DUMB AND DUMBER-14

DUMB AND DUMBER-14

Sammy nen thil eng emaw kan hmuchhuak a, kan thil test na a en vang vang hnuah nau ka pai thu a nemnghet. Nau ka pai theih na tur a kan beih dan vel tuman an hre lo vang. Sawi lan kher ka tum lo va, ţhenawmte pawh an rai a, an thil tih ţhin chipchiar takin ka zawt ngai bik lo. Nau pai dan chu inhriat ţheuh kha,khatiang kha a rukin,midang hriat lohin kan ti ve a ni mai. A ruk a ti na na na sawi leh kher kha a ţul ka ti lem lo. Kan nupa chiah a kan tih dun a kan hriat dun chi a ni tlat. Mahse duh aiin nau ka pai hma mah mah. 

"A lawmawm tehreng nen iva hlim loh hmel ve" Sammy chuan a ti ta ngei reng a, dawhkanah ka bawk thlawp. 

"Zir dun tur kan la neih kha,ka zir hma hmain ka lo rai daih a" ka ti a, ka awmdan ţhin ka hrilh a,ka awm nuam lo deuh ţhin te leh luak chhuak te thlengin, ka rai anih a rin thu a sawi a,rang lutukin test na tur a lei. Ka ţhianpa berin a hriatthiam em em laiin ka pasal chuan a hrethiam lehpek lo. Kan awmdun reng a,ka nawm loh thu pawh ka hrilh ţhin,nachhawkna bak min chawh ngai lo. 

"Fa ineih hunah i zir mai dawn lawm"

"Ka zir thei awm lo e. Awm chawt a ngai ang a,ka fimkhur loh phei chuan a len tak tak hmain a dang ka nei leh ang a,a buaithlak vel vek tawh" ka ti a, lawm vak lo mah ila paih rawh ti se chu ka phal teuh lo. Ka zir chak em em ka zirthei lo tur hi pawi ka ti ber.

"I zir thei em em ang. Thil ngaihtuah vak vak lo la,piang tawh se ka ti e,ka duat dawn lutuk. A nutei tur ka ni mai" 

"Mipa inih kha. I mipa nihna hi hai ziah suh. Pathian huat zawng a ni tih hre ve ta che"

"Ka duh duhin ka awm ang. Thinchhe hler hlur lutuk mai. In pa hnenah eng tin nge i hrilh dawn?"

"Ka hre lo" tih pahin ka inbengkang ţual ţual a, Rri te kan la manchhuah chiah bawk si lo. Tunah phei chuan an fimkhur lehzual tawh a mahse sawi neuh neuh a la awm reng. Ka pa ngei pawn ţhen a tum hnai aniang Dy-i zawk ka pa hnenah a let leh tawh. Rri chuan a sual a lo chhuah ngam lo a ni awm e. U Biaktei lah chu Sawmpuia'n a ngen nasat vangin pasal a la nei rih bik lo a, kan la awm nuaih nuaih. Rintei nen pawh kan inmelh no lo thei khawp mai.

"Kan boruak hi a hahthlak rih emai,ka hrilh rih lo mai ang. Nakinah a la hre dawn tho tho"

"Mawli,naupai hi a chhe lam zawngin i ngai a mi a? Thu lawmawm anih hi, Sawmpuia pawn hria se a lawm zawk dawn sin" a ti vin duai. Buaipui ngai dang an awm belh lehah a ngai ang tih ka hlau ve a ni mai a. 

"Min vin vak vak suh,khai khawm a thinrim reng ang vel ka nih hi aw. Min tih thinrim belh a nge. Ka sawi hma loh chuan tu hnenah mah lo sawi suh ang che"

"Tih tlak chu i tum lo tiraw?"

"Tum lo. Ka fa a nia, ka fa liau liau ti tla duh tur chuan min ngai duh bik suh. Hrilh dan tur ka la hre lo. Rri te an inţhen fel hunah leh chiang kek kawk a kan manchhuah hunah kan lawmna belhchhah tu a tan ka hrilh chauh ang" tih pahin ka pum ka khawih a,a la thep vek. Tichung hian ka rai ve tho chu a nia,tlem chuan ka rilru a khawih ve deuh. Ka lawm miah lo ka tih chuan dawt ka sawi a ni mai. 

"A ţhat chu ka hre hmasaber hrim hrim pawh hi a lawmawm. Rosy a nuam awm bik e nang chu" min rawn thlek daw daw lehnghal.

"Ti maw?"

"Nau i pai thei bik a,naupai hi nawm hmel ka ti,bakah an inhmeh phei chuan a mawi e. Pathian hian hmeichhe pangngaiah min siam ve mai se ţha tur ania,mipa ah min siam a ka inti nú leh tho sia" beidawn hmel zet hian a ti a,a tuai kher hi a ţullo em a ni.

