FATED TO LOVE YOU-9

FATED TO LOVE YOU-9

NUNUI

Ka nu leh pa rawn haw ni tur a ni a, ka huphurh takzet. Zodina chhanna ka la pe thei lo va, hmangaih thei dawn a ka inhriat loh vangin ka ti lungngai lehzual mai mai ang tih ka hlau a, 'aw' ka la pawh lo. Nau ka pai kher kher hi ka tan chuan lawmawm viau mahse ka nu leh pate an zak dawn tih ka hre lawk sa. Ka u in a hriat rualin sawn pawm ai chuan Zodina nei mai turin thu min rawn a, an inkawmngeih a, englai pawh a Zodina lam ţang a ni. Ka ngaihven duh lo lui ve tlat. Ka u ngaihdan ang hi ka nuten an put ve ka hlau ru kher mai. 

Nilengin dawrah bet lo deuhin ka awm. In an thlen veleh min rawn hrilh a,ka la haw ngam mai lo. Ka naupai hi ka paih a nih ngawt loh chuan hriat hun an la nei ngei ngei dawn. Engtin nge an dawn sawn ang tih ka ngaihtuah thiam lo va, nulat ka hriat theih tirh aţanga min duh pui zawk char char ţhin Zodina ka nei mai dawn nge keimahin naute hi ka enkawl ang? Paih ka phal der si lo, a ţha lam zawnga ngaihtuah ka tum pawn a theih loh. An lawm dawn lo tih chiang takin ka hria. Nau ka pai thu keimah chiahin ka hriat lai pawh khan ka chhungte chuan biakin hawng ngei a pasal nei turah min ngai a, ka pa takngial pawhin min fak ve. Hre ngat se la chuan an zak dawn lutuk a, tun thlengin ka la hrilh ngam loh phah a ni ber. 

Haw na tur dang ka neih chuan loh vangin hreh deuh chungin ka haw a, inchhung ka luh rual a min lo en ţhap te chuan ngaih an ti ţha lo rum rum thei. An zingah ţi dekin ka ţhu ve a, an in entirna chanchin te ka zawt ta mai mai. Ka nu chuan min en chik hle a, a fanu ka nihna angin eng emaw hriat a nei tih ka lo hrethiam, chung te chuan min ti zam takzet. Ka pa erawh chu ka danglamna hmu angin a awm lo. 

Chaw eikham veleh mu turin ka kal nalh a, ka nu in min zui vat. 

"Mu hma ta che, i chau lo a mi?" ka pindan a rawn luh rualin ka lo ti a, ka khumah a ţhu rem sauh sauh. 

"Nau i pai tiraw?" a ti chang khawl a, min melh run bawk. Lu ka lo bu nghat a, thil dang ka sawizawm ngam lo. 

"Zothana a ni em?" ti a min zawh leh hnuah pawh rei deuh hnuah "Ni e" ka ti thei hram. 

"Engtia awm nge i tum?"

"Ka hre lo" ka ti sep. Ka awmdan tur ka hre lo tak tak a, naute tih tlak ka tum lo bur a, thildang erawh ka sawi thei lo. Thil dang min zawh hmain ka unaunu Grace a rawn lut ve hlauh. 

"Nunui naupai hi i hretawh em?" ka nu chuan a lo ti a, a nelawm tawh loh takzet.

"Hria e. Phone hmanga ka hrilh cheu chuan in phili buai ang tih ka hlau a, i hmuh hunah i hrethiam dawn tho a, ka hrilh lo mai che" a ti zung zung. 

"Pasal nei lo va nau i pawm anih chuan min an nuihzat ru viau ang che. Nang chauh nilo kan chhungkua thlengin. Mi zah kan kai ve na ţhin te hi a bo vek ang" ka nu chuan a ti hmarh hmarh a, thil dang a zahpuiawm loh deuh ni si hi hetiang lamah hian a rilru hi a hmanlai tlat ţhin. An chhungkaw inzirtirna ah ngaiin kan hnial duh ngai lo va, tunah ka chungah a thleng ve ta chiah. Pasal neih hi zahawm naah a ngai tlat a, ni tho mah sela tun ţum chu min nawr lui lo se ka duh zawk. 

