FATED TO LOVE YOU-1

FATED TO LOVE YOU

Facebook link

https://www.facebook.com/groups/292456422208447/?ref=share

ZODINSANGA

Ka banrek a ka sana bun ka bih zawk hnuah ka lehkha kenlai dawhkanah ka dah a, ka ţhutdan ka siam rem hnuah mit chhingin ka chal ka hmet zui mawlh mawlh. Dar10 vel thleng naupang ho record ka en hnu chuan lu a na ve bur mai. 

Ka pa hian school changtlung ve tak a din a, kan pian hma aţangin a ni tawh. Vanneih thlak takin a ţhang chak a,rintlak a ka inngaih hnuah ka pa ai ka awh. School ka enkawl hnu hian hniam lam a pan hlauin ţan ka la nasa hle. Hma kan sawn zawk zel theih nan school mai bakah in lamah eng eng emaw ka duang lawk ţhin. Kan hming ţhat tawh sa na hi chhawm nun zel ka duh. 

Reilote chawlh ve zawk ka tum laiin tu emaw hian ka pindan kawngkhar a rawn kik a, zawi te a thawk huai pahin ka meng a, pangngai takin ka ţhu ţha leh. 

"Lo lut rawh" 

Zawi muang a kawngkhar inhawngin ka phir pui Zothana nui vur vur chungin a rawn dak. 

"Ka leng haw in kawtlai aţangin i pindan a eng hi ka hmu a,i la mu lo anih ka ring ngawt a,ka ring dik a nih hi. Hna ila thawk a ni maw? Duh leh mamawh te inei em? Chhiahhlawhah min ngai la, thingpui nge coffee? Massage lam te?" ka lo nui suk. Mamawh nei zawk ka nih loh hmel.

"Eng thil nge i duh?" 

Phur fe a rawn pen lutin kawngkhar a khar leh thlap. Chair chuang pakhat la awm chawi kangin a nghenchhan awmna lam chu ka lam a hawi tir a, duhdan zet a a ţhut hnuah nuam ti awm fahranin a nghen chhan zawk chu a bawh a. 

"Phir hi kan hmel a inan chiah chiah chu thuhran, kan chhungril kan lo inhre pawh em a nih hi. I nat chuan ka na a, ka nat chuan i na a, thihna chiahin min ţhen hrang thei ang. A nih loh chuan engkim kan inhre tlang vek. Tunah pawh ka sawi hma hauhin duh ka nei tih i hria a,keini pahnih phei chu ka nu paw'n min hai ziah hi"  kuangkuah a a thusawi lo ngaihthlak pah chuan ka melh run a, a sawi zawh veleh "Thupuiah lut tlang rawh. Eng thil chiah maw i duh?" ka lo ti ve thung. 

Tlem a ţhu ngil deuhin chair nghenchhan tlang chu a tuai puat a, chutah min rawn en lehin min nuih tlawn lehnghal. 

"Zodin, i puihna ka mamawh a" beisei nei tak a min en chung hian a ti a, ka rindan sa vel a ni. Hetianga min en tawh chuan thil ho mai mai min tih tir ngai lo. 

"Eng thilah?"

"Naktukah model ho in kan resort an hmang dawn a,ka awm ve ngei ngei a ngai. Miin a hmun vel an lo hmu ang a, a hranpa a fak chawp a ngai lo vang. Phone leh hun dangah sawi theih tho mah sela remchang ka la thei maithei a, kan hlawk lehzual nan. Resort nei an awm nual tawh a, ţan lak a ngaih em hi"

"I thil tih tum tak hriatpui lo che mah ila naktuk hi kan piancham a nia,i piancham" a hmui hnuai lam sehin muangchangin a bu nghat nghat a, kan boruak a ralmuang lo sawt khawp mai.

