FATED TO LOVE YOU-6

FATED TO LOVE YOU-6

NUNUI

Zothana thih aţangin thla khat a liam leh tawh a, ngai ka la awh thei chuang lo. Thlanah ka la kal ziah a, depression ka nei nasa in doctor ka rawn fo. Naute vang chiahin ka la nung hram hram a ni ber. Zodina min thli thlai turin a rawn lang zeuh zeuh a, vawikhat phei chu depression vanga ka doctor rawn ţhin nen ka hmu dun a, anni pawn chiang takin min hmu. Ţhian hnaivai tak anni tih ka lo hre lo a, ka chanchin an sawi dun ngei ka ring. 

Ka chhungten ka naupai thu an la hre lo reng a, ka sawi ngam rih lo. Ka sawichhuak a nih chuan ka pa ngaihdan a ni dawn lo va, a lung a ţha lo bawk nen, a rilru hrehawmna tur leh a nghawng thei thil la sawi duh rih lo. Zodina hnenah ka naupai thu a hriat dan kha ka la zawt lo va, a ni pawh ka zawt ngam lo a ni mah. 

Dawrah keimah chauhin ka awm a, kawngkapui bak engmah ka hawng lo. Nidang ang bawkin ka pik mup mup reng a, ka awm a tawtin chhum chhah puiin min tuam ni maiin ka hria. Ka khawhawi a tawiin ka ipik na hian min kalsan hleithei lo. 

Ka chhungten an hriat hlauin kawr lian pui pui ka ha a, nidanga ka inchei dan ţhin nen inang lo viau mahse ka inchei peih loh sawt zia an hria a, min rinhlelhna an nei lem lo vin ka hria. 

Mi chu an ţap a, an thawl hawk a, keichu ţap ve vak vak mah ila ka thawl phah chuang lo. Ka ţap zo a,a ngai te bawkin ka tawt leh up up a, ka ţah a chhuak reng tho bawk nen, ka awmdan hi a hrehawm lehzual hle. 

Keimah chauh a tih tur ber hre lo va ka hawi ka hawi laiin Zodina a rawn lut hlawl. Kawngkapui inhawng sa chu a khar a, hma ka sawn thei miah lo hi a ngaihdan a ni lo viau maithei. Zodina ka hmuh hian Zothana hmu angah ka inngai a, Zothana a ni si lo hian min ti hnualin ka lungngaihna a zual ţhin. 

"Va in en teh" tih nghut pahin min pawt a, darthlalang hmaah min dintir. Ka dar a dawmin ka hnungah a ding a, ka taksa chhiat chak zia min hmuh tir a tum a ni ngei ang. 

"Hetianga i awm hian Zothana a lawm i ring em?" a tih leh chuan lu ka thing ne ne a, ka mut bui luk chu tih reh a hnekin ka mittui a tling leh pam tawh. Ka cherin ka dawl dang a, ka tla duk a, ka biang ki pawh a hma aiin a langsar. Ka thawk zawngin ka nghawng ruh chiang takin a lang thei a, ka mit hnuai val kalhin ka hmui a ro riap bawk. Mi nung damlai ka ang lo lek lek. 

"Nunu, min lo en teh" ti vin hlukin min kuar her lawp a, ka biangah na zetin a hmer a,thil thleng mek chu na a tih ve zia a mitah a lang thei.

"Mahni inhrem hi bansan a hun ta viau e. Zothana a awm tawh lo. A thi tawh. Mitthi awmzia i hria em?  Khaw lo zawng hlir a awm chung khan ţap reng mahla nung damin a lo let tawh lo vang. Nangmah chiah i na ah i inngai a, i awmdan hian midang a ti na ve vek. Tupaw'n kan ngaihtuah che a, i hmasialna hi tawpsan tawh rawh. Midangin a ţha leh vek ang ti a min hrilh laiin kan ţha chuang si lo a, min hnemna ţawngkamin min tihnat zual theih zia ka hria. Mahse hringnun hian min nghak ve lo. A kal ngaiin a kal reng a, keimahni kan pawimawh. Midang rual a kan kal ve zel a ngai. Amah hmangaih tu te a boralsan avangin an chhe ta vek a tiin miin sawi se a lawm i ring em?" 