"Zanah ka pa nen lo sawi dun ula, Zothana a awm tawh lo va, a tlan bo pawh a ni lo va, naute hi tih tlak lam chu ngaihtuah duh suh ka nu. Zothana awm lo mahse Zodina hian a pawm thei dawn tih ka chiang. Nunui hi a duh ru ve viau ţhin tho a" ka u chuan a ti ta zat zat a, nuam lo ti ru viau mah ila an buaina ber ka nih vangin ngawih ka chuh a, ka nu in a duh dan a kaltlang pui ang tih ka lo hlau et et. 

"I mawl em ni? Zothana chhungten an remtih i ring em ni? Zodina lah a hnaah hma a sawn chho zel a, a unaupa bialnu, naupai sa lehnghal a pawm duh teuh lo. Chutih rual chuan fanu pasal nei lo va naupawm pawh ka duh chuang lo. Mu rawh u. Zanin ah ipa ka sawipui ang a naktukah kan sawi leh dawn nia" a ti a, ka nu chhuah hnu chuan ka ţhu zawi hnawk. Reilote chiah ka bula a awm chung pawh khan ka chau hman. A kal dawn a a thusawi lah hlimna a awm lo. Rilru buai a ka awm a duh hrim hrim emaw tih mai tur. Zothana nen a kan fa hi neih ngei duh lo ila chuan ka nunna hi ka la ve daih tawh ang. 

"Ka sawi ang chuan ti mai rawh. Naute pa a thih tawh phei chuan ka nute hian an tih tlak tir tho tho ang che. Tui thlar hmak i duh loh a, naute i hum duh anih chuan Zodina bak belh tur inei lo. Fanu nihna hloh a in i chhuahsan duh a nih leh thuhran. Pa kan la neih ve reng duh chuan ka pa rilru ti hah lo zawng a awm a ţha bawk a, thutlukna chu i siam tur a nia,i thu thu. Zodina rilru put hmang chu ka hrilh tawh che kha" phone enreng chungin ka u ala ţawng zuah zuah. Min ngaihsak loh hmel viau mah sela a thusawi chuan awmzia a nei vek. 

"Vanduai tur hrim hrim hi kan awm ve aniang. Engkim a tluang purh dawn maw tih laiin buaina in min hmuak zel tawh a" ka sawi zawh chuan ka thaw zui halh. Ka awm hi a tawt up up reng a, eng thil mahin a ti reh thei lo. Zodina kianga keimah tak tak ang a ka awm chang leh, ka awmdan diktak a hnen a ka sawi te hian ka thawl ve huai a, in a ka luh rual rualin ka ipik leh a, kan in hi a phuiin a pik bik emaw tih mai tur a ni. Ka tawrhna hrethiam tu awmchhun leh min ngaihthlak sak duh tu awmchhun anih vang te pawh aniang, inthup a ngai ve bawk si lo, mahse keimahni vanga buai reng turin ka duh tawh lo. Kei takngial, ngaihsak duh lo va hel ţang ţang ţhin tu pawh hian ka khawngaih tawh. Kan tello a hlim tak a a nun hmang tawh turin ka duh. 

"I vanduai a,i vannei bawk a. Mi tam tak an nun a mi pawimawh berin an kalsan hnu a mal ngawih ngawih an awm. Nang chu ngaihsak tu ila nei tal a,i vanduaina tam tak kar a i vanneihna hi hmuh tel tum la, indawm kun lup reng lo vin lawm thiam zir rawh" a ti a, ka nu leh paten min hauh pawh a chhang let miah lo tur leh ka pa natna hrereng turin min hrilh zawm melh melh. 

