EIGHTEEN-5

EIGHTEEN-5

"Tunlai chu Msa nen hian in inzui nasa riau. An sawi sup sup tawh cheu nia aw, in inngaihzawn an ring a, chutiang chu a thleng dawn tawp si lo va tiraw?" a nui har har a, ka nuihpui thei der lo. Ka thil hmuh mawlh kha ka mitthla ah a cham reng a, ka ţhianţhaberin min bum hi na ka ti.

"Ka bulah ilo ţhu leh tawh dawn em? Tommy hi ka ning. Min ti rethei turin a rawn insawn a ni ringawt. Ka pen min thuhruk sak a, ka lehkhabu hmawr a thai pawp thul. Kan insual lo chauh tawh" a ti leh zat zat. Tih theih ka nei si lo va, Tommy talin chutiang a a lo ti chu a ţha khawp alawm. Nidang chu nise ka khawngaih ang a, tun ţum chu khawngaihna ka nei der lo. Ka na ngawih ngawih a ni ber. 

"Rawn insawn ka tum reng a, mahse Msa hi zirlaiah puih a ngai a, board a paltlang zo lo ang tih ka hlau a, a bula ka ţhut chuan a ngaihsak ve a, inkawm tam lo mah ila ka ţhian a ni ve tho a" ka ti zung zung a, ka inbengdaih hmasak te te phawt loh chuan a bulah ka ţhu peih tawh rih lo. Ka ngaidam thei chuan ka ring mahse ka ring nawn leh tawh lovang. Kum tam tak ka lo rin ve tawhna kha minute tlem te chhungin a ti chhe vek. 

"I ngaihven sawt riau. Hriata ngaihdan a ni lo ang e" a ti a, Hriata hming a lam te chuan engkim sawichhuah a zawhfiah vek mai ka duh mahse ţul ka ti rih lo, ka inveng ang a, thil dang hriat belh ka tum zawk ang. Hriata nen hian eng thil chiah nge tih an tum ka hre duh. 

"Hriata ngaihdan ka tan a pawimawh lo. Ka duh vang a a bialnu ni ka nih loh kha. Ila hre vek em?" ka ti ve kher. 

"Hria a ka inthiam lo ve tho. Mahse ka khawngaih a, ka hrilh ngam tawh lo. I star ţhin tho a, tihian nih pui rih mai mai rawh ka tih kha" a rukin ka ner nawk. Rei tak kan inkawm ve tawh chhung zawng khan milem mai mai a ni tih ka lo hre ngai miah lo. 

"Hun remchang ka hmuh veleh ka hrilh ang. Ka lo star tak tak lo aniang. A bialnu ka nih chiah hian thil rit lutuk ka phur ta reng a, thin thlak dan ka zawng mek" a awmdan a danglam ringin ka en reng a, a mitmeng thlengin danglam a awm lo. Min huat vanga a ti anih chuan min huat nachhan tur awm ang ka hre der si lo. 

"Msa i ngaihven thar a, i rilru a dik lo zo vek tawh a nih hi" a la ti zawk za mah a. 

"Msa ti reng suh. I pawi a sawi lo a, keipawh a tawpkhawkah chuan min pui ziah tho. I hmuh dan a dik lo ve hrim hrim anih kha"

"I ţan anih chu" ti hmakin hmalam a hawi a, bell a ri ta bawk a, Msa bula ţhu turin ka kal ve vat. Ka pa chanchin ka hrilh vek chungin vawikhat pawh min la zawt lo. Ngaihven nei lo leh midang te tihbuai chiah thiam ka tih ho khan ka ţhiannu ai hian an ngaihven vek zawk. 

"I bialpa leh i ţhiannu te a ruk a induat hiam hiam khan a ţhawng che em?" 

"Fiamthuna chi a ni lo. A hma in in lo hre daih tawh a min hrilh duh lo a ni maw? Bum kual mai mai theih in tia nga min nuihzat ngawt ang chu" ka ti zat zat. Ka ţap lek lek tawh niin ka hria. Midang hmuh laia chak lo tak ang a lan ka duh loh vangin ka insum mai mai. Ţhiante bum nih hi tu tan pawh a na vek. 

"Kha a chhe lamah min hnuk lut leh tawh"

"A chhe zawng a ka ngaih che i duh loh chuan min hrilhfiah la"

"Vawiin khan ka hre ve chiah. Ka awih bik lo a, nakinah Tommy zawt rawh" a ti leh ta daih. 

