EIGHTEEN-10

EIGHTEEN-10

REBECCA

"I va lo hmelţha tawh ve" ka ner nawk. Kil khatah Tommy leh hmeichhe pakhat nen an ţhu ve ran hlawm a, Fiona a tih kha a nih ngei ka ring. A hmelţha in a vun a ngo a, kei aiin a sam a sei daih zawk a, a thawmhnaw hak aţang pawhin keini aiin an chhungkaw khawsak a ţha daih zawk tih a hria. Pastor fanu kha a ni miau a. A nu hnap a, a mitmeng a fiah kalh a, a incheina leh landan lah a changkang. An dawhkan bula ka din chiah khan min lo nuih ver ver a, ka hmu lo der. 

Ka nu in phalna min pe bawk a, Msa bulah ka ţhu ve. Fiona erawh kan hma chiahah Tommy nen an ţhu thung. An eitur lam ang ang ka pe vek tawh a, tui a tih hmel khawp mai. Ka ţhut ve takah chuan Msa'n Fiona nen min inhmelhriat tir a, a mawiah kan inchibai ve. A kut lah chu hnathawk ngai lo ang maiin a nem a, ka kut a vuan nghet ţha ve duh lo lehnghal. 

"In siam tui tawp. Ka cham chhung chu ka lo chawl ziah ang. Ka pite ta tur ka hawn ve duh a, haw dawnah min pack sak rawh aw" a ti siam siam a, lu ka lo bu nghat. A awm bo hnu a kan inhmuh leh hmasak berna a ni chung a ka thik ber ţhin a lo hruai chu ka lungawi chiah lo. 

"Msa leh Fiona te awm chhung hian chaw eikhawm ila" Tommy lah hi a. A duh duh hi a sawi ve tawp tawp zel a, kan boruak a hre thawi tho si. 

"Nia a ţha ngawt ang. Kan awm rei thei dawn si lo a, in hriat chian na zel a ni mai lawm" Fiona chuan a lo tuihnih vat. A inthlahrung lo angreng phian. 

"Midang kan sawm kual ang a, an hman vek dawn sa. In haw leh hma ngei ngei a ngai" Tommy bawk chuan ro a la rel zat zat. 

"Keichu hun ka nei ve lo. Kan dawr a thil ei tur a in lokal khawm anih loh chuan ka nu puih ka ngai a" ka ti a, a nihna diktak ka sawi. 

"In dawrah hian eikhawm ila, tlai lam a in khar hnu awm velah kan ti ve ţan ang a" Msa ve thung. Kan dawr a tih aiin ţhiante in a kal ka duh daih zawk thung. 

"I mawl a mi? Ka nu in a phal dawn lo hrim hrim. Chaw eikhawm nan lo hmang ta ila a chhung a awm ho hi a buai nuaih dawn" ka ti khar khar a, min en ţhap. 

"Rawtna dang i nei a mi?" kan ngawih ţhap hnuah Tommy bawk chuan ka ngaihdan min zawt leh ta nge nge. 

"Nei lo, chhunah kan dawrah kan inhmu khawm reng thei tho a, tihian chawl pangngai angin in rawn kal ang a, chaw eikhawm kher a ngai a mi?" ka ti a, inchei ve deuh te a ngai ang a, khatiang kha ka peih lo. Fiona aiin ka nalh lo ang tih ka hlau a ni ber. A thiamthei ve tho a, keimah angin zir nasa ve lo mah sela a ti ţha pawl a ni ziah tih ka hria, mahse kan school aia an thiam ka ring chuang lo. Msa bul a awm tam thei zawk anih vangin ka thik em em ringawt. Ţhian an nia, keipawh a ţhian ka lo ni tawh ţhin. Min ngaihsak ţhin ang leh min puih ţhin ang chiah a ti ve ţhin turah khan ka ngai a, ka thik lehzual. 

