FORCED MARRIAGE CHAPTER 1-18

FORCED MARRIAGE-1

EMMA'S POV

"Saw a lokal chiah" ward round tur a doctor lo lut mek chu kan lo thlir dauh dauh a, ka duty pui ţhin, mi tam tak zing a ka rin ve awmchhun Debbie hian a atchilh ti ila a dik ber ang. A hna a tlin in a thiam em em a, a enkawl lai te pawh in an fak ţhin. Damlo bulah nelawm taka awm chang nei ve bawk ţhin mahse keini chu a ţul tawp ah lo chuan min be ngai lo.

Kan bul a rawn thleng chawpchilh nghal a, dawhkan hnuai a langthei lo chin aţangin Debbie in ka mal a rawn ţham chuan ka lo nui hak. Nuihzathlak a awm miau loh avang in kan doctor-a chuan min en in a mithmul a san ak a, ka nuihchhan chu hriat a tum niin a lang. Engmah a niloh zia lantir nan ka lu ka thing a, ka nui hmel erawh ala bo lo.

Damlo ho file chu a rawnkal hma a an khum ţheuh a ka dah tawh avangin Debbie nen an kal kual a, Debbie lâi taka che vel chu ka ţhutna aţangin nui ţhaw in ka lo en. Naupang ngaihzawng nei ang mai alawm anih le.

Emma Malsawmtluangi ka ni a, phir pui kei aia tlem a naupang Ethan ka nei, Ethan Malsawmzuala. Doctor hial ni ve tawh mahse naupang ang mai ala ni. Tunah hian ka duh ang ngeiin nurse hna ka thawk a, ka unaupa Ethan erawh Doctor a ni thung. Internship a ti zo a thawk ve ţan chiah a ni. Ka nu leh pa ten hna ţha tak annei a, midangte awt miah lo in tun thleng hian ka la awm ve. Ka zia a zawiin ka thinrim mai mai ngai lo a, Ethan pawn min chhaih thinrim zo ţhin lo. Khawngaihna ka ngah in damlo te chungah pawh ka lantir nasa ţhin a, anmahnin an sawi anih loh chuan ka thil tih hi midang ka hrilh ngai lo. Ka bialpa nen hian nurse ka nih tirh in kan in hria a, ka thawhna hmun a Security a ni. Mi dangte ang tho in in hmelhriat satliah in bul kan ţan a, nitin kan inhmuh takah chuan kan in ngaina chho a, a nihna hniam te hi ka hmusit ngai lo a, ka iai ngai hek lo. Kan inbia a, a hran pa a inhmuh zeuh zeuh kan chin takah chuan mipa leh hmeichhe kar a in duhtawn na a piang chho a, hmangaihna in a thlak thleng thuai a, ka ţhiannu ngei Debbie hian min lawmpui ngai lo. 'Hna sang zawk a duh ve ngei ang, chhungkaw khawsak harsat vangin lehkha a zir sang theilo a, hnaţha zawk nei turin tihpuitu ţha a nei ve lo' tih hi ka chhan na a ni ţhin. Duh reng vanga rethei an awm hleinem. An sel nasat poh leh ka khawngaih a, chu chuan hmangaih lehzualna a hringchhuak leh ţhin.

 

"A bula ka awm lai khan a rim ka lo hip vang vang a" a nui śang a, a mitmeng a nung sar a, a mipa duh ber bula a awm chuan naupang thil thar nei ang maiin thildang a tihsan theilo. A duhber chu a ngaihtuahna ah kawrthar ang maiin a pawm bet a, kawr kan hak a min phuar ţang ang mai hian a in pawmbeh tir a, a bialnu nen a hmuh dun apiangin a kawr duh ber a chhia ang maiin thinrim tak in ui chung chung in a paih bo leh ţhin.

Bialnu a nei, hmelţha leh in khaithli tak, kan thawhpui a ni a, Cardiologist a ni. Kan hmuh apiangin a nui hmel chauh kan hmu ţhin a, ka ţhiannu mipa duh ber Matthew a hip bet tlat pawh hi a awm lo lem lo. A nui hmel hian damlo pawh a ti dam sawng sawng thei hial in ka ring. A sam a dum hlap a, a vun ngo tak chuan a ti lang fai sar reng a, a nuihmel mawi tak nen, mipa dang zawng zawng hmuh kan in doctor nelawm loh tak Matthew a thlang nalh thung. Debbie in a atchilh em vangin tum miah lo mah ila an chanchin ka hre nasa a, naupanlai aţanga hmun khata lehkhazir dun char char an ni. An in hmangaihna thuk tur zia ka lo ngaihtuah a, keipawn ka bialpa kum thum vel chauh ka la zui hetiang taka ka hmangaih thei anih chuan anni pahnih in hmangaihna chu ava nasa dawn em tih ka lo ngaihtuah ţhin.

"I ngaihtuah zui ve a mi? Ngaihtuah mahla a awm tho mai. A pian nalh lutuk te hi. Ka pasal ni se ka duat hliau hliau ngawt ang" phur takin a ţawng siam siam a, ka lo nuih ver ver a, a khawvel tetakte hi Matthew hian a luah hneh em a ni.

"Chuti chu kan phuarbet anga, kan neih luihtir mai dawn che mi?" nui vak vak chunga min kuah pah in a khabe in min nawr nawk nawk a, dek ka huat em vangin min fiam pah ţhin.

"Chutiang chu i sawi ve pawh ka lo ring ngai hleinem. Kan tih vaih chuan maw an hospital aţang hian min petchhuak a ni mai. Uii ka duh emai min duh ve si lo" a ti chuai raih a, thawk hak pah in dawhkan ah a bawk a, he hospital hi Matthew te ta ani tih ka la sawilo tak e. Hospital lian tak nei thei chu an khawsa nuamsa viau in ka ring. Mi hausa leh lutuk te hi ka la awtchhin ngai lo a, ka nihna ang ang pawmthiam hi ka zir mai thin a, ka hlimna pakhat pawh hi niin ka hria.

A biang ah pen hmawr a hawlh pah in "I mumang lam ah i nei nawn mawlh mawlh tho lawm. I pasal tur diktak chu Pathian in ala pe mai ang che. Chu chu Matthew ai pawn ila duh daih zawk ang tih ka chiang" ka ti a, nitin kan inhnem reng mai anih hi.

"Matthew luahlan thei tu chu Matthew chiah hi"

"A thinlung neitu hrereng chunga i duh tlat hi a atthlak tlat. Hmalam pan rawh, vawikhat ke i pen tawh chuan vawihnihna chu a harsa tawh lo ang" ka sawi zo chiah tih in kan dawhkan bulah tleirawl pakhat a rawn ding a, zak leh inthlahrung hmel tak in an thil khailai a zawh thu a rawn sawi a, ka tho tharh a, an khum lam ka pan a, ka tih tur ania, damlo enkawl dan ka zir a, an tan a nung a, anmahni pui turin ka in tiam a, ka uniform hian damlo te ţanpuitu tur ka nihna a lantir a, anni ka puih vang hian hlawh ka hmu bawk a, ka tihtur chu phun nawi lo in ka ti bawrh bawrh ţhin. Ka chauh chang leh nawmsam loh chang pawh in indawmkun mai lo in na chung chungin hlim hmel ka pu tlat ţhin. Ka ţawngkam ka fimkhur a, ho te a ka ngaihah pawh damlo te pawi ka sawi thei, mi fel famkim ka ni lo a, mihring ve tho ka nih vangin ka fel famkim thei bik lo mahse ringtu ka nihna hi ka nun a lantir ka tum tlat ţhin.

"Ka u duhtak" ka unaupa Ethan ka hmuh rualin sana ka en a, ka duty hun a zo tawh a, min thlak tu tur pawh a lokal tawh.

 

"Ka inthlak anga ka hman a ni mai" tih leh thawh ka rual a, Debbie chuan inthlak turin min luhsan tawh. Scooty khalh hi ka thiam lo a, zir pawh ka zir ngam lo. Car erawh chu ka thiam ve sawih sawih, ka la thiamchian loh vang in ka la khalhchhuak ngam lo.

Nurse ho inthlakna room bik kan neih ah ka lut a, ka nau in min nghak tawh sia ka che sawk sawk. A dawhtheih loh zia ka hria a, a chimawm chi a ni bawk nen, in nghah rei tir ka duh lo.

Ka chhuah veleh "Mafela a duty a i hmukawi duh em?" min lo ti a, chawhnu lam duty ka ni bawk nen, ka zawh meuh chuan a tlai tawh ţhin sia, in lamah chaw ei an lo duh tawh ţhin vangin ka lu ka thing a "Zanah a hman tak leh rawn leng mai rawh se" ka tih rual in ka bag ka ak ţha pah a, ka nau nen ward aţangin kan inzui chhuak a.

"Mafela hi ka ţhianten a hmelţhat nen security lo deuh hi nise an tia" pangai taka ti chung in bike a ti nung a, a hnung a ţhut tharh pah in "Ahna nuam ti tak a a thawh a rilru a neih te chuan a nupui fanaute chuan rual an awt bik nang" ka ti liam satliah ve mai.

"Neih ilo rilruk deuh a ni lo maw?"

"Nei mah ila eng nge pawi?"

"Pawi lo e. I upa zel anga, hmelchhe hma chi ini bawk nen" nui chung in a hnung ah ka chum a, ka chum nat deuh ţum pawn a haw ngai lem lo.

"Ava rimtui ve" inchhung kan luh rualin ka nu eisiam rim a nam vang vang a, chauh deuh ţum pawn in a haw man a awm ţhin.

"Ka pa min thlen khalh a ni maw?" living room a ka pa lo ţhu chu kalpelh pah in ka be hram tho.

"Aw han intifai ula, ei ang u. Zan in chu chhungkua in rorel tlang ang u" ding meuh in ka pa ka thlek a, a hmel tak run ka hmuh chuan chhungkaw rorel chu pawimawh tak anih ka ring nghal ngawt.

Ka inbual zawh ah thawmhnaw fai sar ka ha a, ka z*ng hawk in ka in hria. Darthlalang hmaah reilote ka inthlek kual a, ka nu pui tur in inhnuai ah ka tlan thla leh a, ka nu hi mi taima anih vangin awmpui lak a duh ngai lo. Inchhung chet pawh min tih tir hma a, ţhenawm ten a taima ti a min fak ve ţhin na chhan pawh ka nu vang a ni. Entawn tur leh taimak min zirtirtu ţha tak a ni. Kan inchhung a fai chuan ka mawina ania, a fai loh a ka nu ka rin vek chuan ka mualphona a ni. Hetiang hian ka nu chuan ka naupanlai aţangin min hrilh ţhin a, ka luhlul ka chhuah ve chang pawn ţap mah ila ka ti lui tho ţhin, ka puitlin hnu hian inchhung chet hi thil harsa leh hahthlak ah ka ngai tawh lo. Inchhung fai chu nawm pawh a nuam bik.

 

Kan ei zawh ah ka tifai a, midang chu living room ah an awm ţhap tawh. Ka pa chuan engtak sawi ang maw ka ti rilru neuh neuh a, a hna ah buaina a tawh ka ring silo. Plate ka sil sawk sawk a, ka sil zawh hnu ah ka chhungte ka zawm ve a.

"Eng chungchang nge ka pa" harsa tih hmel takin a rawn thaw kawk a, chu chuan thil ţha tak a nilo tih a entir. Ka nu ka en a, nikhaw hrelo a awm thut thei hmel alo pu a, kan rorel tur ber hretu tu chu kei leh ka nau chiah kan ni. Ka nu leh pate hi ka fak em em a, kan duh ang min zirtir in kan tuina lam lam ah min kaltir a, min nawrlui ngai lo. Min hmangaih zia ka hriat vangin an rilru ti na lo zawng in, an thuzawm tlat ka tum ţhin.

"Ipu in a hmangaih zia che u in hria anga, in tana ţha tur, nakin zel a in nawmsakna tur hi in pianhlim aţangin a ngaihtuah ţan ti ila a sual lo ang" a chawl det a, a hma ang bawk in a thawk a sak ţalh mai.

"I pasal tur alo hual lawk a"

"Eng maw?" ka au miah lo. Pangai deuh in ka pa chu sawinawn leh turin ka ngen mai a ni.

"Ka pu duhdan in alo hual lawk mipa hriat pawh a hriat ngailoh chu Emma hi neih tir in tum maw?" Ethan zawk chuan a ti khur khur a, a remti hauh lo ang.

"Ipu hi a boral tawh a, a duhdan leh intiamna chu lehkha ah hian a awm vek. A ţhianpa nen a an intiam na ani a, a tupa nen inneihna tur a intiam na" ka mit sulh a, sawi tur leh ngaihtuah hmasak tur ber pawh ka hre lo. Ka nu chu ka bulah rawn insawn in min kuah a, mumang ang ruai a ni.

"Hetiang hmanlai thil, iti tawp thei alawm ka pa" ka nau ţawng pawh ka hre ruai ruai chauh tawh. Ka awm a tawt up up a, thaw hah tur ang mai ka ni.

"Ipu in lehkhaziak a a dah hi ka ti tawp theilo ang. A intiamna hi ka sut chuan ipu hmingchhiatna tur a ni. Emma a pawi ka ti" a ti chuai raih a, a indawmkun a, hetiang thil ka chunga a thleng hi ka pa chuan min lainat ve a ni.

"Tunge a pasal tur chu?" ti a ka nau in a zawh chuan ka beng hup mai ka duh. Ka pasal tur hming an sawi pawh ngaihthlak ka duh lo.

"Matthew. In thawhna Hospital rochun tu tur hi" ka pa ţawng chu zawi viau mahse ka hrechiang em em tho si. Pasal ka nei dawn anih pawn ani kher kher chu ka thlan loh tur zing a mi asin.

Ka ţhutna aţangin muangchangin ka tho a, hnial thei ka nilo a, hnial mah ila a sawt lo ang. Nunna neilo ang maiin ka kal a, in dap chawp takmeuh in a ni ka room pawh ka thlen hram. Khum a bawh thlawp pah in lukham ah ka hmai ka phum a, Mafela ka ngaihtuah chhuah phei chuan thim chhah deuhin a tuam mup mup ang vel ka ni.

"Hey tho la i neihduh lo tih zuk hrilh rawh" Ethan-a ţawngri ka hriat pawn ka awm ngai in ka la awm reng.

"Tho rawh ka tih chu. Pasal inei dawn lo tih zuk hrilh ta che" min phih tho lawp a, min thlah rual in khum ah bawk ka let leh hnawk. Zuanzang tak leh che zung zung chi ka ni a, tunah chuan tha ka nei lo. Ka chakna neih ve chhun ten reilote chhung in min chhuahsan vek.

"Emma hetiang chuan i duhlo chung in an hralh che a ni ringawt alawm. Hnial ve ta che" ka mit ka chhin rual in ka biang a lum pup a, ka mittui tla chu a tawp theih ka rin chuan loh vangin hruk ka tum lo. Tlaivar ţhak pawn hru ila ka hru hul lo ang. Ka phone ri rang rang ka hriat phei chuan ka mit ka chhing nghet lehzual, min rawn biak tum tu ka hrechiang lutuk.

"Mafela anih hi. I chhang dawn em?"

"Aih" ka ti thei ţawk. Ka aw a chher vek a, ka ţah aw ţuau bawk.

"Eng nge ka tih ang? Lehkha khu ka laksak anga ka halral vek mai dawn ami?"

 

"Aih" ka ti leh tawp. Ka pu leh ka pa ka ti mualpho thei lo. Fanu ţha ber nilo mah ila a sual ber nih ka duh lo.

"Muhil rawh. Naktuk ah an ţhulh thu an hrilh maithei che sin" min mut ţhat tir a, min dah ang ang in ka awm tawp. Puan min sintir a, light a off hnu ah "Muttui le Emma" sawi sap a atih hnu ah a thawm pawh a zawi tial tial a, ka bul hnai ah a awm tawh lo tih ka hriat veleh ka ţap hlawp hlawp a, a ri in ka ţawngtai a, chakna ka dil bak chu ka tan thildang ka dil belh lo, Mafelan a tawrhthiam theih nan ka dil a, chhel tak a a awm theih nan ka dil bawk.

Zing ka tho chu ka rit luk mai. Ka lu ana em em a, ka mit a kham ţhum bawk. Ka ţhuchhuak a, ka room chhung cheimawina leh thawmhnaw te ala ngai vek. Ka hahchawlhna ber ţhin ka room ngei ah lungchhe tak in ka ţap muhil ţhak a nih kha. Chetsawn nachang pawh hrelo in ka en ngai ka en tlawk tlawk ringawt. Ka phone ri pawh a hma ang tho in ka ngaihsak chuang lo. Mafela ka namnul nasat ber ţum a ni ngei ang. Hetianga ka tih vang hian misual tak ah ka in ngai a, mahse chutiang ngaihtuah duah thei pawh ka ni lo. Ka chawmawlh vek a, ka thi mek a ni. Chu chuan Mafela pawh a nghawng ve a nih hi.

"Emma inu leh pate hi i haw lo ang chu tiraw?" ka bula ka nu rawn ţhu mek chu ka lo en a, a hmel dâng lap te, a mit sen râm te, a aw dam diai te chuan min lainat zia a lantir. Ka pu duhthusam ang in sakeibaknei puk ah ka lut dawn a, hmanraw ţha tak tak in ven na tur fawmkhawm sawk sawk tur ka nih laiin ka nu hmangaihna aw nem tak chuan min ti ţap leh si a nih hi.

"Kan hrilh lawk lo che hi kan thiamloh a ni. Kan duhdan a ni biklo tih i hria Emma. Vawin ah hna ikal hlan in Mafela i hriatrengna tur thil ho hi ka lo dahbo dawn nia" ka kut a la a, dim te in a chul a, "Pawi ka tih thu sawibak chu hnem ngaihna che ka hrelo" a ti sap a, a ţawng tawp lam a khur a, ţah a hnaih ve tawh hle tho.

"Ţhian inkawmngeih tak an ni a, i pasal tur Matthew-a pu hi ipu hian a nunna a chhansak a ni awm e. Chumi rulh let na tur leh an tuchhuan zel thleng pawh a inzawmna an neih theih nan hetiang inremna atthlak tak hi an siam a" ka nu awm ah ka hmai ka phum a, duat takin min lo kuah a, "I nei anga, danglam nan hun iduh reilo ang. I pasal rawng chiah bawl iduh vat in ka ring. Pasal nei chunga ngaihzawng neih a thiang lo tih pawh i hriat ka ring. I pasal tur hi i lakah a hel anih pawh in ţhatna in i hneh thei tih i hrereng dawn nia" tia min hnemna chuan min tih zangkhai phah lo. Ka chawmawlh a ka thi mek ka tih tawh kha.

Hna ţhulh thei ka nih loh vangin ka insiam a, ka mitbui luk te chu tihreh theih a nilo. Matthew hmuh ka tum a, ani tal in a ţhulh ngam mahna. Ka insiam zawh ah darthlalang ah pawh ka in en lo, ka pawr viau in ka ring. Pawi ka tilo, nula ka nilo ţep tawh a, ka nulatna ka thlah dan tur a lungchhiatthlak bik zia hi min chik tu te chuan an hreve thiam maithei sin.

Ka hman ţhin taxi ka bia a, a rawnlan hun tur nghak in gate pawn ah ka lo ding a, in ah phone ka dah a, tunah tak chuan phone tello a awm rih ka duh. Mafela hming a lo lan chiah khan inthiamlohna in min tuam hlup hlup a, be tur in huaisenna ka nei rih si lo. Taxi a rawn thlen veleh ka ţhulut a, nurse ka nih hnu a hospital a kal ka huphurh ber ţum a ni awm e.

Hmundanga pengkawi lo in Matthew-a office ka pan ding nghal. Min lo lawm hauh lo ang tih ka chiang, hmuh ngei ka duh tho si. Kawngkhar ka kik a, lut tur a min sawm na ka hriat ringawt pawh in ka khur ti tih a, inti huaisen lui in a room ah chuan ka pen lut a, min hmu chu hmuhtheih khawp in a hmel a danglam chak a ni.

"Ka nupui tur hi hmuh vat ka lo in beisei hleinem" a ţawngkam chu a ngeiawm lek lek a, min tih el na awki pawh ka hriat hmaih lo.

"Ţha deuha sawipui tur che in ka lokal. Khawngaih in pangai deuhin sawidun ang" ka ti dam thluam a, a ngaipawimawh duh miah lo lehnghal.

"I sawitur sawi zung zung la min chhuahsan vat rawh" min sawm miah lo mahse a dawhkan hma a chair ah ka ţhu a, "I hnial thei angem?" tiin ka zawt a, min chhan mai loh vangin "Ka hnial ngam silo a, he inneihna hi kan duhlo ve ve tih ka hria, mipa zawk inia nang tal chuan i hnial ngam ang chu" mipa a intih ve na rilru cho chhuah ka tum tlat a ni.

"Ka theilo ti ta ila?"

"Tum rawh khawngaihin" ngen ngawl takin ka la ti tho. Ka taksa peng tin te hian a khawngaihna an ngen vek tawh.

"Nei tur che a tihluih ka ni. Keini pahnih hi bungrua ang maiin min nawrkual vel anih hi. Ka nei ang che, hremhmun tenau hi han chendun tak tak ila, hrereng rawh min nei rei chak hauh lo ang" a puak keh ve niin ka hria a, chu chuan min ti hrilhhai letling zawk. A thinrim zia chu a hmel dur khup leh a mitmeng thim ruih chuan a ti langchiang lehzual a, hrehtak chunga min neih a tum chhan hi hospital chan a duhloh vang chauh niin ka ngai bawk.

"Ka tihpalh a ni" ka ti sap a, ngaihdam ka dilna chhan hi keipawn ka hrelo. Ka hlauh em vang a nih ka ring.

"Ka hmangaih che beisei ngai suh" a ti sup a, ka bu nghat a, ani chuan hmeichhe pakhat chauh a hmangaih. Irene lo hmeichhe dangin a thinlungah hmun an chang ve theilo ang. Chutiang chiah chuan keipawn mi pakhat hmangaih ka nei ve bawk.

A office aţanga ka chhuah rual in ka thaw kawk a, ani pawh in a chhungte a hnial ngam lo anih chuan he inneihna hi a thleng ngei ang. Pathian hma a thu ka tiampui anih chuan ka ţhen thei tawh lo ang a, Pathian hma a ka intiamna chu ka sut thei tawh dawn hek lo. Ka pu kha la dam ni sela hetiang mi hi ka neih a phal kher angem? A mit ah khan min huatna bak engmah dang a lang lo. Min haw ngawih ngawih tu ka neih a ngai si. Ka neih rual in ka hmangaih em em, ka pasal tur a ka lo ngaih ţhin pawh ka thlah angai ngei dawn bawk a,ka hmangaih leh min hmangaihtu ka ti na dawn a, tun ah tak chuan dam zel ka va thlahlel lo em!

CONT...

 

FORCED MARRIAGE-2

"Vawin chu i diklo riau ania" min ti tu Debbie chu en ngam lo in thildang tih tur ka zawngkual a, a duh em em mipa ka nei dawn tih hi ka hrilh ngam rih lo nachungin kan inneihni a dinpui tur pawh ani lo chu ka nei chuang lo.

"Min chhang rawh. In in ţhen ami?" a ti leh a, ka la chhan loh cheu vang in min pawt lawp a, kan in hmachhan ran mai.

"Emma min hrilh la i thawl hawk maithei sin. Ka bulah chuan i thuruk a him tih i hriat kha" ngen ngawl taka a tih takah chuan ka ang zuau a, ka aw a chhuak thei chuang miah lo.

"I ţha em Emma?" min vawn na ka phih thla a rang takin washroom ka pan a, ngatinge thil a harsat tak em em? Ka mi rin ber ţhin bulah pawh ka in bunruak thei ta lo a nih hi.

"Lo hawng rawh, a chhan ka hriat hma chu ka beidawng dawn lo" a tih chu kawngkhar a chum ri nen a in pawlh nuk a, ka hawn hma loh chuan chum zel a tum a nih hmel. Hreh deuh chungin ka hawng a, a rawnluh veleh "Min ngaidam rawh" tiin ka lo kuah a.

"Ka va hrethiam lo ve. Ka pawi i sawi hleinem"

"Pasal ka nei dawn" ka aw chu a ri chang chang chauh.

"I awmdan en hi chuan Mafela neitur i ang miah lo" tlem a tawlhsan deuh hlek pahin ka dar ah a kut pahnih in a dawm a, kan inchen tawk em vangin kan inhmachhawn ran a, a mit a ka en ngam loh vangin ka kun tlat thung.

"Tunge i neih dawn?"

"Matthew" min thlah riai riai a, a inlakhran fel veleh ka ţhu hnawk a, tap aţanga tui far keuh keuh lo chu thawm dang a awm tawh lo.

"I sawifiah deuh thei em? Ka haw miah lo che. Hetianga thil thlen thut dan hi min hrilh rawh. Nimin ah pawh pangai deuhin ila awm kha. Matthew i neihna chhan tur hi eng nge?" ka bula a rawn ţhut ve chiah chuan ţi dek in ka lo en a, ka sawiţan hma in ka thawk ka la te te a, in ka thlen aţanga thilthleng zawng zawng chu harsa ti tak chungin kim biai tho si in ka hrilh a, ka ţhiannu chu ngaithlatu ţha tak ava ni em.

"Pathian chu hlau lo ila chuan nizan ah khan ka nunna hi ka ti tawp ngei ang" tiin ka thusawi ka ti tawp a.

"Ti rawh chhuak phawt ang. Damlo min mamawh an awm takin. Kan sawizawm leh dawn nia" a ding hmasa zawk ah ţangin min kaitho a, washroom aţanga kan chhuah hma in ka hmai ka phih a, damlo ho in ka ţap tih an lo hriat ka hlau a ni.

Kan let leh hnu ah pawh tih tur em em a awm chuan loh avangin Debbie chuan "Ka mipa duhber hi Pathian in itan alo ruat zawk a nih hi" a ti uang a. Nui zui hak hak mahse keimah ang bawk in a nuilui rei thei biklo.

 

"Karleh mai aţang chuan nula ini tawh dawn lo a, rinchhan tur pasal inei tawh dawn a, a mizia leh thildang, a ţhatna leh ţhatlohna pawh pawm vek turin i intiampui dawn a, thil awlsam ni dawn lo mahse pawmthiam izir dawn nia" a ti dap dap a, a awki ah a thutak zia a lang a, a mitmeng ah a tih tak tak zia a hriat bawk.

"Ţap tawh suh, i hmangaih ber nei dawn lo mahla i nulat tawp lam hi hlim deuh a hman tum rawh. Kan duh ang vek in kan awmthei lo. Rilru na ngawih ngawih a kan awm hi Pathian in a phal a, thil thalo kan chunga alo thlen changin kan bulah a awm tlat thung. Kan hlim lutuk vanga kan hriat miah loh a Pathian kan hlat chang hian kan chunga thuneitu a nihzia a rawn lantir ţhin anih hi. I bulah Pathian a awm reng a, zam mah ta che" a ti dam dap a.

A kut ka ban de de a, nui ver ver chungin amah zawk in ka kut a vuan leh a "Matthew chu a ţhat em hi. A mitmeng a nalh si, a khabe phir lai te hi in faten chhun se ka ti. A palian in a pian a nalh bawk si. Hetiang chu tunge duh lo ang? Keimah vangin hrehawm iti lehzual anih ka ring tlat. Ralkhat aţanga lo duhtu ve mai ka nia, ka ti tak tak hleinem. Min ring rawh, nuamlo tihna ka nei miah lo" zangkhai vah a a tih takah chuan ka hlauh pakhat a kiang a, hlauhna tam tak ka la nei tho.

Matthew ward ah a rawn luh chuan ka lo ip chawih a, ka ngaihbel nge a pawr ve fap tho mai. Debbie thawh a tum loh vangin keiman ka zui a, test tur a tih ho damlo awmpuitu te bulah ka lo hrilhfiah a, Debbie nen an inzui ţhin aiin kan rei zek mai, discharge ngai an lo awm nual bawk nen, duh angin a hmanhmawh theihloh a ni.

A zawh hnu ah kan dawhkan bulah rawn ţhu in thil a ziak mual mual a, ka lo enreng a, hetiang inneihna maksak taka hnuhluh kan ngai hi hrehawm ka ti. Ani pawh ka hrethiam, ka chungah thinrim mahse ka haw lo. A hmangaih Irene neih tumin duhthu a sam ve ţhin tho anga, a duhthusam leh beisei loh anga thil a thleng hi a tan pawh pawmthiam a har ve dawn em a ni. Ka enreng tih a hria nge a rawn hawichhuak a, min rawn en ve veleh ka hawisan vat. Ka en leh ngam tawh lo.

"Emma coffee ila peih em? Intih harh paha ikal peih chuan ka in chak deuh a" Debbie damdawi sem rawn let in a tih chuan "Peih e" tiin ka lo chhang a, pawisa min pek a tum a, ka neih thu hrilh in ward aţangin ka chhuak a, inkhung ringawt lo a kal harh chu ka mamawh ve lawm.

Dawr ka thlen rualin a nghaktu chuan "Iduh ka hria" alo ti nghal var a, nuih let pahin pawisa ka pe a, ka nghah chhung ringawt pawn ka rilru chu hmundang ah daih a awm leh tawh.

"Nula la naupang tak hian a ri hiatna a hlauh a rinawm si loh a" tawngri ai mah in ka taksa a rawn sawi chuan ka ngaihtuahna aţangin min harhchhuah tir zawk. Inthiamlo takin ka hawilet a, Matthew chuan coffe keng in min lo melh run lehnghal.

"Ka tihpalh ka ngaihtuahna ka lo kawm nasa deuh a" tih pahin ka laksak sawk sawk a.

"I ngaihtuahna a i ţhiante chu an hlim loh hmel"

"Tehreng mai. Chuchuan keipawh min ti lungngai ve a nih hi"

"Danglamna kan nei anih chu" a coffe tur a lakve keng chunga a kalsan chu ka tum reng vang nilo in ka zui. Kalkawng dang awm miau hek lo.

"Danglamna kan neih ka hrelo. Kan lungngaihna hi thil inang reng anih hi"

"I ngaihtuahna a i ţhiante vangin i lungngai a, keichu thil tak tak hian min ti lungngai in min ti thinrim, i hrethiam tawh em?" min entlang vek tum ni awm taka chiang in min en a, ka zam chhe lo chauh ţhin.

"Hetiang kan chunga thleng hi pawi ka ti. A awlsam zawk nan ţhian tal kan ni thei angem?" tiin ka sawm ta tawp. A hmui hnuailam a pet zauh a, a tih ţhan a ni. Hetianga a ti hi ka hmu zeuh zeuh.

"Hmelhriatloh anga awm ka thlang zawk e" a ti hmuk a, sawm zui ngam niin ka hrelo.

"Awle. Iduh ang chuan ni rawh se" ka ti sap a, nuamlo ka ti in ka zak hle. Chu chu hrethiam ni awm tak in "In hnaih lo ila kan pahnih tan a ţha zawk"

"I bialnu hi ţhen itum em?" ka zawhna atthlak tak chu a chhan duh pawh ka ring lo. Nupui nei chunga ngaihzawng neih reng pawi a tih leh tih loh ka hriatchian chak vang a zawt ka ni.

"Aih. Ka ţhen lo ang" nghet charh a a tih takah chuan ka lu ka bu zeuh a, ward lam ka pan a, rilru natna ka neilo hrim hrim, keipawn hmangaih ka nei a, Mafela ka ngaihtuah chhuah hian ka na em em zawk.

____________________________

In ka thlen chuan ka room ah ka lut tlang a, ka nu sawi ang ngei khan Mafela ka hriatrengna tur engkim a lo dahbo vek. Na ti viau mah ila ka nu chuan ka tana ţha tur a a rin a ti a, lunghnur thei ka nilo.

"Mafela mangang in min rawn bia a, engkim ka lo hrilh vek mai anih kha. Zanah a lokal dawn" ka nu chuan min zui tih reng reng ka lo hrelo.

"A tuarthiam lo em? Mafela chuan min dem lo ang tiraw? Rawnkal chu a hreh em? Min hua in i hria em? Nu" tiin ka lo zawt zung zung a, ka nu chu ka hnung ah ding in ka sam hnawk niai chu a chul a "A haw reng reng lo che. I hmangaih em a, chhan ţha tak awm lo chuan midang ineih a ring hauh lo ang. Zan in ah a thlah fel che anih pawn tawrh dan i thiam dawn nia. Pasal neitur ini a, nula anga mipa i kawm a rem tawh lo. I naupanlai aţangin hauh ngaiin i awm ngailo a, nunnem leh zaidam, hmangaihna ngah tak ini ţhin a, tunah pawh ila ni reng. Tun ah chuan i rilru itih paukhauh a hun ve tawh. I dan theih ni miah lo i chunga thil thleng hi chhel leh chak taka hmachhawn turin ka duh che" thupe aw tak ngaihthlak nuam tak siin min hrilh a, zawm thei ila ka ti khawp mai. Ka hmangaih ber kalsan mai hi thil awlsam a ni dawn silo.

A rawngbawl a laklawh vangin ka nu chuan min chhuahsan leh rih a, Mafela lokal hun tur ka ngaihtuah ringawt pawh in ka ipik ngawih ngawih, lo hmachhawn dan tur ka hrelo a, a bula lo dah ka duhlo, ka mittui hian a tih nat belh mai mai ka hlau a ni. Mafela hmuh hi ka hlau ngawih ngawih ang tih ka lo ring ngai lo.

"Emma thil i ei peih angem? Tlem tal eirawh aw" Ethan an min ngaihtuah em em hi chuan buaina ka tawk a ni ţhin. Naupanlai aţanga ţhian dang kawm miah lo a inkawm chho ngar ngar kan ni a, englai pawn min tibuaiin min tih thinrim dan a zawng a, buaina ka neih erawh chuan ka hma ah ka aiawh in ka ding ţhin. Min hmangaih lo amaw ka tih hial tur khawp a min chhaih buai chang pawn min hmangaihzia a lantir leh tho ţhin. Phir kan nih vangin kan in pawh lehzual in ka hre ve ţhin.

"Ka rawn ei ang. Kan inthlak phawt ang" ka ti a, ka rilru anat em vangin engmah ei ka chak lo a, ka ei loh chuan ka chhungte an mangang dawn si. Keimah angin an na ve vek a, keimah chiah ka in ngaihtuah thei bik tlat lo.

Door bell ri ka hriat rual in ka thin a phu dup dup a, ka nu leh pa ţhenawm ah an kal a, ka nau a room ah a awm bawk si vangin Mafela chu keimah chauh in ka hmachhawn a ngai a ni. Zan danga a lokal changa phur taka kawngka hawnsak ţhin si kha zan in chu kawngkhar ka hawn a a hmel ka hmuh rual in ka thaw a tawp dawn maw ka ti hial.

"Ka lo lut ang chu" a nui deuh a, tun ang hunah pawh ani chu ala nui thei tho a nih hi. Keichuan nikhat lek chhung khan nuihdan ka theihnghilh hman vek a sin. A rawn luhna tur ka lo kian a, kawngkhar ka kalh leh hnu ah living room ah kan inzui phei a.

A bulah pawh ţhu ngam lo in hmundang ah ka ţhu daih. Kan inhmuh tirh ang khan a hmelţha ka la ti reng a, ka hmangaih chhan tak hi chu a thinlung a thianghlim em vang zawk a ni.

"I hmel en chuan lawmpuina hlan chi ini lo tawp mai" a nui ri chu hla tak aţanga lochhuak ang maiin ka hria. In hnaih takah awm mah ila mu leh mal ka neilo. Thil thleng hian min ţhawng lutuk a, ngaihtuahna mumal pawh ka nei theilo.

"Ka hna aţang hian ka bang dawn a, hrilh che ka tum laiin i pasal neih tur thu inu hnen aţangin ka hria a"

"Keimah vanga ban tum ini lo ang tiraw?" tia ka zawh chuan a lu a thing vat a, "Nilo e. Ka putea puitur in Delhi ah hnathawh ka tum a, hlawh tam zawk chu ka um lo thei lo a, pasal inei dawn anih phei chuan kal ka hreh tawh lo. I pasal neih hma in ka kal ang. Hmanpui che duh viau mah ila keimah nilo in damchhung atana thu a tiampui lai che ka ngaithla ngam lo a ni" a ti hnual raih a, pawisa kan khawl anga kan la innei ngei ngei dawn nia kan ti dun ţhin kha ania, chung zawng zawng chu tun ah chuan a thamral vek tawh.

"Min ngaidam rawh. Ka tihnat che vangin min ngaidam la, i nupui ka nih theih loh vang leh ka thutiam ka bawhchhiat vangin min ngaidam rawh" ka ti mawlh mawlh a, ka khawngaih lutuk chu a hmel pawh ka en ngam lo.

"Hetianga kan inthlah hi ka lo ring ngai lo a, ka hmangaih reng ang che. Mahse in hmangaih te hi an tawp dan a hlimawm vek kher loh a, pasal i neih tawh chuan ka rawn tibuai tawh lo ang che. Zan in hi kan tawpna a ni tawh. Ka haw lo che a, ka dem lo che. I duhvang a thleng a nilo tih ka hria. I inthiamlohna kha dahbo la, i pasal chu hmangaih itum dawn nia" a awki dam tak chuan min ti thinur takzet. Min hau se, tenawm min ti se, min ankhum vak vak sela ka inthiamlohna hi a zia zawk ngei ang. Tunah chuan a zual tulh tulh a nih hi.

"Mafel ka hmangaih che" ţap ţuau a ka tih chuan a nui hak a, a nuih a za bik miah lo tih ka hrechiang. Boruak tih zangkhai tum in a tilui mai mai a ni. Ka bulah rawn insawn in min kuah a, amah ka sik rual chiah chuan ka insum theihna hlauh in ka ţap a, min kuah chuan ka thlamuang em em ţhin, tun ţum chu min kuah rual khan ka lungchhe takzet a ni.

"Hnial thei ila chu ka hnial ang. Ka nu leh paten thil min tih luih tir tawh chuan hnial chi ani silo a, kan nun ah an inrawlh ngailo a, zalenna min pe ţhin tih i hriat kha" ţap chung pawn ka la ti mawlh mawlh tho.

"Ka hria. Hmelma kan ni dawn chuang hleinem. In bunruah na tur iduh chuan min rawn be ţhin dawn nia, hna ka thawk anga, ka hlawhtlin hunah ka hrilh hmasaber ang che. Chu chuan ka huat loh zia che a lantir ngei ang" a ti dap dap a, ka hnung ah muangchang in a chul a, "Pasal nei mah ila ka hmangaih ber tho ang che" harsa ti tak chungin ka ti leh a.

"Min hmangaih lo turin ka ti dawn lo che. I pasal hmangaih tum turin ka duh bawk che. Keini pahnih chu a remtawh lo, ţhian angin min hmangaih tawh la, i pasal rawng chauh bawl rawh. Eng mi pawh nise i pasal ania, i ngaihsak phawt chuan a palzam rei hauh lo ang che. Mipa te hian ngaihsak nih hi nuam kan ti ve tho a, i tan a ţhat zawk nan harsa mahse ngaihsak rawh. I hlimna tur chiah ka duh ţhin a, tun ah pawh ala ngai reng. I pasal laka ţhat i chhuah chuan a hnu leh alo lang vat anga, hlim takin i awm thei ang" ka che hrut a, min kuahna aţangin ka talchhuak a.

"Awlsam deuhin awmdan tur min hrilh thei a, min hmangaih tak tak em? Ina ve tho em? Ka kal tur hi nui chung khan min thlah dawn ami?" tiin zawhna mawlmang tak tak ka zawt a, a hlim ka duh ber rual in ka pasal neiturin amah ah nghawng a neilo lutuk hian min ti thinur.

"Ka hmangaih che. Ka thih ni thleng in ka hmangaih ber ini reng ang. Mi thar anga ka thlarau a thawhleh hunah pawh ka hmangaih tho ang che. Kan thlarau chu tumahin an thunun tawh lo anga, intiamna lehkha vanga ţhen theih ani tawh lo bawk ang. Kan thlarau chu a awmdun reng thei tawh anga, chumi ngaihtuah chuan ka la nui thei anih hi. Kan khawvel nun tawp hun a ka tawn leh hun tur che ngaihtuahin pangai takin ka thlah thei che a nih hi. Ka na ve lo ah i ngai tiraw? Min sawisa se, chem in min vit se, tuna ka na ai hian a zia zawk tho in ka ring. Khawvel ah chuan ka nei ve thei tawh dawn lo che a, keimah vang tal pawn hlim taka awm tum rawh aw?" ngen ngawl taka a tih chuan ka hmai ka hup a, awrawl chhuah meuh in ka ţap a, ka tho a, ţap chungin ka veikual a, ka sam ah ka ţham a, ka dam thei hlawl lo. Dam a hnek in a zual zel zawk a nih hi. Chutianga ka awm chu Mafela chuan min pawtbet lui a, dim te in min nam ţhu leh a, ka hma ah a rawn ţhingţhi rawp.

"Ngaithla rawh Emma" ti chungin ka kut pahnih a vuan bet a, ka ţah nasat vanga ka mit thip vang vang te chu engahmah ka ngai lo.

"Hetianga hmuh che hi ka duh lo. Ipu leh inu leh pa ngaihtuah rawh. I pianhlim aţangin hmangaih takin an enkawl che. I duhzawng tihsak loh che an nei lo. Kal an zirtir che a, thil tlem te i sawi theih pawn an lawm em em. An duh ang tak pasal ineih phei chuan an lawm dawn asin" ka kut a vawn na thlah in chhuat ah a ţhu hnawk a, a ţawng lawk loh danah ţawngchhuah harsa a tih ve tawh zia a lang.

"Ka hmangaih che" ka ti leh sap a, keimah zawk in ka kuah a, min kuah let lo a, a zawi hnawk a ni ber.

A haw dawn ah pawn thlengin ka thlah a, a kal tawh hnu rawn tlan let leh in "A tawp nan" tiin min kuah a, ka naupanlai khan ka nautelem duh em em kha hetiang chiaha nghet hian ka kuah ve ţhin. Min kuah dan ah chuan min kaltir harsa a tihzia te, ata chauh ni tur a min duhzia te leh atana ka hlut zia te a lantir.

"Zan in chu arsi a lang lo reng reng. Kan hun tawp zan chu min hmanpui tur an nia sin le. Ka hmangaih hi harsa ti tak chungin ka thlah dawn tih te rawn hmu ve sela, ka thawk tawp thlengin ka hmangaih dawn ani tih ka sawite hi min hriatpui sela, zan in hian an reh vek mai sia, Emma ka hmangaih reng ang che" a in la hrang a, chelh hman rual a ni tawh lo. A kut ah tal vawn leh tum a ka ban pawn a thawi fua a, a kal liam nan pawh hun a duh rei lo.

Mafela awm lo chu ka ruak huai a, van lam ka thlir a, arsi a awm lo. Kan rilru na lutuk hi an hmungam lo a ni mahna. Ruahsur ala hun lo a, ruah mal lo dawngsawng turin tumah an la inpeih silo a, ka hmangaih lungchhe tak chunga ka thlah kha an hmuh chuan min ţahpui ve ngei dawn sia, ruah mal a tla lo thei dawn silo. Midang inring lo ţhawn thut duhlo in van mite chuan kan inthlah lai khan an kawng an khar ţhiap ni maiin ka hria.

Mafel min ngaidam rawh, ka hmangaih che.

____________________________

Vawin hi ka pasal neih ni a ni. Tupawh an thawmhnaw neih nalh ber ber nen hlim takin min lawmpui turin an lokal khawm a, a pasal neitur ber ka hlim ve silo. Ka nuilui hmel pawh midang tan chuan a hlauhawm maithei.

Pastor hma ah kan ding a, ka pasal tur chu doctor ţha tak leh mi hausa ni bawk nula te ngaihzawn rawn a ni. Ka pasal tur chu min haw em em tu a ni a, ka pasal tur chu harsa taka a hmangaih kalsan ve tho tu a ni.

Ka kut a vawn chuan ka hik chum chum a, ka chhungril khur chu pawnlam a a lanchhuah loh nan ka thunun hram hram.

Thu kan chham a, ka aw chu tihluihna in a ri chhuak chang chang chauh a, ka chevel ah pawh chuan phurna reng reng ka neilo tih he inneihna lo thlen dan hretu te chuan an hmuthiam ang.

Thu tlem te kan chham hnu ah nupa a puan kan ni. Pathian hma a thu ka chham khan ka rilru zawng zawng ka pe a, a nuam ah leh a hrehawm ah pawh ka pasal vuan tlat turin ka in tiam a, ka nunpui thei angem tih hrelo mah ila Pathian hma ah dawt ka sawitheilo tih ka chiang. Pathian hnen a ka thutiam hi ka bawhchhe thiang lo.

Zungbun ka bun a, nula ni tawh lo in mi nupui ka ni tawh. Ka nun ah keiaia dah pawimawh tur a awm tawh a, ka taksa leh ka thisen a ka inzawmpui tur ka pasal chu. Mihring mithmuh ah inzawm mah ila kan chhungril, kan thinlung a inzawm ve thei dawn lo silo.

Kohhran dan thianghlima ka pasal neih ni ah hian ka kawchhunga lungngaihna tam tam inchhek khawm chu a puahkeh loh nan ka in veng hram hram a, min lawmpuitu leh chibai min buk tute chu nuisang in ka lo chhâwn a, a der tih hrelo in anni lah an phur em em mai si.

Inneih a zo a, ka pasal nen a kan chen na hmun tur kan pan ding nghal a, min lawmpuitu ţhenkhat te pawn min la zui. Kan chen na tur chu pahnih tan chuan a lian mah mah a ni. Inneihna a lokal tam zawk chu an hausak zia hretu an nih vangin kan in tur an hmuh chuan mak ti hmel an pu lo a, an ri nak nak reng a, min ngaihven loh lai chuh in kan room tur a an sawi ah inthlak turin ka chhohsan. A lawmna pawimawh a zo tawh a, tunah chuan thawmhnaw pangai ka ha thei tawh ang.

"Lemchan i thiam khawp mai" nuih suk pahin a necktie a pawt thlawl a, a mitmeng thip tak chu a nupui tur ka ni tih a hriat aţang khan ala danglam lo.

"Nuih luih kha harsa ka tih ve zia i hrethiam kher lo ang"

"Engpawh nise hremhmun ah hian ka lo lawm a che" ka din na ah a rawnkal hnai a, a kut pahnih in bang a nem a, ka tang ran mai.

A rimtui hman manto tak chu ka lo hip a, hetiang a manto hi Mafela chuan a hmang ve ngai lo. Mi hausa ho hman ang leh thuam ang hi a nei ve ngai lo.

"Iva zam em em ve" a kutzung ţangin ka hmai a chhui thla riai riai a, ka hnungzang pawh ka zam vanga ka thlan chuan a bual hneh tawh hle.

"Ipu leh ka pu intiamna an ruala phum bo vek theih hi engvanga rawn tharthawh nge in nih? Ka thil neih eng nge duh in neih?" a aw a chang fak a, a hmel ka en ngam lo.

"Ka-ka hre..lo" ka ti bah nawk a, ka aw a khur nasa in hlauh vanga ka ţah a chhuah bawk vangin ka hmui hnuailam pawh a khur der der thei hial.

"Ka thilneih nge keimah hi iduh? I ţhiannu nen a min en nasat ţhin zia ka hai lo. Tun ah min nei ta a, i lawm em?" bang a chum pawp a, ka zuang zawk lo chauh a ni. A hlimna a chhiat chhan hi keimah vang a ni pakhat ve a, ka pu khan a ţhianpa kha thutiam lo siampui lo se chuan kan nun hi tluang takin kan hmang ve mai tur.

"Emma...Oh ka tihpalh" Debbie aw kan hriat veleh ka kawng ah kuah in amah si chet in min bawm bet a,Debbie lah a thil hmuh in a ţhawn em vangin kawngkhar bulah ka hau in a ding zum zat reng bawk. Matthew chuan a tih ţhin dan in a hmui hnuailam a pet sawi zauh chungin Debbie din na lam a hawi a "Ka nupui mawina chauh ka lo hmu a, mikhual kan la nei tih ka lo hrelo a ni" a ti sup a, min thlah rual in ka thaw hawk a, "Midang an awm chhung chu ka kalsan rih ang che, ka insum thei ţhin silo" a kal dawn a min nuihzat hmel kha ka lo hmu hman hram. Min huat em vangin infiamna ang lekah min hman a tum a nih hi.

"Emma engemaw sawidun lawk ang" khum piaha ţhutna kan dah a pan a, keipawn hnial miah lo in ka zui ve. Kan ţhut rualin ka kut a vuan a, ka mit ah pawh en ngam lo in a hawikual ruai a, thil ţhalo dang ka hmachhawn leh dawn em ni?

"I pasal awmdan khan min ţhawng lutuk a, nidang ang chu nise ka ţe teng tung maithei, tunah chuan ka rilru hi thildang in a bawhbuai a" a chawl det a, harsa ti tak in vawihnih vawithum lai a thaw kawk kawk a, "Emma he thu hi hrilh hun che anih leh nih loh ka hrelo" a ţap ti tih tawh a, min ti mangang takzet a ni.

"Tuna min hrilh theihloh pawh in i sawitheih hun ka nghak thei alawm"

"Nilo i hriat angai" ati vat a, boruak a hip leh vang vang a, a ţawngchhuah leh chiah chuan ka mit sulh a, ka zawi hnawk bawk.

"Mafela a room ah thi in an chhar"

*I ţha em Emma?" min sawi nawk nawk a, ka mit ka chhing riai riai a, hetiang em em hi chu kei mi dawrawm leh chaklo tak hian ka tuarzo dawn em ni?

CONT...

FORCED MARRIAGE-3

"Emma engemaw tal sawi rawh" mangang taka tichung in min sawi nawk nawk a, ka taksa hi thil rit tak in a delh ang mai a ni. A phone ri rang rang ka hria a, tunge a biak leh eng nge a sawi pawh ka hrethei lo. Ka dang a ro vek a, ka tha a zawi em em bawk.

"Mafela te in a kal ka ngai a, ka rawn be dawn che nia, ngaihven tur che in i pasal ka lo hrilh ang" a ti zung zung a, ka chhang thei chuang lo. Engvanga thi nge? In bunruah ka duh chang pawh a ngaithlatu nih a in tiam a, min hmangaih reng tur thu a sawi bawk a, ngatinge min kalsan leh si? Ka awmna chu a vir muai muai a, ka mittui a rawn hnam leh a, a thim zui vek a.

Ka harh leh meuh chuan ka awm na a thim vek a, hlauthawng takin ka ţhuchhuak a, ka indap kual ruai bawk. Ka awmna hmun ka dapkual a, table lamp ka dahfuh veleh ka hmet eng a, khum ah puansin thlap in ka lo awm. Ka hawikual ruai ruai a, chutah chiah chuan thil tak tak chuan na takin min rawn vaw leh a, Mafela he khawvel ah hian a awm ve tawh lo tih bawk chu.

Hmachhawn dan ka thiam lo a, ka beisei loh lutuk in pasal ka nei a, ka pasal neihni ah Mafela boral thu ka hre leh bawk. Ka puansin lai nghet taka ţham in ka hmui ka pet a, mit ka chhin rual in ka biang ah thil lum tak a luang leh ngiai ngiai a, nitin ka ţap a, ka mittui hi a tawp thei lo.

Kawngkhar a ri rak a, ka lam pan a ke pen thawm a awm a, a tawp rual in ka awmna bul a hniam sut a, tuemaw chu ka bulah an rawn ţhu ve ngei a ni.

"Emma eng nge thleng a?" a aw ri ka hriat chuan ka meng kawk a, ka chhungril hi a khur nghal a ni ber.

Min rawn hnaih zel a, kan hmai a insi lo chauh tawh. Kan inlen hleih em vangin min hliah hneh viau in ka ring.

"Mafela a thi a" aw khur hlak hlak in ka ti a, a hming ka sawi ringawt pawn natna hlir in ka awm a rawn hnawh leh a, a hmel danglam lo dan ah Mafela chu a hrelo a, a thihna chuan a nghawng ve lem lo tih a hriat. An hospital a rinawm taka thawk ţhin chu engtin nge a hriat loh theih zawk?

"Ţhutthleng ah nikhawhrelo a i awm ka rawn hmu che a" a ti sup a, a tawlhsawn deuh tawh bawk a ka khup tun in a chungah ka khabe ka nghat a, ka chevel chu alo enreng tih ka hria, chu chuan min ti zam hle bawk.

"Ka hmangaih thi ta ka sun anih kha. Keipawh hi thi ve ila ka ti sin" engvanga sawichhuak nge ka nih ka hrelo a, khawi aţangin nge huaisenna ka neih pawh ka ngaihtuah lo. Ka awmdan hrilhfiah ila min kalsan vat se ka duh ber.

"I hmangaih i sun maw?" a tawng zawih lutuk vangin ka hrethei lo lek lek a ni.

"Aw" ka ti tawi tak a, thildang chu min zawt leh pawh nise ka sawi tawh kher lo ang. Amah chiah hi a hmangaih chan anilo tih hre ve hrim hrim se ka duh. Kei phei chuan kumkhua atan ka chan hlen dawn lehnghal. Ani chuan nitin ala hmuthei, keichuan a sulhnu bak ka hmu leh tawh dawn lo.

"Kuah tur che in min duh em?" a ban pahnih a dahkau a, ka lo en reng ringawt vang chuan a aw a thian kharh a, "Ka sawi awmzia chu zan in chauh iduh chuan min kuah thei ang" mak ka tih vangin chet nachang ka la hre chuang lo. Hetianga a zam hi ka la hmu ngai lo a, hetianga awka dam hian min la be ngai lo.

"I duh chuan lokal rawh, a nat zia ka hria, hun ka hawng rei dawn lo" a ti leh hmuk tawh. A dawhthei tehchiam lo a ni.

Ka hlauhna leh zamna dah bo in a ţhutna lamah ka tawlh hrut hrut a, ka chet muan em vangin amah zawk chuan min rawn kuah a, zan in atan chauh a ni ang. Naktuk ah chuan midang ta a ni leh tawh anga, a hming chauh in ka pasal a ni leh tawh ang.

Ka thlakhlelh vanga kuah ka nilo. Ka pasal neih zan anih vangin Mafela bulah ka awm thei lo a, a ruang takngial pawh ka hmuthei lo. Keimaha tawrh ngawt ngawt ai chuan rinchhan tur ka duh. Matthew hian tuar ve lem lo mahse tunah chuan ka ţhian ah ka ngai a, ka lungngaih ber zan ah hian a amah ngheng in ka awm a, min tawrhpui a in huam ta sa sa, ka kuah chawt mai a nih hi.

Mafela, ka hmu leh ngai dawn tawh lo. A hlim hmel leh aw dam tak ţhin te kha, ka hmuchak in ka la hrechak em em si a. Matthew hian hetianga a tihchhan hi ka hrelo, khawngaihna tlem te a nei ve anih loh pawh in a hmangaih a chan ve tho vangin rilru hahdam nan a kuah tur a duh ve pawh a ni maithei e.

"I duhchuan ikal ve thei ang" ka rin loh lutuk a a tih tak ah chuan ka che hrut a, thawh ka tum uaih a, ka ţhulh leh ta zawk. Ka hmuh chuan ka mualpho ngei ang. Milar tak pasal ah ka nei a, mi sawi ka kai vat ngei ang.

"Ka kallo ang" ka ti sap a, nun na nei tawh lo tih hriat taka a mu bam tur te ka ngaihtuah a, ka lainat ngawih ngawih. Ka tello a khawvel hmachhawn huam lo tur si chu ngatinge min chelh mai loh? Ngatinge hmun hla takah min tlanbopui loh? Buaina chinfel dan te kha min zawnpui tur a nia sin. Chhel tak anga awm in ka pasal laka awmdan tur te min hrilh a, keichuan inti pachang tur pawn ka hrilh lo a, hnathar a thawh tur ah khan duhsakna pawh ka hlan lo. Keimah chiah ka in ngaihtuah, ka lungngaihna chiah kha ka ngaihtuah a, Mafela hma hun tur kha ka lo rel pui ve lo.

Ka thaw ri hrawk a, ka ţahchhuak lutuk insum chu a harsa ve em bawk a, thawm ka chhuah lo thei lo. Matthew hian engangin nge min ngaih ang ka hrelo. Mafela tan chuan mualpho pawh ka huam mai a niang chu. In sum nasa hle mah ila ka ţapchhuak ta tho mai. Ka mittui hi Mafela aia phu an awm chuang lo. Ka thaw a chham mai dawn in ka hria a, boruak ka hip kawk kawk a, ka ţap tawp thei silo.

Matthew chuan ka hnung ah dim tak in a beng det det a, a chul leh zeuh ţhin a, chutianga a ti chuan ka thaw a ti pangai a, min hrethiam ni a ka hriat vang in insum miah lo in ka ţap a. A thawmhnaw te chu ka mittui chuan a chiah huh hneh viau in ka ring. Min hnem tur leh ka lusun min awmpui tur a a inpe hi a inchhir maithei, mahse zankhat lek chu hnemtu leh ka hnen a awm tur ka mamawh em a ni.

_____________________________________________

Ka hmai nizung in a rawn chhun rual in ka harh a, ka ţap muhil a ni ngei ang. Ka ţhutchhuah rualin ka lu na lutuk chu ka dawm vang vang a, ka mit thip hlur chuan men a ti harsa bawk. Ka bulah Matthew a awm tawh lo a, zana ka mutthilh lai pawh ka hrelo. Zankhat chiah ka lungngaihna a nasat em vangin min awmpui turin a in pe a, ka mutthilh tak hnu ah min chhuahsan a nih hmel. Zan khat a inpekna pawh kha a ropui khawp mai.

Ka phone rikna lam ka chhui a, ka mutna bul lawk ah a lo awm. Zanah kha chuan a awmna pawh ka hrelo kha ania. Debbie a nih vangin rang tak in ka la a, ani tal in Mafela hun tawp zan ah a awmpui ka beisei.

"Emma i tho nuam em?" a rawn ti a, a aw aţang pawn a chauh zia a lang.

"Tlang deuha ka sawi dawn anih chuan, tunah chuan engmah nuam a awm lo" ka lo ti a, ni sa ţha viau mahse ka khawvel hi a thim ruih tho.

"Ka rawn lam ang che. Mafela i vuiliam ve ang chu. Vui zawh ah duty turin kan kal tlang dawn nia, lo intifai a, lo insiam rawh" a rawn ti zung zung a, ka chhan hma in a ti tawp nghal bawk.

Mafela thlah ve ngei ka duh vangin ka tho harh a, mutna ka tihfel hnu ah bathroom ah inbual turin ka lut a, tui a ka inchiah chuan ka taksa a dam sawng sawng a, tui chuan ka chhungril natna a tleuhfai thei chuang lo. Muangchan chi a nih loh vangin ka ti zung zung a, bathroom aţanga ka chhuah hnu ah kal mai thei turin ka insiam nghal.

Darthlalang hma a ka ţhu chiah chu keipawh ka in hai lek lek. Ka hmui a ro rep a, ka mitkhur a thuk in a hnuai a dum kual raih a, ka vun a lang da lap bawk. Pasal ka nei dawn tih ka hriat aţang khan ţah loh ni ka nei ngailo a, ka landan danglam ta viau pawh chu a mak lo e.

In hnuai a ka chhuk veleh nu valai tak hian min lo chiau au vat a, choka ah min zui lut in "Matthew chu akal tawh a, i muttui maw?" zangkhai vah in alo ti zung zung a, an awmpui a nih ka ring.

"Tehreng mai" ka ti liam satliah a, chair pawtchhuak in ka ţhu chawt a, dawhkan ah ka kiu nghat in ka lu na tak chu ka dawm leh a, "Iva nawm loh hmel ve. I rawn tho duh kher anih kha. Eitur chu ka rawn pe thei tho che a" ngaihthalo tak chunga a tih leh tak ah chuan nui lui chungin ka ţhat thu ka hrilh a, ka hma a eitur tuihnai tak tak rawn chhawp pah in a ti ti siam siam a, a thilsawi ka hremiah lo thung.

Tui viau mahse tlem te bak ka ei chuang lo. Ka lem lui thei ngang lo. Chu chuan an awmpui Pi Sangi chu a ti ngaihthalo lehzual a, min enliam rih turin ka hrilh. Tumah ka be chak lo a, thil ei chakna pawh ka nei chuang lo. Engmah in tuina a nei lo ang bawkin ţawngkam ţha tinreng pawn ka lungngaihna hi an hnem zo kher lo ang.

Door bell a rik veleh Pi Sangi bawk chu kei aia che hmasa zawk ah a ţang a, kawngkhar a hawn rual in "Emma a tho tawh em?" tih ri in a zui nghal zat. Pi Sangi chuan engtin nge a chhan ka hrezui lo a, ka hriat leh chu ka bula ka ţhiannu rawn ţhu chu a ni leh tawp mai.

"I inpeih sa vek tawh bawk a, kal nghal mai ang" tih pah in min kaitho a, ani hi chu chau viau mahse a che zung zung thei zel. Tihluihna hmanga pasal neih tir anih ve loh vang leh a hmangaih ber in a kalsan hlen ve loh vang a ni mahna.

Kan in kawt a a car in hung ah ka ţhulut a, a rawn luh ve hnu reilote ah car ti nung in a tawlh riai riai a, tukverh glass ah ka chal ti si in pawnlam ka melh run bawk.

"I awmdan tur ka hrethiam a, chutih rualin hetianga hmuh che hi nuam lo ka ti khawp mai" ka kut a rawn hmer zawk a, a khalh chhunzawm leh a.

"A thihchhan min hrilh miah lo a, rin chu ka nei. A hrisel ţha a, a damlo ngailo tluk a ni. Debbie a intihlum tiraw?" a chhan na nghak in ka kut ka hum ruh a, nghet takin ka hmui ka ti chip bawk.

"Ka rin aiin i tuarchhel daih a"

"Khawngaihin min hrilh rawh"

"OD" rapthlak ti tak in ka hmui ka hup a, ruihhlo a khawih ngai lo. Vawikhat pawh ala tichhin eih ngai lo.

"Lalpa leh! Keimah vang tiraw?" ti chungin ka ţhiannu ka en a, ka mittui a hnai leh tawh. Nasa takin ţap mah ila ka tawrh hi ana em a, tumah in min dem ka ring lo.

"Nilo e. Nangmah vang a nilo. Khawvel a awm reng ai chuan pialral a lo nghah che a thlang a ni mai. Inthiamlo duh suh"

"Heng thil zawng zawng ka chunga thleng tur hian eng thil sual nge ka tih? Pathian pawi ka khawih a mi?" zawhna ka zawt na a ka phun sep sep chauh.

"Tupawn thilsual kan ti vek. Sual na neilo kan awm lo. Chutih rual chuan thilsual ti lo ber pawl inih ka ring. Emna Pathian hian kan tawrh zawh loh tur natna min pe ngai lo. Ka sawi tawh kha, i bulah a awm a, be rawh. Ţawngkai la a puihna dil rawh. I mamawh hun apianga pui tur che in a intiam a, i koh a, puihna idil phawt chuan lawm takin a pui ang che"

"Keichuan Pathian tan a nun hman nan hun ka la nei, Mafela thlarau hi a him angem ka hrelo" ka ti zo chu lungchhe taka insut ri in a zui a, keimah nilo in Debbie zawk a ni. Ka thil sawi chu alo ngaihtuah ve a ni maithei.

"Mafela thlarau chunga zahngai tur pawn kan dil thei alawm" a ţah vang in a aw a chhum bung nasa a, kan in be zui ta lo.

Mafela te in kan thlen chuan mi an lo tam tawh. In ven nan ka lu ka tuam a, Debbie chuan min kaiin inchhung ah min luhpui a, mi tam tak kar ah kan inzep lui a, ka hmu ta.

