FATED TO LOVE YOU-13

FATED TO LOVE YOU-13

Pindan chhung a ni zung lo lut chuan min ti harh a, a lum nuam bawk a mut pah a nilum ai ni pah fawmin ka che sawn lawk lo. Ka meng diar diar a, engin min chhun khalh chuan mit ka chhing leh vat. Na lo te a ka nuai hnu a ka men leh chuan ka khawhmuh a fiah tawh a, men a harsa tawh lo. Ka mutna pindan chu ka enkual a, ka pindan a ni lo tih ka hria. 

Ka kut dah kangin ka kut ţang a zungbun ka bun thar chu ka en a, pasal ka nei tawh tih lantirna a ni. Ka pasal hi ka hmangaih ber nen an landan a inang chiah chiah a, mahse ka hmangaih ber kha a ni lo. Pasal atana neih ka tum leh ka hun lo la awm zel tur hmanpui ka tum ţhin kha tun a ka pasal hi a ni lo. Ka thawpik lutuk chuan ka ven deuh nan thawk ka la hrawk a, awmzia a awm miah lo lehnghal.

Tunah chuan pasal ka nei tawh a, min hmangaih tih ka hria. Hmangaih let ve lo mah ila a ni chuan min hmangaih zia min hrilhin a lantir a, thil ţha hlir min tih sak. Min hmangaih thu a sawi apiang hian pawi ka tiin ka inthiam lo ngawih ngawih ţhin. Ka hmang ţangkai mai mai ni a ka inhriatna hian inthiam lohna min neih tir ţhin a, ka chhanlet theih loh vang ringawt pawh a ka tih nat na hian pawi tihna min neih tir ţhin. Eng emaw zawng tal a ka chhan let a beisei ve ţhin in ka ring mahse eng ti zawng mahin ka la chhang let thei rih lo. Ka tho chhuak a, khum lu ngheng a zawi deuh a ţhu in sana ka melh a, dar7 a ri chiah. Ka rin aiin ka tho tlai daih. Nidangah ka harh hma thei hle sia, zanah ka harh ziah bawk a mahse nizan chu ka harh miah lo. Tui deuhin ka muhil a, zing dar7 ah ka harh ve chiah. Zodina mutna sofa awmna lam ka hawi vat a, a lo awm tawh lo. Pindan dang a mut ka phalloh hnu khan ka bulah mu duh chuang lo vin sofa ah a mu a, la hma viau mahse kei aiin a tho hmasa tho. Hna kal turin a insiam biai tawh maithei. 

Ka inphih fai a, mut thawmhnaw ka thlak leh hnuah pindan ka chhuah san a, Zothana pindan zawnah ka ding leh det. Kawngkhar herh hawn na ka ban de de a, an kalh loh vangin awlsam deuhin a hawn theih ang. Hawn ka tum zuau na a ka ngam leh ngang lo, kut ka la let vat a, hmanhmawh takin inhnuaiah ka chhuk leh ta zawk. 

Tumah an lo awm lo a, an inreh ţhin zia hre sa mah ila a nu leh pate tal hmuh ka inbeisei deuh a, mahse hmuh tur an awm lo. Choka aţangin an ei siam rim a rawn nam pha a, choka ah an awm anih ringin ka phei leh a, rinloh deuhin Zodina ka hmu ta zawk. A thawmhnaw balh loh nan apron nu deuh a hreng ve ngei a, a thil siam laiah rilru a pe bawk aniang ka en reng tih a hre lo. 

Nui ruh ruh chungin a che vel chu ka thlir ta reng a, ei a siam thiam tih ka la hre ngai lo. Ka beisei loh deuh deuh thil a ti nual tawh. Hmalam pan tur a min hrilh ni aţang khan a mitmeng vawt raih reng leh thutak hmel a put reng ţhin te kha ka hmu tawh ngai lo. A tawrhna te leh a hlim nui lai te min hmuh tir ve tawh a, ka hriat sa a ni chung hian a thar hlak a hmelhriat ţha leh ang mai ka ni. 

