EIGHTEEN-6

EIGHTEEN-6

"Rebek i hman tawh em? U Msa pawnah a awm tawh" ti a Kimpuii au lang lang ka hriat takah chuan bag ka ak sawk sawk a, darthlalangah ka in thlek leh hram. Makeup a hman theih miau loh vangin ka sam mar pang a ka ţawn san vah tawh chu a mam ţhat loh hlau ni awm takin ka tuai nawn thuak a, mahni chauh a kal ţhin khan nghak tu ka nei ve ta ran mai. A awihawm loh zawk. Ţhian kawm tam chi nih loh hi chuan kan maltlat reng a, midang nen a awmkhawm luih hi kan thiam lo zawk mah. 

"Min rawn sawm kher a ngai hleinem. Mahniin kal ve ve ila school ah kan inhmu mai dawn alawm" ka tih nang nang lai te chuan min lo enrengin a nui suk a, duhna nei ve miah lo angin inhre mah ila ka lai tho. 

"Kan kal dun rei tawh dawn lo e. Ka lo sawm ziah ang che" tih leh ka banrek a vawn a rual a, ka thing thla rang hle. 

"Naupang kan nih tawh lo hi. Inkaih kher ka duh lo" ka ti hlar a, a tum lui bik lo. A bike hmuh beiseiin ka hawi vut vut a, min kalsan daih. 

"Bike i keng lo tak tak a mi?"

"Aw"

"Ngatinge?"

"I hlau sia" ngaih pawimawh ka ni ngai vak lo va, ka hlauh vang mai a a bike duhtak a keng lo chu ka lawm rualin ka zak ru hle. Ţhianţha hmu ve hleithei lo chi ka ni a, ka kawm tam loh nen ka kawm ve chhun te hi mahni hmasial leh ka ţhatna duh vak lo tu an ni duh tlangpui. Puipuii kha ka ngaina hman viau a, mahse a ni pawh midang ang tho. Thil engmah hriatchian la nei lo mah ila Hriata nen khan eng emaw tum an nei tih ka hrethiam a, Msa thusawi ka hriat hnu ah ngat phei chiang ka chiang viau tawh. 

"Lokal chak ta che" ka hma daihah a awm tawh. Rilru kawm melh melh chungin a hnungah ka kal a, ka lo ngaihven lo bawk nen min koh meuh chuan kan inhlat tawh angreng. Tlemin ka kal chak ta deuh a, min nghak tur a a din khawmuan ve bawk vangin inhlat viau e tilo chuan ka umpha har lo. Thaw hluam hluam chungin min lo nghahnaah ka ding a, min chawlh pui ka rin nen kal a rawt lehnghal a, kawng a chho deuh nen a hahthlak takzet. Muangchang a hah lutuk lo a kawngzawl lai thlen hi ka duh dan ţhin a nia, Msa hi rin aiin a kal thei daih. 

"Nitin i kal a, eng tin nge ila hah theih zawk a?" ti a phun nuah nuah chungin ka hnungah a kal a, ka hah lutuk loh nan min nawr kal. 

Ka hahdam deuh hnuah "Thingtlangah chuan hnai te ah school a awm ang a, taxi a chuan ngai miah lovin in thleng thei bik ang a, khawpui aiin in inpawh daih zawk bawk ang a, a nuam phian ang" ka ti a, min nem lovin ka rualin a kal tawh a, taxi stand kan thleng ve ţep tawh. 

"Lo awm ve daih la"

"Ka theih loh zia kan hriat ve ve hi. Keipawh kan school aţang hian class-12 hi ţha deuh a zawh ka tum ang a, mahse ka college ka kal hunah chuan ka ţhiante hi kal rual pui tawh lo ila ka ti. A bikin Puipuii, ka rin tehreng nen a rukin min lo bum reng a" tiin ka vui ve. Ka lung a la awi thei lo va, ka la na takzet. 

