FORCED MARRIAGE 19-27

FORCED MARRIAGE-19



"Nu i loleng peih em?"
"I buai deuh em ni?" a rawn ti dam diai a, keima nu ngei ka biak hi chuan naupang ţha leh mai ni hian ka inhre ţhin.
"Ka ngai che a, min rawn tlawh lawk la" tiin ka ngen a, ka thawpik viau hi chuan ka nu hi ka ngai ber ţhin.
"Ka rawnkal dawn nia" a tih hnu ah kan inbiakna kan ti tawp a.


Matthew nen kan in be ţha hleithei lo. Ani chuan min biak a tum nasa ţhin a, thinrimna ka pai ţun vangin kan in hau leh ţhin. Ţha deuh a inbiak hi ka thei hlawl lo a ni ber. An thlalak lah kha ka mitthla ah a cham reng ţhin lehnghal. Tunah chuan a hna a zawm leh tawh a, keipawn hnathawh leh ka tum mahse hospital dang ah a ni tawh ang. Ka thawhdun pui tawh lo ang.

Phir te mutthilh lai a ni bawk a Sandra ka bualfai a, a unaupa fanu hmangaih takin ka enkawl a, apa thuzawm in ka hna aţangin ka bang a, lawm nachang pawh hrelo in hmeichhe dang a ngaihsak em em a, ka rinhlelh deuh lah in a thinrim hlur mai bawk nen ka ţah a chhuak ut ut ţhin.


Sandra thawmhnaw ka hak tir zawh a a sam ka khuih laiin ka nu a rawn lang hlawl.
"Iva rawn thleng hma ve"
"Kan inbiak zawh khan ka rawn inthlahtir nghal. Pi Sangin chho tlang mai rawh alo tia" a bag khai lai a dahţha a, ka fate mutna lam a pan nghal. Ka nu hi engkim hrilh ka duh vang a ko ka ni.


"Eng eng emaw sawipui che ka duh a" Sandra ka vawnna ka thlah a, ka thytak zia a hriat in ka nu chuan sofa a rawn pan a, ka bulah rawn ţhu in "Eng nge ni?" a ti sep a. Ka sawihreh khawp mai.


"Nu, Matthew hian ngaihzawng a neiin ka hria" ka ti tham ţuak a, a pha nasa in keipawn ka finfiah kilh kelh bik lo mahse ngaihţhatlohna ka nei lian viau.
"Irene kha em ni?" a ti nghal chat. An inzui nasa ţhin em a, Ethan hnen aţang pawn a hre daih tawh ang.

"Ni e. A thlah thei tak tak dawn lo a niang. Tunlai phei chu kan boruak a ţha lo"
"Ava pawi ţhin ve. In hlim ve dawn chauh emaw ka lo ti asin" a ti nem diai a, thinurna leh natna hi keimah ah a in chawhpawlh nuk reng mai.


"Nu a rei tawh emai" ka ti chuai raih a, ka tawrhna hi a tawp ve theilo a ni ber. Ka nu in ka kut a vuan a, a zut heuh heuh lai chuan mittui tling pam in ka hmui ka pet fan fan a, awmdan tur ka hrelo a ni ber.
"Hmeichhia in mipa an zarbuai nasat hian buaina a tling ve a, engtia awm nge i duh?" tia min zawh chuan "Ka hrelo" ka ti thei ţawk. Ka pu khan thutiam lo siam lo sela chuan hlim takin ka la awm ve tur.


"Ipa hriattir iduh em?"
"Duh rih lo. Hna zawm leh ka duh"
"Naupang hi" a sawi ka ring sa hrim hrim.
"Chu chu nia ka koh chhan che. In ah i awm ţhin tho a, kal dawn ah ka rawn dah anga, haw lam ah ka rawn lam leh anga pawi iti em?" tiin inthlahrung takin ka zawt a, phir te chauh ni se chuan a zia a, Sandra a tel ve zel a ngai a, midang fa daih a ni bawk nen nu te pawh nise a nawm lohna chen a awm.


"Pawi lo ve. Ka tute alawm an nih" awlsam tak a a tih theih tak ah chuan ka thaw huai a, naupang ka ngaihsak loh vang a nilo. Thawven na ka duh ve a ni. Inchhung a ka tuar ngawt ngawt hi chuan ka â vek thei ang.
"I inhuam anih chuan hnathawh veleh ngei ka tum. In lam a chinchang hrelo lutuk a ka awm hian min nuihzat in min bum mai mai dawn in ka hria" ka ti a, ka thusawi chu a pawm zia lantir nan alo bu nghat nghat a.


"I dawhtheih viau rual hian rilru tawp chin hi inei ve a, ka dang lo ang che" a ti ta nge nge a. Irene nen a an chungchang sawidun pui min tiam a, tun thleng in kan la sawidun chuang lo. A ţhian a nih thu bak a sawilo a, ka sawi tawh ang khan a hming ka sawilan chuan i thik tiin a thinrim hlur ţhin.


"I thawhna ngai ah em ni ang?"
"Ni lo e. Private hospital dang a tam alawm. Thawhna tur ka zawng mai ang" ka ti ve tlat. Thawven tum in hnathawh leh ka duh a, ka ipik lehzual na tur a an inzui lai hmuh theih reng na hospital ah ka thawk duh lo.
"I in ngaihtuah chian hnu a thuthlukna siam inih ka ring a, iduh chuan thawk leh rawh. In ţhen kher erawh a ţhalo ania"

"Ka hria lawm. Keimah anga pasal neih vanga rilru hah nasa hi an awm pawh ka ring lo" ka ti hlak a, ka tawrh tawh zawng zawng ka ngaihtuah a, ka la dam ve chhan hi Pathian vang chauh a ni.


"Awm ve bawk e. Pasalten ngaihzawng an neihsan lawp lawp pawh an awm. A tawpkhawk ah lo chuan ţhen reng reng suh. Vanduai ber emaw kan intih pawh hian keini aia vanduai an awm ve zel ania"
"Inţhen hi englai mahin ka duh ngailo. A tawpkhawk a thleng ang tih ka hlau khawp mai" ka pasal in kei aia midang a ngaihsak lai hmuh reng hi thil harsa tak tur a ni. Irene-i nau lah khan an chanchin min rawn hrilh chamchi a, a sawi nuam tih ber a ni. Ka tlawm lai hi hmuh an chak ber niin ka hria.


"Ka lo ţawngţaipui dawn che u nia, Matthew nen pawh ţha takin sawidun ula. Fa inneih tawh hi hrereng rawh u" a tute fahrah tur chu a hmungam biklo a ni ngei ang. Keipawh naupang vang hian ka rilru a buai viau ţhin. Keimah chiah la ni ila chuan ka pasal hi a hmeichhe duhzawk thlang tur in ka ti tawh ngei ang. Ka fate vang chauh hian ka la tuar hram hram.


___________________________________


"Naktuk aţangin hna ka thawk leh dawn" a hawi phawk khawp mai. A hriat loh in hna ka zawng a, keimahin ka in buaipui vek. Ani pawn engmah min hrilh ngailo a, ka hrilh duh biklo a ni. Pangai tak in ka awm a, tum ruk ka nei tih hriatloh khawp in lem ka chang ve. Hospital a kal tur a a chhuah veleh keipawh in aţanga chhuak ve in thawhna tur remchang ka ngaihven ve ţhin.


"In ah awm la naupang buaipui rawh" a ti hmuk a, a hmuh loh ah ka ner sawk.
"Ka khuahar. Kan thawk dun tawh dawn hleinem. Hospital dang ah lawm ka thawh dawn. Min dang theilo a, nangpawn i duh duh iti tho a" ka ti let ve salh a, min dem theilo ang. A cho chhuah a nih hi.


"I duhdan in hna ka thawk anih hi. Nang leh naupang te tan"
"Hna chhuanlama i hun hman dan hi ka hrevek. Kan fate hian nu leh pa hmangaihna an dawng ang iti ve a, tunah chuan pa neilo ang chiah an nih hi. Thil an hriatthiam hun ah eng ang in nge an ngaih ang che? Ka pa chuan keini aia ngaihsak dang a ngah an ti dawn che sin" ka ti hmarh hmarh a, inthiamlohna ka nei tel zel ţhin hi thil pawi tak a ni.

"An tan hna ka thawk a, ka ngaihsak vang zawk anih chu"
"Ipa ang mai nih iduh mi?"
"Ka pa chungchang sawi suh" a ti hrawk. Apa awmdan ka hrevek, anu in min hrilh vek. An inchhun pafa khawp mai.


"Irene nen a in awmdan zawng zawng a nau hnen aţangin ka hrevek"
"A nau chu ţhian ah ilo siam tihna em ni?"
"A teuhlo. Khatiang ţhian ka mamawh lo. In chanchin hi min rawn hrilh chak zek zek. Duhtawk tawh se ka ti khawp mai" tun hnai a kan awmdun apianga kan hun hman dan anih hi. Kan in hnial reng a, min hmangaihna leh min ngaih ve ţhin na pawh kha a bo zo tawh a ang.


"Thinrimna i zawn reng chuan i hre tam tial tial ang"
"Ka zawng reng reng lo. I zirlo em anih kha"
"Siamţhat ka tum. Duhlo tu zawk inih kha" min melh run a, ka zam leh hman ţhelh a ni.
"Irene chungchang isawi duhlo a, siamţhat itum lo tawp anih kha"
"Ka ţhian tih i hria"
"I hmangaih bawk. I kalsan thei lo anih hi. Tun ah pawh in inzui ngawrh leh tawh khawp ani lawm ni?" a thinrim zia ka hria a, ka haider tlat thung. Kut min thlak dawn lo tih ka hrechiang a, ka ngawi duh bik lo a ni.


"Hna chu thawh a ngai lo aw"
"Min dang theilo ang. Naupang hi keima nu zawk bulah ka dah ang a, ka thawk ang" a no kenlai dawhkan ah a nghat chawrh a, dawhkan bulah ding in ka enreng. A thinrim zual zel a ni ber.
"Ka nu pawh a awm reng. I chhungten eng ang in nge min ngaih ang?"
"Chu chu sawi ka tum chiah. Midangin engang in nge an ngaih ang che?" a nui hawk a, nuihza tak tak erawh a ni lo.
"I chhungten min dem ang a, midangin an dem ang che. Nausen thla hnih pawh la tling lo chhuahsan reng thei chu mak an ti khawp ang"
"Midang ngaihdan ka ngaipawimawh seng tawh lo. Ka nu bulah ka dah ang a, ka thawk leh ang" luhlul takin ka ti ve tlat.


"Inu bula dah a ngai lo. Ka nu bulah dah rawh" a tih tak ah chuan hnathawh leh ka tumna chu a hnial tawh dawn lo niin a lang.
"Sandra pawh an enkawl duhlo a, ka ring tawk lo. Ka nu bulah ka dah ang" ka ti leh a, anni bula ka dah chuan rilru nuam in ka awm thei lo ang.
"I mak sawt khawp mai"
"I hnen aţanga ka zir a nih hi" a thaw hawk a, a thinrimna thunun a tum ve nasa a ni maithei. A ngaihtuahna ka hriatpui lo a, ka sawichiang thei lo.


"Thawk leh rawh. I chhungte hmuh a thiamloh min chantir i chak zek zek tawh a nih hi. I danglam ta khawp mai" min kalpelh hnu ah kawngkhar a ri zui bur a, ka lo ţang ţeuh ringawt. Ka danglam chhan pawh amah vang bawk. In en let miah lo a min dem daih ţhin hi keipawn mak ka ti. A chhungte pawh khatianga sawi kha ka tum a ni bik lo a, thinrim lai chuan duhloh deuh pawh sawichhuah a awl. Ka nu leh pate an inhau ngailo a, kan chhungkua kan in kawmngeih bawk. Chuti chung chuan chhungkaw mak tak ah ka lawi lut a, an nundan ka zir chawp a, hrehawm ka tuar a, fa ka neih chuan an hlim ang a min ngaihsak ve tawh ang tih nak laiin a ngaih a ţha em em ringawt. Tunah chuan min chik a hun ve tawh. Min ngaihven ve tawh rawh se.


___________________________________


Ka rin aiin ka fate kalsan a harsa. Darkar reilote chauh kalsan dawn mah ila vawikhatna tur a nih vangin ka harsat khawp mai. Ka nu in ngaihtuah lo turin min ti a, ka nu bulah an him dawn tih ka chiang. Fate hian kan thinlung ah hmun an lo chang lian khawp mai tih ka hriat belhchhah.


Ka thawhna thar chu hospital pawh lian lutuk a ni lo a, ka ni hmasaber anih vangin nuam tihna pawh ka la neilo. Ka awm mai mai chuan ka pasal fanaute bawk an rawn lang leh ţhin.

"Bed no 7 ami saw a file min lo pe" mipa aw in a tih ri ka hriat chuan ka ţhu ngil awt a, nui ri in a chhunzawm zat.
"Ka tihpalh thildang daih ka lo ngaihtuah a" ti a thupha chawi pah in ka ding a, ka duty puite kalsawn lai a ni chu ka lawm ngei mai.
"Khatianga i in ngaihtuah vak vak chuan i tar vat mai ang" tih pah in uang deuhin min melh a, coat var a ha a, doctor a ni ngei ang. Ala naupan hmel hle a, kei aipawn a naupang daih ang. Ngo lampang ani na a ngo hluak chi chu a nilo, a coat var hak chuan a chawiin a lang fai sar a, a inhmeh khawp mai. Ka nau rual tur ka lo chik viau chu a awm ang lo. Ka thawhpui tur ania, ka lo zirchiang a ni mai. Ka pasal leh fate bak hmangaih ka nei lo a, ka neih pawh ka ring lo.


"Ka va hmuhnawm awm ve" ka inhau ru nghal mawlh mawlh. File min dil a, pek nachang pawh ka hrelo. Ka hna ţan ni a ni lehnghal.
"File chu kan la ang"
"A ngai lo. Ka rawn uang anih kha. Milim ang maiin che lo in i awm reng a, i mit pawh i khap lo" a sawi uar lutuk chu ka nuih a za ru angreng hle. A naupan hmel bawk nen, a thusawi lai te chuan a lawmawm khawp mai.


"Min ti hlauthawng hman alawm" ka ti hluai a, alo ţhen sak a.
"Nangmah chiah in min hlau. Casualty ah ka duty a, Tebawihi ka rawn zawng a" a hawikual pah a, a hmuh tak loh ah chuan keimah bawk min en leh.
"Ka hremiah lo. An rawn let ţep ang. Lo nghak la" tih pahin ţhutna ka kawk a, rawn ţhu nghal mai lo in kan hma a dawhkan lianpui ah a bawk a.
"Ka va hmungai lo che ve" a ti sup a.
"Vawin aţangin ka ţan chiah"
"Anih chu. La hmuh ngailoh ka ngah. Ka thawhna ala reilo a" nui chunga a tih chuan ka ţhutna ngaiah ka ţhu leh daih. Kei aipawh a la naupang tur hi ka infiamkual tir mai mai dawn lo.


"Ava rei tawh" a banrek a a sana bun a en zawk a, a dawhthei lo viau anih dawn hi Matthew ang mai. Matthew sawi tak ah chuan ka kal tur kha lungawilo deuhin min thlah. Kan in ah pawh a rawn lut ve zawk a, ka chhungte chuan an lo be bawrh bawrh tho. Ka pa chuan engmah a hreve lo a, ka nu leh Ethan erawh chuan an hrevek a, ka unaupa pawn alo thlithlai tur thu min hrilh anih kha. Eng nge a tih ve ang tih mai mai ka ngaihtuah leh hman pek a, kan inhauh hnu khan zanrei ah a thinrim avang khan ngaihdam min dil a, ka kal tur kha lungngawi lo deuhin min thlah leh a. A chang chuan ka kalsan daih hi a hlau ve a ang ka ti ţhin.


"Hey milim ang in i awm leh tawh. Hey tih iduh loh chuan ihming han sawi teh"
"Emma. Nang aiin ka upa bawk" ka ti tel kher. Tebawihi chu nghak lo in kal daih tawh se ka ti. Rilru buai lai lehnghal in min be reng mai.
"Dominic. Nang aiin ka naupang bawk"
"Naupangchhia lutuk" ka ti hluk a, ka lungawi lohna haider in a nui hak hak a, midangte runluih nuam a tih hmel khawp mai.


"Dominic eng nge ilo tih? Ka ţhiannu thar kha i rawn beisei ami?" Tebawihi awmdan vel chuan Debbie min hriatchhuahtir a, ka ngai khawp mai. Thawk dun leh thei ila ka duh viau laiin a ngai a thawh leh ka duh tawh silo a.

"Ka u hi kawm a har khawp mai" min rawn melh a, ner nung in ka hawisan.

"Ala tlangnel lo anih hi. Nanganga zaktheilo a ni ve lo a, Emma hepa hi ka bestfriend anih hi aw" Tabawihi chuan a ti nghal bawrh bawrh a, damlo kan ngah lo in buaipui ngai lutuk an awm lo a, inkawmhlimna hun pawh a tam dawn a nih hi.


"Ka u lo zak tawh suh aw"
"Khatin min ko suh" ka ti hluk a, zawi zet a Tebawihi kuah in a uai a, Tebawihi thau tul chi a ni bawk nen, a kuah vel pawh chuan a taksa a chet phah eih lo.
"Hey kal tawh rawh. An hek vaih che chuan kan thlahliam che a ngai palh ang"
"A rawnkal lo ilo ti tlat dawn lawm. Tshirt min chahsak kha rawn lam ka tum"
"Ka keng lo naktuk ah. Kal tawh teh" Tebawihi bawk chuan a ti leh a, a tshirt a hmuh dawnloh vanga a lungawilo a tum zui bur a, kei aia a la naupan zia ka chiang tulh tulh internship ti zo hlim vel chiah ala niang.


"Theihnghilh tawh suh. Ka kal dawn, U Emma bye bye" ka hmui ka chip tlat a, a nuihna tur ka ti kiam chuang lo.
"Ka zahpui che kal teh. Haw dawn ah min thlah rawh aw"
"Bike in a zo lo che" Tebawihin vawm tuma a tin tak uaih ah chuan a tlanchhia a, thawhpui nuam leh ninawm inpawlh a ni dawn a nih kha.


"Khati reng kha ania, hrethiam rawh. A duh chuan a fel ve tehmai nia" ka ţawngchhuah hma hauhin a ţhianpa a thupmawi nghal vat vat.
"Ka hria, ala naupang em anih kha"
"A mawl lutuk biklo ania aw" a ti nang nang a, ka sawi zui pui tawh lem lo.



Ka haw dawn ah driver ka ko lo a, ka nu hnen ah a rem rem a ka haw tur thu ka hrilh thlap tawh. Khawlaia kal harh te hi ka mamawh ve lawm. Duhtawkin ka in ngaihtuah thei ang chu.

Hospital ka pelh thui hma in ka hnung lam ah horn a ri tuarh tuarh a, ka kalna aia sir lehzual a ka kal hnu pawn a ri zui reng tho. Ka hawilet a, min rawn tibuaitu ka hmuh chuan ka tum nasa viau in ka ring. In her leh hmak in chak lehzual in ka kal. Thawven duhin ke a kal ka thlang a, ka ning khawp mai. Ka hnung ah muangchang a min zuiin a la ri reng a, thinrim taka hawilet leh in "A bengchheng" ka ti tuarh a.


Muangchanga rawn tlan in ka sir ah a ding a, ka lo melh thip khawp mai.
"Khawilam ah nge i haw dawn?"
"Kan in lam ah. Ke a kal ka duh a chuang turin min sawm suh. Ka nau rual lek inih kha min fiamkual reng suh" ka ti nghal bawrh bawrh a, ka huntawn in a zirlo bawk nen ka ning takzet.
"Tebawihi a ţhiannu rualin a haw dawn a sawm che ka tum mai mai" a ti ban charh a, ka hauh vang khan nuam lo ti ve a ang.
"Keimaha haw ka duh. Nidang ah kan la haw rual dawn nia" nem deuh zawk in ka ti leh.


"Inau rual ni mah ila vei nei i ang em a, mi ka chik ve thei teh ania"
"Ka kal phawt" tih leh kal ka rual a, reilote chiah kan inhmu a, hriat a nei tawp lovang. A ngaihruat mai mai anih kha. Ka zawn a a rawn tlan leh pawn ka ngaihven duh ta lo. A beidawn hnu ah chak deuhin a tlan ta daih. Chhungkaw buaina, nupa inkar ţhalo nen, tibuai tu dang ka mamawh miah lo.



Naupang hruai tur a ka kal chuan Matthew alo awm reng tawh. Ka hrilhhai lek lek a ni. Hma takah a rawn haw ngai silo a, kan in lam a naupang an awm vang a ni ngei ang.
"Khawnge ka nu hi?"
"Iduh anga nuam in i hmang em?" ka zawhna chhang miahlo in a lungawilohna a lo ti lang nghal.


"A nuam khawp mai. Boruak dang hip ve ka lo mamawh em a" phir te an muttir na ah kal in ka ngaihven a, reilote chhung pawn an ngaihawm hman alawm le.
"A ţhat chu. Ilo hip zau mah mah ange, nu inih kha" min ti deuh kher a, a awmdan hi a hreve lo em maw ni?
"Pa zawk hian engchen chiah nge i hip? Inchhunga i mawhphurhna hre lek lo a i awm hi"
"Pa leh nu kan inang lo. In tan hna ka thawk a, inlama naupang enkawl hi i tih tur a ni" a ngai bawk a sawi leh tawh. Hospital danga hna ka thawk hi a ngaingam hlawl lo anih hi.


"Keipawn ka thawk ve dawn. A chhe ber tawk thei kan nia, pawisa khawl ka ngai"
"A chhe itih chu?"
"Chhungkaw kehchhia. Hmeichhe dang i buaipui tel reng chuan kan la tawk ngei ang" ka thusawi chu thleng tak tak lo se ka duh. Nupa inţhen pawizia hi fate ah a lang ţhin. Fa ka neih chiah phei chuan ka hlauthawng lehzual a, nu ve tho te chuan fate hmangaih na nasat zia min hriatpui ngei ang.


"A thleng ngai lovang" a ti nghut a, kan nupa inkar ţha ţhin tak khan chhiat lam a pan leh tawh tih chu a hriatthiam ve ngei ka ring.
"Kan inneih hlim ang mai khan kan inhlat leh tawh a nih hi"
"I luhlul i chhuah a, thu mak tak tak sawiin i mizia nilo pui pui i chhuah a, kan inhlat chhan hi keimah ka nilo. Min rin loh vang a nih hi" a ti a, ka rinna tichhe tu chu amah hi a ni tih a inhre duhlo zel dawn anih hi.




CONT...

---

FORCED MARRIAGE-20



"Vawin chu reunion an tia, ka rawn haw tlai ang" wardrobe hawng in haktur ka enkual a, chawhnu ah ka ţan dawn mahse kal hma ka tum tho. Naupang dah pah a ka nute bula awm rih ka chak.

Ka chhan loh vangin "I awmdan hi a khamawm tawh khawp mai" a ti nghut a, ka tih tauhsan reng a, thiamlohna chen ka nei ve tih in hre mah ila Irene a thlah fel hma chuan pangngai takin ka awmthei lo. Aman ţhian angin en mahse a hmeichhia hian a en ve lo.


"Ka nuten naupang hi an ngai sia, riahpui ila ka ti deuh a" dawt ka sawi. Ka nute chuan ka pasal phalna lo a ka riah an phal hauh lo ang.
"Thil tih ţullo tawp a nih chu"
"Rawn haw har itum tho a, kan nufa chauh a awm ai chuan ka nuten an ngai ve sia"
"Nilengin an awmpui thei. Riah tum mah ula ka rawnhruai tho ang che u" thinrim lutuk in a ti khur khur tawh. Riahpui ka tum lui tlat thovang. Kan nufa a khawhar tak a lo nghah leh tawp mai kha a peihawm loh emai.


"Min ngaihtuah lo in nuam deuh in hun hmang rawh"
"Ka lo tum dawn nia" a ti bung hmuk a, min chhuahsan ta daih. Min tih lungawi tumna pawh a neilo. A beidawng tawh a ni mahna. Min hmangaih sela chuan min beidawnsan ka ring miah lo.


"An lo thleng chiah" tia ka nu au chul ri ah chuan Sandra alo phu zawk a, inchhung aţangin mi pahnih an rawn tlanchhuak a, ka tih ngailo in motor kawngkhar an rawn hawng nghal rawk rawk. Ka unaupa leh hmeichhia chu a rawn dah luh chuan Fiona tih ka hrechiah. Irene mai nilo a ţhiannu lehzel pawn min rawn hnaih zel a nih hi.


Naute an rawn la a inchhung lama an pawmlut chu Sandra kaiin an hnung ah ka zui. Fiona awm ve vang nge ka nu chu phur zual riau hian ka hre tlat pek a, ţullo ka ti khawp mai. Ka nu mai nilo ka nau hnaih tur pawn ka duh lo. Chawhma chhung kan in a awm hlim ve kan tum nen, nuam ka tihna tur pawh a bo leh ta vek dawn anih hi.


"Fiona hi i hria tiraw?"
"Hrie e" tiin bung deuh in ka nau chu ka lo chhang a, kan dinhmun hrereng chungin hetiang a ti duh hi a mak khawp mai.
"Ka ţhiannu a nih hi" nui ruh ruh chunga a tih chuan a sawi awmzia tur ka hrethiam mai. Fiona te chu keini aiin a upa daih ang chu. Irene nen an in rual vel ang a, Fiona ai hian Debbie pawh ka duh daih zawk.


"Min hlau miah suh. Rilru kawi ka pu miah lo ania" nui sangin ti mahse ka ring tak tak thei chuang lo. Keimahah hian rinlohna lian tak a awm tlat a, a chhan ka hrebik lo. Duhpui lo viau mah ila ka nau rilru tih hnual ka duhloh vangin "A ţhat chu" ka ti veleh mai bawk a, min hrechiang a, ka lawm lo tih a hriat ka ring tho.


"Irene nen in in kawmngeih sia reunion ah itel ve dawn lo em ni?" ka ti kher a, ka ngaina lo nghal tawp.
"Tel ve thei lo. Anni ho chu an hrang Matthew te ho nen" ka nau in a nghawk zeuh lai chu ka hmu ru reng. An che vel engkim ka lo enchiang em a ni.
"A ţhat chu kal dun rawh se"
"An in ngaina em a, pawhţhen theih pawh an ni lo" a tih chuan kan en ta ţhap a, chu chu a hriat veleh za lo deuh a nuih pah in "Ţhian angin ania ka tih" a ti nawi niaih ringawt.


"I ngamtlak ve ve anih chuan an pahnih in ilo zilh dawn nia" ka nu in a rawn ti chhuak hlawl a, ka pa office turin a kal tawh bawk a, sawipawi a ti tawh lo a ni ngei ang.
"Ka zilh ngun alawm abikin Irene. Nakinah an la inchhir mai ang" ngaihsam taka a tih chuan ka nu nen kan in melh ralh a, ka unaupa chuan ka fate bak a buaipui lo.
"An inchhir hun kan nghah chhung khan a tlai vek thei a, nupui leh nu ka nih angin ka fanu hi ka hrethiam lehzual a, ka lainat in hrehawm tuar reng turin ka duhlo" a ti a, ka nu chu ngawi tawh se ka ti kher mai. Fiona hian thil zawng zawng a hriat ka duh lo a, kan rilru puthmang awm ang a hriat phei chu ka duh lo lehzual.


"Tuar hram hram la tuarchhuah hun ila nei mai ang. Dawhtheihna neih te hi a ţha ania"
"Kei aia dawhthei hi an vang viau ang. Ka chanchin zawng zawng i hrevek anih loh chuan awmdan tur min hrilh suh" ka ti khur khur a, ka nau pawh rawn hawichhuak in min melh kar tawh.
"Ka tihpalh. I mizia leh rilru ţhatna hi ka lo fak ve ţhin che a, tuarchhuak ngei tur a ka duh vang che a ni"
"An chanchin kan hriat ve loh hriat i nei mi?"
"An inzui ngawrh viau tih ka hria" a sawizawm leh mai dawn emaw tih laiin a hmui a chip ta hmak a, ka zawt zui bik lo. Thinrim leh rilru na a ka awm tawh sa nak laiin hriatbelh ka mamawh lo ve.




"I rawn thawhna ala reiloh nen Dominic lah hian a sawireng mai che a, amak ve ngawt mai. Hmeichhia a ngaihven ţhat peihlo nen" ka ţhut rualin Tebawih in alo ti nghal bawrh bawrh a, ka nui liam ve mai. Pasal fanau ka nei tih hria se mak an ti viau ang chu. Dominic pawn min umzui chiam chiam tawh lovang.

