EIGHTEEN-2

EIGHTEEN-2

"Iva tlai ve hrilh tur che ka nei a, ka hrilh chak tawh tehreng che nen" tih pah a ka ban puam a min ben na lai chu ka tuai nawk nawk a, a cher ang aiin a kutthlak a na zek lehnghal. 

"Eng nge min hrilh tur chu? A pawimawh leh vak awm si lo va" ka tih chuan min hnaih lehzualin a rawn ţhu a, a phur sarh lehnghal. 

"Hriatrenga sawn a duh ve che" a ţhutna lam a kawk zawk a, ka hawi phei ve vat. Min rawn ngaihsak lem lo va, Puipuii thil min hrilh chu ka awih lo hle bawk. 

"Dawt ringawt min hrilh turin min lo nghakhlel ve em em a, ka ngai che ti law law rawh" ka ti fiamthu a, a ngaihdan a nih loh hmel nasa. 

"Min hrilh alawm mawle. Min lo biak rawh a tia, ka yes ve tawp dawn ania. Zei lo mahla a pawi lo. I star tho a, ka duh angin ka ti ve pawp dawn a nia" a ti zat zat a, thutak a sawi ka ring lo va, ka ngaihven ve hluai peih lo. Lalhriatrenga nen hian kan inbe ngai vak lo va, a felin biak a nuam tih hre mah ila ka star ruk miau vang a hel chang ka ngah. Pawh ka tum lahin midangin min khalh zel a, tun thlengin ka la pawh hleithei lo. La belchiang lo viau mah ila mi fel, rilru ţha leh zaidam anih zia mite hnen aţangin ka hre ţhin a, exam naah lah keimah ang tho in a ti ţha zingah a tel ziah. 

Bell rik hnuah Msa leh a ţhiante an rawn lut a, hliam nei miah lova a ţhiante ka hmuh chuan a rukin ka thaw huai a, buaina an siam zui lo tihna a ni mai. Msa erawh buaina a tawk tih a hriat hle. Kan hmuh ţhan a nia ngaiah nei tawh hlawm mah ila keichu ka thil ngaihtuah dan kha a dikna chen a awm ka ring ta tlat. Chhan nei lo chuan hetianga a awm hi ka ring lo. Naupang fel leh zakzum tak kha a ni ve ţhin a, a nun tluang purh sela chuan inthlakthleng lova a la pangngai reng ka ring.  

"Haw rual ila" Lalhriatrenga ve thung. Puipuii thusawi kha ka lo hre leh tawh lo va, ka hmuh takah hian ka hrechhuak leh ta chauh. Rang lutukin Puipuii a tlanchhuak a, eng nge ka hriat ni Msa ţhutna lam ka en kher. Min en ve reng chungin muangchangin a tho a, a hmel landanah eng thil mah ka chhiar thei lo. 

"Rebecca eng nge i en vung vung?" Hriata'n a tih leh takah chuan inthing harhin ka insiamfel sawk sawk. Msa a chhuak tawh bawk a zam ru tak chungin Hriata rual chuan ka kal ve a, Puipuii lahin Hriata nen a an thusawi dun min hrilh leh tawh si lo va, sawi tur ka hre lo kher mai. 

"Lehkha i zir nasa leh tawh em? Nang hi chu kumtir aţang hian i zir vak zel a" min tih chuan lai deuhin ka lo nui a, kan pahnih chiah a kal dun vel chu nuam ka ti lo. 

"Zir nasa bik lo e. Nang zawk? Tih ţhat loh lai inei ngai bik lo a, keimah ang chiahin i zir nasa ve tho ang" ban charh hian ka ti a, muangchangin kan kal delh delh. Kan hma chiah a kal ve te nen pawh kan inhlat viau tawh. 

"Ka zir ţha thei tawh lo" zawi sup a a tih chuan kal pah reng chung a amah en ha tho si hian "Ti maw?" ka lo ti mawl ve tawp. 

"Ka ngaihtuah zel che a" ka nui hak. Chhanna ka dawn chuan min ti zak a, boruak te chu a hma aiin a lum. A mitah erawh ka enzui ngam ta lo. 

