FATED TO LOVE YOU-11

FATED TO LOVE YOU-11

"I chhungte tal i hrilhfiah thei em?" min rawn hruai a, kan pahnih a kan awm veleh ka zawt. Hahdam beiseiin riak chhuak ve mah ila ka muttui phah lo. Grace ka hau a, ka haw lek lek. Ka thusawi ngaithla ţha duh lovin ka nu leh pate a bengdaih tur thu chiah min hrilh.

"Aw hrilhfiah thei hram. I naupai thu an hriat phah thung a" a ti a, motor a khalh vangin hmalam a en tlat a, ka hlauthawng hmel a hmu kher lo vang.

"Ti tla turin min duh ve tho angem? Miin min sawi duh dawn sia,ka chhungte ang hian an zak ve em?" ti a amah en reng chung a ka zawh chuan lu a thing a, Zothana fa chu hmuh ngei an duh zawk anih hmel. 

"An hum ang. Tlanbo lo vin iduh dan i hrilh chiang tawh dawn nia" a ti a, ka chhungte a sawina tih hria in aw ka pawh duh lem lo. Ngaihdan leh rindan an nei nghet sa a engpawh sawi ila an rilru ka hneh theih ka ring lo. 

Ka huphurh vang nge kan in kan thleng hma khawp mai. Kan din hnuah pawh inchhung luh ka hreh vangin motor aţangin ka chhuk duh lawk lo. Ngawi reng a ka ţhut reng hnuah ka awmdan chu hrethiamin "Chhuk rawh ka luhpui ang che" a ti ta hlauh. Ka nu leh pa te ka hriatchian em vangin a thusawi chuan min thlamuan zo lo. Ka hreh em vang chuan muangchangin ka che ţial ţial ti ila a dik ber ang. 

Min lo nghak ni awm takin an lo ţhu ţhap a, a nuam lo takzet. Zodina nu leh pate awm ve phei sela chuan ka zam lehzual ang. An hmel en ringawt pawhin an lungawi loh zia a hriat theih a, ka zam lutuk chu ka kutphah thlengin a thlan dup thei. 

"Lo ţhu ru Zodin. I rawn thlah thlen ka ring lo a, ţhu ve rawh thingpui te kan lum dawn nia" ka u in a lo ti zung zung a, ka nu leh pate chuan ngawih an la chuh tlat. A awl laiah kan ţhu a, ka hlauh tehreng nen Zodina chu hlau angin a awm ve duh lo. 

"Grace hnen aţangin Nunui neih i hnial lo niin kan lo hria a" tiin ka pa in bul a ţan a, a awki chu ngaihthlak a nuam tehchiam lo. Kan chhungkua kan inpawh em vangin a thusawi pawh chu pawi lo ah a ngai a nih hmel. 

"Midang ngaihdan tur i ngaihtuah thleng pha em? Naupan tet aţanga inhria in nia, hmangaihna i pe thei dawn tih kan hria a mahse in chhungkaw hnen aţangin eng thil mah kan mamawh lo. Hmangaihna in pek ve a ngai lo va, engkim a buai vek a, a buai nasat hmain ka fanu hi buaina aţanga lakchhuah ka duh. Ka fanu hian pasal a neih hma in nau a pai lo vang a, amah chauhin naute a enkawl lo ang. Tukin ah ipa nen kan inbe chiang tawh" a tih zawm leh a, muang ban charhin a ţawng a, a tih tak zia lantir nan thumal tin te chu fiah takin a lam vek. 

"Mawhphurhna ka la ang. Nunui leh a naupai lai hi chhungkua ka pe ang a, amah chauhin a enkawl lo ang. Pawisawi lo paih ai chuan chu chu ţha i ti zawk ve tho lo maw?" tiin Zodina chuan a lo chhang let ve khauh a, a tisual tu leh buaina thlen tu ber kei chu hawichhuak ngam lo vin hnuai lam ka bih tlat. 

"Inneihna lem hmang hian chhungkua i pek theih i ring maw? Hmanni lawkah inau a thi a, innei ta ula miin engtin nge an sawi ang? Hnung lam aţangin min nuih tet tet mai dawn a sin. A rai tih an hriat ngat phei chuan ngaihdan mak tak tak annei ang a, naute hi tu fa nge kan tih ang? Zothana nge Nangmah? Hetiang thil atthlak hi ka thlen tir lo vang. Keini chhung chuan rem kan ti lo" nghet charh hian ka pa bawk chuan a ti leh a, zam tak chungin ka kawr lum hmawr ka hum ngat ngat a, hmui ka pet fan fan bawk. Ka ţawng ve chuan ka pa ka tih thinur lehzual ka hlauh vangin ka insum ţang ţang. 