"Emma a ngaihven tak tak che in ka hria, a nihna tak sawilo mahse i chanchin kan sawidun ngun. A duh che niang" amahin a nui kur kur a, a thau angreng bawk nen a nui ringawt pawh hi lawmawm tham a ni.
"A duh rual ka nih loh hi. Ala naupan hmel em hi" ka ti daih a, ka chanchin diktak hi hrelo turin ka duh. Zawhna a tam mai mai. Ka pasal chanchin te min zawt ang a, a chanchin ka sawi peihloh ber mai a ni rih sia.

"Hmangaihna in naupang leh upa a thliar hleinem. I duh ve loh pawn a rilru nawmna tur tawk in lo kawm ve la" tih pah in in la zei takin min nek salh salh a, hetianga vei nei miah lo a awm hi ka chak ve ţhin. Tebawihi leh Debbie hian in anna an ngah khawp mai. Debbie a puitling deuh zawkin a thau ve lo tih mai loh chu.
"Ka kawm alawm. Nau angin ka en a, mi a tihlim ve bawk nen"
"Kan hlimna thlen tute tluk a hlu an awm hleinem"
"I ţhianpa tan chuan ţhahnem i ngai hle mai" ti a ka fiam chuan uar tak in a nui uarh uarh a, a nuihdan chauh lo chu nuihzat tur lai ka hre ve lo.


"Henu hi a nuih tawh chuan damlo ţhi ţep tawh pawh an harh kawk thei ang" a beng hup in dawhkan hma ah a rawn ding a, a ţhiannu nui chu ngaihtheih loh hmel tak in a ner nang bawk.
"Ka nui i ngaihthlak peihloh leh lokal lo tawp la. Emma awm hnu hian i lokal ngun riau" Tebawihin alo ti ve hlak bawk.
"Casualty ah lokal an awm loh vang anih hi. Emma vawiin hi ka nu Birthday ania, duty zawh ah present min lo leipui" a tih laiin Tebawihin zawi te te in vawi tam tak a ruk thei ang ber in min rawn nghawk a, a thusawi lai mek nen a inrem em vangin min chhaih a nih ka ring.


"Haw hma ka ngai a" tiin chhuanlam ka siam a, pasal neilai ka nia, nau ang pawn en ila mipa dang zuikual chu mi te ngaihdan a ni lo ang. Mi chhiatna lai leh tihsual zeuh hrethei leh sawipeih tak tak hi a tam zawk an la ni sia.
"Tebawihi a hman silo a, min kalpui rawh"
"I ţhian dangte sawm mai rawh"
"An awm lo. A ţhen chu thingtlang ah daih te an awm a, ka sawm pha lo" a ti nang nang a, naupang ang maiin a tum bar bawk.
"Engtin nge kan tih tak ang? Haw hma ka ngai tlat sia" la tih tlat pah in pawisawiloh hmel takin ka en ha a, chhuanlam ka siam mai mai tih a hrelo ang.
"Darkar chanve pawh a tling lo ang"
"Minute tlem te a tlai chi pawh ka nilo"
"Keimahin ka lei thiam lo"
"Tum mai rawh" ka ti hmuk a, a nin hmel ţan tawh.
"Thil ka lei ve ang che"
"Pawisa ka nei ve"
"Khawngaihin min kalpui rawh"
"Emma kalpui rawh ka hman silo a a khawngaihthlak. Present a lei ţhat loh chuan a nu in a be lo rei leh ngawt ang" Tebawihin alo tih ve chuan ka thaw halh a, min tibuai tu hi an va tam tak em.
"Darkar chanve hma in leizo ngei ngei ang che" ka ti hlak a, Tebawihi nen chuan an au lo chauh a ni. In ah leh hnathawh naah pawh naupang hlir in min hual vel ni maiin ka hria.


"Ka lawm e. Iduh chuan ka treat ang che"
"Haw hma ka ngai ka tih tawh kha"
"Ka hria e" alo ti vat. Ka fate an la te a, rei tak chhuahsan thei pawh ka la ni lo hrim hrim. Ka pasal awm ţha duh sela chuan hna ka thawh kher pawh a ngailo ang. In a awm nuam ti lo khawp in min siam a, hetiang hian ka awm phah a nih hi. Haw viau mah ila ka ngai em em reng tho.


"Kha khawvel dang ah a awm leh daih tawh. Ka kal dawn" rawn kunhniam vak in ka chal ah na vak lo in a rawn nem a, rang zet in a inthiarfihlim zui nghal.
"Naupangchhia sia"
"Hetiang hi an ţha. An rilru a thianghlim a, neih tum tlat rawh a ti na miah lo ang che" Tebawih in alo ti leh zung zung a, min duhpui takzet aniang a fak nasa tawh emai.
"Keichu mipa laka rilru pe chi ka ni hleinem"
"Hmeichhia iduh tihna mi?" ka hau chung in min hlat dawrh a, a ngaihtuahna a tlem ve khawp mai.
"I ngaihdan dan a ni mai. Ka sawi dawn lo"
"I landan nen a inhmeh lo. Ngaihzawng ineih pawn a hmeichhia zawk ah i ţang tal ang" a hriat phak loh tur in "Mawl lutuk" ka ti sep a, min ngaihdan hi a ţha phian ang. A ţhianpa nen a min suihzawm phet a tum tawh lo bawk ang a, ka zalen tihna a ni mai alawm. An bula awm hi hahdamthlak riau chang a awm ve a, inchhung boruak hi engmah in min theihnghilh tir lo nachung in ka nuih ve reng theih phah ţhin. Ka rilru hahchawlh nan a Pathian min pek te ah ka ngai hmiah.



Bike a dahţhat laiin a sir ah ding in ka lo nghak a, Millennium Center a ka kal lohna pawh a rei tawh a, kal ve hrim hrim a pawi lo. Naupang thawmhnaw ka duhzawng tak pawh ka hmu mial maithei a, intihharh nan a ţhat phian dawn hi.

"Eng nge lei iduh deuh?"
"Present tur chu ka chah daih tawh. Keiman tshirt lei ka duh a" a ti nawi nuaih a,a inthlahrun hmel kher mai.
"Sawiţha ta che"
"Ka nu present lei tur pawn ka sawmchhuak hleithei lo che a, ka thawmhnaw tur phei chu min leipui duhlo sa"
"In ţhen hrang ang. I thawmhnaw tur lei la keiin naupang thawmhnaw ka lei ang" ka tih chuan mak a tihzia a hmel ah a langchhuak nghal.
"Min leipui turin ka duh che. Naupang chu tunge? Tu fa nge i leisak dawn?" mak a ti lutuk chu nuihzathlak zawk. Hre miau hek lo le.
"Naupang a ni mai. Ngaihţha tak khan awm la min zawt zui tawh lo bawk rawh" ka kal veleh min zui nghal a, ka fate chu thawmhnaw rawng in ang haktir ka duhlo. An la te si a, hriat hran an har ang. A design in ang se a rawng in ang lo se ka duhdan a ni. Mahse an pian hlim aţangin min lawmpui nan a thawmhnaw rawn pe tu an ngah tawh a, an pahnih a in ang thlap tur vek in an rawn lei.


Dominic thawmhnaw ka zawnpui chu rin aiin ka chau a, darkar khat hnu vel ah a duh ang tak a lei thei chauh. Leipui turin min hruai a, ka thlansak apiang a duhthusam a ni lo zel a, dawr pakhat ah reitak tak thleng kan awm a, a kar laklawh ah naupang thawmhnaw kan en veleh ţhin bawk si nen kan hun tiam kan bawhpelh chiang ngawt mai.

"I chau em? I rilţam em?"
"Teuhlo mai. Haw tawh zawk ang" ka dar ah a ban a rawn dah a, min kuah ang a nih mai chu. Tebawihi a uai nasat ţhin ang kha chuan min uai ve lo a, hetiang hi a tih ţhan tak a nih vang in ka sawisel lem lo.
"Saw saw nalh iti em?" tih hluai pah in a thil hmuhna lamah min kuahphei nawk nawk a, ka in pal nawk nawk ni ber in ka hria.
"Tuman an leikhalh dawn lo che"
"Ka enchiang vat chak tihna" a nalh tih inkhaina hma a kan din pawn min la kuah reng chung in a thlek vang vang a, hun reitak kan hmang leh ngei dawn a nih chu. Dawr nghaktu chu a chhung aţanga lo chhuak in min rawn ngaihven vat a, la thla tur a kan tih hun nghak in kan bulah a ding ve reng a, a man zat leh a ţhat zia a sawi pah mawlh mawlh a.
"Emma ka ha chhin duh angem?"
"I kawr tur a nia i thu thu. Ti vat vat tawh zawk mai teh ka hmanhmawh" tiin ka lo tur ve sek bawk a. Thawmhnaw a lei leh dawn ah chuan ka zui tawh lovang.


"Emma" ka phu zawk a, ka ţaksa a ţang nghal ţeuh a, ka aw hriatchian tak a ni. Ka zam em em bawk.
"Emma" a tih leh chuan muangchang in ka leh hawi a, ka pasal a nu nen kan inhmachhawn ta ran mai. Ka hmuhtirh lai ang chiah khan a nelawm leh tawh lo. A mitmeng a dur khup a, a hmui a chip hmak a, a bag ah lai hrui ah nghet tak in a vuan bawk. Dominic pawh min ko tu hrechiang chak in ka rual in min kuah ang ang in a inher ve a, chu chu a pawi ber. Ka nu chuan min kuah tu chu a mit in a chhui kual dan dan a, ka hmuh veleh Dominic-a kut chu ka dar aţangin ka nem liam a, lai deuh in ka ding ta reng.


"Ka monu hi ka lo be lawk ang chu" a ti fiah fak a, ka en loh vang in Dominic-a hmel put dan ka hrelo a, mak tih na a a khah ngei ka ring. Ka nu kal hmawk hmawk chu a hnung ah ka zui a, mi tam loh deuh na ah a ding chawt a, vei vel an awm reng tho na a min rawn hmuhna lai ang em kha chuan a lun lo.


"Mason i zui duan duan a, tunah lah kan hriat ve ngailoh tlangval a ni leh a, mipui tam na ah ila in kuahtir zui" a ti hmarh hmarh a, a thinrim em vangin a aw pawh a khur hial in ka hria.
"Ka nu khapa kha kan thawhpui ania, nau ang chiah in ka en" ka ti dek dek a, "In sawifiah angai lo. Ka hmuhdan kha a chiang tawk"
"I hmuh ang ringawt kha a nilo"
"Nu ini ve tawh. I monu in mipa dang in kuahtir se i lawm biklo ang"
"Ka tihpalh. Kan in ngamtlak lutuk vang zawk a ni" a kut a lekchhuah chuan min beng dawn emaw ka ti hman a, min beng lo in a sam a hui daih thung.
"I pasal phallo chung hna i thawh leh na chhan hi a ni em?"
"Ni lo. Ka thawh hnu chiah a ka hriat a ni" thudik ka sawizia lantir tum in a mit ah tak ka en a, min rin hmel chuang lo.
"Ipa nen kan lo sawidun ang" a hnunglam ah ka enzui vawng vawng a, kan in ngainat ve tawh nen. Mason zui reng ang a min sawi kha ka duh miah lo. Mason kha ka hriat tirh chuan ţhian kan nia, a mize diktak ka hriat hnu ah ka thlah vat reng a, pasal ka neih vang a ţhian kawm theilo tur ka ni bik lo.


"Ka rawn zawng che a. Ka rawn lan nghal chat vang hian in thusawi ka ngaithla tihna a nilo" ka bag khai laiin ka lo vaw pawp a, a hrilhhai viau nghe nghe.
"Mi kuah i hrat lutuk a, min kuah vang anih kha a thinrim lehzual em em" ka lo ti vak a, awmze nei miah lo in ka lo thinrim ţun ringawt.
"Nia ka lo ti leh ţhin. Min ngaidam rawh. Mi nupui ini tih hria ila chuan ka kuah lo ang che"
"A pawi tur zawng zawng a pawi vek tawh. Ngaihdam in dil khan awmzia a neilo. Keipawh ka thiam lo. I tih ţhan anih vangin ka dang lo che a, ka ngaihsam ve tho vang a nih kha" ka ti leh ta zawk a, a inthiamlo hmel mawlh hi a khawngaihthlak.


"I in ngaihtuah ngut ngut zel a, vei nei i ang ţhin a. In hlim vak lo in ka hria" kan ţhut rual in chu chu a sawi hmasaber. Min kalpel suau suau tu te en reng pah in "Nupa chu intihthiamloh chang a awm ve bawk ang chu. Kan in hmangaih tlat chuan a tawk mai alawm" ka lo ti a.
"In in hmangaih chuan siamţha rawh u. Nula emaw ka lo ti che sin" a nui zui hawk a, sawitur a vang duh ngei mai.
"Fa engzat nge ineih tawh?"
"Pakhat..ti ila phir an nia"
"Thawmhnaw i en kha an haktur anih chuan an la lian lutuk lo a ni maw?"
"Thla hnih pawh an la tling lo"
"Ava pawi ve" a ti sup a, a sawi awmzia ka hre miah lo.


"Ka fate an la te chu maw pawi?" ka ti hu reng bawk a.
"Nilo e. I awmdan ka chik ţhin che a, i hlim loh ţhin vang ania tihhlim a hruai thawven ka tum ţhin na chhan che. Fa pakhatna chu pawh thla hnih la tling lo innei chauh a in nupa in hlim lo nghal chu a pawi. Engvang pawh nise a pawi khawp mai" a ti duah a, hmeichhe nasa tak leh ka pasal thlem awlsam tak vang a ni tih sawi ka chak viau na a ngawih ka chuh ta zawk a, miin hre tam lo se a fuh zawk.


"Ala ţha veleh mai ang"
"Inu en kha chuan a ţhat hmel loh. Buaina a ka hnuhluh che vangin pawi ka ti"
"Tikhan awm lo teh min hnem lo emai. Kei aiin i hlauthawng zawk alawm le" tih hlim tum tak in ka ti a, hlau lo deuh ang a awm ka tum a ka hlawhchham maithei. Ka hlau takzet a, ka pasal lerhsan ah min ngaih ka hlau. Kan nupa inkar khikna chhan zawk chu an fapa a ni tih an hre duhlo a, langsar takin hmeichhia a zui a, ka ţhian a ti ve tho va, an ngawihbopui mai. Keipawn ka ţhian ka zui ve a, an ngaihdan anih loh viau pawn an thu thu in ka awm biklo ang. Ka hna hi ka chawlhsan tawh dawn lo.


"Kawm tur iduh chuan ka awmreng a nia"
"Ka lawm e. Nau ang maiin ka ngai che a, ka lawm lutuk" ka ti mawlh mawlh a, min tihhlim alo tum ţhin vang hrim hrim pawn a lawmawm. Pathian hian ţhianţha hi min pe veleh zel mai a nih hi.



Kawngkhar ri ţhuai ah chuan ka muhil ka harh chiang kher mai. Phir te pawh an che ţual ţual a, ka ngaihven vat vangin an harh lo hlauh.
"Naupang iti harh dawn lawm thawm dim ta che" khum bula a rawn din pah in ka lo ti nghal hrawk. Mu chung pawn a rim ka hrepha. Reunion chu a hmang nuam bawk aniang a rawn ruih haw hi.


"I bazar kal chu nuam iva ti awm ve" a ti nghal khur khur a, anu hnen aţangin a hrevek tawh tih hriat reng.
"I ruih lai lehnghal a inhauh ka peihlo. Ka nute bulah ka riahsan lo che a lawm hle rawh" theih chu nise blanket a inkhuh daih ka chak. Naupang ngaihtuah tel an ngai zel tawh a duh ang pawn a awm theih tawh loh. Fa kanneih hma khan min lo ţhen law law zawk sela ţha tur. Ka tuar nasa tawh em a, ka thinchhia in ka luhlul zo tawh a nih hi.


"I hna aţang hian bang ang che"
"Ka sawi tawh kha ka bang dawn lo" tih pah in ka ţhuchhuak a, kan inhnial na ţhin thupui ngai bawk a luh leh ka peih tawh lo.
"Ngaihzawng ineih vang ami i ban hreh em em nachan hi?"
"Nangman anih kha nei chu. Ka bialpa a nilo. Ka nu bulah pawh ka sawi nau anga ka en anih kha" an bawrh bawrh a, ka rilru a ka vei ţhin leh an chhungkaw chunga ka lungawi lohna zawng zawng hi sawichhuah vek ka chak. Min tur ut ut a ni ber.


"Ka ţhiannu. Ka sawingun tawh. Ka hmangaihzia che i hria"
"I hmangaihna i tihlan dan ava mak ve. I hmangaihte rilru iti na ngawih ngawih zel em ni?" ka ti let ve salh a, mahni nihna pawh hre lo.
"Ngaihzawng ineih vang alo nih hi i mizia a dan a, in hauh i cho arh reng?"
"Ka neilo a ka sawingun tawh. Ka nu pawh ka hrilhfiah tawh. A hrethiam duhlo anih kha. In duh duh dan in ngai teh u"


Mahni fate ţhatlohna haider a midang te chetsual zeuhna hmuthei deuh an lo awm ve a nih hi. Ka nu pawh a ni chiah, a fapa tihsual a haider a, ka ţhian pa nen min hmu a ngaihdan diklo a nei ve ringawt mai. Min lo ring hlawl lo a nih hi.
"A mo inia, a duhsak che a, khatiang kha i hmuhtir a"
"Ka chunga thinrim lo hian ka bialpa anga in ngaih hi zawtfiah vek rawh u. Ka hne lutuk che u. Kalsawn rawh mutthilh ka duh" ka ti hmak. A thinrim tur zia ka hria a, mak deuh maiin a hma ang khan ka hlau miah lo. Ka thinrim ve tho vang a nih ka ring.

"I ban duhloh chuan ka ban luihtir tho ang che"
"Ka hna chungchang sawi tawh suh. Min ban luihtir chuan inţhenna hial a thleng thei tih hria ang che. I awmdan avang hian ka nu pawh a lawm biklo" ka ti veleh zat zat a, ka ti mai mai lo bawk.
"Inţhen ka chak ti law law rawh. Min ngaihdan hi a diklo tih i hriat hunah ila inchhir ang"
"Ka ngaihdan che hi a dik tih ka hre tial tial a,ka la neilui zel che hi mawl ka in ti ngawih ngawih zawk" Matthew takngial pawn rapthlak tih hmel zet a min melh ve tak tlawk tlawk hi.

"Hlimna min thlen thei miah lo tu pasal neih ai chuan pasal neilo a awm ka thlang zawk" ka pasal leh a chhungte hian min hmangaih miah lo niin ka hre tlat tawh a ni.

(A tawi in tih pawn tunlaia ka tih theih dan chin a ni rih ania aw, ka inthlahrung ve teh mai nia)


CONT....

---

FORCED MARRIAGE-21



"Kal lo turin ka hrilh chiang viau tawh che" sofa a a ţhu chu ngaihven duhlo in ka in siam lui char char.
"I awm ang a ka awm ve chuan i inchhir viau ang" a ti leh khur khur a, a awm angin ka awm ve zawk anih hi. Ngaihzawng ka nei ve em lo a lawm hle zawk rawh se.


"I duh duh in awm rawh"
"Ka nute pawn chawl turin an duh che. Min zah loh pawn anni tal chu zah rawh.
"An thu angin reitak ka chawl tawh. In siamţhat a tum biklo a keipawn tu thu mah ka zawm tawh bik lovang. Ngawi rengin ka tuar a, ka hrethiam zel che a, min zuam a nih hi. Nang leh i chhungten a an duh duh a an tihkawi theih tur ka nilo" ka ti tawn tawn a, ka bulah ţi dek in Sandra a ding a ka khawngaih angreng khawp mai.


"An mo ini ka tih tawh kha"
"An mo pawh ni ila, an sal ka ni tel hleinem" in hauh reng te hi ka kham ve tawh. Ka lung ti awilo tu ber a hria a, ka thlah anga kan nupa inkar hi siamţha ang tih a tum miah lo. Min runluih emaw tih mai tur a ni lehnghal.
"I thusawi tur te hi tunge zirtir ţhin che? I danglam tawh takzet"
"Natna hian mihring alo ti danglam thei khawp a nih hi. Ka dawhtheihna hi a tawp vek tawh"
"Lo nat ve nachhan tur inei lo. Ka ţhiannu i thik tlat hi mak ka ti khawp mai che"
"Ka lungawiloh te chuan i ţhian pawh nise thlah mai ta che" ka tichhuak ta nge nge a, a ngawi ta daih. A thlah hreh lutuk hi ka hua. An chanchin te pawh Irene nau khan chawllo in min rawn la hrilh. Vawikhatmah ka la chhanglet lo chung pawn a rawn sawireng peih tho. Nupui fanau a nei tih hre lek lo in a lengkual vel anih hi.


"Zan in chu ka nute in ah ka riak tak tak tawh ang. Kan inhmuh apiang in kan inhau a, awmhrang rih ang" ka ti ta tawp a, ka peih tawh lo a ni ber. Naupang an la te tho a a pawi em em bik nang.
"Inţhen hi chak viau suh. A hma ang khan awm leh la kan hlim a ni mai" a ti hluk a, thip zet in min melh run bawk.
"Engmah ka haider tawh dawn lo. Pawn lamah nuam i chen laiin ka lo tuar tlawk tlawk tawh dawn biklo"
"Khapa vang kha em ni inţhen i cho arh reng. Khapa kha i um duh pawn naupang hruai lo hian kal rawh" a tih chuan ka phone kenlaiin ka vawm a, lo inveng hman lo sela chuan a hmai ah ka vawm fuh ngei ang.


"Nang anga ngaihzawng nei ve tur ah min ngai suh. Naupang vang anih hi ka dawh hram hram se. Fa kanneih hma khan lo inţhen daih ila ţha tur"
"Fa kanneih hma khan rilru kawi ila pu lo a, mipa dang i ngaihven lo bawk" a ti nghut a, amah ang chiah a min ngai chu ka haw hle. Tunah tak chuan ka nei peih tawh hlawl lo. Hahdamna ka hmu lo a, ka cher bawih bawih reng a nih hi.


A ţhutna bula amah ka vawm na phone a theh thlak kha ka la a, bathroom ah ka luhpui. Sandra pawh ka ngaihven hman tawh lo a, bathroom ka luh hma zawngin a ţap ri ka hria a, ka luh hnu a kawngkhar ka khar phui hnu ah a reh chauh. Ka phone ka la chhuak a, ka nu ka biak dawn laiin kawngkhar a rawn beng vak vak a, biak luih ka tum zet na a chawl miah lo a a ben rik char char vangin ka nu a lo mangan ka hlau a, ka hmet tawp leh ta nge nge a.


"Engthil nge i rawn tih kha?" bathroom kawngkhar pawh hawn pah in ka ti tuarh a, thil tisual lo ang maiin a awm leh tawh.
"Hmu tur che in ka nu a lokal" a ti sup a, thinrim deuhin na tak in ka nemsawn dawrh a, Sandra in ka kut ah nghet takin alo vuan ve nghal bawk.
"Keipawn ka hmu duh khawp mai" ti a kal mai ka tum chu min lo kuah chawt a, ka tal zui phat phat, a chezia ho te hian in hip tir ka tum tawh lo. Nau ka neih hlim a min phatsan duhtu a ni tih ka hrereng ang.


"In ţhen thu kha sawi miah suh ang che u"
"Ka sawipui duh ber a ni. Kan nundan hi ka hne tawh. Ka hlim lo in hahdam in ka awm ngai lo. Awm hrang ila puitlin zir ve ve ila a ţha ber ang" a phallo chungin ka talchhuak lui a, Sandra lah in ka kut a vuan tlat mai bawk nen. Awm hrang pawh ni ila Sandra hi ka hruai thovang. Tuman an duh chuang hleinem.


"I naute lo awmpui rawh aw Sandra. Khawiahmah ka kal dawn lo. Ipi ka hmu lawk anga ka rawn hruai leh dawn che nia" tia ka thlem pawh in a lu a thing tlat a, anu ang chiaha ngaiin min hmangaih a, keipawn ka hrin ang chiah in ka hmangaih. Ka pawm nawlh a, khum ah a naute mutna bulah ka ţhuttir pah in "I naute pawh ka hruai loh hi. Lo awm rawh aw, ipi ka hmu ringawt anga ka rawnkal leh vat ang" ka ti nawn leh a, men pur tho mahse min ngen ta em lo.


Matthew lam hawi leh tawh miah lo in inhnuai lam ka pan a, step ah pawh ka tlan thla hlawk hlawk. Inkawm khawmna pindan ah kuangkuah in alo ţhu a, ka awm ve tih a hriat veleh ka lam a lo hawi a, a hma aimah a nelawm loh in ka hmu. Ka zam ve na thup in a ţhutna piah ah ka ţhu a, kan in hmachhawn leh ran a, diklohna ka neihloh vangin ka hlau hran lo.


"I ban na lehkha ka theh lut a" muangchang a a tih chuan ka ţhu khawng auh a, ka thinur hle bawk.
"Ka bang dawn reng reng lo. Tihsual palh anih thu ka hrilh ang" ka ti ve ngat a, an mo mah ni ila ka min thunun vek nachhan tur ka hrebik lo a ni.
"Ţha deuha thil kan tihlai hian zawm rawh"
"Zan in ah bungrua ka rawn la ang" mak tih hmel takin min en a, kei ngei pawh hian ka thusawi chu mak ka ti. Ka inchhir chawpchilh nghal a, lak let theih a ni tawh silo. Ka fate an rawn lang hmasa ber a, ka pasal a ni leh a, ka sawichhuak hma lutuk a ni.


"I pasal leh i fate aiin i ngaihzawng kha i thlang zawk maw?" ati chang fak a, ngaihzawng nei tur a min ngai pawh hi mak ka ti. Ka hrilhfiah vek tawh. Min ring lo a, keiphei chuan ring tawh lo tak ka ni.
"Ngaihzawng ka neilo. In ngaih ang kha ka ni lo"
"Ka hmuhchian viau kha. Matthew nen ngaihdam che kan tum a, vawikhatna a ni bawk a, hriatthiam che kan tum tlat a, nangchuan inţhen iduh ta zawk a" ka hnen aţanga a thuhriat chu a rinloh lam daih a nih hmel khawp mai.
"A tawp nan ka sawi leh ang. Ngaihzawng ka neilo. A nei zawk chu Matthew hi a ni. Nupui fanau a ngaihsak lo. Inchhung hi a hrehawm lutuk" ka tih lai chuan uluk tak in alo ngaithla a, ka thlavang a hauh a ka lam a ţan ka rin laiin "Irene nen hian ţhian inkawmngeih tak an nia, ţhen hran theih an ni lo. Thik lo in i ngaihdan diklo kha paih bo la in hlim a ni mai" a ti hmuk a, a fapa hi fuih zawk tur a nia sin.


"A hmeichhia hian ţhian ang in a en ve ngai lo. Jason leh Damon te pawh nithum hnu ah thla hnih an tling mai dawn. An pian hlim bak kha a buaipui leh lo hrim hrim bawk a, keimah ah inchan la, ka thiltih hi a dik tih i hrethiam mai ang"
"I pasal ngei i ringlo tlat a, i rilru ka thlaktir thei bawk silo che a, i thuthlukna apiang kan pawm tawh mai aniang chu" beidawng tak a a tih hnu ah min chhuahsan a, a fapa diklohna chu a ngaihthlak ngam loh tawp kha. Ka rin em em laiin ka rin na a tichhia a, ka rin nawn leh theih ka ring rih lo. Ka rin na kha min pek let tum aiin a tichhe lehzual zel duh zawk.


[Ka u hi a raiin ka hria] ka pasal a nu chhuah hnu ah ka nu biak ka tum a, Irene-i nau hnen aţanga message lo awm ka hmuh chuan ka nuichhuak hawk. Ka nun chawhbuai tum bak thiltih chak an nei miah lo a nih hi. Hetiang nun hnawk nuaih a awmreng ai chuan pa neilo a naupan ţhanlen tir ka duh zawk tho tho. Ka message dawn chu awih tur nge awih loh tur pawh ka hrelo a, zawhchian chakna pawh ka neilo. Thudik ka hriat chuan ka na lehzual mai mai dawn in ka hre tlat. Ka pasal ka huat lutuk vang hian ka tawt up up a ni ber.