Chhuahsan duh ila chuan keimahin ka awm thei teh meuh mai. Dawr ka nei tawh a, chhungte pawisa ka dil tawh ngai lo. Ka inchawm zo ve tawh chung hian ka chhuak a nih chuan ti lang lo mahse ka pa rilru a nuam thei dawn lo va, a natna tizual tu nih ka duh lo bur. Min ti na palh anih pawh ka nu leh pate ka tihnat ve chuan malsawmna ka dawn loh phah ka hlau a ni. 

Ka rindan chiahin ka pa a thinrim khawp mai. Ka thawh veleh a min hmuh phat khan min beng ţhelh nghe nghe. Ka nu in a lo dang hlauh a, kut em chu min thlak lo. Kan chhungkua kan ţhu khawm ţhap a, ka nu leh pate rilru hah zia ka hmu thiam. Pasal nei lo va nau ka pawm an phal lo bur a, tih tlak mai ţha an tih laiin ka hnial ve tlat thung. 

Ka u in Zodina hming a lam ri dek dek a, ka pa chuan "Thu lawi lo lo sawi ve sek suh" a ti hlur a, keipawn ţul ka ti lo. 

"Pawisawi miah lo thah ai chuan a ţha daih zawk. Pasal nei lo va naupawm turin in duh lo va, a nei duh tu tur ka sawiin in hnial tho bawk si. Nau tih tlak chiah in ngaihtuah a, Nunui hian ti tla duh pawh ni se Zothana vang tal pawn hnial ţang ţang tur in nia sin" tiin ka pa chu zam hauh lo hian a chhang let a, kei erawh ka ngun ngul reng a, engmah ka sawi ve ngam lo. 

"Zodina'n lo pawm pawh nise a chhungte sawn an pawm hauh lo vang. I thil tih tum hi Zothana zah lohna zawk a nih hi. A chhungten hre ngat se chuan an thin a rim khawp ang"  ka nu in a lo ti veleh a, zingkar aţangin an inhnial a, ka lu a hai muai muai tawh. Chhuahsan ka duh takzet rualin ka la chesawn ngam der si lo. 

"Zodina ber a inhuam te chuan a chhungten sawi theih an nei lo. Keichuan engtin pawn awm se pawi ka ti lo. Pasal a nei emaw nei lo emaw ka nau a nihna a bo dawn chuang lo. Nau tih tlak ka remti lo bur a, pasal nei lo va nau pawm induh loh viau leh ka sawi ang chuan ti ula a ni mai" tiin ka u chuan a la hnial ve ţang ţang. Ka nau pailai vang hian engpawh ka ti duh dawn tih a hrechiang. Zodina ţhianţha ber ania, ka thlavang hauh anga awm siin Zodina ka neih dan phet a zawng tih ka hai lo. 

"Miin eng angin nge an ngaih ang? Hmanni lawkah a pasal tur a thi a, a pasal tur unaupa,a phir pui lehnghal pasalah a nei an ti dawn a sin"

"Anih a hnu pasal neih tir lo vin naute chu pawm pui ula a ni mai lawm" 

"Ti tla sela buaina a awm lo ber. Mi hriat miah lohin a nula leh tihna a ni mai" ka pa chuan a ti ta nghut a, ka rilru a lo buai takzet. An hnaih a ka awmreng chungin ka chanchin an sawi zuah zuah a, awm ve lo ang mai ka ni. Chhungkaw kalphung chhuanlamah an hmang a, hetiang hi a thleng dawn tih ka hre lawk. 