"I hre ngai lo tak tak maw?" ti a ka zawh chuan lu a thing a, "Ka awih ngai lo" a ti sup a, midangin an hriat ve loh nan a ţawng a zawi hle. 

"Ka duh vang a ka bialpa ni a ni lo. Puipuiin a lo yes ve tawp a, tih tawp ka tum mek. Hriata vang chuan ka na miah lo. Na angah min lo ngai miah suh ang che u" ka ti hlak hlak a, a lo ţhen sak thung. 

"I nat leh nat lohah kan buai lo. Mi an landan aţangin teh tawh suh. I teh sual reng mai ang" 

"Ve tak che hian" ka ti a, za vak lovin ka nui zui. A sual zia ka hrilh reng ţhin a, a la na thei nasa. Chuti chung chuan chimawm a la chhuah reng tho a, mahse ka sawi tawh ang khan a hun takah a rawn in lan thei riau.

Ni a ral ve bek bek zel a, ka pa a chau zual zel. A awmdan chu pawmthiam tum viau mah ila ka thei rih lo. Min thlamuan ţhin tu ber ka nu ţawngkamin min thlamuan zo tawh lo va, thil thleng mek chu kan te ber pawn a hrethiam ve tawh. Kan ngui ngiai reng hlawm a, nidanga inhau a invin vak vak ţhin kha hriat tur a awm tawh lo. Hnasang tak a nei ve lo a, kan buaipui ngai zawkin a awm a, amah a a tih theih a tlem hle. Chuti chung chuan pa nihna a hlen vek tho a, tuman a kal mai kan phal lo. Pawisa tam tak a nupui fanaute vur reng thei chiah hi pa an lo ni lo. Pa a nihna inhria a, nupui fanaute tan a pa nih tling tak te hi pa diktak an ni. Mi hausa tak tak pa ten an zir loh vang a chhungkaw hlim lo an tam em hi. Keini chuan ka nu leh pa te inhau lai kan la hmu lo va, thinrim a an inhnial ri takngial pawh kan hre ngai lo. Inhauh chang chu an nei ve ţhin ngei ang a, mahse kan hmuh lai chuan inrem takin an awm ţhin. Ka pa hi pa dam dup mai chi a ni a,a ţawng tam lo chung hian ngaina tu a ngah em em tho. Keini a fate ho phei chuan kan la thlahlel takzet. 

"Pawnah i ţhianpa a awm" Kimpuiin a tih chuan bang a sana lian intar ka en nghal a, dar8 a ri tawh. 

"Tunang hunah tu nge lokal a? Rawn luh tir mai la hei ka thil siam a hmin ţep" 

"A rawn lut duh lo. Va chhuak la i hre mai ang" a ti leh tawp a, a nui tet tet lehnghal. 

"Hmin law law rawh se"

"Ka lo vil ang" rang fe hian a ti leh a, Msa bak a nih ka ring ta lo. Kimpuii hi kei aiin kum2 in a naupang a, Msa nen a kan nih hun nghak rauh rauh ţhin tu a ni. A la naupang sia inti maithei mahse naupang te a kan ngaih te hian rin aiin hetiang lam hi an hre thui zek duh teh mai nia. 

"Thil dang tihsan lo la, a ut ang e aw" tiin ka chah thlap. School kal kan ngai vek sia, thawh hai palh a awm thei a kan tia a theih ang ang zanah kan siam lawk ţhin. Zingah kan ti lum leh mai a, kan unaua khirh ber, chawhmeh siam thar loh ei duh miah lo Lucy takngial paw'n a sawisel ngai lo. 

"Rawn lut ve mai ta la" ka ti chhuak lang lang a, kawtah naupang pawmin a lo ţhu a, a nau Gracy a ni tih ka hre vat. 

"Gracy nu nau a thih kha i hria em?" tiin min lo zawt daih thung. 

"Ka nu ti ve mai la aw. Vengchhung mi anih loh chuan ka hre ve lo"

"Nau mi lo awm teh" leh tawp mai a. Gracy chu chhuk tirin ka dinna lamah a rawn nawr a, zaizirin khap teh mah ila a hrethiam duh tlat lo. 

"Inu leh paten an hriat chuan an hau hrep ang che aw. Bakah a u ka ni ve lo a, ka bulah a awm duh teuh lo mai" Gracy dar a dawm reng chungin ka hnial ţang ţang. 