Kan ngawih reng laiin bike chak tawkin min rawn tlan pel a, a tlan liam mai dawn maw kan tih laiin a kual pawp a, kan lam pan a a rawn tlan let leh lai chuan kan ding chawt. Kan hma chiah a a rawn din chuan ka ţe ţhawt. A tlan chak a, kan dinna hrulah kher a rawn tlan bawk a, lirthei hlau chi ka ni bawk nen ka insum hman lo a ni. 

"Malsawmkim i mawl a mi?" ka ti tuarh. Insiamţha in min chil lui dawn lo tih ka chiang ta bawk a, reilote chhungin ka hlauhna zawng zawng kha lak bo in a awm leh vek tawh. 

"Tihpalh. Theihnghilh ka nei a" a ti liam puat a, kan hnunglam a kawk pah bawk.

"Kawng pangngaiah tlan ve mai ta che"

"Kawng vek a nih hi. Au vak vak suh Hriat hnup hnup-a kha a beng a ngawng ang e" ngeiawm zet hian a ti leh a, a helmet phelh kher lo mahse a mit aţangin a nui tih ka hria. Zah ka sawi thei tawh lo. Hriata banah vuanin ka kalsawn pui ta daih. Kan pelh fel veleh ka thlah leh vat thung. 

Hriata hi hmeichhe tan a kawm nuam leh zaidam anih vang hian hmeichhia hian an bawr nasa a, hmeichhe bul a awm reng ta chu Hriat hnup hnup-a an ti mai ţhin. Mahse mi tlem te chauhin. A tuai lo va, mipa pangngai ve tho a ni. Hmeichhia a dawmthiam vang leh zirlai ah te a puih nasat vang a hming lem mawi lem lo tak a pu ta mai chu pawi ka tih pui hle. 

"Msa nen khan in inhre ţha mi?" a ti ta chiah reng a. School ah kan inbe tam lo va, Puipuii lo chuan Msa nen school kan lut dun char char tih an hre kher lo ang. 

"Veng khatah kan awm a, kan inbe tam lo. Kan inhmelhriat satliah a ni mai. Kan inbe tam em em lo a" ka ti mawlh mawlh a, a ruk chuan ka inthiam lo angreng hle. 

"Ka cousin a nia"

"Maw?" ka ti hu a, ka aw lah a ring ţha leng lawng. Ka awmdan chuan a nuih a ti za em em mai lehnghal. 

"Msa pa te unau hi pahnih chiah an nia. Msa pa leh ka nu chiah. Kan inkawm tam lo va, i hre lo mai mai anih kha. Keini chu ka nu te khuaah kan awm char char ţhin a" tiin min hrilhfiah a, inchhung hnai hle si an inpawh lo ka ti rilru leh hman tawh. 

"Msa leh a nu hi an inpawh vak lo a mi? An awmdun lai hi ka la hmu miah lo a" 

"Nu a nei tawh lo. Msa naupanlai hian tun a a nu hian a nu tak kha a lan a, Msa hi ala naupang. Kan khuaa an awm lai tho a nia, Msa pa in nupui thar a neih veleh kan khua an chhuahsan. Ka nu min hrilh dan a nia, dik turah ka ngai. Fa lah kha an nei thei lo reng a, tlai khawhnu ah an nei veleh ta chauh a" a tih chuan muangchangin lu ka bu nghat nghat a, Msa hian nau hmeichhia pakhat chiah a nei a, ala naupang. School a kal tawh na a a pawl a la san vak ka ring lo. 

"Msa nu chu khawiah nge?"

"Kan khua ah. A ni paw'n pasal dang a nei tawh a, fa pathum an nei tawh" 

"A tan chuan a nuam lo ve ve dawn ni maw? Apa bula a awm in nuhrawn a hrawn a, a nu hnenah awm dawn se pahrawn a hrawn veleh a ngai ang a" ka lo ti veleh a, mahse a inthlak danglam chhan hi ka hre thei chuang lo. Aizawl an lo awm hma daih aţanga inţan tawh a nia, hriat a nei vak dawn lo lehnghal. 

