin ka tiam thei lo che a, chhel taka a kianga awm reng turin ka chah duh che"
"A na tuar hmel hmuh ka duh lova, na tuar lo a a awm reng ka beisei"
"A rang khawp mai tiraw?" min vengthawng deuh chungin a ti a, a natna hi a thawk rang khawp mai. Phallo tak chunga ka thlahliam a ngai ang tih ka hlau a ni.
"Nitin i hmangaih thu hrilh la---" a tih mek laiin "Ka hmangaih maw?" ka ti a, ka inla hrang nghal a, ka mangan em vanga ka kuah ve kha ka zak chawpchilh nghal bawk.
"Hmangaih e. In ringhlel suh. Ka hrechiang che ka tih tawh kha. Hmangaih lo la chuan i thiltih ang zawng zawng hi i tilui thei dawn lo tih ka chiang. Kalsan tura a tih che khan i kalsan daih ang. I chapona dahţhain a kianga awm i thlang a, i hmangaih a ni" a ţawngkam mal tin chu a fiah kek kawk hle. Ka umzui reng kha keipawn mak ka in ti a, hmeichhe pakhat ve mai vanga ka tlawm duai duai reng te hi zahthlak ka tiin mak ka ti. Ka in thunun thei si lo a ni. Ka hmangaih pawh a niang, tu hnenah mah ka hmangaih thu ka sawi ngai lova, sawichhuah ka hreh takzet a ni.




Zingah hma takah thovin damdawiin lam ka pan lehnghal a, ka thlen chuan a lo la muttui khawp mai. Abigail erawh alo tho tawh a, mut a kham lo tih a hriat.
"Haw rawh ka lo awm ang"
"A khuasik reng a, khawvar hnuah chiah kan mu a"
"Doctor i hrilh em?"
"Hrilh ve bawk e. A harh hunah min lo hrilh rawh aw" tih pahin a insiam sawk sawk a, ala ham bai bai mai.
"I rawnkal tih an hria em?"
"Aih lo hrilh mai rawh"
"Hrilh ve tur che lawm. Nidangah ka sawisak tawh lovang che" ti hmak chungin chhuahna lam a pan a, he nau hi chuan min hlau lo khawp ang. Min tih ang hian Jason a ti ve ngam lo.


Ka nau kal hnuah a khum bulah ţhuin a kut ka vuan a, Jason hnenah khan thil ka sawi ţeuh. Rilru a hah tak tak hian min ti ti pui duhtu te bulah hian thil sawi ţeuh a lo awl a nih hi. A kal hma chuan ka hmu duh tawh lo. Rui vak ang maiin lawm ka awm le.


A kut a rawn tihchet rualin a meng riai riai a, min hmuh veleh a biangsum lang kalhin a nui leh ver ver a, ka damchhunga a nui hmel hmuh leh a nui ri ngaihthlak ka chak a ni. A damlohna hian a ti cherin a tla kawk kawk a, ka mitah chuan a chhiat phah lo. Ka hmuh hmasakber aţang khan hmelţha ka ti tawh a, hetianga kan inpawh hi ka ring pha lo. A nundan ţhin kha a duhthlanna a nilo tih ka hrechiang tawh a, ka khawngaih lehzual phah a ni.


"I lokal na a rei tawh em?"
"Rei tawh e. I mumang ah min hmu ni maw ka hming i lam char char" ti a ka fiam chuan a hmui hnuailam a ti pawrh a, a nuih chhunzawm leh tho. Ka kianga awm hi nuam a ti ve tih ka hria keimah ang chiahin.
"I muttui em?"
"Tehreng mai. Ka mumangah chuan ka lo dam tawh a" zawi sepa a tih chuan min vit zawk a, dam a duh takzet a, tun thleng pawh hian a la beisei a ni.
"I dam vat dawn tihna a nih chu" ka tih rualin Jason nen a kan thil sawi ka ngaihtuah chhuak a, nilenga hun a hman nawm theih nan ka hmangaih zia hrilh ka duh a ni. A tello a ka awm theih dawn loh vangin min kalsan lo tur a ngen te ka duh, a inti chhel lui a nga, min kalsan lo tak tak maithei a sin.


"Ka..." ka ti hman a, ka sawihreh deuh vangin ka ngawi leh rih a, ka nu leh pa leh unaute pawh ka hmangaihna thu ka la hrilh ngailo ka tih tawh kha. Tu hnenah mah ka la sawi lo, ka mi rin ber Jason hnenah pawh.
"Eng nge sawi i tum?"
"Ka..." ka ti leh phawt a, mi â te pawh ka ang. Henu vang hian ka â zo tawh a nih hi. Min kalsan phei chuan awmdan ka thiam lovang.
"Ka...hmangaih che" ka ti zawi sup a, min nuihzat ka rin laiin hlim tih hriat takin a nui a, amah ka vawnna kut chu hmer letin "Ka hmangaih che" a ti ve sep a, reitak ka lo nghah tir tih ka hrechhuak leh bawk. Vawiin atan chuan sawi nawn leh ka tum tawh lo. Ka tih mai mai tawh loh vangin awlsam takin ka sawithei tawh lo a ni.


"Ka sam an ţawn na hian min do. Sam i khuih thiam em?"
"Thiam e" ka lo ti vat a, tu sam mah ka la khuihsak ngai lova, Sangsangi chu tihsak pawi ka ti lo. A khum bul chhuarah samkhuih ka zawng nghal rak rak a, ka haikual ve hnuah ka thil phawrh saah alo awm a, ka hmuh veleh ka lekchhuak a, a lo insiamrem vat. Khum bula ţhu ka nih vangin ka awm zawn a a lu dah turin a in her rem a, ţi dakin a sam darh ho ka lo huikhawm a, a sam an ţawnkhawm bik ka lak dawnlai chuan a lu a kan deuh a, ka huikhawm leh hnuah samtawnna ka pherh a, samţawnna a sam tam tak kai chu a hmuh hlauvin ka thukru vat. A hmuh chuan a hnual mai ang.


A sam ka khuih sak a, an ţawnkhawm tawp anih vangin samţawnna awmloh hnuah pawh khuih a har khawp mai, zankhuaa a delh beh vang pawh a niang. Ka khuih lai chu ka chhungten min hmuh ka hlau ru khawp mai. Ka tih ngai loh deuh deuh ka ti ta ţeuh. Thil tam tak chu min thlak thleng sak a ni. Ka khuih chhuah apiangin samkhuihah sam a kai a, a nihdan tur a nilo tih ka hria a, a sam tlak chhan pawh ka hria, chemo hian mi hrang hrang ah chi hrang hrangin nghawng a nei a, a sam tla chu ka peih ru zel a, a sam ka buaipui lai chuan zawi te tein a zai a, mak tak maiin Pathian hla a sa lehnghal.


"I hla sak chu i hriat ve ngai pawh ka lo ring hleinem"
"Nizanah Abi in min zirtir a, min ţawngţaisak bawk a, ka khuasik a, ka lu ana ngut ngut bawk a, min ţawngţaisak hnu kha chuan ka thlamuang a, tui deuhin ka muhil thei a, ka mumangah ka dam vek bawk a" a ti siam siam a, nidang aiin a hmel hmuh pawh a nuam. A chauh zia a hmuh theih rualin a hlim tih a hriat. Kha thu ka sawihnu phei kha chuan a hlim takzet a ni.


"Ka zo e. Inu ka ni ringawt alawm Hmingthansang"
"Khatianga min koh lohna pawh kha a rei tawh. Sam i phiar thiam em?" a ti lehzel a, zir viau mah ila ka thiam lovang.
"Thiamlo. Tikhan dah rawh" tih pahin a sam la tla ţhenkhat ka paih ru leh zauh a, a hma ang khan ring deuh deuhin min be leh tawh se ka ti khawp mai. Tunah chuan zawi te tein a ţawng a, a hah zia a hmuh theih bawk.


Ka mut ţhat tir laiin "Engtikah nge kan len ang" a ti leh a, min zawt fova, chhan dan thiam a har ţhin a ni.
"Kan leng vat dawn nia, han dam phawt mai la"
"Ala rei awm e" a ti nang nang a, tum burin a kut ţang a en a, a khawih niap niap bawk.
"Rei lo ang. Ka lenpui chak tawh che" tih pahin ka nuih suk a, ka chak tawh tak tak a, ka hruaichhuak ngam lo mai chauh a ni.
"In in bul velah khan ka kal chak"
"Kan la kal dawn nia" ka lo ti leh a, a dam anih phawt chuan a kalna apiangah ka kal ang. Ka mize hlui a bo vek vanga min nuihtu pawh awm se pawi ka ti lo. Ka hmeichhe hmangaih tak hi ka kianga a awm chuan a tawk viau a ni.


Midang an lokal a, ka awm hlat chuang lo. Mawi leh mawi lo ka thliar hrang lova, midang min ngaihdan ka dah pawimawh lo. A kianga awm turin min duh a, keipawn a kianga awm ka duh. Engtinpawn min ngai se Sangsangi nen a kan thinlung a in hnaih chuan a tawk ka ti mai. A chanchin an zawt nak nak a, ţhenkhat chu an reilote an ţhu mawi ve a, an kal lehnghal mai. Lan mawi loh hlauh vanga rawnkal ve mai mai ni awm an ni. Kut kan in vuan reng a, ka thlah phal ţhin lo a ni. Ka vawn theih loh hun a thlen ka hlau ber ţhin.


Tlai lamah a hma aiin a chau leh deuh a, kan mangang tlang khawp mai. Ka pa in min awmpuiin min thlamuan mawlh mawlh a, awmzia a nei lo. A ţawngpeih mang lova, ka pa chuan a ţhat leh vat tur thu leh chhun lama chim tu an tam vang anih thu a sawi. Ka awmhlat phal lova, zanah pawh riahpui zel ka duh tawh a ni. Cindy lo hmeichhe dang ka ngaihsak awmchhun a ni a, ka hmuh phak loh a bo daih turin ka duh lo a ni.


A khumah ka bawk a, tidam turin tumah ka ngen thei lo. Tihdam tum nasa mahse an thei lo. A natna hi a rangin a na em a, mihring thiamna, damdawi leh hmanrua ten awmzia a nei lo a ni. Beiseina kan neih chhun chu Pathian chauh a ni tih ka hria. Ţawngţai ve mah ila min chhang duh lovang. Inkhawm tur a ka chhuak inkhawm duh lovin ka kal bo fova, ruihhlo ka khawih a, chhungte duhdan lo anga awm nuam ka ti tlat ţhin a, ka chhungten Pathian thu an sawiin ka ngaithla ţha paih ngai lova, ka hnial fo ţhin. Hetiang mi ţawngţaina hi Pathianin a chhan duh ka ring lo a ni.


A chet ţual ţual takah chuan ka tho vat a, chau deuh chungin min la nuih hram. A damdawi ei ang zawng zawng te hi midang chuan an dampui a sin. Chemo pawh ţhatpui an awm laiin ka hmeichhe hmangaih neihchhun ve lakah chuan awmze neilo ang vel a ni.
"I murei lutuk a, ka ngai hman che" rilru beidawng tak chungin ka nui lui a, a natna in ţan dan a ho tehreng nen hetiang hi kan thleng ta a nih hi.
"Nangpawh" a ti tham chhal a, a aw ri a zawi em em bawk. Ţawngduh tak nilo mahse ze zawi tak a ni chuang lo. Hmeichhe harhvang ve tak hetianga hmuh hi a hrehawm a, ka hmangaih anih vangin hmuh a hrehawm lehzual.
"I theih chuan muhil leh rawh. Zingah i harh kawk mai ang" ngai viau mah ila hahchawlh a mamawh a ni.


A mit a chhing leh a, 'Lalpa khawngaihtakin tunah lo tidam rawh' tiin ka rilru in Pathian ka be ve hial. Hetiang a hmuh hi ka duh tawh lo a ni. A damţhat hunah ka infiamna mai mai a nihloh zia lantir ka duh a ni. A hriatchhuah aţangin a pindan ah leh damdawiin ah hun a hmang a, ka ta a nih zia leh ka zahpui loh zia te, ka infiamna a nih loh zia te lantirna hun ka la nei lo a ni.
'Pathian, ka bia che a nih chu. Ngaihtuahna pawh i hriat theih kha. I awm tak tak anih chuan lo ti dam rawh' ka ti leh a, Sangsangi ka en pah reng a, a awm ngaiin a awm a, danglamna ka hmu lo.

(In nghak rei bawk a, result chhuak kan phur ve bawk nen, type nan hun a duh ve sia, ka lo dah lawk hman lova, min ngaidam hram hram dawn nia. In lo nghah ţang ţang vangin ka lawm lutuk bawk e)



CONT.....

---

Show post links

Top

Ngaia

Site Admin

Post May 19th, 2019, 4:02 pm

BROKEN-9



Ka harh ruala ka hmuh hmasakber chu Cindy a ni. Nui ver ver chungin min lo en a, min ţhuthnaih zual sauh bawk.
"Thil ei turin an chhuak a, Damon nizanah a mu miah lo aniang, sawta saw a muhil bawrh bawrh mai" z*ng vaha tih pahin Damon mutna lam a kawk a, ka lo nui ve ringawt. A ţullo ka ti chung pawn min riahpui lui tlat a, a zo lo a nih saw.


"Eng nge i an?"
"Ka chau. Dam pawh ka inbeisei tawh lo" tiin tlang takin ka ngaihdan ka lo hrilh a, a chang leh ka khawhmuh a fiahlo ruai vek a, ka chau em em reng bawk a, reilote chhung pawh a hetiang khawpa ka tlahniam thei anih chuan dam ka in beisei tawh mawlh lo.
"I dam leh em em ang"
"Tupawn chutiang chuan min hrilh a, ka dam leh dawn tih an sawi lai hian hlim hmel an pu ngai lo. An beidawn zia ka hmuthiam ve" ka ti a, ka ţawngzawh rual chuan ka hah deuh vangin ka thaw zui halh a, ka hriselna a ţhat var hunlai kha ka ngai vawng vawng.


"Ka thih hunah Damon hi lo enkawl ţha rawh aw"
"I thi dawn reng reng lo Sangsang" a tih chuan ka nuih a za lova, ka thinrim bawk lo. Nuihza miah lovin ka nui lui thung. I thi dawn lo an tih chuan dawtsawi ah ka ngai. Treatment lak pawh ka duh tawh lo.
"A nupui ni ngei ang che. Ka tana i tih theih awmchhun anih chu" ka tih zawm leh a, Damon mutna lam ka melh zauh a, kan inhriat aţangin ka damlo char char a, hun nuam tak kan hmang dun ve thei lo a ni. Kan lo in hre har mah mah a ni.


"Sangsang i ţawngţai ngai em?"
"Aih. Pathianin min duh ve lo"
"Chutiang chuan tuin nge hrilh che? Pathian chuan tupawh min hmangaih vek asin" a bag aţanga Bible rawn phawrhin ka lukham bulah a dah a "I peih changin ilo chhiar dawn nia, i peihlo anih pawn Damon chhiartir la, ilo ngaithla dawn nia" a hmelah min khawngaihna a langchhuak a, ka bo thuk em a ni.


"Pathianin min hmangaih ve sela chuan hrehawm takin min awmtir bik lovang. Thil ka hriattheih tirh aţangin natna hlir min pe a, tunah ka hlim ve dawn chauh a, natna bawk min pe leh a, tuna ka natna phei hi chu tuman an tidam thei lo. Ka thi mek anih hi. Min hmangaih ni sela heng zawng zawng hi ka chungah a thlen tir lovang" chau tak chungin ka ti mawlh mawlh a, ka theih tawp a ring chuan ka ţawng ve tho. Ka aw pawh a chhuak theilo ţep tawh chu a nih hi.


"Pathian hian kan ţhatna tur chauhin ro a rel ţhin. Ţawngţaiin inhlan la, thlamuanna inei ngei ang. Thil hi a ţha lam zawng hlira thlir thiam apiang mi vannei an ni. Pathianah rinna nghat la, nangmah kha inhlan la, i chungah engpawh thleng se lawm takin i tuar thei ang. Ih maw Sangsang, ringtu piangthar tak tak chu an thih dawn pawhin hlim takin an kal ţhin asin. An pa diktak an hmutawh dawn tih an hria a, chumi hmuh chak chuan zam miah lovin lawm takin an kal ţhin. Vanah nuam takin natna nei tawh miah lovin an awm tawh dawn tih an hria a ni" a ti dap dap a, a ţawng lai chuan ka lo enreng a, a mitmeng a nung sar a, tukverh darthlalang aţanga langthei chin van lam a melh zeuh zeuh va, keipawh min en leh ţhin. Pathian min hmangaih zia leh ka sual tlan nan a Isua thih thu te min hrilh a, sawi nuam a ti khawp mai. Amahah chuan tih tak takna te, Isua chu ka thinlung taka ring ve tura min duhna te ka hmu a, ka dam leh dawn a ni tih thu a sawi ri tawh lova, Isua ka rin chuan ka thih hnuah vanah nuamsa takin ka awm ang tih te, leiah chuan thinlung leh taksa na reng rengin ka awm a, Pathianin ka tawrh reng a phal tawh lova, vanah a kiangah hlim taka awm ve tawh turin min duh a ni tiin min hrilh tawh zawk. Mahse chutianga ka awm dawn chuan ka pianthar phawt a ngai a ni.


Ka in ngaihtuah neuh neuh a, Damon thlengin ka ngaihtuah a, ka natna hi ka tuarchhuak zo ta lo anih pawhin Cindy hnenah hian let leh se ka duh a ni. Keimah anga natna tuar ve turin ka duh lova, amah kaihruai thei tu ber Cindy hi nei se ka duh takzet a ni.
"Insit duh miah suh aw. Engtinpawn lo awm tawh la Pathian chuan a ngaidam thei vek che. I awm ang ang khan pan tawp la, alo pawm ngei ang che" tih sep sep pahin ka sam a rawn chul a, min lainat vanga a mittui tling pam pawh ka hmuhhmaih lo. A bialpa chhuhsaktu ang ka nia, a hmuh lai rengin a thinlung tihnat nan Damon khan min fawp vel a, chuti chung chuan ka ţhatna chauh ala duh tho a nih hi. Vanram a ka kal loh a hlau em em zawk a ni.


"I chiang amaw?" ka ti tham ţuak a, ka aw ka thian zui kharh a, vawikhat pawh ka la piangthar chhin ngai lova, ka tum eih lo bawk. Amah hnaih tumna ka nei ngai lova, min pawm duh ka ring bik lo a ni.
"I nunhlui a ngaipawimawh ve lova, tun hun hi a pawimawh. I chungah engpawh thleng se a awmpui tlat che anga, thlamuanna tam tak a pe ang che" ka kut vuanin a awm zawnah a dah a, a mit chhingin a phun sep sep a, min ţawngţaisak niin a lang. Awmdan tur ka hriat loh vangin ka chhing ve ringawt a, mak tak maiin thlamuanna chu ka dil ve a ni. Dam ka in beisei tawh loh vangin min tidam turin ka dil miah lo. Thlamuanna ka neih theih nan ka dil zawk a ni.


Ka mit ka men veleh Cindy chu a dan ngaiin min lo nuih ver ver a, pawr phangin Damon pawn min lo melh chhuk run a, a thawm ka hre miah lo.
"Ka kalsan ang che u. Ka hman chang apiangin ka lokal dawn nia" zangkhai vah a ti chungin a tho va, Cindy kal tur ngaihsak miahlo in Damon muangchangin a rawn ţhu thla ve thung.
"Riak suh ka ti mawlh mawlh a, i riak lui a" ka lo ti hmasa a, ka khawngaih ve deuh vang a ni.
"Ka riak char char dawn" luhlul takin a ti nghut a, ka ner suk ringawt.
"Ka lenpui ang che" a tih leh takah chuan ka harh hawkin ka hria. Phalna a la ni ngei tur a ni.