"I lo tel ve lo ang a ni mai" Tommy chuan a ti uang a, min fiamna mah ni se ka haw tho. A ruk a thinrim ţun sa nak laiin ka thinrim lehzual a, ka nui ve duh der lo. 

"Rebecca a hman loh chuan ti lo mai ang u. Aizawl kan lokal leh hunah a ni mai lawm" tiin Fiona chu ka lam ţang angin a awm a, a rilru tak tak erawh ka hriat pui lo. 

"Kan ti ang, kan eikhawm ang a a hman lo chu kal loh a ni mai" Msa chuan a ti deuh hmuk a, ka lawm lo kher mai. Ka kal theih dawn loh chuan ţhulh mai duh ber a nih ka lo ring a. Kan boruak chu a rit luk tawhin ka hria. 

"Nia ka tello in in eikhawm mai dawn nia, chawlh kan nei rei si lo a, ka nu puihna hun ka nei tlem emai chawlh chhung reilote hi chu ka nu puih nan a hman ka duh" ka ti a, ka thinrimna tih lan loh hram hram ka tum. Ka ngaih ve tehreng nen kan pahnih chiah a inhmuh chu sawi loh midanh telh ve phet a tum tlat a. Lo haw lo tawp se la ţha zawk tur. 

"I pui dawn nia,i hman loh chuan kan phut lui dawn lo che a, kan inhmu reng thei tho a" Msa bawk chuan a ti leh a, chaw eikhawm bawk an sawi leh a, a hun tur te relin Fiona pawh a phur khawp mai. 

Msa leh Tommy te meizial lei turin an chhuak a, Fiona nen chiah kan lo nghak a, sawi tur a vang duh ngei mai. 

"Restaurant hi in siamna a rei tawh em?" hawi kual pahin zawhna min zawt a, dawr chhung vel a en kual dan dan. 

"Rei ve tawh" 

"I chanchin ka hre nual tawh a, ka hmu chak lutuk che a, mahse i awm ka ti nuam lo zawk a ang" inthlahrung dak hian a ti a, a nui sen sen bawk. 

"Chutiang a awm lo. Tommy leh Msa kha i zawt thei ang. Keichu hetiang reng hian ka awm, ka boring lutuk" ka ti a, a mawi a tan ka nui lui ve. 

"Keimah vang anih loh chuan a ţhat chu. Phone aţanga ka aw i hriat leh chuan engahmah ngai tawh suh aw. Msa hian nangmah chiah a ngaihtuah che a, keipawn ţhian ang chiahin ka en" a ti na a ka awih lo khawp. Ţhian ang chiahin awm se a bul a a awm reng peih ka ring miah lo. Mahse lu ka bu ve zel tho a, Msa nen kan inbiak ngun vang chauh a inrawlh lo niin ka hria. Msa zia a hrechiang ve tho ang a, a duhna ti lang se chuan Msa hian a hlat daih ang a, mahse Fiona hi a fing a, a duhna tilang duh lovin ţhian angin a kawm tlat a, zawi zawi a hneh tum a ang tlat alawm. 

"Customer in ngah thei ngawt ang. In siam tui sia, an zawng chhang zel awm bawk sia" a ti leh a, kan thil siam tui a tih thu a sawi reng ringawt. 

"Ngah reng bik lo mahse an awm ve zel. Mi tam ni deuh leh tam vak loh ni a awm ve a"

"Nih chu..chaw eikhawm chu lo tel ve la, inu ka lo dil pui ang che" a la ti ta deuh deuh. Amah vang a rilru nuam lo deuh a ka awm ngun tawh zia hi a hre lo em maw ni. 

"A phal lo ang bakah chaw eikhawm tih vel hi ka peih loh ve zawng tak a nia. Ka tel ve ngai lo hrim hrim hetiang velah hian" ka tih laiin Msa te an lo lut a, ka thaw huai. Fiona nen chauh kha chuan boruak a ţang ut a, min biak nel tum viau mahse ka nel hleithei lo. Mi tam takin min bumin min phatsan tawh a, tumah inbum tir leh ka duh tawh lo. Hei vang hi nia Msa pawh ka rinhlelh reng. Tumah ka ring zo tak tak tawh lo a ni maithei. 

