HRINGNUN

HRINGNUN

https://chat.whatsapp.com/K6HoP6HNsfU6mWeB8taHc5

Ka hmuh hun a thleng a, muangchang a ke pen chhet chhet pahin eitur tlem ka kensak ve na polythene chu nghet zet hian ka hum ngawt ngawt. Hreh viau mah ila ka nau hmel ka hmu ngam ve ta hram. Inbiakna tur kua tetakte an siamah chuan nui chungin a rawn dak a, a lu a kawlh mul a,a nui chuan a mit a thleng pha lo. 

"A hrehawm em?" ti a ka zawh chuan lu a thing a, ka thil ken chu kawngkharpui aţangin an pe a,kei erawh luh ve an phal lo. Phur fe a ka thil kensak ho a en kual dan dan lai te chuan ka rilru a lo na tlat pek a,a sual vanga helai hmun hi thleng mah nise kan thisen zawmpui ngei te hetianga kan hmuh chuan rilru a na lo thei lo a ni. 

"Ilo chhuah hunah fel deuhin awm tawh la, mi hmuhsit leh nuihsawh turin awm tawh reng reng suh. Kan hringnun ah hian engpawh a thleng thei a,a tam zawk hi chu keimahni thlen tir tur a ni tih hrereng la. A hniam ber a awm hi a sang ber a ni thei. Helai hmun hi inngaihtuah harh nan hmang la ,i rilru siam nasa hle rawh" ka ti duah a,a rawn chhuah hun a a ngai ang bawk a nih ka hlau em a ni.

"Awle min lo ţawngţaipui ve ţhin ula"

"Tehreng mai. I awmpuite eng nge an an?"

 "An fel a,a nuam lutuk. Min lo ngaihtuah suh u. Ka nu leh ka u leh Eli min lo biak la, inkan hun lehah lokal ve tawh rawh se. Ka ngai lutuk cheu" a ti a, thu tam kan sawi hmain inhmuh hun reilote an siam chu a tawp a, a duh ang pawh a sawi zo hman lo. Ka pa hming a lam lo a, khawi hmunah pawh awm ila tuman a hming kan lam ngai lo. Unau pali kan ni a,upa ber dawttu ka ni. Hmeichhia pathum kan ni a,tun a ka hmuh zawh chiah kan te ber dawttu hi mipa awmchhun a ni. 

Ka ţhiannu min sawmna angin an inah ka lengkawi a,an chhungkua an awhawm bik kher mai. An zingah chuan ka nun a eng thil ţha lo mah thleng lo ang maiin ka nui ve bawk bawk a,pa berin pa a nihna hlen a inchhung uap chung a chhungkaw hlim tak a din chu ka fak takzet. In ka haw ang a,kan inchhung a lo pik leh mup ang a, hetiang a ţhutkhawm a nuih ho bâwk bâwk hi kan nei ve dawn lo tih ka chiang. Ka pa vangin an lo tum leh bur tawh maithei. Chuti chung chuan midang hmuhah ka awmdan ka ti danglam duh eih lo. Hetiang hi ka nihdan chu a ni. Mi hmuh laiin ka chak lohna ka lantir ngai lo. Luhlul chhuahin ka lungngaih ţhinna zawng zawng te chu ka bei let ţang ţang a, a rukin ka lanchhuah tir chauh ţhin. Eng ni lo mah ila ka buaina hi miin hre lo se ka duh a ni. 

In ka haw chu rin ang ngeiin ka pa a lo rui leh chhur tawh. Ţhutthleng a mu duai chung hian vin zet zetin a ţawng a, ka nu leh kan te berin tv an lo en a, ka u ka hmu lo. Pindanah a inkhung bo leh daih tawh ang. Zurui ang reng te chu tuman an ngaithla peih nang.

"Inau chu eng nge a lo an a? I u i nghak lo a,a kal ve duh nen" ka nu in a ti dek dek a, ka pa chuan pawr zet hian "Tlawh a ngai reng reng lo. Sual man a hmu a nih kha. Tikhan hrehawm thei ang berin awm rawh se" pawr fe in fiah mang hlei lo hian a lo ti ve nawk nawk a,ka ngawihsan mai.

"A ţha. Rpi te inah chaw ka ei aw" tiin ţha deuhin ka nu ka hrilh a,ka pa a lo inrawlh ve zel. Ka haw tlai deuh hlek a, dar7 a ri tawh chung pawn chaw an lo la ei lo. A mutthilh hun an nghak a ni ber. Tuman kan chhang duh miah lo chung pawhin a phun reng a, ka ning lutuk chu ka thawmhnaw pawh thlak hman lo vin ka chhuak leh ta ringawt. 

Kalna tur ber pawh hre lo vin hmalam panin ke ka pen mawp mawp a, in lian pui pui ka kal pel hmawk hmawk. Thui fe ka kal hnuah ka chhehvel enchian tumin ka hawi kual a, street light in a chhun phak chin kawngsir a ţhutna an siamah chuan ka ţhu hnawk. Vei vak an awm lo va, a thlang fe ah lo chuan in a awm lo. Hlauhna ka nei lo va, nuam ka ti zawk mah. 

