FATED TO LOVE YOU-5

FATED TO LOVE YOU-5

NUNUI

Thlanah keimah chiahin ka ţhu a, ka dawr ka la ngaihsak leh lo. Thlan a keimah chiah a awm a Zothana kawm melh melh hi nuam ka ti ber rih. Kraws an phun laia a hming an ziah chu ka chul ka chul ringawt. Tih theih dang a vang em a ni. 

"Vawiinah ka in entir a" ti a hrilh pahin ka pum ka khawih a, ka pum a la puar hma hauh hian naute nen chuan inzawmna thuk tak nei nghalin ka inhria. 

"Naute tan hian thil ka eiţhat a ngaih thu min lo hrilh leh a, mahse ka tum ve nasa. Thil ei ţeuh ţeuh tumin eitur ţha ţha ka la khawm a, ka ei lui thei chuang lo. Ka lem rualin ka luak a ni nghal deuh zel a, doctor chuan nau ka pai vang a ni a tih rualin ei ka tum lo hrim hrim niin a sawi. Ka hriatna ah hian engmah a awm tawh lo va, engthil mah ka hrethei lo. A chhan erawh ka hre bik lo. Ka ril a ţam thei lo va, ka vawt thei lo va, lum ka ti thei lo a, mutchhuakin ka chau ngai miah lo. Ka hriat theih zawng chu ka thinlung a natna hi a ni mai" ti a phun sep sep chungin ka biang a mittui luang ka hru hul a, ka hru zo chauh a, a tharin a rawn luah lan leh nghal zel a, ka natna ka lanchhuah tir ve theih dan awmchhun a nih miau vangin a tawp thei lo. Zothana ka ngaihtuah chang apiangin ka mittui a luang vat ţhin. 

"In a ka awm lahin a hrehawm zual sauh emaw tih tur a nia, dawrah ka la kal ngam rih lo. Min kalsan ni a kan sulhnu te kha thianfai turin ka hrilh a, ngai viau che mah ila hmun tin a i sulhnu hmuh tur awm hian min ti na zual ţhin. Helai hmun lo chu kal chakna dang ka nei lo. Thlanmual ka hlauhna zawng zawng a reh vek tawh a, helai hmun chauh hi ka hnaih theihna che niin ka hre tawh. I sulhnu ringawt ni lo i taksa awmna hmun chauh hi keimah tak tak ka nih theihna awmchhun a ni. Hmun danga ka awm a ka hriat theih loh zawng zawng ka hre thei vek a, ka ţawng thei a, ka chawmawlh na a reh a, ka ţapin ka nui thei a, i kiangah chauh chutiang chuan ka awm thei" ka ti a, mi â ang maia mahni a ka phun bul bul reng chu min hmu ru awm ta se min hlau ngei ang. Ka inchei peih lo va, ka nihna ang angin ka awm a, ka inbual ţawk a, thildang ka lan mawina tur ka inber ngai lo. Mawi min ti a min fak tu tur ber a awm tawh lo va, ka thawmhnaw nalh tak tak te ka melh peih tawh lo. 

"I awmna kha a khawharthlak ve em? Nangmah chiahin i awm sia i khua a har ngei ang. Mi tam tak kianga awm reng chung hian keipawh ka khua a har a, kan naute vang chauh hian chak tak a awm ka tum lui hram hram" muangchangin Kraws inphun chu ka ngheng a, mit ka chhing zui zat. Helai hmun a ka awm hi chuan engkim ka hre thei, ka mut thlengin a chhuak ve thei ţhin. 

Reilote chhung chauh ka mutthilh ka rem. Ka mut dan a rem loh bakah Zothana thih aţangin mut mumal lai ka la nei lo. Ka meng riai riai a, min lo en run tu ka hmuh chuan ka phu zawk a, ka mumang emaw ka ti hman ţep. Ka khawhmuh a fiah tial tial a, min lo en run tu mitmeng hriam hrak ka hmuh takah chuan ka beisei loh zawk ka hmu tih hre chawp chilh nghal. 

"I ni lo tiraw? Tunah chuan lemchanin awmzia a nei tawh lo. A tir tu tur ber che a awm tawh lo a, ka mumangah ka ngai hman dawn a, mahse a tak tak a ni. Amah i ni lo" 

"Aw a tak tak a nih hi. Mi â ang mai a awm lo hian harh ve tawh rawh. In khawngaihna rilru i put tlat kha ti tawp la, thil thleng mek hi hmachhawn rawh" vin lek lek hian a ti a, a awki a san a ka hlauh theih tehreng nen engahmah ka ngai tawh lo. Zothana hmel ang tak ka hmuh chuan ka ţah a chhuak ut ut zawk. 

Ka hmaah a rawn ţhu a, ka dang ro nghulh tih reh tumin chil ka lem khawlh.

