OUR STORY

OUR STORY

Lukham bul a ka phone dah nghawr der der reng chu ka ning ngei mai. Meng mang lo hian ka la a, lukhamah dahin ka bengin ka delh hnan. 

"Eng nge?" ka ti ţial ruai. 

"I aw chu leh" lehlam aţang chuan nui ri ka hre zawm zat.

"Ka khuasik a, tukin chu min kalsan mai rawh,ka tho peih ngang lo,ka hritlan vang aniang" chau âwm tak hian ka ti a, ka khuh lui kharh kharh. 

"Ava nat hmel ve aw. Ka kalsan mai ang che, lo dam rawh aw" 

"Awle" a tawp zui hmak. 

Zing tin exer lak puiah min sawm ţhin a, nalh ka duh tak tak lai kha chuan ka phur ve viau zel mahse ka peih tawh lo. A thawh dawn lai vel tak hi ka peih lo ţhin a,kar khat bak ka phur lo. Tui deuhin ka mut chhunzawm leh thei ang chu tih nak laiin pindan kawngkhar a intheh hawng ţhuai a, ka ţhu chhuak chiang hle. Ka nau mi pangngai ang pha zan lo hi phur fe in a rawn tlan lut a,hauh hrep chi a ni si lo, a ngaihna hre lo deuhin ka lo en hau ringawt. 

"A u inhnuaiah i thil tur a awm. Bawm pui lian pui a nia" tih pah hian zau deuhin ban a phar a, mak ka ti lehzual.

"Ka thil tur maw?" phawk hra a tih pahin ka awm ka kawk a, a lo bu nghat nghat. 

"Eng nge niang le?" ti nuah nuah chungin ka tho a, ka nau chu a tlan chhuak leh daih tawh. Tumah an la tho lo aniang kan inchhung a la reh ţhuap. 

Mit nuai chungin hawichhuak mang lo hian ka pindan panna kailawn aţang chuan ka chhuk a, inhnuai ka thlen thlak veleh a ka mi hmuh vang chuan ka ding chawt. Msa chu ka nau kuah ran chungin a lo ding reng tawh. Track suit dum pawl a taksa rem thlup tur a ha a, phakar chhuahin min rawn kaitho lehpek.

"I ţha maw? Dawhehnu" mit ko san zauh pah chuan a ti a, min elhsen hmel zet hian a nui suk lehnghal. Ka huat tawk a tling kher mai. 

"Bawihpuia hi fuih pawrh ziah lo tur a ka tih che kha" vin hlar a ka tih laiin min ngaipawimawh lo fahran hian "Awle ka lo nghak ang che, insiam zung zung la aw" a lo ti ve thung. 

"Ila hre ve viau ang" ti nuah nuah chungin pindan lam ka pan hnu hnu a, phur lo tawkin ka insiam. Msa lahin min nghak run tawh bawk si, a duh naah hi chuan ka hnar thei ngai lo. 

Ka zawh hnu a ka chhuk leh lai chuan ka nu pawh a lo tho chhuak ve chiah a, ring leng lawng a "Engati nge zing karah lollipop i lo ei leh tak? Tu nge pe che? I ha a na leh dawn a sin" a tih hluai laiin rang lutukin Msa'n min kai chhuak dawr dawr. Kan in kan pelh fe hnuah min dinpui ve chiah. 

"I lo pe leh pek a ni maw? Nangmah vangin ka nu in Bawihpuia a hau ve ziah. Hnawksak leh lutuk mai,ka damlo chung min hruai chhuak lehnghal" hah vanga thaw hluam hluam chung hian ka ti a, exer la ve tur dang ho in min kal pel sap sap. Tho hreh viau mah ila zingkar boruak hi chu a nuam phian zel. 

"Kal ve tawh ang le Duatte" ka thusawi peh hel dan a zawng leh tawh. Hepa hi chu tih vak ngaihna ka hre ţhin lo. Lungawi lo deuh a zui chungin "Tikhan min ko suh" ka ti hmak. A kal chak si, reilote chhung pawn kan inhlat hman viau.

"Nih leh Tum mawite" a rawn leh hawi a, a hlat takah ka awm tawh tih a hmuh chuan a nur nang. Rawn let lehin ka hnungah a kal a, ka kal muan deuh hlekin min lo nam zel. Mut ka kham lo bawk nen ka ham leh bai bai ţhin. 