A chang chuan naupan ţhat leh te ka chak ţhin. Vei nei miah lo a engthawl tak a kan unau a kan awm ve theih lai te kha thleng leh thut se ka ti ţhin. Khatih hunlai kha chuan hrethiam rual ka la nih loh vangin engthil mahin min la ti buai lo a, ka pa sualna ka la hmuh thiam loh miau vangin lungngaihna in min la chim buai pha lo. 

Tunah chuan engkim a danglam tawh. Nitinin chhungkua kan buai a, ka pa tihdan ka nauin a zir veleh ţan mek. Chhun a ka hmuh dan te,an man hlim a lockup a ţhu ngui bur ka hmuh te mitthlaah a rawn lang leh zut zut a, sual viau mahse ka nau ka lainatna leh mahni ka inkhawngaihna chuan mittui a ko chhuak leh ta. 

Ka kutphahin ka kâ ka hup a, ka ţah loh nan na zetin ka kutphah hnunglam ka seh. Kawngkal an awm hlauh pawh a ka hmel an hmuh theih loh nan ka kun tlat. Mi hmuhah hmeichhe induhtawk leh lu zo vah angin ka lang ţhin a, lungngaia ka indawm kun lai hi tuma hmuh ka duh lo.

"Helai hmun a ka hmu che chu mitvai a ang zawk" ka phu nasa kher mai. Ka hawichhuak zawk a,a din lohna lam hawi lehin ka biang leh mit ka nuai fai nawk nawk a,ka mit dumna thla vel a lan hlauin ka kawr banin ka hru leh tawk tawk. Chuti chung hian ka kutin ka hmai ka la hliah tlat tho. 

"I ţha meuh maw?" ti a ka bula a rawn ţhut chuan ka tawlh hret.

"Ka ţha Malsawmkim, min kalsan lehnghal mai ta che" tiin ka lo hnar a,chu thu ka sawi chuan aw ka thian zui kharh. Pangngai thei ang ber a lan ka duh tlat a ni. 

"Tun a i landanah kha chuan 'Ka ţha' tih chu ţha lo tihna ang vel" 

"Ţawng duah lo khan min kalsan mai teh" ka ti hrawk a, ka tan engmah a ni lo. Mipa hrim hrim hi eng nga tan mah ka ti lo. Kan chhungkuaa mipa te an laktlak loh em vang hian mipa ka hmuh dan a dang vek tawh. 

"Zanin chu ţhian ka lo ni ang" aw dam dap a tih pah hian ka hmai hliahna kut chu min lak thlaksak a, rang zetin ka lo phih let vat. 

"Inau nen kan inkawm ţhin a,chubak inzawmna kan nei lo" ka ti hmuk a, thlasik a ni tawh bawk nen,ţhut reng chuan a vawt duh khawp mai.

"Helai hmun hi a fal viau na a a nuam asin. Keipawh mahni a awm ka duh chuan ka kal ziah. Hmeichhe tan chuan tlemin a hlauhawm deuh a, zan dangah nangmahin kal tawh suh" 

"Vengchhungah hlauh tur ka hre lo. Min kalsan loh hmel emai. Keimah zawk ka kal mai ang" tih leh din ka rual a, ka banrekah vuanin min pawt ţhu leh hnawk. 

"Buaina inei emaw nei lo emaw helai hmun hi kan pahnih tan siam ila,i lokal duh phawt chuan zantin dar7 ah ka lo nghak ţhin ang che" min hmuh hlau deuh chungin ka melh zawk a, ka lam a lo hawi ve chiah. Ka hawisawn leh rang a sin aw. 

"I awmziah dawn chuan ka lokal tawh dawn lo. Ka buaina chu mahniin ka ching fel ve thei" luhlul ka chhuah ve tlat. 

"I duh phawt chuan ka tih kha. Vawt iti tawh ni maw? Hoodie hnuaiah engmah ka ha si lo va" a ti nuah nuah a, lukhum lum min khum tir lai chuan lo dan ka tum a,a ţang ve tlat.  

"Lo kal rawh,in inbul thleng ka thlah ang che. Zan dangah kan ti ti dawn nia. Hei dar9 a ri tawh a,inuten an ngaihtuah ang che bakah vawt iti emai" ka mipa nel ngai reng reng loh min ngaihtuah awm taka a awm vel chu mak ka ti ru khawp mai. Mak tak maiin hetianga a awm thut chhan hi hriatchian ka chak tlat pek a, mahse nidanga zawh atan ka khek ta zawk. A thu ang chuan ka awm ve tehmial a, kan inbul kan thlen hma zawng kan inbe tawh lo. Ka luh dawnah "Tui deuh a mut itum dawn nia" a ti a, ka hawi let lo. 

Ka u nen a kan pindan inţawm ah ka lut a, a chhung a chengten lumna keng tel lo mah ila inchhung boruak chu a lum nuam khawp mai. 