"Ni e. Mahse piancham chu kumtin a thleng a bakah kan upa tawh. Chuan Nunui hnenah thu ka lo tiam a, naktuk hi kan hmang dun thei ang ka lo tia, a zin hmaa ka hrilh a nia, a zin hlanin he thil hi ka hre leh sia, vawiinah a rawn haw"

"Chung zawng zawng chu nga ti nge keimah min hrilh? I bialnu hrilh rawh" 

"Ka thei lo. Buai chung chungin engkim a buaipui nghal vek a, ka ei duh zawng te nen lam. A zin hmain ka lo intiam tawh bawk nen thutiam bawhchhiat ka duh lo" 

"Thutiam bawhchhiatna anih ka ring lo. Sumdawnna hi a pawimawh a,i hna ber. Nunui chu ho te te a thinrim chi a ni lo a, thudik i hrilh phawt chuan a hrethiam ang che" 

"A thinrim lo ang a min hrethiam dawn tih chu nang aiin ka hria. Ka ti lungngai duh lo. A piancham zawk pawh ni lo ah a phur em em a,hah pawh sawi lo vin engkim a buaipui. Ka ţhulh chuan lantir lo mahse a hnual tho ang. Chutianga a awm chu ka duh lo" a tih chuan ka lo thaw hrawk a, a duh naah hi chuan a luhlul takzet. 

"Ka puih theih che i ring maw?" nui ruh ruh pah a min en chungin a bu ngauh. 

"Pui thei lutuk e. I tlai lam hun bak ka mamawh lo" 

"Ka tlai lam hun chu eng nga tan nge itih?" ka ti lehzel a,ka hrethiam tawh lo takzet.

"I tlai lam hun zawng keimah angin i awm ang" 

 Tun ţum chu nidang a a thil min tih tir tum ţhin zawng zawng aiin min ţhawng. Melh ram ram chung hian "Nangmah angin ka awm ang maw?" ka ti hrawk a, a nui tet tet duh chauh. 

"Mi â let der inih hi. Nunui hi mimawl ah i ngai em ni? Min hmuh phat aţangin min hre nghal ang. Kan landan chu a inang maithei mahse kan inang lo. Ka kâ ka an rualin a hrechhuak nghal vek ang" 

"A hre lo ang che" ti a min thlek pahin lu a thing a, "Ka nu paw'n min hriat hran loh chuan Nunui chuan a hre lo ang. Ka lenchhuah ruk duh apiangin ka lem i chang ziah tho a, i hnehsawh tawh khawp ang chu" 

Rum hrawk chung hian dawhkanah ka bawk a, rang zet a ţhu ţha lehnghalin a ngai ang bawkin ka melh leh. 

"Khang hunlai nen khan a inang tawh lo. Ka nu chu ka tihder thei,ka nu a nia, kan pahnih nu. Mahse Nunui chu i bialnu a nia,ka bialnu a ni ve lo" vin zet hian ka ti a, ka bialnu a ni ve lo. Min hmuh apiangin hlauh hmel zetin min en ziah a, ka ngaihtuah let apiangin ka thin a khei zak ţhin. 

"Ka kut vuanin min kuah bawk ta se eng tin nge ka tih ang? Engtin nge itih ang? Engahmah i ngai lo em ni? Theihnghilh rawh,kan thil tih tum hian hna a thawk lo vang. Thudik chu hrilh mai rawh" mangang zet a ka tih lai chuan a lo nui hawk a, a lemchan chauh ni lo mi bialpa lem chan lehzel ka thiam lo. 

"Chutiang a thleng lo vang. Eng thil mah a ti hmasa ngai lo. Ka sawi awmzia chu a vuan lo che ang a,a kuah lo ang che. A fawh che phei chu beisei lo la" la nui hawk hawk chung hian a ti a, a hmaa ka thil tih lai chhunzawm san leh ka tum laiin ka darah a rawn vuan a, ka ngaihven duh ta lo.

"Khawngaihin Zodin. A rei lo vang. Tlai lam zawng bak a ni lo vang. Lokal vat ka tum ang a, a rei berah darkar 3 chhung chiah. Ka eiduh zawng a buatsaih ho eipui la, a bulah ţhu lo la in insi lo a ni mai. Ka bialnu ka khawih tir phal che i ring reng reng em ni" ngen ngawl zetin a ti a, ka nau lam chu hawiin thawk ka la vang vang. 

"I remruat dan hi a ţha lo. Min hre ngei ang" ka ti sup a, ka mitah min en ang a, Zothana ka ni lo tih a hria ang. 

