FATED TO LOVE YOU-2

FATED TO LOVE YOU

LALNUNPUII (NUNUI)

A mitah chiang zetin ka en a, Zodinsanga a ni tih chiang takin ka hria. Zothana mitmeng dam dap,ngainatawm tak ang kha a ni ve lo. Ka hmuh ziah ţhin ang ngei, thip râm leh vawt raih, Zodina ngei a ni. Engtin nge ka hriat loh theih? Ngati nge ka lo fimkhur tawk loh? A ţawng tlem em em a, maksak tak takin a che a, engtia hre lo nge ka nih? An mitmeng aţang ringawt pawh a hre hrang thei a in ngai si engtin nge ka hriat hran loh theih? Ka mawl takzet. Mi â let derah ka inngai. Mahse a sam, a thawmhnaw, wallet leh car thlengin Zothana ang chiah chiah vek. Zodina hmuh ka inbeisei loh em vangin a ze danglamna ka lo hmu thei lo zawk a ni. 

Min rawn hnaih a tum lai chuan hnung lamah ka tawlh dawrh a, ka awmdan chu a lawm loh hmel kher mai.

"Zothana hnaah a buai a, i lungngaih hlauin min rawn tir. Lo pawmpui lo tur ka nia" a ti a, Zodina ngei a ni ka ti rilru mawlh mawlh.

Lu thin pah a tawlh hnung leh hretin "Eng thil nge ka tih tak le? A hma lam a hrechhuak tur zawk che ka nia,ka mawl takzet" zak tak chungin ka ti a.

"Ka tih dik loh zawk a nih kha. Dawt hrilh lo tur che ka nia" a hmel hmu thei lo turin ka inher a, ka lungphu mumal lo lutuk chu tih tawp ka tum nasa. Ka hmui hnuai lam ta tak a seh chungin ka kutphahin hmai ka hup a, ka hmangaih ti ve lawm lawm ţhin si a reitak ka hai thei chu ka inthiam lo hle. 

"Ka tihpalh"  ka hriat phak tur tawk lek a a tih hnu chuan ka hawi let leh hmain thuk takin thawk ka la kawk phawt. A mitah ka en ngam tawh lo va, zak tak chungin hnuailam ka bih tlat. 

"Kan thil tih zawng zawng kha khawngaihin Zothana hrilh suh aw" zawi tein ka ti a, amah lo zawk ka lo kuahin a kut te ka vawnsak chu a ni sia.

"Awle. Eng thil mah thleng lo angin ka ngai ang" 

"Ka lawm e" ka ti sep a,ka la en thei chuang lo. 

"Haw tawh ila a ţhat ka ring. Ka lo thlah ang che" a tih pawh chuan lu ka bu nghat ringawt. Zawi muangin ka chhuk thla a, phur lo deuhin car lam ka pan. 

Ka inbual zawh hnuah  chuan dressing table hmaah ţhuin sam ka khuih a, keimah leh keimah chu in en in zawi tein ka thaw huai. Ka ât em vang khan ka inhaw takzet. Lo hrechhuak hma tur hi ka nia, an rim chhui let tumin mit ka chhing vang vang a, Zothana perfume ang chiah hmang mah sela an rim a danglam a tho. Zothana rim chuan mi a chawk phur theiin a thlum dêm a, Zodina erawh chuan hnim rimtui thar lam tak rim a nam a, a rim chuan mi a hip awlsamin a tithatho thei. An danglam. 

Ka mit chu meng lehin ka hmui ka seh ngawt ngawt a, theihnghilh ka tum nasa mahse a hmel te,a rimte leh engkim kha ka hriatna aţang hian ka paih bo thei lo. Kan awmdan kha ka ngaihtuah let apiangin ka lungphu a pangngai lo vin a rang em em zel a, chu thil chuan min ti zam takzet. Ka awmdan chu ka inhuat ngawih ngawih ka ring a,mahse mak tak maiin ka rilru ah eng emaw danglam a awm. Kan awmdun chhung a a mit ka la ve ni awm tak a min en na ringawt te khan ka ngaih a ti ţha lo. Ka hriat chhuah hnu khan ka ţang ţeuh reng a, a ni pawh a ni ve tho ang. Mahse ka sawifiah thiam lo. 