"Min nam teivet suh" tih pahin ka ban ka vai a, ka hmaah lung a awm tih hre loin ka rap pial lehnghal. Ka tlu dawn maw ka tih laiin min lo dawm hman hlauh. Ka hlau lutuk chu ka thinphu a rang hman hle. Ka insiamţha thuai thuai a, min dawm rei hman lo.

"Ka tello chuan i awm thei tak tak lo anih hi tiraw?" a ti fiamthu a, sawi dik viau mahse ka haw tho. 

"Peih lo chung a min hruai chhuah vang a nih hi" 

"I ke i ti na em?" min ngaihtuah ve hmel zet hian a ti leh daih. Hnuai lam a bih run a, "Na lo" tih pahin a ngaihţhat nan ka ke ka khai kang leh ta vel. 

"A ţha hlauh e, puak haw i ngai ang tih ka hlau deuh a" a ti a, min kalpel pahin ka beng bulah "I rit ve angreng sia" zawi te hian a ti leh deuh kher. Ka pawisawi hi chu nuam a ti ve thei ngawt mai. 

Ka thlan a tlak hluam hnuah min haw pui a, hel theih reng si step thui tawk ah min kalpui ţalh. Ka sawisel deuh hlek leh ka ţhatna tur a nih thu a sawi ziah lehnghal. Muangchangin step ah chuan chho mah ila ke a ka kal khat em vangin ka ti hleithei lo. Hah hnâpin ka haw. In ka thleng chu fan hnuaiah zawi tawkin ka ţhu a, ka nu lah chuan "Msa tehsek lah hi. Bawihpuia a tirh theih nan ei ka phal loh thil a lo pe ziah a, ka hauh leh a rukin a pe a, hauh loh leh langsar deuhin a pe a, tihngaihna tak pawh ka hre lo ve" a lo la ti hlak hlak. Pastor fapa a nih hi a rinawm loh rum rum ţhin. A pa pension dawnah kan vengah an rawn awm a, kan venga in an neih sa midang an luah tir ţhin chu sa ţha in a pa pension hnuah an rawn awm nghet chauh. An unauah a naupang ber a, a zia a danglam ber bawk. Kan veng pastor ni tur a an lo awm hlim aţangin kan inkawm. Ka nu leh a nu hi khaw khat chhuak annih vangin an inti unau a,kan inpawh angreng. College kan kal dun a, nitin kan inzui. 

Class ka kal tur chu ka inchei uluk hle. Miin nalh min tih hian nuam ka ti ţhin a, kan chhungkua kan khawsa theiin ka nu in thawmhnaw dawr a nei lehnghal. Thawmhnaw leh pawisaah kher kher hi chuan ka buai lo khawp mai. Zirlai chauh la ni mah ila duh duh ka nei thei. Ka pa in min duat a, ka duhzawng ka sawi chu lei zel turah a ngai. Eng helh tur em em ka nei lo bawk a ka nun hi nuam ka ti rih. 

Ka inpeih veleh pawn a Msa awm leh awm loh hriat tumin ka dakchhuak a, scooty ka ken peih loh chang hi chuan min rawn sawm se ka ti ţhin. Ka hmuh mai loh vangin inchhung aţang chuan chhuakin gate pawn lam ka en leh a, a bike chiah ka hmu. Mak ti ru tak chung a let leh ka tum lai takin min rawn ban thut a, ka phu nasa lutuk chu ţe ţhat chungin ka zuang dawrh thei hial. Ka thlabar tehreng nen min la nuihsawh zui. 

"I mawl em ni? Infiamnan min hmang reng suh, toys ka nih loh hi. Min ti phu ziah suh. Thawhah ka neih ve loh vang hian min thik a mi?" ka ti hrep a, ka inchhir chawpchilh nghal. A nui hmel a ral riai riai a, mahse hun reilote chhung chauh a ni. A insiamţha leh vat tho.

"Min rawn enthla nasa em a,ka lo biru anih kha. Kal ang le Toffee" pangngai tak a a tih leh theih takah chuan tawi tein ka nui a,ka inthiam thei tak tak chuang lo. 

"Ka sawi tum a ni miah lo nia, ka hlauh lutuk vang a nih kha. Hrereng suh aw ţhian kan tih kha"

"Ka theihnghilh daih tawh Toffee" ka lo nui hak.  