"Tommy te ilo kawm daih ang a, mahse an duh ve che chuan ka hnek hrep ang" a tih chuan ka lo nui vak. Amah nen hian zir dun char char thei ila ka duh ber. Mahse kan inhmu lo ţep tawh sia, a bul a ka sawi kha ka ti tak tak. Ka ngai viau ang. 

Taxi kan hmang a, nidang angin midang kan nghak lo. Kan pahnih chiah a chuan a duh tlat. A hnungah kan ţhudun a, ka bag kuah betin pawn lam ka thlir a, ka ţhian neih chhunin min bum aţang chuan school pawh a ninawm ve ţan tawh. 

"Thil i ziak ngai em?" ti a min zawh takah chuan muangchangin a lam hawiin ka inher a, "I ngaihtuahna leh i thil tawn vel te i ziak chhuak ngai em?" a tih zawm leh a, lu ka thing ne ne. 

A bag aţangin diary ni awm tak a rawn phawrh a, a kawm a pawl a, hmeichhe duhzawng tur chiin mawi takin a inchei bawk. Chu thil chu min pek pah hian "Ziak tawh rawh. Tukin ah kan veng kawnah ka lei a, a nalh ber ka thlan a nih kha" intithei fe hian a inti a, a thil tih chu ţha a ti lehpek. Ka awh ve tho vangin hreh viau mah ila ka la ta tho a, mi thil pek ka la mai mai ngai lo. Msa hnenah pawh "Tunchiah ka la ang. Nidangah chuan thil min leisak tawh suh" tiin ka hrilh. 

"Umm..lei lo ang. Pawisa ka ngah vak bik lo hrim hrim a" nui chung hian a ti a, a diary min pek chu ka keu a, nidangah ka lo ngaihtuah ngai miah lo a, engmah inziak ala awm lo bawk a, ka ziah chhuah tur ho ka hriatnaah a inlar nghal zut zut. 

"Ka lawm lutuk. Ka hmang ţangkai viau ang" ka bag a khung ţhat pahin lawmthu ka sawi. Nei lo chung chung a min leisak anih phei chuan a hlu lehzual. 

"Midang i hrilh ngam loh te ziak chhuak zel la, i vei run lo ang a, i vei run loh chuan i ipik lo deuh ang a, sawi lo mahla i ziah thlak diat diat chuan a zia hrim hrim" ti a min hrilh chuan nui sen sen chungin ka bu nghat nghat. 

Kawng pengah kan chhuk a, ke a kal a ngai leh tawh. Msa nen a ni tho a, nidang angin kawng a thui ka ti tawh lovang. Kan hma lawk a kal te lah chu ka hmuh duh loh ber Puipuii leh Hriata te anni lehnghal. Engkim ti tawp tawh mah ila Hriata hmuh hi chuan ka awm a nuam lo zel. Fel hmel deuh ang a awm chung a min bum reng vang anih ka ring. Puipuii nen chuan ţhian angin an la awm chhunzawm zel a, a ruk a inhmuh kha an la ching em ka hre lo. Ka ngaihven peih lo. 

"Ipa chuan school hi Hriata kut a a dah duh tak tak i ring em? Dam chuan kan zir ve zel ang a, school enkawl thei inni vat mai dawn a, in inrual chiah lehnghal" ka ti a, kan hma lawkah ka mi sawi mek te an kal a, an fing si, an hriat palh hlauin ka ţawng zawi khawp mai. 

"Ka hre lo. Ka enkawl chak hran lo. Tuina zawng a in ang lo va, mahse min chhuhsak chuan an lawm viau ang. Ka nu vang tal a ka tih ve a ngai a, Hriata hian kei ai chuan a enkawl zo zawk ang a mahse fa te chu thlan zawk awm tak" a ti ve duah a, thil a danglam takzet tawh. Msa nen a mimal nun ngei kan sawi dun thei tawh a, midangin an hre ve miah lo lehnghal. 

