EIGHTEEN-7

EIGHTEEN-7

"Nizan a ka thilsawi kha fiamthu ah ila ngai tho em?" Puipuii a ni. Midang hnen a diklo deuh a a chanchin sawi angah min ngai a, zanah phone in min chhuahchhal. Ka sawi miau loh vangin fiamthu ah ka lo ngai a, a thin a rim viau thung. 

"I chanchin ka sawi lo tih bak sawi tur ka la hre chuang lo. Ţhian ka kawm ngai lo va, mi chanchin sawi lawr dun dun chi ka ni lem lo bawk" zan a ka thusawi ngai bawk ka sawi leh. Kawngkhar bulah inhma tawnin kan ding a, min kalpel tu te chuan min ngaihven lo hlauh. 

"Hriata nen a inngaizawng angin kan lar hluai a, nang ni lo la tunge niang? Ka nau ţhiannu in nangma hnen aţanga an hriat angin ka nau hnenah a sawi a, Hriata nen kan inkawm nasat vang hian i thin a lo rim a mi?" ala ti ta deuh deuh. Chhan ngaihna ka hre lo lutuk chu ka nui tawp. Ka thil hmuh kha sawi ve ila chuan phat ngaihna a hre miah lo ang. 

"Ka sawi lo ka tih tawh kha. Hriata nen a in inkawm hi ka thinrim lo bawk. Keipawh Msa te ho zingah ka tal tam ve tho a, tupawh kawm la ka thinrim phah lo ang" ka ti a, min phatsan vang khan ka na zo vek tawh. Ka tawng ngun tawh a, ka na ngun a, ka dam leh hma bawk. Ngaiah ka nei tawh a ni ber ang chu.

"Sawi lo la miin engtin nge an hriat ang?"

"In inzui reng a, an rinthu an sawi a ni mai lawm. In in ngaihzawn loh leh kan in ngaizawng lo ti mai ula. Ka tel ve peih lo. Ka chik ngai lo cheu a, in chanchin sawi tur ka hre lo" ka ti veleh ngat. Thip zetin min melh a, ka hlau bik ţhak lo. Ka dikna anih phawt chuan engpawh lo thleng se ka hmachhawn ngam vek. 

"A hre hmasa tu ten i hming an sawi a, pha char char mahla nangmah inih ka ring tho. Msa te i kawm vang mai hian ka khin ngam loh phah lo che. I duh duh sawi zel rawh sawi tur ka hre ve tho" a ti tan tan a, inkawm tawh lo mah ila rei tak kan lo inkawm ve tawh vang ringawt pawn tun a a awm dan leh min tih duh dan hi mak ka ti. A duh chuan a lo nasa takzet. 

"Hriata bialnu chu ava thinrim awm tan tan ve" aw lo chhuahna lam chu kan hawi vat a, Msa a lo ni. A nui ţhaw lehnghal. 

"Lo inrawlh ve suh. Ţhian hi chu kan rinawm turah ka ngai a, ţhian rinawm loh hi an lo tam khawp mai" Puipuii chuan a lo la ti ţalh a, ka hming sawi tu ka zawh lahin a sawi duh bawk si lo. Ka thin a rim ve lek lek tawh zawk. 

"Ţhian rinawm lo hi in tam, a buaithlak"

"Malsawmkim rinawm lo zawkah min chhuah daih suh" Puipuii awmdan chu a naupangchhia takzet. Ka bulah pawh naupangchhia ang takin a awm ţhin a, a fin ruk zia ka hre vek tawh. Zia hi a thup hlen theih tak tak loh. 

"School building hnung lam a inkal an lo hmu a ni maithei sin. Rebecca i puh vek ringawt a" a tih chuan din hnaih hretin a rukin ka sik a, ka kut a lo vuan daih. 

"Ţhian chu khawi hmunah pawh kan kal ang chu. Kan ni tihna a ni kher lo" a la dang duh chuang miah lo. Msa thusawi a hriat hlim a a mitmeng buai kha ka hmuh hmaih lo va mahse a buai rei lo. A thiam chan na tur a sawi tur a hre tho. 

"Pha zawt zawt tawh lo mai teh Lalnunpui. A ninawm tawh. I ţhiannu hi mawhpuh zel tawh lo bawk la, a dawih ve sia" ka melh nghek a, a ngai pawimawh lo nasa. A thinrim ve viau dawn maw ka tih laiin a tawp lam chu fiamthu bawkin a khar leh tho. 