"A pahrawn a sual lo. A nu in a zir nge ka hre lo. Ka nu te nen pawh an inpawh phian. Msa hi en thli thlai turin min hrilh ţhin a, chanchin min rawn zawt fo. A ţha lam hrilh tur a vang em zawk a" a ti a, a nui zui hak hak. 

"Nia ala naupang em a, a rilru ala puitling lo va, nakinah ala danglam ve mai ang. In tih pa hunlai a la ni ve tlat a" nui chung hian ka lo ti ve bawk a, boruak uap churh pawh a veng ta deuh e. 

"A ngaihven riau che in ka hre tlat" ka hlauh ruk rauh rauh a sawi chhuak ta phawng. Lo nui lui nasa teh mah ila a lem zia a hrethiam tho ang. 

"I ngaihven ve loh chuan a ţha a ni mai" amah bawk chuan a ti leh a, chhan dan tur ka haihchham leh viau tawh. 

"Puipuiin eng nge a sawi a?" ka ti thei ţawk. 

"A sawi tam lo. Chhanna ngawr ngawr chiah min pe" a ti leh mai a, chhanna a tih chu ka hrethiam. Ka duh reng vang a min duhna ka chhanglet ve ah a in ngai a ni ngei ang. Lo star ru ve ţhin mah ila a rang teh thut lutuk a, thil thleng zawng zawng hi dawnsawn dan ka la thiam chiah lo. 

Peng kan thlen veleh thlah ka duh leh duh loh min zawt a, ka duh loh thu in ka chhang. Vawiin atan chuan a tawk tawh lutuk tlat. Keimahin ka haw a, kan thil sawi ka ngaihtuah zui rauh rauh. Msa te nen hian vengkhat ni mah ila kan inhnaih lutuk lo a, ka chhungte leh vengchhung a ka hmelhriat te paw'n a nu tak anih loh thu an sawi ngai lo. Mahse kan veng a an awmna a rei tawh a, a hre tawk chu an awm tho ka ring. 

Haw tlang lo in ka nu ka pui leh a, khar dawn hnaih lamah Msa a rawn lang hlawl. Kil khatah a ţhu ve a, midang ang bawkin pangngai takin ka lo chhawn. Ka nu dawr a ni a, ka mimal buaina ka ti lang thiang lo. 

"Ka nau b'day a nia, eng nge ka leisak ang?" tiin min lo zawt daih. A dawhkan bulah dingin kan eitur la neih ho ka ngaihtuah kual rauh rauh a, cake kan siam ngai bawk si lo. A thil rawn lei tumna hi a fuh chiah lo deuh a ni. 

"Dawr dang inhawng a la tam saw. Hmeichhe thil lei tur an ngah daih zawk ang. Kan dawr a mi ang hi chu b'day a dawn atan chuan an duh kher lo ang" ka lo ti a, a kut pahnih suihzawmin dawhkanah a kiu a nghat a, a kut chungah a khabe nghatin min melh ran. Hmuh khawngaihthlak ka tum lutuk nge a mitmeng te chu a dul deuh ruihin ka hre mai. 

"In khar ţep tawh em?"

"Ka hre lo. Ka nu in khar a tih hun hun a ni mai. Mi an rem hunah leh eitur bang a tam lutuk loh hunah. A zawh vek chu kan duhthusam a nia" chhanna ka pe chip chiar zek. 

"Min leipui rawh" a ti leh tawp a, a awki te chu, thu min pe a ang mah zawk. 

"Ka hman lo. Kumtin i lei awm tho sia nangmah pawn i lei thiam tho ang chu"

"Kum tin ka lei ziah a, mahse kan veng dawr a ka vawikhat leina tur a nia" a ti a, tihfuh intih hmel zetin a nui zui ruh ruh lehnghal. 

"Eitur bang a la tam. Sem kual ka ngai a, ka hman lo" ka ti ve hmak. A hawikual leh te te a, keipawh ka ni tho. Msa bak awm an awm tawh lo. Choka lam a ri rak rak a, an intifel ţan pawh a ni maithei. 