"Bialnu neichhin la,nuam iti zawk phian maithei a sin. I hmai chei tawh lo la,i kuttin te kha hnawih tawh lo la,mipa thawmhnaw ha la,tum chhin rawh. I tum phawt chuan i thei em em ang" tiin thurawn ka pe a,a sawt lehpek lo maithei. 

"Ka peih lo e. Bakah min zahpui ang ka awm nghawng nghawng zel sia,ka tih luih a ni bik lo a"

"A ni reng. I aw nu deuh hlek chiah kha i tih luih loh. Thil dang kha chu i siamţha thei vek. I hmelţha a,hmeichhia duh tu che an awm dawn chiang" ka ti leh a, Pathian pawi a sawi hi ka hlau ber ţhin. Sual ve tho mah ila ka hmangaih em vang hian a ţhatna tur chiah ka duh pui. 

"Kan la ngaihtuah dawn nia,ka peih rih lo. Ka awmdan hi nuam ka ti. Hmeichhia nih ka chak ber"

"I peih mai mai. I thawmhnaw hak tawk tur pawh mipa hak zingah vek alawm i zawn tho. Ka hrilh peih tawh lo che. Hun a awm veleh gospel camping ah lut ang che" ka ti ta tawp. Pathian thu lo chuan a ti harh zo chuang lo ang. 

U Biaktei nen rawngbawl pah a kan lo ti ti mawlh mawlh laiin ka pa a rawn haw a, a hmel hmuh a nuam lo kher mai. 

"Khaw nge Malsawmpuia?"

"A lo la haw lo" 

"A lo haw veleh min rawn be rawh se" a ti a, a kal chiah chu U Biaktei nen kan in en haw ringawt. Lungawi lohna a nei chiang mai. Sawmpuia chu lo haw lo mahse pawi ka ti lo zawk. Buaina a chhuah buan buan ka hlau.

"Sawmpuia hi lo haw lo turin ka hrilh mai dawn?"

"A ngai lo. Rawn haw vat zawk turin hrilh rawh. Thil thleng tur ang chu thleng vat vat zawk rawh se,a ninawm zo zai tawh emai" U Biaktei'n a tih takah chuan ka pa awmdan chu hrilhin lo haw vat turin ka ti ta zawk a, a inkhar nghal tur thu a sawi. 

"Ninawm e kan inchhung hi chu a" ka ti sep a,Rri tel ve na hrim hrim hi chu a ninawm vek. Hmun tinah buaina a chawk chhuak a ka hne riau.

"Tuar hram hram rawh a fel ve ţep tawh ang. Keipawn ka ning a,Sawmpuia vangin pasal ka nei thei rih si lo a,kan tawrh rih mai a ngai a nih hi"

"Ka pa hi a la pension dawn lo mi?"

"Ka hriatsual loh chuan nakumah a pension ang. I nuhrawn hi pa upa lam deuh te hi a áwn riau" fiamthu titak deuh hian a ti a,ka lo pawmpui thlap.

"Pawisa menin a meng a,a neih theih tur te chu upa deuh mahse pawi a ti lo a ni mai lawm. A khawngaihthlak zawk, eng ang pawn pawisa nei se keichu ka duh lo reng reng,a tenawm. Kum50 ral kai tawh hi ka mal ka chul tir dawn lo reng reng. Upa deuh deuh hi ka duhzawng an ni ve lo" ka tih buan buan laiin Rintei a rawn lut ve a,a inthlak fel diam tawh. A lo haw lai ka lo hre lo hrim hrim.

"U Biakte puih i ngai em?" a ti kher a,awm lo ang hmiah ka ni leh tawh. Ka hauh vak aţang khan min hmu lo der a,ka awm ve tih hre lo ang hian a awm char char zel. Ka lo ngei lek lek ţhin. 

"Ngai lo e,hei kan zo a ni mai. Rosy pawh a awm mai mai tawh. Lo awm ve mai mai rawh" U Biaktei lah chuan a lo ti dam duam a, mahse a ruk chuan ngaihdan chintawk a thiam tawh. Mi hian kan chungah ţhat chhuahin min be ţha luam mahse keimahnin kan zir loh chuan a rukin engah mah min ngai chuang lo. Chutiang chiah chuan U Biaktei hi a awm. Rintei hi keimah angin a ring ve tawh lo. A ruk a a thil tih duh dan a hre ve tawh miau a. 

