FATED TO LOVE YOU-4

FATED TO LOVE YOU-4

NUNUI

Car ah muangchangin ka ţhu lut a, ka thu hriat chu dawn sawn dan ka la thiam thei lo. Na zet a ka hmui sehin kut ka hum ngawt ngawt a, a nat lutuk loh nan a rilru a ţawngţai mawlh mawlh bak tih theih ka nei rih lo. Ka mangang takzet a, tun dinhmunah chuan Pathian chiah beisei ka nei. 

"Eng nge a chungah thleng? Chhunah khan a la ţha hle sia" Grace lam hawiin ka ti a,ka aw thlengin a khur nasa hle. 

"An insu a nih hmel. Traffic awm loh na chin a nia, a inthlah dul deuhin helmet a khum lo va, chumi thleng chu ka hria" a ti a, ka awih lem lo. Traffic jam a kan din lai pawhin min en duh lo va, zep ţhen a nei a nih ka ring. Car keng ziah ţhin si vawiin ni berkher a bike a keng chu pawi ka ti takzet. Hospital thlen vat ka duh tehreng nen a jam sek lehnghal.

Nghet lehzualin kut ka hum a, ka inti pachang ve hram hram. A na lo ang tiin ka ngaihtuah lui tlat.

"Engtin nge i hriat?"

"Ka nu hnen aţangin" nghenchhan ngheng a mit ka chhin rualin ka biangah mittui a luang a, ţah loh ka tum lui nasa. 

"Zothana chu a ţhat i ring ve tho em? Hliam tenau te te chauh aniang tiraw?" aw ti a min chhan beisei deuh chung hian ka ti a, ka rindan hi finfiah ka duh.

"I sawi ang lek chu nise ka ti. Mahse a chhungten an hriat paw'n engmah a hre tawh lo" a tih chuan ka chakna neih ve zawng zawng hi bo duak ang a ni. Rinchhan nei lo va ding reng phei chu ni ila ka tlu tawp thei hial ang.

"Engmah a hre lo a?" zawi te a ka tih hnuah lu ka thing a, an hresual a nih ka la ring fan. A lu hai rih mai mai anih ka ring. Mi thusawi aichuan ka ngaihdan hi ka ring zawk. Min kalsan dawn paw'n a la dam ţha var a, zana kan in a lokal a intiam bawk a, amah nghak reng turin min ti a, a thutiam a bawhchhe lo vang. Hliam nei chung pawh a a lokal ţawk ţawk ka ring. A thutiam a bawhchhe lo vang a,dawt min hrilh lo ang. 

Zawi muangin ka pum zawnah ka kut ka nghat a, naute chungchang takngial pawh ka la hrilh hman lo. A lawm dawn tehreng nen, a fa ngei chungchang hi a hriat ngei ngei a ngai. A ţha em em ang. A ţhat leh vat a ngai. Kumkhuaa inhmangaih reng turin kan pahnihin kan intiam tawh a, Pathian leh midangte hriatah thu kan tiam ţep tawh. A intiamna hi a bawhchhiat duh bik ka ring lo. 

Grace phone a rik chuan keimah zawk ka lo phu dawt. A thusawi ka lo ngaihven ran a, ka hriatthiam theih tur chhanna pe lo mahse a hmel a inthlak thawk. Hospital kan thleng tawh a, motor a dahţhat lai velin a ni call a dawn hun hi. Ka lam rawn hawiin mitmeng ngui riai hian min en a, a en uarh loh vangin ka hmuchiang thei lo. 

"A thi chiah" a ti sep a, chu thu tawi te chuan min deng na takzet. Khawvel hi a ding chawt ni hialin ka hria. Ka ţap thei lo va, ka hrawkah hian eng emaw hnawh tu awmin thawk thlengin a harsa. Inthunun tumin ka bei lui ţang ţang a, ka u thusawi chu dawt mai mai ni se ka ti takzet.

