EIGHTEEN-1

EIGHTEEN-1

(Hei hi khawngaihin chhiar hmasa lawk aw. Storyfb ah ka dah tawh dawn lo a, mahse an youtube channel ah chuan an chhiar tho ang. Ka reh vang vang a, ka inthiam lo. Ka pa a boral thut a, covid in min nang leh a, ka damlo chho leh bawk si. Ziah duh reng chungin ka ziak mai thei lo va, rilru ah a lut hleithei bawk si lo. Rei tak ka nghah tir cheu a, nangnin min lo hrethiam zel a, in chungah ka lawm takzet. Chapter-1 ka dah dawn chiah a, a boring in ti maithei. Chapter hmasaber hi ziah a har ber ţhin a😁 tawpsan mai lovin a dang in lo ngaichang hram hram dawn nia. Chawlh rei chuan ngai awh a har a, a la mam put lo maithei. Chapter a tam ang a,rilru ah a lut chho veleh zel ang a, hma kan sawn zel turah ngai ang. Inchungah hian ka lawm a ni mai..engkimah😇)

"Engah nge a in ngaih teh hrep ni. Kar khat a chawl a, buaina nei miah lo vin school a rawnkal zawm leh a, keini ni ila chhungte an ko phar leh dawr dawr ang a" bag a lehkhabu khung luh pahin ka ang bawrh bawrh. Malsawmkima an duhsak bik lutuk hi chu lawm lo an tam mai. 

"Principal fapa a nia, buaina a neih ring duh suh. Hrethiam mai mai teh" ka ţhiannu Puipuiin a hriat phak hlau zetin a lo ti ve vat. 

"Principal fapa te chu kan zavaia entawn turin a awm zawk tur alawm. Buaina tawk a khem nen nuan a lokal reng lovin" la tih hlak hlak pahin a ţhutna lam ka hawi a, kan lam hawiin dawhkanah a bawk. A mit ko inbel va chu tu tan pawh hmuh a har lo. 

A nau in a rawn koh tak vangin Puipuii chuan min chhuah san a, kan bang tawh miau a, midang pawh an chhuak pheuh pheuh. Lehkhabu ka khung zo a, compact phawrhin ka hmaiah ka tat zui mawlh mawlh. Makeup hman phallo mahse tlem a hmai hnawih pawt chu tuman an hre chuang lo. Keimah chiah a ruk a inhnawih ţhin ka ni lo bawk. 

Compact ka khung leh lai mekin ka tukhumah tu emaw hian min rawn nem a, ka phu nasa lutuk chu ka buk lawp rualin ka ţe ţhat nghe nghe. Thinrim zetin ka hawichhuak a, Malsawmkima bawk. A hmai zawn a boruak chu a kutin a vai thuak thuak a, ka en tih a hriat veleh a ner suk. 

"A va khu nasa ve. Eng nge i inhnawih kha?" ti a min zawh pahin a rawn kun hniam a, ka bag chhunga ka compact dah kha ka la hum reng. 

"Khu tur engmah a awm lo. Ka inhnawih lehzel i hriat a ngai lo ve. Dan bawhchhe reng tu zawk hian min hek te ilo tum ang e"

"A khu lo maw?" a ti hluai a, a khuh der vel te chu rum fe hian ka lo en reng. 

"I mit kha ka chhut nat belh hma in min hlat vat rawh" vin zet hian ka ti tuarh a, class chhuahsan tum mek te paw'n ding meuhin min en. A ruk a ka duh deuh a tel ve lehnghal. Mahse min ngaihven rei lovin a chhuak ta daih a, a vanneihthlak. Msa lahin min awm hnaih ropui si. Hepa hi chu a hnawksak ve a ni. Ka tho thut a, ka bag akin ka tlanchhuak ta dawr dawr. 

Min chhaih buai tur a min rawn um phak leh hlauin step ah ka tlan thla a, building chhawng chung ber a kan class a awm kher kher hi chu hmanhmawh chang chuan ka hne hluah hluah zel. A hnuai ber ka thlen dawn a ruaiah ka ke ka bilh lehnghal. Ka tluk hma in ka indawm ding hman hlauh a, ka ke bilhna lai erawh a na deuh vung vung. Chuti chung chuan ka kal lui zel tho a, ka nu puih ka ngai a, midangte ang a tawi khawmuang thei ka ni ve lo. Puipuii nen tal hian kan haw na tur inang se ţha tur. 

