EIGHTEEN-4

EIGHTEEN-4

"Ipa eng nge a an?"  corridor ah dingin ka pa ka ngaihtuah rauh rauh a, ruah a sur cherh cherh bawk nen rilru a nuam lo duh lehzual. 

"A damlohna kha ka nu in a lo zep a, kan rilru hah a hlau sia, min ngaihtuah vang ni tho mah sela a hriat rual khan min hrilh ve nghal se ka lawm zawk ang" ka ti sep sep a, ka rilru a na takzet. Natna alo neih sa vang aniang dawr aţang khan hmanhmawh pheleng a a haw. 

"I tan a ţha tur anih a ring zawk aniang. Vei dang nei lova class-12 hi i pass theih nan" 

"Min vuipui ve ka rin nen Malsawmkim" nuih hak hak pah hian ka ti a, a lam hawiin "'Inu chu ka sawisa hrep ang a, inchhir a tun ai nasa a ngaihdam a dil theih nan che' ti te a i sawi ka ring a" fiamthu bawkin ka ti zui leh. 

"A ngaihtuah che, a awmdanah ka hrethei a, ka hrilh tawh che kha, chhan awm lovin tumah kut ka thlak ngai lo bawk aw" a ti ve nang nang. 

"Ka nu chuan thil ţha a ti ah i ngai a ni maw?"

"Tehreng mai. I nat hlauin amahin engkim a tuar a, a chhel ka ti. I chhun chuan nangpawh i chak ngawt ang" 

"Thahrui ngah lamah nge hrehawm tawrh theih lamah?" ka lo ti ha. 

"A pahnihin. A ţul chuan min paw lawp lawp thei ang a, i hmangaih te zawng zawng hi vawileh khatah bo vek ta sela ila damchhuak thei tho ang" tiin thiam lo zetin min hrilh ve. A thilsawi lah a in pha man lo nasa ropui. 

"Ka ring che nia" thutak zet a tih pahin ka darah a dawm a, tawi te in a nui bawk. Ka dar a dawmna a thlah dawnah reilote chhung chu a hma aiin a hmer na a, hrehawm ka tih hmain a thlah leh ta daih. A kalsawn hnuah pawh keimahin ka la ding reng a, engmah ti thei lo mah sela pa berin inchhung a uap tlat hi chuan inchhung hi a ti phuisui hrim hrim a, buaipui ngai reng paw'n awm se thi tur chuan ka duh chuang lo. 

"'Min kalsan daih lo se la, keimah chiah chuan ka khua a har. Nimin aţang khan ka ngai lehzual' iti i rilru in" min kuah zui chawt a, tal bat bat mah ila awmzia a awm lo. A chak ropui mai sia, min kuah ang angin ka awm ta ringawt. Ka awm ţhat veleh min kuahna a thlah dul ta deuh. 

"Ka sawi chu dik iti em?" tiin min zawt leh a, Tommy a ni. Msa te ţhianho zing a mi. Dawr min tih faipui tu zingah khan a tel ve a, phun reng chungin choka chhuat a nawt. 

"I sawi awmzia ka hre miah lo"

"Mawl der vel lo mai teh. Tun a kalsawn chiah kha a nia ka sawi. Kan ţhianho hian fiamthu inang sawi vek mah ila Msa fiamthu ah chuan i nuih a za bik ang a, a mit a chhin paw'n a mitmeng nalh iti tho ang a, a ţhut lai paw'n a pian nalh zia i hmu tho ang" a tih mawlh mawlh lai chuan za em em hian ka lo nui a, ka nuih vak vak vang nge a sawi chhunzawm duh ta lo. 

"Lehkhazir ţha rawh Tommy. I ngaihtuahna a mawl ang angin i thusawi pawh a mawl mang. In ţhianho hian thluak tlem te tal nei ve teh lo" ka ti deuh zek. Min thlah thut rualin min nem kat dawrh lehnghal. Min nem na deuh hlek sela chuan ka tlu chiang viau ang. 

"Engmah a awm nange?" a ti hu a, mak a tih hmel nasa. 

