FATED TO LOVE YOU-3

FATED TO LOVE YOU-3

ZODINSANGA

KUM5 HNUAH...

"Ka rual chuan i lokal tak tak ang maw? Helamah i chhungte an awm vek sia" thei tui min siam sak min pek hnuah ka hmaah a ţhu a, no hum ran chungin tlemin a rawn awm hnai deuh. Nui sang chung hian "Min ngaihtuah ve tak tak ang a i awm chang leh engkim a i thutak ţhin vang hian min hip lehzual" a ti a, a rilru a awm apiang a sawi chhuak ţhin a,kan inang lo khawp mai. 

"Chuvang chuan em ni min zui chawt?" ti a ka zawh chuan zawi te nui chung hian lu a thing leh ang lawi a. 

"Ni lo ve. Min hip vang ringawt a ni lo. Ka hriat tirh aţang che a ka zui chawt chhan che chu i bialnu ka nih duh vang. Chuan ka ni ta ngei bawk a" a mit a en chungin ka nui suk a, helai hmun ka thlen thlak khan a ni chu a lo awm daih tawh. An chhungkuain an awm a, a pa hi mizo a ni lo a, a hnam chu sawi sak kher lo teh ang. A nu Mizo a nih miau vangin Mizoţawngah a buai hran lo. A fingin a rintlak a, lehkha pawh a thiam khawp mak. Nunui nen an inrual vel maithei. Kan intawn tirh aţangin min pawh dan phet a ngaihtuah a, ţhian dang ka kawm vak lo bawk nen hunawl ka neih apiangin kan inkawm. Mi mawl ka ni lo va, kan inkawm nel hnu lawkah a rilru put hmang ka man thiam. Inlaichinna neih pui tur a ka la inpeih loh vangin ka haider sak ţhin. Mahse hun a kal hret hret a, min hneh ve zel. Bulţan hmasak ka tum miau loh vangin bulţan hmasa tu zawkah a ţang. 

Kum khat kan inkawp tawh chung hian ka hmangaih leh hmangaih loh ka la hrethei lo va,a bula awm erawh nuam ka ti. A puitling a, a fin bakah a hmelţhain a nalh takzet. Kan sawi duhzawng a inang a, ka duh apiang min duhpui thei zel a, ka tuina angah tui chawp a tum ve ţhin. Ka hmeichhe hmangaih ve ţhin theihnghilh tum a hmalam ka pan theihna atan a pawimawh lehzel. 

Lehkha pawimawh ho ka khawm sawk sawk laiin "Zawh duh che ka nei a" a ti sep a, a hlim hmel bo ta vek chu hrethiam lo vin mit ko kan akin ka lo bu nghat. 

"Kha pen kha ngati nge i bul hnaihah i dah reng zel a? Ka sawi awmzia chu i hmang chuang si lo va,mahse i hmuh phakah a awm reng a, i piancham a ka leisak che ai khan i hlut hmel daih zawk. Ka leisak che kha a to zawk a, a nalh daih zawk bawk a" a ti nang nang. Nidang a a sawisel ngai lem loh vangin mak ka ti ge deuh. Ka lehkhazirna dawhkan a pen let nghat chu ka melh zawk a, Nunui min leisak kha a nia, a rei tawh bawk a a hlui ve tawh. Ken loh ka tum uk a,tlai khawhnuah a rukin ka ipte ah ka thun leh. Khami ni aţang khan ka hlatah ka la dah leh lo. Tawi te nui chungin ka keng kang a, "Ngaiah ka lo nei tawh a" ka ti sup a, he pen hi ka hnaih a a awm phawt chuan ka khawhar a zia deuhin ka hre ţhin. 

"Awle. Khang ho kha lo buaipui la, thil dang ka lo endik sak ang che,i haw ţep tawh sia"  a din rualin ka lo melh zawk a, lungawi lo hmel a pu lo. Heng mai mai te hi ka duh nachhan a ni. Engpawh hrilhfiah dawn ila thu tam sawi a ngai lo. Min hrethiam a, zawhna ka chhan duh loh tur chi min zawt lui ngai lo. A la dinreng vangin ka hawichhuak leh a,kan mit leh mit a intawn chiah chuan nui chung hian "Ka rual chuan i lokal duh tak tak em?" tiin ka zawt nawn leh. A sawi ziah a, a tak ram a thlen dawn meuh chuan a chhungte kalsan a hreh leh si maithei. 

