FATED TO LOVE YOU-8

FATED TO LOVE YOU-8

NUNUI

Kum5 liam ta a kan kalna hmun ngeiah khan a ding dat. Kalpui ka intiam tawh ang ngeiin ka kal pui a, a hmun a falin a rem a,a nuam em em bawk. Zothana piancham lawmnan pawh khan ka thlang chat reng a. 

Car aţanga chhukin kawngkhar a khar a, pawnah car nghengin a ding zui zat. Hreh viau mah ila chhuk ve mai loh chu tih tur dang a awm lo. Hmanhmawh lo fe hian ka chhuk a, a bulah ka ding ve. A chhung a min luhpui a tum loh hmel. 

"Helai hmun hi ila hria em? Hmanni khan kalpui che ka tum a, kan thlen hmain kan let leh ta sia" tiin min be hmasa tu zawkah a ţang a, chiang takin ka la hre vek a, Zothana ang a ka ngaih theih vang khan tun thlengin ka la zak. 

"Hria e,i piancham kan lawm dun kha. Tun hi ka kal leh hmasak ber na" tih pahin ka chhoh en ha a, ka lam a lo hawi ve chiah. Ka hamhaih viau laiin a lo nui suk. 

"Nitin hma i sawn tial tial a, a lawmawm. Nangmah i in enkawl ve thei tawh a ang khawp mai" 

"I tel ve tho alawm. Nitin min rawn bia in tih tur min rawn hrilh ţhin lo la chuan ka la ngai reng ang" ka lo ti a, awm lo se la chuan ka ngaihtuahawm viau maithei. Zothana ka hloh rual khan keimah ka in hloh tel ve a, Zodina min puihna vang liau liau in tlemin hma ka sawn ve hret. 

"Ngati nge helai hmunah kher hian min hruai? Zothana ka hriatchhuah ziah iduh vang a ni em?" 

"Ni lo. I theihnghilh dawn lo ka tih tawh kha. Tuman kan theihnghilh lo ang. Eng mah i pumpelh thei dawn lo va, paltlang vat vat a fuh zawk bakah helai hmun hi hun ka hman nawm berna hmun a ni ve tlat. Khawi hmunah mah kan kal dun ngai lo va,helai hi kan kal dun ve na awmchhun a nia, ka ngainat chhan pawh a niang" a ti a, eng emaw sawi tumin ka ang zuau hman a, ka ţawngsual hlauin ngawih ka chuh leh ta zawk. A awmdan teh thut hi a mak. Zothana thih aţang hian min hnaih sawt a, min ngaihsakna a lantir ve thiam tawh. 

"Ka hmuh hmasak ber ni che aţang khan ka ngaihtuah ber ini reng. La upa vak lo mah ila hnaih che ka chak a, ţhian nih a inkawm ve te. I nui hmel ka hmuh changin ka lo hahdam ve ţhin. Mahse Zothana hnaih a i awm chang chauhin inui ţhin a, keichu min hel dan i ngaihtuah char char zel a" a tih hnuah a nuichhuak ta hawk a. A ngaihtuah let a ni ngei ang. Keipawn ka la hria, Zothana kianga awm kha nuam ka tiin ka nui reng zel a, Zodina a tel ve chuan ka nui duh ngai lo. Ka huat vang a ni lo va, ka zamin ka zah a,ka hlau tel bawk ţhin. 

"Zothana piancham kan lawm ţum kha ka hnaih ber ni che a nia a vawikhat nan. Zothana anga min ngaih tlat vang khan ka zam angreng viau. Mahse ka unaupa hun hlimawm tlem ka lo lak ţhensak ve kha lawmawm ka ti tho. I bialpa ang a min ngaih vanga min kuah a ka kut i vawn lai te khan a dikloh zia sawi a inla hrang nghal tur ka nih laiin lem ka chang chhunzawm reng a, inthiam lohna ka neih veleh ka inla hrang thei chauh a, ka sawi ngai lo vin thudik i hriat phah a nih kha. Zothana anga ka awm reng chuan thil a kal dik lo zo ang a, ka duhna che a zual zel ang a, kan inkarah thil ţha lo lehzual ka thlen tir ka hlau a ni" a ti a, an unau hian engkim an inhriatpui a, min duh ve thu hi hrilh lo mahse Zothana khan a hre ru tho angem le tih thlengin ka ngaihtuah ţhin. 