"Nu ka rawn haw dawn. Ka peihtawh thlawt lo. Ka tuar lui thei tawh lo. Naupang hma hun tur ka ngaihtuah seng tawh lo. Hetiang pa neih ai chuan fahrah nih an thlang zawk thovang" ka nu aw ka hriat rualin ka ţawng nghal bawrh bawrh a, Irene chu lo railo pawh nise ka pasal hi ka neiluih paih chuang lo. Ka thinrim laia thuthlukna siam ka ni a, thinrim laia thil ti bawrh bawrh chi ka ni. Ka inchhir leh anih pawn ka tuar tawh mai ang. Ţhen ka tum nghet tlat.


"Thil ţhalo thleng a awm em ni?"
"Ka pa kha office kal tur pawn lochhuak suh se. Ka rawnkal dawn. Sumchhuah mai ang. Ka tlin tawh lo" ka ti leh a, ka pu thutiam laktlakloh lutuk vangin pasal ka nei a, hrehawm ka tuar hrep a, ka hlim dawn chauh a hmeichhe pakhat vangin buaina ah ka lut leh a, hahdam aia chak ka nei tawh lo.
"Rawnkal phawt la kan sawiţha dawn nia" ala rawn ti cheu a, ka dawhthei em em e, ka duhtawh loh chin ah chuan tihluih theih ka ni tawh lo thung.


Room ah chho leh in ka insiam chhunzawm a, bag lian angreng tak ah naupang thawmhnaw leh an mamawh ka vawm lut hmawk hmawk.
"Engthil nge itih? Ka nu nen eng nge in sawi?" pawisawilo awm takin a rawn ti leh a, a thang ah hian ka awk tawh dawn lo. An lemchan tawh zawng zawng te hi ka kham. Ka pasal ka rin tawh loh viau lai hian Irene a rai ka ring miah lo bawk. Ka pasal aiin a bialnu leh a nau hi ka lo ring lo zawk daih a nih hi.


"Ka haw dawn. Min dan tum miah suh. Inu pawn ka awmdan apiang an pawm tur thu a sawi vek tawh"
"I tlanchhe thei lovang"
"Kan hria ang chu"
"Sandra hi hruai suh ang che" a tih chuan ka thiltih lai ka tawp chawt a, Sandra thawmhnaw ka khung vel mek a ni.
"Nangchuan ngaigzawng neihsan in i lenbosan mai mai dawn a, Irene lah in hnawk a ti dawn ropui si. Kei anga hmangaihtu a neilo. Ka hruai dawn" a mit a enkal chungin ka ti let a, ka tello chuan a awmthei dawn lo tih ka hre chiang.


"Mason-a fanu anih vang a ni maw i intih ta tu em em. Mafela leh Mason te hmel ihmu thei em ni?" min tham lo deuh a a tih chu haw viau mah ila ka ngaithla liam mai. Tufa pawh nise Sandra hian tihsual a nei lo. Naupang rilru thianghlim tak pawh an hmangaih thei miah lo hi an mak ngawt zawk alawm.
"Zanah thildang chu kan rawn la ang. Sandra chungchang ah hian in duh chuan min khing thei ang. Duhthlang thei a ni tawh a, nangni aiin min thlang tho tho vang"
"Apa te unau in a an ngainat zawng chu a ngaina ve bawk ang chu"
"Khatiang khan min ti suh. In chhungkua hrim hrim hian rinawmna in nei ve miah lo a nih hi. Hmeichhe pakhat a lungawi lo vek in nih hi" tiin ka duhloh zawng tak ka sawi leh a, heivang hi alawm thinrim lai chuan mahni chiah a awm a ţhat nachhan.


"I ţawnghnem khawp mai" a ti nghut a, naupang mutna lama kal a tum chu lo tlan khalh in a hma ah ka ding tlat a, "Hnaih suh" ka ti ţhat bawk.
"Ka fate an nih hi"
"I fate anni ve tawh lo. Nang aiin min mamawh zawk. I nupui fanaute hlut zia hi kan awmloh hun ah chiah i hria ang. Sandra pawh ka hruai dawn. Baby pawn ka bula awm turin a duh. Ka zawt vek tawh" ka ti khar khar a, Baby in kan buaina hi hriat a nei lo. Sandra a rawn biak chang pawn kan sawi ngai lo.


"Fa i awh viau chuan Irene nen va nei rawh u. Midang pathum hi chu min chuhpui tum reng reng suh" ka tih laiin awlsam tak a min nemsam in naupang mutna bulah a kallui tho. A hnaih tak tak hma in ka che sawk sawk a, phir te pahnih ka pawm a, tihnat a hlauh vang in min chuhlui bik lo. A tihnat vaih chuan tun ai hian ka haw lehzual ang. Phir te pawm in ka ding a, zam lo takin ka en ran bawk a, Sandra in ka kawr hmar ah a pawt nghal chat a, mipa chu ni ila min sawisa hrep ang tih tur vel a ni.
"Hetiang chhungkaw buai, hausa viau lo phei ula chuan mi zawng zawng in an hlat ang che u. In chhungkaw zing ah hian ka tel peih tawh lo"
"I duhloh chuan ka tilui lo ang che. I duh chuan awm hrang rawh mahse rei suh aw" ka nui hak a, hrehawm ti zawk ang hrim a a awm leh tak hi. Ka thinur tawpkhawk in ka luhlul ka chhuah hma khan a chhungkua hi venhim tum se ţha tur. Naupang pawh ngaihven tawh lo in a chhuak daih a, a hmuhphak ah ka awmpui dawn lo hrim hrim. Duh leh tupawn min dem rawh se. Ka taksa leh rilru a hahdam zawk dawn a nih pawn chuan midangte dem na mai mai chu ka tuar vek ang. Rintlak a ni tih ka hriatchian hma chuan he in ah hian ka let leh tawh lovang. Ka pu thutiam ka ti puitling tawh a, Pathian laka ka thutiam erawh ka hlen thei ta lo a ni. Pasal neih hi ngaih anga nuam a ni lo khawp mai.


"Emma i thuthlukna hi a dik i ring maw?" ti a ka nu in mangang tak a min zawh chuan lo buk nghut pah in "Aw" ka ti sup. Ka unaupa Ethan hian Delhi ah MD tih leh a tum a, a ruala kal ve ka tum.
"Thinrim laia thiltih rum rum hi a ţha ber lo. Nupa chu intih thiamloh chang a awm ve tur alawm. Hetah awm lungawi la i haw leh dawn nia" ka pa in a tih chuan ka thinur lehzual.
"Ka tawrh ang kha in tawrh ve hma chuan in hrethiam lovang. Hahdam ka duh ka tih tawh kha. Nitin zantin kan in hau a, a hahthlak lutuk. Kan chhungkaw tihchhiat duh ran tu hmeichhia a thlah duh bawk silo. Phallo mah ula ka kallui thovang" luhlul takin ka ti ve tlat. Ka pa mal inkar a Sandra ding chuan tih tur ber hrelo in min melh kual ralh ralh a, ani pawh hi ka khawngaih zo zai tawh.


"Ka hrethiam che Emma. Lokal daih rawh. Hospital ah pawh an sawi nasa in an nuihzat phah che" ka phir pui ka unaupa Ethan chuan alo ti ve thung. Ka lamţang awmchhun niin ka hria. Ka nu leh pate an ngawi run tawh a, ka pa in office kal a tum lo a, ka nu nen a chhun a an chhuah tur thu rei deuh hnu ah a sawi a, ka pasal te inpui ah kal an tum tih ka chiang. Kal sela naupang hi min chuhpui lo turin hrilh bawk rawh se.


Ka rilru a nawm theih loh vangin Baby ka bia a, ka rin ang chiahin Sandra chu ka bula awm tur a a duh thu leh Dehli ah ka kalpui chuan Sandra pawh a hmuhreng theih tur thu sawiin alo phur phian a, ka rilru pawh a nuam ta deuh. Sandra lak let chungchang erawh a sawi tel leh ta lo a, Mason nen a an inkar thu pawh ka zawt lo a, a sawi lo bawk.



Bungrua kan lak zawh in Debbie ho in ka room hlui ah kan awm a, ka thuthlukna siam chu min pawmpui em em zawk. Matthew ka hmuh dan erawh kha chuan ka rilru a kaipeng lehpek a, milim ang maiin a nu bulah a awm a, midangin an biakna kha hria ang pawn a awm lo. Ka din na bula rawnkal a tum a nu in alo vuan bet vat lai pawh chiang tak in ka hmu. Ka duhthu in sum ka chhuah tir a, a chhungte chapo ve tak chuan tlawm zawk a ţang turin an duh hauh lo ang. Naupang ka hruai lo a, min lo laksak daih ka hlau. Anu leh paten min be lo a, Matthew pawh an bulah hlir an awmtir. Pi Sangi lahin ţap chungin min thlah a, keipawh ka kal dawn meuh kha chuan ka insum thei bik lo. Thinrim a thil ti ni mah ila ka thiltih hi a diklohna ka hre hauh lo. Ka pasal hi ka huat viau rualin ka fate pa a ni a, ka hmangaihna a bo chuang lo. A vawihnih nan ka hmangaih ka kalsan leh ta a nih hi.


"Ka ngai ngawt ang che Emma. Naupang ho pawh hi an ngaihawm ngawt ang"
"Heta ka awm chuan Matthew ka hmu reng dawn a, ka inrintawk hunah chiah ka lo let ang. Nangpawh ka ngai ang che" ka ti let ve a, kal nghal mai dawn lo mah ila a rang lam a kal ka duh. Ka nau bulah ka awm thei dawn chuang lo a, Baby in ka awmna tur alo buaipui vek dawn tho a, Ethan aia kal hma zawk ka duh. Matthew a rawn in lan hma ngei a kal ka duh.


"Min rawn be ziah ang che aw"
"Tehreng mai. Matthew hnen ah a thawi pawn engmah sawi suh aw. I thinrim ber lai pawn sawichhuak palh reng reng suh. Awm hran a, kan in hmangaih tak tak leh tak tak loh hriatchian ve ve kan ngai tih i hriat kha. Kan in hmangaih a, innei tur a Pathian ruat kan nih chuan in ngaidam tawn in kan la inzawm leh ngei ngei" tiin uluk takin ka hrilh a, ani hi thil sawi phawng phawng ţhin anih vangin Matthew chhui theih tur a hnuhma a hnutchhiah ka hlau a ni. Sawichhuak lo turin a in tiam thlap a, ka ţhianţhaber anih angin keipawn ka ringtawk.


Zanah ka muhil thei ngailo a, thil ka eithei lo bawk. Matthew a rawn inlan miah lo a, min rawn be hek lo. Hmeichhia zawk in ka duh angin thil ka kalpui a tlawm ah ala ve a nih ka ring. Ethan hnen aţangin hospital ah chuan a kal ziah thu leh Irene nen pawh a hmuh dun ţhin thu ka hria a, ka awm lo chu nawm a ti zawk tur ah ka ngai leh hmiah. A duh anga reilote chiah awm hrang tur ah min ngai tak tak anih chuan a tisual viau ang. A dikna ka hmuh hma chuan ka hnaih leh tawh lovang. A chhungte pawn thawm an rawn nei leh tawh lo a, keichu thuhran naupang an rawn ngaihven lo hrim hrim. Chapo leh induhtawk tak vek an nia, an khawsa thei bawk nen hriatthiamna chen chu ka nei.


Damon a muttheih loh vangin ka awi a, naktuk mai hi kan kal hun anih tawh vangin damlohna eng emaw a neih ka hlau khawp mai. Jason aiin tlem in a naupang a, mut duh tak ţhin a nih laiin tlai aţang khan a ţap reng a, ka pawm chuan a bang veleh mai zel. Damon awi reng chungin kan thil ken tur ho ka enkual leh a, tlai tawh deuh mahse Baby pawh ka be leh a, luh nghal theih na turin in pawh a lo tifel vek tawh. Baby hmuh pawi ka tih loh rualin Mason hmuh tel erawh ka hlau. A ruka kal tur ka ni a, kan awm na ka pu in a hriat ka hlau a ni ber.


Thla a en em vangin parda ka pawt kau in ka nawr tawlh a, ka nun hman tawh dan ka ngaihtuah a, ka van ngaihawm loh ve tak em. Matthew nen a kan hlim ve deuh lai kha ka ngai vawng vawng a, mi bik ang a min in ngaihtir ţhin lai te leh min ngaih em em ţhin lai te kha. Mihring hi reilote chhung pawn kan lo danglam thei a nih hi. Ka lunglen deuh chang phei chuan let leh a, tawrh leh mai te ka duh rum rum ţhin a, mahse ka thil lo tawrh tawh bawk khan min dang leh ţhin.


Hahdam tum in ka awm hrang a, ka awmhran na ala reiloh vang nge ka hahdam em em pawh ka hrechuang lo. Naupang vang hian pangai takin ka la awm ve mai mai chauh niin ka hria. Irene kha a rai thu ka hre leh ta miah lo a, a nau khan min rawn chhaih kual leh vel anih ka ring a, a tir aţang khan ka uksak peihlo reng a ni.


Dim te in Damon ka mut tir leh a, pa tello in an awm ve tawh dawn chu a ni sia. Pa ni tlak loh tawp pa an ni ve ţhin hi chu a pawi em a ni. Ka theihtawp ka chhuah ang. Pa an neihlohna lang miahlo khawp in ka enkawl ang. Ka mut ve dawn ah ka ţawngtai a, ka pasal tan pawh ka dilsak. Ka hmuh hreh rualin ka hmuh phak loh a a awmtur chu ka ngaihtuah em em tho. Pathian in rem a tih chuan engtik ni ah emaw bul ţan ţha in chhungkaw hlim tak kan la ni ve maithei sin.


(Next ah chuan kum a vei hnu a an inhmuh leh dan vel a ni tawh ang. An awmhran chhung hi ka ziak lang dawn lo a, an sawi lehna aţangin a hriat tho ang. Emma hian Matthew a ring leh thei angem tih te in lo ngaihven zel dawn nia. In dawhthei hlawm bawk a, inchung ah ka lawm khawp mai)


CONT...

---

FORCED MARRIAGE-22




(Ka sawilawk ang khan kum6 hnu lam ka ziak daih ang,buaina a awm em lo ang chu)



KUM 6 HNU AH.........



"Damon kha thil kha chhar miah suh i ta a nilo" ka ti tuarh a, ka hma ah pakhat zawk rawn ding in "Jason a nih saw" a rawn ti hluk. Thawmhnaw in ang an hak a, an awm hlat hi chuan ka fate pawh nise ka lo hai leh ţhin.
"Ka tihpalh Damon. Jason ka sawi chu i hria em?" tiin ka au leh a, a thil chhar chu a ngai ah chiah dah leh in kan din na bulah a rawn kal.


Delhi aţangin kan let a, airport kan thlen hnu ah ka nu te min lo hruai hun kan lo nghak. Ka unaupa Ethan chu a zir zawh khan a let lehnghal a, keichu ka la inpeih lo ka tih vangin ka awm rih a ni. Naupang pawh school ka kaltir a, let leh mai ka tum loh laiin ka nu in ţap chung meuh a min ngen tak avangin hreh deuh chungin ka let a, naupang an ngai bawk nen. Keimah chiah ka in ngaihtuah thei ta lo a ni.


Phir te pawh kum6 an ni tawh a, Sandra chu kum 10 mi niin naupang fel tak a ni. Baby in pasal a nei leh a, Mason leh anu chanchin ka hre ngai lo. Matthew chu kan in ah a kal ngun hle niin ka nu hnen aţangin ka hria a, ka ngen na angin min biak pawh theihna an hrilh ngai lova, naupangte thlalak erawh an lo entir ve ţhin.


"Nu an harh thei e zahthlak" a ti bai bai a, a tihziah dan in ka ban ah a uai a, ka hlat ah a awm khat zawk. School kal hunchhung hi min hlat rei ber a ni ang.
"Jason...Damon ipi te an lo thleng ţep lokal rawh u" an harh lutuk a mi awm tam na ah phei chuan ka awmpui ngam lo. A fal deuh lai ah ka dinpui a, Jason hi chu a zia, Damon hi a harh zual in a luhlul em em ringawt mai a ni. Sandra pawh a vel ngun a, tihpalh tih hi a sawiluih tir theih der loh. Bathroom a ka kalhkhum pawn a danglam phah lo, naupang te si a luhlul zia hi pui tak a ni. A mizia leh a chanchin ka nuten an hriat chuan pa a mamawh an ti mai ţhin.


"Pute" ti a Sandra phur tak a a au tak ah chuan an lo thleng ta tih ka hre mai. Kan lam pan in Ethan nui vur vur in a rawnkal a, min tlawh turin a rawnkal ngun a, naupang ho in an lo bawh chung chung mai. Sandra an en hrang miahlo hi ka chhungte ka fak na a ni. Baby khan pasal a nei leh tih ka sawi tawh a, a pasal lah kha hnamdang alo ni kher bawk nen, Sandra ka ngaihtuah em vangin aman min ngai bawk a ka awmpui ta zel a ni.


"Ka nute an lokal ve em?"
"Kal lo. In lamah an lo hmuak che u. An rawnkal ve chuan in bungrua nen kan leng dawn lo a, motor dang a ngai dawn a a buaithlak" tih pahin kan bungrua ho a hlang a, a kalna apiang ah ka fate chuan an zui dul dul reng. Jason leh Damon te chuan an in puaktir lo chauh a ni.
"Bike leh taxi an in su a, kan ding rei zek a"
"An na em? Ava zialo ve"
"Na lo e. In ril a ţam em?"
"Ţam lo. Thlen vat ka duh ber" ka lo ti vat a, kan inţhen aţanga kum6 lai a liam tawh hi mak ka ti. Dam chuan kum a vei chak khawp mai.


"Nizan ah Matthew a rawnkal a" kan tlanchhuak tawh a, naupang pawh a hnung ah an ţhu tlar ţhap.
"Eng nge a rawn tih?"
"A ngai. Biak theih dan cheu a hre duh a, Delhi ah pawh a rawnkal ngun. Emma duh aiin i luhlul rei mah mah. Ka chik ţhin a, Irene hi chuan ala duh ngei a, Matthew hian mitmei a hmuh awm ka hre ngai lo. I biru rei tawh mah mah a ni" a ti charh charh a, dik tihna chen ka neih rual in ka rin leh theih ka in beisei chuang lo. Pa a nih angin a fate hmuh chu a phu ve. A faten an pa a ni tih an hrelo ringawt tur te hi ka khawngaih a, Matthew mai bakah naupang pawh ka khawngaih. Debbie hnen aţangin ka pu thih thu leh hospital pawh Matthew kut a a awm tawh thu te ka hria a, Mason erawh Delhi ah anu awmpuiin ala awm reng a, doctor a ni a, kei nurse ka nih rual in vawikhatmah kan inhmu lo a, a bo hmak aţang khan kan in be leh tawh miah lo bawk. Kan hnathawh lam in ang mahse kan thawhna hmun a hrang tihna a ni mai. Delhi hi a zau a, hriatchhuah ka hlauh lutuk vangin mizo thiltih khawm naah pawh ka fate ka telpui ngai lo. Mizoram house ah hian ţhenkhat kan inkhawm ţhin a, mikhual an tam a, inkhawm tur an tam viau chuan in ven nan ka tel lo leh ţhin a, in lamah keiman inkhawmna ka neihpui mai ţhin. Awmpui ka nei a, keimah ka inkhawm ngam loh pawhin ka fate chu an hrechuang lo ang tiin kan nula ho a inkhawm tur a tirh chang pawh ka nei. Sunday anih tawh chuan ka fate hian inkhawm ngei ngei tur ah an ngai tawh a, Damon bawk hi inkhawm peihlo a inkalhkhum tlat chang a nei leh ţhin. Jason nen room an inţawm a, Sandra nen kan inţawm thung. A inkhawm peihloh ni chuan Jason-a thawh rualin inkhawm naa a hak tur a rawn thehchhuahsak a, a in kalhkhum daih ţhin. Rilţam chung chung pawn inkhawm bang thawm a hriat hma chuan a awm ţhin. A naupan zual lai chuan a ti bik lova, tun hnaia a chin thar a ni. Ka duhlo chungin Baby in kan in luahman min peksak char char a, a intiam angin tu hnen ah mah kan awmna a hrilh lo. Hnamdang hausa tak pasal a a neih hnu phei chuan a lo pe lawk diam ţhin a, pek ve ka tum pawh in min lo khalh leh ţhin.


Mason hi tun thleng in ka la dem em em reng a ni. Sandra hi a duhloh phawt chuan ka pe lui dawn lo a, a dam leh dam loh te, eng tiat nge a nih tawh, a nungchang a ţha em? Engang in nge a ţhanlen tih te tal chu ngaihven tur in ka duh. A fa tak tak ah a ngai lo em maw ni le tih thlengin ka ngaihtuah ţhin. Sandra hian ala hria em ka hrelo a, a sawichhuak ngailo hrim hrim. Mahni fa ngei ngaihsak miah lo a a awm thei hi mak ka ti in ka haw takzet a ni. Misual tak ni ila chuan tunah hian Sandra hi rethei tak in a awm ngei ang.


"Kum6 zet i fate i thukru duh hi i thei hrim hrim. Keini lahin i phalna lo chuan kan sawingam silo. I luhlul i chhuah tlat tho sia, thil ţhalo zawk a thlen kan hlau bawk nen. Matthew hi ka khawngaih ţhin. A fate a hmuchak ve ţhin lutuk hi"
"A hunlai khan a chhe ber kan thlen hma khan siamţhat tum sela chuan a fate ka thuhruk a, hahdamna zawnga ka tlanchhiat a ngai nang" ka rilru ka la thlak chuang lo. Amah ka rin na kha ka neihlet leh theih pawh ka ring tawh lo.


"Biak theihna che min dil apianga pek duhloh hi hrehawm kan ti vek. Puitling vek kan nia, kan tan a hrehawm ve zia i hrethiam phak lo anih kha. Ka nu phei chuan pek mai a duh ţhin a, inţhen mah ula in fate vangin inzawmna in la nei reng tho a" a thilsawi chu phir te chuan an ngaithla lo a, an hrethiam vak lo bawk. Sandra chuan alo ngaithla kar a, pa chungchang min zawt ţhin a, ka hrilh nual tawh a, a lo man thiam vek in ka ring. A pate pahnih ngaihsakna a dawng ve miah lo te hi ka khawngaih ţhin. Sandra hi chu a baihvai em a, hmangaih loh theih a ni lo.


"Emma i rilru nat ka duh lo a, i ţah pawh ka phal chuang lo. Mahse nupa inţhen ţhatloh zia i hriat vek kha. Ka sawi duh ngailo a, i ngaihthlak duh ka rinloh vang leh i tawrh nat em vangin ka hrilh nawn duh ngailo che a, tunah chuan rawnlet leh tur a huaisen na inei ta bawk a, naupang vang tal hian in nupa a in siamţhat tum ula a ţha ang" ala ti lehzel a, Jason pawh hian a ţhiante chuan pa anneih thu a sawi leh zeuh ţhin. Kan inţhen na in a nghawng loh ber chu Damon a ni awm e nge alo nghawng nasa ber zawk ka hrelo. An la naupang a an la ngaihtuah tam em em lo ang a, an upat hun ah chuan min zawt ngei ang. Matthew hi kei chuan ka hua a, a fate lehzel in an huat chu ka duh lo a ni.



"Kan thleng ta" Sandra au ri ah hnunglam ka hawi a, nui sang chunga ban phar in a zi mar al al a, phir te chu an tlanchhuak daih tawh.
"I phur tawh viau a ni maw?"
"Aw..nu kal tawh lo ang u aw" alo ti nghal chat a, apite min rawn tlawh tur a an lokal apiangin an ruala haw ve alo ngen ziah reng a ni. Hnamdang zing a awm kha nuam a ti lo ţhin khawp mai.


Inchhung ah kan lut a, Jason leh Sandra ten ka nu malchung an chuh laiin Damon chuan apu a bel chawt thung. Ka pa hi min hmu turin a rawnkal khat ber a, Damon hian a ngai ber tlat thung. 'Api chuan min hau ţhin' a ti mai a, an tih hnawk vel phun chung a a tifai ţhin kha a lo haw ve em em mai ţhin.
"Emma...." ti a au chul chunga Debbie rawn lut chuan min kuah nghal chung chung a, kum6 chhunga ka hmuh miah loh leh bawk chu Debbie hi a ni. Ala nula reng a, ahma aiin alo cher deuh a, a sam a tan tawi vang nge ka hmu naupang zawk.
"Engemaw tal min lo hawn em? Kum6 chhung i pasal in min umzui chung a i awm na ka zep tlat vang pawh thil ţha deuh ka phu" zangkhai vah in a ti zui bawrh bawrh a, min la kuah reng bawk.
"Ka chau rih. Ka hawn ţeuh che. Nakin ah kan la phawrh dawn nia" mak deuh maiin Matthew an sawi hian ka awm ala nuam lo reng. Kum6 chhung khan ka theihnghilh miah lo bawk. Hmangaih kan nei anih pawn lunglen na hi awmhran chuan thla khat hnu ah te a reh mai ţhenkhat in an ti ţhin a, keichu chutiang ka nilo. A fate ka hmuh reng vang nge nikhat pawh ka theihnghilh ngai lo. Nilenga ka ngaihtuah loh pawh in naupang ka muttir laiin ka mitthla ah a rawn lang ziah ţhin. An lian telh telh a, apa an ang zel emaw tih tur a ni lehnghal.


"Sandra hi a nula tawh e. Jason leh Damon pawh hi thlalak aiin ka hmu lian daih. In hmelţha hlawm e. Min hria em? In nutei ka nih hi aw" nelawm taka a tih chuan Sandra leh Jason ten an lo nuih ver ver a, Damon chuan apu sana bunlai a laksak ngawt chu ala thlek vung vung a, phelh darh leh dan a ngaihtuah tih ka chiang. Toys pawh ţhiah darh loh tlem te chiah a awm. Sandra-i barbie ho lah a bawp alo thlawn thul, phir ve si ah chuan an hmel chiah a in ang a ni ber. Jason a zaidam in a rilru a no em em a, Damon a luhlul hle thung.


"Damon hei i nutei a nih hi aw" Debbie aiin ka ţawng ring deuh. Min en ha a, chumi hnu ah Debbie a en leh a, a sana kenlai a en leh.
"I zak a ni maw? Damon chu a zakzum hle mai" tiin Debbie in ala fiamzui hram a, Sandra chuan Damon mizia a hrechiang bawk a, min rawn melh ralh a, a ngaihţhat nan ka lo nui ringawt. Damon hi chuan ka mize ţhalo lai a chhun aniang nge apa mizia zawk ka thliarhrang thiam lo.


Ka inbual chhungin ka nu leh Debbie ten naupang an lo bual ve a, ka zawh meuh chuan an lo thlak fel diam tawh. Kan ţhutkhawm ţhup laiin "Matthew fate an nilo pawh tila tuman an awih lo ang" tiin Debbie in min rawn hrilh ru su su, naupang ho ka nu in choka a a hruai luh veleh "Naupangchhia min ti dawn tih ka hre tho a mahse Jason hi ka duh zawk" a tih zawm leh a, Sandra kal liam tawh na a en leh lai chuan min zawh tur ka hre lawk. Min zawh hma in "Baby in pasal a nei a, Mason erawh chu a chanchin hriat ka neilo. Baby hnen aţang pawn ka hrelo a, Sandra pawh a rawn ngaihsak lo" ka lo tih khalh a, a thinrim hmel leh tawh khawp mai.
"A thi tawh a ni lo maw?" a ti hluai a, thi se chu kan hre ngei ang.
"Thi lo tawp ang. Sandra a ngainat loh zia i hriat kha. Sandra a hmuhloh theih dan chu keini min hlat hi a nia, min hel char char tihna a ni mai"
"Matthew hi hna a chawl ngun a sin. Hospital hi a kut ah a awm tawh a, a zin an ti deuh reng a, a zawng cheu niin ka hria. Ka phone khawih laite hian a rawnkal thut a, a rawn bih ngur ngur zel a, i hming hi a dang daihin dah lo ila chuan a hre daih tawh ang" a ti duah a, ka hmelhriat hnai te chu ka chanchin zawh loh a nei miah lo tih ka hre daih tawh.
"Ka nute pawh hi puitling nilo sela chuan a zawt lui thovang. Ngaihdam alo dil a, ka awmna leh min biak theih dan a zawt chamchi a, kei aiin midang a ngaihven zawk a, ka tlanbo hnu ah min zawng leh chiam a, a inchhir tlai emai" ka ti hmak. Baby pawh a zawt a, Sandra ka enkawl sak miau vangin Baby ka lam ah a ţang lo theilo a, ani pawn a khawngaih thu a sawi ziah a, a hrilh ngai chuang lo. Kan kal hma te khan kan in a rawnkal a, in lamlet hun a nei, rawnkal lo in biak pawh min be duhlo a nih kha. A mawhphurhna sanzia a hriat ve a ngai a, na tak chungin ka biru ka ta reng a ni.