Ka nu in min haw san hnuah dawr chhung ka tifai a, Msa a la awm ve. Tommy-an Fiona a thlah zawh hnuah a rawn lam leh ang. 

"Fiona kha fel iti em?" tiin ka chhuat nawh laiin min lo zawt a, a ni chu hahdam zetin a lo ţhu. 

"Ka hre lo. Kan vawikhat inhmuhna chauh a nia, a mizia zawng zawng ka la hre lo a" ka ti a, hawichhuak duh lovin ka nawt zui mawlh mawlh. 

"Hriatchian i tum lo zawk a ni maw?" ti a min zawh leh lai chuan hawi chhuakin "Lo ţawng chhen lo teh ka la buai em hi" ka lo ti vin hlar a, mak min tih hmel takzet.

"Min hau reng suh ngaih man i awm lo emai" fiamthu ti tak deuh a a tih leh hnu chuan hmui hnuai lam ka ti pawrh zeuh a, chhang lem lo vin ka thil tih lai ka chhunzawm leh. 

Tih tur awm zawng zawng ka tih zawh vek tawh hnuah pawh Tommy a lo la let lo. Msa hmaah ka ţhu ve a, dawhkan chung a ka kut ka dahchhuah rualin a lo vuan a, lak let ka tum apiangin a hmer na zual sauh zel. 

"I ning em?" a tih chuan "Eng maw?" ka ti hmuk a, ka la chhang ţha duh lo. 

"Kan awmdan hi. Khaw hranah kan awm a, phone chauhin kan inbe thei a, i rinhlelh turin ka awm reng a, Fiona aw i hriat reng a ngai a, zantin deuh thaw kan inhau a, i ning tawh em?" a ti a, ka mitah tak min melh run a, chhan ngaihna vak ka hre lo chuan lu ka thing. 

"Ka ning tawh" a ti leh tawp a, a thusawi chu tawi viau mahse min ţhawng khawp mai. Min kalsan ka hlauhna leh a thusawi in min ţhawn dan te chu ti lang duh lovin ka nui lui a, "Fiona vang a mi?" tiin ka zawt ve a, mi pahnih inkarah hian a tello tur an lo tel ve chuan a hnawk nuaih zel. 

"Ni lo e. Ţhian chiah kan ni. Ka hrilh ngun tawh che kha. Fiona hi kan unau a kan ţhian a ni. A lo len chang hian ka naute a kawm ber a, hei pawh ka sawi ngun tawh. Zantin thupha ka chawi a, tih lawm che ka tum a, ti chung chuan thinrimna hlir i zawng a, i lungawi loh hlau in ka awm reng a, hmeichhia hi chu dawh in ngai tih ka hria a, ka dawhthei ve chuan ka hria. Mahse hetiang reng a kan awm dawn ai chuan ţhian ni leh zawk mai ang. Ţhian kan nih lai kha nuam ka ti zawk" a ti a, a thusawi lai sawi nuam a tih loh zia a hmelah a lang chhuak ve tho. 

"Nang ni la engtin nge i tih ang? Hmun khatah kan awm lo va, khaw hran daihah kan awm a, Fiona i zui ngawrh ang hian mipa zui ngawrh ve ila, kan inbiak laiin lo ţawng ve sek se la i haider reng thei bik dawn a mi?" ka ti let ve a, thiam lo intih na ka nei lo. A naute thawm ka hriat rualin Fiona aw ka hre tel ve zel a, min be chung a ţhian kawm reng tho ah ka ngai a, bakah keimah ang rual chiah ve tho a ni a, mipa leh hmeichhia chu eng emaw a awm palh ka hlau ve a ni mai. 