"I duhna berah ka hruai ang che"
"In in bulah khan ka duh" ka lo ti vat a, an in a ka kal hmasak ber aţang tawh khan an in thlen hmaa thing ding sung ho hnuaia ţhut kha ka chak daih tawh a ni.
"Berkher a" a ti sup a, peihlo mahse ka hrethiam. A seilenna hmun a nia, ani tan chuan hmun mawi leh nuam pawh a ni ve lovang.
"Party ka tih i ring a mi?" ka ti hlak a, lu a thing nghal vut a.
"Ring lo. Kan kal dawn nia. Inu a rawnkal ţep a, ka dil hreh a, ilo dil dawn nia, ka pa chuan a phal"
"Awle" ka ti sam et a, ngen ngawl taka ka tih chuan a phal ngei ka ring. Tunlai phei chu min ngaihsakin min duat em em a, thil dil a har loh lai tak tur a ni.
"A rawnkal veleh ka chhuak dawn nia" a ti leh a, nuih ver ver pahin ka lu ka ti che a, ka remtihna lantirna a ni.


"Sakei chu i hlau ve hle ni maw?" ti a ka fiam zui lai chuan a nur nang a, naupang te a ang khawp mai.
"A fanu ka duh sia, tih thinrim chi nang" min chhanna avang chuan nui ve mah ila ka ngaihtuahna a kalthui khawp mai. Lo in hre hma ila chuan kan awmdun chhung leh kan hlim hun chhung a rei deuh tur. Ka mit phe ruai avang chuan ka mittui a tla maw ka ti hman a, ka nuai nawk nawk a, ka kut a huh miah lo. A la phe reng vangin ka nuai nawn leh a, ka kut min lo vawn beh sak.
"Ngatinge?"
"A thak deuh a" ka ti daih a, a phe tih kha ka sawilang duh lo. A buai phili leh chung ang a, apa a hrilh anga, ka nu in a hreleh ang a, ka kal duhna ah ka kaltheih loh phah a ni mai.


"Ka duhna che i ţahpui ta mai emaw ka tia" a tih chuan a darah ka nem a, "Lo la ţap rih suh ila hre dawn chauh" tih pahin ka kut a vawn lai zawk a fawp zeuh a, ka lo enreng. Min duh lutuk lo in min hmangaih lo mahse pawi ka ti lo. Rei ka dampui ka inring thei tawh tlat lo a ni. Ţawiawm tu chhungkua neiţha mahse hrehawm tuar turin ka phallo a ni.
"Ka hmangaih che" min en vang vang paha a tih leh chuan a hmel chiang taka hmuh ka chak takzet. A thinlung aţanga chhuak tih hre mah ila hmuh chian lehzual ka chak a ni. Tunah chuan ka thinlung kehchhe vek tawh pawh a in zawm ţan veleh mek a, mi thinlung ti kehchhe tu ka nih ve ka hlau a, ka nih ngei ka ring si. Min hmangaih takzet anih chuan ala kehchhe ve ngei dawn a ni.




DAMON'S POV


A nu rawnkal veleh ka chhuak nal nal. Rinhlelh hmel takin min la melh ram ram a, min rinna a la nei tlem. Ka hrelo der ve hmiah hmiah a, min la seh em love. Khawlaia awmreng ai chuan tiin ka pa office ah ka kal a, alo ţhu ngui lup. Sangsangi natdan hrechiang ho hmel hian min ti hnual leh ţhin. A dawhkan hmaa chair ka pawt tawlh a, chumi riah chuan a rawn hawichhuak ve chauh.


"A muhil a mi?"
"A nu a awm"
"I chhuahpui dawn ta em?"
"A nu a dil mek"
"Kal hlat pui suh aw"
"Ngatinge?" ka ti deuh kher a, a chhan ka hrevek tho. Natna dang a kai belh an hlau takzet vek a ni.
"A nu in a ngaihtuah a, rilru nuamlo deuhin a lo awmreng dawn a, kal hlat pui lo la, rawn let pui leh vat rawh" a ti leh duah a, engkim ka hrethiam a, tlem te chauh peh hel deuhin min hrilh ţhin.
"Kan in bula kal a duh. A duh chen chen ka awmpui ang" ka ti hmuk a, hun reitak hnua kan lendun lehna hmasaber tur a ni. Ka tur hmanhmawh lovang.


"Tun hun hi i duhdan chauh a kalpuina hun a ni tawh lo. Pawn lamah awmrei pui lo la a ţha ber" a tih leh hnu pawhin "A duh hunah chauh ka rawn letpui ang" ka la ti tho. Nikhat chauh lenchhuah chu a pawi nachhan tur ka hre lo.
"Sangsangi ka ngaihtuah vang a nih chu"
"Keipawh a hlimna ka duh vang"
"A himna pawh duh tel rawh" a upat tawh nen a luhlul khawp mai. Ka nu leh pate mize inang lo hi mak kan tih thu Jason nen pawh kan sawi zeuh zeuh. Ka nu a zaidam nen.
"Kan in bulah hlauhawm a awm a mi?" ka ti kher a, an awmdan avang hian ka zam phah nasa. Ka inrintawk ve na te pawh a bo zo ţep tawh mahse Sangsangi chungchangah chauh a ni. Thildangah chuan ka la ngai reng.


"Awm love, hritlang a kai te a hlauhawm a"
"Kai lovang ka veng tlat ang" tiin atthlak takin ka chang a. Tuna a natna lo zual zel pawh hi vensak ka duh. Theih chu nise lakbosak dan ka zawng char char mai tur.
"Sangsangi aiin i phur zawk a nih hmel"
"Kan phur dan a inchen vel ang" ka nui suk a, danglam ta viau a min ngai hi ka duhlo a ni. Hmeichhia vanga danglam nih phei chu ka duh lo nasa a, Sangsangi vangin ka danglam tho si. Chu chu midangin an lo hmuh ka duh lo. Ka chhungte pawh nise a ngai reng.


"Car min lo hmantir teh a" tih pahin dawhkana a bottle dah ka ban a, tuiin pahin a hmel ka en ru. A in ngaihtuah nasat hmel.
"Bike chuan a hritlang palh ang" hritlang a kai a hlau bawk a, a phal mial mahna. A car hman bik phei hi chu a ui a, Jason pawh hman a phallo a, kei phei chu a phallo lehzual.
"Kan in bulah chiah i kalpui tak tak ang maw?" min rinhlelh hmel deuha a tih chuan ka lo nui hawk. Ka tleirawl chhuah hlim aţangin sual kawng ka zawh a, ka bum nasat ţhin vangin min rinna annei tlem tawh.
"Damlo chungchangah dawt isawi ka ring ami?" tiin ka zawt let a, Sangsangi tan a nawm zawk ka rin vanga dil ka ni tak tak. Chhuanlam mai maiah ka hmang tawh lo.
"I kal tamna hmun ho kha Sangsangi tan a him lo ania, i sawina ah chiah chuan kalpui ang che" tih pahin chahbi min pe a, min pe hreh khawp mai.
"Chaw eikhawm naah ka kaltlangpui ang. I haw duh huna kan lo let loh chuan bike lo hawn mai rawh" ka ti fiamthu a, a tak anga lantir ka duh vangin ka nui duh lo. Ipte aţanga bike chahbi phawrhin dawhkanah ka dah a, lak pawh a la duh lo.
"Chutiang hmuna i kalpui chuan thi vat rawh se i tih naah ka ngai" a ti ram hmak a, a hmel pawh a dur khup khup thei.
"Ka uang anih kha. Chanchin ka va ngaihven ange" tih leh thawh ka rual a, ka awmrei thawkhat a, an lo in dil fel tawh ang. Ka chhuah dawnah "Rawn let har suh u aw" a ti leh hram.
"Awle kan duh hunah kan rawn let ang" thildang a sawikual leh ţeuh hmain ka chhuahsan.


Sangsangi awm naah ka let leh a, a nu a awm bawk nen, a awmna a ka lut chu ka pa office a ka lut phawr phawr nen a inang lo khawp mai.
"I va zam hmel ve"
"Tinge? Ka rawn pen rual a mi?" a nu chuan fiamthu a hrethiam lo a ni maithei a nui duh miah lo.
"Ka awm vangin i zam anih ka ring a"
"Zam hran lo" dawt ka sawi. Sangsangi leh ka infiamna tih vel a buaipui aţang khan min la ngaina lo reng a, a fanu kher ka duh bawk nen, ka zam ve deuh bawk a ni.
"A lo inchei a" a ti sep a, Sangsangi khum lamah a inher zui bawk.


Ka luh hlim khan a nu chiah ka lo en a, Sangsangi ka hmu chiah chu ka rilru a na takzet a ni.
"In chhuak dawn sia, amaha inchei ve a duh a" zawi tein a ti leh a. Nidanga a inchei ve ţhin nen a inthlau khawp mai.
"Ka nalh em?" tia min zawh pahin a nui ver ver a, darthlalang a in en miah lo chunga inchei ang mai a ni.
"Aw i nalh ber ang" ti mah ila hmuh hrehawm ka ti mah zawk. Mu chunga inchei anih vang a ni mahna a inhnawih sual nuaih ni. Ţhut a tum laiin a nu nen kan lo pui vat a, kan ţhut ţhattir veleh a nu in a sam a chul mam sak a, a khuihsak leh bawk. A hma ang bawk khan sam a tla leh ţeuh a, a kawlh mai a hlauhawm lek lek tawh.


"Ti hian thlah ve rawh se" Sangsangi hriatphak tur a a tih hnuah min en chungin lu a thing a, min hrilh a tum ber ka hre lo. Ka hnaihah rawn dingin zawi tein "A sam a tlem emai" a rawn ti sep a, chu veleh "Nia thlah khan a nalh" ka ti khawtlai leh hnuhnawh. Engtinpawn awm se ka mitah chuan a nalh ber vek tawh. Hmeichhe dang mawina hmuthei tawh lo ang mai ka ni. Ka pianhlim aţanga ka kianga a awm nghal lo hi pawi ka ti vawng vawng tawh mai. Lo inhre hma ila chuan ka neih daih tawh ka ring hial.


A puan a pawt hlim a, a thawmhnaw pawh a nu in alo thlaksak hman tawh a ni. Khum aţangin ka pawmthla a, chhuat a rah ruala ka thlah chuan a pai chhat chhat. Dawm leh vat pahin "Ka tihpalh" ka ti sup a, a pawiloh thu sawi chungin ka thlah leh hlau ni awm takin min dawm nghet khawp mai.



"Ka chhuah lohna a rei ta hle mai" a ti a, tukverh phen aţanga hawikual pahin a khap fak fak a, kan in lam kan pan mek a ni.
"Kan chhuah lohna tih zawk tur"
"College pawh ka nin theih tehreng nen tunah chuan ka ngai tawh. Damdawiin aţang hian chhuak vat ila zawm leh vat thei tawh ila ka ti e. Mahse thil sual lam chu engmah ti tawh lo ang aw" a ti siam siam a, a phurzia a hmuh theih. Nakin lawhah a chau leh ang a, ţawngţha peihlo khawp hiala a awm leh ka lo hlau lawk a ni.
"Ti tawh lovang"
"Tak tak maw? I rui tawh miah lo ang tiraw? Rui tawh miah suh aw" tih lawm lawm pahin ka darah a kut a rawn nghat a, ka tih theih loh tur ka tiam duh lo. Hun harsa ka tawh hunah ruihhlo hi ţhianah ka siam leh mai dawn tih ka hre lawk. Ka melh zawk a, a lunghnur hmel ka hmuh chuan "Ka tiam theilo che a, mahse ka tum ang" ka ti ve a, ka tum anga ka theih loh chuan thuhran. Thutiam bawhchhiat ai chuan a ţha fe zawk.


Kan thlen veleh kawng dal lovin car ka dahrem a, ka chhuk hmasak hnuah a ţhutna lam ka hawng a, a chhuk ve lai te chuan nghet deuhin ka lo vuan a, engtikahmah ka thlah leh tawh lovang.


Thingkung hnuaiah in ngheng chialin kan ţhu a, ka kuah veleh ka darah a lu a nghat a. Boruak a nawm tehreng nen ka ipik khawp mai.
"Lo thi ta ila engtin nge i awm ang"
"Ka ţap vak vak ang" ka ti fiamthu a, thildang sawitura ka duh vangin ka uang lui a ni. Kei ngei pawh ka nuih a za lova, thi tur chuan ka la dah phallo a ni.
"Ka thih i ring reng reng em? Ka natna ang nei hi ka hriatah thi an awm ţeuh tawh sin"
"Thi lovang. Ila naupang a, tihtur ila ngah. College i zawh hunah min nei ang a, fa kan nei ang a, kan fate hnenah huaisen taka i beihlet vanga cancer natna i hneh tak dan te ila hrilh zawk ang chu" ka ti ve luam a, ka sawi zawng zawng chu a taka thleng turin ka duh tel bawk.


"Midang lo duh daih ta la?"
"Ka hmaa hmeichhe dang an lo lan chuan ka mit a del nghal zel" zawi te a a nui ri chu ngaihthlak a nuam khawp mai. A nuiri hi zingkar ka harh phat aţanga hriat ka chak ţhin a ni. Ka nupui a nih hunah chuan ka hrereng thei tawh ang.


"Ka thi dawn ka tihna ni lovin ka thi anih chuan Cindy hi nupuiah nei rawh aw"
"Atthlak" ka ti hluk a, a thi anih chuan amah ngai reng reng hian hun ka hmang kumkhua ang chu. Kan in hriatna ala rei hauh lo, kan inhriat aţangin inhmu miahlo a kan awm chu ka zin lai chauh kha a ni thung. Nikhat pawh hmulo a awm hi har ka ti takzet tawh a ni.
"Ka thi dawn ka tihna anilo ka tih tawh kha. Mahse ka thi anih chuan i tana ţha ber tur chu Cindy chiah hi. A rilru ka tihnat dawn tehlul nen ka tan a ţha ber min la duhsak thei a, min la ţawngţaisak thei ania" tih pahin a rawn hawichhuak a, hnai taka min en laiin a hmuiah ka lo fawp a, in lak hran vat pahin a hawikual nghal ruai.
"Tumah an awm lovang"
"I chhungte an lo awm thut chuan a zahthlak dawn sin"
"Zei min ti ngawt ang" nuih hak hak pahin min kuah a, "Kalsan che ka duh miah lo ania" a ti sep a, ka awmah hmai a phum a, ka kawrhnung a ţham a, "Kan in kalsan lo ve ve ang" a taksa a che deuh a, a ţap niin ka hria.


Ţap lo turin ka ti duh lova, ţap sela a thawk hawk zawk ang. A ruih laia a ţap ka hmuh leh tun a a ţap ka hriat hi chu min nghawng dan a dang daih. A hnungah muangchangin ka chul a, ka kawr hak a mittui vanga huh leh a thil in hnawih kai tur vel ka pawi sa lo.


A duhtawk a ţah hnuah a ţhu ţha a, a hmai ala hup tlat. Sawi tur ka hriat loh vangin "A zia hawk em?" ka ti mawl tawp a, inhup reng chungin a bu nghat nghat a, min kalsan a hreh ang bawk hian keipawn ka huphurh a ni. Jason sawi kha ka ţawmpui ta khawp mai. Kan awmdan tur chu Pathian kutah chauh a in nghat tawh a ni.


A rawn dakchhuak a, a ţah vangin a hnar leh a mit a sen hlar a, a hmelţhatna a bo chuang lo. Nitin hian ka mitah chuan a ţha telh telh zawk a ni.
"Ka pian nawn leh hunah pawh i ta tur chauh nih ka la duh tho ang" a ti tham ţiak a, a biang la huh deuh chu a tuai pah bawk.
"Engvang pawhin inţhen hrang ila, ka zawnghmu zel thovang che" ka ti veleh a, thih hnu piahlam pawh nise ka zawng zel thovang. In kawp pangai te angin hun kan hmang ve lova, a damlo buaipui nan hun ka hmang tam mah zawk. Ka ning ngai lova, min mamawh laia a kianga ka awm thei hi ka lawm tawh zawk. Midangte angin awm ve lo mah ila, min kawm thei miah lo khawpa a chauh chang pawn a kianga awm hi nuam ka ti tlat tho.


"Ka hmangaih che a, ka thinlung hi midang tan a ni lo. Ka kiangah i awm emaw awm lo emaw pawh nise ka thinlungah chuan englai pawhin i awm reng ang a, ka thinlunga i hming inziak tawh hi nawhreh theih a ni tawh lovang" ka ti a, ka thilsawi vang chuan tupawn min nuihzat se pawi ka ti lo. Ka hmangaihzia ka hmangaih berin a hriatchian hi ka duh ber. Ka chapona aiin ka hmangaihna ka dahsang tawh zawk a ni.


"Kumkhua atana ka kalsan che anih chuan midang nei rawh a pawi miah lo. Ka awm tawh dawn lo miau a, ka dem miah lovang che" a ti a, midang neih tumna ka la nei miah lo. Ka kianga awm reng turin ani chauh hi ka duh a ni. He natna hi ka hua a, chak taka a taksa a eichhia te, treatment leh damdawiin awmzia a nei miah lo te hi ka hua. A chau zel a, hmuh theih khawpin a taksa a chhe chak a, nitin a chhe telh telh a tih theih ang. A thawk rang a, an hriat aţang khan thla hnih a tling dawn ek ek chauh. Ka pa chuan thla khat a daih angem aw a tih kha a nia, thla khat ai tam a dam tawh a, beiseina ka neih ve phah ţhin a, chemo a lak hnua a chau lutuk ka hmuh hian ka beidawng leh ţhin. An fimkhur vangin college kal an phal lova, a pindanah emaw damdawiinah an awmtir leh ringawt ţhin. A taksa chau leh a khawsik ţhin te kha lo ngaihven hma sela chuan hetiang hi a thleng lo maithei. Kan hriat meuh chuan a tlai tawh. Tun hun hi kan thlen phah a nih hi.


Ka zungbun bunlai ka phelh a, a kut zungţangah ka rawlh chhin vel a, a thawl vek. A kutzungpuiah pawh thawl tho mahse a tang nghet ber a, ka enchhin zawhah bun ţhat tir leh in "Kan in hualna anih hi. Naktukah a thar ka lei ang che. Ka nupui hual ini tawh a, min kalsan lo la keipawn ka kalsan lovang che" ka ti a, a kut ka chelh reng laiin ka kutah a mittui a far a, chuveleh dim leh duat takin ka kuah a, "Ka hmangaih che" ka ti leh a, ka nupui hual hian min dampui reng se ka ti takzet a ni.



(Tunlai chu ka nghah reitir thei khawp mai che u. In fel hlauh a, ka vannei, ka lawm khawp mai min hriatthiam ţhin vang pawn. A natdan hi ka cousin awmdan ang deuha ka ziah ania, chuan story a ni tih min hriat nawn sak leh dawn nia, a tak ang diak diakin engmah a thleng thei lo. Ka active lutuk loh vangin ngaihdam ka dil a, comment leh like min pe ţhin tu te chungah ka thinlung takin lawmthu ka sawi leh e )


CONT...