"A hre lo ang. Ka thawmhnaw i ha ang a, i ţawngkam thlum lo ve tak hi a hriat reng loh nan ţawng tlem la a tawk a ni mai. Ka duh ang ka tih zawh veleh ka lokal nal nal ang. Kal lo vin ka lo tlan ang" ti a min ngen hnu chuan nghen chhan ngheng a ţhu awnin sam ka tuai a, a thil min tih tir tum hi a awlsam ka ring lo sa. 

"Darkar3 chu a tam lutuk. Darkar2 ka awm ang. Darkar2 chhung ka nghak che ang a, i lokal loh chuan Nunui hnenah engkim ka hrilh ang" tiin fiah zetin ka hrilh. Darkar2 chhung a bialpa ka ni ve thei ang mahse hlauthawng tak chungin. 

Zothana thawmhnaw Nunui leisak ka ha a, engkim kan inthleng, car thlengin. Darthlalang hmaa ka din chuan nui suk chungin muang changin lu ka thing a, kan inang kher mai. Chawhnu lamah in aţangin ka chhuak a, ka nu leh pa ka pelh dawn lai chuan ka tlan ti tih. Ka dam hun chhung a ka thil tih atthlak ber a la ni hial ang. 

Nunui te in kawtah car ti dingin ka bia a, a lo chhuah hun ka nghah lai te chuan ka zam takzet. Ka nghah vang vang hnu a tukverh a ka dahchhuah lai takin a rawn chhuak a, a nalh kher mai. Zothana min hrilh angin car aţangin ka chhuak a, min hmuh veleh ring leng lawngin min ko a, a hlim hmel takzet. 

Za lo fe in ka nui a, min hriat hran theih loh nan Zothana khan nui tam turin min hrilh. 

"I m-mawi khawp mai" ka ti bah nawk a, thudik hrilh a haw daih ka duh rum rum.

"Nang pawh i hmelţha lutuk" nui ver ver chungin min rawn hnaih lehzual a, "Happy Birthday" a ti zui sep. 

"Ka lawm e" 

"Ka ngai lutuk che" 

Lo dawn sawn a chhanlet leh dan ka thiam lo. Ka tan a sawi a ni lo tih hre mah ila ka lungphu a tih ran loh phah chuang lo. Ka haw lek lek zawk. Aw thian kharh chungin ka din hlat a, nunhlui chu nunhlui a ni tawh a, danglamna inthlen tir ka tum lo. 

"Kar khat chiah ka zin bo a, iva in la hrang ve a" min rawn hnaih lehin tlangnel fe hian ka banah na vak lo vin a chum a, "Min ngai ve miah na nge?" a tih chuan aw ka thian kharh a, ka ngai ţhin em? 

"Kal ang" ka ti nghut a, ngaihven zui lo vin car ah ka ţhu lut a, rei vak lo hnuah a rawn lut ve mai. Min hnaih leh hmain a hmun lo hauh lawk lamah ka kalpui. He thil hi ka ti leh tawh ngai lo vang. 

A hmun kan thleng a, ka nau nen a kan sawi lawk angin a ep chiahah ka ţhu. Dawhkana kut ka dah veleh a lo vuan a, dawhkan chu rawn bawhin min hnaih leh tawh khawp mai. 

"Vawiin chu iva ngawichawi ve" a ti a, ka lo thaw dep dep. Mipa viauah inngai mah ila hmeichhe hmaah hian a lo zam chhiat theih khawp mai. 

"Ka chau deuh a" ka ti a, dawt ka sawi lo. Ka awmdan teh hrep vang hian ka chau takzet tawh. Ka kut lak let ka tum a, a lo pawt ve zel. Kan pawh tawn reng hnu chuan a nui ta hak hak a, pawt na deuh mah ila a man bet ve tlat. Min rawn en veleh a nui tawp hmak a,min vawnna a thlah chawpchilh nghal. 

Zangkhai huai chungin ka dah thukru a,kan inbe leh tawh lo. Kan thil chah a lo thlen hnu paw'n ngawi rengin kan eidun a, a rukin min melh zuk zuk reng tih hre mah ila hria angin ka awm duh lo. Sana ka en ru reng ve thung a, phone ka bih pah run reng a, Zothana biak ka tum ngat ngat. Message tam fe ka thawn tawh a, chhanna ka dawng lo. Ka thinrim tawh kher mai. 