A thil sawi zawng zawng ngaihtuah letin ka hmui ka seh na zual sauh a, a thil sawi ho kha eng nge awmzia? A ti tak tak nge Zothana lem a chan vang chauh? Ka thluak a buai nuaih chungin thil tam tak ka ngaihtuah tel tho a, zawhna hlirin ka khat a ni ber. 

"Nunu i muhil tawh em? Ka lo lut lawk dawn" ka unaunu aw ri chuan ka ngaihtuahna thuk tak aţangin min hruaichhuak a, kawngkhar lam ka melh ta zawk a.

"A inkalh lo. Rawn lut rawh" ka tih lang lang hnu chuan nui sang chungin a rawn lut a,dressing table bulah bang nghengin a rawn ding a, zawhna a ngah leh dawn tih ka hre lawk. 

"Ka muhil thei lo eng emaw ei tumin ka tho leh a, ngati nge i la mut loh? Zothana piancham in lawm dun chu eng nge a an a?" tiin phur fe hian min zawt a, ka chhan lawk loh vang chuan ngaiţha lo deuhin "Eng nge? Thil ţha lo thleng a awm a mi?" a tih zawm zat. 

Thawk hawk pah hian zawi tein lu ka lo bu nghat nghat a,ka unaunu lakah hi chuan engmah a zep theih loh. 

"Eng thil nge thleng?"

"Vawiinah Zothana ka hmu lo" amah en pah hian ka ti a, beidawng deuhin ka thaw zui halh. 

"I hmu lo maw? Mahse ka nu in a rawn lam che a,a rawn thlah leh thlap che a ti sia" a ti nang nang a,min lo hmu ru leh vek tawh a nih hmel.

"Ka chhuak ngei a, mahse midang bulah ka awm. Zothana awmna ka hre lo" 

"Midang bulah maw? Zodina a ni em?" phawk hra hian a ti leh a, sawi nawn leh ringawt pawh ka huphurh. 

"Ni e. Zothana hnaah a buai aniang, ka lungngaih a hlau sia,engkim ka lo buaipui sak vek tawh bawk nen,amah aiah Zodina a rawn tir a, rei deuh chhung chu ka hre bik lo" ti a ka insawifiah lai chuan a nuih a lo za hle. 

"Zodina hi Zothana angin a awm maw? A awihawm loh hial zawk. Rei tak kan inkawm tawh a,i sawi chu nilo se ka awih teuh lo. Zodina ka lo hriat ve ţhin kha chuan hetiang thil hi a ti miah lo vang. A unaupa in a vau a nih loh chuan rei tak chhung amah anga awm turin a ngen hrim hrim ang. Nang lahin i lo hre hrang der si lo va, engtin nge i hriat chhuah?" 

"Zothana ang chiahin a inchei a, a sam thlengin Zothana chiah chiah. An in an zia chu nangpawn i hriat ve tho kha. A zia a zawiin a ţawng tlem a,a chhan ka zawh lahin a chauh thu a sawi a,ka lo awih zel a, Zodina present tur ka tih kep a, a ngawih rei em vangin a thikah ka ngai a, kuah pahin Zodina engahmah ka ngaih loh thu ka sawi hma zawng kha chuan ka hrechhuak lo" ka ti a, ka aw chu a ri chang chang chauh. Zan a rei tawh a, thawm dang a awm tawh loh vangin chiang takin a hre thei tho ang. 

"Engahmah i ngaih loh thu i sawi maw? Chuan i kuah vel maw?" a ti hluai a, lu thin pahin "A ţha lo tawp ang" a tih zawm zat. 

"Rei lo te chauh alawm. Min nem sawn thuai a, chuan Zothana hnenah engmah a sawi loh tur thu min tiam a" 

"Chutiang a nih phawt a hnu engin nge la tibuai che? Zothana'n engmah a hre dawn hleinem" a tih chuan ka zam luatah ka hmui ka liak zeuh a, a mitah tak en pahi! "Keimahah hian eng nge maw danglamna riau a awm" tiin ka hrilh ta nge nge. 

"Eng danglamna?"

"Zodina min endan te leh kan inkar a boruak ţang at reng te, engkimin ka awm an ti nuam lo vek" ka ti a, ka awmdan ka sawifiah thiam loh ang bawkin hrilhfiah dan pawh ka thiam chuang lo. 