Kan school awmna hi a fal ve deuh a, kawngpui lun lai aţangin a peng a, kal lamah pawh pengah kan chhuk a, school thleng ke in kan kal zel mai. Lirthei nei an vannei deuh a, a hranpa a motor hman chawp chuan pawisa a hek duh lutuk. 

Nghet zet a ka bag hrui vuanin keimahin ka kal chhet chhet a, kal chak ka tum nen ka ke chu rin aiin a na zek. Puipuii te unau hi chu an veng a hlat deuh vangin taxi in an rawn hruai ţhin a, peng thleng an rualin haw ve zeuh zeuh mah ila a nau a tel ve ţhin sia, nitin a tel ve ziah kha nuam ka ti lo. Pawisa ka thawh ve bawk si lo. 

Mipa ho zing a chhungkaw awmthei deuh hlek, bike nei thei ho chuan min tlan pel pheuh pheuh a, phurh tur an neih loh paw'n tumah an tlawmngai vak ngai lo. An rual a haw ve dil ngam ho an phur zeuh zeuh tih loh chu. Engmah ni lo mah ila midang puihna dil hi ka hreh ve tlat. 

"Hey, na inei mi?" ka sirah bike a ti ding a, tunge a nih hre turin helmet a phelh kher a ngai lo. 

"Nei lo. Kal mai mai teh" ka lo ti hlar a, min rawn be buai tei vet lo sela chuan dam varin in ka thleng thei ang. 

"Lo lawn rawh ka haw tlang dawn" hnung lam thlek zeuh pah hian a ti ve tehmial a, lu ka thing nawk nawk. 

"I phurh berkher chu ka duh lo bur. Na ka neih belh phah lovang tih tunge sawi thei?" tham lo zet hian ka ti ve. Principal fapa pawh ni sela ka hlau lo nasa. 

"Chu na inei a ni maw?" a ti leh hram. Ka chhan hmain a banrek a a sana bun a bih a, rawn hawichhuak lehin "Pi Zamveli helai vela a kal hunlai a ni dawn chiah" a tih chuan ka sana ka en ve nghal zat. 

Pi Zamveli hi mi ang lo a ni a, helai velah hian kan hmu fo. Hmusitin chhaih nawmnah ngai lo mah ila mahni chauh a hmuh kan duh lo fur. Ka hmaa kal ve reng te lah hmuh tur an awm tawh lo. 

"I rawn lawn dawn nge dawn lo?"

"Dawn lo"

"A ţha lawm. Ka kal a nia, Zamveli'n a inpawm tir nawlh dawn che anih kha. Khaw thim hnuah bak haw a phal lo ang a" min sawi ţhaih lui tih hre mah ila ka hlau tho. Ka hmu tawh ţhin a, ţawng mawilo nilo sela a landan ringawt pawh a hlauhawm. Hreh chung chungin a kamis ka vuan de de a, ka hawikual nasa lutuk hmel chu a mak deuh nge a nuichhuak ta hawk. 

"Lawn rawh ka thlah ang che" sawm nawn ka ngai lo chiang kher mai. Ka tello in a haw daih ang tih ka hlau zek zek zawk. Bike chuan hi ka hlau deuh hlek ţhin a, a kawngah ka kuah hreh deuh bawk si. A bag ah ka nghet zetin ka vuan ta ringawt. 

Kan inbe leh tawh lo va, mak tak maiin min chhaih zui miah lo bawk. Amah vang a na ka ni tih a hria ang a a inthiam lo ve deuh a nih ka ring. Mihrinna lai tlem a la nei ve a ni mahna. 

Kan dawr kawtah ka chhuk a, ka nu in min hauh hlauin bai loh hram hram ka tum. Min thlah vang hian lawmthu ka sawi a phut kher lovang chu maw. Phut pawh nise lawmthu hrilh ka tum der lo. Ka ke na lo se chuan ke a haw pui tur ka ngah lutuk tlat. 

