FATED TO LOVE YOU-10

FATED TO LOVE YOU-10

Huan lam pan a kan kal lai chuan ka lu a hai muai muai reng a, vawt ka ti em em bawk. Thil ei lui ve ţhin mah ila tam ka ei thei chuang lo va, zan mut a har bawk si ţha ve viau tawhah in ngai mah ila ngai ka la awh thei chuang lo. 

Ka luhai a zia awm deuh ringin mit ka chhing vang vang a, awmzia a nei mawh khawp lehnghal. Min tuam hlawm tu tur ber ka nu leh pate lahin mualpho ai chuan paih mai an duh zawk a, inhuam viau mahse ka buaina a Zodina hnuh luh ve zel ka duh si lo. An lawm ring lo mah ila Zothana vang tal pawhin chhungkaw kalphung thlak danglamin hriatthiamna an neih ve deuh ka ring a, an ngaihsan sa, pi leh pute aţanga an chhawm an la ngaipawimawh zawk tho. 

Huan kan thlen veleh a ding dat a, in be miah lovin a enkawl tu te awmna ţhin kan pan ding a, khua a thim thet thet tawh vangin inchhung leh pawn an lo ti eng va tawh. An awmlai a lo ni hlauh chu ka lawm khawp mai. Kawngkhar a in hawn sa vangin kik buai lovin a chhungah kan lut tlang a, mak an tiin an hrilhhai hmel khawp mai. 

"Zodina ve tehmial chu? Thil thleng a awm em ni?" U Lawma chuan a lo ti vat a, an huan a kal ve ngai miah lo Zodina an hmu thut chuan a ti hrilhhai a ni mahna.

"Awm lem lo. Ka rawnkal khat em a" a tih lai mekin "Kal ka rawt a, helai hmun hi a thawventhlak deuh takin zanin chu riah nan rawn hman ka tum a" ka lo tih khalh zung zung. 

"Rawn riak rawh. Kan khua a har lo sawt dawn ni mai lawm. Zodin i riak ve dawn em?" U Ramtei chuan a lo ti ve bawk a, ka rin lawk sa angin a riah ve loh tur thu a hrilh a, ţhutthleng awl ah kan ţhu ve thawr. 

U Ramtei te hi an chhungte an nia, an inchhun dan inhnaih vak lo mahse an inpawh phian. Kan nu leh pate rual em an la nih loh vangin Zothana koh angin ka ko ve tawp a, an inneih na a rei tawh nen fa an la nei lo. U Lawma hi a awm ţha duh vak lo a, helai hmun a awmtur hian Zothana pa in a tir a, nuam an ti phian. Zu a in tlem deuh na a a nghei chuang lo anih hmel tunah pawh a nu phut mai. Chhungte thawhchhuah ring chawt lo va hetianga a awm hi a ţha hrim hrim. Helai hmunah hian awm lo se la chuan a ruihna duhin tlai tin a chhungte pawisa a la dil ziah awm sia, nupui a duh a chawmna tur a nei bawk si lo. U Ramtei hi a taima hlauh a, an in lama an awm ai chuan an hlawk pui zawk hrim hrim. An nu pawh hian nuam a ti zawk. Zothana nen khan kan kal ngun a, kan inpawh ve viau tawh.

"Nunui chu i nawm loh hmel e. Nge i chau zawk?" U Ramtein a tih chuan za vak lo hian ka nui lui a, ka tawrhna hi midang rilru ti nuam lo tawk lek a a lanchhuah ka hlau ţhin. 

"Dawrah kan buai a, ka chau deuh mai mai. Na ka nei miah lo a nia" ka ti a, thil dang min zawt zui lem lo. 

"Thingpui ka lum ang cheu" tih leh thawh a rual a, ka tho ve nghal zat. A ngaihna hre lo tak a min en hau lai chuan "Ka lo pui ang che" ka ti satliah a, min hnial lo bawk a choka ah kan inzui lut. 

Kan pahnih a kan awm chiah chu zawite hian "Zothana a thi tih hrelo ila chuan Zothana maw ka ti ngei ngei ang. Anu leh paten an tih luih loh chuan Zodina a lokal ngai si lo va, an in a kan kal lah hian hmuh tur a van bakah min be hmasa ngai miah bawk si lo. Engtin nge i rawn hruai theih zawk?" a ti ser ser. Tui tam tawk ka in hmasa te te a, tlem chuan ka awm a nuam deuh. 