"Awm lo awm lo. Eng thil nge awm se itih a" ka tih chuan a kut ţang pahnih hi a mit zawnah a dah a, chumi hnuah ka mit zawnah. Chutiang chuan a ti kual zak zak. 

"Mitah ka hria. Zirlaiah ka mawl a ni mai a, mipa leh hmeichhe inmelh danah ka mawl lo. In mitah ka hmu thei" muang charh hian a ti a, ka mit kawm tur ang maiin a awm tawh lo bawk a, tlem chuan ka awm a nuam deuh. 

"I hmu sual anih dawn chu. Midang ka en ang vekin ka en"

"Ni nang. Msa i en hian eng emaw inkap chhuak pap pap ka hmu tel ţhin" ka nui leh tawh. Kei ngei pawhin ka hriat loh alo hria mai ni lova a hmu thei chu mak ka tiin a fiamthu ah ka ngai mai. 

"Nui ringawt suh. Msa hian a hrilh tawh che em?"

"Eng nge min hrilh tur a neih a?" tiin ka lo zawt let vat. Nachin lawkah ka bulah a awm a, ka pa chungchang ni lo thildang a sawi der si lo. 

"Hriatrenga hi engtik aţangin nge i hriat?"

"Nikum khan. Class-11 aţang chauhin anih kha kan school ah a lo luh ve. Ngatinge Hriata chu?" 

"A fel em a, fel deuh hi an sual duh" tihluihna takmeuhin a nui lui. Zahzelah a tukhum a khawih a, nuih luih reng chu a har ve bawk aniang a nui tawp hma hle. 

"I thusawi khan awmzia a nei lo reng reng. I ziah thiam loh paw'n thu awmze nei tal sawithiam turin inzir ve rawh" ka ti a, ka nuih a za ru angreng. 

"A rinawm lo e ka tihna ni lo vin ring vak duh suh. Kan mi rin deuh te kan rin loh ang a an awm hian kan na duh. Khawvelah hian tumah ring suh" a ti nawi kual ta vel mai mai. 

"Nangpawh ka ring lo ang che maw?"

"Aw keipawh. I rinloh dan a awm ka tum lo a, mahse kan tum loh dan a awm a ngaih chang a awm leh ţhin. Chuvang chuan i nat loh nan min ring lo la, Hriat hnup hnup-a phei chu ring lo lehzual rawh" a ti duah. Sawifiah tum viau mah sela a sawifiah tum ber ka man thei chuang lo. Hrethiam angin ka awm der vel mai mai. 

"Ngatinge Hriata bik chu?"

"Mifel hi an fel reng thei lo ka tih kha. Keipawh tun ang hian ka fel reng thei lo a, inven nan mi rin bur loh a ţha. Tunah fel min tiin min star ru viau mah la min ngei hun ala thleng maithei a. Min ngainat i duh loh hunah chuan tih luihna in ka chhiatna lai hlir i ngaihtuah a ngai ang a, ka tho â lai te, ka ham lai hmel te" a ti bawrh bawrh a, a nui zui sang a, hmuh a nuam ngei mai. 

"Ka huat deuh tur a awm i tum chiang mai"

"Tum lo e. Mahse hmalam hun kan hre lo va, tupawh hian bomb puak thut thei kan pai reng a, tum miah lo mah ila kan mi ngainat tak te bomb puak khan a per ve thei a, chuvang chu a nia fimkhur rawh ka tih mawlchhahnu" tih pahin ka chhipah min beng a, a na zek lehnghal. Tuai vut vut chungin "Ka hrethiam lo a ni ve mai a, min ben kher a ngai a mi?" ka ti vin hlar. 

"Ka hrethiam lo a ni ve mai a, min ben kher a ngai a mi?" ka tihsak a zir. A lu a dawm ve a, a aw lah chu ka aw ang chiahin siamthiam lo mah sela hmeichhe aw angin a ti sin tho. 

"Iva ninawm tak"

"I rilru ka la peng thung alawm. In ngaihtuah vak vak suh i tar vat mai ang. Mihring te hi chu kan thu lo vet vet emai. Kan chung a thil thleng apiang pawm thiam tum mai zel hi a ţha zawk" a ti leh lawi bawk sia, thu awmze nei deuh hlek a sawi ka hriat vawikhatna. 