Ka lu khuhna muffler hmawr lam chuan ka hmui hup in ka mittui a dir zung zung a, an muttir na bul lawk ah ka ţhu a, chet nachang pawh hre lo in ţap chungin ka en ngawt ngawt. Min kuah chungin Debbie ka bulah ţhu lo phei se la chuan ka let tawp thei hial in ka ring.

A hmui a duk vek a, a vun a dang lap a, a mit chu nghet takin a chhing a, a hmel erawh ala ţha reng. Vawikhat tal rawn meng leh sela, a tan ka ţap a ni tih min rawn hmu sela, a bulah ka awm tih hrebawk sela a thlamuang deuh tur.

A kut dahchhuak in a hmai vawt thler chu ka chul a,hetianga ka hmuh che hi ka ring lo a sin. Min ti na takzet a ni. I thih dawn khan eng rilru nge i put ang? Min ngai em em dawn tih ka hria. Ka pasal neih ni pawh khan ka ngaihtuah reng che ka ti rilru mawlh mawlh a, ka ţawngchhuak ngam silo. Mafela chu thlarau khawvel ah a awm ve tawh a, ka chhungril a hmu tlang vek tawh anga, ka hmangaih zia hria in ka thilsawi ruk pawh chu a hrethei ngei ang.

Kha zan kha, min rawn thlah zan kha. Pangai taka rawnkal in a nui lui a, min kalsan dawn meuh chuan harsa a ti em em a nih kha. Tihluihna hmangin pasal ka nei dawn tih a hriat khan engtin nge a awm ang? Ka nu hnen aţangin a hre lehnghal. Hrehawm tam tak a tuar ve anga, a chhungril pawh a rum vawng vawng ang. Chuti chung chuan chhel takin a awmlui zel a nih kha. Mafel ngatinge pachang taka i awm tlang mai loh? Damchhunga inthiamlo taka awm reng turin min duh em ni?

Kha zan khan a thutiam hriatpui tur a arsi an lo lan loh vang khan a lunghnur em em a, tunah chuan ani pawh arsi a ni ve tawh anga, zantin mawi tak in a eng ve tawh ang. Kha zan kha ka hmuh tawp ber zan a ni dawn tih hria ila chuan ka thlah lo anga, a haw tur pawh kha ka umzui lawng lawng mai tur. Hetiang ti duh hial khawpa i na anih chuan ngatinge min hrilh mai loh?

Darkar a liam zung zung a, tunah chuan kuang ah dah in an phum bo a hun ta. A tawp nan a hmai ah chuan chul in aw rawl chhuah meuh in ka ţap a, amah uitu a ngah vei nen a ngaihtuah chiang lo a ni. Phum bo mai tur chuan ala uihawm lutuk a sin.

A kuang an dah rem a, mitamtak in thla an lakpui lai chu ka en a, a ţhianten an lakpui lai chu ka en ngam lo. A hlim ber ţhin kha an zing ah a ding ve thei tawh silo. A ţhiante pawh an ngui nghiai hlawm a, tupawn min hel a, min kalpel ringawt pawh in huat hmel tak in min melh a, a chhungte pawn min be lo a, a unaute, min ngaina em em ţhin tu te pawn hmelhriatloh angin min en a, tumah ka dem lo. Ka phu hliah hliah, an unaupa thattu melh a min melh pawh in ka haw chuang lo. Keimah lo chu dem tur ka awm lo a, keimah ngei pawh hi ka in haw ngawih ngawih.

Thlanmuala ka kal ve Debbie in a phallo a, keipawh ka kal duh lo. Thlankhur thuk taka an dah hnu a leia an vur hnan tur chu ka hmu ngam lo. Tunah chuan lei dai ah, amah chauhin a mu tawh dawn lo. A kuang an phurh liam thleng in ka en a, tuna zuitu ho hian tlai lamah chuan an rawn hawsan vek anga, zanah amah chauhin thlanmual reh tak ah a awm tawh dawn chu a ni sia, ka va lainat tak em.

Lalpa khawvel hrehawm a tih em vangin, a tan a i hunruat pawh nghak hman lo in amah ngeiin a nun la in hahchawlh na a rawn zawng a, i kianga chawlh hahdam vat a chak tawh a ni. Khawngaih in lo pawm la, lo kuangkuah rawh.

Ka rilru in ka ţawngţai mawlh mawlh reng a, a hahdam loh ka hlau em a ni.

Debbie in hospital a let a duh tawh vangin car dahna lamah kan kal a, ka nghet lo em em a, tlu maithei reng ka nih vangin min kuah bet tlat a, car kan thlen hma chiah in tuemaw hian ka banrek ah rawn man in min phih lawp a, ka hawichhuak chu Mafela ni alo ni reng a.

"I sum duh vangin i phatsan a, hetiang hi anih phah a, ka haw lutuk che tenawmnu. Tuna i pasal hian Mafel an a pek theihloh zawng zawng a pe vek thei ang che mahse Mafel an a hmangaihna che aia nasa hian a hmangaih ngailo ang che. I pasal pawisa hmangin inchei la, nuam chu chen mawlh rawh" a ti nghal buan buan a, min duat theih nen hetianga min ankhum duh anih chuan a sawi ang khan min haw viau a ni ngei ang.

"Min ngaidam rawh" ka ti sap a, ka duhvang a nih bik lohzia hrilh chak viau mah ila awmzia a nei tawh dawn chuang lo.

"Pasal atan mi hausa bawk iduh leh dawn tho si anih chuan ngatinge Mafela kha i zuikual reng? Lo inhre lo tawp ula kan bulah a la awm ve tur. Kan mithmuh ah vawikhatmah rawn inlan tawh suh. I pasal sum hmanga min rawn puih te ilo tum ange, ka ti mualpho rap duh ang che. Kal la rawn let leh tawh ngai suh" ka banrek a vawn na chu na takin a paih dawrh a, a in her zui nghal. Hetiang hi ka la hmachhawn dawn chauh. Tupawn engtinpawn min ti se lo tawrh tawp mai loh chu tih theih ka nei lo.

_______________________________________________

HOspital gate ah kan tlanlut a, Debbie in min hnem mawlh mawlh reng a, a thusawi chu tlem te chauh ka hria. Ka rilru in ka ţawngţai reng a, chakna ka dil, ka mamawh em a ni. Garage ah car a dah rual in ka chhuk a, harsa viau mahse damlo te tan ka hlim luih a ngai leh tawh. Damlo awm rei tawh ţhenkhat chuan an harsatna te min hrilh ve ţhin a, a hma chuan ka lo ngaithla liam mai mai ţhin. Tunah chuan ka sawipui anga, a êng lam zawng hlir ka thlirpui tawh ang. Mafela ang khan tumah an liam ve ka duh tawh lo a, ka hmungam tawh lo.

Ka inthlak fel hnu ah tihtur a awm chuang lo bawk a Debbie bulah coffee lak ka tum thu ka sawi a, keimaha ka kal alo remti ve mai bawk. Ka chhungril a hnawhtu ka neih hi chuan coffee ka in ţhin a, min chhawk lo mahse tihţhan ah ka nei tawh a, ka lam leh nge nge ţhin.

Dawr hma ah ka ding a, dawr lo nghak tu Nunziri chuan lainat hmel takin min lo en ve a, kan hospital zawng zawng in he dawr hi kan in ţawm a, Mafela nen pawh kan kal dun ziah a, kan inkawp tih a hriatchian em vangin a thi chu min lo tawrhpui ve ah ka ngai. Amah hi â phuang chi a ni a,thawktute leh damlo awmpuitu tlangnel deuh hlek tawh te chuan fiam ber a an neih a ni. A ţhen in an bawl a, a ţhen in nau anga chei in an fiam a, he dawr hi chu a reh ngai vak lo.

"Coffee min lo pe"

"Ka hria lawm. Ka pe dawn che. Mafela chu i ngai em?"

"Sawi rih lo teh ang" ka ti hrawk a, ţi dek in min en. Tunah chuan sawingai ka ti tawh rih lo. Kan sawi apiangin ka rilru a hrehawm thar leh ţhin.

"Coffee kha min lo tihkep rawh" Matthew-a ţawngri ka hriat chuan ka phu zawk thei hial. Ka lam rawn hawi in "Coffee kha rawnkeng la in be lawk teh ang" a ti hmuk a, dawr piah a thutna awm a pan nghal vut bawk.

"Hepa han nelawm loh dan em em hi. A neitu pawh nise rawnkal ve ziah lo se ka ti. A pa hrak lehnghal a,a landan leh a mizia hi a inrem hlawl lo" tih mawlh mawlh pah in Nunziri chuan a ngei zia lantir nan a hmui a tisawi kual a, Matthew ţhutna lam ka lo melh vung vung ringawt.

"Kha coffee chu la rawh. Nelawm loh viau mahse a man a pek kep che a, a free in i in thei anih kha"

"Awle" tih pahin coffee pahnih chu chawi in Matthew chu ka pan a.

"Kha la rawh" ka tih veleh a rawn ban a, a bula ka ţhut chuan ka zam leh em em tawh. Zana thil thleng kha hrelo ang hmak in a awm a, min kuah laia amah kha a ni leh tawh lo. Min haw tak ang khan a awm leh tawh.

"Vawin a i chet danah ka chhungte an lungawi lo" a ti hmuk a, ka inthup ve nasa viau sia, mi hian an tana ţangkai lo tur an va sawipeih ţhin tak em.

"Mawilo taka chet ka neih ka hrelo" ka ti ve ngat a, an fapa hi ka duhvanga ka neih a ni lo a, ka hmangaih ber huntawp ka hmanpui chu sawisel thei an ni in ka hrelo.

"Kal tur a phalna ka pek che khan a ruang bula ţhu a ţap turin ka ti lo che. Zana i ţah kha a tawk viau lo mi? Ral aţangin thlir liam mai ta che. Mitthi i hmu ziah te i enliam ţhin ang khan ti ta che. Hmangaih viau mahla mitthi a nih tawh kha" dawr bul ah chuan awm lo ila a au vak vak in ka ring. Kan awmna hmun in a zir loh miau vangin a ţawngring ngam lo a, a thinrim zia erawh ka hria. A ţawngkam mal te te chuan min ti na a, vuak chawrh chawrh ang mai ka ni. A tan chuan mitthi satliah a ni a, ka tan chuan a ni ve tlat lo.

"Ngaihdam ka dil theilo che. Ka awmdan ah khan diklo ka hrelo" ka ti ve tlat. Mafela telna chu nilo se tlawm zawk ah ţangin thupha ka chawi anga, Mafela thlahna a nih miau vang in ţul hawt lo ah ngaihdam ka dil lo ang. Mafela tana ka tih theih hnuhnung ber a nih kha.

"I pasal neih tukah mitthi ruang bulah i ţap a, i zaklo anih pawn kan chhungkaw hming iti hliau thei tih hre ta che" ala ti leh zel. Min en run a, doctor coat var a hak leh a mitmeng thim ruih chu a in chawih lo kher mai.

"Irene hi thi ve se kei ai nasa hian i thlah ngei ang" a hmel ka enchian rualin ka thilsawi chu ka inchhir nghal. Min that mai dawn amaw ka ti hman hial.

"Irene chungchang hi sawi ve tawh suh. Intihlum lo turin a fing tawk" ka hmai bul set ah rawn kun in a nui suk a, min hmuhsit zia a lang. Kei chauh ni lo in Mafela thleng in a nuihzat niin ka hria. Hospital a thawk hi ania, a thihchhan pawh a hre daih tawh ang. Staff ţhenkhat pawh a vui naah chuan ka hmuh nual kha.

"Khawngaihin Mafela chungchang sawi tawh suh. A liam tawh a, a thlarau tal chu zah ila ka duh" ka tawngkam a nem a, ani pawn a huat ka ring lem lo.

"Tun chin ah chuan fimkhur tawh ang che. Ka nu leh pa ten he inneihna hi ka chungah an thlentir thei anih chuan tih theih loh annei dawn lo tih i hriat a ţha. Hmun tin ah mit leh beng an nei" a kal mai dawn amaw ka tih laiin ala ţhu reng tho. Keimah zawk ka kal hmasak a ngai dawn anih hi. A bulah hian ka awmduh tawh lo.

"Ka kal hmasa ange" hawihhawm taka ka tih hnu ah ka ţhutna sir a coffee ka dah ka chawikang a, "I chhungte pawisawi tawh lo ka lo tum dawn nia" ka tih hnu ah "I duh chuan ti nawn leh rawh. Kan inţhen phah tak hlauh chuan a lawmawm khawp ang" a hmuhloh ah ka ner suk a, chhanglet tawh lo in ka kalsan a.

Min haw em em reng ang hian a awm a, ka bulah chuan thinlung nei ve lo ang maiin a awm a, mahse Mafela thihzan khan hriatchhuah ka nei a, ka ngaih ang em em a vawt chu a nilo. A thinlung tlem te hi chuan lum na ala nei ve. Nilo se amah kuah in ka ţap muhil thei hauh lo ang. Hetianga a awmchhan hi keimah vang a ni ve tho. A hmangaih tak chu nei se a duat viau in ka ring a ni.

Ka let leh lamah ka duty na ward a ka kal dawn in step ah Irene nen kan intawk a, a sam sei tak ţhin kha alo tan tawi mat a, hmeichhe rilru na chuan an sam an tan ţhin an lo tih ţhin kha ka hrechhuak. Ni e, a rilru ana ngei ang. A pasal tur a alo rin in nupui dang a nei ta si a.

Ka kalna tur ah ding in ngeiawm tak in a nui a, ka coffee kenlai chu la in bawlhhlawh bawm ah a vawm lut. A dai vek tawh tho a, pawi ka ti hran lo. Ka in peih tawh dawn chuang lo a Debbie ka pe ang ka lo tia.

"Matthew nen a in khata chendun chu eng nge a an? Hausakna um a mi pasal tur chhuhsak chu eng nge a an?" a ti chang fak a, a nelawm na ţhin zawng zawng kha a bo vek tawh. A nui hmel ringawt pawh damlo te tan damna tham kan lo tih ţhin kha a awm tawh lo.

"I ţhawngthei ta lo em ni? Pawisa engzat nge i mamawh? Min dil mai ta che"

"I hresual anih kha. Pawisa vanga ti ka nilo" a nui hak a, a mitmeng ling bat bat pawh ka hmuh hmaih lo.

"Pawisa vang nilo se nangmah hmangaih miah lo tu hi inei lo ang. Ka hlimna zawng zawng min tihchhiatsak vek tih hre rawh. Ka haw lutuk che. Rukru, midang ta tur chhuhsak ching ka hua che" a tih tuarh hnu ah ka biang a thip zawk a, ka mittui a tla sawk bawk. Min ben leh a tum a, ka mit chhing in ka lo dawh tawp. Na ka hriat mai loh vangin ka meng a, Irene chu a manrek ah ka unaupa Ethan an alo manbet a.

"Engthil nge ti ni a i inhriat a?" ka nau chuan a ti hrawk a, midang in kan thawm an hriat hlau in a ţawngring lo.

"Min thlah nghal rawh. Rukruk pawizia ka zirtir anih hi"

"Ka unaunu hian engthil mah a ru lo. Nangmah vanga a ţap ka hmuh leh chuan i rin aiin ka hlauhawm thei ang tih hria ang che" a tih hnu ah a manbehna chu na takin a paih sawk a, Irene pawh a kat dawrh thei hial.

"Enchhin ila, i hlauhawm poh leh i unaunu, i thisen ngei hi ana ve zel ang"

"Chu chu hnehna chang lo tu zawk sawi awm tawk vel anih chu. Dr Irene i hmelţhat nen i thinlung a kha hle mai"

"Ka junior, ka lawm em em ţhin kha ka do a ngai a ang khawp mai. Tunah chuan tlawm zawk angin ka kal phawt ange" a kal pah in na tak in min su a, ka vir nawk a, ka nau in min vuan hman lo phei sela chuan step ah ka lum ngei ang.

"Emma dawihi ila ni reng anih hi. I hmel pawh ala chhia. Ehe...i ţap ami? I ţah phei chuan i hmelchhe lehzual" ka ţap nasa zual sauh a, step ah chuan balh pawh hlau lo in ka ţhu a, Ethan chu ka hmaah rawn ding in "Ka kuah dawn che nge khanu kha tunah ka that law law anga ka phum bo daih dawn? I sawi ang apiang ka ti ang. Emma a ţah tawh lohna tur anih chuan jail ah pawh ka tang mai ang. I pasal neitur ka dang theilo che a, nu leh pa ti na theilo mah ila midang chu tihnat theihloh ka nei lo i pasal ngei pawh. Le, ka tihtur chu min hrilh rawh le" thinrim taka a tih chuan ţap chung bawk in "Min kuah rawh" ka ti ţuak a. Nui hak chunga rawn ţhuhniam in min kuah a, ka nau hian eng pawi mah a khawih ka remti lo.

"I ţah laia i hmelchhiat zia hrereng in i ţap lui tlat a, bang tawh rawh ka vel che maw an ti ang" ka dar ah a khabe a nghat a, min sawichhiatna ţawngkam te chu a rilru na thupna mai mai a ni tih kei hian ka hrechiang. A coat var hak chu ka mittui hruk nan ka hmang a, ka nui zui hak a "A su tu ten hmeichhia ka vel amaw an ti ngei ngei ang. Irene khan a tihbuai leh che chuan min hrilh dawn nia, i tan eng nge ka nih kha?"

"Superman" a nui hak hak a, keipawh chutiang tho chu. Ka biang ah a kut pahnih in a dawm a, a hmet tel bawk nen ka hmui pawh a kawh put mai.

"Tunah chuan varak ah i chang leh tawh. Varak an ţap ngailo a, an in ngaihtuah vak vak ngailo bawk a, nangpawh tunah chuan varak ini leh tawh a, ţap tawh lo la, in ngaihtuah vak vak tawh suh. Kan chunga thil lo thleng tam tak hi chu kan thunun theih a nilo" ka biang a dawm na a thlah a, ama biang dawm in a hmui a ti zum ve thung a, "Keipawh varak ka nih hi. Emma inkawm ang, ţap tawh lo ang" a tih chuan ka lo nui ver ver a, min tibuai reng ţhin mahse in khata awmdun leh ka van chak tak em.

Thil ri rak ka hriatna lam ka envat a, hmanhmawh taka Matthew kal hlawk hlawk ka hmu hman. Min lo enreng a ni thei angem? Irene chungchang kan sawi lai kha chuan tumah an awm lo tih ka chiang. A hriat pawi tur ber a hriat loh phawt te chuan ka ti liam ta vel mai mai.

Ka duty zawh ah kan in lama haw tawh lo in ka pasal nen a kan chen na hmun ka pan ta zawk a, ka ban hun chiah ah ward ah mi pakhat rawn lut in a driver ka nih thu leh ka pasal in min hruai tur a a tirh thu a rawn sawi a, haw na tur dang ka neih chuan loh vangin ka zui ve mai.

Gate bul kan thlen veleh gate lianpui chu a rawn in hawng a, ka chuan na motor chu a tawlh lut riai riai a, ka ngaihdan ala ngai reng, mi pahnih chauh chen nan chuan a lian mah mah a ni.

In chhung ka luh rualin Pi Sangin min lo be siam siam a, eitur a siam vek tawh thu alo sawi a, "Ka intifai anga ka rawn chhuk dawn nia" ka ti ţha ve mai. Room a kal tur a step a ka chho te chu ka in ham tang ţawng ţawng a ni ber. Mu zawi lo in ka inbual sawk sawk a, thawmhnaw fai sar ka hak hnu ah inhnuai ah ka chhuk a, thil eifel vat a mut vat ka duh ber, ka chau lutuk.

"Pi Sang min lo zawm ve la"

"Ka la eichak lo a" tiin min chhang mahse ka sawm lui tho. Chhungkua a ei ho ţhang kan nia, keimah chiah a ei chu nuam ka tilo.

"Matthew te bula i awmna a rei tawh em?" tiin ka zawt chawt a, chhan harsa a ti em lo ang chu.

"Aw an naupanlai aţangin. Zanah ka riak lo a, nakin deuh ah ka haw ang" a ti a, a ei ve duhloh chhan ka hre chiah. An in ah zawk a ei ţhin a ni ngei ang.

"Emma i pasal hi a rilru a chhe miah lo ania aw" a ti a, ka sawizui pui lem lo. Mafela bawk hi ka rilru ah a rawn lang leh ţhin.

Thil keh ri chhuai ka hriat chuan ka harh kawk a, ka chauh deuh vangin ka mu kha ka lo muhil nghal ni ngei tur a ni. Ka phut nasat em vangin ka awm dawm in thawm ka ngaithla leh vang vang a, thil keh ri bawk ka hre leh a, chumi hnu ah bungrua ni awm tak a ri leh rum rum.

Matthew hi insualpui a nei amanle ti rilru chungin ka tho a, ka hlauh vang in ka khup te chu a zawi vek a, ka kalţha thei lo. Ngam leh ngam lo in room kawngkhar ka hawng a, ka bih dek dek a, in chunglam ţhutkhawmna velah chuan tumah ka hmu lo.

Ţul miah lo ah ka kawrhma pawt khawm in inhnuai lam ah ka chhuk a, step chanve vel ka thlen a ka zuk en chiah chu ka rin aiin a nasa daih.

Sofa a let rem rum a, living room cheimawina atana vase in hung thleh thluah te pawh a keh phung a, a keh them tereuh te te chu hmun tin ah a darh a, pheikhawk bun lo phei chuan kal ngam na chi a nilo. TV erawh a him hram a, a lai taka glass dawhkan awm te chu a keh darh hneh lutuk, a sir a a thil tihchhiat vel en run chungin Matthew a ding bawk.

Ka tlan thla hlawk hlawk a, a thil tihchhiat en chuan hliam engemaw tak a nei ngei ang. A mitmeng thip tak chuan min thah mai pawh a hrehlo tih a lantir a, a thinurna a sosang hle tih ka hria a, pawisa duh vanga ka nei ah a ngai leh tawh a ni maithei.

"Han mu rawh ka lo tifai ang"

"Ngawi hmak rawh" a ti tuarh a, ka lo ip chawih a, doctor ţha tak hetianga a awm ve ka lo ring ngai lo.

Ka banrek ah min pawt lawp a, amah ka sik rualin ka darah a vuan a, bang ka sik rat thleng in min nem a, kan in lenleih bawk nen talchhuah ngaihna a awm lo.

"Ka nun iti chhe vek" ka rin ang chiah. A nun tichhe tu ah leh a pawisa chiah duh ah min ngai tlat alawm. Zu rim a nam a, a awmdan ah a rui hle tih a hriat. Rui viau chunga heti taka nasa a inchhung a suasam thei hi thil mak tak a ni.

"Ka hmangaih lo che" a ti sup a, thinrim viau mahse a ţawngzawi viau lawi si.

"Ka hria. Min hmangaih lo tih ka hria"

"Ka ţanpui che a" atih hnu ah ka sam darh nuaih huisawn in ka beng ah a zep a, "Ka nun tichhe tu hi amah khan lo ţahtir mai mai tur ka nia" a ti nuah nuah a, a ţawng dan ah pawh a ruih zia a hriat lutuk.

"Min hua anih pawn khawngaih in inchhung bungrua tichhe tawh suh" ka hlauh lutuk vangin nghet tawk a ka mit chhing chung in ka sawi.

A nui hak ri ah ka meng a, ka hma ah a ding run tawh lo. A ban lehlam in bang a nemchhan a, a dintheih nan bang chu a rinchhan takmeuh tawh. A thil tih chhiat ho a enkual hnu ah "I tawrh ai an tuar a nih saw" a ti sup.

"Engmaw i tawrh tir a?"

"Haw viau che mah ila hmeichhia kut ka thlak theilo. I laka ka thinrimna thildang ah ka hrithla a, lawmthu min hrilh ta che" ati leh a, a ruih em em pawn ţawngkam nem tak a hmang thei chuang lo a nih hi.

"A reh tawh hi. Ka thinrim zualpui a reh a, ka kuah leh tawh che hi" tih pah in a kut awl lam in ka kawng ah a kuah a, min haw tho si in kut min thlak thei lo a, kan inchhung bungrua in a tuar ta zawk a, a thlen fo loh ka beisei. Ka beisei aiin a thinurna sosang a tilang chhuak hma. Mafela ka sun nasat zia pawh a hria a, kar khat tal chu keimaha min awmtir ve tur ania sin.

"Hliam inei em?"

"Aw" tih pahin a inla hrang a, bang nghenga ding chungin a awm a khawih a, a sawitum ka hrethiam a, zawh zui loh ka thlang zawk.

"Nangmah vang anih hi" a aw ah chuan thinrimna a tel leh tawh a, min huat avanga thildang a khawih chhiat leh hma in hreh deuh chung in ka kuah a, "In chung ah chho ang. Heng ho hi chu zing ah ka tifai tawh mai ang" ka ti ta ringawt a, a zawi tial tial amaw tih tur a ni.

Harsa takin inchung ah ka chhohpui a, mak tak maiin ka tihdan ang ang chu hnial a neilo. Hnial thei pawh a nilo, amahin a in buaipui rei thei hauh lo ang. Hetiang ni chung hian min huat avangin bungrua khati khan a suasam thei a, a tihlan aia nasa daihin min lo hua a nih dawn hi.

Ka room kalpel in a hma zana a mutna ni a ka rin ah ka luhpui a, ka ring sual lo. Khum kan thlen rual in a mu thlawp a, a jacket vel hlihsak tur a khawih ka tum a, a duh miah lo.

"Muttui" tiin ka thlah a, light ka off sak hnu a ka chhuah dawn ah Irene hming a lam ri ka hria a, ka nat leh nat loh nghak in ka ding tawi a, ka na lo. A lam nawn leh pawh in ka na chuang lo. Ka hmangaih lo a, duhna pawh ka neilo tih ka in hrechiang lehzual.

Tihluihna, kan pute inremna vang mai mai a innei kan nia, kan in hmangaih ngai lo ang.

CONT...

FORCED MARRIAGE-4

Matthew nen kan inneih aţangin vawin hi a thla khat na chiah a ni. Mafela thih ni anih vang in he ni hi ka hrechiang lehzual. Ka hmangaih em em leh min hmangaih tu in kumkhua atan a min kalbosan ni leh min haw em em tu in a ta ni tawh tur a zungbun min bun tir ni kha. He ni hi ka tan chuan ni ţhalo ber leh ka ţah hnem ber ni a ni.

Inchhung bungrua a sawisak vak aţang khan Matthew nen chuan in hrengai lo ang maiin kan awm leh tawh. Kan awmpuite hmuh ah pawh a thup chuang lo. Zan a a thiltih kha hrelo ang hmak in a awm a, hospital a kan inhmuh chang chuan a mawi ah kan in be ve. Pawnlam mite hmuh ah nupa kan ni a, chhunglam ah kan in pawh lo em em tho si.

Matthew a inlak hran tlat vang hian Mafela ka ngai lehzual a, a chhungten min hmuhfuh ka hlauh vangin a thlan ah pawh ka kal ngam lo. Heti hian keima room ah keimahin ka sun a, tun thleng in ka mittui hi ala hul tak tak lo. Khawvelah hian la awm ve sela chuan beisei tur ka la nei ve anga, hlimna chhan tur ka la nei ve tur. Mafela khan ka pasal hi hmangaih turin min ti a, hetianga in la hrang tlat leh in a awm chang pawh a a room a inkhung bo reng, ka ruala thil ei duh bawk silo chu ka hmangaih ngawt thei lo. Mafela ka hmangaih ang khan tumah ka hmangaih thei tawh in ka ring lo.

Zan a ni tawh a, Pi Sangi pawh in min hawsan tawh. Khua a nawm loh em vangin boruak a vawt a, tih tur dang a awm miau loh vangin ka inbualfai hnu ah nightgown ka ha a, mut pah in ka phone ka en a.

Mafela nen a kan inbiakna ţhin ka chhiar kual a, inhnialna thu ka hmu lo. A dinhmun hria in a tlawm em em a, a thinrim pawh ka la hrelo. A bula awm tam apiangin a fel zia an sawi tam a, amah hretu phawt hi chuan an ngaina em em vek. Ka lo hmangaih pawh kha a awm hliah hliah, lalnu ang maiin min en a, ka hlimna chiah a duh ţhin a, hmeichhia ka nihna a zahthiam bawk. Kan inhriat tirh lai hun a let leh kha ka chak zek zek. Hetiang hi hrelawk ila chuan ţhian chiah ka nihpui anga, ka ngaihzawn na kha ka thup tlat anga, tunah pawh khawvel ah ala awm ve tur.

Motor ke chik tuarh ri ka hriat chuan ka phu zawk a, Matthew a ni tawh ngei ang. Sana ka en a, dar11 alo ni reng tawh. Ka ngaihtuahna kawm in ka mengrei leh viau tawh mai. Zan a rei tawh vang in a thawm pawh a na in hriat a awl bik.

Parda ka pawt kau a, tukverh ah dak in kawtzawl ka thlir a, a lai tak ah a car chu a ding ngei. Dahţhat pawh a tum loh hi chuan a rui a ni ţhin. A rawn ruih haw pawh hian ka ngaihsak ngai lem lo a, amah hian a nun ka tihchhiat vek thu min hrilh ţhin a, zingah min mikhual en leh tho ţhin.

Car aţanga a rawn chhuak chu a pai chhat chhat a, ka ringsual lo e. Zandang aia a rui a ka hriat vangin puih ka duh a, chetsawn ka tum veleh hmeichhe rawnchhuak ve ka hmuzui a, hrilh nawn ngailo in Irene a ni tih ka hria. An pahnih a hmuhdun kher hi nuam ka ti lo. Ka rilru ana hauh lo. Mafela ka la ngai a, anni pahnih mai mai hian ka rilru an ti na lo. Chutiang a ni chung chuan ka hmuhdun hian nuam tih lohna ka nei. Ka sawithiam chiah lo, mi min hmuhdan tur ka ngaihtuah vang a ni maithei. A bialnu hlui ni ah an ngai a, ka pasal in a bialnu hlui a awmpui reng chuan a nupui hi min nuihzat phah ka hlau a ni ber ang.

Door bell a ri char char a, in neitu ber a rawn haw dawn tho a door bell hmeh a ţulna ka hrelo. An rawn lut ve mai ang tiin ka ngaihsak duh lo. A reh tak vang vang ah chuan an rawn lut ta anih ka ring. Ka mu leh dawn chiah tih in a ri leh a, duhlo mah ila ka hmuh tho an ngai dawn a nih hi.

Hmanhmawh takin step ah ka tlan thla hlawk hlawk a, an rawn hmeh rik leh hma a hawn thuai thuai a mutsan lehnghal mai ka duh. Kawngkhar in kalh miah lo ka hmuh phei chuan ka thinrim hlur mai. Min runluih duh vang anih chuan an tisual ang. Ka hmuh laiin infawp bawrh bawrh mahse ka na dawn miah lo.

Ka hawn veleh Irene nen an rawn lut a, Irene chuan min nuihsawh deuh chung in "I pasal in ka hnen a awm ala thlang tlat hi amak hran love. Kaihthawh nan che doorbell ka hmet anih kha. Room in in ţawm chuang lo bawk a, a room a ka awm rih chu a pawi em lo ang tiraw" a ti zat zat a, min dil pawh a nilo, a tih tur min hrilh mai a ni. Matthew chuan engmah a sawilo a, sawitur pawn ka beisei lo. Ka rin ang em em a ruichhia a ni lo a, a bialnu thusawi hrethiam lo tur khawp a chhia leh tha hriat na bo thak khawp a rui a ni lo bawk a, ka hriatpuina a awmdun an duh tihna a ni mai.

"Ka awm rei lo ang. Lo la meng rawh. Kawngkhar i kalh leh te angai dawn a sin" min ti leh a, tlawm inti viau mah ila ka beisei sa a ni. Room lam chhohna step a an inzui chho chu en in ka thaw hawk a, ka tihziah dan in ka nat leh nat loh ngaichang in ka awm ka dawm a, ka chhan na hmuh pawh ala ngai. Ka na lo.

Living room ah awm in tv ka en a, ka hmetkual thuak thuak reng a, en chak pawh ka neilo. Ka rilru chu in chunglam ah daih a awm a, ka in khawngaihin ka chhungte ka ngai hle. Mafela ka ngai lehzual. Hetianga ka awm hi min lo thlir reng awm sia, ka pasal hi hmangaih tur in min la duhtho angem?

Irene rawn chhuk thla chuan step tawp a thlen rual in "Ka bialpa hi a hmingchhiat ka hlau sia ka riahchilh lo mai ange. A hmingin a nupui ini bawk a, a mut ţhat leh ţhat loh min lo ngaihven sak mai dawn nia" a rawn ti leh kher a, ţawngduah lo in kal se mifel tak ang khan ka hmu leh thei tur. Mi huat hi ţhalo ti viau mah ila a ţawngkam vang hian ka lo haw leh ţhin.

"Ngaihtuah suh. Ka lo ngaihven sak ang che" ka ti sup a, ka hmuhphak loh ah awm vat se ka duh. A duh na ah chuan tih hreh nei miah lo ang in ka ngai tawh a, ka hnial ngai thil a sawi anga, a thinrim in kut min thlak leh mai ang tih te ka hlau a ni.

"Keichu ni ila min hmangaih lo tu nen a chendun ai chuan thutiam tawhsa tih puitlin sak loh zawk ka thlang fo ang" a tih chuan ka remote kenlai ka hum ngawt ngawt a, kan inneih dan hi a sawichhuah fo loh a ţha zawk ang. Hriat nawn reng hi ka tan thil nuam a nilo a, ka hmangaih ka chan phah a, mangchhia ang mai a ni.

"Mangtha Irene" ka aw a chang fak a, Irene pawn min chhuahsan ve ta. Kawngkhar a khar veleh rang takin ka kalh a, theihnghilh nei a a rawn let leh mawlh ka hlau. A tello pawh in kan inchhung hi a hrehawm tawk tawh a, a rawn tel ve phei chuan hremhmun tak tak ang a ni tawh ang. Matthew sawi kha a dik, ka damlai reng pawh in hremhmun ah ka awm a, pasala ka neih vang hian nitin harsatna ka tawk a, hrehawm ka ti bawk. Min neirei chak hauhlo ang a ti bawk tak e, kan inneih ni aţang la la khan ţhen lehnghal kha ka duh a sin. Pathian hma ah meuh thu tiampui lo ila chuan Mafela mitthi mai mai a tih khan mualpho huam in ka chhuahsan daih tawh ang. Hremhmun ah chuan ka inbarh lut tawh a, a sa hrehawm zawng zawng hi ka tuardai ţhak ang. Mafela a liam tawh. Beisei tur ka nei tawh chuang lo.

Ka room kalpel in Matthew awmna lam ka pan a, kawngkhar pawt hawng in ka bih dek dek a, a muhil tawh niin ka hria. Light ala in on vek a, Irene khan ngaihven tur a min duh vangin light pawh a off duhlo a ni ngei ang. A khum bulah ţhu in a muhil lai hmel ka en a, a mutthilh hi chuan misual tak pawh a ang lo. A mitmeng min huat na a khat ţhin te pawh a mutthilh hi chuan hmuh tur a awm lo va, a hnarngul sang vah, Debbie in nalh a tih ţhin em em pawh a mutthilh lai chuan ka hmu nalh ve. A harhchian a min haw em em chunga bung deuh deuh a min biak hi chuan a engmah hi ka hmu nalh lo. Ka hlau a, ka zam in ka ţi dek ţhin a, a nalh lai leh ţha lai ka lo hmu tawh ţhin lo. Hmu thei pawn min siam lo a ni zawk. A theih chhung chu min hel a tum a ni ber.

A rawn che hrut a, ka phu nasa lutuk chu ka kat dawrh thei hial. Ka tum loh deuh in a mutna bula table lamp ka vai thla lehnghal, vanneihthlak takin a chhe lo a, vanduaithlak tak in ka ti harh thung.

A mulai chu rawn in bengkang in min en run a, ka hmulthi te hi a ding vek in ka hria. A nun ka tihchhiat thu bak ka ngaihthlak leh chuan ka ring lo.

"Eng nge i rawn tih?" a ti bung hmuk a, kun ngul chung in "I mutţhat leh ţhat loh ka lo en, Irene khan lo thlithlai tur che in min chah a" ka ti sep sep a, naupang hlauh nei nen kan danglam na ka hrelo.

"Min rawn ngaihven bawk a damdawi min lo lak rawh" a ti leh sup a, eng damdawi ber nge a mamawh ka hriat loh vangin ka la chesawn chuang lo. Mut zangthal leh pah in a chal a dawm a, "Na ti leh tur si te chu in loh mai tur ania" ka ti sep a, a hrephak ngei pawn ka ring, a lu ana viau aniang min chhanglet ta lo.

A room a a thildah vel ka hriatchian loh vangin ka room lamah zawk ka let a, na tih hmel taka a chal a dawm lai kha ka hmu a, lu na damdawi a mamawh anih ka ring. Irene a riak ve mai mai lo kha pawi ka ti ta khawp mai. Ka mihring hlauh tak ka buaipui a ngai a, riak sela chuan ka room ah ka khum ah ngei hian tui tak in ka muhil tawh ngei awm sia.

A room kawngkhar ka pawt hawng leh a, damdawi mum pakhat ka keng bawk. He room a luh hi ka chak em em ngai lo. Khum bul ah ding in ka ban ka pharchhuak a, "Kha ei rawh" ka ti mawl tawp a, amah pawh ka en hran lo.

"Tui tello in maw?" a tih tak vangin ka bottle ken lai khum ah ka thehthla a, ka thil thehthlak chuan a tlak maithei. Ka damdawi mum kenlai a rawn ban a kan taksa a insik rual chuan a sat zia ka hrechiah.

Harhchhuak thut ni awm takin ka che phat. A tho tur chu ka dawm a, a chal ka khawihsak zui nghal bawk.

"I khuasik in ka hria" hlauthawng taka ka tih laiin ka kut alo beng per a, "Ka hria" a tih nghut hnu ah ka damdawi pek a ei a, lawmthu min hrilh mawi ve te ka lo ring ania, a tum leh hmuk tawh. Ka lo beisei sang leh lutuk ţhin a nih ka ring.

"Mamawh ineih chuan min rawn hrilh mai dawn nia" ka la ti thei tho. Mafela thih aţang khan tupawh hi an thih ve ka hlau vek tawh. Ka nu a hritlan pawn ka phili nasa anih kha. Thil ho te a an ngaih pawh ka hmu ho ve thei tawh lo. Matthew pawh hian min mamawh miah lo chungin a rilru na a bo beisei a a rui chu ka buaipui leh ta zel a nih hi. Min mamawh em em tu Mafela erawh ka buaipui hman ta lo a, ka inchhir na leh inthiamlohna hi a reh leh tawh lovang.

Ka chhuahsan dawn ah a mutna lam ka thlek leh zawk a, ka hmuh hlima a mut ang chiah khan alo mu leh tawh. Tun ah chuan a muhil tawh lo a, min hmuh a duh loh vanga a mit chu chhing mai mai a nih ka ring. Kawngkhar ka nem hawng a, ka chhuah veleh ka thaw lo khawl khawm tawh zawng zawng kha ka thaw chhuak hawk. A bula ka awm khan ka thaw dep dep ngam chauh a ni. A khawsik lai pawn min mamawh lo in ka bulah a awm duh chuang lo a, min hel reng pawh hi a awm lo lem lo. A tan chuan mangchhia ka ni ringawt.

Ka khum ka thlen rual chuan ka hahdam huai a, dar12 a pel tawh. Mutthilh vat ka tum loh chuan Debbie in zawhna a ngah leh dawn emai. Ka harh laklawh vangin ka muhil thei lawk lo, ka let ka let a, a chang leh phone ka en a, awmzia a awm chuang lo. Dar1 rik hma in ka thawmhnaw hak tur pawh ka dahchhuak fel thlap tawh. Kan in awmna hi a fal in thawm a reh hma a, zanrei ah phei chuan a khawharthlak zual. Hetiang a ka vawikhat awmna hi a ni lo a, ka muttheih loh hi chuan ka nu ka ngai ngawih ngawih ţhin.

Ka harh veleh ka zimar al al a, khawvar dawn hnaih ah ka muhil ve thei chauh a, rit luk in ka ţhuchhuak. Mu tlai mah ila ka harh hun pangai ah ka harh ziah tho. Ka murei ngai lo. Ka nu khan a phallo ţhin a, naupanlai aţanga tho hma ţhang ka nih vangin ngai ah ka nei tawh.

Parda ka pawt kau a, khua a dur khup a, rual a tla cherh cherh bawk a, hnakal tur a chhuah pawh a huphurhawm. Khum bet a kan na anih loh chuan ţhulh mai mai theih a ni ve si lo. Tukverh chu tlem in ka pawtkau a, thlifim rawn lut chuan min chhem harh sawng sawng thei hial. Ka lu rit bur pawh a zia ta deuh e. Ka ban ka dahchhuak a, ruahsur changa ka tihziah dan a ni. Naupangchhia viau mahse nuam ka la ti tlat. Ka mitthla ah Mafela a rawn lang zawk a, ka nui hmel a ral riai riai a, thil rit takin min tlak ang mai ka ni leh tawh.

Ruah a sur sia, a thlan kha ruah in a nan ngei anga, ruah do hreh lutuk ţhin mi alo ni kher bawk nen. Ka hlauh ruk ang ngeiin ruah a tam tulh tulh a, thlan a kal duhna in min tur a, a chhungte hmuh thut ka hlauhna bawk chuan min dang leh a. Matthew-a nu leh pate beng a thlen leh ka hlau bawk. Tunah chuan a thlan ah pawh ka kal ngam ta lo. Zalen taka kan inhmuh theih hunlai kha ka ngai vawng vawng. A thih hnu ah lem a ruang bula ka awm pawn a ti lawm lo a ni mai sia, Matthew khan khawi hmun ah pawh mit leh beng an nei a ti tawh a, thlanmual ah pawh kal ila khawen lai chuan an lo hriat leh tho ka hlauh vangin rual a sur zel a nih chuan zan lama kal tum in ka rilru ka siam ta zawk a.

Ka rilţam loh em vangin inhnuai ah ka la chhuk lo. Matthew pawh a kal leh daih tawh in ka ring. Ka chung ah ţhat chhuah ngailo mahse damlo te tan a in pe zo em em thung. Ka inbual zawh hnu ah muangchang in ka insiam a, hun ka la ngah tho a ka hmanhmawh duh lem lo. Thawmhnaw ka hak hnu ah darthlalang hma ah ţhu in ka sam sei tak chu ka khuih a, makeup ka hmang ngai lem lo. Hman ve chak na ka neih ţhin lai pawh khan Mafela khan a phal ngai lova, khata ţang kha chuan tum chhin na pawh ka nei leh ta lo. Kan inneih ni khan min cheitu te khan danglam vek khawp in min hnawih mawi ve a, kha pawh kha ka mittui tho in a tlengfai a nih kha.

"Inhnawhpuar hmasa lo a kal itum em ni?" Pi Sangin alo tih chuan buk nghut pah in "Ka ril a ţam lo em a, ka ţhiannu nen kan eidun mai ang chu ka lo tia" ka ti ţha ve mai. Kan in ngaina ve viau tawh a, fanu ang tak tak hian min en ţhin in ka hria.

"A ţha alawm. Nidang ah chuan chak lo chung pawn eiluih tum ţhin tawh rawh. Anih loh chuan ka thil siam i eichak lo hrim hrim ah ka ngai tawh ang" nui vur vur chungin a ti leh a, keipawn a thilsiam tui ka tihzia leh ka eiţhin tawh tur thu ka hrilh a, a lawm ngang mai.

Nihliap hum ran chungin kawngkhar ka hawng a, rin aiin a sur tam zek lehnghal. Ka hma zawn ah ka hman tur bik a an tih car a rawn a rawn ding a, huh ka hlauh em vang in ka luh dawn lek chhung pawn nihliap ka khum ta tho. Ka ţhutluh hnu ah ka ti thlep a, ka khar zui zat bawk.

"Ruah a sur nasa sia vawin chu traffic a jam nasa maithei"

"A pawilo ka kal hma tho a, ka tlai lo ang" ka tih takah chuan driver chu a rilru a nuam huaiin ka ring. Thla khat zen zawn kan in hruai tawh a, kan in nel tawh in kan ti ti bawrh bawrh thei tawh a, Matthew-a nu driver ni char char ţhin a ni. Motor tam na deuh chin kan thlen veleh a jam ţan chu a ni mai. Tupawh hmanhmawh takin an insul pel zut zut a, an nihliap ken chuan tu tan pawh chet a ti harsa tih a lang reng. Footpath chu a te mah mah deuh a ni. Ruahsur vanga tih tur ţhulh ngawt theih a nilo bawk nen, ke a kal chu a ninawm duh ngawt in ka ring.

Ward a ka luh rualin Debbie in nuisang in min lo dawngsawng a, ka hma viau amaw ka tih pawh hian min lo thlen khalh tawh ţhin.

"I huh em lo maw?"

"Huh vak lo ve. Iva hma awm ve" tih pah in ka kawngban hnawng chuap chu ka chul thuak thuak a.

"A jam tur ngaihtuah ran in lawm ka kal. Ka thleng ve deuh chiah ka inthlak fel chiah a nih hi. Matthew pawh a chhuak chiah. A nawmloh hmel khawp mai" a ti duah a, a thilsawi inzawm lo tak tak te chu ka lo remkhawm a, Matthew chungchang chu ka ngaihven bik hle. Zanah khan a khuasik a, a nuam lo ngei ang.

"Kan inthlak ve ange" ka ti liam puat a, inthlakna room ka pan ding nghal. A vawt em a, thawmhnaw ro ţha pangai hak a chakawm tawh. Ka unifom ka in bel a, hetianga ka inthuam hi chuan ka lungawi em em ţhin. Damlo te tan a thawh hi nuam ka ti. Damlo te bula hlim hmel put reng ka tum ţhin a, ka ţawngkam tin ah te chuan ngilneihna a tel theih nan ka ţawngţai ţhin. Ka kut ah hian dam na awm sela ka duh a, keimah vang hian thlamuanna nei se ka duh ţhin.

"In pa chu va ngaihven rawh. A office ah a awm ka ring" ka ţhut ve rualin Debbie in tih tur min lo hrilh nghal. Ka huphurh tak tur a ni lehnghal.

"Emma tum rawh. In in kar chu engpawh nise i pasal a nihna hi a bo dawn lo. Ţhat chhuah tlat la, ţhat naa hneh tum tlat la, in la ngeng kual vel mahse a hnar reng theilo ang che. Matthew mizia chu kan hriatchian kha" a ti dap dap a, ka la chesawn chuang lo. A bula awm hi nuam ka ti hlawl lo a ni.

"Sawilo mahse i ngaihsak a phut em em dawn ania, va kal la, a ţhat leh ţhat loh zawt la, chubak chu itih hmasak ngai a awm lo. Ngaihsak lo che ang in awm mahse a thlithlai ru reng che tih ka chiang" a tih chuan ka thaw halh a. Zawi zet in ka ţhutna hnung ka ngheng a, "Kan inhlat takzet tih i hriat kha. Vawikhat tal uluk deuhin min en ve sela, vawikhat tal tihtak zet a min ngaihsakin min zirchiang ve sela, vawikhat tal a nupui ka nihna hi pawm ve sela chuan danglamna a awm ngei ang. Matthew hian min hlat lui tlat lo sela, ţhian ang tal in min en sela chuan Mafela vanga ka tawrhna pawh hi a zia ngei ang" tiin ka phun sep sep a, nupui ka nihna angin ka pasal in min ngaihsak chu ka phut ve lo theilo a ni.

"Ka hrethiam che Emma. In inneihna hi nu leh pa pawh nilo in pute intiamna tih puitlin in duh vang ania, hmangaihna a tello tih ka hria. Mahse damchhunga hetianga awm hi in tum ami? Tuemaw zawk zawk chu in tlawm angai asin. Bul ţan la, hun rei angai lo vang. Mipa rilru hneh hi thil har a nilo. Matthew hi misual a nilo tih reitak ka lo ngaihzawn tawh vangin ka hrechiang" a ti zung zung a, a thusawi tawp lam ah chuan a nui pah hak hak a, a chanchin peihlo chung chung a ka ngaihthlak te kha ka hrechhuak thar leh.

"Kal rawh. Alo seh lo ang che. Lantir lo mahse a ruk chuan a lawm em em dawn tih hre tawp rawh. Matthew te ang mimawl hi chuan an rilru a thil awm hi lantir an hreh tlat a" ti chungin min nawr tho a, hreh viau mah ila a thusawi chu dikna chen a awm ka ti ve tho. Dawhkana ka phone dah ka la a, ward chhuansan in ka pasal hmuhtum chuan ka kal ta nge nge a.

Reilote hnu ah a office bulah ka ding leh ran tawh. Hmachhawn dan tur ka hrelo chu ka tawi ka tawi a, ka kik mai ngam lo. Let leh mai te ka duh rum rum laiin Debbie sawi anga awm ka duh tho bawk si. A tawp ah chuan ţi dai chungin ka kik ta nge nge. Lut tur a sawm na ka dawng miah lo lehnghal. Ka kik mawlh mawlh a, a reh tlawk tlawk a. Khawsik chungin a muhil leh em maw ni ti rilru chungin sawmna dawng miah lo in tlem te ka ti kau a, ka lu ka rawlh lut a, ka thil hmuh vang chuan ka tlu lo chauh.

Matthew leh Irene te chu induhtawn taka inkuah in duhthawh zet in an lo in fawp bawrh bawrh a, Irene chu a malchungah ţhuin min hnungchhawn zawng in a awm. Matthew ka hmuchiang em em a, ka bing mup mup in ka hria. Irene a awm tih ka lo theihnghilh a ni. Irene a awm chuan ka puihna a mamawh lo tawp ang. Dim te in ka kharphui leh a, hawilet tawh lo in ka kalsawn ta daih.

Hospital ah lehzel pawh an in mamawhna an tilang tawh a, in lamah an awmdun ngam tawh silo. Lo hre ru tu an awm anih vaih chuan an nuihzat tur chu keimah bawk a ni. Tun maia an awmdan ka hmuh kha chuan ka nat leh nat loh ka in zawt duh tawh lo. Chhan na ka nei rih pawh in ka ring lo. A rapthlak tih bak chu ngaihtuah dan pawh ka thiam lo. Ka hmuh tur reng a khatianga awm kha an ni hauh lo. Chuti chung chuan zantin a rawn haw tlai apianga Irene bula a awmdan tur ka ngaihruat thiam vek phah.

Tuemaw hian min su chawrh a, ka tlu chiang ker mai. Ka phone ka thlauh a, a rik rin dan ah khawilai emaw ber chu a keh ngei ka ring bawk.

"Na inei em?" min ngaihtuah taka ti chung in ka hma ah a kut a rawh dah a, ka vawn hma in a hmel en tum in ka dakchho vah a, a hmel ka hmu chiah chu mak ti lutuk in ka ang pham ringawt.

Tupawn hmu se hepa leh Mafela in an zia hi an sawi ngei in ka ring. Phir ang maia in ang chu an ni hauh lo. A mitmeng nem tak fiah kak tho si te, a hnar leh a hmui te nen, mit a hmuh theih mai a a landan hian Mafela min hriatchhuahtir a ni.

"I na em?" a ti nawn leh a, an aw chu a hrang hlak. Mafela ai chuan a palian tih thleng in ka hre hman vek. Hmalam pan ka tum laiin Mafela ang tak mipa ka hmu leh a, Mafela hian hmalam ka pan hi a phallo em ni? tih chu ka in zawhna a ni.

"Ka pi khawvel ah hian rawn let leh phawt teh" tichung in ka hmai zawn ah a kut a rawn vai a, ka harh kawk mai. Engtia rei nge ka lo thlir tawh ang? A kut ka vawn rual in min kaitho a, zak tak chungin ka insiamţha mawlh mawlh. A coat var hak chuan doctor a nihna a entir a, ka la hmu ngai hauhlo thung.

"I ţha em? Na engemaw ineih chuan min hrilh rawh" min ngaihtuah tih hriat takin a ti leh a.

"Ka ţha, min ngaidam rawh ka kalna ka lo en miah lo a" ka ti sap a, â ka intih lutuk vangin ka sa ve pap pap mai.

"A pawilo" a tih leh sap hnu ah a kalhrang a, a kal na lam ka enreng. Hmun dang daih a kal lo in ka phone thlauh a chhar a, ka din na bulah a rawn let leh a, nui sang chungin "A thlawk hla khawp mai. A keh deuh a nih hi" a tih chuan ka phone ai mah in a nuihmel chuan ka mit a la zawk. Mafela ka hrechhuak lo thei lo a ni.

"Ka lawm e" ka phone ka laksak a, a sawi ang aiin a keh nasa. A thar lutuk tawh lo a, Mafela nen a kan inbiakna ala awm vang in a hlu em em thung.

"I hmel en chuan i phone tichhe tu kha keimah ka nih hmel" a rawn ti leh a, pawi ka tihna kha ka hmel ah a langchhuak leh tawh a ni ngei ang. A ţawngkam leh hawiher ah chuan Mafela an na a nei miah lo tih ka lo ngaihtuah leh hmanhmawh tawh a, a landan hian min hriatchhuahtir mai chauh a ni.

"Ni lo e. Phone hi ka tan a hlut vang ania, i thiamloh a nilo" pangai tak in ka ti veleh a, a rilru a nawm phah sawt in ka ring. Amah la en reng chung in "Min hrethiam la, ka va hmu ngailo che ve" ka ti leh a, mumallo taka ka awm reng vang nge a nui ta hawk a.

"Vawin aţangin ka rawn zawm chauh a, min hrengai lo ang. Min hmu fo tawh zawk ang" a tih chuan ka lo bu nghat nghat a, hmu fo lo ila ka la duh zawk tho.

"Emma ka nia"

"Mason" a kut a rawn dahchhuak a, keipawn ka lo vawnsak vat. Eng doctor nge a nih ka hrelo a, nelawm leh engthawl ve tak a nih ka ring.

"I lukhum hi a sawi a nih hi" tih pah a min rawn hnaih lehzual in ka lukhum a siamţha a, a diklo nasat ka rin loh nen a siam rei zek. Min hnaih tulh tulh bawk nen ka mit ka chhing ta tawp.

"Ka nupui kha hnaih hlek suh" Matthew-a ţawng ka hriat rual deuh thaw in Mason chu a let tawp a, ka auchhuak hman ţhelh a ni. Matthew chuan min ven him tum ni awm tak in min kuah a, Mason rawn thawhchhuah tum chu puih pawh a tum lo. A pui lo khawp ang. A hnek miau alawm.

Mason chu kan hma ah nui vur vur chung in a ding a, a kamsir aţanga thisen tlem lo chhuak tiam tiam chu ngaipawimawh ang pawn a awm lo.

"Min lo lawm dan a dangdai khawp mai unaupa"

"Unaupa maw?" ka lo ti vat a, mak ti in ka meng kawk bawk.

"Ka lo lawm che beisei suh. Ka nupui hi hnaih tawh lo bawk ang che" Matthew chuan a ti ram hmak a, mak ka ti lutuk chu ka en tawn zak zak ringawt. Mihring in ang lo lutuk hi unau an nih theih pawh ka lo ring ngai lo.

"Hmeichhe nalh tak hlut nachang i hriat miah loh hi hnaih mah ila tuman min dem kher in ka ring lo ve" ngeiawm taka a tih hnu ah "Emma kan inhmu leh dawn nia" a ti sup a, kan hmuhphaka Mason a awm loh veleh ka in la hrang nghal.

"I unaupa maw?" tih chu ka thil sawi hmasak ber a ni. Matthew hian pianpui unau a neih awm ka hrelo. Sawi pawh an sawi ngai lo. A unaupa a nih chuan kan inneih na ah te khan min telpui tur a a awm ngei ka ring bawk.

"Unaupa hrawn" a ti hmuk a, tun ah tak phei chuan a nelawm loh mai nilo in a hlauhawm a ni ber tawh zawk.

"Khapa kha hnaih hlek suh ang che" ram hmak in a ti leh a, ka dar a a rawn vawn chuan ka lo ip chawih ringawt. Ka huaisen na sawm khawm in "A fel hmel em kha. Kawm mai mai chu a pawi dawn em ni?" tiin ka zawt a, ka dar a hmer na chu a na vawng vawng thei.

"I pasal ka nia, ka thu i zawm tur a ni. Hnaih suh ang che" a ti leh hluk a, min thlah rual chuan ka pai chhat chhat. Thil ka ei mumallo nen, ka taksa a chak lo em a ni.

"Fimkhur ţhin rawh, zeilo lutuk" a ti nghut a, ka hmusual nge ka pai deuh chhat chhat lai khan a nuihza a insum nasa tih ka hmu. Hmusit leh elhsen taka min nuihsawh ang kha a ni lo. Irene bula a nui ţhin ang khan. Ka awmdan chu a mawilo viau nge Matthew nui tak tak hmel pawh ka hmuh ve tak hi.

"Hmangaih lo che mah ila i pasal ka nih ang in venhim che hi ka tihtur a ni Emma" a ti sup a, ka hmuhphak loh thleng in a kal na lam chu ka en ngawt ngawt ringawt. Matthew leh a chhungte hian thuruk tam tak an neih ngei ka ring nghet tlat bawk.

CONT..

FORCED MARRIAGE-5

MATTHEW'S POV

"Engtia awm zel nge i tum?"

"Ka hrelo" ka malchunga a rawn ţhut rual in a kawng ah ka lo kuah a, nupui nei reng chung in ka office ah ka bialnu hun ka hmanpui ta ziah a nih hi.

"Emma i nei a, Mafela a thi a, Mason a rawn let a, chuti chung chuan awmdan tur ila hrelo maw?" a tih nawn leh pawn "Aw" tih chauh chu ka chhan na a ni. Mi hrang hrang nen inzawm na maksak tak tak kan nei duah a, ka nun tibuai tur tawk lek in an rawn in lan sek a, chinfel dan tur pawh ka hre tawh nek love.

"I nupui i khawih thei miah lo hi imak ka ti ngawt mai. I nupuiin nau a hrinsak veleh che i zalen ang. Chu chu inu leh pa thuchhuak a ni bawk a, nau a neih rualin nupui ah min nei nghal thei tihna a nih chu. Min nghah rei tir suh. Hmeichhe dang nen incheng dun tih hrereng chung chuan nikhat pawh a rei" ti dap dap chung a thochhuak in ka hma ah kuangkuah in a ding a, a sawi dik ka nupui hi ka khawih thei lo. Khawih ka tum apiangin inthiamlohna in ka khat leh ţhin.

Mason nen ka hmu dun zeuh zeuh, a rawn let aţangin kar hnihna a ni leh tawh. A hranpa taka inbiakna kan la nei lo a, ka nupui chu Mason hlat turin ka hrilh ngun hle rual in ka thu zawm duhlo in luhlul a chhuah a, a duh duh in awm teh se. A chungah thil ţhalo a thleng a nih pawh in mawh ka phur lovang.

Ka nu leh pate hian an lawm tehchiam lo. Ka pu ala dam a, ka pu thu an hnial ngam bik lo a ni. Emma hian fa nei sela, chu chu ka pu in a hmuh chuan Emma nen hian kan zalen tawh ang. He inneihna hnawk nuaih hian min phuar tawh lo ang a, keipawh hian ka hmangaih tak hi ka nei ve thei tawh ang.

Emma nei tur a min tih khan ka hnial nasa, ka pu in chhungkua aţanga min paihchhuah hial a duh takah chuan ka hnial thei ta lo a ni. Hospital hi ka nei lo a nih chuan Mason-a emaw Mafela kut ah a awm ang. Mafela ka ngaihtuah chhuah chuan thinrim ţeuh in ka nuichhuak hawk. Irene pawn min thlek ha reng a, kha mihring lemchang thiam lutuk kha. Hospital chungchang hriatchian a duh vang in a nihna thup in security ah a rawn awm a, a nihna diktak hi kan chhungkua leh Irene lo chuan tuman an hrelo.

"Matthew ka thusawi chu ngaihtuah zawm rawh. Mason ringawt i ngaihtuah khan hlawkna a siam lo che. Emma chu lo ti na pawh nise eng nge pawi? Emma hian ngaihzawng a neih leh i pu ngei hian a petchhuak mai ang chu" a ti leh zat zat a, Emma hian ngaihzawng a nei miah lo ang. Min hmangaih lo chung hian ngaihzawng nei ngam tur khawp a huaisen a nilo.

Ka ţhutna aţanga thochhuak in tukverh lam ka pan a, hmangaih lo mah ila nat a phu bikin ka hrelo. A chungah ţhat ka chhuah ngailo a, ka ngaihsak a ţulna pawh ka hre chuang hek lo. Amah in a in enkawl thei a, mi tenawm takin a kalsan kha a la na reuh zek lehnghal. Khavang khan ka nu leh pa leh Irene duhthusam hi ka puitlin thei lo a ni ber.

"A chang chuan ka bula awmreng hi i thlahlel ve lo in ka hre ţhin" nem duai a ti chung in min rawn kuah. Min nawr chung reng mai hi nin chang ka ngah. Ka hmangaih loh leh duh miah loh mutpui tawp chu a har bakah min nei tur a thuthlukna a siam bak ka pawisawina nei miah lo tihnat hi ka thei rih lo. Ka rilru puthmang diktak chu ka ngawih bo pui mai a, kan thuruk hi keimahni ah chauh a him tih hi ka ngaihdan a ni.

"Min la chhang miah lo" a hma ang bawk in a ţawng ala nem a, "Neih che ka duh" ka lo ti sup. School ka kal ţan tirh aţangin kan inkawm nghal ti ila a sual lovang. Min kalsan tur a ka tih pawh a duhlo tlat ţhin tu a ni. Dinhmun harsa tak a ka din chang in min fuih a, ka beidawn pawh in ani chu a beidawng ve ngai lo. Min hmangaihzia a hriat vangin ka nu pawn a lawm ţhin hle. Irene chu awm lo se tun a ka dinhmun ang ah hian ka din theih ka ring lo. Ka chanchin chhia leh ţha hrevek tu a ni.

"Min neih iduh chuan i nupui hian naupai vat sela, nge ni a amah mutpui tur kan ruai mai dawn? I nupui hi a chhelo zek a, pawisa tam tak hlawh phei chuan tuman an mutpui hreh nang" a tih chuan rapthlak ti tak in ka melh tlawk tlawk ringawt. A ţhatna ka sawizo chiah a, tun a a thil rawn sawichhuah phei kha chu kei takngial pawh hian ka la ngaihtuah chhin ngai lo.

"Chutiang chu a thleng ngai lovang" thinrim tak chungin ka hrilh. A sawi nawn leh ngam pawh ka rintawh loh laiin "Iti ngam lo anih chuan keiman ka lo ti ang. Hospital a thawk ruihhlo duh ve tak tak te hi ka chhawr thei ang. Ka pawisa hmang vek in ka tih tir mai ang" ala ti tan tan. Irene anga hmeichhe luhlul hi an tam lovang.

"Ka nupui i pawngsual tir ang maw? I hmeichhiat pui pawngsual turin mi i ruai a ang maw?" ka thinrim vangin ka awki pawh ka san tawh. Hetiang thil tih duhna a nei hi a mak. Ka hriat ţhin Irene kha a ang tawh lo.

"Neih che ka duh tawh. Mafela bialnu hlui bula awm reng hi nuam pawh iti em ni? Henu hi ka hua, i nupui tur chu keimah hi ka ni. Engtia rei nge ka la nghah dawn? A mittui te hi i rilru hneh a tum vang a nih hi, nanglah in inthiamlohna ineih phah ziah a, i awmdan ah hian ka hrevek, ka lakah hian engmah i thup theilo ang" a ti tuarh tuarh a, a ţap bawk. Hmeichhe mittui hmuh hi ngaiah ka nei thei lo. Irene pawh ka kuah bet ta ringawt.