"Iva tlai ve. In dahfel la min pui zung zung rawh. Tihian kan haw ang a rawngbawl a ngai leh ang a, i unaute lah an la chhawr tlak mang si loh" a dan ngai bawkin ka nu chu min hmuh rualin a ang nghal bawrh bawrh. Chawl an tam phei chuan ka zak ţhin. 

Ka nu hian kan veng kawnah thingpui dawr lian vak lo a siam ve a, kan eikhawp chu kan hmu ve. Ka pa hian taxi a khalh ţhin a, vanduaithlak takin accident vangin a khalh zawm thei lo. Midang kan khalh tir a, ka pa angin an dim si lo. Kan taxi neih ve chhun chu tunah chuan a ţawng chhe viau tawh. Kan unauah ka upa ber a, nau pahnih ka nei. Hmeichhia vek kan ni bawk a,ho te te a inhauh chang kan ngah ve ţhin hle. 

Ka nu sawi ang tak takin in a kan haw chu tuman rawng an lo bawl lo. Chaw takngial pawh an lo chhum lo. Ka naute rawngbawl thiam rual an ni tawh a, an tih duh tlat loh vang hian kan inhau fo a, ka sawisel peih tawh lo zawk. Thinrim deuhin ka tih phah ziah a, ngawi reng a an ţawngkam chal tlai tak tak hre lova tih mai ka duh tawh zawk. 

Zanah lehkha ka zir a, ka nu leh pa enkawl let a nuamsa deuh a siam theih vat ka duh a, nuamsam vak lo chung paw'n ka zir lui hram hram ţhin. Pakhatna ka ni ziah reng bawk. Thawhrim loh chuan hlawhtlinna a awm thei lo tih ka hrechiang a, tun a ka tih hram hramna hian rah ţha ala chhuah ka ring tlat. School ah midang ang tho in vei nei lo leh thawveng zetin awm ve ţhin mah ila midangte aia vei tur ka ngah bik zia ka hre ru reng a, midangte aia nasa in in lamah ka zir ţhin. 

"Kha thingpui in rawh. Dar11 a ri tawh a, mu ve tawh la, zingah ka kaitho hma leh dawn si che a" min chhawr nasat vang a ka nu inthiam lo leh hrehawm ti hmel ka hmuh te hian tumruhna min pe ţhin. Kei aiin a hah zawk daih a, ka pa pawh a bang chuang lo. Thei chu nise nuam sa tak a kan awm ve theih nan a theih ang ang a thawk ngei ang. 

"Ka zo ţep. Min mutsan daih rawh. No hi chu ka lo sil mai ang, kei aiin i tho hma leh zawk dawn tho a" ka ti ve luam a, ang buan buanin min hau bawrh bawrh ţhin mah sela ka nu aia min hmangaih tu an awm chuang lo. Ka tan a ţha ber zel chiah a duh a, ka naupanlai aţangin school ţha ah hlir min luh tir reng a ni. 

"Ipa a nuam lo deuh a, ka la mu mai lo ang. No hi chu lo dah rawh mut dawnah ka rawn la dawn nia. Keimahni ang a awm lo tur hian ţha deuhin zir rawh" a chhuak mai dawn maw ka tih laiin stool a pawt hnai a, ka bulah a rawn ţhu ve. A mitmeng a dul ram a, en liam thuak mah ila a chauh zia a hmuh theih tho ang. 

"Kum18 kan nih lai hi a pawimawh a, nun insiam hunlai, nulat kan hriat ţan hunlai a nia. I nunkawng i zawh sual chuan nakin zel atan thil pawi a thlen thei a, fimkhur deuh a nun a ngaih hunlai tak a ni. I zirlai chiah ngaihtuah la, mipa leh ruihhlo intihbuai tir duh reng reng suh. Nakinah hna te ila nei ang a, i phu tawk leh i tan a ţha tur chu Pathianin ala pe em em ang che" dam dapin muang changin a ţawng a, ngaihthlak a nuam hle. 

"Buai miah lo ang. Ţha deuhin ka zir zel ang a, nuam sa deuhin ka siam ang cheu. Inhmun ka lei ang a, chhawng sang tawkin ka sa ang a, iduh leh midang i luah tir a, i phal loh leh keimahni'n kan luah vek ang a" ka tih chuan a nui hak hak a, tetakte ka nih lai aţanga tun thleng a ka ţhianţhaber la ni reng chu ka nu hi a ni. Min phatsanin ka chungah rilru chhia a pu ve ngai lo. 

