EIGHTEEN-3

EIGHTEEN-3

"Eng thil nge itih leh tak a?"

"Engvakmah" thinrim lutukin thawk ka la hrawk. Hlauhthawnna in ka khat bawk. Midang a tihbuai chang chuan a fihlim maithei zel. School naupang dang chu sawisa hrep mah sela a pa in a hum tho ang mahse Hriata berkher chu a zuam sual ka hlauhpui ve a ni mai. 

"I ni fapa a nih hi" ka tih chuan a rawn dakchhuak ve ta nge nge. A din dan erawh a thlak duh chuang lo. Bang nghengin duh dah angreng deuhin a ding a, nidang ang bawkin vei nei lo ang maiin a awm tho. 

"Chuan?" mitko san ak chung hian min zawt let ta daih. 

"Chuan tih a ngai tawh hleinem. Hriata kha i sawisa chiang mai. Buaina a nei ngai lo va, zirlai chiah a buaipui. I sawisak chhan hre lo mah ila iti dik miah lo ania" ka ti zat zat a, a nui hmel ka hmuh chuan ka hrilhhai hle bawk. 

"Fiamthu ka thawh hleinem. Hetianga i nun reng chuan hmelma i insiam tam mai mai. Hriata ngat phei chuan a ngaihtuah che a, midang ngaihsakna che hetiang hian rul let suh" ka ti leh salh salh a, ţawnghnem inti viau tawh mah ila ka la sawi zo chuang lo. 

"Ka tih a ni lo" ti a a phun sup lai chuan ka lo nui hak. Ka awih lo lutuk a ni ber. 

"Itih nilo se tu tih nge nia nga? School pumpuiah hian nang lo buaina siam ţhin an awm lo hrim hrim" uar zetin ka ti leh tan tan. 

"Zawt rawh. Chhan awm lovin tumah ka tibuai ngai lo" ti ve bawk mah sela ka la awih chuang lo. 

"Ka zawt ang. Dawt min hrilh anih chuan ka be tawh ngai lovang che" ka tih hnuah ka kal ta daih a. Ti ti pui tlakah ka ngai lo va, ka sawi tur dang zawng pawh ka sawi leh ta lo. Ka lo inrawlh ve vak hi dik ti lo mah ila an unau a buaina an neih ka duh lo va, mi pawisawi ngai lo Hriata khatianga ka hmuh kha ka thin a rim a, Msa'n buaina a tawh ka hlau bawk. Ka awmdan hi ka hrethiam chiah lo. Inrem turin ka duh a nih ka ring. 

"Ka zawng che a" Hriata ve thung a ni. A hnaiah phei chuan a duk lai a langsar lehzual. 

"Tunge khatiang khan siam che a?" 

"Msa leh a ţhiante. I ruala ka haw kha an lawm lo anih hmel" tiin awlsam fe hian min lo chhang a, a awmdan te chuan khawngaih thla a la reuh lutuk. 

"Lawm loh na chhan tur an nei hleinem. Msa nen engmah kan ni lo va, inhre satliah mai mai chauh alawm kan nih. Ka ţhian a ni lo va, ka bialpa a ni lo bawk a" fihlim tumin ka lo inveng. School naupang dangin ngaihdan dik lo an neih ka hlau a ni. School form ka hak tawp berna tur a ni tawh a, pawl-12 ka ni tawh. Hetih hun chhung hi thlamuang deuh a hman ka duh. 

"I ngaihdan ang khan a lo ngai lo a ni maithei a, a rukin lo duh ta che se la engtin nge itih ang? Anih loh pawn sawichhuak ngam ta se? Sawichhuak ta se min ţhen phah dawn em?" a zawhna ka hriat chuan ka hawi hu hu. Ka awmdan hi mak inti ngei ang. Kum18 ka ni tawh a, hetianga lo dawngsawng tur hi ka ni lo, hmeichhia leh mipa inkar a thil thleng ţhin tam zawk ka hre tawh. Mahse ka beisei loh lutuk zawhna ka dawng chiah chu ka hawi hu hu tho. Chhanna tur ngaihtuah ru ran chungin mit ka len kual a, engkim kha fiamthu vek a ni ti a hrilh ka tum mek hian ka bialpa ah in ngaiin ka ţhen hlau awm takin a awm vel si a. 