"Kan unau fate, in unaute zingah hetiang hi an awm lo. An felin an zahawm em em vek a, nupui pasal ţha tak tak annei vek bawk a, keiin fa pahnih chiah ka nei a, a naupang zawkin sawn a pai lehnghal. Ka unaute ka hmu ngam tawh lovang. Mi fa te kan awt rum rum reng mai dawn asin" ka nu in a tih chuan ka thinrim hlur a, ka pa awm lo se chuan ka chhang let ngei ngei ang. Kan hlimna aiin an zahawmna leh mawina an dah pawimawh zawk tih ka hre chiah. Ka pa in a lo tui hnih bawk a, ka u thusawi chu engahmah an ngai lo. An unau fate aia chungnung zawk turin min duh a, kawppui ka nei lo anih chuan naute pawh ka nei lo vang. Chhuahsan ta ila buaina nasa zawk ka thlen ka hlau tho bawk si. Ka awmdan hi a laiin ka tihzel tur pawh ka hretawh lo. 

"I va inhawng rei ve" khua a thim thet thet tawh tihah Zodina a rawn lut hlawl. Ka bulah ţhuin ka lam a rawn hawi a, hrilhfiah ka duh viau naa sawi ţan dan tur ber ka hre lo. 

"Zanin chu dawr a riah ka tum deuh" ka lo ti a, kan boruak a ţha lo tih a man thiam nghal ngei ang.

"I chhungte i hrilh a mi?" 

"Hrilh e. Ka zep reng thei dawn chuang lo a, an pawm dawn lo tih hrereng chungin thudik ka hrilh a, Zothana vang tal a ngaihdan an lo neih tawh ţhin te an thlak danglam ka ring a, mahse an la ngai reng" ti a ka phun sep sep hnuah "Naute hi ka bihruk pui a nih hi" ka tih zawm leh a, za lo deuhin ka nui hul hak. 

"Hetah chuan riak suh. Hotel nuam deuh deuh a tam tawh a, mikhual tam hunlai a ni lo bawk a room awl a awm mai ang. Insiam la ka zawnpui ang che" thil thleng engmah min zawt lo chu a mak zawk. Ka u hnen aţangin a hria ti dawn ila Zodina hrilh lo turin ka intiam tir thlap tho si. 

"Hotel ah ka duh lo. Zothana nen khan in huan a thlamah khan kan kal ţhin a, chutah chuan min dah tawp zawk rawh. A enkawl tu te an awm tho a hlauhtur a awm lo vang" ka ti nghal zung zung a, Zothana nen a kan kalna ţhinah ngei keimah chauh a awm ka duh. A thlanah kal chak viau mah ila zanah chuan ka hlau ve deuh a, thlarau chu thuhran misual ka tawn palh ka hlau a ni. 

"Naute vang a ni bawk a ka thlah ang che. In boruak a ţha vak lo a nih hmel a, inhrem nan ni lo thil ţha zawk ngaihtuah nan hmang la" 

"Awle,eng thil ţha lo mah ka ti lo vang. Keichuan naute chiah alawm ka ngaihtuah tawh. Ka nu leh pate hmuh rih loh dan ka zawng zawk a nih hi" tih pahin dawr chahbi bang a ka khai ka pawt thla a, inhrilh chawp ngai lovin kan inzui chhuak a, tibuai duh tawh lo viau mah ila Zodina car ah bawk ka ţhu leh vung tawh a, rilru fim ka put theih nan an thlam hman ka la dil zui. Dawhthei viau lo se la chuan min ngaihsak peih tawh hauh lo vang. 

Ka u hnenah ka kalna ka hrilh a, min ngaihtuah lo turin ka ti bawk. Zodina nen kan nih thu message ah ka ziak tel a, a ţhianpa a tel phawt chuan min ngaihtuah lo vang. Ka u in ka tal awh theih nan Zodina nen a kan hriat miah lohin thil a lo ti tih hre lawk ila chuan ka awmna hmun ka hrilh hauh lo vang le. 

CONT (Tunlai hi ka buai over a, chocolate siam leh deliver vel a ngai ţhin a, siam tam a har sia order a awm ve nual zel sia. Ka regu rih loh pawn min lo hrethiam hram hram dawn nia. zantin dah ka duh viau na a ka hman thlawt lo a ni. Ka regu veleh thei ţep tawh ah ngai ang😇)