"Nia a fa ngei chu a dah hmasa zawk vek ang. Inu te awm naah Hriata nu leh pa te an awm ve tho sia, inu leh pate rorel dan hi ka hrethiam chiah lo. Mahse i tan a ţha tur anih ring phawt ila, ipa nen hian inpawh em em lo mah ula a hmangaih che tih hrereng la, nakin a hnehna chan tum ranin ţha deuhin zir rawh" ka ti a, ka fuih mawlh mawlh. A chak loh lai hmuh chak ngawih ngawih te hmuh lai hian tlu in a chak lo palh ang tih ka hlau a ni. 

"Min ngai dawn tak tak em?" min zawh ka hlauh ruk ber min zawt leh tawh. A tih tut tut ka ring reng a, ka nghak ang che a tih pawh khan mak ka ti reng a nih kha. 

"Ngai dawn e. Ka mal leh dawn a, mahse a rei tawh dawn chuang lo a, tluang deuhin ka zo ve thei mai ang. Ţhian ka kawm tam loh leh lehkhazir na hun ka ngah ting a ni mai" ka aw ki chu zangkhai viau mahse ka chhungril erawh a rit nulh thung. Khawvelah hian mihring kan tam nen ţhianţha tak tak hi an lo vang takzet. 

"Ka rawn tlawh ţhin ang che. Bike ka nei a, a harsa lo ang" a ti liam puat a, a tak a thlen ka ring hran lo. Vei em em nei lo angin ka hre laklawh tawh a, anu bulah awmin school tharah a lut ang a, ţhian a chhar vat ang a, keipawh min theihnghilh zui ang. Chu chu ka ngaihdan a ni. 

Msa te ţhian ho zingah hlim takin hun ka hmang ve a, thil lo thleng tur hi hre lawk ila chuan an zing a nui uar ber berah khan ka ţang awm si lo va. Ban dawnah class aţanga Sir a chhuah hma hretin kan zirtirtu pakhat hian eng emaw a rawn hrilh a, an thusawi kan hriat phak loh vangin kan lo thlir ţhap. Principal hnen aţanga thuchhuak anih kan ring fur awm e, mahse Sir chuan min nghawng dawt thei thil a sawi ta tlat. Ka pa thih thu chu. 

Sawmpuia bike hawhin Msa'n min phur haw a, kan inchhungah mi an lo zi luih luih tawh. Hmanhmawh zetin ka lut a, ka nu ţap ri ka hre zui a, hospital aţanga ruang a thlenna a la rei lo a, an lo la buai khawp mai. 

A ţha leh vat mai ang ti a ka ngaihtuah luih tlat laiin ka pa chuan min kalsan a, a ruang hmu reng mah ila ka awih miau loh vangin ka ţap thei lo. Nghet zetin kut ka hum a, ka kuttin in ka kutphah vun te chu a ti pilh phung thei ang tih tur khawpin ka hum nghet mahse na ka hre lo. Thi zawih zawih mah sela na ka hre thei kher lo ang. Tui tak a muhil ang maiin a awm a, harh leh vat turah ka ngai a, mahse che lovin a mut ngaiin a mu reng. Min be tu an awm deuh rengin ka hria a, a ţhenin min pelh pahin min su a, chung ho chu tu te nge an nih ka hre thei lo. Ţap chuah chuah ri leh inchhung uap lutuk te, chhum chhah takin min zial muai muai te leh eng eng emaw rit tak takin min rawn delh chawrh chawrh mai te chu ngaithei lovin kan in chu ka tlanchhuahsan ka nge nge. 

Khawilam nge ka pan dawn ka hre lo va, kan veng a hmun reh lai ber, naupang kan nih laia kan infiamna ţhin hmun chu ka pan ta ngawt a, ka kal mawp mawp a, tumah hmuh ka nei lo. Nge ka hmu ang a ka hre lo zawk? 