"Msa hi i sawi ang kha a ni lo. A hriatna ah hian eng thil mah a dah lo. Tupawn hmeichhia a ngaihven loh zia kan hre vek a, a ngaizawng tu te hnek pawp duh chi chauh a la nih hi" tiin uar zetin ka nui lui vak vak. Ka nuihdan pangngai nen a inang lo nasa, ţap mai tur te pawh ka ang. 

"Lo ni ta se?"

"A ni lovang. Tumah a ngaihven lo. A ţhiante leh hmeichhia ai pawh a a duhzawk a bike te, midang nen a buaina neih tum phet te, chutiang ho bak chu ngaihven a nei lo" ka tih hnuah "Mahse misual a ni miah lo a nia" tiin ka belh leh hram. 

"I hriatchian hmel khawp mai" a ti sup a, min chhiar tum ni awm takin min en run bawk. 

"Aw school kan lut dun char char a, ka hrevek lo na a tam tak chu ka hre ve" ka ti ta nge nge a. Ka thusawi chu mak a tih hmel lem lo. 

"Anih chuan kum12 mi lek anih laiin school tlanbo in ţhiante nen mei zuk ruk an ching tawh tih i hria em?" ti a min zawh chuan lu ka thing. Class a awm loh chang chu a nei ţhin ngei a, mahse an hre ngai lo a, insawifiahna ţha tak a nei ţhin. Ziak ngeiin a ni bawk. Mahse khatih hunlai khan kum engzat nge kan nih ka hre lo. Chhinchhiah kilh kelh tur khawpin ka ngaihven ngai bik lo. 

"Ka rin aiin ilo hrechiang daih. Aizawl i awmna ala rei loh nen" 

"Chhungte hnen aţanga ka hriat. Siamţhat theih dan tur an sawi ţhin laiin. Msa chanchin chu duhtawk ang. Khawnge i bo vang vang?" a tih takah chuan ka thaw huai. Ka kalna hnu lam a thlek a, aw ka lo thian kharh. 

"Inchung zawlah ka awm mai mai. Vawiin chu ka awm a nuam lo lutuk a, midang bengchheng lutuk kha ka ning thut a" ka ti nawi niaih. A ni inla fel hian ka kal tawh naah khan min kalpui a tum leh ang tih ka hlau ru hle. 

"I khuasik a mi?" ti a min zawh rualin a kutphahin ka chal a dawm a, ka phu zawk na a a langsar lo hlauh. 

"Damdawi i ei duh em? Ka dilsak dawn che mi? I eng nge na? I khua a sik si lo a" a ti zung zung a, ka star tak tak lai kha chuan tun a min ngaihsak ang hian min ngaihsak se la chu ka lawm thei viau ang. Mahse ka bialpa a nih tak hnu hi chuan ka ning tlat. A ni hnihna chiah la ni mahse ka ning takzet. 

"Duh ka nei lo. Kei aiin i nat hmel zawk. I dam hunah hrilh tur che ka nei a nia aw. Puipuiin min lo zawng palh ang ka lut tawh dawn" tih leh kalsawn ka rual a, a duk chur laia ka duh dan ni miah lo ang a thil a kal thu sawi chu nuam ka ti chiah lo. A dam hun atan ka khek leh ta zawk. 

"Awww..Rebecca ka bialnu" ka ding chawt. Mihring laktlak loh leh bawk. Lalrinmawia aw ring lutuk chu hla deuh a awm te pawn an hre phak hial ang. A ni nen pawh hian rei tak school khatah kan lut dun tawh. Ţawngmawi lo nilo sela a ha hi a kuh angreng a, a hmui a chip tlat paw'n a ha kan hmu tho ţhin. A pa lian lo va, kei aiin a pawng hret chauh. Kawng en mang lova kal chang phei chuan a ha ah kan intauh leh dawt ţhin. Min fiam reng a, min tibuai reng a, kan naupanlai phei chuan min vel ţap reng ţhin. Naupanlai leh Lalrinmawia sawi takah chuan hriatchhuah ka nei. Min velh chang a min chhan ţhin tu kha Msa bawk hi a ni tak e. 

"Ka uang peih miah lo a nia, vawiin chu min tibuai suh" ka sawi zo hman ţawk. Min pawm bet thlawp a, a nui uarh uarh. Mi ang lo ang maiin a awm ţhin a, a thiam thei phian thung. Pakhatna ka ni ziah a, Lalrinmawia hi pahnihna leh pathumna a nih chhawk reng. 