"Khawnge ila sem dawn?" tiin min zawt reng bawk.

"A rawnkal apiang ka lo pe ang. Thil i ei dawn loh chuan kal tawh rawh. I duh duh va lei la, a unaupa lei a nih phawt chuan Gracy chuan a lo pawm vek ang" ka ti zat zat. Ka nu lokal leh kal loh ka en pah reng. Tunah tak phei chuan Msa hi hmu lo mahse pawi ka ti miah lo. 

"Kum dang a ka lei a duh ngai lo a, leitur ka hre lo" te a ti vel a, awih chiah lo mah ila a duh ang a ka awm hma chuan min chhuahsan leh chuang lo ang. Ka nu in a rawn hmuh a a ngaih a ţhat loh hma in "Pawnah min lo va nghak rawh ka lo kal ang" ka ti ta nge nge. 

Ka nu hnenah chhuanlam fahrah te te siamin chhuah zawk ka dil a, a lo remti ve teh miah. Chhuah ka dil ngai lo a, ka dil ve chhunah a phallo duh bik lo a ni maithei. Msa chuan min lo la nghak ve ran a, ka kalpui thei tur chu a phur khawp lehnghal. Zanah khan min haw viau emaw ka ti hman a, min lo haw miah lo a nih hmel. Kan sawi nawn leh lawk, hepa hi hriatthiam a har takzet. 

A nau thil pek tur chu ka enpui ta nge nge a, a duh khirh lem lo. Ţha ka tih ang apiang ţha a ti ve zel a, lei vek sen a ni si lo. A duh tur ber ni a ka rin ka laksak ta tawp a. An lo tuam thei nghal hlauh bawk. 

"Hriatrenga kha i hrechiang em?" a nau thil tur nen kan let leh tawh a, kan dawr kawtah kan awm. A kal mai dawn maw ka tih laia a thil min zawh chu mak ka ti ru hle. 

"Aw hrechiang e. Midang paw'n an hrechiang vek. A fel a, a bul a awm a nuam bawk a, tupawh a ngaihsak a, buaina a siam ve ngai lo va" ka ti ta zat zat. Sawi tur ka lo ngah ve phian. Nidang ang tho in engahmah ngai lo va a nuih liam leh mai mai ka rin laiin a hmel a tak run a, min chhaih chak reng ang khan a awm tawh lo. 

"Ka hriat theih chinah mifel a nih lai ka va hre lo ve" zawi te hian a lo ti ve sup. 

"I hre reng nang. I unaupa a nia, hriatchian i tum ngai hleinem. Ţhian dang i kawm daih zel a, unau in nih hi tuman an hre kher nang" ka la ti bawrh bawrh. Tlem te talin harhchhuak ve deuh se ka duh a ni mai. Nu a nei tawh lo a nih pawhin unaupa a nei tih tal te hria se la. 

"An hriat loh chuan a lawmawm nasat chu. Ţap ka thlem peih lo a nia" a ti a, a ngaihna hre lo deuh a ka awm reng laiin min a kalsawn daih. Zawh chian na hun ka nei hman lo hrim hrim. Ka harh chhuah hnuah ka nui hawk. Tu nge maw ţap se a tih ni? Msa hmaah kher kher hi chuan ka ţah ka la ring chhin ngai lo hrim hrim. Ka tet laia ka ţah bak kha chu. Hrilh nawn ngai lovin Hriata a ngaithei lo tih ka hre mai a, ama dik loh zawk vang a nih ka ring hmiah bawk. 

Nidang ang bawkin school ka kal leh a, Hriata'n pengah min lo nghak ve mial. Nidang a min nghak ngai hlei lo. Ka hrechhuak leh si, kan ni ve ngeiah a ngai tak e. Ka lo rin ţhin dan nen a in ang lo. Ka bialpa anih chuan nuam ka tih viau ka ring ţhin a, mahse nuam ka ti miah lo. Hmuh ka hreh ru ngawih ngawih zawk kha a ni sia. 