Ka en reng tih hria in a rawn hawi a, zing kar a a hlim hmel hmuh chu a nuam khawp mai. 

"I muttui em?" a tih chuan zawi te hian lu ka lo bu a, "Muttui lutuk ka harh miah lo. Puih i ngai em?" tiin ka lo zawt ve vat. 

"Ngai lo, a ei theih ţep. Lo ţhu rawh" tih pahin dawhkan a kawk a, hreh viau mah ila ka ti lui leh thei dawn chuang lo. Chair ka pawt tawlh a, a thil siam hmin hun ka lo nghak ran. Gas a off veleh tho vatin ka siam pui a, ţhu hle hle turin min ti mahse nuam ka ti lo. Pahnih chiah kan ni bawk a buaipui tur a tam chuang lo. 

Kan siam zawh hnu chuan ka enkual dan dan a, a tui hmel hlawm khawp mai. Eng thil mah ka eichak ngai lo a, tukin a a thil siam chu eichhin ka chak vek. 

"Ei siam i thiam tih ka lo hre miah lo a. I lo thiam ru reng ţhin a ni maw?" tiin ka zawt a, ei a siam lai ka la hmu ngai lo.

"Thiam ngai lo. Kan in a lehlang a rawnkal ţhin hnen aţang khan ka zir a, ka thiam har. Ka ti beidawng fo mai" a ti a, a zir hun tur awm ang ka chhut thiam chuang miah lo. 

"A tui viau ang"

"Eichhin rawh" phur fe hian a ti a, ka ei hun a ngaichang ran. Ka eichhin chak ber ka suak a, lai deuh chungin ka ei. Tui ka tih leh tih loh ngaichangin min en ran a, zam a awl angreng. 

"Kei aiin rawngbawl i thiam daih zawk a nih hi. I siam tui lutuk" nui deuh chung a ka tih chuan thawveng huai a ang. 

"Tui itih chuan ei ţeuh rawh" zangkhai deuh hian a ti leh a, ka ei lawr dan dan. 

"A tui em?" a ti nawn leh. 

"Tui lutuk" ka lo ti veleh vat a, ka beisei a san loh nen a siam thiam zek mai. Rawng bawl hi ka thiam ve vak lo a, chhungkua a naupangber ka ni bawk nen min awl hneh ţhin hle. Zothana nen a inneih kan tum hnu khan ka nu in min zirtir ve chauh. Hmeichhia nih chuan thiam loh a nuam lo duh khawp mai. Naupanlai aţang hian zir ila, inchhung chet engkim hmeichhia kan nih angin thiam vek tum ila a ţha ber. Ka nu in min zirtir tlai lutuk a keipawh ka tlaw phah vek. Tui hre ve si siam thiam si loh chuan a rukin kan zak chem chem reng mai dawn a, tun a ka ei ang hi siam tum mah ila ka thiam ve teuh lo mai. 

"Tam deuh ei tum rawh. I tan a ţhat bakah naute tan a ni tel zel tawh a, ei luih a ngai" ti mahse tun ţum chu tui ka tih vang liau liau in ka ei. 

"Hna i kal dawn lo mi?"

"Aw. I la kal dawn si lo va ka ngaihtuah deuh che a, ka pa a awm tho a, inah ka awm ve rih ang" 

"Chutianga tih a ngai lo. School tan theih tawp i chhuah ţhin a, keimah vangin i hna thlengin kalsan suh. Min ngaihtuah vang ni tho mahse ka in enkawl thei a, thil ţha lo ka thlen tir lo vang. Naute vangin hetianga thui hi ka kal tawh a, theih tawp ka chhuah zel dawn ti a ka hrilh che khan ka ti tak tak" ka ti ta duah a, a awm ve hian a khawharthlak loh a, ka bula awm turin duh ru viau mah ila keimah vanga hna a ngaih thah ka duh lo.

"Ka chawl rei lo ang. Ni hnih khat vel chiah" a ti leh tlat tawh a, ka sawisel tawh bik lo. 