"In lamah kan lo nghak dawn mi? Tunah chuan hmu rih lo mai la, inah lo awm ila,i inbengdaih theih hunah i hmu chauh dawn nia" min ngaihtuah vang a min hruai let lehnghal duh mah ni se lu ka thing. Thil thleng zawng zawng hi hriatthiam har ka ti. Chhunah ka bulah awmin kan inneih kawr tur ka ha chhin lai te kha nalh ti deuhin min lo thlir a, kei aiin a hlimin a phur zawk mah emaw tih tur a ni. Min kuah chungin min hmangaih thu a sawi a, a kal dawnah lah reilote chiah thang a ka hnena let leh vat turin a intiam bawk a, engtin nge a thih theih? 

"Tunah ka hmu duh" ka ti sep a, ka awmchhung tawt lutuk tih reh tumin ka thaw zui hawk. 

Ka unaunu rinchhanin ka kal ve ţawk ţawk. An lo awmţhap tawh a,ka luh ve mai an phal lo. 

"Screen in an zar hliah vek. I hmu thei chuang lo. In a kan hruai haw hunah i hmu dawn nia ka tih kha" min vuan tlat chungin Grace chuan a ti a, chakna ka neih tawh loh miau vangin ţang lui tur ka awm chuang lo. 

Zothana vuiliam ni chuan buaipui ngaiin awm lo mah ila a hmel ka hmuh apiangin ka mittui a tla leh ţhin a, a vun chu dâng vek tawh mah sela ka tan chuan a la ţha ber tho. Ka unauni in min ngaihven reng a, tupawh mai chuan min khawngaih ni berin ka hria. Ngawi rengin ka hmangaih ber chu ka en tlawk tlawk a, midangin min biak paw'n chhanna chang ka hre mang lo. Ka hriatna a mumal lo va, an aw ri hre mah ila an thusawi ka hre hleithei lo. 

Thlanmual thlengin ka zui a, a tawp thleng a zui zel ka duh. Pastor in ţawngţaina te a hman zawh chuan an let sap sap hlawm a, keichu ka dinna ngaiah ka la ding reng. Ka rose par ken chu ka thlak thla a, hetianga ka hmu chung pawh hian awih har ka la ti. 

"An haw deuh vek tawh a, haw ve tawh rawh,khua a vawt angreng sia,i damlo mai ang" ka aw hriat ziah ţhin ang tak mai ka hriat chuan ka puan bah hmawr ka hum ngawt ngawt a, min hmangaih zia min hrilh ţhin tu aw ngei kha nise ka tih em em laiin a nih loh zia ka chiang hle thung. Amah ang chiah chiah midang daih zawk a ni. 

Dimte a min kuaiherin ka bianga ka mittui luang chu min hruksak a, a ni pawh a mit a sen râm mahse a ţap lai ka hmu lo.

"Hetianga i ţap hi ka vawikhat hmuhna. Ţap tawh suh, Zothana'n i ţah reng a duh lo vang, amah vang a nih ngat phei chuan" ti mahse ka ţah a chhuak sual sauh a maw tih tur a ni. Ka insum theihna a bo a, ka inthunun ve na zawng zawng nen. Ka awm a min hnawh tlat tu a awm reng vang hian a na in ka thawk a sak a, ka thaw ţha hleithei lo. Zan lamah nise Zodina ka hmuh chauhin ka insum theihna ka hloh a, a chhan ka hre bik lo. An inan em vang hian Zodina ka hmuh tawh chuan ka inthunun theihna zawng zawng a bo vek ţhin. Zodina hmuh chu Zothana hmuh ang vel a ni a, mi hrang hlak an ni tih hre tho mah ila a hmel leh a aw vang hian Zothana ala awm ve ang tlat a ngaihna ka nei. 