"I ţhian anih chuan ka hrethiam ang. Ka ţhian a nih bakah ka nu leh ka naute nen an inkawmngeih a, rawn len a tum loh pawn ka nu in a ko tho a, a chang leh ka nauten an va hruai a, kan inbiakna bulah ka naute nen an infiam ţhin a, an thawm i hria anih kha. I thinrim apiangin ka sawi ziah kha. Min rin lehzual theih nan vawiinah ka rawn hruai a, Fiona bakah kei leh Tommy thlengin min be ţha duh lo a, biak hlekin i vin zel bawk si. Ka dik vek bik lo mahse i ti deuh mah mah" a ti a, ka awmdan min hriatthiam pui miah lo chu hrehawm ka ti. Khawhran daih a bialpa neih chuan kan hlau hma vek. Kan class ah awm ve ve se, nitin hmu thei ila chu hetiang hi ka ni bik lo ang. 

"Min hriatthiam duh loh leh i thu thu. Mahse i awm ang hian awm ve ila i en liam mai mai dawn bik lo. I awm bo vang vang hnuah i rawn hruai leh a, ka lawm dawn lo tih te chu i hre sa vek lo mi?" tiin ka lo zawt ve thung. Mihring hian kan ţhatna lai chauh kan lan tir thei bik lo a, ngaihdan a nih loh lutuk ţum hi a awm ve ţhin. Vawihnih khat chauh chu hria ila ka haider thei mai ang mahse ka hre ngun lutuk tawh. Thil engkimah hian a awm tawk a awm. A la ţan em em zui lehnghal a. 

"Min hrilhfiah la chuan ka hrethiam ang ka hrilhfiah ţhin ang chiah che hian" a la ti ţalh a, mahni inthiam chawp a la tum char char mahse keichuan a lutuk mah mah ka la ti tho. Ka ngaih ve em em laiin kan dawr thlengin a rawn hruai lut a, midang pawh ni se hetiang teh hrep hi chuan an lawm bik miah lo vang. 

"Keichuan ka hrethiam ve thei lo. Nangmah alawm ka biak duh che. Khanu aw kha ka hre tel ve sek peih lo"

"A be hleinem che keiman alawm bia che" 

"Min be lo a ka hre ve reng mahse thawm a lo nei ve sek kha ka kham. A chang chuan min intihtheih khum ni mai te hian ka hria" ka tih chuan a nui chhuak ta hawk a, ka lo melh ram ram thung. 

"Khati zawng khan ngaihtuah tawh suh. A hriat lai a ka lo biak reng ngam che chuan i ngaih ti ţha zawk rawh" a ti a, tlemin ka rilru a nuam deuh. Inţhen lam a sawi ri tawh lo tlat a. 

"Ka hre peih tawh lo a ni tawp. I let leh hunah pawh a awm lohna lai hlir aţangin min lo be tawh rawh. Inţhen kha sawi tawh lo bawk la" ka ti a, ka nui pawh a hma ang ngawt a lem chu a ni tawh bik lo. 

"Nin thut chang ka nei a, chuvang zawk chu. Ka thunun thei vek bik lo a, ka thunun theih piah lam anih chuan hriatthiamna nei ve deuh tawh rawh" a ti a, ka pawm ve tehmial. Tukverh te kan khar phui a, kan ti ti pah reng. Mi hmuh hlau tak chungin a vawikhat nan min fawh ve zan kha. Rilru a hlim zui veng veng thei. 

Tommy nen an haw dun a, keichu keimah bawkin ka haw. Kan inbul vel a khaw en laia a lokal ka phal lo. Miin min hmuh dun chuan an sawi duh leh dawn lutuk tlat. 

Kan dan ngaiin zanah kan inbe leh a, Fiona nui ri ka hre ta lo. An let leh hunah ka hre leh tho ang. Ka nu pawh hian kan awmdan aţang hian hriatthiam chin a neih ka ring a, ka lunghnur hlau in a haider a nih ka ring. Ka pa thihna a la rei lo a, khawhar hnem tu tur kan mamawh a, ka nu pawh a hma aiin hna a thawk nasa. Kan khawhar hunlai a nih bawk vang hian a hre lo der mai mai a nih ka ring. 

