DUMB AND DUMBER-LAST

DUMB AND DUMBER-LAST CHAPTER

Ka naupai chu hrehawm tinrengin min bawm a ni ringawt. Ka thinchhe hlur a, kan kawmthlang nu upa lam tawh uikawm ve zet mai huan a thei berkher te ka eichak tlat a,min la pe phal lawk lo zui. Sawmpuia leh U Biaktei ten tih tak zet a an dil hnuah chauh min pe phal ve chauh. Vin zet zet a ka dil an hlau a keichu ka kal ve phal lo. A zaidam pahnih an kal a,an hlawhtling hram. A rah hnem tehlul nen,namen lo vin a ui a, a hralh chuang bawk si lo. A dangdai ve khawp mai.

Ka pa leh Rri an inţhen chiang tawh a,Dy-i bakah Maggie ngei pawh a let leh tawh. Ka pa an haw zui lo va,hun kal tawh chu theihnghilh sakin inmil deuhin an awm tlang. Ka ngaih loh vang ni lovin let leh turin min ti ta se ka duh kher lo vang. Kei ang mi thinchhia leh ţhatna vak nei lem lo hian Sawmpuia ang a mifel hi pasal ka hmu leh tawh lo vang. Rri khan a ţhatna tur a nih ringin min neihtir a,a chhiat phah thung mahse ka tan a a thil tih ţhat awmchhun a ni ngei ang. A muhil tui lai ka en vang vang lai a midang ta tur leh midang a kuah vel tur ang a ka ngaihtuah tel phei hi chuan chum ţhuai mai te ka duh ţhin. 

U Biaktei bialpa pawh ka hmuh pui ve tawh a,ka pasal angin hmelţha ve lo mahse a fel khawp mai. Chhungkua a kan buaina tawh te hrethiamin U Biaktei ngei pawh a nawr tut tut lo a, a fakawm. Sawmpuia pa,ka pa ni ve tho bawk hi chu ka hmuh hian ka zak tlat zel. Engkim kan hre tawh bawk nen, a hma ang a ni thei tawh lo. Rri nen an inhmuh zui awm thawm hre ngai lo mah ila chaw ei ho ringawt te hi nuam ka ti lo. Sawi tur a vang duh thei sia,kan ngawi ţhap zel. A ni pawh a inla hrang a, kei chiah ni lo Sawmpuia nen pawh an inbe khat. Kan inchhung chu ka nu damlai ang khan a nuam thei tak tak tawh lo.

Tih tur em em a la nei lo bawk a, Sammy a rawn leng reng a, raipuar tan a eitur ţha an sawi a hriat te hi min rawn ken ve ziah. A hlimchhawn hrehawm lutuk ţhin kha a pel deuh tawh a, tumah uchuak takin ka hau tawh ngai lo. Min ngaihven viau chungin Sawmpuia ngei pawn thinrim lek lek chang a nei fo mai. Mahse a tuar lui zel a,hei a tuarchhuak ve mai dawn. Ka pai tluan chuan fa nei mai tawh tur kan nia,a hma aiin a thawk rim zawk. Ka pa'n bialnu a nei tawh lo va,kan tan inphal ve viau tawh mahse kan nupa chuan tihbuai loh dan tur phet kan ngaihtuah tho. Dawr lian zawk te kan hmuh ve mial phei chuan puih kan ngai bik miah lo vang,in luah man chawi kan ngai lo va,kan pa lah a inren thiam. Pasal hi nei fuh ve chem chem tak ka ni. 

"Naktuk chu i thawh hma a kal ka ngai maithei"

"Rawn accident haw tawh miah suh ang che" ka ti a, tu tu te emaw thla a laksak leh dawn niang. Pawisa an pek hnem dawn hi chuan a phur thei a nia pawisa duh tih takah. 

"Ka lo fimkhur dawn nia"

"Hmeichhe dang lakah te khan fimkhur la,an rim rawn nam haw reng reng suh. I rawn haw veleh ka hnim dawn che nia" ka ti leh khar khar tawh. Ka rimhriatna hi a ţha ve a,ka chhuan ve ber pawl a ni. 