Phul chungah ka ţhu hnawk a, kan naupanlai ang em chuan a nuam tawh lo mahse hetiang hmun hi a vang a, ka hahdam ve na hmun a ni. Hnim ţo a awm ve sung na a sang tak tak a ţo ţhin te kha a awm tawh lo va, pangpar hmuh tur a awm tawh lo. Motor a ding pheuh pheuh a, chung zing a pakhat phenah chuan ka ţhu. Ţhut chawlhna tur a an siam a chung awm vek hi a la awm ve a, a hlui tawh viau na a mi tam tak tan chuan a hlu hle. Mahse a langsar em a, helai hmun a ka kal chang chuan chawlh hahdam nan ka hmang ve ngai lo. 

Melh ngai melh ngawt ngawtin ka ţhu ta reng a, zel a awm ang mai hi niin ka inhria. Ka pa dang bai a mu kha ka mitthla ah a cham reng a, chuti chung chuan ka pawm duh chuang lo. Darkar a liam zel a, ka huh hluam tawh. Ka mang vek a, huh nasa tawh viau mah ila ruah sur chu ka ngaipawimawh duh chuang lo. 

Ka pa chanchin ka hriat aţang khan ka la ţap miah lo va, kan inchhung kha zing a ka kalsan ang ang khan la awm turah ka dah lui tlat a, ka pa chu a lo haw anih pawhin dam takin a lo haw ang ka ti rilru mawlh mawlh a, kum18 chiah ka la ni a, pa nei lo rual ka la ni lo hrim hrim. 

"Rebecca....keimah aw" ka aw hriat ţhan em emin ka hming a lam ri ka hria a, ka ţhutna aţanga hnai te ah a ni. Mahse a hmel tur awm ang ka hre thei lo. Ka pa hmel chiah ka hmu thei a, khum a an muttir lai leh hlim tak a a nui lai a inlan chhawk reng. 

Ka dar a min khawihtu an awm takah chuan zêl ang a ka awmna ata chu harhchhuakin ka phut vangin ka taksa a che det a, tim daiin ka awm zui a. Min rawn khawih tu chu ka ngaihven zawm chuang lo. Tunah rih hi chuan keimah chauh a awm ka duh. Engkim a pangngai leh vek thleng a keimah chauh a awm ka duh. Mahse tu emaw hian tih luihna hmangin min pawt tho lawp a, a taksa lumna ka hriattheih hma zawng chuan min kuah tih ka hre lo. Nghet zetin min kuah lehnghal. 

Mi tam takin a tawm hul nan a an lo hman ţhin leh an chawlh hahdamna ţhin a min hruai luh hnu phei chuan ka harh chiang ve ta. Thil thleng zawng zawng ka hrechiang ta vek a, thil tak tak chuan min deng lehin classroom a ka awm laia Sir in ka pa thih thu a sawi aţang khan a vaiin a rawn let leh vek. Thil tak takin min den leh takah chuan ka na leh a, awih duh lo mah ila ka pa chu a thi tak tak tih ka hria. Ka na takzet. Ka na lutuk chuan mittui a ko chhuak ta nge nge a. 

Ka hawichhuak a, lainat tak a min lo en tu leh thil tak tak a min hruai lut leh tu chu Msa a lo ni. Thil thleng engkim mai chuan ka thinlung hi a ti na a, a tak tak ka ngaihtuah nasat pauh leh a na hi tawrh a har ve zel. Zêl ang a awm leh a, engmah hre lo tawp a awm ka duh mahse tunah chuan chiang takin ka hre vek tawh.  Ka ţah lai chuan ka hnungah lo chulin a thiam ang angin min hnem ve a, reitak tuma mitmei veng lo va duhtawk a ka ţah hnuah ka inbengdai ve thei hram. 

Ruah sur a bang a, kan bul vel a hnim hring leh lei aţanga rim thianghlim tak lo chhuak chu ka hip vang vang. 