"Thu tam tak min tiam a, min nei tur leh kumkhuaa min hmangaih tur te, min ngaihsak reng tur te pawhin a intiam a, mahse hetiang hi a ni ta sia, min hmangaih kher kher hi a inchhir ang a min nuai bo dan a ngaihtuah emaw tih mai tur a ni. Ka tel lo vin khawiahmah a kal ka ring tawh lo va, mahse min hruai ve lo vin a kal tho si. Eng nge ka tih tak ang? A tel lo vin eng thil ber nge ka tih ang" 

ZODINSANGA

"Phir hi chu kan inzawm tlat a, kan rilru leh ngaihtuahna thlengin. Kan hmel a inang em em lehnghal. Thihna chiahin min ţhen hrang thei ang. Ka thih hmasak chuan Nunui lo enkawl ţha la, fa kan nei hman a nih phei chuan ka fate zawng zawng nen ţha deuhin lo enkawl la,ka ai lo awh ngei ngei ang che" a accident ni a in a chhuahsan dawn a a sawi hnuhnung ber a ni. Hna ka kal tur ka insiam laiin ka pindanah a rawnkal kawi a, kan ti ti laiin fiamthuin a sawichhuak a, keipawn ka lo nuih liam pui mai. Kan thihni tur ka lo ngaihtuah ngai lo va, Zothana phei chu thi thei turah ka ruat lo. Ka phal loh vang te pawh a niang. 

A thusawi vang khan nilengin ka awm a nuam lo va, tlai lamah a accident thu ka hria. Ka thinlung hi vih zawk ang maiin a na a, Nunui zawhna min zawh ang chiah hi keipawhin zawh ve ka duh. A ni ang tho hian ka awm. A tello in eng nge kan tih ang? Nunui enkawl ţha turin min hrilh a mahse engtia tih tur nge niang? 

"A tawng che hi a nun a thil thleng ropui ber pawl a nia, englai paw'n a ngaihtuah reng che a, a hmangaih vang che hian a inchhir lo tawp ang" ka thusawi chu hria angin a awm lo. A en ngai a en tlawk tlawk a, mu leh mal a nei lo. Chanchin min rawn hrilh khan a chhe ber tawk thei turin ka inbuatsaih nghal a, mahse chung chuan awmzia a nei lo. 

Ka ţhianţha ber leh a ţha ber zel min duhpui tu leh ka pawh ber ţhin, mi hlim thei tak ni bawk chu kumkhua a tan a awm tawh dawn lo va, awih a harsa takzet.

Ka hmaa hmeichhe ţap mek hi ka hmangaih takzet. Mahse ka ta a ni lo ni lo vin ka unaupa neihchhun liau liau a ni. Zothana awm tawh lo mahse la engtin nge a nupui ni mai tur hi ka enkawl theih ang. Florence a awm ve tawh lehnghal. Mahse hetianga ka hmuh chiah hi chuan inthunun a harsa takzet. A lungngai a, a chak lo in a derthawng a, ka venhim theih nan engthil pawh ka ti duh ang. Ka thaw hrawk a, hnem tu a mamawh ni a ngaiin ka kuah a, "Ka ngaihsak ţhin ang che" ka ti sup a, a ţah nasat em vangin ka thusawi chu a hre pha kher lo vang. 

"Zodin kawtlaiah min lo hmuak tak tak a ni maw?" lu ka lo bu nghat a, nui sangin scooty min rawn pan a, za lo zetin tawi te in ka lo nui ve. Zothana thih aţangin karhnih a liam tawh a, ngai ka la awh thei lo. Thil ka sawi ve hmain min kuah chawt a, min thlah mai ka rin laiin min kuah nghet sauh sauh. Mit chhingin a taksa lumna chu ka intuam tir a, rinchhan tur ka mamawh ve rih hrim hrim. 

"Thil thleng zawng zawng hi pawi ka ti khawp mai" tiin ka beng bulah a phun sep a, engmah sawi ve lo vin ka bu leh nghat ringawt. 

"Ka ngaihtuah lutuk che a, a hlimchhawnah kha chuan i kiang a awm chawt a mawi dawn si lo va, mahse tunah chuan ka awm reng thei tawh ang. Tunah pawh hrilh lawk lo cheu in ka rawn kal thut a,ka rawn thlen dawn hnaih a ka hrilh chauh che kha pawi iti em lo vang chu" a tih chuan dim te in a ban ka dahsawn sak a, a hrilh hai  loh nan ka nui lui zui zat.