"I awm reng tawh dawn sia, i nu leh paten phal mahse Zothana khan heta lokal leh a phal tawh kher lo vang. Bakah a hlimchhawnah phei chuan chhungkaw inhmuhkhawmna ang a ni awm sia. Min hruai ve kha a pawi dawn lo mi?" a ti na a a chezia ah ka thusawi a ngaihven zia a lang tlang vek. A kut vawn tum a ban phar chhuah pahin "Kum khat lai kan inkawp tawh a, ka chhungte nen a in inhmelhriat ve theihna tur hun remchang a ni mai" ka ti a, lawm vanga nui sang chung hian rem leh rem lo va ka malchungah rawn ţhuin ka nghawngah a kuah a, fing fel tak ni si naupang ang mai a a khawsa chu ka nuih a za angreng.

"Kan inlaichinna hi i ngai thutak ve lo emaw ka tia, min duh tak tak loh vangin Zothana hnenah takngial pawh khan i sawiduh lo emaw ka tia, mahse tunah chuan min inhmelhriat tir i tum ve tawh a, ka hmu chak tawh lutuk" a ti siam siam a, a lawmawm reuh khawp mai. 

"Ngati nge tumah i hrilh lawk loh? Hrilh la chuan min lo hmuak ang a a nuam ve dawn a sin" taxi a ka luhpui hnu thlengin a la phun. Tuman min lo lawm hluai lo ang a, mahse Florence an hmuh hmasak berna tur a nia, ka hruai thut tur hi hre lawk hlawm lo se ka duh. 

"Mawh ka pite bulah kan zin ve fo a, anni pawh kan hrilh lawk a min lo lam mai a, ngati nge maw i hrilh hreh tlat ni?" ka malpuia chum pahin a la ti hlak hlak a, suitcase rit zetin a ke ka delh tir palh a,ka ngaihven zui lo bawk nen a lung a la awi chiah lo a nih hmel. Ka en duh lo lui tlat a, nui ruh ruh chungin tukverh lam ka hawisan daih. 

"Ka pite inah ka haw phawt dawn nge ka zui hmasa dawn che?" thutak deuh a a tih takah chuan ka inher a, chhanna beiseiin min lo melh kar. 

"Min zui phawt rawh. Kan chhungkaw ţhian hnai te nen chaw eikhawm an tih ka ring a, eizawhah ka thlah dawn che nia" 

"Midang an awm ve dawn maw?" a ti hluai a, a phawk hra bawk.

"Dawn e. Chhungkaw khat chiah" ka lam hawia inher remin min rawn hnaih a, a sam a chul mam thuak thuak bawk.

"Ka hmel a mak em? Mutthulk ka hrat sia, ka chhe vek em?" a ti sawk sawk a, a ngaihţhat nan a sam ka lo chul ve thuak.

"Chhe lo e. Nang hi chu i mawi takzet" zawi te hian ka ti sup a, hmelah kher kher chuan Nunui hian a tluk lo. A hmelţha ţha kan lo hmangaih bik lo a nih hi. 

Driver nen thawm dim deuhin bungrua kan hlang thla a, kawtlaiah a remchang laiah kan dahkhawm. Kan chuan man ka pek fel hnuah Florence hawi kual ruai lai chu ka kai a, kan luh dawn tak takah erawh ka hnungah ka din tir. Kawngkhar ka hawng de de a, an lo ri sap sap. Aw thian kharh chungin ka lut a, "In lo ţha maw?" ka tih chuan an lo hawi ţhap. 

Ka nu in min rawn pan hmasaber a, hnai teah chiang zetin min en. 

"I va cher ve, thil ei ţha la meng vak vak suh ka tih ţhin kha" a lo ti a, nu hi chu nu an nihna a lang leh nge nge ţhin. 

"A hma aiin ka chak daih zawk. Tunlai ang hunah ka thau hmuih duh bik lo va" nui hawk hawk chung a ka tih laiin "I lo thleng tluang a a lawmawm" ka pa in a rawn ve sup. Ka dar a hmer zawk a, ka nu ang em emin min lo lawm thiam lo mahse a duh ang ka ti hlawhtling thei chu min chhuang ru ve viau tho maithei.