"Min hnim dawn nia, eng rim mah ka nam lo vang. Kan indin hlat dawn e,lo hlauthawng lo la" hahdam hmel zet hian a mu zui. Ţhu run chungin ka la melh khui tho. 

"Ka hlauthawng kher lo. Keimah lo chu duh inei lo tih ka hre ve tho. Min phatsan phei chuan kei chauh ni lo vin mi pahnih i phatsan dawn tih inhria la" ka la ti hram a, hei hi nia a nin em em ţhin chu. 

"Min ring ve em em tawh teh" a ti hmuk a,ka ţhutna lo lam a hawi daih. 

"Ring tehreng mai. Min duat loh ka hlau zek zek ţhin zawk a,chuvang chu a nia ka hrilh reng zel che. Mipa hi chu hmeichhe chhe lo deuh te hi inlawm ve ropui sia. Thinrim vel lo mai teh,lerh lo chung chung a i lerh palh ka hlauh vang zawk anih chu" tih duai duai pahin ka kuai pawp a, zangthalin ţha deuhin a mu veleh mai bawk a, tih lungawi hi a har lo ve thei a nia. 

"Mu rawh a tlai tawh. Thawh hma ka ngai a,mutthilh hma ka duh. Kuah i duh chuan ka mutthilh hma hian rawn mu rawh" a tih takah chuan ka mu rang sât sât khawp mai. Nui ver ver chungin ka inthawlh a,min lo kuah chat. Ka pasal neih ve dan hi chu a nuam thlawt. Nakin zel a thil thleng tur chu ka la hre lo na a tunah rih chuan nuam ka la ti rih khawp mai. 

"Ka mut a la chhuak lo e" khap fuk fuk chung hian ka ti a,a lam hawiin ka inher a,mit a lo chhing tlat tawh. A meng duh tawh der lo lehnghal. 

"Zingah i thawh rualin min kaitho miah suh ang che"

"Umm" tih ringawtin min chhang. Lukham sik rual rual a muhil nghal thei nih hi ka chak ve ţhin. Mit ka chhin ve ngial pawn a chhuak thei hlawl lo. Ka inleh sek chuan a nin ka hlau si,a muhil chiang tih ka hriat hnuah ka che dêt dêt ngam chauh. 

Zing a ka harh chuan a lo awm tawh lo. Khum bula drawer tetakte ka hun chungah chuan lehkhate a lo dah a, nidangah hetiang thil a ti ngai lo. 

Duhtak Rosy, 

Ka hmangaih che. Ka eiduh zawng ber Sausage ai pawn, a thlawn a wifi ka hman ţhin ai te, ka kal hlat san ngai miah loh ka camera ai pawh hian ka hmangaih che. Model tam tak aiin i sam zai pakhat pawh ka duh zawk. Ka thil ziah tur hi tumah ka zawt lo tih hre tel la,ka nu te hunlai a an chindanin ka ti ve a nih hi. Hmelchhia itih lai ber paw'n ka hmangaih che. 

Lehkhathem a a thil ziah chu. Ho viau mahse a lawmawm ve hrim hrim. Tenawm loh tawk velin a ziak a, tawk tâk tâk tak a ni. Uluk tawkin ka thlep ţha a,nawh mar thlap duh mah ila thawh hun a pelh duai tawh vangin lukham hnuaiah fimkhur deuhin ka dah. Lukham chuan a delh chhia ang tih te ka hlau. Hetiang lehkha hi ka la dawng ngai lo. Tawi viau mahse hlutna riau a nei tlat, zún a keng tel. 

"Rosy i tho nuam em?"

"Nuam e. Tukin chu nidang aiin ka tho nuam zawk. U Biakte, keimahni vangin i pasal neih tur i ţhulh reng a,hrehawm iti em?" tiin ka zawt let a,lehkhathawn ka dawn vang ni lo vin ka ngaihtuah ve hrim hrim. 