College panin kan kal dun a, kan inbe tam lo. Msa hi lung ţha lo nei a ni a, lantir ngai lo mahse buai ruk chang an ngah a ni awm e. A naupan deuh lai phei chuan damdawiinah an lut fo. Hrisel ţhat reng a duh vang hian a inenkawl nasa a, a ipte ah inhaler a awm reng ţhin. Hei chu a rukin ka hria, ka bulah chuan hrisel ber leh vei nei lo ber angin a awm ziah. Min chhaih thinrim a,min thlem lungawi leh a, chutiang chu kan nitin hna a ni ber mai.

"I kekawr mawng a bal aw" classroom pan a kan kal laia a tih chuan ka kekawr mawng en tumin ka hawi let ţawk ţawk a,ka beng fai pah thuak thuak.

"Khawilai nge bal?"

"Bal leh lo nih kha" nui hawk chungin ka darah min kuah a, hniam zawk mah ila min la uai zawk zui. Tum bur chungin tlawm zawk ka nihna ka pawm leh ta mai. Min fiam a, min tihder a, mi â let der ang a min lantir chang a tam. Mahse ka tan ţhian ţha tak a ni ţhin a, fiamthu thawh nan a min hman ţhin te chu thinlung tak a lâk loh ka tum ţhin. Bakah a ni chiah hi tum vang reng a min ti na lo tur awmchhun a ni tih ka hre tel.

Classroom kan luh dawnah a inla hrang chauh a, class ţan hun ai hma daih a kal kan ni bawk a mi an la tam lo. 

"Sofie helamah" ka ţhian siam thar Rinzuali chuan min lo ko vat a, keimah chauhin ka kal dawn maw ka tih laiin Msa chuan min zui ve zel. Rinzuali bula ka ţhut fel hnuah dawhkan chungah bag ka dah a,lehkhabu phawrh ka tum laiin ka bul chiahah Msa a lo ţhu veleh. 

Rinzuali ka melh vat a, Msa zawk chu a lo nuih sang. Chhe lo a tih thu min hrilh zeuh zeuh tawh a, Msa chanchin min zawt tur ringawt a min lo biak chang lah a tam. Ka ţhianpa hi hmeichhe zingah a mikhual lo phian. 

"Hetah eng nge i rawn tih? Rawn ţhu ve suh" Rinzuali hriat hlauin zawi te in ka hrilh. Duh hmel tak a a en ţhin lai te hi ka hmu peih lo ţhin. Vawiin chu ka thin a chhe lehzual hrim hrim. 

"Tun ţum chu i bula ţhut ka chak tlat, a chhan ka hre mai bik lo" dar kan ak pah chuan a ti a, lehkhabu a phawrh ve hnuah min rawn en a, thil ngaihtuah nei ni awm tak a lang chung hian a rawn kun hnai a, "I thla tin hlawh lak hi ka hlimpui phian a niang" a tih chuan a awmah ka chum pawp a,a nuichhuak ta hawk. Chum leh ka tum laiin ka banrekah a lo manbet hman a, ka zak kher mai. Ka awmdan aţangin ka period tih a hre nghal vek a, kei lahin ka lo thup thei bik si lo. 

"I mawl hle mai" 

"Ka sawi dik sia" nui reng chung hian a lo la ti a, Rinzuali lehzelin min lo nuih ve avang chuan ka thinrim lehzual. Mi nuihzat nih hi ka thil duh loh ber a ni hial ang. Min rawn hnaih leh deuh a, lo ngaihven duh lo vin hmalam ka hawi tlat.

"Class banah i ei duh ber ka leisak ang che" aw hniam te hian a ti a, ka nghawng hnaih te a rawn ţawng a ni bawk a, a ţawng zawnga a thaw lum deuh hlek lai pawh ka hre thei. Ka thinphu a lo rang leh hman pek a, ho te te a ka nem lehzel ţhin hi ka inhua. 

"Nih loh pawn i chawlh duhna berah ka chawlh pui ang che?" mit sirin ka melh ralh a, a hmu lo hlauh. Hepa hi chuan ka lungawi theih dan tur te hi a hre chiang ve thlawt. 

"Ka pe vek ang" ka lungawi ţep tawh. Midang an rawn lut khawm ţak ţak a, thinrim reng tum mah ila a tih chi loh. A ni chuan midang awm ţhup lai a min thlem a hreh leh dawn si lo. 

"Mawh, aw ti teh Toffee" pangchang aw tak a ti chung hian zawi tein ka banah min nawr a, ka nui lek lek tawh.