Ka ţah vanga ka hmui khur der der chu ka pet a, ka mittui lah chu a hma aiin a tla nasa zual sauh emaw tih tur a ni. Ka bianga min dawmna kut pawh ka mittui chuan a luan hnan ngei ang. 

"Helaiah hian a na bik em a" inhnit hlawp hlawp chung a tih pahin ka awm ka dawm a, "Ka ngaihtuah nasat phei chuan ka thaw hi a tawp ve mai dawnin ka hre ţhin. Mutthilh luih tum ve paw'n ka beidawng ţhak ţhak. Mit ka chhin hlek leh ka hriatna zawng zawng hi amah bawkin a fanchhuak vek a,Zothana lo chu engmah ka rilruah a awm thei lo" ţap nasa zual sauhin mit ka chhing a, ka thusawi dikzia a lang nghal. Zodina hnaih a ka awm ngat phei chuan ka hriatna hi lakpen theih a ni ţhin lo. 

"Ka hmuh che hian ka ipik lehzual. Ka hnaih a i awm tawh chuan boruak a uap nghal vek. Amah i ni lo tih  hrereng chung hian i hmel ka hmuh hi chuan Zothana ah ka chan lo thei lo ţhin che" chu thu ka sawi zawh chuan ka biang a hmer na lehzual sauh a, ka khabe ruh kual thleng a a nat vek takah chuan a hmel hmu hreh viau mah ila ka meng leh ta nge nge a. 

"Ka ngaihdan hi a dik lo tih ka hria. Mahse ka hmuh apiang che hian Zothana a awm hnai ni ah ka ngai a, ka bulah ala awm reng niin ka ngai ţhin. Chutianga ka ngaih zel avang chuan ka inhaw ngawih ngawih ţhin" ka ti a, ka aw chu a ri chhuak chang chang chauh. 

"Chutianga a nat viau a, i theihnghilh thei dawn lo tak tak anih leh amahah chuan min ngai rawh. Zothana hmun ruak chu ka lo luah ang" a thusawi chuan min nghawr dawt a, rapthlak ka ti hial zawk. 

"Keimah vanga hma i sawn thei dawn anih phei chuan min hmang ţangkai rawh" a la ti lehzel. 

"Engmaw i sawi? I thusawi kha i hrechiang thei em? I â takzet Zodinsang" ka ti hriam hrak a, dimte a ka biang chul chungin ka mitah chiang zet hian min en a, a landan a ngai reng. A thutak leh viau tawh. 

"Ka â lo va ka thusawi pawh ka hrechiang. I lak a ka rilru put hmang i hrechiang. Ka sawi hma hauhin nang chuan i hre vek tawh. Ţha tak a enkawl tur che leh ngaihsak tur chein Zothana ai ka lo awh ang. Zothana ang chiah a hmangaih tur che in" 

"Ngawi hmak rawh" ti vin tuarhin ka nem sawn dawrh. Ka thaw hlawp hlawp a, ka hah ngawih ngawih. 

"I â takzet. Zothana a awm loh hnu hian nangpawh i â vek tawh. Zodina ka hriat ţhin kha chuan hetiang hi a sawi lo vang. Mahni inthunun thei tak inih ţhin kha" ka ti a, Zodina ka lo hriat ţhin kha chuan hetiang thil tih leh sawi hi thih hrehin a hreh ngei ang. 

"Engtin nge khatiang thil kha i sawi ve theih zawk? I unaupa nupui hual ka nih hi. Eng tin nge nangmah hmang ţangkai tur che leh Zothana ang a ngai tur che a min hrilh theih zawk? Bialnu inei tho bawk a, Zothana leh keima tan ringawt a i inpek hian itan a fair lo iti ve lo mi? Florence in engtin nge a ngaih ang? Tenawm a tih i ring lo em ni? Zothana ngei pawh a tel, i thil tih dan hi dik an tih i ring em? Ka nat vang ringawt hian keichuan hma ka sial thei lo" ka tih zawm leh a, Zothana tan a inpe pumhlum ţhak a, kei lehzel chuan a zalenna ka laksak thei lo. 

"I tawrhna chiah ngaihtuah a i hnungtawlh luih zel ţhin hi naute khan dik a tih i ring em?" ka rinlawk sa ni tho mahse ka ding khawng awt tho. Nau ka pai tih hi a hriat ring sa mah ila a sawichhuah meuh chuan min ţhawng kher mai. Tuman an hre lo va, tumah ka hrilh lo. Engtin nge a hriat theih bik?

