FATED TO LOVE YOU-12

FATED TO LOVE YOU-12

https://www.facebook.com/groups/292456422208447/?ref=share

https://chat.whatsapp.com/K6HoP6HNsfU6mWeB8taHc5

"Ka rilru hmin tum duh suh. Ka fanu a nia, a tan a ţha ber tur ka duh. Inneihna maksak leh chhungkaw mualphona thlen thei hi ka pawm lo vang. A naupai te nen lam hian ka pawm thei lo vek" ka pa in a tih chu chiang takin ka hre pha. Ka nu a awm ve lo nge a thawm ka hre tel lo va, kan inchhung a reh em vangin an ţawng a ring hma, kawngkhar an khar phui loh zawn tak meuh a awm ka nih vangin ka hrechiang thei lehzual. 

"Ka hria, i tan chuan pawm a harsa dawn tih ka hria alawm. I hmangaih a, a naupanlai aţang tawhin kutthlak chu sawi loh hauh pawh i hau phal ngai lo va, a tan a ţha ber tur i duh na lamah naute in a hma hun zel tur a tihchhiat i phal lo va, i ngaihdan ţawmpui thei lo che mah ila ka hrethiam thei tho che. Mahse a dinhmunah hian indah ve chhin teh. Thutlukna liam tham i siam hma in a dinna ah hian ding ve chhin la, a thil paltlang zawng zawng te hi ngaihtuah nawn sak leh rawh. I hriatthiam phah maithei asin" tiin ka u chuan ka tan ala ngen a, ka pa in a chhan let leh hmain "Lungngai lo tur leh nunhlui theihnghilh a hmalam pan turin tupawn kan hrilh vek a, kan nawr a ni zawk mah. Mahse a thil paltlang leh a tawrhna te kan hriatthiam pui tak tak lo. Zothana nen an inpawh zia kan hriat bakah kan hmu vek a, inneih hun tur kan ruat vek hnuah accident vangin hetiang hi a thleng leh ta sia, tumah kan inring hman lo. Awlsam tak a hmalam a pan theih i ring bik lo ang tiraw? A neih chhun a naupai lai paih sak ngat phei chu, in duh dan hi in kaltlang pui a nih ngat chuan damchhungin inthiam lohna innei char char tawh ang" a tih zawm leh a, kut ka hum ruh a, thawm ka chhuah ngam lo. An thusawi ngaihthlak chu a dik lo tih hre mah ila thaw dep dep chungin ka ngaithla ta reng.

"A na dawn tih chu kan hre vek. Inu nen pawh kan sawi ţhin. Vawi leh khat a dam thei a ni lo va, hun a rei ang a a dam ve mai ang. Naute hian hma a sawn tir dawn lo va, a dinna ngai a din chu sawi loh a hnuk hniam tu tur zawk leh hmalam a pan zelna tur a dal zawk ang. Zothana thih hma lawk pawn dawr tih len zel a tum thu phur takin min hrilh a, a hnuaia zir duh a hmu ve zel bawk a, hlawk lehzual a tih dan a ngaihtuah ve reng. Thla tam a tawrh a ngai tawh lo vang" ka pa chuan luhlul chhuahin a ngaihdan a sawh sawn duh lo. 

"Hma a sawn lo vang. Nunui hi in chik tak tak lo a nih hmel. Dawr a kal lehna a la rei reng reng lo. Zothana thlan a tlawh nitin a, dawr aiin a awm hnem zawk. Hnathawk miah lo va nileng a awm chang a ngah. A cher sawt zia te hi inhmu ve miah lo mi? Kan mitmei a ven vang leh amah vanga kan mangan a hlauh vangin a tawrhna a ti lang ngam lo va, inzin hlan te khan eng thil mah a ei ngai lo. A ei ve pawn a luak zui bawrh bawrh zel a, hrelo angin ka awm a a rukin ka enthla reng ţhin. A ţhat thu a sawi reng lai pawhin a ţha ngai lo va, keini chuan a thusawi kha kan awih mai. Hetiang anih reng chuan a nau pai lai chauh ni lo vin amah thleng hian kan la chan lo ang tih a sawi theih loh" ka u chuan a ti veleh a, vin chuang miah lo mahse a hma aiin a awki a sang ve ta deuh. 