Living room a ţhu ve dang ho ka en kual a, an zinga ka tel ve leh theih vangin hlim hmel an pu vek thei. Nunu in min lo en ve reng a, kan mit leh mit a intawn chiah chuan a hma a ka lo zam tawhna ţhin leh boruak ţang at reng kha a rawn let leh a, hmalam ka pan tak tak lo em maw ni ka ti hman hial. Kum tam tak a ral hnu chuan engkim a vel vek tawh ang tiin ka inhrilh ţhin a,keimah leh keimah dawt ka inhrilh a ang letling zawk. Ka en ringawt pawhin ka lungphu a mumal lo va, theihnghilh ka tum tawh hnu nunhlui bawk a rawn let leh ţhin. Zawi te a bu zeuh chung hian tawi te in a nui a, min lo lawm ve danah ka ngai. 

Ka unaupa in min rawn kuah thut takah chuan ka rilru kal ding lutuk tur a hruai peng ta deuh. 

"Ka lo ngai hman tawh che a, lo haw nachang ila hria hi a lawmawm khawp mai" fiamthu a a tih chuan nui chungin ka inla hrang a, midang aia ţha zawk neih zel duh naa khat a ni bawk a, hna a thawk nasa deuh nge tlemin a thu ve ta deuh.

"Ka kalsan leh maithei che. Naute ang mai a min uai ţhin hi sim tawh rawh"  nui hawk chungin uangthuang zet hian a kiu in min nghawk zawk a, "Ehe..Florence" a ti zui hluai. Ka dinhliah mai piah lamah keimah chiah min buaipui hlawm a,an lo hmu lawk lo a nih hmel.

Florence dinna lam hawiin midang hmuh theih turin dimte in ka pawt a, ka bulah ka din tir.

"Florence a nih hi. In tello a ka awm chhung zawng a in ai lo awh tu" chawl detin Nunui ka melh zawk a "Ka bialnu" ka ti zui sup. Tupawh mai chuan mak tih hmel fe hian min melh phawk hra hlawm. Ka nu harhchhuak hmasa berin "Zodina i rawn zui duh a i fel hle mai. Zothana hnen aţangin i chanchin kan lo hre nual tawh a, kan hmu ve ta nge nge che lawm" a ti a, Ka pa in phur tak a "Ka fa u zawkin bialnu ti a sawitur a nei ve ta nge nge a ni maw?" a lo tih ve zeuh hnu phei chuan Florence a zah hmel khawp mai. 

Ka nu chu rawnkal hnai lehin "Ka fapa i lo buaipui nasa a kan lawm lutuk a nia. Khawhar miah lo vin i lo siam thei a" aw dan deuh a a tih hnuah min nghawk sawk pahin "Kan rawn tlawh ţum che khan min hmuh tir daih tawh ta che" a ti vin hlar thung. 

Nunui te unau chuan mak ti hmel an la pu reng a, Grace phei chuan min en tawn zak zak. Florence a en zawh a min rawn en ve lai chuan ka lo nuih a, kan inkawm nasa bawk a min endan aţang ringawt paw'n min zawh tur ka hre sa. Zawhna a ngah leh khawp ang. 

"I ţha zel maw Grace?"

"Aw ţha e, min va ţhawng ve Zodin" a ti a, midangin min ngaihsak loh hnuah Florence kutah kaiin Grace leh Nunui dinna lam chu ka panpui a,an che eih lo. A ţhawng fal takzet a nih hmel. 

"Florence a chanchin ka sawiziah kha ila hria em? Grace naupanlai aţanga tun thleng a ka ţhianţhaber la ni ve char char a nih hi" ka ti fiamthu a, a sam a lo tan tawi mat a, a ti lang naupang khawp mai.

"Hria e. I chanchin ka ngaithla nasa ţhin alawm" a lo ti ve vat. Hreh zet chungin Nunui chu ka melh a, kan boruak ţang ut reng chu ka la bo thei lo. Thawk ka lak hrawk hnuah "Hei Nunui, Zothana bialnu" ka ti sup a, Nunui chuan min en rei duh lovin Florence zawk a en a, hawih hawm chhuahin a nui sun sun a, a nui hmel mawi ka tihna kha a la ngai reng tho mai.