"Engmaw i sawi a?"

"Zep duh suh. I rai tih ka hria" mak ti a ang pham chungin lu ka thing ne ne a, min rawn hnaih lehin a ipte aţangin ka in entirna lehkha a rawn phawrh. 

"He thil hi i thlauh a" ti sup chungin min pe a, lo hmet hrual nawk nawkin chhuatah ka paih. Damdawi min chawh ka lei lo va, eitur a min hrilh engthil mah ka la ei lo va, lehkha ka ti bo tih pawh ka hre lo. 

"Hmuchhuak lo ta ila engtia rei nge thup zel i tum?" 

"Ka rai tih ka hriatchhuah khan Zothana ala dam a, mo kawr ka hakchhin ni khan hrilh ngei tumin rilru ka siam a, mahse thil pawimawh ah an rawn ko a, a hmanhmawh em vangin zan a hrilh atan ka khek a, amah nghak reng turin min hrilh a, zana a lokal tur thu a sawi. Mahse a accident thu ka hre leh zel a, a nat vak loh nan leh a dam leh theih nan ţawngţai mawlh mawlh mah ila awmzia a nei lo. Hospital ka lo thlen ve hmain a thih thu ka hria a, kan hun tiam a ka hmuh leh meuh kha chuan a beng bulah nau ka pai tih hi auchhuahpui chiam mah ila a hre thei tawh lo vang. Pa a ni thuai dawn tih hre lo vin min kalsan a, ka dawr aţanga a tlanchhuah hmaa ka lo hrilh ţalh lo kha tun thlengin ka la inchhir anih hi" kun ngul chung a ka mittui ka hruk hul hnuah ka dakchhuak leh a, Zothana ang chiahin ka hmu leh mahse Zothana a la ni chuang lo. 

"Engkim hi a buai nuaih vek lo. A fair lo vek. Tun hnai a ka chunga thil thleng zawng zawng hi a fair lo. Engkim a ţha vek ţhin a, tupawh kan hlim a, mahse reilote chhungin engkim a inthlak thleng a, tupawh kan danglam a, kan hlimna a bo a, Zothana ka chan a, engkim ka chân vek tawh. Engkim nei a in ngai ţhin kha engmah ka nei tawh lo." ka dar a min lo dawm rualin nghet zetin ka lo kuah a, ka ipikna leh ka awm a hnawh tu zawng zawng tih bo vek tumin ka ţap leh a, awmzia a awm thei chuang si lo. Ka samah dimtein a chul a, ka awm tawt lutuk chu a na ngut ngut.

"Engmah a danglam lo. Kan la pangngai vek. I mal lo a, tupawn a hma ang rengin kan la ngaihtuah vek che. Thil ţha lo i chunga a thlen ka phallo a, ka thlen tir lo ang. Zothana awm tawh lo mahse a thisen ila kawl reng. In pahnih a infa i pai mek a, i khawhar a la hnem thuai ang" ka sir lama dawmin a inla hrang a, min hlat chuang lo. 

"I nat ang chiah a na ve tho ka nih vangin ka hrethiam che. Kha thil rapthlak zet kha a rawn thleng thut a, tuman kan beisei lawk lo va, min ţhawngin kan na ve vek. Kan sun ang a ,kan lungngai ang a, chu chu kan chung a thleng ngei ngei tur a ni. Mahse mahni kan inhrem reng tur a ni lo. Zothana thlan a kal ziah leh nitin amah vanga ţah ziah te, thil eitheih loh phah nan a i hman vang te hian a lo let dawn lo. In naute vang tal khan chak tak a i awm a ngai. Zothana i chan tawh a, naute lehzel chu i chan duh lo ang tiraw?"

"Ka hria. Ka in enkawl dan tur leh naute tan a ka tih tur zawng zawng ka hre vek. Chutianga tih pawh chu ka tum nasa, mahse ka tih dawn chiah hian a har lutuk. Eng thil mah hian tuina a nei lo va, ka taksa zawng zawng hi a mu churh vek ni maiin ka hria" ka tih mawlh mawlh lai chuan min lo kuah ve thung. 