"A duh che niin i ngai tihna mi?" a rawn tichhuak phawng a,ka ngaihdan chiah. Min endan leh a awmdan zawng zawng,nidangah ka la hmu ngai lo. Lem a chang nge a tak tak tih erawh ka la thliar hrang thiam chuang lo. 

"Tun a i hrethiam chauh hi a tlai deuh tawhin i hre lo maw?" a ti lehzel a, a ngaihna ka hre lo vin mak ka ti tak zet a, a hma zawng aiin ka lungphu a rang lehzual. 

"I thusawi chu eng nge awmzia?" ka ti ha a, a hma zawngin engmah ka hmu thiam ngai lo. Midang zawng zawng aiin a inthup thiam zawk.

"Lo sawi sak tur ka ni lo tih chu ka hria mahse a duh che. Zothana chiah i ngaihsak ţhin lai zawng zawng hian Zodina chuan a rukin a duh che" 

Ka thaw chu ka hrawkah a tang tlat a, ka thaw thei lo lek lek. Mahse engtin nge a nih theih? Khang hun chhung zawng leh tun thleng hian Zodina hian min ngaina lo ah ka ngai ţhin a, ka bula a awm tawh chuan a vawt raih reng a, min biak lah a tum ngai lo. En pawh min en ngai lo chung hian engtin nge min duh theih ang? Zanin a a awmdan zawng zawng kha he thu tawi te hian a hrilhfiah vek. A thusawi te kha, ka kianga awmreng a duh thu a sawi te kha Zothana lem a chan vang chauh a lo ni lo. Zodina tak tak angin kha thu kha a sawi. 

"Mahse tunah chuan Zothana nen in inkawp nghet tawh a, innei duh pawh ni ula tuman kan hnial tawh lo ang che u. Zodina rilru put hmang mai mai chu a pawimawh tawh lo" a ti a, min chhuah san hnu pawh chuan ka ngaihtuahna ala kal kawi nasa, mahse thutlukna ka siam ve thei ta niin ka hria. Nia Zodina rilru put hmang a pawimawh tawh lo. Duhthlanna ka siam fel tawh a, ka ta ni tur a ka duh zawk a thlang fel vek tawh a,ka thinlung hi Zothana tan chauh ka pe tawh. 

Kha thil a thlen aţang khan thla khat a liam leh tawh a, Zodina nen a kan inhmuh leh hmasak berna a ni. Zothana thawh rim rah a lang a, resort thar an hawn leh theihna lawm nan an chhungkaw ţhian hnai tak kan chhungkua chauh chaw eiah min sawm a, chaw eichhung zawng pawh chuan kan boruak a khirhin a nuam lo hle. A mit a en loh ka tum nasa hle a, min en ang tih te ka hlau. Khami ni a thil thleng kha ngaihtuah loh ka tum ţang ţang bawk a, kan inkar a thil awm ka hrilhfiah awmchhun ka unaunu Grace chiahin kan boruak chu min hriatthiampui ang. 

"Thlalak vel ka lo hmu a, hmun dang in neih tawh zawng zawng aiin tun a mi chu a ţha lawr lak. Zothan i hnathawh hi hmuh a nuam khawp mai. Ka fapa ila ni mai tur hi tun aţangin ka lo hlimpui ve viau tawh" tih pahin ka nu chuan Zothana nu a en a, "Fapa fel leh an kalna lam ve ve a ţha lawr lar i nei hi ka thik ţhin khawp mai che" a ti fiamthu zui a, midang ho chu an lo nui dar dar. 

"Fanu i nei ţha ve tho alawm. Grace lah naupangte in professor a ni thei a, Nunui lah a thawmhnaw design reng reng nalh lo a awm lo. Khawiah pawh kal dawn ila Nunui kutchhuak ngat lo chu ka ha duh lo" ti a Zothana nu in min fak ve lai chuan Zothana chuan nui chung hian min rawn en a,tawi te a lo nuih ve pahin Zodina ka melh ru zauh, a hmelah engmah a lantir ve lo a, a rilru a awm tur leh a ngaihtuahna chhiar theih a ni ve lo. 