"Kan inhmu thei chu a lawmawm Florence" 

"Ni e. Ka hria che alawm. Zothana a rawnkal chang hian a sawiziah che a, i design min hmuh tir ho pawh ka la mitthla thei vek. Ka hriatsual loh chuan inu hak mek pawh kha i kutchhuak a ni hrim hrim" 

"Aw Nia,ka kutchhuak ve a nia, i hriatna a ţha khawp mai"

"Thil ka chik a,ka chhui dik thei tehmai nia" tih pahin Florence chuan min rawn en a, kan boruak a hriatthiam hlauin ka insiamrem vat. 

Chawei an siam zawh hnuah kan kil sap sap a, rin ang ngeiin Florence a mikhual rei lo. A tlangnel vat a, tupawh inhawng takin a ti ti pui nghal vek thei. Ka hmazawnah Nunui a ţhu khur a, min ngaihven lo vin a chaw eilai leh Zothana chiah ngaihven mahse ka ep chiah a a ţhu hrim hrim chuan min ti buai pha. Sawi tur ka hre ve mang lo. Midang nen a inbe reng chungin Florence chuan min mitmei pah reng tih ka hria a, Nunui ngaihven ang a tum lo viau mah ila a sawt lo kher mai. A chhungte kalsanin ka hruai a, keimah vang a a hnual ka hlau takzet. 

Kan eikham hnuah kan ţhu khawm ţhap a, kei aia puitling zawk ten zawhna an ngah khawp mai. Min hmu cher ta lutuk chu ka nu a lungawi thei lo va, Nunui nu leh pa lahin ka pa chhawk thuai turin min lo nawr ve sek bawk. 

"Lo ngaithla vek teh u. Nunui nen hian sawitur kan nei a nia" ring leng lawng a Zothana aw lo chhuahna lam kan hawi ţhap. Nunui a kuah a, a nui vur vur bawk. Ka nu leh pate ka en a, chutah Nunui te chhungkua ka en leh a,eng emaw hriat sa nei vek hmel an pu.

"In hrevek tawh tho ang a,mahse vawiin a rawn thleng chiah ka u hian a la hre ve si lo va" a tih lai chuan Nunu in a kut a lo en vat a, a hlim hmel em em mai lehnghal.

"Nupui ka nei dawn. Nunui hian ka sawmna a pawm ve hram a, engkim sawifel a ni tawh" a ti lang lang a, min ţhawng takzet. Midang an lo nui dar dar a, an ngaihven zui lem lo. 

"Ka lawmpui che u" za vaklo in ka nui suk a, ka aw ah tawrhna a lanchhuah loh ka beisei. Din chhuah ka tum laiin a rukin Florence chuan min lo vuan a, nui sang chung hian "Keipawn ka lawmpui lutuk che u" a lo ti ve var. 

"Kan lawm. Mahse kan i zawk te kan neih khalh ve ve tur hi tlemin hrehawm kan ti ve deuh a, Grace chuan a hmu zo rih lo va, Zodina tal hian Florence hi nupui atan sawm ve sela,a rualin inneihna kan buatsaih thei ang a" Zothana fiamthu chu lo nuih pui a har khawp mai. 

"Ka nghak char char a,i unaupa hian min sawm a tum tlat lo alawm" tiin Florence chuan a fiamthu a lo zawm vat a, Zothana lawmah a tla a, min kawk va chung hian "I hmu maw? A nghah reng che kha" a ti lung lung. Sawi tur a vangin ka zak takzet. Aw thian kharh chung hian Zothana ka melh ram ram a, a ngaipawimawh lo nasa.

"Keini chuan hna kan la ţan dawn chauh a,inneih kan la sawi hman lo" ka ti ta ringawt. 

"A dik chiah,eizawnna lam hi kan tan a la pawimawh rih zawk" tiin Florence chuan a lo tuihnih a, ka thaw veng ve huai.