"Eng thil ţha lo mah i thlen tir lo vang. Midang i dah pawimawh zia ka hria a, nang ai chuan Zothana leh kei hi min dah pawimawh zawk dawn tih ka hria, lantir ngai lo mahla Zothana i hmangaih zia kha kei taknghial pawh hian ka lo hmu thiam ve ţhin" tiin dik takin ka chhang a, keini kan nat ai chuan amah chiaha hrehawm tawrh a thlang zawk ngei ang. Ka rin ang chiahin "Chuvang chuan alawm ka pa thu zawm a hmun dang a ka awm" a ti ta nge nge. 

"Grace hnen aţangin eng eng emaw chu ka lo hre tawh a, i kal bo hma khan ka hre nual tawh. Hre vek chungin ka haider lui a, Zothana ka hmangaih vang a ni ber. A bula awm nuam ka ti ţhin a, ka hmuh tirh aţang khan ka ngaina a, Zothana chiah ka ngaihven ţhin. Hrehawm i tihna tur a ka lo awm ţhin anih chuan ngaihdam ka dil" tiin zawi te te in ka phun sep sep. Kan tan a a inpekna zawng zawng ka ngaihtuah chang hi chuan ka khawngaih ţhin. 

"Tunah ila haider reng dawn em? Hun ţha min pe thei tawh em? Zothana a awm tawh lo a, hun remchang ka nei ve thei em?" ti a min zawh chuan mak ka ti kher mai. Kan awmdun chang a Zothana kianga awm anga ka inngaih thu ka sawi vang khan ka tan a inhlan leh mai ang tih ka hlau a ni. A hlimna tur um ve tawh turin ka duh,keimahni vanga buai tawh lo turin. Lu ka thing nawk nawk a, min la duh reng pawh nise a theih loh bur. 

"Aih,nangnen chuan a theih loh vek. Min enliam tawp rawh. Kan awmdun chang hian Zothana kianga awm angin inngai ţhin mah ila Zothana ini chuang lo va, khatiang zawng khan ngaihtuah tawh suh, keini chu a theih loh" ka ti bah nawk nawk.

"A thih ni khan a chhuah hmain min hmu hmasa a, ngaihven tur che in min chah" 

"A inhre lawk tihna maw?" ka lo ti a, ka bulah chuan amah nghak reng turin min chah a, a unaupa hnen a a thu chah nen chuan a inang lo takzet. 

"Ka hre lo. Kawng engkimah kan inang a, kan duhzawng thlengin. Kan mizia tih loh danglamna kan nei lo. Thihna chauhin kan inzawmna a ti chat thei ang tiin a sawi reng ţhin a,ka ngaihpawimawh sak ngai lo. A thih ni khan ngaihven tur che in min chah a, a tihziah dan a nih vangin ka ngaithla liam mai. Mahse kha thil kha a thleng ta sia, a thawk tawp thleng a a ngaihtuah che ka ring" a ti lehzel. 

"Min ngaihtuah turin a chah che a, chu chu in inbiak hnuhnun berna maw? I hnen a a sawi hnuhnun ber maw?" ka ti a, ka mittui a hnai leh tawh. Keipawh hian ka hne ve takzet. Ka awmdan mumallo ţhin lutuk leh chak lo ber ang maia ka mittui a tla awlsam ta em em mai hian ka thin a ti rim hlur ţhin. 

"Kha thil kha min chah lo mahse hetiang hian ka awm tho ang. Eng thu mah sawi lo mahse ka ngaihsak tho ang che" ka biangah dawmin dimte in ka mittui min hruk sak a, kei mai mai vangin a chapona a hnuk hniam hreh lo va, ka ngaihven ngai loh laiin a rukin min ngaihven reng tho mahse ka thinlung hi Zothana hnenah ka pe vek tawh a, midang pek tur ka nei tawh lo. 

"I kawngzawh lai mek hi a harsa tih ka hria, nangmahin ka zawh tir lo vang che. I rualin i kut vuanin ka lokal ve zel ang" a tih hnu chuan hnunglamah ka tawlh dawrh. Bialnu a nei a, hmalam a pan tawh. A lo paltlang tawh thilah ka hnuk lut duh tawh lo. 

"A theih loh ka tih tawh kha. I thusawi kha i hrechiang reng reng em? Zothana chiah ka hmangaih a, amah chiah ka hmangaih reng bawk ang. Ka chân vang mai hian mahni hmasial takin ka vuan thei hleinem che. I kalsan vek tawh. I lo na tawh a,ka ti na nawn tawh lo vang che. Engtin pawn lo awm ila min ngaihven lo vin hmalam pan zel zawk rawh. Bakah engtin nge Florence? I bialnu engtin nge a awm ang? I engmah hi ka ta a ni lo. Min vawn reng inhuam viau mahla i kut kha ka ta a ni lo. I bialnu kha vuan reng zawk rawh. A mamawh ve tho che tih i hria em?"