"Insum rawh i nghak rei lovang. Pawngsual tih vel kha chu theihnghilh rawh. Emma hian a duhvang in min nei bik lo" tiin ka hrilh nawn leh. Irene ka ngaih chang apiangin ka nun ti chhe tu ah ngaiin ka haw hlur ţhin. Ka ruih chang in a chhia zawng zawng ah ka puh ţhin a, ka ruih a reh a, thil tak tak ka hriatchian hnu ah ka inchhir leh ţhin.

"I nupui chu, i nupui ti a sawi ziah pawh hi ka duh lo. Emma bulah hian Mafela hi ka tan a mikhual lo tih sawi ka duh. Nang hian min dang tlat lo ni la chuan saw in ah sawn a awm tawh kher lo ang. A duhthu ngeiin a chhuak daih tawh ang" tiin a phun sep sep a, diktak chuan Irene pawh ka khawngaih. Kan chunga thil lo thleng hi kan beisei loh ber a ni tlat. Buaina dang ka ngah tawh tehlul nen kiam lam aiin zual lam a pan zel zawk lehnghal.

"Emma hian pawimawhna pakhat chiah a nei. Amah vang hian hospital hi i kut ah a awm thei dawn a, chuvang tak chuan a rilru lak tum hian che vat rawh. Ka nghak rei theilo ka tih kha. I nupui nih vat ka duh tawh. A rilru hneh tum la, i rilru erawh chu pe ve hauh suh" a ti leh a, ka rilru ka pek awm ka hre lo. Ka lakah ţhat a chhuah reng chung pawn luhlul chhuah in ka la do tlat zawk a nih hi.

Irene ka thlah hnu ah in lam pan in ka inkhalh haw a, dar8 a lo ni leh der tawh. Ka haw hma ve ţum pawn dar8 ka thleng zat zat tho. Nilengin khua a ţha a, zan lamah ruah a sur leh a, khaw awmdan thleng hian a mumal tawh lo anih hi.

Car ka dahţhat hnu ah inchhung ah ka tlanlut a, ka huh nual hman tho. Pi Sangi lo veikual sek chu min hmuh veleh a ding chawt. A haw a hun daih tawh sia. A hmel a mangan na rawn langchhuak chuan ka ngaih a ti ţha lo takzet.

"Matthew khawnge Emma? Ala rawn haw lo. I nupui ala rawn haw ve miah lo ania, nidang ah hetiangin a tlai ngai lo" a ţap lek lek in ka hremai.

"Kan ngaihven ange. Mangang suh" tih leh phone phawrh ka rual a, beidawng zet in ka dah let lehnghal. A phone number ka neilo. Hei hian ka ngaihven loh zia a ti chiang lehzual in ka ring.

"Pi Sang haw tawh rawh a ngaihtuahawm loh ang. A chhungte hmu turin a kal anih ka ring" tia ka ţawng thlamuan hnu ah "Driver a hruai em?" ka tih zawm zat.

"Hruai lo. Ani pawh a mangang ve tho. A duty zo alo nghahna ţhin ah alo nghak a, a nghakchhuak zo lo" thinrim tak in ka sam ka tuai puat a, naupangchhia taka che rual pawh a ni tawh lo. Chanchin sawilo in a bo a tupawh a ti mangang a nih hi.

"Kan zawng ange. Anu te in ah ka en anga, a awm ka ring. Ka rawn hruai haw ang. I chhungten an ngaihtuah ang che, haw tawh rawh" ka ti leh a, min chhan na pawh hre hman lo in ka tlanchhuak leh. Car kha lo dahţha hmasa lo tawp ila ţha tur.

Ka thawmhnaw a huh deuh vangin car chhung ah pawh a vawt zek. A ţhiannu lah kha biak pawh theihna ka hre der lo lehnghal. Anmahni in bak chu zawn na tur ka hre chuang lo. Mason nen tun thleng thleng a an awmdun ka ring lo bawk nen. Mason hnen aţanga thil pawi hriat a neih loh ka beisei.

An in kawt ah car ka ti ding a, hmanhmawh taka chhuk in gate ka pawt hawng. Ruah a sur tam tial tial a, nihliap ka nei miah lo lehnghal. Thli a tleh dawn nge a thaw vuk vuk bawk. Door bell ka hmet pawp pawp a, an rawn hawng har zek lehnghal.

"Matthew nang maw?" anu chuan min hmuh a in beisei loh hmel kher mai. Lut tur a min sawm nachang pawh a hrelo.

"Emma a lokal em?" ka ti nghut. Ka thinrim a, a vawt bawk. Tun ang hun ah chuan ka nu takngial pawh ţawngkam nem in ka be theilo ang.

"Kal miah lo. Eng nge awmzia? A bo em ni?" mangang tak in ati nghal bawrh bawrh. Lemchang a ang lova, Emma chu a kallo tak tak bawk ang.

"A ţhiante in ah akal anih dawn chu. Ruah a sur sia ka ngaihtuah deuh mawle" ka ţawng pawh ngaihthlak a nuam ve deuh tawh in ka ring.

"I be tawh em?"

"A tlang theilo a" a number ka neih loh thu kha sawilan ka duh lo.

"Rawn lut rawh kan la meng vek a" a ti bah niaih a, a fanu chuan a rilru a ti buai ve anih dawn hi.

"Ka kal leh zawk ang. Lo mangang lo la, ka rawn biak tir dawn che nia" kal tum in ka inher zui nghal.

"Lawk in Matthew, vawin hi Mafela piancham a nia, thlanmual ah Debbie nen an kal a ni lo maw? Zawnpui i ngai em? Keiman ka zawng zawk dawn em ni?" a ti leh zung zung a, Mafela, a thih hnu pawh hian buaina ala ni tho anih hi.

"Ruah a sur bawk nen chhuak lo zawk mai rawh. Ka rawn biak tir ang che" ka ti nawn leh. Ama nu ngei pawh ţul lo ah a thlabar ta vek anih kha.

Gate pawn ah daih car ka dah vangin ka huh nasa tawh. Zawng tawh lo in ka hawsan daih dawn em maw ni ka ti rum rum tawh. Tun ang hun a thlan a kal te chu atthlak lutuk. A piancham a lawmsak kha mitthi tawh hnu chuan a hrepha tawh tawp lovang. A inti hah thlawn mai mai a ni. Thinrim ţun chungin thlanmual ka pan ta tho.

An phumna hmun tak ka hriatloh vangin ka zawn chawp angai anga, thlan ah a kal tak tak ngam anih chuan a lan ang aiin a huaisen zek dawn a nih hi. A zawng tur a kal pawh ka chak zek zek lo. Doctor ka ni a, mitthi tam tak hmu in kan hospital aţang ngei pawn ruang a chhuak hnem tawh. Chutiang a ni chung chuan zanthim ah, ruahsur hnuai ah lehnghal thlan ah ka kal ang tih ka ring chhin ngai lo. Ka nupui mawl tak vangin ka duhloh deuh ka ti leh dawn a nih hi.

EMMA'S POV

"Tho nghal rawh haw ang" tih pahin tuemaw hian ka ban bul ah tak man in min pawt kang lawp a, ka rin loh lutuk in min pawt tu chu Matthew a ni lehnghal.

"Engtin nge thlan ah ka awm dawn tih i hriat?" ka ti tham ţuak a, vawt ka tih vang in ka khur hlawk hlawk a, engtia rei nge ka awm tawh pawh ka lo ngaihtuah lo. Mafela piancham lawmsak tur a kal ka ni a, ruah a rawn sur tak chiam ah chuan chesawn ngam lo in ruahban hun ka nghak tlawk tlawk anih kha.

"Tikhan khapa bula i sawiduh chu sawi zung zung la, vawikhat mah kal leh tawh suh" thinrim tak a tih pahin ka ban a vawn na a thlah a, a rawnkal hma khan ka sawiduh chu ka sawizo vek tawh.

"Sawitur ka nei tawh lo" ka ti sap a, a hriat laia Mafela biak ka duh lo bawk.

"Anih a hnu, zawn ngailo a rawn haw nachang hre ta che. Nangmah i in ngaihtuahloh pawn midang ngaihtuah nachang hreve ta che. Tupawh iti thlabar" a thusawi chu dikna chen a awm a, thinrim mahse a awm ka ti. Mahse Mafela tana ni pawimawh hi amah thlah na ni pahfawm a heta hman hi ka duh vang a ni.

"Mafela hriat ah hi chuan in hau lo ang" ka ti chiah chu a rawn nui chhuak hawk a,a hmel ka hmuchiang thei lo a, engtinnge amah hian min rawn hmuh theih zawk pawh ka hre lo.

"Mitthi a nih hi. Engmah a hre tawh lo. Mi mawl ang maia khawsa lo hian hmalam pan rawh" elhsen tak chungin min ti leh a, a hmangaih tak nen hian thihna in ala ţhen hran ve loh vangin a hrethiam lo mai mai a ni. A hospital a rinawm taka thawk ţhin lehnghal hi a zahlo ka ti khawp mai.

Ka chhan tak loh vangin ka banrek ah a rawn man chawt a, min pawt kal ta dawr dawr a, Mafela thlan lam ah ka hawilet ţawk ţawk a, midang tan chuan mitthi ni tawh mahse ka tan ala thi ve lo. A tan a ka kensak te kha lawm taka a dawn ngei ka ring.

Car a dahna kan thlen rual in passenger side lam a hawng a, dimlo tawk in min namlut nawk nawk a, a khar zui nghal bur bawk. A khar ri ah ringawt pawh khan ka ţhutna aţang in ka kang awk thei hial. Heti chen hi min rawn zawng a, ruahsur hnuai ah lehnghal. Keimah ang tho in a huh nasa a, vawt pawh a ti ve ang. Thinrim tak a a che buan buan pawh hi ka dem lem lo. Min rawn hmu kha pawi ka tih rual in ka lawm tho. Zan a rei tak tak hun ah chuan thlanmual kha nuam ka tih ka ring bik lo. Ke ngat a haw leh tur in hun a ngai rei dawn bawk nen.

Matthew a ngawi run tawh a, ţi dak chung in ka melh dek dek a, a hmui a chip hmak a, a sam aţangin ruah tui ala far fep fep a, khawvawt tak leh a mitmeng vawt ruih chu a inhmeh khawp mai. A thinrim zia hrilh nawn ka ngai lo. Mason khan pa hmun nu hrang an nih thu a sawi a, zawhchian ka tum chuan thildang ah a pakai daih ţhin. An chhungkaw chanchin hi ka nu leh paten min hrilh ngai lova, ka pu thu ang in min neih tir tawp a ni ber.

"Thlanmual ah ka awm tih hriatna i nei em?" ti a ngam leh ngam lo a ka zawh chuan "Kha mitthi bak kha buaipui inei hleinem" alo ti nghut a, midang mitmei ka ven vang in khawthim hnu ah ka kal a, anu leh pate beng a thlen hlau in driver pawh ka hruai duhlo a nih kha.

"Ka tan chuan mitthi ala ni ve lo"

"A thla in ala chenchilh che tihna?" min rawn en zawk a, hmalam a en lehnghal.

"Aih. A thla ka hmungai lo. Ka thinlung ah ala thi lo ka tihna zawk"

"I thinlung chu i phum bo ve angai anih chu" a ti leh hmuk a, a sawi anga awlsam hi ni sela chuan ka lunglen vanga hrehawm ka tih em em lai te khan ka phum bo daih ang.

In kawt a kan din rual in min hawnsak pawh nghak lo in ka chhuk nghal tharh. Ruah ala tlak reng vangin car a dahfel chhungin ka lo luhsan daih bawk. Ruahsur hnuai ah min rawn zawng a, min hruai haw vang hian lawmthu hrilh a phu a, Mafela a ngainep lutuk erawh ka duh lo bur. Mitthi mai mai ang a a ngai pawh hi ka duhlo, alo ngai anih pawh in ka bulah chuan sawilo se ka duh. Keimah vanga huhphung leh vawt ti taka ka hmuh kha chuan ka inthiamlo leh lawi bawk si.

Ka room kawngkhar a rawn kik dat dat a, la inthlak lo mah ila ka hawng tho. Ka phalna pawh la lo in a rawn inzep lut a, a room ah ala lut miah lo tih hriat reng, keimah ang tho in ala huh ve hluam tho.

"Hei chu i room a nilo a" ka ti dek dek a, "Ka hria" a lo ti leh hmuk tawh.

"Sawipui tur che ka nei" sofa ah a ţhu a, a thawmhnaw huh vel chu a pawisa lo hle mai.

"Sawi la" tih pah in a hmazawn ah chiah ka thu ve. Muk deuh a thilsawi hi ka ngaina tawh lo. Ka pa in ka pasal neihtur thu kha muk takin a sawi a, Mafela thih thu a ni leh a, tun ah Matthew hian enge sawi ve a tum ang? Boruak ţha lo tak bawk in min hmuak a nih ka ring nghal hmiah.

"Mason nen hian eng inzawm na nge inneih?" ka rinloh lutuk thil min zawt ta daih.

"Ţhian satliah kan ni mai. Kan inhmuh changin kan inbia a, thil kan eidun a, a bak a awm lo" ka ti liam puat a, chhuak vak se, intihfai vat a mut vat ka duh.

"Mafela hi i theihnghilh thei angem? Keimah vang tal in" a tih chuan ka ka hau ringawt. Nidang aiin a ţawng ngaihthlak a nuam a, a hmel pawh hmuh a nuam zawk. Khua vawt viau mahse reilote chhung kha chuan kan inkar kha a lum ve ta deuh in ka hria.

"Mi kan lo hriat tawh chu theihnghilh theih an ni tawh lo. Mafela phei chu ka tan a hlut zia amah ka sun dan aţang khan i hriat ka ring. Amah kha hreve ngailo mah la ka tan chuan a pawimawh lutuk mahse tunah chuan ka bulah a awm thei tawh lo a, hmalam pan ka tum mek a nih hi" tiin tlang tak in ka hrilh a, ka damchhungin ka theihnghilh dawn lo miau alawm.

"Hmalam pan tur chuan ka pui ang che. Tun aţang chuan i pasal ang a awm ka tum tawh ang" lehzel chuan. A damlo a maw ka ti rum rum tawh.

"Matthew"

"Min ring lo tih ka hria. Ka lantir ang. Khapa theihnghilh a hmalam pan tur khan ka pui ang che" a ti nawn leh ngat. Mafela hming lam hi a har viau em maw ni?

"Ka nupui angin awm la keipawh i pasal tak tak ang in ka awm ang. Bul ţan ţha ang" a tih chuan chhan ngaihna pawh ka hre tawh lo. Irene hi a ţhen thei angem tih te ka ngaihtuah a. An la inkawp reng anih chuan ka chunga ţhat a chhuah nasat pauh leh ka na ve zel dawn tih ka hria. Chu chu duh lo in "Min lainat vang anih chuan ti duh suh. Nangchuan Irene ila nei alawm" ka ti sap a, ani pawh a ngawi ve vung vung tawh.

"Kan intifai ve ange, mut vat ka duh a" ti a thawh ka tum laiin "Ka ţhen ang" harsa tih hmel tak chung in a ti a, ţhut thlak leh hnawk pah in a hmel tak run chu ka en a, ka thil hriat chu ka awih lo lek lek zawk.

"I theilo ang. Kan hmangaih te ţhen hi thil awlsam a nilo"

"Ka nupui a ni thei ngai dawn lo a, hmangaih mah ila ka ţhen ang. Kan inpui tawn thei tihna a nih chu Emma. Kawng thar zawh ve ve tur a kan inpuih tawh angai anih hi. Nupui leh pasal ang in" a tih hnu ah a nui suk a, a chauh hmel em em tho. Harsa a tihzia a lang.

"Kan tum dawn nia" ka ti ve ta nge nge a. A sawi anga ka chung ah ţhat a chhuah dawn anih chuan chu tluka lawmawm chu a awm lo. He in lianpui a in hel kual zak zak kha chu a ninawm ve tawh bawk a, ka pasal tak anga a awm tur chu enchhin ka duh phah a ni.

"A ţha e. Naktuk ah kan inhmu dawn nia, nupui leh pasal ang in. Zan in ah chuan mu hahdam rawh" a tih sup hnu ah a ding a, a kal tlang mai dawn maw ka tih laiin ka ţhutna bulah rawn ding tawi hret in a rawn kun hniam a, ka beisei loh lutuk in ka chal ah a fawp a, khawng awt in ka ţhu reng ringawt. Kawngkhar inkhar thawm ka hriat veleh ka thawchhuak ngam chauh.

A sawi ang khan a awm dawn anih chuan mi bulah pawh lemchang tawh lo in nupa ang tak tak in kan awm ve tawh dawn tihna ania nga. Mafela chu a thi tawh a, hmalam pan tur a min puih chu thil harsa a ni lo ang, chutih laiin Irene theihnghilh tur a puih dan ka hre ve lo. Irene lakah in veng in ka hel hram hram a, an inţhen vaih chuan pawisak a nei dawn lo tih ka hrereng.

Ka hlauhna chu dahţha in intih paukhauh ka tum ta zawk a. A taka thil a thlen hma a lo hlauh lawk chiam kha a dik ber lo. Tun ah chuan pasal ka nei tak tak tawh ah ka ngai a, Irene pawn min tihnat tum mahse ka hma ah ka pasal hi a din ngam ngei ka beisei.

Mafela ka ngaihtuah chhuak leh a, hmalam pan tur hian min duh tak tak angem? A thlarau ka zah ngawih ngawih a, chuti chung chuan khawvel ah a awm ve tawh lo vang in ka beisei ngam tawh si lo. Hlim tak a awm tur a min duh ngei ka ring a, a duh ang tak in hlim taka ka awm leh theih nan hmalam ka pan dawn a ni.

CONT...

FORCED MARRIAGE-6

Tukverh aţanga nizung rawn lut in min ti harh a, parda tih phui nachang ka lo hre lo a ni. Zanah ruah a sur nasa a, zing ah a sa leh vur a, mu leh mal pawh a nei lo. Ka meng riai riai a, ka khawhmuh a phe ruai bawk. Ka pindan a nizung rawn lut vang a ni lo, nidang ah pawh a rawn lut ziah a, hetiang hian ka awm ngai lo. Zan a ruah ka do reng vang a nih ka ring. Thawh tum in ka in beng kang a, ka lu a nat zawk vang in mut leh pah in ka rum hawk a, ka mit ka chhing zui zat bawk. Ka dang a ro a, ka thinphu te chu anih tur ang aia nasa in a ri dawp dawp in ka hre mai.

Ka taksa sat dan aţang chuan ka khuasik tih ka hrethiam. Ruah ka do a, in a ka haw leh hnu ah pawh ka thawmhnaw huh ka thlak vat lo bawk nen, khawsik awm reng pawh ka ni.

Kawngkhar kik ri pawh chu ka lo chhawn peih lo. Ka nawm loh em vang in hna kalloh mai te ka duh rum rum. Na ho te hi ka mutpui ve mai mai ngai lo a, ka intiharh hram hram ţhin. Tun ţum a ka lu na hi chu a dan a dang deuh. Min kher ngut ngut in ka hre mai.

Ka pindan chhung a rawn pen lut chu Matthew bak a nih ka ring lo. Pi Sangi hi in nel ve viau tawh mah ila ka phalna lo chuan a rawn lut ngai lo. Ka khum bulah pen ri a tawp chat hnu ah ka mutna bul a hniam sut a, Matthew a ni tih meng miah lo pawh hian ka chiang tawh.

"Na nei iva ang ve?" doctor a nihna angin ka awmdan aţang hian a hriat ka ring a, ka chhang lo mai. Dim te in ka chal a rawn khawih a, nidanga min pawh pawp pawp leh min hmer ngawt ngawt ţhin ai chuan a kut pawh a dam in a deh a nuam zawk.

"Damdawi kan la ange, i khuasik a nih kha" a ti leh a, a hmel hmu lo mah ila a aw aţang chuan min ngaihtuah ve tak tak ni in ka hria.

Rei pawh ka nghah hma in ka mutna bulah a rawn ţhu leh a, a khawsik ka buaipui zan kha ka hrechhuak uai uai. Hlau tak chungin ka buaipui a, a taksa ka sik hlek pawh a duh lo a nih kha.

"Emma damdawi hi ei lawk rawh" a tih veleh ka meng a, ka rin aiin min lo awm hnaih daih. A hmel a tak run a, a mit ah huatna ka hmuh tawh loh vang in ka thaw huai mai. Ka chet phat rual in a tawlh sawn leh deuh a, min hlat tak ah a awm chuang lo. Ka lu ka tih kan ruala ka lu a nat leh vak chuan ka ner sawk a, vanneihthlak tak in thawm ka chhuah lo hlauh. Ka na tuar hmel a hmuh vang nge min lo pui a, min pawmthawh laia a taksa lum tak in min sik khan ka khawsik chu kiam in ka vawt ta vek emaw ka ti hial. Min dawm reng chung in ka hnung ah ka nghen theih tur in lukham a dah a, hetiang hian min la ngaihsak ngai lo. Zan lam a a thusawi kha a ti tak tak a ni ngei ang. Ka pasal tak tak ang a awm chu a tum tak tak a nih ka ring. A lukham dah ngheng a ka ţhut veleh a damdawi mum ken leh tui min pe nghal zat.

"Kha hei hi ei rawh. I muhil leh anga i harh leh hun ah chuan i dam vek tawh ka ring" nelawm tak in a nui a, ka thil hmuh chu ka awih lo hial zawk. Ka lu nat em vanga ka hmuhsual a nih ka ring si lo. Dam vat ka duh vang in keipawn ka lo ei a, ka eizawh hnu ah ka mit ka chhing leh a.

"I mu leh duh em?"

"Aih duh rih lo. In tih harh ka duh. Chawhnu lam ka duty a ni tho a..." ka tih lai chuan min lo pawtchat in "Hna ikal lovang" thupe aw tak a a tih chuan ka lawm letling zawk. Vawin chu hna kal ka chak lo takzet.

"Nikhat lek ţhut chu a pawilo. Ka kal zawk anga, ka lo let leh har lovang. Pi Sangi pawh eitur ka siamtir a, a rawn pek che chuan tlem tal lo ei itum dawn nia" a ti zung zung a, a hmel ka hmuh chak vang in ka meng leh a, nidang ai chuan a hmel pawh a dam deuh e.

"Keimah vang chuan rawn haw hma duh suh. Khawsik satliah a nih hi. Chawhnu lamah chuan ngai ka awh leh tawh ang" ka ti ţha ve mai. Enkawl lai a ngah tih ka hrereng. A hna lo lak hek sak kha ka duh tehchiam lo.

"Ka lo haw hma ang. Thil i ei zawh ah lo muhil la, i harh leh hunah i bulah ka lo awm leh tawh ang"

"Minute sawmhnih vel lek muhil ta ila"

"Ka hrelo le. Ka lo awm leh hman tho ang" ka awih lo lutuk chu ka nui hak a, ani pawh alo nui ve mai.

"I chal kha kan dep dawn mi? A nuam phian in ka ring" a tih leh tak ah chuan ka lu na theihnghilh in ka lu ka thing a, a nat leh zawk vang in ka dawm vang vang.

"A landan chuan a ngai anih hmel. Kan la lawk ange" tih leh thawh a rual a, dan hman a ni leh tawh lo. A na lutuk hi a zia maithei, mahse khawsik pangai anih vang in vawt ka ti em em tho si.

Puan pawt khawm in ka inkhuh hlun a, a ţhalo tih hre mah ila ka vawt ti ka insum thei tawh lo. Ice pack keng chunga Matthew rawh let leh pawh chuan ka blanket a rawn pawt hlim nghal.

"I sa kha a tizual mai mai. Blanket hi sin duh pawn hei aia pan hi sin rawh" tih pah in a hawikual a, blanket ka dahkhawmna lam kawk in "La vat rawh a vawt" ka lo ti hrawk. Ka pindan chhung a kil ber langsar lo deuh tur a blanket ka dahkhawmna wardrope a hawng rawk a, puan nem thep ang chi kha phawrh in min rawn pan leh.

Ka blanket sin lai chhah ţha tak chu hnawl tawm in a rawn lak thar zawk min sin tir a, ka sin thar tak pawh chu ka lo pawt khawm leh chawih chawih tho.

"Damdawi khan min va chhawk har tawh ve" tih pah a ka melh ram ram lai chuan alo ţhen suk a, "Chu chu ka thiamloh a mi?" ti a min zawhlet pah in ka bul set ah rawn thu leh chat.

"A ninawm tawh em a" ka tih lai te chuan ka zam vang in ka meng phelh phang in ka ring.

"A chhawk mai ang che. I thil ei hma in damdawi ka eitir lehnghal che a, thil ei ngei ngei i ngai tihna anih chu" ti reng chung in ka khabe ah dawm in min kuai dak a, ice pack in ka chal ah a rawn deh zawm nghal zat.

Min hnaih lutuk chang hian engtin tak awm ve ang maw tiin ka lo ngaihtuah ţhin. Mipa a nia, ka zam ang hian a zam ve ngailo maithei. Nuam lo tih chang a neih ka ring zawk mah. Min hmangaih vang a min nei a nilo tih bawk hi ka lo ngaihtuah leh ţhin.

"Minute sawmpanga vel tal dep ila a ţha ang"

"I tlai ange aw. Keimah pawn ka lo in buaipui thei tawh reng" ice pack vawn ka tum laiin ka kut alo lasawn vat a, "Awm mai mai teh" a ti nghut bawk. Hetianga min buaipui hian nuam ka ti lo. In kiltawihna ka la nei tlat. Ka pasal diktak ang a a awm tur thu a sawi kha keimah zawk hian ka la pawm lo em maw ni aw ka ti vawng vawng.

"I mit kha chhing daih la a nuam zawk ang" a sawi ang chuan ka ti leh mai. Thil thleng zui ta erawh ka beisei lo ber a ni. Ka chhin rual chiah khan a hmui leh ka hmui a in si nghal ang a ni. Ka meng kawk a, awm ngaihna hrelo lutuk in ka chhing leh. Ka chhanglet dawn nge dawn lo pawh ka hrelo, ka ngaihtuahna a buai vek. Min huat theih em vang in hetiang thil hi a ti ang tih ka la ringchhin ngai lo. A inlak hran hnu ah ka meng leh a, amah ka en tawh lo.

"Ka kalsan ang che. Ka lo haw hma ang. Lo hahdam rawh"

"Awle thil pawh ka lo ei ang" ka ţawnglai chuan ka wardrope zawng zawng ka enkual kim vek a, inchung leh parda zawng zawng te nen, ka pasal erawh ka en zing ah a tel ve lo. A chhuah dawn a a nui hak ri chu ka hria, en ve lo mah ila thawm chhuah awmchhun a ni. A ruk in ka in hau mawlh mawlh, ka awmdan kha, ka vawikhat tawn na ni awm fahran in a nih kha ka laih vel. Min nuih pawh kha a awm ve reng a ni. Keimah a nghawng nei ang ah a in ngai ang tih ka hlau leh hnuhnawh. Alo nei reng tawh zawk em? Ka hrelo, ka ngaihtuah duh lo bawk.

Pi Sang in eitur min lo pek ka eilai chuan nuisang in min lo thlir reng. Ka ka a tuilo viau na a a thilsiam chu tui tih hmel tak in ka ei tho. Damdawi ka lo ei tawh lehnghal a, thil ei ka mamawh hrim hrim.

"I pasal in siam tur a min tih ang ho ka siam a, nizan a ibo thu ka hrilh khan kei ai pawh in a mangang zawk in ka hria" a ti dam thluam a.

"Ka thiam loh a nih kha. Hrilh nachang ka lo hrelo cheu a" thupha chawi ka ba in ka hria.

"A pawilo mahse ti nawn tawh lo la ka duh"

"Ka ti tawh lo ang. I siam tui khawp mai. Tun ah chuan ka duh tawk rih. Tlai lam ah hei aia tam hi ka ei ang" ti a insawikhalh in eiluih tir ka hlau chuan ka nuih tlawn ta vel.

"Awle. Tlai lam ah hei ai tui hi ka siam ang" alo ti ve mai bawk a, kan in pawh tawh in a bula awm a nuam a, ka nu ang mai ah ka ngai a ni.

"Pi Sang, Matthew hi i hrechiang em?"

"Tehreng mai. A naupanlai aţanga an bula awm tawh ka ni ka tih kha"

"Anih leh Mason i hria em?" ka tih chuan a mak ti a meng phar nasa, a hriat thu min hrilh ka rin laiin "Ka hrelo" a ti daih. Hrelo tak tak se chuan a awmdan a danglam miah lo ang. Plate a khawm sawk sawk a, "Tih tur ka la ngah sia, lo mu hahdam rawh. I pasal pawh a rawn let har ka ring lo" a ti zung zung a, ka biak leh hlau ni awm tak in hmanhmawh tak in kawngkhar lam pan in a kal dawr dawr. Ka taksa hi dam sela chuan ka umzui ang a, ka zawt lui tho ang. Hun ala tam alawm ka ti ta ringawt. Tun ah chuan mut ka mamawh a, ka damchian phawt a ngai a ni.

Ka harh leh chuan min hnungchhawn zawng a mipa ding ka hmu hmasa ber. Matthew a ni tawh ngei ang. Lo haw hma a tum tak kha mawle. Ka mit ka nuai a, ka kutphah a ka chal ka khawih leh chuan alo huh dap a, ka khawsik pawh a awm tawh lo.

"Ilo haw hma duh kher a nih kha" en chiang mang lo a tih pah in ka ţhuchhuak a, ka puansin ka hlim zui bawk.

"I pasal ilo beisei deuh tihna mi?" rang lutuk in ka en nghal. Mason nen kan in hmachhawn ran mai. Matthew tur ah ngai in ka lo enchiang lem lo a ni.

"I pindan chhung lehzel a min hmuh i lo beisei nange" a nuisang a, a hmel hmuh a nuam lehpek khawp mai mahse ka beisei lo takzet. Matthew a rawn haw hman phei chuan a lawm lo viau ang.

"Pawn lam ah inkawm ila. Hospital a ka rawnkal loh vang a ni em heta ilokal chhan hi?" khum aţangin ka chhuk a, pheikhawk ka bun leh hnu ah room aţangin ka chhuak nulh. Ani pawn min rawn zui ve mai. A him zawk a ka hriat vang in inhnuai lamah ka chhukpui a, tumah hmuh tur an lo awm lo lehnghal.

"Min la chhang miah lo i lokal chhan ka zawh che kha" tih pah in sofa ah ka ţhu hnawk a, hmun dang ah a ţhu dawn emaw ka tih laiin ka bul chiah ah a rawn ţhu ve.

"Ka chhang che a i ngaithla lo anih kha. I phi chung a" nuihza insum tak in alo ti ve thung. Be mawlh mawlh chung khan ka che zung zung kha nia, min chhan na ka lo ngaihtuah tawh lo.

"Min chhang ţha leh mai la"

"Ka hmu lo che a, Debbie lah in hriat a lo neibik lo bawk nen, ka rawn risk" tifuh a intih hmel khawp mai.

"Engtin nge kan in i hriat a?"

"Ka unaupa nupui inih kha hrereng la"

"Anih chu" ka ti ve sep. Matthew chen na chu a hre lutuk ang. Helai hmun hi a vawikhat kal na a nilo ang tih pawh ka ring nghal hmiah.

"I rilţam em? Zawh nachang che ka lo hre miah lo"

"Min zawt alawm hei" a nui hak a, keipawh ka lo nui ve mai.

"Ka rawn ei lawk a, in pitar neih ve hian a siamtui lo thei sia" fiamthu a sawi mah nise a ner nang nang tho.

"Chutiang pitar an awm lo aw. Nu la valai ve deuh mai chu a awm. A fel khawp a sin,rawngbawl a thiam bawk" ka lo ti let ve khauh. Pi Sangi bak bak a eisiam thiam. Hunthawl deuh ka neih hun ah a hnen aţang hian ka zir ve ang ka lo ti zawk a nia.

"Pi Sangi kha a awm tawh lo maw?" a ti hu a, ka inrim hma in ka tum lawk hauh in a mal ah ka beng chawrh.

"Hey mi phalna la lo in kan in ah i rawn lut a, ka room ah i rawn lut tlang lehnghal. Pi Sangi tal chu dil ve ta che"

"Pi Sangi ala awm maw?" kan zawhna kan in chhang lo dun nasa.

"Tu phalna in nge i rawn luh a?" ka ti tuarh a, ka au ri a hriat chuan min ngaihven ve tak tak tawh.

"Kawt ah Rema ka hmu a, phalna min pe vek" a ti nang nang a, Rema a tih hi ka driver a ni.

"Ka unaupa in a kal tur in phalna ka mamawh in ka hrelo bawk a"

"A nupui room a lut tur chuan phalna i mamawh lawm" ka lo ti let. Rema te pawh engtin nge alo hriat hmanhmawh ni. Lawk in, Pi Sangi khan zing ah mai khan Mason a hriat loh thu kha a sawi sia, chu chu hria ni awm tak in Mason lah a rawn lang hlawl bawk a. Dawt a sawi chhan kha engvang nge niang ka rinzawn thiam lo.

"Pitari chu khawnge a awm a?" tih pah in a tho nalh a, choka lam ah a phei. Kei lah ka lo in ngaihtuah buai ve em em. Hriatloh der ngai khawp a tihsual Mason hian alo nei tawh em maw ni ka ti hial. Matthew khan a lawm tehchiam lo a, Pi Sangi lah in hrereng chung in a hrelo der a, Mason lah khan Rema thleng in an hming in a ko nalh nalh thei vek bawk.

"Ka hmulo reng reng" tui bottle keng chung in a rawn let a, ka bulah bawk a ţhu leh. Matthew te hi chhungkaw lar an nia, midang ti ti aţang pawn an chhungkaw chanchin hi hre awm tak ka nia, tuman an sawi ngai bawk silo. Mason hnen aţanga pa hmun nu hrang an nih thu ka hriat kha a ni mai.

"Hospital a min hmuh loh vang ringawt a lokal chu ini tak tak ami?" tiin ka zawt nawn leh ngat. Nikhat lek min hmuhloh vang a lokal a nih ka ring tehchiam lo.

"Mi sawi dan in hospital a security pakhat nen in in kawp ţhin a ni awm a" a ti bauh a, sawi nuam a ti bik chiah lo a nih hmel. A unaupa ka pasal alo ni bawk nen.

"Ni e. Sawichhuah ka duh tawh lo. Hma lam pan ka duh. Ka hlim chiah a duh ţhin a, a duh ang tak a hlim leh ka tum mek a nih hi" ka ti a, hmalam pan ka tum hi ka hmangaih loh vang leh theihnghilh ka duh vang a nilo. Ka theihnghilh dawn lo a, ka hmangaih reng bawk ang. Kan awm na hmun a in an tawh loh vang in hmalam pan ka duh. Khawvel a ka la awm chhung hi chuan ka din na ngai reng ah ka ding reng thei lo.

"Awle tun atan chuan ka zawt tawh lo ang che. Mahse i ţhian ka nia, i inpeih hun ah in awmdan ţhin te min hrilh ve la, i rilru hneh tur a thil tih te ka hrechak, ka ti ve duh maithei a" a ti fiamthu a, a nui pah hak hak bawk.

"I thiam ang ang khan ti ve la anih chu a. Ka sawi dawn reng reng lo"

"A chanchin ringawt pawh i sawi ning ţan a ni maw?"

"Teuhlo mai. Ka ngaih zel vang alawm" a nui hmel chu ben bo daih mai ka duh. Kan awmdun apiang in min chhaih buai dan a ngaihtuah ziah. A mize tlang tak leh thawveng chi a nih bawk vang hian kan in nel hma phian. Ka be duh lawk lo a, min be lui char char a, Debbie a kawm nel ve hnu ah keichuan ka be ve chauh a, ka biak ve hnu reilote ah kan in pawh ta em em a, a mak ve ngawt mai.

"Tun thlenga la ngai tur si chuan pasal neihsan lo mai tur ania" thutak deuh a a tih tak ah chuan keipawn "I unaupa ka neihchhan chu ihria alawm" ka lo ti ve sap. Mason lehzel hi chuan min dem thei lo ang. Matthew hi a unaupa ania, lehkha a kan puten thutiam an dah pawh a hrechiang ang.

"Hmangaih chu nei ve ila a chhe ber thleng pawh huam in ka vuan tlat ang"

"Kan duhdan ang zel hian kan awm thei lo. Hmangaihte ţhen a nat rualin hmalam pan pawh a harsa mahse keichu hmalam pan ka duh. Mafela pawh engkim ka hrilh tawh, alo ngaihthlak a min lo pawmpui ngei ka ring" ka ti deuh duah a, harsatna ala tawh loh vangin a hrethiam lo mai mai anih hi.

"I pasal lo haw hma in kan kal daih teh ang. Min khawih leh chuan ka hmelţha tak hian a tuar leh dawn si a" nui sang chunga a khabe dawm in a hawi vah a, kar hnih lek chhung pawn ţha ti tu a nei ngah hman tak tak alawm.

"Haw i tum deuh thut a, coffee tal in leh phawt la"

"Pitari a awm silo. Nidang ah i pasal zin hun ah ka rawn la in ang" a ti a, a haw dawn ah pawn thleng in ka zui chhuak.

"Naktuk ah chuan lokal tawh ang che. Ngen na pawh nilo in thupek a nih chu"

"Ka lokal ang. Kan inhmu dawn nia" ka tih tak ah chuan lawm tak chungin a car ah a lut a, an nu te chu mihrang ni mahse Matthew hian nau tak tak ang in pawm ve thei tawh se ka ti ngawt mai.

Keimah chauh a ka awm leh tak ah chuan hahchawl tur in ka room ah bawk ka let leh. In bual harh ţha a ka hriat vang in bathroom ah ka lut a. Ka khawsik kha a rawn let leh ang tih mawlh ka hlau. Hna ţhulh ngai a ka awm leh ka hlau. In ah hian tih tur a awm lo lutuk a, kawm tur an awm lo lehzel nen a khawharthlak. Vawin pawh Mason kha rawnkal lo se la chuan ni a rei leh viau ang.

Bathtub ah ka inchiah a, ka taksa rawl ţhum pawh a zia deuh ang. Mason leh Pi Sangi kha ka awm ve lai ngeiin in nangching se ka ti rilru khawp a, Pi Sangi kher in dawt min hrilh hi chu hriatthiam a har. Ka hria ti mai sela thildang ka zawt zui dawn pawh a nilo a, ka zawt zui maithei bawk. Mason an lawm lo lutuk hi a chhan tur awm anga ka ngaih ber pawh Matthew nen an nu a hran vang chauh. Thildang lawm loh chhan tur an neih awm ka hrelo.

Bathroom kawngkhar kik ri ka hriat hnu a Matthew ngei maiin "Inchiah rei suh i khuasik leh ang" a rawn tih tak ah chuan ka in tleuh vat vat a, a tum ang khan a rawn haw hma lutuk thei chuang lo a nih ka ring. Thawmhnaw ka kenluh loh vangin hreh deuh chungin bathrobe chauh ha in ka chhuak zal zal.

Sofa ah thatchhe zet a ţhu chung in min lo en run a, lungawi lohna nei a ang hle bawk.

"Engti tur in nge Mason a rawnkal?" ka ring dik chiah. A lawm hauh lo ang ka tih tawh kha.

"Hospital ah min hmulo a, ka chanchin hriat duh in a rawnkal a nih kha" a thinrim chu ka palzam lui ve a, khum ah ţhu in ka phone ka en a, ţul hawt lo ah Debbie message ho te te ka thawh ţeuh.

"I ţhian ringawt chuan ava ngaihtuah che ve" a ti leh nghut. A unaupa nen chuan kan in kawp dawn lo tih te chu hriat ve tur a nia.

"Min ring chiah lo niin ka hria. Dawt ka la hrilh ngailo che. Iduh leh Mason pawh i zawt thei ang" ka ti ve ngat. Zawt kual vek sela ka tan chuan a nuam daih zawk ang. A rindan dikloh zia a hre ram ram bawk ang.

A ţhutna aţang chuan muangchang a tho in ka awmna lamah a rawn kal a, ka bula a rawn ţhut ve chuan min hnaih mah mah ka ti. Tawlhsawn tur in chet pawh ka che ngam tawh lo.

"Tun aţang chuan khum kan in ţawm tawh ang"

"Maw?" ka lo ti ha ringawt. Ka makti hmel pawh a hmuhhmaih ka ring lo.

"Nupa tan khum in ţawm chu amak viau a mi?" fiamthu mai mai nise ka la ti tho. Ka khabe ah dawm in ka mit ah tak ka chhungril zawng zawng hmuh tlang vek tum ni awm tak a chiang in min en a, zingkar a a thil tih kha ka ngaihtuah chhuak uai uai a, ka zam lutuk chu ka in hum ruh nasa.

"I pasal ka nih ang in ka tih tur diktak ka ti tawh ang. Ka hrilh lawk tawh che" a hma aia dam deuh hlek in a ti leh a, ka la ţang ţeuh tho mai.

"Reilote chauh ţhat ila chhuah a, ka enchhin phawt ang che ka tih kha" ka sawizawh rual deuh thaw in a hmui leh ka hmui a in si zawm zat. A hma ang bawk in nghet tak in ka mit ka chhing a, ka chhanglet leh chuang lo. Ka hnaih a Matthew a awm hi chuan ka inthlahdul hleithei lo a ni ber. Min fawhna aţanga a inlakhran hnu ah pawh ka la pangngai thei chuang lo. Ka pasal hi ka la pawh tak tak thei lo a, ka la in pe pumhlum thei lo a ni.

"Zan in aţangin thil kan eirual ziah tawh ang" tiin thupek a chhuah leh a, a pasal a nihna a lantir dan ka hriat duh vang in ka lo pawmpui thlap.

"Ka intihfai ve chhung in lo inthlak rawh. Pi Sangi pawn rawng a bawl zo tawh in ka ring" a tih leh a, ka bathrobe hak lai hmawr lam pawh chat chat pah in ka bu nghat a, ka awm nawm loh dan chu hrethiam ve ni awm takin min chhuahsan ve nghal mai.

A rawn luh leh vat ka hlauh vangin a chhuah rual in ka che phat. Ka inthlak zung zung a, lotion ka inchulh a, bathrobe ka dahţha a, reilote chhung in ka in peih at tawh. Min rawn koh kher nghak lo a inhnuai lam a lozuk chhuk ka duh zawk a, a rual a thil ka ei tur pawh huphurh ruk nak laia, choka a luh rual ringawt pawh ka duh rih lo. Thla hnih dawn hnu ah ka pasal nen a rualin thil kan ei ve dawn chauh a, zamawm ve duh deuh a sin.

Inhnuai leh inchung inkalpawhna kailawn ah chuan muangchangin ka chhuk thla a, he in lianpui, bungraw nalh leh man tam tak tak awm na ah hian a pawimawh ber hlimna a awm lo ţhin. Tun ah mak tak maiin ka pasal a inthlak danglam thut a, bungrua pawh a hma aiin ka hmu mawi deuh. Min hmangaih leh hmangaih loh ka ngaipawimawh rih lo. Keipawn ka hmangaih lo tih ka chiang chuti chung chuan a nupui ka nihna angin nupui tak ang in min en se ka duh tho ţhin. Ka pasal tak tak anga a rilru a siam pawh hi keimah ang in ngaihdan a nei ve tawh a ni mahna. In hmangaih lo mah ila ţhian nih tal ila a ţhat ka ring ţhin a nih kha.

Choka ka luh meuh chuan Pi Sangin eitur alo buatsaih mup mup tawh. Amah en reng chung in "Vawin ah Mason a rawnkal a" ka ti deuh kher. A che a tawp chat a, a phili buai viau ka rin laiin a chet zawm leh mai. Dawt min hrilh kha ka ngei ve deuh tlat alawm. Dawt ka sawi ngai lo a, dawt hi ka hua. Min chhang dawn lo amaw ka tih fel vek hnu ah "Ţhian kawm tur ilo neih chuan a ţhat chu. Ka fate college ah ka kal lawk a" a ti a, hrelo tak tak pawh a ang ve ta lawm.

"Nakinah la hmelhriat ve la aţha ang. A fel asin"

"Emma pasal nei tawh inia, i pasal ah chiah hian i rilru pe rawh. Mifel leh ţha kan tih te hian kan rilru an ti na zui duh a nia" min ti let ta daih. Mason hian ka rilru a ti na ve ngai lo ang. A chhungten an lawmloh chung pawn a hlim em em tho a, ka entawn ru reng zawk a sin.

"Min lo nghah ka ring a" min melh zawk a, ka hmazawn a chair a pawtchhuak zawm zat a, a sam ala hnawng chap a, in lamah hian kan inhmu zen zen ngailo a, hospital a a landan nen chuan a hrang hlak. Hetianga in lama a landan hi ka duh daih zawk. Amah pawh a hahdam hmel in hmuh a nuam.

"Hetah ka lo nghak che. Engmah ka la ei lo"

"Ei ţeuh rawh"

"A tui dawn bawk a, ka ei ţeuh ang" Pi Sangi ka melh pah a, a thilsiam han faksak hi chuan a lawm ţhin. Eisiam hi chu a thiam ve a, che muang deuh mahse uluk taka a siam hi chu tupawn an eitui vek ang.

Kan eizawh ah inthurual ang hrim in living room lamah kan phei a, kan in en a, kan nui tawp. Nidang ah chuan inhmuh hlau ngawih ngawih in room ah kan tawm chawt ţhin a, ka pasal hian inthlak danglam tak tak a tum ta a ni ngei ang. Tv kan en dun reng laiin "I ţha tak tak tawh maw?" a rawn ti a, ka chal a khawih pah bawk.

"Ţha e naktuk pawh ka kal thei tawh ang"

"A lawmawm. Na ineih chuan zanlai ah pawh min kaitho mai dawn nia" tiin ka tan a inpe ve ta hial. Amah en in ka nui ver ver a, nupa hlim leh in pawh tak nih vat ka duh.

_________________________________________

"Tuemaw chu a mood a fu viau a ni maw?" coffee lei tuma ka kal chu Mason bawk in min lo umzui. A dan pangai in a nui leh sang tawh.

"Hmalam pan ka tum hi ka tifuh dawn in ka hria"

"I pasal in a duat deuh tawh che a nih hmel" ka nui hak a, zan lam a kan hun hman dan ka ngaihtuah a, nupa tak tak ang mai kan ni. Khum ah pawh rei tak kan ti ti a, boruak tihchhiat ka duh vangin an chhungkaw chanchin erawh ka zawt lo.

"I ngaihtuahna pawh i nuihpui tawh ania, a duat tawh che tihna" min kawk va a, a kut chu lo beng per in ka kal zawm hmiah hmiah.

"Emma naute nei vat suh aw" a tih tak ah chuan ka hawilet a, ka kalsan na ngai ah khan a lo la ding reng.

"Ka pasal hi fa neihsak vat ila kan hlim lehzual ang chu"

"In hlim leh hlim loh tur ka sawithei lo. Fa nei vat suh. A theih chhung chu in dang ang che. I hria maw?" a ti khur khur a, a hmel a rum al mai bawk si. Mason a ang lo zawk hial alawm. A lu a nem pawp pah in "I hmel te kha ka ngaih iti ţhalo. Fa ka neih chuan nangmah ber hi asin lawm tur chu" ka ti hlak. Kalsawn leh mai ka tum laiin ka banrek ah a vuan a, "I pasal bulah hian i hlim em?" tiin min zawt.

"Hlim ka tum ţan mek. Pasal pakhat chiah neih ka tum ţhin. Pasal neih a ţhen leh tih vel hi ka duh lo. Chuvang chuan hlim ka tum mek. In unau buaina hi ka hrelo a, in in millo anih pawn keichuan ka enhrang lo che u. Ka ngaih ah chuan unau in ni tho tho. Ka chung ah in thinur na lantir ve suh u" hepa bula ka awm hi chuan ka ţawngduah zel.

"I pasal hian a hmangaih che in i hria em? I ţhen duh anih chuan chhan ţha tak ka kawhhmuh thei ang che. Ka pu bulah hmuhtir la, i pasal lak aţang hian i zalen a ni mai"

"Fa ka neih i hlauh vang in chutiang thleng thleng chuan ilo buaipui vek hman a mi?" ka ti let a, engvanga ka fa neih phallo tlat nge maw a nih le?

"Theihnghilh rawh. I pasal hi sawichhuak fo lo ila aţha zawk ang"

"Nangman i sawichhuak hmasa anih kha" ka la ti ţalh. Min fiam nan a hmang hmasa reng bawk a.

"I pasal vang a i hlim ka hmuh hian ka lo na tlat ţhin. Ka duh vang che ani lo a, i pasal in a tihlim thei che hi ka duhlo" a ti leh a, thu awmze neilo deuh deuh ava sawi hnem tawh tak. Matthew kha a huat awm pawh ka lo hrengai silo a.

"Nupa kan nih chuan kan intih hlim tawn a ngai alawm" reilote chhunga a danglamna hi amak ka ti. A hma a min chhaih hawrh hawrh tho si. Mason hi hetiang hian ka la hmungai miah lo bawk.

"A ţhat chu intihlim rawh u. Ila inchhir loh ka beisei. A room a a bialnu thlalak tar chuaih thei mihring hian engtikahmah a hmangaih lo ang che" a ti nghut a, ka ban a hmerna chu melh in "Thlah rawh" ka ti chang fak. Min la thlah duh chuan loh vang in "Ka hlimna min ţawmpui theilo ţhian ka mamawh lo" ka ti leh a, a lo nui hawk.

"Venhim che ka tum mai a ni. Engtia rei nge ţhat a chhuah tawh? Matthew hi nang aiin ka hrechiang"

"Eng nge i hriat chu? Min hrilh la, i pasal vangin i mood a fuh iti zo chauh a hetiang hian i awm leh thut a, ka hrethiam lo alawm" a insawifiah hun ka nghak ran. Pakhat zawk in min tih hlim apianga ka chunga an lungawilohna an lantir hi ka hne.

"Fa nei lo tur a ka duh chhan che i hreduh maw?"

"Ka pu hnen a Emma neih i dil vang kha em ni? Mason"

CONT...

FORCED MARRIAGE-7



"Ka pu hnen a Emma neih i dil vang kha em ni? Mason" kan awm na hnaih tak ah Matthew a lo ding reng. Mason pawn min thlah thuai a, Matthew chuan kei ni lo in Mason a en run a, an thusawi hi a awmzia reng reng ka hre lo. An chhungkaw chanchin sawi an duhlo ve ve a, maksak tak a awm chang an nei a, hriatthiam harsa tawk lek a sawichhuah thut an ching bawk.

"Khawngaih in sawifiah rawh u. Nangni unau in a in neih kual mai mai tur ka ni pawn ka hrelo" ka ti ta nge nge a, bungrua pawh ka ni hleinem.
"Ka nei tawh che a, midang in an nei lo ang che" ka zawhna chhang mahse Matthew chuan Mason bawk ala en reng tho.
"I nupui hian i thil tum a hre tawh em?" ngeiawm zet in a nui suk a, ka bo tial tial thung.

"Irene i ţhen tawh em?" a ti zui leh a, a ţhen tur thu a sawi tak kha. Ka ţhen tawh ti a awlsam taka a hrilh ka rin laiin "Ka nun ah hian lo inrawlh suh" a ti ta hmak a, ţhen sela chuan a sawi ngei ang.

"Ava ropui ve. Bialnu leh nupui, doctor ni bawk. Hun i neilo reng pawh hi ka dem em em lo che. Karleh a ka pa birthday lawmna tur ah khan in nupa hian lokal ang che u" a kalsawn dawn ah Matthew dar ah a hmer pah zeuh lehnghal. Hetiang em em a unau inpawh lo hi an awm theih pawh ka lo ring ngai lo.

"Khapa kha hnaih lo tur in ka hrilh che ani lawm ni?" thinrim taka a tih chuan dak vah in ka lo en ve, in sawifiah ngai zawk chu amah hi a ni.
"I thil tum chu min hrilh la, Irene ila ţhen loh chhan nen. Bulţan ţhat i duhthu i sawi a, i sawi ang chu nangbawk hian i puitlin thei dawn lo anih hmel. I insawifiah hma chu ţhatchhuah der vel tawh suh" ka ti ve ngam tawh. Tun ah hi chuan a dik zawk ni in ka in hria.
"Ţhat ka chhuah kha a der a nilo. Irene chu ka la ţhen lo ngei a, ka tum mek a nih hi" a tihlai chuan ka lo nui hak. A ţhen theih ka lo ring ringawt pawh kha mak ka in ti.
"I thil tum pawh chu sawi tel law law la?" ka ti leh hram.

"Ka thil tum chu ka hrilh tawh che" a ti leh hmuk tawh. Ka hnen a a sawi leh Mason-a thil hriat kha a in an loh hmel ka ti.

"Ka pasal ang a awm itum tawh tih vel kha chu anih loh hmel"
"I ngaihdan dan in ngai teh" a ti hmak a, dawr lam ah min kalsan daih.

Ka va thlen ve chuan Nunziri nen an lo in be mek. Nunziri landan en chuan Matthew hian a pawi a sawi leh tawh a nih hmel.
"Kha la rawh i pasal in a pek kep che" a tih hnu ah a tum zui hman lehnghal.
"Awle ka lo in ang. Debbie ta tur ka duh tel ve a"
"Chu chu i pek belh angai anih chu. I pasal saw pawisa ka kir vek tawh sia" tih pah in Matthew din na lam ah a thle deuh buk a, a ngei ngawih ngawih ni maiin ka hria. Matthew hriat phak loh tur in "Engtin nge alo tih hman che?" ka ti sar sar a, in ven nan ka hmui ka hup tel pah bawk.
"A ţawngkam hi ka ngei ţhin a, a chapo si" tih pah in Debbie coffee tur min pe tel a, pawisa ka pek hnu ah coffee no hnih chawi a ka kal chu Matthew chuan min rawn zui ve nghal.

"Ka bulah awm rih suh. Ka ring leh tawh lo che" ka ti ve hmak a, Irene ala ţhen lo hi ka ngei. A nupui ka nihna ang in huat theihna dan ka nei bawk.
"Kenpui i ngai em?"
"Ngailo. Nitin ka la ziah. Keimahin ka ti thei"
"A sa lo mi? Ken na tur i dil lo nih kha"
"Lo buai ve lo mai teh"
"Ka nupui hi a kang ang tih ka hlau ve tho a" a tih chuan coffee hian ka theh ţhawt ţep a ni. Ka thinrim hmel a hmuh lah in a nui suk duh chauh lehnghal.

Ka duty na hmun ah pawh min zui lui zel. Ka be duh lo chung pawh in min be lui ngat ngat. A bialnu a zinbo a, a lunglen hnemtu ah min ngai niin ka hre tlat tawh. An inţhen fel tih ka hriatchian hma chu ţhat chhuah reng mahse ka rin theih pawh ka ring tawh lo.
"Nangni nupa chu in rawn inzui luh vel a, hmuh in nuam khawp mai" ti a min lo fiam pah in Debbie a nui ruh ruh a, ka rilru nawmlohna hi ka hrilh duh lo. Debbie ngaihţhat nan ka nui ve na a rilru nawmlohna ka nei reng tho. Mason khan ka fa neih a remti lo tlat leh apu hnen a min neih a dil chungchang vel te. Kha thil phei kha chu Mason bula sawichhuah pawh ka duhtawh lo. Fa neih chungchang erawh zawhfiah ka la tum reng tho.

"Debbie chawhnu lam chu kan leng harh dawn mi?" chawhma lama kan duty hun a ni ve tawh a, chawhnu chhung zawng in a awm ka peihtawh bik lo. Za vaklo a nui chungin Matthew a melh ralh ralh a, hria ang pawn ka awm lo.

"Chawhnu lamah tih tur em em ineih chuan loh kha" ka ti leh a, min hnial hreh a, Matthew a zah bawk si chuan engmah a sawi ta lo. A remti ah ka ngai. Ka sawm na te chu a hnial ngai lo hrim hrim.

"Khawnge kan len ang?" Matthew zawk in a rawn tih khalh a, ka ner nawk ringawt. Damlo damdawi pek ngai ţhenkhat an awm vangin ka coffee pawh in lo in ka kalsan daih. Debbie nen lo inkawm mai rawh se. Matthew chuan a biak leh pawh ka ring chuang lo. A hma zawng pawn ward a rawn round lai pawn min be duh ngai hleinem. A thiltum hi hriat ngei ngei ka duh. Mason hnen aţangin hriat ka tum char char tho ang.

Damlo damdawi pek ngai ţhenkhat ka pek zawh hnu ah ka let leh a, Matthew pawh a lo la awm reng.
"Tih tur inei lo mi? Vawin chu iva awl ve" ka ti deuh kher a, ka awmdan chuan a lung ati awilo hle tawh tih a hmel aţangin a hriat. Min hmangaih lo a, a bialnu pawh ala ţhen hleinem, keizawk hi thinrim tur ania ka nih.
"Ka office ah lokal teh"a ti hluk a, a chhuak zui nul nul lehnghal.
"Zui vat rawh. I pasal kha tlanchhiatsan i tum a ang ka ti. Emma ţhatchhuah a tum ve mek a nih kha. In in neih dan ngaihtuah la, hrethiam ve la" a ti bai bai a, ka ngaihţhat tawh loh zia hi hretel ve sela ţha tur ania.

"Zui kher angai lo ang. Damlo ka buaipui a, ka tlanchhiatsan loh kha"
"Mason leh Mafela hi an in an em vangin Mason hi ilo duh daih ani lo maw?" tia min zawh chuan ka thinrim ru ţeuh mai. Mafela ang viau mahse Mafela anih loh chuan ka duh chuang lo.
"Chutiang a nilo. Mason chu ka ţhian anih hi. Nangtal hi chuan min ring ngam teh" ka ti ve hlak a, nupa kan nih vangin min inremtir a tum nasa mah mah a nih hi.
"Mason hi ka rinzawng a ni miah lo" deuh tlat ţhin hian a.
"I rinzawng ni miahlo hi kei ai pawn ilo kawm nel hmasa zawk a"

"I pasal office ka kalpelh apiang hian a bulah Mason hi ka hmuziah. A chhui ru te a nilo maw?" hlauhthawn hmel tak in a ti leh a, Matthew thil tum atih kha ka ngaihtuah chhuak leh. Mason hian hriat a nei chiang alawm. Mahse Debbie bulah chuan "Unau an nia, a kal ve bawk ang chu. A tan chuan phalna lak kher pawh angai lo a" ka ti daih.

"Anih dawn chu. Unau an ni hi isawi apiangin min hrilh tirh ang khan mak ka la ti reng. Mason hi a rawn lang thut bawk sia, mi ţhenkhat chuan Delhi ah a awm char char ţhin a an ti. Vai ngaihzawng a nei a, fa annei tawh te an ti vel"
"An va hrebik ve" tih pah in ka nui vak a, Debbie pawh a nuih a za ve tho. Midang chanchin ţhalo hi kan sawipeih lutuk a, Mason-a chanchin pawh an phuahchawp leh tak ţeuh hi.

"In pa chu va hmu teh. Sawiduh te pawh a lo nei maithei sin"
"Aih. In lamah kan sawifel thei lawm. Duty zawh hun chu leng ang aw"
"Awle" a ti ve tawh. Tun ah tak hi chuan ka hmuchak hrih lo.
"Buaina innei lo tiraw?"
"Neilo e" ka ti liam puat a, ka ring hleithei lo hi kan buaina chu a ni mai. Rin ka tum veleh rin loh nachhan ka nei leh ta a nih hi.

Kan duty zawh veleh Debbie nen kan lengkual a, kan awmdun hi chuan sana hi a kal zung zung zel. In lianpui a khawhar deuh a awm reng ai chuan len harh ve ziah ka duh tawh. Pasal ka neih hma a kan kalna ţhin ah kan kal kual leh a, Debbie pawh zalen tak a ala awm laia pasal ka neih a ngai bik hi hrehawm ka ti lehzual. A ti ti siam siam reng a, keipawh nidang ai ngawt chuan ka hlim in ka rilru pawh a harh ţha. Khawthim lek lek hnu ah min thlah a, a ngai ang bawk in kan in chu a reh leh ruih tawh.

"Pi Sang ka ţhiannu nen thil kan ei hnem lutuk a, engmah ka eipeih tawh lo aw" ka ti lut nghal a, zan lam thleng a daih tur ka ei nghal vek.
"Matthew nen in eirual ka lo ring a"
"Nia ka ţhiannu nen kan ei chhuak leh ta sia" a ngaihţhat nan ka ti ve mai.
"Anih chu. I puar chuan aţha lawm. Keipawh ka haw ţep, ka tihtur ang ka ti zo tawh bawk a"
"A ţha lawm. I hahchawl hma ve deuh thei tihna ania nga, ka han inbual harh ange" ka tih hnu ah inchung lamah ka chhohsan a, kan kalkual nasa bawk a, ka chau hnap mai.

Bathtub ah pawh ka inchiah rei. Ka nun danglam chak dan hi mak ka ti. Hun harsa tak tak ka paltlang a, mihring rin an har zia ka hrezel bawk a, keimah ngei pawh hi ka inring lo ţep tawh ang. Ka intleuhfai hnu ah bathrobe nen ka chhuak a, khua a thim vek tawh. Ka pasal thawm pawh ka la hrelo. Ka rilru hi a diklo zo tawh a, Irene zin alo haw tawh a nih te ka ring rum rum. An inţhen thu hi Irene ka aţanga ka hriat hma chuan ka awih tawh lovang.

Ka sam ka ti ro hnu ah nightgown ka ha a, ka mu daih. A rawn haw hma in lo muhil daih ila ka hmu lo a ni mai. Room kan inţawm ta bawk nen, a thawm hriat ringawt pawh ka duh lo. Phone ka switchoff a, Debbie hian ho te a min rawn call a ching a, ka muhil min ti harh tur thil ka duh lo. Tui tak a mut a, Matthew hmuhloh reng ka duh.

Dimlo taka kawngkhar in khar pawp ri vang chuan ka phu zawk a, ka harh chiang em em bawk. Matthew a rawn haw tihna a ni mai. A tlai tawh thawkhat in ka ring. Thawm a neihloh na lam ah ka inlet thawk a, ka muhil der lehnghal hmiah. A rawn haw tlai chuan Irene bulah a awm ţhin tih ka la hre kar. A rui leh ngei bawk ang. Bathroom a luh hnu chuan a reh ta vang vang a, ka awm dawm meuh in ka thaw huai mai. Ka mut a chhuak tawh miah lo lehnghal.

Ka bula a rawn mut chuan chet pawh ka che ngam tawh lo. Ka hawina lamah chiah a mu lehnghal a, "I muhil lo tih ka hria nia" tih sup pah in min rawn kuah lehnghal.
"Min thlah leh mutthilh ka duh" ka ti hmak a, chetsawn ka tum na lamah amah chu ka hnaih zawk mah in ka hria.
"I tlanchhe rei ta bawk e, duhtawk tawh rawh"
"Tlanchhiat chhan ka nei tih te hreve la" ka tih lai mek in a hmui leh ka hmui a in si lehnghal a, awmsan tum mah ila ka thei chuang lo. Min fawp bawrh bawrh a, a awm ah ka nem a, a lungphu dut dut chu ka hre thei. Ka awm a khawih chuan ka tal leh vak a, ka duh teuh lo mai. Min fawhna aţanga a in lakhran chuan a duhtawk mai dawn amaw ka tia, a ni teuh lo mai. Ka ban pahnih chunglamah dahchho in a manbet a, talchhuah tum in inleng bat bat mah ila kan inlen hleih em vangin awmzia a neilo. Mipa lakah chuan ka tha a nep ropui mai si. Ka nightgown dimlo taka min phelhsak lai te chuan ka lo ip chawih chawih a, ka hlau lutuk chu ka khur thei hial. Ani lah in engahmah a ngai tawh der silo. Ka ţap ri leh mittui te chuan a tibuai pha tawh lo. Ramsa kawlh tak ang mai in nasa takin min suasam ka ti mai.