"Biak theihna che ka hre si lo a, ka nghak thlawn chuang lo che a nih hi" ka nui lui leh. Ka hlim ka inrin viau na hmunah ka nui lui reng dawn anih hmel. Kan kal thui hmaa tih tawp vat ka tum. 

"Phone pai an phal si lo a, a hmingin ţha vak lo chu nei ve mah ila inah ka hnutchhiah daih zel" 

"Pai an phal lo a, a ruk a pai chu an phal tho ang" tih pahin a phone a phawrh a, ka lo vuan bo vat. Midang hmuh hlau a ka hawi zak zak hnuah "I mawl a mi? An hek mai ang che. Principal hi i putea pawh nise dan i zawm tho a ngai. Chhungten thil an tih theih vang a dan bawhchhia hi ka ngei zawng tak" thinrim zetin ka hau buan buan a ni ber. 

"Ava mak bawrh bawrh ve. I dawhthei viau in ka hre sia" a tih chuan keipawh ka inbengdai. Ka thinrim vak nachhan kha ka hre bik lo a, ngaihtuah tur ka ngah lutuk vang te anih ka ring ta ber. Ka tho fu chiah lo bawk nen. 

"Ka hlauthawng lutuk a ka thinrim thut a nih kha. A reh tawh ka tihpalh lutuk" tih velin ka riat nawi ta mai mai. 

"Tihsual inei chuang hleinem. I sawi zawng zawng kha a dik vek. Chhungte hausakna leh thiltihtheihna a diklo zawng a hman chu thil ţha a ni lo. Ka thlawp che" a tih takah chuan ka awm a nuam deuh. Ka ke na hrechang lo vin ka kal hmawk hmawk. Min biakin a ruk tawk te te in ka chhang a, ka be hmasa lo hrim hrim. Min nghak kher kher kha a inchhir ve viau maithei. 

"I fiamthu tih hrilh ang che. Ka thu la hmasa lovin engkim ilo ti vek a, a hmelţha a, ka star ngei a, mahse ka bialpa ni kher turin ka duh lo. Mipa tello a ţha deuh a zir phawt ka duh" ka ţhut rualin ka thil sawichak ber ka sawi nghal mawlh mawlh. 

"I sawi ve ziah sia, ka tihfel sak vek che a lawm zawk ta che"

"Ka lawm miah lo. Kan chhungkaw dinhmun leh thil dang zawng zawng nen i hre vek. Ka remtihna tello a thil ilo ti hi a lawmawm loh" ka ti leh salh salh a, lo ngai kawi dawn mah sela pawi tihna pakhatmah ka nei lo. Hriatrenga ka haw lo va, ka la inpeih lo ah ka ngai. 

"Msa vang a ni em?" ti a min zawh chuan ring zetin hmui hupin ka nui a, ka tawp leh hma viau thung. 

"Anih i ring em?"

"Ring e. Nitin a ţhutna i en ziah a, ngei viau angin awm mahla school a rawnkal leh kal loh changa i awmdan danglamna te hi ka hmuthiam ve e aw. Min bum tum miah suh. I ţhiannu ka nih hi" inringtawk zetin ti ve mah sela ka tlawm duh bik lo. 

"I ring dik lo anih chu. Msa vang a ni hleinem. Ka chhungte vang zawk. Ka nu in bialpa neih ala phallo a, kum18 chiah ka la ni bawk. I fiamthu mai mai tih hrilh ang che" 

"Ka duh tawh bik lo" a ti hlar mai. A ngawih vang vang a, ka lo la ngaichang reng. 

"A khawngaihthlak. Zak chung chungin min hrilh ve a, nimin ah in haw rual a, tukin ah in lokal rual leh a, a lem mai mai ka tih chuan a zak lehzual dawn a sin" a ti leh nang nang. A tihsual a hria a, a pawr ngam ta bik lo. 

"Keiman ka hrilh mai ang. Ka mawhpuh vek ang che" ka ti a, ka lungawi lo ve tak tak. Hetiangah hi chuan thutlukna chu ka siam tur zawk a ni. Min hnial ve mah sela ka ngaithla duh tawh lo. Tupawh nise an lungawi bik kher lovang. 