"School hi in ti lian zel a, nakinah chuan private school ro ro ah in la langsar ber dawn anih hi. Tunah pawh naupang in ngah tawhin in result lah a ţha. Zodina hian ţan a la nasa a nih dawn hi" ka pa in a lo ti ve bawk a, Zodina hming an lam ve lai chuan ka fian ka hum ngawt ngawt a, dakchhuak a amah en lo turin ka insum ţang ţang. 

"Ni e. Rin ai daihin a thlen san pui a, sawitur dang kan la nei. Resort lam chauh ni lo vin Zodina hi inhmu lo thuai dawn a nia" Zodina pa in a tih takah chuan insum zo lo vin ka hawichhuak ta nge nge. 

"Ph.D tih veleh a tum a,tun a a thlen chinah pawh kan lungawi tawh tehlul nen amah hi a lung a la awi ve si lo va, hmun danga a awm leh chhung chu school hi ka kutah a awm leh dawn a nih hmel" a nu in a lo ti ve thung.  

ZODINSANGA

An hawi phawk hra hlawm. Ka duh dan ni lo vin ka pa duh dan zawk a ni. Tun aia ka thlen san zawk theih nan zir leh turin min nawr a, inzir zel hi nuam ka tih ve bawk vangin ka lo rem ti vat. Thuk tak a thawk ka lak hnuah ka hawichhuak a, Nunui nen a kan mit a intawn lai chuan ka lungphu a rang hle. Ka nu thusawi chuan a ţhawngin mak a ti takzet tih a hriat.

"Ka duh dan a nia, school lian pangngai ve tak kaihruai tur chuan mi thiam a pawimawh a, ka zir leh ang" ka ti a, a reh zui ţhuap. 

Chaw eikham hnuah kawt laiah ka chhuak thawveng a, Nunui amah chauhin ka hmu tehmial. Amah chauh lehnghalin. Thupha ka la chawi mumal lo va, ka duh vang a ti ka ni lo va,thupha chawi zawk tur niin ka in ngai lo. 

"Khaw nge Zothana?" ka aw a hriat chuan phawk hrain a rawn hawi let a, kha thil thlen hnu khan ka hmu lo rei ta khawp mai. 

"Dawrah ka kal lawk dawn a tia,ka zui ve duh lo a, ram dang a kal chu i tum tak tak em ni?" tiin zawi tein min lo zawt a, a mit meng a ngui ve ruai. A bulah ka ţhu ve te te phawt a, min hlauh tawh loh nan hlim hmel put ka tum ve hram. 

"Tum e, thiamna hi chu tuman min laksak thei lo va,ka lo let leh hunah chuan nangpaw'n hma i lo sawn tawh dawn nia" ka ti a, hmeichhia hi derthawng viau mahse derthawng tak a hmuh reng erawh ka duh lem lo. 

"Ni e,ka lo tum ang. Chanchin kan inhrilh ţhin ang a,i lo haw hunah eng emaw tal min lo hawn dawn nia" 

"Kum4 hnu a i duhzawng la hriat reng chu a har maithei"

"I zawh hma chu lo haw i tum miah lo em ni?" tiin mak tih hmel zetin min en. Kan kawt laia eng kan chhit leh thla eng ţangkawp chuan chiang takin a hmai an en fuh a, a mak tihna ka hmuh hmaih lo.

"A buaithlak mai mai. Zir loh kar a thawh tur awm ka zawng pah ang a, hunawl ka nei vak lo vang"

"I chhungten an la chawm thei tho che a, hnathawh tur zawng kher duh suh. I hah mai mai alawm"

"Hah lo ve,thiamna tih zauh nan vek a nia, a chakawm zek zek zawk. Ngati nge? Ka lo haw har chuan min lo ngaih hman i ring a mi?" ka ti fiamthu a, a ţhu ţha sawk sawk a, aw thian kharhin tum burin hma lam a hawi ta daih. Ka fiamthu lehzel a tak tak emaw a ti chu ka nuih a za khawp mai. 

"Zothana hi a puitling lo va,ka ai lo awh la, lo duat la, thu ţha lo hrilh la, nghet takin in lo in vuan zel dawn nia" ka tih zawh a a dar a ka hmer chuan a phu nasa. Inthiam lo zetin ka thlah leh vat. 