"Ka hrethiam che ka tih tawh kha. Mahse i khawvel siamchawp tereuhte a i chen reng chuan hma i sawn thei lo vang. Nitin i natna a zual zel ang a, naute thlengin a tuar ang. Chuvang chuan ka puih duhna che hi lo pawm mawi rawh" a tih lai chuan ka lo kuah let ve a, Zodina ka duh vang a kuah ka ni lo. Tunah chuan hmalam ka pan theih nan a min puitu tur ka mamawh niin ka hre tawh a, Zodina ka hmuh hian Zothana hmu angah ka inngai ţhin. 

"Midang ila hrilh lo maw? Keimah lo tu in nge i rai thu hria?" zawi te a ka beng bula a tih chuan lu ka thing.

"Tuman an hre lo. Grace takngial pawh ka la hrilh ngam lo. Ka pa in a hriat phei chuan a hriselna in a tawrh phah maithei a, bakah midang pawh hrilh ila Zothana hrechhuak thar lehin an nat phah mai mai zawk ang" tiin ka phun sep sep a, huaisen luih ka tum ve ngial pawhin hrilh lo bawkin ka awm leh ţhin. 

"Lo lungngai suh, min ring la, chinfel dan ka lo zawng dawn nia" a ti a, ka inlak hran hnuah "Ka kal phawt ang a, tlaiah ka rawn lam ang che" a sana bunlai en chung hian a ti leh a, a kawr a ka mittui luan huhna val kalh chu eng fiah vak lo chung pawn a hmuh theih. 

A kal hnuah hmai ka phih a, makeup lachhuak lehin langsar lo deuhin ka hnawih ve. Psychiatrist ka rawn ber ţhin a ţhiannu ni bawk khan eng eng emaw a sawi ngeiin ka ring a, nakinah ka la zawt ang ka ti rilru ran. 

Tukverh leh kawngkhar vel ka hawn laiin ka luak a chhuak leh ut ut a, hawng kim hman lo in bathroom ah ka tlan lut leh. Luak chhuak viau siin luak tur ka nei chuang lo. Ka thawk thlengin a hrehawm lehpek a, luak tur tal nei ila a zia deuh ang. Ka pum ka dawm a, ka taksa chak loh lutuk hi a lo tawrh ve loh hram ka beisei. 

Ka dawr a thawk te an lokal a, min tih hlim tum a an awm lui te, an fiamthu thawh te leh an ti ti mai mai te chu ka ning vek. Bathroom a ka luh leh ka ţah a chhuak zel bawk si. Hnathawh ka tumin ka rilru ka pe thei bawk si lo. Pawnah ka tlanchhuak leh ringawt ţhin a, motor tlan ri leh horn an pe tuarh tuarh ţhin te chuan lung an ti zing lehzual. Beng hupin dawrah bawk ka tlan lut leh ţhin. Khawl ri ringawt te chu ka âtpui thei mai dawnin ka hre ţhin a, Zodina khan min rawn lam kawi tum lo sela chuan Zothana thlanah ka kal leh daih tawh ang. 

Chhun chawlhah ka thawhpuite chuan eitur min lak kepin ka hmaah an chhawp ruih a, ka cher zia leh thil ei nasat ka mamawh zia an sawi sap sap. Ka hawikual ruai a, ka tawt leh up up ţhin. Ei luih tumin fiankhat ka suak a, ka kâ chhunga dahin ka ţhial ve ngei. Ka lem chiah tihah ka luak a chhuak leh a, doctor khan ka naupai vang a nih rualin eiluih ka tum lo hrim hrim niin min hrilh. Ka rilruah hian engthil mah hi tih luih tumna ka nei lo va, keimah chauh a hmun fal deuh a awm a, Zothana nen a inkawm mai mai bak nuam tih ka nei lo. 

A intiam angin tlaiah min hruai turin a rawnkal a, a ni chuan a thutiam a hlen thlap. Zothana pawh khan a unaupa ang hian a thutiam kha hlen ve thei se ţha tur.

Dawr chhungril lamah kan pahnih chiahin kan awm a, tukverhah dakin hmun hla tak ka thlir a, ka bulah ngawi rengin a lo ding ve. A phone a rik takah chuan a lam ka hawi vat a, a screen a en vak vak hnuah a hmet tawp. A ri nawn leh ţhin a, mahse a chhang duh tlat lo. 