"Zothana thih hnu hian kan inpawh phian a, kan tawrh dan a inang a, Zothana kan hmangaih ve ve a,kan tawrhna kan inhriatthiam pui a, min hrethiam tu bula awm chu a dan a dang deuh. Engkim ka phawrh ngam a, duh leh ka ţap a, duh duh ka sawi. Inthup ţit ţet a ngai ve lo a, Zodina ka hlauh ţhinna kha a reh vek tawh" ka ti ve bawrh bawrh. Zodina bula ka awm chuan Zothana nen kan la inhnaih reng angin ka ngai ţhin ka tih tawh kha. Ka hlauh ber leh ka biak hreh ngawih ngawih ţhin kha ka inphawrh mgamna ber leh ka mi rin ber te zinga mi a ni der tawh. 

"Ţawngtam lem lo mahse a sual hleinem. A rintlak a, vawikhat a buaipui tawh che chuan a tawp thlengin a buaipui ang che. A rilru a nghet a, a thlak zung zung ngai lo. A nu ngei hnen aţanga ka hriat a nia, amah en hian a dik ang ka ring. Zothana beisei tur a awm tawh chuang lo va, nang paw'n zawi zawiin hmalam pan tum rawh" min ti veleh a, tuman ka dinna ngai a ding reng turin min duh lo. Sawi ang a awlsam zel hian awm theih se ţha tur. 

"Ka tum alawm. Zodina puihna zarah tlemin ka zia ve deuh" 

"Ka sawi kha lo chhinchhiah kar rawh. A tawp thlengin a pui ang che. Zuang lawr dun dun chi a ni lo" no a thingpui a thlit chhuah lai chu ka lo en reng. Ţawng sual ka hlauh vangin ka chhang duh tawh lo va, ho mai mai ka sawipui. 

U Lawma a nu phut tawh bawk a, thingpui nen a kan let leh lai te chuan a lo ti ti tui ngang mai. Ka ţhutna ngaiah bawk ka ţhu leh a, U Ramtei pawh an pa bulah a ţhu. Thingpui in pahin U Lawma ti ti kan ngaithla ţhap a, an nu a kap zeuh zeuh. Ka khawvel tetakte a ka chen leh veng veng tawh vangin a thusawi ka hre mumal lo ber zawk. Beisei loh deuhin Zodina zawk chuan a ngaithla uluk angreng a, zawhna a lo siam leh zeuh zel. 

Chaw ei loh theih loh turin chaw an chhum belh lui tlat a, kan ei ve ta nge nge. Kan in aiin ka ei hnem daih, tlem te mah ni ila a nuam khawp mai. 

"In awm loh hun chu a khawharthlak leh dawn a nih hi. Kan pahnih chiah a kan awmreng hi chuan ngaiah kan nei a, phone leh tv a awm bawk nen. In rawnkal zawk a,reilote kan inkawm hnu a in haw leh daih hian khua a har duh a, kum khat vel cham tur hian lokal ziah ula" U Lawma chuan a ti bual bual a, a nui huah huah bawk. An awmna hi hla tak a ni lem lo va, a kal zung zung theih. A awlsam em vang ania Zothana nen pawh kan kal fo. 

Chaw ei khamah Zodina nen kawt laiah kan ţhu chhuak a, in dang a awm ve lo bawk a engin a chhun phak chin bak chu a thim khup a, a hlauhawm lek lek. 

"I chhungten an rawn bia che em?"

"Ka kalna tur Grace hnenah ka hrilh a, a lo hrilhfiah aniang min rawn be lo" ka lo ti sep. An thin a rim khawp ang. Mahse an duh dan a tih tir ka tum lo. Zodina hi hnuh luh ve ka duh lo viau na a Zothana min hnutchhiah ka naupai lai tih tlak ai chuan ka nei mai ang. Ka hma ka sial anih pawn ka tan ni lo naute tan chiah hian. 

"Pasal nei lo va nau ka pawm an rem ti lo va, mualpho an hlau bawk a, chhungkaw zahawmna a bo ai chuan nau tih tlak mai pawi an ti lo zawk a, tihian tlan bo na ka zawng a, mahse zankhat chiah. Zankhat chiah lo chu ka ngam chuang lo. Puitling inti viau tawh mah ila nu leh pa thuhnuaia ka awm a ngai tho sia. Thawh chhuah nei mah ila thawhchhuah ka neih theih nan a an theih tawp chhuah tu ka nu leh pate thinrim a ka chhuahsan chuan ka hlim tak tak ka ring bawk si lo. Ka awmzel dan tur hi kei ngei pawh hian ka rel thiam lo" tiin keimahin ka phun mawlh mawlh a, a ngaihthlak leh ngaihthlak loh ka ngaihven tawh lo va, ka hrilh nge keimah leh keimah ka inbia pawh ka hre lo. 