"An zawng nasa che a, inthlak tur a ka haw  laiin Kimpuii mangangin min rawn bia a, ka zawng kual nasa tawh che. Lo kal rawh haw tawh ang" tih leh ka ban a vawn a rual a, tun ţum chu ka lo hnial lo. Thil thleng zawng zawng ka hrechiang thei tawh a, kan hnenah ka pa a awm ve reng thei tawh dawn lo tih nen. Ka hriatna te a lokir leh tawh a, ka pa bul a hun hman ve ka duh tawh. 

Bike a chuan chu nidang angin ka hlau tawh lo. Ka harh chian phah zawk niin ka hria. Kan vengchhung a awm ka nih miau vangin in kan thleng har lo va, pawn lam a awm te leh inchhung a awm te, tu mai pawh chuan min en hrek hrek tih ka hai lo. Ka paltlang mawp mawp a, ţhenkhatin min lo pui vatin ka inthlak sawk sawk a, ka pa rual chu ka kil ve ta nge nge. 

Zanah ţhalai tam takin min men pui a, chhiat tawh chiah hian mizo nih hi a lo nuam takzet. Rual ka pawl lovin chhiatni ţhatni ah ka inlan tlem em em a, chuti chung chuan inchhung khat ţhapin tlaivar an la awm. Mizo tlawmngaihna hi a lo la thi tak tak lo a ni tih thlengin ka hriat phah. 

Ka rin loh pakhat dang leh chu Msa a ni. Vawikhatmah min kalsan lo va, an ţhianho in an awm ve reng. Ka beisei ber Puipuii ka hmu lo thung. A vui ni a kan class ho an lokal pawhin Puipuii chu a lokal ve lo. Midang bulah thu a lo chah tho a, a damlo niin an sawi. Mahse ka awih lo.

Karkhat hnu velah pangngai takin school ka kal veleh a, ka pa chu ngai viau mah ila midang zingah ka lantir tawh lo va, midang te hmuh laiin ka ţap tawh lo. A kal tawh a, a lo let leh tawh lovang. Ţapin au vak vak mah ila a lo kir tawh dawn lo. Hmalam pan ka zir a ngai tih ka hria a, kan hnenah awm tawh lo mahse a chhuan tlak a awm ka tum tho. Chuvang tak chuan ngawrh lehzual a lehkhazir ka tum ruh hle. 

"Rebecca i bag a inhawng huau a nia" classroom lam ka pan laia hmeichhe au ri ka hriat chuan ding chawtin ka bag ka la thla sawk sawk a, a sawi ang tak takin a lo inhawng huau. 

"Hei hi i thlauh a, iva in ngaihtuah nasa awm ve. A tlak lai i hremiah lo a ang" rawn ti lehin Msa diary min pek kha a lek va a, "Ka chhiar miah lo ania" a tih zawm vat a, a nui sen sen lehnghal. Kan class a mi tho a nia, inkawm ngai lem lo mah ila kan inbe ve zeuh zeuh. 

"Ka lawm lutuk Awmte. A tlak lai ka hre miah lo tak tak" ti a ka hrilh chuan a nui hmel a ral riai riai a, lungngai hmel a pu.

"Ipa kha pawi ka tihpui lutuk che. Keipawh kum-10 ka nih laiin ka pa a boral a, ka hrethiam che. A hlimchhawnah hi chuan a na duh a, a rei ang a inkhawharna te pawh a zia ve tial tial mai ang" a ti leh siam siam a, ka lo bu nghat nghat ringawt. 

"Kal ang. Kawm tur iduh chuan ka bulah i lokal ţhin dawn nia, Puipuii leh Hriata an inzui chawt sia, i mal lutuk palh ang" zangkhai vah hian a ti a, ka banah a kuah a, chak zetin min kalpui. A harhvang a, a ţawng a rang a, a mah hrim hrim hi ni zawk zawk chi a ni hrim hrim. Mahse fel an ti vek. 