"An tlaivar ang. U Hruaii a haw rih sia, kha lah kha mitthi ka hlau a tia a kal ve duh si lo va, mi nung zingah ka rawn dah dawn" a ti fiamthu a, amah chiahin a nuihpui. 

"Khawnge i kal dawn?" 

"Puitea damlo ka kan dawn" a ti a, Puitea hi an ţhian ho zing a mi tho a ni. Ka ţhian tiin sawi vek thei tawh mah ila Puitea berkher hi chu pawh har ka ti riau. 

"Hruai ve mai rawh. Nau pahnih ka nei a, ka nu leh pate an awm lo ve tho. Rintlak a awm ka duh a, tihian in lamah ka awmpui mai. Thi lek lek anih lem loh te chuan inau pawh inah awmpui ve mai mai rawh" ka la ti tlat. Chhungte hian kan tih theih tawk a an ngaih chhe te bak min tih tir ngai lo. Chutiang lek pawh lenchhuah theih loh chu ţha ka tih loh zawng tak. 

"Ka rei lo ang. Min ring vek tawh sia, lo awmpui lawk rawh. Thil ka lo hawn ang cheu" tih zawngin min thlem leh a, hnial vak ngaihna ka hre tawh lo. A ngawi hmasa zawkah ka ţang leh ta nge nge. 

Gracy chu Lucy nen an inkawm thei phian a, min tibuai lo ang reng. Msa ngaihchan reng a ngai a, ka kutah Gracy a dah ve lak lawh tawh bawk si nen choka ah lehkha ka zir. Tv a an thil en ri ka hre pha vek a, an bei ring ang reng si. Rilru ah a lut mawh khawp mai. 

"Gracy u kha phone tawh rawh a mut a chhuak tawh a nia" Lucy in a ti lang lang a, biak ka tum ngun viau tawh. 

"A rawn haw mek. Thil a lo hawn dawn cheu a lo la meng hram hram ru" ka ti thla ve ngawt a, a chin ka hre der si lo. Thil hawn sawi takah chuan an thawm pawh a hma aiin a ring leh ta deuh. Ka kum rualpui chiah Msa hetiang mai mai a a awm lai hian keive nu leh pa chan ka chan a ngai a, tleirawl te chauh la ni mah ila nun hian puitling turin min nawr lui a ni ber. 

Dar11 velah a rawn haw a, Gracy leh Lucy an muhil tawh. Eitur eng eng emaw a rawn hawn chu dawhkanah a bun ruih a, ka en peih ţawk ţawk laiin Kimpuii lawmah a tla ve thung a, a duhzawng a thlang nghal zung zung. Ham bai bai chungin ka nau eitur thlang vel chu ka en reng a, naupang pahnih ta tur chu tlem te chauh a dah. 

Ka darah a tawk zeuh zeuh a, ka ngaihven duh mai lo. A tawp san duh tak lo ah chuan tum barin ka hawi chhuak a, ka nin zia a hmuh thiam ka ring. 

"Lokal lawk teh" tih leh kal a rual a, a pawimawh hmel angreng a, ka zui leh ta hnu hnu. Pawnah a lo ding ran tawh a, tlaiah ruah a sur a, zan dang aiin boruak a vawt deuh. A ngui angreng sia, tlem a din hnaih deuhin kut ka kuangkuah hlun. 

"I kal tur nen i boruak a va in ang lo ve. An lo hau che mi?" ka ti fiamthu a, boruak a zangkhai deuh ka beisei viau na a a rit tulh tulh emaw tih mai tur a ni.  

"Hriata sawi zawng zawng kha a dik vek" tiin bul a ţan a, Hriata thu min hrilh kha ka hrilh chhawng der si lo.

"A thil min hrilh hriat inei mi?"

"Aw, nangpawn i sawi kha, unau kan nia, ka hrevek. Ka pa hian school hi changtlung lehzual turin ka enkawl ang a, lehkha i zir ţhat peih chuan nakinah ka ai ila awh dawn nia min ti ţhin a"

"Chuti chu zir ţha ta che" ka lo ti vat. Inchhungah khan ka lo enchiang miah lo va, ka mut a chhuak tawh bawk nen ka lo ngaihven tehchiam lo. Pawnah ka ding harh a, ka hnaih a, ka belhchian hnu hi chuan ruih nei a ang ka ti leh pek. Damlo kan tur ni lovin rui turin a kal a ni maithei. Hma hun eng tak a nei a, a inti chhe phal zawk ngawt mai.