"Ti lo ve,i nu hlui a rawnkal tawh ngai lo va, kan inchhung a hrehawm lutuk tawh lo a,ka inngaihtuah nasa,neih luih mai tum chang te ka nei ve tho a,mahse Sawmpuia kalsan hi ka hreh leh ţhin a,fa han nei ula,hmangaih tur leh ngaihtuah tur dang,rinchhan tu tur nei se la keipawn rilru nuam deuhin ka nei thei zawk ang. Min nghak hreh chuang lo va,ka pasal tur a inhawng tho a, min vengthawng duh suh" a ti duah a, ka khawngaih ve ţhin. Tum uk siin a ţhulh leh ţhin sia,min kalsan a hreh laiin a pasal tur mitmei a veng ve leh tho bawk sia,a awmdan hi a laklawh vel vek. 

"Vawiin chu i ţhianpa a rawn lang leh ang a"

"Lang khawp ang. Ni hnih a rawn inlan tawh lo a,vawiin chu a rawn lan ngei ngei ka ring"

"I khuahar lo ve deuh ang a a ţha lawm. Bul in ţan ve ek ek dawn chauh a ni sia, nakin zelah harsatna in tawk a nih pawn inţhen reng reng suh u. Thutlukna siam zung zung lo ula,Pathian hmaa in intiamna hrereng ula, tumah kan nuamsa reng thei lo a,tu nupa mah an hlim reng lo. Infuih tawn ula, a hrehawm hun a lo thlen pawhin chhel takin awm ula,tun ang reng hian in hmangaih tum ula,engpawh in tuarchhuak thei ang" a ti melh melh a, min zilh ve nasa ţhin. A la duhtawk mai lo "Nupa a kan insiam tawh chuan kan ngaih a ţha a,kan awmdun reng thei dawn maw tiin hmangaihna kan hlamchhiah ţhin a, hmangaihna hi kan vawn nun reng loh chuan a thi ve thei a, nangni chuan ngai pawimawh ula, tun a in in hmangaihna hi vawn nun reng in tum dawn nia, hmangaihna dai tawh chhem alh leh hi a harsa a,tam tak chu tlai khawhnu ah inchhirin a thi tawh hnu tih nun leh a nupa inkar zawm leh an tum ţhin a,mahse a har tawh ţhin. In vawn nun reng chuan inhau bur burin inti thiam lo mah ula hmangaihna khan a suihzawm leh zawk ang che u" a tih zawm leh a, ka lo bu ve nghut nghut. Tun ang reng hi a ni dawn lo tih chu ka hre ve mahse engtiang chiah nge ni dawn ka ngaihtuah thiam lo. Hmalam hun ka hre miau lo a. 

Chaw kan eikham hnu rei vak loah Sammy a rawn lang tak tak. A inchei vur a,hmeichhe ngaihzawn chu kan la hnaih lo khawp mai. Chhang leh thei tui te min rawn kensak a, damlo ang chiahin min en. Inchhung ka tihfai zawh hnuah kan khumah kan mu dun a, tunlai chu mut hi nuam ka ti. Muhil thei lo mah ila mut hrim hrim hi a nuam. Mahse U Biaktei ka pui phawt zel. Sammy ka khan ar ar a,rai lo ila chuan i rit tiin min hau leh hrep tawh ang. 

"Naute hi nei vat vat la ka ti e, a nuam dawn sin aw. Ka duat ngawt ang. Mahse na i tuar dawn sia ka khawngaih lawk sa che"

"Engtiang chiah a na nge?"

"Thil hi i hre lo ve ngawt mai. A na a ni tawh, tunah hian min zai rawt rawt ta la,chutiang vel chu a nih ka ring. Thih chakawm ngawih ngawih khawp a na" a tih chuan ka inbengkang ur ur. 

"Min sawiţhaih tihna mi?"