"Tu lukhum nge i rawn khum haw a? Ka pa i ngaihtheih loh vang mai maiin ka nu i tlanchhuahsan a, mahni chiah inhmangaih suh. Tupawn kan hne vek, tlanbo na kan zawng reng kher lo" ti a ka u lo ang bawrh bawrh chu ka hre lo der hmiah. Ka inthlak zawhah ka inbual a, mu tur a ka kal leh paw'n "Vawiinah lah min lo nghak rawh ka ti mawlh mawlh a, nangmahin i lokal daih a, khawthim hnuah i rawn haw chauh a" a lo ti vin leh tâk a, phone enin a nui zui leh ang vur vur a. 

"Ka nu pui duh lo a tlanchhuakah min ngai ziah a,iduh chuan nangman pui ta che. Upa ber inia,phone bak ngaihtuah inei hleinem. Vawiinah pawh ka nghak rei lutuk che, ka hmuh hman loh ka hlauh vangin ka kalsan tawp che anih kha. A ţha ber ang hian awm tum suh,kan inang tlang vek" ka ti ve nge nge a. Ka nu pawh a ni tho,ka unauten a hnen a min hek tawh chuan kei aiin a ring zawk vek. Ka pi leh pute pawn kei aiin ka unaute leh kan mo te an ring zawk. Fa lak emaw intih rum rum chang te ka nei ţhin.

"Ve che min puh let daih suh. Inchhungah i awm khat lutuk. I duh chen chen i chhuak a, siam sa i ei leh tawp a, ka nu in engkim a hria ang"

"Ka thiamna ka sawi ve ngai reng reng lo. Zu ngawlvei phunchiar lutuk bul a ka awm peih loh vangin a mutthilh hma lenna tur ka zawng ţhin. In hre vek reng ang chu,ka thil tih ţhin leh tih ngai loh chu nang aiin ka hrechiang zawk. Bawiha hmuh a hun leh hunah pawh vawikhatmah ka kal tawh lo vang. Kal char char ang che,hmu hman lo khawp a i tlai leh i thu"

"Ţawng tam viau zel suh. Mahni ute chhang pawng pawng zel mai. I nasa reuh lutuk mai" a thinrim tawh em a,a insum zawkah ka ţang. Ţawngţai lo vin ka mu tawp. Ka ţawngţai peih lo. Thil ka hriatthiam theih tirh aţangin kan inchhung nawm nan ka ţawngţai ziah, ka inkhawm chang lahin biakin chhung a kraws intar en chungin ka rilru in ka ţawngţai char char zel. Kal kim lawmman dawng zat zat khawpin inkhawm ka peih a, engmah ni lo chungin chapo tak angin lang mah ila a hranpa a mi pawi ka sawi ngai awm ka hre lo. Chuti chung chuan ţawngţai chhanna ka dawng thei chuang lo. Kan mipa neihchhun a sual ve tak hnu phei chuan ka beidawng lutuk ţawngţai ka thlah hmak a, kum2 vel chu biakin chhung ka rap tawh lo. Thil thleng thei lo dil reng ka peih lo a ni mahna. A chhiat lehzual nan ka ţawngţai a ni ringawt. 

Mit ka chhing a,ka mut a chhuak lo kher mai. Sawmkima lukhum min khum tir kha ka lukham bulah ka dah a,a rimtui veng veng. Ka ţhiannu u a ni a, an mipa neihchhun a ni. A nau nen kan inkawmngeih a, school kan lut dun a, tunah lah college khatah kan kal dun leh a, BA kan zo ve ţep. Inkhawm ka bansan aţang hian a nu leh pa min be ţha em em ţhin tu te khan tun hnu a min hmuh hian min hre lo der hmak hmak zel tawh. Ka nuih a za ţhin zawk. Kohhran upa ve lai,a eiruk nasat zia lah mi tin hriat. An hausa a, a tihsual chu a tam zawkin an haider. 

Sawmkima nen hian kan inbe ngai mang lo va, Tetei vanga an ina ka len chang pawn ngawi rengin a awm ve tawp a, khawlai a inhmuh chang a kan kalna tur inzawh vel bak a hranpa a han ti ti luam leh inchhaih fiam vel kan nei ngai lo. An unau hi an sang vek a, Sawmkima phei chu hmelţha tih a hlawh ve ţhin hle. Amah aia upa daih an in a lenchilh tawk lah bo lo. Ka ţhiannu u anih vang hrim hrimin a ţhatna hmuh tumin ka lo en ve ngai lo. Bakah a zia a zawiin a ţawng tlem hmel ka ti ţhin a,min be hmasa lo tu biak hmasak ka tum ngai bik bawk lo nen, ka pawh hran lo khawp mai. Ka tum hauh lohin Sawmkima ngaihtuahin ka muhil a ni ringawt.