"Sawmpuia hi vawiin chu a lo tlai leh dawn ni maw? Bza hian model ho a kawhhmuh aţang hian a tui thar riau mai. Hlawh a lo awm veleh zel bawk nen" kher kher chuan ngawih mai mai ka tum ve tawh nak laiin. 

"Oriflame leh avon tih vel hi a lo ţha vak lo mawni dawn le? Rintei thil hman ho hi oriflame leh avon deuh vek a nia,hmasawnna kan va hmu si lo ve,chhuah peihna chiah a chawh a niang" ka ti a,ka tum lawk miah lohin ka naupangchhia leh ta. 

"Pawisa ka neih chuan a tawk. In a tawm sen reng ai chuan ka hlawk tho tho"

"Pasal ka nei fuh nge ka hre lo. Hnathawh a phal tlat si lo va,ka tawm sen sil na ţhum reng mai a nih hi. Ka duhzawng hi chu ka la nei thei ve zel" min rawn melh zawk a,min melh rei ngam leh chuang lo. Dawih dei duai hle si min khei deuh hian a ţawng ve ziah. 

"Khaw nge ka pa chu?" mi chhe sawi chu koh aiin a hnai mahse a chhe mawlh si lo. 

"Pindanah. I va hmuh a i huat tur deuh a sawi pawn insum hram hram ang che" tiin U Biakte in a chah a,hrilh ru hman ila chuan hlau bik miah lo va chhang char char turin ka hrilh ang. Kan ţhatna phu miah lo tu te chungah hi chuan ţhat chhuah ve loh mai te ka duh ţhin. 

Pindanah ka lo nghak a,ka vei tawn sek. Duk chur chuan a lo let lo turah ka ngai a,a rilru erawh a nat ve det ka hlauhpui. Zanin chu chhungkuain chaw kan ei rual thei leh dawn lo chiang khawp. Kum tam fe ka nghak ni mai a ka inhriat hnuah a rawn lut ve thei hram. A hmaah ka ding chat. 

"Eng nge a sawi?"

"Ţhu phawt ang" a tih takah chuan kan pindan a sofa awm chhun lian ţha zet maiah hian kan ţhudun ran a, ka hrechak zek zek tawh. 

"Rri a lo zualko pek a"

"Eng tin?"

"Ipa hnen a i thil sawi ang khan" ka pa chuan a sawichhuak ta nge nge a nih dawn chu. Ka hrilh hnu khan a ngawi rei thei ka ti reng a ni.

"Chuan engtin zel?" 

"Kan inhnial a,ineih chuan ka chhuak ang ka ti. A ni pawn a zep tawh bik lo va, neih chu a tum lo a nih hmel. Vengchhung a mualpho a hlau bawk a,a neih ngam ka ring lo" 

"Kan la awm ho thei tihna maw?"

"A nih mai lohin. A neih dawn loh chuan chhuahna chhan tur kan nei lo. Ka nu a thih thleng a a awmna a ni bawk a,chhuahsan a huphurhawm. Thlah turin ka hrilh a, ka nu chhungte beng a thlen a hlau tel bawk a,a thlah thei turah ngai ang" a ti a,rin aiin a hahdam hmel daih. 

"Rri chu a van chawh dawn tak. Ka pa leh ipa hian thlah thei hlauh se ka ti tawp. Hrehawm ti deuhin awm ve reng reng se mahse midang a hmu leh vat tho ang" ka lo ti ve bawk a,a zahthlak hrim hrim. Ka pa leh Sawmpuia pa in hmeichhe pakhat an lo inţawm reng a nia,a inchhuanpui chi loh khawp mai. 

"Rintei hi eng tik thleng nge a awm ve dawn?"

"A duh chen chen a awm ang. A hma pawh a a tihdan a nia,a rawnkal a,a duh hunah a haw leh mai a. Ngati nge?" kan awmdan velah a hrethiam ve mai ţhin lo em maw ni.

"Ka sawipeih lo. Nakinah ka la hrilh ang che,chaw ei phawt teh ang" tih pahin ka tho a, ka pa nen a an thusawi chu rin aiin a ho. A rawn thinrim hmel nen khan a hau hrep dawn maw ka tia,Sawmpuia zawk hian a vau let a nih ka ring ber. A tawp khawkah chuan a lo sual thiam ve tho mai. 

Chaw kan eikham kan pindan a kan let leh chu ka uak tuarh tuarh. Ka insum rei lutuk tawh. Thil rimna tawk ka ei fuh a,ka luak a la chhuak hlui reng. Ka insum theih loh chinah bathroom ah lutin tlem ka luak ta nge nge. Sawmpuia chuan inla bengvar fahranin ka hnung a lo chul a,a hawilet a a hmel ka hmu chiah chu ka lawm lo ngei mai. A lo ner nang a,a luak a chhuak ve hmel. 