"Chinfel dan i hriat tawh kha. Thutlukna siam tu tur inia, i kutah a innghat" a lo ti hmuk a, min neih pawi a ti lo tih ka hria mahse min duhna ai mahin ka na dam nan leh Zothana hnaih a awm reng ang a ka inhriat theih nan ni berin ka hria. A inpekna zawng zawng ka hriat hian ka khawngaih a, ka nun hnawk nuaih a hruai luh ve zel ka hreh phah. 

"Ka nu leh pate chu i hriatchian ve viau kha. Mi mitmei an veng a, mi ngaihdan an dah chungnung ropui si. Zothana unaupa inih vang hrim hrim pawn engtikah mah naute vang mai mai a min neih an phal lo vang" tiin ka lo hnial a, thil dik niin hre bik lo mah ila ka la hmuh miah loh ka naupai lai mek ka neih theihma tur anih phawt chuan ka nei mai ang tih rilru ka pu tawh. Hmeichhia hi chu kan duh zawngah kan huaisen a, kan duh ngawih ngawih tih puitlin theihna anih chuan midang ngaihdan mai maiin min tibuai pha tawh lo. Min ngaithei lo deuh tu nei tur ka ni lo va, ka naupai lai hum duh tlat leh rei tak min lo duh ru ve reng tu a ni a, naute nen a kan himna tur a ni ka neih dawn ni. 

"Mi ngaihdan kan ngaih pawimawh chuan khawvelah nun ngaihna a awm lo. An sawi ringawt ang a, kan nunah ro an rawn rel dawn lo. Min sawisel nasat poh leh hlawhtlin lehzual zel tum ila, kan hlawhtlin phawt chuan tuman min sawi rei peih lo. Min infak siak sup sup ang. Sawiselna tuar zo lo va a hniam zawng a kal hi an sawi chhunzawm reng a, midang aia chungnung zawk an tlawn huam huam. Ka duh dan ka hrilh tawh che a, mi an duh lo chung nawr lui chi ka ni lo va,ka nawr lui lo vang che. Hmeichhia an duhlo chung neih luih ka tum lo" a tih chuan min hua emaw ka ti rum rum. 

"Kan hnam tihdan ve ania, nupui pasal kan neih hma chuan nu leh pa thuhnuaiah kan awm a, nupui pasal kan neih hnu pawn a danglam chuang lo. Kan buaina hian kan chhungte a inhuat tir ang tih ka hlau khawp mai" ka ti a, rei tak ţhian an lo ni tawh a, inchhun na nei miah lo chungin kan chhungkaw hnih hi kan inpawh hle. Keimahni vanga midang inkar a khik palh ka hlau ţhin a ni. Kehchhe vek lo mahse a khi thawm mawi leh pawh hi thil har tak a ni tho tho. 

Ka thusawi ngai pawimawh lo zet hian "Naktuk zingah ka rawn lam ang che" a ti nghut a, a pawi ka sawi awm ka hre si lo va,min ning awm deuh a a awm chu mak ka ti ru angreng hle. Ka phone ah lai a nghawr det det a, ka nu a lo ni. Ka hlauh vang nge ka inrin hmain Zodina ding uaih tawh banah ka vuan a, ka awmdan teh thut chuan a tih hrilhhai ve hmel. 

"Hello" ka ti tham chhal a, aw ka thian zui kharh kharh. Zodina ka la vuan reng a, engpawh thleng dawn se min pui turin ka duh a ni. U Ramtei sawi ang chiah khan a tlan chhe ve lo vang. 

"Zodinsanga nen in in ru maw? Kan zahna tur hlir a awm itum em ni? Inei duh anih pawn ţha takin sawi ta che. Zothana fa pai mai duhtawk lo vin Zodina i inruk tir a, mi nuihzat bawm kan ni ringawt dawn anih hi. I nei duh anih chuan chhungkua a kan sawikhawm lai khan ngawi reng lo vin sawifiah ta che" a rawn ti nghal bawrh bawrh. Thu mak tak tak a rawn sawi vang chuan chhan let ngaihna ka hre der lo. 