Zingah hma takah tho in class kal turin ka insiam a, ka hmai ka hnawih uluk hle. Ka mithmul zawng zawng nen a nalh dan tur berin ka chei vek. Ka inthup ve na a ni. Ka hmaikawr a ni ber ang chu. Ka hmel a lungngaihna langchhuak tur te hi makeup hmangin ka thup a, miin min chik loh nan an mit la tur ka inhmeh zawng tak thawmhnaw ka ha ţhin. Mipa ţhenkhatin nalh min tiin itawm min ti a, ka ţhian hmeichhiate lahin ka makeup mawi an tihzia an sawi bawk a, buaina an neih ve loh phawt chuan tuman min mamawh lo a,chuvang a min chik lo te pawh chu an niang,inthup hi a lo har lo khawp mai. Tetei nen kan inzui leh chawt a, a ti ti siam siam reng. A hairstyle a thlak chu a inhmeh leh hmeh loh min zawt nawn chhen a, chhanna ngai hlir ka lo pe ve. 

Tlaia ka haw chuan ka pa leh a ţhianpa in zu an lo in a,inchhungah a nam huam. 

"Khawnge ka nu te?"

"Dawrah a niang chu,amah zawt ta che,inu veng tu ka ni em ni?" duhdah zet a zawhna chhan vel hi chu kan chhungkaw zia a nia, mak ka ti hran lo. Kan chhungkuaah vin lo kan awm lo.

"Pawisa dilin i kal leh tawh ang chu ka lo tia, zu in bak thil dang tih peih inei ve mang si lo a" ka ti kher a,a ţhianpa chu ka pa aiin a lo thinrim zawk. Ipa i zah lo min ti a,an pahnih chuan min hauh rawn hrep. Ka chhang ve char char. Kei aia upa daih mah nise zu rui ka zah nachhan tur ka hre lo. Kan inhauh hrep hnuah min chhuahsan a, rawng ka bawl laiin ka nu in min rawn bia a,ka putea te in a chaw an eitur thu a rawn sawi. Kal ve turin min ti na a ka lo hnar. Ka putea'n min hau leh dawn tho a ka kal peih vel lo a ni. 

Dar7 a rik dawn hnaiah in aţangin ka chhuak leh zal zal. Ka nute an lo la haw lo va, ka pa ţhutthleng seiah bawk mu lehin a ţawngvai nasa,a ti lui a nih ka ring. Zan hmasa a ka kalna bawk kha ka pan leh a, ka lukhum hawnsak kha ka hum ran. Ka thlen ve chuan a lo awm reng tawh. Min hmuh veleh nui chungin "Ka thlen khalh che" a lo ti a, a malchungah lukhum ka thlak thla.

"Hemi pe tur chiah che hian ka lokal" 

"Lo ţhu ve rih rawh. Thil te te ka hmuh ang che" phur fe a a tih takah chuan hriat chian chakin ka ţhu ve a, ipte aţanga a thil rawn phawrh chu hmuthei tho mah ila flashlight in ka lo chhun kher. Tuilum ip rawng pawl leh sen dâng kutphah tiat lek hi a lo ni a,a cute reuh phian. A mipa ken chi loh ka tih em vangin ka nui chhuak hak. Mak tih hmel fe in min rawn melh a, ka chip rap teh a sin. 

"A lawmawm em a vawiinah ka lei a,pakhat zawk hi nei ve rawh"

"Min leikep maw?"

"Umm..vawt iti thei sia"

"Ka thlang hmasa dawn mi?"

"Aw ladies first an ti ţhin bawk a thlang hmasa mai rawh" a tih takah chuan rang zetin a pawl zawk chu ka la a, thilpek hi ka dawng khat teh a sin.

"A pawl kha iduh tak tak maw?"

"Duh e a milem hi ka duh a" ka ti a, a ngaihna ka hre lo hle.

"Chuan a sen dâng hi ka nei ang maw?"

"Aw ka duh zawk min thlan tir kha" ka lo ti ha. 

"Hemi rawng hi i duh zawk ka ring a" 

"Ka lak hi iduh zawk chuan nei zawk mai la. A rawng kha a hmeichhia iti deuh mi?"

"Ti lo e,kan ak daih ang e. Zanin chu tlemin izia deuh a ni maw?" ka insiamţha leh hnuhnawh. Hmalam en run chungin ka ţhu leh tawh a,ka vun a vawn thut tawh loh nan jacket ipte ka zen daih. 

"Ka chanchin min zawt ve ziah suh" ka ti ram hmak a, Tetei hnen aţangin a tam zawk chu an hrevek tawh ang. 

"Inkhawm iva thlahdah sawt ve,ka hmu tawh ngai miah lo che" 

"Ka inkhawm peih tawh lo. Ka inkhawm ţhin laiin ka hmu ngai lo zawk che" dawt ka sawi. Ka hmuziah, a taksa leh vun rawng rem thlup a inchei hi a thiam a, inkhawm naah hi chuan a langsarin hmuh a nuam ţhin. 