A rem lai lai a chum pahin "Min thlah rawh" ka ti pah mawlh mawlh. A insiamrem sauh sauh a, ka hlauh ang ngeiin min chawi kangin min vir pui a, ka zak lutuk chuan midang nui dar dar ri chu ka hre ruai ruai chauh. 

"Thlah rawh iti na ang" ka aw hriat ţhan lutuk ka hriat chuan nidang zawng aiin ka lawm. Min thlah chuang lo na a ka ke chuan chhuat a si ve tawh. Hnunglam aţangin ka banah min pawt lawp a, ka ring dik chiah. Msa bawkin min ţanpui leh tawh. Ka hauh ve nasat nen min ngei ve miah lo em mawni? A thluakah engmah a awm thei lo va, ka thusawi ho kha a hre leh tawh lo aniang. 

"Ka fiam anih kha. Lo inrawlh ve ziah suh Malsawmkim" Lalrinmawia chuan a ti khur khur a, a thinrim loh tih erawh ka hria. A tihziah dan a nia, Msa nen chuan an inkawm ziah tho. 

"I fiamthu ve dan hi a ninawm chi. Hmeichhia a nih hi, tha tawp a beih chi a ni lo. i tihlum mai ang" Lalrinmawia a nuih uarh uarh laiin chil ka lem khawlh. Msa chu ni ila a thusawi vang khan ka zak viau ang. A ni ve lah chu zak miah lovin a hawi larh lehnghal. 

"Mawl chhahpa. Ka theh hlum nguarh ang. Engkim i nei thei a, a pawimawh ber thluak inei thei tlat si lo a" Lalrinmawia chuan a ti nang nang a, lu thin pahin a chek zui tlak tlak. 

"Hmeichhia fiamthu thawh nan hmang tawh lo la a ni mai Kuhte. Iduh leh Hriata dim miah lovin va vawm vir rawh. Saw lai lawkah sawn a awm" hnung lam kawh pah hian a ti a, a sawisak zawh hnu lawkah pawh a unaupa khawngaihna ala nei chuang lo. Min pui fo mahse min ti thinrim leh ţhin. 

"Hmeichhia zawng zawng nge Rebecca bik hi? Ehh..hmeichhia zawng zawng an nih ka ring chiah lo" ti a min chhaih chuan ka lai hle. Keimah chiah ka zak lo. A ţawng ring angreng sia, Msa nen chuan sawizui tur kan hre lo kher mai. Fiamthu a ti leh tlat awm sia, han huat vak chi lah a ni der si lo. 

"In sen ţha dun ţel ţawl tehmai nia aw. In phit hma in Hriata chu ka va zirchiang ve ang e. Vantirhkoh in engtin nge hliam a lo neih ve theih reng reng ni?" ti bul bul chung hian min kalpel a, ka lawmzia chu. 

"Hriata kha i sawisa reng sia, kut i thlak loh thu i sawi ve char char a, dawt sawi lah hi i thiam" class lam panin kan inzui leh tawh a, ka thusawi a hriat rual chuan a ding chawt. Min rawn en a, zam map lovin ka lo melh ve ran. 

"Ngatinge min la biak?" 

"Maw?" ka lo ti hu a, mahse chawp leh chilhin ka thusawi tawh ka hrechhuak. 

"Dawt i sawi chuan ka be tawh lovang che itih kha" a ti ta ngei reng bawk a. 

"Dawt i sawi a mi?"

"Aih"

"Hriata ka zawt a, itih niin a sawi sia" ka ti nuah nuah a, rin zawk tur ka hre tawh lo. Msa hian kut thlak tak tak se la chuan a ţan tlat ka ring lo leh hnuhnawh a, Hriata lahin dawt a sawi ka ring chiah bawk si lo. Thudik hi a ropui a, nakinah a dik zawk chu kan la hre mai ang chu. 

"Lalrinmawia'n min tihbuai apiangin min chhan ziah sia, biak duh loh tawp che chu mawi lo ka ti leh si" nui sang chung hian ka ti a, a awih loh hmel kher mai. 

"Nui duh lo vel suh. I inla emai aw, hetianga ka nuih hi chuan ţha min ti tih ka hrereng a nia" uangthuang tak hian ka ti a, ka fiamthu thawh chuan a ti lunghnur zawk mah. 

"I inla cute ve tihna mi?" 

"Aw lawmthu sawi nan. Korean ho style ka la a nih hi" tih pahin ka kut pahnih ka khabe hnuaiah ka dah a, ka la nui sang reng. 