A duhtawka min khawih hnu ah min chhuahsan a, ka ngaidam ngai lovang. Ka pasal ngei in ka duhlo chung in min khawih a, pasal ka neih hun atan tia ka lo invawn thianghlim ve na te chuan awmzia a neilo a, ngaihhlut nachang pawh a hrelo. Ka taksa mai nilo in ka rilru a na ngawih ngawih. Tun ah chuan min sik hlek pawh ka duhtawh lo. Che lo in chunglam en in ka mut ngai in ka mu reng a, a rapthlak takzet a ni.


Ka taksa chu tleuh fai vek tum in reitak shower in ka inphuh tir a, ka ţap bawk. Pasal a nihna hlen tum se chuan ka remtihna pawh ala ve ngei ang. Nge a thinrimna tikhan a hrithla ta zawk? Ka damchhung in he a thil tih vang hian ka ngaidam leh tawh lo ang. Ka taksa a duk awm te chu en pawh ka en ţha ngam lo. Keimah a ka tawrh a ngai leh tur hian min ti lungngai lehzual. He thil thleng hi ka nu takngial pawh ka hrilh ngam dawn silo.

Ka intleuh faihnu a bathroom aţanga ka chhuah a room chhung ka luh leh chiah chuan thil thleng kha a ngai ngai in a rawn lang leh a, ţahchhuak tak a hmui pet fan fan chung in bedsheet ka hlip a, paih tur in ka khung hrang. Ka hmuh apiangin ka rilru ana lehzel ang. Mut pawh mu ngam tawh lo in ka ţhu tlaivar ta ţhak a, ka chhungte ka ngai in Matthew chet duh dan avanga ka rilru na chu ka ţap leh ţhin.

Khawvar ţantirh ah tukverh bulah ka ding a, thlifim in ka hmai a rawn chhem vawt sang sang a, harh huai tur ka nih laiin ka chhungril chu a rit tulh tulh thung. Nichhuak ţan tir te chu nidang ang in a mawi tawh lo. Thih daih te ka chak rum rum. Hlim hi ka tan a rem ve lo ah ka ngai tawh. Ka hlim ve dawn amaw tih laiin lungngaih lehzual na bawk hian min lo hmuak leh thin.

"Emma" a aw thum tak aţang chuan Matthew a ni tih ka hria. Ka ding khawng lah a, ka hawilet duh lo.
"Ka kik a i hrethei lo a"
"In thlahrun leh si vel kha angai tawh lo. A pawi tur chu a pawi ve tawh. Min chhuahsan lehnghal rawh" ka ti chang fak a, ka ngei ngawih ngawih.
"Min ngaidam rawh"
"Aih. Ka ngaidam ngai lovang che. Tun aţang chuan hnaih pawh min hnaih tawh suh"
"Iduh ang chuan ka hnaih tawh lo ang che. Khawngaih in min ngaidam dawn nia" a ti leh a, ngaihdam min dil ngam tur pawh ni in ka hrelo. Hreh tak chungin ka in her a, a mu biklo tih ka hre mai. A inthiamlo ve pawh a ni mahna. Inthiamlo mahse ka ngaidam thei chuang lo.
"Aw min hnaih tawh suh. I nupui ka nih tirh khan hremhmun ah min lo lawm lut a, hremhmun ah chuan ka awm ta ngei anih hi. I thil tih vang khan ka ţhen che anga, i bialnu nen zalen taka in awm leh theih ilo ring ange, in pahnih a hrem na tur ringawt cheu pawh ka ţhen dawn lo che. Mihrang angin kan in en leh anga, mi hmuh ah chuan nupa kan ni tho ang. Tunge hrehawm ti zawk kan hria ang chu" ka ti hmarh hmarh a, min chhanglet lo hrim hrim. Thinrim ang pawn a awm lo, min khawngaih ni awm taka min en vel te chu ka huat tawk a tling em em.
"Nang ang a nunrawng hi ka la tawng miah lo" elhsen deuh in ka nuih pah bawk. Diktak chuan ka thinrim leh rilru na chu ţah vak vak mai ka la duh.
"Min ngaidam rawh. Eng pawh tila ka sawisel lo ang che" a tih leh hnu ah min chhuahsan ve ta nge nge a, amah anga nunrawng ka ni ve lo a, ka ti na ve thei lo a nih hi. Mahse a bialnu nen hian zalen tak in ka inkawp tir bik dawn lo.


__________________________________________

Matthew leh Mason te pa birthday alo thleng reng tawh. Karkhat chhung kha Matthew nen a hma ang bawk in kan in hel leh zak zak tawh. Hospital ah pawh Irene nen an inzui ka hmudun leh zeuh zeuh tawh a, ka la ţhen lo chu pawi an ti ru ve ve ang.

[Ka rawn lam ang che. Kan kal rual a ngai]

Ka reply peih lo. A hming in nupa kan ni ve a, an chhungte hmuh ah chuan lem kan chan angai leh ngei ang. Ka pasal anga awm a tum thu a sawi khan ka phone number te min dil chawp a, kan inneih hnu fe ah ka phone number pawh a nei chauh a nih kha.

Ka duty hun a zawh chuan muangchang in ka inthlak. Kal chakna leh phur na ka nei hlawl lo. Ka che dem dem a, a theih anga tam hun lak hek ka duh. Inthlak ringawt anih vangin ka duh ang in hun ka hmang rei theilo zawk.
"I chetsual pawn a pawilo mothar hlim chuan a thleng chawk ania" tiin Debbie in min fiam a, a lang in ka nui a, ka chhungril a na em em thung. Engmah a hreve lo a, Matthew te chhungkaw inpui a kan kal tur pawh hi kan in pawhna tur ah ngaiin a lawm em em zawk.

Debbie ban a kuah chungin inthlakna room aţangin ka chhuak a, Matthew alo awm reng tawh.
"Kal nghal mai ang" a ti sup a, rang lutuk in Debbie pawh a inla hrang nghal. Matthew chhuahna lam kawk in "Va zui rawh ţha deuh in aw" tiin min thlah a, thil thleng zawng zawng hi hrilh vek ka chak ţhin, ka thei silo a.

A car bul kan thlen veleh ka ţhutna tur lam kawngkhar a hawng hmasa a, ngawi rengin ka ţhu lut. Min hawnsak tawh bawk a, khar ka tum buai peihlo, a mah bawk in a nem khar a, a tih tur ve reng alawm. Min biak ka hlauh vang in maimitchhing chungin tukverh glass ah ka chal ka ti si a, a hnaiha ka awm hian ka na zual ţhin.

"Lem kan chan angai dawn a"
"Ka hria" ka ti bul hmuk a, biakzui ka chakawm vak loh ang.
"A ţha. Ka nu leh hmuh ah tum hmuk suh ang che"
"Ka hria. Ka awmdan tur te chu i hrilhchawp ka ngai lo" ka ti ve ngat a. Nidang ang chu nise thinrim takin meinei deuhin min chhanglet leh tawh anga, tun ah chuan amah hi thiam lo zawk a ni tih a in hria, ka laka thinrim ve ngawt thei a nilo.

Gate lian tak chhung ah kan tlan lut a, kan inneih aţangin hun a liam nual tawh. Tun hi Matthew te inpui a ka vawikhat kalna a ni. Anu leh pate pawh kan inneih ni bak kha ka la hmu leh lo. Chuti khawp chuan ka inpawh lo a, an chhungkua hrim hrim hi an inpawh lem lo ah ka ngai. Hausa viau mahse an awhawm hlawl loh.

Kan luh dawn ah Matthew chuan ka vawn turin a kut a rawn dah a, lemchan a ngai tih hria in ka lo vuan. Birthday ve meuh si tumah hmuh tur an awm lo. Chu chu hrethiam ni awm tak in "Kan chhungkua kan kalkawm ţhin. Pawnlam mi sawm kan nei ngailo" tiin min hrilh a, sawm ţeuh se ka tan a nuam daih zawk ang.

Inchhung ah kan lut a, a chhungte lo ţhu ţhap ka hmuh takah chuan ka nui sang a, Mason chiah in min lo nuih let. Mason ka hmuh ringawt pawh in ka thlamuang. Midang hi chu an nelawm loh hlawm sia an zing a awm pawh ka chaklo.
"In lokal thei maw? Hei ka nu leh pate chuan hei ka pu hmangaih tak anih hi" Mason chuan alo ti zung zung a, ţi dek in Matthew bulah ka ţhu ve.

"Ka pu ilo damţha maw?" ti a Matthew-an apu a biak chuan a aw alo thian khurh a, a hawisan zui hmak. A lawm tehchiam biklo a nih hi.
"A damţha. Tunlai chu a insawisello" anu in alo ti thung. A fapa chu lainat hmel takin a enzui vawng vawng, kei min huat hmel tehlul nen.

"Ka pa kan rawn hmu tawh bawk a, kan let lehnghal mai ang" Matthew chuan a ti dek dek a "Chhungkaw dan bawhchhiat itum em ni? I la laktlakloh zel anih hi" apu chuan a ti tuarh a. La duhtawk mai lo in "He inchhung a kan lo lawm ve chhung che hi chuan awm mai mai rawh" a ti zui leh. Matthew hi haw viau mah ila ţul ka lo ti lo khawp a, mahse ka lo inrawlh ve na tur niin ka hre lo.

"Ka pa insum ţhin rawh. A nupui pawn nuam a ti lo anga sin" tiin anu chuan a thlavang alo hauh leh vat zawk a.
"A nau zawk Mason pawh a tluk lo"
"Iti diklo. Matthew hian fakna a dawn hnem zawk bakah a record pawh a ţha zawk" anu mai mai chu. Fate thlavang hauh a ti na ngawt ang.
"Ka mit ah hian a ţha zawk thei lo. I nupui te hi ava cher ve. Ngaihzawng ila nei em ni?" a ti leh a, a tar â tawh maw ka ti rum rum mahse a tupa nupui ka nia, an chhungkaw zing a tel ve ah min ngai a, sawihreh a neilo ni mai ah ka ngai.
"Ka pu duhtawk tawh rawh. Emma sawn nuam lo ati nia" Mason chuan a ti dam thluam a, apu chu duat hmel tak in a kuah pah bawk.
"I unaupa laktlakloh zia te chu a hria ang chu. A hna a tlin silo. He mite pahnih lah hian an hum tlat a" tih pahin Matthew-a nu leh pate a kawk a, a hna hi a tlin khawp mai. Chu chu kei ngei pawh in ka hria. Apu hian a huat viau chhan tur awm ang hi ka ngaihtuah thiam lo.

"Ka chau riau ka han chawl hahdam ange" tiin Matthew a inthiarfihlim a, lemchang mah ila ka umzui buai duh lo. Amah a awm a duh zawk in ka ring.
"Ka pa a tawk tawh viau a ni. A naupanlai aţang tawh in a chhiatna lai ringawt i hmuhsak a" Matthew-a pa chuan a ti ve ta nge nge a, awmdan tur pawh ka thiam lo. Lo sawi ve tur ka hrebawk silo a.
"Ţhatna nei heklo mawle. Mason te unau a tluk lo emai"
"A tawk" Matthew-a nu rawn au tuarh ah chuan ka phu zawk thei.
"I ţawng tam mah mah tawh ka pa" sehchilh rap rap in a ti a, ţan lam nei ţham in an awm a nih hi.

"Emma lo kalrawh hawi thawveng teh ang" Mason-an a tih tak ah chuan ka lo lawm ngei mai. Hma a hruai a, keiin ka zui a, kan thlen hlim aţanga boruak rit nghal churh chu tlanbosan ka chakna a rei tawh.
"Matthew kha a ţha ang tiraw?" step a kan chhoh hnu ah ka zawt ngam chauh.
"Diktak chuan ţhalo ang. Ka hrilh vek dawn che nia" a ti a, kawnkhar lian vak lo a nam hawng a, inchung zawl nuam tak alo awm reng. Pangpar a awm kual ţeuh a, pi pi ni awm tak thir a siam a awm bawk. Chutah chuan kan ţhu a, an chhungkaw awmdan kha mak ka ti tak tak a ni.

"Hrilh loh che ka tum zet na a, mi â ang maia a ţawng apiang i enkual hnu ah kha chuan hrilh che ţha in ka hria" a ti fiamthu a, "Min hrilh har zawk ngawt alawm" ka ti ve vat bawk.
"Ka pa leh Matthew a nu hi ka nu nen an inneih lai rengin an inkawp ţhin a, ka u pian rual chiah hian Matthew hi a piang ve. Ka u kha thla tlem te chiah in a upa. Chu chu hrevek chungin ka nu khan a nei lui zel a, a thih thleng khan. Ka nu a thi a, a thih hnu kar khat lek ah ka pa in Matthew te nufa hi a rawn hruai haw a, naupang te kan la nia, nu thar kan nei leh kha kan lo lawm ve em em laiin ka pu ngaihdan kha a ni lo a, hnawhchhuah te a tum a, ka pa in a hum tlat a, Matthew ah hian a ţuan ta a, a zin a, thil min lo hawn pawh in Matthew chu a hawn ve ngai lo. Thil ei phalsak loh chang te a nei ţhin" a nui hak a, apu thiltih chu awm ang lo a ti ve hle in ka hria.
"Matthew nen hian ngatinge in in huat?"
"Ka pu hian min in eltir ţhin a, zirna ah leh kawng engkim ah. Kan unau in min ţan dun tir a, Matthew kha a mal ţan ţhin. Naupang kan nih lai chuan nuam kan ti zawk mah a, kan upa zel a, Matthew kha kan huphurh ta ran a, kum18 a nihin ka pu hian in aţangin a chhuah tir a, nu leh pa ala neih miau vangin pawisa ah chuan harsatna a tawk chuang lo. Irene kha amah pui turin awm lo phei sela chuan Matthew hi chu a thi daih tawh ang. Kan unau hian a thil neih apiang laksak ţhin ah Matthew hian min ngai a, ka rawnlet leh pawh hi a lawm lo ang tih hriat sa tho a ni. Kan awm ve chuan ka pu hian a haw lehzual amaw tih mai tur a ni ţhin a. Ka pu leh ipu in thu an tiam angin in in nei a, i pasal tur diktak zawk chu ka unaupa a ni. Matthew hian Irene a hmangaih zia ka pu hian a hria a, tih hrehawm a duh vangin a neihtir che a nih kha. Hospital changthei zing a a hming paih ah leh tuithlar ah hial a vau a, a nei ta che a ni. Tun ah hian kei in nge Matthew hian hospital hi nei dawn ala hriat loh. Anu hian a nawrlui nasa tih hrebawk la, fa neilo tur a ka hrilh chhan che pawh kha ania, anu hian Matthew bulah enge a sawi ţhin ka hrelo a, ka nu thih hnu lawkna rawn lut duh chu nu nasa tak a ni dawn tih hre tel la, kan unau a Matthew hian min huat em em chhan pawh a nu vang hi anih ka ring tel bawk. I hriat tur a ka duh bawk chu, ka pu bulah neih che ka dil lo. Matthew hi a rawnkal ngai lova, kha thu pawh kha anu hnen aţang bawk a a hriat a ni ngei ang. Min ngaih dikloh phah loh ka beisei" uluk deuhin ka ngaithla a, an chhungkua chu an buai ve hle mai. Matthew pawh khawngaihna chen ka nei.

"Khawnge i unaupa chu a awm ve? Min neih duhlo in a tlanbo em ni?"
"Tlanbo lo e. Room ah a awm. I hmu duh em?"
"A fel em? Min hmu duh angem?"
"Tehreng mai. Ka mihring hriat ah chuan a fel ber ang. Lokal rawh le" a ti a, ka ban ah a vuan a, kan chhohna ah bawk khan kan chhuk thla leh a.

Kan awmna inchungzawl hnuai chiah a room pakhat ah min hruai a, kawngkhar a hawn hma in ka mit a hup a, "I inring maw?"
"In ring e" kawngkhar kalhna a herh ri rak a, a nem hawng zui a, hmu thei lo mah ila a thawm aţangin ka hrethei. A kut awl lama min kuah in room ah chuan kan pen lut a, ka mit a hupna a lathla nghal bawk.

"Emma ka unaupa hi hmelhriat rawh. Mafela, i hmangaih tak ni ţhin kha" ka hma chiah a Mafela thlalak lian tak in tar chu ka en ngawt ngawt ringawt.


CONT... (A hnuaiah advertisement khu kan click theuh dawn nia aw)

---

Show post links

Top

ADVERTISEMENT (A hnuai a milem hi a nia hmeh zeuh tur chu)

Ngaia

Site Admin

• Quote

Unread post April 8th, 2019, 7:45 pm

FORCED MARRIAGE-8



"Eng-enge-awmzia" ka ti bah nuaih mai. Mason an min thlah rual chuan ka thlep hnawk a, rang takin min rawn dawm leh vat. Mafela ka hriat ţhin kha chu a hausa ve si lo a, security mai mai amaw ka tih ţhin kha ka thawhna hospital neithei reng alo ni ta daih a, ka pasal tur diktak ala ni zui a, a thih hnu ah chauh ka hre bawk.

"Ka unaupa hnen aţang hian i chanchin ka hre ngun ţhin. Thi lo sela chuan Delhi ah ka la awm reng ang. Mizoram hi nuam ka ti ve lo" a ti sep sep a, Mafela thlalak chiah ka la en. Unau an nih vang anih hi an lo in an em em ni.
"Mafela ka hriat kha chu security alawm" a lo nui hak ri ka hriat chuan min chhawk lo kher mai.
"Lawyer a nih kha. Delhi ah kan awmdun char char ţhin. A dang chu i hriat tur a awm tawh lo a, chuan nangmahin i ding thei tawh ngem?" a ti deuh duah a, lu bu nghat chungin a vawn na a ta in lahrang hmasa zawk ah ka ţang.
"Mafela hi chu kum3 kan inzui a, ka hrechiang ve viau a sin. An in ah pawh vawi tam kal in chaw pawh ka ei ngun"
"Ka nutei te in ah anih dawn chu" nuihza insum tak in a ti leh a, kum tam tak bum in ka awm a, chu chu min nuihzat ni mai in ka hria, ka lawm lo hle bawk.

"Mawl min tih vanga nui inih chuan in thup duh suh. Langsar deuh in nui rawh. Mafela te hi ala dam hial lo maw? A thihna hi phuahchawp in in lo thukru a ni lo maw?" thinrim takin ka ti ve phiar phiar a, ţawngrin ngam a ni lo mai zawk a, ka thinrim zia erawh a hmuh hmaih in ka ring lo.

"Dam sela chuan Delhi ka chen na nuam lutuk kalsan in hetah ka rawnkal lovang. I awm nawm loh hlau in thudik tlang takin ka hrilh che a, Mafela thukru tur ah min la ngai amaw?" a ti ve ta khur khur. Tun ah chuan tumah hlauhna ka neitawh lovin ka hria.
"Ka rindan ka sawi mai anih chu. Thuruk in ngah em em dan ah hian thil awm ang a ni ve tho a" ka ti a, ngaihruat nachang kha ka lo hre miah lo a, Mafela ruang chunga ka awmdan zawng zawng Matthew-a chhungte khan an lo hre vek a, an hospital a nurse thawk pawh min hriatkim loh laiin security thi phei kha chu an umzui vak kha a rinawm loh a, he chhungkaw zinga alo tel ruk ve reng vang anih hi an lo hriat em em ni. A nihna diktak hi engvanga ka lakah lehzel zep nge a nih? Min hmangaih miah lo in min lo hmang mai mai em ni? He thu hi a thlalak en chung in ka in zawt mawlh mawlh. Kum 3 chhung hmangaih tak a ka lo zui tawh pawh tun ah chuan ka ring leh thei ta lo.

"Mafela hian ka lak ah lehzel engvanga a nihna thup nge a nih?" tiin a unaupa Mason chu ka zawt ta zawk. Mafela chuan min chhang ve thei tawh si lo a.
"Ka hriatpui lo a, ka chhangthei lo che" a in her vut a, a kal hma in a kawr ah ka pawt hman tho. Nin hmel deuh in min en a, zam lo tak in ka lo en let ve.
"I hriatpui tih ka hria lawm Mason. I thil min hrilh aia tam daih hi hriat pawh ila neih ka ring"
"I hriattur a ka duh chin chu ka hrilh che a, lawmthu min hrilh zawk rawh. Hei ka unaupa pawh ka hmelhriattir che hi. Zawh na i ngah tual tual a, min zawh chak tak tak pawh ila nei nual ang. Mihring nih dan anih hi. Kan thih thleng in eng nge maw hriatchak em em kan neih ka ring. Kan zawhna neih zawng zawng hian chhan na a nei vek lo. Ţhenkhat chhan theihloh a nih laiin ţhenkhat sawichhuah chiloh te a awm a, i hriat duh ber kan chhungkaw chanchin i hretawh a, kan chhungkaw mo inih vangin hriat i phu bawk. Thil dang ah chuan inrawlh buai lo ang che" a ţawng chhung zawng khan ka lo in sehruh ve char char. Zep chu ala nei ngei dawn anih hi.

"Chhuk tawh ang. Ka unaupa i ngaih chang chuan ka pu i hmuhduh thu sawiin chhuanlam siam la, he room ah hian i kal ţhin dawn nia" a ti nem leh duam tawh.
"Tun ţum a ka kal hi vawikhatna leh a tawp na anih ka ring" a hmel en tawh lo in a kut ka melh daih a, nghet tak in a hum a, a kut chang te pawh a var pap thei hial.
"Kum 3 chhung min bum tu chu amah hmuh tur a awm tawh lo a, ka ngaih vang mai a a sulhnu chhui reng tur in min ngai em ni?" thle ha chungin a mit ah tak ka en leh tawh. A kut hum dan aţang khan a thinrim zia a lang a, a hmel ah erawh a lantir miah lo. A tih ţhin ang chiah in a nui sang tho.
"A sulhnu chhui turin ka ti lo che. He room ah hian a sulhnu chhui tur a awm lo. I duh duh hun a i luh ve ka phalsak che a nih kha. Ţhian kan nih kha, i ţhian ka nihna ang in mamawh ineih chang apianga i kal theih nan ka room leh ka unaupa room a in hawng reng tih na. I pasal vanga i ţah chang ten" ka pasal lo ţahna chhan tur ka neilo ah a ngai anih dawn hi.

Na lo te a ka chal a nem pah in "Ka unaupa room chhung ah a laka i lungawi lohna i sawi chuan a thinrim dawn sin. Lo kalrawh, kan tawm bo reitawh, chhuk tawh ang. A nih loh chuan ka nuhrawn in thawnthu mak deuh a phuahchawp leh palh ang" a ti a, ka ban a rawn vawn a tum chuan ka lo duh lo. Mak a tih hmel deuh na a reivak lo hnu ah a nui zui hawk a, room aţang chuan min chhawm chhuak ta tho a.

A khar dawn thlengin Mafela thlalak chu ka la en. Ka pasal tur diktak chu amah a ni tih a inhre ngei ang Mason pawn a hre tlat a. Matthew tih hrehawm a duh ve tho vangin a pu thiltih chu a pawmpui ta mai ah ka ngai. Ka haw hlur a, ka hmangaihna erawh a ngai reng tho.

In hnuai ber a kan chhuk leh lai chu min lo thlir ţhap a, an lam pan a kan kal laiin apu in nui ruh ruh chung in "In in hmeh kha mawle. Ka neih tir mai dawn che mi? Mason" alo ti a, fiamthu pawh nise ka duh lo. A ţhianpa tu nu ka nia, bungrua ang mai a a chei tur ka nilo.
"Ka unaupa nupui anih hi ka pu" an ţhut khawmna kan thleng chawpchilh nghal a, Mason chu apu ţhutna ţhutthleng ban ah a ţhu a, kei erawh a hran pa in ka ţhu thung.

"I pasal i ngaihven tur ah ka lo ngai a" ram hmak a tih pah in a mitmeng lian kel kawl tak chuan min en run bawk. Matthew ang bawk in a hnar ngul a sang vah a, a lian in a ngo suah bawk. Nu hmelţha tak a ni na in a nelawm loh hle.
"Amah a awm a duh zawk ka ring a" ka ti ve mai a, min mamawh chiah pawh in ka ring lo. Irene chu awm se a mamawh ber tur a ni.
"A duhzawk ang. Naupang anih lai aţang tawh in Irene lo chu tumah a ngaithei hleinem. Mason te unau tel ve an tum pawh in a phal ngai lo. Irene kha amahin a hauh bur a, mahni hmasial tak a nih hi, i pasal hi chu a buaithlak a nia"
"Irene chauh kha a neihchhun a ni. I neihchhun thil chu i roh ve bawk dawn lawm ni? Tunge mal taka siamtu ngaihtuah zawk ta che?" anu chuan ati leh hmarh hmarh tawh. Hetianga an awm hi nuam ka tih loh vang in Mason ka zui a, kan let leh chiah a, bul an ţan leh dawn a nih hi.

"Ka tupa ni tur a ka pawm ve hi lawm viau zawk rawh se. Hospital chang theitu zing ah hial a awm tak hi"
"A thiamna avang hian hospital hi a kut ah a awm ngei ang. I thuneihna avang ngawt khan i hnukthla thei lo. Mason pawh Delhi a awm a duh zawk a, a rei ang a, a kal leh thovang. Ral aţanga hospital enkawl chu han ngaihtuah ve la" a nu in a tih laiin Matthew a rawn lang hlawl a, ka bul ah chauh hmel tak in a rawn ţhu hnawk a, apu bawk chuan "Fa neivat rawh u. Matthew englai mah in min tilawm ngailo. Fa ineih chuan ka lawm ve mahna" alo ti leh a, ka ip nghal chawih thei. Ţul miah lo ah thilthleng bawk kha ka ngaihtuah leh hman.

"Ka pu, Emma nuam lo tihna tur zawng in ţawng tawh suh. A lokal duh tawh lo mai tur a sin" tiin Mason chuan a rawn khap leh a, "Emma hi i ngaihven riau mai. Nitin i chanchin a sawi ziah ania Emma" apu in atih leh veleh Matthew a ding hluai a, ka banrek a rawn man in min pawt ding zui ve zat.
"Kan kal ange. Vawin atan chhungkaw dan ka bawhchhia a ni mai. Ka pa i piancham ka lawmpui che, nidang ah tui deuh ka la eipui dawn che nia" a ti a, ţhutthleng a ka bag dah la turin a kun leh zawk a, ka bag a khai a, min kalpui dawn veleh a pu bawk in "Kan chhungkaw zing ah hian kan lawm ngai lem lo che a, lawm loh ber in dan i bawhchhe dawn a, he in ah hian rawn lut tawh hlek suh" vin tak in arawn ti leh hram.
"Rawn luh hi ka chak ngai lo. Ka nu leh pa vang chauh a ni ka lokal. Anih leh le Ka pu, damţha zel ang che" a ti a, midang chu kan ngawi dak vek. Chak deuhin a kal a, min pawt dawr dawr a, pawn a kan chhuah veleh min thlah chauh.

Step tawp ah a car a awm a, step ah chuan muangchangin a chhuk a, a hnung ah ka zui a. A thil tih vang khan ka la haw em a, hnem tum na pawh ka la nei chuang lo. Step tawp kan thleng a, car kawngkhar min hawnsak leh a, ka ţhutluh hnu ah ka malchung ah ka bag a rawn dah a, ka bag a khai reng tih ka hre leh chiah. A nem khar leh a, a che vel ah chuan phurna a awm lo a, a rawn ţhut luh ve chhung pawh chu rei tak a ni. A in ngaihtuah nasa a nih ka ring a, dawhthei tak in ka lo nghak ve reng.

A rawn lut a, car a ti nung a, a tawlh ta riai riai a, gate kan tlanpel chiah chu kan dawk zawk ni maiin ka hria. A tlanchak lutuk a, ka hlauh em vang in ka mit ka chhing tawp. Ka hlau tih a hria nge "Ka tihpalh" a ti sup a, tlem chuan a tlan muang ta deuh.
"Emma ipu kha eng ang mizia nge?" ti a min zawh chuan chhuang tak in "Pa fel tawpkhawk mawle. Min hmangaih a, min duat bawk a, midangte ţanpui nuam a ti ţhin bawk a, ka ngai ţhin tak tak a ni" ka tih siam siam laiin amah ka en zawk a, hmalam a en run a, a mitmeng chu nidang ang lo tak in a dul ruih mai. Apu leh ka pu a khaikhin a ni maithei.
"Vawin a thil thleng kha pawi ka ti" ka ti leh ta ringawt. Sawichhuah a duh ka ring chiah lo a, sawitur dang ka hretawh si lo a.
"Chhungkua aţanga ka hming a paih loh chuan a tawk mai. Ka nu leh pa damchhung chuan Mason hian hospital a neithei lo. Hospital hi ka kut a a awm chuan ka pu a lawm dawn lo a, chuvang tak chuan neih ka tum. Ka phuba lak ve theihna awmchhun a nih chu" a ti chang fak a, a tumruh zia pawh a hmuh theih.

"I lak a ka thil tih kha ngaihdam ka dil nawn leh duh che. Midang ngaihdam harsat chi leh midang hnen a ngaihdam dil pawh duh ngailo ka nia, ka thiltih kha ka inthiamlo takzet tih i hre dawn nia" a thutak viau a, a awki pawh a nem in inthiamlo ve tak tak a ang mahse "Ka ngaidam theilo che" ka la ti tho. Ka rilru na hi a dam thei lo.

"Min hnaih lo turin ka la duh tho che. In hawn ka tum lai takin rapthlak tak in i che a, nakin hun chu ka sawithei lo. Tun ah rih chuan ka ngaidam theilo che" ka ti nawn leh. A thaw hak a, thildang a sawizui lem lo a, kan in pawh kan thleng chawpchilh nghal mai.

A thim ruih a, tumah an awm tawh lo a nih hmel. Hetiang a a thim ruih hi chuan ka hlau ţhin. Kan in leh a vel hian zanthim ah chuan nelawm na reng reng a neilo. Zing ah a mawi leh em em tho si. A chet hmasak nghak lo in keimah in ka chhuk a, kan inpui kawngkhar pan na step ah chuan thim viau mahse ka bel tawh vangin ka tlanchho. Kawngkhar ka hawng a, ka luh rual in light ka on zui nghal a. Pi Sangi chuan a tihdan ngaiin fel thlap in a kalsan a, puitling vek kan nia, tihnawktu tur kan awm tawh lo bawk a, chet na tur pawh a tlem deuh in ka ring.

Ka pindan a lut tlang mai lo in sofa ah ka ţhu rih a, chhun aţangin engmah ka eilo bawk nen ka ril a ţam a, thil ei te ka duh. Matthew rawn lut ve chuan "Pi Sangi ka bia a, rawngbawl sa in a dah a, han inthlak la, ka lo tilum ang" a ti zung zung a, ţhumuang lo in choka ah a lut tlang nghal. A rual a thil ei tum na ka nei miah lo.

Ka muangchang lui a, ka inbual a, bathtub ah pawh rei deuh ka inchiah leh. Lo ei hmasa turin ka duh. Ţhat chhuah mahse a der mai mai a ni tho vang. Ka inbual zawh ah muangchang in ka inthlak leh a, tih lum chhung leh a ei chhung ang tur hun ka hmang tawh. Min nghakchhuak lo chiang khawp ang.

In hnuai pan na kailawn a ka chhuk chhung pawh a rei. A lo la awm hlau in ka tawi ka tawi a, step tawp ka thlen veleh ka ding muang leh a. Ka hmuh hreh zia hi hria se chuan a hma ang khan min hel leh reng mai tur. Kalna tur dang a awm miau loh vang in choka ah ka lut ta nge nge a.

Dawhkan ah eitur alo in hung a, Pi Sangi chuan nidang ang in a siam tam lo anih hi. Matthew chu alo la inthlak ve lo a, apron nen a ka hmuh phei chuan mak ka ti chu ka ka hau ringawt. Amah en reng chung in chair ka pawtchhuak a, ka ţhut hnu ah ka bulah ka phone a rawn dah a, "Car ah i theihnghilh a"
"Ka lawm e"
"Ava keh nasa ve"
"Ka thlauh a, a pawilo a rei deuh tawh hrim hrim" tih pahin ngaipawimawh lo deuh in ka dar ka san ak a. A hmui hnuailam a pet sawi zauh a, thilsawi tum ang deuh in a awm na a engmah a sawi ta lem lo. A apron awrhlai hlih pah in "Plate vel kha chu Pi Sangi sil atan dah mai rawh. Ka han intifai ve ange, eitui le" a ti sep a, "I ei ve dawn lo mi?" ka lo ti mawi ve tho.
"Aih ka eichak lo" tawi te in a nui a, min chhuahsan zui nghal a, an inpui a kan kal aţang khan ala pangai lo hrim hrim.

Ka rilţam tawh vang in ka ei bawrh bawrh a, siam tam lo mahse a siam uluk ve a nih dawn hi. Nidang a thil hmin har deuh deuh siam duah ţhin si vawin chu siam awlsam chi tlem te chauh alo siam a, Matthew tlanchhiatsan duh in ka pindan ah darkar khat ai tam daih hun ka hmang a, ala sa ţha var hlawm tho sia, ka thil ei hi Pi Sangi siam a ni tak tak em le?

Ka eizawh hnu ah plate ka silfai a, thil tih harsa a nilo a, kan in ah pawh ka ti ziah tho a, naktuk daih a Pi Sangi lokal tur sil atan a lo dah ngawt chi a nilo. Ka tan pawh a zahthlak alawm. Ka silzawh ah hru ro leh in ka rem ţha leh a, ka tihfel zawh hnu ah choka ti thim in mu tur in ka kal ve ta chauh a. Matthew a rawn in lan leh tawh lo a, ka eitui leh tui loh min zawt tur tal a a rawn inlan leh te ka beisei ve ringawt a, rawn inlan sela chuan ka haw leh viau tho si ang a, a awm loh in ka zawng a, a awm in ka hua a tih ang vel a ni.



Zing a ka ţhanharh rual in ka tho kang nghal vat. Zing lam ah ka duty tawh a, muangchan chi a nilo. Nidang aiin ka mu rei lehnghal. Bathroom ah lut in ka intifai zung zung a, hospital a kal in peih thlap in ka insiam nghal bawk. Ka kal hma a thil tlem ei tum in inhnuai ah ka tlan thla a, choka aţanga thil rimtui tak lo chhuak chu ka lo hip vang vang, ka eichak lehzual.
"Emma iva inpeih hma ve"
"Ka duty hun a inthlak tawh kha" chair pawtchhuak in ţhuthmun ka rem a, Pi Sangi chuan a thilsiam tui hmel tak tak chu ka hma ah a rawn hun diat diat pah in "Nizan chu in ei tui maw? Ipa piancham ah hi chuan an siam ţeuh zel a, ka lo tel ve theilo mai pawh a" a ti luam a.
"Thil ei hma in kan lo haw daih a"
"Anih chuan pawn lamah in eichhuak tihna mi? Engmah ka lo siam silo a, nizan ah pum ruakin in mu em lo ang chu maw?" min ngaihtuah tak chung in a ti leh a, "Matthew khan Pi Sangi ka bia a, rawngbawl sa in a dah ati maw ka tia, thil ka ei alawm. Nidang aiin isiam tlem in a awlsam chi hlir isiam ka lo ti rilru a" ka tih chuan a nui ta huau huau a, alo be miah lo anih dawn hi dawheh lutuk.
"Aman a siam chawp anih dawn chu. A siam lai te ihmu ve lo em ni?"
"Hmu nang. Room ah ka awm daih a"
"A duh chuan a siamthiam ania, aman a ei ve em?"
"Aih. Ka eichak lo ati lawm" ka ti hmuk a, dawtsawi kher lo khan keiman rawng ka bawl dawn tih ve mai tur ania.
"Eiluih tir ta che. Saw in aţanga a rawn haw saw chuan a hlim lo vek zel. A unaupa hmanni lawk a thi ta lah khan a haw em em a, a tihsual ringawt hi a zawnsak a----" a hmui a hup ta daih. A ţawngsual a ni ngei ang. Pi Sangi pawn thil tam tak a hriat laiin hriat ka nei ve mang lo a, tin, hetiang buaina a Mafela an sawichhuak ve ziah hi ka duh lo bur bawk. La dam ve sela chuan Mafela pawh min lo bum vang khan a chung ah ka lungawilohna ka tilang nasa viau ang.

"Ka kal dawn. Ka tlai palh ang" tih pahin ka tho a, Pi Sangi chuan thil ka zawh belh a hlau nge min hlat telh telh lehnghal a. Mason a hriat loh thu min hrilh tawh a, Mafela a hreleh lawi bawk sia, Matthew chungchang hi a hre hnem zek in ka ring, a naupanlai aţanga awm ţhin tu a ni bawk a, Matthew hi a fa tak tak ang a a hmangaih ngei pawh ka ring.




Hun a liam ve zel a, kan nupa pawn kan la in hel zak zak reng. An inpui a kan kal aţang khan thla khat ai tam a liam leh tawh a, ka la haw em em reng a, ka hriatloh in ka hnunglam ah thil min lo tihsak ţhin a, ka hriat leh hnu pawh in lawmthu hrilh ka nei ngai lo. Ka hun hman dan pawh a ngai. Ka duty a, ka haw veleh room ah ka inkhung chawt a, ka rilru a buai em em reng a, ka ngaihtuahna hi a chawl lo tih theih a ni. Chungte vang chu a nih ka ring ka chau ngawih ngawih a, Debbie leh Mason pawh vin vak vak chang ka ngah. Irene leh Matthew ka hmuh dun phei chuan ankhum vak ka chak ţhin. In hel zak zak mah ila a rawn haw leh haw loh ka ngaichang ziah a, a rawn haw tlai ngailo tih ka hre thlap. Min biak a tum apiangin chhuanlam siamin tih tur dang ka dap a, keimah zawk hi a hel nasa tu zawk ka ni maithei.

Tun ah pawh Debbie nen kan duty a, register a thil a ziah mawlh mawlh laiin dawhkan ah ka lo bawk nguai a, min melh zeuh zeuh a, ziah zawh hram a duh vangin a ziah zawm leh a, kan ward in a kan mamawh tur ang zawng in almirah hawng turin a tho leh zawk ţhin a, mamawh tur ang a enkual a, mamawh kan neih ho chu a ziahna tur bik a kan dah ah a ziak pah zel bawk a, nidang ah chuan ka pui ve sawk sawk ţhin a, tun ţum chu ka peih lo. Ka rit bur a, haw daih mai te ka duh.

"Tun hnai te hian i zawi riau mai?" min en kal a, thil ţhalo a awm a nih a ring ber in ka hria.
"Ka tai ana riai riai a, ka period dawn niang" ka lo ti vat a, ka tai zawn ka dawm pah bawk.
"Thla hmasa khan i period em?"
"Aih" Debbie nen chuan kan mak tihdan a inchen vel in ka ring. A ni theilo ka ti ru mawlh mawlh a, hmeichhia chuan vawikhatna ah pawh raina chance kan nei tih ka hria. Khatiang thil tenawm tak vang khan ka rai duh lo. Ka rai lo ang. A hun a in sawn ringawt dawn aniang.

"Emma nang hi---"
"Chutiang a nilo" ka lo ti vat. Ka duh lo bur. Tunah chuan rai lo ila ka tan a ţha zawk. Ka rai vangin min hnaih lehzual a tum ang tih te ka hlau. Ngatinge ka ke pen tin ah hian buaina hian min lo hmuah zel bik le? Hlauhna in ka khat a, ka kutphah te a thlan dup thei hial. Nurse ka ni a, lo in chik ila chuan ahma ang tawh khan in rinhlelh nachang ka hre daih tawh ang. Rilru buai nuaih chung leh Matthew hel tum reng reng khan ka khawsa a, ka lo in chik ngailo a, Matthew nen a kan inzawm na tinghet tu tur engthilmah ka duh rih lo a sin.

"Test ngei ngei ang che. Engtin chiah nge i awm ţhin?"
"Engtinmah ka awm lo" ka lo ti hlar a, a nui ţhaw lehnghal.
"I pasal hi i haw viau amaw ka tia, naute hmuh vat ka lo in beisei hleinem" tiin min fiam zui a, keichuan ka la in ring duh chuang lo. Ka lak a rawng tak a che tu fa chu ka pai theilo ang.
"Gynae ward ah ka va kal ang a, velocit ka va dil ang" a nui var var reng a,a kal tur pawh a phur nasa mai si. Debbie awm loh hnu phei chuan ka hlauthawng lehzual a, ka chal aţang te chuan thlanfim a bawl ţuk ţuk lehnghal a, ka rilru in ka ţawngţai a, atthlak viau mahse ka rai loh nan ka dil.

Debbie rawn let leh chuan a ipte aţangin a thil lak chu a rawn phawrh a, ka hmuh ringawt pawn ka ţim ur ur thei.
"Debbie test kher angai lo. Ka rai lo ang. Dahţha la mamawh tu an awm ang" ka ti sawk sawk a, ka thusawi ngai pawimawh lo deuh in velocit chu min hmehbel chawt chawt tho.
"Test hrim hrim rawh. Ka hlim em hi, alo nih loh tak leh nidang ah kan ti leh dawnnia" ala ti tak deuh deuh a. Ka test hma chuan min nawrlui tho ang. Ka hlau tih a hre lo mai mai a nih hi.

Washroom aţanga ka chhuah rual in Debbie in mitmeng nung sar in min lo en a, ka thil hum bo vek chu ka pe veleh a, "Ala lang lo mi?" alo ti ha a.
"Keimah in ka en ngam lo" ka ti chhuak ta nge nge a. Ka test zawh a ka nghah vang vang hnu khan en ngam lo in ka hum bo leh a, negative se ka ti takzet.
"Lungngai suh. I pasal nen in in pawh lehzual nan a Pathian ruat ah ngai rawh" tih pah in a thil ken chu a en ta nge nge a, ka hmu ve chiah chu ka bing mum mum a, tlu tur ang mai ka ni. Bang ngheng in ka ding hram hram a, ka thaw a chham lo chauh bawk.

"Emma ka van hlim tak. Hlawh ka lak apiangin naute thil tur ka lei ziah ang. In enkawl uluk rawh aw, ka lawmpui che" a au chel chul a, a thil ken chu lek kang va chungin kan awmna room tetakte ah chuan a tlankual a, a au ri chu damlo te pawh in an hriatphak hial ka ring.
"A ni theilo" ka ti sap a, ka mit ka chhin rualin ka biang ah lum thla riai riai a, ka mittui a tla tih ka hria, hlim na mittui a ni miah lo lehnghal. Tih tlak thlengin ka ngaihtuah hman hial.
"In nupa en chuan a hmelţha viau ang" a ti leh a, kan inthlakna room tetakte hi Debbie au thawm in a khat vek.

"Ţap suh" a ti sep a, ka pum rawn khawih chung in "Inu hi a hlim lutuk vangin a ţap vel ania" a ti leh a, ka hlim loh lutuk vang tih a hrelo mai mai a ni. Ka mittui ka hru sawk sawk a, naute hi ka duh lo. Ka hmuh apiangin ka chung a thil thleng kha ka hrechhuak zel ang. Pathian pawh ka dem rum rum hial. Fa awt ngawih ngawih te an rai theihloh laiin kei, chupawh vawikhat na ah chauh lehnghal. Hetiang em em a nasa hremna tuar tur hian tihsual ka neih pawh ka hrelo.

"Duty ve si hetah eng nge in tih reng? Damlo te sawi ngaihven ta che u" Mason rawn lut chu Debbie in alo kuah chung chung a, a hrilhhai hmel em em lehnghal.
"Kan ţhiannu hian nau a pai. Party a ngai Mason. Chawhnu lam ah a lawm nan thil ei ho ang u aw" Debbie in alo tih veleh ka tlanchhuak a, kan pathum a kan inkawm nasat vang in a hrilh ve kha ka ring sa hrim hrim. An chhungkaw chanchin leh fa neilo tur a min tih vel kha a hreve tlat lo a.

"Iva hmanhmawh ve" ka banrek ah a man rual in ka ding chawt a, ka kut chu ka phih thla rang hle bawk.
"Min khawih lo tur a ka tih che kha. Tun ah phei chuan ka haw lehzual che" ka ti tuarh a, nau ka pai thu pawh ka hrilh dawn lo. Naute hi engtin nge ka tih dawn pawh ka la hrelo.
"Tihsual ka nei leh ta mi?" nin hmel deuh in a ti ve a, a tihsual hian ka damchhung min nghawng tawh dawn a nih hi.
"Ka la ngaidam reng reng lo che. Kum tam tak liam leh pawh nise ka ngaidam lo ang che" ka ti leh a, ka sawitum chu a hriatthiam ngei ka ring.
"Ka hria, ka inthiamlo bawk. Ka ngaihtuah reng phah che a nih hi"
"Maw?" ka ti khur hlak hlak tawh. Tun ah tak hi chuan a engkim hi ka hua.
"Emma khawngaihin"
"Min lo ngaihtuah ve ka ngai lo. I bialnu bulah khan awm hle hle rawh" ka ti leh a. Kalsawn ka tum a min lo vuan leh chiah chu "Eng nge ni leh ta?" ka ti vak a, ka thinrim lutuk chu ka lungphu te a rang vek.

"Engkim a ţha vek em? Emma" a ti nghut a, "I hriat ve angai lo" ka ti leh hmak. A inthiamloh vang a min ngaihtuah thar thut pawh a ngai lo.
"Eng hi nge i hriat reuh ni. Ţhat chhuah ka tum in i vin hlar reng mai"
"Tum buai tawh suh" min en run a, a thinrim a in sum nasa ve khawp ang.

"I thinrim loh deuh hunah kan inbe leh dawn nia" a tih te chuan ka ngei lutuk chu ka lo ner nang nang. Amah vang hian ka nun a chhe vek tawh zawk. Ka neih vang a a nun chhe vek ang khan a sawi a, tunah chuan keimah hi anih hi chhe vek tawh zawk chu. Ka bula a awm laiin ka thinrim a, a kalsawn vang in ka thinrim leh bawk a, ka in hrethiam teh nuaih tawh lo e a. Ka â vek tawh in ka hria.


"Hetah hian nimaw ilo bihruk a?" dawr bula kan ţhut chawlhna ţhin ah ka awm a, zawn hmuh ka har lo.
"Ka awmna a lansarh em hi" ka bula rawn ţhut pah in Mason chuan min kuah thuak a, ka taksa ţang at a hriat rual in min thlah lehnghal.

"Ka hlauh chu a thleng dawn ta a ang. Thuruk ngah tak fa chu i pawm ngei a ngai ta sia" a ti sup a, ka naupai vang a hlim tak tak chu Debbie chiah a ni ngei ang.
"Hospital a neih theih nan tih hreh a neilo a, nang lo hmangaih dang daih a nei bawk. Hmeichhe â deuh deuh zing a chhiartel i ngai ve tawh dawn anih hi" za lo deuhin a nui hul hak a, a unaupa diktak zawk vang pawn ka naupai hi a huat ka ring.

"Nau ka pai sia min hrelo der tawh mai rawh"
"Chutiang chu ka ti thei lo. I naupai hi i dangdai riau lehnghal. Hlim tur inih laiin i lunghnur em em zawk a. Naute kha i pumchhunga a insiam ţan mek lai aţangin i lawm lo nghal niin a lang" a ti dap dap a, ka lawm hauh lo reng a.
"Lawm lo mah ila ka fa anih chuan ka pawm ngei angai tho lawm"
"I lawm loh tak tak chuan tihdan ka hria" a thil hriat chu ka thil ngaihtuah lai nen a in an chiah ka ring.

"Hmeichhe lam doctor pakhat ţhianţha deuh ka nei a, a hnen ah ka hruai thei ang che. Midangin an hreve lo ang"
"Eng ti turin?" ka lo ti ha a, min hruaichhan tur te chu ka hrechiang nasa mai.
"I in entir ang. Tihdan alo hre mai ang. Naute kha i tihtlak duh chuan ka pui ang che" min inrempui tum ni awm tak in a kut a rawn dahchhuak a, ka lo vuan mai thei bik lo.
"Naute kha i vanduaina tur a nih kha. Ti tla la, i him a ni mai" a tih leh hnu ah a kut chu ka lo vuan a.
"Tihtlak chu i duh takmeuh maw" a tih chuan "Tehreng mai" tiin ka lo chhang vat. Mason a nui suk a, ka thinlung a rum vawng vawng thung.



CONT...
(Naupan tet aţanga ka kawm ţhin ka ţhiannu a accident a, nizan aţang khan ICU ah biak theihloh in a awm a, ka rawn dah tawi deuh a, min lo hrethiam leh hram dawn nia. Chuan khawngaihin in lo ţawngţaipui ve dawn nia. Min hriatthiam na tam tak inneih vang leh, ka thuziak in lo hlut a, comment te min lo peksak ţhin vang hian thinlung takin ka lawm bawk. In ţha ber vek e ❤❤❤)

---

FORCED MARRIAGE-9



"I duty zawh hun ah ka rawn lam che nga ka ţhianpa chu kan hmu dawn nia" ka lungphu chu a pangngai aiin a rang a, ka hlauh vang leh inthiamlohna nasa tak ka neih nghal vang a ni. Ti tla ta ila hremna nasa lehzual ka tawk a ngem tih thleng in ka ngaihtuah hman a, ka thil tawn tawh zawng zawng te hi a tawk tawh viau a ni.

"Awle. Ka lo nghak ang che"
"I rilru i thlak loh ka beisei" a ti sup a, ka awm nawm loh dan a hmuthiam a nih ka ring.
"Tun hun ai chuan nakin zel ngaihtuah ang che" a ti leh bawk a, nakin zel ka ngaihtuah vang anih hi ka buai em em ni. Harsatna hi a chhawng duat ni mai hian ka hria.

Ward chhung ka luh veleh ka unaupa Ethan chuan min lo pawm kang nawlh in min theh vir kual a, damlo te tih hlauhthawn ka duhloh vang in ka au lo mai mai. Min dahthlak hnu ah ka hlauh lutuk vangin ka awm dawm in ka kun a, ka hnungzang ah a rawn beng thak thak lehnghal.
"Atthlak deuh hian che ziah suh" ka ti hlak a, Debbie nen awmze nei deuhin an in melh ralh a, Debbie hian a lo hrilh veleh tawh a ni ngei ang. A ngamtlak zawng apiang a hrilh chuan ka tan nau tihtlak a ti harsa ţalh ang.
"Ka lawmpui che Emma. Naute hian in nupa hlimlohna te a chhawk ka beisei. A pian hun a i hlim dan tur chu" Ethan pawh Debbie ang tho in a phur. Ka thil tum hi hria se eng ang in nge min ngaih ang?
"Hlim nachhan tur pawh a awm loh tawp chu" ka ti bul hmuk a, Debbie bulah tum bar in ka ţhu zui hnawk.

"I naupai hian a ti hlim ve lo che maw?" tih pah in Debbie chuan min en kar a, kei erawh chuan melh tur dang ka zawng daih. Hetianga min en reng chuan thil awmzia a manchhuak leh vat ang.

"Tunah a tihlim lo che anih pawh in nakina i hlimna ber tur anih kha. Emma Pathian in i hlim a hun ati ve tawh a ni ngei ang" thutak deuhin a ti a, Ethan pawn kan hmazawn ah tak ţhuthmun a rawn rem ve a, "Ila pawmthiam em em ang Emma. Naute ineih chuan in pa nen in in hmuh thiamloh chang pawn lamţang inei dawn tihna ania, in inchhung pawh a reh lo sawt ang a" a rawn ti ve a, an thilsawi hmang ah hian ka tih tur hria an ang zawk.

"I chetsual loh nan leh naute a hrisel nan ka ţawngţai char char ang" tiin Debbie chuan min chilh zui veleh bawk.
"Tun ah chuan hlim la, ţha deuhin thil i eibawk dawn nia, naute khan engkim a ţawm ve tawh dawn che a, i thawk rual in a thaw ve zel ang a, a rinchhan theih awmchhun ini rih. I thiltih engkim ah fimkhur phah bawk rawh aw" tih pah in hlim tak chung bawk in min kuah a, ka inthiamloh sa tehlul nen, an thilsawi hian ka inthiamlohna an ti pung nasa lehzual.
"Ka nu leh pate pawh ka lo hrilh ang. An hlim hmel tur ka mitthla lawk thei" Ethan pawh in a rawn ti veleh a, engkim an tibuai dun ta vek a nih hi.

Ka duty hun a liam a, ka inthlak zawh chuan Mason alo awm vang tawh.
"Kan naute thar tur chu kan lawm dawn tak tak em ni?" Debbie in a ti nghal chul a, naute thlah liam duhna rilru kan neih hi hreve hek lo le.
"Emma nen hian chhuah na tur kan nei hmasa a" tiin Debbie chu thiam tak in alo hnar a.
"Chhuak dun rawh u. Ethan nen kan lo lawm ve mai ang. Emma in in ah ka kal anga, i chhungte nen kan lawm ho dawn" tichungin tum bur in kawngkhar lam ah a kal nghawng nghawng mai.

"Mason ka tih theih rih ka ring lo"
"Chhuak phawt ang" a ti sup a, ţawng fimkhur a ngai reng a ni. Step reh lai kan thlen rual in "I rilru iva thlak hma leh si ve" min ti hrawk a, min ngaihnep hmel em em lehnghal.
"Ka rilru ka la thlak chuang lo mahse tun tut tut ah chuan ka theilo. Ka chhungten an hrevek tawh dawn a, an hlimna ka tihchhiatsak thei rih lo"
"Midangte hlim loh i hlauh vang in vanduai na ah i in barhlut anga maw?"
"Naute hi vanduaina a nih dawn leh dawn loh kan la hrechiang chuang hleinem. Nghah rih ka duh" inthlahrung tak chung in ka ti leh a, min puih huam em em tu pawh ka ti beidawng leh ta anih hi.
"I chhungte bulah chuan keimah nen a kan chhuah dun laia i tluksual thu pawh kan sawi thei"
"Thil liantham lutuk a ka chhungte bum hi ka ngam lo a ni" ka ti chuai raih a, ka kun ngawih bawk.
"Itih dan dan le. Iduh ang chuan nghak la, tih tlak iduh hun ah min hrilh dawn nia" ani pawn a ti veleh ta zawk a.
"Ka lawm e. Min pui ziah a, ka lawm lutuk"
"Matthew chuan a hre em lo ang chu tiraw?"
"Hrelo ang. Ka hrilh tur ah an ngai ang a, midangin an lo hrilh ka ring lo" a bu nghat a, nau ka pai tih hria se chuan lawm nachhan tur pakhat chiah a nei. A piantirh aţanga a vawikhat nan a pu lawmna a siam ve ang. Chu zawng chu.


In ka thlen veleh ka inbual sawk sawk a ka mu daih. Ka chau a, mut ka mamawh. Pi Sangin min lo biak pawn mumal in ka chhang lo. Ka mutchhuak em em lo mahse mut ka chak em em tho. Kawngkhar ri rak ka hriat rualin ka muhil der nghal, Pi Sangi emaw Matthew pawh nise ka hmu peih lo ve ve, keimah a awm ka chak.

Ka mutna bula a rawn ţhut hnu ah ka sam a chul zui a, muhil ang in awm mah ila ka mit a phu dut dut tho a, ka muhil der tih a hrebawk ang.
"Tupawh nila min kalsan teh" ka duh aiin ka ţawng nem. Ka chauh vang aniang. Ka sam ala chul reng vang in ka meng a, rum tawk in ka melh zui bawk.

Min ngaipawimawh lo deuhin ka bulah a rawn bawk a, min sik hlau deuhin ka tawlh hret bawk.
"Emma naktuk ah mi pawimawh tak zai tur ka nei a, ka hlawhchham chuan ka pu in min paihchhuah a tum ngei dawn a" a tih hnu ah a kutphah a a hmai phum in a thaw hawk a, a rilru a buai ve hmel khawp mai.
"Chuan?" ka lo ti sep a, a sawitum tak chu sawi vat vat se ka ti a ni.

"Team aţanga in hnuhdawh ka tum a" a tih chuan ka ţhuchhuak hlawl mai.
"Eng vang nge? I hlawhtlin i ring lo mi?" dilchhut tak in ka ti leh a, doctor ni mahse mihring ve bawk a ni a, hlawhchham changte a nei ve tho na chungin fak hlawh ber pawl a ni ve ţhin a, tun ţum a inring zo tlat lo hi mak ka ti.

"Ka pu inrawlhna ah chuan tel ka duh lo" a ti sup a, a awm ngai reng in a la awm.
"Amah kha ipu tan a pawimawh ringawt a ni mai a, zai harsa a nih chuan loh te chuan i hlawhtling em em ang. Ipu hriat tur in ţha deuhin ti zawk rawh" ka ti duah a, ka huat tehlul nen thurawn te kan pek leh tak chu.
"Cancer a nia, a upa tawh bawk a, hmunpui zawk a kaltir kan tum in ka pu in a remti tlat lo" a ti nghut a, a in let thawk a, zangthal a mu in inchung lam a melh vang vang a, a mitmeng pawh a dul ve ruih alawm.
"I theihtawp chhuah la, i theihtawp bak chu Pathian kut ah dah rawh" ka tih lai chuan a rawn nui hawk a, min melh zawk pah in "Ka ţawngţai tawp ber pawh ka hre tawh lo" a ti sup a, ka awih lo hial zawk.

"I mi zai tur ah hian Pathian i mamawh ngei ang a, ţawngţai chu i ngai ngei dawn anih chu. Tih tak zet in dil la, a chhan na i hmu chawpchilh nghal in ka ring" ka ti deuh duah a, ka mi huat tak bulah lehnghal ţawngtam ka inti tawh khawp mai.

"Min ngaihdam theih nan ţawngtai ila min chhan iring em?" min en run a, a nui tawh miah lo.
"Tu ngaihdam na tur che in?"
"Nangmah kha" a tih chuan chhan mai ngaihna pawh ka hrelo. Ka lo ţawng duah te kha ka inchhir leh hnuhnawh.

"Diktak chuan ka chunga i thiltih kha ngaihdam harsa ve deuh a sin. Khatiang itih hnu lawk ah khan Irene nen langsar tak in in zui leh bawk a" ka ti sep sep a, zahzel ah ka kut ţang ka khal pah niap niap bawk.
"Tihchhan ka nei ti ta ila?"
"I pu vang maw?"
"Sawi mah ila i awih kher in ka ring lo. Min rin na ka neihlet hun ah ka hrilh ang che. Kei chuan dawt tello a neih let che ka duh"
"Dawt vanga min neitu an awm itihna a ni em?" ka lo ti ha a, engmah a sawichiang duh ţhin lo hi lawm kan buai em em na ţhin.
"Mi kan hmangaih dawn hian minute khat pawh a ngai lo" a ti leh daih.
"Ka la ngaidam lo che ania"
"Min haw em em a, ka ngai em em thung che a" ka ner nawk a, chu chu a hmuh in alo nui suk a, lemchan ah vek ka ngai tho tho.

"Emma tih tur min hrilh rawh. Irene hi ţhen a i hnen ah chauh awm turin min hrilh rawh"
"Thu awmze neilo deuh deuh sawireng suh chhuak tawh teh" ka ti hlar a, Irene chu a ţhen thei dawn lo tih hriat sa reng. Ka hrilh buai peih lo.
"Lo mu ve rawh i hlauh ang kha a thleng tawh lo ang" ka thusawi a ngaih pawimawh loh ţhin zia chu. Awmdan tur pawh ka hrilh peihlo lehzual.

"I room ah mu mai ta che"
"Ka nupui ka ngai ve rih a nih hi" a ti leh mai a, kalsan a tum loh hmel khawp mai.
"Ka chau tehmai nia min chhaih kual reng lo teh" ka vin leh ţan tawh.
"Mut ve mai loh chu tih theih inei biklo a nih chu. I pasal bulah lehnghal" a ţhen sak a, ka hmel rum deuh a hmuh rual in a hmui a chip leh hmak. Hospital ah loh theih loh a ka hmu pawh tih tawh nak laiin.
"Ilo mut ve dawn chuan thawnthubu min chhiarsak rawh" a rum hawk a, ka chhungril a nui ver ver thung. A chhiar peihlo ang a min kalsan ngei ang. Ka khum hi keima ta chauh a ni leh vat ang.

"Ka chau viau asin Emma"
"Anih a hnu i room ah va muhil bawrh bawrh la nimai lawm" ka lo ti hmak. A chauh leh chauh loh ka ngai pawimawh lo nasa mai.
"Khawi ka chhiar tur chu" lungawi vak lo chunga a tih chuan mak ka tih vang in ka meng kawk a, ka insiamţha leh vat. Khum aţanga chhuk in Debbie lehkhabu ka hawnsak ka la a, a ruk in ka nui leh vur vur tawh. Beauty and the Beast ngei chu. In la pa ve tak in hetiang bu an chhiar tur chu a lawm lo teh ang chu. Ka ngaihdam duh reng reng in a khawsa a, keipawn ka ngaithla chak tehchiam chuang lo. Hrem nan han chhiar ve reng reng teh se.

"Hei hi chhiar rawh le" a awm ah tak ka vawm a, lehkhabu a enchiah chu a hmel hmuh a nuam tehchiam lo ngei mai.
"Emma i chiang chiah maw?" a ti ta ngei reng a. Ka lo bu nghauh nghauh a, a chhiar laia mutthilhsan daih ka tum.
"I naupangchhia riau mai" a ti leh sup a, a bula mutna awl awm chu a beng thak thak a, ngam zan lo chung in ka mu ve tho. Ka chauh vang alawm thil dang a nilo.

Lehkhabu a thu inziakte chu muangchang in a chhiar a, a chhiar tui loh zia pawh a hriat. Chhiar reng chungin ka lam hawi turin a rawn inher a, ka dul zawn ah min kuah zui zat bawk. Min tihnat tum ang a a awm loh vang in ka lo ngaipawimawh duh lem lo a, ka lungphu dut dut chu a hriat loh hram ka beisei.

"Ka tilui thei tawh lo" a ti bul hmuk a, lehkhabu pawh chhuat ah a vawm thla zui daih.
"Mason hi ila hua em?" ka tih chuan ka nak nem lai a hmer vak a, ka che hrut a, min thlah ve nghal mai.
"Mihring thah theihna min pe sela chuan ka that hmasa ber ang" a ti nghut a. Hetianga min hlauh ve lai hi thil zawhna hun ţha ber ah ka ngai.

"Mafela kha i unaupa alo ni reng a" ka ti leh a, amah ka en a pah a, a hmel dur khup leh a mitmeng vawt raih chuan a huat zia a ti lang.
"Ni e. Mason hnen aţang bawk a hria inih ka ring" a ti bul leh hmuk a, zawh zui zel ka chak a, ka tim deuh bawk si chu chil ka lem khawlh phawt a, amah pawh ka en ngam tawh lo.

"Hrelo ang khan i awm char char a"
"Mafela chanchin ka sawi chuan i haw ngei ang a, mitthi tawh huat chuan awmzia a neilo. Theihnghilh rawh"
"Min hmangaih alawm"
"Maithei" a ti nghut a, zawh zui leh pawh a chakawm tawh loh.
"Unau ve si in pawh lo lutuk" ka ti zui sep a, a hriatphak pawh ka rin loh laiin "Ka pawh loh chhan i hriat loh chuan sawi tawh suh" a rawn ti hmuk. A in lak hran reng vang bak a nih ka ring lo. Irene lo chu ngaihtuah a nei hleinem.



Zinga ka ţhanharh rual in ka ril a ţam riai riai a, zan lam ah engmah ka ei si lo. Ka hnathawk haw kha Matthew nen kan inhnial rap rap hnu ah ka muhil a, zanlaia rilţam deuha ka harh pawh khan alo awm tawh lo a, ka chet peihloh vang in thil eitur pawn ka kalchhuak ta lo a nih kha. Haw viau mah ila an mi zai tur chu ţha taka a tih puitlin ka beisei.