"Pawi ti lo ve. I rawnkal hi a lawmawm zawk. Mahse min ngaihtuah vak duh suh ka ţha. Hna tam tak thawh belh tur ka nei a,lungngai leh khawhar hmanin ka awm lo vang. Ka nu leh pa enkawl tur a ka chak ţhat a ngai a, Zothana buaipui ber ţhin zawng zawng hi a buaipui lai ang reng a dah ka duh. Kan kiangah awm tawh lo mahse ka ti mangang thei lo vang" ka nat rukna thupin ka ti a, awm lo mahse min thlir reng maithei. 

"Iti thei dawn tih ka hria. I chak a,tuman an hneh thei lo vang che tih ka hre bawk a, ngai i awh leh vat ang tih ka chiang. I ţhat thu i sawi thei hi ka lawm lutuk" 

"Umm.." ngaihven vak lo in ka bu nghat nghat a, a rawn thlen tirh a lei a a bawm hun chuan ka mit la in "Eng nge kha kha?" ka tih zawm zat. 

"Thil a ei mumal lo an ti che a, zingah hma tawkah tho in i duh chi hlir ka siam sak che. Nileng hun ka hmang a nia aw. Inu leh pate nen a in ei khawp law law in ka siam a" tiin phur zer hian min hrilh a, box hran hran a chher chhuan ţeuh. 

"Iva fel ve. Lut ila,chaw i ei ve nghal dawn nia" tih pahin a thil lo ken chu ka khaisak a, ka khai lohna lampangah min vuan a, ka ţhat tak tak a ring a nih hmel. Min ngaih ang chiah chak leh thil ti thei nih ka chak khawp mai. 

Chaw ei a hun veleh Florence chuan a siam sawk sawk a, a eitur lo ken ho pawh ti lum ţha lehin kan hmaah a tlar dul. Ka duh chi leh tui tak tak vek mah ni se kan chhungkua bik chuan kan ei tui chuang lo. Eng thil pawh kan hmaah chhawp se tui ti tak a ei a har vek. 

"Nu Maruat ei ţeuh rawh. Hetianga i awm reng chuan i lang tar vat ang a,i chakna a bo thuai mai ang. Hei in eitur a ka siam ka lo ken ţeuh hi" tiin Florence chuan chaw eiluih tir tumin ka nu a thlem heuh heuh. Zothana awm lo thut hi a pawm thiam lo ber a ni hial awm e.

"Florence thu kha zawm la tlem tal ei rawh. Karhnih chhung a i thil ei a tlem tham emai i taksa in a tuar lutuk ang" ka pa in a lo ti ve bawk. 

An thusawi chu hnial hrehin eitum ve bawk mahse harsa a tihzia a lang reng. 

"I lokal thei chu a lawmawm khawp mai. Kan nu pawh i awm chuan a ţha sawtin ka ring. I fel takzet a ni" ti a ka pa in Florence a fak lai chuan "Nunui pawh a fel khawp mai" ka nu in a lo ti ve vat.

"Zothana'n nupui tur a tana a duh thu a sawi khan kan hlim tlang hle a, mahse tunah chuan rilru na takin a awm awm sia. Kan fanu a ni thei lo ang a, Zothana lah a awm tawh si lo" a tih zawm zat. Chu thu ka hriat chuan fian ka hum nghet sauh a, thlan a kan inhmuh bak kha ka la hmu leh lo. A chhungte an rawnkal pawhin a rawnkal ve lo va, a dawr a la hawng leh lo bawk.

"Tui deuhin lo ei rawh u" tih leh thawh ka rual a, tupawh hmuh an hrehawm vek. Intih harh tumin pawnah ka ţhuchhuak a, Zothana a ngaihawm takzet. 