"Aw,nia aw ka lo ti ang. Ţha deuhin ka lo enkawl ang" a ti bah nak. Min hlauh tlat chhan hi ka hre thei bik lo. Ka hmangaihna phum bo ka tumna lamah ka kal thui ve deuh a ni mahna. 

"Zothana hian a ngai che sia, hunpui chawlh velah te chuan lo haw ve ţhin la" 

"I awm a, a zia mai ang. Haw reng lo ila ka zir ţha zawk ang. Duh leh in pahnihin in rawn zin ţhin dawn nia" ka ti a, kan inah hian thli a tam a, a vawt leh vur tawh.

"Zothana chu nghak duh suh" tih pahin ka tho a, "A vawt sia, inchhungah tawm lum rawh. A ni dawr kal chu a va ţawng leh duah ang a, a rawn let leh hmain hritlang i kai hman ang a vawt emai" ka tih zawm leh. Rin lo takin a nui ve teh mial a, min rawn chhoh melh a, thla eng hnuaia a mitmeng de sawr sawr te chu a hmuhnawm lehzual. 

"Vawt mai mai chu ka tuar thei lutuk. Ka lo nghak ang che ka ti tawh sia,a rei tawh lo ang. Ka nghak tih a hria a,a rawn let vat mai ang. Min ngaihtuah duh suh" 

"I damloh chuan Zothana a buai leh ber dawn a,chuvang zawk chu" ka ti a, min chhan let leh hmain ka inher vut a,in lam ka pan. Kan ta ni ve ngai lo tur hi chu a tlai tak tak hmain hlat ila a ţha zawk. 

Ka lehkhazir na dawhkan hmaah ţhuin a ngai ngai a ka la dah present bawm kha ka lachhuak a, min pek aţangin thla1 lai a liam tawh chungin ka la hawng lo. Dimte a a bawm ka zut ka zut hnuah ka hawng a, pen dum a lo awm a, pen dang aia danglamna vak a awm lo. A sirah ka hming a inziak a, a buaipui nasa ve dawn tih erawh ka hria. 

Pen tereuh te enin ka nui suk a, thil te tham deuh paw'n hlimna a lo thlen ve thei tho a nih hmel. A hnen aţanga thilpek ka dawn hmasak berna a ni a, min pek lai khan Zothana angah min ngai mah sela a nawmna a bo chuang lo. Min kuah laia a taksa lum dan te leh a rimtui inhnawih rim thlengin chiang takin ka la hre thei a, khang hun chhung kha reilo viau mahse keimahah a awm reng tawh thung. 

Engahmah min ngaih loh thu a sawi lai kha ka bengah a ri nawn awn awn reng. Nunui ka ngaihtuah apiangin kha thil kha ka ngaihtuah tel ziah tawh ang. Inseh ruh ţeuh chungin a pen min pek chu ka hum ruh sauh a, min haw lo va, min ngaina chuang lo bawk. Min thlahlel tak chung a min en na te, a nui hmel mawi tak te kha Zothana ka ni lo tih a hriat khan a bo nghal vek. A hlauh hmelin min ngei hmel hle a, a rukin na viau mah ila Zothana nen an inkar a ka lo tlazep kha inthiam lohna lian tak ka nei tel tho. A aiawh turin min tir mah sela ka kal thui mah mah a ni. Min kuah lai te khan lo nemsawn tur ka nia, tun thlengin ka la inthiam thei lo. Ui viau mah ila ka bula awm reng tur a tana a ţhat loh ringin pen chu drawer ah ka dah a, ka kal hnan zui hmiah. Thaw hawk chungin ka kutphah in ka hmai ka hup a, kum tam tak a ral hnu pawh a hmalam ka la pan thei miah lo hi ka inhaw takzet. 

Inthiam lohna leh thinlung aţanga natna chhuak thei zawng zawng tih tawp tum a theih tawp chhuah a ka lo beih laiin Zothana aw ka hre thut. 

"Hey ila thinrim reng tih ka hria a nia. Chuti ni lo se thla khat chhung lai min hel reng lo vang. Ph.D tih leh i tum pawh zanin ah ka hre ve chauh a" a rawn ti a, ka lo melh run a, a thutiam a hlen loh vang khan ka haw takzet. A ring dik chiah. Mahse thil tam tak ka ngaihtuah a, khami zan a thil thleng thleng khan. Keimah zawk hi ngaihdam dil tur ka nih laiin midang hnen a ngaihdam dil hi ka thih tih hreh ber a ni. A kianga reilote ka awm kha nuam lo ka ti tiin ka sawi thei lo va,ka unaupa bialnu kha ka kuah hial a nih kha. 