"Awm ho reng mah ila thil danglam engmah kan hmu thei lo. Zodina bawkin lo hria in a hmu a, mahni thuduh leh mahni chiah in ngaihtuah ţhin ah ngai mah ula nangni aiin Nunui danglamna leh a ruka a tawrhna a hmuh chian sak zawk. Mi ngaih a mawi lo mah ni se venhim a duh miau vangin a puih reng theih nan Nunui a thlem thlu a, inneihna lemah ngai mah la Zodina rilru put hmang hi a lem a ni ve lo" ka u in a tih chuan ka lo ip chawih chawih. Ka pa a tih thimrim lehzual ka lo hlau a ni ber.

"A hmangaih alawm. Mi dang zawng zawng aiin a hmangaih zawk. An tawrhna a in ang chiah a, an hmangaih ber an chan ve ve. Zodina hian engkim a hriatthiam pui vek. Zothana'n a hmangaih ang chiah khan a hmangaih. A inţanna a rei tawh. Ka sawipui zeuh zeuh ţhin a, inneih an tum hma te khan Nunui be ve ţhin tur a nawr chang ka ngah mahse Nunui a hmangaih ang tho a Zothana a hmangaih ve tho vangin a thup tlat a, engkim a up bet vek a,  Nunui hian a hmangaih lo tih hrereng chungin a inpe em em reng tho. A hmangaih em vangin kan hmuh loh thlengin a hmu thei vek. Tun thlenga Nunui a la dam ţhat chhan pawh hi Zodina tho. Naute vang hian mipa dangin an duh loh phah i hlau a, naute nen a pawm thei tu Zodina i hmuh kan leh daih a, neih a duh chuan lawm tak a pawm thiam tum zawk mai rawh. Midang chuan engtinpawn sawi rawh se, i fanu himna hi a pawimawh daih zawk. Midang ngaihdan ai chuan i fanu dik tak a hmangaih tu hi a pawimawh zawk" ka u in a tih leh chuan ngaithla zel duh lovin ka inthiar fihlim ta daih. Zodina inpek nasat zia ka hriat tam poh leh ka inthiam lohna a nasa ve zel a, engkim a laksak niin ka hria. A zalenna leh a hlimna zawng zawng, amah hmangaih tu leh a tan a tih hreh nei miah lo thlengin ka laksak vek. Hmangaih tu nei ve reng siin kei leh Zothana tan bawk a in hlan leh chu a ni sia, ka tan chuan a hlu takzet. 

Ka u chu ka pindanah phur tak a lo lutin Zodina nen a kan inneih theih a rin thu min rawn hrilh a, lawm viau tur ka nih laiin a der takngial pawn ka nui lui thei lo. Ka hmel a hmuh chuan ka bulah rawn ţhu in min thlek vang vang a, ka hlim loh chhan min zawt ta ngei. 

"Rilru nuam deuh a awm duh mah ila thil dik ka ti niin ka in ngai thei lo. Mahni hma ka sial a, nakin zel tur ka ngaihtuah phei chuan ka hlau takzet. Tih nat ka duh lo va, hlim tak a awm reng turin ka duh. A hlimna ka thlen sak thei angem ka hre lo mahse midang zawng aiin Zodina kianga awm nuam ka ti a, Zothana hmu ang maiah ka inngaih ţhin vang hian ka natna chhawk nan ka hmang ţangkai mai mai ni ah ka ngai. Ka ngaihtuah thui chang phei chuan keimah leh keimah hi ka inhaw takzet" tiin ka lo hrilh a, sawichhuak lo mah ila ka rilru nawm na tur eng emaw tal sawi turin ka duh takzet.

"Inhaw duh miah suh. Zodina hian a thil tih hi a hrechiang tih hre tawp la, thutlukna a siam hma khan a in ngaihtuah nawn ngei ngei ang. I rilru put hmang thleng a hrevek chungin he kawng hi a zawh lui a, engtin pawn awm la a hrethiam zel ang che. Puih che a duh vang a nia, i lak aţang hian beisei let a nei lo vang" dam dap hian a ti a, min hnem na hi chu ngaihthlak a nuam viau ţhin. 