Ka intifai a, ka insiam zawh hnu ah inhnuai ah ka chhuk a, Pi Sangi thilsiam chuan ka hnar a verh kher mai. Choka ah ka tlanlut a, nui sang in min lo hmachhawn bawk.
"Matthew kha vawin a buai lehzual dawn a, a kal tawh a" alo ti a, apu tan a mi pawimawh tak kha a zai dawn tak e. Ka ţhut fel hnu ah phone ka phawrh a, nakin ah inchhir leh dawn pawh ni ila vawin atan chuan tiphur tu leh fuih tu a mawmawh.

[Ţha deuh in ti ang che. Ipu in a lawm theihna tur che in i theihtawp i chhuah dawn nia] tih hi ka thawn a, tun bak chu ka ngaihsakna ka ti lang lo ang tiin ka in hrilh mawlh mawlh. Ka la haw reng a, ka la ngaidam hleinem.

[Ka hlawhtlin chuan min ngaidam thei tawh angem?] a rawn ti let hlauh a. Apu rinna a neih theih nan a bei tur a nia, keichu ka pawimawh lo. Irene a nei alawm ka la ti tlat tho.

[Ipu kha han ti lawm phawt teh] ka ti ta ringawt. Apu in a tihdan kha ka tan pawh lo ngaihthlak kha anuam lo letling zawk. Mi ngaihdam dil hreh deuh ang in a insawi a, keichu hun remchang a hmuh apiang ah ngaihdam min dil anih hi.

[Min ngaihdam phawt chuan engpawh ka hmachhawn thei ang] ka lungphu rang leh dup dup chu ka duhlo kher mai. Ka inbum tir lo ang ka ti rilru mawlh mawlh. Min fiam kual mai mai ni te hian ka ngai ţhin. Tun chauh chu dawtsawi ila a pawi em lo ang chu. Ţha deuh a a zai theih nan leh a pu a tih lawm nan dawtsawi tawh mai ang.

[Ka ngaidam che. I hlawhtlin lo vaih chuan ka haw leh ang che] tih ka thawn ta ringawt a. Ka ngaidam tak tak pawn ka in hre chuang lo.

[Ka tum ang] a rawn tih hnu ah phone ka dah a, Pi Sangin ka hma a a rawn chhawp ho chu ka enkual a, ka eiţeuh thei dawn anih hi.

"Artui kha i duh ţhin sia" tih pah a min hnaih tak a artui kan a rawn dah chuan ka ner nung a, a hmel ringawt pawh ka ngei. Pi Sangin min rinhleh ka hlauh vangin min hmuh ka hlau hle thung. Nidang ah ka hmanhmawh chang hian ka kan tir mai ţhin a, mak min ti viau ţhin reng a nih kha.

"Ka lawm e" ka ti mawi ve a, artui chuan a rim rawn chhuah tawh lo se ka ti kher mai. A la khu vut vut a, nidang ah chuan ka ei nghal mai ţhin a, tun ţum chuan eichakna ka nei miah lo.
"Artui iduh em em mai hi imak ve ngawt mai" ala ti zui a, ka ei loh chuan min ringhlel dawn chiang sa. Ei tum in tlem te ka suak a, ka huphurh ngawih ngawih. Ka ka ah ka dahlut a, ka lem thei thlawt lo. Pi Sangi lah chuan min enreng lehnghal. Artui hmuam chung in fiah mang lo in "Ka zunchhuak lutuk" ka ti liam puat a, bathroom hnai ber ah ka tlan lut.

Ka luh rual in ka luak nghal tih theih ang a ni. A hma zawng khan hetiang hian ka awm miah si lo a. Pi Sang in min rawn ngaihven a, a hriat hlau in tui ka herh haw a, thil dang ka ei hma hawt in kha thil vang khan ka luak bawrh bawrh a nih hi. Rai haw deuh chi ka nih ka hlau a, ka in hrethiam tawh lo. a rim leh a hmel te kha ka ngei em em ringawt.

Ka intifai a, min rinhleh loh nan ka inchul man thuak thuak a, bathroom aţang chuan ka chhuak a. Pi Sangi hian min ringhlel vaih se chuan Matthew-a beng a thleng nghal dawn tih ka hria a, chu chu ka duh lo. Naute hi engtin nge ka tih dawn ka la hre chuang lo. A mawi ah ka ţhu leh a, engvak ka ei tawh lo. Pi Sangi ngaihţhat nan tlem te te in ka ei lawr a, artui chu ka khawih leh tawh lo hrim hrim. Hospital ka thlen hun ah a hranpa in ka ei leh mai ang ka ti ta tawp.

"Ka kal nghal mai ang. Nang hi chu i siamtui reng mai anih hi" ka ti luam a, a tihdan ziah in a lawm leh hmel vur vur khawp mai. Ka awmdan chu ka in hrethiam lo. Ka thil eitheih reng ţhin ka ngei ta em em mai te. khatiang em em a ka hne kha ka in hrethiam lo zawk hial.



Hospital ka thleng a, ka buai nghal hle. Debbie nen mumal tak pawn kan la in be hman lo. Zing lam a kan duty hi chuan kan buai a zual a, zan lam pawh chuti bawk, chhun ah hian a zia ber in ka hre mai.

"I chau viau ang a, mi pahnih inni tawh lehnghal a" tiin Debbie in min fiam zeuh zeuh a, ka lo nuih liam mai a, ka chhanglet lem lo. Matthew khan a zai hlawhtling angem tih ringawt te ka ngaihtuah a, nau ka pai a ka rilru pawh a danglam mak vek anih hi.

"Matthew i hrilh tawh em?" kan ţhut ve hman hnu a atih leh chuan ka lu ka thing a, a hriat loh ka duh ber zawk.
"Hrilh i tum em?"
"Tum lo. Amahin zawngchhuak rawh se" ka ti tawi tak a, hrilh mah ila kei leh naute aiin Irene a thlan ka la ring lo. Irene chuan harsatna a tawh in a awmpuiin a thlamuan a, kei erawh chuan a buaina ka belhchhah thung. Khaikhin chi pawh kan ni lo.

"Hre vat se a ţhat zawk ka ring. Nupa in kar ah chuan zep neih a ţha ngai lo" a ti leh a, min zilh hi a peih ve hrim hr a, ngai ah ka nei tawh.
"Ka pai tluang zel anih chuan ala hre dawn tho tho" ka ti sup a, tih tlak duhna rilru ka la nei tho hi kei ngei pawh in mak ka ti in nunrawng ka in ti takzet a ni.

"A hlim viau ang. Hman aţangin ka lo thlithlai tawh a, pa nih hi a tlin viau in ka ring" a ti leh a, awih chiah lo mah ila ka tilang lem lo. Matthew chuan amah lo chu ngaihtuah dang a nei lo ang.

"He thil hi Mason kha result en tur ania, a rawnkal laiin ka lo theihnghilh daih a, a office a entir tawp mai angai anih hi" tih pah in a lu a thing nawk nawk a, a thaw pah hawk bawk.
"Keiman ka va entir ang e" ka lo ti vat a. Matthew leh naute chanchin ngawt a sawi a, a bula awm a hahthlak ţan riau.
"A lawmawm viau ang. Damdawi ka lo sem dawn nia" a ti ţha ve mai bawk.

Ward aţanga ka chhuak chiah chu ka thawl huai in ka hre mai. Naute lak a ka rilru put hmang hi Debbie hian hria sela chuan min be duh tawh kher in ka ring lo a, a chunga hetiang a thlen ve hma chuan min dem thei pawh a ni chuang lo.

"Emma" Matthew-a aw lo chhuahna lam ah ka lehhawi a, nidang ang lo takin a nui ve sang mai.
"Ka nupui hnen aţanga duhsakna thu nawn ka lo in ring miah lo a" tih pah in ka lam ah a rawnkal hnai a.
"In la ţan nange?" ka lo ti daih. A thusawi chu ka sawizawm chak teh chiam lo.
"Ţan lo deuh. Ka bulah awm thei la chuan ka in ringtawk lehzual sawt ang"
"Ka awm dawn lo chu anih hi"
"I mi fuihna kha a tawk viau e" tih pah in min kuah a, keichuan ka kuah let ve lo. Ka remtih hma chu min si miah lo tur khan a in tiam ve sia.
"Ka hlawhtlin chuan min ngaihdam dawn kha. Hrereng rawh" a ti leh sup a, duh leh a zai zawh hnu ah ka rilru ka thlak leh daih thei lawm.
"I theihtawp chhuah la a ni mai. I zai zawh hun ka lo nghak ang che" ka ti veleh a, kalsan tir vat vat hi ka duh ţhin, a uap a na lutuk a, ka rit luk zel.
"Ka hlawhtling ang. Ka nupui min fuihna vang chauh hian" ka dar lehlam lehlam ah dawm in a nui suk a, a tih tak hmel em em thung.

"Kal rawh. Va in puahchah la, ţawngţai ngei ngei ang che" ka ti nawn leh a, a hlawhtlin rin na lian tak ka nei bawk.
"Lutuk e. Kan inhmu leh dawn nia" a ti a, a kalhma in min kuah leh hram kha. A rilru puthmang leh a chetdan inthlak thut thut hi a chhan ka hrechak ngawt mai.

Mason-a office lamah ka kal a, mak tak maiin Matthew tan ka ţawngţai ru ve tho. Apu in chhungkua aţanga a hming a paih chuan ka tan pawh zalenna tur anih laiin ka ţawngţaisak ta tho chu a nih hi.

Office ka thlen veleh Irene rawn chhuak mek nen kan in tawk. Zam lo takin min en a, min kalpel mai dawn emaw ka tih laiin "I pasal leh a unaute i hrechhuak ta bawk a, i thawveng huai ang chu maw?" min ti a, min hmuh hi chuan a ngawi thei thlawt lo.
"Hetah eng nge i tih ve?"
"I pasala unaupa ka hmu. Helai ah hian ka duh duh hun ah ka kal ve thei tih hrebawk la" a ti a, a nui hmel chu a rapawm lek lek zawk.

"Min hrethiam la ka hmanhmawh deuh a" tih pah in ka lehkha ken ka hmuh zeuh a, hmanhmawh lo mah ila ka be chak lo hrim hrim bawk a.
"Kan thilsawi chu iluh hun ah Mason i zawt dawn nia, i thidang hial maithei" tih pah in min elhsen deuh in a nui leh a, ka kalpelh dawn ah ka su lui ve ngat. Thil zawng zawng deuh thaw hi ka hne in ho te pawh in min ti thinrim a, Irene phei chu ka hmupeih lo lehzual.

"Irene ka rawn hmu a" ka luh veleh ka ti nghal tawp. Ka lehkha ken dawhkan ah ka nghat bur a, a hmel ka en reng bawk.
"I landan ah chuan ka bialnu thikthu chhe tak ang vel ini" chair ah thatchhe tak a ţhu in a nui suk a, ka thil ken chu ala melh eih lo.
"Eng nge in lo sawi a? Irene sawi dan ah kha chuan in thilsawi kha min khaihhnawih thei thil anih duh hmel" tih pah in a hma chiah ah kuangkuah in ka ţhu fel than.

"Hre lo la itan a ţha zawk ang" a ti sup a, muangchangin a chair a ti vir pah bawk.
"Min kaihhnawih thil chu hriat ve ngei ka duh" luhlul tak in ka ti ve ngat tho. Irene hi ka mihring rin loh ber te zinga mi a ni tawh a, a thil hriat ang hriat loh bik chu ka duh lo. A ni aiin ka chingfel ţha thei zawk ang.

"Mafela chungchang" a ti hmuk a, Mafela anih chuan keipawh ka tel ve ngei ang. A ţha lam anih erawh ka beisei.
"Mafela kha intihlum anih i ring em?"
"A intihlum alawm" ka ti vat a, ka chhang rang lutuk nge ani pawh a nui ve tawp tho.

"I rin zawng ni tur hian i lak a ţhatchhuah rei a ngai dawn lo hle mai Emma"
"I thilsawi hmasak kha sawi zo law law phawt mai teh" ka ti hluk a, ala nui reng tho.
"Tlai ah lengchhuak dun ila ka hrilh vek dawn che nia" ti zawngin min thlem tawh.
"Matthew nghah ka ngai" ka tih chuan a nui hmel a bo nghal vek a, a hmel chu hmuh theih khawp in a dur chak.

"Mihring tlaktlailo lutuk fa iti tla phallo a, tunah lah lo nghah i tum leh a, Mafela kha mahni intihlum anih iring tak tak maw?" a tih nawn leh chuan chhang lem lo in ka lu ka bu nghat ringawt.

"Mafela kha thah a nih kha"thinrim taka a tih chuan ka nghing dawt. Heivang hi aniang Irene pawn i thidang hial maithei a tih kha.

(Ka ţhiannu ka awmpui a, rilru khingbai deuh in ka ziak chhuak leh hram a, in beisei ang ka phalo ang tih pawh ka hria, kan hun tawn in a zir lo lutuk a. Tunlai chu inthlahrung tak chungin in hriatthiam na ka dil reng mai dawn anih hi. Min thlâwp tlat ţhin na zawng zawng ah ka lawm e)


CONT....

---

FORCED MARRIAGE-10



"Mafela chungchang sawichhuah reng hi ţul ka ti lem lo" ka lehkha ken chu dawhkan ah ka vawm a, a la en duh chuang lo. Keimah ringawt min la en a, ka thusawi chuan a ti nui suk bawk.

"Mafela chungchang i hriat duh loh vang nge a that tu hming ka sawi tur hi i ngaithla ngam lo zawk" ngeiawm zet in a ti leh a, Mafela kha tuman an that lo tih hi ka rindan nghet tlat a ni.
"I unaupa ania, lawyer lai a ni bawk a, khatiang ti duh tur khan i rinloh lutuk na lam ah puh tur i zawng mai mai ni in ka hria" tiin ka ngaihdan diktak ka hrilh a, intihlum a nihna kha ngaingam lovin that lo ni daih mai sela a ti vel mai mai ah ka ngai. A zeldin na mai mai hi a tak ram thlen tir a tum anih hmel.

"Thah a ni tih hi nakin ah ila hreve ngei ang"
"I hriatchian em em theih dan hi min hrilh ve thei angem? Irene kha i in bum tir em lo ang chu tiraw?" ka ti ve sak a, ka ţhianpa ber thleng hian Irene hnaih lo tur hian ka duh vek. A thinlung lo tenawm zia ka hretawh. A landan ai hian a nasa daih a, Matthew hian a hmangaih em em chhan pawh hi ka hre nek love.

"Irene leh Mafela chan kha in ang iti ve viau lo maw? Irene hian thihna a pumpelh hlauh zawk a" a tih leh phei chuan ka lo run kher mai.
"Anih a hnu hnem la, tihlim la, inbum tir hlek suh" ka ti tel hram. Irene hian lo bum in Matthew nen a an inkar hi a tichhe lehzual thei tlat.

"Au vak vak suh naute khan bengchheng a ti ang" min tih el tih ka hrereng. Ka pum zawn en chungin ngeiawm zet in a nui leh bawk.
"Ka au loh kha. Ka ţhian inih ang in ka duhsak che a, awmdan tur ka hrilh mai che a nih kha" ka la tlawm duh bik lo a, a chhaih zam theih pawn ka awm duh lo. Nau ka pai vang a lawm lo ber a ni tih pawh ka hre kar.

A ţhutna aţanga rawn tho in muangchang in min kal hual a, "I pasal hi ka thik ngawt mai. Hmeichhe ţha tak a nei bik a" a ti ban charh a, a chang hi chuan ka awm a ti nuam lo ve ţhin.
"Test result khu lo en ang che. I damlo te ngaihven ţha rawh. Hmeichhe pakhat ve mai dawtsawi ngaithla kual reng lo in"
"A thlak danglam bawk che a, i mize zawiawi tak leh nem tak ţhin kha thlak danglam vek tur in eng thil nge a tih?" a ti leh daih. A hmel en phei chuan ka chunga thil thleng kha alo hre leh vek emaw ka ti hial. Mahse kha kha chu kan nupa inkar ania, tuman an hre lo ang.

"I hriat ţul ka tih chu ka hrilh mai ang che. Debbie in rei min ti ang. Ka kal mai ang e" ti a kal ka tum laiin min rawn kuah thut a, talchhuah tum in ka bei nasa mai. Min kuahbet lui tlat chung in ka beng bulah "Naute chungchang kha ngaihtuah nawn leh ang che" a ti sup a, min thlah zui nghal.
"I sawi duh chu min kuah kher lo a sawi mai tur alawm"
"Ka ţhian hi ka duh chuan ka kuah mai thei ah ka lo ngai a, min ngai diklo suh. I vin em a ka ti hlau ve zawk che anih kha"
"Nihtak chu" ka ti hmuk a, ka chhuah dawn ah na tawkin kawngkhar ka khar a, chianglo ruai in a nui ri ka hre hman hram. Khatianga a awm thut kha mak ka ti reng a, a fiamthu tih hre lo in ka hlau em em lehnghal.



Ka duty zawh hnu ah pawh inthlakna room ah Matthew nghak in ka lo la ţhu. Tun hun hi a tan a pawimawh a, a nupui ka nih ang in, ka huatna dahţha in ka ţawiawm a ţul a ni. A hlawhtlin chuan ka lawmpui ang a, a hlawhchham anih pawh in hrehawm a tih lutuk loh nan a bulah ka awm ang. Irene hmulo tur a pawh pen ka chak ve hrim hrim.

Ka phone nghawr dut dut chu la kang in ka en vat a, Matthew a lo ni. Ka rin aiin a hring lai chu ka hmet rang daih. Ngaihthlak tum a ka bengbula ka dah rual in "Khawnge i awm?" a rawn ti nghal tawng a, a aw zangkhai vah a, chanchinţha a nei a ni ngei ang.
"Inthlakna room ah ka lo nghak che" ka sawizawh rual in a hmet tawp lehnghal. Tum bar in ka phone ka en a, ka hmeh thim hnu ah ka bul ah ka nghat chawrh. Ka lo nghak vanga lawmthu sawi nachang pawh a hrelo reng reng. Lo ngaihven lo tawp ila ţha zawk tur.

Ri mang hlei lo a Matthew ka lo hauh bawrh bawrh laiin a lo lut hlawl a, a chauh hmel tak kar a a hlim hmel chu ka lo hmuh hmaih lo. Ka hmu thut chu mak ka tih vang in ang pham in ka lo en reng a, ka din rual in min rawn pawm chawt.
"Ngaihdam ka ni thei tawh angem?" a ti thawp sap a, ka intiamna kha a la hrereng a nih hi.

"I hlawhtling tihna mi?"
"Ni e. Ka kuah ngam tawh che hi"
"I zai hma pawn min kuah tho alawm. Ka ngaihdam hma che pawh in ka phalna la hmasa miah lo a min kuah kha" ka ti veleh a, mi hnial zawt zawt te hi ka hrat tawh. Ka thusawi avang chuan a nui hawk a, min kuah nghet lehzual sauh in ka sam kar ah a hmai a phum a, min mamawh deuh ang a a awm thut hi ka ngaih a ţha theilo lehpek a, Irene nen hian buaina an nei em maw ni ka ti hial zawk.

"I pu in a beţha ve tawh che em?" sawitur dang em em ka hrelo a.
"Aih. Ka beisei lo" a ti nghut a, a lian bawk a, min han kuah tak tak chu ka pil hneh viau in ka hria, ka cher lehzual zui bawk nen.
"Ţha tak a iti zel anih chuan ţhat ala chhuah ve mai ang. Irene i rawn hmu tawh em?" ka zawhna chu a ţul ber lo khawp mai. Ka hrechiang chak a ni ve mai a, pawi ka ti lo leh si.
"Hmuh chhan tur ka neilo"
"In in ţhen tawh mi?"
"Aw" a ti tawi tak ringawt. An inţhen chhan hrechak viau mah ila ka zawt ta lo. A hmangaih viau khan ka hre sia, a tan pawh sawi a nuam lo ang. Bakah a hma lawk a Irene chungchang a sawi hmang ah pawh khan an la inţhen loh hmel ropui sia, rilru hi an tibuai ve ngawt mai.


"Min thlah tawh rawh min hmutu an awm palh ang"
"A pasal sawn a van ngai em em an ti mai ang" a ti uang ve ngei. Fiamthu leh Matthew hi chu a inhmeh ve thlawt lo a. Min thlah rual chuan ka thaw huai a, a nuih a zat khawp kha. Min pawm bet hneh em alawm.

"I haw thei tawh em? Emma"
"Thei tawh e"
"Lawm ila" a tih chuan dak vah in ka en a, a la hlawhtling tak tak silo a.
"I pu ila ti lawm chuang silo a, vawin phei chu i zai hlawhtlin vang lo a lawm lo lehzual viau maithei si. Iti beidawng lo ang tih pawh a sawitheih hleinem"
"Ka pu ka tih beidawn na hi lawm a chakawm. Amah tak khan min telpui ve thei se ţha tur" ka inrin hma in ka nuichhuak hawk, ka huatna kha ka lo theihnghilh leh dawn dawn ţhin. Ka chhungril tak hi chuan ka la ngaidam theilo in ka hria.

"A awmloh lai chiah hian i huai a"
"Ka vawikhat hnek pawh a thihpui thei ang chu putara hian" a ti leh nghut a, ka nui a hmuh rual in a nui veleh tho.
"Pawn lamah thil ei dun ang"
"Ka ngaidam che a i in ngaih vang khan chutiang thleng thleng ka tihpui dawn che tihna a ni chuang lo" ka ti hmak a, ka ngaihbel nge a ngui nghal ruai in ka hre mai.
"Vawin chiah min lawmpui nan" ala ti tho a, a duhna ah hi chuan a dawhthei ania.



Ka damchhung a ka huat tawh tur a ka ngaih nen restaurant ah in hmatawn in kan ţhu leh ran tawh. Ka hnial char char a, awmzia a nei miah lo. Ka hnial chhung min sawm tih ang vel a ni. Kan piah a tleirawl te te ţhu te chu kan lam hawi in an in hrilh ru a, an hmui hup in an nui leh ţhin a, phone an lek kang reng bawk a, ka thla an la anih ka ring si lo. Hmeichhe vek an nia, milar ka nilo bawk nen ka thla lo lak ve ngawt nachhan tur an nei lo.

Matthew ka en a, an hriat loh turin tleirawl ho awm na lamah ka thle zeuh a, ka thle nasa ngam lo. A tui in na no keng reng chung in bang bo hmel tak in min lo en. Ka awmdan ah pawh hrethiam ve tur a nia sin le. Kan thil chah lah chu an siam rei em em mai lehnghal.

"Ngatinge i thlek reng?" a ti sup a, a hrethiam lo tak tak a nih dawn hi.
"Kan piah a mi te saw en rawh" sehchilh rap rap in zawi te si in ka lo ti a. Ka sawizawh rual in ala hawiphei nghal zui.
"Anna anih saw" a ti hluai a, anmahni enreng chungin a nui leh ta vel a.
"Tu nge Anna chu?"
"Irene te naupangber. Ka lo hmu har zawk anih saw" a u hmuhtir turin kan thla an lo la vek anih dawn chu. A unaunu ramhuai ah a ti chang leh dawn anih hmel.

Kan eitur chah an rawn dah a, ka thlang uluk bawk a, artui a tel lo chiang. Hmuh leh pawh ka duh rih lo.
"Kha coffee hi"
"Ka duhlo" ka lo ti vat a, tun ah tak chuan in chakna pawh ka neilo.
"I duh theih hluam hluam nen" a ti sup a, ka hmazawn ah a la rawn keng kang reng tho.
"Ka duhlo ka tih chu" tih pah a nawr let ka tum chu ka duh aiin ka lo nawr na deuh a, alo vuan nghet chiah lo nen. Mitkhap kar lek ah a kawr leh kekawr a huh nual in ka ring. A kawr hma ami chu chiang takin ka hmu thei a, a kekawr erawh ka hmu lo.

"Ka tihpalh, a sa viau em?" tih pah in tissue paper ka ban a, alo ban ve chiah bawk a, keimah zawk in ka kut ka la let vat. Ka inthiamlo ru ngei mai. A val kulh dawn chiang sa.
"Kan chhangchhe hle mai" tih sup pah in a kawrhma a hru a, chetsual khut khut hi ka ching hrim hrim. Thil ei nachang ka hrelo a, puih nachang pawh hre chuang lo in a che vel chu ka lo en reng ringawt.

"Min lo eisan rawh. Ka va tifai lawk ang" a tih hnu ah washroom lam a pan nal nal, en pawh min en duhtawh lo reng reng. Min hruaichhuah a sim phah deuh ang chu. Ka lo nawr let na awm reng reng, ani pawn min pek luih ţalh a tum anih kha tiin ka inhnem chawp leh vel. Dawhkan huh deuh nual chu ka hrufai a, kan piah a tleirawl ţhu te lo nui vak vak ri chuan ka beng a verh zar mai. An ţhutna lam ka enphei leh a, ka hawiphei rual chuan a hma aia nasa in an lo nui. Irene-i nau chu tu ber nge pawh ka hrelo. An awmdan chu ka thinrim tawk a tling em em. Thinchhiat lai a lo ni bawk nen.

"Puih i ngai em?" tih pah in tissue paper hlawm an rawn vawm phei a, hman hnu tih a hriat em em mai lehnghal. An ni ang rual khin chu ka zah ve deuh bawk si vangin ka hrelo hmiah.
"Sum duh lutuk ho hi chuan zah pawh an hrelo" ti a an sawi lai te chuan ka ţhuthmun ah ka insum nasa kher mai. Matthew ka mamawh ber ţum a ni hial ang. Lo let vat vat se ka tih rual in kalna tur a helai hmun kher ka lo thlang kha ka inchhir tawh lutuk. Mi an tlem ţhin ka tih vangin ka thlang kha ania, hnawksak deuh deuh an lo awm leh ta sia.

Matthew rawn let leh chuan ka lawm rual in ka thinrim lehzual. A kawr hma a huh bial kulh a, a in sil ve hle a ni ngei ang.
"Ilo la ei nange?"
"Ka eipeih lo eivek rawh" ka ti hlar a, a hrilhhai hmel khawp mai. Kan piah a ţhute nui ri hriattur a awm tawh lo hmak a, lem an chang thiam ve ngawt mai.
"Ei rawh. I duh a i chah tawh kha" a ti hmuk a, ka lungawi lo lehzual. Plate a vawm mai te ka chak rum rum.

"I ţha maw?" a rawn ti leh a, ka la ţhu tum bur tho.
"Tlem te tal ei rawh" min nin hmel tak in a ti tawh. Hriatchian tum miah lo in min ning ve ringawt ka lo ti leh hman.
"Ka duhlo chung min hruai anih kha. In lamah ei ila a tui daih zawk" tih pahin fian ka ban rawk rawk a, ka ei zui ta bawrh bawrh a, ka rin aiin ka ei rang in ka ei hnem thei.
"I fel e" tih pahin thil ei a ka kun laiin ka lu ah na lo te in vawithum vel a rawn beng det det a, a nuichhuak hawk bawk.

Ka ei mawlh mawlh laiin thil ka ngaihtuah chhuak thut. Ka thil ei a tawp chat a, kan piah a tleirawl ho hian min thlithlai reng a, en nawm siam sak ka duh. Min tihdan kha an in chhir ram ram mai ang. Ka rilru hi avan mak sawt tak, kei aia naupang daih tur te pawh ka khing duh ta mai a nia.
"Matthew"
"Umm"
"Soup hi min lo hawptir" ka in zahpui lutuk chu a rukin ka mal ka ţham tawn tawn mai. Debbie phei chuan min vawhlum duh hial ang. Matthew pawh a bang bik lo, min en run run ringawt.
"Mawh ti vat rawh"
"Emma keimahni chauh kan ni lo ania" tih sup pah in a hawikual zawk a, ani ai hian ka zak daih zawk. Ka la tihngai miah loh thil a ni ve tho.
"Ka ngaihdam loh che chuan rilru hrehawm deuhin i awm reng dawn tiraw?" ka tikual vel a, amah hian min hel reng a, ka biak duhloh ve chuan hrehawm a tih em kha.

"In lam ah aw khawngaihin" a ti leh sup a, ka lu ka lo thing mat mat. A thaw hrawk a, thinrim na leh maktihna hlir a a khah vel ka ring. Min ning em em bawk ang. A soup chhuah chhung te chu a rei rapthlak. A suak a a dahthla leh ţhin a, an piah a ka hmelma ho chu an kalsawn hman ka hlau nasa mai.
"Ang rawh" a ti hmuk a, fian chawp a ka ka chhunga a hnawhluh tawp tawp ka rin laiin min ngaichang thlap. Vawithum vel min hawp tir hnu ah "A tawk" ka ti bul hmuk a, vawithum min hawptir lai kha engemaw ber kha chu an lo hmuh ka ring. Ka lawm tawk em em a, khatiang kha ka ti nawn leh tawh lo bawk ang. Ka mizia nen pawh a inhmeh lo hrim hrim. Ka ngaihtuah let pawh hian ka biang a sa ham ham thei.

Ka eitur chah chu ka eizawm leh a, ka hawichhuak tawh lo tihtheih a ni. Matthew pawn min be leh tawh bik lo. Ka duhtawk ka ei hnu ah pangai deuhin ka hawichhuak ve ngam chauh. Bill kan pe a, kan chhuah leh thleng in khang tleirawl ho kha an la awm. Min enreng in ka ring bawk.

Car chhunga kan ţhut hnu ah glass ah ka chal ka ti si a, ka mit ka chhing zui zat. Zawhna chhan zahthlak deuh ka dawn loh ka beisei. Motor a tam tawh em vangin a tlanchak hleihtheih loh a, a tawlh riai riai ţhin chuan ka mut a ti chhuak.
"Tun ang reng a i awm kha chuan i in tauhna mai ang"
"Ka muhil lo a, ka la in veng thei" ka ti hmak a, biakzui zel ka chakawm loh khawp ang.

Ka in tauh bawp a, ka muhil lai ka harh kawk. Mutthilh ka in rin loh tehlul nen, ka insum ve hram hram a, ka la muhil rei pawh in ka ring lo.
"Thuduh lutuk hi a pawi an tih kha" nuihza insum tak in a rawn ti sup a, min lo thlithlai reng anih dawn hi.
"Ka muhil hleinem. Ka in ring hman lo anih kha" tiin ka la in veng ve char char.
"I soup hawp khan mut a ti chhuak duh ania" tiin min fiam a, ka hriat phak tur tawk lek in ka hau a, ka phun ru sep sep te chu min nuihzat zawk amaw tih tur a ni.

In kan thlen hnu pawh in ka luhsan leh daih. Pi Sangi pawh a lo la awm a, ka eipuar tawh thu ka hrilh a, ka room ah ka tlang nal nal. Ka thinrim a reh hnu phei hi chuan ka zak telh telh. Khang ho kha lo runluih kher lo ila ţha vek mai tur a nia. Matthew kha chu a zak ve vak tawh lo aniang min fiam leh zuk zuk tawh sia. A awmdan engkim hi a ninawm a nih hi. Ka awmnawm loh na tur tawk a awmdan a thiam bawk si.

Ka inbual a, ka inthlak leh hnu ah sofa a mut ar ar pah in tv ka en. Khum a mut nghal tawp hi chu zan a rei duh lutuk a, ka zawi theih em vangin ka ţhupeih chiah bawk si lo. Matthew pawn min rawn tibuai leh ta biklo a, vawin ah hna hautak tak a khawih a, a chau ve bawk a nih ka ring.

Khum a ka insawn hnu ah phone ka hmet eng leh a, ka khawih khat ve ţhin hrim hrim.
[Naute kawr tur ka lei a] Debbie in kawr tetakte a rawn thawn chu en in a nui vur vur a, ka pum ka chul a, ngaihtuahna a thui duh khawp mai. Ka rilru ka la siamfel loh vangin Matthew pawh ka la hrilh lo. Lo ti tla ta ila tualthat ka ni ve mai dawn si a. Naupai leh ka harsat phah thei bawk a, lo paitlang ta ila, naute ka hmuh chuan kha zan kha ka hrechhuak leh ţhin ang a, Matthew leh Irene an in kawp leh anih phei chuan naute chu ka retheihna tizual tu mai mai anih ka hlau bawk a, chumai bakah hrehawm a tih ka phallo ang a, a nat chuan ka na ve zel bawk ang a, tihtlak ka hlau a, paitlang pawh ka hlau tho. Midangte ang in ka naupai vang hian hlim na tak tak ka nei thei rih lo a ni. Ka ngaihtuahna leh thil tum hi hria se naute hian min haw ngawt in ka ring. Anu ka nih pawh a phallo hial maithei a ni.




Hospital ah kan awl laiin Debbie phur fal in ultrasound min tihpui a, a naute kawr rawn thawn vang ringawt pawn zan ah ka mutţhat theihloh phah lehnghal a, ka mangphan lehzel bawk nen. Ultrasound kan tih zawh phei chuan tihtlak duhna ka neih kha a kiam ve tial tial in ka hria. Ka en a, ka ngam ngang lo a ni. Ka nu leh pa leh Ethan thleng in an hlim in an nghakhlel em em a ni si a.

"Thla tin kan tihtir ang a, lian deuh ni tawh se ka ti emai" tih pah in Debbie chuan a result kha a la thlek vang vang a, kil tin aţangin a enkual a, a duhthusam ang in a la langchiang thei silo a, ka rai chhung hi chuan Debbie tan chuan ni leh thla a kalmuang viau in ka ring.

"Lo la rawh. Nangmah vang hian hrelo tur pawn an hre ţeuh" lungawi vaklo chunga tih pah in ka pawhthlak sak a, ka bag ah khungin ka kharphui hmak a, tum bur mahse ka ngaihsak lo der ve tlat. Midangin an hriat belh ka duh tawh lo.

Ward round tur a Mason rawn lut chu a zawh hnu ah pawh ala awm ve ta reng. Kan ward hi Matthew chanpual a ni ţhin a, Mason a awm tak hnu ah Mason hian a rawn thlak a, Matthew chu mipa lam ah a kal ta zawk a, a zai leh enkawl bik ho chu a rawn endik tho ţhin.
"Mason naute tan thil lei inei ve tawh em? Nimin ah ka haw kawng ah ka hmufuh a, nalh deuh mai ka lei a" Debbie in phur taka a tih siam siam laiin Mason chuan keimah min rawn melh daih.

"Hmeichhia nge mipa anih dawn pawh kan la hrelo a, a pian hunah ka la leisak ţeuh ang chu" pangai tak a awm a tum na a a thei mang lo. Debbie chuan a hrethiam kher lo ang.
"Nausen hak ah chutiang an thliar tak tak lo. A ţhang zung zung dawn a, a thar kan leisak leh mai dawn lawm" Debbie bawk chuan alo ti leh hlak a, "I ngaihsak ve lo reng reng. Ka phur tehreng nen" a tih zawm leh a. Mason chuan nui ruh ruh chung in "Ngaihsak e. Nang aiin ka ngaihsak daih ang aw. Ka bulah ka awmtir daih maithei" alo ti a, Debbie hlimna tawk a tling hle.

"Lo inkawm rawh u. Ka rilţam ţan, chhang kan lei lawk"
"Ka lokal ve ang. Lei ve ka duh" Mason chuan a rawn ti veleh vat. Kal dun kher chu ka duh vak tawh lo sin. Mak deuh deuh sawi a nei ziah.
"I duh sawila ka rawn leikep ang che. Ka reilo ang" ka ti nawi niaih a, ka bulah chhuah inpeih at in a ding fel than tawh.
"Keiman ka thlang duh" a ti leh bur tawh a, han hnial vak kha a nawm lem loh vangin ka ruala kal chu ka phalsak leh ta nge nge a. Matthew nen hian an sawi tawh chu tih ngei an tum tlat ţhin a nih hi. An in an na lai awmchhun a ni ngei ang.

Ward aţanga kan chhuah rual in "Mafela tih vel chu sawi miah suh ka ngaithla duh lo" tiin ka hrilh lawk a, min ti lungngai tu mai a ni.
"A that tu i hreduh lo em ni?" ala ti tho a, lu thin mat mat pah in "Tuman an that lo. A intihlum a nih kha" ka ti a, ka ţang na ve tlat. Mafela thihna chungchang hi chu Debbie sawi chiah kha ka ring. Matthew puh an tum anih chuan he thil ah kher hi chuan a lam ka ţang thei ang. Kan inneih hi a ni a, biakin leh kan in ah chiah kan awm a, hmun dang ah a kal lo.

"Naute chungchang hi" a ti dek dek a, "Tih tlak ka duhtawh lo" ti a ka lo chhan chuan a ner suk a, ka duhna a kiam ka tih rual in ka duhtawh lo tak tak em ka la hrechiang chuang lo.
"Emma ţhian ang chuan ka en thei tawh lo ang che" tih pah in min pawt ding a, ka lo run hle mai.
"Nau ka tihtlak duhloh vang in min kawm duh tawh lo maw?" ka nui hak a, ani pawh hi ka ngaidam ngun emai.

"Nilo e. Ti tla suh a pawi lo. Ka enkawl pui ang che" a ti leh sup a, a ţawngsawi em a, a thusawi chu ka lo remdik kual vel a ni ber.
"Ka lawm e. Debbie leh nang in awm chuan ka lungngai lo. Mahse ţhian nih i duhloh chhan hi ka hrelo" ka ti leh a, rin chu ka nei a, ka chian ngam loh bakah a ma sawi ngei hi ka hre duh.

"Ka duh che Emma. Fa ineih leh neih loh ah ka buai lo. Nei pawh nila, i fa nen pawh ka pawm vek tho che" thin ti ţhawng thei thu mak tak tak bak sawitur a nei miah lo a nih hi.


CONT...

---

FORCED MARRIAGE-11



"Mason fiamthu hun leh hun loh te hi a awm ngai" ka ti bah niaih a, ka ţawng nawk nawk in ka hria.
"Ka fiamthu lo. Hetianga rilru ka pu hi ka duhdan a ni bik lo. Ka thunun theih piah lam a ni tawh" thutak deuh in a ti leh a, a hmel ah pawh fiamthu hmel reng a lang lo.

"I hriat kha. I unaupa nupui ka nih hi"
"In in hmangaih lo a, hun remchang ka la nei ve tho a ni lawm ni?" boruak uap churh tih zangkhai tum in ka nui lui hak hak a, ka ţah te a chhuak mah zawk.
"Ţhian nih ka duhzawk. Ila in thunun thei ang. Hetiang thil hi sawi leh tawh suh" zangkhai taka ţawng tum mah ila ka hlawhchham chiang hle. Min en reng mai bawk si nen. An uap hi a na ve em a sin.

"Nitin ka hrilh ziah tawh ang che. In hmangaih lo chu a inneih reng theih loh. Ka hnen a i lokal duh phawt chuan ka in hawng reng ania" ka ding kun lap a, zahzel ah ka ke in chhuat lai ka thai kual neuh neuh a, an ni unau zawng an luhlul em mai a, hnial vak hian awmzia a nei ţhin lo.

"Inneihna chuan damchhung a daih tur a ni. Pathian hma a kan thutiam hi mihring in kan lo sut ngawt thei hleinem" ti zawng in ka pha kual leh a, in ven nan a sawi ni mah ila thudik tak a ni tho. Nupa chu thihna chauh lo chuan min ţhen tur a nilo.
"In duh vang a innei in ni lo a, mihring leh Pathian mithmuh ah pawh lemchang mai in ni. Ţhen mahla thudik hrechiang ber tu chu Pathian tho. A dem che ka ring lo" a ti duah a, nupa ah chuan hmangaihna a piang chawp mai ţhin an tih kha. Lemchang mah ila thu kan tiam tho si a, kan inţhen chuan Pathian hma a dawtsawi ang kan ni dawn a, ka ngaingam zan lo a ni. Ka nu leh pate pawh an zak dawn emai.

"Luhlul tlat lo teh. Keichu pasal neitawh ka nia, nula an tam alawm. Ţha deuh kan la zawng dawn nia" tih pah a nui hak chung in a dar ah ka chum a, ţhian ang bak in ka en thei tlat lo a ni.
"Tun ah duhthlang nghal tur in ka ti lo che. Engtik ni ah emaw chuan min rawn la pan tho ang. Keichuan ka lo hnar ve ngai lo ang che" a tumruh zia a hmuh theih a, a rilru puthmang hi a awihawm loh zawk. Matthew hi a unaupa tak tak ni sela chuan hetiang rilru hi a put ka ring lo.

Dawr a thil kan lei zawh a kan let leh lai te chuan min nghah reng tur thu te ala sawi a. Ward pan a step a kan chho chuan Irene kan la hmu zui. Ka hmuh duh loh ber mai ka hmu chu bo vang vang mai te ka duh.
"In in hmeh khawp hi. Nimin lam ah restaurant ah an lo nuihzat viau che a ni awm a" tih pah in ka ngei tur tawk lek in min melh ralh a, a nau hnen aţangin a hrevek tawh ngei ang.
"Ka chesual palh a, tleirawl mawl deuh deuh chiah in min nuih" min nuihzat hmel aiin thinrim tak hmel a pu tawh zawk.

"I che ţhing emai, i pasal tan chuan chhuahpui i zahthlak dawn anih kha" a ti leh hram tho. Henu hi ka haw telh telh mai. Min hmusit lutuk te hi. Min hmusit viau a, a neih duh ngawih ngawih chu ka neihsak ta daih tho anih hi.
"Hun awl aneih chang apianga chhuah dun a duh a, ka lo hnial zawk a" tiin dawt ka sawi ve daih. Matthew khan chhuah dun leh chungchang a sawi leh lo hrim hrim.

"Duhtawh teh u. Ka awm ve reng hi min be ve ula" ti a Mason lo tlakzeh tum chu kan melh hrawk ve ve a, alo nui sang ringawt.
"Midang thil neih chhuhsak chunga thlamuang deuh a awm thei mihring hi huat loh tum pawn a theih loh" a tih laiin "Ka duh reng vanga chhuhsak che ka nilo" ka lo ti ve vat. Ka inzuam tir tawh dawn lo. He nu hma ah hian ka mittui tih tlak pawh ka tum tawh lo.

"Midangte mit lak in duhloh chuan duhtawk rawh u. Irene nang phei chu fimkhur rawh. I hmingţhat tawhna kha ho te ah a chhe thei" tiin Mason a rawn in rawlh leh. Ka rilru a chhe thut a, Irene chu haw ve se ka ti khawp mai.
"Ka awmdan tur chu i hriatthiam kha. Hmingchhiat ka hlau lo. A nat dan tur pawh i hrethiam vek" a ţawng tawp lam phei chu a hriat theih mang lo.
"Mi â tak ang maiin i thinrimna ti lang suh. Matthew hian nang aia hmangaih a nei chuang lo" Mason-a thilsawi vang chuan ka lo ner suk. Min hmangaih lo mahse min ngai tho alawm ka ti rilru rauh rauh.
"Han in hnem vel teh u. Ka kalsan ang che u" ka ti a, an hmuhlai chuan chapo tak ang in hmai pho lah in ka kal nghat nghat a, min tihbuai loh zia ka ti lang ve duh hrim hrim. Mason hi tu lam ber ah nge a ţan ka hre nek love.

Ka thil lei dawhkan ah ka dah chawrh a, a keh rawp thei hial ang.
"A duh duh a a ţawngkhum tur ka ni lo" ka ti chhuak phawng a, hrilhhai tak in Debbie in min lo thlir dauh dauh tih ka hre leh hnuhnawh.
"Mason chungchang a ni em?"
"Irene" ka ti hmuk a, ka ngei zia tih lan nan ka ner zui nghal sak bawk.
"Matthew i nei ta hi ala pawmthiam ngang lo anih hi. Hrethiam rawh, hmangaih te chan nat zia chu i hriat kha. Kan thil lo tawn tawh te avang hian midangte hriatthiam na hi neih ve zel a ţha a nia" ala ti dam thluam thei tho. Ka tawng ang hi tawng ve se hetiang hian a awm bik lo ang. Ka rai no vang nge ka mood hi a inthlak thut thut lehnghal a, tih thinrim zawh loh an tih ţhin kha a chang chuan biak ngam loh khawp in ka vin tak ţhin. Debbie hian a hrechiang ber ang.

"A landan leh a rilru puthmang inmil lo lutuk te hi. Ka bulah chuan sakei a ni ringawt" a lo nui hak hak a, a bula ţhutna awl kawh zauh pah in "Lo ţhu phawt teh" a ti leh a, thinrim tak in ka ţhu chawrh a, kan ţhutna hi hei ai hian dup sela chuan ka ţhut nghawr na lamah Debbie hi a in sep kang dawrh thei ang.
"Nau i pai kha in dim rawh. Thinrim a chet buan buan te hi a ţhalo, i inti palh mai ang" min vengthawng tak chung in a ti a, tunhnai a ka nungchang ang hi ka nei ve tih pawh ka lo in hre ngai miah lo. Ka thil tawn rapthlak tak tak te hian min thlak danglam ta vek anih hi. Mihring hi kan lo danglam thei khawp mai. Nungchang mai bakah hmel thlengin a danglam vek thei tawh.

"Coffee ilo la tel miah lo"
"Ka in peih tawh lo bakah ka keng seng lo. Irene leh Mason hi an in pawh ve a mi?" ka tih zawm nghal zat. Thui tak zawng a hrebik lo ang.
"Pawh ang. Matthew leh Irene hi an in kawm nasa thei emai. Mason leh Matthew hi unau an nih chuan an in pawh ve em em ang. I sawi dan takah Irene hian lem a chan thiam phei chuan" min tih phur a tum leh tawh. Ani pawh a awm nawm nan a ngei zawng te ngei ang deuh a ka awm ve ţhin kha. Hmeichhe pahnih inkawm ve si ah chuan mi pawi kan sawi lo ve khawp mai. Midangte chanchin chhia kan sawi ngai mang lo a, Irene hi kei hian ka haw ta hlur zawk a.

"An inhriatna a rei tawh chuan hmai pahnih a nei tih te chu hriat daih tawh awm tak a nia"
"I pasal te unau bulah a ţha lam chauh a ti lang a ni mai lawm" ka thil lei chu coffee tello in a ei pah mawlh mawlh a, ka khawngaih leh hnuhnawh.
"Coffee chu ka laksak leh dawn che mi?"
"A ngai lo. Tui a awm alawm. Thingpui pawh a lum theih" alo ti var a. Ward hrang ve ve ah min duty tir ang tih ka hlau ţhin. Ka mi rin ve chhun takmeuh ania, ka chunga thil thleng zawng zawng ka hrilh duh chuang lo. A rilru a na dawn em a, midang tawrhtir ve ai chuan keimah a tawrh ka thlang mai.



Ni a liam ve bek bek a, Matthew nen pawh in hauhna kan nei tawh ngai lo. Pangngai takin kan in bia a,kan nuih dun hawk hawk chang lah a tam. Irene nen ka hmuh dun leh zeuh ţhin vangin an inkar ah eng boruak ber nge la awm ka hrelo a, an tawp tawh anga ka pasal in a sawi kha ka ring ve hmiah.

Ka chau nghulh leh ka luakchhuak reng mai te chu ka ning in min manchhuah phah mai te ka hlau ţhin. Ka la hrilh ngam chiah bawk silo nen, thil ei laia ka luak a chhuah te hian chhuanlam hrang hrang siam in ka in thiar fihlim mai ţhin. Ka rihna pawh a tlahniam deuh a, hei hi chu a rei ang a a reh leh mai tur ah ka ngai. Nidang ang in hna a kal pawh ka phur lo. In lam a chawlh hahdam te nuam ka ti ţan a, eichak ka neih te hian in lam a kan neih loh chi anih chuan ka lei haw mai ţhin.

Ka naupai chu a rei ang a ka awmdan hrehawm tak ţhin chu a zia mai ka rin laiin a nasa tawlh tawlh amaw tih mai tur a ni. Choka aţanga chawhmeh rim rawn nam chuk chuk te hi rimchhia ka ti em em a, Matthew lah chu rimchhia ti ang pawn a awm ve der silo a. Ka duhzawng tak ni ţhin te pawh ka hne a, thil ka ei ve pawn ka luak leh a, hei vang hian ka cher kawk kawk in ka hria. Thla hnih na ah khan Debbie bawk in ultrasound min tih pui leh a, kan tihna hmasa nen khan drawer ah ka dahţha a, en tur a drawer ka pawt hawng ngun lutuk hi drawer pawh a chhe ţep tawh in ka ring.

Khum a zawi deuh a ka leh kual mai mai lai a "Tunlai i dam meuh nange?" tih ri ka hriat chuan ka phu nasa lutuk. In bengkan ka tum zet na a Matthew a ni tih ka hriatchian vang a ţhulh leh in ka mu leh hnawk. Kawngkhar ngheng in kuangkuah in a ding a, min en reng, min zirchiang leh vel tawh a niang.

"Dam e" ka ti veleh hnuhnawh. Ka chhan na ala nghak reng miau sia. Ka mu zangthal a, a din na lam ka melh zawk hnu ah inchung ka en leh daih. Ka ban ka phar hiang a, ka zawi vel vek a ni mai.

"I eng nge na?"
"Ka dam ka tih chu" ka ti vin ţhak tawh. A rawn pen lut ta nge nge a, ka mutna bulah rawn ţhu in ka chal te a khawih vel. Ka biang a khawih leh lai chuan a kut ka lo beng per sawk a. Ka ben nat tehreng nen a nui suk duh chauh lehnghal.

"In ward ah damlo enkawl hahthlak an awm nge midang i duty kep ţhin? I chauh hmel thei riau" min ti leh a, ka awmdan chuan a ngaih a ti ţha tawh chiah lo a nih hmel. Ka rai chu a ring lo hrim hrim ang a, min mawlh tu ka nei amaw ati daih ang.
"Tupawh an ţha. Bakah i hriatchian duh te chuan min zawt lo in rawn en mai ta che"
"Ka rawn en ziah chuan min lo hmu ziah thei ang a" a ti uang a, ka lo ner nghal nang a, kan ward ah a rawnkal ngai tak loh vang hian a nupui hi a khawkar lo ber ka ni hial ang. Kan ward a nurse duty ţhin te chuan an sawi reng zel. A englai ber hian nge an lunglen ang aw ka ti rauh rauh ţhin.

"Kawng na ţhum chung phei hi chuan ka hmupeih vaklo che. Kawm tur iduh leh Pi Sangi bulah zuk awm rawh" tih pah a saisir in a ţhut lohna lam ka hawi a, ka in let fel awrh ang tih in ka kawng a rawn khawih a, "Ka lo hmeh ang che" a tih zawm zat. Ka khawng awt a, ka cheţha thei tawh lo. Ka awmdan a remlo viau chung in a hmet tho a, nuam ka ti leh tho sia. Ka kawr a hlim a, ka taksa hlang a hmet a, ka lo dawnsawn dan ka hrilhfiah thiam chiah lo a, nuam ka ti tho tih chu ka sawi thei.

"Emma damlohna inei lo tak tak em?" min ngaihtuah tak chungin a ti leh a, ka cher zia a hriatbelh a nih dawn hi.
"Neilo. Cher ka duh a, thil ka eitlem lui a nih hi. Hmeichhia chuan cher kan duh theih em hi" ka ti kual duah a, a awih a ngemaw chu.
"Zep ţhen inei lo maw?" min ring chiah lo tih ka hria, ka thuruk hi a hriat ve ka duh lo hrim hrim.
"Neilo. Ka ţha vek"
"I neih chuan sawi rawh. I pasal ka nih hi. Doctor ka ni bawk a, enkawl dam che ka tum ang" eng nge maw a hriat ni? Min ngaihtuah thar riau te hian ka ngaih a ti ţhalo zawk.
"Damlohna sawitur ka nei lo hrim hrim. Ngaihţha deuh khan awm rawh" ka mut zangthal leh rual in a kut a lasawn ve nghal a, tun a ka natna te hi chu enkawl dam theih pawh a nilo. Rai hi alo hrehawm em a nih hi.

Ka rilru ah thil hrang hrang a lo lut zut zut a, Matthew hi ka zawt hreh ţhin a, ka zawt chak em em zel bawk.
"Ka hnen aţang hian eng nge i duh?" ka ti ta tawp a, a awmdan hi ka hrethiam tlat si lo a.
"Ka nupui ni reng la ka duh"
"Irene hi i hmangaih a, midang i hmangaih tih hre reng chung chuan ka pawh tak tak theilo che" a insiamţha a, ka bula lo mut ve pah in min kuah a, a hmel ka hmu thei ta lo.

"Irene kan sawi dawn hian ngawih i chuh tlat zel"
"Nunhlui sawichhuah reng ţul iti em ni?" a ti nghut a, min kuah nghet zual sauh va, an inkar ah hian thil ţhalo thleng a awm em maw ni ka ti hial.
"Bialnu nei chung hian i nupui ni reng turin min duh maw?" ka lo ti ha a, zawhchhuah ka tum tho tho. Hmeichhia hian kan thawl hawk thleng in ţhiante bulah kan chungchang kan sawi a, mipa ve chu an nupui te bulah pawh an chhungril an phawrh ţha duh der lo. Sawichhuak vek mahse an mipa nihna a bo dawn chuang mang silo.

"Nupui chiah ka nei tawh" a ti leh tawp a, chhan tum in ka ang zuau a, ka aw a chhuah hma in kan hmui a in si leh reng tawh. Ka lungphu a diklo leh a, rang takin a phu dawt dawt a, ka pasal in ka lak a ţhat a chhuah tak reng hnu hi chuan danglamna ka nei ve tawh tih ka hria, ka lo fawh let ve na hian ani pawh a hriattir in ka ring. A lung zawn ah ka kut ka dah a, ani pawh keimah ang tho in a lungphu a pangai bik lo. Amaha ka rilru puthmang ka thlak danglam ang hi a ni em ka hrelo na a, min haw lo tih ka chiang em em thung.

A inlak hran hnu ah ka chal leh a chal ti si chungin a awm ngaiin a awm reng a, mipa a nia, a nupui bula a awm bawk si chuan a rilru mai bakah a taksa ah danglamna a awm ngei ang. A thil lo tihsual tawh vang khan inchhir na a nei ngei bawk ang a, ka remtihna tello chuan a kalthui ngam lo a ni.

Amah bawk a awm hrang hmasa leh a, min fawhna ka lo chhanglet ve bawk nen, a inlakhran chiah hian ka lai tlat, naupang ang mai.
"Hmeichhe duhawm tak ka nupui anih chin ah hian ka bialnu ka ngaihsak lo a, chu chuan inţhen na a thlentir te pawh a tih theih ang" a sawizawh rualin a nui hawk a, duhawm min tih vang khan keipawh ka lo lawm ve em em.

"Kei aiin Irene a hmelţha fe" ka ti hlak a, ka naupai lai hian ka rilru min lak ţhen sak anih ka ring, ka puitlin na a bo daih dan ah hian.
"Pawnlam mawina aiin chhungril ţhatna hian mi a hneh hma zawk. Hlimna ka pe ngailo chung pawh a min kalsan miah lo tu hian ka rilru a hneh ve tawh a ni ka ring" tih pah in ka lam alo hawi leh a, lo nuih seih pah in ka lo kuah a, lungngaihna chiah min thlen ţhin a, tun ah tak hi chuan ka hlim khawp mai. Irene ka khum ta ah ka ngai tlat. A thutak viau bawk a, dawt hmang a min fiamkual mai mai tur ah ka ngai lo.



"Vawin chu ka rualin kal rawh aw" ka insiam mawlh mawlh laiin a rawn lut a, a in peih leh at tawh. Nizanah room khat ah khum inţawm in kan mu a, chhunzawm zel pawh kan tum leh tawh.
"Ka la hman lo deuh"
"Ka nghak ang che" a ti ve mai a, sofa ah ţhu in ka chevel min lo en a, a sana bunlai a en sek ringawt pawh hian a dawhtheih loh zia a lantir ngei ang.

"Natna nei i ang ka la ti tho" min en reng chungin a ti leh nghut a, ngaipawimawh lo deuh in ka dar ka san ak a, "Ka neilo" ka tih liam puat hnu ah thildang ka tihsan leh.
"Ka nu rawnkal a tum a, ka buai nileng dawn a, duty zawh ah i haw tlang thei angem?" a tih chuan ka thiltih lai ka tawp chat a, anu kha ka hmu chak em em lo. Mason hnen aţangin a fel loh zia ka hrevek tawh bawk nen mahse boruak tihchhiat ka duhloh vang in "Ka thei ang. Nangpawh a haw hma a rawn thlen hman tum ve tho rawh" ka ti a, keimah chiah a awmpui nilen chu ka peih bik teuh lo mai.
"Awle" a ti ve mai bawk a. Min en reng bawk vang in ka che lai tluan ţhak.

Ka inpeih hnu ah kan inzuichhuak a, Pi Sangi pawn phur takin min thlahliam thlap. Kan inneih aţanga hna kal tur a kan chhuah rual hmasak ber a ni maithei. Matthew hi chu zing ah a chhuak tlangpui a, keichu ka duty hun a zir in a ni mai. Heivang hian kal rual reng pawh a theih chuang loh.

"A ngainat zawng inih vang a rawn hmuh che tum ang in a in sawi a" ka awih lo lutuk chu ka lo nui hak ringawt. Min melh dan en khan min ngaina lo tih ka hreve vek.
"Ka nu hi a nelawm lem loh a, a rilru erawh a ţha fu thung"
"Kan inneih hlim a inu leh paten min ngainat loh thu i sawi kha ka la hrereng"
"Hun liam tawh chu theihnghilh rawh. An hriatchian hma che anih kha" a ti nghut a, nu leh pa thlavang hauh a pe na khawp mai ti rilru chungin ka ner suk duh chauh.

Hospital gate ah kan tlan lut a, an phu leh suau suau tawh. A la hma viau ania, mi an tam hma khawp mai.
"Emma ka nu chu kawmngeih tum rawh aw" tiin min chah nawn leh a, ka lo bu nghat ringawt.
"Hlauh nei i ang" a ti sup a, ka zam na ka lo lantir leh tawh pek a nih hi.
"Diktak chuan min ngaina miahlo tu hmuh chu ka hreh ve a, in in a kan kal lai a min en dan te kha min tihnat duh a ang. I nun tichhe tu ah min ngai ve aniang" a huat thu ka sawi ang tih hlau in ka ţawng chhung zawng in ka en ngam lo.
"Tihnat che ka phallo tih a hria" a tih ve hnu ah ka hawichhuak ngam chauh a ni.

Amah ka en chuan a lo nui a, mak tak mai in chu chuan min ti thlamuang khawp mai.
"Irene leh ka nu hi ka ţhianţha neihchhun an nih hi. Ka ngaina che tih an hre bawk a, ka thil neih leh ngainat tak hi ka nu chuan a ti na hauh lo ang" tiin min thlamuan a, ka z*ng deuh huai in ka in hria. Anu hmuh pawh ka hreh em em tawh lo. Matthew sawi ang hi anih chuan min ti na lo ang a, ka tan a ngaihthlak hrehawm pawh a sawi lo ang. Irene hming hriat erawh hi chu nuam ka ti ngai lo.

Matthew nen a kan in ţhen hran hnu ah ka duty na tur bik ah kal in ka inthlak sawk sawk a, ka chhuah leh hnu ah Debbie aiin Mason ka hmu hmasa zawk. Mut a kham lo nge a pawr phang in ka hre mai.
"Ka nuhrawn rawnkal a tum a ni awm e" alo ti nghal var a, chhungkaw in pawh lo tak anni chung hian an thil tih tur an in hriat tawn sak thei viau lawi sia.
"Ka nu ti ve mai la" a zawhna pawh chhang lo in a thusawi ka lo tihdik sak daih. A lo nui suk duh chauh lehnghal.
"Fimkhur ang che a ţha der thiam ania" a tih hnu ah "Ka nuhrawn chu" a ti leh kher bawk.

"Khawnge Debbie?"
"Damdawi a sem" a ti hmuk a, Matthew nen garage ah kan ti ti rei deuh a, ka thil tih tur min lo tih khalh ta daih a nih chu.
"Lo ţha der pawh nise ka pasal a nu anih na hi a bo dawn chuang lo a, a nihna ang a ka pawm mai a ngai dawn anih hi" tiin a hma daih a a thil sawi ka chhang ve chauh.
"Tupawh hi i ring nghal zel mai a, alo bum che ka hlauh vang a nia ka sawi. Rilru ţha hi bum an awl a"
"Min bum fo mahse thudik chu a langchhuak leh ţhin. Mihring ka nih ve tho vang hian ka thil hriat zawng zawng hi dawt nge thudik ka hre chat chat thei bik lo a, thudik chuan min hnaih zel a, dawt erawh chu a thamral leh zel dawn tih ka hrechiang. Thudik chu a dingchang ngei ngei" ka ti duah a, mihring chu tupawh bum kan awl vek. Dawt hi a sawitu in a sawithiam viau phei chuan thudik ang hmakin a ngaih theih.

"Ka nuhrawn hi ring lo la inchhir leh na tur inei lo a ni mai. Naute a ţha maw?" ati leh ta daih.
"Nitin a ţha zual zel"
"Vanduaina a thlen che ila ring lo cheu em?"
"He in chhungkaw buai tak a remna siam tu a nih ngei ka beisei" tih pah in a mit ah tak chiang tak in ka en kal laiin "Apa diktak hian a duhlo vat ang a, keichuan ka pawm reng" a ti leh a, hetiang a sawi hian nuam ka ti ngai lo.
"A fa ngei pawm duhlo khawp a nunrawng a nih ka ring lo"
"I pasal hian Irene aia duh a neilo. Irene hian an in zawm na a pawtchat chung pawh in ala umzui reng anih hi" atih lai chuan mak ti in ka ang pham mai.
"Chu chu engtin nge i hriat?"
"Irene hi i pasal ţhian chauh nilo in ka ţhian ve tho anih hi. I pasal hian a hauh na em a, Mafela nen khan kan kawm ţha ngam lo zawk a, kan puitling a, naupanlai aţanga in pawh tak ţhin kan ni bawk a, kan inkawm chhunzawm ta zel a nih hi. I pasal nen a an inkawm dan hi a ril bik em mai pawh a" a ti duah a, ka chhan let hma in Debbie a rawnkal hlauh zawk a, Mason hi ka ngaina lo tial tial in ka hria. Ka rilru a pawt peng hneh viau lawi bawk sia, Matthew hi a haw ve takzet niin a lang.

"Ka chanchin in lo sawi a ni maw?" Debbie in a rawn ti uang a. Boruak pawh a zangkhai deuh tawh.
"Mason tunlai an fak ţhin khawp che a, Matthew ila tluklo viau tho" Debbie bawk chuan a ti leh a, an chungchang hre tam ve hek lo, Mason-a lo danglam nghal te chu a hmu ve miah lo.
"Kei aia senior chu tluk an har em a" a ti mawi ve na a, a lawm loh zia ka lo hmu hman vek. A office a a kal hnu ah Debbie ka khak a, engahmah alo ngai lem hlei lo a.



Ka duty chhung zawng in a thilsawi ringawt kha ka ngaihtuah lehpek. Irene zawk an in zawm na pawtchattu a ni te hi mak ka ti. A hmangaih chhuhsaktu ah min puh in min haw viau kha a nia, awlsam tak a an in zawmna a pawhchah mai dan hi ka hrethiam pha lo a, keimah min khawngaih vang a ti a ni dawn lo tih erawh ka hrechiang.

Inchhung ka luh rual in living room a Matthew a nu lo ţhu ran chu ka hmu hmasa ber. Ka zawn hmasak ber a ni bawk. A hma ang tho in a nelawm chuang loh. A mitmeng a rum al a, a hmui a chip nghet tlat bawk.
"Ilo thleng der tawh a ni maw? Ka inthlak ang a, ka rawn chhuk leh vat dawn nia" nui sang chung in ka ti mawi ve a, Matthew awm ve se ka ti kher mai. Ka awm a nuam leh tawh lo. Ka haw dawn khan Debbie eitur chah rim ka hria kha ka luak leh vak a, ka chauh tawh sa nen kan inleng hian min ti chau lehzual. Hlim leh phur tak a min lo hmachhawn chu ni sela a zia deuh in ka ring. Inchhung te hi a thim khup in ka hre mai.