"Ipa in thihna ala hnaih ve lo aniang chu"

"Thi daih tawh" fan raihin awlsam zet tho siin a sawi. 

"Engtikah?" 

"Ka pa ka hre lo. Ka thinlungah a thi tawh ka tihna" a ti leh mai a, muangchangin lu ka bu nghat nghat a, ka zawt zui duh ta lem lo. 

"Hriata hmai duk chur kha in ţhian ho thil tih a ni maw?" ka ti ta zawk a. A nuih a za hle nghe nghe. 

"Ni nang. Ngatinge keimahni maw ilo tih aw. Keini chu thlahrang hrang nasa tawk lai kan en a, Hriata a rawn ut ruam ni hma zan chiah kha ania, Msa te inah kan riak khawm. Kan hlau a, a tlai tawh bawk nen kan riak daih tak tak a nia aw" inven tum zetin a ţawng nghal zuah zuah. Kan ti lo an ti vek a, Hriata lahin Msa a nih thu a sawi tlat bawk si. 

"Msa tal a chhuak em? Chhuanlam ho te te siamin a chhuak reng em ka tihna"

"Aih, Msa lawm hlau ber. Dar2 velah ka zunpui a, a mu leh thlap. Khawiahmah a kal lo. Hnuchhuina lam i luhchilh tihna mi?" a tih lai mekin Bsa'n a rawn ko a, a kal dawnah ka chhipah bawk a beng leh hram. A hma ai chuan a na ta lo deuh. 

Ban veleh tawi khawmuang lovin ka haw a, ka pa damdawiinah a awm a, ka nu in a awmpui a, dawr kan hawng thei lo. Nidang aiin in ka thleng hma. Ka naute pawh an school bang an lo thleng fel ve deuh chiah a, an ngui ve riai. 

"Han inthlak hmasa ula thingpui ka lo lum ang cheu" sofa ah bag ka theh thla a, choka ah lutin thingpui ka chhuang a, ka lehhawi leh chuan ka hnung a ka nau chiah lo ding run ka hmu thut a, ka phu nasa hle nghe nghe. 

"Thawm neih nachang hre ta che" ka ti vin tuarh. 

"Ka lo ti ang" ka hlauthawng chezia leh ka vin tuarh te kha hria angin a awm lo. A hmelah engmah a lang lo va, a ruak vek ni maiin ka hria. 

"Engmaw itih ang?"

"Thingpui ka lo lum ang a, rawng ka lo bawl ang. Nangchu lehkhazir rawh" ka hnung a a lo ding ka hmuh thut ai pawh khan a thusawi teh thut chuan min ti hlau nasa zawk hial ang.

"Nidang a engmah ti peih ngai mang si lo. Inthlak vat mai rawh i muanchan viau chuan thingpui a lo dai vek hman ang, hei a so ţep a nia" tiin sawiţhaih mah ila awmzia a nei tehchiam lo. Thingpui dai induh ţhak lo chi a ni chungin ka vauna chuan awmzia a neih phah lo. 

"Anu in a kal dawnah min hrilh a, keini aia hna ineih hma zawk chuan min chawm thei vat zawk dawn a, zirpeih vak lo mah ila sang deuh zir ka duh ve tho a, ka ţhiante zir thleng ka zir ve duh. Anu a awm si lo a, a ai ka lo awh ang a, lehkha zir char char zawk rawh" tih cheng cheng pahin choka aţangin min nawr chhuak dawr dawr. 

Kan awmdan chu kan te ber chuan engahvak a ngai tehchiam lo. Ala naupang deuh a, thil a la hrethiam tak tak lo. A awm ve tho mai. Ka inthlak laiin ka nau chiah Kimpuii chuan thingpui min rawn pe a, hetianga a tih ngailoh em vang hian ka lo zak zawk. Ama tan vek a ti tih ka hria, mahni hmasial zet mai a ni reuh a, chutiang hrevek chung chuan ka hlim tho tho. Ka zah rualin nuam ka ti takzet. 