"Tunah chuan a inchhir tawh in ka hria"
"A hun ve tawh reng a ni. A pawi ber zawk chu amah hi ka rin leh theih ka ring tawh lo" ka tih laiin Sandra-in men pur chungin min rawn ngheng a, asthma a lo nei tak tak a, han buai zeuh chang pawh kan nei ţhin. Heivang hian enkawl nasat lehzual angai a, amah pawh a zawi awi a, ka duat vang nge a rilru a no hle bawk.
"Ngatinge?" ka tih rual chiah in "Ka vel lo" pawr tawkin Damon zawk in a rawn ti nghal. A vel tih a chiang nghal vek bawk.
"Sandra eitur a laksak anih kha amah pawn a nei ve reng si. A in ang vek in ka pe a, a inzat in ka sem bawk a" ka nu in a rawn ti veleh a, thubuai rem ka ngai ve reng tawh.
"Damon i thiamloh anih chu. I duh belh chuan ipi i dil leh mai thei alawm" ka tih chuan a ngawi ran a, a hmel hmuh a nuam lo leh nasa tawh. Chu chu hria in ka nu in "Lokal ru. A tam alawm. Thil ei ngailo ang mai eitur vang chuan intibuai lo teh u" a ti a, Sandra a pawt tho a, Damon kaih ve a tum lai chuan alo duh der lo. Ka mitmei hmanga ka vau pawh in min ngaipawimawh lo deuhin choka lam ah a kal nghawng nghawng a, a kal liam hnu ah ka nu chu hah hmel takin a thaw hawk a, ka-tih-reng-kha tih melh hian min melh a, pa a mamawh thu a sawiziah reng alawm. Debbie a awm vangin engmah sawilo in Sandra kaiin choka ah a lut leh a, "Vaw hrep rawh" Debbie in alo ti fiamthu nghal zat.


"A naupanlai aţanga i thunun loh chuan a upa zel anga, a har telh telh ang" thutak deuh zawk in a ti leh a, ka enkawl dan a in ang vek a, enkawlna ngai vek dawng ah pawh naupang hi an lo danglam thei khawp mai. Matthew hi Jason leh Sandra chuan pa atan an pawm mai anga, Damon hian engangin nge a ngaih ang ka ngaihtuah thiam lo. Kum6 mi lek si hi a danglam takzet a ni.


"Jason i puar tawh mi?" choka aţanga Jason rawnchhuak chu Debbie in alo pawm a, Jason chuan zak tak a nui chungin min rawn en a, "I nutei anih kha" tiin a tlangnel nan ka hrilh nawn leh.
"Hmun dang ah awm daih lo ula chuan ka awm ţhin cheu nga min nel viau tur a nia" a ti nang nang a, kan hun tawn in zir miau hek lo le. Naupang pawh an hrehawm phah tak tak khawp mai.
"Nute khawilai nge in in" Jason-an a tih chuan Debbie phur lutuk chu a auchhuak lo chauh a ni.
"Heta ţang chuan a hla nakinah lo la leng rawh aw"
"Awle"
"Ivan duhawm reuh tak" an infiam lai chu rilru hlim takin ka lo en a, Matthew khan nu leh pa hmangaihna an dawng ngei ang a tih laiin Mason chuan an chhungkua aţanga nau piang chuan nu hmangaihna chiah an dawng ţhin a ti thung. Ka fate pawn pa hmangaihna leh ngaihsakna an la dawng miah lo a nih hi.




Zan ah naupang mut hma an duhzawng en in living room ah kan chhungkua in kan ţhu ţhap a, Sandra leh Jason ten min ngheng a, Damon chu apu bulah bawk a awm. Apu hi a ngaina takzet a ni. Doorbell a ri ral ral a, naupangin min delh tlat vangin hawng turin ka nu a tho a, a reh zui vang vang hnu a ka hriat leh chu "Matthew a lokal" tih a ni mai.


Ka thin a phu dup dup a, Ethan a tho nalh a, room lam a pan nghal lo in ka ţhutna bulah a lokal a, ka beng bulah "I hmuh hma leh a ţha, Emma siamţha rawh u. Naupang an lainatawm. I fate hmel hi en rawh an pa ngei an hriat miah loh hi. I rawn haw tih ka hrilh anih kha" a rawn ti sup sup a, midang awm laia min hrilh ruk vangin ka awmdan ka ti danglam duhlo der vel a, diktak chuan ka hmu hreh khawp mai.


Kan ţhutah ah min hlat deuh hlek in a ţhu a, reitak hmu tawh lo mah ila a danglamna a tam lo. Hun harsa tak a paltlang ve a ni tih a hriat viau thung. Jason leh Sandra te chu ka bula ţhu annih vangin kan lam a rawn hawi duh chiah lo a, kan ep chiah a apu malchunga ţhu Damon a en ngun em em thung.


Chhuanlam siam in ka nu leh pa te an inthiarfihlim a, ţullo ka lo ti khawp a. Kan lam a rawn hawi lai chuan ka lo zam takzet a, a chauh hmel in rilru hah na nasa tak nei a ang. A ngaihzawng nen an hlim zui vak lo a ni maithei.
"Pa i dam em?" Sandra chuan alo ti reuh a, puitlingin engmah sawi nachang kan hriatloh laiin fiah takin a rawn ţawngchhuak. Kan inneih thlalak leh thildang te pawh ka phone hlui zawk ah ka dah a, Sandra hian en ţhin bawk mahse ka hrilh chian hma chuan a hriat ka ring miah lo a nia. Matthew pawn chhan mai nachang a hre biklo.
"A biak che chu" ka lo ti hlak a, Sandra in a chhan na a ngaihchan reng vang a ni.


"Aw dam e. I damţha zel em? Iva hmelţha tawh ve" lai deuhin Matthew pawn a lo ti ve a, phir te hi chuan an hre dawn miah lo a, hrilh ka la tum tho. I fa a ni lo tih emaw ipa a thi tawh tih ang vela hriattir ka tum ve lo a, ţha ka ti hek lo. In ţhen hlen dawn mah ila pa anneih thu hi hrilh ngei ka tum a, min zawh chang pawn pehhel deuhin ka sawi ţhin a, ka hrilhfiah chian hma in a rawn lang ta zawk a ni.
"Jason...Damon hei apa anih hi" Sandra chuan a ti leh a, kei chauh nilo Matthew pawn Sandra thil tih dan chu mak a tih hmel khawp mai.


Phir te chu an la ngawi reng a, Jason chu ka hnung lam ah ding in ka nghawng ah nghet tak in a kuah a, Damon lah a che eih lo. Ipa kan la hmu dawn tih tal ka lo hrilh lo ani ti rilru chungin ka in hau ru mawlh mawlh a, Matthew hian ka la ngaidam chuanglo tih a la hredawn tho a, tunah chuan naupang hrilhfiah a hun alawm, an hriatloh chhan hi ka thiam loh a ni ve tho a ka ti rilru a, Jason chu ka sir a ding turin ka pawt a, a kawng a ka kuah hnu ah "Damon lokal rawh" ka ti leh a, mak tak maiin min hnial biklo. A mak tihna in a tur ve a ni maithei.


"Ipa kan hmu dawn tih ka lo sawi theihnghilh a, hei a lokal a" ka lai ve tho bawk si chuan ţawngkam chheh mawi dan ka hrebik lo. Matthew lah in kei aiin sawitur a hrelo zawk a, naupang pawh an la kimki reng tho. Ka nu awm se a hrilhfiah thiam zawk tur.
"Ka hmuhloh kar ah cheu in lo lian tawh hle mai. Tun aţang chuan nitin ka rawn hmu tawh ang che u" a ti ve ta nge nge a, keichuan en pawh ka lo en duh chuang lo.


"Tinge min hmuhloh?" Jason zawk chuan a ti ta khauh a, "Lokal la ka hrilh ang che. Hmuh loh chhan che tam tak ka nei a" a fate a biak chuan a awki a nem ve khawp mai. Awlsam takin Jason chuan a pan mai a, Damon zawk chuan ka kut ala vuan tlat thung. Jason awmna lam a nih vangin loh theih loh in Matthew ka en veleh hram a, Jason chu a malchung ah ţhuttir in a kuah vang vang phawt. A ngai ve takzet a nih ka ring ve hial. Ka nemnghet ngam chuang lo. An senlaiin a ngaihsak tak tak lo a, an sen lai bak a hmu bawk silo a, a ngaih ve theih ka ring vak lo. Sandra chuan Damon min vawn na phelh tir a tum a, min vuan nghet sauh sauh zawk. Apa tih a hriat chat dan kha ka zawt chak tawh reuh khawp mai.



"Ka hmuh loh chhan che chu a tam em a, nidanga sawiah kan khek zawk dawn nia. Tunah ka hmu tawh che a, nitin ka lo hmutawh dawn che a" a ti ta daih a, Jason pawh che lo in a ţhuttir dan ngai ngaiin a ţhu ngar ngar. An vawikhat hmuhna a nia a pawm a duh ringawt pawh a mak ngawt zawk alawm.
"I phone ah games a awm em?" a tih chuan Sandra nen in en in a rukin kan nui a, phone ah games khelh ka phal vak ngailo a, Jason chu a thlamuang deuh nge ka awm lai ngeiin vawikhat chiah ala hmuh bulah games a dil ngam mai a nia. Matthew lah games lawm lo chi a ni bawk nen, ka rin ang ngeiin "Nei miah lo. Eng games nge i duh? Kan dah dawn nia" alo ti sam et a, Jason pawn a games duhzawng a sawi ve ta par par a, in pawhna ţha tak ah a ngai ngei ang chu.


"Nu games ka duh lo" Damon pawn a ti pawr veleh ta hlar mai. Chu chu hria in Matthew chuan "Lokal rawh Damon, in khel dun dawn nia" a ti a, mahse Damon chuan "Ka duhlo" a ti tlat. Ka rindan vel. Jason chuan midang nel mai a awlsam a, Damon chu a ni veleh tlat lo. An tet deuh lai phei chuan ka phah nasa ţhin. An hming a a ko thei chu mak ka ti viau dawn a, a hranpa daiha ţhu Damon kha ka ko tawh tih ka hrechhuak leh a, nidanga a hmuh hun ah a hriathran ka ring lo thung. Hmu ţhang deuh tan lo chuan phir hriat hran chu a har ve ţhin. Apa ngei pawh nise tun hi kum 6 hnu a a hmuh lehna hmasa ber a ni.


Sandra ţhutthleng dang ah a muhil a, Damon ka malchunga a lu dah in a muhil a, Jason chu phone keng chungin Matthew bulah a muhil. A tlai deuh tawh a, an chauh vanga an mutthilh hma ka rin laiin an muhil har zek zawk a. A room aţanga Ethan rawn chhuak chu naupang mut ţhattir tur in ka lo ti a, Sandra pawm hmasakber pah in "Matthew leng reng rawh aw. Kan muttir lawk ange" a ti hram a, ka pasal hlui hmaizahna nei map lo in "Ka chau a, keipawh mut hma ka duh" ka lo ti vat a, ka thusawi chu Ethan chuan a haider hmak. Naupang ho a sawn hnu ah a room ah min luhsan leh hmak bawk.


"Ka zawn nasat zia cheu i hria em? Pa nei lo a naupang awmtir kha hrehawm iti lo mi?" thinrim taka min tih chuan ka ţang nghal ţeuh a, in hnial ka inpeih nghal em em ringawt.
"Nupui fanaute aia ngaihsak dang neilo chu nila hnamdang zing ah naupang ka bihruk pui lovang. Min dem hma in in enfiah hmasa phawt rawh" ling hlar in ka lo ti ve. Hrechiang miah lo a min dem nghal ngawt ţhin hi engvanga la ngai tlat ţhin nge maw ka nih le.


"I ngaihdan ang ang min nih tir a, finfiahna neilo in min ringhlel a, thil tisual tur a min ngaih tlat vanga inţhen kan nih hi. Nangmah chiah i in ngaihtuah" a ti ve khur khur a, kan dan ngaiin kan inhmu chiah a kan in hau lehnghal a nih hi.
"I nupui ber in ka ngaihtheih loh chu thlah hmak tur inih laiin thikthuchhia min tia min haw let zawk anih kha. Kal tawh rawh. Ka sawi tawh kha, ka chau mut hma ka duh" ka ti hmuk hmuk a, awmluih zel nuam a tih ka ring biklo.


"I thukru leh a nih chuan zawnchhuah leh nan che u mualpho ţhak ka huam tawh ang"
"Ka thukru lo ang. I fate ngaihsak duhna ineih ve tawh te chuan i hmuh ka phal vek mahse neih leh che hi ka tum tawh lo tih hria ang che" ka tih tan tan lai chuan a nui hawk a, ka thinrim zual sauh thung.
"Min neih leh theih nan engpawh ka ti ang" a tih hnu ah nem deuh zawk in "Ka ngai ţhin che Emma" a ti leh a, ka kut vawn a tum veleh ka lo la sawn a, melh ram ram chung in "I fate nen a inzawmna inneih chiah ka phal. An pa inih angin chu chu i phu ve. Keichu ka rilru put hmang ala ngai ang" khauh takin ka ti leh hmak a, min ngaih chang ringawt a a bula awm tur ka ni hleinem. Min nei leh anga, a thlamuan hun ah midang a kawp leh tho ang tih rilru hi ka la pu tlat. In lak hran tlat ka duh a, naupang lakhran leh tumna ka nei tawh lo thung. An pa ania, an duh duh hunah hmu rawh se pawi ka ti tawh lo. Pa neilo a an awmreng chu ka khawngaih ve tho va, chuti chung chuan ka la in hawng thei tlat lo. Ka lo kehchhe nasa hman viau a ni phawt ang.


"Naktuk ah ka fate nen ka rawn hmu ang che u. I tlanbo tawh loh nan ka rawn vil tawh ang che. Chawl hahdam rawh" min chhuahsan hnu pawn ka ţhutna ngai ah ka la ţhu reng. Ka awmdan pawh a la ngai. A awm laichuan ka thinrim in ka haw hlur a, a thiamlohna ni a ka hriat te pawh sawichhuah vek ka chak a, tlem te chauh ka sawi ţhin thung a, a awm lo chiah a, ka khuahar in ka ruak huai ţhin. Kum10 vel tal lo biru ila ka rilru puthmang hi a danglam zawk angem tih mai mai te ka ngaihtuah a, ka ngai ve tho chung hian ka rilru puthmang ala ngai reng. Ka rinna zawng zawng kha min neihlet tir leh hma chuan neih leh ka tum tawh lo.



CONT.... (A hnuaia milem khu inhmuh theih chuan in lo click theuh dawn nia, thank you-J)

---

FORCED MARRIAGE-23



"Nu.....apa a lokal a" Sandra in zawi te te in min sawi a, ka la harh lo maw a ti niang.
"Ava hma ve. Ka lo tho ang" mut ka la kham chiah lo bawk nen mutchhuak aw tak in ka ti tham ţuak mai.
"Aw tho rawh a tlai ang" a ti leh a, ka thawh hma chuan kalsawn a tum lo a nih hmel. Peihlo tak chungin ka in bengkang a, chhuak lehnghal mai sela chuan thawh pawh ka tum lo.


Ka inphih harh sawk sawk a, chumi hnu ah ka sam ka chul mam leh thuak thuak a, Sandra nen chuan room aţangin kan inzuichhuak a. Step ah kan inkaithla dat dat a, step tawp kan thlen hma aţang tawh in phir te thawm a hriat ţan nghal. Matthew ţhutna hma a chhuat ah ţhu in phone an inchuh a lo ni. A bulah pawh ţhu duhlo in a hranpa in ka ţhu a, "An school luhna tur ka lo ngaihven ang" a tih chuan "Ala hma. A ţul hun ah ka ngaihven mai ang" ka ti hmak.
"Fiona u Caroline hi Mary Mount ah a thawk a, school ţha a an luh iduh chuan ngaihven hma a ngai, a laklawh a lut tur lehnghal. Caroline chuan min puih theih ka ring. Ka lo zawt ang" a ti leh a, dik ka tih ve tho vangin ka hnial duh ta lem lo. A la buaipui ve miah lo a, an school luhna tur tal chu tifel ve teh se.


"Phone kha dah rawh u" ka ti tuarh a, an rin loh takin ka vin nge an ţhutna hma chhuat ah an dah rang khawp mai. In biak hleihtheih loh khawpin phone inchuh in an bengchheng a, phone hi an en tam ka duh lo hrim hrim bawk. Zing aţanga Matthew a rawnlan vangin ka thinrim nghal ţun mai bawk. Ka ţhutna aţanga tho in chhuata phone an dah chu ka chhar a, Matthew awm na lam a vawm pah in "Entir tawh suh in hnial nan an hman phah" ka la ti vin hlar tho. Ka ţhut leh veleh phir te pawh ka bulah an lokal nghal a, Matthew chu an la nel chiah lo. Jason zawk chu a zia a, Damon hi a hnaih ah ala awm ţha duhlo.


"Khatin naupang vin vak suh ngaiah an nei mai tur a sin" a rawn ti ve hluk a, ka ngaipawimawh lo nasa.
"I enkawl ve lo a, an mizia pawh i hrelo" ka ti deuh kher a, a fate aiin hmeichhia a duh zawk tlat alawm.
"Ka enkawl phallo in i thukru a nih kha. Naupang ka enkawl loh vang hian min dem miah suh. Siamţhat tum in hma ka la mek a nih hi"
"Siamţhat theih inei tawh lo" ka ti hmak a, naupang an awm tawh vangin ka hnial vak duh lo.


"Vawin hi mi ka zai ni ania, tlai ah ka rawnkal leh ang" ka chhan na nghak in min en run mahse engmah ka sawi duh lo. Ama thu thu a awm hi nuam a ti ber.
"Eng nge ka lo hawn ang cheu" phir te bulah a ti ta daih. Sandra a awm ve lo a, choka lam ah a pi bulah a awm anih ka ring.
"I lokal leh dawn mi?" tiin Jason chuan inthlahrung dak in a lo zawt a.
"Dawn e lokal teh" a tih pawn a kal leh mai. Matthew chu Jason chen tur a ţhuhniam in a kuah leh a, chumi pah chuan "Damon lokal ve la" a ti bawk a, lu thin pah in Damon chuan ka nghawng ah a kuah tlat. A hriat hran dan ka hre lo a, chhinchhiah rukna a nei a ni maithei. An mizia ah hian hriat hran an awl ber.
"In duh duh ka lo hawn ang che u"
"Barbie ka duh" Sandra a rawn leh hlawl mai. Khawi aţanga lokal nge anih pawh ka lo en lo.
"Ka barbie a chhe ţeuh a, a thar ka duh" a ti leh a, naupang tak tak angin khalh tawh lo mahse a keng reng a, an sam te hi a tuai a tuai zel.
"Ka lo hawn dawn che nia" phur takin alo ti a, Sandra-in a sawi tak ah chuan Jason pawn "Keichu Monster truck" lai rut in alo ti ve a, min hlau deuh a ni ngei ang a sawi lai chuan en pawh min en ngam lo.


"Damon duh inei ve em?" ti a nelawm tak a nui chungin Damon a rawn en a, Damon chuan min en hmasa te te a, "Sawi la" ka lo tih tak ah chuan "Keipawh monster truck tho" a lo ti ve a, a unauten an neih vek chuan a it veleh dawn tho tho. Sawilo mahse a rawn hawn tel ka rin tho laiin a sawi khan Matthew tan pawh a nawm deuh ka ring a, Damon hian a pawh lo bik em em a, chung ringawt pawh chu atan a hrehawm tham a ni.



"Matthew hi ineih leh a ngai a ni" naupang thawmhnaw ka thlehfel laiin ka nu a rawn lut a, a thu rawnsawi lah ka lawm loh zawng tak a ni lehnghal.
"Ka hrehawm tawrh na hrechiangtu inih kha. Neih leh ka tum tawh lo. Ka ring thei tawh thlawt lo a ni ber" beidawng tak in ka lo ti a, ka hmuh hian ka beidawn na a zual niin ka in hria.
"Naupang hi thunun ngai rual, nu leh pa inkar a awm rual an nih tawh hi. I fate nun a chhiat loh nan i haw leh mai ţha kan ti a" min ngaichang tak chungin a rawn ti a, chhanlet vak ngaihna ka hre chuang lo. Ka chhan na neih ve chu hnial na thu chauh a ni rih.



"Chhungkaw kehchhia hian rin phak bakin naupang nun a nghawng a, Matthew an hre miah lo ringawt te hi keichuan ka lainat lutuk. Reitak kan thuhruk vanga inthiamlohna ka neih hi a reh thei lo. Hetiang a nih chuan nakin zel ah an pa ngei nen a an inkar hi a khi zau tial tial ang. I fate ţhatna tur aiin i hahdamna i ngaipawimawh zawk niin ka hria" a rawn ti leh khauh. Khum a thawmhnaw awm darh nuaih mai a fawmkhawm hnu ah a rawn ţhu rem sauh sauh va, a thawmhnaw lak khawm ho chu a malchung ah a dah a, "Tihluihna in pasal min neihtir a, reilote bak hlimna a awm lo. Tun ah hian tihluihna bawka min neih nawn tir leh itum a, ka hlim leh chuan ka ring lo" ka ti sep a, ka thiltih lai pawh ngaihven lo in hnuailam ka bih ngur a, ka nu hmel chu ka en duh rih lo.


"Fa pathum inei a, pa an mamawh. I upa zel anga, i kianga awm reng tur pasal i mamawh. Tunah hian i hrethiam lo a ni maithei. Nupa kan inţhen reng reng hian hmeichhe chan a chhe zawk. Damon hi en rawh, thunun theih miah loh chang ineih hi. I rin aiin naupang hi an fing ania, pa a neilo hi Jason aiin a tuar na daih zawk" ka ipik lutuk chu ka thawchhuak halh a, Matthew a tel ve tawh hi chuan ka ipik tlat zel. Rin na hi neihlet leh alo har em a nih hi. Ka ring leh a, ka lo ring sual leh anih chuan ka damchhungin ka chhe vek tawh ngei ang.


"Ka thu lo chuan min neih luihtir tawh lo ang tiraw?" tiin beiseina sang tak nei chungin ka zawt a, naupang ka hmangaih rual in neihleh chak na ka nei rih silo.
"Emma khawngaih in. Tunah tak chuan nangni aia in fate in ngaihtuah a hun tawh. In hnawk kan ti a, kan ngaitheilo cheu a nilo. Naupang ho pawh hi ngai viau mah ila pi leh pu aimaha an mamawh chu nu leh pa anni tlat si a ni. A hma anga tihluih theihna che kan nei lo mahse haw leh la kan duh ber" ala ti thova. Ka fate ngaihthah in keimah chiah ka in ngaihtuah em ni tih thlengin ka ngaihtuah thleng ve tho.


"Emma ka pan a hmu duh che" ka nu nen a kan awm naah ka unaupa a rawnkal a, ka pa chu a office tur ah ka lo ngai a, a thusawi tur pawh a ngai thovang. Ka nu nen an thusawi a in ang reng ang. A chang leh ka in dem a, a chang leh ka nu leh pa te chu ka tawrhna hrethiam lo tiin ka dem a, min khawngaih vanga ka bihruk pawh min phalsak tu kha an ni tho si.


"Lo ţhu rawh. Nutling ini ve ta reng a, naupang ang ah ka la ngai tlat ţhin che" ti a min lo fiam pah in a hma a ţhutna a kawk a, ka pa in a hrang meuh a min hmuh duh chuan thu ho mai mai a sawi lo tawp ang.
"Naupang hi ka en ţhin a, heti ringawt a an awm hi ka ţha ka ti lo a ni. Inu nen kan sawidun a, inpa nen hian awmdun leh ula in boruak ţhalo pawh hi siamţhat a awlsam zawk kan ring a" a ti charh charh a, ka kut ka khal niap niap a, hetiang hi a ni dawn tih hria ila ka la biru reng mai tur.
"Pasal te koh miah loh a haw leh ringawt ka duh lo. Bakah ka pasal hi ka ring thei tawh dawn chuang lo. Ka mamawh lai ber a min kalsan tur a nih hi"
"I bihruk lai aţang tawh khan a rawnkal tlut tlut a, in lengbo mai mai a nih ring in zanrei tak tak thleng a nghak che u. Tun hnai ah phei chuan nitin a rawnkal. Nizan ah a pa in min rawn bia a, in hruai leh ţha kan ti tlang a ni"
"A awmdan ho te vangin in khawngaih nghal a, a fate sen lai a midang kawp duh a nih hi. Thlalak ka hmu a, an chanchin min hrilh tu a awm reng bawk a, khawi hmun ah pawh kal se ka ringhlel zel tawh dawn tihna sin. Rinna hi a chhiat tawh chuan neih let theih a ni tawh lo. Keiphei chu ka thinlung a kehchhe tel vek lehnghal. Kan awmloh hnu a a rawnkal reng vanga ka ngaihdam na chhan tur ka hrelo" thinrim takin ka ti bawrh bawrh a, ka pa chuan uluk takin a ngaithla. Min tihluih ka rin tawh loh laiin "I fate hian pa an neih loh vangin hrehawm an la ti ngei ang. Chung i hmuh hun ah chuan tun ai hian inat ka ring a ni. Fa te hmangaihna thuk zia i hriat ve tawh hi"
"Chuvang chuan ania Matthew hi an pa ani tih ka hrilh"
"Nu leh pa awmdun lohna inchhung chu a nuam tak tak thei lo. Thihna hi tuman kan dang thei lo. Kan la dam anih chuan nupa chu kan awmdun ngei tur a ni. Tlawm zawk a ţan hrehlo ve ve ila, in hau buan buan lo in Pathian rawn chungin kan buaina sawidun ila, in hmangaih tak chung in ţhian ang in inkawm tel thei ila nupa chu kan hlim a ni mai. Pathian fa ţha tak tak a pe cheu a, in tih fahrah kan phal lo. Chhungkaw kehchhia aţang nilo in chhungkaw awhawm leh in hmangaih tawn chhungkua aţanga seilen tir kan duh" a ti duah a, ka pa hian thil a sawivak ngai lo. Pa ngawichawi tak leh ţawngkam thiamlo ve tak a ni. Hetianga a sawiduah tawh hi chuan a vei hle tihna a ni mai.


"I thinlung na tlat ţhin kha i pasal leh i fate hmangin tidam la, i chhungkaw kehchhe tur hi veng zawk rawh. Hmeichhia hian in rin aia nasa chakna in nei a, chhungkaw siamţha turin mipa aiin in pawimawhna a nep chuang lo. I pasal in hmeichhe dang a khum vek a tih theih tur khawp a nupui ţha nih tum zawk rawh. Tlanchhiatsan lo in hmachhawn tawh rawh" tiin min fuih a, ka pasal tan a nupui ţha ka nih leh nih loh ka lo in chhut ngai miah lo a, tihluihna hmanga min neih vanga min ning leh vat ang ah ka ngai mai ţhin. Nupui ţha ber nilo mah ila, reitak kha chu hrethiam in ka dawh hram hram a, ka theihtawp ka chhuah ve chuan ka hria a ni.


Ka pa nen a kan inbiak hnu chuan office tur in tlai khawhnu ah a chhuak a, ka nu leh Sandra chu ka pa rualin bazar turin an chhuak ve a, Ethan lah ka pa nen a kan inbiak laiin hna kal turin a lo chhuak tawh bawk a, phir te nen chiah kan awm. Ţhutthleng nghenchhan ngheng in duhdah deuh in ka ţhu a, ka zawi em em lai pawn min bawh reng peih tho.
"Nu zinga lokal kha a mi?" Jason chuan a rawn ti chhuak hlawl a, Damon chereng pawh tawp ve chawt in ka chhan na a nghak ve ran mai.
"Ni e. Ipa anih kha"
"Damon pa pawh maw"
"Aw.. Sandra pa a ni bawk a, in vaia in pa anih chu" ti a nui lui chungin a sam ah ka chul a, Damon chuan engmah sawi ve lo mahse a ngaithla in a hrethiam tih ka hria.