"I ţhat thu i sawi khan ka hre sia" ka bulah a rawn ţhu a, min en reng chungin "Chaw ei laia inu a ţawngchhuah meuh kha chuan hmuh theih khawpin i danglam a, inu lungngai hmel i hmuh vang nge Nunui na tuar tur i ngaihtuah vang zawk?" a ti a, a ni ve ve. Zothana nen a an inhmangaih zia ka hria a, a dinhmunah ka indah chhin a, ka khawngaih takzet. 

"Chutiang mai maiah lo buai ve suh" 

"Thikthu tihlan na hun a ni lo tih ka hre ve tho a, mahse tihlan loh har ka ti. Nunui a awm ve apiangin i danglam a, a awm loh laia a hming an sawilan paw'n chuti tho chu. Inhlat tak a kan awm duh lo vin ka zui che a, a chang chuan ka awm ve tih hi i hre lo a ang ţhin" tiin a phunnawi a, a sawidik chiah. A awm ve tih hriat loh chang ka ngah. 

"Thlah i ngai em?"

"Scooty ka ken ve reng hi. Mu hma rawh naktukah ka rawn tlawh leh ang che. Hmeichhe dang vanga i danglam ziahna hi hmuh reng a ngaih loh ka beisei" a ti a, inchhungah a lut leh zawk a, a haw dawn meuh chuan ţha deuhin min thlah leh ang lawi a. 

Mu turin inchungah ka chho a, Zothana pindan zawn ka thlen chuan ka ding chawt. A pindan kawngkhar ka melh ngawt ngawt a, ka awm hi vih zawk ang maiin a awm leh tawh. A thih hnuah ka la lut leh miah lo va,ka lut ngam lo a ni ber. A thawmhnaw leh hak tur leh kan phum tel tur vel pawh ka nu leh paten an thlang chhuak vek a, ka hriatchian an ring ber a, thlansak tur a min duh ber laiin ka thei tlat lo. 

Thawk la kawkin ka kalpel a, ka pindanah lutin khumah ka mu a, ka banin ka mit ka hliah a, chak tak a awm turin ka inhrilh mawlh mawlh. He thil hi tlukchhiat phah nan ka hmang tur a ni lo tiin infuih ve bawk ţhin mah ila awmzia a awm mawh khawp mai. 

Ka phone ri chu en mang hlei  lo vin ka chhang a, rin dan chiahin Grace a ni.

"I ţhat leh ţhat loh ka rawn zawt duh che a" a rawn ti a, he zawhna hi ka dawng mawlh mawlh reng a, min ngaihtuah vanga min zawt mah ni se boruak an ti chhe zual daih zawk.

"Ţha e,ka buai a,hrehawm tihna hun ka nei lo. Min rawn ngaihtuah suh" 

"Buaipui tur i ngah ang tih ka hria. Ţanpui i ngaih chuan sawi hreh suh aw,ka awm reng a nia" 

"Ka hria, a lawmawm. Nunui eng nge a an tawh?"

"A ngai reng. Chaw a eiţha duh lova, pindanah a inkhung chawt. Tuman kan be ţawng zawk lo mi â ang mai a ni tawh. Ţap bawrh bawrh se, a natna te hi auchhuahpui vak vak se ka duh zawk. Mahni chauh a tuar tlawk tlawk ai chuan a ţha zawk ang. Tunah chuan a ţap ngai lo va, a mittui a tla zeuh zeuh ringawt. A tawrhna hi amah chauh a a thinlung a phum bo a tum a niang" a ti a, a aw aţang ringawt pawhin a mangan zia a hriat.

"Hun a mamawh a nih kha. Hmalam pan a awlsam dawn lo va,hun pe rawh u" 

"A ni chiah hi ka ngaihtuah awmchhun a ni lo. Tu tan pawh hmalam pan a har dawn a, a bikin nangmah kha"

"Ka ţha" ka lo ti leh nghut. Hmeichhia ang em em a derthawng ka ni ve tlat lo.

"I ţha lo. Zothana nen in inpawh zia kan hre vek a, iti lang duh lo mai maiah ka ngai. I na tih ka hria, i natna kha thup duh suh, ti langchhuak la, i unaupa i sun na kha lanchhuah tir a pawi lo"  

"A tlai tawh emai duhtawk phawt ang" ka ti a, min mangţha hnuah ka dah a, lanchhuah tir dawn mah ila engtia lanchhuah tir tur nge ka hre lo. Ka thinlung hmuthiam tu chauhin a hrethiam ang.