"Keichuan ka hmu ziah che"

"A ţhat chu" 

"Ka rin aiin i chhel. Tiang hian awm reng rawh aw" a tih chuan "Eng eng nge i hriat ve?" tiin ka lo zawt. Hriatchin a nei a nih ka ring nghet bur tawh.

"Hriat vak ka nei lem lo. Ipa ka hmu ţhin a, inchhungah a sual em?" zawi te hian a ti a,amah zawk a inthlahrun hmel. 

"Sual ve bawk e. Vanduai tur hrim hrim hi kan awm ve a, lo vei ve vak duh suh" 

"Kut a thlak ţhin cheu em?"

"Aih"

"Chuti si ngati nge i tlanchhiat?" a dilchhut lutuk chu ka ning leh lek lek tawh.

"Ka tlanchhe lo. A ang ka ngaihthlak reng chuan ka thinrim insum zo lo vin ka that thei mai ang. Ka thiam dan ang angin ka pumpelh ve a, min lo en liam mai mai teh" ka ti hluk hluk. 

"Awle. Ka zawt tawh lo ang che" a ti ve ta hram a,ka thaw huai. 

Zantin ka kal ţhin a,amah hmu tur a kal ka nih loh thu ka hrilh ziah. Kan innel ve sawt hle. Kan inhmuh ziahna hmun a kan inhmuh hmasak ber zan kha ka chhinchhiah kiau a, thla thum lai a lo liam ve reng tawh. A rual a inkhawm turin min sawm ngat ngat ţhin a,ka la hnial ţang ţang. 

Ka nu leh ka u an hman loh vangin ka nau tlawh tumin kal ka tum a, vengchhungah taxi ka ngah veng veng laiin ka hmingin min rawn ko. Zan lam a ka ti ti pui ber anih vangin ka hmuh hma hauhin a aw chu ka hai lo hle. Ka hmaah a rawn ding dat a, a helmet a phelh chuan a nuihmel nelawm zet mai pawh ka hmu leh thei ta. 

"Khaw nge i kal dawn?"

"Bawiha ka tlawh lawk dawn. Khaw nge i kal zawk?"

"Ka nu ka hruai lawk. Thil a leikawi a,kan in a hla lo bawk a min lo nghak rawh. Ka thlah lawk ang a ka hruai ang che"

"A ngai lo" ka ti vat. An chhungkua nen kan inthlau si, buaina an nei ve ngai lo va, chulai kar a ka nau ka hmuhna tur a hruai chu ka zak. Kan chhungkua hi zahpui ngawih ngawih chang ka ngah. 

"A awlsam zawk ang. Min lo nghak rawh aw" 

"Mama lokal ta che ka nghah reng che hi" a nu in a rawn tih takah chuan ka hawisan hmak a, a kal dawnah nghak rih turin min hrilh leh hram. Taxi in min tlanpel zel a,ka kal duh leh duh loh min zawh pawhin lu ka thing. Ţawngka chuan hnar ţhin mah ila awm rawh a tih ang hian ka awm veleh mai zel. 

"Lokal rawh le" ka hawikual zak zak phawt a, min chik deuh tu an awm lo va ka hriat veleh rang zetin ka lawn a, "Ka rei em?" ti a min lo zawhna chu ka ngaihven tawh lo. Min be pah reng a,a rul tawk te te chiahin ka chhang. Ka nau thil tur ka leikawi a, a man ka pek hmain min lo pek khalh lehpek.

"La let rawh,ka nau a nia,ka tihsak ve mai ang" ka ti a,a chet dan chu ka lungawi chiah lo. Ţanpui ngai ngawih ngawihin min hmu niin ka hria. 

"A eitur ka leisak ang a,a rawn chhuah hunah ka tir char char mai ang. Ka chhawr rim viau anih pawn min lo hau lo la" kan thil lei an khung khawm a la sawk sawk a,min kalsan daih. 

"Iva thau ve. I lo chhuak châk tawh em?" nui chung hian ka ti a, midang an kal char char a,reitak ka hmuh loh hnu a hrisel hmel zet a ka hmuh chuan min ti lawm a ni. 

"Ka ngai cheu a mahse chhuak châk vak lo. Ka pa a la ngai reng em?"

"Ngai reng e. A ni chu ngaipawimawh duh suh. Ilo chhuak thei ţep tawh ang. Tuar hram hram la, i mutna a nuam em?"

"Aw nuam e. A la ruih reng phei chuan lo chhuah a peihawm loh zawk. Amah vangin ţhianten min chhaih leh sup sup ang a, facebook ah ţhianten min sawisel nasa viau a mi?"

"Ka hre lo. Ka en ngai lo reng reng. Sawiselna mai mai a ho lutuk. Lo ngaihtuah vak vak duh suh" tiin ka hnem ve a,ka en ngam lo a ni mah zawk. Ka u hian a sawi veleh zeuh ţhin a,ka ngaithla duh ngai lo. Kan unaua kan inkawm chhung zawng kan bulah Sawmkima a lo ding ve reng a, kan haw dawnah ka nau chu a fuih ve. Thu tam erawh sawitur a hre bik lo. 