"Duhtawk rawh. An awm iti nuam lo vek dawn a sin" ti a min en reng chungin Nunui chuan Zothana a hau a, hmalam pan a hun ve takzet tawh. Thinlung ber thunun a harsa ţhin hi ka buaina lian ber a ni. 

Florence ka thawh zawh veleh in lam panin ka haw leh vang vang. Car ka dah fel veleh "Engtia rei nge ni tawh?" tih ri hi ka hria a, ka inher vut. Ka ţhianţha ber ka lam pan a a lokal ka hmuh chuan zawi tein ka lo nui a, a ngaihawm ve ţhin khawp mai.

"Eng rei zawng nge min zawh?"

"I bialnu neih hun chhung. Kan thuruk neih ve ang ang kan sawiduh chang hian helai hmun kher hi kan pan ţhin a,chuvang a nia helai hnaiah ka lo nghah che" a ti a, ban hrul remchang laiah kan ţhu dun a, a nau chanchin min sawipui ka hlau rilru khawp mai. Thup tum eng ang mah ila ka bum theih loh awmchhun a ni.

"Kum tam tak ka lo hre ve tawh che a, Florence ang hi i hmeichhe duhzawng a ni tih ka lo hre lo va, i duh chi niin ka hre lo a ni zawk mah. Ka chanchin i hrilh a, ka rawn tlawh ţum che in a chanchin i sawi der si lo" a ti sep sep a, kan thupui ngaiah bawk kan luh leh hmel.

"Min hrechiang viau a i inngaih ang em em khan min hrechiang miau lo a" 

"Mahse ka hrechiang che in ka inhria" a ti a, thutak run a min en chungin "Ka lo chik ru reng che a, Florence leh Nunui i endan a inang lo" a tih zawm zat. Ka nui hmel a ral ve riai riai in ka ring. Nunui hming a sawichhuah leh takah chuan ka thaw hawk. Ka rindan vel.

"Ţhian ţha kan nia, thudik ka hrilh ang che. Florence hi i duh niin i hre maithei mahse i hmangaih lo tih ka hrechiang" 

"Thil dang sawi fak theih nei lo mah ila Florence kianga awm hi nuam ka ti. Ngaihtuahna ka hmang tlem a, kan inang a, kan tui zawng a inang lehzel bawk a, tunah ka la hmangaih rih lo anih paw'n kan pahnih tan hun insiam ţhain ka hria. Ka tum phawt chuan ka hmangaih thei ang. Chu chu thil dik ber a ni tawh. Ka unaupa nen an innei thuai ang a, ka nau a ni thuai dawn. Engkim a tawp tawh" 

"Ila hmangaih reng. Kum tam tak a liam hnu pawh hian ila hmangaih reng. Engpawh i sawi thei mahse i mitmeng ka chhiar thei thung" min lainat hmel a pu chu ka duh lo ru khawp mai. 

"Ka duhthlanna a hmangaih ka ni lo va, ka thunun theih lo thil a ni. Tum lawk miah lovin hmangaihna a piang thut a, mahse hmangaih reng mah ila ka ta a ni dawn tihna a ni hleinem. A hlimna tur a chhar chhuak thei zel hi ka lawmpui. A mipa hmangaih hi ka unaupa a ni leh kher nen, ka lawmpui takzet"  

"Sualna nei lo mi thianghlim ang maiin alawm i ţawng ve tehmial le. Mahni intheihnghilh ţhak khawp a thuk a ka unaunu i hmangaih hi ka lawm dawn nge a ruka i tuar reng hi ka khawngaih dawn zawk che? Mipa pahnih diktaka hmangaih tu a nei hi ka lawmpui"

"Min sawi tel tawh suh. Nangmah kha in ngaihtuah rawh. Keichu mipa ka nia, hmeichhe tan chuan pasal neih a hun aw"  

"Ka duh hunah ka nei ve mai ang. Florence nen hian in hlim zel theih ka beisei tlat a nia"

"Ka tum mek chu a nih hi" 

"Sir ka lo lut thei angem?" kawngkhar bawh deuh chunga Zothana ding reng ka hmuh chuan tawi tein ka nui a, tlem te chauhin upa zawk mah ila ka hmu puitling thei lo.

"Lutuk"  rawn luh paha hawikual rulh rulh chung hian "Khaw nge i bialnu kha? I riah pui dawn na nge?" fiamthu bawk. Ka thlah lai chiang takin a hmu.