---

Show post links

Top

Ngaia

Site Admin

Post May 19th, 2019, 4:02 pm

BROKEN-10



Ka zungbun bunlai chu ka en vang vang a, ka hriat tirh aţang khan a bun ka hmu ziah. A tan a hlu viau ang ka lo ti ţhin a, a tana hlu tak min buntir phal chu ka lawm kher mai.
"Ka hmangaih che" a ti nawn leh a, ka kut lak kan pahin ka zungbun bunna chu a fawp a, amah vanga ka hlim em em laia hlimna ka pe ve theilo hi pawi ka ti. A rilru ka ti buaiin ka ti hah reng a, ka taksa hi ka thunun thei silo a ni. Theih chu nise keimah ang chiaha mi hlim berah ka siam ngei ang.


"Eng nge i ngaihtuah leh tak vung vung?" a tih rualin "Ka hmangaih che" ka lo ti ve a, boruak nuam tak leh ka hlimna chu a inrem takzet a ni.
"Kan inah i lokal duh em?" a tih takah chuan ka ngaihtuah leh vang vang a, ka chhanna alo ngaichang reng. Amah leh Abi lo ho hi ka la nel em em hran lova, ka kal hian ka zamin ka zak thei em em bawk.
"Iduh loh chuan a pawi lo"
"Duh e. A bul chiahah kan awm a, kan kal loh chuan a mawi nang" ti mah ila ka huphurh ru tho.


A din hmasak hnuah min pawt ding veleh a, ka din chiah rualin min venhim tum takin min kuah a, "A hnai tawh emai heti hian kal phei ang" ka ti a, hetiang hmun a kal vel hi ka chakna a rei tawh. Ka duh ang chuan min awm pui a, hah viau mah ila nuam ka ti. Damon kiangah ka awm a, ka kal chakna ber hmunah ka ke ngeiin ka kal bawk. Damon ka rinchhan ngei a mahse ka inchhuang a ni.
"Abi in i chhuahruk duh vangin in gate lianpui aţang hian i lawn liam ţhin niin a sawi a"
"Gate an kalh a, ka nute roomah chahbi a awm daih a, lawnliam a ngai a" tiin zaidam takin min hrilh ve tehmial a.


"Bike i lachhuak thei awm si lova"
"Ka ţhiante ka chah mai" a ti awlsam et a, a tleirawl chhuah hlim lai nun chu a chen ve viau ţhin tih ka hria.
"A nuam iti em? Pawn ka chhuah reng lai khan keichuan nuam ka ti miah lo"
"Ti e. Nuam ka tih loh zawng ka tilui reng peih lo"
"I chhungte runluih nan a ti ini lo maw?" ka ti hu a, pawn lama hlimna kan zawn chhan a inang lo khawp mai.
"Ni lo. Nuam ka tih vang"
"Tunah lah i chhuak tawh ngai si lova"
"Ka upa tawh. Hotel-ah hotu ka ni dawn lehnghal" uang taka a tih chuan ka lo nui ve mai.


Ka luhai thut a, ka taksa a lum pup a, ka ding chawt.
"I ţha em?" hlauthawng takin a rawn tih zawm zat. Gate kan lut fel tawh.
"Ţha e. In kawtzawl hi a mawi em a, thlir rih ka duh vangin ka ding anih hi"
"Ila hmu ning hlui dawn" a tih veleh a ngaihna hre lovin amah chu ka en chho ha a, min lo en ve chiah bawk.
"Ka nupui hual inih tawh kha. Ka nupui ila ni vat dawn a, hei aia mawi hian ila siam dawn nia" kan awmzel dan tur a a duh a sawi hian damţha pangai ni ila chuan ka hlim thei viau ang. Ka chakloh zia ka hriat hian min ti lungngai zawk ţhin.
"Chutiang chu a thlen theih ka beisei"
"Natna hi i hneh thei tih ka hria" beiseina sang tak nei chunga a tih chuan tumna min pe a, ka taksa ka thunun thei lo hi a pawi ber chu a ni.


An inchhung kan luh veleh ţhutkhawmna lamah min kaltlangpuiin sofa ah min ţhuttir a, ka ţhutnawm theih nan nghenchhan dup nuam tak tak a lakhawm ţeuh bawk.
"Tui ka lo lak ang che" a ti a, choka lamah a kal leh a, bottle leh tui no kengin a rawn let leh vat a, side table ka ţhutna bulah rawn hnuk hnaiin bottle a rawn dah a, ka hmazawn chhuatah a ţhu.
"I nupui ang maiin lawm ka chet le" a ti fiamthu a, ka luhai a la reh chianloh vangin inchhung dai a ka awm chu ka hahdam sawng sawng thei.
"Kan inneih hunah pawh ka tir kual char char ang che"
"Ka nu rilru ana ang"
"Tir kual thei tu te chu kan mamawh lutuk"


Hnunglam ka hawi vut a, a nu alo ding reng. A nui sang a, a awm tih kan hriatreng tawh hnuah pawh a kut a vai zeuh tho.
"Engtia rei nge i awm tawh?" a vin deuh vangin Damon chu a rukin ka tlawh a, ka ke alo man bet.
"In inneih hun tur aţang khan" tih pahin a rawnkal a, ka bul chiahah a rawn ţhu ve chat.
"Thawm nei ta che. Mi ti ti an ngaithla ngai lo" tiin a nu a hrilh veleh chhawng. Ka hmazawn chhuata a ţhu hlauh chu a ruk chuan vannei ka in ti khawp mai.
"Sangsangi ka lo awmpui ang. Gate pawna i car dah va la lut rawh. Ipa a ţap lo chauh tawh nia" a tih chuan ka nuih alo za a, a nundan enin car neih an phalsak ka ring miah lo reng a ni.
"Ţap mai mai rawh se" ti chungin a tho ţuah ţuah tho. A kal hmain "Ka rei lo ang" a ti leh hram a, a nu nge keimah zawk a hrilh ka hre hrang thei lo.


"Vawin chu hmuh i nuam hle mai"
"Ka lawm e" lai deuh a tih pahin zahzelah ka sam ka zut a, vawithum vel ka zut thuak thuak hnu chuan sam ka zut thla tel a, tam lutuk ni lo mahse hmeichhe sam tla pangai ai chuan a tam hret. Ka hre lawk vek. Chemo ka lak vang a ni tih ka hria. Hetiang hi a thleng dawn tih hrereng chungin ka rilru a na tho si. Ka sam tla ka ken lai ka en reng laiin ka kut min rawn vawnsakin a rawn tifai mawlh mawlh a, zak viau mah ila chetna chang reng reng ka hrelo. Milim ang maiin ka awm mawl tawp ringawt.
"Keipawh a tla nasa thei lutuk. Nau neih zawh phei chuan a nasa lehzual ţhin a" a ti sawk sawk a, chu ringawt chuan min hnem thei chuang lo.


Ka ţhut zawi hnawk laiin ka malchungah a kut a rawn nghat a, lainat takin min en reng.
"Ka ţawngţaipui ţhin che a, i thlarau dam nan te ka dil ţhin. I natna hi engkim tawp vek naah ngai suh. Lehkhabu hi phek khat naah a tawp ngai lo. An ziak chhunzawm zel a, harsatna tam tak paltlangin a tam zawk chu hlimawm takin a tawp ţhin. Beidawng mai suh. I tawpna tur hi nang, kei leh doctor te pawn an hrelo. Pathian hnenah inhlan la, i taksa leh thlarau dam nan dil char char rawh" tiin min hrilh malh malh a, ka taksa a dam theilo anih pawhin ka thlarau dam nan tal la dil dawn a ni.


"Engkim hi a tawp vek ka tih rualin ngaihtuahna a kalthui ţhin a, ka in ti chak a, rilru ka ti paukhauh a, ka taksa hi ka thunun theih piahlam a ni sia" ka ti sap a, ka hmui ro tak ka liak huh zeuh a, hmui rep ro rap ang mai hian a awm ţhin.
"I thlarau a dam chuan engpawh tawk dawn la i thinlung takin i pawm thlap anga, thlamuanna inei ang a, van a na nei tawh lo a awm i chak bawk ang. I thi dawn ka tihna a ni lova, tuman thi turin kan duh lo che a, he natna hi hneh thei la kan duh vek. Mahse mihring kan nia, tupawh hi thi tur vek kan ni. Pathian tawk mai tura kan inpeih reng a ngai a ni. Thi turin ka duh lo talzet che, ka fapa a khawngaihthlak dawn emai" a ti vawng vawng a, a in ngaihtuah muk hmel khawp mai.


"Ka tum alawm. Thih loh ka duh a, ka thu lo ropui si" ka mittui tla tur dan tumin mit ka khap fak fak a, Damon vang chiah hian thih ka hreh a ni. Keichuan engmah ka hretawh lovang a, ani chuan nitin min hrechhuak reng dawn si.
"Ţhenkhatin thih chakin an nunna an la a, dam duh ngawih ngawih natna vangin an thi thung. Khawvel hi a mak ngawt mai tiraw?"
"Hetianga natna tihdam harsa tak ka neih hian dam hlut zia ka hre lehzual a, in tihlum te hi ka dem phah. An nunna tlem te kha min pe ve sela, ka dam rei ve deuh ang a"
"Dem suh. An thinlung kan hriatpui tlat lo. An taksa na lo mahse an thinlung a na in a rum vawng vawng a, dam an thlahlel tawh miah lo thei. Keichuan ka dem lo. Mahni nunna lak chu a hlauhawm dawn tehlul nen, dam aiin an thlang zawk tlat sia"


Kan thlir dan inang lo lutuk chu mak ka ti. Thihna ka hnaihin ka inhria a, thih hlauhawm zia ka hriat hian an nunna an la mai duh chu mak ka tiin ka dem a, ani chuan a hrethiam vek thung. Harsatna paltlang kan tum dan a inang lo ţhin a ni. Mahni nunna lak hi buaina tih tawp naah ka ngai thei lo.
"Intihlum tawh ţhian inei mi?" ka ti ta hlawl a, a hriatthiam em em danah ţhian harsatna nasa tak tawk nei ni awm tak a ni.
"Sangsang" min chhan hmaa Damon aw ka hria chu pawi ka ti. Ka thlamuan deuh theih nan miin thih an thlan chhan ka hrechak a ni.


"Nu i pangpar ho saw ka lo en ngai miah lova, an par nasa zual a nih saw" tih pahin chhuatah tho a nu hmaah a ţhu tawh thung.
"Engtik aţang khan nge pangpar i melh peih ve tak a"
"Tun lawk aţang khan. Nakinah ka la tihfai pui dawn che nia" a ti leh a, a nu a biak dan ka hriat ţhin leh tuna a biak dan hi a inang tawh lo. Tunah chuan fapa fel ber ang maiin a awm tlat a ni.
"I thutiam bawhchhe miah suh"
"Mipa ka nih hi. Thutiam ka bawhchhe ngai lo. Mahse min chhawr dim deuh la" tih pahin a nui a, nui tak tak pawh a ang lo ka lo ti hman pek a.
"Dim tehreng e. Sawmi a awm si lova Sangsangi hi eitur kan siamsak ange, rilţama ka dah chuan a lo leng duh tawhlo palh ang" a ti leh luam a, a thawh dawnah nui sangin ka lam a lo hawi leh a, a hmel hi hmuhnuam ka ti reng ţhin.


A nu kal liam veleh ka hmaah a rawn tawlh hnai a, "Intihhlum chungchang ka nu bulah sawi ri tawh suh" a ti nghut a, sawichhuak hmasatu zawk ka ni lo tih ka chiang. In sawithiam vak dawn chuan kan in hauh daih ka hlauh vangin "Awle" ka ti ţha ve mai. Thuawih viau lo mahse a nu a hmangaihzia erawh ka hrethei a ni.
"I chauh chuan iduh leh mu rawh. Thil ei dawnah ka kaitho ang che" a tih veleh choka aţangin thil keh ri a rawn chhuak a, Damon a che rang khawp mai. Choka lamah a tlan nghal a, keipawh ka hlauthawng ve tho mahse inrawlh loh a ţha ka ti zawk.




DAMON'S POV


"Nu" ka ti lut a, min rawn melh vat hnuah no tla keh chhar turin a ţhu hniam leh. A che buai nuaih a ni ber. A chhar hmain a hmazawnah ţhu ve in a banrekah ka man a, "Ka lo ti ang" ka ti zui a, thihna chungchang sawi hi chuan ngaihtuah a nei ţhin tih ka hria. Amah leh ka pa hian sawi an nei lo na a ka patea hnen aţangin ka hria. Kum13 vel ka nih laiin ka zan muhil theilo min mutpui ţumin a sawi a, pa lo nih hlau deuh chungin ka ţahpui tho anih kha. Ka unaute pawh hria an awm lo. Ka patea nen a kan thuruk a ni.


A keh lian ho ka dahkhawm a, hmunphiah hreh viau mah ila a kehthem tereuh te te ho chu ka phiah khawm a ka ruh a ngai a ni. Abigail tal awm se ţha tur. Hmunphiah leh a ruhna ka la a, thiamlo deuhin ka phiat ve. Ka unauten min hmuh ka hlau khawp mai.
"I danglam ta hle mai. Sangsangi hnenah hian lawmthu sawi kan ba nasa a ni"
"A kehthem vanga i thisen chhuak ka hmuh duhloh vang chauh a nih hi" ka ti nghat a, ka danglamna hi ka la inpawm duh lo. Ka danglam tawh zia erawh ka hria.


"I ti pung pung a, hau che ila min chhang zawt zawt a, min runluih bawk a, i naupanlai aţangin pa lo nih hlau reng rengin i awm a, in naupanlai kha chuan Jason hi rilru nem zawkah ka ngai a, in puitlin hnu hian nang hi i rilru a nem zawk tih ka hria. Paukhauh hmel takin i awm a, i luhlul viau chung hian a ruk tak chuan Jason hi a luhlul zawk. A thinlung hi nang aiin a khauh zawkin ka hre tawh" ka lo nui suk ringawt. Kan nu a nia, min hrechiang ang. Jason chu a fel a, a zaidam bawk mahse a thinrim a hlauhawm. Lehkhazir bak ngaihtuah a neilo a, party a kal ve ngai lova, chhungkua a hmangaih bawk. Sangsangi damloh hlim khan Cindy min duhpui vanga sangsangi a pawm mai theih lohna ka hmu a, Abi chu awm lo se a pawm lo reng maithei. Ka nu leh Abi ten an hrilhfiah a, a ngaihdan sawhsawn kha a harsat khawp mai. Mifel leh ţha tak erawh englai pawhin a ni reng. Hmeichhia hian nel har an ti hle a, kan naupanlai a mizia tam tak kha paih bo a nei a ni.


"Jason chu thu a awih a nangmah ang lo takin. Nu leh pa tih lungawi loh a hlau a"
"Ka thuawih lohna lai i hrerei mai mai anih kha" ka ti fiamthu a, ka ruhkhawm thiamloh em vangin ka hmunphiah kenlai min chhuhsak a, aman a rut vek. Naupang mawl tak inti pa tak ka nih lai chuan choka ah pawh ka lut duh ngai lo. Chaw pawh hmundangah ka ei ţhin a, ka pa in a phalloh chang chuan chaw ka nghei ţhin. Ka upat hnu hian ka mawl chhah zia ka inhre ve chauh.


"Tihpui i ngai em?" ka nu hnena ka tih chuan mak a tihzia a lang.
"Ngailo. Sangsangi awmpui rawh hrehawm a ti ang" tih pahin a siamtur a lachhuak mawlh mawlh a, ka dinna ngaiah ka la ding reng. A tana mi pawimawh tak thi tawh vang khan a ngui vek niin a hriat.
"Sangsangi hi a damchhuak leh angem?" ka ti a, "Damchhuak leh em em ang" a tih lai chuan min en duh lo. Ka nu dawtsawi thiam lo tak a ni.


"I hnen aţang chuan thudik ka beisei a"
"Ka hrelo Damon. Pathian thu thu kan tih fo kha. A natna hi thisen cancer ah pawh a rang chi a nia, ka hrelo le. A nu khan chemo lak leh pawh a phal tawh lo ni awm tak a ni. Chau chung chungin a inti harh ve hram hram a, a thih leh damah thuneihna ka nei lo a, hriat pawh ka nei lo"
"Thi ta se ka na angem?" ka tih veleh a rawn dakchhuak. Ka na dawn tih te chu ka in hre vek alawm. A natdan lo hre tawh tu ania, remchang ah ka la ve a ni mai.


"Aw i na ang. I hmangaih phei chuan ina lehzual ang. Mahse hetianga natna hi ruihhlo tel miah lo a tawrh hian a zia zawk. Pathian hnen a chakna dil zel hian kan tuar thiam zawk daih" tihchhan a nei. Engpawh thleng se ruihhlo ti lo turin min duh a ni.
"A thi kher lovang tiraw?"
"A thih leh damah sawitheih ka nei lo ka tih kha"
"A thih i ring a mi?"
"Ka hrelo" a ti leh ringawt a, nidanga ţawngtam thei viau si min chhang ţha duhlo chu ka thinrim ţeuh tawh.
"Ka pa nen in sawidun vek tawh ang"
"Nunna chunga roreltu kan ni lo" a ti leh tawp a, a ngaihdan tlang takin min hrilh sela ka tan pawh in puahchah a awl zawk ang.
"Sawipui i har emai" tih sup pahin ka chhuahsan. Thi lo turah ka la dah ţalh tho. A thih vaih chuan nung reng chunga thi ang mai tho ka ni ve ang.



Thil ei zawhah damdawi inah ka let pui a, chahbi ka dah laiin ka rin lawk angin ka pan min lo hau. Ka nu thilsiam ka eipui thu ka hrilh a, min hau reilo hlauh. Ka sawiziah tawh ang khan hauh rual chu ka ni tawh lo mawle. Party naa kalpui lo a him dama ka let pui leh erawh alo lawmthiam khawp mai. A thu ka zawm khat ve em bawk a, ka zawm chhunah hi chuan a lawm ve ţhin hrim hrim.



Kan in a kan kal aţang khan kar hnih a liam leh tawh a, chemo a lak tawp ber aţanga kar thumna a ni tawh bawk. Jason pawn min kalsan tawh a, a awmloh meuh chuan ka ngai khawp mai. Ka mamawh apianga min puitu hla taka awm ta daih chuan hlauhthawnna min neih tir nasa lehzual bawk.


Sangsangi pawh a changin a chau a, a changin a fel a, a harh apianga a hmuh theih turin a kiangah ka awm reng ţhin. Hotel lam ka ngaihtuah rih lo a, Sangsangi dam hunah chauh hotel a ka rilru ka pek tur thu ka hrilh tawh a, Atea pawn a lo remti ve tho.


A muhil hmel enreng chungin a lukhum ka siamţhat sak a, nihnih vel chu lukhum a khum reng tawh. Inthlak tura in lama ka haw laiin a nu in ward pangaia a ţhiannu awm hmu tura an len thu min rawn hrilh a, ka let leh meuh hian tihian a lo muhil leh der tawh. A len theih chuan a fel viau tawh aniang ka tia ka rilru a nuam huai. Damdawiin a an awmtir reng nachhan hi ka hre lova, Sangsangi nen chuan in lama awm ţha kan ti zawk a, kan nu leh paten min ngaithla duh lo thung. Dam pangai angin awm se a natna hrelo der hmak ila a dam leh mai ang tiin ngaihdan atthlak tak tak te kannei a, lenchhuah leh pawh kan chak a, phalsak kan ni tawh rih lo.


A rawn che ţual ţual a, a men veleh hnai zetah ka bih a, min lo nemsawn ve vat.
"Ka tello in khawnge ilo len vel a"
"Brenda a awm ve a" a ţhiannu ve vawikhat pawh rawn la kal ve lo kha a ni khawp ang.
"A damloh meuh chuan a mamawh che anih dawn chu"
"Mahse ka nu in kal reng lo turin min ti a" a ti a, a tum zui bar a, ka lawm ru khawp mai.
"Kal tawh loh tur tihna anih chu"
"Ka damlo min lo kan loh chhan pawh a damloh ve vang ania"
"Thla hnih chuang maw?" awihlo zet a ka lo tih chuan min chhan ngaihna a hrelo. Bum a awlsam em anih hi.