"Kan bulah a awm silo a" Jason bawk chuan a ti leh a, hetiang sawifiah hi an tet deuh lai aţanga ka huphurh ruk reng tawh a ni. Thudik tak ka sawi a nih chuan thil an hriatthiam hnu ah phei chuan kei leh Matthew hi an haw ve ve maithei.
"Kan awm naah khan hna ka thawh angai a, ipa in helamah hna a thawh angai bawk sia, kan awm ho theilo a" tiin dawt ka sawi a, fate dawt hrilh harsat zia ka hre leh chiah bawk. Ka thil hriat ngai miah loh zirchhuah leh hriatfiah ka nei ta nual a ni.
"Kan bulah awm tawh se" a ti leh ta reuh a, api leh puten sawitur an hrilh amaw tih mai tur a ni. Min nawrkal turin ka fapa thuawih zawk hi an hmang pawh a ni maithei. Awlsam takin midang ka ring chhe zung zung ta mai a nih hi. Ka pasal in ka rin na a tihchhiat aţang khan tumah hi han rin ngam vak ka nei tawh lo.


"Ala awm maithei a sin. Nghak phawt ang u. Ka bula awm hi a nuam lo mi?" ka tih chuan Damon zawk in "A nuam" a rawn ti vat a, min chhan hmanhmawh vang nge a pawr em em bawk.
"A ţhat chu. Ka bulah in awm reng thei tihna a nih chu"
"Apa kha kan awmtir ve dawn lo ami?"
"Pa iduh viau ami? Jason"
"Duh e" a ti pawr ve hlar mai.
"Anih leh Damon ve"
"Ka hrelo" a ti tawi tak a, Jason chu alo hnual deuh rawih ang in a lang ve reuh a. Phir enkawl hi thil awlsam a ni miah lo a, kum6 chhung keimaha ka enkawl thei kha ngaihtuah let chuan amak duh. Ka pa in hmeichhe chu rin aiin an chak a tih kha a dik a ni maithei. Kan chak in kan tuarchhel a ni.


Ka hritlang damdawi eiin min hneh deuh a, ka zawi em vangin ka nute lo haw hnu ah ka mu zal a, Jason leh Sandra te chu Matthew nghak in pawn ah an awm. A thil rawn hawn tur an hmuchak tawh a ni ber. Damon chu a tihziah dan in a pu bulah a tap chawt. An ngaihtuahawm loh bawk a tiin ka mutsan a ni.



"Ilo harh tawh maw?" ka khum zawn tukverh bul a ding a min lo en run ka hmuh rual in thawhphan pawh neilo in ka ţhuchhuak nghal.
"Hetah eng nge i rawn tih?"
"Ka rawn hruai dawn che" tih sup pah in ka awm na ah a rawnkal a, ka bulah inthlahrung map lo in a rawn ţhu.
"Rawn haw ka tum reng reng lo"
"In hrul a i pangpar phun ho kha an lian vek tawh a, Sandra pipu tur kan pahnih a kan siamtir kha a ngai ngaiin ala awm a, ka chhuah dawn ah in infiam dun lai kha ka mitthla ţhin a, ka haw hnu ah pawh chutiang tho chu. Sandra tet lai bak ka mitthla thiam lo zawk a" a nui hawk a, ka pangpar phun kha chu an lo enkawl zui pawh ka ring lem lo a.


"Inchhung pawh i chei ang ang in ka la dah. Pi Sangi pawn a tifai a nih loh chuan a ti danglam lo. Inchhung ah hmeichhia ka hruailut ngai lo a, in rawn haw hun ka lo nghak reng a, kum6 hnu ah ka nghakchhuak ta cheu a nih hi"
"Ka awmloh hnu ah engtiangin nge i khawsak zui ka hrelo a, ka ngaihven hek lo. Ka duh leh ka zawn ber chu hahdamna a ni mai. Kan nupa inkar ah hmeichhe dang an inrawlh thei a, ngampa taka an awm thei anih chuan i thiamlohna chen tam tak a awm. Diktak chuan ka ring thei tawh lo che" ka ti khauh bur a. Min nawrlui thei bik lo ang. Ka thinlung ka khar nghet tlat tawh ti dawn ila ka thinlung ah hmun ala chang reng lawi si. Ka khar nghet anih pawn ka pasal, a mawhphurhna hlen nachang hremiah lo ţhin hi ka lo khar hnan palh a ni ngei ang.


"Ka hria. Kan inţhen hlim khan kei ngei pawh hi ka inring zo lo. Ngaihzawng ka neihsan ngai lo che a, hlimna ka siamsak thei chuang lo che. In ngaihtuah harh tum in ka in la hrang a, ka in ngaihtuah chhuah meuh chuan ka lo tlai hret a ni. Siamţhat ka tum ang. Khawngaihin lo let leh rawh. I pawisawi ka nei ţeuh a, min ngaihdam theih chuan min ngaidam la, i theilo anih pawn i theih hun ka lo nghak ang"
"Theilo ta ila"
"Ka nghak ang. I lung tih awihloh nan hun tam tak ka hmang a, i ngaihdamna ngen a nawr tut tut tur che ka nilo"
"I nghakchhuak peih kherlo ang. Ala rei dawn"
"Dam rei lehzual ka tum angai a nih chu" a ti fiamthu a, a ngaih anga awlsam a ni hauh lo ang.


"Ka lo haw leh a nih pawn ka nu leh pa min tur nasat vang leh naupang vang chiah a ni ang. Keimah ah beiseina sang tak nei duh suh" ka ţawngfiah in thupe aw takin ka sawi bawk a, ka ti mai mai lo tih a hre ngei ang.
"I rawn haw na chhan chu engpawh lo ni se ka lawm vek" a ti tak na a inhmu reng tho si min hnaih tak tak theiloh chuan hrehawm a ti daih zawk ang. Awmdun reng chunga khawhar tho a awl zia keichuan ka hrevek tawh. Ka nu leh pate tihbuai reng hi inthlahrun na chen a awm lo thei lo a, keimah chiah ka ni tawh lo ka fate an tel tawh lehnghal. Min nawr chung chung pawh hi ka hrethiam. Ka nau in nupui neih te ala duh ve ang a, kan nufa hian kan hnawk telh telh ang.



Matthew nen a kan inkawm hnu khan a pa pawh a rawn lang ţan a, a tute pawh ka rin aiin a lawm ve daih. In neih leh chu duh lo in hnial ţang ţang mah ila kei aia upa zawk te chuan min hneh leh tho tho. A tir ah min rawn ve ţhin bawk mahse midangte thu thu a awm tur a piang ni mai ah ka in ngai. Ka pasal a nu a la rawn lang ve lo a, ani chuan kan inţhen hlen pawh a remti ah ka ngai. Ka pawitih loh ber a ni ve bawk.


Chutiang a ni chung chuan tun ah hian kan in hlui gate chhunga motor tlan lut ah kan chuang mek a, kawtzawl zau tak an hmuh veleh a naupang hlim taka an au chul laiin awm leh ka huphurh lutuk chu ka chau nghulh thei hial in ka hria. He hmun a ka kal hmasakber ang mai kha ka ni. Kulh thim rup ang maiin ka hmu leh tawh. He in hi ropuiin mawi viau mahse ţap chungin ka lut a, ţap chung bawk in ka chhuahsan leh a, chu chuan in ropui nazawng ah hian hlimna a awm lo tih a lan tir awm e. Duh duh nei thei keini ai chuan kan in a inhlawh a rawn awm Pi Sangi te chhungkua kha an hlim zawk daih a sin.


Kan chhuk ruala tlankual nghal char char tur a ka ngaih laiin naupang ho chu ka bul hnaih ah an ding a, Pi Sangi hmel pawh ka la hmu lo. Inchhung a ka la luh peihloh vang in grass chung ah ka ţhu a, ka fate chu min hmachhawn in an rawn ţhu ve a. Kan piah deuh ah Matthew a ding bawk.


Engkim mai chu ala ngai vek tak tak a, khawih danglam awm lai ka hmu lo.
"Sawnglai pangpar ho saw Sandra tet laia ka phun ania, Jason leh Damon an la piang lo" ti chungin inhrul a pangpar nalh tak a par chhuah ho chu ka kawk kual a, an lo enkawl uluk tih a lang. Ka fate pawh pangpar en turin an lehhawi a, Sandra leh Jason ten an enzui vung vung laiin Damon erawh a rawn inher leh vat.
"Mawi iti ve lo em ni?"
"Mipa en chi a nilo" a ti a, anui put put bawk.
"Pangpar i en a, i zak ringawt a ni maw?" tiin ka lo fiam belh bawk a, a nui hmel a bo chiang khawp mai.


Matthew din na lam a pipu pawh a sawi ang khan ala ngai reng. Sandra ka awmpui na ţhin ania, a infiam hah hnu ah pipu ah kan ţhudun a, min rinchhan in a muhil ţhin.
"Sandra pipu saw i la hria em?" a lu a thing a, a hriat ruai ruai ka lo ring a.
"Nuam itih theih nen. Pipu kan siamtir lai chuan tereuhte ila nia, an siamzawh pawh i nghak theilo ţep a" tih pahin ka hawikual leh a, thingkung lian vaklo hnuai a ţhutna kan dah pawh ala awm a, tlem in a lo hlui deuh tawh. Matthew kan lo nghahna ţhin a ni. Tlai tin saw ţhutthleng ah sawn thu in a hnathawk lo haw kan nghak ţhin a, chu erawh ka sawilang duh lem lo.


Inchhunga bungraw thiar lut tu te lo chhuah rualin Pi Sangi a rawn tlanchhuak ve a, ka hmuh rual in ka ding a, min rawn kuah chawt a. Ka thil hmuh apiangte hian engemaw min hriatchhuahtir vek.
"Emma ka ngai ţhin che sin. Hei Sandra kha a ni em? Hei hi phir te kha? In va lian tawh ve, in senlai chiahin ka hmu cheu a, ka hre hrang reng reng lo che u", a ti nghal zat zat a, a phur zia hai theih rual a ni lo.


"Ni e. Jason leh Damon. An fel tehmai nia" tih pahin Damon ka en a, fak hi nuam a ti ţhin. Jason ka en leh a, Pi Sangi lamah alo nui ver ver a, ka fate hi midangin an hmuhdan hrelo mah ila ka mit ah chuan an ţha ber.
"Lut ang u. Eitur ka lo siam cheu lawm. Inu pawh hian ka thilsiam chu tui a ti thei tehmai nia aw" tiin naupang a thlem a, eitur hnar ngailo chi an nih ve tho vangin Pi Sangi chu an zui lut ta dial a.


An luh hnu ah pipu ah chuan ţhu in a vawn ban te chu ka chul kual vel a, Sandra naupanlai ka mitthla ah alo lang uarh uarh mai. Ka khup dawm in ka hmazawn ah Matthew a rawn ţhuhniam a, a awmdan teh thut chu mak ka lo ti viau mai.
"Ka lawm e" a ti sup a, a nupui ang a awm leh tur ah min ngai a ni mahna.
"Engvang chuan?"
"I rawn let leh vang hian"
"Ka sawitawh kha. Nangmah vang leh i nupui nih leh tum a rawn let ka nilo. Ka nu leh pate min tirhluih vang leh naupang vang zawk anih hi. I fate buaipui la keichu awm lo ang ah min ngai rawh" Ka lo ti zat zat a, inzawmna nghet neih leh hi ka duhlo mai nilo in ka hlau tawh a ni.


"Tuvang pawh nise ka lawm tho. I thinur na ka cho chhuak a, iduh ang chuan i awm dawn nia mahse min rin leh nan theihtawp ka chhuah ang. Ka nupui ni leh ngei turin ka duh che a ni" thutak deuhin ti ve bawk mahse ka ngaithla liam mai mai a ni ber. Hetianga rang a he in a ka let leh hi ka lo in ring miah lo. Ka hriatchhuah leh tawh bawk chu, min inneih tir leh an duh vang a helama min chah chho an lo ni. Matthew te chhungkua leh ka chhungte an lo in be rem sa vek tawh. Ka nu leh pate ngei pawn ka hriatloh in thil an lo ti ve tho a nih chu.


"Naupang leh midangte hmuh ah chiah i nupui ang in ka awm ang. Kan inneih hmasak lai ang chiah khan. Keini hi chu nupa in kawprem tak kanni ve thei dawn lo a nih hi. Naupang phei chu awm lo se ka nei leh tawh lo ang che" ka ti leh hmarh hmarh a, mipa hi an duhna ah chuan an lo dawhthei khawp mai, thinrim ang pawn a awm duh lo. Ka thusawi nen a inzawm lo tak in "Khawngaihin min kalsan tawh suh" a rawn ti leh sup a, reitak ka awmloh san meuh chuan ka hlutna a hreve ta anih hi. A pawi ber zawk chu ka chawmawlh vek tawh a, rinna leh khawngaihna ka nei tawh rih lo. Mahse ka thinlung ah ala awm reng thung.


"Engmah ka tiam thei tawh lo che. Kan intiamna bawhchhe tu hnen ah hian thutiam leh chakna ka nei tawh lo" tiin ka phun sep sep a, kan thinlung zawng zawng a kan rin ţhin te leh kan hmangaih ten kan rin na an tihchhiat hian neih let leh a har lehzual a nih dawn hi.


CONT...

---

FORCED MARRIAGE-24



Vawin hi naupangte school ţan ni tur a ni. Enkawl ngai rual an nih vangin ka chhungten hna ka thawh leh an phal tawh lo. Naupang leh Matthew pawh an in nel ve tawh viau a, pa te nge nge chu ka rin ai daih in an ngai na hma. Kei hi ka la in ti luhlul tlat mai thung. Damon hian Sandra leh Jason te ang em chuan ala pawh tak tak lo bawk.


"Ka thlah kual ang a, an ban dawn ah i lam mai dawn nia" sawilawk tawh mah ila an kal dawn ah a sawi nawn leh a, chhang lem lo in naupang ka kai a, pawn lam ah ka kalchhuahpui a.
"Fel deuhin awm ula in ban veleh ka rawnkal dawn nia" ka ti a, phir te pawh hmun danga kan awm laia school luh tir tawh tho ka nih vangin an hreh em em lo. Hnamdang ho bulah an awm tawh lo ang a, nuam an ti ngawt zawk in ka ring. An kal liam hnu ah ka luhsan a, phir te aiin Sandra a bang tlai zawk ngei ang a, kan lo nghah tlawk tlawk zel a ngai ngei dawn a ni.


"In rawn haw hnu hian a hma aiin nuam ka ti daih zawk" Pi Sangin phur taka alo tih chuan ka nui ve mai a, naupang an awm ta bawk nen, boruak kan thlak sak hlawk ngei ang. A thil silna bulah ka ding a, kawmtur dang ka nei biklo a, keimah chiaha awm ka peihloh chang chuan Pi Sangi hi ka bel chawt ţhin.
"Mason hi a chanchin i hria em?"
"Ila hre nange?" alo ti let ha a, lu thin nak nak pahin ka hriatloh thu hrilh in ka phun sep a, mak min tih hmel hle.


"Helam ah a nu nen an awm na a rei tawh. In in be ngai miah lo em ni? Sandra pawh a rawn ngaihven lo maw? Matthew leh i chhungte pawn an hrilh che ka ring a" a ti mawlh mawlh a, Mason-a chanchin reng reng hriat ka nei lo. Debbie takngial pawn engmah a sawi lo.
"Hotel lian tak a nei tawh alawm. Tih len belh zel a tum an ti lehnghal. Doctor hna hi a tuipui hlawl lo niin ka hria" a ti leh a, mak ka tihna aiin ka thinrimna a nasa tawh zawk. A fanu a ngaihven duh miah loh vang hian ka thinur takzet. Matthew-a pa lahin engmah a sawilo a, ka chhungten an sawi hek lo. Mason nen khan kan lo inzui viau ah an ngai ang a, a chanchin min hrilh chuan boruak a chhiat belh an hlau a ni mahna. A tuizawng a ti thei a, a hlawhtlin thu ka hriat vangin ka lawmpui a, a fanu a ngaihven duhlo erawh hi chu ka dem ngawih ngawih.


"A chanchin ka hre miah lo thei hi a mak khawp mai" ka ti sep a, ka sawidan ki chu a hriatthiam ka ring.
"Sandra hi a fa ah a ngai lo nge maw ni dawn le?" a ti ve vang vang a, a pawi miah hleinem, keiin ka hmangaih tehlul nen.
"Ka lak a an zep nachhan tur awm ang i hremiah lo maw?"
"Hrelo i tan a ţangkai vak lo an ti aniang. Keipawn a ţangkaina ka hre lo. Apu thih aţang khan a nunhlui a thlah a, a pu khan doctor ni tur khan a duh viau na a a tuiloh zawng a ni chek aniang chu, nawrlui tu a neih loh chin ah bansan in a tuina ber a ti ta a nih hi" a ti zui zel a, a tuilo viau a ni ngei ang hna a thawk ţha peihlo emai. Matthew ang tho in a pu chuan alo thunun ve viau a ni bawk ang a, Matthew ang lo takin a pu hmangaihna a dawng reng thung.


"Emma in nupa a hetianga hmuh cheu hi nuam ka ti lo" a ti sep a, ka thinrim a hlau a ni ngei ang a inthlahrung emai.
"Ngaihdam mai hi harsa ka ti em a, ka fate vangin a bulah ka la awm hram hram zawk a nih hi"
"I fate vang ah i ngai a, ila hmangaih vang a ni tel. Hmangaih lo la chuan i fate vang in i rawn haw leh lo ang" a rawn ti chhuak leh bauh a, hmangaih lo ila chuan a chung ah ka thinrim lo bawk ang.
"Ka hmangaih vang alawm reitak ka tawrh reng ni. Min hmangaih ve lo tu hmangaih hian awmzia a nei lo. Natna bak kan hlawhchhuak lo" dawhkana thleng leh plate vel hruk hul tur a dah chu ka lo chuh vat a, ka ţhut rem hnu ah ka hru ţan a, tih tur a hriat loh vangin ka hma zawn ah a rawn ţhu ve ringawt.
"A hmangaih lutuk che hi a buaina ber a nih hi. I awmloh hnu ah phei chuan a khuahar a, ka awmpui reng ţhin a, i ngaihmawh ber Irene kha vawikhat pawh a rawn lang lo. I sulhnu tih danglam a phallo a, uluk takin min enkawl tir zawk a, na miah lo tur ah i ngai maithei mahse nang aiin a na zawk mah ang" a ti duah a, ngaihven awm lo takin ka thil tihlai ka chawl duh hauh lo a, ka bengkhawn ru em em thung. Matthew chuan ka hnen ah a tawrhna a sawichhuak duh hauh lo ang a, apu laka a tawrhna pawh a sawi ngai lo a nih kha. Engtiang takin nge keimah vanga alo tawrh ve ka hrechak ve tho.


"A khawhar leh rilru nat vang khan a rui ngai lo a, i tan a hriat nuam tur chanchin neih a tum tlat. In in lamah a kal reng a, a rawn beidawng haw ziah lehnghal. Hna a thawkrim a, a lunglen hnem nan khan ruihhlo a hmang lo, hna lamah a insawrbing zawk. I ngaidam thei tawh mai lo em ni? Hun ţha pek leh chu a phu ve bawk asin" tiin min thlem ti tih a, ka lu ka thing mai. Thinlung hi alo nat theih zia ka hrethiam tawh a, a nat nawn leh hi ka hlau ngawih ngawih tawh zawk.
"I hmangaih a, a ni pawn a hmangaih che. In buaina hi nangmah a nilo a, Matthew pawh a nilo. In buaina ber chu in sawidun theih miah loh thil hi a ni ber. I rin na i hlauh tawh kha a ni tel bawk a, nitin hian zir la, in inneih hlim a, a nupui anga en tur che a iduh ang chiah khan i pasal angin en leh la, a thiltih te chik takin en la, danglamna a awm ngei ang. An pa diktak anga hmangaihtu hi i faten an nei dawn lo. In inţhen leh dawn anih loh chuan insiamrem dan ngaihtuah rawh u. Phir te hian an la hrethiam lutuk lo anih pawn Sandra hian a hrethiam tawh a, hrehawm a ti ve bawk ania" a ti duah a, tupawh mai hian min zilh ta vek a nih hi. Ka lamţang an awm miah lo emaw ka ti dawn hial a, mahse min zilh tu te ho hi ka mangan ber lai pawh a min phatsan ngai miah lo te kha an ni thung.


"Mason hi a chen na i hria em?" ka ti ta daih a, hmuh chakna ka nei tlat. Sandra a ngaihven duh miah lohna chhan te hi ka zawtchiang ang chu.
"Hre miah lo. Hotel ah a awm deuh chawt an tia, engatan nge itih deuh?"
"Ka hmu ang chu" ka tih chuan a mengphar nasa khawp mai. Hmuduh miah lo tur ah min ngai a ni ngei ang.
"Sandra hi pek let itum em ni?"
"Teuhlo mai" ka ti hluai a, min dil mahse ka phal kher lovang.
"I hmuh reng hi a ţhalo ang. I pasal a nu in a hriat phei chuan a ringhlel leh mai ang che"
"Min lo ringhlelh ţhin vang em ni a chanchin pawh ka hriat ve loh?" ka ti let a, Dominic nen min hmuhdun ni khan Mason i zuikual nasa min tih ngei kha. Chumi ngaihtuah chuan ka nuichhuak hak a, mi kan rinloh hi chuan ngaihdan mak tak tak kan siam mai ţhin a nih hi.
"Chutiang thleng thleng chuan ka hrelo mahse in in hmuh tam hi ţha an ti lo. Mason hi a inthlak danglam theih ka ring lo. Mafela thi kha ala tuardam theilo a, a nu leh pate hi Matthew te nufa anga inţhen ah ngaiin Matthew a haw tlat bawk a, a chang chuan ka khawngaih ţhin, thudik ni miahlo hi a naupanlai aţangin a hre hnem lutuk a, chu chuan a rilru a ti khawlo ni maiin ka hria" ti a a ngaihdan a sawi chuan ka ngaihtuahna a ti kalthui khawp mai. Naupang hriat a kan thusawi hi fimkhur a ngai khawp mai. An theihnghilh leh mai dawn emaw tih lai hian hriatreng an lo ngah ve phian a. Kan mi huat tak te hi huattir ve an harsa miah lo ang. A diklo zawng a kan hrilh tlat miau chuan an puitlin thlengin an haw mai dawn a ni.


"Danglam theilo kan awm hleinem. Thudik a hriat chuan a danglam mai dawn alawm. Sawipui tur ka ngah a, ani pawn sawifiah tur tam tak a nei ang" ka ti tlat a, biak pawh theihna ka nei tawh lo a, tumah ka zawt ngam lo bawk a, hotel a kal tawp chu ka biak pawh theihna awmchhun a ni. Remchang hmasa ber ah kal ngei ka tum. Mason pawh hi ka rin leh tak tak theih ka ring chuang lo. Ring lo mah ila a fanu a hmuhdan tal chu ngaihthlak ka chak a ni. A ngaihsak duh miah lohna hian chhan ţha tak a nei ngei ang.


Naupang ka hruai a, haw kawng tluan in an school thar chanchin an sawi ka ngaithla. Sawitur an ngah vek a, ţawng an in chuh a ni ber. Apa in a hawsan hnu a Jason a ţah thu Damon chuan a sawilang zeuh bawk a, Sandra nuih a za khawp mai.
"Ka ţap nasa lo" tiin a ţang ve nasa a, a unaupa leh a ţhianpa ber lah in hrechiang a in ti ropui mai bawk a, an ti ti kar ah an inhnial leh bap bap ţhin a, kan nufa awmna tawh chu a ri chel chul tawh ţhin. Kan inchhung reh ruih ţhin pawh tun ah chuan a ri ve chuah chuah tawh.
"Jason chu naktuk ah pawh a ţap leh ang" tiin Sandra in alo fiamzui a, an fiamzui reng mai a duhlo chu a ţap lek lek leh tawh zawk. An tet deuh lai a school an luh hlim pawh a hawsan har khawp a ţap ţhin kha a ni reng a, fate zing ah school luh hlim a harsa bik an awm tih chu nu leh pa te chuan kan hrevek ang. Keini pawh kan bang biklo a nih hi.


In thlen hnu ah ka thlak a, ka bual leh a, Pi Sangin min pui thei a, rin ai tak chuan kan buai reilo. Thil an eilai pawn Jason-a ţah thu bawk chu Pi Sangi an hrilh leh a, kan in khap seng lo. Damon ţawngduh a chhuak emaw tih mai tur a ni.
"School thar chu a nuam em?" kan thil eina bula Matthew rawn lang thut chu kan lo thlir ţhap a, kei phei chuan sana ka en nghal.
"Nuam lutuk" Sandra in alo tih laiin Pi Sangin "Ilo va thleng hma ve" a ti a, inhmuhthiam lohna neilo ila chu ka zawh tur ni awm zawk tak a ni.
"Ka haw hma zeuh zeuh tawh ang. Ka awm hun tur ka siamrem a" tih pah in ka bula chair a pawtchhuak zui zat a, a rawn ţhu tih hre mah ila ka melh duh lem lo.
"Jason a ţap a" Damon bawk a ni. A sawi bang thei dawn lo a nih chu. Matthew a be hmasa ve hrim hrim pawh chu a mak. Midangin nen an in pawh tawh viau laiin Damon chu amah chauhin apa bulah ala awm duh miah lo ania.
"A ni maw? Ngatinge?" tiin Damon anih vang hrim hrim pawn phur takin alo chhang a, Damon chuan ner nang pah in "A ngen che" a ti zeuh a. Jason pawn "Ka ţap nasa lo" a ti veleh.
"Ka awm laiin i ţap silo a Jason. Ţap la chuan ka hruai haw leh daih ang che"
"Khatiangin ti suh" ka lo ti ţhak a, ka vin thut vang chuan mak min ti tlang vek. Chu chu hria in ka in siamţha vat reng a ni.
"Ka uang a nih kha" a tih sup laiin "Fiamthu pawn sawi tawh suh" ka ti leh a, ka thawhsan zui nghal. Min hruai haw leh hi a inchhir viau tawh ang. Hetianga ka awm hma a a thil tih kha a inchhir mah tawh zawk ang.



"In be lawk ang" bathroom aţanga ka inbual zo ka chhuah chuan sofa ah alo ţhu run a, lehkha ala chhiar tur ah ka ngai a. Hnial buai in awmzia a neih dawn loh vangin a ep chiah ah ngawirengin hreh hmel takin ka ţhu thla.
"Min rinloh chhan ka hria a, i ngaih ang khan thil a kal lo tih hria la ka duh. Hmangaih lo che in kalsan duh che ila khang kum6 i bo chhung khan ka ngaihven zui lovang che. Min rinloh chhan ber hi Irene anih chuan i zawtfiah thei ang. Ka sawi chuan i awih leh dawn si lo a" beidawng tih hriat zet in a phun sup sup a, kan awmdan hi a hne leh thawkhat tawh tih ka hria. Kan inneih hun chhung kha reilo ang in lang mah sela awmdun reng kan nih miau vangin ka hrechiang ve tawk tawh.
"Ka ring lo che a, Irene phei chu ka ring lo lehzual. Irene hi ka buaina a nilo a, ka rin na ka neilet thei miah lo hi ka buaina zawk a ni" tiin fiah kalh in ka chhang a, hlauhna leh ngaihţhat lohna hian min tuam leh hlup hlup ţhin.


"Min ring turin ka nawrlui dawn lo che a, rintlak in ka awm ang tih erawh ka tiam che. Ka phatsan che emaw itih ţhin lai pawh khan ka phatsan ngailo che" tiin thiamlo deuhin a sawi ve a, a thutak hle thung.
"Ţawngkam nem emaw tuna min ngaihsak em em tak vang hian ka rin na hi neilet thei ka ni lo. Hlauhna ka nei tel tlat tawh a, ita ka ni tih i chian tawh hnu ah ka natna turin i awm leh mai angem tih te, i ta chauh ka ni tih i hriat hunah chuan i thlamuang ang a, i ngaihsam ang a, nunphung pangai pel hret a nun pawh pawi iti lo ang a" ka ti a, ka hlauhna neih te ka sawi ve mawlh mawlh a, ngaihdam a, a nupui ang a awm leh mai hi harsa ka la ti rih a ni.
"Naupang pathum leh ka nupui, i awm loh hnu ah i hlutna ka hre lehzual a, inchhung hi mi pakhat chauhin a luah hneh ţhin tih ka lo hrelo. I awm loh khan a ruak huai a, ka hnen a i awm laia hlutna che ka hriat tawk loh vang khan min ngaidam rawh. Ka phatsan ngai lo che a, ka phatsan lo bawk ang che tih ka tiam e" a rilru diktak a sawi tih a hmel ah a langchhuak in a tak ngul ringawt mai a ni.
"Tun ah chuan ka rilru ala ngai reng. Nakin hun ka sawithei lo. Hun ţha ka pe che a, sawipui che ka tum a, kan inhnial zel. Ka rilru ka thlak thei rih lo"
"Ka nghak ang tiin ka hrilh tawh che kha. Ka nupui hi ka hriat miah loh in ka lo ti na em a, min rin leh hun ka nghah a ngai a ni. Mahse Emma nang lo chu nupui dang neih ka tum hauh lo" a ţhutna aţanga thochhuak in ka lam pan in a rawn kal a, a rawn thlen hnu ah inthlahrung tak chungin min kuah a, ka taksa ringawt pawh tihnat a hlau takzet tawh niin ka hre ve.
"Muhil rawh. Naktuk ah i hlim hmel ka hmuh ka beisei" a tih sup hnu ah ka lu ah a fawp zeuh a, mut hun nitawh mahse kan pindan a chhuahsan a, khawilam nge a pan dawn ka hre lo. Ka hmangaih tak in a pan na lam tur chu ka ngaihrual vel mai mai thei chauh tawh a ni.