"Miin an sawi sia lawm" 

"An hresual aniang. I chanchin ka sawi ngai lo. Engthil pawh ti la ka en liam thei vek" ka lo ti veleh a, kum18 chiah kan la ni a, hetiang a thu ho te te hmang a inhnial chang hi chu a awm tur alawm. Tleirawl inti ve tawh mah ila mi tam tak ngaihah chuan naupang tho kan la ni. 

"Kan thusawi kha ilo ngaithla ru reng a mi?" kut phah a biang dawmin dawhkanah kiu ka nghat a, a lam ka hawi bawk. 

"Aw bang phenah ka awm" a nui ruh ruh a, a intithei phian. 

"Nidangah chuan lo ngaithla tawh miah suh. Thuruk dang daih te kan sawi ve thei a" 

"Thil dang sawi ula ka ngaithla lovang. I ngam lo si" deuh kher zel a. Mipa ngawichawi ve tak duh chi chuan Msa kher hi chu an duh lo chiang sa. 

"Ka ngam chiang emai. Hnial vak ngaihna ka hre lo a, mahse ka ngam lo tihna a ni kher lo" uar zet hian ka ti a, a nuihsawh nih ka duh bik reng reng lo. 

"I ngam chuan saw va kek rawh. Hmeichhia chu in in kek vak vak zel tho a" a hnungah na zetin ka beng a, midang bengchheng karah pawh a ri a hriat. Na ti angin a awm duh miah lo. 

"Min va duat lo ve" a tih chuan hmui hnuai lam ka ti pawrh a, hmalam ka hawi hmak. A nui ri hre mah ila ka ngaihven duh tawh lo. Ka huat chuan min fiam a chak sawt zel. 

Chhun chawlh veleh kan tihdan ngai bawkin building chung zawlah tiffin kan ei leh a, nihnih chiah school kal dun na hun kan nei tawh. Kan thil ei ban ho chu fun ţha in ka sirah ka dah a, a tui min pek ka in leh te te hnuah "Inu in a lo hruai dawn che mi?" tiin ka zawt a, hmun dang a a awm tur vel hi kan sawichhuah chang hian nuam lo ka tiin ka rit bur zel. Mahse a kal ţep tawh a, thil dang sawi mah ila he thilah bawk hian kan lut leh ţhin. 

"Aih keimahin ka kal thei" 

"I hrechiang tawh awm si lova, mahse an lo hmuak thei che ang a, i awm loh chuan i ţhianten an ngai viau ang che" 

"Nangman min ngai angem?" zawhna ngai bawk. Ka ngaih loh a hlau a, nitin zantin min zawt a tih theih ang. 

"Keichu chiang sa a nia" lai deuh a ka tih laiin a lawm lutuk chu a nui reng. Thil dang dang kan sawi kual leh hnu pawhin hlim hmel a pu reng tawh. 

"Ilo zin ve duh angem?" ti a min zawh chuan lu ka bu vat. 

"Tehreng mai. Ka zin chak lutuk zawk. Ka nu in a phal chuan exam zawh veleh ka lo zin ang" phur zet hian ka ti zat zat a, ka zin chak miau alawm. Aizawl khawpui lun tak ai hi chuan a nawm zawk chang a tam ka ring. Khawpui a nia, mi tam takin kan bawh a, mahse thingtlang a awm daih hi ka chak zawk reng ţhin. 

"Lo zin ngei ngei rawh. Kan inah ilo thleng ang a, nuam itih viau leh ilo awm ve daih ang a" ngaihsam zet mai a a tih chuan ka nuih a za angreng. Thil a ngaihtuah thui lo em em a, a ma ţhat ţhat hian a ţha tawp a, keimah a ngaihsak ang hian midang a ngaihsak ve vak ka hre ngai lo. A puihna ngen an awm chuan a tih theih tawkah a tlanchhe ngai lo thung. 

"Ka lo awm ve daih ten ka nu te engtin nge an awm ang a? Keichu pasal te hi ka nei har viau ang. Ka nu leh ka naute ka enkawl an ngai a, nuam sa deuh leh ngaihtuahawm miah lo a ka dah theih hunah chiah pasal ka nei ang" ka ti a, bang nghengin kan ţhu a, thlifim a tam bawk nen a hahdamthlak takzet. 

"Kum10 chhung velin chutiang chuan i siam thei vek ang" 

"Teuh lo mai. Kum10 chhungin ka ti hman lo ang. Ka zir zel phawt ang a, mahse hma hun kan hre lo va, ka zir tluan phawt chuan kum15 hnu velah chuan an ngaihtuahawm tawh bik loh ang" 

"Kum15 hnuah kum33 ini tawh dawn" zawi sup hian a ti a, ka melh zawk a, a mut a chhuah hmel. A meng khup lup a, khawlum hian keipawh min tih zawi rualin kei aiin a zawi hmel daih tawh zawk. A nui hmel hmuh tur a awm tawh lo. 