Ka inbual harh a, muanchan chi anih loh vangin thawmhnaw hak nuam deuh ka in bel sawk sawk a, ka pasal nu hmu tur chuan ka chhuk leh a, kan inhmuh dan in a zirlo thei em a, ka la ko miah lo. Ka hmu hreh bawk a, ka ke pen tin te chu a rit nulh a, Pi Sangi hian a haw tawh tiin min rawn hrilh se tih thleng in ka ngaihtuah. Mahni pasal te nu hi kei anga hmu hreh an awm pawh ka ring lo. Zing lamah kha chuan Matthew vang khan ka thlamuang em a, ka hmu chiah chu khang zawng zawng kha a bo vek.

A ţhutna ka thlen dawn chuan ka awmdan thlak danglam in ka nui leh sang tawh.
"Chaw ei ve rawh aw" zangkhai vah a ti chung in a bul ah ka ţhu lui ve ngat a, "Ka ei hman ka ring chiah lo. Nidang ah ni rawh se" ka rin loh deuh in a nui ve. Matthew hian apa aiin anu a ang daih zawk, a nu ka hmuh chian hian ka hrethei mai.
"Matthew pawh ilo nghak ang chu"
"A buai thei em a, alo haw hman loh pawn a pawi lo. Mason eng nge a an?" a ti ta daih a, Pi Sang in in tur a rawn chhawp lai chuan ka ngawi rih a, a kalsan veleh "A ţha ni mai. Hospital ah lo hi chuan kan inhmu ngai lo a" ka ti ţha ve mai.

Harsa tih hmel tak in a rawn thaw chhuak hak a, chapo leh induh larh hmel a put ţhin kha lungngaihna in a thlak thleng vek tawh.
"Emma engpawh thleng se Matthew hi kalsan suh aw" a ngaihna hrelo tak in ka ka hau a, min rawn hmuh a duh chhan pawh ka hrethiam tawh lo.
"Pasal atan ka nei tawh a, ka ţhen lo ang" nghet charh in ka ti ve ta nge nge a, a hmel ala inthlak chuang lo.
"A thil neih apiang a hloh zel a, tupawn Mafela leh Mason an bel a, an kalsan mai ţhin a, nang lehzel chuan Mason vang hian ka fapa hi kalsan miah suh" a ti mawlh mawlh a, ka kut a rawn vawn chuan ka phu zawk a, a kut lum a min vawn vang vang hnu chuan ka taksa ţang ţeuh pawh thlahdul in thlamuan na ka nei thei ve ta a.

"In inneih hlim khan ka ngaina lo takzet che. Irene nen an hlim ţan ve dawn chauh a, tibuaitu nei lo a an hlim ve lai, inneih hial pawh kan sawipui tawh hnu ah khatiang kha a thleng a, ka fapa hian lungngaihna ringawt a hmachhawn vang hian Pathian pawh ka dem hial a, in inneih ni kha ka hmuh hmasak ber na che a ni. Mafela ngaihzawng ini tih ka hreleh zel a, ka fapa diklohna changran tu ngaihzawng chuan chhan nei a ka fapa neihtum ah ka ngai tlat che a,in neihna ilo remti ve mai bawk nen, ka enthlak tir reng che a, i ţhat lohna ka hmuh tak loh ah chuan zawi zawiin ka pawmthiam che a, ka fapa hlim tak tak hmel ka hmuh zeuh zeuh hnu ah phei chuan ka ngainat phah ve tial tial che a, midang hnen aţanga i chanchin ka hriat lah a ţha lam vek a ni bawk nen, tunah chuan ka mo atan ka pawm thlap tawh che" a ti dap dap a, a chawl det a, ka kut a vawn na chu thlah in intur a ban a, inhmuam up leh paukhauh tak ang a ka hmuh ţhin kha a ni tawh lo. Mak ka tih leh chu Mafela a sawi dan leh Mafela ka hriat dan danglam daih hi a ni. Mafela kha chu security ang khan ka la ngai tlat. Ka chian em em hnu pawh hian midang daih ah ka ngai tho.

"I rilru ka tibuai tih ka hria. Thil tam tak sawitur nei mah ila nidang ah a tam zawk chu ka la hrilh dawn che nia. Ka fapa hi kalsan lo turin ka duh che. A tuar hnem tawh em a, tawrh belh tir tawh suh. Ka hmangaih takzet a, anat chuan ka na ve zel a ni. Midang hmuh ah lantir lo in amah hian a tuar mai a, a naupanlaiin hetiang mizia hi a ni ngailo. A thinchhiat deuh pawn khawngaihin ilo hrethiam dawn nia, i hriat loh hian thil tawrh a ngah tih lo hriatsak hram hram rawh" a ti dam dap a, a hmangaihna chu keipawn ka lo hmuchiang khawp mai.

"Hospital a len zel nan leh a hmingţhat theih nan Matthew hian ţan a la a, Mason te unau Dehli ah nuam tawl a an awm chhung pawh in ka fapa hian naupang tak chungin hah takin a thawk reng a, selna leh fakna a dawn pawh a in zat vel in ka ring. Hospital a len zel tak ah chuan apu hian Mason te tan a it leh a, Mafela kha lawyer anih vangin Matthew thil tihsual chang ran in hospital ah hian hna hniam te a rawn vuan a, Matthew tih hrehawm nan a ţhianpa nen an in tiamna tlem bawh pelh in Mafela aiah Matthew hi i pasal turin a dah a, Matthew pawh khan a pawm thei mai lo che mahse tunah chuan a ngainat zia che ka hre tawh. Mafela ngaihzawng inih vang ringawt pawh khan a ngainep ţhin che a, Mafela hmeichhe kawp ţhin ang mai mai kha inih a ring a, inih loh zia a hrechiang zel a, a ngaina ve zel che a ni. Min rin leh rin loh chu ka hrelo. Dawt erawh ka hrilh lo che tih Pathian in min hriatpui e" ka thaw hawk a, keimah a awm ka chak ngawih ngawih tawh. Mafela chungchang chu min tibuai ber tu a ni leh a, ka hmangaih em em ţhin a, hriatchian zel ka chak rual in ka huphurh bawk.

"Mason-a nu hi eng nge a chanchin?" ka thil zawh avang chuan mak ti hmel a pu thut a, a thlak danglam hma leh viau thung. Min chhan a hreh tih hrereng chung in a chhan na ka nghak tlat thung.
"Nidang ah ka la hrilh dawn che nia"
"Tun ah hun kan ngah tho alawm" ka ti ve tlat a, Mason-a hnen aţanga ka thil hriat leh tun a ka thil hriat in kawkalh nuaih mai te hi remkhawm har ka ti. Matthew-a nu, ka nu ni bawk hian Pathian hming lam meuh a a sawi chu dawt a nih ka ring chiah bawk silo.

"Mason chuan a thi tawh a ti a" ka ti leh a, ka nu chu kar char char ka duh.
"A thi lo. Thi se chuan vuina te kan nei ang chu. A thlan hmuh tur pawh a awm loh hi. Mahni nute ngei thi anga han lantir te chu" thinrim takin a ti hmarh hmarh a, Mason khan dawt a sawi tihna em ni dawn?

"Anih leh khawnge? In ah kha chuan a awm ve lo tiraw?"
"He thu hi ka sawi ve chi ani lo. Ipu zawt rawh"
"Ka ngam lo. A thi ang a ka hriat vang khan mak ka ti em a" ka ti leh a, hreh deuh chung in "K-ka n-nu" ka ti bah nak bawk. Ka koh ve dan lah chu a chiang lo si. Ka ko hrim hrim chu mak a lo tih hmel ve viau bawk a.
"A awmna chiah ka hre duh ringawt alawm"

"Delhi ah Mason-a nupui leh fanu nen an awm" ka phu dawrh a, ka nu lah a chip leh hmak tawh. Tun aţang chuan tumah hi ka ring leh tawh ngai lo ang. Tumah ka rinchhan tawh lo bawk ang.



CONT... (Kan damloh buai em vang in ka rawn dah khat a, in lam leh hospital kal tawn sek angai a, ka rawn dah chhun pawn a sei lutuk thei ngailo a, min hrethiam hram hram dawn nia, damlo na tak neih hi chuan kan lo phili ve tawh ţhin sia, min hriatthiam ţhin na avang pawh khan thinlung takin lawmthu ka sawi mawlh mawlh. Thui lo pawh nise nitin dah hram hram ka lo tum tawh dawn nia )

---

FORCED MARRIAGE-12

"Nupui a nei maw?"
"Ila hre nange?" kan bo dan a in chen vel ang. A sawiloh tur sawi ni awm tak in a hmui a hup a, a mitmeng rum al ţhin pawh maktihna in a thlakthleng vek.
"Ka hre miah lo. Ava mak ve" meng phar kawk chungin ka ti leh a, Debbie kha chuan a sawi zuai tawh a, ka lo ngai thutak duh lem lo kha a nia.

"Anih leh eng mi nge a neih? Chuan Mafela kha a nihna diktak min hrilh thei em? Kum3 chhung kan inzui a, engmah ka hrelo. Min hrilh vek rawh. Thudik tak vek i sawi em?" a dar a dawm chung meuh in ka zawt mawlh mawlh a, ka la pangngai thei lo. Mawl ka inti in la zak ngawih ngawih.
"Ka fapa chungchang lo chu sawi ka duh tawh lo" a ti bur tawh mai bawk a, kei in ka hrechiang chak tulh tulh bawk si. Ka ngei lek lek hial a ni.

"Khawngaih in min hrilh rawh. Mafela khan hmeichhe dukdak lo a kawp ţhin em ni? Eng ang in nge a nun a hman?" ka ti leh a, min nin hmel tawh viau chung pawh in ka la beidawng duh chuang lo.
"Mafela chu ila ngaihven viau tihna em ni?" a ti chang fak a, a rilru tur chu ka hrethiam. Keipawn ka thil zawh chu atthlak ka ti mahse ani lo chu zawh thudik min hrilh tur an awm chuang lo.

"Aih. Ngaihven tum mah ila a thi daih tawh a, awmzia a nei chuang lo. Thi lo mahse pasal ka neihtawh a. Eng ang in nge a nun a lo hman tih chiah hriat ka duh" ngen ngawl tak in ka ti leh. Kum3 chhung lai lem a chang biklo ang. Min hmangaih tak tak tih ka hria, nunhlui chu a nei ve ngei ang a, keichu min bum miah lovang.
"Hmeichhia a kawp kual nasa, lehkha a zir lai aţang tawh in. Thildang chu ka sawi lo ang. A nihna kilh kelh hriat ka nei biklo" bottle a ban a, tui a in khawlh khawlh a, a thilsawi chu inchhir hmel a pu. Mafela ka ngaihtuah leh a ring a ni ngei ang.

"Mason-a nupui chu? Engtik hun a innei nge an nih reng reng?"
"An la innei ţha lo. Fanu duhawm tak annei tih chiah ka hria. A nupui pawh a rawnkal zeuh zeuh" hlauhthawn hmel tak in ka kut a rawn vuan leh thut a, a chetdan phut phut chu hriatthiam a har. Rilru mumallo tak pu te pawh a ang rum rum.
"Mason hian eng thil pawh tise ka fapa hi kalsan reng reng suh aw. Chumi sawi tur chuan ka lokal. Irene nen hian an inkawmngeih tih hria la, thikthu tichhe vak duh suh. Ka fapa hian a ngaihven em em tawh che tih ka hria. Mafela leh Mason tih vel intihbuai tir suh" a ti leh mawlh mawlh tawh a, ka zawhna min chhang tawi thei hle si. A thilsawi hi a dik vek anih chuan Mason-a lakah hian ka lungawilo khawp mai.

"Hospital hi Matthew kut ah a awm ngei thei angem hriat a ni tawh lo. Mason leh a nu hi an ţangdun ngei dawn a, ipu rilru hneh dan an thiam bawk si, ipu in Matthew a lawmloh zia i hriat tawh kha. A hnen ah awm in ilo fuih ve reng dawn nia" ka bu nghat a, ka rilru erawh a vak kual nasa hle mai. Mafela ah bawk a tawp leh ţhin. Tupawh lo kawpkual ţhin se ka haw reng reng lo, nunhlui neilo kan awm lo. Kan nunhlui a in ang lo nuaih a a ni mai. A damlai khan tlem tal chu min hrilh ve tur hi a nia, a thih hnu ah a chanchin ka lo hriat tlem lutuk vang khan ka zak leh hnuhnawh a, a nutei te nupa lah kha a nu leh pa tak ang ah ka lo ngai hmiah mai bawk a, a in kawkalh kual vek tawh a nih ber hi.

"In ngaihtuah hah duh suh. Thil lo thleng tur tuman kan hrelawk lo. Inringtawk tak chunga lo hmachhawn hi kan tih tur a ni. Ka hawsan ang che. Nidang ah kan inhmu leh ang a, kan sawi chhunzawm leh dawn nia" a ti a, muangchang in a ding zui a, ka din ve hun nghak in min en reng a, rilru buai nuaih chungin pawn lam ah kan in zui chhuak a, a driver in motor a dahrem chhung in "I ngaihtuahna hruaipeng thei ka sawi ţeuh in ka ring. Fimkhur turin ka chah leh duh bawk che a. Ipu hian a mo te hnawhchhuah a hreh miah lo ania, i nun uluk la, in ti chak tlat ang che" kan hma zawn ah car a ding a, car aţanga driver a rawn chhuah chuan a tihziah dan in a dak larh a, a chapo hmel leh ar tawh. Min thlahna thu a sawi mawi ve ka ring a, ka lam hawiin hmui chip tlat chungin a bu zeuh a, driver in kawngkhar alo hawnsak sa ah chuan a ţhulut a, driver hmuh laia nelawm deuh ang a awm a duhlo a nih te ka ring leh a, vawin a ka hmuh tak hi chuan ka hmuh tawh ţhin nen khan a danglam hlak reng a ni.

Muangchang in inchhung ah ka penlut a, hriatzel ka duh. Mi hrang ve ve hnen aţanga tlem te te chhumbung tak tak hriat reng ai chuan thudik tak a vai a hriat vek ka duh. Tumah hi in bum tir ka duh tawh lo. Choka aţanga Pi Sangi thil siam rim rawn nam chuan ka luak a tichhuak leh ut ut tawh. Ka hmui hup in bathroom hnai ber ah ka tlan lut a, ka thleng hman lo teuh kher lehnghal. Ka luak zawh hnu ah kam te ţhuah in ka hmai ka phih a, reh vat se ka ti, hetiang reng chuan Matthew hian hriat hun ala nei mai ang. Ka dul puar a hmuh hun ah hre chauh se ka tih nen. Ka inzep reng theilo ang tih ka hlau ngawt mai.

Bathroom kawngkhar ka hawn rual a Pi Sangi lo ding reng ka hmuh chuan ka phu nasa lutuk a ka au ţhat nghe nghe. Ka kat dawrh thei.
"Pi Sang min ti phu alawm" ka ti vat a, a kawngdawm in ka hmaah a rawn ding a, min en kal mai bawk a, zam awm duh tak a ni.
"I rai tiraw?" a tih chiah phei chuan inchhung hi a reh nghal vung vung thei.
"Rai lo" tiin ka la pha zel tho.
"Fa pali nei tawh ka nia, ka hre lutuk. I pasal hian a hrethiam lo mai mai zawk anih hi. I taksa danglam dan ah te hian ka hrevek" ka banrek ah vuan in choka lamah min kai dawt dawt a, ka in pal nawk nawk a ni ber.
"Thei i eichak em?"
"Eichak e"
"Ţhu rawh ka rawn siam ang" a ti a, fridge a hawn laiin keipawn chair pawtchhuak in ka lo ţhu rem ve a, Pi Sangi chevel en pah in ka nu thilsawi ngawt kha ka ngaihtuah lehpek. Mafela leh Mason te hi eng vanga lemchang nge an nih ang? Hospital duhtho si in Delhi ah an awm reng a, Matthew an huat vang hian Matthew kut a a awm an remti lo em ni ang? Ka hrethiam lo khawp mai. Mafela hian rilru chhia a put ve theih ka la ring chuang lo a, Mason-a nupui lo nei reng hi awih har ka la ti. Ka nu sawi kha a dik vek anih chuan ka pasal hi ka lainat thar riau mai.

"Ei vat rawh ka siam tawh kha" inthiamlo deuh chunga Pi Sangi en pah in ka nui vur vur a, ka ei zui nghal mawlh mawlh. Room a a ruk a ei ai ngawt chuan heti hian nuam ka ti daih zawk..
"I pasal hriat i remti lo em ni?" tih pah in ka hmazawn chiah a chair a pawt tawlh ve a, kan in hmachhawn ran mai.

"Hre rih lo se ka duh. Kan inneih dan i hriat vek kha. Ka naupai hian hlimna a thlen sak la ring teh chiam lo" kut vai nawk nawk pah in ka ti a, ka van zam tak.
"In inneih tirh ai khan a danglam daih tawh sin. Matthew hi ka hrechiang, a haw tawh miah lo che. A rilru pawh a ţha a, a pawm em em ang. A hel char char ţhin lai che pawh khan i chanchin hi min zawt awl lo. I thil eiţhat leh ţhat loh chen in hriat vek a duh ţhin" plate ruak nawr tawlh pah in ka hawichhuak leh a, "Irene hi a thinlung aţanga a paihchhuah tak tak theih ka ring lo" ka ti chuai raih a, ka hmuh dun khan ka nat leh nat loh ka in zawt ziah a, ka na ngai miah lo kha ania, tunah chuan in zawt lo mah ila an awmdun tur ang a ka ngaihtuah ringawt pawh in ka na em em tawh. Ka hriat miah loh leh ka inrin hma in ka pasal ah hian ka rilru ka lo pe hneh hle tawh a ni.

"A paihchhuak hauh lo ang. Ngaihzawng ang in a en lo ang a, ţhian ang chuan a en reng tho ang. Irene lo chu ţhian ţha a neilo. Matthew hian a ngaihven takzet tawh che a ni" a ti veleh a, ka nu in min hrilh tawh bawk a, min ngaihven ve deuh a nih ka ring tawh.

"Naupai chungchang hi ka la sawipui ngam chuang lo"
"I pum a lian vat ang a, ala hre dawn tho tih hrereng rawh"
"Chumi a hmuh hunah chauh chuan hre mai rawh se" luhlul takin ka la ti ve tlat. Ka hrilh hreh telh telh a ni ber mai.

Chawl hahdam turin room ah ka chho a, ka nu thilsawi bawk ka ngaihtuah leh. Ka paihbo thei ngang lo. Ka pasal lah ka zawt ngam lo nasa mai si. Ka nu ka hmuh leh veleh chipchiar tawh in ka zawt tawh ngei ang ka ti rilru a, englai mah a min lawm ngailo tu hi Mason aiin ka ring ta zawk. Nupui alo nei reng te hi mak ka ti khawp mai. Ka nu ai pawn Matthew hian a hriatchian ka ring zawk.



MATTHEW'S POV


"Duhtawk rawh" a no kenlai ka phihthlak sak rual in phelh phung in min en. Dar10 a pel tawh. Ka nupui ka bia a, casualty lam an buai deuh a ka pui tiin dawt ka sawi phah. Irene hian a thil in a ţhulh duh silo a, a ţhiannu mangang in min rawn bia a, hetiang hi ka hmuh dan chu a ni mai. A ţhiannu in luah ah Irene buaipuiin ka la awm mek.

"I nupui hi ka hua....nilo...ka ten" fiah mang lo in a ti ban charh. Min kawk a, a ţhu nghet hleithei lo.
"Ka thlah ang che"
"In in ah min hruai haw mai rawh. Innei tawh mai ang" min kuah thuak thuak a, ka in ve loh vangin a thil in rim chu chhia ka ti lehzual. Emma lo chu nupui dang neih tum na ka nei tawh tlat lo. Ka thinlung in let but hi a chhan ka hrilhfiah thiam lo. A nungchang hian min hneh ni ber in ka hria.

"Matthew min nei ngam lo mi? I nupui chu reilote chiah neih i tum kha" a ţap lek lek tawh lehnghal. Hetianga a awm hian ka lainat tho. Min dem thei lovang. Reitak ka kawp tawh a, ka ţhianţha ber a ni bawk. Ka ţhianţha ber ni chhunzawm zel tur in ka duh a, Emma thianghlimna rawng tak a ka tihchhiat sak aţang khan Irene hi ka nupui tur ah ka dah ve tawh ngai lo. Sakhuana ka ngai pawimawh tehchiam lo a, ka ţawngţai lohna pawh a rei tawh. Chuti chung chuan tihluih na hmanga ka tihchhiat vek tawh hnu hmeichhe nunnem tak hi hrehawm tuar tur in ka hnutchhiah thei lo. Mason vang mai mai in khatiang khan ka che lehnghal. Ka thinrimna cho chhuak lo sela chuan khatiang kha ka ti bik lovang. A lak a thil pawi ber ka tih hnu ah pawh ka bulah thlamuang tak a mu in ala nui thei a, tihnat leh ka hlau em em tawh zawk anih hi. A landan ah Irene a pha lo, a chhungril ţhatna hian min hneh a ni ber.

"Matthew" tih pah a min nghen leh chuan ka harhchhuak zawk. Ka lo in ngaihtuah leh veng veng tawh a nih hi. Ka nupui chauh ka ngaihtuah lehnghal. Ka phatsan miah lo ania, mipa ka nia, ka ta ni tur a zungbun ka buntir tawh chu nghet tak in ka vuan mai tur a ni.

"Ka thlah ang che. Zan dang ah hetianga i awm leh anih chuan ka rawn hruai tawh lovang che"
"Iva sual sawt ve. Ka ţhen vang che kha mi? Ka thinrim thut a, ka ţhen mai mai che a nih kha. Ka inchhir leh tawh" tih pah a insiamrem in min kuah leh tawh.
"Inţhen a ţha zawk. Nupui ka nei tawh a, engtikahmah kan innei thei lovang" tiin bung hmuk in ka chhang a, Irene chuan min nawr lui ngam tho vang.

"Min ţhen thei lovang. In ţhen ka duh lo hrim hrim. I nupui hi lawm i ţhen zawk tur chu"
"I hmeichhiatpui chu keiin ka lainat ai nasa a i lainat zawk ka ring a"
"Ka hlimna zawng zawng min lakbosak tu hmeichhia hi ka lainat ngai lovang"
"Emma chiah a nilo keipawh ka tel ve. Ka nupui i huat chuan min haw ve rawh"
"Ka hmangaih che" ti sep chung in ka awm ah a hmai a phum a, ka nupui ni tur a ka lo duh ber ţhin a ni. Keipawn ka hmangaih, ka hmangaih takzet a ni. Mahse hmeichhia leh mipa inkar a hmangaihna ang hi chu a awm tawh lo. Irene hi ka kawppui ang a en leh ka tum pawn ka nupui hian min dang tlat tawh. Nep ka in ti khawp mai. Irene chu ka unaunu ang leh ka ţhian ang in ka la hmangaih tho.

Fiona (Irene ţhiannu) mu tawh chu lo tho leh in kan bulah a rawn ţhu ve. Irene ang a Cardiologist ni ve tho a ni a, kan hospital a thawk a ni.

"I nupui kha Ethan nen hian phir tiraw?"
"Ni e" tih sup pah in Irene ka tung tho a, a rui telh telh emaw tih mai tur a ni. A thle ngawih tawh a, a sam a hnawk nuaih bawk.
"Muhil rawh se a pawi lo. I rawn thlen hma khan a ţap char char a, ka thlem theilo in ka rawn be tawp mai che a nih kha. A nat zia ka hriatpui a, ka khawngaih khawp mai. Mahse Irene chu a tuarchhel a, a tuarchhuak mai ang. A na tawh sa chu na sela, midang tihnat belh tawh suh. I nupui ka sawina a nih chu" tih pah in intur bang la awm chu a ban a, a inthlit ve nghal zat.

"Ethan hi ka hre em em a, i nupui hi ka hrechiang ve lem lo a. A chanchin sawi ho lah hian a fel zia ngawt an sawi a" a tih laiin Irene a rum ţuah ţuah a, Fiona chuan alo nuih hak hak a. A thil thlit lai a in zawh hnu ah cigarette a ţan leh a, "Fa inneih hnu phei chuan Irene hi intihbuai tir miah suh. I nunhlui chu liam tir rawh. I hmeichhe lo hmangaih ţhin vang a i fate fahrah phal reng reng suh" a ti leh a, ka hriat hnu vek. Helai hmun aţanga chhuah vat hi ka chak ber tawh.

"Ka hawsan mai ang. A tlai dawn tlat"
"Pa ber len a hun tawh lo iti deuh mi?" tia min fiam pahin a en a, ka rilru ang tho a pu ang. Kan khawngaih ve ve in ka ring.
"I nupui chuan zankhat chauh chu a hrethiam thei ang che. Hetah riahpui mai rawh"
"A theih loh" ka chhang rang kher mai. Ka nu nen a an inhmuh chungchang pawh min hrilh chak tawh in ka ring. Thu ţha tak tak min hrilh hnu ah ka nupui riahchhuahsan turin min ti leh a, he nu pawh hi mak riau chang a nei.

"Anih leh nghak harh rawh. A muhil a harh hun ah a zawngbuai nasa dawn che a, mut ka kham lo ang. Ka mutsan ang cheu" cigarette a nawr hlum a, ka lo dan hlau ni awm tak in mu tur in a kal zui nghal.

Ka nghak vang vang a, tih harh tum in ka phe vat vat reng bawk. A zawi lutuk a zia hnu ah "Haw ang" tih hmuk pah in kaihthawh ka tum a, a duh ţhak lo lehnghal.
"Ka hawsan dawn che" tiin ka vau tawh. Ka dawhtheihna pawh a tlem ve tial tial. Ka chau bawk nen chawlh hahdam ka chak ve tawh. A harh deuh hun ka nghah chhung nen dar 2 a ri leh dawn tawh.

"I nunrawng hle mai" thinrim tak in a ti leh a, min melh ram ram bawk.
"I men peih tawh kha. Tho rawh"
"Darkar chanve chiah awm leh ang"
"Min zui dawn nge i riak dawn" sana ka en sek tawh. Ka ţhurei bawk a, ka taksa a na ţhum tawh bawk. Ka hawsan duh tak tak dawn tih hria in hreh deuh in a tho a, a pai chhat chhat a, ka lo dawm vat. Ka nupui ka bum a, inthiamlohna in min eizo lo chauh tawh.


Car ah ka ţhuttir a, seat belt ka hrentir leh hnu ah ka lut ve chauh. Ka hrentir loh chuan amah a nghet lo em a, kan khawtlai mai mai. Fiona te in aţanga hruaichhuah chhung pawh a rei. Ka haw thei chu ka thawveng ve hawk thei. Kan tlan thaw ang a a zia mai ang chu.

"Ka ngai lutuk che hi ruih chhum hmawk hi ka chak ber ţhin. Ka nihna ka ngaipawimawh seng tawh lo. Ka ţhen theilo che. Inţhen ka lo sawi kha tun thleng hian ka la inchhir. Khawngaihin inţhen lo ang aw" a ti zuai raih a, in ţhen chu thil ţha ber a ni si a nih hi.
"Matthew min ţhen thei lo ang. Kan in hmangaih em kha" ti chung in ka dar a rawn vuan a, "I ruih loh hun ah sawidun ang" ka ti nghut a.

"Min ţhen luih chuan i inchhir khawp ang" ngawih ka chuh a, ka tlanchak viau thung. In thlen vat a hahchawlh ve ka duh tawh. Nilengin ka vir buai a, ka nu pawh hmuh hman ve ka duh tehlul nen ka hmuthei ta lo a, zing a ka chhuak zing lam ah bawk ka haw leh a nih hi.

"Ka ţhen vang che a danglam inih chuan ngaihdam ka dil che. Tumah ngaihdam ka dil duh ngailo a mahse min ngaidam rawh" a ţah aw leh ţuau tawh. A ţah hma in thlenpui vat teh ang.
"Ka haw lo che a, lemchan pawh ka duh lo. Ka nupui ang a miţha hi ka tihnat chuan damchhungin ka inchhir tawh ang. Hriatthiam itum dawn nia" a rui em a, a hrethiam rih kher lo ang.

"A der chiah a ţhat chhuah tur inih kha. Ka hrethiam chuang lo. Ka ţhen chuang lovang che"
"Chhuk rawh" mak tih hmel zet a min en laiin seat belt ka phelhsak a, ka khalh chak bawk a kan thleng hma ngei mai.
"Kan thleng" pawn a ka chhuah peihtawh loh vangin a ţhutna lam ah kun phei in ka hawnsak a, a room thleng a thlah a ngai em lo ang chu.

Car aţanga a chhuk hnu a in lam a pan chu ţang ţeuh in ka thlir reng. A kal pai deuh laih laih lai chuan chhuk ka tum ut ut ţhin a ka insum hram hram. Ka lainat a, inţhen hi harsa ka la ti. Ka naupanlai aţang tawh a ka nun a hmeichhe awmchhun ni ţhin a ni. Emma aiin a buk a rih zawk chang a awm a, Emma ka huat em em laia Irene nen kan awmdun chang pawh in Emma laka ka inthiamlohna bawk in ka thlen thui loh nan min dang ţhin. Emma ah hian ka rilru pe tawh mah ila Irene hi ka thlah thlam tawp thei chuang lo. Min mamawh chuan ka tlanchhiatsan thei lo a ni.

A luh fel hnu ah ka inkhalh chhuak a, kei aia mipa ţha tawng vat turin la duhsak. Irene hian hrehawm a tih chuan keipawh hian ka la tuar ve tlat. Irene kalsan hi thil awlsam a nilo. Ka nupui hi ka hmangaih in ka hrelo na a ka ngaina takzet tih erawh ka chiang. Irene ka hmangaih a, Emma ka hmangaih lo a, ka ngaina ringawt chung a ka ngaihtuah reng mai hi mak ka in ti. Irene ţhian ringawt lo ang a ka en tirh laia ka awm ang mai khan tunah hian ka awm.




Inchhung ah thawmdim tak in ka lut a, ka nupui chuan min lo hau hrep mahse ka ngawi reng ang ka ti rilru rauh rauh. A mutthilh tawh tak in tiin kawngkhar pawh ka hawng dim hle. Ka bih dek dek a, a thim em vang in ka hmuthei lo. Light ka on ngam tawh loh vangin phone ka ti eng a, sofa a ka thawmhnaw hak tur alo dah ka hmuh chuan ka nui suk a, ka lawm rual in inthiamlohna ka nei leh. Kan inneih hlim a Emma ka huatna chhan ţhin kha. Amah vanga inthiamlohna ka nei ziah khan min ti thinrim ţhin. Min la nuihtir ang tih ka ring ngai lo.

Ka thawmhnaw hak tur alo dah chu la in bathroom ah ka lut a, ka inbual harh hnu chuan ka chau pawh a zia ve deuh. Irene pawh a ţha em ang chu. Ka inbual zawh hnu ah ka nupuiin min lo dahchhuahsak chu ka ha a, parda ka nawr kau a, thla eng alo luh chuan a nuam tawk chiah.

Emma muhil tawh tih harh hlau tak chung in khum ah ka lawn kai a, a en deuh tawh vangin a hmel pawh ka hmuchiang thei ta. Thlamuang taka muhil chungin a thaw ri sek sek a, Mason thusawi awih a khatianga rawng taka ka che kha pawi ka la ti.

Irene duh angin ţhat chhuah der a min rin hnu a fa neihpui ringawt kha ka tum dan ţhin a ni. Ţhat ka chhuah a, ka bula hlim leh thlamuang tak a a awm chin ah kha chuan lem ka chang kha ka inchhir leh a, min hneh tur khan hun a duh reilo. Ka rinloh deuhin reilote chhung khan ka nupui ringawt hi ka ngaihtuah a, Irene nen kan inhauh phah fo a, min ţhen ta hial a. Min ţhen hnu phei chuan ka nupui hi ka ngaihven zual a, lemchan na mai mai kha tih tak tak na ah a inthlak a, huatna kha duh na in a thlakthleng thawk bawk.

A tir ah khan ka pawm duh lo a, awlsam tak a ka ngainat mai kha ka ring ngai lo. Mason khan Mafela hmeichhe kawp mai mai chu a ngaihnep zia leh amah pawh in a awmpui thu min nuihsawh tak chungin a sawi a, Emma ka zah vanga ka insum ve hram hram laia khatianga min nuihzat kha ka thinrim a, rawng takin ka nupui ngei lak ah ka che a, a thianghlim tih ka hriat phei kha chuan keimah ngei pawh kha ka in ngaidam theilo.

Ka thil tihsual vangin ka ngaihven lehzual a, min chhuahsan daih ka rin laiin ka bulah ala awm reng a, min ring zui leh mai a, a rilru thianghlim tak hi tihnat sak leh ka hlau em em tawh zawk. Bum leh ka tum tawh lo. Irene nen a ka buk tawn reng ţhin te hi tih tawp ka duh. Ka tan a hmeichhe hlu tak an ni ve ve. An hlut dan erawh a in ang lo.

Puan ka sin ţhat tir laiin a rawn che ţual ţual a, a harh dawn a ka hriat vang in ka muţha a, ka muhil der nghal. In sawifiah ngaihna ka hrelo dawn em a.
"Hey i chet char char kha" thophang aw pawr taka a tih chuan ka nui chhuak ta hawk a.

"I rawn haw na a rei tawh em?"
"Reilo. Thleng deuh chiah"
"Ngati em em nge? Casualty a rawnkal an tam viau ami?" dawt ka sawi zel a ngaih hmel. Tu thusawi pawh a ring vek zel a, an bum reng mai dawn a nih hi.
"Aw zan in bak a ni tawh lo ang" a reh leh vang vang. A muhil emaw tiin a lam hawiin ka in let a, min lo en reng.
"Muhil leh rawh" tih pah in ka kuah a, thil ei ve reng chunga a cher tial tial mai hi a mak a ni. Natna neilo angin a insawi tlat mai bawk si.

"Ice cream ka ei chak" a ti sep a, a ţawngvai ti dawn ila a mengfiah tawh fu mai sia.
"I damlo ang naktuk ah"
"Leisa a awm em? Fridge ah ka zuk en lawk ang" thawh a tum uaih laiin ka lo vuanbet a, "Ka zuk en ang" ka ti hmuk a, ka tlai vanga thupha chawina ni rawh se. Ka hahchawl ve hman lo erawh ka ning ţan.

Ka mu ve thei dawn chauh emaw tih laiin ka tho lehnghal a nih hi. Ka mit a thip rum a, ka lu ana ut ut tawh bawk. A harh tawh bawk a, thawmdim a ngai tawh lo. Mut leh vat ka duh ber vang in step ah ka tlan thla a, hmeichhia hi chu hahthlak chang a tam dawn anih hi. Ka nu hian zing dar 3 velah ice cream a ei ve chak ţhin angem tih thleng in ka ngaihtuah. Irene khan a eichak ngailo a, a duhmiah lo zawk.

Fridge ka hawng rawk rawk a, ice cream a awm miah lo. Ka thupha chawina tur ber ania sin. Pi Sangi nen ice cream kan lawm vaklo bawk a, awm lo awm reng pawh a ni. Ice cream ai a eitir tur zawng in ka enkual a, ka hmu mai lo. Ka harh chhuak thut, nui suk chung in tuivawt ka la. Hei hian ice cream ai a awh zo ber ang.

Phur tak in room lam ah ka tlanchho a, inchhung ah ka tlankual fua fua a ni ber. Nurse ho in min hmu se mak an ti ang chu. Thupha ka chawidan a hautak emai.

Khum ah a lo ţhu fel than a, bottle pek pah in "Ice cream a awm lo a tuivawt ka rawn la"
"Ice cream alawm ka duh"
"Ka rawn haw hma te khan sawi ta che. Ka chau ka mu dawn" tih nghut pah in khum ah ka lawn a, puan ka ban zui zat.
"Tui hi a thlum ve hleinem"
"Chini thlum mai rawh" ka mut rual in puan in ka in khuh nghal. Ka haw tlai vanga min hrem a tum na anih chuan a hlawhchham ang. Zing dar 3 vel a ice cream ngen tlat te chu naupang pawh a ni tawh lo.

In sut hraih hraih ri ka hriat tak ah chuan ka in khuhna ka keu a, ka nupui chu a ţhut ngai a lo la ţhu reng chung in a ţap. Ka luhlul chhuah in ka in khuh lui leh. Ţha taka hnathawk leh tur chuan tlem tal ka mut a ngai. Tihsual tlem te ka neih vaih chuan a pawi dawn. Enthlak reng ka ni. A ţap rei peihlo ang. A ţap ka hmuh khat tawh nen a chhel ve viau tawh in ka lo hria a, ice cream vang mai mai in a ţap lehnghal.

Ka mu lui thei ngang lo, ka in khuhna ka keu leh ta nge nge. Tunlai a damloh hmel thei em a, na te hi alo nei zawk em maw ni?
"Na i neih chuan sawi rawh" ka ti hmuk a, mutthilh vat ka duh. A hmai a mittui luan na vel ni ngei tu ani a tuai puat puat a, "Ka chau viau ania Emma" min la chhang duh chuang lo. A ban ah ka ban dek dek a, a la sawn vat.
"Lo kal rawh mu ang. Zing ah fridge khat vek ka lei ang che" ka ti ta ringawt.

"Ice cream ka eichak emai" a ti leh a, min hnaih duh der lo.
"Zing ah ka lei ang che ka tih chu. Muttui aw" inkhuh leh ka tum laiin ka puan a manbet a, thinrim zet in ka lo rum nghut.
"A tawk Emma" ka tih vin ţhak lai chuan ţi dek in min lo en. A hmui hnuai lam a pet a, a ţah leh mai ka hlau.
"A awm lo chu eichak lo mai rawh" a duhlo chung in mu tur in ka pawt lui. Lei dawn pawh ni ila eng dawr mah a in hawng tawh lovang.

"Muhil la i eichak lo mai ang" a chal a ka fawh lai reng pawn min lo nemsawn. A zia a thlak nasa khawp mai. Damlohna eng emaw chu a nei chiang ang. Kan inneih hlim ang kha chu la nise room hran ah ka inkalh hnan hmak ta ve ang. Mit chhing nghet tlat chung in "Ka eichak" ala ti tho a, a hriat loh ah ka nui. Ka leisak ţeuh ang.



Thawm ri rek rek reng ah ka harh a, reitak chhung chu ka hrelo der.
"Hospital a kal i ngaih kha" ti a min rawn sawi nawk nawk chuan ka ţhuchhuak hlawl a, sana ka en nghal.
"Min va kaitho har ve"
"I harh har zawk anih kha"
"Ice cream chu ka lei ang che"
"A ngailo" ti a nuih ver ver pah ice cream a rawn lek chhuak a, a insiam peih vek tawh bawk.

"Kan intifai ve ange. Ka rual in ikal dawn nia" ka tih lai pawh in min en miah lo in ice cream chiah a ngaihtuah. Tunlai hian a danglam takzet a nih hi. Ka ngaihsak tak deuh vang in a pangchang ni mai ah ka ngai.

Ka intihfai ve hnu ah ka hak tur alo dahchhuak leh thlap a, ka tihchhiat vek lai kha ka ngaihtuah kir leh ţhin. Hetiang a la ti duh hi mi mak tak a ni. Min hip em em tu a ni bawk. Vantirhkoh ang mai a thianghlim hi ti na leh duh tur khawp a huaisen na ka nei tawh lo.

"Hmanhmawh rawh kan tlai mai ang. Hun bi nei a duty ka nih hi. Ka kaihthawh lai che khan harh ve vat mai ta che" ti buan buan chung in ka insiam min pui a, a ice cream lah a dahthla phal der lo.
"Ice cream i ngen rei em anih kha"
"Min leisak chuang hleinem" a tum zui bar lehnghal. A duty hlan a lo lei turin Pi Sangi hrilh a ngai anih hi.
"I damlo miah lo maw? I danglam riau mai"
"Teuhlo mai. Ka ţha vek ka tih chu. Min zawt ngun lutuk a ninawm tawh" a tih hmuk hnu ah bathroom ah min luhsan a, a ngaihna hrelo takin ka dar ka san ak ringawt. Thla tin a hmeichhe buaina ang hi a nei anih ka ring ber tawh. An mood a inthlak ngun theih em hi.

Ka mut tlem vang nge ka lu a na ngut ngut lehnghal. Ka chal ka hmet leh ţhin a awmzia a nei chuang lo. Emma lah chu bathroom ah ala awm tlat lehnghal a. Damdawi dil ka duh viau a sin. Bawm a dah rem rum ho ka enkual a, ka hmu mai lo nen, ana ngut ngut bawk si. Zanrei tak thleng chu Irene ngei pawh nise ka buaipui tawh lovang.

Khum bula a drawer dah ka hawng diat diat a, chhawng thum na ka hawn a ka thil hmuh chu la kang in ka enchiang nghal. Drawer pawh khar lo in ka dingchhuak a, ka lu na ka hre chang tawh lo. Ka thilhmuh chu mak ti in ka en ngut ngut ringawt. Ka thinphu a rang a, tih hmasak ber tur ka hre lo.
"Matthew ila inpeih nange? I mak chen chen lutuk" a hmai bul set ah ultrasound result chu ka dah a, a ding khawng awt in ka hre mai.

"Emma hei hi enge awmzia? I lo rai reng a maw?"



CONT....

---

FORCED MARRIAGE-13



A thil kenlai chu rang taka ka pawhthlak sak hnu ah ka hnung lam ah ka thukru ta daih a. Hlauhna in ka khat tlat tawh. Ka thinphu a rang vek a, ka lum pup pup a, ka vai ruai bawk.
"Emma sawifiah rawh" a ti zuai raih a, nun na neilo ang mai a ni.

"Aw nau ka pai" ka aw a ri chhuak chang chang chauh a, a hrechiang viau tho tih a awmdan ah a lang. A meng buai nuaih a, khum ah a ţhu zawi nghal hnawk a.
"I fa ngei a ni bawk" hlau chung chung in ka ti leh a, min ring lo anih chuan ka insawifiah tam lo ang tiin rilru ka siam nghal.

"Thu lian tham tak i zep a, engvang nge?" a ti sup a, a aw chuan ngaihnobei lo viau mahse a thinrim loh zia ka hmuthei a, rilru na a ang zawk mah.

"I pawm duh in ka ring lo a" tih paha a hmazawn a ka din rualin min lo kuah thlawp a, khum a ţhu a nih vang in ka awm ah a hmai a phum a, reitak chhung chu ka lungphu ngaithla in che miah lo in a awm reng. In ţhen hial a duh tur ah ka lo ngai leh hmanhmawh tawh.

"Ka tihpalh a ni" a tih phei chuan hlauhna in min man nasa lehzual. Inthiarfihlim a tum mai ang tih ka hlau a ni.
"I chunga ţhat ka chhuah ngailoh vanga zep ini ngei ang. In nghahna tlak ka nihloh vang in thupha ka chawi" a tih leh pawn ka la ngawi reng a, a hahdam nan a sawi ber tur ka hrelo. Mason nen kan inzui ngun si a, a fa anih a rin loh ka rin rum rum laiin "Ice cream ila duh em?" tih pah in a nui zui hak a, min la kuah bet reng tho.

"I pawm tihna em ni? Ka hlauh ang hi a thleng lo ang tiraw?"
"Ka ring che Emma. Keimah ka in rin aia nasa in" ka lawm lutuk chu ka hnuk a ulh ţeuh mai. Ka ţahbelh thar ta riau te hi naute vang vek a ni. Ka ice cream ngen te kha ka zak ve tehmai nia. Ka mizia diktak a hrechiang tawh a ni ngei ang. Thu tam pawh min zawt lo in min ring nghal a, ka rinawm zia a hria a nih ngei dawn hi.

A sam kar ah ka kut ka rawlh lut a, ka kut lehlam in ka kuah ve bawk a, thil rit tak min del tlat ţhin tu chu lakbo a ni ta. Ka zâng huai mai.

"Ka lawm e Emma" a ti leh sup a, ka naupai thu a hria hi awmdan tur ber pawh ala hre lo a nih hi.
"Ka chetdan tenawm tak vang a thleng ania, iduh chuan i paih daih thei reng sia" tiin ka thil lo tum ţhin a sawi a, paih ka tum tih ka sawi ve duh der lo. Ka sawi ve chuan min rin na a tlem sawt palh ang.

"Tual ka that ngam hleinem. Kal teh ang kan tlai lutuk ang. Sawidun leh na hun kan la ngah alawm"
"Aih ka la ngai che" naupang aw deuh a atih chuan ner nung chung in ka beng chawrh a, fiamthu mai mai mah nise ka lawm em em tho si.
"Nitin ka rualin kal ziah tawh rawh. Chhun lam i duty hun ah pawh ka office ah i duty hma i awm thei" tih pahin a ţhutna aţangin a tho a, a kal mai dawn amaw tih laiin min hnaih hrut a, ka lo rin ruk ang ngeiin ka hmui ah a fawp leh a, keipawn ka chhang let rang viau. Kan hun hman dun zawng zawng hi chhinchhiah tlak ni vek se ka duh vang a ni.

"Kal ang le Pearl" a mi koh dan avang chuan ka thle ha a, sawinawn leh tur a ka ngen na chu ţawngchhuak lo mah ila a hriatthiam ka ring.
"Chhunglam leh pawn lam ah hian i mawi em a" a thusawi chuan min tihzah ve deuh vang in ka beng leh biang vel a lum pap pap a, ka biang a tai hlar thei hial ang.
"Khati khan min ko kher suh" ti hlar chung in ka biang ka dawm a, engvanga naupang ang mai a awm ţhin nge maw ka nih le?
"Anih leh wifey" min rawn hnaih leh hrut chungin uang deuh a min en pahin a mithmul a san ak a, a ban ah ka lo chum a, a nui hawk thung.

Inhnuai pan a step a kan chhuk lai pawh in min dawm bet reng. A hriatchhuah hma zawng pawn ka chesual lo a, tun ah min veng run tawh. A awmdan hi amah pawh a ang lo zawk. Choka aţanga chawhmeh rim lo chhuak mawlh hi ka ning ţhin. Han sawisel dawn lah in a siam tu ka zah ve tho si.

"Kal vat teh ang" ka ti leh ringawt a, ka luakchhuak ut ut chu ka la insum hram hram.
"Engmah ila ei lo"
"Ka eipeih lo. Kal ang" ka hmui ka hup nghal chawt a, ka ţawng leh vaih chuan ka luak a ni mai. Nidang ang chu nise chhuanlam siam in bathroom ah ka lut leh ang a, engkim a hriat tawh hnu hi chuan in thup a ţul tawh lo nachung in a hriat a han luak bawrh bawrh chu ka inthlahrung deuh.

"Nidang aiin in rawn chhuk tlai, rawng ka bawl zo vek tawh" Pi Sangin a rawn tih tak ah chuan choka lam min pan pui a, ka insum thei tawh ngang lo, ka nemsawn rawk rawk a, bathroom lam ah ka tlan dawr dawr, kawngkhar pawh khar hman lo in ka luak leh bawrh bawrh tawh. Ka va ning tawh em.

"I ţha em? Puih i ngai em?" ka hnungzang ah a chul a, ka luak ai a luak ve ngawt thei anih loh chuan min puih theihna a nei lo. A kut awl lam zawk a ka sam huikiangin ka chal a dawm a, mahni a tawrh ai ngawt chuan a zia daih zawk. Rai lai hian ngaihtheih miah loh thil kan lo nei vek anih dawn hi.

"Hna ikal lui peih ang maw?" tiin ka intihfai lai pawn min zawt reng a, damlo viau tur ah min ngai a ni ngei ang.
"Peih e. Khatiang a ho lutuk. Kal vat ila a ni mai" ka tih nawn leh chuan min hnial tawh bik lo. Min hnial leh pawh nise ka kalsan thovang.


Car a a rawn ţhut luh ve rual in "Awih mai har ka la ti" a rawn ti ţha leh a, hlauhna bawk in min man leh. A in ngaihtuah chiang ang a, a fa a nithei in a hre leh lo aniang tih chen in ka ngaihtuah.
"Result kha hmuchiang viau lo ila chuan min hrilh mah la ka awih kher lo ang"
"Chuvang chuan alawm ka hrilh ngam miah loh che. Ilo pawm lo kual vel tur kha ka ngaihtuah thleng pha vek" tih chhum hmuk pah in pawnlam ka thlir daih. Ani chuan ho viau ang in a ngai anga kei ve thung chu ka thinrim em em thung. Engkim a chiang vek tawh a, rawn sawichhuah leh pawh a ngai tawh lo.




MATTHEW'S POV

Thudik tak ni si lawm avanga awih theih miah loh hi a awm ve chawk. Tum bur in pawn lam a thlir a, a in kuangkuah fel than bawk. Naute a paih lo hi mak ka ti zawk. A chunga thil lawmawm loh tak thleng hriatchhuahtir reng tu tur a ni a, chuti chung chuan ala pawm tlat tho a, ţawngkam thiam tak chu ni ila lawmthu ka sawi vul chuk ta ve ang. Ka ngaihsak lehzual ang a, ka nupui leh naute hi ka venghim tlat bawk ang.

A naupai thu a hrilh ngam loh khawp a ka awm ringawt pawh ka inchhir a, ka lo in hawn tak tak loh zia ka hrechhuak. Ka hna ah ka buai mawp mawp a, inchhung ah buaina tam bawk nen, ka nupui inhnamhnawih tir loh hram tum in keimahin ka bei a, ka nupuiin thuruk lian tak lawmawm tak si alo nei reng tih ka lo hre miah lo. Ka ngaihsak viau tawh emaw ka tih pawh ka lo la ngaihsak tawk lo chu a nih hi.

"I duty tlang dawn nge thil kan ei phawt dawn?"
"Debbie bulah ka ei dawn" min la enduh chuang lo. A zia a thlak thut thut a, ka hrethiam vek. Dawhtheihna zir nan a ţha phian in ka ring.
"Sawlai ah sawi ice cream an zuar ţeuh a sin" tih pah in kawngsir a ice cream dawr ka kawk a, "Ka eichak lo" ala ti hmuk tho. Pi Sangi kha leikhawl tur in ka hrilh tawh bawk a, zan rei a ice cream lei tur a chhuah a ngaihloh ka beisei.

"I dul kha ala puar miah lo tiraw?" ka ti dek dek a, "Thla thum chiah a nih hi. Mahnia tawrh phei chuan thla thum pawh a rei. A puar ala hun loh hi" a ti ţek hlar mai. A thinrim chhan ka hre der lo lehnghal.

"Engin nge i lung ti awilo a?"
"Engkim hian" a ti tawi tak a, a hlimchhawn a ka tuarpui theilo chu pawi ka ti khawp mai.

Garage ah ka tlanlut a, ka dinrual in min chhuksan nghal bawk. A tihziah dan a nia mak ka ti tawh hran lo. Chhuk ve ka tum laiin ka phone a nghawr det det a, tunlai chu ka phone ka en phur tehchiam lo ţhin. Ka hlauh ang ngeiin ka pu ngei a ni bawk. Phur lo tak chung in ka beng bulah ka dah a "Ka pu" tiin nem takin ka ko tho.

"Tun ah in ah rawnkal nghal rawh"
"Ward ka la round lo a, damlo ka enfel phawt anga ka rawnkal dawn nia"
"Tun ah ka tihchuan tun ah rawnkal la a ni mai. I hna kha chu Mason thawh tir rawh. Min rawn hmu vat rawh"

Thinrim tak in seat lehlam ah ka phone ka thehphei a, mipuiin min sawisel theihna tur ngawt a ngaihtuah leh tawh a nih hi. Ka tihtur ka tih ţhat loh a sawiseltu ka ngah poh leh Mason tan chance a ţha ve zel bawk. Chutiang chu thlen tir ka tum bik lo. In lam a a sawitur chu damlo te aiin an pawimawh lo zawk daih ang. Ka pu min kohna ngai pawimawh duh lo in damlote bulah ka kal hmasa. Enkual chhung te chu a rei hleinem.


Damlo ka tlawh kual apiangte chu a lo awmpuitu ten min nghahhlelh tawh zia an lo sawi rualin an harsatna neihte an lo sawi sap sap a, test result ţhenkhat enkual chhung leh test ngai awm te hrilh leh chhung chu a rei zek. Rin aiin an lo tam daih a. Kan khawl a chhia anih loh chuan pawn lama tih ngai lo in hospital ah hian a tih vek theih a, kan hospital hi a changtlung ve tawh. Ka pa chiah in min pui ţhin a, ka pa min puih bak hi chu ka thawhrim vang liau liau anih vang hian midang kut a hlan ka phallo. Ka theih chhung chu venhim tlat ka tum a, he hospital hlutna hreve miah lo tu kut a hlan mai ka tum lo.

Ward ka round zo duty room a ka luh leh chuan Ethan ka hmu hlawl. A unaunu ka tihnat hlau a min vau reng ţhin tu kha a ni. Thu ngai bak dawn ka in beisei lo.
"I office ah inkawm lawk ang" a ti bung nghut a, a chhuak zui daih chu ka zui chhuak ve nghal mai. Hetianga a awm hi ka hmuh ngai ala nih loh vang in pawimawh tak sawitur a nei anih ka ring.

Office chhung ah in hmatawn in kan ţhu a, a sawi hma in tui a in hmasa leh te te a, ka pu hmuh ka la ngaih vangin ka hmanhmawh ru khawp mai.

"Irene hnen aţangin hospital chungchang hi ka lo hria a, hetianga a buai nuaih chuan thawktu ho hi an insawnchhuak vek ang tih a hlauhawm khawp mai"
"Engthil nge a sawi?"
"Damlo i enkawl ţhin ho hi Mason-a kut ah an awm tawh. Hospital kaihruai tu hi Mason a ni tawh" ka thuhriat awihawm loh zet vang chuan ka nui chhuak hawk. Engthil chiah nge tih an tum?

"Matthew keipawn ka thuhriat kha ka awih lo. Damlo na tak tak hi Mason-a kut ah an awm anih chuan in hmingchhe fo ang. Hospital hi angai ang hian a kal reng thei miah lo ang. I awmdan en chuan ka thusawi hi ilo la hre bik lo a ang khawp mai. Chingfel ang che. Chumi sawi tur chuan ka rawn hmu che. Buaipui laklawh ka nei a, ka kal ange" a ti a, a chevel pawh ka lo ngaihven tawh lo. Mahni chiah in ngaihtuah, zanrei lama intihhlimna ngaina tak leh min tihchhiat tum ran tu kut ah hian he hospital hi a awm hauh lovang.

Ka coat ka hlip sawk sawk a, ka pu ka hmuh ngei a ngai. He thil hi an pahnih a an remruat a ni ngei ang. Hospital a hmingchhiat chuan kei chauh nilo ka pu leh ka pa pawh an hmingchhe tel ve ang. Ka pu hi haw viau mah ila min haw chung chung a min enkawl seilen vang pawh hian a hmingchhiat ka duh lo.

Ka pu hmu tur a ka kal hma in Emma duty na ah ka lut hmasa leh phawt. Dawhkan bawh in alo awm zawi hniang a, Debbie a phe vat vat thung. A bul ah ţhu in ka kaitho a, phelh phang in min lo en hau ringawt.
"Thil i eitawh em?"
"Aw Debbie nen kan ei"
"Ka pu hmu tur a kal ka tum a, thlah hmasak iduh em?"
"Duhlo. Ka duty ala zo lo. Mi pawh an rai ve tho a, an duty char char tho. Nep deuh ang a awm ka duh biklo. Ka hahchawlh lai irawn hmu mai mai anih hi" ati leh zat zat tawh.

"Ka lo let hun min lo nghak dawn nge---?"
"Debbie ka inthlah tir dawn" ka sawi zawh hma hma in. Zing a a luak bawrh bawrh ka hmuh hnu phei kha chuan ka ngaihtuah riau. Luhai ten a tlu anga thil pawi zawk a thlen ka hlau a ni.
"Ka pu ka hmuh zawh ah ka rawn haw tlang dawn nia, fimkhur rawh aw" tiin ka chah leh hram.

"Ipu chuan a hmu duh dawn che mi?" a ti ha a, min lawmloh zia a hreve tawh reng a ni.
"Min ko a, min nghakhlel tawh viau zawk ang"
"Kalpui iduh em? Nangmahin i hmu ngam ang maw?"
"Ngam e. Ka pu lawm. Dam in ka rawn let leh em em ang" ka ti fiamthu ve na a, a nuih a za tehchiam lo.
"Ipu hmuh kha rilru natna mai mai anih zel dawn chuan hmu lo mai la"
"Chanchin ka rawn hrilh dawn che nia" ka kal lui tur chu phallo ni awm takin min en a, indona hmun a kal tur ang mai ka ni.
"Inu leh pate an awm ve angem?"
"Awm ang. Hmuh zawk a ni mai. Ka rawn haw hma ang" midang an awm ve vang in ka kuah thuak ringawt a, a ngaihţhalo viau mahse ka kalsan ta tho.


Inchhung ka lut a, nidang ang bawk in a reh leh vek tawh. Ka nu ka au a, he inchhunga ka hmuh chak awmchhun a ni. Vawi nga vel lai ka koh hnu ah choka aţangin a rawn tlanchhuak a, min hmu chiah chu au chul chungin min kuah nghal chuk chuk bawk.
"I damţha em? I nupui a ţha em? Awm ho ve thei ila ţha tur ania tiraw?" ti mawlh mawlh chung in apron a hlip a, ka nu bula ka awm chak em em lai pawh a min ţhenhrang tu chu ka pu bawk a ni.

"Ka pu in min ko a" ka tihchuan a meng kawk a, a hlauhthawn hmel viau bawk.
"Eng thil ah nge? Iva hlim hmel si ve. Ipu ihmuh dawn chuan i ţap lo chauh a ni ţhin sia" ka nu in min hriatchian em avang chuan ka lo nui suk a, zingkar ah chanchin lawmawm tak ka hria a, ka pu pawh hlau thei lo in min siam a nih hi. Ka nupui leh ka fa insiam mek hian chakna min pe niin ka hria.

"Nu chanchin lawmawm ka nei a, i thidang lo ang tih min tiam phawt la ka hrilh dawn che nia"
"Ka thidang lo ang. Hospital chungchang ani chiang. Ipu tan a hriat nuam tur rawn ken inei em ni?" tiin beiseina sang tak nei chung in min zawt a, ka lu ka thing a, ka pu hi chu engtikahmah ka tilawm ve lovang.

"Ka nupuiin nau a pai a" a reh lehnghal vek. Midang zawng aia hrilh hmasakber ka duh kha a ni. Harsatna tam tak min paltlangpui tu hian kan chhungkua a thil lawmawm thleng hi hre hmasaber se ka duh.
"Iti tak tak em ni?"
"Tehreng mai. Hre hmasaber la ka duh a" ka inrin hma in min kuah a, a insut zui hliam hliam bawk.
"Ka van lawm tak em. Enkawl ţha ang che aw. I nupui leh ifa hi i neihchhun tur te an nih hi. I mal thei si, ka awmpui thei silo che a, hlim zel tawh rawh aw"
"Nunhlui sawichhuak tawh suh ka nu. Ka mal tawh lo a, ka thil lo tawn tawh te kha chu theihnghilh vek tawh rawh" ka ti na a kei ngei pawh hian ka la hrevek tho chu a nih hi.

"Ipu chu han hmu la. A sawiduh ang apiang han ngaihthlaksak phawt mai teh. A lawmawm lam hi chu ipu ihmuh zawh ah intih thawven nan kan sawi leh zawk dawn nia" a tih pah in a mittui a hru a, ka nu a ţah vang nge ka pu chu ka hmu hreh thar leh riau mai.
"A room bul thlengin ka hruai ang che" tih leh ka ban a kaih a rual a, ka naupanlai a rawn lang leh uarh uarh mai. Ka pu in min koh ve apiangin ka nu in min hruai thlap loh chuan ka kal ngam ngai lo.
"Inau nupui leh fanu pawh tlai ah an lo thleng ang"
"Baby te nufa maw?" ka ti hu a, a lu lo buk nghat nghat pah in a sam a hui chho a, a mit ala sen ram mai.
"Engti tur in nge an rawn kal?"
"Baby a chawl a, an rawnkal zawk dawn aniang"
"Naute hmu turin ka rawnkal leh dawn nia, Emma pawh ka rawn hruai ang" kan ti ti chhung in ka pu awm na kan lo thleng reng tawh.

"Nangmaha luhtir che hi nuam lo ka la ti reng"
"Min ngaihtuah suh. Hospital chungchang ah a nih ka ring" kawngkhar ka kik a, lo lut rawh a tih rual in ka nu in hlauthawng tak in ka ban a ţham chawih a, a lu a thing mat mat bawk.

"Ka thihna tur ka pan ang mai lawm anih le" ka ti hluk a, ka pu hmuh vat a, haw vat ka duh leh ber tawh.
"Ka lo zuk chhuk a nge. A ţawng ka hre ngam lo" a ti a, min kalsan chu ka thaw huai. Ka nu ber a hlauhthawn viau chuan hlauhna ka nei ve. Emma lah in min hlauhpui tawh bawk.


"Ka pu ilo dam em?" dawhkan hma ah alo ţhu a, dawhkan ah chuan lehkhabu a inchhawp leh ţeuh tawh.
"Ţhu rawh" ram hmak a tih pah in a hmazawn a chair a kawk a, rang tak in ka ţhu ve nghal.

"I nupuiin nau a pai niin ka lo hria a"
"Engtin?" ka ti hman chiah a, ngawi rih tur a min duh zia lantir nan ka hmazawn ah a kut a rawn phar a.
"Irene hi i hmangaih bawk a, iduh chuan inei thei ang" he putar hi a duh duh a rorel a tum ringawt. Ka duhlo chungin Emma min neihtir a, thildang ah chuan min tilui tawh lovang.
"Ka nupui hi ka ţhen dawn lo" ka ti nghut a, a thinrim khawp mai.

"Baby naute dah turin a lokal a, Mason nen an inţhen dawn"
"Mason te nupa an inţhen vanga ka nupui ka ţhen ve na chhan tur ka hrelo" ka ti hrawk a, an fanu kum3 mi lek, an rapthlak khawp mai.
"Emma hi Mafela nupui tur a ni"
"Ka nupui a ni tawh a, ka ta a ni tawh. Emma hi hrehawm tawrh tir tawh reng reng suh" thip ram in min melh a, hlauhna ka nei tawh lo. Kan nupa hi a duh duh a a thunun tur kan ni lo.

"Irene neihna hun ka siamsak che hi i bawhpelh ang maw?"
"Ka hrilh nawn leh ang che. Ka nupui hi ka ţhen dawn lo. Ka fa nen hian ka venghim tlat ang" elhsen deuhin min nuihkhum a, dawhkan hnuai lam ah ka in hum ruh ve tlat bawk. Ka pu hi kutthlak mai duh chang ka nei ţhin.

"Ka thusawi anga i awm lo anih chuan hospital ah hian i aiawh in Mason ka dah ang"
"Hospital hi ka rah ve phal tawh dawn lo mahla ka nupui leh ka fa hi ka kaltir dawn chuang lo" luhlul tak in ka la ti ve. Hospital hi ka damchhan a ni ka ti ţhin. Ka tha leh zung leh ka thiamna ka hman tam na hmun ber a ni mahse Emma leh naute hi thildang aiin ka thlang lo thei lo a ni.

"Hrep tak che hian. Khawvel ah hian ineih tur thil a awm ve lo. Mason hian Emma a duh ve tih i hria em?" a ti leh khur khur a, engkim ah Mason te unau vek.
"Ka pu, ka nupui hi i duh duh a i chinphar tur a nilo. Bungrua a nilo a, mihring zing ah pawh a ţha ber a nih hi. Kan boruak ţha lai mek hi khawngaihin min tihchhiat sak suh" tiin khawngaih ka dil a, min ngaihsak lo deuh in dawhkan a paper awm a keu kual a, ka pu tupa ka ni kher hi a pawi a nih hi.