"Damlo hrang hrang an tam vang ania ka nu chuan a phalloh. Mahse ka kal zeuh zeuh ang. Nakinah kan kal dun dawn nia aw" a phur lutuk chu aw pawh loh chi a ni lo. A nui hmel hmuh reng ka duh ka tih tawh kha. A hlim nan a duh angin "Ka hruai ang che" ka ti a, natna dang kai a awlsamna hmunah chuan kallo se ka ti viau thung. A tan phei chuan kai a awlsam lehzual ang a, chuvanga phallo pawh chu an ni ang.


"Na ilo nei em?" ka ti leh a, ka awmloh chhung reilote chhunga a lo awmdan pawh hriat vek ka duh ţhin. Hma a sawn anga ka hriat chuan min ngen angin ka nu hmasaber ziah ţhin.
"Nei em em lo. Ka len theih tawh chu. Damlo dang na deuh deuh te ka hmu a, ka khawngaih sin aw. Keimah anga enkawl tu ţha anneih ve loh phei chuan" tih pahin ka ţhutna lam hawiin a rawn saisir a, a ban pakhat a kham a, min en kal a, a chauh viau loh hi chuan a hmel hmuh a nuam ţhin.


"Brenda chuan min lawmpui thu a sawi a" a ti a, zungbun thar ka leisak tawh a bunlai min hmuh tir a, ka pek ni khan lawm vangin a ţap leh. A lawm vang a nih thu a sawi hma kha chuan a duhlo emaw ka ti hman. Hmeichhiate hian ţahna chhan an ngah em a, ka lo la thliar hrang thiam chuang lo a ni.
"A buntir tu che hmelţhat vang a mi?"
"Aih a fel vang"
"Ka awih lo. A hmelţhat vang zawk aniang" a ninzia ka hmuh vangin ka ti nawn leh. Min fak fova, ka infak ve hian a ning ziah.


"Hei hi min chhiarsak leh tawh rawh" a ti a, a lukham bula a dah, tuma delh pawh a phalloh Bible bawk a rawn phawrh leh a, kan pahnih chauha kan awm chuan min chhiar tir fo ţhin.
"Tunah chuan ka peih lo" tiin diktakin ka hrilh a, ka chau ve a, hunawl ah chuan hetia a kianga awm melh melh hi ka duhzawk. Thildang tihsan ka duhlo tihna pawh a niang chu.
"Chhiar rawh. Ka lo ngaithla ang" a rawn tawlh hnai a, lukhama a hman a ban lachhuakin ka ban a la a, Bible min hmehbel chawt bawk.
"I chhiarchhuah veleh ka dam nghal ang" ti zawngin min nawr a, duhthlan tur dang ka nei chuang lo. A dam hunah ka duh duh ka tihkual tir ve ang. Thawk ka la halh a, phur lo tak chungin Bible ka chhiar hmabak chu ka keu leh a, a ruk tak chuan keipawn ka ţangkai puiin thlamuanna nasa tak ka neih ve phah a ni.


CONT...

---

Show post links

Top

Ngaia

Site Admin

Post May 19th, 2019, 4:02 pm

BROKEN-11



Brenda khum bulah Damon nen kan ţhu ran a, a remti lo chung chungin min kalpui turin ka nawr lui a, ka ngen char char hnuah min remtihsak ve chauh a ni. Chau ve tho mah ila ka ţhiannu hi ka ngaipawimawh ve thova, septicemia an tia, keimah ang bawkin a natna a lo ngaihthah rei ve a, mahse ani chu tunah chuan a ţha tawh lutuk a chhuak thei ţep tawhin ka ring.


"Nanghi i damlo hi nuam iti riau mai" ring leng lawng a min tih chuan ka zak ru angreng. A ţawng hi a ring ţhin hrim hrim a, venthawn em em a nei ngai lo.
"Tuman damloh nuam an ti ngai lo"
"Thlahnih chuang vengtu ineih phah lawm" a tih laiin Damon chuan "Lo inkawm rawh u. Ka va chhuak ang e" a ti a, chhuak lo mahse pawi ka ti lem lo.


"I mask te kha phelh rawh ining ve lo mi?" a tih veleh mask ka lathla a, khawlum bawk nen ka zia huai mai. Ka hawirual ralh ralh a, Damon a awm hnaih loh ka beisei. Awmhnai sela chuan min hau ngei awm sia.
"I awmna hmun hi a khawharthlak loh bik e. Damlo dang leh a awmpui tute an awm ve reng a" ka la hawikual ruai a, a bul vela awm ho ka enkual pah.
"Damlo zawng zawngah chuan i khuahar lo ber ang. Mahse maw i bialpa hi ka ngaina lo"
"Ngatinge?" ka lo ti vat a, ngainatu a nei vak lovang. Keichuan ka hrechiang tawh a, a landan ang hi anih loh zia ka hrechiang a, ka ngaina in ka hmangaih takzet a ni.


"A induh si. An hausa tih kan hrevek a, a chapo kher a, hmeichhia a ngainep bawk sia, farnu neilo ang mai hian"
"A fel lutuk a sin. Min hmangaih bawk a" min chhan alo tum laiin ţawng rih lo turin zaizirin ka hrilh a.
"A ţawngkam ringawt a nilo. A chetzia ah ka hmu thei. A ţhen chuan an sawi ringawt a, an lantir chuang lo. Damon chuan a sawi tam lova, mahse a lantir nasa thung" tiin a thlavang ka hauh a, ka hmuhdan tak ka sawi bawk. Ka luhai muai muai a, pangai deuhin ka awmlui tlat tho. Buaina ka neih vaih chuan ka len vangah an puh dawn chiang.


"I hmangaih ve em?"
"Tehreng mai"
"I natna hi a rang chi an tia, a ni tak tak ami? Ka khawngaih che e, min thihsan tur a ka ngaihtuah te hian ka rilru a na" a ti a, ka thihsan dawn lo che ka tih theih loh vangin hrehawm ka ti a, thih erawh ka hlau tawh miah lo thung. Cindy sawi ang khan thlamuanna ka nei tawh a ni. Mihring kan nia, thi tur tho tho kan ni. A kal hmasa bik kan awm angai anih hi.


"A hrim hrimin i mangan lai leh i rilru nat ţhin lak chauh khan min mamawh a, tunah min mamawh tawh lo" tum burin a ti leh a, a damlo hian a ti thinchhe ve deuh aniang.
"Chutiang a nilo. Englai pawn ka mamawh reng che"
"I bialpa chiah i mamawh tawh. Keichu min hretawh lo"
"Hretawh lo che ila chau chung chungin hetah ka rawnkal nang. Ka ngai ţhin lutuk che lawm"
"Nih leh damdawiin aţanga kan chhuah ve ve hunah party kal ang aw. Hmelhriat ka ngah tawh nia, khawi hmunah pawh ka tlangnel tawh a, ka hruai ve ang che aw" phur takin a ti leh a, chutiang hmuna kal chu ka tan a rem ve tawh lo.


"Ka nunhlui a let leh ka tum tawh hleinem" ka ti sep a, kha nun kha beidawn lehzual na mai a ni.
"I piangthar ami?"
"Aw, a ni mai ang chu" elhsen takin ka ţhiannu ngei chuan min nuihsawh a, hetiang hi ka tawh ka ring ngai lo. Ka piangthar a ni mai ang chu. Ka ţawngţai ţhin a, ka ti mai mai ngai lo. Thiamlo deuh chungin tihtak zetin ka ţawngţai ţhin. Pathian hnenah ka inhlan thlap tawh a, ka taksa hi dam dawn lo mahsela ka thlarau erawh a dam tawh a ni. Bible ka chhiar a, ka chhiar loh changin Damon leh ka nu ka chhiartir a, uluk takin ka lo ngaithla a, hriatchian lehzel ka chak ţhin a ni.


"In dam chiah anga, khawthim thet thet aţangin chhuahpuiah min rawn sawm leh reng mai ang" min nuihzat tak chungin ala sawi chhunzawm zel tho.
"Ka let miah lo ang. Damdawiin aţanga ka chhuah hunah pawh biakin ka bel chawt ang" tumruh tak chungin ka ti ve a, ka thlarau a bo leh mawlh ka hlau tawh a ni.
"Isua khan tihsual nei miah lovin keimahni sual vangin a tuar a, kan tan a tuar ka tihna anih chu. Nu leh pa vuak hlauin kan unaute sualna pawh kan tawrhsak duh lo ania, ka hun hmasa lam zawng zawng kha Pathian tan ka hmang ngai lova, ka zak khawp mai. Ka rilru ana tiin ka vui ve reng tho si. Pathian hre miah lo chung khan ka dem vel a, mahse min la ngaidam duh tho. Min ngaidam mai lovin thlamuanna tam tak min pe zawk" ti a ka hrilh malh malh lai chuan ngei hmel deuhin min lo en reng.


"Pianthar a ngai alawm i thi tep tawh--" a ngawi leh daih a, sawisual a in ti ve deuh ni tur a ni min ngei hmel pawh a pu tawh lo.
"Ka thi ţep tawh a ni maithei. Ka thlarau a thi ve dawn lova, hei vang tak hian Pathianin min la ngaidam duh hi ka lawm phah asin"
"In ti piangthar ka lo tih ţhin ang chiahin i awm" a tih leh takah chuan za vaklo chungin ka nui lui a, ngaihtuahna mawl mang tak tak ala neireng anih hi.
"I bialpa te chhung ang mai. In ti fel, an in ti fel hlawm e, mi pawn an sawi alawm. Hospital te hi an inchuh nasa ţhin an ti sin"
"Chutiang a ho mai mai. Thil kal tawh anih chu" ka ti a, tumah hi an inti fel ka tilo. An fel tak tak vek a ni.


Damon nen a kan inkawp an remti pawh mak ka tih tawh nak laiin min buaipui em em vek a, Jason takngial pawh min hmu turin a lokal ve a nia. In ti fel angah ngai ila chuan tumah ka ngaina lovang. Min ngaihsak tak tak tih ka hriat hian ka lawm rualin ka inthlahrung hial zawk. Chhungkua buaina tawk lo kan awm lova, buaina an lo tawk ve tawh anih pawh in thil kal tawh ania, tupawn kan kalsan vek tawh. Brenda hi ka nu awm laia a awmdan leh tuna a awmdan hi a hrang hlak a, a mood a fu chiah lo ah ka ngai.


"I bialpa a lokal" a tih rualin a lukham bula ka mask dah a la a, a hum bo hmak.
"Hmingthansang khawnge i mask i dah? Phelh lo tura ka tih che kha" a rawn ti chiah reng a, Brenda kut ngawt ka lo en a, mask a humna lam kha blanket hnuaiah a zen lut a, a kut a rawn dahchhuah leh chuan hum a nei tawh lo.
"Chu chiah, i phelh kher a, natna hrang hrang nei an nia, natna do let tu i neih chhiat tawh em kha" min ngaihtuah awm takin a rawn ti a, a awmdan chu mak ka ti telh telh mai.


"Tun bak chu a rawnkal tawh lovang" Brenda hnen a a tih hnuah min kaichhuak hlawk hlawk. Ka banrek a hmerna a na vung vung a, a kal chak bawk nen, ka pen pawk pawk a ni ringawt a, min ti chau zual takzet a ni. Ka awmna cabin kan thlen dawnah ka ding chawt a, ka ban ka phih thla a, min vawn zui reng a tum tawh bik lo.


"Kan buai vek. I thih hlauin kan buai vek. Len iduh a, i duh angin ka lenpui che. Inu leh ka pa ten natna i kai loh nan an tia an fimkhur vangin mask an vuahtir che a, kha rul vang mai mai khan ilo phelh a" thinrim taka min tih lai chuan ka ip chawih ringawt.
"Rul a nilo. Brenda anih kha"
"Mask a thukru lai kha ka hmu hman. Midang awm ve vangin ka haider anih kha. I thih hlaua nangmah vengtu ho aiin kha rul thu kha i ngaipawimawh anih leh i thu ni tawh rawh se. I kal leh anih chuan ka buaipui tawh lovang che" a ti na a, a thinrim vang mai mai tih ka hria. Min hmangaih zia ka hrechiang a, keiman ka kalsan anih loh chuan min kalsan miah lovang. Damon ka ngaihtuah em vang chauh hian thih ka hreh phah a ni. Thildangah ka hreh lo. Pathian ka ring tawh a, chau tak chungin thi mah ila chak zawkin ka thlarau a tho leh dawn a ni.


Ka ban a vawnna a nat vanga hauh hrep tum khan "Ka tihpalh" ka ti leh ta zawk a, ka la dam chhung hi chuan tih lungngaih loh hram ka duh ve a ni. Cindy chungah lawmthu ka sawi bang thei lo. A thinlung na taka kan hliam chung pawhin ka thlarau min la chhandam sak tho a ni. Tunah hian na tuarin awm mah ila vanah chuan ka na tawh dawn lova, taksa leh rilru na miah lovin chatuanin hlim takin ka awm reng tawh dawn a ni. Mahse, awm lo ta ila Damon hian a tuar viau ang tih ka hria. Chumi hun atan chuan Damon bula awm turin Cindy pawh ka hrilh tawh a ni. Tun aţanga in hlat taka awm te pawh ka duh rum rum tawh.


"I tihpalh chuan ti nawn tawh suh. Kan chhiatna ringawt duh ţhian neih ai chuan ţhian neih loh a ţha zawk"
"Ka hria. Ka kal tawh lovang" ka tih lai mekin "Damon" tih ri kan hria a, aw lo chhuahna lam kan hawirual ţhawt nghe nghe.


Hmeichhia la naupan hmel tak, hrisel leh harhvang tih hriat zet hi alo nuisang a, chu chuan min ti chau zual. Kan landan in ang lo lutuk tur te, sam mawi tak a neih laia ka lu khuh vek a ngai bik te, ka insit miah lova, kan landan erawh ka lo khaikhin ve a ni.
"Hetah eng nge itih ve?" tih pahin kan dinna lam ah a rawn pen phei a, a naupan hmel ang aiin a lian reuh khawp mai.
"Kan hospital ah ka kal theilo mi?" a lo ti nghut a.


Keichu ni ila min chhan dan avang chuan zakin ka buai chhe viau ang. Ani chu ala nuisang reng thei lo. Damon hual vel tu hmeichhia te hi an chhel hlawm ngawt mai.
"Ka sawi awmzia chu damlo buaipui inei mi?" min en pahin a ti a, min haw hmel leh rilru chhia pu pawh a ang lo.
"Ka bialnu hi ka awmpui a" tih pahin min kuah a, chunu pawh chu muangchangin a bu ve nghat nghat a.


"Nakinah ka lo leng ang. Abi min lo biak dawn nia, a ngaihawm lutuk a"
"Phone in nei ve ve a, inrawlh ve na tur ka neih ka hrelo"



DAMON'S POV


"Ka phone a bo a, phone number a bo vek a"
"Kan buaina a in ang chiah" henu hi Abi school kalpui ţhin a ni. Min ngaizawng nasa ţhin. Ala naupan nen a zaklo reuh zek lehnghal a. Mipa zawk ka lai ţep ţhin zawk alawm le. Ka nau phone number neih theih dan a ngah. A chhuanlam mai mai a ni.
"Nakinah ka loleng ang" a tih nawn leh hnuah a in her a, Sangsangi ka kuah lut ve nghal.


"Tunge a?"
"Abi school kalpui ţhin anih kha" khum a a lawn tur ka lo pui a, damdawi pawh an rawn pe leh ţep tawh ang.
"A nel hmel ve khawp che kha"
"Nangpawn i thik khawp kha" a aw ang chiahin ka ti ve a, puan pan te ka sintir pah bawk a, ka awki vel avang chuan ten hmel deuhin min lo en. Ka dem hran lo, keipawh ka in ten. Vawikhatna leh a tawp nan ka ti ve chhin anih kha.
"Zawi zawiin min hlat rawh"
"Khanu vang khan maw?" ka ti hu a, a lo van thik awm ve ka ti rum rum.


"Nilo. Lo thi ta ila i tuar dawn lutuk asin. Min hlat hret hret chuan i tawrhdan a ziaawm ang a" a ti sep a, hmeichhia te hian hmahun hre miah silo hian hma hun an ngaihtuah peih viau thung a, an in ti lungngai chawp mai mai.
"Ka hnaih telh telh dawn che. Kan inneih phei chuan kan in hnaih lehzual angai ang"
"Kan la in kalsan dawn tho tho a, in kalsan vat hi a ţha zawk daih"
"Kan inneih chuan kan awmdun reng zawk ang" tiin a thusawi tur ka haider lui char char a, a sawitum ka hrechiang viau tho. A rawn hmu apiangin beisei anneih tlem zia an sawi a, chutiang a ni chung chuan neih ka la tum tlat a ni. Ka ngaina in ka hmangaih a, a kianga ka awm tam ang hian hmeichhe dang bulah ka awm ngai lo. Chu chuan midang zawng zawng aia ka ngainat bik zia a lantir ang. Cindy ngei pawh ka hmu reng ngai lova, Sangsangi chu nileng zankhuaa ka awmpui pawn ka ning ngailo.


"Inneih sawi tawh rih lo teh" a ti hlak a, a ţhiannu khan a hnual zawnga thil sawipui a nei em mawni ka ti rum rum.
"Min nei duh lo mi?"
"Duh rih lo. Hunin a hrilh ang chu" sawitur dang ka hriat tawh loh vangin "Ka hmangaih che" ka ti a, ka nat hlau a min vengthawng pawh a zia deuh ka beisei a ni.
"Min kalsan mahla ka dem miah lovang che"
"Ka kalsan lovang che" ka ti ve thung. Kalsan lo turin ka intiam tawh a, amah zawk hian min kalsan anih loh chuan ka kalsan lovang. Ka thusawi anga ka awm a, ka thutiam a ka dintlat na hian min ti mipa lehzual a, mipa chu hmeichhiate rintlak leh in nghah ngamna kan ni tur a ni. Sangsangi nen kan bul ţan na fuh lo mahse tunah chuan ani aia hmeichhe ngaihsak ka nei ta lo. Ka nu leh ka farnute tih loh chu.


"Vawin hi Sandra birthday ania"
"Engtikah nge i haw dawn?" min lo ti vat a, min ning deuh tawh a ang.
"Inu a lokal ţep a, haw lo mah ila a pawilo. Jason pawh a awm chuang lova, lawmna hranpa a siam lo bawk a, chhungkaw kima chaw ei kha a ni leh mai a" ka ti na a ka ngaipawimawh ru khawp mai. Ka nu hian kan piancham hi a ngaihlu a, zirna avanga hmundanga kan awm anih loh chuan chhungkua a awmkhawm hram theih nise a ti ţhin.
"Haw rawh. Ka nu rawnkal veleh i kal dawn nia"
"Iva sa ve, a lum iti mi?" tih pahin dim tein a hmai ka khawih kual a, a khuasik vak ngai tawh lova, ngaihţhatlohna ka nei lo. A taksa aţanga lumna lo chhuak ve hrim hrim ah ka ngai a ni.
"Ti vak lo. Sandra chu lawmpuina min lo hlan kep rawh aw. Abi pawh test lai a ni sia, min rawn ngaihtuah suh se"
"Ka lo hrilh ve ve dawn nia"


A nu rawn lutin min rawn be luam a, Sangsangi chu din hliahin a hmuh lohin a kut ka vuan a, a nu nen a kan inbiak chhung zawng ka chelh tlat a ni.
"Sandra chu a naupanlai ai khan a hmelţha lehzual daih tawh zawk. Ka hmuh leh veleh eitur ka lo leisak dawn nia" a ti a, ka haw dawnah "Zanah riak turin ka lokal ang" ka ti leh hram. Chaw eizawh chuan ka hman a ni leh mai a, hotel ka la buaipui lo bawk a, hunawl ka ngah khawp mai.