"Kan inang reng. Nangpawh kum33 tho alawm inih dawn" tih pahin hmalam hawiin ka ţhu ţha leh a, ka dar a a lu a rawn nghah chuan ka taksa a ţang deuh awt na a in thing harh vatin ka insiamţha leh sawk sawk. Ka hmel a hmu thei lo hlauh a a vanneihthlak. 

"Kum33 thleng pasal nei lovin i awm dawn ka tihna"

"Pawi lo. Ka chhungte nawmsakna tur a nih phawt chuan pasal nei lo ţhak a awm pawh pawi ka ti lo" ka ti lehzel a, min duhthu a sawi tawh a, nupui atan a min duh tel anih phei chuan ka thusawi chuan a ti ţap lek lekin ka ring. 

"Min la duh lo mahla beiseiawm talin awm ve la" a ti nang nang a, ka nui a mahse ka nuih rin hlauin hmui ka hup thung. 

"Kum40 ka tlin hunah te chuan ka nei ve hman tawh maithei sin" ka ti fiamthu a, ka hmel a hmu lo va, ka ti tak takah a ngai tho ang. 

"Tommy-a faten class-10 an pass laiin keini chuan A-apple kan la ti lauh lauh dawn ni maw?" thil a thlir thui loh ţhin nen inneih a fa neih hian a ngaihtuah thleng pha chu mak ka tih rualin ka nuih a za hle. Ka nuih vak vak laiin "Ka fiamthu lo" a lo ti pah ve reng. 

"Chutiang la ngaihtuah suh. A la hun lo lutuk. Lehkha kan zir zel phawt ang chu" la nui hak hak reng chung hian ka ti a, ka thusawi chuan a ti phur fahran lo. 

"Midangin duh duh a an tihkual theihin awm tawh suh" teh daih chuan. A ngaihtuah zawng a thlak leh thut tawh aniang. 

"Ka awm a mi?" ti a ka zawh lai chuan ţhu ţha in ka kut a vuan a, inhma tawnin kan ţhu tawh a, ka lai leh kher mai. 

"Aw..nichin lawk a i awmdan kan hriat ve ve kha. Khatianga a tih ngam loh tur che khan awm rawh Puipuii kher lo pawn khatianga an tih che chuan khing let la, i chak zawk zia hmuh tir rawh. Vawihnih vawithum vel i rah beh chuan an ti zawm ngam lovang che" thutak zet hian a ti a, ka mitah tak min en a, keichuan ka en rei ve ngam lo. Hmun dang ka melh a, ka en zawk a, ka hawisawn leh ţhin. 

"Buaina ka nei ngai lo. Buaina neih ka duh lo va, tlanchhiatsan zel ka duh"

"I tlanchhiatsan theih loh tawpah ka tihna. Loh theih loh a buaina i tawh chuan a tlawm zawkah ţang suh. Tharum a ngaih loh phei chuan a awlsam lutuk. Kut an thlak che chuan min lo hrilh la, ka lokal vang vang ang a, hmeichhia pawh nise ka rawn hnek pawp ang" 

"I mawl a mi?" ka ti tuarh a, a nui hmel ka hmuh takah chuan ka nui veleh mai. 

"Ka ngaihtuah dawn che. Lehkha chiah i thiam. I nep a, bum i awl a, landan a fel hmel deuh leh tlem a hming ţha deuh hlek i ring zel a, ka awm loh hunah buaina ilo tawk ang tih ka hlau" a ti a, a tih tak zia ka hmu thei ve tlat. Min ngaihtuah tak tak tih a lang reng. 

"Ka fimkhur dawn alawm. Ţhian ka kawm lo ang a, lehkha ka zir ang a, ka nu ka pui ang a, ka inkhawm ang a, exam zawhah lo zin ka tum ang a, buaina  pumpelh dan ka zawng char char bawk ang a" ka ti mawlh mawlh a, a rilru nawm theih nan a sawi ka ni. 

"Tumah in ngam tir lo la a ni mai" a tih bul bul laiin bell a ri a, a phun zui hlak. Phur vak lo chungin a tho a, sir lam a ka thil dah ka khai hnuah min kaitho ve. 

Classroom kan luh dawnah Tommy-an min lo ti phu dawrh a, ka hlau hman lutuk chuan ka thil ken laiin a lu ah ka khawng nghe nghe. A ţhianpa in na a tih viau laiin Msa lawmah a tla a.