Kimpuii chawhmeh siam chu a eitlak vak loh. A tumna hrim hrim pawh a lawmawm ti a ka ei luih bawrh bawrh laiin kan naupangber Lucy erawh a ţap lek lek. Kimpuii ber pawn a ei hleithei lo.

"Ka thiam ve zel mai ang" a ti sep sep reng a, a ţhen lai a chi hlawm awm te chu a rukin ka paih leh ţhin. Lucy thinin a tuar ta ngang lo aniang chu "I thiam loh chuan siam lo mai ta che Lalthlengkim" vin zet hian a ti ta nge nge. A thlengah fian a nghat bur a, a kham tau nghawng nghawng. 

"Ila thiam ve mai ang. Tumah thiam sa an awm hleinem" tiin ka hnem vat a, upa ber hi chu kan van pawimawh bik tak. Nu leh pa awmloh laia rorel tur ber kan ni a, puitlin a ngai bik takzet. 

"Ei lo tawp rawh se. Zan a a rilţam a buai pawn ngaihsak duh miah suh. Naupang te si chhe zit zet reuh lutuk mai" Kimpuii chuan a ti ve tan tan a, a chawhmeh siam chu chaw nen a dah kawp a, tui ti awm takin a eizui bawk. Chaw tello chuan ei a har bawk em a ni. 

"Nizanah anu nen a in ti ti ka hre phak a, apa a beiseiawm vak lo a mi? Nidangah pawh a awmdanah a damlo tih chu ka hre tho a, a dang bai reng a, a chau hma in a khuh nasa thei bawk si. Thawhah ang deuh hian a awm ţhin bawk sia, a ţhuchhuak lui hram hram a ang ka ti ţhin a, a thi vat dawn tihna mi? Keini chu kan awm thei mai ang a, anu engtin nge a awm ve ang?" Kimpuii bawk a ni. A mitmeng fiah kek kawk chuan min melh ran a, dawtsawi ngamna chi a ni lo. Class-10 a ni ve tawh a, engkim a hrethiam tawh bawk. 

"Ka hre lo le, Pathian thu thu. Kan mangan a hlau a, chau chung chungin a ţhuchhuak ve ţhin a, school kan kal hlan chuan a mu reng tho ang" ka thusawi chu a zuih ral ang a ni. Ka sawizawm thei tawh lo. In ah tumah kan awm si lo ang a, tun ang reng a a lo nat ţhin phei chuan amahin a in buaipui vek ang a, chhel ka tiin ka ngaisang chutih rual chuan ka khawngaih takzet. Ka nu ang tho a ka ţhianţha a ni ţhin a, kan inpawh hle. 

"Heivang hi ania puitling ka ngei na ţhin. Sawi nghal vek se kan duat ve thei ni mai tur. Na chung chung pawn dam deuh angin an awm zel a, an inzep thei leh lutuk mai" ala ti hlak hlak. 

"Min hmangaih vang zawk alawm. Kan hlauhthawn an duh lo a, vei nei run leh hlim lo deuh a school kan kal a ţhiante zing a kan awm te an hlau a, thutlukna an siam hmain keimahni min ngaihtuah hmasa dawn tih hrereng la, nu leh pa te dem zawngin ţawng tawh suh" ka tih takah chuan a hrethiam ve deuh. La phun zui reng tho mah sela a hma ang em chu a ni tawh lo. 

Lehkhabu chhiar pahin lam panin ka kal a, kan test tur ka en nawn leh thuak thuak. Thawm ka hriat miah loh laiin ka darah tu emaw hian min rawn kuah a, ka hawichhuak vat. Rin loh lutukin Msa a lo ni. School naupang dang hmuh laia min biak vak ngai loh vang a mak ti ka ni. 

"Eng thawnthu bu nge i bih leh tak ngur ngur a" tiin thawveng zet hian min zawt a, a hlim hmel takzet. 

"Kan test dawn kha i hre nange? Miss in a sawi laiin i awm ve reng kha" ka lo ti a, test tur lehzel a hrelo chu a beidawnthlak.

"Hre lo. Ka muhil aniang. Tommy nen inţhutthleng ula"

"Ngatimaw?"