Chaw eikhawm na a tel turin min sawm leh a, ka lo hnar leh. Fiona kha a sualna hre lo mah ila inhmuh leh ka duh tawh lo. A tel ve chuan buaina kan nei ziah. Msa nen hian mi pahnih len na tawk chiahah kan awm a, midang chu inhnawh ve ţalh lo se la ka duh. 

Nitin dawrah a lokal a, a theih ang angin min pui ve ţhin. Fiona a rawn hruai tawh ngai lo a, kan awmdun reng a buaina leh inhauh vel a awm tawh lo. Hlim takin kan inkawm thei a, engkim inlungrual takin kan ti dun thei vek. Ngai kan awh leh tawh a, ka thinrim ţhin chhan leh kan boruak ţhat loh ziah chhan kha a hriat tawh ka beisei. 

An let leh a hun ţep tawh. Chawlh chhung a rei lo a, kar khat pawh an la cham tling lo tihah an let a hun leh dawn der tawh. Fiona nen an awmdun tam leh dawn tihna. 

Zanah a lokal a, ka nu hrilh lem lo vin ka chhuak a, naktuk mai hi an let hun a ni leh reng tawh. An cham rei lo va, ka buai lai a lo ni ve kher kher bawk nen hun hman dun na hun kan nei tlem hle. 

"Bsa ten in an sa zo ţep tawh tho a, an inhnuai luah la, hetah awm leh daih mai la" ka ti a, inţhen hran leh ka huphurh tawh. Ka hnaih a a awm hian a nuamin thla a muang bik hliah hliah. 

"A theih rih loh. Thuawih tur a min hrilh ţhin tu zawk hian bi bo turin min hrilh ta reng mai a" a ti a, ka sawi ang a awm chu a tum lo nasa. 

"I awmna apiang nuam iti zel a, ka sawi tawh kha. Kan inbiak lai hian i aw chiah ka hre duh. I naute emaw khanu thawm kha ka hre peih tawh lo" ka ti a, ka thusawi hi zawm a tum dawn tih ka hria. Min duh ve em a, inţhen sawi mah se la tunah chuan min ţhen tak tak ka ring tawh lo. Min vauna mai mai a nih ka ring hmiah tawh. 

"Ka ngai ber tho che ka tih kha. Naupang harh bengchheng rual an nia, an thawm hriat loh a har ang. Bengchheng lo tur a tih reng chu an khawngaihthlak ve a" 

"Naupang hrehawm tih leh tih loh te i ngaihven ve ta a ni maw?" nuihzat deuh tak hian ka ti a, danglamna tlem te ka hmu. 

"Ka nau te an nia, Aizawl a ka nau pawh ka duat theih em kha" 

"I dawheh. I awm peih lo in kan inah i rawn dah vel kha aw" ka tih chuan min hnial ngaihna a hre bik lo. 

"Naupang te hi lawm ve rawh" min ti ta ringawt a. 

"Ka vui chang a kei aia midang i ţan leh zawk chuan keimah zawk hian engkim ka ti tawp vek dawn a nia" ka ti khar khar a, khanu kha a ţan ziah a, ka ngaithla hne tlat zel. 

"Awle mahse Fiona bak ţhian ka nei lo a, chu chu i hre lawk sa dawn nia" a ti a, ka tih reng kha. A tan hian a pawimawh tawh lutuk tlat. Inhlat deuh a awm bawk si chuan rilru a nuam lo duh takzet. 

"Naupang i ngaina tawh tho a, i nau te i kawm ve tawh mai ang chu. Fiona nen inhnaih deuh a in awm duh ro ro chuan helamah awm daih ila" ka ti ţha leh a, kan inhmuh leh hma zawng rilru nuam lo deuhin ka awm leh reng dawn a, ka hah leh dawn lutuk. 