"Phone call i chang nge biak i nei ve hrim hrim? Kan thlen tirh aţangin phone hlir ila en a,kei aiin i en ngun zawk" inbengdaih tumin mit ka chhing a, thawk ka lak leh vang vang hnuah ka hawichhuak. 

"Resort kan siam ţhat lai mek enkawl tur a ka dah te kha ka bia a,ka duh dan ka hrilh a" dawt ka hrilh. Darkar thum a ral tawh dawn a, thawm a la rawn nei lo. 

"Chu chu a pawimawh viau rih em ni? Vawiin hi i piancham a nia, hna chu dahţha rih la, boruak muanawm tak hnuaiah kan ei thei lo mi?" a ti a, a hrilhhai hmel ka hmuh meuh chuan inthiam lohna ka nei thar leh a, ka tan ni lo mahse Zothana piancham lawmpui nan theih tawp a chhuah a, a hnual hlauin a aiawh turin Zothana paw'n min tir a, theihtawp ka chhuah ve rih a ngai ang. Message a awm leh awm loh ka en leh hnuah phone ka ak ţha a, tawi te a nuiin "Tihpalh" ka ti sup a. 

Lu thing ne ne chungin min nuih let veleh mai bawk a.

"Ngaihdam min dil duh suh. Hna te chu a pawimawh ber alawm. Kan pawisa hmuhna leh ei hmuhna ber a nia, i piancham a nih vang chauhin mawle ngaihven rih suh ka tih. Ka kiang a nuam deuh a hmang turin ka duh che a" aw nem zet a a tih chuan ka lo bu nghat.

"Ka ei tui. Ka lawm e,engkimah" 

🔹🔹🔹🔹🔹🔹🔹

Washroom a kal chhuanlamin ka kal hrang a, Zodina biak tumin beng bulah phone ka dah a,ka vei kual sek. Darkar4 a ni leh tawh. Khua a thim tawh a, a la rawn inlan lo. 

"Hello!"

"Zodinsang khaw nge ila awm? Darkar engzat nge liam tawh i hria em? Tlai lam hun bak a ngaih loh thu i sawi a ni lawm ni? Khua a thim tawh hi,rawnkal vat rawh" 

"Ka tihpalh takzet. Rin aiin hun a duh rei a, hei Lawma a chesual a, a ke a ti na a ka buaipui leh lawk a, lo awm rih rawh khawngaihin" a ti a, a la ri nuai nuai. Hliam buaipui ngai awmna hmun a ang lo. Zothana hian chak lohna a nei ve a, hnial theih miah loh. Nawm chenna lam hi a ngaina ve hle. Thlem a sam viau bawk. Tunah pawh keini aiin a ngaipawimawh a nih hmel. 

"Zothansang a tawp nan ka hrilh leh ang che. Eng chhuanlam pawh siam la ka pawi sa lo. Tunah rang takin rawnkal nghal rawh. Pawimawh lo chin bak in awm tawh lo vang" 

"Ka hre thei tawh lo. Nakinah Lawma ke na ka rawn thawn ang che. Bye bye Zodin" 

"Hello? Zothan? Hello? Hello?" phone la thla in ka enchiang a, a lo dah daih tawh. Hrep tak hian. Bang nghengin ka ding a,in bengdaih a ngai. Ka inthunun tlat chuan manchhuah ka ni lo thei ang. Ka thinrimna leh ka rilru put hmang dik tak ka lanchhuah tir thei lo ang. Tunah chuan Zothana ka ni rih. 

Kan hma zawn ral hla tak thlirin kan ding dun a, haw a rawt tawh dawn maw tih laiin a chung sang laiah min la kalpui. Beisei aiin a nuam,a hahdamthlak.

"Zanah hian a mawi lehzual. Eng lutuk lo mahse thla engin a chhun phah chin lai ringawt pawh hi a mawi pha" tiin ka lam a rawn hawi a, a mitmeng a nung sar. 