Ka thil tawn theihnghilh tumin ka thawk nasa zual a, hunawl ka insiam duh lo. Florence a chhungte hnenah a let a, min rawn be ziah na a buai ka intih miau vangin ka be rei ngai lem lo. Ka haw pahin Nunui dawr lan theihna ah ka ding khawmuang a, ral aţangin ka thlir. A lo inhawng tawh a, hma a sawn hret ni ah ka ngai. 

Ka phone ri chu lak loh ka tum zet na a tih mangan ka hlauh vangin tlai khawhnuah ka la ta hram.

"I buai a mi?" zangkhai vah hian a rawn ti a, a ri zui nuaih nuaih.

"Buai lo e. Ka haw dawn mek a" tiin ka dawt ka hrilh a, Nunui hi a lawm chiah lo tih ka hria a, ka thli thlai ruk reng thu hi ka hrilh duh lem lo. Grace hnen aţangin a ţhat loh thu hlir ka hria a, a chanchin ka zawh lohna chin rei tawh viau mahse haw pahin a dawr lamah berkher ka kual ţhin.

"I ngaithla em?" 

"Aw ngaithla e" aw ka thian zui kharh. Nunui leh a dawr lam hlir ka lo ngaihtuah a, a thusawi hriat mang ka nei lo.

"Eng nge itih a? I rilru a va buai hmel ve, thil thleng a awm a mi?" a tih chuan car seat nghengin ka ţhu rem a, "Buaina vak a awm lo. Ka chau deuh a" tiin dawt ka hrilh. Thudik hrilh duh ţhin mah ila an bialpa ten hmeichhe dang daih an buaipui a ni tih hrilh se tu bialnu mah an lawm lo vang. Buaina ka ngah tawk tawh a, belhchhahtu ka mamawh lo.

"I natna zawng zawng kha hnaah bur bun vek la,hnathawk char char la i dam huai huai mai ang" a ti leh a,min ngaihtuah a min ngaihsak zia ka hria, ka tawrhna hi awlsam te a reh thei ah a ngai a, min beisei sang mah mah. Bei let thei turah min ngai a, hun ka mamawh ve tho tih erawh a chhut thleng pha lo. Ka ţha tiin ka hrilh liam puat ţhin bawk nen a dem awm bik lo ve. 

"Hei kan dine out dawn a, awm ve la ka ti nia aw. I awm chuan a nuam lehzual ang a" a ti siam siam a, ţawng ri nawk nawk lah hriattur a tam.

"Awle ei ţeuh rawh. I haw veleh min rawn be dawn nia" 

"Ka ngai lutuk che. Lokal a i bula awm leh vat ka chak tawh" a tih chuan ka inthiam lo kher mai. Ka ngaih thu hrilh ve duh viau mah ila dawt ka hrilh duh lo. Ka ngai tlat lo. Kan boruak tawn aţang hian hriatchhuah ka nei a, a bula awm nuam ka tih hun chu hna leh zirna kan sawi dun chang leh kan tuina kan tih dun ţhin chang chauhin a ni. Tunah chuan a thik thu lang zawk ţhin te, min beisei sang lutuk leh engkim ti thei a min ngai tlat hi ka hne hluah hluah a, thaw a ti chham lek lek tawh zawk. Ka sawi tawh ang khan buaina dang ka duh belh lo va, a ngil putin ka la kalpui mai mai. 

"A nih leh aw" 

"Awle" a aw aţangin a lungawi loh zia hre mah ila ka ngaimawh lo lui. A lawm nan a ka rilru lo pui sawi ka tum lem lo. Buaina awm loh theih dan ber ka ngaihtuah a, ka awm awmin ka awm ang a, a peih loh hunah boruak chhia siam kher lovin min kalsan ve tawh mai ang chu.

CONT..