"Ka rualin haw rawh"

"Nga ti nge i lokal?"

"Hruai tur che in. Zothana'n hetianga i awm hi a duh i ring em? I ngaihtuah ve tak tak a nih chuan chawlh hahdam tir rawh" a ti a, a dinchhuah hnuah pawh ka la che chang lo. A ning ta deuh nge min pawt tho lawp a, chakna ka neih miau loh vangin min kaihna lam apiangah ka kal. Kawngpui pawh theihna kawng chho a kan kal lai te chuan zawi viau mah ila min chawlh pui duh lo. Chak deuhin a kal a, min kai hlawk hlawk a ni ber. 

Kan haw kawngah kan inbe lo va, tukverhah dak chhuakin van ka thlir a, ngai ka awh leh theih nan hian engtia rei nge ngai ang le? Naute vangin ka la nung ve ţawk ţawk a, ka taksa a chak loh zel chuan kan naute pawh hian min kalsan veleh mai ang tih ka hlau ţhin. Ka chakna tur ber lah ei luih a har ţhin si. Ka rinchhan ber ţhin a awm tawh lo va, keimah chiaha ka hmachhawn a ngai ang a,ka pum a puar thuai ang a, ka nau pai thu hi an hrechhuak thuai ang.

Car a ti ding tawh ni a ka hriat hnuah ka hawikual thuak a, a ding tawh tak tak. Ka ngaihtuahna ka lo kawm leh melh melh tawh a, engtia rei nge a din tawh ka hre lo. Mi â tak tak ka ang ber tawh.

"Kan thlenna a rei tawh em?" Zodina lam hawi pahin ka ti a, nui suk chungin lu a lo thing.

"Ngati nge kan thleng tawh tih min hrilh loh? Ka ngaihtuahna ka kawm tawh chuan engmah ka lo hre tawh ngai lo va" 

"Tihbuai che ka duh lo va, kan thleng tih i hriat tawh chuan lut tawh rawh" 

"Min zawh duh i nei em?" ka ti a, ka hmusual maithei, mahse khua a la thim chiang lo va, mut hun a la nih loh bawk vangin eng a la tam a, hmusual niin ka in ngai lo. Vei nei a ang riau.

"Zawh che a ngai hran lo. I inpeih hunah i sawi duh ang chu i sawi turah ka ngai" 

"Sawi duh em em ka nei lo. Ka ţha tih hria la a tawk mai" ka ti sep a, ka thusawi chu a pawm loh hmel kher mai.

"Thlanah nangmah chauhin ka hmu che a, i ţhat thu chu sawi duh tawh suh"

"Dawr aţangin ka haw hma a, in a tawm tluk tluk chu a ninawm ve sia, tih tur dang a awm lo bawk nen ka kal vel mai mai a nih kha" tiin ţan ka khawh ve tlat a, min hmuhdan kha ka chhungte a hrilh ka hlau a ni. 

"Tlaiah i dawrah ka kal" a tih chuan phawk hra hian ka en a, ka chhan let hmain "I chhungte i bum a, dawr a kal tur ang a insawiin thlanmual i pan zawk a, i awmdan hi a dik niin i hria em?" a tih zawm zat. 

"Ka chhungte chu hrilh i tum a mi?"

"Hrilh turin min duh em?" ti a min zawh let chuan lu ka thing. A ruk chuan an hretawh maithei mahse dawr kal tur ang a insawi si thlan a ka kal ziah thu hi sawichhuak kher lo turin ka duh. Zodina ngat phei chuan hrilh lo se ka ti.

"I hrilh lo thei a ngem? In a awm hi ka hne hluah hluah. A uap lutuk hi ka thaw a chham mai dawnin ka hre ţhin. Ka chhungten min ngaihtuah ropui si, min ngaihsakna an lantir a min hnem an tum hian ka tawrhna an ti zual sauh zawk. Ka ţha lo takzet chung a an ngaihţhat nan a ka ţhat thu sawi ziah te hi ka kham. In chhungah hian ka awm tam peih rih lo" ka ti a, ka taksa chak loh em vangin ka kut a khut der der reng. Chu chu a lo hmu nge ka kutah chuan a vuan a, kei ang lo takin a taksa a lum nuam bik. 

"I phalloh chuan ka hrilh lo vang. Zingah dar engzatah nge i chhuah ţhin?"

"Ka u rualin ka chhuak ve tho ţhin. Dawr a kal tur angin ka insawi a, inchei lo mah ila min ringhlel ngai lo. Inchei ka peih loh sawt zia an hre vek a" ka ti nawi niaih a, ka awmdan hi ka unaunu chuan a hre ru daih tawh maithei.

"Dawrah i kal si lo va khawiah nge i kal ţhin? Kan veng thlanmual i rawn pan vang vang zel tihna maw?" 