"Kan inţhen" a lo ti nghut a, min ţhawng kher mai. Keimah vang a nih loh ka beisei. Zothana tan engkim tih a inhuam ţhin a, min ngaihsak tur a a chah vang mai a a bialnu a ţhen chu ka ngaihdan a ni lo hle. 

"Ngati nge i ţhen? Zothana tan a i inpekna hi ti tawp tawh rawh. Nangmah i in theihnghilh ţhak a, a thi tawh a, a thusawi apiang i zawm a ngai tawh lo va, eng thil mah i tihsak a ngai tawh lo. Eng thu pawh chah che sela mawhphurhna i lak a ngai tawh lo" ka ti lawm lawm a, mipa induhtawk ve tak a ni ţhin mahse a induhna leh chapona te kha a bo vek tawh. 

"Ka hmangaih loh vangin ka ţhen. Thil dang a awm lo. Englai pawh a ka hmangaih reng ţhin hi nangmah chiah inih vangin ka ţhen. Ka hmangaih vang che in ngaihsak che ka duh. Ka remtihna lo vin tuman eng thil mah min tih tir thei lo. Ka duh vang a ti ka nih hi. Ka hmangaih vang che in" fiah tak hian a ti a, a tih tak zia ka hmuh hmaih bik lo. 

"A theih loh. Ka thei lo a, ka duh lo. Ka ngaihtuah chiah poh leh a theih loh telh telh. I thil tih tum hi a ţha lo takzet" 

"Min hmangaih ve turin ka ti lo che. I lak aţangin eng thil mah beisei ka nei lo. I kianga awm a i buaina te i ruala hmachhawn a chinfel sak che ka duh. I naupai thu hi an hre thuai ang a, sawn pawm ti a an sawi tur che hi ka duh lo.Ka enkawl pui ang che. Ka thil tih hi a dik loh zia ka hria. Ka inngaihtuah nasa tawh a, khawilai mah hi dik a awm lo. Mahse a dik leh dik lo ka thliar lo va, midang min ngaihdan tur ka ngaipawimawh lo. I naupai lai nen khan chhungkua inneih ka duh. Naute khan pa a mamawh thuai ang. Ka nawr lui lo che a, min hmangaih ve tur phei chuan ka phut lo che. Chhungkua a neih chuan sawn pawm ini lo vang. Naute hi sawn a ni lo bawk ang" 

"Eng thil chiah nge sawi i tum?" ka lo ti hlak. 

"Min nei mai rawh. Sawn pawm i duh loh chuan min nei rawh"  

Zothana bawk a lo lang leh. Min sawm lai khan ka hlim em em a, inneih a duh thu a sawi lai khan ka hlim takzet. Tunah amah ang chiah chiahin inneih lam a sawi leh a, a dan a dang. Engkim a danglam vek a, dawnsawn dan pawh ka thiam lo. Ka thu hriat chuan ka thawk a ti rang a, ka in thunun thei lo ţhelh a ni. Ţah loh tumin ka insum hram hram. Hepa hi a mawl takzet. A â vek tawh niin ka hria. 

"Ngati nge hethiang thil hi i tih? Innei mah ila kan hlim dawn chuang lo va, thawnthu lungchhiatthlak takah a chang mai mai dawn tih i hre ve vek a ni lawm ni? Zothana chiah ka hmangaih a, midang tumah ka hmangaih thei tawh kher lo vang. I inchhir ngei ngei ang. Eng thil mah ka pe thei dawn lo che a, ka tihsak thei dawn lo bawk che. Tawrhna bak pek theih che ka nei lehpek lo vang" ka ti a, neih ka tum lo bur. Ka hmangaih loh chu thuhran sawisel tu tam tak kan nei ngei ang. 

"Ka duh vang a ti vek ka nih vangin phut let ka nei lo. I hnen aţang hian beisei ka nei lo. I kianga ka awm tam ve thei tawh ringawt te hi thil mak tak a ni. Ngaihsak che hi ka duhna a rei tawh a, ka ngaihsak che i phal a nih chuan eng thil mah min tihsak ve lo mahla ka lung a awi tho ang" a tih laiin "I â takzet" ka lo ti sep. 

CONT..(Dah loh aiah tawi te ka rawn dah aw. Chocolate hian min tibuai lutuk a,naktuk zanah thui deuh ka lo dah ang. Ka mutchhuak tawh lutuk a, kan mengrei zawn lutuk a, chauh a awl. Zanin chu in lo hrethiam dawn nia😭)