Vengchhung a restaurant pakhatah kan chawl a, min hre tu te chuan min en duh hlawm khawp mai. Sawmkima nen berkher a min hmuh duh chu an beisei loh thil a nih hmel. Mi pangngai deuh hlek ho chuan min en ringawt lo vin ţha deuhin min bia a, chawlh nan a hmun dang thlang lo va vengchhung lun lai ka lo thlang kher kher chu ka inchhir hle. 

Ka nu a lo haw thei lo va, dawr khar hun âwmah pawh a la reh vang vang. Eli a awm bawk si lo. Ka mangang chuan ka be ta ringawt.

"Ka lo haw tawh rih lo ang. I u nen khan puitling deuhin lo awm ula, Bawiha chu a chhuah dawnah ka lachhuak ang a,ka bulah ka awmtir ve rih ang. In luah tur a vang a,in vaiin ka hruai thei rih si lo cheu a,tikhan lo la tuar rih phawt ru aw. In luah tur ka hmuh veleh ka rawn hruai ang che u" a rawn ti a, inţhen turin duh ţhin viau mah ila ka nu a lo haw loh meuh chuan hrehawm ka ti hle. Ka nu thusawi ka u ka hrilh laiin ka pa in a lo hre pha a, a phun nasa. Ka nu a sawisel bawih bawih a, mipa dang um ah te a puh thul, thil liantham deuh hlek a thlen chuan midang min mawhpuh vek a,a thiam lohna lai hi a hre duh ngai lo. 

"Ka nu a awm loh chuan engtin nge pawisa kan tih ang?"

"Kan dil mai dawn lawm. In a hmu vat mai ang. Ka pa chiah kalsan chu a khawngaihthlak" 

"Ka khawngaih thlawt lo" uar fe hian ka ti a, khawngaih tlak loh hi chu ka khawngaih peih hlawl lo. Ka u hi chu ka pa paw'n midang aiin a duat bik. 

Kan inchhungah hi chuan thil thleng thei lo pawh a awm lo. Ţha deuhin kan awm tlang dawn emaw tih pawhin min ţhawng thut thei thil a thleng reng. Ka nu duhthlanna hi ka dem lo va, a tuar rei ve tawk tawh a,awm ka tihpui hliah hliah. Hnathawk peih lo zu duh si sual bawk si bula awmreng chu a peihawm loh em a ni.

"I lokal dawn lo maw ka tia" a bulah ka ţhu zawi hnawk. Zanin chu khawlaia awm tlaivar mai ka duh. Ka nu unauten ka pa neih leh an phal tawh lo bur a, ka nu in a thawmhnaw tlem a zawng a rawn lak laiin buaina a lo siam nasa,a la inhrosa khur khur reng a, a mutthilh lawk ka ring lo. Ka nu te kal liam tur kha mittui tla chungin ka thlir a,kan awmkhawm leh vat theih tur thu sawi mah sela min hnem zo chuang lo. Eli kuah chungin car hnungah a ţhu a, Bawiha thawmhnaw tlem a la tel. Ka hmel a hmuh theih loh hnu thlengin a ban a vai a, min lo hruai leh lawk loh ka hlau a ni. Ka nu rawn haw duh loh hnu karhnihna velah bungraw la tur hian an lokal. 

"Ka nu in bungrua tlem a rawn la a, ka pa nen an inhau kha ning viau ţhin mah ila bungrua meuh a rawn lak takah chuan ka ngai reuh" ka ti sep sep a, min kalsan hreh ve zia te kha ka hmuthiam ve vek a, a ni pawh ka khawngaih.

"Dawr a nei a,pawisa a inkhawl ang a,a lo hruai leh vat ang che u. Buaina nei lo vin in awm thei ţep tawhah ngai la, hringnun chu heti mai mai hi, engpawh a thleng thei. A ţha leh nuam chiah kan beisei ţhinna hian beidawnna min thlen zawk ţhin a" 

"Mahse kan inchhung a ruak lehzualin ka hria"

"Ruak ang. Nu hi an pawimawh a, bungrua a awm vek chung pawn nu a awm loh chuan a ruak a, bungrua a la a nih phei chuan a ruak lehzual ang"

"Ka ning e,ka pa hian zu nghei duh ve mai sela chuan hetiang a inţhen darh hi a ngai awm tawp si lo va, naupangchhia ni tawh lo mah ila nu kan la mamawh tho a, ka ngai ngawih ngawih" ka ti a, ka mittui tla chu a rukin ka hru zeuh. Mahse a tawp hleithei lo, Sawmkima pawn hrethiamin min kuah a, ka ţap ta nge nge. Ka hnungah dim te a chulin dawhthei zetin min lo nghak a, engmah sawi lo mahse ka tan a tawk em em tho. Ka duhtawk ka ţah hnu chuan keimah zawk ka inla hrang a, kun tlat chungin ka inhru leh mawlh mawlh.