"Nau hi a chhiat emaw a ti tla anih chuan inţhen hi a awlsam deuh in ka ring"
"I nunrawng hle mai" ka ti sup a, Emma nen a kan inţhen a duh chhan hi ka hrelo a, keimah vanga Mason-a mualphona tur thup a tum leh pawh a ni maithei e. Engpawh tih tum se naute leh ka nupui hi ka thlah lovang.
"Thil pawi a thlen hma hian ka thu awih la a ţhat ka ring"
"Engvang nge? Ka nun tihchhiat hi eng nge a nawm em em na? Ka hlim dawn chauh a min tichhe lehzel a nih hi" ka thusawi tawp lamah chuan ka au a ni ber tawh.
"Zalen na hun ka siamsak che anih hi. Naute chu a tih tlak loh pawn a pian veleh in la mai dawn ania. Keini leh i nupui leh naute la piang lo hi ithlan zawk" dam dap a a tih veleh ka ţhutna aţangin ka tho a, duhthlan theihna min pe bawk a, ani hi chu ka thlang miah lovang.
"Nang ang em chuan ka nunrawng ve lo ka pu. Ka nupui leh fa hi thildang aiin ka thlang zawk. Ka duhthlan na i hretawh bawk a, a dang zawng chu i kut ah awm rawh se"


"Mafela kha i nunrawn ve tho vang a that ini lo em ni?" ka chhuahdawn laia a thusawi avang chuan ka ding leh chawt a..


CONT.... (Vawiinah ads i la click lo a nih chuan i lo click ve ngei dawn nia, a hnuai chiaha milem khu aw click tur chu...)

---

Show post links

Top

ADVERTISEMENT (A hnuai a milem hi a nia hmeh zeuh tur chu)

Ngaia

Site Admin

• Quote

Unread post April 8th, 2019, 7:50 pm

FORCED MARRIAGE-14



MATTHEW'S POV


"Mafela kha amah leh amah a intihlum. Kan in haw hle ţhin tih ka pawm. That tur em a nunrawng erawh ka nilo"
"Ka thu i zawm loh chuan i nun hi a nuam hauh lo ang" a tihtak zia hriat chuan a zam awm rum rum thei hial. Mahse tunah chuan damchhan tur ka nei tawh. Ka fa lo piang tur tan hian pa nih tling tak a awm ka duh a ni.

"Harsatna min thlen dawn anih pawn keimah chauh min bei rawh. Ka nupui leh ka fa lo piang tur hi chu buaina ah hnuk lut ve suh" ngen ngawl takin ka ti leh a, min ngaipawimawh lo takin thil dang min tihsan leh tawh.
"Ka pu chhungkua ka din dawn mek a, harsatna min siam lo in min fuih zawk rawh"
"Tihsual lian tak ka nei a, Emma hi neihtir lo tur che ka nia, ka tupa a thih phah lehnghal" a tih lai chuan rang tak in "Ka that lo" ka ti vat. Tupawn thah a nih loh zia an hrechiang. A hmu hmasa tuten a hrechiang hlei hlei ang.
"Ka hriat dan chuan i thah ngei a ni. A intur ah damdawi chak tak i pawlh a ni" a ti bauh a, ka pu in min huat lehzual na tur thil a ni.

"Ka that lo. Damdawi hmanga intihlum a ni ngei a, ka thah a nilo. Ka nupui neih ni ania, biak in leh in ah ka awm nileng. Ka pu ka that lo tak tak" dawhkan vuan in ka ding a, ka thah ang a lo sawi tu chu Mason bawk a nih ka ring. Ka that loh zia chu kan inneih lai a min dinpui tu Mama pawn a hriat ka ring. Room a Emma ka tihbuai chhung reilote tih loh kha chu kan awmdun tluan thak.
"Englai mah in ka lawm ngai lo che. Ka tupa hming ila put vang chauh a police pawh hrilh lo ka ni. In hnamhnawih lo la chuan Mafela thihdan kha ka chhuitir ngei ang"
"An chhui chian poh leh mahni intihlum a ni tih an hrechiang lehzual ang" ka ti nghut a, min dawp vak mahse sawitur mumal ka nei dawn chuang lo.

"Hospital hi i kut a a awm theih nan Irene hi nei rawh" Mafela chungchang kal kan in thildang a sawi leh daih tawh. Ka fihlim tih ani ngei pawh hian a hriat ka ring.
"Irene hi ka ţhianţha ber a ni a, chutianga awm reng tur chuan ka duh. An chhungkua hian hospital tan pawisa tam tak pek an in huam ngei ang a, lo pawm miah suh. Ka nupui leh ka fa hi pawisa a thleng theih an ni lo" ka tih lai mek in paper a hlawm a, min vawm nan a hmang zui zat bawk. A hmel a rum al a, tar chaklo vak tawh a ni chung in a thinrim chu a dingchhuak ve hial.

"Ka sawi ang apiang hi i zawm mai tur a ni. Fa chuang lehnghal, ţangkaina tlem tal neih tum ang che. Ka thu thu a awmtur inih hi" a tih khur khur laiin ka pa a rawn lut hlauh. Ka pa hmel ka hmu chu ka thlamuang huai a, naupang tak nitawh lo mah ila ka pa chuan min hnem nan min kuah se ka ti. Ka pa lo lut lo sela chuan ka pu thusawi kha chhanlet ngaihna pawh ka hretawh lo.

"Matthew hi fa chuang a nilo ka pa. Hospital hi Matthew kut a awmtur a ni. Mafela khan doctor nih chakna a nei ngailo a, Mason lah hian hospital aia ngaihpawimawh dang a ngah. Matthew thawhrimna hi haider miah suh" tiin fiah tak in a hrilhfiah a, ka pu chu chair ah ţhu thla leh in keimah chiah huat hmel tak in min la melh tho.

"Ka thuzawm apiangin hospital hi an chang ang" a ti ban charh a, ka pa a awm chuan a aw ki pawh hriat a nuam ta deuh.
"Matthew hi hun harsa siamsak tawh lo turin ka ngen che. Amah vang chauh in hospital hi a ţhang. Mason-a kut ah hian dahchhin la, kum khat chhung pawn kan tlahniam hneh viau ang. Baby pawn a rawn ţhen leh tak hi" ka pa pawh in a ti ve a. Lo in thiarfihlim ţha a ka hriat vang in kawngkhar lam ka pan a, ka chhuah dawn lai a ka pu in Mafela thihna chungchang a sawichhuah leh chu ka hre vuai vuai. Ka thah a nih miau loh chuan police pawh pun se hlauhna chhan tur ka nei lo.


Inhnuai ka thlen thlak rual a ka hmuh hmasak ber chu hmeichhe naupang hlim tak a tlankual vel chu a ni. Ka rin aiin an lo thleng hma daih mai. Tlai lam a lo thleng tur ang khan ka hre sia.

"Sandra min la hria em?" a tlankual lai a ding chawt a, nu leh pa tello a awm tur chuan a lainatawm khawp mai. Muangchang in a lu a thing a, kum khat lai kan inhmu tawh lo a, min hrelo mahse a awm tho mai.

"Matthew...nangmah ini tak tak em? Iva danglam ta ve...Matthew ini maw?" ti a au chul chung in Baby in min rawn kuah a, ka thinrim chang pawh a min nawrlui ngam ţhin tu kha a ni. Hmeichhe harhvang tak, Emma ang mai a rilru tluang a ni.
"Ni e. Kan va inhmu khat ve. Chawlh in rawn hmang nge?" tiin ka zawt a, an inţhen tur thu ka lo hriat lawk tawh kha chu ka haider.
"Sandra hi ka rawndah a, keichu ka let leh har lo ang. Ka let hma in i nupui pawh hmuh ve ngei ka duh khawp mai"
"Sandra hi apa bulah i dah ang maw?"
"Aw. Pa nih zir ve rawh se. A nun ho lutuk hi a zia mahna" an rawn thlen na a la reilo bawk a, ala pawr ve phang a, Sandra erawh naupang tha za rual a ni bawk a, a tlankual leh par par tawh.

"Tlaiah chauh in rawn thleng tur ah ka ngai a Baby" sofa ah ţhu in ka nu intur min rawn pek ka in a, Emma ka ngaihtuah tawh khawp mai. Baby te an lo thleng zui bawk nen duh ang in ka hmanhmawh thei lo a ni.
"Ka nu hi ka rawn tihder a nih kha" ka nu melh ralh pah in a nui ver ver a, ka nu lah in "Mason hi engvanga ţhen duh nge inih a? Sandra hi a lainatawm emai" tiin alo zawt daih thung.

"A nupui fanau a ngaihsak lo emai. Sandra pawn a ngai em em a, keimah min ngaihsak loh pawn a fanu tal hi chu ngaihsak tur a nia. Zan lam a kan inbiak apiangin hmeichhia in min lo chhang ziah bawk a, ţhen hlen ka tum lo. Hrem ve rih ka duh, in zir ve rawh se" a ti a, Ka nu nen an nupa chungchang an sawidun zel duh ka rin vang in haw tum in ka ding a, mak ti tak in min en rual ţhawt lehnghal.
"Haw ka duh deuh a, i let leh hma in Sandra hi i rawn lenpui dawn nia" tiin Baby chu ka chah a, car ka dahna thleng in ka nu nen chuan min thlah ta tho a. Mason-a haw tur nen kan in pel vuai a, ka nang hman lo chiah chiah. A fanu tal chu a ngaihsak ve em ang chu.
Ka pa kha ka nghakchhuak lo a, ka pu khan a hneh ve lehtawh a ni maithei. Ka pa meuh pawh in a hlau em em reng chu a nih hi.




EMMA'S POV


Matthew hi ka pu nen an inhmuh aţang khan a zia a dang deuh. Min hmuh loh hlek in min call reng a, phone keng reng turin min chah bawk a, keimaha khawlaia kalchhuah a phal bawk silo. Ka pu nen lah hospital chungchang bak kan sawilo a ti bawk si. Mason-a nupui leh a fanu a hmuh nghal thu a sawi leh tawp a, min zawn chuk chuk zel chhan ka zawh lah in ka ngai che ati leh tawp a, a zia inthlak hi lawm tur nge hlauhthawn tur pawh ka hrelo.

Ka chauh ngawih ngawih ţhin vang hian kar khat chiah chawlh ka dil a, chupawh ka hmang zo ţep tawh. Vawin hian Mason-a nupui leh a fanu an rawnkal dawn niin a sawi a, ka chechang peih rih chuang lo. Khum ah zawi deuh in ka la mu.

"I rawnchhuk peih em?"
"Iva rawn haw hma ve" ka lo ti hluai a, thawh ka tum uaih uaih laiin ka bulah rawn kal in min kuai mu leh a, tunlai phei chu a thawk rim a, a chauh ve viau ţhin ka ring.
"Baby te ka rawn lam kawi a" inleng neih chu a ruk chuan ka peihlo. Ka chawlh chhung a zo ţep tawh a, tibuaitu neilo a awm ka duh nen.

"I chhuk peih rihloh chuan i muhil ka ti mai ang"
"Ka peihlo ka tih miah loh kha" ka ti leh hlar tawh. Ka tum vang ni miah lo hian ka lo vin leh ţhin.
"Ka awm loh hlan khan naute in lo in hau em lo maw" tih pah a in bengkang in a nui suk a, a kut awl lam in ka sam a chul pah bawk.
"Ala te lutuk a buaina engmah ala siam lo" ka pum khawih pah in ka nui vur vur a, ka lo paih daih ang tih ka hlau leh hnuhnawh. A pian hma aţang ngawt pawh hian min tihlim em em tawh si a.

"Ka fapa chuan anu ava duat ve"
"Hmeichhia nge mipa anih pawh i hriat loh tawp kha aw"
"Mipa a nih hi" inringtawk taka a tih chuan ka lo ner nang a, hmeichhia nise ka ti.
"Ice cream ka eichak reng a, hmeichhia a ni ngei ang" tiin ţan ka khawh ve tlat a. Lo chhuak vat vat se ka ti ngawt ang. Kan nupa hlimna belhchhah tu tur ber a ni.

"Kan naute hi chu nu leh pa kar ah hlim takin a seilian thei ang tiraw?" ti a zawh pah in ka en ha a, Sandra ang a naupang te anih lai aţanga fahrah tir ve ka duh lo.
"A thei ngei ang. Hlauhawm a awm lo" a ti na a, amah a a awm chang a muk tak a a in ngaihtuah lai hi ka hmu leh ţhin.
"Nangmahin engmah tuar suh aw. Ka awm ve hi aw" ka ti ta nge nge a, chhawk theihna te ka lo nei ve maithei asin.
"Ka lam a i ţan chhung chuan engpawh ka tuar thei ang" a ti a, ka chhang tawh lo na a amah chiah a tawrh tir ka tum bik chuang lo.

"Chhuk ila an khua alo har a nge" a tih takah chuan zawi viau mah ila phur tak in ka tho tharh a, Matthew sawi chiah ka hria a, ka la hmu ve lo reng reng. Khum aţanga ka chhuk tur ka in pal lehpek a, ka tlu ţep nghe nghe. Matthew lo awm hlauh lo se la chuan ka tla daih ang.
"Fimkhur rawh" a ti sup a, ka pheikhawk bun lai te chuan min lo vuan ţung tawh.
"Zeilotei hi a" a tih leh chuan a nak ah ka nghawk sawk a, a nui vur vur reng tho.

"Min vawn reng chuan i tello a awm ka thiam lo mai ang" ka ti uang a, step ah pawh ka tluk hlau in min kuah a, min paw lo chauh tawh anih hi.
"Ka duhthusam a nih chu" ka nuih rik hak rualin naupang hlim taka khek ri kan hrezui nghal zat bawk. Nui reng chungin kan in en a, "Ka naute pawh hi nakinah chuan thawm ngaihnawm tak chhuah in ala tlankual ve ruai ang a" ka sawizawng pawn ka mitthla thei vek. A hmel tur ka ngaihtuah thiam lo a, hmeichhia ang in ka ngaihtuah.
"I naute bik a nilo. Naute hi chu kan in ţawm"
"Min chhun zawk tho ang" ka tih hmuk hnu ah ka tum zui bar a, naupang tlankual vel kan hma ah tak a rawn din chuan ka nui leh nghal.

Min hmu ngailo bawk a min melh zeuh zeuh ngam chauh. Matthew zawk chuan alo pawm vat a, Mason chuan fanu a nei hmelţha hle mai. Living room lam a an in pawm phei chu an hnung ah ka zui a, kan thawm hria in Mason-a nupui Baby chuan nui sang in min lo hmachhawn a, Debbie sawi hmang kha chuan Mason-a nupui chu hnamdang a ni a, Baby erawh hi chu mizo ngei a ni.

"Emma i ţha maw? Baby ka nia, ka hming chu i hretawh maithei" tia a kut a rawn dah chu lo vawnsak pah in ka pasal hnen aţanga ka lo hriat tawh thu ka hrilh a. Ka ţhut ve rual in ka bulah Matthew pawh Sandra pawm in a rawn ţhu ve. Ka lainat khawp mai.
"Engtikah maw let i tum?"
"Naktuk ah ka let ang. Emma ka fanu hi min lo ngaihvensak rawh aw. Theih chu nise apa bul ai chuan in bula kalsan hi ka duh zawk a, mahse ka pu in a remti dawn silo a" a ti hnual raih a, a lungngaih hmel khawp mai.

"Apa a puitlin iduh chuan apa bula i awmtir chu a ţha zawk ang. Kan ngaihven reng thei tho alawm" ka ti na a ka chiang lo khawp mai. Kan nupa ngei pawh hi duh duh hun ah kan kal ngam lo chu ania.
"In ngaihven chuan ka lawm ngawt ang. Irene nen pawh kan inhmu a, ka chah tho bawk a" a tih lai chuan ka lo ip chawih a, Irene pawh hi engvanga hrevek nge maw an nih le? Baby lah chu a thusawi pawiti hmel pawh a pu lo. Ka ngaihtuahna hrethiam ni awm tak in Matthew chuan ka malchunga Sandra rawn nghah pah in "I pawm a duh tlat. Naupang hian mifel an ngaina a" a rawn ti sup a, a nui deuh bawk a a fiamthu a nih ka ring. Sandra lah chu a infiam chau deuh nge ka awm ah a bei fel thlap a, a ngawi hle hle tawh.

"Mason hi ţhen la pawi ka ti lo a, mahse Sandra hi i kalsan hreh lo mi? A zawng reng dawn che sin" ka ti ta phawng a, kei ni ila ka tih theih miah loh tur a ni.
"Ţhen hlen ka tum lo. Pa a nihna hriattir ka tum a nih hi. Sandra hi nuhrawn emaw pahrawn pawh hrawn tur in ka duh lo. Mason pawn a hmangaih a, a fanu vang pawh hian a in siamţhat ka beisei" a ti a, ka pawmpui chuang lo. Engkim hre sa a nei a nia, tuarchhuak rat turin ka duh zawk daih. Anmahni chiah an in ngaihtuah a, Sandra hi a tuar tu ber a ni dawn si ka ti rilru rauh rauh a, nu leh pate thil tihsual naupang pawisawilo in an tuar ţhin hi a pawi khawp mai.

Chaw ei tur a kan tih pawh in an duh miau si lo a, thim thet thet ah kan phallo chung in an haw lui a. Sandra ka hmuh khan ka infuih sauh sauh, ka fa hi a fahrah ve ka phallo.

A hma aiin thil ka eithei deuh tawh a, Pi Sangi leh Matthew te an lawm khawp mai. Ka eitheih miah loh lai te khan kei aiin hrehawm an lo ti zawk amaw tih tur a ni. Luakchhuak ut ut ang kha ka la nei tho a, zawi ngawih ngawih chang ka nei bawk tih loh chu in sawiselna em em ka neilo a ka lawm khawp mai.



Nitin Matthew nen kan kal dun a, kan haw rual leh a, a hman tlai dawn anih chuan ka lo hawsan lui ţhin. Irene nen ka hmu dun zeuh zeuh a, ţhian ringawt an ni tawh tih in Matthew chuan a sawi a, Irene zawk chuan min nuihzat hmel viau ţhin. An inkar a thil awm ka hriatchian hma chuan ka pasal rin tawp rih ka duh a, hrechiang hawt lo a thinrim bur bur chu a puitling zia lo emai ka ti deuh ţhin.

Garage a car a dahţhat fel hnu ah ka duty na thleng min thlah leh ţhin. Tun a a tih ang chiah hian. Ka dar a kuah tlat chung hian ward thleng min thlah ţhin a, kan thawhpui te pawn min fiam leh zeuh ţhin. Irene nen inkawp leh sela chuan hetianga a tih ngam hi ka ring lo a, min ngaihsakna hi a der mai mai a nih loh ka beisei tlat bawk.

A tih ziah dan in "I phone ak reng rawh" a ti leh a, a hmai bula ka dahkan zuai hnu ah a hmuh laiin ka ak a, phone hi a pawimawh ta em em mai a ni. Min ngaih vanga min biak reng a duh niin a sawi.
"A ţha. Min nghak la ka rual in i haw dawnnia" a ti leh a, nitin thu ngai reng min chah a, ka nin viau chang pawn thu min la chah duh chuan a lawmawm tho alawm tiin ngawih ka chuh leh ţhin.
"Haw hma te hi ka chak ve a, min nghak rawh iti tlat zel sia, ka lo nghak leh mai ang chu" lawm lo tak chungin ka lo chhang a, ka luhlul a chhuah ve chuan min au lawm lawm mahse ka hawsan hmak zel tho a nih kha. Khatiang ka mood inthlak kual vak hunlai kha ka pel tawh. A hma ai khan hriatthiamna pawh ka nei nasa lehzual zawk in ka hria.

"Fimkhur ang che aw. I thiltih apiang min rawn hrilh la, step ah hian nangmahin kal suh aw" ka thusawi apiang chu ka lo aw liam puat puat a, min venhim a tum nasa viau ah ka ngai mai. In pal khut khut leh tluk thut thut ka hrat vang te pawh a niang.

"Nangpawh fimkhur la. Hmeichhe bulah te khan awm tam lo a" ka sawizo ward chhunga rang taka tlan luh nghal mai ka tum chu "Engmaw?" ti a nui hak chungin min pawt let leh a, ka duh aiin ka lo sawithui leh tawh.
"Fimkhur rawh ka ti anih chu"
"Chuan?" a hmel en tum in ka dah vah a, uang deuh a min lo en let ve in a mithmul a san ak a, a la nui deuh reng bawk.
"Lerh hi a ţhalo a, in veng rawh tihna anih chu" ka ti nawi nuaih a, ka ţawng lai khan ka lei hi a nilo lamah a inthlep kual pawp pawp in ka hria.

"Naute nen kha chuan ka ngam tawh lo che u. Emma pasal rinawm ka ni reng ang" a ti a, a nuih ala za hle bawk.
"I hmelchhe emai" ka ti ringawt.
"Hmeichhe dang in ţha min han tih nen. Ward ah ka lut ang a, min lo en leh sup sup anga" a tih lai chuan a awm ah ka chum a, nui hawk chung in min kuah nghal daih.
"Mipa dang ihmuh apiangin an hmel en loh tum ang che"
"Ngatimaw?"
"I en ngun deuhte hmel ang kha kan naute hian a pu daih palh ang" a la fiamthu reng aniang. A thilsawi chu Matthew sawi ve tur pawh a ang lo zawk.

Ka luh dawn a ka ban ka vai laiin nui pah in a mit a siai a, lei ka chhuah vak hnu ah ka tlanlut a, a nui ri erawh ka hre hman chiang khawp mai.

Debbie ka hmu lo a, a lo la thleng lo nge pawh ka hrelo. Mason-a hnen a pek tur file alo inchhawp nuaih a, "Hengte chu rawn lak ve mai tur ania" tiin ka phun sep a, nupui alo nei reng tih ka hriat hnu leh a nupui ngei pawh ka hmuh ve tak hnu kha chuan kan in be tlem. Min biak a tum pawn chhuanlam siam in ka kalsan a, keimah zawk hian ka hel ngar ngar mai ţhin. A zah ka hlauh vang leh ka pasal nen unau an la nih ve bawk vangin a mimal nun ka zahsak a, aman a sawichhuah hma chu tiin Debbie bulah pawh ka la sawichhuak lo. Chhungkaw thil lo sawi zuah zuah kha nuam ka ti lem lo bawk a, an inkawm nasa tho a, ala hrilh ve mai tur ah ka ngai.

Damdawi ka semkual a, pek nghal ngai ho ka pe kual nghal thuak thuak bawk a, Debbie awm lo chu ka buai ngei ang. A che rang a, a ti zung zung a, ka lo ring mah mah ţhin a, keimaha tih a ngaih chang hian ka buai leh ţhin.

Mason chuan file a rawn lak hun ka lo ngaichang deuh reng a, Debbie message ka thawn ţeuh tawh bawk. Traffic jam ah a tang a nih ka ring. Midangin an hriat hma a a rawn thlen vat a ngai. A tlai viau chuan an lawm hauh lo ang.

Darkar chanve ka nghah hnu ah pawh Mason a rawn lang thei lo. File ho chu ka pawmkhawm a, a office lam ah thinrim takin ka kal hmawk hmawk a, Matthew kan doctor anih lai khan a office ah thil zawng zawng pek vek a ngai ve ngailo. Aman a rawn tifel mai ţhin. Hetiang a hna tlin lo lutuk hi apu lah hian hospital enkawl tur in a duh em em mai chu a nia. A hrechiang lo mai mai a nih hi.

A office ka thleng a, kawngkhar pawh a inkhar lo. Parda a in zar phui em em ringawt a, ka hnaih deuh hnu a phun ser ser ka hriat chuan ka tih ngai ni miah lo in an ţawng ngaihthlak tum in ka beng ka dawh hnai a, a reh leh duak tho sia. Ka thawm an hria em maw ni ka ti hial. Irene nen an lo awmdun leh a nih ka ring a, Irene a awm ve chuan ka lut duh lo. A hmel ka hmuh ringawt pawh in ka hah.

Parda sir lam ka keu dek dek a, alo awmpui chu hriat tum in ka bihthla a, an awmdan ka hmuh rual chuan ka mit ka chhing vat. An lo in fawp a nih chu. Kawngkhar khar miah lo in hospital ah lehnghal. Hmeichhia chu enchian tum in ka meng leh a, min hmu ve chuang lo bawk a, hriatchian ka duh. Nurse a ni a, a pianhmang vel te ka enchian chuan ka meng phar nghal awn awn a.

Mason-a lo awmpui chu tudang nilo in ka ţhiannu Debbie ngei a ni. He mihring hian engthil chiah nge a beisei ni dawn le?


CONT... (Naktuk hi ka nau birthday ania, saturday hi keimah a ni ve thung a, hreh viau mah ila naktuk leh Saturday chu ka chawl ang aw. Ka lo hrilhlawl cheu a, in hriatthiamna ka ngen pah bawk. A ţul tawp ah lo chuan ka chawl lo a, khawngaihin min lo hrethiam hram hram dawn nia)

---

FORCED MARRIAGE-15




"Debbie" ka hriat tur tawk lek in ka phun sep a, ka mit ngei pawh hi ka ringhlel hial. Hetiang mai a Mason-a awmpui theih anih ka ring ngai lo. An thawm a rin deuh hlek hnu ah an rawn chhuak dawn anih ring in ka file ken ang ang nen a ngai ngai in ward lam ah ka tlan let dawr dawr a, ward chhubg ka luh hnu ah pawh ka chawl chuang lo. Damlo leh a awmpuitu, ka tlanpelh tak te pawh in mak ti in min enzui ngei ang.


Ka file kenlai dawhkan ah ka nghat chawrh a, ka awm dawm in thawk ka la a, thu lengvel chu nise ka awih kher lo ang. Ka insiamrem thuai a, hna ka thawh a ngai. Damlo ţhenkhat drip khai lai a zo a, ţhenkhat tan khai a hun ve chiah bawk a. Chutiang vel buaipui chuan ka phe dawr dawr a, ka thil hmuh tak ka mitthla a cham zui reng hi ka duh lo. Ka mitthla a thil awm mek paihchhuah tum ran chungin duty te awm na ah ka let a, Debbie a lo ţhu ran tawh.


"I rawn thlen na a rei tawh em? Emma" a tih ziah dan in a nui sang a, ka thil hmuh kha ka sawichhuak leh zawk mai dawn em maw ni tiin ka ngaihtuah a, min hrilh hun nghah ţha ka ti tho bawk a, Mason hi hnaih lo turin ka duh bawk.


"Tlem in ka tlai deuh a" a hmel en ran chung in "File ho hi Mason hnen a thleng tur a nia" ka ti leh kher a, Mason tih lai chu ka lamfiah bik lehzual.
"A rawnkal mai ang. Heng te chu a rawn en ve ang chu" ngaihsam fahran in min chhang a, min hrilh tur neireng chung in sawi loh a thlang ah ka ngai.


"A hna hi a ngaihsak lo mah mah. Hetiang a nih reng chuan a fak ţhin tu te hian an la sel zawk ngei ang" tih hlak pah in file ho chu dawhkan sir ah ka nawr phei a, ka ten zo vek tawh in ka hria.
"Ward round pawh ala hun hleinem"
"A hun daih tawh. Damlo hi chu ngaihsak tur ania sin"
"Mason hi i ngaina lo sawt riau" nang in i ngaina ta lutuk mah mah a nih hi ka ti rilru rauh rauh a, pawi ka ti viau lehnghal. Ka duh aiin Mason hi ka hrechiang tawh.


"A hna ngaihsak tur in ka duh mai a ni. Hospital hi nawm chen na hmun tur a ni lo"
"Matthew hian Irene a buaipui laiin tuman an sawisel ngai lo. Doctor dang pawh ngaihzawng nei tam tak an awm" chuti chu Mason nen hian an lo in ngaizawng hman tihna em ni dawn?
"Matthew hian hna ţhulh khawp in ngaihsak dang a nei ngai lo. Chuan engvanga Irene leh ngaihzawng chungchang sawichhuak tel nge inih? Mason hian hmeichhia ngaihsak fal bik a nei tihna em ni?" ka ti ve sak sak a, a ţawngsual na lai pawh a hre tawp nang, a hre maithei bawk. Amah vang a Mason hi rawn tlai a ni miau a.


"In pa thlavang i hauh na ta hle mai maw. A lawmawm, nupa hlim tak in nih zel ka duh ber" Mason nen a inkawp a ka ngaih vang in min duhsakna ţawngkam te chu ka hmu lem vek tawh. A hnen aţang khan thu neuh neuh fahrah te te a hre ve ţeuh tawh in ka ring.
"Kan hlim e. Min duhsakna avang pawh khan ka lawm. Mason-a fanu Sandra hian min tihlim phian bawk a" a nui hmel chu maktihna, thinrim na leh rinhlelhna ten a thlak thleng kual vel a, ka lo hmu ru reng. A hnen ah hian ka la sawi lo miau a, tun a ka thilsawi alo dawnsawn dan aţang hian Mason hnen aţang pawn a la hriat bikloh zia a lang.
"Anih chu. Nangni pawn in neih ve ţep tawh kha. In enkawl uluk la aw" a mitmeng a phelh phang a, ka khawngaih leh hnuhnawh. Mason hian a phu hlawl lo a, in thiarfihlimsan vat se ka tih vang chauh a hrilh ka ni. Baby khan inţhen hlen a duh lo bawk.


"Boruak in va neih rih hmel ve" kan boruak chu alo rit bawk aniang Matthew ka hmuh chuan ka harh kawk thei hial in ka hria. Amah hrim hrim chu zingkar lam ai pawh khan ka hmu thar lehzual a ni ber.
"Rai lai hi chuan awmdan a inthlak nasa thei em a, hei i nupui chau thinrimna zawng kual vel lo bengdaih ka tum a nih hi" nidang pawh nise Debbie in alo chhan dan tur tho a ni a, dawtsawi leh lo pha kual vel a ni lo, fiamthu, a tih ţhan dan a ni.


"Eng nge ilo tih?" ka tih ţhak rual in a awm zawn ah ban phar in "Ka tlawm" alo ti vat a, a nui vur vur bawk a, a paper kenlai ka lo en daih a, a inziak erawh ka chhiar theilo.
"Ka uang lo. Tun ang hun ah i lokal ngai silo a"
"Nimin lam a ICU aţanga an rawn sawnchhuah ka rawn umzui. Khawnge Mason?" tih pahin a hawikual a, intithei tak chung a dak vah in Debbie lam ka hawi a, tu nge hna ngaihsak zawk a hre ve tawh ang chu. Ka awmdan chu an lo hrethiam kher lo maithei, ka thil hmuh an hreve lo a, Mason nen a in haw lo tak a lo awm Debbie pawn ka hmu tih a hre hleinem.


"A rawn lang miah lo. A buai deuh a ni mahna" ka ti hluai a, a thiltih hrechiang tu Debbie in chhan a tum silo a, ka rinthu ka sawi mai aniang chu. Ka rin ang chiah in Matthew pawh a lawm loh hmel kher mai. Damlo na tak tak kan nei ve reng a, a ngaihven tur chu nurse mai bakah an natna hrechiang a, damdawi hman tur hrilh tu tur an doctor te a ni. Ward a rawnkal hun tawh lai a a reh vang vang hi a dik lo bawk.


"A sana a diklo a ni maw?" a ti hluk a, zawh bik pawh a nei chuang lo. Debbie in "Office ah a awm reng tawh ang. Kan ko a nge aw" a ti ve ta nge nge a.
"A ngailo. Ka va hmu mai ang" min rawn en a, dam deuh zawk in "I duty zawh ah min rawn hrilh dawn nia, ka nu in chaw ei tur in min duh a" a ti a, min rawn pah a ang mah zawk.
"Awle kan kal dawn nia, Sandra pawh ka hmuchak" ka ti leh a, ka ţhianţha ber naupang hmanga tih hrehawm ka tum chu sual ka in ti ang reng.
"Ka rawn lam ang che. In dim la aw" ka hnung a chul thuak a, chumi hnu ah Mason hmu tur chuan min kalsan a, an in be ţha dawn lo tih ka chiang sa khawp mai.


"Matthew hi a danglam tawh e. Irene nen a an in kawp lai ang kha a ni tawh lo. Nau i pai vang nge a duat riau mai che. A ţawng tam ve sawt bawk si, biak a hrehawm tawh miah lo" Debbie chuan alo ti chul a,Matthew danglamna chuan a tih hlim tak tak zia pawh a hmuh theih. Mason nen in zawmna an lo nei anih pawn ka ţhatna chiah duhtu ka ţhianţha kha ala ni tho in ka hria.


"Pasal nei ve tawh la, neih peihawm loh khawp in i upa mai dawn"
"Ka duhzawng te neih hi a remloh zel hmel sia, ka chhungte hian nangmah ang hian midang nen min sawirem in ka duhlo chung pawh min nawrlui ve mai se a ţha ang" a ti duah a, a mipa duh ţhin chu Matthew a ni a, ka pasal a ni ta daih. Mason nen ka hmu dun leh a, fa alo nei leh bawk nen. A sawi awmzia ka hre ru reng.
"I sawiziah kha, kan ţhatna tur chuan Pathian hian kan nat a phal" tiin ka hnem ve a, duty dang hi kan ngaihsak em em ngailo. Kan pahnih hian kan inkawm mawlh mawlh a, kan in pawh ve ţhin em em bawk a, tun ah tak hi chuan zep ţhen kan nei tawh ve ve.


"Pathian hian kan nat a phal a, kan han nat chiah hi chuan Pathian remruat ti a pawmthiam hi a harsa leh a" a ti a, dik ka ti ve tho mai. Keimah ah pawh khan ka hrechiang. Mason nen hian engchen chiah nge an thlen tawh ang? Ngaihtuahna an ti thui khawp mai.
"Ka thil tawn lungchhiatthlak tak tak vang khan ţap chungin Pathian ka dem fo va, tun ah chuan ka mittui a hul tawh a, chhel na nasa tak ka neih belh a, van lam hawiin Pathian hnen ah lawmthu ka sawi leh ringawt ţhin. Ka thil tawrh kha a thlawn lo a, huaisen na leh chhel na te min zirtir duh vang a lo nia" ka pasal inthlak danglam nasat zia ngaihtuah zawm in keimah in ka nui ver ver a, Pathian hian ka ţah a phal a, ka hlim pawh a phal tho. Harsatna ka tawk leh a nih pawn ka la hlim leh ang tiin ka in hnem theih tawh ka ring.


Tlai tawk ah Mason a rawn lang ve hlawl a, kan hmazawn ah rawn ţhu in Debbie zawk a nuih sang a, ka lak ah a beidawng a, ka ţhiannu ah a ţuan tih pawh in a sawitheih ang. Debbie hi hmang ţangkai lo hram se ka ti ngawt mai.
"File ila rawn ngaihven har ve"
"Min rawn pe tur a tirh mai theih tur kan chhawr tel a, rawn tir mai ta che. Ţhu nileng chunga hlawh lak tir tawp em ni itum?" min ti let a, midang lo tir ta ila a mualpho dan tur a hrelo, nge nia nga ka ţhiannu hi tih mualpho a duh zawk? Pawisawi loh hmel tak a lang si hian alo rapthlak em a nih hi.


"Ka rawn lam lo anih chuan rawn dah tir tawh ang che nge ni a Emma mifel chungchuang hian an hah hlau in alo tir hreh leh tawh zawk?" min tih el nasa khawp mai. A ngeiawm a ni tawp.
"Keiman a lokal hun nghak ang ka ti anih kha" tiin Debbie alo inrawlh a, ka ringhlel lehzual vek tawh.


"A ţhat chu. Kan monu hi ka fiam ve zawk anih kha" a ti a, min la nuihzat zui reng tho.
"Doctor in ti ve tan chuan fiamthu thawh mai mai lo a damlo ngaihven a ţha zawk in ka ring"
"I pum kha ka hmu lian deuh. Vanduaina tur chu kha a rawn lang ţan alawm"
"Mason" Debbie in a lo ti tuarh a, a hawikual zui nghal bawk a, keipawh chutiang tho chu. Vanneihthlak tak in tuman min lo ngaihven lem lo.


"Duhtawk rawh. I hria maw? Tu fa mah hi vanduaina an ni lo a, an ni ngailo bawk ang" a ţawngring tawh lo na a, a thinrim khawp mai.
"Kan chhungkua aţanga nau piangchhuak apiang hi vanduaina an ni vek. A hring tu nu hmangaihna chiah an dawng ţhin" a ti sup a, keimah chauh chu ni ila sawitur a ngah leh viau ang. Debbie a awm ve a, an chhungkaw chanchin chu a sawi tam lo mai a ni. Mahse keichuan ka fa hian pa hmangaihna a dawng ve dawn tih ka chiang a ni. A pian hma aţangin hmuh hlan a nghakhlel em a, anu hnen aţang bak a a dawn ngai miah loh, nu leh pa hmangaihna dawn tir a chak em em tawh. Mason-a ngaihdan hi ka fa lo piang tur hian a thlakthleng ngei ang.




"Min nghak rei em?" lu thin pah in ka nui seih a, a office a luh aiin pawnlam a lo nghah ka duh zawk. Tu office ah mah ka lut duh tawh lo. Ka rilru tibuai turin ka hriat duh loh ka hriat phah ţhin a, ka hmuh duh miah loh ka hmuh phah ţhin. Ka rilru a buai hian naute hian ka tawrh ve ka hlau ţhin. Tun ah chuan keimah chauh ka ni tawh lo. Naute hi tun aţanga ţha tak a ka enkawl a, hmangaihna tam tak pek ngei ka duh.


"I nuamsam lo em ni?" a ti leh a, an in pui a kal hi ka huphurh em em reng mai a nih hi. Kulh thim mup, lungngaihna in a hual khup chhung a lut ang mai ka ni ţhin.
"Ka ţha" a kut ka vuan a, zawi te a then chung in a thlamuan nan ka nui leh a, "Tunah chuan ka hlauhna pawh a nep tawh" kan kut then reng chung in ka ti leh a, ka zam deuh hian ka kut a che sek zel hrim hrim.
"Hlauh khan awmzia nei lo. Hlau miah lo a beihlet hian awmzia a nei thui zawk. Kan inpui leh ka pu hian min tihlau tawh lo a, ka nupui leh ka fa chan ka hlau ber tawh zawk" hospital ah la awm reng lo ila chu ka kuah ngei ngei ang. Min haw ţhin tu khan min chan a hlau tawh a, naute hian a pian hma aţang in vanneihna min siamsak ta zawk a nih hi. Apa ngei in min ngainat lehzual phah si a.




An inkawt ah kan ding dat a, infuih tawn na ni awm tak in awmze nei deuh in kan in en a, ka sam rawn chul in ka biang ah dim te in a dawm leh a, ka chal ah min fawp zui leh zat bawk.
"I lut hreh anih chuan ka haw pui leh ang che" a mitmeng a min ngaihsakna ka hmuh chuan ka pasal tan hian ka pawimawh ve em em tawh a ni tih ka hriatbelh leh a, "Ni lo ve. Ka thup nasa viau chung pawh a ka zam zia i hmuh theih chat tawh na hian min ti lawm ngei mai. Zam viau mah ila i awm chuan ka hmachhawn vek thei" ka ti duah a, gate chhung ah car a rawn tlan luh leh tak avang in kei pawh ka chhuk a, ka pasal in a dahţhat chhung chu step bulah ka lo ding a, rawn tlan lut ve chu Mason ngei a ni tih ka hmuchiang ta.


Ka zawn ah rawn ding in glass a tihniam a, rawn dakchhuak in thutak deuh in "Debbie hnen aţangin ka fanu in a tihhlim ţhin zia che ka lo hria a" a ti a, ngaipawimawh lo awm fahran in ka dar ka lo san ak a, hmun dang ka hawisan ta daih a.
"Hospital lam ah hian ka mimal nun phawrhchhuah ka duhlo tih min lo hriatsak tawh dawn nia"
"Hmeichhiate infiam nan a i hmang ţhin hi bansan la, i mimal nun chu a him ang"
"Ka mimal nun aimah in Hospital a i pasal dinhmun hi a derthawng tawh zawk" ngeiawm taka a nuih hnu ah glass a tiphui a, a thilsawi awmzia zawhchian tum a auh zui ka tum laiin Matthew a rawn thleng chawpchilh ve nghal a, "Lawk in, Mason kha" ti a phili ruai chungin umzui ka tum leh a, Matthew chuan min lo dawm bet in "Tumah um lo la, tu thuhnuai ah mah awm suh. Hmangaihna lo chu kan chunga thuneitu an awm tur a nilo" a ti nghut a, "Hmangaihna maw?" step a a pen chho tawh chu ka la din reng vang in a rawn leh hawi a, "Mak ti viau duh suh. In hmangaih tawn tak chhungkua neih chak tak hian a chhungkaw kaihruaitu atan hmangaihna a thlang ve a ni mai" a kut a rawn dahchhuah lo vawn pah in "Pathian a pawimawh zawk lo em ni?" tiin ka la zawt tho.
"Pathian chu hmangaihna a ni lawm ni?" min zawt let veleh a, sawifiah dan chiah ka thiam lo. Ţawngţai te a chin thar leh hun ah ala hrethiam ve mai ang. Keipawh in nitin in ka hrilh ve thei ang chu. Pathian hrelo chhungkua awhawm an awm ngailo a, an tawpna a hlim awm ngai hek lo.


"Anu" hlimna avanga au khek tuarh tuarh leh tlan ri dat dat in a zui zat. A ban tetakte phar hiang chung a ka lam pana Sandra alo tlan lai chuan ka lo ţhuhniam a, chhungkaw buaina leh anu leh pa inţhen chungchang hre miah lo in hlim tak in ala nui thei a, ka lainat lutuk chu ka bul alo thlen rual a ka lo pawm beh chiah chuan ka mittui hnam tawh sa chu a luang chhuak a, Sandra awm na lama min hliah tur in Matthew kha lo ţhu ve nghal lo sela chuan midang ngaih ka ti ţha lo ngei ang. Anu awm loh tak hnu a kan inhmuh leh aţangin 'nu' tiin min ko a, a ţawngtam lutuk lo na a harhvang tak a ni reuh a, a ngainatawm in an lakhran chiah hian ka ngai zui vawng vawng ţhin.


"Min kuah ve dawn lo mi?" a ban tawi te a ka nghawng a la kuah reng chunga Matthew en pah in a lu a thing a, a nui ver ver bawk a, a sam kir chiat hian a ti duhawm lehzual. Matthew tum der vel chu keimah bawk in lo hmuthei lo leh in a chal ah ka nem a, "Tikhan awm vel suh" ka ti hmuk a, a nuih a za kher mai.
"Naute kan neih hun ah phei chuan min ten dawn anih hi"
"Tenawm loh tawk lek a nau lawm dan a awm ve a" ka mittui luan na hnu vel a kut a min rawn tihfai sak pah in "Lut phei phawt ang. Kha kha chu kan pahnih chauh a sawi chi" a tih pah in Sandra a kawk a, a hrethiam ve awm tawp silo.


Sandra pawm mai ka tum chu ka pasal bawk hian min lo dang leh tawh.
"A rit tawh si. Ţhutthleng pangai a i ţhut hun ah duh leh i pawm dawn nia" a ti leh bur tawh a, Sandra duhlo chungin aman a pawm lui daih. Min rawn ban a, a kut lo vawnsak in an bulah ka kal a, living room lam ah kan inzui phei a, ka pu thleng in an lo ţhu ţhap lehnghal.


"Emma i hrisel zel em? I thil ei a tui tawh em?" ka nu in a lo ti zung zung a, hunkhirh lutuk pawh a ti ziaawm deuh.
"Aw eithei tawh lutuk. Kan hrisel" tiin nuih sang pah in naute chanchin ka sawi tel a, Sandra pawh ka malchung ah a ţhu leh vang tawh.


"Matthew hna lampang a tluang em?" ka pu in a rawn ti veleh a, ka pu awm hi chuan boruak a uap tlat zel.
"Tluang e. Buaina a awm lo"
"Mason hi Delhi a let leh a tum a, Sandra hi in awmpui rih thei angem? Chumi sawitur chuan ka rawn sawmtir cheu a" a ţawng nem ve lutuk chu a awihawm loh zawk. Thil lian tham tak min tih tir a duh vang a ni ngei ang.


"Baby pawh Delhi ah a awm a, hruai sela, an inkar pawh an siamţha leh thei zawk ang" tiin Matthew-an alo hnial a, ka ngaihdan ve chiah a ni.
"Thil siamţhat nan a ţangkai lo ber chu naupang an ni" kan ţhutna lam a rawnphei mek pah in Mason chuan a rawn ti veleh a, hetianga an inhnial hi alawm ka nin em em ţhin.



"In fanu hi in ngaihsak lo. A puitlin hun ah ala haw mai ang che u"
"Anu ngei pawn a ngaihsak loh chuan ka lo ngaihsak nachhan tur ka hre biklo"
"Nunrawng" tii ka lo phun sap a, an hrepha vek a ni ngei ang min en ţhap mai. Mason chuan a nui hmel ngeiawm tak la pu reng chung in "Mo fel tak kan nei a, a hna bansan pawn a enkawl duh ang chu" a ti leh a, ka lo run ngei mai. Ka pu in "Ni e.. Emma hian nau a pai tho bawk a, chawlh hahdam pah in a ţha viau ang chu" ti a a rawn tuihnih leh phei chuan ankhum phiar phiar ka chak a, ka hlauhna in min insumtir zawk.


"Damlo chung pawn hna ngaipawimawh in a thawk lui a, Sandra vang ngawt in kan bansan tir thei lo ang"
"Sandra hian min ngaina ve thei mang lo a, i nupui lo hi chu awmpui thei an awm lo" ka nu lehzel pawn a ti veleh tawh. Sandra ka en a, amah duhlo in puitling zawk ten kan inhnawn kual reng chu hrethiam lo in a ţawng a piang a enkual zak zak a, ka lainat khawp mai.


"Emma i tlawmngai thei mai angem?"
"Mason hian hruai rawh se" luhlul takin ka lo ti veleh a, hna bansan a ngaih phei chuan ka tlawmngai duh bik lo.
"Sandra hi i awmpui duh lo anih chuan hospital ah hian i thawk zawm thei lo ang"
"Ka pa" Matthew chuan a rawn ti vin ţhak a, ka pa hi ţawngtlem tak, midangte thusawi hnial mang lo chi ania, a thusawi kha tu tan pawh awih a har in ka ring.


"Sandra hi i enkawl anih chuan i nau neih zawh ah naute lakhran theih hun ah i duh leh i thawk leh dawn nia. Thil harsa a nilo. Sandra hian i bul tluka nuamtih na a neilo. Apa ngei ai pawn a ngaina che a, i hnial theilo ang" a thusawi chu a lamfiah in a nghet charh a, hnial ngam an awm pawh ka rin loh laiin Matthew bawk in "Emma hi in zahlo hlawm khawp mai. Eng ah nge in in ngaih? Emma aia ropui viau ah in in ngai em ni?" ala ti khur khur a, khap tum in a ruk in a kawr ah ka pawt a, ka pa leh ka pu an thinrim hmel nasa tawh mai bawk nen, thil pawi zawk a thlen ka hlau.


"I nupui chu kan fanu ve tho a ni. Kan ngamtlak a, buaina kan tawk a, min pui tur in kan ngen a nih kha"
"I fanu chu a hna aţanga bantir in nau i awmtir ang maw? Hepa fanu lehnghal hi" vin tak a ti chung in Mason a kawk a, Mason chu a lo la nui thei. A hmai ah tak ben pawp ka chak khawp mai.


"I thu lakdan kha a diklo. I unaupa fanu chu tihtur dang an neih chhung chu in lo enkawl mai tur a ni" ka pa pawn a awki a san ve tawh, ka nu chu mangang takin ka en a, keimah ang tho in a chiai ve tih ka hmuh chuan ka mangang lehzual.
"Zan rei a party a kal, hmeichhe kawp leh ruih bak tih tur a nei lo. Ka pa khawngaihin kan nupa hian thawk lak na hun min siam ve rawh u" a ţawng tawp lam chu a chuai raih a, a chauh hmel in a thil ngen chu a tih tak tak zia a lang bawk.


"Anu damlo enkawl tur in Delhi ah a let dawn. Damlo enkawl leh a nupui nen a an inkar siamţha tur a akal chhung chuan Emma hian Sandra awmpui rawh se. Phun nawi tawh suh u" ka pu in thupe aw tak a a tih chuan a reh ta tlawk tlawk a, thil ei ho hma in hetianga in hauhna hi a thleng ziah a, hlim tlang tak a ei ho kan nei ngai lo.


"A thawmhnaw ka han siam ang" tiin ka nu a tlanchhia a, kan boruak ipik tak chu a zo lo a ni. Keichu kalsan ka tum lo, ka pasal in ka thlavang a hauh vang in in hauhna a thleng a, sawi ngam nei ve lo mah ila a bula lo awm ve ka duh.


"In fanu hi in hmangaih miah lo. Hmangaih ula chuan hetiang hian midang kut ah in dah hauh lo ang"

"Baby khan la let leh tur a a rawn dah iring em ni? Baby in a hnutchhiat tawh hnu a duhtawh ngai lo" Matthew chu ngawi tawh se ka duh. Mason hian ka pu leh ka pa rilru a hneh zawk dawn tho tho. Sawibuai mahse Sandra hi kan kut ah a awm tho tho dawn. Ka hna aţang pawn ka bang dawn tho tho.


"Pi Sangi bulah awm sela, Emma hian a hna chawlhsan suh se"
"Hospital a thuneitu zing ah kan la tel ve tih hria ang che" tiin Matthew an la hnial tho a, a hriat phak tur lek in ngawi tawh tur in ka hrilh a, min huat lai a a thinrim ţhin lai ai khan tun ah hian a hlauhawm daih zawk. A hmachhawn tu ho hian an hlau lo mai mai zawk.


Ka nu chu suitcase leh bag lian tak keng in a lo chhuk a, kan nupa a min hrethiam tu awmchhun in tih theih a nei lo lutuk hi a pawi a nih hi. Kan ţhutna bulah a rawn nghat a "Thun loh ka nei ţeuh a, nidang ah Matthew hian rawn lam leh mai rawh se" a ti sep a, ani pawh a ngui nghiai mai.


Matthew lo chu thildang sawiin an ti ti chhunzawm a, thil pawh kan ei tlai. Ka rinlawk ang ngeiin kan eitui lo tlang a, Matthew phei chu ei lo ang vel a ni. A mawi ah reilote a ţhu ve a, a inthiarfihlim leh vat. Kan ei zawh hnu ah Matthew bawk in haw a rawt vat a, midang ngaichang miah lo in Sandra bungrua keng in a chhuak nul nul a, ka nu in a umzui dawr dawr bawk.


Sandra chu ka pu leh ka pa chuan an mangţha a, ka pa zawk chuan thupha a chawi leh a, hna chungchang erawh a sawilang lo. Mason chuan a fanu thlahna thusawi a nei lo. A kalbo thut tur thu hi a sawi lawk lo a, Matthew ngei pawn a hrelawk miah lo a nih kha. Hetiang alo nih vang anih hi vawin ah hnathawk miah lo a a awm. Debbie kha engvanga fawp nge a nih ka hrelo a, Debbie lungngaih chhan pawh ka hre chuang lo, rindan ngaihtuah kual mai bak chu sawifak tur ka nei miah lo.


Pawn a ka chhuah ve veleh ka nu in "Mason a kalbo chuan Matthew tan hospital neihna hun ţha ania, chuvang chuan ipa hi ring ula, a thu awih phawt rawh u" min lo ti a, ani pawn Sandra chu fawp in a mangţha a, a bungrua te car a an hlan luh hnu ah keipawh Sandra pawm in ka ţhulut a, ka nu a la ding reng a, min lainat hmel khawp mai.
"Ka nu min rawn tlawh zeuh zeuh dawn nia aw"
"Awle. In ei duh ang apiang ka rawnkeng ţhin ang. In enkawl uluk rawh aw" tiin min thlah liam a.



"Hetiang chhungkua a i mo hi pawi ka tihpui khawp mai che" ka pasal lam ka hawi a, alo la in sehruh nasa viau.
"Chhungkaw hausa tlakchham neilo hlimna leh hmangaihna tlachham tak si. Naupang ţhanlen nan a duhawm hlawl loh. Sandra kan bula a awm hi a ţha zawk tur ah ngai ang" tih pah in Sandra sam ah ka chul a, naupang harhvang tak si an in hauh vak hnu kha chuan ka malchung aţangin a chhuk duh miah lo a, kan kal dawn a apa a ngen miah lo te kha thil mak a ni.


"Hospital dang a i thawh duh chuan ka ngaihtuahpui ang che"
"A ngai lo. Nu leh pa thu hi zawm phawt ila, rilru kan neih ran a ngai thung ang" tiin ka fuih a, tumah hi rintlak an awm lo.

"Kan tum ai hma in fa kan nei anih hi" ka tih laiin "Kan fa anih loh kha" alo bung nghut a, ka ngei zawng tak.
"Anu leh paten an kalsan a, keini lo nu leh pa a nei rih chuang lo. Mason i huat na kha a fanu lak ah hian hrithla miah suh"
"Chutiang mi ka ni lo. Sandra ka huat loh zia i hria"
"Anih a hnu kan awmpui chhung chu i fanu ang in en hle hle la anih chu" ka ti ve hmak a, in hauh vak hian awmzia a nei tam lo.

"Ka tih hrehawm ţhin na che i tuarchhuak zo chiah a, tun ah kan chhungkua vang bawk in i hna i chawlhsan a ngai leh a, kan inneihna hian i hlimna zawng zawng a laksak che anih ber hi" a ti ve duah mai. Ka lak ah a inthlahrung tih a hriat reng. Sandra a hmangaih tho si, ka mitmei a veng bawk si vel a nih duh hmel. Matthew hi a rilru a chhe miah lo ka tih tawh kha.

"Ka pasal in hahdamna min pe tawh a, thildang chu ka tuar ve mai ang chu"
"Ka lawm e"
"Eng ber ah?"
"Engkim ah" ka nui hak a, Sandra nui ri in a chhunzawm a, engvanga lo nui ve nge a nih ka hrelo. Boruak a ipik rei em a, ka nui ri chuan a ti thlamuang ve a ni mahna.

"Mason-a nu chu a damlo tak tak ami?" ka hrechhuak leh thut. Mason phei kha chuan a thi tawh tiin min hrilh tak.
"Ka hrelo. A damlo lo ang. Ngaihsak suh, kha i fanu leh i pasal chauh hi ngaihtuah rawh" a ti fiamthu a, "Ka tum ai hma in chhungkua ka din dawn anih hi" a ti veleh ta tho.
"Hmangaihna lo chu kan chhungkaw chunga thuneitu an awm tur a nilo" a thusawi tawh hnu ka lo sawichhawn veleh chuan a nuichhuak hawk a,
"Tihluihna hmanga ka thil neih tawh a ka neih hlen duh awmchhun i ni" a ti sup a, kan in kan thlen dawn meuh chuan kan boruak a zangkhai tawh khawp mai. Sandra ka fawp zeuh a, i nau lo piang tur ang chiah hian kan nupa kar a hlimna thlen tu ni mawlh ang che ka ti rilru pah bawk. Mason a awm tawh dawn lo a, kan chhungkua hi hlimna in min hmuak ve tawh hram rawh se.



CONT...

---

FORCED MARRIAGE-16



February thla a ni leh tawh a, khua ala vawt vin tak mai. Sandra kum 4 tlin na pawh kan chhungkua leh api sawm in kan lawm zo chiah a ni. Ka pum a lian tawh hle a, nau ka nei har tawh lo ang. Pum puar lian deuh chunga kawrlum hak ve ngai tho ţhin bawk nen ka chhe thei viau in ka ring. A vawh zual chang in a lum ţha ţha ka lo duh ve bawk a, min ti lian lehzual. Matthew pawn cher min ti tawh bik lo.


Hna kha ka bansan ngei a, thawk leh dawn pawh ni ila a ngai ah chuan ka hreh. Debbie ngai viau mah ila Irene hi ka ngaihtuah ringawt pawn ka awm a ti nuam lo a, thawh ho leh a inhmuh leh reng kha ka peihtawh lo. Mason pawn thawm a rawn nei miah lo a, Baby erawh chuan Sandra a rawn be reng ţhin. A fanu chu a rawn ngaihtuah ve a, rawn lam a tum thu erawh a sawi ri ngai lo. A rawn be tawp a, Sandra lah hian anu leh pate a lam ngai miah lo bawk a, kan bul ah hian a thlamuang em em a ni tawp.


Matthew hnathawk a lo la haw lo a, Sandra nen hian nitin kawtlai ah alo haw hun kan lo nghak ţhin. Thlasik a ni chung pawh hian kan la bansan chuang lo. Kawtzawl a ţhutna tur a kan siam ah ţhu in Sandra infiam lai ka thlir a, thli thaw chu nasa vak lo mahse boruak a ti vawt zual pha tho. Kawrlum chung a ka puan lum bah chu ka ţhamkhawm a, Sandra lah chu vawt hre ve lo ang maiin a tlankual zak zak reng bawk a, hnathawk lo a hetiang a awm tawp chu a khawharthlak chang a tam khawp mai. Sandra hian min ti hlim zawk a, an rawn lak hun ah chuan ka khua a har viau ang.


"Sandra lokal tawh rawh. I bal vek ang" ti a ka koh chuan hnial miah lo in ka ţhutna lam ah a rawn tlanphei a, a hmel hlim sarh leh a rawn tlanpelh tak pangpar mawi tak te chu an in rem khawp mai. Ka awm na a rawn thlen dawn ah ama ke bawk pal in a tlu bawk thlawp a, a ţap uar kher lehnghal.
"Ilo thlen teuh tawh nen, ava pawi ve" tih pah in ka kaitho a, ka pawm zui zat bawk.


Matthew kan la nghah miau vang in pawn ah bawk ka ţhutpui a, naute pawm a pawm in a ke leh kut vel te ka enkual a, grass chunga tlu a ni bawk a, hliam a nei hran lo. Ka puan sinlai in ka tuam hlun a, ala ţap hluam hluam lehnghal.
"Khatiang kha keipawh hian ka haw lutuk alawm. Ka tlu ziah a, a na thei si" ka tih chuan min en ha a, "Mahse keichu ka ţap ngai lo. Ka ţah chuan ka chak loh vang a ni dawn sia" ka thilsawi chu a hrethiam kilh kelh lo maithei, a ţap a bang ringawt pawh hi lawmna tham a tling.
"Ka tluk pawn a hma aia chak zawk in ka tho leh ţhin" ka tih lai a a hrilhhai hmel ka hmuh chuan ka nui hak a, "I nau tur hi i hmuchak tawh em?" tiin ka zawt ta ringawt a, phur tak in a bu nghat nghat a, a hma lawk a thilthleng kha theihnghilh in a nui leh sen sen tawh.


Motor thawm kan hriat chuan gate ka en nghal a, Sandra pawn ka khuhna aţanga in hai hawng in a rawn bih ve ţawk ţawk. Car a rawn tlanlut a, Matthew ngei a ni. Kan nghakchhuak leh ta a nih hi. Sandra chu lo che ve sawk sawk in ka malchung aţangin a chhuk a, Matthew a lokal a, a rawn pawm hun a nghak ţhin.
"Apa" a ti tuarh a, Matthew chu rawn dakchhuak in a ban a vai a, hetianga a koh hian a tir ah kha chuan a lawm lo hle a nih kha. Hun a rei a ngaiah a nei ve mai bawk a.


A rawn chhuk a, amah chiah hmuh kan lo beisei laiin Irene pawh a tel. Lo hmu hma tur in ka lo enchiang tawk lo a ni. Nidang ang bawk in ka en liam puat a, Irene kan mikhual dawn tih ka lo hrelo a ni. Nidang ah chuan Sandra a pawm hma in min kuah in min be hmasa phawt ţhin a, tun ţum chu min ngaihsak hauh lo. Sandra a pawm a, in pan na step a zawh chhoh pui a, an hnung ah Irene nen kan zui. A awmdan chu ka ngei ru riau, Irene awm ve vang ah ka ngai hmiah a, a dik ngei bawk ang.


"Matthew inchhung chu ka cheitir ang ang che khan ilo la dah alaw?" Irene chuan a ti lut a, a vawikhat hmuhna ni ang hrim in a hawikual ruai bawk.
"Thlak danglam kan duh a, naute neih zawh lam ah aniang" tiin keiman ka lo chhang. Kan inneih hlim a Matthew-a rui in inchhung a suasam chiam khan tam tak chu kan thlak ngei a, thlak loh ala tam mah zawk. Irene duh ang in an lo siam tih pawh tun ah ka hre chiah.


"Ka han inthlak ang e. Lo inkawm ru" a ti daih lehnghal. Sandra a hruai a, Irene nen kan inpawh nan a min kalsan anih chuan a tisual khawp ang. Hetiang mi hi ka kawmnel theih ka ring lo. Min ngaina lo a, keipawn ka ngaina lo. Ka pasal nen a kan inţhen a duh a, keiin ţhen ka tum lo thung. Kan danglamna zawng zawng dah dun hian suihzawm luih chi kan ni lo tih chu a hriat mai.


In hlat tak ah kan ţhu a, min biak hma chu biak ka tum bik lo. Inchhung a la enkual nasa, ka hmu ru reng.
"Thlak danglam duh suh. Ka duh ang in ka thlak leh vat dawn tho a, buaina a tam mai mai" a tih chuan a ţhutna lam zawk ah ka hawiphei vat a, zamlo zet in min lo en ran.
"Mi pasal mai mai tan chuan i uihawm lutuk. I mawina te kha tlangval hnen ah pe zawk rawh. Matthew chu pa tak tak a ni ţep tawh" min tham lo zet in a nui a, a bawp khawkherh in inchhung hmun tin ah a mit a lenkual a, kan inchhung cheidan alo ngaihpawimawh ve vakna chhan tur a awm lo.


"Ka duhzawng chu neih ngei ka tum ţhin. Harsa chung chung pawh in ka beidawnsan ngai lo. Matthew phei chu thildang zawng zawng aia neihlet awlsam tur a ni lehnghal" hna ka bansan hnu a Irene ka hmuh leh na hmasaber ani. A tih ziah dan in tun ah pawh min ti thinrim lehpek khawp mai. Tuman min chimbuai loh a, an rawn tel ve loh hian kan hlim daih zawk. Irene ka hmuh apiang hian hmeichhe nasa tak tak an awm ve tih ka hrechhuak leh ţhin.


"Mi pasal iduh tlat mai hi a mak ngawt mai"
"Ka duhlai takin tihluihna hmangin midang daih pasal ah a ţan phah zawk a nih kha. Matthew leh kei hian nangmah vang hian kan tuar nasa sin" a ti zuai raih a, min vin lo chu mak ka ti zawk. Matthew a hlau ve pawh a ni maithei. Ka pasal lakah hian a ţha thei ang ber a lan ala duh tlat a, a vin ngam lo aniang.


"Ka duhreng vang a nei ka ni biklo. Mahse ka pasal leh naute pa a nih tak hnu hian hmangaihna a piang chawp mai. I duhzawng chu inei ţhin, i duhber ka pasal hi i neilet anih pawn nangchuan i duhzawng inei ang a, naute in pa a neilo thung ang. I hlim tho angem?" ti a ka zawh chuan nuih pah in alo bu nghat a, amah chiah a in ngaihtuah ţhin a ni tih kha ka lo theihnghilh leh tawh.
"Nu hmangaihna a dawng dawn tho a. Ka hrilh lawk che kha, a rei ang a, i inchhir telh telh ang ka tih kha" sawi mai tur ka hre tawh lo. Chu chu hria in a hawisang lehzual bawk. Hetianga a awm ngam a, min vau ngam a nih chuan tih hreh a nei miah lo ang.