Nidang ang bawkin chhun a kan chawlh laiin min chhuahsan leh a, a ni hi chu pawn nuam a ti khawp a, hmelhriat a ngahin ţhian siam a thiam  a, class a inkhung reng a ning hlur bawk. Mahse chawlh lai vel anih loh chuan keimah nen kan inzui chawt thung. Veng khatah awm phei ila chuan kan in kawmngeih lehzual ang. 

"Khawnge i bialpa?" ka hma chiah ţhutthlengah ka lam hawiin a rawn ţhu a, min nuih ve bawk mahse nidang angin ka lo chhawn peih lo. Hriata hnen a ngaihthlak nuam deuh a thil sawi dan tur ka ngaihtuah mek. Msa ngaihţha lo paw'n min thlek ngial ţhin a, ka la tum bur reng tho. 

"Kha in rawh" ka hmaah thei tui a dah a, ka ban duh lawk lo. A ruk chuan ka inchak reng. 

"Zirlai ni lo ngaihtuah i nei ve ţan a ni maw?"

"Iva bengchheng tak" ka ti ta nge nge. Pawisawi lo awm takin min lo en lehnghal a, ka sawi duh ang ka duang thiam rih bawk si lo. Pakhat lahin min tibuai reng a, zirlai ni lo ngaihven tur dang a awm hi ka hne takzet. 

"Eng nge a? Hriata mi?" ti a ngaihţhat loh hmel fahran a min zawh chuan lu ka thing rang hle. A hriat ve zel a ngai lo. Hriata a mil loh zia ka hre tawh a, ho te pawh ni se a ngai hua ang a, a thinrim tawh chuan thluak a nei tawh lo. Rilru fim a pu ngai lo tihna a ni ber ang chu. 

"I hriat zawng tumah ngaihtuah ka nei lo. Kal mai mai teh min rawn ti buai" ti pawr ve chhar chhar mah ila a che eih lo. 

"Vei inei" a thil kenlaiin ka biang a hawlh zeuh a, hmuh ka nuam vak lo aniang a la let rang viau thung. 

"Khawvelah hian vei tur a tam lutuk. Nangpawn ka zawhna chhan duh loh chin inei a, engkim inhriat tawn sak turin kan inpawh lo bawk a, ka hrilh dawn bik lo che" ka ti ve tlat. Pawn chhuak ngai mang lo kha Msa vang liau liau in ka chhuah ve phah. 

Zanah lah nise lehkhazir lo ţhakin Hriata hnena sawi tur ka ngaihtuah a, kan duang chhin vel ţhin. Bialpa la nei ngai miah lo ka ni bawk a, eng thil mah ngaihtuah chhuah theih ka nei lo. A nihna ang rat a hrilh ka tum ta zawk a ni. Ka nu thusawi kha dik hmel riauin ka hre bawk. Thil pakhat a rilru pe chawt chi kan nih chuan mipa hian min lo tibuai thei dawn khawp mai. 

Phur fahran lo in school ka kal a, vanneihthlak takin Hriata'n min lo nghak lo hlauh. A zah hlau a ka hrilh ngam loh leh pumpelh dan ka zawng ngat ngat mai aniang chu. 

Mahse ka sawi aia sawi hmasa an awm a ang khawp mai. Hriata lo lut chu nidang angin nuisang chungin a hawi vak lo reng reng. A kun ngul a, ka ţhiannu leh tun hnai mai aţanga Hriata ţhiannu ni ve ta Puipuiin a ţhutna ah kal chilhin a ngaihven vat. 

"Engmah a sawi duh lo. A biang vel saw nasa lo te in a duk a" a rawn tih takah chuan buaina a tawk a nih ka ring nghal mai a, a ti tu hre lo mah ila rinhlelh erawh ka nei chiang a ni. 

CONT....(Rilru la peng tu atan ka rawn thai kawi leh nawk nawk a, a dang min lo ngaihven sak lehzel dawn nia😘)