"Khami zan khan ka lo insum thei lo lehpek a, ka tihpalh takzet. Rin aiin a nuam daih a" a ti a, ka chhan lawk loh vangin min rawn hnaih leh deuh a, ka lehkhazirna dawhkanah a rawn ţhuin inthlahrung dekin min rawn melh. Khami zan a thil thleng kha kan la sawi dun leh lo va, zawhna a siam paw'n ka hel zel. Kal bo ka tum takah chuan a insum thei lo vin a rawn chhuak ta ah ka ngai.

"Nunui ka zawt ngam si lo va, a ni lah engmah thleng lo angin a awm hmiah hmiah. Engkim a ţha vek em? Rinhlelh deuh te a nei lo tiraw? A zia a dang riauin ka hria a" tiin chik zetin min zawt.

Ka unaupa chu ka melh zawk a, Nunui nen a kan awmdan zawng zawng a inlar zut zut. Thawk ka lak hrawk hnuah lu ka thing a, ka unaupa hnenah lehzel dawt ka sawi a ngai tawh. Nunui hnenah engmah sawi lo turin ka intiam tawh a, ka intiamna ka hlen ngei ang. 

"Eng thil mah hriatchhuah a nei lo" dawt ka sawi. Chu thu a hriat hnu chuan a nui chhuak hawk.

"I ti thei ang tih ka hria a ni. Rinhlelh a nei lo ang ka tih reng kha. Lem kan chan phawt chuan tuman an hre lo vang. Kawr inang kan hak chang hi chuan kei takngial pawh hian tu nge kan nih zawk ka thliar hrang thei lo a nia" min tih lawm tum zet chung hian a ti a, ka lo ner nawk. In ang viau mah ila Nunu in a hmangaih zawk chu Zothana hi a ni. Kan landan a inang mahse kan mizia a hran hlawk vangin a hre tho. 

"Ka kal bo dawn a,ka lo let leh hunah pawh laklawh a awm tawh tur a ni lo. A lehpek a awm tawh dawn lo tih ka hrilh chiang duh che" 

"Tehreng mai. Hetiang thilah hian ka ti buai leh tawh lo ang che" a ti a, a awmdanah a hahdam tawh tih a hriat.

"Hna hi a pawimawh rualin Nunui hi ho mai maiah ngai suh. A hmangaih che a, lawm nachang hre rawh. Hmeichhe dang leh ruihhlo hian Nunui hmangaihna ne pawh a tluk lo vang" fir takin ka ti a, ttlem te chauhin upa zawk mah ila ka thusawi hi a ngaipawimawh ve viau ţhin.

Nui sang chung a buk nghat nghat pahin "Ka hria, ka kianga a awm hian famkimin min siam a, a hma aia ţha zawkin min siam zel. Chuvang chu a nia kan hma hun atan rim tak a ka thawh ţhin. Kei ang bialpa a neih vang hian inchhuang se ka ti ţhin a, a chhuan tlak a awm ka tum. Ka thih ni thlengin ka hmangaih reng ang" 

"A ţha" ka lo ti sup a. A thusawi avang chuan nguai rawihin rip chhunga tang ang maiin inngai mah ila ka thinlung takin ka lawmpui. Nunui nei thei lo mah ila ka unaupa talin a nei thei alawm. 

"A tlai tawh emai mu turin ka kal dawn" a tih hnuah ka lukham kawh pahin "Lo ţap miah suh. Zingah i lukham a huh leh huh loh ka rawn endik leh thlap dawn a nia" a tih chuan nui chungin ka lo bu ngauh a, ka pindan aţanga a chhuah rualin ka nui hmel pawh a tawp nghal. Ka unaupa nen a kan ti ti hian engkim a chinfel ka rin laiin a ti hnawk sauh zawk. Hmalam ka pan a hun tak tak tawh tih ka hria. Hmalam ka pan theih nan chuan ka pa thu ang a awm a,an hmuh phak loh a kal bo hi ka thil tih theih ţha ber leh awmchhun a ni. 

CONT...