Break ah Msa nen inchung zawlah a rukin kan kal a, tiffin kan ei dun. Ka rilru put hmang la hrilh ve lo mah ila ka bulah min pui turin a awm reng a, a chang leh ka ţap a thlem a, a chang leh a thiam ang angin min hnem ve a, thil ka eiloh a hlauin min vil deuh chawt. Tlai chaw eidawnah a haw chauh ţhin a, midang mitmei ven a ngaih vangin zanah a rawnkal ngai lo va mahse min rawn be reng zel. School ka kal loh chhung zawng pawh khan Msa hi chu nitin ka hmu ziah. Ka duh ve leh ve loh hrelo mah ila ka hmuh loh chuan ka ngai ţhin a, hmun dang a a awm daih tur hi ka huphurh tial tial. 

"Tunkar chiah school kan kal dun thei tawh dawn ni maw?" ka ti hluai a, hun a tam tawh lo kher mai. 

"Aw karleh aţang chuan nangmah chauhin i kal tawh dawn. Min ngai mah la ţap miah suh ang che" a ti fiamthu a, ka sawichhuak anih loh chuan ka pa chungchang a sawi ngai lo. 

"Ka ţap peih lo. Ka ngaih che ka ring tawh lo reng reng. Ka bulah i awm char char a, ka hne deuh tawh che" ti a ka fiam let chuan a ngaihdan a ni vak lo nge a nur nang mai. 

"Min ngaih loh chuan ka hnek ang che" ti a min vau leh tak khur khurah chuan ka lo nui hak hak a, hnekah min vau ziah a, a ti tak tak dawn lo tih ka chian em vangin ka la hlau chhin eih lo. 

"Ka ngai ang che iti ve ziah a, ţhian dang ineih hunah min theihnghilh leh rang awm hle sia"

"Ka thih hunah chauh ka theihnghilh ang che. Leh lo, ka thih hunah pawh ka rawn tlawh ziah tho ang che"

"I mawl a mi?" a ban a nem pah hian ka ti tuar a, ka nuih a za hle tho. 

"Min theihnghilh ang iti anih kha. Mihring ka nih loh hun thlengin ka hrereng dawn che tihna a nih chu. Vai ram a thlanah daih min phum mahse ka rawn zawng hmu chat thei tho ang che" thla ka hlauh zia hre miah lovin a la ţawng pawr nasa mai.

"I thih thleng min hrereng la a tawk. Thih hnu lam kha chu ka phut lo aw" aw ki hniam deuh zawk hian ka ti veleh. Ngai viau mah ila thla kher hi chu ka duh lo bur. 

"Ka thih hun tur ka hre si lo a, naktukah lo thi ta ila ka hre rei lo dawn che e"

"Sawi tawh suh mawla. Min tibuai tur hrim hrim pawn i damreng ang chu"

"Tibuai tur che ni lovin duat tawh tur zawk che in" inla zei fe a a tih chuan ka lo zak. Ka melh khai khai a, a hrethiam teuh lo. 

"Khang thil te kha khawi aţangin nge i hriat?"

"Nangmah vang hian love story en ka chin phah. Vai mizo a an lehlin thlengin ka en vek" a ti a, min rawn hnaih hretin ka beng bulah "Tommy nen" a ti tel hram. 

"Hmuhnawm iti em?" tiin ka lo zawt vat. A ngainat loh zia leh hmeichhia in kan sawikhawm chang a ho a lo tih ţhin zia hrereng mah ila ka zawt chak ve hrim hrim. 

"Ti lo. Ka entawh ho ah hmuhnawm tih ka la nei miah lo. An ţawngkam ka chhinchhiah ţhenkhat ka theihnghilh leh vek tawh bawk a, inzir nan ka hmang thei lo. Ka awmdan ho hi chu ka thiam chawp" a ti a, a nui ruh ruh lehnghal. 

Bell a rik chuan a hriat tawk lekin a phun nuah nuah reng a, ka bul a la awm reng a chak tih ka hre reng. Kan ţhu dun tho a, chuti chung chuan helai hmun a kan pahnih chauh a awm hi a chak em em reng tho. 