In ka thlen chuan Sandra alo lawm thiam khawp mai. Ka haw a beisei loh thu a sawi a, a beisei loh deuha min hmu chuan a ti hlim zual a ni. Sangsangi leh a nu thu min chah ka hrilh a, a nui sang reng. Lan chhuahtir ngailo mah ila ka chhungte an hlim chuan ka lo hlim ve ţhin. Hmeichhe pathum bik phei hi chu venhim tlat ka duh a ni. Ka hmangaihzia la hrilh lo vek mah ila la hmangaih takzet vek a ni. In hau ve ţhin mah ila ka hmangaih loh phah lova, kan inhnial bap bap ţhin te hian unau kan nihna a lantir zawk. Sandra anga u fel hi an vang viau maithei a ni.


Ka nu in a tihdan ngaiin rei deuh hun a hmang a, chhung inkhawm neih dawn a ţawngţai tawp lova thuhma an neih ţeuh hian ka ning ţhin. Ka nu lah hian a hranpa a min hau lova chhung inkhawm naa min hauh a ching a, ka hnial buai theih loh hun leh ka insawifihlim theihloh hun remchang a chuh ve ţhin. Chaw ei naah a sawizawm ngai miah lo thung.


A ţawngţai zawhah chaw kan ei a, Jason an ngaihzia an sawi sap sap. Ţawng tam luam lo mahse chhungkaw kim hi chuan a nuam ve.
"Pa i phone ri reng chu ka ning" Abi in a ti hlak a, ka nin rukna a rei tawh.
"A pawimawh aniang, va la mai teh" a ti a, chaw ei laia thildang tih phallo ber a ni ţhin. Biak an rawn tum nasat vangin a dan siam a bawhchhe dawn anih hi.


Abi in phone a rawn dah veleh ka pa a tho nalh a, a in silfai hnuah a phone a en a, a rawn be tu tur a hmuh rual chuan a kalsan. Biak let a tum a ni ngei ang a, ka ţang nghal ţeuh. Sangsangi chungchang a nih ka ring ber a, Sangsangi nu in rawn biak a tum a nih ka ring. Ka nu leh ka unaute pawn min melh ralh ralh a, ka thil ei pawh a tawp vek.


Ka pa rawn lut hmuh phei chuan hlauhna in min man nghal thei. Thu lawmawm sawitur a neih lohzia a lang chiang.
"Jason an class bang kha a ţhianpa nen an accident a" ka ding nghal vut. A ţhianpa chu ka hria ang. Vai ania, bike a nei a, Jason nen an inkawm nasa.
"Engtin nge a awm? A ţha em? A ţha tiraw?" ţap ţuauin ka nu in a zawt nghal mawlh mawlh.
"A ban a tliak a, a lu a sawh deuh bawk a, tunah chuan ala biak theih rih loh" Sangsangi ang chiahin Jason hi ka tan a hlu a ni. A chunga thil ţhalo a thlen ka duhlo.


Ţhutkhawmna ah kan awm ţhap a, ka nu lahin "Ka van lainat tak em" a ti sek a, a awmna a hlat vangin tih theih kan nei mang silo.
"Damon naktukah inu nen kal rawh u. Abi in test a nei mek a, Sandra lah tunlai a buai a, Sangsangi chu kan lo enkawl ang" thupe aw takin a ti a, hnial ngam chi a ni lo.
"Nia Abi leh keimah pawn kan lo awmpui mai ang a" Sandra pawn a ti veleh a, ka ngaih hlut ve ve an nia, an pahnih a enkawl theih ka duh a, min mamawh huna an kianga awm ka duh ve ve. An awmna a in hlat em a ka duh angin ka awm thei silo a ni.


Chahbi lak pahin "Damdawiin ah ka riak dawn a, Sandra ka thawmhnaw min lo siam rawh, i dah ang apiang ka keng mai ang" ti a ka hrilh chuan lu alo bu nghat a. Ka nu mangang a vei kual sek a, Abi in lehkha zir nachang a hre lova, Sandra lah milim ang maiin a awm a, ka pa a in thunun thei ber. An mangan laia chhuahsan ka tum hi ka inthiam chiah lo. Midang hnem ka thiam lova, awm mah ila ka ţangkai ka ring chuang lo.


Nuam lo ti deuhin ka chhuak zal zal a, an phallo chung ka lenchhuah luih ţalh ţhin lai ai pawh khan a nuam lo zawk. Ka unaupa neihchhun ka ngaihtuah a, Sangsangi ka ngaihtuah bawk a, ka dinhmun a lai leh tlat tawh. Ka pa min tirhna ka hnial ngam lova, Jason chu a ţhat leh mai ka ring a, damdawiin ţha zawkah a awm bawk nen. Sangsangi mawlh hi, min kalsan daih ka hlau khawp mai.


CONT... (Ka type sa a bo a, rawndah tho ka duh bawk sia, a hmaa uluk taka ka type ang diak diak kha a ni thei tawh lova, a phuailuai deuh maithei. In lo mut hman ka hlau bawk nen, hmanhmawh deuhin ka type chawk leh nawk nawk a, a in kawkalh deuh a awm pawhin min lo hrethiam hram hram dawn nia)

---

Show post links

Top

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122

Ngaia

Site Admin

Post May 19th, 2019, 4:02 pm

BROKEN-12



"I lokal leh duh kher a, a ngailo sin. Zanin chu hahchawlh nan hman ve tur che ania" a rawn thlen rualin ka lo ti nghal. Ka kiangah a tap chawt a, a chhungte lakah pawh ka inthlahrung. Ka nu lah Damon rawn thlen veleh haw turin a insiam sawk sawk bawk.
"Ka rawn riak dawn. Hetah lo chuan ka muhil thei lo" tih leh ka khum bul chair a rawn ţhut a rual a, haw tir tum tlat mah ila ka thei leh dawn chuang lo.


"Jason a accident a"
"Engmaw?" ka lo ti vak a, an va buai lehzual dawn em.
"A ţhianpa nen. A ngaihtuahawm lutuk lova, mahse naktukah ka nu nen kan kal dawn a" min hlat turin ka ti a, min kalsan tur te in. A tak ram a thlen chiah hian ka ngaingam leh ţhin lo.
"Ka thusawi vang khan mi i kal ve dawn?" ka ti a, khavang kha anih chuan kallo turin ka ngen leh mai ang. Nitin a hmel hmu lo chuan ka awmthiam tawh lo a ni.
"Ni love, ka pa thuchhuak ania, zawm ngei ngai chi"
"Engtia rei nge?"
"Ka sawithei lo" a ti sup a, a kun lup bawk. Min kalsan hun ka huphurh a, min kalsan a hreh ve tho bawk.


"Kal rawh. Buaipui tu a neih loh chuan a khawngaihthlak dawn asin"
"Lainatawm khawp mai. Ka cham rei lovang. Ka kal phawt ang a, a dinhmun a zir a niang chu. Abi leh Sandra an hman silo a" a ti zung zung a, zam hmel a pu ve a, ka lungawiloh a hlau ve a ni.
"Keichu awmpuitu tur ka nei lawm. I unaupa ania, a beisei dawn che a, i kal ngei ngei a ngai. Min rawn ngaihtuah miah suh" ka ti a, a haw zawk laia ka khawsik vel kha chu ka sawichhuak duh lo. Ka khuasik a, khawlum vanga midangte an thlan bawrh bawrh laiin keichu vawt tiin ka khur hlak hlak a nih kha. Chutiang zawng zawng chu ka hrilh anih chuan rilru nuam lo deuhin a kal palh ang. Enkawl vanga damthei tur zawk hi enkawl nasa zawk se ka duh. Keichu ka ral riai riai tawh.


"Ka rawn be reng ang che. Ka rawn haw huna min lo hmuak thei turin lo dam rawh aw" a nui hmel ka hmuh chuan keipawh ka lo nui ve a, tu hnenah mah ka dam leh dawn ka ti thei lo.
"Ka theilo anih pawhin i thinlunga ka awm tlat chuan i kianga awm reng ang ka ni ang"
"Ka rawn haw hunah tun aia dam zawk a hmuh che ka duh" a ti bur a, ka thlarau chu a dam alawm. A dam tawh lutuk a, natna nei miah lova vanrama awm pawh ka chak phah a nih hi. Tuman ka thinlung an ti na ve dawn bawk silo. Dawt leh ruihhlo a awm ve tawh lovang a, ka mittui pawh a tla ve tawh lovang.


"Lo thi ta ila min theihnghilh mai angem?"
"I thi dawn lo"
"Lo thi ta ila ka ti reng alawm. Ka zawhna angin chhang rawh. Mihring kan nia, thi tur vek kan nih hi" a ţhutna aţanga thovin ka bulah a rawn mu ve a, ka nu in min riahpui pawhin ka bulah a mu mai ţhin. A mutna lam ka hawi rualin min lo kuah a, hetianga kan awm hian him hliah hliah ah ka in ngai a, nuam ka ti ţhin.


"Kum tam tak a ral hnuah eng ang mi nge ka nih anga, engtiangin nge hun ka hman dawn ka sawi lawk thei lo. Ka hma hun tur ka hre miau lova. Mahse ka thinlungah i awm reng ang a, ka hmangaih reng ang che. Chu chu ka tiam thei che. Englai pawn nangmah chiah ini reng ang" ţahchhuak deuh chungin ka nui lui a, ka mittui tih tlak loh ka tum tlat.
"Eng harsatna pawh tawk la i nunhlui ah let tawh suh aw. Khatiang nun bawlhhlawh khan hlawkna a neih lohzia kan hre ve ve a, i hunawl hman ţangkai dan zawng la, keimah vang tal pawhin i thiltih ţhin kha i bansan dawn nia" ka ti a, a awmzawn ah ka lu dahin a lungphu ka ngaithla a, a luhlul em vang hian thu tiam tir ka duh a ni. A thutiam angin a awm ngei ngei ang a, ka hriatlai ngei a a nunhlui a a let tawh dawn loh thu a sawi chuan a kiangah awm lo mah ila a let miah lovang.


"Awle ka let lovang. Ka lo in thunun dawn nia" a tih chuan ka lawm kher mai. Min tiam theih ţhin loh pawh min tiam thei ve ta. Ka nu pawh a in tiam vek tawh a, ka thlarau an zah vang tal pawhin an nunhlui ah an let tawh lovang. Pathian hnathawh a lang zel a, thlamuanna ka nei nasa tial tial a, ka taksa damlo chung pawh a ka thlarau tal a dam vang hian ka lawm em em a ni.


"Ka lawm e. Dam reilo mah ila ka thlarau chuan alo nghak reng ang che. Ka hnen a i lokal ve theih nan ka Pathian hi lo bel tlat ang che"
"Thi tur ang maiin lawm i awm le" a ti a, ni e, ka la thi ang. A hnai tawh viau maithei a, ala hla viau thei bawk. Ka taksa chaklo tial tial hian in rinlawkna min neihtir a ni. Tunah pawh ka luak a chhuak ut ut reng a, nitin hian na dang ka neih belh zelin ka hre mai. Ka taksa dam nan ka dil lo ka tih tawh kha mahse na leh hrehawm tuar lova thih ka dil ţhin. Ka thi lai hi min hmangaih ve tu mi tlemte te tan a hmuh hrehawm a nih ka hlau ber. Ka kachhung na leh zan rei a thlan in min bual huh vek ţhin laite khan ka nu kha pangai sela chuan he natna hi an hrechhuak hma anga, chhan theih ka la ni tur. A rawn lanchhuah leh meuh chuan a nasa tawh lutuk a, a tlai tawh. Engkim a tlai vek tawh.


"Ka hmangaih che" min ti leh a, a tihziah danin ka chalah leh ka hmuiah a fawp a, tui tak leh thlamuang taka ka mut theih nan min kuah a, ka thinlung kehchhe vek tawh a ka ngaih kha Damon leh Pathianin min zawmkhawm sak vek a ni. He natna ka nei pawh hi ka vui ta lo. Pathianin leia hrehawm ka tawrh reng a phal lova, sual viau ţhin mah ila a hnen a awm turin min duh a ni.
"Ka hmangaih che" ka ti sep a, hun reilote chhunga hetiang taka hmangaih ka nei hi mak ka in ti. Kan in hmangaih a, hun hlimawm tak hman dun ve na hun kan nei tlem ta deuh a ni. Vanramah kan inţhen tawh dawn hleinem.


"Muhil rawh ka lo veng dawn che nia" a ti a, nidangah chuan ka sam min chulsak ţhin a, tunah erawh chul ngai a ni tawh lo. Lukhum lianpui ka khum loh leh puanin ka tuam a, duhawmna pawh ka nei tawh lo. Kan taksa leh kan nunah hian thu kan lo va neilo em.
"I kal hunah pawh i rilru ti hah duh lo la, hetah hian ka lo nghak reng ang che. Him deuhin ilo haw leh dawn nia" ka ti a, ka ngai dawn a, ka sawilang duh lo. Kallo turin ngen ila chuan a kallo leh mai ang. Chutiang em chu ka ti duh biklo. Ka mamawh ang chiahin a unaupa, a phirpui ngei hian a mamawh ve tho a ni.


"Min lo nghak reng rawh. Thil ka lo hawn ang che. Lo dam deuh tawh la, duhna lam apianga kal thei lo ni tawh la, ka chamrei dawn lova, reilote chhunga i hmasawnna min lo hmuh tir dawn nia" a ti dam dap a, a landan leh a chhungril in millo lutuk hi mak ka ti ţhin a, ka la ti reng bawk dawn a ni.
"Damdawiin ah nilo, in lama lo awm ka tum ang"
"A ţhat ka ring. Damdawiin hi lo chhuahsan la, inah eitur te lo buatsaih la, nupui ţha tak ni thei turin inzir la" a ti a, cham rei lo tur chungin hun rei tak nghah ngai chi a sawi tho a, kan inneihna chu van mipuiten min buatsaihsak zawk ang. Khawvel inneihna ropui ber ai pawhin a ropui daih zawk ang. Keichu Isua kiangah ka kal ngei dawn tih ka hrechiang tawh a, Damon hi a lokal ve theih loh ka hlau em a ni.



DAMON'S POV


Dar12 a pel tawh a, ka la muhil thei lo. Ka harh telh telh emaw tih mai tur a ni. A muhil lai ka enreng a, mumang ţha tak nei niawm takin thlamuang takin a muhil a, a natna a pawmthiam tawh zia a lang. Thla hnih leh tlem chauh ala ni. Ka hmangaih takzet tho si. A hlimna leh lungngaihna te thlengin ka ţawmpui hial tawh. Min kalsan anih chuan nundan ka thiam lovang. Ka thutiam ang khan ka nunhlui ah ka let lovang a, nausen ang maiin nundan ka zir thar leh a ngai thung ang.


An mu reh vek tawh a, thawm hriat tur a awm tawh lo. Ka hmangaihber thaw ri sek sek chu ka ngaithla reng a, ka ngaihtuahna ah thil tam tak a rawn lut a. Zingah ka ruala a thawh ve tawh loh ka hlau ţhin a ni. Hahdam taka a muhil hi lawmawmin hmuh nuam viau mahse a mit a chhin hlen ka hlau ţhin a ni. Nu leh pa ngaihsak tu chu nei sela hetiang hi a thlen a ngai bik lo tur.


A kal dawn anih pawhin ka hmangaih zia hria se ka duh. A mit a chhin hlen dawn thlengin ka hmangaihna thu hi hrilh ka duh a, ka thiam ang angin ka lantir a, hriattir ka tum ve nasa ţhin. A ta chauh ka ni a, ka ta chauh a ni ve bawk tih te hi lantir ka tum ve ţhin. Midangin min ngaihdan leh an rilru put hmang ngaihven ngailo ka nih vangin tihdan ka thiam lo hle thung.


Min kalsan turin ka duh lova, ka kianga kumkhuaa awm turin ka duh a, chung chu ka thuneihna piahlam daih a ni. Bible ka chhiarsak a, ngaihnawm ti takin a lo ngaithla a, a naupanlai aţang khan kaihruaitu ţha nei ve sela chuan hmeichhe fel ti a sawi sup sup a ni ve ang. A duh vang reng a nunkawng diklo kha zawh a ni lo a ni. Ka hriatchian poh leh ka duhna leh hmangaihna a zual a, khawngaihna te nen a in pawlh vek. Lalnu ang maia enkawl ka duh laiin a natna hi ka enkawl thiam ve lova, doctor ka lo ni lo hi ka inchhir rum rum ţhin.


Ka nu ka rilruah a rawn lang a, tlai viau tawh mahse ka call tho. Jason ngaihtuahin a muttheih bik ka ring lo. Reilo te a ring hnua a aw ka hriat chuan tawi te in ka nui a, ka rindan chiah a ni.
"Ka kal ve lo thei angem?" ka ti a, ka nu ka biak ţhat ve ţum tak a ni.
"Thei lo. I unaupa in a mamawh che a, i hmuh ngei a ngai. Jason ngaihtuahin ka muhil thei lova, kal loh kha rawn sawi tawh suh" a rawn ti hlak hlak a, a thinrim viau ni tur a ni.


"Kal loh ka duh chhan i hria em?"
"Hria e. Sandra leh Abi an awm alawm. Ipa pawh a awm a"
"Sandra leh Abi ten Sangsangi an enkawl hman tho chuan Jason bulah kal zawk sela, kei hetah ka awm ang a" ngen ngawl takin ka ti leh a, thinrim taka a thaw hrawk ri pawh a chiang viau tawh.
"Kal thei annih loh dan kan sawi tawh kha. Nu leh pa te thu hnial reng hi thil ţha a nilo. Tun hi i duhdan a kal hun a nilo. I thawmhnaw kan siam peih vek tawh a, zingah rawn haw ang che"
"Duhlo ta ila"
"Jason ngaihtuah rawh. I khawngaih ve lo em ni?" ţap ţuau in a rawn ti leh tawh. Fate hmangaihna hi engtiang chiaha nasa nge anih ka hre lova, ka nu hian a hmangaih bik emaw tih mai tur a ni ţhin.


"Damon ila awm em?" a rawn ti a, chhang tawh lovin ka ti tawp a, reilote chiah a ni ang. Jason ka hmu zawk anga, Sangsangi hnenah ka let leh ang.


A rum ţuah ţuah reng a, a taksa a sa vur bawk. A khuasik anih ngei ringin hmanhmawh takin nurse duty ka ko a, an rawn buaipui vat a, nachhawkna in an chiu a, amah phei chu a harh miah lo. A hmui pawh a sen tawh lo. En mai pawh hian a chau tih a hriat a, heti chung hian ka ruala zing a harh ve ziah turin ka la phut tho a ni. A zaidam vangin a bula awm a nuam a, a thinlung kehchhe vek tawh a a ngaihlai pawn midang ngaihdam ala awlsam viau thung. Hetiang khawpa hmeichhe ţha leh pawisawi hian ngatinge he natna ţangkailo tak hi a neih bik? Pathian ka dem lo. A natna tuar tu zawk pawhin a dem loh chuan lo dem ngawt thei ka ni bik lo. A thlamuan zia ka hmuh hian hmun nuam zawkah a kal dawn tih ka hrethei a ni. Sangsangi kalna a kal ve ngei tumin keipawn ţan ka la sauh sauh ang. Ka nun vawihnih naah chuan ka hmangaih hi ka chan tawh lovang.