"Aih,dawrah hian luh ka tum ţhin a, a chhan ka hre bik lo ka tim tlat. Zothana sulhnu thian fai vek tur a ka tih hnuah pawh ka thei chuang lo. Ka dawr a inhawng reng chungin ţhenawm dawrah te ka kal daih a, ka nin hnuah thlanmualah ka kal chauh ţhin" tiin dawt tlem belhin ka hrilhfiah a, adik tak ka hrilh chuan min ngaihtuah lehzual ka hlau. 

"Engtin nge i haw leh ţhin? Grace i ko ngam tawh awm si lo va"

"Taxi ka bia a kawngpuiah ka lo chang ţhin" 

"I chhungten engmah an hre lo tak meuh maw? Thlanmual chu a fal tlangpui a, a hlauhawm theih zia i hre lo mi?" a ti a, a hlauhthawn vang nge amah ang lo deuhin a awki a san ve a, ka kut a hum nghet sauh. 

"Vawiin pawh thlanah kalin hmu lo che ila chuan nitin i kal zawm ziah ang a, atthlak zet a chet hi i bansan loh chuan inu leh pa ka hrilh ang a, duh leh an kalh khum che ang a, hma i sawn theihna a nih dawn phawt chuan ka ti vek ang. Ka sawi kha hrereng rawh nangmah chiahin lu i sun lo va, khaw thim dawn thleng a thlanmual a awm a him lo va, harsa ti chung chungin hmalam pan kan tum hram hram vek tih hria la, nawr luih ngaiin awm suh. I hmachhawn a hun tawh, thil i ei duh loh a nangmah i inhrem reng chuan thil chhe zawk a thleng mai ang"  a ti a, min ngaihtuah ve tak tak niin ka hria. 

"Ka lo tum ang" ti mah ila a thusawi zawm tumna ka nei chuang lo. Ka mipa hmangaih ber a nia, nitin a kianga awm ka duh a ni mai.

"Inu leh pa hnenah ka hrilh lo vang tih ka tiam thlap che. Mahse zing leh tlaiah dawr a i kal leh kal loh ka rawn en kawi ziah ang che. Chu chu ka thutiam ka hlen theih dan awmchhun a nih chu" hriam hrak hian a ti a, bum theih mai ka inrin vei nen.

"Mahse...."

"Chhuan lam siam suh. I cherin i dawl dang a, i mit hnuai a val kulh a, i chhungten khatianga hmuh reng che kha an duh lo vang. Tum chhin rawh, i theih ngang loh chuan i duh duhin i awm dawn nia mahse tum chhin phawt rawh" a tih chuan hnial duh viau mah ila a tih tawh chu ti tlat chi,ngaihdan sawh sawn ve vak ngai lo a ni tih ka hrechiang a,ka sawisel duh lem lo. Beidawng zetin ka thaw hawk a, kawngkhar ka hawng ta nge nge. 

"Mutthilh hma tum rawh aw. Naktuk zingah kan inhmu dawn nia" 

"Awle" 

Dawr a la inkalh a, ka awmdan tur ka hriat lawk loh vangin midang chu lokal lo mai turin ka hrilh. Chahbi spare ka kawl ve chu ka hum run a, ka hawng ngam rih lo. A thih hma lawk a hlim deuh a a awmna hnuhnung ber a nia, ka lut hreh ngawih ngawih. 

"Hawng rawh" ka hnung lam aţang hian a rawn ti a, ka hawi let thuai. A lo ding reng tawh a, hawn loh ka hreh si,ka herh hawn dawn lai te chuan ka va khur nasa tak. 

"I hawn tawh chuan lut rawh" zawi muangin ka pen lut chhet chhet. Ka meng ngam lawk lo va, min zui reng tih erawh ka hria. Tluk palh ka hlauh vangin ka meng leh thuai a, engkim a la ngai vek. Ka enkual den den a, kawr ţhui sa an khai zingah chuan kan inneih ni a hak tur a ka tih phur tak a ka buatsaih ngei pawh kha a tel ve a, Zothana sulhnu paih ho turin ka ti na a ka hriatrengna ata an paih bo tel thei chuang lo. Ding chawtin ka hawi let a, Zodinsanga nen kan in hmachhawn ran. 

"Eng thil chiah nge tih i tum? Ka tawrhna tih zual i tum ve tho em ni? Ka duh danin min awmtir mai mai rawh" ti a kal mai ka tum chu min lo dawmin ka dinna ngaiah min nam let leh dawrh a, Zothana hmaa mo kawr ka hakchhin lai kha nimin chiah ang mai a la ni. Awm luih reng a har takzet.