"Thu lawi lo zet zet sawi kha bansan la, eng nge i duh min hrilh rawh" ka lo ti hluk. 

"Kha kha ka ngai" min kawk zauh chung hian a ti a, a nui ruh ruh bawk.

"Eng maw i ngaih?"

"'Eng nge i duh?' ti a i sawidan ţhin kha ka ngai" ka ţawngdan chiah chiahin a sawi kher lehnghal.

"I pindan chhung a hetianga kan ti ti lohna hi a rei tawh a, inhmu fo mah ila kum tam a liam meuh chuan kan hrang hlak a ang" chu thu ka hriat chuan ka inthiam lo ve lek lek. A sawi dik chiah,in hmu fo mah ila in khata kan awmdun lai kha a ang thei tawh lo.

"Kan kalna lam ve ve ah kan buai a, nakin zel atan kan inbuatsaih a ngai a, hei hi hringnun chu a nih hi" ngui bur a khuma a ţhut hnawk hnu chuan chair a ţanga tho chhuakin a bulah ka ţhu ve a, "Kan inhmu tam lo anih paw'n engmahin min ţhen hrang dawn hleinem. Kan inzawmna hi a chak ţha a, unau tam tak aiin kan inpawh zawk a, phir kan nih vang te pawh aniang. Nangpaw'n i sawi ziah kha phir chuan rilru inhriat tawn sak theihna kan nei ţhin itih ţhin kha hrereng la" ka tih takah chuan tlemin a hlim veleh ta deuh.

"I rawn let leh hi ka lawm takzet. Ka hnaih a i awm phawt chuan ka him bikin ka hria" nui hawk chungin a tih ziah danin a banah ka hnek fiam a.

"Naupang ang a awm hi bansan tawh rawh. Nupui inei thuai dawn a, fate ila nei ang a, i nupui enkawl tur leh hmangaih reng turin chak tak a i awm zel a ngai. In innei thei tur hi ka lawmpui takzet che u" 

"Ka zam ve ţhin a, ka buai a, ka nu leh pate tih lawm nan theihtawp chhuahin hna ka thawk a, mi aia ţha zel neih tumin ka hmanhlel a, ka sawmna a lo remti ve mai kha ka vannei. A ni ang hmeichhia ka tawng hi ka lawm takzet. A ni ang tawng a inhmangaih tir thei tur hian ka nunhlui ah khan thil ţha tih ka lo nei a ni maithei. Hna avanga rilru a buai lai pawn ka kianga min ţanpuia min thlawp tlat tur a a awm te hian a nuam bik a, engkimah min hriatthiam ţhin vangin ka lawm bawk a" a ti ve mual mual. Hetiang thil hi a sawi vak ngai lo va,a lawm takzet a nih ka ring. 

"Chuvang chuan ngaihlu la,i thinlung zawng zawngin i hmangaih dawn nia. In kawng zawh ţheuh a in lo tluang purh vek hi a lawmawm" 

"Nih leh Florence ve hi? Ka duhpui che, kawm a nuam a, in inhmeh khawp hi" 

"Kan inlaichinna in hma a zawn zel theih nan ţan ka la mek" ka ti a,hma kan sawn thei meuh ang nge maw?

"A ţhat chu. Nupui ka nei a nih paw'n kan hnenah la awm ve reng rawh. Ka hlawhtlinna te min hmuhpui ve tawh la, ka duh angin ka ti ve thei zel a,mahse i tello chuan heng hi ka ti thei lo vang. Nangmah vangin ka duh ber ka ti thei a, zir sang vak lo chung pawh a tih theih zawng zawng. Lehkha kan zir lai zawng zawng paw'n assignment ka tih tir vek che a, kei ka leng mai mai a. Ka pa in kan unaua school ringawt buaipui tur a min duh laiin ka ai i awh a, ka tuina tur dang min zawn hmuh pui leh a" 

"Ka unaupa inia i hlimna tur ni a ka hriat zawng zawng chu ka ti ve bawk ang chu" ka tih chuan ka kut vuanin nghet zetin a hum a, zanin a awmdan chu a danglam khawp mai.