"Dawr hi kan ti lian ve zel ang a, in unau hian in duh chen chen in zir dawn nia. Ka chawm theih chhung che chu nang phei chu chawl reng reng suh. In zirtirtute hnen aţanga fakna thu dawn te hi a nuam a, kan fate in fel chuan nu leh pate hian kan chhuang cheu a, kan intithei em em ţhin a ni tih i hrereng dawn nia. Mu tawh rawh. I thiam tur chin i thiam tawh tho ang. I thawhrim rual khan in duat tho rawh" a ti a, thingpui ka inzawh thleng a awm. Ka inzawh hnuah no ruak kengin a chhuak ta chauh. Engtik ni ah emaw chuan midang eitur pe tu ni lovin a ţhut hmunah a duh duh a la lam ve thei ngei ngei ang. 

"Kha hei hnawih rawh" ka dawhkanah damdawi a let bal a, lehkhabu a ka hliah rualin midangin min en leh en loh hriat tumin ka hawikual zak zak. 

"Damdawi ka mamawh chuan ka lei ve mai ang chu. Min leisak a ngai lo."

"Ka chhar anih kha" min chhang rang kher mai. Rang deuh a min chhan a an ţawng bawk chuan dawt an sawi tlangpui an tih ţhin kha. 

"La let vat rawh Malsawmkim" zawi te sehchilh rap rap tho si hian ka ti leh a, keini aiin awmthei mah sela a khawngaih ka ngai lo. Tu khawngaihna mah ka mamawh lo. A dinna lamah ka nawr phei a, a lo nawr let ve tlat.

"La rawh school ban apiangin ka phur peih lo che" ka hnial leh hma in a kal daih. Ka ning lutuk chu inbengdaih nan thawk ka la kawk a, engkim a duh dan ang chiah a kal tir vek a tum ţhin hi ka ning lehzual. Principal fapa hian principal emaw in tiin min thunun vek a tum ni maiin a hria. 

A ţhiante ho nen an ri zui ham ham a, a mizia leh nundan ah hian ngaihdan ka siam thiam tawh lo. Naupang kan nih lai aţangin school khatah kan lut dun char char a, veng khatah awmin kohhran khatah kan lawi bawk. Hrechiang viau emaw ka intih lai hian hriat loh tam tak ka nei tel ni ah ka ngai. 

"Msa nen khan eng nge in in hnawn char char? Ka en reng cheu nia aw. Zep ţhen nei tawh miah suh ang che Rebecca" tih pahin Puipuii lah chuan hnai set sawtah min bih a. Tumah hian hun thawl min pe ngai meuh lo. A hmuh tawh ber a hnu tiin thil thlen dan chip chiar ka sawi ta vek. 

"Hetiang hi an inhmangaih daih duh ania aw" a dar a min nawk zeuh chunga a tih chuan ka nui hul hak. 

"Kum18 mi lek nunah hmangaihna a awm theih i ring a maw?" tiin ka lo zawt a, a bu nghauh ngauh mai. 

Kum18 lek kan la ni a, hmangaihna awmzia hrethiam lo turah min la ngai maithei. In ngaihdan chu a dik ngeiin ka ring bawk. Ka hrethiam lo. Kei aia upa fe leh tawn hriat nei ngah tawh tak tak te, nupui pasal a insiam hial tawh te pawhin hriatthiam harsa an tih hmangaihna hi kei kum18 mi lek hian ka hrethiam thei lul lovang. Mahse mipa leh hmeichhe kar a inhip tawnna a awm theih zia leh duhna a pian chhuah theih zia erawh ka hrechiang khawp. Mahse Msa berkher chu ka duh awm ka hre miah lo. 