"Makeup ka lo hmang leh kher kher a, a pherh ang a,ka hmelchhe leh vek tawh ang. Zanin chu ka hmaikawrin ka rilru na a thup zo lo ah ngai mai rawh. Miin englai pawh a makeup hmang peih angin min sawi ţhin mah sela ka hmai kawr ţha ber a ni ve tho bawk sia" ti a awmze nei mang lo va ka phun sep sep lai chuan ka hmaah a rawn ţhingţhi a, ka khabe ah dawmin ka hmel ka thuruk a phal tawh lo.

"Makeup nen hian i hmelţha a, mahse makeup tello in i mawi thung. Hmelţhat leh chhiat hi makeup ah a innghat lo. I lungngaihna thup nan hmaikawr a pawimawh lo va, midang thusawi ngai pawimawh duh suh. I nau i zilhna kha zawm ve la,mi chuan an duh duh lo sawi rawh se,hringnun ken tel a ni ka tih tawh kha. Nangmah hi i pawimawh ber, tumah inthunun tir lo la,inringtawk rawh. I lungngaih chuan langchhuak se la, i lungchhia a nih leh ţap la, i chakloh vang a ni lo va,inrintawk loh vang a ni lo. A hnu lam zel a i awmdanah i châk leh châk loh te,nangmah i inrintawk tak tak leh tak tak loh a chiang zawk. Hmalam pan tum hauh lo va thil ngai reng i inrah beh tir reng a, i lungngaihna ngai a i lungngaih reng chuan ila inringtawk tak tak lo tihna. Hmachhawn thei turin lo inring la, hringnun kel tel ve rengah ngai la, i dinna ngai rengah din tum lo la, thil pakhat hi vawi tam tak ţahpui duh suh. Infuih la hmasawn san daih rawh" mittui tla chungin uluk takin ka lo ngaithla a, ka u in min hek reng a, fuih tu ka nei ngai lo. Mi hrang hlak ang a ka lo en ţhin zawkin min fuih a, zanin a tan ţah a phal bawk a,ka insum peih tawh lo. 

"I lungngaih ţhinna ngai reng i inhneh tir zel chuan i kehchhe tial tial ang. Chutiang chu i chunga thleng turin ka duh lo. Kehchhe tawhah in ngai lo la, i nunah thil ţha zawk thlen tirna hun ila nei. Ipa thinrim chhuah tauhsan tawh lo vin ngai a neih tum la, a ruih loh laiin zilh la, in chhungkua siamţhat leh nan hun ila ngah. A thim zawngin engmah ngaihtuah tawh suh aw" a ti a, ka bianga mittui luang min hruksak pahin "Nangmah in ngaihtuah hmasa ber phawt la, nangmah i inhmangaih thiam hunah thildang chu a ngai angin i siamţha leh thei mai ang. Midang hmangaih tur pawh hian mahni kan inhmangaih thiam tho a ngai a nia" a tih zawm leh a, zawi tein lu ka lo bu nghat nghat. 

"I makeup a reh vek tawh a,ila hmelţha tho" tiin min fiam a,kan inhnaih bawk nen ka zak lutuk chu ka lum pap pap.

"I chungah engpawh thleng se ka awm reng dawn tih hria la,nangmah chauhin i hmachhawn dawn lo. Naktuk zan aţang chuan reilo te te ka lo leng ziah tawh ang. Hmeichhia khawlaia hmuh reng chu ka sual hmel emai" a ti a,ka remtihna lantir nan ka lo nuih sak. 

A sawi ang chiahin min rawn pan ta ziah a,mahse a lengrei ngai lo. Darkar khat chiah te a awm a, a haw dawnah lehkhazir turin min ti ţhin. Vengchhungah kan chanchin a darh chak hle a, Sawmkima nau Tetei,ka ţhiannu ngei chuan min hlat sawt viau thung. Ka rualin a kal duh tawh lo va, keimah vanga a chhungten Sawmkima an hauh ţhin thu sawi a ching. Sawmkima ka chik a, danglamna ka hmuh chuang si lo. An chhungkuaah buaina ka thlen ang tih hlauin a nau thusawi chu ka hrilh chhawng duh ngai lo. 

"Ţawngleh leh inkhawm i bansan hi a ţha lo. Pathianin i dilna a chhang lo ah i ngai ringawt a,Pathian malsawmna dawng ve loah i inngai a,a dik ber lo. Inu im dawr a nei a,hma a sawn hret hret lehnghal, tun thlengin eitur in la nei a, Pathian malsawmna vek anih hi. I dilna chhang zung zung turah i ngai a,i beidawng hma mah mah" a ti a, tv en pahin kan ti ti a, kan thil en chu kan rilruah a lut lo dun hle. 