"Tu emaw chu iti beidawng ve dawn ni maw?" tawi te nui chung hian ka melh a, a lo nui ve suk. 

"Ka biak loh chi zawk a nia"

"Nula a ni na nge?" 

"Ni lo ang. I ţhiante an insiam ţan a, insiam rawh ka thlah ang che" a ti a, mak tak maiin a bula ka awm hian thlamuan riau chang ka nei. Ka sawitawh ang khan Zothana hi a lo awm hnai ve zel ni maiin ka hre ţhin. 

"I ţhiannu doctor khan ka chanchin hrilh che a nei em?" ngawi rengin a khalh a, zawh loh ka tum zet na a hriat nei a ang ka ti. Zothana kha a chezia aţangin ka chhiar thei ţhin a, Zodina pawh hi a danglam vak ka ring lo.

"A sawi tam lo. Nangmah chiahin awm lo la, pui thei tu che i mamawh a" 

"Chu zawng chu maw?" 

"Hmeichhia ve tho a nia, thil i ei ţhat duh loh reng a, nangmah i intih hrehawm reng chuan naute tan a ţha dawn lo tih a hre ve. Mahse hun tlem ral leh deuh se i ţha ve mai ang" a ti zung zung a, kan veng lamah kan kal lo tlatin ka hria. 

"Khaw nge kan kal dawn a?" ti ha chung hian pawnlam ka thlir thuak a, thui tak erawh ka hmu thei lo.

"I thawhpuite khan chhunah thil eitir kan tum a, fiankhat chiah a ei an tia, thil ei kawi ang. Hman a i hmun hauh lawkah khan kan ei dawn nia" a ti a, hmun lun lai kan pel tawh a, kan awmna a fal veleh deuh tawh. Ka ngaihsak lawk loh vangin kawng dik lo ah kan lokal reng tawh tih ka lo hre lo a ni.

"Ka ril a ţam lo. Haw tlang mai ang, let leh daih rawh. Pawisa a hek lo a ni mai. Kan chah ve uk ang a,ka ei theih leh si loh chuan pawisa kan seng thlawn mai mai" ka tih hnu lawkah kawngsirah a ding thut a, ka inrin lawk sa loh vangin ka bu dawrh. Seatbelt hreng lo phei ila chuan hmalam ka bawh rawk rawk ang. Mahse ka seatbelt hren lai chu min phelhsak sawk sawkin a ţhutna lamah min kuai her lawp a, a mitmeng a rumin a hriam hrak a, a thinrim zia hmuthiamin ka hlau ru kher mai. 

"Zothansanga i hmangaih takzet a nih chuan a fa i pai mek vang tal hian in enkawl ţha lehzual zawk ta che. Hei hi maw i hmangaihna i lantir dan chu? Nau i pai tih i inhria a ni law mi? Nangman ei duhlo mahla i naupai lai mek hian chaw ţha a mamawh. Zothana leh naute ai hian i tawrhna chiah i la ngaihtuah lui ţalh tho maw?" vin zet hian a ti a, doctor khan thil ho te a hrilh ka ring tawh lo. Ka mittui vangin ka khawhmuh a phe ruai a, ho te te a ka ţap reng mai hi kei ngei pawh hian a chhan ka hre bik lo. Mittui te hian ţangkaina an nei lovin lo tel ve chhen lo turin ka duh mahse theih tawp chhuah a dan beh ka tum pawn ka thei ngai lo. 

"Engtin nge Zothana hi ka theihnghilh theih ang?" aw khur der der hian ka ti a, min nin hmel takzet.

"Ka kham tawh. Vawi engzat nge ka hriattiampui che ka tih tawh. Ho te te a i ţap pur zel te, nangmah chiahin i tuar emaw iti te hi ka kham takzet tawh. I lungngai a nih pawn naute tal kha ngaihtuah rawh. Nu ini thuai dawn. Nau i pai a, mawhphurtu ber tur i ni. I naute hrisel leh hrisel loh kha nangmahah a innghat. Venghim a ngaihsak tu tur zawk ngati nge hetianga i awm reng" a ţhutna lampang kawngkhar a hawng a, a chhuk dawn emaw ka tih laiin a chesawn miah lo. Seat hnung a ngheng a, ka ti beidawng tawh niin ka hria.

