FATED TO LOVE YOU-7

FATED TO LOVE YOU-7

ZODINA

"A naupai lai chu a ţhat ka ring. I hriat angin Gynaecologist ka ni lo va. Mahse hetianga a awm reng chuan a naupai lai thlengin a tuar ang tih a hlauhawm khawp mai" Rinawmi, Nunui rawn ţhin doctor nen kan inhmuh ţum a a thil sawi a ni. A hma aia ka ngaihsak phah nachhan leh hmalam pan tur a ka kaihhruai luih nachhan.

"Thil eiţha tur a ka tih leh ka ei a, ka luak leh zel a a tia, ei luih a tum lo hrim hrim niin ka hria, helam hi chu hmeichhe lam doctor zawt la a ţhat zawk ka ring"

"Ka ţhian inih vang chauhin ka zawt che. Hmeichhe doctor chu lo rawn mah sela a doctor thleng thleng a umzui sak ka tum lem lo. Luakchhuak te chu hmeichhe naupai chuan an nei vek a ni lawm ni?" ka ti a, psychiatrist a pan tih ka hriat thawi khan mak ka ti ang reng a, ka school kalpui ţhin a lo ni hlauh nen, engmah sawichiang duh lo mah sela ka puih theih dan tur min hrilh a intiam. 

"A tam zawk chuan an nei ang. Mahse tawrh hlelhawm khawp a a nasat chuan buaina a ni ve thei"

"Engtia tih chi nge?" ti a ka zawh chuan kuangkuah meuhin min thlek vang vang. 

"Engtik aţang khan nge midang buaina a inrawlh a changtupa ang maia chhanchhuah duh na te ineih ve tak a" a ti a,a nui zui ver ver. 

"Englai paw'n. Ka unaupa vang a ni pakhat"

"Ka ring chiah lo. I awmdan----"

"Leh naute vat" lo tih zawm zatin a thusawi tum ka lo pawt chat. 

"Zothana thih hnu hian danglamna tam tak a nei ang a, chhungte puihna a mamawh ber. Ţhian pawh nise tupawh a hnaih theih apiang. A tawrhna te amahin khawl khawm vek lo se la, chutiang a a tih reng chuan thil pawi zawk a thleng mai ang. A naupai thleng hian a nghawng ang tih a hlauhawm a, tu nge a mi rin ber ni a i hriat? A mi rin ber leh a chhungril a phawrh ngamna nih tum la, i thei lo anih chuan a mi rin ber ngaihtuah rawh. A natna ang chiah tuar a hrethiam ve, amah hrethiam tu leh ngaihsak tu a mamawh ber"  

Hemi ni aţang hian ka ngaihven lehzual. Ka tawrhna tihlan ka duh loh viau laiin ka ţanpui theihnaah ngaiin a hnenah chuan ka sawi lang ve fo a, ka hriatthiam thu ka hrilh nasa. A ţap reng mai te hi nin chang ngah mah ila a thunun theih a nih bik loh vangin ka palzam hram hram. Zothana thihna khan a nghawng a, amah leh amah pawh a inhre thei tawh lo. A sawi dan takah naute vang chauh a dam ve hram hram a ang ber. 

Nitin ka bia a, thil a ei leh ei loh ka zawt nasa. Ka tih ngai miah loh leh ka ti ve ang tih ka rin ngai loh thil thlengin ka ti vek. A thil ei duh lo ka hauh hrep aţang khan kar khat lai a liam veleh reng tawh. Khami ni aţang khan ka sawi chuan a hnial ngam tawh lo va, tam lo mahse a ei ve ziah tawh a ni awm e. 

Florence-i pite in kawtah ka ding dat a, ka biak khat deuh vang a a ngaih ţha lo reilote awm turin a rawn zin vang vang a nih hmel. Lut mai duh lo vin ka be hmasa a, amah chiah a a awm thu a rawn sawi takah chuan kan inkar chinfelna hunah ngaiin ka lut ta zawk a. 

Kawngkhar a rawn hawng a, a thinrim hmel hmuh ka inrin nen min lo nuih sang. Ka luh hnuah kawngkhar khar ţha lehin ka kalh a, midangin min tibuai lo se a fuh lehzual ang. 

"Ka ngai lutuk che a ka lokal tawp" tih pah a ka nghawng a min kuah chuan ka lo nam let vat a, a hrilhhai hmel takzet. 

"Kan ţha vek em?" 

"Sawipui duh che ka nei. Lokal lo mahla inhmuh theih dan ka ruahman tho ang ka tih lai a nia" ka ti a, eidun tur ka lo siam sa a tih vangin ka thusawi chu hrelo derin choka ah a lut a, ka zui lut ve zel. A sawi ang chiahin a lo inchhawp dul.