"Khawnge i nu leh pate?" tiin ka zawt ta daih a, ka nu leh pa ni ve tawh mah sela koh thut a harsa a, a hriatthiam tho ka ring. 

"Ka patea te inah an kal. Tlaiah an lo haw ang. I thawh hma hretin an chhuak. Engtikah nge doctor i hmuh leh ang?"

"Karleh lamah daih aniang. Hmuh tlut tlut a ngai chuang lo a, naute i ngaihtuah a a lawmawm. A len deuh hunah i ngaihtuah ţhin zia hi kan hrilh ang a, a lawm ve viau ang" fiamthu ti tak deuh hian ka ti a, min pui reng lo sela chuan ka chhiat pui viau maithei. 

"Fa te chu tupawn an ngaihsak" a ti hman chauh a, a ngawi ta daih. Zahzelah aw a thian kharh a, "I fa ania i chhiat palh chuan nangmah i inti hrehawm leh vak dawn a, ka enkawl pui che a ngai a, Zothana vang pawhin" a ti leh ta daih. 

"I sawi sual miah lo a nia. Tunah chuan naute pa ini tawh a, nang pawn naute in pa a mamawh thu min hrilh a, ka pasal ini tawh bawk a, naute pa ini mai lo mi?" 

"Ni mai e" a ti liam puat a, a zam hmel takzet. Ka mitmei a veng reng a, min hmangaih viau chung hian a ta anga min chhal a hlau a, a inthlahrung a ni mah. Naute pa nih a hreh lo a, keimah zawkin naute pa tur a ka pawm theih loh a hlau a ni mahna. Min tuam hlawm tu a nih bakah keimah vangin mawhphurhna lian tak a ko ah a in nghah phah a, a ni aia phu an awm chuang lo. Hmelah phei chuan naute pa nen danglamna an nei lo.

Kan thil eina vel ka tih fel pui leh a, thleng sil ka chuh tlat. Ka sil lai pawhin ka bulah eng eng emaw sawiin a lo ding ve reng. A hma aia a danglamna ka hmu ve zel a, ka hlauh ţhin laia a awm ang khan a awm tawh ngai lo. 

Tv enin kan ţhu dun a, kan thil en laiah rilru kan pe lo ve ve. Ka kut ka elh neuh neuh a, sawi tur nei nual mah ila bulţan na tur ka hre lo. 

"Vengchhung mi te hian kan chanchin an sawi nasat i ring em?" ti a zawh pahin ka melh zawk a, tv bawk ka en leh. 

"Sawi ang" 

"Min nuihzat viau ang tiraw?" tih leh pah hian ka nui hul hak a, Zothana nen a inneih kan tum hnuah Zodina ka nei leh daih a, Zothana thih hnu reilote ah lehnghal. Mi ti ti tui ber kan nih ka ring. Chutiang ngaihtuah chhuah chang chuan rilru a hah a, ka zak bawk. 

"Nuihzat lo vang. Ngaihven lo lui rawh" a ti na a a chang chuan ka tawt up up tho ţhin. Ka awmdan hi ka hrethiam lo. Ka mut lai reng te hian ka rilru a hah thut a,ka ţah a chhuak thut thut ţhin bawk. Hmalam ka pan hleithei lo a ni ber. Inthlahrung viau mah ila inthunun theih loh chang ka nei ţhin. Midang hmangaih leh ka hlau tawh a, Zothana a thih thut ang khan ka hnaih a awm te hian min kalsan thut hlauhna ka la nei reng. Ka pangngai hlei thei rih lo va, tlemin hma sawn mah ila ka sawichhuah loh tam tak min ti hah tu a ala awm nual tho. 