"Fiona nen a kan inkarah engmah a thleng lo ang. Hahdam deuhin lo awm phawt rawh. Ka lo biak reng chhung che chu i ngaih lo ti ţha reng la a tawk a ni mai" a ti a, rinawm a tum nasa a, mahse a rinawm reng thei a ngem ka hre lo. Keimahni ang rual lekah phei chuan awm dun tam loh chuan kan in ngai lo hma a, inbiak peih loh vat a awl. Hmun khat a awm ve ve a lo ţha ber mai. 

"Ka ring tho che a mahse hmun hran a awm hi ka ning. School kan kal dun theih lai kha nuam ka ti ber" ka ti a, ka naupangchhia tih ka hria mahse a awm lo leh mai tur hi ka huphurh takzet. Msa nen a kan ţhut dun na ţhinah keimah chiahin ka ţhu tawh a, Puipuii leh Hriata te an inzui chawt a, keichu khawhar deuhin ka awm ţhin. Ka ti ti pui ber ţhin leh hlauh ka neih chang pawh a ka bul a awm reng ţhin kha a ni miau a, ka tan chuan a hlu in a ngaihawm lehzual. 

"Keipawh nuam ka ti mahse thu kan awih rih a ngai a, hei aia hla ah pawh ka la kalsan theih che, min rin loh chuan nangmah leh nangmah i inhrem mai mai" a thusawi chu dik ka ti, ka tawp up up a ka hah bawk. Mahse ka inthunun thei chuang lo. Keimahah hian thikna leh ngaihţhat lohna a a lo awm ringawt zel a, chu chuan ka thin a ti rim ţun ţhin. 

"Zantin min lo bia la, vawikhat lek pawh i rinawm loh chuan ka ngaidam dawn miah lo che a nia, inţhen hlen vang vang a ni mai" ka ti khar khar a, ka tih tak tak zia a hre ngei bawk ang. 

"Awle rinawm char char ang. Ka duh zia che i hriat kha" a tih chuan ka nui ver ver. Min duhzia chu ka hrechiang khawp. Inţhen mah ila hrehawm ti tur zawk a ni. Fiona a rawn hruai ni a inţhen a sawi bak kha a la sawi nawn leh lo a, sawi nawn a duh pawh ka ring lo. A chhan hriat hleih theih si loh hian a nunah ka pawimawh ve tlat a, hei vang hian hmeichhe dang aia min dah hmasak ka ring ve tawp zel. 

Min duh em vang hian thinrim khum te a nuam bik a, min thlem char char te hian ka intithei ţhin hle. Amah hi thunun vek thei ah ka in ngai ţhin a, tunah hi chuan ka thunun vek niin ka inhre bawk. 

An haw tur ka thlah chuan Fiona ka hmu leh a, Fiona unaupa rual bawkin an haw leh dawn a ni awm e. Min lo be luam a, a rul tawk lek lekin ka chhang. A awmdan ţhin ka duh loh zia hre ve hrim hrim se ka duh. 

Msa nen a hnung lamah an ţhudun a, ka bialpa chuan a kal dawn thlengin ka kut a vuan a, Fiona a awm ve bawk vangin nuam ka ti lehzual. Mahse kan awmdan chu ngaimawh angin a awm duh miah lo. A hmu lo der char char a ang zawk. 

A kal hmasak ber ang bawk khan an liam thlengin ka thlir a, rei deuh chhung kan inhmu lo leh vang vang ang a, kar khat chhung lek pawn thil tam tak a thleng thei a, thla eng emaw zat chhung phei chuan eng eng nge thleng ang ka ngaihtuah thiam lo. Ka hnaih a a awm lai a ka rin na zawng zawng kha ka hmuh phak loh a a awm chiah hian a bo nghal vek zel. Ka inhrem leh ngat ngat mai dawn a nih hi. 

CONT..