"Thil pakhat chiah ka dil a,chupawh kum tam tak chhung. Beidawn hi a awm ve tho a sin"

"Phut let nei ranin i inkhawm a, i dilna a chhan theih nan chiah Pathian i bel a, a zawng zawngin Pathian tan inpe ve chhin phawt la,Pathian tan i thinlung ila pe tawk lo ve bawk alawm" tiin min lo hnial a, Pathian thu min sawipui ţum hi chuan zandang aiin a lengrei ţhin. Mahni inhmangaih min zirtir a, Pathian tello a nun ka hman a hlau tel bawk. A thu chu zawmin a rualin ka inkhawm veleh ta zeuh zeuh a, ţawngţai pawh ka chhunzawm leh tawh. Mahse ka pa tan a ţawngţai hi harsa ka ti tlat ţhin. Bible chhiar ka uar thar a, Pathian min hmangaihzia ka hre nawn leh. Mihringin thil sual kan ti nawn mawlh mawlh reng chung pawh a min la ngaidam thei zel te hi, entawn tur a ţha si, har bawk si a ni. Pathian hnaih ka zir thar leh a, engkimah ka rawn a,hma ka sawn ve hret hret. 

Ka nu hnena kan awm hnuah pawh kan la inbe zui reng a,inngaizawng miah si lo vin midang be miah lo vin kan inbe reng ţhin. Lehkhazir hi ka tih mi ani vak lo va, BA ka zawh hnuah ka nu ka pui ve ta daih. A ni chuan a la zir chhunzawm reng. Min hmuh hlau deuh chungin chhun a hunawl ka neih chuan waiting shed ah khan ka kal ţhin a, kan intawn dan te ka chhui let neuh neuh ţhin. Ka tan chuan hringnun ti nuam tu ber a ni tawh. 

Kum a liam ve zel a, hna a neih ni chuan kan pahnih a kan awmna hmun bikah khan kan inhmu a, kan pahnih chauhin kan lawm. Duat takin min kuah a, kan inbiak ţhin danin a zir bawk a mak ka ti hran lo. Inngaizawng miah lo chungin kan thikthu a chhe ve thei em a. 

"Hna ka nei tawh bawk sia,min nei tawh mai la" a tih chuan ka lo nui hak. 

"Inngaihzawnna awm miah lo hian maw?"

"Kum tam kan inkawp chawt a, inngaizawng aiin kan inhrechiang daih zawk. Ka bialnu ang char charah ka ngai ţhin che. Ka nau nen school inkal dun ţhin lai aţang tawh khan ka en ru ziah che. Kan in a i lo len chang paw'n sawitur hre miah lo va ka awm ve reng zel kha. Kei aia hrechiang che an awm kher lo vang" 

"Chutianga min hmu châk viau ţhin si te chu a hma daih khan min hrilh ta che"

"Min biak peih loh hmel thei em a, ka be lui tlat chung che pawn min la hnar a" a tih leh phei chuan ka nuih a za hle.

"Nakinah min sit leh si ang e" ka ti fiamthu a, englai mahin min zahpui ngai lo va,min sit dawn lo tih chu kei aia hrechiang an awm lo.

"Chutiang a thleng lo vang. I nihna ang angin ka pawm che a,nakina ka sit leh tur leh engahmah ka ngaih loh chu ni ila min be peih lo chung ka be lui tlat lo che nga, vawt ti chung chungin zantin ka nghak ziah lo vang che" thutak deuhin a lo ti thung. Min chhanna chu ka beisei sa ni mahse ka hlimna a bo phah chuang lo.

"Nangmah vangin hmalam pan ka zir a, ka hlutna min hriatchhuah tir a, awm lo la chu ka dam tawh kher lo maithei a ni"

"Keimah leh Pathian vang bakah hmasawn tumna ineih vang. Pathian a pawimawh ber a, thil dang zawng chu a pawimawh dan a inang vek" a lo ti a.

Kum khat a vei leh meuh chuan ka tleirawl lai aţang tawh a min duh em em tu leh hringnun ka chhiar thiam theih nan a min pui ţhin tu chu pasalah ka nei ta nge nge. A nu leh farnute chuan min lawm lem lo mahse ka pasal hi a laiah a ding thiam a, ka chungah ţhat an chhuah lo ngam lo. Keimah inhmangaih ka thiam tawh a,midangte hmangaih dan pawh ka thiam ve zel. Ka chhungte pawn hma an sawn ve zel a, ka nau lah Pathian thu zirin Pathian thu sawi nuam a ti em em tawh. Pathian ka bel a,ka thinlung zawng zawng hlan chunga beidawng lo va ka dil reng takah chuan chhanna ka hmu ve ta.

Hringnun hi hman dan thiam a lo ngai khawp mai. A kawng a man pulh reng lo a, a bumboh chang a tam. Chutiang hun a lo thlen pawh chuan beidawng mai lo ila, kan tlu sual palh a ni thei,hringnun a ni miau a,khatiang hun kha a awm lo thei lo mahse indawm kun mai lo ila,kan thu anih pawn a hma aia chak zawkin tho leh ila, chhungkuaah buaina leh innghir nghona aiin hmangaihnain min hneh zawk se la, mahni inringtawk tak leh Pathian bel tlat chunga hringnun hman hi a lo pawimawh ber. 

A TAWP TA♡