School khatah lutin kan ţhanglian rual a, kan kum zat inang reng mah sela mipa na na na chu kei aiin a sang fe zawk. A hmel a chhe hran lo a, sawifiah vak ngaihna ka hre lo. A ngo vak lo na a a lang fai sar reng thung. A sam kir deuh hlek chu a inhmeh phian a, ka duh phah chuang lo. A mize inthlak thut thut hi ka hrethiam lo miau a, a changin min ti lawm a, a chang leh min ti thinur a, beiseina ka nei sang vak peih tawh lo. Ka huat viau ţhin na a chhiat vekna duh khawp erawh chuan ka la haw tawk lo.

"Msa i ngaihtuah chiang" ti a Puipuiin min fiam chuan na vak lovin a lu ah ka beng a, ka ngaihtuah chang pawhin a ţha lam zawngin ka ngaihtuah khat khawp. 

"Hmangaihna hrethiam ah in ngai tawh reng reng suh. Nupui pasal a insiam hma chuan hmangaihna a awm theih ka ring lo hrim hrim. Aa...sawi ringawt pawh ka peih lo. Ţha deuhin lehkha zir ila kan tan a hlawk ber" ti a ka hrilh chuan lehkhazir lai bik te chu min hnial ţang ţang. Hma lam hun tur thlir thui vak loh leh chhungkaw dinhmun a ţhat hi chuan lehkhazir hi a peihawm dawn loh em a, ka dem hran lo. 

Chhun chawlh hun a ni leh tawh a, midang awm loh lai chuhin ka mawza ka hlim thla. Msa a awm ve a, lehkha chhiar peih zual leh pawn lam nuam ti lo tlem an awm bawk. Anni chu ka ngaipawimawh lo. Msa phei chu tukverhah a dak a, a khawvelah a cheng mek niin a lang. Be mah ila a hre kher lovang. 

Ka ke a hnawih tur min leisak kha ka hawng a, tlem ka hmet chhuak. A rim a na phian lehnghal. Kun hniamin ka tat kual a, thil dang ngaihsak miah lo emaw ka tih kha ka thil hnawih lai en turin a rawn ţhu hniam a, ka ţhu ţha nghal sawt sawt thung. 

"Nitin hian kan awmdan hi hrelo angin i awm der mai mai ziah tihna mi?" ka tih chuan naupang pawisawi ngai lo ang mai a min en chung hian lu a thing a, a chhipah ka nam kun leh vat. 

"I thawm ka hre lo a, he thil rim hi ka hria" tih pahin ka kenlai min phih thlak sak a, min hnawihsak lai chuan nuam ti chiah lo mah ila kan naupanlai ka hrechhuak ruai ruai. Min ţanpui tur a vawikhat nan a a rawn penchhuah ni kha. 

Kum8 mi lek kan la ni. Kan school bang hi kan chhungte tu emaw berin min rawn hruai ţhin a, ka nu in min hruai ziah laiin Msa erawh an awmpuinu in a rawn hruai ţhin. Ka nu nen an inkawmngeih phian lehnghal. Msa nen erawh inhrengai lo ang maiin kan awm a, ka nu leh an nula Hruaii inbiak lai te chuan an hnungah kan biru chawih chawih ţhin. Hruaii kutah khan a chelh tlat ţhin a, an inpawh hmel phian. Gate bula ice cream an zawrh chu kan lei tir ziah a, kan duhzawng a inang chiah chiah lehnghal. Nikhat chu dam sam mang lo chungin ka nu in school min kal luih tir a, ka mut a chhuak reng. Chawlh laiin dawhkan bawhin ka muhil ta nge nge. Ka mutthilh hlanin mipa harh zualin ka pheikhawk hrui an lo suihzawm a, ka harh hnu a ka zunchhuak zung tur a kal mai ka tum chu ka tlu ta a ni. Kan la naupang a, chiangkuangin thil hre tawh lo mah ila ka ţap tih erawh ka la hrechiang a, min ţanpui turin Msa a rawn penchhuak vat tih pawh ka hria. Hetih lai hian nilaini ah chuan hmeichhia pawhin pheikhawk hrui nei chi kan bun vek ţhin. Ka hmaah rawh ţhuin ka pheikhawk hrui buarchuar nuaih a an suih chu phelh tumin a bei ngat ngat a, rei fe a chai hnuah a phelh thei hram. Phur zet a rawn dakchhuakin "An suih vek a i tlu anih kha. Hei ka phelh tawh. U Hruaiin tihdan min hrilh a,ka siamsak ang che" intithei zet hian a ti a, khawvel tan a thil ropui tak ti ang mai a ni. Bell a ri zui a, a hmanhmawh bawk nen a ti fuh hleithei lo. Miss a rawn lut a, min rawn tihsak a. Ka mang hriat ruai tawh chauh a, min fiam tu te kha a hau ni ta in ka hria. Khami ni aţang khan a ţhian nih ka tum ţhin a, mahse ka hlawhchham ţhak. Tlem a kan upat deuh hnu phei hi chuan ka hrethiam lo lehzual. Rilru nghet lo ve takah ka ngai ţhin a, rintlak loh tak niin ka hre bawk. 