"A ţha ka awm loh hunah pawh khatiang khan ti zel ang che" a ti a, min rintawk hmel khawp mai. A kal dawnah tak tak chuan a hlau leh si ang a. 

"Box hi thir hmang la, midang chhut a ngaih leh thut hunah i chhu na thei deuh ang" mi tih let dan min hrilh nasa ngang mai. Chak lo deuhah min ngai a, min ngaihtuah takzet mahse keichuan chak ka in ti. Ka thil paltlang tawh zawng zawng hi chak tak tan loh chuan paltlang theih a ni lo. Paltlang chiah a ni lo va, ka la nui thei a, engmah thleng lo ang maiin ka la awm thei. Chuvang chuan chak lo angah ka in ngai ngai lo. Tharum chu ka ngah lo mahse ka chhungril aţang hian chakna tam tak ka nei. Ka pa thih aţang khan ka chak leh chhel zia ka hria. 

Ka muhil thei lo. Khumah ka let ka let a, sana lah chu zan dang aiin a kal chak emaw tih mai tur a ni. Naktuk mai hi Msa kal hun a ni tawh. Amah hruai turin a duh lo chung a nu a rawnkal lui a ni awm e. School ban hnuah kan la inhmu leh lo va, a kal dawn a thlah erawh a phut khawp mai. 

A diary min pek kha ka mut hlim aţangin ka bulah ka dah char char tawh. A chanchin ziah ka tum uk ţhin na a ziah tur ka hre lo. A thil min tihsak ka ngaihtuah a, a tam tawh lutuk. A ţhian nih ka chak lai te leh ka huat ber lai te ka ngaihtuah a, tette aţanga school khat a lut dun na na na chuan hriatreng tur kan lo ngah khawp mai. 

Mutthilh ka tum luih ngial hnu pawh a ka theih tak lohah chuan light on lehin ka lehkhazirna dawhkan a ka tar kan class thlalak chu ka la a, kumtinin kan la a ka tar zel ţhin. Tun a ka en hi ka duh zual bik a, kan la naupang a, rilru thianghlim tak kan la nei vek. Phatsanna ka la tawk lo va, ţhianten midang hnenah dik lo deuh deuh a min sawi an la ching lo. Msa a la zakzumin a nui pawh a tak tak a la ni. Hetih hunlai hi chuan min tibuai ngai lo va, min ţanpui tu ah a ţang ţhin. A ţhian ka ni lo va, a hranpa a inkawmin kan inbe ngai lo. Chuti chung chuan ţanpui ka ngaih changin min ţanpui ziah tho. Veng khata kan awm vangah ka ngai mai zel a, ka hnen a a inhawn tak viau hnuah hian kan tet lai kha chuan min khawngaih vang niin a sawi a, high school kan kal hnu aţang kha chuan min star vang niin a sawi. Mahse min puih ziah rual hian ka thin tih rim chang a ngah a, amah vang hian ka ţap tawh lehnghal. 

Kum11 kan ni ve tawh. Msa pawh tlem a danglam hretin ţhian a kawm ve nual tawh a, midang fiam a nuihzat an ching ţan. Chhun a kam chawlh laia a kal ziah naah ka kal ve a, midang kal an phal loh nasat ţhin em vang a kal lui ngat ka ni. Thil hriat chian chak mi ka ni a, ka pite in a ka kal haw lam pawhin mipa rual ding khup zing a a lo ţhu hriatchian tum a ka en hnaih hram tawh kha. Hetih hunlai pawh hian an thil tih ţhin ka hre chak tlat. 

An hmuh theih lohna chin ni a ka ngaih aţangin ka en ru a, thil danglam tih an nei lo. An infiam a, eng eng emaw an siam a, an ipte aţangin motor lem tereuh te te an phawrh bawk. An ti ti nasa a, an ri leng lung a ni mai. Midang hmuh hlau hle si thawm an nei ring khawp mai. A hnu a ka hriat leh danin a ruka an motor lem pai kha an hmuh chuan zirtir tute an hrilh ang a, an laksak daih ang tih an hlau ve a ni awm e. Bakah kum11 lai ni ve tawh chung a motor lem la khalh kha a zak,  tun hnu a ka zawhchhuah tho. Kan upat deuh hnu a ngaihtuah let leh hi chuan a nuihzathlak. 