"Tum ve mah ila ka theihnghilh thei thlawt lo. Theihnghilh ka tum poh leh ka hriatnaah hian a inlar nasa zual a, ka duhthlanna a ni bik lo" ka ti sep sep a, ka vin let ve ngam lo. Ngam mah ila vin turin chakna ka nei lo.  

"Theihnghilh turin ka ti lo che. Tuman kan theihnghilh dawn lo. A theihnghilh theih loh zia chu midang aiin ka hrechiang" a ti a, ka lam rawn hawi lehin a hma anga thinrim hmel kha a pu tawh lo. Reilote chhung khan a lo inbeng dai hman a ni maithei. Zodina zia in a kentel a ni ve a, a inthunun zung zung ţhin.

"Zothana aiawhin ka ngaihsak ang che ti ka sawi khan ka ti tak tak a, i rilru a nat viau a tihngaihna dang i hriat loh chuan Zothana angah min ngai rawh. Nangmah chiah a awm turin ka kalsan lo vang che" a ti leh a, ka rilru a buai nuaih nuaih a, a dik ber ka ngaihtuah thei lo. Ka mittui ka thunun thei lo va, keimah hrim hrim ka tawrhna zawng zawng nen hian keimah chauh chuan eng thil mah ka remkhawm thiam lo. Na chiah ka hre thei a, ka ţap reng ringawt a, ţah reng te hi ka duh dan a ni bik lo. Ka awmdan hi hrehawm tiin mangang ve lo ila chuan doctor ka pan hauh lo ang. Ka tum ve nasa, tum takmeuhin ka tum ve, ka chhungte min nawrna te hian min tihlum thei mai dawnin ka hre ţhin. Ka chau takzet. Ka chhungte hmuhah pangngai tak ang a ka lan reng a ngai a, nau ka pai tih hi an hriat hlau reng rengin ka awm a, Zodina bulah chiah keimah angin ka awm ngam. Zothana thlanah a nih loh chuan Zodina bulah chiah ka ţap ngam a, ka tawrhna ka lantir ngam a, ka rilru a thu awm te ka sawichhuak ve ngam bawk. Ka chhungte hmuh laia dam tial tial ang a lan der ngai te hi hrehawm ka ti ţhin. 

"Ka ţha alawm" tiin dawt ka sawi a, bialnu a nei a, Florence pawn a ngai ve tawhin ka ring. Derthawng tak a ka awm reng chuan Florence a ngaihsak hman lo ang a, hmeichhe dang ka ti lungngai ve ang. Min ngaihsak hnem tawk tawh a, hma ka sial reng thei bik lo. 

"Ka tan eng thil mah ti duh tawh suh. Ka tibuai hnem tawk tawh che. Ka chak lohna hlir ka hmuh tir ţhin che a, ka tihbuai ţhin che avang hian min hrethiam dawn nia. Mahni hmasialin keimah chiah ka in ngaihtuah a, midang ka lo hre chang lo a, ka tawrhna aiin i tawrhna a nep bik dawn lo tih ka hria. Mahse eng ang a nasa pawn na ila, keimah intihdam nan ka hmang ţangkai miah lo vang che" ka ti a, ka nihna anga ka lan ngamna leh tlai khawhnu a ka rin ngam ber awmchhun mah nise tunah chuan bialnu a nei ve tawh. Mal tak a awmreng ţhin kha a ni tawh bik lo.

"Engthil mah ka ngai pawimawh lo a,midang min sawi dan tur leh thlir dan tur ka ngaimawh tawh hran lo. Nang leh naute chiah hi in pawimawh ber tawh a, in pahnih chiah hian ka ngaihvenin ka ngaihsak tawh che u" a ti a, a tih tak zia a hmelah a hmuh theih. 

"Keiman a ka tih tir zel kher che ngai lo hian a hunah thil ei la, in duat rawh. Hetiang reng inih chuan naute hian a kalsan ve maithei che. I hmangaih te pahnih chan i duh loh chuan ka sawi ang chuan awm ang che. I rin ngam ang tiraw?" tiin min zawt a, ka chhanna a ngai chang ran. Hnial ve mah ila awmzia a neih dawn chuan loh vangin lu ka bu nghat a, a nui hmel ka hmu veleh thei ta. 

CONT...