"Ka zo e" a tih rualin mawza ka pawt chho sawk sawk a, a damdawi hnawih na lai a sa ham ham. 

"Engtia itih nat nge?" ti a min zawh chuan "Chut lutuk" tiin ka lo phun sep. Ka sawi reng kha, amah vanga ulh ka ni tih hriain ţhat a chhuahah ka ngai a, ka tihnat dan min la zawh tho hi. 

"Step ah" a ding hluai a, nui hmel a pu lehnghal. 

"Aw ka hria. I hma chiahah Lalhriatrenga te an kal a, umphak i tumna lam a i tihnat a ti maw?" ala ti ta deuh deuh. 

"Lalthanmawi i zak miah nange? Mipa um na lamah i ke i ti na maw? Chuan i damdawi tur ka lei a" ka melh hrawk a, a ngawi hmak.  

"Ka chhar iti ni law mi?" ka tih chuan lai deuhin a nui a, a sam tuai nawk nawk chungin a ţhutna lamah a kal ta daih. Ka pa emaw a inti em maw ni. 

Nidang ang bawkin keimahin ka haw leh a, ţhian kawm tam loh lutuk hi a chang chuan a khawharthlak. Kawm nasat chuan buaina ka tawh ka hlau tho bawk si. Ka hnung leh hmaah ţhian ho in an kal dal dal a, Puipuii tal kein haw ve ţhin se a nuam deuh tur. Msa ka hmu tawh lo va, keimah tlawng ka ni mai. Hriatrenga ka hmaah a kal a, hmeichhe dang nen an kal ho sia ka be buai duh lo. Titi pui tur awm lo mah sela ka rual a kal ve an awm tal alawm. 

"Inah tih tur a tam leh dawn sia, rice lah kha a bang hnem si. Tlai a ka siam chauh ania, a la lum vek. Ipi te inah dah kawi rawh aw i patea faten an ei duh ang" ka nu min tirhna chu peih lo viau mah ila ka hnial buai duh lo. Hnial mah ila ka kal dawn tho tho. 

Ka pite in a kal dawn hian kawn aţanga pen a ngai a, an veng hi tlemin a fal deuh na a kawn aţang hian a hla lutuk lo. A fal lai kal rei a ngai lo tihna anih chu. Ka thil pek lah rin aiin an lo duh daih a, naupang na na na chuan hmun dang aţanga ka ken chu an inchhung a eitur awm sa ai chuan an lo ngaina daih zawk. Tui lo zawk mahse hawnsak an nihna hrim hrim kha an tan chuan a pawimawh bik riau.

Chaw eiah min sawm lui tlat a, chaw eikham hnuah pawh ka leng ve ta reng. Ka nu in min rawn biak meuh chuan dar9 a lo ri reng tawh a, keimah a ka haw tur min ngaihtuahin ka pi in min chelh a tum viau na a ka haw lui ta tho.

Muangchangin ka kal bek bek a, a chang chuan zan boruak hi nuam ka ti ţhin. A reh a, mi tam takin thilsual tih nan hmang mah sela ka hlauh phah lo. Zan kher lo a thil sual ti an tam lutuk tlat. Kan va hmuh pui dik diak lo a, hmuh pui mah ila a tam zawk chuan kan sawisel ngam lo va, kan man ngam lo. Thil sual kan ti ţheuh a, kan tih sual a inang lo mai zawk a ni. 