A khawsik a reh hun nghakin ka ţhureng a, kalsan ka hreh takzet a ni. Keimah ang hian an duat ve lo ang tih ka hlau a, a thinlung an lo tihnat sak leh te ka hlau a, hmangaih ka neih aţang hian keimah ka in ngaihtuah ber tawh lova, hlauh pawh ka ngah sawt. Kei aiin ka hmangaih hi ka ngaihtuah tawh zawk.


Zing ni chhuah rualin ka harh a, ka kalsan ni tur a ni tawh. Min kalsan hlau tu zawkin ka kalsan rih dawn chu anih hi. A chal ka dehna puan ka la thla a, thisen neilo ang maiin a dang bel a, a lainatawm takzet. A duhawmna leh a mawina hmuh tur a awm tawh lova, a thinlung leh ka thinlung hi inzawm hman lo sela chuan a ţhatna ka hmu bik lovang. Tunah chuan a pawnlam mawina in min hip tawh lova, ka thlakhlelh leh ka en ber pawh a ni tawh lo. A chhungril ka hmuchiang a, ka ngai em em reng a, a kianga awm reng ka duh phah a ni.


Ka chhungten min rawn biak an tum reng a, ka nin hnuah phone ka switch off. Ka haw loh an hlau ni ngei tur a ni. Khuma bawk chunga ka lo mutthilh vangin ka na ţhum a, ka dar te ka chum leh rih a. A rawn harh ve veleh hlim hmel takin ka lo nuih a, a lu dawmin mit a chhing leh vang vang a, a men leh rualin a ban a thlak thla hnak a, nidang aiin a zawi daih zawk.


"Na inei em?" ti a ka zawh chuan lu a thing a, a thaw halh a, ka kalsan theihloh mai te pawh ka hlau.
"I neih chuan sawi la" a hma ang bawkin lu a thing leh. Zan lama a khawsik khan a ti zawi ve anih ka ring hmiah. Thildang ka puh duh lova, a zual pawh ka ti duh lo. A ban cher ve tawh tak a rawn pharchhuah chu ka lo vuan a, duat takin ka lo fawhsak.
"Ka lo nghak ang che. Cham rei lo la" a ri zawi sap a, a ţawngzawh rualin thawk a la leh halh bawk.
"Ka chamrei lovang. Min lo nghak reng dawn nia, lo dam la, tun aia hlim zawk hian kan inhmu leh dawnnia" ka ti a, ka haw hunah hlim taka kan inhmuh ka beisei. Jason ka sawipui ang a, a tam berah zanhnih bak riah ka in ring lo.


"Ka piancham a thleng ţep tawh a, a lawm naa hak tur kawr mawi deuh lo hawn rawh aw" a ti a, tun thla tawp hi a piancham a ni tawh tak e. Ka leithiam dawn lova, ka nu in min pui thei ang chu.
"Ka lo hawn ang. I inhmeh deuh tur ka lo hawn dawn nia"
"Rawn rei suh" a ti leh a, khum a bawh leh pahin a kawngah ka kuah a, theih chu nise ka kalsan lovang.
"Rei lovang. Tih tur kan nei ve ve anih chu. Min lo nghak ang a, keipawh ka chamrei lovang. Hlim taka inhmuh leh kan tiam kha aw"
"Awle" a ti sep a, a mit sir lam a a mittui rawn luang chu ka lo tihfaisak a, ka rilru a buai khawp mai. Sangsangi kianga awmreng ka duh a, ka chhungten min tur ve sek bawk nen, ka unaupa ka ngaihtuah lo thei bik bawk si lo a ni.


"Kal lo turin min ti dawn em?" kalsuh min ti sela chuan ka kalsan lui lovang. Jason hmu tur chuan ka nu leh pate kaltir mai ka duh tawh laiin ka pa chu Sangsangi bula awm turin ka duh tho bawk.
"Dawn lo. Kal rawh. Keimah ang thoin Jason pawn a mamawh che a, ka chelh lovang che. Ka lo nghak reng zawk ang che" a ti a, a kalsan tu tur zawk hian ka huphurh a ni.
"I kawr tur nen ka lo let leh vat dawnnia" sana a kal pur pur a, muangchang lova in lam ka pan hun a ni tawh.


Ka kal hmain ka fawp a, a tawpna ni lo rawh se.
"Kan thutiam kha tih hlawhtlin tum ve ve ang aw" ka ti leh hram. Harsa ti tak chungin ka kalsan a, kawngkhar bul aţangin ka hawi let leh. A nu in a biak mawlh mawlhna ngaihsak miah lovin min lo enreng a, nui lui chungin ka kut ka vai a, ka rilruin 'a rei lovang' ka ti nawn leh a.


CONT...(Story ania, a tak tak ang diak diakin a kal theilo tih ka lo sawi nawn leh e hehe)

BROKEN-13



"In ka thleng chiah a" a ţawng ka hriatchian lehzual theih nan phone ka dah rem leh te te a, ka ban ka dah kang reng peih lova, ka mut bawk vangin lukhamah ka dah tawp a, ka beng nen ka sik tir. Ka phone a rik rual khan min awmpuitu ka nu in min chhuahsan.


"I hrethei em?" a rawn ti leh a, a ri rawk rawk bawk a, a pindan lamah a kal tlang ni awm tak a ni.
"Aw hrethei e"
"I khuasik em?"
"Aih, ka ţha vek" ka ti sep a, hetianga in biak ai hi chuan ka bulah khan awm se nuam ka ti daih zawk. Chelh tum ila chuan ka chelh thei ang. Ka hmasial vanga a unaupa in a tawrh kha ka duh silo.
"A ţhat chu. Kan intifel anga, ka rawn be leh ang che aw"

"Awle" ka ti mawl tawp a, a tih tawp rualin ka inlet thawk. Nikhat pawh a rei dawn a nih hi.

Ka luak a chhuah leh deuh vangin ka zangthal leh a, muangchangin ka pum ka chul a, ka thaw halh halh bawk. Ka thisen zama damdawi rawn thun leh tur a nurse lo lut pawh nidang angin ka lo lawm peih lo. Damdawi chi hrang hrang nitin min pe reng a, awmze nei pawn a lang lo. Min ti chau zual mai mai tu an niin ka hre mai. Damdawi tel miah lovin inah min enkawl mai sela ka duh daih tawh zawk.


Nurse rawnkal hnua Damon te upa ber Sandra ka hmuh ve chuan mak ka ti angreng. Ani pawh ka lo be hmasa peih chuang lo. Ka khum bul chhuara damdawi tam tak awm khawm ruih chu a rawn enkual a, thawm dim vak lovin a khawih ri rawk rawk a, min be dawn lo emaw ka tih hnuah "Eng nge i an?" min ti ve hram. Nurse chhuah veleh ka khum bula chair ah a rawn ţhu thla ve tehmial bawk.
"Ka ţha e" ka ti sep a, in a haw dil mai te ka duh a ni.


"Vawiin i khuasik em?"
"Aih" ka ti leh ringawt a, ani hi chu ka hmuh tirh aţanga ka nel vak loh kha a ni hrim hrim a, a hmel a zahawmin a rum a, sual ti lo mah ila ka hrechiang ve em em lo. Sawitur kan hrelo dun bawk a, ngawi rengin kan awm tlawk tlawk a, a chhuak leh mai bawk lo nen ka awm a ti nuam zan lo. In veng rengin ka awm ka ti mai.


"Abi a lokal dawn em?"
"Ka hrelo le, lehkhazir tur ngah a inti deuh a, zanah a rawn riak thei ang chu" ti a min chhan te chuan ka lo inthlahrung em em a, a unaute pahnih ka tibuai reng a, kei damlo chaklo tak ka ni bawk nen pui theihna ka nei ve bawk si lova, nuam ka tih loh phah.
"Damon awmloh chhung chu Abi class kal hlan a ka rawnkal zeuh zeuh a ngaih hmel"

"Angai chuang lo" ka lo ti vat. A awm hian nuam ka ti lo zawk.

"Ka awmrei hman dawn chuang lova, ka hman changin ka lokal ţhin dawn nia" a ti lui tho a, ka hnial zui ta bik lo.


Ka lo muhil sek nge ni ka phone ri ah chiang lo ruaiin ka harh a, mit chhin leh mai ka tum laiin Damon ka hrechhuak zawk. Phone ka en vat a, a lo ni ngei bawk a, a kal turin min lo biak a tum ni ngei tur a ni. Rei pawh ka muhil lo a nih dawn hi. Sandra a lo la awm reng a, Damon ka biak dawn phei chuan ka hnaihah lo awm lo se ka duh. Ka in ngaihtuah buai vel chhungin a ri a tawp a mahse a rawn rik chhunzawm lehnghal.


Ka tihdan ngaiin lukhamah dahin ka delh bet a, "I chau deuh a mi?" a tih chu ka hre zawm zat a.
"Ka lo muhil a" inthiamlo tak chunga tih pahin Sandra ka melh ru ralh a, kalsan ala tum lo anih hmel.
"I muhil leh duh zawk em? Hei ka nu nen kan kal mek a, ka pa in min thlah a" a rawn ti zung zung a, mutthilh ai chuan amah biak ka duh zawk daih.
"Ka harh tawh hi"
"Jason pawh a harh tawh an tia, cham rei a ngai lovang. Ka thlen veleh Jason ka hmu anga, i kawr tur chu ka lei dawn nia" a nu leh paten a thusawi an hrevek awm sia, nuam lo ka ti leh hnuhnawh. Damon lahin inthlahrunna a nei ve dawn der mai si lova.


"I buai chuan angai chuang lo" ka ti ţha leh vel a, lei kher lo mahse pawi ka ti lo. Englai mahin ka piancham ka ngai pawimawh ngai lo. Ka thinlung tina tu ka hriat belh zelna hun anih ţhin vangin thleng lo tawp mahse pawi ka ti ngai lo.
"Ka rawn lei ang. A nalh ber ka rawn thlang dawn nia. Tunge awmpui che?" a tih chuan a awm reng laia Sandra hming sawi ka hreh ngang mai. Min chhuahsan a tum miah bawk silo.
"Sandra" ka ti sep a, ka melh pah bawk a, a hming ka sawi rualin a rawn hawi vat lehnghal.


"A ngaihsak che em? Mamawh ineih chuan tir hreh suh aw. Abi ka bia ang a, class ban veleha lokal turin ka lo hrilh dawn nia"
"Min ngaihtuah lutuk suh. Lehkha zir zawk rawh se"
"Sandra bula awm kha nuam iti lovang tih ka chiang" a rawn ti a, a dik khawp mai. Ka nel ve tlat lova.
"Ka nu a awm alawm"
"I duh duh a i tirh ngam tur Abi kha a ţha ber. Amah ai Jason hnenah ka kal tawh a, awmpui che chu a tih ve tur a ni"
"Anih chuan i tih dan dan le" ka ti ve ta a. Ka biak peihloh pawh a min hrethiam tu tluk an awm lo. Bengvar chhuaha lo kawm chawp tur ai chuan a nuam zawk hrim hrim.

"Ka la thlen hlat loh nen ka ngai nghal che" a rawn tih hnuah a nui zui hawk a, min ngaih lutuk loh a zir angai a ni. Tuna in hlat taka kan awm tur te hi Pathian remruat anih ka ring tlat tawh. In hlat lo ila chuan englai pawn kan awmdun reng ang a, kumkhua atana ka kalsan hunah a tuar thiam lo mai mai zawk ang.
"Keipawhin" ka ti ve a, ka sawi thui ngam lo.
"Sandra ala awm a mi?"
"Aw"
"A awmloh hunah min rawn be rawh aw. Abi chu kan hrilh ang e"
"Awle"
"Ka hmangaih che"
"Nangpawh" ka ti sap a, sawi ve chak mah ila mitmei ven tur ka nei a, ka ngam lo. Anu leh pa awmlaia a sawingam vang pawn a thutak tih ka hre mai. Ka hlim ru veng veng a, hmangaihtu diktak ka nei tih hre chung talin ka kal thei dawn anih hi.


Ka chau ngawih ngawih a, ka mut a chhuak em em bawk. Chutih rualin ka ruh ana ţhum a, a kham ut ut in ka hre mai. Ka ke ka ti che reng a, ka mutna puan phah ah ka ban ka nawr reng bawk a, "Ngatinge?" a rawn ti vat a, ka thil tih lai chu ka ti tawp nghal.
"Ka chau" ka lo ti ringawt a, ka chawn bawr vel ka puan sinlai chhanah a rawn hmet a, ka awmdan chu engtinpawn a nuam thei lo. Ka ruhna sawilang lo mah ila min hmet reng tho a ni.


"Ka lo hmet che anga, mutthilh tum rawh. Damon chu be tawh rih lo mai rawh. A thlen veleh a rawn be tho ang che" tih pahin min hmet mawlh mawlh a, mit ka chhing a, chiang takin Damon ka hmu a, min kalsan tur lai ang chiah khan ka hmu a, a hrehzia te kha ka hmu nawn leh a, ka chelh mai lo kha ka inchhir leh rum rum hial a ni.


"A naupanlai aţanga thuawih duh miah lo ania" ka meng kawk a, Sandra chuan min lo enreng a, a mitmeng chu a lang hriam tho nain min huat lohzia pawh ka hmu tel.
"A inkhawm duh lova, ka pa hian a hruai lui ţhin a, ka pa a zin phei chuan tuman kan tilui thei lo. A rawn tleirawl a, school kallo a len mai mai te a ching leh a, zirtirtuten a thuawih loh vanga ka nu leh pate koh chang pawh an ngah. Ti suh kan tih chu ti rawh tih ang vel ania, tun thlengin tu thu mah a zawm ţha duh lova, Jason leh nang hi ka hriat ve theih aţanga a ngaihpawimawh ber in ni" a ti a, mit ka chhing a, Damon bawk a lo lang leh. A nui hmel te, ka ruih em em laia min ning hmel te leh a thinrim hmel te, engtinpawn awm se ka mitah chuan a ţha em em vek a ni.

"Ka rin aia nasa in a hmangaih che a, i lo damchhuak leh anih chuan Pathian lam hawi tawh turin kaihruai la, i damchhuak theilo anih pawhin vanramah, Pathian hnenah i kal dawn tih hrechiang sela, i hnen a kal ngei tumin a bei ve ang. Nangchu Pathianin insiamţhatna hun ţha a siamsak che a, he natna inei hi vui chang i ngah ka ring. Mahse han ngaihtuah la, rui chunga accident a thi an tam zia te hi, an accident na hmunah te an thi nghal a, an sual avanga Pathian hnen a ngaihdam dilna hun tlemte pawh annei lo. Nangni chu in ruih bawk bawk a, chak tak tak a in tlan fua fua lai pawn Pathianin a hum tlat cheu a, tunah ama lam hawina hun a siamsak che a, vui lovin lawmthu sawi zawk rawh. He natna hi thil ţha nilo mahse Pathianin i thlarau damna hun a pe che pawh hi lawmthu sawi rawh" min ti a, chau viauin mutthilh daih duh mah ila ka ngaithla uluk khawp mai. A sawi dik ka ti a, thihna hun tam tak ka neih laia Pathianin min hum tlatna kha ka lo hre ngai miah lo. Kan tello hian Pathian hi a awm thei. Kan rui a, amah kan fak ngai miah lova, amah ring tlat tu tam tak a neih laiin keini rui mai mai min la hum tlat a, Pathian tello a awm theilo zawk chu keini hi kan lo ni reng a ni.


"Ka sual thupha chawia ka ţawngţaina kha a pawm duh anih chuan thi mah ila vanramah ka awm ngei ang" ka ti a, ka thaw zui halh a, chauh deuh hi chuan ţawng pawh alo peihawm loh anih hi.
"A lawmawm nasa anih chu. Keipawn ka ţawngţaipui nasa che. Ka nau pawh nangmah aţanga inzirin ţha taka a awm zawm zel ka beisei tlat a ni"
"Party leh ruitheih thil tih chu a bansan ngei ang" inringtawk takin ka lo ti ve a, thu a tiam tawh a, thutiam tawh tih hlawhtlin loh chu zahthlak leh mipa nih lohnaa ngai chi a ni bawk a, a luhlulna leh chapona avang pawn a ti hlawhtling dawn tih ka chiang a ni.


"I chungah hian kan lawm lutuk ania Sangsang. I dam leh ngei kan duhsak pui ţheuh che" a ti dam dap a, an ţawngka chuan damchhuak leh turin min duh a, an hmelah beiseina an neih tawh loh zia ka hmu. Keimah takngial pawh hian dam ka in beisei tawh lo chu anih hi.



DAMON'S POV


Kan thlen veleh Sangsangi biak ka tum nghal a, Abi in phone lo la in a mutthilh thu min rawn hrilh. Airport aţangin taxi kan hmang a, hospital ah kan kal tlang ang. Abi bawkin a muhil lai thlalak a rawn thawn a, ka phone kenna kut chu ka malchungah nghatin ka en vang vang a, cherin dawldang viau mahse ka mitah chuan hmeichhia zawng zawng zinga ţha ber a la ni reng tho.


"Ava cher belh leh nasa tawh ve" ka nu in a rawn tih veleh phone ka ti thim a, ka ak ţha nghal.
"Ka van lainat tak" a ti leh hluai a, a sam tla a hui kiang a, pawn lam a thlir leh a.
"In lainat lo aniang chu a hlatah min kaltir hi" ka ti bung nghut a, Jason a biak theih tawh an rawn tih kha chuan kallo tur a min tih ka ring a, ka ringsual a ni.


"I unaupa hian a mamawh ve tho che a, hriatthiam tum rawh. Tun dinhmunah phei chuan kei ai pawn a ngai daih zawk ang che"
"Naupang a ni tawh hleinem" luhlul chhuahin ka la hnial tho.
"Pa inti deuh chungin i khawsik vanga school i chawlh pawn Jason-a school kal i ngaih vanga i ţah ziah tho kha"
"Naupanlai thilthleng tawh anih kha" ka ti hmuk a, eng fiamthu mahin ka nuih an ti za tawh lo.
"Jason pawh tunah a damlo a, accident lehnghal, a thlaphan tur zia ngaihtuah la, a mamawh che, a kianga i awm a ngai"
"Ban pakhat tliak leh cancer chu a inthlau viau lo maw" nui suk chungin ka melh a, a thinrim deuh niin a lang. Ka bialnu aichuan a fapa a hmangaih a, a awm lo lem lo. Nu a ni miau a lawm.


"Engtia rei nge kan cham dawn?"
"Ka hrelo. A la sawitheih loh"
"Zanin ka riahpui ang a, naktuk ka haw leh mai ang"
"I rapthlak khawp mai" a ti hlak a, a hma ai daihin a thinrim niin a lang.
"Ni e ka rapthlak. Ka bialnu damlo chau zet ka kalsan hi ka rapthlak a ni" ka ti lui a, min chhang duh tawh lo.