"Chutiang chu i ngaihdan anih chuan engtia tih nge i tum? A naupai lai hi i tih tlak sak mai dawn nge?"

"Nau tih tlak hi duhthlan tur awmchhun anih chuan ka hre hauh lo" a ti bur a, mualpho a hlau a ni. Zodina chuan chhan let chi ah a ruat tawh lo nge ngawih a chuh a, U Ramtei sawi ang kha a nih tak tak chuan ka nau pai lai hum nan eng emaw tak a tih erawh ka la ring fan. 

Ka nu a in ngaihtuah harh hmasa ber a, Zodina chu thil dang a sawipui ta daih. Rei mawi tawk a awm ve hnuah haw tumin a in buatsaih a, a car dahna thleng ka thlah. Kan inbe miah lo va nuam lo ka ti ru takzet. Min pui tur a ka duh miau vangin car a a luh dawn lai chuan a kawr hmawrah ka lo pawt a, pawt na lo mah ila ka lam a rawn hawi tho.

"Min pui ang tiraw? Ka pa rilru hneh a awlsam ka ring lo a, thinrimin chhuahsan ta ila ka inchhir ka hlau ve tho sia bakah ka pa hi ka hrechiang. Thinrim a ka chhuahsan a nih phawt chuan min tui thlar duh ngei ngei ang. Ka pa hrisello ve tak leh min ngai em em reng tu ka nu ka chhuahsan chuan ka hlim dawn chuang lo. An duh angin ka naupai lai hi ti tla ta ila damchhungin ka inthiam lo ang a, Zothana thlanah takngial pawh ka kal ngam tawh lo ang. Ka dinhmun ka ngaihtuah a, mualpho dawn mah ila ka nei ang che. Ka fa ka hum theihna anih phawt chuan ka nei em em ang che" ka ti ta mawlh mawlh a, Zodina pawn mak min tih ve hmel kher mai. Duhthlan tur dang ka neih ho hi mualpho aiin a rapthlak vek. Thil ţha lo tak tih ai chuan reilote mualpho pawi ka ti tawh lo zawk. Mi chuan min sawi mahse reilote bak min sawi peih lo ang. 

"I thutlukna chu i chhungte lo sawi pui rawh. Ka rawn bia ang che" 

"Chuan engtin nge ni dawn ta? I rilru put hmang ala ngai reng em?" tiin ka zawt nawn leh a, ka pa vang khan a rilru a thlak ka hlau a ni. Thu tam sawi lo mahse a thusawi ho kha Zodina tan a hriat nuam lo tur hlir a ni. 

"Thlamuang deuhin lo awm rawh. Thil ei la" a ti ringawt a, ka la duh tawk mai lo, nu chuan a fa tan engpawh tih a huam ţhin ka tih tawh kha. Ka huaisenna sawm khawmin "Min nei ang a naute hi i hum thei ang tih tal tiam la, thlamuangin ka awm thei chauh ang. Hmeichhe tan sawi a mawi lo tih hre ve tho mah ila ka chhungte leh naute hi chan ka duh lo ve ve" ka ti leh ngat a, ka duh dan diktak a ni. Ka chhungte nen a chhe tak a inchhuah ka duh lo va, Zothana fa hi neih ngei ka duh bawk. 

"Ipa kan hmin theih dawn leh dawn loh ka hre lo. Kan awmdan tur chiang hmasa lo vin thu ka tiam thei lo che. Ka hlen chhuah theih tur chiah ka tiam ţhin. Mahse theihtawp ka chhuah ang tih erawh ka tiam che" a ti a, min khawngaih nge min kalsan hreh ve hmel. A tlan liam hnuah pawh keimahin ka la ding reng a, Zodina tello phei chuan inchhung luh leh a huphurhawm. Kan hnam kalphung a nih ve deuh vang nge tlem a kum a upat hnuah pawh thil pangngai lo a thlen chuan nu leh pa te hi kan lo la hlau viau tho mai. 