"Hriata nu leh pa leh Gracy nu. Ka pa ai ka awh an hlau a, Hriata nu leh paten ka pa ai chu Hriata'n la awh se an tia, kei angin sawisel a kai ve lo bawk a, Gracy nu in Gracy tan a duh ve thung a, ka pa hnenah min hek ţhin a, ka pa hian min ring tawh lo. School a buaina in sawi ţhin leh keimah nen a inthlun zawm ţhin te hi ka tih a ni lo. Hman zan a min hmuh pawn an sawisak zawk chu keimah ka nih kha. School pakhat ve mai an awh vang hian eng eng nge ka pa an la hrilh dawn ka hre lo va, ka thiamna ka sawiin a awih ve tawh si lo va, sawi ka tum tawh lo. Mahse...." a ti a, a ngawi ta daih. Ka pa in a khawhar changa a ţhut ţhinna tur a dah ţhutthleng ah chuan ţhu in cigarette a ţan a, ka hmuh vawi khatna. Ka hmuh laiin a la zu lo hrim hrim. A ţhutna chu mi pahnih len na tawk vek lek a ni. Kei teh lul rei tak a lo pai tawh a thuruk min hrilh ve duh chuan tiin a bulah ka ţhu a, thuruk hrilh na tlak a min ngai chu ka lawm a, ţhianţha ah min ngai ve tak tak tawh niin ka hria. Naupanlai aţangin kan inhre tawh a, a inhawng har zawk ngawt alawm. 

"Eng nge mahse?"

"Ka hlau" a ti leh tawp a, zawh zui zel tur ka van hle. Msa hian tumah a ring vak ngai lo a, heichu hman aţanga ka hriat tawh a ni. Kan naupanlai kha chuan ţhian pawh a kawm ngai mang lo va, tun a a ţhiante lakah pawh hian a inhawn vak ka ring tehchiam lo. 

Natna a nei a ni maithei. Sual ka tih ţhin rual a ka ngaihtuah tel ţhin a ni. Tuma hriatpui ve loh rilru nat rukna. Mahse tumah a ring tlat si lo. Kawngkhar awm lohna inchhungah a kalh khum tlat a, tumah an lut thei lo. Pawn lam aţanga a chhung a thil awm rin chhin mai loh chu tih theih a awm lo. Keimah ang a en luih tum tlat tan chuan tukverh aţangin tlem chu a hmuh theih a, ka hmuh ang sawiin ka zawt a, tumah a rin loh miau vangin min hrilh duh chuang lo anih kha. Tlem te hmu thei mah ila ka lut thei chuang lo va, chuvang tak chuan a na chu hnai takah ka en thei lo a, tihdam phei chu a theih loh bur. A nei tu berin a khar khip tlat si a, tupawn kan inrin siak vel mai mai a, hrechiang hawt lovin thutlukna kan siam a, a tawpah misual takah kan chhuah a, mahse rilru ţha tak a lo nih rualin natna a lo nei ru reng si. 

Zanin a hetiang thil a sawichhuak thut hi a chhan ka hre bik lo takzet. A na in a hnawh tawt lutuk tawh ang a a puak chhuak ta a ni maithei. A nih loh paw'n ka rintlak tih a hria ang a, hman aţanga a sawi chak tawh sawichhuak turin ruihhlo in huaisenna a pe a ni maithei bawk. Min hnawh tu kan sawi chhuah a, kan anchhuahpui hian kan thawl ve hawk ţhin si a, mipa pawh hmeichhia pawh kan ni ve ve ang. 

"Eng thil nge i hlauh?" tiin ka zawt leh ta tawp. A ngawi leh reng tawh a, zawhna ka siam loh chuan engmah a sawi lo tawp ang. 

"Ka pa hian min huat ka hlau" a thusawi chu mak ka ti lehpek. A pa runluih nan buaina a siam emaw ka lo ti char char ţhin a, mahse a pa hi chan a hlau takzet niin ka hre tawh. 

"Ka len lai khan ka nu in min rawn bia a" a ti leh a, hei erawh mak ka ti vak lo. Nu leh fa inzawmna hi chu a thuk em a, engmahin a ti chat thei lo. 