"Bawihte" hmui hnuailam ti pawrh lui chung hian ka en zawk a, hmalam bawk ka hawi leh.

"Duatte" ka nui ta nge nge. Hming dang dang hi min phuahsak a, Sofie tih pawh Toffee tihin a thlak hmak. Thawk halh pahin chiang zetin ka melh zawk a, hnehna a chang zawk tih a inhria. Ka hnar thei lo lutuk hi ka chungah ngei hian ka thinrim fo. Ţhian aia thuk zawk a ka en palh ka hlau ţhin. 

Class ţan hun a nih meuh chuan a ţhu sawn ve ta hram. A ţhiante kiangah a insawn a,an ri nghal ham ham. Ka hawi phei zawk a, nui chungin ka ţhutna lam a rawn hawi ve. A hlim viau hi chuan keimah zawk hian a natna ka lo ngaihtuah chhuak ţhin a, mi zinga a awm laia a buai palh ka hlauhpui ţhin hle. Class kan ţan a, nidang ang bawkin rilru ka pe lo lehpek. Msa ţhutna lam bawk ka hawi leh a, a ni chu a thutak run tawh. Thlir reng tu an awm tih a hria nge a rawn dakchhuak a, ka en reng tih a hmuh veleh uangthuang zet hian ka hmuh turin mit a siai a, lei ka chhuah zauh hnuah lehkhabu ka en daih. Ka bulah awm reng mahse a thinlung chu midang daihin a kawl. Hmeichhe vannei tak a ni. Msa thinlung hneh thei hmeichhia chu ka awt khawp mai. Keini aiin a upa daih zawk a, kan college chhak school a zirtirtu pakhat a ni. Lu ka thing nawk nawk a,ka ngaihtuah zawm peih lo.

"Sofie, Msa hi bialnu a nei em?" Rinzuali lah chuan ka ngaihtuah duh loh ber a rawn phun pui ser ser.

"Ka hre nang, duh leh amah zawt la, hria pawh ni ila midang thuruk lo sawichhuah ka duh lo" ka ti hlak hlak. Mood fuh loh a ti zual. A lehkhabu awl laiah a pen kenlai chuan eng eng emaw mak tak tak a ziak kual nuaih a, zirlai tak chu a ngaihsak bik lo.

"A chhe lo e. Ka duh tlat a nih chu mak lutuk. Ka hmuh tirh aţang khan ka rilru ah ala awm char char. A bialnu angah ka inchan a, mut dawnah te hian ka ngaihtuah veng veng zel" a ti a, dawhkanah a kiu nghatin a kutphahin a biang a dawm a, thil thleng ngai lo tur thlen tir theihna awm chhun a ngaihtuahna khawvelah a cheng zui veng veng. 

"Eng angin nge i ngaih ve?" tiin ka ban a vuan chungin min rawn zawt leh a, vawiin chu ninawm hlir. Diktak chuan ka hre bik lo. Mut dawn leh zing thawh hlim a ka rilru a awm hmasaber chu Msa a ni ţhin. Chuti chung chuan ka duh niin ka inhre chuang lo. Ka ţhian leh ţhian chauh ni lo pianpui unau ang chiah a min ngai tu lo duh chu a zahthlak zawk. Bakah mipa dang tam tak an awm laia bialnu nei berkher buaipui chiam ka tum lo. 

"Ţhian angin. Engtiangin nge ngai se min tih?"

"In awmdun tam sia, tlem tal a i duh ve deuh ka ring a, ţhian ang chiah a i en chuan a ţhat chu. Lo duh mah ila inthiam lohna ka nei dawn lo tihna" a ti a, a hlim khawp mai. A mitmeng a nung sar a, a nat phah mai mai ang tih ka lo hlau zawk. Mahse ka buaina tur a ni lo. 

"Ka hrilh ngun tawh che kha, bialpa neih ka la duh lo. Kan la naupan em hi" beidawng zetin ka thaw halh. He mi thar pa hian keimah chauh a ka awm min hmuh apiangin min duh thu a sawi ziah. Min duh hmel ve viau laiin ka duhzawng a ni ve si lo. Nuam lo ti ru tak chung a hnar nawn fo a ngai a,a sawt lo thei hle. Khawnge Msa pawh hi khaw nge a bik bo teh hrep ni? 

"Tum chhin la, min hriatchian i tum ve ngai lo a" luhlul a chhuah leh pek tawh. Ka hrechiang lo tak tak a, mipa dang hriatchian tumna nei ngai hek lo. 