"Ka lawm e. Ka tan a i inhlanna zawng zawngah" 

NUNUI

Inneih kawr ka kutchhuak ngei mai ka ha chhin vel a, ka phur tawh takzet. Darthlalang hmaah ka ding a, nidang zawng aiin mawi ka inti. Siamţhat ngai a awm miah lo bawk. 

"Ka mumang a ni lo tih min lo hrilh lawk teh" Zothansanga tak hi chu a. 

"I mumang a ni lo" nui chung hian ka lo ti a,ka mipa hmangaih ber nupui ka ni thei ţep tawh a,chu ringawt pawh chuan hlimna nasa tak min thlen. 

"I mawi takzet. Mo ka hmuh tawh zawng zawngah ila mawi ber" a ti vei luam. 

"I nupui ka la nih em loh hi. Insum ve deuh ţhin la" 

"I remtih ni la la khan neih nghal che ka duh a, mahse Zodina a lo haw chung chung thei si lo. Kan inneihna hmang thei lo  khawp a buaina tur dang a zawn leh vaih chuan a chak tawh lo khawp ang" fiamthu titak deuh hian a ti a, keimah vanga lo haw lai lawk duh ngai lo a nih ka lo ring ţhin a,mahse ka ring sual a ni. Bialnu a nei ve tawh hi ka lawmpui takzet. Nunhluiah a awm reng lo va,hmalam a pan ve tawh. A tan engmah ka ni tawh lo ang tih ka chiang. 

"A buai ve a, a awm bo vang vang a, a rawn haw a hna bawkin a hmuak leh a, ipa chuan a enliam thei mai ang mahse inu chuan a ngaihtuah ţhin ngawtin ka ring, tlemin a cher ta deuh lehnghal"

"Hna bak ngaihtuah nei hek lo. Ngaihsak tu nei miah lo vin mal takin a awm ang tih ka hlau ţhin a, keichuan nang ka nei che a, Zodina a mal tlat ka hmuh te hian ka inthiam lo va, mahse tunah chuan ngaihtuah a ngai ta bik lo. Florence hian a ngaihsak dawn tih ka chiang. Ka tan unaupa ţha ber a nia, a inpekna zawng zawng hi ka chhiar seng tawh lo" a tih chuan ka lo na lehpek. Ka khawngaih ve ţhin. Kan pahnih a kan hun hman tawp ber ni kha ka ngaihtuah let lo thei lo va, min duh ruk ve reng ţhin thu Grace ka aţang ngeiin ka hre zui zat bawk a, buaina chawk chhuak lo va min duhna phum bo a thlang hi ka lawm takzet. Kan boruak ti hnawk a midang natna thlen ka duh bik lo va, amah hmangaih tu leh a hmangaih a tawng ve ta hi ka lawmpui.

Zothana hnenah hian ka hlim a, damchhunga hlut a, hmangaih reng ka duh. Chhungkua kan din ve thuai ang a,ka duhthusam ţhin kan puitlin thei ţep tawh.

"Hna hi thawk rim vak tawh lo la, ka nupui ini dawn a,ka chawm thei che. Nang chuan in lamah kan fate i lo enkawl ang a"

"Vawk ka ni em ni? Ka thawk ve thei a, min chawm thei mahla hmasawn zel ka la duh ve tho lawm. Ka dawr hi ka khawvel a nia, ka tan a pawimawh tel ve tho" ka tum zui bar. Ka kutah chelhin chiang zetin min en a, zam map lo vin ka lo en ve reng.

"I khawvel ka ni emaw ka lo tia, ka ni na nge?" 

"Ni e. Nangmah chiaha i thawh bik ka duh lo va, kan innei thuai ang a,nupa chu kan in ţanpui tawn zel a ngai alawm. Ka khawvel leh thinlung zawng zawng a ka hmangaih i ni reng ang" ka ti a, a phone ri ral ral chuan kan boruak a thlak danglam vek,inla hrangin a phone a chhang a, keichu darthlalang hmaah bawk ka ding leh. Tu nge a biak a eng chung chang nge tih lam ka lo ngaihven tawh lo. Mahse a rawn let leh hnu a a hlauthawng hmel ka hmuh takah chuan ka ngaih a ţha tawh zan bik lo.