Kawn ka pan chhoh dawn laiin mi5 vel an lo ding khawm ţhap a, eng ala awm bawk a, an awmna la pawh chiah lo mah ila ka hmu thei ruai ruai. Mipa vek an niin ka hria. Zam ve deuh mah ila zan ala rei lo bawk a inti huai luiin an awmna lam chu ka pan zel tho a, ka haw na lam tur a ni miau a, hreh eng ang mah ila ka kal tho a ngai. Ka chhungte be turin phone lah ka keng der lo. 

Ding ţhap ho chu kal pahin ka en reng a, pakhat a rawn hawi zawk a, a hawi let leh vat. An vai a an rawn hawi chuan ka ding chawt. Ka thinphu a rang ve ta deuh a, ka pite in lam a tlan let leh daih mai te ka duh rum rum. Mahse an mahni zawk an tlanchhe ta huk a, a ngaihna ka hre lo kher mai. Hmeichhe pakhat vang a mipa rual tlanchhiat tak mai chu a mak zawk. Hlauh dang an nei em mawni tiin hnunglam ka hawi a, tumah an awm der si lo. 

Lung chungah mi pakhat a ţhu kun ngul a, chak deuhin ka kalpel ang ti rilru chungin ka kal hmawk hmawk a, thui ka kal hmain ka ding leh rih. Ka hnaih tawh viau thung. Ka thlek leh te te phawt a, Msa a ang riau. A ni hi buaina siam a peih ve a, tleirawl tha zat lai a ni bawk nen, a lo ni mial maithei tiin ka hnaih leh hret hret. Ka va'n tawi khawmuang rei tawh tak. 

Ka thlen hnu phei chuan Msa a ni tih ka chiang lutuk tawh. Kun eng ang mah sela hepa berkher hi chu hnai set sawtah chuan ka hai miah lovang. 

"Malsawmkim eng buaina nge ineih leh tak a" ram hmakin ti mah ila enchian tumin a hmaah ka ţhu ta nge nge. 

"I landanah chuan an sawisa che anih hmel. Buaina siam reng vanga i hlawh chhuah a nih kha" ka ti leh nang nang a, keimah ka ni tih a hrechiang ta aniang chu a hawichhuak ve hram. A hmel ka hmuh chuan chek tlak tlak chungin lu ka thing a, Pathian thu sawi a awm khawm an ni lo chiang khawp mai. Ruih nei a ang ka tih rualin ruih nei tur chuan ka ring phal bawk si lo. Kum18 chiah ala nia, ala naupang lutuk. Khawlaia rui mai mai rual a la ni lo. Nge ka ngaihdan mai mai zawk?

"I vung lek luk lo a iva vannei zawk ve. Eng buaina nge i thlen leh tak a?" 

"I bengchheng, ngawi reng khan haw mai mai rawh" ti ve bawk mahse ka chesawn eih lo. Engtin pawn awm se Msa anih chhung chu ka hlau lo. A chang chuan danglam thut chhan hi a nei ni ten ka hre leh ţhin a. Kan inpawh em em loh vang hian engmah a sawi ngai lo va, a sawi loh chuan ka hrethei mai bik bawk si lo. 

"Haw rual ang lokal rawh. Heta i awm reng chuan nachin a tlanchhe ho kha an rawn lang leh mai ang. Ka chhan zawk che anih kha, chuvang chuan ka rualin i haw thei" ka ti ve tlat. A chhiat vekna tur  ka duh ngai lo ka tih tawh kha. Kan bul velah a bike ka hmu lo a, pawi ka ti lo nasa. 

"Ka ţhiante ka nghak. Nangmah kha haw rawh, tun ang hunah hetiangah nangmahin kal tawh suh" hliam a tuar zawk chung hian min ngaihtuah ni awm takin a ţawng leh lawi sia. 

"Ila leng dawn tho a mi? I chhungten an ngaihtuah ang che. Hetianga i awm reng chuan an rilru iti hah lutuk ang a sin" ka tih chuan a nui hawk. A nundan hi hua in anpui buan buan ţhin mah ila ka ngaihtuah takzet. A nui hian a mit a thleng miah lo, a hmazawnah ka ţhu a, chiang zetin ka hmu thei. 