MATTHEW'S POV


Phir te pindan ah ka lut a, an muttui tawh khawp mai. An khum zawn a ka ţhut hniam lai chuan an thaw si sak sak ka hrephak. Ka tello in kum tam tak an awm a, ka hmuh phak loh ah an seilian a, an sen laiin ka buaipui hman lo a, kal pawh ka zirtir lo. An ţawngtheih hlim ah eng nge an sawi hmasak ber pawh hrelo a tun thleng a ka la awm hi. Ka ngaihtuah chiang a, ka zak a ni.


An sir ah mu ve in tui tak a an muhil lai hmel ka en a, an hmui leh an hnar te, Emma nu in min chhun thu a sawi fova, ka enchian hian ka sawidik zia ka hre ţhin. An nu Emma hi ka phatsan ngai lo. Ka hmeichhe hmangaih ber a ni a, a ni reng bawk ang. Irene hi intihhlum a tum kha, alo ti mai mai hauh lo. Ka nupui leh fate a nghawng hlau in ka veng chawt ţhin. Ani kha ka hrechiang a, a duh neih nan tih hreh a nei lo. Ka nupui fanaute a tihnat ka hlau ţhin. Keimaha beiseina a hmuh loh hnu aţang khan mi pakhat kawp nghet tak a nei a, mifel tak a ni hauh lo. A ţhat loh thu hrilh ţhin mah ila awmzia a neih loh vang leh Irene hlimna ber a nih vang in ka ţha en mai mai tawh.


Damon rawn tal phat phat chu ka lo dawm bet a, a rawn meng kawk a, hlauh hmel takin a meng kual rulh rulh a, min hmuh veleh a thaw huai a.
"I mumang a ţha vak nange?" ka tih rual in ka lam ah ka tawlh hnai hrut hrut a, min kuah nghal chawt. Ka fate a bikin Damon lak aţang hian min ringtawk tak a min kuah ka beisei ngai lo. Kum 6 hnu a an pa ni ta thut ka nih avang hian ka beisei sang ngai lo a, ka rin ai takin Jason leh Sandra ten min nel phian.


"A dum vek a, min lak daih a tum a" a ti niap niap a, venhim tum tak a kuah pah in "A la miah lo ang che. I bulah ka awmreng ang a, ka veng tlat tawh ang che" ka lo ti a. An pa ka nih ang in ka mawhphurhna hlen ngei ka duh tawh a ni.
"Pa" a ti tham ţuak a, ka khawng ve awt in ka hre hial. Midang te awka chhuak hetiang hian ka la dawngsawng ngai lo. Kan inhmuh aţanga a vawikhat nan Damon hian min ko ve a ni.
"Eng nge ni?" ka theihtawp a ţawng nem ka tum ve, pa ti a min koh chiah hian ka hmangaih zia ka hre nasa lehzual ţhin.
"Min veng rawh aw" a ti thawp sat a, a mumang chu eng ang tak a hlauhawm ni ang maw? Min nel lo ber tu in ka ven hian a duh tak na chhan hi.
"Ka veng ang che. Tumah in an tina ngai lovang che. Damon hlau reng reng suh. I hnen ah ka awm tlat ang" thlamuan tum takin ka ti veleh a, school kal leh ngai a ni a, mengreng thei a nilo tih hria in ngai viau mah ila muttir leh tum in a hnung ah muangchang in ka chul a, Jason muhil lai pawh ka melh zeuh zeuh. Pathian hnen ah lawmthu ka sawi pah mawlh mawlh bawk. Amah hrelo in ka nung a, ka thiltih ţhat te leh ka hlawhtlinna te kha ka thawhrimna vanga nei emaw ka in ti ţhin. Ka theihna avanga ka neih anilo tih hriat nan hospital ah buaina a thlentir a, amah ka hriat zual nan ka nupui fanaute kum6 chhung an bi bo a, ka neih let leh nan ka ţawngţai tlut tlut ţhin. Mihring siamţhat nan khawdur angai a, ka theihva avang ringawt in ka duh zawng zawng ka nei thei lo tih hriat nan ka nupui fanaute ka hmuhphak loh ah an awm leh a, engkim hi Pathian vanga ka neih vek zawk an lo ni. Pathian tan thil tih engmah ka neilo chungin thil ţha ber ber min pe thung a, ka tan a Pathian ţhat zia ka hriat phah lehzual ţhin. Ka nupui fanaute hi ka phu miah lo a ni. Ka phu loh thil hlu ka neih hi venhim tlat ka tum tawh tur a ni.


Damon a muhil tawh amaw ka tih hnu a thawh ka tum lai chuan ka kawr ah a lo la vuan ţung a, ring vak lo in ka nui chhuak hawk nghe nghe. A in tih pa tehlul nen a mumang chuan a ti hlau ve hle a nih hi. Thawh tum uaih tawh si kha ka mu ţha leh a, a thlamuan hma chuan ka kalsan tawh lovang. A mut hlan a ka kalsan anih pawn a thawh veleh a hmuh lehnghal theih tur in ka awm ang. Ka nupui fanaute aţang hian hmangaihna diktak ka hreve chauh a ni. Nupui hmangaihna leh fate hmangaihna chu. Tihluihna a ka neih zing a ka paih phalloh chu ka nupui chiah hi a ni.


Kawngkhar a rik rual in Emma a rawn dak lut a, min hmu thut chu a hamhaih ve deuh. Kan inneih hlim ang reng kha a la ni. Ka neih hlim khan a ţhatna ka lo hmuthiam lo a, tunah chuan ka mit ah ka nupui aia ţha an awm ta lo.
"I muhil thei nange?" ka lo ti vat a, min chhang lem lo in kan piah a, Jason-a mutna bul sir ah a mu ve. A ngaihtuahna hriat ka chak ţhin. Min ngaihdam hun tur a a ruat pawh hriat ka chak. Ka tihsual a ni a, a mize ţhalo lai ka cho chhuak in a thinurna tawp ka hawlh thleng a, nghah ngawt ngawt mai loh chu tih theih ka nei lo.


"Damon hian mumang ţhalo tak a nei a nih hmel" ka ti sup a, naupang harh hlau chunga a hriatphak tur a sawi ka ni.
"A nei ziah. I hriat vawikhatna anih vang anih kha mak itih em em"
"Mumang ţhalo a neih changa veng tur a ka awm theilo ţhin chu pawi ka ti"
"Pawi iti ngei ang. Zirtirtuten nu leh pa an koh ni a an nu chiah an hmu ţhin pawh pawi iti tawh ngei ang. Hmuh an hrehawm rualin an pa neih ve chhun lah beisei theih a ni silo a" a thusawi kalhmang ah min dem zia a hriat. A thikthuchhia awmang lo ka tih vanga ka huat ţhin khan Emma thinlung alo tihnat zia ka ngaihtuah pha ngai lo.
"Ka thiamloh a ni" ka ti sup a, tun ah chuan ka nupui fanaute hnen a ngaihdam dil chiah hi tih theih ka nei rih. Sum leh pai leh hausakna ringawt hi chhungkaw hlimna a lo ni lo. Kan in hmangaih tawn hian chhungkua chu kan lo hlim ber dawn a ni. Ka thil tawn tawh te aţang khan lo hre tawh tur ka nia sin. Ka hriatchhuah meuh chuan ka tlai lek lek tawh a nih hi.


"Emma ka hmangaihzia che i hria tiraw?"
"Min hmangaih niin ka hre ţhin. Ka hlimna chiah duhtu ah ka ngai ţhin che. Kan chhungkaw chunga awm chu Pathian leh hmangaihna chiah a nih ka ring ţhin. Ka nun hmanlai mek leh ka hman zel tur pawh nang nen a hman ka duh ţhin a, mahse vawilehkhat ah chung zawng zawng chu a chhe vek a, kan fate keimahin hnamdang kar ah ka enkawl a, hun harsa kan tawh in min hnemtu tur pasal pawh ka nei lo. Kan inkar ah hmeichhe dang a awm miau vangin ka beisei ngam ngai lo" lungchhe tak a a tih chuan hrehawm ka lo ti khawp mai. Ka lo va â rei em ka ti rilru mawlh mawlh a, midang nun chhan a ka inrin lai khan ka chhungkua ka lo tichhe der a ni. Chhungkaw pawimawh zia ka lo hre ngai lo a ni.


"Min beisei ngam miahloh lai khan in hnen a awm chak takin ka lo awm ve a, min rinloh miau vangin i awih kher in ka ring lo. Nang leh ka fate chauh hi a ni ka hmangaih chu. Zingkar a i nui ri hriattur awm tawh lo te, ka rual a thil ei tur i awm tawh lo te leh ka hnathawk tur min thlah a, ka haw lam min hmuak tur awm lo ringawt te khan ka khua a ti har a, min hmangaih tu leh ka hmangaih ber in min kalsan kha ka tawrh nat ber ani" min ringlo mahse ka ti takzet tih a hriat ngei ka beisei. Hmeichhe lam ah hian tawnhriat ka ngah lo viau. Ka nun a hmeichhe awmchhun ni ţhin chu Irene a ni. Chu chu Emma hian awihawm loh khawp a rang in a thlak thleng a, ani hi ka nupui, ka fate nu leh kumkhua a ka hmangaih reng tawh tur a ni.


"Thinlung kehchhia hian ngai awh leh thei sela chuan engkim a pangai leh ni mai tur" a tih sep sep hnu ah "Hun min pe leh la, i thinlung keimah vanga kehchhe tawh chuan ngai a awh leh theilo anih pawn ahma aia ţha in ka siamsak leh ang che. Dimdawi takin ka enkawl sak tawh ang che" ka lo ti a, a tichhe tu bawk hian siamţhat sak lehna hun ka mamawh a ni.
"Rin leh che ka duh. Hlauhna bawk hian min hneh leh ţhin"
"Kan faten nupui pasal an neih hnu ah leh, miten tar min tih thlengin i kut ka thlah tawh lovang" ka ti nghut a, ţawng bung viau mah ila ka thinlung aţanga chhuak a ni. Ka beisei loh takin "Muttui" tiin min chhang a, sawizui a chak vak rih lo a ni. Engtia rei nge ka la nghah ngai ang? A tawrh tawh zat nen a khaikhin chuan hun tlem te chiah ala ni.


"Muttui le Emma" ka ti sup a, khum khat ah kan chhungkua in kan mu a, kan taksa chu awmkhawm mahse kan chhungril a inhlat viau thung. Naupang chuan min hnaih tial tial a, ka nupui hi nitin a in la hrang zel emaw tih tur a ni. Beiseina ka la nei tlat a, ka nei nasa tial tial zawk. A hlat pawn hnaih dan ka zawng ang a, ka ţawngka in ka hmangaih thu ka hriattir reng ang a, ka chezia pawn ka lantir ang. Pathian in chhungkua min pe a, khawvela kan awmchhunga lo enkawl chu ka tih tur a ni. Ka phuloh thil ţha ka hmuh hi ka hlut ang a, a chhiat ka phal tawh lovang. Chhungkaw kehchhia hi thil hrehawm leh rapthlak ber a ni si a. Ka fate hi engang mi tak ni zel ang maw tih thleng in ka ngaituah a, pa ka nih meuh chuan ka ngaihtuah zawng pawh a tam ta hle mai ti rilru chung in ka nui chhuak hawk nghe nghe. Tun aţang chuan min hlat a an awm ka phal tawh lovang.


CONT.....

---

FORCED MARRIAGE-25




"I muttui em?" ka men rual chiah in alo ti nghal a, engtia rei nge kan muhil lai alo thlir tawh ni. Phir te lah a muttui thei chi an ni bawk nen, an la thaw ri sek sek mai.
"Muttui a ni mai ang chu ka harh chauh sia" thawh nghal mai ka peih loh vangin saisir in Jason ka kuah a, phir te khum ah ka lo muhil ve tih ka harh hlim khan ka hrechiah. An mang a chhiat em vangin khum zau tak an awm mamawh a, Matthew nen kan inkar ah an muhil bam a, Jason pawn zanlaia min khan awm ka hre miah lo. Matthew hian a veng a ni mahna.


"I muhil i harh chang apianga mutkham lo ni awm taka i hmel buai leh phelhphang ţhin nui hmel in a chhunzawm vat ţhin te kha hmuhnuam ka ti ţhin a, ka hmuh lohna pawh a rei ta" a ti sup a, tunah pawh ka nui miah lo reng a.
"Hmuh reng iduh lo ah ka lo ngai mai a sin"
"Hmuh leh tum a ka beih mek hi" a ti leh zeuh a, ka ner suk hnu ah ka mit ka chhing leh a, a thawm ka hrezui lo a, ala thochhuak peih biklo ah ka ngai. Ka haw leh hlim ah kha chuan a awm ve hian ka awm a nuam lo in ka ning em em a, tun ah chuan ngai ah ka nei tawh. A awmdan huat tur ka zawn reng ţhin te pawh ka palzam thei leh ţan tawh a, a hlimchhawn ang em khan in hnialna ka chawk chhuak ngun ta lo. Heng zawng zawng hi naupang vang chauh ah ka la puh tlat tho. Naupang hian kan in hau reng lai an hmuh ka duhlo.



Ka hmai a za mer mer a, ka taksa a insawi det det hnu ah "School kan kal tawh dawn" tih riin a chhunzawm hat. Ka meng kawk a, ka tho nghal at. Ka lo muhil leh ngei a, ka muhil rei ta lutuk a ni. Ka fate thawm pawh hre miah lo in ka lo mu a, a zahthlak lek lek. Uniform nen vek an awm tawh a, ka mutna bulah an lo ding ţhap. An uniform hak dan lah chu phir phir te kamis leh kekawr a chuar nasa mai.
"Tunge haktir che u"
"Apa" Jason chuan alo ti tham ţuak a, ka thinrim leh hlar tawh. Fur laia an hakthlak tur a ka ţhui tir, an ţhui zawh ang ang a an rawn dah nawh pawh la nawh mar loh a ni. Chuar tun a nilo na a, a in thlehna hnu ang kha a awm far mai.
"Sandra ipa chu i lo enpui lo mi?" ka ti a, ani chu a felfai thlap.

"Keimahin ka insiam daih alawm" in ven tum takin alo ti ve bawk a, nawh mam sa kha ka khaichhuak reng sia.


Khum aţangin ka chhuk sawk sawk a, phir te kai in kan room lam ah ka kalpui. An room tur bik hi kan siamfelna ala reiloh vang in an thawmhnaw chu kan room ah ala awm vek. An wardrobe leh drawer tur kan siamtir an lo la dah lo a, chungte avang pawh chu a ni. Kawngkhar lo in hawng sa ah chuan ka kailut dawr dawr a, ani pawh alo insiam mek a, a hmanhmawh hmel khawp mai.
"Engthil nge i haktir hi?" ka ti nghal hlar a, ka melh ran bawk. A kamis haklai ban kilh pah in "An uniform thar ani lo mi? Vairam ami an hak leh ten" alo ti sam et a, min nuihzat let zawk lehnghal.
"A chuar em hi. An haklai sa te chu ka khai thlap kha. I hriatloh pawn min kaitho mai ta che. Nangpawn hetiang i ha duh dawn bik ami?" tih zat zat pah in Damon haklai ka hlip sawk sawk a, "Ka hmanhmawh deuh a, ka hmuh hmasak apiang ka haktir. I mut rih duh ka ring bawk nen. Ka insiam pah bawk a, ka enchiang mang lo a ni" a inthlahrun hmel ta khawp mai. Jason a pawt hrang a, a nui hawk ri pawh ka hrezui. A haktir laia hmuh loh ngaihna pawh a awm lo. Thleh ţhat vek ang anih tawh tho vangin an hak tur ka thlep chhuak ah a ngai ang a, a thlehna thla lang chu pawilo ah a ngai mai tih hriat reng.

"Nangmah vangin an tlai vek dawn a nih hi. Ka haw lutuk" ka ti leh ringawt a, a nuih tak ngawt zel ah chuan tihngaihna vak a awm bik lo. Ka khailai lachhuak in Jason-a hak tur zawk chuan ka vawm thlawp a, ka tihluih a ni biklo, ka hmanhmawh vanga vawm zawk ka ni.


"A zo mai lawm. An pheikhawk ka bun sual tir lo chu a vanneihthlak" a tih sup lai chuan ka lo en ha a, "I vawm ve dawn tho sia" ngaihsam taka a dar a san zui ak hnu ah darthlalang hma ah dingin a sam vel a tuai ve thuak thuak a, lehlam hawiin ka nui ve sak. A daihrei lem hleilo a.
"Naupang i lam hman angem? Mason ka hmu duh a"
"Eng chungchang ah?" a ti bung nghut a, ka rindan vel.
"Hmuh mai mai. Kan inhmu khat em a, a hotel pawh ka hmuhpui ve ang chu"
"In dah hrang tawh lo turin i hrilh dawn nia, naupang chu rawn ngaihtuah suh" kan in en rualin a nui suk a, rin aia phalna min pek awlsam ve zek chu le. Phallo mahse ka thu a kaltlang tum tho kha ka nia, ngaihdam a duh lutuk hian ngaihţhalo chungin min phalsak pawh a ni thei.


"An school bang i hruai hman ang maw?" ka ti nawn leh a, hmanhmawh inti deuh chunga heta ala awm ve reng pawh hi a mak ve hrim hrim. Naupang pawh thil eitur in an kal daih tawh sia.
"Hman ang. Hun ka lo insiam ang" a tih tak vangin ngaihţha takin sofa a naupang thawmhnaw let rem rum ho ka la khawm malh malh a, an pafa a lo insiam ve annih vangin a hnawk nuaih ringawt mai a ni. A kal hnaih tawh maw ka tih laiin hnunglam aţangin min rawn kuah a, ka ţang nghal ţeuh ringawt.
"Kan awmdun chang a nuamtihna leh hlim ruk veng veng na ka neih ţhin te hi thil dang in a khum thei ngai lo. Kapu in buaina a thlen ţhin lai pawh in ka hnen ah i awm tlat ang a, kan hneh dun ang tih ka ngaihtuah ţhin na khan chakna min pe a, ka hnen a i awm hian ka hriat miah loh lai pawh khan thlamuanna min lo neihtir a, chutiang chuan damchhunga awm reng ka duh. Pasal leh pa ţha tak nih ka tum ang a, ka hmangaih reng ang che u" a rawn ti a, a kawnga a ban a rawndah chu ka laksawn luih tir a, chumi hnu ah nui lui chungin amah chu ka hmachhawn a.


"I sawidik chiah. Buaina nasa ber i tawh lai leh miin an sel luai luai che pawh khan i kianga awm reng ka in peih. I lama ţang an awm loh pawn keichu englai pawn i lam ka ţang ang tiin ka intiam a, ka infuih ru ve nasa ţhin. Mahse, mahse tih tur a awm tlat ţhin hi a buaithlak. I nupui, phatsan ngailo tu che leh mualpho huam ve ţhak khawp a i lam ţang tlat ţhin hnuchhawn in midang i pan a, hlimna i hmuhloh vangin i rawn let leh a" ka ti ve salh salh a, ka hnen a hlimna a neih ang hi midang hnen aţangin nei ve se min ngaihven ka ring tawh lo. Ka ngaihsan ţhin em em ka pasal hi misual ber ang ah hian ka ngai tawh a nih hi.

"Ka sawitawh ang khan ka phatsan ngailo che. Mipa dangin an kawppui ang a an en che ka phalloh ang bawkin keipawh min hnaih tum tu lak ah ka in la hrang tlat. Ka hmangaih che a, ka thih thlengin ka hmangaihna che hi a ngai reng ang"
"Mason ka hmuh dawn vanga hetiang thu sawi duah hi ini em lo ang chu" ka tih chuan beidawng tih hriat zet in a thaw hak a, a meng khup lap bawk. Ni tam tak mut hmu tawh miah lo ang mai a ni.
"Ka unaupa leh nang hi a diklo zawnga in awm ka ring lo. Ka hmangaihna che hria la ka tih vanga sawi ka ni. Min rin theih nan a sawi ka ni" a ti a, chhan leh ka tum lai takin Sandra a rawn lut hlawl a, apa nen a min entawn zak zak hnu a "Tlai kan hlau a" a ti sep a, keipawh ka harhchhuak chiang hle. Matthew nem pah in "Kalpui vat rawh. An tlai chuan hrehawm an ti lutuk ang" ka ti nghal chul a, room aţanga tlanchhuak in inhnuai lamah ka tlanthla lehnghal a, phir te ka hmuh loh vangin pawnlam ka pan zui leh zat. Hmuhtur an lo awm ngei bawk a, ţul miahlo ah ngaihdam dil nan an sam ah ka chul thuak thuak a, Matthew leh Sandra pawh an rawn lang har lo.
"Kal nghal ang u aw. In ţan hun anih hma chu ka awm khawtlai tawh dawn ania" a rawn ti a, Jason a ţah leh a hlau a ni ber ang.
"A ţah pawn rawn hruai haw miah suh. Awm luihtir ang che" tiin ka hrilh ru a, a lo bu nghat a, engemaw a phunpui sup a, ka hrepha lo hlauh. A hmanhmawh vangin form a hak sualtir a, amah zawk in a ti tlai leh a, tho hma viau lo phei sela chuan kan buai lehzual dawn a nih hi.


Ka thlah fel hnu a inchhung a ka luh rualin Pi Sangin "Matthew kha engmah eilo in a kal ringawt a" alo ti nang nang a, a thil ei leh eiloh pawh ka lo hretawh lo. Ei na hun kha a awm tawh lo hrim hrim bawk a.
"Hospital ah in eipuar mai rawh se" tih pahin choka lam ka pan a, eitur ka ţhutchilh nghal.
"A rawnchhuk ve mai dawn maw ka tia, zing aţangin an rawn be tawh a, eina hun a nei em ang chu" a ti nuah nuah a, ka tan pawh eitui a har tawh. A ei leh eiloh chu a thu a lawm ti rilru chungin Pi Sangi hmuh lai chuan ka eilui leh hram a. Ţan hma in ka fate kha an thleng angem tih ten ka ngaihtuah zui daih. A zuam tur a danglam na neih ka hlau a ni ber. Ho te a ngaidam thei tur anga min ngaih ka duh lo. Ka rilru lenzia a hretawh ngei ang a, min hmangaih tak tak anih chuan ka dawhtheihna tawp hun thleng min nawr lui leh tawh lovang.

"Hmuh i har ta hle mai" a thil ziah malh malh lai chawl in a rawn hawichhuak a, ka hmuh duh thu an hrilh lawk vang kha nge mak ti hmel a lo pu lem lo. A awmna room chhung a sofa an dah ah chuan phalna pawh la lo in ka ţhu a, a lakah hian inthlahrunna tur ka neih pawh ka hrelo.
"I upat ve hmel ta sawt e" a ti a, ka hma ah nui sangin a rawn ţhu a, a hma ai khan a thau deuh hlek tih mai loh chu danglamna em em a nei lo.
"I duhzawng tak iti thei tawh a, a lawmawm"
"Kan duh ber tih leh neih tluk a nuam a awm hleinem" alo ti zui zat a, a fanu hi a duhber zing ah a tel ve lo a ni phawt ang.


"Ka pu thih laiin ka awm lo a, ka tawrhpui che. Tun ah ka rawn hrilh ve thei chauh che a. A pawi ngawt mai a duat tehlul che nen"
"Min duat rual khan min nawr nasa a, ka duh miah loh ka nih phah kha. Mahse ka ngai ţhin khawp mai. Ka pu leh ka nu hi min hmangaih tak tak tu awmchhun a ni" tiin in hawng takin min hrilh nghal a, kan lo inkawm ve nasat tawh vang te pawh a tih theih ang.
"Tupawn an hmangaih che. An hmangaih lo che ah i ngai mai mai anih kha. Matthew pawn inkhung bo tawh lo turin a duh che" ka tih chuan a nuih a za khawp mai. A awihloh lutuk vang niin ka hria. Ngaihdan nghet kan neih tawh hnu a sawhsawn leh a harsat zia chu keipawn ka hria.


"Kan in ah chaw ei tur ten lokal la, ka fate pawh an lian tawh a sin. Phir an nia, i hmuh chuan i ngaihtuah zui ve veng veng mai ang" tiin phur tak anga lang chungin ka ţawng a, ka at vang nge an unaua an inhmuhthiam lohna hi kiang tawh se ka duh. Kei leh ka pasal inkara buaina pawh a fel hleihtheih loh laiin midang buaina chinfel sak ka tum chu ania, Matthew tan a ti ka nih lehzel vang hian a mak lehzual. Mason lo chu unau dang a nei tawh lo a, a mak ve em a ni.
"Ka lo tum ang. Chak vaklo mah ila vawikhat rawnkal chu a har hleinem. Sandra a dam em?" a ti ve ta nge nge e.
"Dam e. A hmelţha tawh lutuk asin. Mizo a ang lo ti tawk te an awm a, an fak ve nasa ţhin"
"Mizo a ang lo tawp ang" a tih bung nghut tak ah chuan ka ang pham a, sawisual ka nei tih ka hrenghal.


"Ka fa ngei ngaihsak duhlo tur khawp a sual ka ni bik lo ania Emma. Ka thisen pawh nilo erawh chu ngaihsak luih a har ka ti. Hnamdang, eng hnam nge anih leh tunge anih pawh ka hriatloh fa hi ka ngaihsak lui theilo mai nilo in ka peihlo. Anu ngei pawn a duh hleinem" a ti khur khur a, a thinrim ţha leh nge a mitmeng te chu a alh bat bat in ka hmu.
"Eng nge i sawi awmzia?" ka ti bah nak a, min hrilh duhna a nei pawh hi a mak. Dawt vek alo ni leh maithei bawk.
"Baby khan min hmangaih lo. Sandra pa khan Sandra a duhloh vang mai maiin apa ang ah min in ngaihtir a ni. Thudik ka hriat hnu ah chuan a tlanchhiat ran em kha" a nui hmel chuan Baby a ngaihnep zia a lantir a, ka tan erawh Baby kha mi ţha tak a ni thung.
"Min itsik tute hian dawtsawi an hreh miah lo a, mi dawtthu sawi ilo la thutak a ni lo maw?" ka la ti cheu. Baby hi hnamdang kawpkual ţhin, hmeichhe lepchiah tak a nih ka ring lo.

"Ka test vek tawh. Ka fa a ni lo. Pawisa nei apiang a kawp a, Sandra chuan pa a ngah ngawt ang chu. Tunah pawh Baby chuan hnamdang bawk ani law mi a neih?" ti a min zawh chuan min en reng tho vangin ka bu nghat a, a thaw hawk a, mak tak maiin a tuar ve viau in ka hreleh tlat pek a.
"Ifa anilo anih pawn pa angin a en che a, ngaihsak ve tur inia sin"
"Sandra ka hmuh apiang hian hriatchhuah ka nei ţhin. Chu thil chu ka thih hun thlengin ka zep tlat thung ang" a ti a, Sandra hian thil duhawm loh tak a hriatchhuahtir ţhin ngei a ni.


"Ka nuhrawn hnen aţangin in chanchin ka lo hria a" a ti ta daih a, ka chanchin sawi ka chak lem loh nen.
"Ngaihzawng nei ang a min sawi anih chuan chutiang mi ka nilo tih hrechiang tu inih kha" ka lo ti vat a, a tir aţangin ka pha nghal pang mai.
"Ni e. Matthew leh kei kha awihlo tu awmchhun kan ni. Matthew hi ka mi huat ber ţhin a ni chung hian a hmangaihzia che hi hria la ka duh tho" in tur an rawn chawiluh lai chuan kan ngawi rih ve ve a, eiduh ka neih leh neihloh min zawt a, ka duhloh thu ka hrilh a, thildang kan sawi lo. A chhuah leh hnu ah erawh "In mawl dun em vanga inţhen in nih kha" nuihzat hmel takin a ti lehnghal a, ka lo nui liam ve mai.