"Florence"

"Ei phawt ang" lo ti hmakin a eizui mawlh mawlh a, a dakchhuak leh tawh lo. Ka ţawng dawn hlekin thil dang a sawi zung zung a, a kâ ah eitur a hnawh lut mawlh mawlh reng. A thil ei chu a hak ta nge nge. Tui ka lo pe vat a, a ţhutna bulah kal hnaiin na vak lo vin a hnungah ka chum a, a ziaawm deuh hnuah ka chul sak leh.

"I ril a va ţam awm ve" ka tih chuan a rawn dakchhuak a, a thil ei a hak vang nge a mit a sen ram a, a mittui a tling pam.

"I lokal hun ka nghak a, thildang ka la ei miah lo. Ka puar tawh. Ka chhungte an lo haw ţep ang ka thilsiam i eitawh bawk a, iduh chuan haw tawh rawh. Zanah ka rawn bia ang che" a ti leh zung zung. A awmdan a danglam a, hetianga a awm chhan hi ka hria. Ka be ngai lo a tih theih a, ka thusawi tur hi a ngaithla ngam lo a nih hmel. 

Choka aţanga chhuah a tum laiin a banah ka lo vuan a, hlau viau mahse a ngaihthlak tho a ngai.

"Pumpelh tum suh. Ka sawi duh ang ka sawi loh nan chhuanlam siam reng mahla engtikah emaw i ngaihthlak tho tho a ngai dawn. Tunah sawi law law ang" 

"Thei tui i in duh em? In leh lawk ila chuan muangchangin kan la sawi dawn nia, ka thil siam kha ila ei vak lo vin ka hria" 

"Ka duh lo. Engthil mah ka duh lo. Nangmah hi ka be duh che" 

"Awle..eng nge min hrilh duh a?" ti a min rawn en laia a mitmeng ka hmuh chuan ka khawngaih takzet. Lo tawng lo tawp ila ţha zawk tur. 

"Inţhen ka duh" a nui hak. In la hrangin ţhutkhawmna pindan lam a pan a, ka zui ve zel. 

"I insawifiahna ka ngaithla tel thei a ngem?" nui reng chungin a ti a, engahmah a ngaih loh hmel. A lang lo lam erawh ka hmu thei lo va,ka hre lo le.

"Buaina ka ngah em a, hna leh thildangah. Zothana a awm tawh lo va, engkim ka kut vek. Ka ngaihsak hman dawn chuang lo che a, kei aia ţha i phu zawk. Kei aia ngaihsak thei tur tur che" 

"Thudik sawi rawh Zodinsang. I chhuanlam hi mipa laktlak loh ho in an bialnu te ţhen nan an hmang ţhin. Nang anga mipa hawihhawm leh fel hnen aţang hian a aia ţha deuh hlek ka hre duh. I nihna ringawt an en chuan makpa atan an awt fur ang che. Chuvang chuan chhuanlam ho te chauh hi hriat ka duh lo. Ţha deuhin min hrilhfiah rawh" 

"Chhuanlam chauh a ni lo. Buaina zawk chu keimah hi ka ni tak tak a, a tir phat aţang khan ka tihsual a ni. Ka rilru put hmang ka hriatthiam loh laiin inlaichinna ka neih pui che a, kan tuizawng a inan vang leh hnathawk nasa mi kan nih ve ve vangin kan inkawp rem thei turah ka ngai a, thutlukna kan lo siam hma mah mah niin ka hria. Kan inlaichinna hi kalpui zel ka duh tawh lo. Kan ti lui a nih chuan tun ai hian i na zawk ang" ka ti a, min en ran a, ka duh ang chiahin zam hmel a pu lo. 

"Thil dang ka lo ring ve chhin. Hmeichhe dang vang a ni thei mial a ngem? Hmeichhe dang tihah i hnaih tak ni si. Nunui inti mi? Khanu vang kha a ni tiraw?"  a tih chuan mak ka ti khawp mai. Grace nen chauh a kan hriat a rawn sawi chhuak nalh. Mahse a fing em a, thil awmdan a man thiam zung zung a, Florence hrechiang tu tan chuan thil mak a ni lo vang. 

"A ni tel tho a, kan inremna aia kan inrem lohna atam zawk vang a ni mah zawk" a thaw hawk hawk a, lem zetin a nui leh. Kan inhrechiang thawkhat tawh a, a thinrimna lantir a duh loh chang a inbengdaih nan a a tihdan ţhin a ni. 