"Ka bulah lo ţhu la, tlem ka lo en tawn"

"Teuh lo mai"

"A bul ţanna tal" tih pahin min kuai a, min rek lek lek a ni ber ang chu. 

"Ziah zawm tur i hre chuang lovang" ka awmdan hrehawm deuh mahse ka la ţang ve tlat. 

"A phuahchawp chhunzawm theih a, min entawn tir la ban hunah ka treat ang che" ka ding chawt a, a ni pawn min thlah chawp chilh nghal. Chhanna lawmawm beiseiin nui vur vur chungin min en ran a, min thlem dan ho ka tih lutuk vang a ding ka ni reng sia. 

"Restaurant a thil awm hrim hrim hi a rim thlengin ka hne hlui vek. Ka entawn tir lo ang che. Iduh leh zir ve mai rawh lukir" ka ti ta hrep. A nui tawp chiang hle. 

"Iva sual e aw" a ti bui bui lehnghal. 

"Hetiang a i awm reng chuan engtikahmah class-12 hi i chhuak lo vang. In ngaihtuah harh la lehkha zir rawh" 

"Zingkarah chutiang ka ngaithla peih lo" a ti hmuk a, a kal nal nal mahse rawn let leh vatin "Kha" tih pahin ka hmaiah thei tui vawt a rawn nawr a, ka vawn veleh a hma ang bawk a chakin a kal leh. Ka awmah tal hmehbel tur a nia, ka hmaiah berkher. A mawm loh nan powder ka hnawih ve vek tawh a, a thil min pek chuan ka hmai a ti huh hluam. Ka duhzawng tak a ni hlauh a, ni lo sela chuan amah vawm nan ka hmang ngei ang. 

Ka ţhutna ţhinah ngei nui sangin Tommy a lo ţhu. Dawhkanah inhawng huauin a bag a awm a, laksawn mai ka tum chuan a lo vuan bet ve tlat. 

"Hetah ka ţhu dawn. Puipuii hian test tur a thiam a, ka entawn duh a"

"Tho vat rawh" zawi tak si sehchilh rap rap tho si hian ka ti a, lu a thing. A nui ruh ruh reng te chuan min ti thinrim. Zingkar a Lucy titau thlem chhung rei bawk si nen, dawhtheihna ka nei tlem tawh takzet. Chair ke ah ka chhuih a, a che eih lo. 

"Msa thu thu in awm suh" ka ti ta ringawt. Tlawmah a la ang a a insawn ve mai ka rin nen a ţhu ţha sauh sauh. 

"Ka thuin anih hi ka ţhut. Entawn tur ka duh a, Miss Tei chu min hrem dan a zahthlak thei emai. Ka fail chuan min hrem dawn a, star ka nei sia min duh loh phah ang" a ti duah a, dawt a sawi tih ka hre bawk. Star neih lai bik te kha. 

"Ţawng duah lo khan i ţhutna ngaiah let leh mai mai teh" ka tih lai mekin bell a ri a, a kamis ah ka ţham hmiah. Ka rilru a hmanhmawh a, Miss a rawn luh hman ka hlau. 

"An en ţhup che" a ti sup a, a ni tak tak. A ţhenin hlau hmel an pu a, a ţhen an nui sawng. Ka thlah vat. Midang sawi tur a awm ai chuan tiin Msa bula ţhu tur chuan ka kal ta nge nge. Englai pawh hian tlawm zawkah ka ţang reng mai. Min tlawm tir ţhin tu te ka thlak danglam thei lo va, keimah zawk hi ka danglam a ngai. 

"A tui em?" ka ţhut rual a a zawhna lo siam chu chhang buai lovin ka thei tui la in loh chu ka phawrh chhuak a, Lucy tihdan zirin dawhkanah na zetin ka nghat chawrh. A mawng a sawi bawih theiin ka ring. 

"Ka entawn sak lo ang che. Tommy saw ka tih tir a ni lo a nia"

"Ka awih i ring em?"

"I awih leh awih loh a pawimawh lo. Ka tih a ni lo a, chu chu a pawimawh zawk. Ka tih vekah i ngai zel tho a, insawifiah duah ka tum lo" thutak zet hian a ti a, a sawi duah tho sia. 