"A nihna diktak ka sawi. Na iti dawn lutuk mahse naute i hmuh hunah i dam huai huai mai ang. Hmelţha tawk nei ang che. Naute hmelţha deuh deuh thlalak en char char ţhin la fa inei hmelţha a ni mai"

"Teuh lo. Midang fa thlalak ka en dawn lo. Sawmpuia hi chhun hlur se ka ti. Kan in phei chu chhunah awm an awm ngai mang lo a, midang daih chhun se la chuan Sawmpuia a ngaih a ţha lo viau ang. Hmeichhia hian ngaihtuah tur kan ngah a sin aw" ka ti a, ho te te a dem mai theih reng kan ni. Kan veng hlui a kan ţhenawm nu phei chuan fiamthu in 'ka rai lai chuan mi pasal hmelţha deuh hlek te hi ka en ţha duh lo' a ti ţhin. Kan pasalte hian midang an tel ve emaw an tih mai hlauhawm tak a ni. 

"In pa te chuan a hrethiam leh teuh lo emai. Duat ka tum sia,a hmelchhiat ka hlau. A chhe reuh e an tih reng chuan khawlai a pawmchhuah vel te a nuam dawn lo a,an fak sup sup chuan kan hawi vah vah thei dawn a"

"I ngaihtuah ho. Fa te chu kan hmu hmelţha vek dawn. Hmelchhia itih chuan i hmangaih tawk lo ah ka ngai ang" 

"Tar deuh deuh tawh ho hi hming phuah tir su aw. An hunlai thil hriatreng nan te, pasalţha ropui tak tak te hming hriatreng nan te an phuah ta ţhin sia,a chal duh lutuk. Nausen pawh nise an hming ringawt aţanga kan pa rual ni awm tak te hi an tam a nia aw" 

"Ka pi leh puten an hauh fel der tawh. Ka hrilh lawk vek alawm. Tunlai milin an ti ve em em ang. Ka fa ania,chutiang lo ngaihtuah ve vak vak suh" ka tih chuan a ner nasa kher mai. Ka en chhuk run sia min rawn hap thuih ang tih te a hlauhawm. 

"Engkimah ka inrawlh dawn. Ţhian inkawmngeih uchuak unau ang mai kan nia,i fa chu ka fa a ni mai. Thil ţha tinrengin ka vur dawn a ni ringawt. A upat hun thlengin min ngai em em reng se,ka tar hun thleng a min enkawl zel duhna rilru pu se ka ti" ala ti deuh deuh. A ţhat nan vek duat a tum mai mai a nih hi. Mahse ka fa anih chhung chuan a hmangaih dawn tih ka chiang kei min hmangaih ang chiah hian. 

"Rri nen an inţhen sia,i pa hi a ţha zel maw?"

"Ţha mah mah zawk. Ka uten an duat a, hna an nei ve tawh bawk nen,an theih ang angin thil an tihsak ve. Lungleng hman miah lo va siam an tum a ni ber. Nakinah thil a hrechiang zel ang a,ka pa pawh a la lawm daih zawk ang. A tlai hman ţhelh a,a tlai tak tak hma a kan hrechhuak hi a lawmawm" 

"Insawi tel ve ziah suh eng thil mah i hriatchhuah ve theih loh kha,hna min thawh tir vak vak ringawt a,nangmah vang a ka lu ti che ţha ngam miah lo va ka awm kha ka la theihnghilh thei lo"

"Nunhlui a ila chen reng chuan i hah mai mai. Ka hreve tawh chuang lo a,nangmah chiah i inhrem" ka lo ti awlsam et a, a haw ngang mai. 

Sawmpuia a lo haw veleh a inthlak hma in ka din rem tir phawt a,ka hnim tak tak. A nuih a za em em lehnghal. Ka thikthuchhiatna ai mahin ka fiam pah ve ţhin hrim hrim. Ning hlui a awm tir te hi nuam ka ti. Ka fiam zeuh zeuh loh chuan nun a boring a,a ţawng tlem ve ropui si,inhmuam up pup reng ka peih ve lo. 