"Nunu, huan enkawl tur a kan dah te kha, an fapa tuiah a tla a, ka kal nghal a ngai. Zodina a buai ka ring a,ka hrilh rih lo mai ang. Ka tihpalh takzet. Nangmahin i haw thei ang tiraw?" 

"A va zia lo ve. Haw thei lutuk e, mahni a haw te mai mai a harsa hleinem. An mamawh phawt che chuan kal vat vat rawh, a dam zawk ka nih hi" ka lo ti sawk sawk a, thil ţha lo zawk a thlen ka hlau ru ve kher mai.

"Awle ka kal ang. Nachinah chanchin ka rawn hrilh dawn che nia" a ti a,inher mai a tum chu a nghawngah lo kuahin a hmuiah ka fawp a, ka chet dan teh thut chu mak a tih hmel khawp mai.

"Hrilh tur che ka nei a,mahse tunah chuan i buai rih dawn sia,zanah ka hrilh dawn che nia,i hman veleh kan inah lokal rawh aw" ka ti a, lu a lo buk nghut hnuah ka chalah a fawp ve thung. 

"Zanah chuan ka lokal dawn nia, min lo nghak reng rawh" zawt te hian a ti sup a, a mitah tak enin ka kuah nghet sauh. Min hnaih poh leh ka ngai emaw tih tur a ni.

"Ka hmangaih che" 

"Min neih i remtih vangin ka lawm e. Min hmangaih vang paw'n. Keipawn ka hmangaih che. Hmeichhe hlim berah ka la siam ngei ang che" a tih hnu chuan nui chung hian zawi muangin ka thlah riai riai a, a liam dawn thlengin ka thlir a, a rawn hawi let ngun. Ka hmuh phak loh hnu chuan ka pumah ka kut nghatin ka chhuk melh a, thu lawmawm tak keimah chauh a ka hriat hi ka hrilh ve chak tawh kher mai. A lawm thiam leh dawn ropui si.

Khua a tlai uarh tawh a, mo kawr kha ka la ha reng. Ka in en deuh sek a, ka phelh mai duh lo. 'I phur fal e' tiin ka dawr a thawk te ho in min fiam sap sap a, nalh ka ti em a ka hlip phallo. Ka u rawn kal kawi a tum a,min rawn hmu ve se ka tih vang a la inthlak lo ka ni pakhat bawk a, ka lo la nghak char char.

A thim thet thet tawh a, ka unaunu ve hian min theihnghilhin min hawsan daih tawh a nih ka ring. Zanah Zothana lokal a tum bawk nen haw ve mai ka rilruk a, ka mo kawr hak lai hlih ka tum mek laiin ka phone a ri ral ral. Ka u hming ka hmuh chuan ka thaw huai. Min lo la theihnghilh bik lo anih hi.

"Iva rei ve ka nghak che nia, inneih ni a ka hak tur hi min rawn hmuh pui ve rawh" 

"Nunu hrilh tur che ka nei a, dawn sawn dan thiam tum la,puitling deuhin lo ngaithla rawh aw" a tih chuan ka ding hluai a, hlauhthawnna nei nghalin ka lung a phu dawt dawt. A aw a danglamna awm tel chuan ngaih a ti ţha thei lo. 

"Thil dik lo thleng a awm em ni? I aw ava dik lo ve" 

"I dawr lam panin ka lokal mek a,lo insiam rawh. Hospital ah kan kal tlang a ngai dawn a" 

"Ngati nge? Tu nge hospital ah chuan awm? Naupang tui tla kha a mi? Zothana'n engmah min rawn la hrilh si lo va" 

"Naupang a ni lo. Zothana zawk. Hlauthawng suh aw...Zothana a accident a, a ţha leh vat ang. Ka rawn lam ang che lo mangang miah suh...Nunu i hrethei em?" a rawn ti mawlh mawlh a, chhan let nachang ka hre tawh lo. Ka bing mup mup a ni ber. Nghet zetin phone vuan mah ila ka kut khur a reh thei chuang lo. A ngaihna ka hre lo vin ka hriatna zawng zawng a ruak vek a, awmdan tur ka hre lo. Khawvel hi a reh nghal ţhuap a ni ber.

CONT...