Matthew leh Sandra an rawnlan veleh "Sandra hi ka la riahpui ve duh. Ka ngai ve thei em a, chubakah in in ah hian ka duh duh hunah ka kal ve thei bawk silo a" ti nem duai chungin Matthew a melh a, Matthew chuan min rawn en zawk a, ka hawisan ve hmak. A duh naah te chuan ka phalna a la ngai hleinem, Irene pawh a rawn hruai haw hi.


"Anu leh paten an hruai kual nasa tawh a, anu in inpui lam ah a dah a, Mason a awm loh hnu ah kan la leh a, hmun danga riahchhuah tir ka remti tawh lo" ati ta hlauh a, hawi tauh san mah ila rang lutuk in ka pasal chu ka en lehnghal. Ka awmdan a hmuh chuan a nui suk a, Irene ala awm vangin ka la nui ve duh chuang lo.

"Baby khan ka enkawl ve a phal tho a, ka buai vangin ka ngaihven hma thei lo a, bakah ka sawitawh ang khan in in ah hian ka kal reng theilo a" a ti leh tho. Irene luhlul zia hi ka hre ve telh telh tawh. Tlawm zawk a ţan a hreh em em bawk.
"I hmuh duh chuan Emma kha bia la, kei aiin Sandra a buaipui zawk a, Sandra chung ah thu a nei zawk daih. Emma khan a phal te chuan ihmuh duh hun ah kan in ah hian ikal mai dawnnia" Irene thinrim hmel chu Sandra pawh in a hmuh thiam ve ka ring. Matthew chu awm lo se min sawisa hrep lo ang tih pawh a sawitheih loh. Buaina neilo a kan chhungkua a kan awmna a rei tawh lutuk a, buaina kan tawh leh ka hlau ngawih ngawih tawh.


"Baby ka bia ang a, ka duh changa riahpui ve a phal chuan min hnial theilo ang" a ti ram hmak a, thu min pe a ang mah zawk. Ka ngaihdan a ni biklo a, ka ngawi thei tawh biklo chuan "Baby i biak khan awmzia a neilo. Anu a ni ngei a, mahse a enkawltu chu keimahni kan ni. Sandra kan ti thlabar ngun tawh lutuk. Tun ah hian a hlim a, a naupan hun chhung hi hetianga hlim leh thlamuang hian hmantir rawh u" ka ti duah a, Sandra a awm ve vangin ka vin lo mai mai. Puitling ho vang hian Sandra a khawngaihthlak rei tawh emai. Tuman an awmpui duhlo a, kan nupa kut ah an dah a, an hnawl tawh hnu anih vang hian an duh duh a an rawn tih ka phal bik lo a ni.


Thinrim tak a ding zawt pah in "Matthew in bia ang" a ti hrawk a, Matthew leh Sandra ngei pawh an hawi phawk khawp mai.
"I sawi tur chu hetah---"
"A fal in" chang tak in alo tih khalh leh a, Matthew chuan a lo hnial leh ka rin laiin Sandra a kuah na thlah in chhuat ah a dintir a, "Inu bulah va kal lawk rawh" a ti zui a. Sandra a rawnkal veleh a ding a, min melh eih lo in lehkhachhiar na pindan lam a pan nul nul. Irene pawn a zui nghal zat a, ka thinrim ţun mai.


"Nu a sual tiraw?" ti a Sandra in min zawh chuan a sual ka tih ve zia hrilh hrep mai ka duh a, mahse nungchang zir chho mek a nih vang in "Sual lo e. Thil pawimawh sawi tur a nei anih kha" ka ti daih thung. Midangte sualna lai hmuh hmaih tur leh an ţhatna chauh hmuh tum turin ka nu in min hrilh ţhin a, nau neih lam ka hnaih thleng pawh a ka pasal beisei lui tlat tu hi a ţhatna lai chauh ka hmu thei lo.


Midangte sual kan tih hma in keini pawh kan in en let ve aţha tih thleng in ka hria, mahse ka duh reng vang a Matthew hi chhuhsak ka nilo tih hi ka inhnem veleh na a ni.
"Ka rilţam e" tih pah a Sandra in a pum a chul kual lai ka hmuh chuan ka harhchhuak ve chauh. Keini tan pawh thil eiloh a hun tawh lo.
"Ka lo theihnghilh a, lo kalrawh thil ei ang"
"Apa"
"A duh hun ah eive mai rawh se" thla tam tak liam hnu ah vawikhat nan thil kan ei ruallo leh dawn anih hi. Kan ei rual ţhan vang in Sandra pawn a hrethiam lo deuh a, Irene vang bawk a ni leh tawh lehnghal.


Choka ah ka luhpui a, ţhutthleng ka pawhchhuah sak hnu ah amah in a ţhu a, a bula ka ţhut ve laiin Pi Sang in a thil siam ho a rawn chhawp a, "In leng an awm sia ka ko duhlo cheu anih kha. Irene khan a ei ve dawn em?"
"Ka hrelo. An inbiak zawh hunah ilo zawt dawnnia" ka ti hmuk a, a thil ei ţan hma in Sandra ţawngţaina ka chham pui a, a ţawngfiahloh zual lai chuan ka nuihpui nasa hle ţhin. Biakin ah te kan kal dun ţhin a, Matthew erawh chuan inkhawm pawh ala ngaihsak lo. Hospital chawikan zel hi a thil tum a nia, kartluan in hna a thawk a, chawlhni ah chuan biakin a kan kal hlan in alo hahchawl ţhin, a awmdan chu duhlo viau mah ila ka la sawisel lo.


"Irene chu a ei ve angem aw?" Pi Sangi chuan ala ti reng a, Pi Sangi hi a duat em a, min ngainat chen zet in Irene pawh hi a ngaina ang. Kei aiin a ngaina daih maithei bawk.
"Matthew nen thil pawimawh an la sawi a, an thawm i hriat veleh i zawt dawnnia"
"An naupanlai pawn chaw ei ţhulh ţhak hian an infiam ziah. Hemite hi chu an buaithlak a ni" ka chhang peihlo a, ka ngaithla zawm peihlo bawk. Ka ei sawk sawk a, Sandra kham rualin ka kham ve. Pi Sangi chet pawh nghak lo in Sandra chu keiman ka sil a, ngaihţhat lohna pawh nei lem lo in Pi Sangi chuan a tifel zui mawlh mawlh a, kan insilfai zawh ah Sandra kaiin pindan lam ka panpui daih. Irene min elhsen lai vel ka hmu peih tawh lo.


Chaw eikham chiah kan nih vang in room a kan awm hnu ah pawh Sandra chu muttir nghal lo in Sofa ah ţhutpuiin tv ka enpui a, a duhzawng en tur a awm hlauh bawk a, a ninhlei lo khawp mai. Room dang a a mut ngam tlat loh vangin kan bulah kan muttir a, khum hran ah a mu ngam lo hrim hrim zawk. A mut ve pawn zanlai ah a ţap ngei ngei. Min si chet a a mut hian a thlamuang ber in ka hria. Ka malchung ah a lu dah in sofa ah chuan tv en chungin a mu ar ar a, reilote ah a muhil leh vat tho ang.


Ka rin aiin Matthew a rawn let har a, Irene khan car a rawnkeng ve miah lo a, a thlah leh te te phawt ka ring. Sandra chu khum ah sawn chuang lo in a thawmhnaw ka thlak a, a menlai khan a nachang ka lo hrelo a, a mut hnu hi chuan a harsa lehzual. Nau neih ka hnaih tawh vang in ka duh ang in ka che zung zung thei tawh lo bawk nen, ka ning tawh lutuk hi neih thuai thuai ka duh tawh zawk.


"A muhil der a ni maw?" ka phu zawk a, ka insiamţha leh vat. A rawnlut thut chu makti awm pawn ka awm duh lo.
"Mutthilh loh a hun tawh loh hi" ka ti bung hmuk a, Sandra thawmhnaw hak hnu suktur zing a ka dah tur chu min lo laksak in amah zawk in bathroom bula bawm kan dah ah ava khung a, "Thil ei turin min lo nghak dawn maw ka tia"
"In tawm bo hun tur pawh hrelo in kan lo pawngpaw nghah thei hleinem che. Sandra a rilţam a, thil ei hun te chu hrezawk ta che" tih khar khar pah in ka melh hrawk a, ka beisei loh lutuk a a nui hmel ka hmuh te chuan min ti thinrim. Irene hi ka thik ţhin tih pawh ka pawm thlap tawh. Tupawh anni vek ang, pasal te beisei reng tu leh neihlet tum ţang ţang chu an hua in an thik ve tho ang.


"Min nuihzat ami? Min bum nasa lutuk a, i nuih ka ti za zo tawh anih dawn hi" tih pah in Sandra lu lam ah ka ţhu a, min nuihsawh niin ka hre tlat alawm.
"Sandra hi kan sawn daih ange aw i ţhut na palh ang" ti a Sandra a rawn pawm lai te pawh chuan min en zawk a, a nui leh ţhin a, Irene a zui vanga lo ngei sa tawh nen, tuna ka awmdan ang a lo awm ve tawh ang a, hrethiam tu pawh ka ngah viau ang.


"Sandra riahpui tih angreng vel kha a ruk deuhin in sawizawm ami?" tiin Sandra a mut ţhattir lai chuan ka lo zawt a, "Sandra chungchang ah chuan i thu ber ka tih tawh kha" puan a sin lum tir hnu a ka bula a rawn ţhut veleh ka pum a khawih zui zat. A tihdan ziah a ni hrim hrim. Sandra nen hian naute hi an be vak vak ţhin.
"Nang tal hi chuan engkim ah min ring rawh. Midang thusawi ngaithla ve suh"
"Irene khan midang thusawi awih in a ringhlel che tihna mi?" ka ti leh hram a, a thaw hrawk a, a ning tawh a ni.


"Irene hi ka ţhian bak a ni tawh lo" a ti nghut a, "Neih che ala tum tho alawm. I rawn hruai haw chhan pawh kha ka hrelo a, Irene nen hi chuan kan in mil ve thei ngai dawn lo tih i hria in ka ring" ka ti hmak hmak a, ka dar ah a ban dahkual in kan lu pawh a in si chial a, kan in ţhuthnaih leh mah mah tawh.
"Sandra hmuh lawk a duh a"
"Rawn hmuh zel a tum ta em?"
"Aw, a hmuh ringawt chu phalsak rawh. Baby nen hian an inkawm nasa ve ţhin a, ţhiante fanu chu a ngai ve ang"
"A ngaih tak tak te chuan khang thla liam ta chhung zawng zawng te pawh khan awm lo ang hmiah khan tawm bo tlat lo se la" tiin ka hnial leh ţalh a, Sandra kan lak tak dan chu sawi leh pawh a ngai tawh lo. Tuma duhloh nei ang mai kan ni.


"A hmuh zeuh zeuh ringawt chu a pawi lo ang. Riahchhuahpui lo sela" ka sawitawh kha, a duhzawng ah chuan ka ngaihdan hi a ngawipawimawh tawh lo. I thu ber min ti chung pawn a thu a min kaltir a tum leh tho hi.


"Kan in a a lokal reng te hi ka duh lo. Incheina thlengin a kawk kual ngam a"
"Irene hi kan thik deuh a ni tiraw?" a nui hawk a, kei erawh chu ka tum nasa viau ang.
"A chhelo alawm. A hmelţha a, a pian a nalh in doctor a ni bawk a" ka tih laiin "I nalh daih zawk" a ti sup a, ka awih lo nasa mai.


"Ka nalh loh hi. Ka pum a puar lung a, ka len lurh tawh hi" ka ti nang nang a, ka in en ringawt pawn lungawi har tih chang ka nei tawh.
"Pawnlam landan mai mai ah buai suh. I chhungril ka hrechiang a, ka hmangaih chhan che pawh a ni. Ngaihdam theih loh tur a ka rin ngaihdam i ngah tawh. I chhungril hi a sexy" a ti uang a, duhlo viau mah ila ka insum theilo ka nui veleh vak tawh. A thil sawifiah thiam ve dan te hi a mak bik ania.


"Irene nen chuan min kalh khum dun reng mahse ka phatsan lo ang che. Ka thlah phal tawh lo che. Ka thei tawh lo bawk a" a ti leh a, ka lawm leh ţan der tawh. Puah keh mai hlauhawm khawp khan ka thinrim a, tunah lah ka hlim leh veng veng tawh a, ka mak ve ngawt mai.
"Hetianga a umzui reng che chuan thil ţhalo deuh pawh a thleng thei sin"
"Thleng lo ang. Min ring rawh. Ka hmangaih zia che a hria. Hospital chang thei tur a beih hi ka tum tawh lo a"
"Eng nga?" ka ti tuarh a, a thawhrim vanga hospital a kan thil neih zawng zawng te hi keichuan kalsan lo turin ka duh.


"Thianghlim leh dik tak a thiltih hi engtikahmah a awm dawn lo. Midangte phiar ru thiam apiang in kan hospital ka lo tih ve ţhin hi chu an chang ang. Ka inhnukdawk anga, hospital dang ah ka insawn ang. Kan chhungkua pawh kan zalen zawk in ka ring" a sawizawh chuan a reh tlawk tlawk a, a duhthlan na ka zahsak rual in hospital hi nei ngei se ka duhpui. Ka duham vang leh pawisa ka duh vang a nilo, hospital aţanga hlawkna lo lut zat pawh ka hriatpui lo mahse a thawhrim tawh na zawng zawng te kha a fate chauh in a zarzo se ka duh. Hnathawh aia nawmchen ngaipawimawh zawkte hian ka pasal thawhrimna zar an zo tur ka duh lo.


"In hnuhdawh iduh ngai miah silo a, thil duhawm loh thleng a awm mi?"
"Aih. Lo hlauthawng duh suh. Inchuh buai reng ka nin vang anih hi. Diktak a in el in a ţha ber in chang dawn ila chuan ka la chuh ve ang a, tunah chuan doctor thiam leh thawkrim nih hian awmzia a nei tawh lo. Pawisa hian engkim a tithei. Pawisa tam tak hian mi ţhenkhat chhia leh ţha hriatna a tihbo sak vek thei a, dikna tellohna chu a dingchang rei ngai lo. Hospital hi a tlukchhiat hma a chhuahsan ka duh" a ti duah a, ka la pawmthei lo fo chuan "A tlukchhiat loh nan beilet ta che" ka ti leh a, hna ka kal ngailoh vangin chanchin ka hrelo hle.


"Keimah chiah chuan ka hneh dawn lo. Kan hospital hi chang dawn lo mah ila doctor ka la ni tho a, nang leh ka fate chu in rethei lo ang. Kan chhungkaw him zawk nan ka chhuahsan a ţha. In hnen ah hun ka hmang tam ve thei deuh tawh bawk ang a" tiin a eng lam zawng a thlir a tum a, amah pawh a hnual ve a ni tih a awmdan leh a awki ah ka hrevek tho. Naupanlai aţanga a rilruba lian ber ţhin an hospital changthei tu tur zing aţanga in hnuhdawh chu a harsa ve ngawt ang.


"I duh ang chuan ti rawh. I thuthlukna siam ang apiang sawisel lo in ka thlawp zawk ang che" ka ti ve thei ta a. Pawi ka tih rukna erawh a reh thei chuang lo.
"Thingtlanga awm i chak em?" tih te min zawt a, a mumal hlawl lo.
"Thingtlanga awm chu chakna chhan inei mi? Tlanbosan duh te inei mi?" hetianga muka kan ti ti dun lohna pawh a rei ta.


"Kan chhungkua a chimbuaitu awm lo a bulţan ţhat ka duh. I duhloh chuan ka tilui lo ang che. Sandra hi ka fanu ang maiin ka ngai tawh a, ka fate hian kan chhungkaw buaina ang hi hreve lo se ka duh" buaina a tawk a nih ka ring nghet hmiah tawh. Debbie ka bia ang tiin thuthlukna ka siam a.
"Mu phawt ila naktuk ah kan sawiţha dawn nia. Khawi hmun ah pawh awm ila ka pu hian a duh phawt chuan min tibuai reng dawn tho"
"Tibuai lo ang. Ka fate nen a inzawm na neihtir ka duhlo. An zahna tur mai mai a nih hi"
"Kan sawiţha dawn nia" ka ti nawn leh.


A kalsawn dawn ah ka hmui ah a fawp zeuh a, a mitmeng a dul lap a, a chauh hmel viau tawh. Khum lam a pan laiin intihfai tum ang in bathroom ah ka lut a, Debbie ka be ta daih a.


"Emma iva ngaihawm ve" a aw a zangkhai leh vah tawh a, Mason nen a ka hmuhdun kha sawifiahna ka hre dawn ta lo a nih hi.
"Debbie hospital lamah buaina a awm em? Matthew hian buaina a tawk em?" ka zawt tlang nghal rawt a, thildang sawina hun ka nei lo.
"Ala hrilh lo che mi? Nangpawn whatsapp vel aţangin i hreve lo mi?" a rawn tih chuan ka thin a phu nghal dawt dawt.
"Hre miah lo"
"Hei vang hi lawm hawizau ve rawh ka tih ţhin. Awm mawl tawp suh. Matthew chu a hmingchhiat em kha"
"Engtin maw?" ka ti hluai a, ţawngrin ka hlau ve tho bawk nen, min ţhawng khawp mai.


"Damlo pakhat a ngaihsak duhlo a, a thi zui bawk a an tia, whatsapp leh facebook ah chuan a tawngtu ni a insawi thusawi chhiar tur a tam ang. Keichuan ka awih vaklo a ka khawngaih tak tak a ni" ka mit sulh a, ka lum pup pup a, ka awmdan chiah pawh ka sawithiam lo.
"Min va hrilh har ve. Engmah thleng lo ang maiin asin kan bulah a awm"
"Nimin a thleng chiah ania, bakah i hriat daih tawh ka ring a, in buai awm sia ka tia rawn tihbuai cheu ka duhlo a"
"Ka hrelo reng reng. Thil mak deuh deuh a sawi a, ka ngaihţhalo in ka rawn bia che"
"Anih chu. Lo hnem char char rawh. Doctor ţhenkhat hi a lamţang an awm a, a thih laia nurse duty te pawn a ngaihsak reng tih an sawi. Thu leng vel a tam mai. Pathian ah in nghat tawp rawh u" a rawn ti a, kan bulah chuan a nui a, hlim awm takin a awm ve reng si.
"Debbie kan inbe leh dawn nia" tiin phone ka dah a. Ka van khawngaih em. Hetiang alo nih vang anih hi thingtlang lam a tawmbo daih alo duh ni.


Ka mut ve veleh min lo kuah a, min hrilh hma chuan sawichhuah ka tum lo. Ka hriatchhuah nawn tir leh mai mai dawn niin ka hria.
"Thingtlanga awm iduh chuan kan awm dawn nia. Keipawn khawpui hi ka ning a" ka ti sep a, a lam ka ţang tlat dawn tih hria se ka duh.
"Matthew nunthar i ţan rual in i nun ah Pathian la lut tel tawh rawh aw. Pathian tello chuan nun hian awmzia a neilo" tiin ka fuih a, min la chhang chuang lo mahse a in ngaihtuah nasat ve tho ka ring.


A hlawhtling ţhin ngei a, biakin ah akal ngai lo a, a ţawngţai ngai lo, hlawhtlin na kha a thawhrimna vanga nei ah a in ngai a, a chunga thuneitu chu Pathian tho a ni. Mihring siamţhat nan hian khawdur angai a, amah a hriat theihna hun Pathian in a siamsak a ni ngei ang. Pathian a belh tlat tawh chuan thudik a langchhuak ngei bawk ang. Pathian hian ka rinphak bak in thil a ti thei a, ţawngţai ngat ngat chung a lo nghah hi kan tih tur a ni.


"Ka hnen ah awn tlat la engkim ka hmachhawn thei ang"
"Ka kalsan lo ang che"
"Ka hmangaih che Emma"a tih chuan "Nangpawh ka hmangaih che" tiin ka lo chhang vat a.


(Ka damlo rei ve reuh lutuk a, ka type rei deuh hian ka luhai vak zel a, ka mit a thim bawk a, ka luak leh ţhin a, ka taksa a chaklo khawp mai, tun a mi pawh hi chawl zeuh zeuh chung a ka tih ania, mistake a awm nual maithei a, a tawi deuh maithei bawk. Min lo nghah ţang ţang ţhin vang in lawmthu ka sawi e, tunlai chu zantin ka lo dah theihloh pawn khawngaihtakin min lo hrethiam dawn nia. In chung ah ka lawm lutuk)


CONT...

---

FORCED MARRIAGE-17




"Ka kal dawn nia aw"
"Awle. I kal tawp ber na tur a ni tawh a, ţha deuh in aw" tih pah in ka kuah thuak a, ka pute ho hnen ah chanchin ala hrilh lo na a vawin bak hi hospital a kal leh a tum tawh lo.


"In pui ah ka kalkawi dawn a"
"Kalpui i ngai angem?" ka lo ti vat a, inpui lam a a kal dawn hi chuan ka ngaihtuah ţhin.
"Aih. Sandra a tel leh angai dawn a, boruak ţhalo lam hi hrefo lo se ka duh. In ah hian min lo nghak ula, min ngaihtuah suh u" a nuih te chuan tilui a ang tawh. A nuilui mai mai anih ka ring. In pui a kal hi kan huphurh em em zel a, vawin aţangin hospital a kal tawh loh a tum bawk a, hlim taka han nuihna chhan tur a neilo em a ni.


"Ka lo ţawngţaipui ang che" ka ti ta ngawt a. Ka dar ah a a kuah a, room aţanga kan chhuah laiin "Ka mamawh lai ber a ni ngei ang" a ti ve sup a, mangan tawp ah hi chuan Pathian ah bawk kan tlulut leh ţhin anih hi.


"I dikna hi hailan ve itum lo em ni?"
"Ka tum nasat pauh leh ka buai zual zawk ang. Thudik chu amahin rawn lang rawh se"
"Hetiang hi chu a hlimchhawn ah an sawi sup sup a, thinrim in an ang bawrh bawrh a, a reh leh vat duh. Hailan itum loh chuan thudik a lanchhuah hma in a reh leh ngei ang"
"Kan hospital chhuahsan hi ka duh ber a ni rih" kawtlai kan thlen tak avangin "Ka lo haw har lo ang" a tih zawm zat a. A liam thleng in ka thlir zui a, a fel ve tehlul nen haw tu leh buaina a hnuh luh tum tu a nei reng hi a hahthlak khawp mai. Kan inneih hma a kan thawh ho lai khan ka lo hrechiang ngai lo a, a nun hi nuam taka hmang tur ah ka lo ngai ţhin a, a nun buaichuar zia ka lo hre ngai miah lo.


Inchhung ka luh a, ka ţhutfel veleh ka malchung ah Sandra a rawn bawk thlawp a, a khuh khek khek mai bawk a. Ka zangthal tir a, thawk harsa a tih hmel hle bawk. A mitmeng a sen ram a, a mittui a tling pam a, hetianga ala awm ngailoh vang hian ka chiai in ka mangang kher mai.
"Na inei em?" ka tih chuan a awm a khawih a, ka chulsak leh vel thul.
"Vawin aţang chuan pawn vawt ah awm tawh lo ila a ţha ang i hritlang dawn niang" ka ti leh ringawt a. Asthma a neih ngai awm ka hre silo a, a awmdan hi a mak khawp mai.


Thawk harsa ala tih hmel reng vangin ka ţhut ngil tir a, a mitmeng ah pawh a hlau tih a lang.
"Hahdam rawh, a reh vat ang, hlau miah suh" ka ti mawlh mawlh a, Matthew koh haw leh mai te ka duh rum rum tawh. Tih vak ngaihna ka hrelo a, Pi Sangin min rawn pui vat zawk a.
"Hospital ah kalpui mai dawn" ka ti hman tawh a, Pi Sangin "A reh dawn lawm hei. Matthew hrilh ngei ngei angai a nih hi. Nidang ah a awm leh chuan a buaithlak ang" a ti a, Sandra chuan min ngheng chial a, hei ai hian nasa se chuan ka buai chhe hman viau ang. A nasa vak lo hlauh zawk a, "Nidang ah hetiang hian a awm ngai miah silo a amak ngawt mai" ka ti nuah nuah a, a infiam a, a tlankual a, khawvawh laiin pawn lam ah kan awm fo a, tun hi hetianga ka hmuh vawikhatna a ni.


A zia deuh tawh bawk a ka pawm leh a, a zawi ve nguai mai.
"Kan mu daih dawn mi?" ka tih chuan a bu nghat a, a khuh leh ţhin a, a thaw a buai vak ka hlau ber mai. Damlo na tuar ka hmu fo a, Sandra ka hmuh kha chuan min ţhawn dan a dang in ka rilru a buai bik. Tunah khan reilote chiah a buai a, khami chhung pawh khan ka chiai nasat hman em kha.
"Matthew hi kan be duh angem? Emma"
"A ngai tawhlo ang. Inpui lamah kal a tum bawk nen, a rawn haw hun ah ka hrilh mai ang" ka ti leh ta zawk a.


Sandra ka mutpui a, a thaw a pangai chhoh hnu ah a muhil vat a, a hmai zartu a sam ţhenkhat chu ka huikiang a, a hmaivun mam han mai ka chulsak leh a, naupang duhawm leh hmelţha tak a ni. Kan hnen a a awm rei hnu phei hi chuan nitin hian ka hmuţha zual zel a ni ber. Nu leh pa a nei fuhlo hi a vanduai em a ni. Heng vang tak te hian ka hmangaih lehzual a, ka hnen a hahdam tak a awmtir reng hi ka thil duh ber a ni.


Ka pum ana riai riai a, saisir a ka mut rei vang leh Sandra ka pawm rei vang kha a nih ring in ka mu zangthal a, ka fimkhur vangin nachhawkna nazawng ka eingam lo bawk nen, tun ah pawh hetianga tawrh tawp mai hi ka duh a ni. Ka mut rem hnu pawh a ana ala reh chuan loh vang in ka chul a, ka khawihna ringawt te chu a na em em vek zel mai. Ultrasound result a lo chhar bak kha chu Matthew hi a dang ka hmuhtir leh tawh lo. Khami result ah khan phir ka pai tih ah khan an thai lo nge engmah hre awm in a awm lo a, ka naute hi hmuhvat ka duh a, a hmuh ruala ka pasal makti hmel pawh hmuh tel ka chak. Hmeichhia nise ka la ti tho mai.


A nat tial tial avanga ka mangang chuan ka mutna sir a ka phone dah ka ban a, hetiang em em hian ana ngai lo a, nau neih ka hnaih anih ka ring. Ka thlan a tla phang tawh mai. Ka phone hmet eng in Matthew ka call nghal a, a la lawk theilo lehnghal. Vawi thum vel ka tih nawn hnu ah "Emma" a rawn ti ve thei hram a.


"Lo haw rawh ka pum ana" ţawng pawh ka harsat vek in ka in hria.
"Inpui lam ka pan mek a, ka rawn let nghal"
"Inpui a min kalsan na hun anih loh hi" thinrim taka ka tih laiin "Ka kal dawn lo. Ka rawn let. Ana viau em? I chesual a mi? Nge i nau nei tur zawk? Ka rawn thleng harlo ang" hlauthawng aw takin a rawn ti ve thung. Phone ka dah a, ka pum a nat meuh chuan hlauh ka ngah khawp mai.





MATTHEW'S POV


Naute chu kut ke kim in a piang angem? Emma hian harsatna tawk lo in ţha tak in a nei thei angem? A na dawn tih ka hria, ka nupuiin nau a neih lai meuh chuan ţha taka engkim a kal theih nan leh a na a tawrhchhuah theih nan ka ţawngţai ve hial.


Kan hospital a kalpui lo in hmundang ah nau nei turin ka hruai a, ka nu leh Debbie nen kan nghak ran bawk. Ka nghakhlel leh mangang chu ka vei tawn sek a, ka bula hmeichhe pahnih awm ve te chuan min nuih leh zauh ţhin. Ka phone ri reng pawh ka ngaihsak thei lo. Emma leh naute in ka rilru zawng zawng an pawt peng a, thildang ka ngaihven hman lo. Mahse ka nu in alo ngaimawh nge "A pawimawh aniang, chhuak la va be lawk rawh" a ti ta nge nge.


Hunlo lutuk ti a phun hluk chungin ka chhuak a, min rawn be tu pawh enchiang mang lo in "Hello?" ka ti bung nghut a.
"I zalen thei dawn ta anih hi Matthew" rawn ti tu chu Irene bak a nilo.
"He hmun hi ka nupui fanaute hruaiin ka chhuahsan anga, ka zalen a ni mai"
"I thutiam ah i ding ngei tur a ni. Fa ineih veleh Emma kalsan in kei hi min nei ang. I thutiam ah i ding lo anih chuan in chhungkua in buai viau ang" tiin min rawn vau a, ka hlau lem lo. Chhungkaw in hmangaih tak te chu tu tihchhiat theih mah an ni lo.


"Fa ka neih veleh a i hnen a kal turin ka in tiam lo. Min lawmpui thei lo anih chuan ka ţhian pawh nila min rawn be tawh suh" ka tihlai chuan a nui hak hak a.
"Kum tam tak ilo hmangaih tawh ţhin aiin reilote chiah ila hriat kha i thlang zawk maw?"
"Ka nupui leh ka fa aia pawimawh dang an awm lo" min chhanlet leh hma in ka hmet tawp ta daih. Ka hlim ni tur a nia, boruak ţhalo ka mamawh rih lo.


Ka luh leh hnu ah Emma pawh ka hmu tawh. Irene vang in ka tlai hret a ni. Chau tak in a mu bam a, ka khawngaih khawp mai. Ka nu leh Debbie ten naute an pawm ve ve ka hmuh chuan mak ka ti khawp mai. Emma kut vuan chungin "Pakhat kha tu naute nge?" tiin ka nu ka zawt a, a nuih alo za nasa mai.
"Phir an nih hi" a tih chiah chuan ka ţhutna aţangin ka tho kang rang khawp mai. Chet nachang pawh ka hre lawk lo. Anmahni zawk chuan ka hnaih ah an rawn pawm a, an hmel ka hmu ve ta.


"Mipa ve ve" Debbie in nuisang in alo ti var a, muangchangin ka kut ka pharchhuak a, Debbie zawk chuan a pawmlai min lo pe vat a, an lian em em lo na a duhawm tak an ni. Ka pawmrual chiah chuan nasa takin ka hmangaih dawn a ni tih ka in hria. Ka nu in min si chet in pakhat zawk a rawn pawm ve bawk a, kan dah dun lai chuan ka khawhmuh a phe ruai a, lawm vang hian mittui alo hnai ve thei a nih hi. Mittui tlak erawh ka hlau khawp mai. Harsatna tam tak kan paltlang hnu ah ţha takin an lo piang a, eng in nge lo hmuak dawn kan hre silo. Nu leh pa hmangaihna erawh an dawng ngei ang.


Naute kan mut hnu ah thil ei turin ka nu leh Debbie in min chhuahsan a, keichu Emma khum bula chair ah ka ţhu. A sam ka chulsak lai chuan a rawn meng diar diar a, min hmuh rualin a nui sak bawk.
"A na em?"
"A hma chuan a na lutuk a, tun ah chuan ana tawh lo"
"I ti ţha khawp mai. Ka lawm e" ka tih hnu ah a chal ah ka fawp a, hmangaihna leh ngaihsakna te pawh a tel vek.


"Pathian hian thihna tur a a ruat chu nise damchhuak zo kan awm kher lo ang" tiin a nat dan a sawifiah leh a, ka hrethiam khawp mai. Phir a nei lehnghal.
"Phir an ni dawn tih ka hrelo a" ka tih chuan a lo nui leh a, "I hamhaih viau em?"
"Tehreng mai. Midang naute amaw ka tih kha" ka tih laiin Emma chhungte an rawn lang a, hrilh vat nachang kan lo hrelo chu an rawn vui khawp mai. Naute an hmu a, an phun nawi zui ta lem lo.


Phir te chu an fak kurchuai a, an hming tur erawh ka chhungte kut ah an dah hlauh thung. Naute dang kan neih leh hun ah a hming an sa ve thung ang. An thuthlukna anih chu. Reitak chhung an awm a, ka nu leh Debbie pawh an rawn let hman. An haw dawn ah ka nu in a thlah a, Debbie pawh an rualin a haw ve nghal.


Ka nu nen kan awmpui a, Emma leh phir te an muhil bawk nen tihtur a vang khawp mai.
"Ipa nen kan inneih laia Mafela nu in min rawn luahlan khan ka rilru na ka thi lo chauh a. Rilru lam doctor ka pan reng a, damdawi ka ei reng bawk a, reitak chhung i fahrah bawk. Irene hi i nun ah i lalut leh anih chuan Emma hi keimah ang chiah in a awm ve ang a, i fate an fahrah bawk ang. Hmeichhe fing tak thang a i awh loh nan fimkhur la, i hmangaihna neih zawng zawng kha i nupui leh fate tan chauh ni rawh se" ka nu in a ti dam dap a, khang hunlai ka ngaihtuah khan ka thinrim thar leh ţhin.


Mafele hruai hian Mafela nu hian ka pa a rawn luhkhung a, ka nu nen a innei reng chungin ka pa chuan fa dang alo nei a. Ka pu an tihlawm thiam avang leh khang hunlai khan ka pa in Mafela nu hi a thlan zawk vangin ka nu nen min hnawtchhuak a, pawisa min pek an tum chu la duh lo in ka nu nen rei tak chhung rethei tak in kan awm. Tuna kan in ah hian kan awmdun a, ka naupanlai chuan in ţha a ni ngai lo. A hmun a nawm em vang in Irene nen pawh khawlai ah kher kan infiam ţhin. Mason hi kum5 a nih in anu leh ka pa an inţhen a, ka pa hian ka nu a rawn beisei leh a, min tih fahrah a duhloh vang leh zirna ţha zawk ka neih theih nan ka nu hian a nei leh a, tun thleng hian ka pa hi a pawh tak tak thei tawh lo. Kan let leh chu ka pu in min lo lawm lo hle mai a, Mafela te unau an awm ve bawk nen. An unau khan a rukin thil a eitir ţhin a, hrehawm ka tih kha a duh ber. Eitur a dahbo tir vek ţhin a, ka nu hi min kuah in a ţap zawih zawih ţhin. Jail tang ang mai kan ni a, ka pu rorelna hnuai ah hrehawm tak in kan awm ţhin. In lam a ka awm aiin hostel a ka awm khan ka puar ţhin zawk. Irene hian min khawngaih a, eitur min pek ruk a ching a, nun ka nin vanga intihhlum ka tum changin min fuih in min chhanchhuak a, Irene hi ka tan a pawimawh khawp mai. Chhungkua ka din tawh dawn a, ka tan a hmeichhe pawimawh tak hian min lawmpui theilo anih chuan ka chhungte aiah amah hi ka paihchhuah a ngai a ni mai. Ka nun hrehawm tak ang kha ka faten an tawrh ve ka remti lovang.


"Ban ka tum a, ka nupui pawh kan hospital ah ka hruai duh loh hi. Ka inhnukdawk dawn" meng phar hra chungin a hawi phawk nasa hle mai.
"Ka nupui leh ka fate him nan ka tih ngei a ngai"
"I tlawm ta tihna em ni?" a ti sep a, ka thuthlukna chu mak a tiin a awihloh hmel kher mai.
"Ni mai teh se. Mualpho nawn leh ka duh tawh lo. Ka fate hriattur chanchin chhia neih ka duhlo"
"Khathil ti tu kha tunge niang? Engvanga chhui duhlo nge inih?"
"Ka hria anih chuan ka thinrim hian khua ka hmu dawn lo a, pawi ka khawih mai ang tih ka hlau a ni" ka ti nghut a, ka hna nuamtih ber thawk chak tawh miahlo a min siamtu hi ka haw em a ni.


"I lamţang kan tam alawm. Lungngai lo phawt la, hospital chungchang chu i ngaihtuah nawn leh dawn nia. Neih tum tlat la ka ti zawk ngawt mai. I fate tan ani lehzel a, ala hlu tial tial dawn. Ngun takin ngaihtuah la, awlsam takin thuthlukna siam suh" ka dar a dawm chungin a ding uaih a, haw a tum tawh a nih ka ring.


"Naktuk ah ka lokal leh dawn nia. Emma pawh a ţhat em hi. Phir te an ţha bawk a, awmrei a ngai miah lo ang" a ti a, a bag aţangin lehkhathem a rawn phawrh a, ka kut a min hmehbel chawt chawt hnu ah rang zet in a chhuak ta daih.


"Engchu ni maw?" tih pahin a inthlep ka pawt pharh a, Jason Lalrinhlu-a tih leh Damon Lalrinkim-a tih alo inziak a, phir te hming tur ah ka ngai hmiah. Tu zawk nge Jason? Tu hi nge Damon? A sawichiang lo bawk nen ka buai nuaih mai.


"Eng nge i ken vu vu a?" ti a Emma in min rawn zawh chuan "Ka nu mawle" ka lo ti nghut a, lehkha them chu ka entir zui a, ani pawn mak a ti ve tho.
"Kan zawhchian hun alo nghak ngeiin ka ring" a tih chuan ka phone ka phawrh a, zawhchian pawh ngailo in message alo vang tawh.

[Ka pawmlai zawk kha Damon ania, Debbie in a pawmtir che kha Jason]

A message rawn thawn Emma ka hmuhtir chuan alo nui hak a, ka nu pawh hi maksak tak a chet chang a ngah ngawt mai. Phir te mu chu ka en a, an dahsawn lo anih chuan a hming neitu chu ka hremai. Ka hre hrang reng thei angem tih erawh ka hre lo. Phir an nia, mipa ve ve an ni bawk nen, chhinchhiahna ka zawn ngei angai dawn a nih hi.


"Khawnge Sandra?"
"Pi Sangi bulah a awm, ngaihtuah suh nakinah kan be dawn nia, chawl vang vang phawt rawh"
"A naute hi a hmuve chak tawh awm mange. Sandra hian asthma a nei em?"
"Ka hremiah lo. Baby ka lo zawt ang" ka ti ţha ve mai a, asthma a neih awm ka hrelo. Ngaihven zui erawh a ngai ang.


"Ka nu in inhnuhdawh a remti chiah lo. Kan him nan a tih ngei ka duh thung"
"I thuthlukna ang apiang keichuan ka pawm vek. Min vengthawng suh" a ti zawi sep a, a chauh lai lai a ka buaina ka sawi ve sek hi thil ţha ber a ni hauh lo na a a hnen aţanga engemaw tal hriat ka duh.


"In hlim a in him ka duh ber. Ka fate tan a thil ţha hnutchhiah ka duh" ka nu thusawi a ka pawm lai tak a ni. Ka fate tan thil ţha ro tling ka hnutchhiah ngei tur a ni.
"Naupang hi en la, chakna an pe ngei ang che. Anni vang hian hnehna i chang daih thei. Min nawrkal tur a Pathian min pek an nih hi" a tih tak ah chuan ka nu duhdan a pawmpui zawk a ang. Ani pawn naupang tan a ţha tur a duh ber ang a, bansan turin min duhlo a nih hmel.


An muhil lai ka en a, Jason leh Damon, ka la hrehrang ve zel rih e. Ka mualpho nasat lai ber in, hmalam pan thei a ka inrin tawh loh lai leh tupawh tlanchhiatsan ka duh laiin, ka lungngaih tawpkhawk lai ber in hlimna tur leh damchhan ka la nei tih lantir nan an rawn lang a, keimah vang a an zah fo loh ka beisei.

Chhungkaw diktak ka nei ve ta anih hi. An tan engpawh ka ti zel ang. Keimah ang maiin an pian tirh aţangin lawm lo tu an nei nghal a, mahse ka venghim tlat ang. Rethei tak a an awm leh fahrah an nih ve ka phallo ang.


"I fate chu an hmuhnawm viau a ni maw?"
"Hetianga hlimna nasa hi ka la nei ngailo" tiin ka rilru diktak ka phawrh a, ka rilru puthmang diktak sawichhuah ka hreh ţhin. Tunah chuan nuam ka ti letling tawh zawk. Ka nupui lawmna tur ka sawi laia a hlim hmel hi hmuh nuam ka ti ţhin.


Ka phone a ri reng a, zan anih tawh vangin a ring lehzual. Ka fate tih harh ka hlauh vangin pawn ah ka chhuak a, Irene-i nau hnen aţang anih vangin mak tihna deuh ka nei. Pui tur a min duh anih loh chuan min rawn be ngai lo.


"Hello?"
"Ka u nun hi i tichhe vek anih hi. Vawin ah a tan a hriat nuam lo tur sawi inei tiraw?" a ti a, a aw khur deuh aţang chuan a ţap tih a hriat.

"Ka nupui fanaute ka ngaihpawimawh zia ka hrilh"
"Nangmah vangin intihhlum a tum asin. Hetianga midang itih nat chuan i tluang bik lovang"
"Engthil maw a tih?" min ţhawn em vangin ka ţawngring khawp mai. Mahni nunna lak duhlo ber te zing a mi a ni ţhin.
"I hriat duh chuan rawn hmu mai rawh" a ti hmuk a, a tawp zui nghal zat.

Irene zawk biak ka tum a, switch off tlat mai bawk a. Kan awmna hospital ah hian awm ve sela chuan ka hmu nghal thei mai tur. Ka nupui fanaute ka hmangaih rualin Irene pawh ka tan ala pawimawh reng. Ka ţhianţhaber a ni reng ang.

Ka rilru a insual but but a, Irene hmuh a, thil atthlak tak atih chhan hi hriat ka duh a, intihhlum a tum tak tak nge lem a chang tih hriatchian ka duh bawk. Ka buk tawn reng a, a tawp ah ka nupui leh ka fate awm na lam ka pan ta nge nge a.


CONT... (In dawhtheihna avang leh ka story thiamlo tak chunga ka ziah ve hi min lo chhiarsak ţhin vangin ka lawm e)

FORCED MARRIAGE-18




Doctor in kan ţha a tih vangin hospital aţangin kan chhuak a, hlim viau tur ka ni. Ka hlim reng a, mahse ka pasal awmdan avang hian ngaihţhatlohna ka nei. Inpui lamah buaina a nei leh tawh a nih ka ring. A in ngaihtuah ngut ngut reng a, ka biak pawh hriat miah loh chang a ngah. A chhan ka zawh lah in a ţhat vek thu a sawi tho si.


Ka la che vak vak ngam chuang lo a, khum ah min muttir in phir te chu ka bulah tui takin an muhil a, Sandra alo lawm in a naute chu hmuhnawm a ti khawp mai. Pi Sangi a awm tho nachungin min awmpui turin Debbie a rawnkal tawp a, ka thlamuang khawp mai. Phir te mutna bulah Sandra a ţhu khur reng a, khawih ngam chiahlo mahse a mit a lasawn thei miah lo.


Matthew inbual zo chu khum ah a rawn bawk zawk a, chumi hnu ah a ban pakhata in nem kang in Sandra a kuah a, "An hmelţha iti em? Sandra" a ti sup a.
"Aw hmelţha e" ti chungin ala en tawn dun zak zak a, inang a ti viau a ni ngei ang.
"Nakinah nang aiin an la lian dawn nia aw" ti fiamthu in Sandra biang ah chuan a fawp a.
"An te e" alo ti ve vang vang mai.


"Emma awmpuitu inei tho bawk a, vawin chu chhuah lawkna tur ka nei a"
"Iva inthlahrun hmel ve" ka ti deuh kher a, hnathawk tur a akal tur ai pawn nuam lo a tih hmel zawk alawm le.
"Kan haw chauh sia"
"Min kalsan lehnghal tur chu nuamlo iti deuh a ni maw?"
"Aw a pawimawh angreng a" a ti ban charh a, engtak chu ni ang maw?
"Eng thil nge?" ka ngaih a ţhalo ka tih tawh kha. A awmdan en phei chuan buaina nei a ang a, hriatpui ve a puih theihna neih ka duh.


"Ka pu hmuh ka duh a" a tihlai chuan en pawh min en tawh lo. Sandra a kuahna aţanga muangchang a in la hrang in a tho zui zat a.
"Eng chungchang ah nge? Duhthlanna isiam fel tawh mi?"
"Aih. Hmuhlawk ka duh. Phir te chungchang hi sawipui ka duh" a ti nghut a, a insiam zui mawlh mawlh bawk.


"I rei angem?" ka tih hnu ah "Ka pu chu nidangah ihmu theilo mi?" ka tihzawm leh a, nidang ang lo takin ţha taka thlah har ka ti. Ka pu a hmuh dawn vang nge ka ngaih a ngam zan lo.
"Ka sawilawk theilo. Hmuh vat ka ngai" ala ti tho. Ka hnial chhunzawm duh ta lo.


"Ka kal dawn. Rawn haw hma ka tum ang" a ti a, a kal hma in a fate a en veleh te te a, chanchin a rawnsawi tur thu sawiin min chhuahsan zui a, hmuhphaka a awm lo chiah chu a reh nghal vawng vawng. Nau neih hlimchhawn a nia, ka bula awm turin ka la duh ve a, hospital ah min awmpui char char a, tihtur a nei ve tawh pawh a ni maithei sin.


"I pu chuan a hrevek a, va hrilh ţhat leh kher angai ami?" Debbie in a ti bawng bawng a, a kalchhuak chu kei aiin alo lawm lo daih zawk.
"Phir te tibuai lo turin a hrilh dawn niang. A sual sia, fimkhur angai a, ka pu tan chuan Mason a ţha ber a"
"A tenawm zia a hrelo a ni maw?" a ti hluk a, Sandra a melh pah ralh.
"A fanu hi i hua a mi?"
"Teuhlo mai naupang anih hi. Amah kha ka hua, ka sawipeih lo" a ti leh a, ka thil hmuh kha ka la hrefiah lo reng a ni.


"Midang tan ţhalo mahse ka pu tan a hlu em a"
"Matthew ti mualpho vak tu pawh kha Mason bawk a ni maithei sin" a thusawi chu ka ngaihven ţan khawp mai.
"Delhi ah a awm daih sia"
"A awm daih tih i chiang a mi?"
"Aizawl hi nuam a ti lo lawm. A awm ang. Thla tam tak a tawm bo peihlo tawp ang" ka tih chuan a lo bu nghat nghat a, Delhi ah nuam a chen leh hle tawh zawk ang chu. Ka pu damchhung chuan helam chu ngaihsak ngai a ti lo tawp ang.


"Sandra hi rawn lak let an tum miah lo mi? An tenawm e, fa nei tlak pawh an ni lo"
"A nupui chuan a rawn be ziah a, rawn lak tumna a nei rihlo aniang"
"Pasal a nei leh vat dawn anih chu. Enkawl peihloh chuan neihloh mai tur alawm" ala ti hmarh hmarh reng a, a in ang thinrim mai dawn in ka hria, ka khap duh lem lo..


"In pa pawh hi tun ang hun a chhuah a awm lo. Hna a kal tur pawh nilo, hospital aţangin in haw chiah a" a ti leh a, Jason zawk in thawm a neih tak vangin a sawi chhunzawm ta lo. A zun leh zun loh a en a, a lo zung ni ngei tur a ni a ner nang nang mai.
"Hriat hran in har dawn ropui si. Ipa in a lenbosan cheu sia keiman kan thlak ang che" a tih chuan ka lo nui hak a, thinrim ţeuh chungin dimte in Jason a thlak.


"Pasal neih ila tum miah lo mi?" ka ti dek dek a "Matthew hi neihluih tir lo che sela chuan ila nei biklo ang" alo ti hlur a, Jason a mut ţhattir pah bawk.
"Dawn lo e. Ka neitawh sia, inei ve chak lo mi?"
"Chaklo. Mipa hi an mak emai. Tumah hi ka ring peihtawh lo" a ti hmuk a, hrechiang viau lo ila chuan a bula awm hrehawm ka ti viau ang. A in ang lungngawi leh vat dawn tho a, ka ngaipawimawh lem lo.


Naute puan huh a tam tawh vangin su turin min kalsan a, a awmlai a ni tho a, Pi Sangi kan tih tir vek duh lo. A naute bulah Sandra pawh a muhil ve bam a, a en reng ringawt a, kan haw hnu ah a ninhlei lo hrim hrim. Reilote ka awmloh san chhung pawh khan min ngai em em niin Pi Sang in a sawi.


Min sawi det det tu an awm vangin ka harh a, Sandra in ka hmai bul set ah min lo en kiau. Ka lo muhil ve anih dawn hi.
"Ka rilţam" a ti tham ţuak a, ţap mai tur hmel a pu, ka harh har deuh a ni ngei ang. Debbie thawm ka hrelo a, Pi Sangi bulah a awm ngei ang.
"In hnuaiah chhuk la, Pi Sangi kha eitur dil rawh aw" ka ti a, ka bula ding anih vangin a hnung ka chul a, a lu alo bu ve nghat nghat a, "Kal rawh le. Zuk ei ţeuh rawh" ka tih rualin a pheikhawk a zawng ve nghal vat vat. A hmuh veleh a bun sawk sawk a, phur deuh in a kalchhuak a. Pi Sangi hnen aţang pawn ka thawhah thu ka hre leh tawh lo.


A khawharthlak emai tiin phone ka ban a, Sandra nen a awmdun reng kan nih vangin thla kan la anih loh chuan ka khawih khat ţhin hle. Whatsapp pawh ka khawih khat a, Matthew mualphona ka hriat ve loh hnu aţang kha chuan message rawn lut reng thei tur in ka dah ve tawh. Ka pasal chungchang midang hnen aţanga hriat chu a zahthlak a lawm le.


Matthew pawn chanchin ala rawn sawi chuang lo. Ka pu nen chuan engtak sawidun ang maw? Message ka enkual dan dan a, number aţanga message awm ka hmuh chuan ka hawng nghal vat. Thlalak a rawn thawn a lo ni. Engtak chu ni maw ti rilru chungin ka download a, thlalak ka hmuh chian chiah chuan ka phone ka thlauh lo chauh a ni.


Awih lo lutuk in ka zoom a, a ni ngei si. Khum ah Irene a mu a, a khum bawh in Matthew a ţhu a, a hnunglam chiah lang mahse ka pasal chu ka hailo a, a kal dawn a a thawmhnaw hak kha a nihzia ka chiang em em bawk. Ka en nawn tlut tlut a, pakhat zawk ah phei chuan Irene kut a vuan lehnghal. A nupui leh fate kalsan in hmeichhe dang bulah hun a hmang a, fa kan nei chauh a, hetiang hian a awm nghal a, ka pu hmu tur ang in a insawi lehnghal.


Damon ţap ngak ngak ka hriat tak ah chuan phone dahţha in ka fapa chu ka ngaihven a, tlem a inher deuh in hnute ka pe a, ka rilru a vakthui khawp mai. Ka fapa hmai ah chuan dim te in muangchang in ka chul a, nupui fanaute aipawn a ngaihzawng hlui ala thlang zawk fo a nih dawn hi. Fa phir duhawm tak a nei a, keichuan an bula awm hi nuam ka ti a sin. An hmel hmuh ringawt pawh a nuam a, an pian hlima an ţap thawm ringawt te khan min tihlim in ka na zawng zawng pawh a reh vek in ka hre hial a ni.


Damon a mut leh tak hnu chuan ka phone bawk ka phawrh leh a, hreh deuh chungin ka pasal biak tum chuan a hming ka hmetchhuak ta nge nge a. Ka call a a ring hma hma in ka hmet tawp lehnghal ţhin a, a tawp ah erawh a nupui ka ni alawm le ti chungin a min chhan hun ka nghak tlang ve ta.


"Hello?" hmeichhe aw ka hriat chuan ka hmet tawp lek lek a, hriatchian law law ţha in ka hre leh hnuhnawh a.
"Matthew ka lo bia" ka ti chang fak a, min nuihzat ri ka hriat tak zel ah chuan Irene bulah a awm ngei tih ka chiang.
"A thilsiam kher ka eiduh a, a siam lawk a, tunge inih a? Number hlang ania" a rawn ti kual vel a, min hrelo tak tak nise min nuihzat hauh lo ang.
"A nupui" ka ti ve ngat.
"A nupui nau nei hlim pawh a kalsan thei a, a nupui tan chuan rilru siam a hun viau a ni law mi?" min rawn ti a, tih theih ka neihloh em vangin ka in sehruh ţeuh ringawt.


"I mipa awmpui kha nupui fanau nei anih kha. Ka chunga i thiltih hi nang leh i unaute chunga thleng ve tur in iduh dawn mi? Khawngaihin rawn haw tir rawh" ka ti sep sep a, phir te an muttui vangin ka ţawngring ngam lo.
"Ka hrilh che kha Emma. Ka duh ka nei ngei ngei ţhin. Ka duh ka neih nan tih hreh ka neilo a, nausen khawngaihna pawh" a rawn tih tak zel ah chuan phone ka dah ta daih a, Irene chu khawngaih dil in awmzia a nei ve lo. A zualkai zawk emaw tih mai tur a ni.




"Ava reitawh em em ve. Han be teh, hau hrep rawh" tia Debbie vei sek chu ka en tawp. Tlai lam a thil thleng kha ka la sawichhuak lo. Ka sawi peih lo a ni zawk mah. A thinrim tawh sa bawk si nen amah zawk in a be rum rum duh mai ang.
"A tlang theilo a" ka dawtsawi chu a awih ngei ka beisei. Dar10 a ri tawh a, haw a hun viau tawh reng a ni.


"Inu han be teh, hospital aţangin in chhuak chiah a, ngatinge rei tak thleng an lo chelh? Anni pawh va hau teh" a ti leh hmuk hmuk a, ka la che eih lo. A ngai reng a ka mu min hmuh chuan beidawng takin a thaw halh a, ka pasal ka biak nawn chakloh zia a hre miau lo.
"Ţhu phawt teh. A rawn haw ve mai ang. Iduh chuan min hawsan rawh kan ngaihtuahawm loh ang"
"Ka hawsan theilo cheu anih hi. Naupang pathum leh nang, la che ţha thei bawk silo nen. Inpa hi a laktlak hlawl loh. A mawhphurhna pawh a hrelo anih hi" a ti bawrh bawrh a, a thinrim em em laiin kei ve thung chu ka thinrim na aiin ka rilru natna a nasa zawk.
"I chhungten an ngaihtuah ang che"
"Ka fel a ka upa tawh bawk. Min ngaihtuah lo ang chanchin ka hrilh vek tawh. A rawn haw hma chu ka awm ang" a ti bur mai. Keiman ka biak laia min chhangtu chu Irene daih a ni. Khami hnu khan min rawn be miah lo. Chanchin min hrilh tur ang a insawi si kha a reh vang vang ringawt. Debbie pawh kan bulah a rawn mu thlawp a, naupang a tih harh leh si chu thawmdim tak in a insiamţha leh vel a, bawkkhup thlawp a mu in phone a hmet zui mawlh mawlh.


Keipawn phone ka en ve a, thlalak min rawn thawn tu bawk khan min rawn thawn belh leh a, ka en ngam tawh lo a, ka delete phallo bawk. Tunah tak chuan thlalak dang ka mamawh rih lo. Debbie bawk hle hle chu rawn tho kang vut in "Ani hi Irene bulah a awm ani lo maw?" a ti hluai a, ka chhan hma hma in "A awm a ni ngei ngei ang. Irene lo chuan tun ang hun thleng thleng an bulah an awmtir lovang. Irene chuan tlaivar pawn a awmtir duh dawn" a ti nuap nuap a, a rinhlelhna a dahkhawm kual vel a, a dik vek bawk.


"A awm anih vaih chuan Irene zawk hi hospital ah mi zawng zawng hriat ah ka hau ang"
"A ngai lo" rang lutuk in ka lo ti vat. Irene aiin ka mualpho daih zawk ang. A pasal in a lerhsan ti a min sawi tur ka duh lo.
"A zak ve dawn lawm. Tenawm lutuk mipa dang hmuzo lo ang mai"
"Hmeichhia ringawt dem tur a nilo. Irene hian ala beisei ngam turin ka pasal hi a awm ve a ni mai. Hnar fithla ţhak sela chuan a beisei tawh hauh lo ang" ka lo ti a, Irene ka ţan lo a, huat neih duh miah lo chung pawh a ka huat ţalh hmeichhia kha a ni. Chutiang a ni chung pawh chuan ka pasal hi thiam ka chantir thei chuang lo. Beisei ngam a ala awm leh a pantu zawk ala ni hian min ti na takzet bawk.


"Hna vang ni miahlo a zanrei tak thleng a i chhuah leh chuan ka ţhen dawn che ti rawh. Vau ve rawh" a ti hlak a, tun ţum chu Pathian hnen a thlen a ţawngţai turin min ti miah lo.
"Ka fate hi. Inţhen lo duh ta tak tak se kei leh ka fate hi chan chhe zawk tur kan ni"
"Zanrei deuh thlenga apa in a lensan duh chuan an pianhlim aţang hawt in pa neilo an ni nghal ringawt alawm"
"Thudik hrechiang lo chuan lo sawi vak tawh lo teh ang" khap tum a ka tih chuan a ner nang nang a, nep min tih hmel khawp mai.



Ngawi renga kan awmdun laia Matthew a rawn luh chuan Debbie in "Iva mawl ve" alo ti nghal tuarh. Matthew pawh a ding chawt a, a hamhaih hmel hle lehnghal.
"Tihpalh ka tlai deuh a" tiin keimah min en a, Debbie zawk in "Mason ang chiah. Fate pawh ngaihsak lo. Mason i huat em kha amah angin awm mah ta che" thinrim takin alo la ti tho a, Matthew lah in a hrelo der hmiah. Khum aţanga chhukin a bag leh jacket ala sawk sawk a "Naktuk ah ka rawnkal tawh dawn lo. I nupui fanaute ngaihsak la i mawhphurhna kha hlen ve ang che" a tih hmarh hmarh hnu ah"Emma ka kal dawn nia, kan inbe dawn nia" a ti nem leh duai a, a chhuak tur thawm pawh a ţha khawp mai.


Min be miah lo in a inthlak a, bathroom a luh hnu ah ka ipik lutuk ka thawchhuak hawk a, sawichhuah ngei ka tum a, ka duh bawk. Sawiţan mai dan tur ka hrelo a ni. Thinrim pawn in hau dawn ila Sandra a muttui tawh vangin pawi ka ti lo. Ka awm te a tawp up up a, ka hlau in ka chiai nasa bawk. Thilsual ti miahlo anga a awm thei te kha mak ka ti.


Bathroom aţanga a rawnchhuah leh veleh "Vawin ah ka pu i hmulo tiraw?" tiin ka lo zawt nghal. Sofa ah ţhu in tv a on a, ka inbengkang a, ka hmuchiang thei tho.
"Irene bulah i awm tiraw?" ka ti leh a, tv enreng mahse tv aţangin ri a chhuak lo a, ka ţawng a hrepha vek.


"Hmu lo. Ka pu pawh ka hmulo. Ka ţhian dangte ka hmu" a ti kual duah a, ka hrechiang ropui mai si. A rawn haw khan a thawmhnaw ka lo en nawn leh a, thlalak ami chiah chiah kha a ni tho.
"Rawn biak che ka tum pawn Irene ania min rawn chhangtu"
"Ka ţhiante an uang a nih kha" a tih leh chuan ka thinrim khawp mai.


"Thlalak pawh ka hmuvek. Irene muhil kha i veng nge a bulah khan ilo muhil ve. Hospital a kan riah vang te khan i chau ve lo mi eitur te ila siam peih a?" zawhna chiah ka nei. Ka zawhna hi chhan ngei ngei ngai khawp a pawimawh vek a ni bawk.
"A damlo a" a ti tawi tak a, ka zawhna zawng zawng a chhang chuang lo.


"Nausen pahnih leh i nupui damţhalo kalsanin midang damlo i buaipui maw?" ka ti let a, a awmduh dan chu ka awih thei lo.
"Nangpawh ka buaipui che kha. Irene hi ka ţhian chauh a ni tawh. Ka hrilh ngun em che hi. Muhil rawh a tlai tawh" a ti hmuk. Thawh tum a ka insiamrem lai chuan "Khawnge i kal dawn?" tih nghut pah in a ding a, ka lam panin a rawn kal nghal. A damţha zawk anih miau vangin ka insiamrem laiin a rawn thleng a, min dawm a tum laiin a kut lo vai per lawp pahin, "Min khawih suh" ka ti hrawk. Min rawn vuan nawn leh tho.


"Bathroom ah mi?"
"Aw, keimahin ka kal thei" ka ti ve ngat a, min vuan lo se chuan ka din rual khan dawm tur ka mamawh nghal ang.
"A damlo ka awmpui lawk anih kha"
"Zing aţanga zan tlai tak thleng a in awmpui hi lawk a nilo" a rawn haw hma ai khan a rawn haw hnu hian ka thinrim daih zawk. Ka thinrimna hi lanchhuahpui dan ka thiam lo a, mi ka hau ve vak vak thiamlo bawk a, ka tawt up up ţhin thung.




Ka mut leh rual in ka mit ka chhing nghal a, naute pahnih leh Sandra awm bawk nen kan bulah alo mu ve theilo hrim hrim. Mut tum mahse ka be peih chuang lo. Chair hnuk ri chu ka mutna zawn ah a tawp a, Matthew a rawn ţhu tih hrilh chawp ka ngailo.
"Irene ka hmudawn tih i hriat chuan i thinrim dawn a, hmuh ngei angai a" ka chal zawn a ka ban dah pah in "Iduh chuan naktuk ah pawh hmu leh rawh" ka ti chhum hmuk a, "Ka duhlo" a lo ti vat.


"Nupui fanaute kalsan a ihmuh duh chuan ava pawimawh awm ve" ka ti leh a, ngawih ka tum tawh na a ka thei hlawl lo.
"Pawimawh angreng e. Hriat duh ka nei bawk a"
"Dawt min hrilh kual a, a muhil te kha i nghak tihna mi?"
"Ka chau ka muhil ve anih kha. Thlalak chu tu in maw lo pe che" a tih takah chuan ka meng a, ka phone zawng in ka lu dahna zawn ka hai rawk rawk a, ka khawihfuh veleh lachhuak in amah vawm pah in "En mai rawh" ka ti hmak. Ka hmuh si se peih lo.


Ka awmdan chu a sawisel lem lo. Sawisel ngam tur pawh a nilo. Ka phone a khawih melh melh a, a hmu ta tih hriat takin a phun hluk a, a thaw zui hawk bawk. A phone lekchhuak ve in a hmet mawlh mawlh a, a dah luh leh hnu a "A lo la tih ka hre reng reng hleinem. Irene-i nau a nih hi. A uang aniang" ala ti tho. Ka inher a, amah hnungchhawn zawng in ka awm daih.


Min be zui lo in blanket leh lukham a la a, phir te a rawn en leh hnu ah sofa a pan a, "Khatiangin tumah an uang ngailo" ka ti leh. Ngawih mai mai a har. Min biak laiin ka be peihlo a, min kalsan dawn veleh ka sawibelh leh chak tho.
"I thinrim loh hunah kan sawidun dawnnia" a ti awlsam et a, ka tan hmuh a nawmloh zia a hre duh lo.


Kimchang deuhin sawifiah se ngaihdam min dil se ka duh a, ka sawichhuah ţan aţanga ka lo beisei pawh a ni. Naute an awm vangin light a off duh biklo a, ka lam pawh a rawn hawi tawh lo. Ka thinrim ţun reng a, tuman an pasal te an ngaihzawng hluite hnaih tak a an awm hmuh an duh lovang.


Ka hlim ve na ţhin zawng zawng te kha chawp leh chil in a bo duak ni maiin ka hria. Ka ţawngţai leh ringawt ţhin. Ka muhil theilo. Thlalak min rawn thawn vang khan Irene-i nau pawh a huat phah chuanglo a, huat a hnek in fiamthu ah a ngaihsak zawk. Ka number te kha engtin nge alo neih theih zawk? Ka ngaihtuah nasat poh leh ka pasal leh Irene hi inkawp tawh lo mahse inzawmna thuk tak an la neih ngei ka ring. A nun a hmeichhe awmchhun ni char char ţhin chu a theihnghilh lo tawp ang.



CONT....