"I ke na eng nge a an?" tiin min zawt daih. Ka thusawi nen a inrem lo lutuk. Mi mawl ka ni lo a, a chhungte sawilan a duh lo ah ka ngai hmiah. Ngaihdan ka siam hma lutuk min ti maithei mahse kan naupanlai khan a school bang a nu in a rawn hruai ka hmu ngai tlat lo. 

"A ngai reng. Vawi leh khatah a dam thut thei lo a, a dam har lo ang. Heta ding ve ho kha tu te nge?" amah ang tho in thil dang ka zawt ve. A sawiduh loh miau chuan ka zawt lui duh bik lo. 

"Hriat loh a ţha zawk. An vai khan keimah chauhin ka hneh vek. Pa min ti em?" a nui hmel a hma aiin a lem ta lo deuh. 

"Hneh vek la an dinhual ţhup lovang che. Inlak pa vak a ngai lo. Ka hneh lo ti law law rawh" ka ti ve thung a, a nui tawp hmak. Thudik hi chuan min deng na deuh ţhin a ni. 

"Haw tawh rawh ka ţhiante an lo thleng ţep ang. Thlah beisei duh suh ka hman lo" tih pahin ka darah min nem a, ka invuan hman hram. Ni lo sela chuan ka tlu chiang viau ang. A thin bu tut a chhuah tawh hi chuan a ngaihtuahna a hmang tawh ngai lo reng reng. Ka la sawi kim lo tak e. A thin a chhia a, a kut a rang em em bawk. Hei vang hian miin a kut an tuar reng a, mi kut a tuar reng bawk. Kum18 mi lekah chuan nghal ve tak a ni. 

"Khawnge i bike?"

"Veng dangah. Hman mah ila ka bike veng dangah a awm. Haw vat rawh nachin a mi te kha an lo let leh ţep ang. An tlanchhiatsan tawh dawn lo che ania" a ti khur khur a, ka hlauh ringin min sawiţhaih leh tawh. Ka sawi ţhaih dan chiah chiahin a ti ve lehnghal. Ţawngthei viau si hi midang hmuh lai chuan a inla hrang leh tlat ang a, ka hrethiam teh nuaih lo ve. 

"Aw ka haw ang. Ka chhungten min ngaihtuah lutuk ang. Dam a kan inhmuh leh theih chuan a ţha a ni mai" ka ti fiamthu a, tlemin ka hlauhthawnna a zia deuh. A ţhiante chu an lokal ngei ang, ka chiang lutuk tlat. School a a awmţhat duh loh puite ngei mai kha. 

Ka din rualin a ding zui ve zat. A sam a tuai thuak a, ka darah vuanin kawn lam hawiin min kuai her. 

"Kawn thleng ka thlah ang che" a ti ta tho a, kan kal chhoh lai a "I rawn inlan a buaina i belhchhah" a tih leh te pawhin ka haw tawh lo. Keichuan ka chhanhim ah ka ngai ve tlat. 

Kawn kan thleng a, in lam pan a kal mai ta lo chuan "Hey Ms, hetianga i awmchhan hi inu leh pate vang a ni em? Anmahni runluih i duh vang a mi sual rawng i bawl tlat a, hmanah kha chuan hetiang hian i awm ngai miah si lo a. Ala rei loh nen, i danglam chak e. I nu leh pa te tih hrehawm iduh vang anih chuan ila inchhir viau ang" ka ti ţalh. Sawi rik a zawh loh ka tum ve ţang ţang a, mahse sawi lo a haw mai a harsa tho si. A luh thuk zel ka hlau a ni mahna. 

"Min hrechiang angin awm suh" a ti nghut a, a ţhiante nghak turin a kal nal nal. Ka sawi tawh kha, Msa ah hi chuan kan chunga ţhat a chhuah a nih pawn beiseina neih san vak chi a ni lo. Bawlhhlawh ah min ngai emaw tih mai turin hawilet miah lo in min kalsan leh daih thei tho. Heng vang te hian a nia ka huat leh ţhin ni. 

CONT....

Whatsapp group link

https://chat.whatsapp.com/I6qUxY6prAmKo85pBXlcPN

https://chat.whatsapp.com/LaAMPSvMmJm8Gv6P2tQvaJ

https://chat.whatsapp.com/K6HoP6HNsfU6mWeB8taHc5