Tlaiah a nu leh pate an rawn haw a, kan inbe tam lo. A nu a fel viau laiin ka pa ang thoin a pa hian thil thleng mek hi a pawm vek thei bik lo a ang. Lehkhabu an dahna pindanah Zodina a ko hrang a, chung ringawt te chuan ngaihţhat lohna min neih tir zel. Keimah vanga inhau turah ka ngai a, a pa hlim hmel hmuh tur awm miah lo te kha keimah vang bawk a nih ka ring. Bet lo deuhin ka ţhu a, Zodina nu in min pe reng mahse a sawi ka hre fum fe lo. Zodina te pafa inzui luhna lam ringawt ka melh a, a ţha lam ngaihtuah tum mah ila ka thei lo. Keimahin a rukin ka lo hah ve em em. Florence hnen aţangin message mak tak ka dawng lehzel nen, lung lian puiin a delh beh tlat ang mai ka ni.

"Nunu biak iva hre thei lo ve. I ţha maw?" Zodina nu in a ring deuh hlek a a tih chuan ka phu zawk a, mak min tih hmel viau. Ka bulah rawn insawn in min en vang vang a, a ngaih a ţha zan lo niin ka hria. 

"Engthil nge i ngaihtuah vung vung a?" tiin min zawt a, a chang hi chuan ka â vek ni maiin ka hre ţhin. 

"Engvakmah ka ngaihtuah lo. Ka mutthlu aniang" ka ti sep a, chhuanlam awih awm deuh hlek ka ngaihtuah chhuak hman lo.

"Meng reng chung khan maw? I ţha maw?" a ti leh ngat. 

"Aw ţha e. Chaw kan ei tawh tho a, ka chau deuh aniang ka lo han mu ang" tih leh thawh ka rual a, ka ţawng a bah nuaih mai bawk nen, ho te te a ka hlauthawng chiam mai zel te hi mak ka ti. Rilru lam doctor ka pan ngam tawh der si lo. Zodina'n a hre leh tho ang a, ka rualin ka ti hrehawm ve mai mai. Keimah vangin a tuar hnem tawk tawh. 

Khumah ka mu meng kar a, Zodina ala reh vang vang. Tuman min rawn ngaihven zui lo va, mahse ka lawm zawk. Ka thaw a pik reng bik lo va, pangngai deuh a ka awm chang te hian ka pik leh thut ţhin. 

Ka lo chhing sek a, mang ţha lo in min umzui. Thlanin min bual huh vek a, Zothana ka hmu. A chesual lai ka hmu a, ka lo tel ve. Thisen tam tak ka hmu tel a, hlau thaw hlawp hlawpin ka harh a, mangan hmel zet a Zodina'n min lo dawm reng chuan ka hlau lehzual. A kut ka paihthlak sak a, ka tawlh dawrh bawk.

"I ţha em? I mumang a ţha vak nange?" a ti a, min hnaih leh tho. Inbeng daih tumin mit ka chhing a, a thim zawng hlir a ngaihtuah a ka hman vang nge ka mumang kha a tak tak ang maiin ka hria a, Zothana nen a kan accident lai te kha a tak tak a ang lutuk. Thil ka ei ţha a, nilengin Zodina nen kan awm dun bawk a, ka awmdan hi Zothana duh dan a ni lo em mawni tih mai tur a ni. 

"Ipa khan eng nge a sawi?" tiin ka zawt a, ka mumang min zawh chhuah ka hlau a ni.

"School chungchang. I mumangah eng nge i hmuh?"  ti a min zawh let ve lai chuan muangchangin ka ţhu chhuak a, Zodina chu ka kuah ta ringawt. Ka thil tih hi ka hria a, a dik lo tih pawh ka hria. Mahse ka kuah bet tlat tho. Ka hnungah dimte in a lo chul a, min zawt zui lo mahse "Nangmahin engmah khawl tawh suh. I sawi loh chuan puih dan che ka hre lo a, nangmaha tawrh i tum chuan i buai tial tial ang" a ti ta tho. 

"I ţhiannu doctor khan ka chungchang eng nge a sawi? Ka rilru a buai nge ka mood inthlak thut ţhin te hi eng nge awmzia?" ka ti a, ka mumang kha ka hrilh duh chuang lo. Ka sawi ngam lo a, ngaihtuah let leh ka duh lo. 