"Hmeichhia an tam em hi. Midang i hmu lutuk ang" 

"Hey Bawihte" ka aw hriat ţhan em em ka hre ta hlauh. Ka bul hnai a a rawn din chuan ka inthlahdul ve thei ta. Ka dar leh a awm a insi chêt a,duh aiin min hnaih mah mah zawk. 

"Tu nge i lo biak hi?" 

"Ruatdika anih hi. Ruatdik hei hi Msa" zawi sep a ka tih laiin Msa chuan ka darah min kuah a,a awmdan teh thut chuan min ti phu eih a,a langsar lo hlauh. 

"A bialpa" Ruatdika nen chuan mak kan tih dan a inang reng. Min fiam reng ţhin mah sela ka bialpa lem a la chang ngai lo. A kutphah a ka hnungzang chul thlain ka kawngah a kuah a, ka thaw a sa in ka zak lutuk chu ka lum pap pap. 

"Ka lo hre lo a, Dindin ka lo va kal hmasa ang" ka chhanlet hma hmain hmanhmawh zetin a kalsawn,a zak ve khawp ang. A kal liam thlengin kan thlir a,kan hmuh phak loh hnuah pawh min kuahna a thlah chuang miah lo chu mak tiin ka chho melh ha a, a mitmeng ril ruih dam dup si chu ka hmu hmasa ber, chik zetin min lo melh chhuk ve run. Ka kawchhung a lumin ka hriatna te chu a chiang lo ruai a, nui suk chungin ka kawngah chuan a hmer a, ka chhungril chu inlet but butin ka hik mep mep ni berin ka inhria. Ka awmdan danglam chu a hriat ka hlau ru takzet. 

"Khatiang i hnaih duh loh chuan lo hnar nachang hre ve rawh. A lehpek ah ka pui tawh lo vang che" ti a phunnawi nghal zatin min vau lawk khur khur. Thil hrechiang mang si lo. Dinhmun chhe zawk leh a ţanpui mamawh zawk ka nih rih miau vangin thaw halh chungin lu ka lo bu nghat. Min kuahna a thlah dawnah ka taksa sir lam a tuai leh kher. 

"I bialpa lem ka chan kha?" tiin min fiam a, ka lo ner nawk. 

"A lem a ni hlauh a a lawmawm. Bialpa a tan ka duh lo che"

"Ouch" na ti áwm tak a a awm a dawm laiin ka lo nui har har a,ka kiang a a awm tawh phawt chuan ka thlamuang hluah hluah ţhin.

"Kan inremna kha?"

"Ka duhna ber hmun a min chawlhpui i tum kha maw?"

"Yes"

"Chiang sa, i intiam tawh kha. I pek dawn vang hrim hrimin ka theih chhung ka ei ang" 

"Min dim deuh la aw" a tih lai chuan hnunglamah dingin a bike dahna lamah ka nawr kal ve ta thung. 

Ka duhna ber a nih chuan a hmun a nuamin an thil siam a to tlangpui. Min chhaih thinrim reng a, thungrulh ve hrim hrim ka duh vangin ka hruai ta tho. Ka eichak zawng a piang ka ziak thla a, ka thil ziah engmah sawisel a nei lo. Ka duhtawk ka ziah hnuah ka pe a, an lo nei vek lehnghal. 

"I chawi hnem ve khawp ang le" nui tet tet chung hian ka ti a, min ti thinrim khat tawh khawp ang.

"Pawi lo i puar dawn te chuan"

"Min ngaihtuah ber ang zia zang hian in awm ve vel a" ka ban puam lai khamin dawhkanah ka bawk a, a ţhutna lam ka melh chho ralh reng tho.

"Ka ngaihtuah ber che lawm"

"Ve che, zirtirtu kha lokal chiah se chu min hlat thei ang berin i tlanchhe dawr dawr ang ka ring" 

"Tlanchhe lo ve, ţhutna kan lo kian ve ang chu" a ti awlsam et a, a duh hmel thei lutuk hi ka lo ngei ve ringawt zel. Mahni aia upa lehnghal, a englai nge maw a duh ni? 

"I mak ve ngawt mai" ka ti teh ngawt a, a chhan min zawt a sawitur ka hre chuang tawp si lo. Min nuih liam mai zel a, en tawp hian engmah a lang thei si lo va, a chhungril tak hi ka hre ve chak ţhin.

CONT..