"Ka neih loh ang eng thil nge a neih min hrilh tel law law rawh. Eng thil nge ka tlakchham? Kei aiin i thlang zawk a, kei aia i thlan zawk chhan min hrilh tel rawh" 

"A neih ang i nei vek. Tlakchham i nei lo va, engkim i nei. Hmeichhe dang nen inkhaikhin duh suh.Nunui te chhung nen hian kan inpawh a,kan ţhang lian ho a, a kianga awm a hmuh reng chakna hi ka ţhanlenpui a ni mahna. Hunin a la hril ang chu" 

"Mahse a hmangaih hleinem che. A hmangaih chu nang ni lovin Zothana alawm. I unaupa thih aţangin thla khat leh tlem chauh ala liam a, Nunui hian a pawm theih che iring a mi? I ngaihtuah a, i theih dan ang ang a ngaihsak iduh ringawt a nih kha. Chutiang chuan ti rawh ka phalsak vek ang che. Kan inţhen kher ngai lo vin i ngaihsak thei reng alawm" a ti zat zat. Peh hel tak leh thu khuh ţhen ka neih chhung chuan min hnial thlak dan a hre zel ang. Inthiamlo viau mah ila "Ngaihven a ngaihsak ringawt ka tum lo. Ka ta nih tir ka tum" ka ti ta nge nge. 

A kut a hum ruh a, a chapona vangin ţap lo turin a insum nasa dawn tih ka hria. A induh ve tawk a, amah ti na tu hmaah hian a ţap ngai lo vang. 

"Fiah lehzual a sawidan ka hre lo. Nunui hi ka tan a pawimawh ber a, ala pawimawh ber zel ang. Tunah i tuar thei anih pawn tawrh theih loh hun a la thleng tho ang. Keimahni vanga i na tawrh reng tur ka tih tawi sak che ah ngai rawh. Min hmuh reng duh ka ring tawh lo va, i awm nawmna tur anih phawt chuan i hmuh turah ka inlan tawh lo vang" 

"Midangin min zawh hunah ka ţhen zawk che angin ka sawi thei angem? Kan chhungte leh ţhiante hnen aţanga zawhna kan dawn hunah keimah zawk hian ka ţhen ang che in i sawi ve thei angem?" a ti a, min duhzia ka hria. A duh ber a chân dawn lai pawh a a chapona a dahthla duh miah lo hi ka fak letling khawp mai. Thip ram a min en reng laiin ka lo nui hawk. Kei aia ţha zawk a phu ka tih khan dawt ka sawi lo. Awmdun reng lai pawh a kei ang a hmeichhe dang ngaihtuah tlat ngai lo a phu a, hmangaih tak tak tu a phu. 

"Awle. Nangmah zawkin min ţhen. Ka lo hrereng ang" min chhanlet hun ka nghah vang vang hnuah tlem te pawh a a chet eih loh vangin "Ka kal mai ang a tlai dawn tlat" ka ti a, a dar a hmer chungin "Engkimah ka tihpalh, ka thiam loh vek anih kha" ka tih leh hnuah kawngkhar ka pan a, ka luh dawn a ka kalhna hawn tum a ka ban laiin hnunglam aţangin min rawn kuah chawt. 

"Khang hun chhung zawng khan min lo hmangaih ve ngai reng reng em?" dimte a inla hrangin ka hawi let a, a khabe ah dawmin min en turin ka kuai dak deuh a, a mittui hmuh tur a awm miah lo hi ka lawm takzet. Hmeichhe chak tak a ni ţhin a, a la ni zel ang.

"Chu chuan awmzia a nei tawh lo. Min theihnghilhin hmalam pan rawh. Kei aia mipa ţha leh felin a lo nghak ran tawh ang che. I chak lohna tumah hmuh tir suh ang che aw"ti a ka hrilh hnuah kunhniamin a tawp nan a chalah ka fawp. 

"Ka sual emai min theihnghilh la, mifel tak i tawn vat theih nan duhsakna ka hlan che" mittui tling pam chuangin a nui ver ver a, lu a thing nawk nawk.

"Hetiang itih vang hian ka haw miah lo che a nia aw. Min hmangaih lo mahla kan awmdun hun chhung zawng kha ka nun a hlimawm ber pawl a ni. Keipawn duhsakna ka hlan che a, mahse i hnathawhna lamah. Theihnghilh tur che in min duh viau mahla engtikahmah ka theihnghilh lo vang che" a ti sep sep a, awmzui zel duh lovin ngawi rengin ka chhuahsan. Ka nun a rawn inrawlh lui zui tawh lo turin a chapona in a dan theih ka beisei. 

NUNUI

"Hma i sawn zel a nih hmel. Vawiin chu hmuh i nuam khawp mai" dawr chhung a kawr khai ka rem fel malh malh laiin a aw ka hria a, ka hawilet hma hauhin tunge a nih leh a landan tur ka hria. Ka i her a, ka ring dik chiah. Dar5 a ri tawh a, school aţanga a haw in min rawn tlawh kawi leh tawh a nih hmel.

"Nitin ka thil ei leh ei loh hriat tumin min rawn bia a, mihring pangngai ka an ve theih phah a nih hi" ka lo ti a, midang awm ve lohna lamah kan inzui lut. 