"Buai lo ve, naupai lai hian mood a inthlak thut thut an tia, chutiang chu a niang. Rilru lamah dik lohna i nei lo" ka rilru a kawi laklawh nge zep ţhen a nei tlatin ka hre leh tawh. 

"Ipa khan min hnaih lo turin a ti che em? Naute vang chauh a min pawm vek in ni em?" tiin ka ngaihtuahna atthlak tak tak chu phuah khawmin ka sawi chhuak a, min kuah nghet sauh sauh pahin "I chungchang a sawi lo. Sawi mahse ka kalsan lo ang che. Naute vang ringawt a ni lo. Kalsan lo tur che a ka intiam tawh kha, ila hre reng em?" a ti a, lu ka lo ti che ne ne a, ka hlauhna pawh a zia ta deuh. Mahse Zothana pawh kha min kalsan lo turin a intiam a min kalsan tho. He lai hmunah hi chuan tui deuhin ka mu ve reng thei tawh dawn emaw ka ti hman a, ka duh loh ber te zing a mi mumangah ka hmu leh tho. 

"Mu leh tawh rawh. I sawichhuah duh loh ro ro chuan ngaihtuah loh tum la" a ti a, min kuahna thlahin ka mut leh dawn lai chuan ka darah a dawm ta thung. 

"Hlau tawh suh. Ka lo veng ang che" tawi te a nui chung hian a ti a, ka mutna bulah a ţhu ve ta reng.

"Heng thil zawng zawng itih chhan hi eng nge? Beisei let nei miah lovin min pui char char a, naupang ang maia khawsak chang ka nei a, kei ngei pawh hian ka rilru a buai ni ten ka hre leh ţhin a, ka chawlh hahdam tir thei lo che. Chuti chung chuan phun nawi miah lovin min buaipui char char tho a" tiin ka phun sep sep a, min chhan dan tur hresa mah ila rilru nawm nan ka zawt leh ngat.

"Thil dang vang a ni lo. Ka hmangaih vang chauh che in" ţawng zawi viau mahse ka bengah a ri ring em em tho. A ţhut lohna lam a saisirin mit ka chhing vang vang a, ţhat a chhuah nasat poh leh ka inthlahrung nasa ting a, khawngaihna ka nei tel ţhin. Puan min khuh ţhat lai te chuan ka lo ngaihven duh lo lui a, che lo in ka mu ngat ngat. Ka mumang ang kha ka hmuh tawh loh nan rilru in ka ţawngţai a, ka bula Zodina awm ve chuan mak tak maiin thlamuanna min pe ve. 

"Mu ve tawh rawh. Ka ngaihtuahawm loh. Ka muhil leh thei mai ang" hawi let chuang lo hian ka ti a, chawl ve tawh em em rawh se. 

"I muhil thei ang maw?"

"Thei ang. Hmun dangah i kal dawn chuang lo a, bakah ka zia tawh lutuk" a awm nawm nan ka lo ti thuai thuai. Ka hmel erawh chu ka hmuh tir duh lo. 

"Umm..sofa ah hian ka mu leh mai ang. Min mamawh chuan min ko mai dawn nia, muttui aw" a ti a, khuma a awm lui tlat lo chu ka lawm ru angreng. Buaipui ngai bik lutuk nih ka duh lo. A kalsawn veleh a mutna tur sofa hmu theiin ka insiam rem a, "Muttui le" ti veleh mah ila a hre phak tawh lo. Florence hnen aţanga message ka dawn te kha ka ngaihtuah nawn leh mai mai. 

[Mi duhlai i laksak a, hrehawm deuhin i siam zui a, hmangaih tu che khan hmangaih a mamawh ve tho a sin] 

Thu tawi te chauh min thawn mahse min ti hnual rawih tho. Hringnun hi chu a ho takzet. Mitkhap kar lekin kan hlimna zawng zawng a bo vek a, hrehawmna hlirin min umzui a, beisei loh dan deuhin pasal ka nei a, khawvelah hian thil thleng thei lo pawh a awm lo. Ka pasal a nih reng chuan hmangaihna ka la pe let thei ve maithei asin. 

CONT...