"Inu nen in la inpawh viau a ni maw? A nawm phian dawn chu. School kal rual inih hma aţangin in awm hrang a, a fel hle mai" ka ti luam. A chhungte vangin a pa in a haw telh telh a, a hrang tial tial a, chutiang a nih laia a nu talin a la hrereng chu ka lo lawm ve em em. A dawt leh a a thu min hrilh erawh chuan a hma zawng aiin min ţhawng zawk. 

"A bulah ka awm tawh ang. Thlaleh aţangin" 

"Thingtlangah maw? Ngatinge? Helamah zirna a ţha zawk a, ipa hnuaiah ngei ţha deuhin pass tum zawk la" ka ti mawlh mawlh ringawt a, ka phi tak chengah chuan a nuih ka ti za deuh nge ngui bur si kha a nui chhuak ta hawk. 

"Ka inthukru dawn. Ka nu remruatna a nia, ka nu thil tih a dik lo ngai lo. A fing a, rem a hria. Thingtlangah school ka kal ang a, ka luck viau ang" a tih laiin na zetin a lu ah ka beng. 

"Fiamthuna hun anih loh hi. I ţhiante engtin nge an awm ang? Min tibuai reng mahla keipawn ka ngai dawn tho che sin"

"Min ngai dawn maw?" a ti ta hluai. Ţhian te ngaih te chu mihring pangngai dan a ni reng sia. 

"Ngai dawn e. Min zarbuai reng ţhin hi ngaiah ka nei tawh. Mood fuh loh deuh ni a min be buai reng tur i awm loh chuan ka khuahar ngawt ang. Ka---" ka tih lai mekin nghet zetin min kuah a, min thlah leh vat thung.

"Nangpawh ka ngai ang che Rebecca. Khang thil zawng zawng ka hrilh nachhan che kha i hre duh em?" 

"Ka rintlak zia i hria a, ţhian kan ni bawk a"

"Ni lo deuh"

"I rilru a hah tawpkhawk a, tlemin i rui deuh bawk a, i huaisen sawt a"

"A ni chuang lo" a tih lehzel takah chuan ning zet chung hian "Nih leh eng nge?" ka ti hlar. 

"Ka duh che" 

"Engmaw?"

"Naa...miin ka duh che an tihin "Engmaw" ti hu hu suh. A bikin keiman ka duh che ka tihin" ka rilru mang vek lo mahsela ka bing ve luk luk chuan ka hria. 

"Engti zawng a duhin nge?"

"Engti zawng pawn. Eitur lam zawng ni lo vin. Chhiahhlawh tur ang zawng a duh ni lovin, ţhian tur lam zawng chauh ni lovin a dang zawngin eng lam zawng pawn ka duh vek che" ka mitah tak min en a, hetiang lam hi Msa nen ngat phei chuan ka la ngaihtuah chhin loh vangin reitak pawh min en se ka zam bik kher lovang. 

"Teh thut che chuan"

"Naa..Rebecca zeilo viau suh. Nakinah ka la hrilh ang ka ti ţhin a, mahse ka nu leh pate a rukin an lo inbe rem tawh a, ka nu bulah ka awm daih dawn. Hun ka la neih laiin ka hrilh che anih hi" 

"I insawi khawngaihthlak hmasa tihna mi?" ka ti leh hram. 

"Aih. Ka thusawi vang khan min khawngaih turin ka duh lo che. Dawt leh zep ţhen nei chunga bulţan ka duh loh vang zawk. Dawt leh thuruk tello a bulţan ka duh. Min ngaihdan ţhin kha a dik lo. Misual ka ni lo, ka thin a chhia a, rilru mumal pu lo va thil tih chang nei mah ila ka thiltih emaw itih tam zawk kha keimah ka ni lo. Kan chhungkaw chungchang ka zep tlat ţhin kha ka sawichhuak vek a, zep ka nei tawh lo. Chuan ka duh che" a ti leh ngat a, sawi tur ka hre miah lo. Ka hrawk a ro vek a, chil lem tur takngial pawh nei lo ka ang. 

Ka chhanna a nghah reng takah chuan "Sawi tur ka hre ve rih lo" ka tih ta nge nge. Ţhian kan ni thei kha ka lawm takzet a, mahse hetiang daih daih hi ka beisei ngai lo. 