"Lalnunpui keimahni min ngaihtuah loh pawn ipa tal ngaihtuah ta che. Kan hau phal lo che a,i duh duhin kan awmtir che a, ipa hi ţhawn thut thut chi a ni lo tih i hria a ni lawm ni? Kan rawn haw aţangin i chanchin lawmawm loh lam hlir kan hria a" ala ti ta deuh deuh a, ka phawk hra a, a thusawi chuan keimah zawk hi min ţhawng takzet. 

"I hresual anih kha" ka ti dek dek a,ka sawi zawh hun nghak map lo hian "I u hnenah in chanchin i hrilh a, hei i u in a sawi vek. Ipa a thinrim khawp mai. A hriat lohin ka rawn bia che anih hi. Naktuk zingah rawn haw ngei ngei ang che" a lo ti leh buan buan. Ţawngna hun ka chang ve lo va, thinrimin min ţawng khalh zung zung. Ka nin tawp khawk hnuah ka ti tawp ta ringawt. 

Zodina kut ka lo la vuan reng a, a din reng tawh vangin ka chho melh a,min lo en ve reng. Thinrim hmel a pu lo va,ka ngaihbel nge min ngaihven hmel tawh zawk. Muangchangin ka ding chhuak ve a, ka nu thu rawn sawi zawng zawng kha ka tan sawichhawn leh a zahthlak takzet a, bul ţan dan tur ka hre lo va, mawi leh ngaihthlak nuam zawng a sawichhawn dan ka thiam lo. 

A kut ka thlah a, ka ţawng chhuah hun a ngaichang reng. Zahzelah ka bengah ka sam ka zep a, hrawk a hnawhtu awm ang maiin ţawng chhuah ka harsat viau thung. Aw ka then kharh hnuah muang ban charh hian "Kan inru amaw an ti" ka ti sep a, mak a tih hmel viau. Ka thu hrilh chu ngaihtuah zui ni awm takin a awm a, "In ru turah min ngai a" ka tih leh hnu chuan a nuichhuak ta hawk. 

"Grace a ni em?" tiin min zawt a, lu ka lo bu nghat. A ngaih thutak viau ka rin nen a nuih liam mai mai vang chuan ngaihdan siam ka thiam lo. Tu mai pawh hian hmanrua ah min hmang vek ni ten ka hria. A phone a phawrh chhuak a, a en lai chuan a nui suk. Min hmuh tir veleh a, a nu hnen aţangin a ni. Ka nu in a hrilh hman vek anih ka ring. A ankhum chiam anih pawn a fanu ka nihna angin mak ka ti lo vang. Ka nu mizia ka hrechiang ve thawkhat. A chhan hmain a tawp a, a rawn ti nawn leh ngat. An inbiak lai chuan ngaihthlak loh ka tum nasa viau. Ka ngaihven lo lui tlat a, a hmaa ka enchian ngam loh a thim zual lai te chu ka melh kual nasa. Hmun dang thlir daih mah ila an inbiak zawh hun ka hre viau thung. A tih tawp rualin ka ngaihven vat. 

Min hrilhfiah hma hauhin "A rawn thinrim ve em?" tiin ka lo zawt vat.

"Thlamuang deuhin lo mu phawt rawh. Zingah ka rawn hruai ang che"

"Kal nghal i tum a mi?"

"Aw, chanchin ka rawn hrilh ang che" a ti a, thildang a sawi lo. Anu nen an inbiak zawh hnu hian a awmdan a mak riauin ka hre leh tlat pek. A nui tawh lo va haw a tum nghal ut ut bawk. Hriatchian duhin zawt nawn mah ila chhanna ngai bak min pe lo va, rilru nuam lo deuhin min kalsan. A ţha lo lam hlirin ka ngaihtuah. Rilru tih thawven tumin ka kal a, ka u vangin ka hah lehzual phah. Hlauthawng reng reng a Zodina lo lan leh hun nghah tawp bak tih theih ka nei leh ta lo.

CONT (Min hriatthiam ţhin naah lawmthu ka sawi. Krismas leh kumthar inkar ka buai lutuk a, ka duh angin ka dah ngun thei lo. Nizanah dah ka tum nen reilote mutthilh ka tum ka lo muhil tlang daih bawk sia. Vawiinah lah ka zawhte duat lai motor in a chil hlum leh bawk si. Rilru khingbai deuh chungin ka type mawp mawp a, min nghak rei tawh sia ka rawn dah hram. A fel fai lo lai a awm paw'n min lo hrethiam leh dawn nia😇)