"An style la mahla korean inih phah lo. Kan nunzia a hrang hlak" min ei lo awm fe hian a ti leh a, ka insiamţha sawk sawk. Ka awmdan vel chu zahthlak ka ti. Ka chhaih chakin khati khan ka ti kual a, ka chhaih nuih zawh loh mai bakah zah chiah ka hlawh. 

Ngawirengin kan inzui a, classroom a luh dawnah "Khatianga itih leh chuan ka hnek tawh ang che" tiin min la vau pung pung zui. Tihian ţhenkhat chuan an star ve em em a, a star tu te hi ka khawngaih zawk. Ţha deuhin be mahse chhanna nem tak an dawn ka ring lo. 

"Khawnge Hriata kha? Msa tih a lo ni tak tak a, hepa hi chu ka ngei hluah hluah. Principal bulah hek rawh ka tih lahin a duh bawk si lo. Zingah khan i nuihzat a hlau a, a lo nghak ngam lo che a, a hmai a duk khawp a hnek tu lah a hek duh lo. Hepa hi chu a van fel tak e aw" ka ţhut rual chiahin Puipuii a lo ţawng nghal char char. Kei lah ka la zak ngat ngat bawk. 

"I hria em ka thusawi chu? Mifel lutukin a duh che a, nang lahin ka duh lo e iti vel a, duh hle hle la chuan a ţhen miah lo ang che. Pawl-12 chiah la ni mah ila nupuiah ala nei ngei ngei ang che" a la tih zat zat takah chuan ka ning ve ta. 

"Chutianga fel itih viau chuan nangman nei mai ta che" ka ti ţeu ve ta hlar. Thil hrang hrang ka tawng hnem lutuk a, Hriata a lo fak ve reng chu ka hne. Hriata ka ngei vang a ni miah lo. Ka la zak bawk si, rilru mumal put loh sa nak laia min hau ve reng hi ka ning. 

"Keichu min duh ve lo a, nangmah chiah a duh che. Hriata mitah chuan hmeichhe dang chu phung vek kan ni mai" min tih nuih tum a a tih chuan a hlawhchham chiang hle. Hriata chanchin sawi loh ţha berin a hre ta aniang chu a hmui a chip ta hman a, boruak hipna hun ka nei ve chiah. 

Tlaiah Hriata nen kan haw rual leh a, kan inbe tam lo. Min thlah a tum ngial na a ka hnial fithla ţhak. Keimahin muangchangin kun ngul chungin ka kal a, lung te reuh te kalkawng a lo awm leh zeuh ţhin ka hmuh apiang ka chhuih pah zel. Ka awmdan kha ka ngaihtuah chet chet hian ka zak chet chet a, laklet leh theih a ni der si lo. Keimah ang rual dang ang bawkin drama ka en ve nasa a, ka thil en a tak tak a ka ti ve chhin chiam kha a pawi hle. Ka lanchhuahtir na ber pa lahin ţawngkam ţha a neih loh mai piah lamah hnek ah min la vau zui. 

Ka nu pui tur a ka luh chiah chuan mipa rual nui dar dar ri ka hria a, thawm lo chhuahna lam ka hawi chiah chu ka nu pui lo va haw tlang mai ka duh nghal ut ut. Msa te ţhianho an lo ţhu ţhap a, Lalrinmawia pawh a tel. Msa ţhianpa a ni ve tho a, a nui uar ber berah a ţang lehnghal. 

"Sawng ho sawn eng nge an ei dawn va zawt teh" ka nu in min hmuh rualin min lo tir nghal a, Msa te ţhutna lamah kher lehnghal. 

"Ilo zawt diam tawh ang chu tih nak laiin"

"An rawn lut deuh chiah a, Msa a tel ve saw. I ţhiante an ni tho a, nangmah ngeiin va sawt rawh" ala ti ta deuh deuh. A fanu hi Msa hmaah inlak cute tumin a phusa chiam tih chu hria se min tir awm tawp si lo. 

"Eng nge in ei ang" ti a ka zawh ringawt pawn a hma aia nasa in thawm an chhuah a, school naupang chauh an la ni bawk a, vei an nei lovin an thawveng kher mai. 

"Hriat hnup hnup-a nen khan eng nge in tih kawi a? iva rei ve" Bsa'n ring leng lawng a a sawi chu ka nu in a hriat phak hlau in counter ka en vat a, phone a mi a biak lai a ni hlauh. 