"A pawi lo. Sawi tur i neih hun hunah min hrilh ve dawn nia, ka kal hma a hrilh hman che ka duh a, ka kal hnu daihah pawh ka ngaithla thei. I hriat khan ka duhtawk" a ti a, rin aiin min hrethiam leh ang lawi sia, ka hmuhdan a dik lo laklawh a, tihluihna hmang a min sawi duh mai te ka ring a, mahse chutiang chu a lo ni hauh lo. 

"Lo awm rawh ka nau ka va hruai lawk ang e" a ti a, inchhunga a luh hlan chuan ka ţhutna aţanga tho in ka veitawn sek. A ngui em em a, chumi hnuah a uang leh a, chumi hnuah min duh thu a sawi leh a, dawt leh thuruk tello a bulţan aduh anih chuan kan inkar a inhriatthiam lohna awm thei zawng zawng ţhian anga a sawi dun theih laia khatianga a zawng zawng a sawifel mai kha a duh a nih ka ring a, a insawi ang anih chuan min duh ve tak tak anih hmel. Mahse kum18 chauh kan la ni a, engtia rei nge kan kalpui theih ang? A lakah eng rilru ber nge ka put pawh ka la hre lo a, min nghak reng thei kher angem? Tleirawl lai hi chuan rilru kan thlak thleng zung zung a, ngaihzawng kan thlak reng a, nakin hun zel tur chu ngaihtuah thleng pha ţhin mah ila hlim tak a tawp tur hian kawng bumboh tak zawh ve a ngai a ni tih kan ngaihtuah thleng pha lo va, kawng bumboh zet chu kan han zawh chho ve a, thui pawh zawh lovin kan tawp san mai ţhin. School naupang nih laia in ngaizawng innei hi ka hre tlem khawp a, ka zirlai tibuai tu mai mai a nih ka hlau a ni. Thil thleng thei zawng zawng ka ngaihtuah thlen theih vek laiin a lak a ka rilru put hmang erawh ngaihtuah ngaihna ka hre lo. 

A nau a rawn kaichhuak a, a kal danah pawh a tho phang tih a hriat. Msa thil hawn Kimpuiin a phal chin a pek ve kha a khai leuh leuh bawk. 

"Min thlah turin ka ti tawh lo mai ang che min hau leh hrep palh ang" nui chung hian a ti a, keipawh ka lo nui ve tawp. Gracy a tel ve vangin bike dahna thleng chu ka zui ve. 

"Hmun dang a ka awm daih hunah chuan nang leh Gracy ka ngai ber ang" a tih chuan tlemin ka lai ve deuh. 

"School dangah iluh hunah chuan ţha deuhin zir tawh ang che" ka ti khar khar a, ka zahzel a ni mai ang chu. 

"Fel viau mah ila lehkhazir peih loh hi chu ka pian pui a nia, khalam kha chu nakinah min la hrilh dawn nia" a tih hnuah a kun a, Gracy biangah dawmin nelawm zet hian a nui leh a, min tihbuai laia a nui hmel angin a ngeiawm ve lo. 

"I harh chiang tawh em?" aw dam dap hian a ti a, Gracy pawh a lo bu nghat nghat. 

"Thlen veleh i mu lehnghal dawn nia" ti a a nau a hrilh hnuah ding chhuak lehin "Kan haw pui ang e. Naktukah ka rawn sawm ang che" tiin min hrilh ve thung. 

"Ngai kher lo. Bike ah ka chuang peih lo"

"Ke in kan kal dawn nia" a ti lehzel a, an tlan liam thlengin kawtah ka ding. Tho phang viau mahse Gracy paw'n a ban a vai ve nasa. 

A bike thawm a reh fel hnu chuan ka thaw halh a, Hriata thil min hrilh kha Msa chungchang chu a dik vek maithei. Mahse an chhungkua a Msa ngaihsak ang a a insawi kha chu dawt vek. Dawt vek a ni tih ka hria. Ngaihsak se Msa dinhmun luah lan ţalh an tum miah lo vang. Chhungkaw rethei zawk te hi hausa pui pui ai a hlim zawk an va tam dawn em. Pawisa hian engkim a ti thei a, thil tam tak a lei thei. Hlimna anih rualin buaina thlen tu leh chhungkaw ti darh tu pawh a ni thei tho. Tih theih a van ngah tak. Mahse Pathian hre lova pawisa kan ngah ringawt chuan hlimna a thlen thei chuang lo. Msa te chhungkua ang chiah hian. 

CONT..