"I bula ka awm a,nangmah nen a kan thlir dun phei hi chuan a mawi lehzual. Arsi te,thla te,engkim a mawi zual vek"  zangkhai vah a nui chung hian van lam ka thlir a, a thusawi chu chhanglet lo vin boruak thianghlim tak chu ka hip vang vang. 

Ka kut a rawn vawn leh chuan a mitah tak ka en a, keimah zawkin hawisawn leh harsa ka ti. 

"Vawiin hi i danglam riauin ka hria, i mi chhawr ten iduh angin thil an ti lo nge min ning hrim hrim zawk?" ti a min zawh chuan chhan tumin ka ang zuai a mahse chhanna ka nei lo. Ka danglam riau a a hriat nachhan chu zanin a a mi hmuh tum hi ka nih loh vang tih thleng a hrilh ka duh. Ka chhia leh ţha hriatna chuan ka unaupa puih a ngaih vanga thudik hrilh thei lo ka ni tiin min hriattir a,mahse ka hmasialna lam ve thung chuan thudik hre lo se,he hun hi ral thei lo se ka ti ve thung. Ka hmasialna chu ka paihthla vat. Ka inhrilh lawk tawh a, ka rilru put hmang dik tak ka lantir thei lo. Chu thil lantir ai chuan ka thinrimna lantir ka duh zawk. 

"Ka chau deuh ka tih kha. Ka ning lo che. Engtin nge ka nin theih ang che? Sana hi ding reng turin ka duh zawk" ka ti a, tun ţum chu dawt ka hrilh lo. Nui ver ver chung a min rawn hnaihin min ngheng a, "I pianchamah chauh nilo,nitin hetiang a i kianga awm hi ka duh" 

Kuah mai ka tum laiin ka inthunun hman hram. Min hnaih em a,a perfume rim thlengin a hriat. Mahse tun a thlamuang tak a min ngheng mek tu hmeichhia hi ka ta a ni lo vin ka nau bialnu zawk a ni. Min hnaih lo tur leh Zothana ka ni lo tih hrilh zawk tur ka nih laiin ka hmangaihna hi ka duhthu a tih tawp theih a ni lo. Ka hmangaih takzet. Kan in a a lokal hmasak ber ni aţang khan venhim tlat duhna ka nei a, hun kan hmang ho tam tial tial a, tum lawk miah lohin ka ta ni lo tur hmeichhia hi ka lo hmangaih ve a, a nui hmel mawi tak hi ka theihnghilh ngai lo mahse ka tan a nui ve ngai lo a, ka unaupa zawk tan chauh. Ka tih dik loh zia ka inhria, mahse vawiin hi ka piancham a ni ve tho a, zanin chauh chu ka unaupa ai ka awh tluan theih ka beisei. Engkim a lem vek a ni chung hian keimahah chuan zanin hun engkim hi a hlu vek thung. 

"Zodina'n engtin nge a piancham hi a hman ve i rin?" ka hming ngei a rawn lam rik chuan min ţhawng khawp mai. Ka inthunun thei lo ţhelh a ni.

"Ka hre lo. Piancham lawm tih vel hi a ngai ho lam ve a, lehkha kan zir lai kha chuan ka piancham lawmin ri hut hut mah ila pindanah inkalh khumin lehkha a zir lui tlat a, hna a neih hnu hian a zia deuh kan ring a, mahse hmasawn zel dan tur hlir a buaipui leh a, zanin pawh hna a thawh ka ring" 

Min nghenna aţang chuan inla hrangin min rawn melh chho ha a, "Amah chiahin a awm reng ţhin em ni?" ti a min zawh chuan zawi te in ka bu nghat a, ni e, keimah chauhin, englai pawhin. 

"Ngati nge?" a tih chuan mit ko ka lo san uk a, ngaihmawh awm lo fahran hian "Ngati nge keimah min zawh" ka lo ti liam puat. 

"Ka sawi awmzia chu ngati nge ka rilru a lo nat le? Ka khawngaih tlat" 

"Ilo na maw?"