"A ţha hle mai. Nitin ka rawnkal hman tawh si lo va, hriat ka duh tho chuan ka zawh che a ngai a ni mai a, i ţhat pui phei chuan ka chhunzawm ziah ang" a ti fiamthu ve ngei. Min pui nasa a, eng ka an phah lo ti ila chuan dawt sawi ka ni tawh zawk ang.

"Engtik nge inu leh pa an lo haw ang?" 

"Karlehah" ka ti sep a, ka hnual zui rawih. Ka pa checkup a hun a,ka nu nen an zin. Lo haw lo se ka tihna a ni lo va, an lo haw huna manchhuah ka nih chuan ka pa a ţhat loh phah ka hlau a ni. Damna duhin hmunpui zawk an pan hram hram a, keimah vanga a damloh phah ka hlau ţhin.

"Kum5 liam taa ka piancham kan lawmna hmunah khan hruai leh che ka duh a, hmanni khan kalpui che ka tum viau na a a laklawhah kan let leh sia, engtikah nge hun ineih theih ang?" ka hmaa calendar intar en ve bawk mah ila ka tan chuan hun hian awmzia a nei tawh lo. Zodina min ngenna angin naute tan thil ka ei hram hram a, mahse awmze nei lo vin ka la nung mawp mawp tho. A rukin thlanah keimahin ka la kal zeuh zeuh a, midang ti mangang lo turin dawr khar hun awm velah ka haw ţhin. Ka inpawm duh emaw duh lo emaw Zodina bula ka awm hian ka thla a muangin ka lang tlang ber a, a chang chuan Zothana bia ang maia inngaih chang ka nei a, tlemin ka hriat miah lohin hma ka sawn ve deuh a ni maithei. 

"Ka kal ve a ţulna chhan a awm mial em?" amah pawh en chuang lo vin ka ti a, khalai hmun kha ka kal nawn leh tawh lo. Ka awmdan kha ka ngaihtuah let fo a, Zothana hnenah khan sawichhuak ngai lo mah ila keimahin ka zak chem chem fo mai. 

"Nunhlui aţanga hmalam kan pan hian nunthar kan din pah nghal a, nunthar lemchanna leh dawt tello" a thusawi chu ngaihsak vuk angin awm lo mah ila a sawi tum ka hria. Lem a channa hmun a ni a, Zothana anga a lo awm tawhna hmun a ni. Khalai hmun nuam takah khan amah tak tak angin a awm ve duh a ni mahna.

"I tan a pawimawh hmel emai ka kalpui ang che. Keichu chhuah zawk zawk hi chu ka thei reng a, i hunawl neih ve na ni ber inrinni thlang mai ang. Keimah tak tak hi i kianga ka awm hian a lang chhuak ţhin a, ka chhungril zawng zawng thlengin. Nangmah tak tak itih lan ngam na hmun zawnpui ve tur che ah ka inngai mai ang" tiin thu awmze nei lo tak tak ka sawi a, hma ka sawn hret hret ka tih lai chian ka rilru leh ngaihtuahna tam zawk hi chu nunhlui leh Zothana bawkin an la kaipeng tlat a, a hriatreng theihna turin nau ka pai lehnghal. Tum viau mah ila ngai ka la awh thei lo va, tih luih theih ka ni lo. 

"A ţhat chu. Ka tan chiah ni lo kan pahnih tan a pawimawh" a ti a, eng chiah nge tih a tum ka ngaihtuah thiam lo. A ţhutna piah dawhkan te a phone dah chu a nghawr der der a, tum lawk miah lo vin ka bih a, Florence a lo ni. Ka lo en ve kher kher chu a inthlahrung ru angreng hle. 

"I chhang dawn lo mi?" ka tih chuan lu a thing a, a ngaih pawimawh loh hmel em em mai lehnghal. An inkarah buaina eng emaw a awm a nih ringin ka ngawihsan zui mai. Eng ni lo mah ila a chang chuan ka lo chik ve ţhin a, Florence hi a khawngaihthlak takzet. Chutih rualin min tlawh pawh ka hlau ru hle thung. Kan hmuh leh ngai tawh lo tur a min kalsan hian a na a, kan hmuh reng theih a awm tho si a an thinlung kan neih sak theih miah loh hian a nat dan a nep bik chuang lo vang. Heivang tak hian a ni ka khawngaih ţhin ni. Florence nen hian kan inang chiah. 

CONT...Zanin chu changtunu ai pawh hian ka thluak a ruak zawk😂nizan ka dah tawh si lo va ka ti hram hram. Ka rilruah a lut thei miah lo va,ka thai kual vel mai mai a nih hi. Zanin chu in hriatthiamah ti mai ang haha