"Irene ka hmangaih a tih reng lai pawh khan nang ang hian a hmangaih miah lo. Irene nen a an inţhen aiin nang nen a in in ţhen khan a tuar na zawk. Nupa hi chu inzawmna alo nghet a nih hi"
"Hreber awm ang khan sawivel lo la"
"Hmeichhia ka kawp nasa a, ka hreber lo anih pawn a hretam pawl ka ni ang. Ka bialnu te ka ţhen laia ka chhungril awmdan hi a inang lo fur a nia"
"Baby nen a inţhen kha ana ber em?" tiin pehhel lem lo in ka zawt a, anat ber ka ring miau a.
"Na ber e. Nupa anga awm kan nih vang kha a niang. Tumah hi nupui a neih leh ka chak ta lo. Matthew hi i kalsan anih chuan hmangaih tu tak tak che i chan tihna a ni ang" thutak deuhin a ti a, a thusawi hi rin tur leh rinloh tur ka hretawh lo. Ka rin em em laiin ani pawh hian dawt min lo hrilh ţeuh a, ka piangsual zo vek tawh.


"Thudik tak vek i sawi em?" ka ti ngei reng bawk a, ka rinlohna ka tihlan vang chuan a nui hak hak bawk.
"Sawi e. Haw la i pasal mawl leh chut tak saw i hmangaih thu va hrilh mawlh mawlh rawh" a ti fiamthu a, a nuihzat viau a ni.
"Ka rawn hmuh kha che khan min lo biak ţhat duh ka ring miah lo a" kan thusawi nen a inzawm lo lutuk in ka ti ta daih a.
"Ka ngai ţhin che Emma. Ka thil sawi leh tih te avang khan min biak duh a, min hmuh leh duh ka ring lo zawk a, nang hi chu ka ngaina che. A hmeichhe thu iti maithei a, i rilru tina lo bawk la, i bula ka awm hi chuan Mafela bula awm angah ka in ngai a, a sawi reng che a, i chanchin a sawi pah pawh hian i thlalak hi a kuah lo chauh zel a ni" Mafela ka ngaihtuah lohna pawh a rei ve tawh. Sawizui vak ka duhloh vangin chhang lo in ka nui ringawt.


Kan in a ala rawnkal tur thu a sawi hnu ah min thlah a, ka haw kawng ah pawh ka ngaihtuah zui reng. A unaupa a ngainat tak vangin min ngaina a, a unaupa tho a huat em em nupui ka ni daih thung. A hma khan Matthew nen a kan inţhen pawi a tilo ţhin hle a, tun ah erawh hmangaihna avanga mihring kan nat theih zia a hreve tawh a, ka pasal haw viau chungin kan inzawm leh a duh tawh thung.

Thinlung na hi kan tuar thlawn emaw kan tih laiin zirtur alo inphum ru reng ţhin zawk alo nih hi.


In ka thleng chiah chu naupang in sawitur an lo ngah lehpek ngei mai. A ri leh chel chul tawh.
"Apa a khuasik a, Pi Sangi nen an awm" Sandra in alo tih chuan hreh tak chungin kan pindan lam ah ka kal a, kawngkhar alo in hawn sa vangin Pi Sangin "Thawk nasa lutuk suh ka tih ziah kha. Migraine phei chu ana lutuk an ti lehnghal. Tunah khan ala na viau em?" a tih mawlh mawlh chu ka hrepha a, ka luh veleh "Emma pawh a lo thleng alawm. Emma han in buaipui teh u. A lu na a chhuak leh pek a nih kha" a lo ti nghal zat zat a, khum ah ka bag dah in a bula chair awmsa Pi Sangi lo ţhutna ah chuan ka thu a. Ice pack Pi Sangin a dah chu la kang in ka chal ah dim te in ka nghat a "Damdawi i eitawh em?" ka tizui sep a, ka ngaihsak khat tawh bawk a, ka ţawng a sak tlat tawh. Ka chevel pawh ka khawr ţut tawh.
"Aw in thlen veleh ka ei"
"Eng nge a an tawh?"
"A zia tawh e" a ti sup a, migraine a nei tih ka lo hrengai miah lo.


"Migraine inei tih i sawi ngai miah lo a"
"Min haw chung pawn i hlauhthawn em kha. Lu na pangngai anih hi" min lo ti let daih a, hlau hmel ka lo pu a ni maithei.
"Natna chu sawitur ania" ka ti ta vel mai mai. Min rawn melh zawk pah in a ţhen sak a, chunglam a melh leh a, "Inchhirna in min eiral loh chauh a, kan chhungkua in ngai a awh leh theih nan a ka buai lai hian ka taksa na ka lo ngaihtuah tel hman lo a ni"
"I taksa kha enkawl ţha la, chhungkaw siamţha turin i bei nasa lehzual thei zawk ang. I luna a chhuak ngun viau em?"
"Aih. Tun a mi pawh hi mutpui tham a nilo. Nizan ka muttlem vanga mu mai mai ka nih hi"
"Naupang ven rual an ni hleinem. Chubakah tuman an rawn ru bo dawn lo a"
"Nangmahin phir i enkawl a, i buai ţhin em? Midangte laka tlawm hi ka hreh ţhin a, nangchu ngaihdam ka dil reng mai che. Ti sual tu zawk ka ni miau sia" a tho a, lukham lakhawm in a hnung ah a dah a, chumi ngheng chuan a ţhu a, ka kut la in ka kut ţang kar ah a kut ţang a rawlh a, ka lo hnial lem lo.


"I awmloh laia ka intih hlim ve na chu kan thlalak hlui en leh kan hun hman tawh hnu chhui kir leh a ni mai. Ka bula i awm reng tawh chung hian ka mumang mai mai ang a ngaih chang ka nei leh ţhin. Kum6 hnu ah ka nupui a lo let leh a, a ţhat dan ala ngai reng lehnghal. Ka nupui tur a a thlang che hi ka pu in ka tan a a tih ţhat ber a ni" a tih laiin ka nui hmel a lanchhuah ka ring. Ka hlim vang ah ka la dah phal chuang lo. Ka pasal a nih theih vang hian ka pu hnen ah lawmthu ka sawi thei tawh rih lo.
"I hlauhna kha dahţha in hun min pe leh rawh. Hlimna chiah ka pe tawh ang che. Keimah vanga i mittui tlak leh hun tur chu ka thih hun ah a ni tawh ang" a ţawngkam chhuak tin chu ti tak tak se ka ti. Haw viau a ka in ngaih lai leh a tello a awm thei a ka in ngaih lai pawn a hmangaihna chu ka lo la beisei tho a nih dawn hi.


"Hlimna min siamsak theilo anih pawn naupang tal chu hlim takin siam reng ang che"
"Ni lo e. Nu ber a hlim loh chuan naupang an hlim tak tak thei ngai lo. Nu leh pa kan in hmangaih a kan hlim chuan naupang pawh an hlim in an thlamuang ang. Engkim nei mah ila i thinlung ka neih let theihloh chuan ka thil neih hian awmzia a nei lo. Hlawhtlin na ka chan laia min lawmpui tur a i awm loh khan hlawhtling ah ka in ngai lo. Ka hlawhtlin na phen ah hian min fuihtu nupui ţha tak ka nei tih ka lo hre phak ngai lo. Ka tiam che Emma, hmeichhe hlim ber ah ka siam ang che"
"I thutiam chu ka lo chhinchhiah ran ange" ka tih chuan lawm vangin a nui ve ta. Tun ţum chu a thutiam a tih hlawhtlin tawh ka beisei. Tlawm tak a awm nghal dui ka tum chuang lo. A dawhtheihna enfiah ka chak a ni. Ka tan engchen chiah nge alo huam a, engchen chiah in nge min hmangaih? Tun ah chuan a hlawhtling tawh a, mi zingah min zahpui em tih te hriat ka duh.

Matthew min neihtir avang hian ka pu lawmthu ka hrilh theih ngei ka beisei.



CONT.... (VAwiinah ads click lo in la awm a nih chuan a hnuaia advertisement milem khu in lo click vek dawn nia)

---

FORCED MARRIAGE-26



"Ka nu" ka ti hluai a, zingkar hma tak a la ni. Pi Sangi takngial pawh a lo la kal lo. Matthew leh naupang te pawh an la mu vek. Ka mutchhuah tawh loh vanga zingkar boruak hip tum a ka chhuah dawn laiin door bell a ri a, midang an harh hlau in ka hawng vat a, ka pasal a nu hi a rawn lang hlawl a, Aizawl a kan let leh hnu ah min hmu turin a la rawnkal miah lo a, ka beisei loh em vangin ka hamhaih hle.


"Min luhtir dawn nange?" a tih chuan kawngka dal in ka ding reng tih ka hrechiah.
"Lo lut rawh" tih pah in ka awmsawn sawk sawk a, min en dan ah pawh a hma ang a min ngainat tawh loh zia a lang.
"Tui min rawn lak rawh" thupe aw tak a a tih leh hnu ah sofa lam ah a kal a, kei ve chu choka ah ka tlan lut rawk rawk. Zingkar hma tak ah engemaw a duh ni? Tui nen a choka aţanga ka chhuah chuan alo ţhu fel than tawh. Ka tui laksak chu ka pek hnu ah a bul ah ka ţhu ve a, bottle a tui chu muangchang in no ah a thli a, a tui inchhung pawh rei ka lo ti.


"Duh hun hun a luh leh chhuah nan he in kawngkhar hi a lo inhawng reng a nih dawn hi" thip zet a min melh chuan ka ip chawih chawih thei. Ka hnial ngam ţhin kha mak ka inti tawh zawk. Khanglai khan thinrim viau ţhin lo ila chuan tun ang hian ka zamchhe hneh viau ang.
"Ka fapa i tina a, a tuarchhuah dawp ţep ah i rawn lang leh a, mipui tamna a mipa dang in kuahtir duh mo ka duh hleinem" a ti bawng bawng a, kum6 kalta a thil thleng tawh kha a thar thawh leh dawn a nih hmel. A pawi lo, Dominic ka hriatchhuah leh phah tal alawm. Ka lungngaih lai ber a ka ţhian kha ka buai em vangin ka lo hrechang lo leh ţhin.

"Ka nu i hresual a ni ka tih tawh kha" ka ti dam duam a, thinrim nan ka hmang peih tawh lo.
"Ka hmusual tihna em ni? Fa pakhat chauh ka nei. Hmeichhe naran mai mai in duh duh a a tihkawi ka phal hleinem. Tunah phei chuan hospital ah hotu a ni tawh lehnghal"
"Kum6 kal ta a thil thleng kha sawichhuah a ţul tawh lo. I ngaihruat na mai mai lehnghal" ti a ka chhan chuan a thinrim lehzual. Ka haw hlim ah te khan rawn sawi se chu ka hrethiam. Kan boruak in ţhat lam a pan dawn lai mek a rawn tharthawh leh a ţulna ka hre tawh lo.


"I awmna chhuichhuah theihloh khawp in i pil bo a, khapa kha i thawhpui doctor a nih thu ka hre lehzel a, i awmloh hnu ah kha hospital ah khan ka kal leh a, a ban thu min lo hrilh. In kal dun a nilo maw?" min ngai mak khawp mai. Rapthlak ka ti lutuk chu chhan na chang pawh hrelo in ka en tlawk tlawk ringawt. Boruak thianghlim dawn tum khan boruak ţhalo bawk ka tawng leh tawh.
"Min chhang theilo em ni?" in ti vei takin a hawi vah a, a tihziah dan a ni.
"Kan inbe ngailo a, a chanchin ka hrezui lo" ka ti sep a, thudik tak ka sawi.
"Anih leh ka fapa hnen aţang hian beisei i nei em? A hlawhtlin hnu ah i rawn lang leh nawlh a, duh inei em ni?"


"Duhtawk rawh" inchhung panchhoh na step lam chu ka nu nen kan hawiruak ţhawt a, Matthew a lo ding run a, ka enreng lai tho in a rawn chhuk zel a, ka bulah min zi chet in a rawn ţhu a, zam tak chungin ka en a, a hmel dur khup khup chu ka lo hmuh hmaih lo. Min duhsak tu leh a harsatna pawh min hrilh ţhin tu ka nu kha a ang tawh lo. Dominic nen min hmuh dun hnu ah a danglam ta vek a, min chelh a tum laiin luhlul chhuah in a fapa ka chhuahsan lui bawk nen, min haw awm tak pawh a ni.
"Emma hi ka hruai haw lui a, min hnaih leh tur a ngen tu pawh keimah ka ni. Kan nupa inkar ah hian tumah in rawlh buai tawh lo se ka duh" ani pawh zing tho hlim a ni bawk nen a ţawngkam a chang bawng bawng khawp mai.


"Ven che ka tum. Hmeichhia ţhenkhat hi an mak ania, rin mai loh tur" ka awm ve tih hrelo ang maiin min zahpah hauh lo in a ţawng a, ka nu tan chuan ka lo hniam viau tawh a ni ngei ang. Ka pu damlai kha chuan kan in ang tlang vek ţhin a ni sia.
"Nangpawh hmeichhia inih kha ka nu. Emma ang bawk in mo ini ve bawk. Ka nupui hi keiin ka hriatthiam aia nasa a hrethiam tur inia sin. Kan chhungkua a boruak ţhalo thlen tir tu chu tupawh nise kan lo lawm thei lovang. Nunhlui chu liamtir rawh. Nunhlui neilo kan awm lo" a ti duah a, anu hi a hmangaih in a duat thiam hle ţhin a, ka awmlai lehnghal a a chhang ve ngam chu mak ka lo ti ru kher mai. Keimah vanga an inhmuhthiam loh chuan nuam ka ti miah lo ang.


Pi Sangi a rawnlut zal zal a, kan boruak a hrethiam a ni ngei ang min be miah lo in choka a pan ding nghal. Nidang ang chu nise reilote tal a rawn ţhu veleh ngei awm sia. Ka nu ngawi ran a ţhu hnen ah chuan "Coffee i duh em? Tui iti ţhin sia" a ti sup a, an inhnial na kha a tawp ta ah a ngai anih ka ring.
"Duh lo. I office ah ka rawn hmu ang che" a tih pah chuan min rawn melh kher a, ka nu hi hriatthiamna chen ka nei. Ka awm ang hian ka mo ngei hi awm ve se ka lawm bik lo maithei. Mahse Matthew ber in ka kalsan leh hlau in min chelh a, fa kan nei tawh bawk nen, kan awmdun lo thei ta lo a ni. Ka sawifiah viau hnu pawh a ngaihzawng nei tur a min la ngaih vang erawh chuan ka rilru a na khawp mai.


Kan in a chhuahsan veleh Matthew pawh ngaichang lo in room ah ka tlanchho a, bathroom ah ka tlanlut leh nghal zat. Zingkar ah khatiang sawitur ringawt khan a rawnkal a, kan haw hlim te khan rawn sawi sela chuan he in ah hian ka let miah lo ang. Tunah boruak a ţha dawn ţan a, Matthew nen a kan inkar chhe lai pawh kan siamţha mek a, nunhlui rawn kaihthawh leh a hun tawh lo em a ni.
"Emma lo chhuak lawk teh" kawngkhar ben rik pah in a rawn ti a, bathroom ah ka lut a engmah ka la ti lo tih ka hrechhuak chiah. Ka hmai takngial pawh ka lo la phih lo. Muangchangin kawngkhar hawn na ka ban de de a, ka nu thusawi vang khan a thinrim ţhat veleh loh hram ka beisei. Ka kuai zeuh a, kawngkhar a in hawn rual in ka beisei loh deuhin min lo pawt a min kuah nghal thlawp. Engemaw ber kha sawifiah tur a min tih ka ring ania.


"Ngatinge i lungngaih? I tlanvak hma khan i mittui ka hmu hman. Keimah vanga ţap ini lo ang chu tiraw? Keimah vanga i ţah tawh loh tur thu kha sawiin ka intiam na pawh ala reilo a" a awmzawn a bei ka nih vangin a thinphu dup dup ka hrethei.
"Teuhlo mai. Nangmah vang a nilo. Ka mittui tla pawh ka hre reng reng hleinem. Ka nu kha ka lo ngai tawh lutuk aniang" ka tikual vel a, inlak hran ka tum chuan alo phallo nasa mai. Min kuah ang ang in ka awm ta hle hle a.
"Ka nu in khatiang a rawn sawi leh kha pawi ka ti. Ka harh a, ilo awm silo. Zawng tur che a ka rawnchhuk laiin tlem a zawng ka hre hman a, a zawng zawng hrelo mah ila i natna tur a sawi tih ka hria. Tih tur leh sawi tur ber pawh hrelo a buai taka i awm lai kha ka hmu hman a, ka rawn ţawngchhuak ve a ni. Miin engpawh sawi se, ka nu ngei hi a sawitu pawh lo ni se, ka thuhriat ţhin hian ka hmangaihna che a ti nep chuang lo"
"An ni thusawi chu i ring tho tihna em ni?" ka ti sep a, min chhan let na tur chu ka ngaithla ngam lo ţhelh a ni.
"Ring lo. An thusawi hi phuahchawp leh ngaihruatna mai mai a nih ka ring. A tak tak lo ni pawh nise ka tihsual vanga thleng ah ka ngai thovang. Ka nupui ka ngaihsak tawk loh vangin kei aia ngaihsak tu mipa dang loh theih loh in a kawp ah ka ngai ang, mahse nangchu chutiang mi inih loh zia ka hrechiang tho si. Ka sawi ţhin ang khan tihluihna a ka thil neih zinga ka paih bo phalloh leh ka hlut ber ini ang. Ka tan chuan nang aia hlu an awm lo" a tih chuan ka lo nui hak a, ka mittui vangin ka khawhmuh a phe ruai thung. Ka nu min rawn hauh hnu a hetiang thu ka hrethei hi ka lawm em a, lawm vang in mittui alo tla ve thei chiang a nih hi. Ka dar pahnih a dawm in a awm hla deuh a, min dawm reng chunga rawn kun hniam in hnai set sawt ah min en a, ka mittui a hmuh vang nge a nui suk lehnghal.


"I hnen ah ka awm tlat tawh ang a, kei chu sawiloh tumah in an ti na tawh lovang che. Hun chhe ber i tawn chang in i hnen ah ka awm ve ang a, tun aţang chuan mal takin ka awmtir tawh lovang che" a tih hnu ah "Ka hmangaih che" min ti nawn leh a.
"Pasal leh pa nih zir ţan mek, a nupui fanaute venhim tum tlat tu hi keipawn a hma ang tho khan ka la hmangaih alawm" nui ver ver chunga ka tih chuan a hlim zia a langchhuak. Ka sawizawh hnu reilote ah a hmui ka hmui a insi zui zat. Hetianga kan awmlohna pawh hi a rei ve ta. Min fawhna pawh ka lo chhanglet rang ve ta khawp mai, a inlakhran hnu ah "Ngaihdam ka ni tawh em?" min zawhna atthlak tak avang chuan ka lo nui mai a, ka bu nghat nghat a, rei pawh rial lo in min fawp nawn leh. Ngaihdam a nih hnu chuan a hma aiin a duhthawh zawk daih lehnghal.



An kal tur ka thlah pawh chuan nidang aiin kan phur a, ka ngaihbel mai mai nge ka hrelo na a naupang pawh nidang aiin an harhvangin an hlim zawk ni maiin ka hria. Nu leh pa te inkar boruak ţha vaklo kha hrethiam kilh kelh lo mahse kan awmdan an zir ve reng a, an entawn ber te kan nih bawk vangin engemaw chen chu an lo hreve a nih ngei dawn hi. Nui sang chunga an tlanliam ka lo thlir lai chuan Pi Sang in "Hmuh in nuam leh ta khawp mai" a rawn ti a, ka bulah alo ding ve reng chu ni in.
"Mihring hian buaina hrang hrang kan lo nei anih hi tiraw? Ka pasal nen a kan inkar a fel chauh a, ka pasala nu thinurna ka hre ţan leh mek a" ka lo ti a, a rawn luh hlim a kan awmdan aţang khan a hmuthiam dawn hrim hrim.
"Buaina te tawk ţhin lo ila Pathian kan hrenang. Amah kan hriat theih nan buaina te hi min siamsak ve ţhin a, la kiang turin kan dil ngat ngat a, kan buaina chu min lak kian sak ta ţhin a, ţhenkhat chu an buaina a reh a, mangang taka Pathian hnen a an ţawngţai ţhin lai leh Pathian in a a thiltih sak te hrelo ang hmakin an duh dan in an nung chhunzawm leh a, tam tak chuan Pathian thiltihtheihna leh ropui sia hmu in an damchhung hun Pathian nen an hmangdun tawh ţhin" a ti a, dik tihna chen pawh ka nei ve. Mangan lai chauh a Pathian hre em em, an buaina in a kiansan ruala Pathian laka inla hrang zui leh ta mai te an awm ţhin. Keichuan ka damchhungin ka bel tlat tawh ang. Belh tlak a nih zia ka hria, kum6 hnu ah chhungkua kan hlim veleh ta a, nghak rei viau mah ila ka nghak thlawn chuang lo.



Naupang ban hma deuhin Mason a rawn lang hlawl a, a hawikual nghal vut vut bawk.
"Zawn nei iva ang ve"
"Naupang ho" a ti ngei reng bawk a, Matthew ruala an rawn haw tur thu ka hrilh chuan a ner nang a "Tlai ah chauh maw?" a ti hluai a, a thil khai lai a nghat chawrh bawk.
"Nilo e. Tunlai chu a rawn haw hma ţhin a, chawlh a in pe ve deuh a nih hi" ka lo ti uang a, a thil khailai chhuata a nghah tak chu ka dahţha a, "Eng nge i rawn khai ţeuh a" tih pah in ka hawng a, toys ka hmuh chuan ka nui hak a, fiam tum in ka en a, min lo melh rum nasa mai.
"I rawn in ring ve viau a ni maw?"
"Naupang hmu tur a toys kenloh te chu. Ka patea chu ava rethei ve an ti mai dawn sin" chapo awm takin a hawikual vel a, amah ka hriatchian vangin a awmdan chu ka lo nuihpui hak hak thung.


"Mason coffee iduh em? Nge thildang?"
"Ehe....pitari chu ilo la hmelţha reng a nih hi" ti vak chungin Pi Sangi chu alo kuah a, a fakna avang chuan Pi Sangi pawh a hlim khawp mai. A nui vur vur reng ringawt.
"Tui ka duh. Chu chiah chu nimai"
"Chaw einghal rawh aw"
"Eilo ang. Matthew ka hmurei peih hleinem" fiamthu titak deuh a a tih chuan ka lo ner nang nang a, chu chu a hmuh in ka tih ang chiah in a rawn ti ve kher.
"I unaupa neihchhun hi haw viau suh" ka ti hlak a.
"Ka huatna aia nasa hian min hua. Sawi tawh lo teh" a ti hmuk a, Pi Sangi tui rawn pek a in khawlh khawlh a, ke hlir a hah deuh a rawn thleng ang mai a ni.


"Kan lo haw" naupang ho rawn lut in Mason an hmuh chuan an ding chawt a, Matthew thleng in mak an tih hmel em em vek. An awmdan chu hrethiam ni awm takin Mason chuan "In patea ka nih hi. Lokal ru thil kan lo hawn che u" nelawm takin alo ti a, ka thawveng huai nghe nghe. Tumah tih bik a neilo a, a koh kal theih mai loh vangin amah zawk in an din na ah kal in a kuah diat diat a, "Tu zawk nge inih?" tiin Damon a zawt a, ani lah in alo hrethiam lo nasa mai.
"I kuah zawh chiah kha Jason. I biak mek kha Damon" tiin Matthew chuan alo hrilhfiah a, a thil rawn hawn a pek hma in Pi Sangin inthlak turin a hruai phawt a, Mason leh Matthew pawh ka awmna lamah an lokal leh rih.
"Khawi ka thil lo ken kha" tih pahin ka lam ah a kut a rawn phar a, a thil rawn khai luh ka dahţhatsak chu ka lo pe vat a, a ţhutna bula a bun chiah chu Matthew pawh a lo nui ve suk. Amah in ngawi rengin a thliar mawlh mawlh a, a hmeichhia deuh chu Sandra tan a dah ni awm tak a ni. Kan lo enreng laiin "Matthew i fapa pakhat kha i rawn ti thinrim em ni?" a ti sup a, kan lam rawn hawi miah lo in a thliar zawm reng bawk.
"Ice cream kan lei dawn a, dawr lian bulah dinna a awm silo a, an school kalkawng khawlaia an zawrh kan lei a, pink an pe a" tiin nui chungin a sawi a, Damon rawn tum haw vuau pawh kha a awm ang khawp mai.
"Damon tiraw khah? A tum nasa khawp mai, i naupanlai ang mai"
"I naupanlaiin itum ve bur ţhin a ni maw?" ti a ka fiam lai mek pawh in a nur nang a, Mason lah chu nui sung in kan lam a rawn hawi a, Matthew chu a chhaih ve ni awm tak a ni.


Sandra leh Jason te chu an thil dawn avang chuan an ri chel chul a, Damon chu Mason bulah ţhu in a a remkhawm chi, keinin a naupangchhia mah mah e kan lo tih chu a rem mawlh mawlh a, ala lungawi zan lo tih a hriat.
"In len hunah eng nge nih in chak a?" tiin naupang ho chu a zawt a, Sandra leh Jason ten rang takin "Doctor" an lo ti vat a, nui hawk chungin Matthew chuan ka dar ah a rawn kuah a, a hmel ka lo en vat a, a fate nih tum avanga hlim nge Mason rawn lan vang ka hrelo.
"Damon nang ve le?"
"Ka hre lo" a lo ti daih thung.
"Ţha deuhin zir phawt mai la ila hremai ang" a ti ve ta tawp a, Sandra en hran na a nei miah lo chu ka lo lawm khawp mai.


Mason chuan pawn ah naupang a infiampui a, Damon chuan rin aiin a nel phian. Matthew pawn "Min hmuh tirh ah min nel ve miah silo a" a ti hial reng a ni.
"Unau tak tak awm thei tawh ula ţha tur" ka ti sep a, nuam lo a tih hlau viau mah ila an in mil theih tluk a thil ţha a awm lo. An lo intihnat tawn tawhna kha an theihnghilh a hun ve tawh. Keipawn theihnghilh ka tum ţan mek a nih hi.
"A la theih mai ang. Tumah hi tihluih theih an ni lo. Nangpawh ka nghak ţang ţang che lawm" a ti a, dik ka tih vang in ka lo bu nghat a, kan inpeih hun nghah a ngaih chang a awm ve. Ka lo hmanhmawh leh ţhin a ni.
"Sandra chungchang hi i hretawh em?"
"Aw. Ka hre daih tawh" alo ti liam puat a, thlek ha pah in "Iva sawilo ve. Ka hriatna ala rei miah hleinem" ka ti bai bai a, mipa tak hi chu a. Sawi ve mai ţhin tur ania.
"I hmangaih em a, Sandra ka khawngaih bawk nen, ka ngawihbopui ta mai a ni"
"Thildang zep ila nei em?" a tihziah dan in a hmui a pet zeuh a, a chezia ka lo en ve ran a, hmuh ka nei chuang der lo.



MATTHEW'S POV


Irene chanchin sawitur ka ngah, a huat ber anih miau vangin sawichhuah erawh ţul ka ti lo. A bialpa ka duhpui loh zet nen khan an awmdun chawt a, a rai leh zel a, nau neih lam pawh a hnaih tawh ang. Ethan leh Debbie bulah Irene chungchang reng reng Emma hrilh lo turin ka ngen a ni. A rai thu a hriat phei chuan min ring lo sa bawk nen ka fa ah hial a ngai thei tlat a ni.


"Neilo. Thildang chu i hrevek tawh" muangchangin a bu nghat nghat a, min ring chiah lo hmel ka hmuh chuan ka nui suk a, Irene chu sawichhuah miah loh ka duh tawh a ni. Emma nen a kan chungchang a hreve chak ţhin em em a, min ngaihdam hun ah chauh ka hrilh ang che ka ti ţhin a, vawin ah hrilh ka tum a, ka hmuh loh vangin zan lam ah ka be mai ang ka ti ta ringawt. Mason pawh hian Irene chungchang a hriat ka ring. Emma hnen ah engmah a sawilo a ni phawt ang a, ka tan a a thil tih ţhat tlem te zinga mi a ni ngei ang.