Hospital kan thleng a, Jason-a ţhianpa in pawnah min lo hmuak a, min hmuh chuan a thlamuan hmel khawp mai. Hetiang hmunah te hian Sangsangi hi enkawl se a dam chak zawk daih awm sia, a nu kha lo pangai deuh sela chuan keimah nen a kan inhriat ve hma daih khan a natna te pawh an hrechhuak ang a, hetiang hmunah hian kalpuiin a dam daih tawh ang. Amah a in hmangaih lutuk a,fa a nei tih hrelo derin khawvel a chen a, a fanu thih dawn ţepah heti hian a harhchhuak a, a tlai tawh. Amah vanga a fanu thinlung kehchhe vek pawh a haider thei a, na te tham tak a neih phei chu a ngaihsak lovang. A pawi ber zawk chu tuna a natna hi na te tham tak aţanga rawn inţan a ni hi a ni. Lo inhre hloh lo phei ila chuan hrehawm takin a thi ang. A tlu ang a, buaipui awm si lovin a ruang an chhar nawlh lovang tih pawh a sawitheih loh. Sangsangi hetianga a awmchhanah hi chuan a nu hi ka dem a ni. Nu leh pa nihna chanvo hlen thei miah lovin fa annei ve ţhin hi a pawi anih hi.


Jason lah ka tum loh dan deuhin ka hmu a, na vak lo tura ka ngaih kha hliam alo ngah phian. Kan thlen lai tak chuan a muhil a, a lu an tuam bur a, a hmai leh ban tliak lo zawk lam pawh a dukin a pilh phung mai. Hnamdang kara hetianga ka hmu chu ka khawngaih ve. Thla ka la a, ka pa, Sandra leh Abi te ka thawn vek a, an lainat thu an rawn sawi rang hlawm khawp mai. A harh veleh a biak tir turin min chah ţheuh bawk.


A rawn harh veleh ka nu in "Na inei em? Ila hlau em? I taksa kham lai a awm em? Eichak inei em?" tiin zawhna tam tak alo zawt nghal a, keichuan khum bula dingin ngawirengin ka thlir.
"Ka ban ana" a rawn ti a, a ban tliak lo lam chu ka nu in a hmehsak nghal a, Jason chuan min rawn en zawk a, a inthlahrun ve hmel zek a, a biang te a vung a, chhungte a mamawh lai tak a ni ve tho va, inthlahrunna tur a nei hran lo.


"Sangsangi eng nge a an?" ka ţhut thlak ve rualin min lo zawt nghal. A ţawng ring lo a, a taksa a chet deuh a piangin a ner leh sawk sawk ţhin a, a taksa pawh ala na ţhem ţhum a nih dawn hi.
"A ţha lo" ka ti mawl tawp a, a dinhmun a chhe zel zawk a tih theih tawh.
"I rawnkal a phal ami?"
"Sangsangi nen chuan kan awmdan turah duhthlanna kan nei ve lo" ka ti a, in hmachhawn a ţhu kan ni bawk a, ka nu ka en kher. Kan nun tawh dan ka sawi lova, Jason accident hnulam a ni ka sawi ni.


"Jason nakinah kan sawidun dawnnia" ka nu in a rawn ti veleh a, tum nei ran a min kaltir an nih ka ring lova, Jason hian ka nu aia min ngaih zawk ka ring miah lo bawk.
"Eng nge sawipui i tum?"
"Jason hi a inthlakna vel laksak turin kal rawh. A tlai hma hian che zung zung rawh" a ti a, ka zawhna lo deuhin min chhang a. Sangsangi nen a min pawh hran duh vang hrim hrim anih chuan ka lungawi lo khawp ang. Tunah phei chuan Jason ai hian Sangsangin min mamawh zawk.


"Kal rawh. A tlai chhiat hma hian che zung zung rawh" a ti leh a, engpawh chu lo sawipui se Jason hnen aţangin ka hreleh thovang. Tha tho lo deuhin ka chhuak a, khawlum leh ka boruak tawn chu a in mil lo khawp mai. Hahdam nan a bar a kal a, thil in zawk te ka chak. Sangsangi hnen a ka intiamna tih hlawhtlin ka duh vangin kal tumna ka nei lo thung. Kan duh leh kan chak lai ber te, mamawh ni a kan inhriat lai te a kan hnar theih chuan hnar zel a awlsam tawh.


Abi ka be leh a, Sangsangi ala mutthilh thu bawk a rawn sawi leh. Nidang ang lo takin a mu nileng deuh ţhak a ni awm e. Ka chhungte thu ka lo hnial lui lo kha ka inchhir leh hnuhnawh a, ka haw leh hun chu a hma ai daihin ka duatin ka ngaihsak ang ka ti rilru mawlh mawlh. A baihvar ve reuh bawk nen, ka khawngaih vang hian theih chu nise a tawrh ai tawrhsak thlengin ka huam.


Ka nu min tirhna a kal hmasa lovin Sangsangi kawr en turin ka kal ta zawk. A cher tawh angreng viau a, a hak tawk ka hrethei mai ang chu. A kawr tur nen ka haw dawn a, min lo nghahhlelh lehzual ka ring a ni. A piancham hlim taka kan hmandun theih ka beisei. 'min lo nghak reng ang che', tiin keima hriat phak lekin ka phun sup a.


CONT...

---

BROKEN-14



Sangsangi kawr tur ka lei kengin Jason-a in luahah ka lut a, a thim mup a, kawngkhar bul maiah light on na a awm a, ka hmet eng leh a, bungrua tlem a nei a, a in luah a lian lo bawk a, lehkhabu a tam ber.


Dawhkan pakhata lehkhabu awm ho ka dahsawn a, ka kawr lei ka dah a, en nawn leh ka duh vangin ka phawrh chhuak a, a fual hnalh a, a inhmeh khawp ang. A tawk leh tawk loh tur erawh ka chiang lo khawp mai. Ka thil leisak hrilh tumin ka call a, Abi bawkin a lo la leh.
"Ava murei tawh ve, dawt min hrilh a ang tawh" ka ti a, nileng pawn ka be thei tawh lo a, ka ngaih a ţha tawh lo.
"A khuasik a, a chau lutuk a" a rawn tih chuan ka ding hluai a, haw mai ka duh leh tawh.


"Mutthilh tir lo mai rawh a harh theilo mai ang"
"Mutthilh a mamawh. Ka awmreng dawn chanchin ka rawn hrilh zel ang che"
"Lo veng tlat ang che. Zan reiah pawh a bulah awm zel ang che" ka hlauthawng a, ka awmna hmunah hian ka bet miah lo. Sangsangi leh a awmna pindan chiah ka ngaihtuah naah a awm a, ka mangang a ni.


"Ka veng reng ang. Jason kha bia la naktukah rawn haw rum rum mahla a pawi lo. A chau riau ania" a rawn tih phei chuan ka chiai nasa a, Jason a ngaihtuahawm loh chunga he hmuna min kaltir nachhan hi ka hre lo a ni.
"Ka nu lo be ve rawh. Jason chu a ngaihtuahawm loh. Sangsangi chu engtin chiah maw a awm?"
"Natna dang a nei a, a natna sa aimah chuan thil dang hi a natpui tawh zawkin ka hria. Ka rilru a nuam thei tawh miah lo. I awm hla bawk si, a nu lah hi a rukin a ţap reng a" thlaphang takin a rawn ti a, a hma aia dam zawka min lo nghah a intiam a, hlim taka inhmuh leh kan intiam a, min lo nghak ang. Ka awmloh laiin thil pawi a thleng lovang.


Jason-a thawmhnaw tur ka lakhawm sawk sawk a, hospital ah bawk ka let leh. Hospital hi ka in pakhat ang a ni tawh. Ka thlenin ka nu a lo awm lova, doctor nen an inhmu a ni awm e.
"Sangsangi a ţha vak lova" ka tih chuan Jason pawn a bengkhawn khawp mai.
"I lokal ve thei hi mak ka ti reng a ni"
"Tihluih ka ni. Ka nu bulah ka haw leh theih nan min dilsak rawh"
"Nu leh pa thuzawm loh chu kei aiin i thiam zawk daih. Hnial ta che" min ti duh lek chauh a, Sangsangi hlata ka awm chuan ka bet thei lo a ni.


"Hnial theih an ni lo. Thisen cancer hi an thi vat ţhin em ni?"
"Thi vat an awm a, thi vat lo pawh an awm. Vanduai deuh te chu awm ve bawk e. A vanduai zinga Sangsangi a tel hi a pawi khawp mai. Natna dang ho te a kan ngaih hi an thihpui duh chawk lehnghal" a tih chuan min ti hlau lehzual. Ka hlau a, ka hlauhna hi ka paihbo thei si lo a ni. A khuasik reng a, natna neilo tan chuan khawsik mai mai chu ho lam tak a ni. Sangsangi tan chuan a pawi viau tawh zel si.


"Ţawngţai ngai miah lo khan ka ţawngţaisak ve a, chhanna a awm chuang lo"
"Pathian i dem leh ringawt a?"
"Dem love, ka rawnkal hma khan Sandra nen kan inbia a, Pathian chuan Sangsangi thlarau damna hun a pe a, lawm zawk tur ka ni tih min hrilh a"
"Sangsangi pawh hrilh ve sela a ţhat chu. Nangpawh Sangsangi aţang hian inzir rawh. Ruihhlo leh khawlai nun hian engmah a siamţha lo. Bo lehzualna mai mai"
"Thu ka tiam tawh a, ka ti hlawhtling ang" ka ti sup a, ka tumruh hle bawk. Khawvelah min awmpui lo mahse van aţangin min vil reng dawn tih ka hria a ni.


Ka nu a rawn let a, "Karkhat vel Jason kan enchhin ang a, a zia veleh kan rualin a haw ve ang. Aman a zuam hunah helai hmunah hian a kal leh chauh ang" a ti a, karkhat lai awmhman ka in ti ve lo a ni.
"Keichu ka haw ang" ka lo ti a, ka nu ka ngaihtuah a, amah chiaha helaia a awm tur chu khawngaih mah ila a dam zawk ania, tunah chuan Sangsangi aia min mamawh tu an awm lo.


"Kan vaiin kan haw rual ang" luhlul zetin a la ti ve tlat. Pawisa ka nei a, phallo mahse ka haw lui thovang. Zankhat dang ka riahpui leh ang a, ka haw ang. Ka phone nghawr dat dat chu Sangsangi anih ringin ka en vat a, Cindy zawk a lo ni. Pawnah ka tlanchhuahpui a, a hranga biak ka duh.


"I mawl nge i sual ka tih dawn? Sangsangi hian thil a hre mumal tawh lo. Chuti chung chuan ila kalsan thei amaw?" a rawn ti vin hlak hlak a, mipa mah ni ila chu thu ka hriat chuan ka tha a khur nasa in ţhutna awm hnai berah ka ţhu hnawk. Ka kal hma chuan pangai takin min la thlah thei a nih kha.
"Khawnge i awm?"
"Damdawiin ah ka awm. Midang pawh an tam. I chhungten nawrlui che mahse hnial tur inia sin. Ipa hian Sangsangi dinhmun chiang takin a hria. Hetianga a awm hi i hmuh an duhlo anih ka van ring em" a rawn ti leh a, thinrim viau mah ila ka chhungte ka dem lo. Min hmangaih zia ka hmuthiam ve tawh a ni. Ka nat an hlau a, hla takah min tir a, ka awm hnaih aiin ka na zawk a, ka inthiam lo takzet.


"Ka rawn haw vat ang. Min lo nghak turin lo hrilh rawh"
"Hrilh mah ila awmzia a nei lovang. Natna dang a kai tel nual a, keinin kan tawrh theih ang kha a tuar ve thei tawh si lova, i awmloh vangin a khuahar dawn bawk nen. Rawn haw rang la a ţha ber"
"Ka rawn haw ang" ka ti nawn leh a, a piancham a a hak tur nen lam ka leisak a, kal thei ala ni lo. A kal anih vaih chuan kumkhua in ka hmu tawh lovang a, ka thih ve hunah chiah ka hmu leh tawh dawn a, ka hmangaihzia tal kha hreleh rawh se.



Ka nu min ngen na angin ka haw lehnghal lova, zanin hi ka zanthum riahna a ni. Naktukah keimahin ka haw ang. Sangsangi chanchin ka zawt reng a, amah tak chu ka be leh thei ta lo. Haw mai tur ka nih tawh vangin ka thil leisak ho ka dahkhawm a, a hmuh huna a hlim hmel tur mitthla in keimahin ka nui a, a changin a ţha an rawn tia, a changin a ţhalo an rawn ti bawk a, ka haw hunah min lo lawm peih ka beisei. Jason-a thil buaipui ngai zawng zawng ka buaipui zawh sak vek tawh a, ka nu pawn min chelh ta bik lo. Min chelh mahse ka tih tur ber ka tih zawh tawh vangin ka hnial ve thei tawh ang.


[Sangsangi ICU ah an dah] ka unaunu message rawn thawn chu ka chhiar nawn tlut tlut a, ka en rei tial tial a, ka khur nasa telh telh a, phone pawh ka hum nghet zo lo. Helai ka kal zan bak kha zan hnih chiah ka riah belh a, a rang mah mah a ni. ICU aţang chuan ka thlen hunah pawh min lo lawm thei tawp nang. Dam deuh zawka min lo nghah a intiam a, damlo lehzualin min lo nghak dawn a ni. Ka thlen hlimah Sangsangi nui hmel hmu hmasaber thei dawn ta lo a ni.


Ka harhchhuak thut a, Abi ka call vat. A la mai lova, ka ti nawn tlut tlut a, vawi tam tak ka tih hnuah min rawn chhang ve hram.
"Tunah eng nge a an?"
"Lo haw rawh" ţap ţuauin a rawn ti a, beidawn lehzualna mai mai a ni.
"Ka pa a awm em?"
"A awm char char a, a kalsan deuh chiah"
"A ţha leh ang. A dam leh mai ang" ka la ti leh hram. Ngaihtuahna mumal ka nei lo. Dam leh tura ka duhna a lian ber a, ka haw huna a hlim hmel hmuh leh ka chak a ni.


"Ala biak tlak lai khan a thlamuan thu a sawi a, chu chuan min ti thlamuang ve a, hlau leh hrehawm ti hmel a pu lo" a rawn ti a, a aw a khur nasa a, a awmdan tur ka hrethiam a, a hmunah awm ve ila chuan biak tlak ka ni hauh lovang. Chanchin min hrilh zel tur a ka tih hnuah kan inbiakna kan ti tawp a, rilru a buai duh rem rem khawp mai.


Zanah ka mu miah lova, khawvar rualin ka insiam ţan a, haw vat vat ka chak rualin ka huphurh tel bawk. Abi nen kan inbe reng a, ani pawh a tlaivar ve ţhak a ni. Samgsangi te vengchhung ami te pawh an tlaivar a ni awm e. Chu chuan thil ţha tak a nih loh zia a lantir. Reilote chhung chauh ka hrechung pawh a ka hmangaih theih, thinlung kehchhe vek chung pawh a zankhat lek a hlim ve theihna tur pawh zawng char char duh mi a ni a, a hlimna zawnna hmun kha pawnlam leh ruihhlo nilo sela chuan hetiang em em hi a tuar lo maithei sin. Mihring siamţhat nan khawdur a ngai a, chu khawdur chu kei leh Sangsangi hian kan tuar mek a, ka tan hian khua a dur hlen ang tih ka hlau khawp mai.


Ka haw hmain ka nu leh Jason ka tlawh leh a, ka kal hmain ka nu in min ţawngţaisak a, ka chunga thleng engpawh ka tawrhthiam theih nan min dilsak a, ţawngţaina thu pawn min ti thlamuang thei tawh lo. Keimah zawk hi thi tur ang maiah ka in ngai a, Sangsangi tello chuan thi ang mai ka ni dawn a ni.


"I awmdan min rawn hrilh zel la, engpawh thleng se thil ţhalo lakah in thiarfihlim rawh aw" min ti a, ka nu leh Jason tello a a chhe ber tawh chu ka thil huphurh ber te zing a mi a ni. 'Min lo nghak reng rawh' ka ti rilru mawlh mawlh reng a, ka hlauin ka phili chung reng a, mipa angin ka awm thei rih lo a ni.



Mizoramah ka awm leh tawh a, ka thlen hian ka thleng tih ka hre leh tawp a, thil dang ka awmdan kha hriat mumal ka nei pawn ka hrelo. Ka buai nuaih a, thil thleng engkim hi mumang ang vek a ni.
"Damon" tia min lo au tu Cindy chu mak ti zetin ka en a, ka haw dawn thu ka hrilh lo.
"Abi hnen aţangin ka hria a, ka nghak rei tawh che. Car ka keng, kal vat vat ang" a ti a, min kai zui dawr dawr a, a ran vulh ni awm takin a kalna apiangah ka zui.


Car hnung lamah ka bungrua a dah lut a, a rit lo bawk a, ka pui lem lo. Khalh thei ka nihloh vangin khalh chhawk tumna pawh ka nei chuang lo.
"Nangmah ang mi i kawp tih ka hriat khan ka nuihzat che a, thutak lem lova i kawp kual mai mai ka lo ring a, ka ring sual anih hmel. Kum thum kan inkawp chhung khan min hmangaih leh hmangaih loh pawh i hre lova, Sangsangi lah reilote chhungin i hmangaih em em tho si" a ti a, muangchangin a tlanchhuak pah a, a damlo masa viau a, cher tawh viau mahse hmuh ka chak tawh a ni. Min lo nuih peihlo mahse pawi ka ti lo. Hmuh a ka hmangaihna thu hrilh leh ka duh a ni.


"Khawvel hi alo zim anih hi, i bialnu damlo ka buaipui thei te hian a lantir. Missionary hna ka dil a, ka tling ve hlauh a, Ka awmna tur hmun a nuam dawn hran lova, mahse ka hlim takzet a ni" a ti a, ka ngawi ngul reng thung. Cindy vangin Sangsangi khan thlarau damna a chanzia ka hai lova, lawmthu sawi tur ka nih laiin eng thil mah ka sawi peih lo. Thlen vat a Sangsangi kianga awm vat ka duh ber tawh a ni.


Ka phone a Abi hming rawn lang chuan hlauhna min neih tir leh a, thu lawmawm ka beisei lo. Tun hnaia kan inbiak apiangin Abi hnen aţang hian thu lawmawm hriat tur a awm ngai lo. Ka la duh lova, a rawn ti nawn leh ta tho a, Sangsangi ka hmuh phawt loh chuan midang thilsawi ka ngaithla duh rih lo. Cindy in car tidingin ka phone min rawn chhuh a, a ngaithla reng a, sawi a nei ve lo.


An inbiak zawhah ka phone min pe let a, remlo deuh chungin min kuah. Nemsawn ka tum poh leh min kuah nghet zual zel a, a hmai a thukru tlat bawk.
"Eng nge a rawn sawi?" tih pahin ka nem leh a, pangai takin a awm ţha veleh mai. A hmel ka hmuh chuan hlauhna bawkin min man leh. A mit sen ramah chuan mittui ala tling pam a, a luan na hnu ni awm tak a biang vel ala huh hliam bawk. Thil thleng chu zawh leh chuan ngai ka ti tawh lo.


"Sangsangi te in a kan kal tlang a ngai" hetianga na ka la tawrh loh avang hian awmdan ka thiam lo. Engtia han hmachhawn tur nge ka hre lo. Thinlung kehchhia an sawi hi ka lo hrethiam ngai lova, thinlung kehchhe vek tan hi chuan kan hun tawn mek mumal taka hmachhawn zel alo har dawn anih hi. Eng hmel nge ka put ka hre lova, ka ţap lova, ka mittui pawh a tla lo. Mahse ana in pawmthiam a har si a ni.


Hlim leh lawm tak chunga inhmuh leh kan intiam a, ka thutiam hlen tumin ka kal mek a, a thutiam a hlen zo ve ta lo a ni. A natna kha a na em a, natna dang neuh neuhin a man leh bawk nen, a thutiam a hlen lo hi ka dem lo. A thuneihna piahlam a ni tawh a ni. Engkim hi ka mumang ang ruai vekin ka hria a, ka ngaihtuahna a mumal lova, a na tih bak chu thil thleng leh ka awmdan sawizawm dan ka hre lo.