"Zothana khan ngaihsak tur che in min chah a, hetiang hi midang ka ngaihsak dan a nih hi. I duh dan dan a ka awm tir che chuan engtikahmah hma i sawn lo vang" a ti a, Zothana nen a an danglamna ka tih ţhin a mitmeng rum tak chuan min vau zam thei emaw tih mai tur a ni. Ka naupanlai a maths a ka fail ţumin ka nu in min zirtir turin ka tia, thutak deuh a min melh run tawh chuan ka inthlahdah ngam lo. Ka hlau hle ţhin a, min zirtir kha hrehawm ti viau ţhin mah ila exam lehah chuan Maths ah ka ti ţha tawh hle. 

Tunah pawh min zirtir leh a tum a nih hmel a,zirlaibu a chuang ve miah lo. Ka chhiar ve theih loh tur, Zothana tello a nun bul ka ţan leh dan tur min zirtir a tum a, ka zirlai a hma ka sawn ang khan a thil min zirtir tumah hian hma ka sawn ve thei kher angem? Zirtur hi a inhar hleih takzet. 

Ka dinna bul lawk a ţhutthleng inhungah chuan ţhu hnawkin ka kutphahin ka hmai ka hup a, ka insum ve ţang ţang. Midang hmaa ţap lo turin ka insum ţang ţang zel a, Zothana thlanah chiah ka ţap ang ka ti ţhin. Mahse amah ang tak, an danglamna hmuh tur awm mang lo in hmalam min pantir a tum lui tlat a, Zothana angin ka duh dan apiang a zawm ve dawn lo tih ka hrechiang. Kei leh ka naute pai lai mek tan a ţha zawk tur pawh ni se a har ka ti. Naute ka ngaihtuah tel chang phei chuan a fa ka pai mek tih hre miah lo va min kalsan hi na ka ti ngawih ngawih. Ka awm ngaiin rei tak chhung ka awm a, ka insum theih loh hnuah ka ţap leh ta nge nge. 

Ka hmaah ţhingţhi in ka kut a vuan a, ka insum rei em vanga ka thawk mumal lo chu hrethiamin ka hnungah dim tein a chul pah bawk.

"Ţap la a reh mai ang. I thil tawn zawng zawng hi nangmahah bur burin pai vek lo la,mahni chiahin tuar tawh suh. I awmdan tur ka hriatthiampui che. Tun a i natna tawrh mek ang chiah hi ka tuar ve tho a, paltlang ka tum mek" a tih chuan dakchhuakin thip ramin ka melh.

"Tunah tak chuan min ti thinrim takzet. I thil tih duh dan hi ka hua. Ngati nge helai hmunah hian min hruai? Ka natzia hrethiam chung siin ngati nge ka natna i belhchhah?" vin zetin ka ti a, ka ban a vawnna ka phih let dawrh. 

"Ka duh dan zawngin ka natna tih nep dan ka zawng ve hram hram a, helai hmun hi a accident hma lawk a a awmna hmun a nih hi. Heta ţang hian a chhuak a, ka hnen a a let leh vat tur thu sawiin a intiam a, mahse engmah a thleng lo. Ngati nge? Helai hmunah hian ngati nge min hruai?" ka ti zui bawrh bawrh. 

"A nat dan ka hriatthiam loh i ring maw? Zothana kha ka unaupa a nia, ka phir pui. School kal dunin lehkha kan zir dun a, kan infiam dun a, engkim kan ti dun vek. Hospital a thi chhawng a leh reng laia engmah ka ti thei lo te kha a nat dan tur i hrethiam zawk em? A dawm hlum tu ka nia, thawk tawp ber a lak lai hmu tu ka ni. Chuti chung chuan i natna hi ka hriatthiam pui loh che ila ring cheu a maw?" thinrim zet hian a ti ve a, insum thei tak a ni ţhin a, a inthunun theihna hloh a hetianga a thinrim hi ka la hmu ngai lo. 

A ngaihna hre lo va hamhaih zet a ka awm lai chuan a tho a, kawngkhar zawng zawng a hawng a, dawr chhung chu a eng ta uarh. Ka ding ve hluai a, kawngkal velin min hmuh theih tawh dawn vangin ka hmai ka tuai zui thuak thuak. 

"Mahni insawisak kha bansan thuai ang che" a ti a, a mitah tak en ka ni bawk a, a mitin a chhui chin ka hrethiam zel thei. Ka pum zawn awm vel a en lai chuan ka lo hup vat a, ka zam thar kher mai.

"Nangmah chiah i nilo lehnghal" tiin min chhiar tum ni awm takin chiang zetin ka mitah tak min en leh tawh. 

"Nangmah chiah ni la chuan venthawn ka nei lo ang. Hmun hlauhawm a i kal ka hlau lo ang a, i chetsual palh ka hlau lo vang. Midang ngaihtuah tel ang che" a tih hnuah min chhuahsan a, a rawn let leh hun tur a sawi lo. Nau ka pai tih hi a hria a ni thei angem le?

CONT..