Hmun dang a kal bo leh chi ni a ka hriat tawh loh vangin hreh chung chungin ka lut ve hnak hnak. Ka pa a lo awm tawh lo va, ka u in mitmeiin an pindan lam min lo kawhhmuh zeuh. Ngawi rengin a ngaiah bawk ka ţhu leh a, inchhung boruak rit lutuk mai piah lamah ka thil tawn buai chuar nuaih vang chuan mittui a hnai leh kuarh tawh. Min duat em em ţhin tu ka nu in thinrim hmel a pu tawh lo va, min lainat ve ang a a lan vang te pawh a ni maithei. 

"I thil tawn hi nu ka nih angin ka hriatthiam pui che. Thil tam tak ka lo paltlang ve tawh a, ka hrethiam vek. Ka hriatthiam lehzual nan che eng emaw tal sawi ve la, ipa thusawi zawng zawng te kha ngaihthlak a nuam lo vin a ti na lehzual ang che tih ka hria mahse thudik lo a sawi chuang lo. Ila naupang a, hma hun eng tak inei a, Zothana a awm tawh loh ro ro chuan pasal nei lo va nau i pawm a remti lo a ni mai. Nau i pawm loh chuan nula ila ni reng dawn a, fa ineih chuan i hlu lo sawt dawn tih a hria a, a ngaihtuah vang zawk che a hetianga awm hi a nia" dam duai hian a ti a, zan lam a ka insawifiahna a ngaihthlak duh loh kha hre tawh lo ni awm takin a awm. 

"Insawifiah ka tumin i ngaithla duh lo a, tunah eng emaw sawi turin min ti leh a" ka ti ve ngat a, min chhan tum a a an zuau laiin ka u in "Ka pa damdawi ei a hun tawh ni lawm ni? Va buaipui rawh, Nunui chu keiman ka lo sawi pui dawn nia" a lo ti a, sofa a ka bag let nghat chu la kangin "Lo kal rawh, pindanah hahchawl ve lawk rawh i chauh hmel emai" a tih zawm zat. 

"Ngati nge inru ang a min lo sawi? Buaina i belh chhah mai mai dawn tih te chu hre rual ini tawh. Ka nu in min rawn biak hnu phei kha chuan Zodina lakah pawh ka inthlahrun phah ngawih ngawih a" ka u nen chiah a kan awm hnu chuan ka vin ve hrak tawh. 

"I naupai lai hum dan ka zawng. Zodina ineih theih dan tur nen. Pasal ineih chauhin i pai tlang thei ang. A tir aţangin engmah i sawi ţha duh lo a, i naupai thu thlengin i zep a, engkim min hrilh vek rawh" ka awki ang chiah a sangin a lo ti ve.

"Zothana thih hma deuhin ka hria a, a accident ni khan hrilh ka tum a, thil pawimawhah an lo ko leh sia, zanah hrilh tumin rilru ka siam a, mahse ka hrilh hman lo. Zothana khan fa a nei dawn tih leh pa ni mai tur a ni tih a inhre hman lo. A thi a rilru mumallo deuhin ka awm reng a, Zodina khan a hrechhuak ta hlauh zawk a, min zep pui turin ka hrilh lehzel. Thil thleng zawng zawngah hian Zodina hi demna tur a awm lo. Hma lam pan thei turin min pui a, thil dang engmah min tih luih tir lo" ka tih lai chuan khumah a rawn ţhu ve a, englai pawh a min pui reng ţhin tu Zodina hi an dem ka hlau a, amah nei tur a min nawr lui ang a an ngaih ka hlau takzet. 

"I naupai a hria chu thuhran ni se, a duh che tih thlengin hre mah ila neih che a duh chhan hi ka zawh pawn a sawi ţha duh lo. Ngati nge neih che a duh deuh thut? Nizana ka dawt theh darh kha haw awm viau si in a haw mang bawk si lo" a tih nuah nuah lai chuan ka lo thaw hawk. Zodina chu kei aiin a hrechiang daih zawk awm sia. 

"Min puih a duh. Ka naupai hi ka nu leh paten an lawm dawn lo tih a hre sa vek aniang. Bakah a bula ka awm hian Zothana a awm hnai angin ka ngai ţhin tiin ka lo sawi palh zeuh a, naute hum a duh bawk nen. Keipawn ka duh, Zothana min hnutchhiah awmchhun anih vangin a him theih nan ka tih theih ang ang ka ti vek ang. Fa hrinsak a ţha tak a enkawl chhoh zel hi Zothana tan a ka tih theih awmchhun a ni. Zodina ka neih chauhin chu thil chu ka ti thei dawn niin ka hria a, neih ka hnial loh thu thlengin ka hrilh tawh" ka duh ang ka sawi zawh chuan za lo deuhin a nui hul hak. 