"Ţhian kan nia kan haw rual mai mai. In ngaihtuahna a bawlhhlawh a nih kha. In duhzawng kan neih loh chuan dawr dangah kal mai rawh u. In bengchheng si midang in hnar mai mai" ka tih tan tan hnu chuan an duhzawng an sawi sap sap hlawm. Pakhatin a ziak zel a, an bih ţhap a, an buai khawp mai. An awmdan enin keimahin ka nui tet tet. In lak pa tum ve bawk ţhin mah sela an naupatna hi kawng tam takah an hriat miah lohin an lantir veleh ţhin. 

An eiduh zawng an ziahna ka lak lai mekin ka dinna bulah ka nu a rawnkal a, an bengchheng a rawn hau dawn maw ka tih laiin "Ipa a nuam lo deuh a, inau ten min rawn bia a, ka ngaih a ţha lo riau. Ka haw phawt ang a, ka rawn khar pui leh mai ang che" a ti a, ka rin loh lam daih. A mangan hmel em em mai bawk si. 

"Ka haw ve a ngai lo mi? Lokal duh tawh suh. Keimahin ka ti thiam tho a, khar pui kher ka ngai lo. I ngaihtuah viau chuan haw phawt la, a bulah awm rawh. Ka lo haw ve vat ang" ka ti sawk sawk a, ka naute hi an ngaih a sam viau. Anni meuhin ka nu an rawn koh tawh chuan ngaihţhat lohna tham a ni. 

"Awle. Puih i ngaih chuan rawn sawi la i naute ka rawn tir ang" a ti a, a indah fel sawk sawk a, hmanhmawh deuhin a haw. Ka classmate te lah chuan min en ţhap a, ka mittui hmuh an in beisei a ni mahna. 

"Englo...Becca..ipa in natna a nei a mi?" tiin inthlahrun ve hmel zetin bah nak hian Msa chuan min zawt a, lu ka thing. 

"Kan ril a ţam sia, kan eitur chah kha min pe phawt la, kan eizawhah kan tihfel pui ang che" Sawmtea'n a lo ti zui ve zat. 

"Ka rawn pe vat ang cheu, reilote lo nghak ru. Chuan tihfel pui ka ngai lo. In eizawh veleh kal vat ula min pui a ni mai" ka la ti khar khar. 

"Kal mai mai teh" an lo ti sap sap a, a over zualin an ban an vai. Paruk lek an ni chung hian an thawm chu na tak a ni. 

"In kal dawn nange?" ka melh kual den den a, ka melh apiangin lu an thing zel. Dawhkanah pawisa tawi te te a net tap hlawm a, a ţhen chu a chuar ţha nasa. An neih ang ang an thawh kham ni ngei tur a ni. An pawisa dah chu la in chhiar pahin mumal zawkin ka rem a, pawh mar chawt chawt ngai awm nual mah sela an dah dik thlap. 

Ka duh lo chung chung min pui tlat a, chuti na na na chu tiin remchang ka la ve a, choka chhuat thlengin ka nawh tir. Rin ai takin nuam an ti phian. An infiam a, keimah min fiam zeuh zeuh bawk a, an nui dar dar reng a, an chetchhiatna te sawiin rei tak inhre tawh ang maiin keipawh min kawm bawrh bawrh. 

Ka lo hre lawk ngai miah lo a, miin an sawi dan ringawt aţangin ngaihdan ka siam a, belhchian tum lovin ka ngaithei lo ve em em ringawt a, an awm mai mai paw'n ţhenkhatin an rel reng a, keinin kan lo awih zel a, school a thil pangngai lo a thlen apiangin an tih leh tih loh zawt miah lovin kan mawhpuh nghal ringawt zel a, ka pa damlo in ka rilru tibuai viau mah sela ţhian paruk lai ka neih belh thung. 

Belchiang lo a ngaihdan ka siam mai kha ka tihdik loh zia ka hria a, ka zak bawk. Miin engtinpawn sawi sela kum18 chiah an la ni a, thil ţhalo tam tak an ti chung hian an thil tih ţhat a tam zawk a, tun aţanga bul an ţan nghal anih chuan an tih dikloh siamţhatna hun an la ngah bawk. Puipuii chauh nilo ţhian dang ka neih belh thei chu ka lawm takzet. 

CONT (Ka nau a damlo reng a, vawiin pawh kan buai rap rap. Buaina hi a kaltluang ve khawp a hehe. A la thui lutuk lo a, zan dangah chuan hei ai hian a thui deuh ang. Min hrethiam zel ţhin a in vaiin in fel lutuk e😘)