"I ten a law a? Min ten tur si min buaipui loh mai tur a lawm" ka ti a,ka in tleuh fai hma kha chuan hauh nghal chak viau mah ila ka ţawng ngam lo va,ha ka nawh zawh veleh ka hau ve chauh. Ka insum ve nasat tehreng nen min la ten hmel em em zui.

"Ka pum a ţha lo"

"Min ten a nih kha,ka luak ringawt a nih kha"

"Ngaikawi zel suh,ka nin hun a thlen vaih chuan aw" a ti a,a ngawi daih. In herin khum a pan vut a,ka umzui rang teh a sin.

"I nin hun a thlen chuan eng nge? Engtin nge min tih dawn a?" dak vahin cho tawkin ka en. Hetiang a nih chuan nau ka neih hunah pawh min buaipui thei dawn lo sa.

"Eng tin mah" a ti leh tho si. Thil zep harsa ti chi ka lo ni bawk nen thu thar ka neih hi ka hrilh chak leh tlat tawh. 

"Hrilh tur che ka nei nia aw" 

"Eng thil nge?" a tih a,min ngaihven lehnghal. Tunlai chu kan inchhungah eng eng emaw a thleng reng a,thu thar hriat kan chak vek. 

"Ka hrilh duh che angem aw" ka ti kual leh vel a,a haw leh ang chu.

"A pawimawh lo ni maw?"

"Pawimawh tehreng. Thil dang zawng zawng aiin a pawimawh" ka intithei nasa mai. A pai tu ka nia,ka pumchhungah a awm daih a,tuman min laksak thei der si lo. 

"Nih leh sawi vat la dawt tello in" 

"Dawt ka hrilh duh tawh lo che,min bum let leh daih dawn sin. Ih maw,ka rai ve ţat" zawi te hian ka ti a.

"Awle....eng maw?" teh hluai chuan. A meng phawk nasa ngei mai. 

"Ka sawi duh tawh leuh" ka nui zui ver ver a, film a ka en ţhin ang hian lawm avangin min pawmin min theh vir ve lo hrim hrim. Chutiang chu a hnen aţang hian ka beisei lo hrim hrim. Ka pasal hi chu a felin a hmelţha vawr ringawt a,a romantic lo ve e, min duh hlur a ni mai. Min hmangaih a ni mah zawk. 

"I chiang maw? I rai tak tak maw? Dawt tello in ka tih kha"

"Rai tak tak ka tih chu. Nge maw min rin loh em em ni?" ka ti hmuk a,ka thinrim der. Ka thinrim leh rim loh a hre dawn chuang lo. Ka vin ţhang em a,a nihna turah a ngai nghet tlat tawh. 

"A va mak ve" a ti leh tawp a,sawi tur vak a hre lo. Ka thu hrilh chuan a ţhawng hle ringawt. 

"Mak hleinem hmeichhe pasal nei ka nia, Pathian malsawmna ka dawng a ka rai ve nimai lawm" 

"Midang i hrilh tawh em?"

"Sammy nen chiah kan la hria. Hrilh hmasak ber che ka duh sia,i rawn haw hma zawng khan ka zep ţang ţang" min kuah ve takah chuan ka hlim veng veng tawh. Diktak chuan vawiin a sawi tum ka ni reng reng lo. Ka zep thei thlawt lo. 

"Dawn sawn dan ivan thiam lo tak. Midang chu ni se an chawi kang ang a an theh vir vel awm sia" min thlah hnuah ka chhuahchhal chawp chilh nghal.

"I lu a hai ang bakah i rit" a ti fiamthu a, lantir vak lo mahse a hlim zia erawh ka hmu thiam ve e. 

Khum a ka lawn tur te chu "Fimkhur rawh i chesual ang e" a lo ti a,a uang ve ngat ngat.

"I over emai. Naute hi pik chhuak thei ila chuan ka phuh chhuah daih tawh ang" 

"Ila pai dawn chauh. Phunchiar awih loh aw" a ti nghal tawng. 

"Ka phunchiar viau ang. Zan rei tawk tawkah thil ka ngen ziah ang" 

"Ka lei lo ang"

"Min duat loh i tum chiang"

"Umm..duat vak lo ang" kan in en a,kan nui leh ringawt ţhin,ka rai vang a pawi ka lo ti ţep ţep te kha ka inchhir lehnghal. Kan hlimpui nghal em em mai sia,piang chiah phei sela chuan a chil thli ringawt pawh kan nuihpui uarh uarh thei ang. 

CONT (Last chapter chiah a awm leh ta, chhiar nuam ule hmelţha ho😍)