"Beisei let nei mahse eng thil mah pek tur ka nei lo. Chuvang tak chuan hrehawm ka ti lehzual. Misual tak niin ka inhre ţhin. A puihna mamawh viau siin tih ve theih ka nei tlem si" 

"Kan awmzel dan tur kan hre lawk lo a, pek let tur nei lo angah in ngai nghal ngawt suh. Hun a liam zel ang a, ila hmangaih ve lo ang tih tu nge sawi thei?Mi ţha tak a ni a, ţawngkam thlum tak tak nei ve lo mahse hma i sawn phah ngei ka ring. Hun hian eng kawng nge min zawh pui zel dawn tih leh eng thilah nge min hruai luh zel dawn hre lo mah ila hun ţha siam sak la a ţhat ka ring. Hmangaih rih lo mahla hun ţha siam sak la, nangpawh insiam rawh. I tan a khuanu ruat diktak a lo ni mial maithei a sin" a ti na a midang hmangaih leh tur angin ka la indah chhin ngai lo. Khawvela ka awmchhung a ka chanvo ve tur,ka chung a thleng ang apiang lo hmachhawn a, lungawi tak a pawm tum zel hi thil ţha ber niin ka hre tawh. 

Ka nu leh pate chuan mualpho huamin Zodina neih chu an remti ve hram a, mi kan sawm hnem lo. Ka pa phei chu a zah em vangin a ţhiante takngial pawh a sawm duh lo va, a hlim hmel hmuh tur a awm lo. A fanu pasal neih ni a a awm ve ngei ngei ngai lo sela chuan a tel ve duh kher lo vang. Ho lam takin kan innei a, a lawmna pawh kan ti ropui chuang lo. 

Florence ka hmuh chuan mak ka ti angreng hle. Midangin min ngaihven vak tawh loh hnuah Zodina nen an inbia a, ka awmna a hlat deuh vangin an thusawi erawh ka hre phak lo. An inţhenna ala rei loh nen, pangngai tak a an inbe thei chu puitling ka ti ru khawp mai. A bikin Florence, lokal ve turin ka beisei lo va, keimah vanga inţhen an ni miau a, min huat viau ka rin laia mawi tak a ka hmu thei chu mak ka tiin keimah zawk ka dik lo niin ka hria. Zodina ban a kuahin a nui sang reng a, a thawmhnaw hak leh a hmai chei dan te chuan a ti lang nalh lehzual. Nula nalh tak kalsan a kei min nei daih hi a hrechiang tu tam tak chuan mak an ti ve ngeiin ka ring. 

Tlai lam a ni tawh a, mo lawm tur a lokal an haw ţhen nual tawh. Zodina leh Florence an ti ti tui hmel bawk a kan pindan tur ah ka lut ta daih a, keimah chauh a ka awm hnu chuan ka ipik leh mup mup tawh. Ngaihtuah loh tum viau mah ila rilru ah Zothana a awm reng a, kan pahnih a kan duh ber ţhin chu vawiinah a thleng a, mo thuam nen mawi tak a ka din laiin min dinpui turin a awm ve tawh si lo. Min kalsan lo se la chuan ka pasal neih ni hi tun ai hian a ropui zawk ngei ang. 

Chaw ei dawnah Zodina chuan min rawn ko a, a hmingin tlem ka ei ve. Florence a awm ve reng a, Zodina a be siam siam reng. Ka bialpa a ni lo va, loh theih lohin ka pasal a ni ta der a, hmeichhe dang tel ve reng mahse sawi theih ka nei lo va, ka thik awm pawh ka hre lo. Pindan a mahni chiah a awm kha nuam ka ti lo va, midangin min chim buaiin nuam ka ti chuang bawk si lo. Ka mumal lo in kei ngei pawh hian ka awmdan hi sawifiah dan ka thiam lo. 

Khumah ka ţhu ran a, Zodina lo lut chu ka lo en tawp. A inbual fel vek tawh laiin ka hmai takngial pawh ka la phih ve lo. 

"I mut theih dawn loh chuan rilru la peng tur thil ti rawh. I duh leh lehkhabu chhiar la, zai ngaithla la, khatianga i awm reng chuan i muhil thei lo vang" tih pahin min rawn pan a, "A har ang tih ka hria mahse naute tan tal khan hahdam tum rawh" tiin min ngen zawm zat. 

Ka hmaah tak rawn ţhu hniamin "A him theih nan thui fe i kal tawh a, tuman paih turin an ti tawh lo vang che. A enkawl chu i tih tur a ni tawh" 

"Thil tam tak min tih sak a, engmah ka tih sak let ve thei si lo che a, pawi ka ti" ka tih sep lai chuan ka kutah a vuan a, natna ka thlen sak ang tih mawlh ka hlau ţhin. 