Msa a luh tawh hnuah keichu kut sil turin ka kal kawi leh a, bell a ri tawh bawk a ka hmanhmawh khawp mai. 

"Hey Rebecca i eitur Msa ka lo thawn kha i hmu em?" Hruaitea chu ka lo en hu hu ringawt. A thusawi chu ka hrethiam hauh lo. Ka awmdan danglam chu hre thuaiin "Ipa a boral sia, inchhung a mi ringawt chu eitui a har ang ka tia, iduh tur a ka rin ho ka lei a Msa ka rawn thawn a, eng lo a nia, keichu a hranpa in ka lokal zak a" ti a min hrilhfiah hnuah lai deuhin a nui put put a, a sam tuai pahin min melh zeuh zeuh ngam chauh. 

"Aw hmu e. I rawn thawn tih ka lo hre lo a, Msa'n min hrilh theihnghilh aniang. ka lawm lutuk a" ti ve luam mah ila eng eitur mah ka dawng lo. 

"Awle nakinah ka lei leh ang che" rang zet a a tih hnuah a tlan nghal daih. Class-11 a mi a nia, kumtir lamah a lehkhabu tih bo ka chhar sak a, khata ţang kha chuan kan inhmuh chang te hian biak hmasak a ngai lo. A felin a bengvar khawp mai. 

"Khawnge ka eitur i dah?" 

"Kan eizawh chiah kha" a ti liam puat a, a hre lo der chiang lutuk. 

"Hruaitea min lo thawn. School ka kal loh lai khan a thawn che kha" ti a chiang fe a ka sawi theih takah chuan za lo zet hian a nui a, a kil zawk a ţhu ka ni bawk a, kuangkuah chunga bang nghengin ka lo melh reng. 

"Kan ril a ţam a pawisa kan nei si lo a, Tommy nen kan ei vek" en pawh min en duh lo. Hmalam a melh run a, ka lungawi loh zia ka hmuh tir thei lo. 

"In nei awm emai. Pawisa innei ve ve ziah. Thil dang leina tur pawh in nei a, ngatinge ka eitur berkher min lo ei sak" ka ti nang nang a, lungni lo viau mah ila class a kan awm miau vangin ka vin vak vak thei chuang lo. 

"A pawi viau a mi? Pawisa kan pai lo a, kan ril a ţam sia kan ei. I eitur tlem kan ei ve chu a va pawi awm ve. A pe tu pa che lah kha a hmelchhe si" a tih zawt zawt laiin Tommy a rawn leh hawi a, Puipuii bulah a ţhu reng emaw ka ti bawk nen ka phu nasa kher mai. 

"A ti mai mai anih kha. Hey Malsawmkim dawt sawi reng suh, ka thik a ka ei ti ve mai rawh. Rebecca kan ril a ţam lo, puar chung chungin kan ei, kan luak lo chauh. Pe mai mai rawh ka tih pawn lukira hian a thik tlat a" tih thu Tommy hnen aţanga ka hriat chuan Msa chu hauh vak ngaihna ka hre tawh lo. Lehkhabu phawrhin a keu kual a, a chang leh a pawimawh lai ni awm tak a thai vel thul. A chhiar awm tawp si lo. Awm lo ang hmakah min ngai leh tawh a, be mah ila a hre duh tawh kher lo a, beidawng zetin Tommy ka melh a, a nuih a lo za em em thung a. 

"In thusawi ka ngaithla ru lo ang tih a hlauhawm hle mai. Ka ngaihthlak a zarah hei lehkha a zir ve phah hi" Msa a kawk zawk a, Puipuii hnen a ţhu turin a kal ta nge nge a, Miss a lo lut zui zat bawk nen, Msa lahin min la hre lo der char char a, engmah ka sawi zui duh ta bik lo. 

CONT...