"Aw, phir inni chung hian in danglam a, nang chu hlim reng ang hian i lang a, i bula awm te pawh hlimna min thlen vek thei khawpin i ngainatawm a, mahse Zodina chu a ni ve lo. A puitlingin a fim kak reng a, a nghetin a him a,a rintlak hmel takzet. Mahse ka hmuh apiang hian khawharna hmu tel zel ţhin angin ka inhria. A bul hnai a ka awm hian him viauin inhre mah ila a ipikin a up tlat tho" 

"Chu chu i ngainat loh chhan a ni em?"

"Aih,ka ngaina. I unaupa a nia ka ngaina lutuk. Biak tlangnel harsa ka ti mai chauh alawm" a ti zat zat a, nui suk chungin hmalam ka hawi a, min biak harsa a tia,tunah kan inbe thei viau lawi a, buaina chu kei ka ni lo. Min hlau tlat a, min biak nel a tum lo. Ka unaupa anga min ngaih hian min biak awlsam a ti zawk anih hi,keimah tak tak ang a min ngaih aiin. 

"Pek tur che ka nei tak a sin. Lo nghak lawk rawh" tih leh tlan let a rual a, a thang vang vang hnuah present bawm pahnih nen a rawn let. 

"Happy Birthday" tih pahin pakhat zawk chu min pe a, Zothana ta tur a ni a, hawn sak hreh viau mah ila a pe tu berin ka hawn hun a nghah reng vangin phur vak lo chungin ka hawng. Muffler phiar a lo dah a,ka nuih a za ru angreng. Zothana chuan a ngaina dawn lo nasa. 

"Thil dang lei thei tho mah ila hei ka phiar sak che. Mi bungraw siam sa lei ai chuan keimah ngeiin a ka siam hi a hlu zawk ka tia, i duhzawng a ni em?" tiin beisei nei zet hian min rawn en a, a bawm a hnawh luh leh pahin "Lutuk. I thiam khawp mai" ka lo ti mawi ve. Present bawm dang a la ken chu kawh pahin "Kha kha eng nge?" tiin ka zawt a, min rawn pe veleh. 

"Zodina ka hmuh theih ka ring si lo va, hei hi lo pe mai rawh. A ta ve tur anih hi" a tih chuan mak ka ti ru takzet. Kan inhriat aţanga chhiarin tun ţum hi vawikhat thil min pek ve na a ni. 

"Eng nge i dah sak?"

"Pen...mahse a man to chi ka leisak a nia aw. Ngah viau mahse lo paih suh se. Kan inhrechiang si lo va,a duhzawng ka hre ve lo a, pen nen hian an inhmeh ber ka tia" a ti ban charh a, ho ka tih a hlau ni ngei tur a ni. 

"Ngati nge present i pek ve?"

"Nuam lo ka tia,naupanlai aţangin ka hre ve ve cheu a,mahse in pianchamah nangmah chiah thil ka pe ţhin a, Zodina chuan ka nu leh pate leh i nu leh pate hnen aţangin a dawng ve ngai awm si lo va, kumin chu ka tihsak ve mai mai" min rawn hnaihin ka nghawngah a kuah a, nui sang chung hian "I ngawih daih a, Zodina ka pek ve vangin i thik em ni? Ka tan engmah a ni ve hleinem. Ka khawngaih a ka pe ve mai mai lawm" a tih chuan ka inthunun theihna hlohin ka nam dawrh a, a kat nawk. Darkar tlem te chhungin min ţhawng dawt tu leh thinlung khei zawk thei a thleng hnem tawk tawh. Ka unaupa ka thik lo va, englai mahin ka thik ngai lo. Mi khawngaih nih hi ka thil duh loh ber a ni bawk. Ka hlawhtling a, school enkawl lo mah ila hna ţha fe fe ka nei thei. Khawngaih thil pek hi ka mamawh loh ber te zing a mi a ni. Engahmah min ngai lo tu hnen aţang ngat phei chuan.

Phawk hrain ka mitah tak min en a, min enchian phawt chuan min hria ang ka tih tawh kha. 

"Zothana i ni lo. Nang chu Zodina.."

CONT..(Fated to love you hi min lo chhiar sak leh ula,like leh comment te min lo pek sak ve ru aw,a thawhnu bulpuiah kan lut vat dawnnia,a boring rei lo ang😀😀)