Naupang ho nen an rawn ri lut ham ham a, Jason chuan ka malchung a rawn chuh vat a, Damon erawh Mason bulah a awm. A hmuh hmasakna ber a a nel em em mai hi mak tak a ni.
"Damon hian nitin rawnkal rawh a ti a" tiin Emma a hrilh a, a nui pah reng bawk.
"Rawnkal la nimai lawm Damon ber in a tih te chuan" Emma chhan hma in ka lo chhan khalh. Ka ţawngkam bung nghut a hriat veleh min rawn nuih leh a, ka huat vanga ţawng bung hmuk ka ni lo. Ka inrin hman loh vang ah ka puh.
"Keichuan ice cream pink ka leisak ve dawn lo a"
"Sawi tawh suh" ka ti nghut a, Damon hi alo in la pa em em tih ka hre lo a ni. Naupang dang angin ice cream a nih chuan a ei ve mai tur ah ka ngai a, min vawm nan a hmang lo chauh a ni. Min vawm hma in Sandra in a laksak hlauh a, a eisak tu chu Jason a ni thung.


"Sunday ah hotel ah ka kal ţhin dawn"
"I inkhawm dawn Damon" ka nupuiin thupek khauh tak a rawn chhuah nghal. An rawn haw leh hnu chuan keipawh ka inkhawm ve ziah tawh. Kan chhungkua in kan kal a, nuam ka ti takzet tawh.
"Inkhawm banah ka rawn hruai ţhin ang"
"Tlai lam daih a ni dawn a sin. Saturday ah kalpui zawk mai rawh. A unaute hruai tel ve bawk rawh" ka nupuiin a tih rual in "Keichu ka duhlo" Sandra leh Jason ten an lo ti ve nghal zat. Mason leh Damon chauh awmtir chu keipawn a ven hneh loh ka hlau.
"Anih chuan Damon chauh ka hruai thei anih chu"
"Engtin nge i thlem?" ka ti hluk a, Damon sam a chul hauh hauh pah in "Hmeichhia an tam mai ka ti" tiin min lo chhang a, reitak hnu a Mason nen kan nuihdun leh hmasakna ber a ni hial ang. Ka nupuiin thidang mai tur hmel alo pu ve lehzel nen.
"Ka ti mai mai anih kha Emma. Boss ka nia ka tia, boss nih ve a chak a" tiin a hrilh tlang ta nge nge a.
"I room ah lo khawiahmah kalpui suh" a ti leh hlak a, fate ngaihtuah hi chu a na a ni. Nu hian an ngaihtuah bik amaw tih tur a ni lehnghal a, ka nupui pawh fiamthu ah a nuih theih miah loh kha. Mason khan a fiam hlum lek lek zawk a nih kha.


Chaw ei tur a kan tih pawn a duh tlat lo. A car bul thleng in ka thlah a, kawngkhar a hawn tawh hnu ah pawh lut mai lo in "Irene bialpa hi tunge kha?" tiin min zawt a.
"Hruaitluanga. A chanchin ka hre tam lo"
"Nau a nei ve ţep tawh em? Emma hian hriat a nei lo tiraw?"
"Nei ve ţep tawh ang. Ka nupui chuan engmah a hrelo. A unaupa leh a ţhiannu pawh hrilh lo turin ka ngen nghe nghe. Ngaihruatna eng eng emaw a nei leh anga, boruak a chhe leh mai mai. A ţullo"
"Ka ngaihthlak tur a sawi i ngah ve tawh hle mai" a ti a,a nui vur vur bawk. Ka ţawnghnem viau tih ka lo hre hleinem. Ka nupui hnen a sawi a neih ka hlauh vang a nih ka ring.
"Sandra chungchang chu ka hrilh ta a nih kha" a ti sup a, ka khawngaih khawp mai.


"Fa i neih theihloh chungchang kha"
"Ka la zep" a ti tham ţuak a, fa neih theihloh hi chu a tawp chiang em a ni. Fa a neihtheih loh thu a hriat aţang chiahin a ni Sandra pawh a fa a nilo tih a hriat. Ka nupuiin Sandra a kalbopui hnu a ka nu thinrim in a sawichhuah a ni. An kalbo hma khan ka hrebik lo.
"Sawichhuah a nuam lo a, a zahthlak bawk a" a ti ban charh a, hnem dan a awm lo. A ţha leh mai ang ti dawn ila ţha leh mai thei a ni lo a, pawi ka tih ve zia erawh a hrethiam ang.
"Nangchu fa inei ţha khawp mai Matthew"
"Ka lawm e. I duh hun hun ah i rawn kawm thei ang" in hawng tak ang a awm ka tum ve. Ani pawn min huatna a tilang tawh lem lo.
"Damon chu ka rawn hruai ţhin dawn nia. Sandra pawh alo hmelţha tawh khawp mai. Jason a fel viau bawk a, chhungkaw mumallo tak ah kan seilian ve ve a, i fate hi chu chhungkaw hlim takah seilian rawh se. Kan naupanlaia hrehawm kan tawrh ang kha tawrh tir ve suh. An unau an in haw ve palh ange"
"Ka siamţha tawh a, a chhe leh tawh lovang"
"An tum nasat viau pawh a an tihchhiat loh nan ka lo venpui dawn che nia. Tun ah chuan kan tuina lam ve ve ah kan kalhrang ta bawk a, zawi zawi a kan inzawmna a ngheh theih ka beisei"
"I duh phawt chuan le"


"Ate i phone" ka fapa aw hria in kan lehhawi a, Damon chu phone lek va chungin a rawnkal a, a hmanhmawh hlak hlak viau lehnghal.
"Tunge Ate chu" tih pahin ka pawm a, Mason a kawk va lehnghal.
"Patea tih chuan ka upat hmel alawm. Ate min tih loh pawn Te min ti ru ka ti anih kha" a ti awlsam et a, "A ţhat khawp chu Mace" ka lo ti ve sup.
"A ţha khawp mai Matty" ka lo nui hawk. Kan naupanlaia kan in koh dan ţhin a ni.
"Ka kal ange. Damon inu phalna thlap in Saturday ah ka lo hruai ang che aw. Sunday ah chuan inkhawm zawk rawh aw" naupang aw anga a aw a tih nem duai lai chuan ka ner suk a, fa ka neih hnu pawh a ka la tih ngam loh a ni.
"Awle" thuawih takin Damon pawn a ti ve mai. A kal liam hnu ah chauh inchhung ah kan lut ve a, kan kal chhung zawng ka kawrnghawng a khalh a, a ngawi run thung.


Damon dahthla tur a ka kun hniam pah in ka nupui biang ah ka fawp zeuh a, "I thlah fel thei maw?" tiin a lo nui sen sen. A thinrim laia a hmel hriam hrak pawh a ţhat tawh tehlul nen a nuih phei hi chuan a ţhatna sawifiah thiam a har, hmuh a hriat chi a ni. A thinlung a thianghlim tel lehnghal. Ka nun buai nuaih nuaih kar a ka pil bo loh nan Pathianin vantirhkoh min pe a ni ringawt. Ka hmuh tirh ah khan a ţhatna hrechiang turin ka lo belchiang tawk lo a ni.
"Khatiang kha ka beisei pha lo"
"Chu i rin aiin a kal tluang daih a ni maw?" z*ng vah a a tih chuan ka bu nghut a, Mason nen a kan inkar a ţha deuh chu kei ai mahin a hlim hmel zawk. A rilru a ţha tia ka sawi tawh kha, mihring ţha famkim kan awm lo, ka nupui hi ka tan chuan a ţha famkim a ni. Vanduai in ti tak ţhin kha mi vannei zinga chhiar tel theih ka ni ve ta.



CONT...

---

FORCED MARRIAGE-LAST



Vawin hi Matthew birthday a ni. Hnakal tur a a chhuah thleng khan ka hrelo der. Tun ah hian ka thawhna hmasaber hospital, Matthew ka hmuh hmasak ber na ni bawk ah ka lut mek a, ka pek tur ka lo chah lawk tawh sana ka ak ran bawk. Ţhawn thut ka tum a ni.


A sawilawk tawh ang khan ka chungah ţhat a chhuah lehzual a, kan haw leh hnu ah thla tam a liam leh tawh a, naupang leh kei min enkawl dan ah sawiselna tur a awm lo. Min lo ngaihsak ţhin na zawng zawng aia nasa khan min ngaihsak tawh a ni. Kan fate pawn mi pa an awh bik ka ring lo. An tuizawng a tih pui peih in chau viau chung pawn phir te pawh a infiampui reng ţhin. Damon pawh Mason nen an inkawmngeih tluang zel a, school chawlh anih tawh chuan Damon hruai turin Mason a rawn lang vat ţhin. Hotel ah thawktu ten an duat a, chocolate eitam ka phalloh laiin Mason chuan a leisak ţeuh ţeuh a, hotel a Mason nen a awm chu nuam a ti em em reng a, Mason-a nu lehzel in a duat lutuk chu mak tih chang ka ngah. Ka pasala nu hi ka chungah a la lungawi chiah lo nang a naupang hi chu a rawn hmu veleh zeuh ţhin a, an pi tak tak ai pawn Damon chuan Mason-a nu hi a ngai zawk tlat. Zing ah an rawn la a, tlai ah an rawn dah leh a, an rawn dah leh hnu ah Damon hian a sawizui nasa ve ţhin hle. A len hun ah chuan Mason ang chiah nih a tum thu a sawi. A nun diklo lai kha Damon hian a chhawm loh ka beisei.


A office lam pana ka kal mek laiin ka hmuh duh loh ber Irene ka hmu a, ka haw leh hnu thla tam tak chhung pawh in a chanchin ka hrelo kha ania. A nui hmel tak ran ka hmuh chuan ka awih lo lek lek a ni. A cher em em a, a hmelţhatna leh a vun nung sar ţhin erawh ala danglam chuang lo.
"I dam em? Emma" nelawm tak in a ti ve reuh va.
"Ka dam alawm. I dam zawk em? Ka hmu cher riau mai che" ka ti ţha ve mai. Thinrim a min lo hau leh pung pung anih loh chuan thinrim ve ringawt ila sual nih ka hlawh zawk ang.
"Aw, nau pawm chuan thau a har aniang" a tih chuan ka meng phar nasa viau in ka ring. Ka awmdan a hmuh chuan a nui hak hak a, zawhna ka zawh belh leh hma in "Fanu thla thum mi ka nei ve a" a ti leh a, ka pasal umzui reng tu kha a ni a, nau a pai thu tu hnen aţang mah in ka hre ngailo a, fa a nei tih hriat chu ka tan chuan thil mak tak a ni.
"Pasal inei em ni?" ka ti hu a, hriatloj zawng ah chuan tupawh kan lang mawl huih vek a nih hi.
"Ka la nei ang chu. Matthew vanga ngainat ve che hi ka tum nasa ţhin a, ka la hlawhchham ta tho a nih hi. Ka ţhianţhaber leh ka hmangaih ber ni bawk hlimna ini miau sia, ka hmangaih em vangin a hlim ka duh a, i hnen ah ka kaltir ta a nih kha. Kan thih hnu ah thlarau ni a kan in tawn leh hunah chuan ka ngaina ve tawh ngei ang che" a tih lai pawh chuan mak ti in ka la ang pham mai.


"Fanu i nei a, ka lawmpui che aw" ka ti veleh a, ka thinlung tak aţanga lawmpuina thu ka sawi thei te pawh chu thil mak a tling lehzel.
"Min lawmpuiin ka ring. Ka fanu hi i pasala fa a ni lo ania, Matthew a rilru a nat viau hian ka tan hmuh ala hrehawm reng a, chuvang chuan ka awm nawm nan a i tih theih pakhat chu hlim taka Matthew awmtir reng a ni mai. Hospital dang ah ka thawk tawh dawn a, in chhungkua pawh hmuhloh dan che u ka zawng reng ang. A hlimna duh viau mah ila hmeichhe dang nen a hlim taka an awmdun hmuh chu a la har tho. Ka hmangaih ber i neih daih avanga ka ngainat theih miahloh che avang hian min ngaidam dawn nia" kal a tum laiin atthlak tak in ka che leh. A kal hlau ni awm tak in a banrek ah ka lo man a, ani pawh a ding ve chawt tho.


"Pathian in kan ta tur a a tih an nih loh chuan tumah hi tihluihnaa neih theih an ni ngai lo"
"Matthew hi chu tihluihna hmanga ineih a nih ngei kha"
"Pathian ruat kan nih vang in kan in hmangaih a, tihluihna hmanga neihtir kan nih ve ve avang khan kan lungawi lo a, a der a nupa nih tum kha kan lo in hmangaih ta sia, a tak ah kan chantir a nih hi. Engkim hi Pathiam ruat vek a ni. Mihring in kan duh ang a kan tih danglam theih a nilo"
"Anih dawn chu. In hlim zel dawn nia, duhsakna ka hlan che Emma. Ka kalsan phawt ang che. Hmuh leh che ka duh tawh lo bawk ang" ka vawn na chu ka thlah mai loh vangin amah zawk in a phih thla a, a kal dawn ah nelawm tak bawk in a nui leh a, a na ve viau a ni tih erawh a mit aţangin a langchiang khawp mai. Irene hi kei aiin a lo chhel zawk daih a nih hi. A hnunglam ka thlir zui vawng vawng a, a fanu chuan nakin zelah anu ang lo takin amah hmangaih tu leh a hmangaih tak damchhung atan a neih theih tawh ngei ka beisei. Hmu lo mah ila a fanu chu malsawmna dawng turin duhsakna ka hlan mawlh mawlh. Anu ang a hmeichhe nalh leh duhawm tak ala ni ve ngei ang a, a enkawl dan in a zir chuan hlim na tam tak a nei ve ngei tawh ang.


Irene kal liam hnu ah Matthew office ah ka lut a, min hmuh chuan a lo tum bur. A chhan ka hriatchian vang in ka rukin ka nui sak a, a fate zinga chhiartel mai tur em maw ni ka ti hial.
"Happy Birthday" phawk hru in a rawn hawichhuak a, nui hmel in a chhunzawm har lo. Min kuah tur in a ban a rawn pharchhuak a, a zawn ka thlen veleh min lo kuah a, "I theihnghilh ah ka lo ngai a" a ti zui sup.
"Kartluan in i sawi a, theihnghilhna hman a awm hleinem. Ka hrelo der mai mai a nih kha"
"Lemchan pawh i thiam tawh khawp e" a ti leh nghut a, ka lo nui hak ringawt. Ka in lakhran hnu ah ka bag ka hai rawk rawk a, a sana tur ka leisak chu ka phawrh a, "Sana i lawmzia ka hria. I birthday leh hma chu a chhia a nih loh chuan sana dang nen a thlakthleng phal a ni lo" fiamthu ti tak deuh in ka sawi a, alo bu ve nghut nghut a, a kut ka vuan a, a bun lai la thla in ka leisak chu ka bun tir a, "Ka thilpek dawn zinga ka hlut ber anih dawn hi"
"Pathian zar ah kan dam zel anih chuan i piancham kan la lawm dun reng dawn sia, hlut ber i ngah dawn mang e" ka ti sep a, kan piancham leh kan fate thlengin Pathianin hlim tak a kan lawm ho reng min rwmtihsak em ang chu.
"Nang aia hlut dang ka nei chuang lo. Thilpek min pe lo mahla ka bula i awm chuan a tawk viau mai"
"Ka awm reng dawn tih i hriat kha" ka tih hnu ah boruak tihchhiat hlau tak chungin "Irene ka hmu a" ka ti sep a, ka rin ang ngeiin a hmui a chip hmak.


"Fanu a lo nei reng a, ka lawmpui khawp mai" nui ver ver chunga ka tih leh tak ah chuan a thawveng huaiin ka hria.
"Nei e. I hriatthiam loh ka hlauh vangin ka zep a, ka thiamloh a ni"
"Ka hriata sawichhuah iduh lo tih ka hria. Lungawi lohna ka nei miah lo. Min enkawl dan ah ka vui hleinem. Ka thilhmuh ka sawi mai a ni" ka tih tak ah chuan a ni pawn in hawng tak in "Nau a neih hnu ah hna a la rawn zawm lo a, vawin ah a ban thu ka hre chauh a ni" a ti ve a, sawidun zel ila boruak ţhalo kan pumpelh a ni mai.
"I hmuhpui ve tawh em?"
"Aw Debbie leh Ethan te nen kan en ve kha. Hemi hospital ah hian a nei a" ka unaupa leh ka ţhiannu lehzel in an zep chu a nuihzatthlak angreng. Kan nupa inkar a chhiat leh an hlau ve tawh takzet a ni ngei ang.
"A hmelţha viau lo maw? Ka hmu ve chak hle mai"
"Ka hrethiam lo. A te angreng" hmu ve chak viau mah ila Irene ber in inzawmna neih a duh loh chuan ka hmu lo reng mai dawn a nih hi.


Haw pah in naupang kan lam kawi a, Matthew nen a min hmu dun chu an hlim khawp mai.
"Nu kan lo nghah pah cheu khan Tete-an ka lehkhabu en min dil a, phir te hian an phallo a" tiin Sandra a vui a, a hma a ka ţhut vang in hnunglam hawiin an ţhu tlat ţhap chu en pah in "Ngatinge in phalloh?" ka ti a, an in en tawn zak zak hnu ah Damon chuan "Kan veng ringawt" a ti a, min en duh miah lo lehnghal.
"Atea khan Sandra bulah mipa awmtir loh tur a ti lawm" Jason chuan a ti ve bawk a, Atea an tih chu Mason a ni ngei ang.
"Sandra an tihbuai chuan in chhan ang. A lehkhabu en an dil in lo phallo tawh suh u. A thuhrim ah nangni aiin a u daih a, a vel mai tur cheu sin" ka ti uang a, an ner nasa dun khawp mai.
"In sual emai"
"Kan veng che nih kha Sandra" Damon chuan a ti leh vat a, Jason hi chuan a u ve mai a, Damon hian a duh tlat lo pek a, Delhi a kan awm laia anmahni awm ţhin tu pawh a hming ngat in a ko ţhin.


"Jason atea bike nalh deuh kha i hria em?"
"Aw hria e"
"Min khalhtir dawn sin iduh ve em?"
"Damon" Matthew nen kan au rual ţhawt. Gate ah kan tlan lut mek a, car a tih din veleh Matthew chuan "I taksa in ala tlin lo a, bike i khalh duh chuan i taksa tlin tawk ka leisak che kha khalh mai rawh" a ti hrawk a, ka lo ngawi reng.
"Khatiang a lem lem a nih kha" pawr tak a ti chung in kawngkhar a hawng a, lungawilo deuh in a chhuk zui bawk. Keini pawh kan chhuk ve sap sap a, Jason leh Sandra ten min kai a, Matthew leh Damon te chu inhau chungin kan hma ah an kal. Mason reng reng pawh chu, bike khalh lo sawihmuh reng reng.


"Cycle te khalh la a tawk. I puitlin hun ah ila khalh ve dawn nia atea bike ang chu" ka pasalin a tih lai mek chuan inchhung kan lut tawh. Sofa ah kuangkuah in ka fapa a ţhu tum hmuk a, a bulah Matthew a ţhu ve.
"Pa keipawn atea ka kawm ve duh tawh"
"Rawn sawi ve reng reng suh Jason. Damon pawn bike khalh a tum chuan a kawm tawh dawn lo" an inhnialna chu Pi Sangi nen kan lo nuihpui a, kan mawl nupa khawp mai. Fate kan ngaihtuah lutuk vang a ni ngei ang. Mason pawn a la khalh theihloh zia a hrevek ang a, a ding laiah a chuantir vel mai mai chauh ang. Kan lo phul pui hlut zawk a ni.
"Atea ka kawm awm tho e" Damon chuan a la ti nang nang a, Jason chuan ama malchung chuh in "Apan a phalloh chuan ka duh lo" apan a hauh ve a hlauh vanga tlawn titih chungin a lo ti daih thung a, kan daihzai ve ta khawp mai.
"I bike saw inchhungah khalh mai mai la a tawk" tih pah in bike lem an chuan theihna tho si a leisak chu a kawk a, a te lek lek tawh maithei.
"Ka duhlo"
"Thu i awihloh chuan atea rawnkal pawh ka phal tawh lovang" a ti nghut a, Jason a lo mangan hmel tawh khawp mai. Kan inchhung ah hetiang hi a thleng ve ziah tawh. Naupang hi an zia a in ang vek thei bik lo a, hauh reng ngai bik hi an awm ve hrim hrim. Kan naupanlai chuan ka unaupa pawh hauh ngaiin a awm ngun ţhin. A reh veleh mai a, Damon pawh a reh veleh mai ka beisei.


"Ava khawharthlak awm vung vung ve" ti sup chungin ka bulah a rawn ding ve a.
"An muhil tawh mi?"
"Aw muhil fel chiah" naupang a muttir chhung in tukverh ah ka lo dak vauh vauh a, khaw awmdan a nuam tawk chiah a, tukverh pawh ka hawng vek. Muttir ve ka tum hian keichu min hlauh loh vangin phir te hi an ninhlei lui ţhin a, an in buan a, tuemaw zawk zawk an ţah chang a awm a, kan menrei phah ţhin. Matthew a nih erawh chuan an mu hma ţhin hle thung.


"Mason ka bia a" a tih chuan ka nui vur vur a, a fapa chungchang bawk aniang chu mawle.
"Damon hi awmpui a duh a, ka phallo. Jason bakah keini pawh kan khuahar ang ka ti a" a ti zui sup a.
"Nupui neiin fate nei ve se ţha tur. A ngaihsak tawh mang silo a" ka lo ti ve hlak a.
"Ala ngaihsak leh mai ang. A inla awl ve rih a nih hi" a ti liam puat a, engang mi pawh nise, nupui a nei emaw neilo pawh nise ka fate tan chuan patea ţha tak a ni tho mai. Ka beisei phak bakin kan fate min hmangaih pui tlat a ni.




Fanu ka nei leh a, kan hlim tlang khawp mai. Hospital aţanga kan chhuah hnu ah pawh en ala hlawh hle reng a, Matthew thawhpuite pawh an rawn lang ve reng a, Mason-a nu pawh a rawnkal ve hial a, a hming atan Abigail a ti a, a mizo hming ah Lalrinchhani a ti a ni. Ka fate hming sak ah ka chhungte an la awl ta zel a ni.


Tupawn kan hlimpui a, Damon pawh Mason bul ah a kalloh phah ta fo mai. An pian hlim a Sandra in a lo lawm ang chiah in an ni pawn an nau thar chu an lawm khawp mai. School kalchhung chiah an reh a, a dang zawng ah chuan an mut hma zawng an awmpui chawt a ni mai. Mipa an nia, a hlimchhawn ah bak an lawm ka ring lem lo a nia, rin aiin an lawm phian. Pawm an inchuh rap rap zel a, che buan buan chi an nih vabg leh ala sen em vang in kan phal ngai lova, an in tih tauhchhawk a ni ringawt ţhin. Ţap bai bai chunga room an chhuahsan chang lah a tam. In la pawm nasa dawn lutuk tun ah chuan ala sen emai tiin ka thlem ţhin a, naupang an nihna a lang a, reilote ah an lungawi veleh mai zel.


"A muhil alaw?" tih pah in Matthew a rawn mu ve a, kan naute thar muhil chu a bih zui dak dak pah in "I ute ho pawh an mu tawh e" a ti sup a, tunlai chu an mut a chhuak hma thei khawp mai.
"Kan naute thar hi chuan nangmah a chhun zawk ngei ngei ang che. Hmelţha tih a la hlawh viau dawn a ni"
"Mawhphurhna i ngah leh ta sawt a nih hi" tiin ka lo hrilh nawn zeuh a, a chang chuan a nin ve ţhin ka ring. Fa te ţha tak a enkawl hi nu leh pa tih tur a ni si a, ka fate hi Pathian hnen ah ka hlan fo va, fel vek tur in ka duh a, kan nupa pawn kan sawidun nasa ve ţhin.


"In chunga ka mawhphurhna neih hlen hi ka tih tur ah ka dah. Ka fate hi mifel tak ni a nakin zel ah pawh ngaihtuahawm loh tur a an awm ka duh. Ka kianga awm reng tur in ka duh bawk che"
"Thihna in min ţhen anih loh chuan ka kalsan tawh lo ang che" ka lo ti vat a, tun ah fanu kan nei leh tawh a, in ţhen mah ila a chan chhe zawk tur ka nih zia ka hrechiang tawh. Irene pawn min kiansan ta bawk a, Mason hnen aţangin a fanu pawh kum khat leh thla nga a nih tawh thu ka dawng. Ka fanu nen an in upat hleih dawn loh khawp mai. Irene erawh a fel zui vak lo a ni awm e, ka ţawngţai naah ka hreve reng ţhin. Mihring in harsatna sutkian kan tum dan kawng hi a lo in anglo teh zawng a nih hi.


"Thlamuang deuhin ka awm thei tawh. Ka pasal ber in Pathian a hnaih ve ta bawk a" ka tih chuan a nui hawk a, inkhawm hman loh a hlau ve viau tawh.
"Min kaihruai tu ka nei ţha em a nih hi. Ka thlarau thlengin min chhanhim sak a, neilo che ila chuan ka la awm ho viau in ka ring"
"I tum na phen ah ka lo awm ve mai mai zawk a nih kha" ka tih laiin naute a ţap ngak ngak a, mut reh hnu ah chuan a ring duh khawp mai. Ka buaipui vat vat a, ka pasal lah in tih tur hre lo min puih duh tho si in min lo enreng a, a zun ka thlak vel ka chet apiangin lai deuh deuh in alo che ve a, a zah ka hlauh vang in ka nuih ngam lo, ka in sum nasa khawp mai.


A mut a chhuak tawh tih ka hria a, muhil turin ka hrilh a, ala meng lui ve tlat tho. Phir te a ang lo a, zan a ţah a hrat reuh riau a, ka hahpui deuh dawn a ni. Min chhawk tum in a pawm ve a, phir te a buaipui hman lo bawk a, a zeilo ngang mai. A phallo chungin ka laksak leh ta ringawt.



Naute a muhil a, Matthew pawh muhil tur a ka tih luih tlat vangin a muhil tawh. Nilengin hna a thawk leh dawn a, chawlh hahdam a mamawh zawk. An muhil lai en in ka nui ver ver a, kan inneih hlim khan fa ka neihpui pawh ka ring ngai lo a, kan in hmangaih zui phei chu ka ring lo lehzual. Ka pu thutiam zawm in ka nu leh pa tih luihna in pasal ka nei a, ka ţhen leh a, an tihluihna bawk in ka haw leh a, ka inchhir lo khawp mai. Ka nu leh pa thu ka zawm vang hian ka la inchhir ngai lo. Ka rawn ber an ni ţhin reng a ni.


An muttui tawh sia, tih harh hlau tawk in an bulah ka mu ve, tunah chuan ka chhungkaw neih ve ah hian ka lungawi ta khawp mai. Naupang duhawm tak tak leh pasal ţha tak min hmangaih tak tu ka nei a, hrehawm ka paltlang ve ta. Ka tawrhna zawng zawng kha a lo thlawn lo tawp mai. Ka pasal in min hmangaih lehzual sawt a, min hmangaihna vangin Irene a tlawm ta bawk a, anu in ka chungchang chhe tak a a sawi na pawh dodal in min hmangaihna a dah sang zawk a ni. Ka tuarchhuak ve ta a nih hi.



Zing ah an school kal tur in ka biang ah an rawn fawp liam liam a, naute a awm vangin pawn thlenga thlah ka bansan rih. A fate tlanchhuah zawh hnu ah Matthew chuan ka hmui ah a fawp zeuh a "Naute nen ni nuam tak in lo hmang dawn nia" a ti sup a, nitin a ka hun hman hi ni nuam tak a ni reng tawh mai a nih hi.
"Ka lo let vat ang. Ka hmangaih che" nui sak chung in "Nangpawh ka hmangaih che" ka ti ve sep a, nitin min hmangaih zia a sawi ţhin a, ka ngaithla kham ngai lo. Ka neih hlim ah hremhmun ah min lo lawmlut a, vanram ah kan chantir ta a nih hi.



END..


(Thiam lo tak chung a ka thuziah min lo chhiarsak tu zawng zawng te, in chung ah lawmthu ka sawi. Ka damlo reng a, ziak theilo in ka awm reng a, min nghak ţang ţang a, comment chhiar nuam tak tak min hnutchhiah ziah bawk a, hriatthiamna ngah tak tak chhiartu ka neih vang pawn thinlung tak in lawmthu ka sawi e.)