"Anih leh ngatinge a insawn?"

"Kan hriat chin a inang reng. Heta ţang chuan hriat belh ka nei thei bik lo. Va zawt rawh" a ti nghut nghut a, a tum bur lehnghal.

"Ngatinge min chhan hmuk hmuk kher a" 

"Ka thil pek che i sawh chawrh khan min vaw chawrhah in ngai rawh" ring zetin ka nuichhuak phut. A hma ang bawkin min en ţhup a, midangin nui chung a min enliam mai laia Tommy-an a mit a siai bik chu ka hrethiam lo. Ka hmufuh angreng sia, ngaihtuahna dang a nei leh tawh bik a nih ka ring. Msa nen a kan inkar a eng emaw awm ang a ngaih tlatna ang kha. 

"Sawi ve tawh suh i inhmeh lo"

"Ka sawi zeuh zeuh ang a ka inhmeh ve zel mai ang" ala ti ţalh. Mipa ve si min hnial reng ringawt. 

"Ka chau nghulh reng dawn nih chu"

"A ţhat nasat chu. Ka phur haw ziah thei che ang a" a ti zel. Sawi tur a hre zel dawn tho a, a tawp a tlawm zawk nih tho tho ai chuan ka ngawihsan daih. 

Chawlh laia chhuak ngai mang hlei lo kha vawiin chu ka kal kual ve chiam a, school building hnung lamah ka kal a, mi an tlemin a nuam phian. Kal ziah tawh tur a ni ka ti rilru mawlh mawlh a, midang chim buai loh a awm hi nuam ka ti. 

Ban vuan hian Msa a lo ding a, a lang thei lo chin a bih dek dek. Khawi hmunah pawh hmuh tur a awm a, enthlak nei a ang riau lehnghal. A hmel hmu lo mah ila khaw en lai ngat phei chuan a sam aţang ringawt pawhin Msa a ni tih ka hria. Dim tein ka kal ţhem ţhem a, tih phut tum zetin a darah ka dawm thut a, a phu miah lo. A hmui a kut dah chungin a lo leh hawi a, a tih ang chiah a ti ve nghalin a awm ang chuan rem leh rem lovin ka awm ve a, kan va inhnaih tak. Tommy chuan min hmu ngat se zan a muhil thei lo hrim hrim. 

Thil ho mai mai ka hmu dawn maw ka tih laia ka thil hmuh berkher chuan min ţhawng takzet. Vuak chawrh ang mai ka ni. Ka mit sulh ni ten ka hria. 

Hriata leh ka ţhiannu Puipuii ngei an ni. A rehin mi kal zen zen lohna a ni bawk a tuman an hmuh an ring lo aniang an inrem hmel khawp mai. An nui dun leh ţhin a, a chang leh Puipuiin Hriata banah a kuah thuak thuak a, ţhian satliah an ang lo. 

"Eng nge an sawi i rin" ti a ka phun sur sur laiin rum zet hian min lo melh a, hmui ka chip hmak. Tommy khan a hre ve angem le? Heivang hian Hriata kha ring lo turin min hrilh lawk a ni thei angem? Zawhna ka ngah a, ka ţawng ngam bawk si lo. 

Kan enreng tih hre hek lo Hriata chuan a kuah ta nge nge a, ka meng phawk nasa viau ang. Ka inhmu lo a, engtiang chiah a zauin nge ka men ka hre thei lo. Thil dang erawh an ti em lo. School a awm an ni miau a. Bell rik a hun dawnah inbe miah lovin kan kalsawn ta nge nge. 

Zawhna ka ngah takzet. Zawh hmasak ber tur ka hre si lo. Thudik ka ngaithla ngam rih lo a ni mahna. Hriata vang a ni lo, Puipuii vang zawkin. Ka ţhianţha berah ka ngai ţhin a, engkim ka thlen na hmun a ni. Hriata min duhpui awm tak a a awm laia khatianga an pahnih a ka hmu kha mak ka tih rualin ka thin a rim tel bawk. 

CONT....