"Zodina chu hman ţangkai i tum tihna a ni maw? Zothana bul a awm angin i in ngai thei ang a, Zothana nen a infa i enkawl theih phah bawk ang a, Zodina eng nge i pek ve ang?" ti a min zawh chuan chhan ngaihna ka hre lo. 

"Chuan a bialnu kha? A bialnu kha engtin nge a tih?" ţi dek a ka u ka melh lai chuan a mit hmul a lo kan ak a, a hmelah engmah ka chhiar thei lo.

"Ţhian in nia, sawi dun ta che u" ka ti hlak a, lan tir lo mah ila ka awm a nuam bik chuang lo.

"Sawidun pui theih ni se ka zawt lo vang che"

"An inţhen" tiin rang deuhin ka lo chhang. 

"Nangmah vangin amah hmangaih takzet tu hmeichhe pawisawi lo a ţhen maw?" a ti hluai a, a meng phar nasa. 

"Ka chiang bik lo"

"Zothana leh i tan hian rin aiin a lo inpumpek nasa daih. Inei anih chuan hmangaih i tum ve angai dawn anih chu. In inneih theih nan nizanah dawt ka sawi a, a thawk na vak si lo va, thil dang ngaihtuah leh angai anih chu" a tih zat zat hnu chuan keimah zawkin mak ka ti ve thung. 

"Kan inneih duh lo ang khan i awm sia" ka ti ta hu a, a lo ţhen sak.

"In awmdan hi a buai chuar nuai a, thil thleng ang ang hi ka pawm vek. Zodina'n a hmangaih lutuk che hi lawmthu hrilh hial tlak a ni. A ni ang mahni thuduh lutuk hi chuan hmangaihna tello chuan hetiang thil hi a ti lo tawp ang. A duh naah mi mitmei a veng ve tawh si lo. Tih theih tlem chiah inei ve" 

"Eng nge ka tih ang? Eng thil pawh ni se tih theih ka tum ang"

"Zodina hi ring tawp rawh. Zothana fa pawh nise tuman an tih nat loh nan theih tawp a chhuah ngei ngei ang. A theih ngei pawh ka ring. I lo tih ve tur chu in enkawl ţhat a ni mai. Naute a hrisel theih nan chuan nangmah i in enkawl ţhat a ngai. Thil ei ţha la, a thim zawngin engmah ngaihtuah tawh lo la, i fa nen a in tan a ţha tur chiah ngaihtuahin ti tawh ang che" ti a min hrilh chuan ka lo bu ve nghat nghat. Ngaihtuah ringawt pawhin min hmuak tu thil hi paltlang a awlsam dawn lo tih ka hria, ka kal zelna tur kawng hi bum boh viau dawn mah sela venhim tur ka neih tawh miau vangin huaisen leh chhel tak a kal luih zel ka tum tho ang. 

Ka mut ţhat lohna a rei tawh bawk a ka lo muhil ni ngei tur a ni chawhnu lamah ka harh a, ka tui a halin ka ril a ţam em em bawk. Ka inbeng kang a, chhun a ka mut vang te pawh a niang ka rit luk a ka lu a na bur. Chawlh a nih vangin ka u hna a a kal loh ni ania, ka pindan a la awm reng tur a ka ngaih laiin a lo bo hman daih. Ka lu dawm a ner nang chungin inhnuaiah ka chhuk a, tumah ka hmu lo. Choka ah tui ka in a, eitur ka en lawr den den. Rilţam viau mah ila eichak ka nei chuang lo. Ka u ka ngaichang ru reng a, thawm a awm bawk si lo. Ka pa te rawn haw hlim a ni bawk a, an pindanah a awm anih ringin thawm dim tak chungin ka pan a, kawngkhar inkhar phui lo lai aţang chuan ka bih dek dek. 

Ka rin ruk ang ngeiin ka pa leh ka u inhmachhawn ran chu ka hmu a, tukverh bulah an ding a, ka hming an lam ri ka hriat takah mawi lo viau mahse bak phen a dingin beng ka chhi ta ran. 

CONT...(Tunlai ka dah ngun thei lo lutuk hi ka inthlahrung lutuk tih min lo hriatsak hram hram ru. Dah ngun deuh ka lo tum tawh dawn nia, buai zual a reh ve ţep tawh e. Min lo hrethiam ţhin a, ka lawm takzet tih ka lo sawi nawn leh😇)