"Sausage ai chuan min lo eichak zawk tak tak a nih hi"

"Ka eichak che ka tih loh kha. Kha thil kha sawichhuak tawh suh. I mutthilh laia ka kalsan che ka inthiam lo deuh a,ka ziak ve mai mai" a ti nawi niaih. Nau hial ka pai tawh chung pawh hian min hmangaihna lantir vul chuk hi a la hreh em em reng a, U Biaktei ang khan hmangaihna hi a thi mai ang tih ka hlau,hmui vung luk khawp pawn ka chhem nung leh thei awm der si lo. 

"Tak tak a i chau em?"

"Chau ve tho. Ka inbual zawhah thlalak ho ka hmuh ang che,nalh iti viau maithei"

"Va inbual vat vat rawh" zawi te hian ka lo ti a, ka chanchin min zawh aiin thlalak min hmuh tir mai mai te a chak zawk a,mipa hi chu an vei zawng hi a lo danglam deuh chu a ni. Min duhin min hmangaih hlur mah sela hmeichhiain kan lantir ang hian an lantir ve thiam tak tak lo. Thiam deuh deuh chu awm ve bawk mahse ka pasal hi a thiam lo zingah a tel. 

Chaw ei a la hun lo deuh bawk a a hnathawh ho chu min entir a,keipawn nalh ka ti kher mai. 

"Ka kal ve chak e"

"Kan la kal dawn nia,hei ai nalh hian ka laksak ang che. Sammy leh Bza te nen hman deuh ni ah ka la hruai ang che u" a ti a,han sawi meuh hi chuan a lo inhawng viau zel bawk sia. 

"Na i lo nei em vawiin lam te?" teh khiah mai a. 

"Nei lo,Sammy a lo leng a,kan mu char char"

"Ţhat chu. Sammy hman lai a ni hlauh hi a lawmawm,i khawhar a lo hnem ve a tiraw?"

"Tehreng mai. Nang ai pawn min awmpui nasa zawk. Nang chu zingah i chhuak tlaiah i lo haw a,Sammy chu ka khawhar hlauin nilengin a rawn awm ţhin" ka ti tan tan a,a lo nui hawk. Ka sam a chul thuak hnuah min kuah a, min kuah hi chuan nuam ka ti leh viau tho ţhin sia. 

"Nakin zel atan anih hi ka tih. Ka pa hi chu pension se la, intihharh nan a duh leh zinkual vel mai mai se la,lantir lo mahse hrehawm a ti ve ang. Nu leh paten min buaipui rei tawh a,mahni ke a kan din ve a hun tawh. Fa te kan nei ang a,pakhat chiah kan duhtawk awm bik si lo a, nang leh kan faten rual in awh loh nan ka thawh a ngai a nih hi" teh duah chuan. Hrethiam tur a min duh fe anih loh chuan a sawi duah ngai lo.

"I lo va puitling tawh ve"

"Min lo ngai lutuk ţhin lo la, ngai chung chung che in anih hi hna ka thawh. Nangchuan hahdam deuh chungin min kai a keiin hah chung chungin ka ngai ve thung che a" a ti leh luam a,a dawrah tih tur hahthlak vak ka hre der si lo. 

"Tun ang reng hian min ngai ang che"

"Tun ang reng hian ka hmangaih ang che" a lo ti ve thung. 

"Min hmangaih loh vaih. Bialnu dang nei sawmsarih mahla ka chhuak dawn hlek lo a nia" ka ti khar khar.

"Lutuk,chhuah itum chuan ka phuarbet ve thung ang che" a ti a, kan inneihna ala rei lutuk lo bawk a inţhen kan la tum lo khawp mai. Nakin zel chu ka hrebik lo le,ka la sawithei rih tlat lo.

END (DUMB AND DUMBER CHHIAR ŢHIN TU ZAWNG ZAWNG TE,IN CHUNGAH KA LAWM BUR😂)