"Thil pek ka phut lo. Hlim leh hrisel takin i awm zel dawn tih intiam la a tawk mai. Thil pek dang aiin a lawmawm zawk ang" 

"Theih tawp ka chhuah ang" zawi te hian ka ti a, ka theih ngei angem tih hre lo mah ila a rilru nawm nan leh ka naupai lai tan hian ka tum ve a ngai. 

Ka kut a vawnna thlahin ngainatawm tak a nui chung hian ka sam a tuai thuak a, a ding zui zat. 

"I chau awm sia mut tum tawh rawh. I inbual duh chuan bathroom awmna i hriat kha. Bungrua ho hi rem fel duh suh, naktukah ka tihpui dawn che nia" a tih hnuah a inher zui daih a, kalsan a tum laiin ka lo vuan ve vat. A rawn hawi let leh a, ka awmdan chu mak a tih hmel takzet.

"Khaw nge i kal dawn? Hetah i mu ve dawn lo mi?" ka ti bah nawk a, ka zam em vangin ka aw thlengin a khur. 

"Aw hetah hian mu la pindan ruak dang a awm tho a, chutah chuan ka mu ang. Mamawh ineih tak leh min ko mai dawn nia, zanin a i mamawh tur chin chu ka hrilh tawh che a" a ti ban ve charh a, a hrilhhai ve kher mai. 

"A ngai lo. Hetah i awm ve thei alawm" ka lo tih chuan a hma ai mahin mak a tih hmel lehzual. A beisei ang lo deuh a ka awm vang te pawh a ni mahna.

"Engmaw i sawi?" ka thusawi hrechiang deuh chungin min zawt nawn leh. Thawk hak pah a dakchhuakin ngam leh ngam lo vin a mitah ka en a, ka zah zia a hmuh hmaih bik ka ring lo.

"Kan innei tawh a, hmun dang a mut a ngai kher lo. Awm ve mah la pawi tihna ka nei lo,i pindan zawk a nia, insawn duh suh" 

"Kan inneihna hi a lem vek a nia, ka mitmei ven a ngai lo. I thei lo chung in nawr kal lui duh lo la, a tak tak angin lantir tum lui duh suh. A lem tih kan hre ve ve a, ka bul a i awm a i zam ţhin te hi thil pangngai a ni. In ang viau mah ila mi pahnih kan ni tho a, awm nuam lo khawpin in tur lo la. Muangchang a hmasawn tum zawk rawh. Rilru dam leh nuam ti tak a i awm ka duh ber. Min hmaizah vangin in nawr lui tawh miah suh" ti mahse keimah a awm ka duh lo. Ka hmaizah vang a ka duh lo thil ti lui ah min ngai a, ka ti lui lo va, ka hnaih a a awm hian ka thlamuang zawk. 

"Min puih i duh chuan ka hnaih a i awm a ngai alawm. Kan inchhung uap lutuk ah ka awm tawh lo va, ka naupai lai an paih hlau reng rengin ka awm tawh lo va, nuam ka ti tawh lutuk. Mahse lokal ngun viau mah ila in inah hian zan ka la riak bik lo va, vawiinah ka pasal ini chauh bawk a, engkim hi a thar ang vek a ni. Chuvang chuan engkim hian min ti zam vek. Kan inzah tawn ve ve tih ka hria mahse ka bula i awm hian ka thla a muang zawk. I awm ka ti nuam lo tih hre mah ila i awm hnaih hian nuam ka ti zawk a, engkim ka lantir vek ngam a, ţha miah lo chung siin ţha ang a ka lan a ngai lo va, ka natna leh tawrhna zawng zawng min hriatthiam pui tu awm chhun i ni bawk a" ka ti a, thil dang ka sawi zawm duh lo. A na dawn tih ka hria. Zothana a an vang chauh a a kianga awm nuam ti ka ni tel a, ka thil sawi dang hi dawt ni lo mahse Zothana vang chauh a ni tih hi sawi tel kher ka duh lo. He inneih na hi a lem vek ang a a ngai anih chuan ka hmangaih let ve a beisei miah lo vang. Kei ngei pawh hian ka thinlung hi Zothana rual khan a thi tel ve tawhah ka ngai a, thinlung thi tawh hnu hi lo nung lehin midang a hmangaih leh thei angem hre lo mah ila a kiang a ka awm hian ka hahdam a, ka ipik lutuk ţhin te thlengin a ziaawm phah ţhin tih erawh ka zep lo.

CONT..