Van lam ka hawi a, tunah chuan taksa leh rilru na thei tawh miah lovin a awm tawh anga, a taksa pangai a nei leh tawh ang a, biangsum lang kalh a a nui te kha van mipuite pawn mawi an ti ve ang. Mi dinhmun leh nihna awt a, thik ngai miah lo khan van mipuite chu ka awt thar a, kal ve nghal mai te ka duh rum rum a, vanram thleng a han umzui mai ka duh a ni.


"Ka hnem thiam lo che. Mahse khawngaihin mi â ang maiin awm lo la, i ngaihtuahna dah fim la, i inchhir lohna turin thlah liam suh" min ti a, min mamawh laia ka awm loh vang leh min nghak chhuak zo lova a kal tak avang hian ka damchhungin ka inthiam thei tawh lovang. A damlai hmel ka hmu hman lo hi ka inchhir kumkhua tawh ang.


Cindy insum nasat zia ka hmu a, amah ngaihsak tak tu hnenah chuan awm se nasa tak a a ţah ka ring. Keichuan ka ngaihsak hman lova, ngaihsak thei pawh ka ni lo. Awmdan tur leh engtin nge ka awm mek pawh ka hriat loh lai hian midang ka ngaihsak hman lo.


"I phone ri kha a tawp hleithei lo chhang rawh" a rawn ti leh a, ka off ta daih thung. Tumah ka be peih lova, min rawn be biklo turin ka duh bawk. Min hnemna thu ka ngaithla peih lo. Eng thu mahin min hnem zo chuang lovang. Ka thinrim hlur a, huat erawh ka nei lo. Thil awmdan chu awihlo in a changin ka nui hawk a, ka nui rei lo thei viau thung. Ka â vek a ni ber.


"Hmu tura ila inpeih lo anih chuan ka tlankual pui rih ang che" a tih leh pawhin sawi ka la nei chuang lo. Engtinpawn min awmpui se ka awm thei vek. Hmu ta ila min lo lawm ve thei tawh dawn chuang lo. Hmangaih tak ka tawng a, hmangaihna awmzia ka hria a, kan hmangaihten kan thinlungah engtiang chiahin hmun an chan thuk theih dan ka hrechhuak a, hmangaihten min kalsan a nat theih dan ka hre leh mek bawk. Mihring ka nih angin thinlung nat viau chang ka nei ve. Tun ang hian ala na ngai lo. Ka kehchhe mek a, a siamţha theitu ber lah in kumkhua atan a mit a chhing hlen dawn ta mai si. Min siamţha a hlimna min pe tu bawk kha min tina tu a ni leh ta. Infiam nan a ka hman a, a thinlung na kha min ngaidam tak tak thei lo ang a, heti zawng hian min rul let ni maiah ka ngai. Thihna hi infiamna a ni ve lo asin.


Ruah hmi a tla seng seng a, phai khawlum aţanga haw ka ni bawk a, boruak a ti nuam dawn khawp mai.
"A dur na a rei tawh bawk a" tiin Cindy a phun sep a, khaw awmdan mumallo leh ka awmdan mumallo tak chu a inhmeh phian a ni. Khawchhung kan la lut chiah lova, ruah a rawn tlak tam veleh ka dintir a, a din rualin pawnah ka chhuak zui zat.


Ko pangah dingin ral lehlam ka thlir vang vang a, ruahin min nan huh hma kher mai.
"Damon rawn lut rawh" ti a car chhung aţanga Cindy rawn au chu ka ngaipawimawh duh der lo. Van lamah ka dak a, ruah mal vawt tak zingah a lum a tel ve a, ka mittui tih ka hria. Keimah lo chuan tuman ka mittui tla an hmu thei lova, an rawn hre thei lo. A piancham a hnai tawh. A piancham a nghakthleng zo lova, a kawr tur pawh a hmu hman lo. Ka mittui tla ve chu ka zak rum rum a, ka hmangaih berin kumkhua atana min kalsan meuh chuan mipa mah ni ila na ve thei tho ka nihzia a langchhuak a ni.


Haw nghal lo a hetianga ka awm kawi hi min dem tawk an awm ang. Ka hmu ngam rih lo a ni. Tuna ka hmuh chuan awmdan ka thiam lo lehzual ang. Kham ah hian zuangthla in zui ve ta nghal ila kan kalma tur hmun a dang daih anga, thih hnu lam thlengin ka ti na dawn a ni.


Reitak ka awm hnuah huh hluamin ka ţhu lut a, ka hmangaih ber chu ka thlah liam ve tur a ni. A huntawp a a kianga ka awm loh chuan nakinah ka kiangah a awm duhlo ang tih ka hlau a, vanramah pawh min lo hriat chat theih nan a huntawp thlenga a kianga awm ka duh a, a kalna a kal ve ka duh takzet bawk.


"Kristian kan ni hi kan vannei asin aw. Thi mah ila kan thlarau a thi ve si lova, beisei ila nei alawm. A taksa thi mahse a thlarau in alo nghak reng ang che. A hnena i kal ve theih nan ţan la sauh sauh rawh. Khawlai ah in in chhar a, ruih leh nawmsip bawl in thlang a, midangte leh Pathian tana thil ţha pakhat pawh ti ngai lo kha Pathianin ala chhandam duh cheu a. Hriattirna ah ngai rawh. Engtiang pawhin awm ila, hausakna leh mawina chikim pawh nei ila kan chunga roreltu chu Pathian tho a ni. Khawvel in hlimna min pek daihrei lohzia kan hre mek a nih hi. Sangsangi pawh a ţhat lai hun zawng zawngin Pathian a hre lova, a ţhatlai zawngin khawvel mawina a chen a, a chhiat ber hnuah Pathian chuan alo pawm leh tho a, Pathian hian a rawng kan bawl a, a tana thil ţha kan tih te hi a duh ve. Kan mangang hun chauh a kan belh tur a ni bik lo. Sangsangi vang tal pawhin i nun a in thlakthleng thawk ka beisei" a ti duah a, missionary awm tak pawh a nih hi.


"A bible neih ve chhun kha a thih dawn thlengin a bulah an dah reng a, thlamuang takin a kal ngei ang" a ti leh a, ka beisei. Na hrehawm nei miah lova kal turin ka duh a ni. An in kawtah a ding chawt a, kan inhriat hlimchhawn laite kha ka ngaihtuah kir lo thei lo. Ka la huh hluam a, mi an la tam lo bawk a inthlakna hun a awm mai ang. Zai ri leh ţap ri a inpawlh nawk a, pawn aţang pawn chiang takin a hriat. Chu thawm chuan phallo viau mah ila ka hmangaih neih ve chhun chu ka thlahliam ngei dawn tih min hrilh a ni.


(In duhdan a nilo tih ka hria. Ka ziah dawn aţanga ka ngaihruat dan kha thlakthleng mai a harsat bakah, ka cousin thisen cancer vang a thi ta pual liau liau a ka ziah anih vangin heti hian ka kaltlangpui ta a ni. Ka tih lunghnur cheu vangin min ngaidam dawnnia )


CONT....

---

BROKEN-LAST



Thlanmuang mawng lama thlan la tharlam tak chu ka pan a, a thih ni en kher lo pawhin a thih na a la rei loh zia a thlan ala tharlam danah a hmuh theih. A thlan hmutu tam tak ten kum18 mi lek, a thih hnu reilote a kum19 tling mai tur chu naupang tiin an ui vek ang a, kei erawh chuan a kum lam aiin Hmingthansangi anih vang hrim hrim khan ka ui a ni. A nihna ang tawp khan ka hmangaih a, min ti na chung pawh hian ka hmangaih a, nitin a thlanah ka la kal ziah anih hi.



Vawiin hi a piancham a ni a, Abigail hnen a a lehkha hnutchhiah chhiar tur a min tih ni a ni. A thlanah nitin ka kal thova, a thlanah hian chhiar ila ka kianga awm a, a ţawngkam ngei hria anga ka in ngaih theih ka beisei a ni. A hming leh kum inziahna an phun bulah ka ţhu a, ka insiamrem fel hnuah a piancham ka lawmpuina thu a hming inziak enreng chungin ka hrilh a, a piancham a a hak atana kawr ka leisak kha an vui naah an haktir a, lawmpuinan a ka leisak kha kumkhua a ka thlah hlen nan ka hmang a ni. Mihringin rem kan ruat a, a ti hlawhtling thei tu kan nih poh zia ka hriatfiah phah khawp mai.


A lehkha ziah chu muangchangin ka hawng a, a tir berah ka hming a ziak a, a chau tawh a ni ang a hawrawp pawh a chhe kher mai.


"I kal ni chiah kha a ni. Abi rawn thlen veleh lehkhapuan leh pen dilin i chhiar tur hi ka ziak a, tuma min biak buai ka duh loh vangin a muhil ti zel rawh ka ti a, dip daltu awm miah lova ziah ka duh vang a ni. Ka chauh deuh vangin chhiar a har maithei ania" tiin bul a ţan a, a awmdan tur ka ngaihtuah a, ka lainat thar leh kher mai.


"Kan intawn dan kha mi chuan an sawisel luai luai maithei a, mahse ka tawng che kha ka vanneihna a ni. Kha hmunah khan ka kal lovang tih ka hlau a, kallo ila chuan ka mangan tawp thlenga min puitu leh min hmangaihtu ka tawng dawn lo tihna a ni. Misual tak ni tho chung hian misual leh chapo tak angin ka hmu ţhin che a, i thinlung thianghlimzia leh mifel inti tam takin an tlukloh zia che chu ka belhchian hnuah che ka hre chauh a ni. I thinlung a nem a, khawngaihna i ngah bawk a, i nupui hian khawvela mi vannei ber a nih zia a inhriat loh ka hlau a, i nupui ni thei lo mah ila keichuan ka vanneih zia nitin ka hriat belh zel a ni."


"Ka taksa chau viau mahse ka hlim em em zel thova, ka kianga i awm hian ka lo kehchhiat vek tawhna te kha ka theihnghilh vek ţhin. Min kalsan dawn tih ka hriat khan ka huphurh a, i unaupa damlohna thil anih vangin ka ui ngam silo che a, ka chau tawh em a, ka huntawp lam a ni tih ka hretawh a, ka kianga awm reng turin ka duh che a, reitak ka nawmna chauh umin ka lo tlan tawh a, ka hun tawp lamah lehzel chuan ka hma ka sial lui thei ta bik lo a ni. Ka kiangah awmlo mahla ka thinlungah i awmreng a, i kalna apianga kal ve ang mai ka ni. I lak aţanga hla taka ka awm khan ka thinlung hian nang chauh a hnaih ţhin zia che ka hrechhuak a ni."


Chhiar zawm thei lovin ka chawl rih a, mahni hmasialin min chelh lui ta sela chuan a thih ni thlengin a kiangah ka awm ngei ang. Ka nu leh pate thu ka lo hnial miah lo kha ka inchhir reng tawh dawn anih hi. Hetianga a kal mai hi ka ring bik lo a ni. Ka mumang lamah tal hriattir lawk lo ni ila ţha tur. Ka hma hun ka hriatlohna hian mihring mai ka nihzia min hriattir a, kan chunga roreltu leh thuneitu a awmzia ka hrefiah leh bawk. A lehkhaziak chu ka keu pharh leh a, chhiar tur tam a awm tawh lo. Ka damchhung daih chhiar tur min hnutchhiah se, nitin chawl lova chhiar reng ka duh hial ang.


"Tunah chuan thih ka hreh tawh lova, a rawng ka bawl ngailo chungin ka hun tawp dawnah pawh Pathian chuan min lo la ngaidam duh reng a, chuvang chuan ka kalna tur a nuam tih ka hria, min lo ngaihtuah lo la, i rilru lo ti hrehawm reng reng suh. Vanramah ka kal anga, natna nei tawh miah lovin Isua kiangah ka awm ve tawh ang a, nitin a i hun hman dan te ka lo thlir ţhin ang. Ka kianga i lokal ve ngei theih nan ţan la sauh sauh a, hunrei tak nghah ngai dawn pawh nise dawhthei takin ka lo nghak reng ang che. Ka thinlung kawl tu ini a, i tello chuan ka kim thei dawn chuang lova, ka thinlung kha a chhiat tawh loh nan venghim tlat la, ruihhlo itih leh a, khawlai a i tal leh mai mai chuan ka thinlung insiamţha vek tawh i kawl lai mek kha a chhe leh vek dawn a ni. A chhiat tawh loh nan chuan uluk taka i ven angai a, min hmangaih reng a ni tih i nunah i lantir chhunzawm zel dawn nia, ka thinlung i enkawl chhunzawm dan a zirin keipawn ka hrezel ang."


"Ka thinlung kha kawl tlat mahla keichu mihring ka ni ve tawh dawn lova, mite ngaih chuan mitthi mai ka ni tawh ang. Ka thlarau kalna tur an inrinsiak luih luih anga, a tam zawk chuan vanram ka kal an ring hauh lovang. A chhe lai hi a lar hluai ţhin si a, kei, thil ţha ti ngai reng reng lo nunah khan hmuh tur an hre lova, ka thlarau kalna tur pawh hrechiang an inti hlawm viau ang. Ka chanchin a chhe zawnga an sawizawm i hriat pawhin fel zirlai mek inih zia inhria la, khing let hauh suh. Ka kalna tur chu nang leh kei leh mi tlemte in kan hria a, a pawimawh ber chu Pathian mi hriat ka ni ve tawh hi a ni. Midang tan thil ţha ti miah lova ka kal tur hi hrehawm ka tih ber a ni."


"Ngaihzawng leh nupui neih te kha ilo hreh phah ange. Kan chenna hmun a in ang tawh dawn lova, i thiltih dipdaltu nih ka duh dawn lo bawk a, i hlim nan nupui nei ngei ang che. Kan thinlung a inzawm tlat chuan engtik ni ah emaw kan la awmdun leh ang. Min vengthawng miah lova i hlimna tur um ve tur che in ka chah che a nih chu. Mahse a ţha lamin ni rawh se."


"Nupui nei a fa te nei turin ka duh che a, chutiang chu a thlen ngei ka beisei mahse hma kan sial leh lawk ange, min hreve reng ţhin dawn nia. Kan hun hman dun chhung tawi te kha hre reng la, ka tana ni pawimawh te min lo hriatsak reng la, khawvelah awmdun rei theilo mah ila i thinlunga awmreng ka la duh tho a ni. Ka hmangaih che a, ka hmangaih reng ang che" tiin a ti tawp a, ka chhiar zo chu ka chhiar hma ai khan ka ruak daih zawk a ni.


A natna tawrh vanga hrehawm a tihna te a ziak lova, natna dangin a bawm tel thu pawh a ziak lo. Amah hrereng turin min duh lo mahse ka thawk tawp thlengin a hming ka lam nawn fo ang. A lehkhaziak chu uluk takin ka thlep ţha a, ruah a rawn sur ţan avangin a huh hlau takin ka dah bo vat a, a hming inziak bawk chu ka chul leh a, a sawi ang khan tunah chuan nuam taka a awm tawh ka beisei.


"Ruah a sur a nih hi" tih ri ka hriat rualin ruahin min nan huh tawh lo nghal a, ka dakchhuak a, Abi nihliap kengin alo ding a, pangpar bawr nalh tak a keng bawk.
"Keimaha thlanmual reh a ka kal vangin min hau dawn tih ka hria, i awm tih ka hriat vangin ka lokal anih hi" a ti nghal zat zat a, rawn ţhuhniam ve in a pangpar ken chu dah mai a tum a, ka lo manbet vat. Hrilhhai zetin min en hau a, ruah a tam tial tial vangin keipawh leiah ka ţhu tawh lo.
"A bal ang. Thilpek bal deuh dawn i duh biklo ang chu tiraw?" ka ti a, muangchangin a bu nghat nghat a, a pangpar ken chu a pawm ţha leh a.


"Vawt a ti ang" tih sap pahin a nihliap khumlai in thlan a khuh a, thlankhur thuk taka amaha a mu bam tur ngaihtuah chuan a lainatawm takzet a ni. A pangpar kenlai a huh hlauin a jacket in thlen phak chin chin a khuh a, nihliap chu thlanah kan hnutchhiah a.


Ruah ban hun nghakin chawlh buk an siamah kan awm rih a, ka nau hi Sangsangi ţhianţha neihchhun ang a ni a, Cindy kha a tan chuan a hlu bawk. A tana mi hlu te hi reilo te te chiah a la hriat te kan ni a, keini ho min hriat hmaa a nun hrehawm tur zia ka ngaihruat thiam lo. A nunna hial a la lo hian a tawrhchhel zia a lantir. Sangsangi anga tuarchhel pawhin a tawrhchhuah zawhloh chu ava na dawn em.


"Hmalam pan hi kan tih tur ania, theihnghilh si lovin hmalam pan tum ila. I in thlak thleng thawk hmuh te pawh hi a lawmawm" a ti ban charh a, ka huat thu sawi a hlau a ni.
"Thil hi sawi anga awlsam a ni vek lo tih hriat tur"
"Ka hria lawm. A awlsam loh vang ania tum ila ka tih kher. Thihna hi chu tuman an tuar thiam lovang. Kan hmangaih tak te an thih phei chuan engkim hi a tawp vek a, khawhawi ngaihna pawh a awm lo. Damdawiin a i kal leh duh miah lo pawh ka hrethiam che. Mahse in delhbeh rei tir suh. Hmachhawn la, hmalam pan la, Sangsangi duh ang ngeiin biakin bel chawt bawk la" a ti leh duah tawh.


Hmalam pan ka tum lo a ni lova, ka la thei rih lo a ni. Hmalam pan nan ala hma a, kum tam tak a liam hnuah hmalam ka pan ve thei mahna.




Hun leh ni a liam a, thlan kal ka la ţhulh lova, ka hmangaih ber thihna hmun damdawiin ah khan ka la kal leh lo. Rilru lakpen nan hotel ah hna ka thawk tlut tlut a, rorel ringawt lovin hnathawk ho ka puih chang pawh a tam. Inkhawm hun anih apiangin ka inkhawm a, vanram chanchin an sawi apiangin Sangsangi ka hrechhuak a, chanchin kan inhrilh thei tawh lova, ani chuan min hmuh reng ka ring a, a chanchin min hrilh ve chak ka ring ţhin.


Ka tawrhna ala rehthei lova, Sangsangi alo let leh anih loh chuan a thihna avanga ka kehchhiatna hi a awm reng dawn ani. Tupawn hmalam pan turin min hrilh a, a harsat zia ka lo hrilh let ţhin. A tawng ve lo chuan an hrethiam lovang.


Min dampui reilo mahse a nunah zirtur tam tak ka hmu a, nun thlahdah pawizia thlengin min zirtir a ni. Hun ţha ka neih laia insiamţhat mai loh chu tih theih ka nei lo. Ka hun ţha a liam chuan a tuar tu tur bawk ka ni. Kehchhe vek mah ila ka nunah thil ţha tam tak ka senglut thung. Ka tawrhna nasa tak aţanga thil ţha ka chhar chhuak thei hi ka vanneihna a ni. Midang tana thil ţha ti lo ah a in ngai a, kehchhe vek a min kalsan hi thil ţha a ni miah lo. Mahse min chhanchhuak a ni. Mifel ber ber te chauh hi Pathianin hmanrua ah alo hmang biklo anih dawn hi.



END.. (BROKEN min lo chhiarsak a, comment leh like min pek ţhin vangin thinlung takin lawmthu ka sawi e. Hlimawm deuh deuh a tawp turin kan chhunzawm tawh dawnnia )

---