An infiam ka en reng lai chu Msa'n min rawn hmu ta ngei a, a meng rum lutuk kha tun thlengin ka la theihnghilh thei lo. Tum burin rum tawkin min melh a, a motor lem man tlawm tak tur chi a ken ruk chu a ipte ah akin min rawn pan hnai a, ka hamhaih lutuk kha ka awm ngaiin ka awm reng ringawt. An infiam lai ka en ruk vangin min hau a, kalsawn vat turin min ti bawk. Min man chiang angreng sia, chet nachang ka hre lawk lo chu min nem thlu a, chuti chung chuan kalsawn nachang ka hre chuang lo. Min vin tuarh tuarh a, a ţhiante ho pawn min hual tuau tawh. Ka zak lutuk leh tlu tawp khawp a min nem mak ka ti lutuk chu chet nachang ka la hre chuang lo. Ka rilru a nat em vang khan khami ni kha ka la hriatreng phah. 

Ka kalsawn mai si lo va, anmahni zawk chuan kal an rawt ta ringawt.  An kal hmain min kek hram a, chu chu ka ţah chhan a ni. A ţhiante khan engtinmah min ti lova, khami ni khan Msa kha ka haw hle. Naupang te chauh la ni mah ila min tihdan kha ka theihnghilh mai thei bik lo va, ka nu hnenah sawiin inah pawh ka la ţap hliam hliam. Ka huat phah rei hle a, tiffin ka pai theihnghilh ţum a a ei ai min pek hnuah ka lungawi leh em em. Chutiang reng chu kan ni ţhin. 

Khawvar ţan tirhah ka tho nalh a, ka muhil miah lo. Msa sawi lawk angin kan veng kawn a ka nu thingpui dawr kawtah ka awm a, ka pa thih hnuah dawr hi kan la hawng leh rih lo. Haw kan tum leh vel mek chauh. Dawr inhawng awmchhunah coffee ka lei zawk a, kan dawr lamah bawk let lehin Msa te nghakin ka ţhu ran. Ka nghakhlel viau nge ni sana ka en ka en a, ka ţhu rei thawkhat tawh. Ka thlen hlim ai ngat chuan mi an tam ta deuh a, motor tlan a awm nual tawh bawk. 

"Rebecca" ka hmaa car a din rualin ka hming a min ko ri ka hre zui zat. Ka en veleh a nui suk a, hawi let lehin car khalh tu hnenah chuan eng emaw a sawi hnuah car aţang chuan a chhuk a, a kal dawn meuh chuan ka ngai lehzual. 

Car chhung a chuang chu ka melh leh kher a, a khalh tu chu hmeichhia a ni. A hma khan ka hmu chiang vak lo a, mahse hung rem tur a a tlan leh hma khan ka enchiang hman. Ka nu ang rual vel tur hi a ni a, Msa nu a nih ka ring. 

"Thil ka la ei lo. Min eipui la" a tih hnuah "A tawp nan" a ti tel hram a, ka ngei ru angreng. 

"A tawpna tur a ni hleinem. Kan inhmuh leh veleh kan ei dun leh ang chu" ka lo ti thung. 

"Umm..kan inhmuh leh hunah i duh apiang ka leisak ang che. Lo kal rawh inu a inhawng si lo va, eina tur dang zawng ang" a ti zung zung a, keimah a ka thawh hun nghak lovin a tihziah danin min kaitho a, kan dawr ep a restaurant pakhat awm ve lam min pan pui. 

"Inu mawni kha" a rual a kal dat dat pah hian ka zawt hram a, a ruk tak chuan lo tel ve lo mahse pawi ka ti lo. 

"Ka hrilh tawh a, a rawn zawng hmu mai ang" a ti awlsam et a. Kan kal chak bawk a kan thleng chu a ni mai. 

A la hma deuh bawk a eitur an lo la nei vak lo. An neih ang ang kan lam a, Msa chuan a nu a lam kep nghal vek. A bulah min ţhuttir a, ka hlat deuhin a hria nge ka lamah tawlh hnaiin min si chetin a ţhu. 

"Engtik aţangin nge school tharah i luh theih ang?"

"Hre lo. Karleh lamah aniang"

"Anih chu. Ţhian kawm nasa lutuk lo la, ţha deuhin zir ang che. I zir ţhat loh chuan ka lo zin miah lo ang" ti a ka vau tan tan laiin "Keimah zawk ka lokal mai ang" a lo ti then. 

"Ka hmu duh tawh miah lo ang che ka tihna" ka ti ţha leh vel a, inhnial reng mah ila a awm loh chuan ka khua a har viau ang. 

"Ka hrilh che kha aw. Tumah in rahbeh tir suh. Tommy leh Bsa te kha i duh duh naah ilo tir dawr dawr dawn nia, ke a i kal peih loh leh inlam tir la, i inthlah tir bawk ang a, kawm tur i neih loh changin ko tawp la, dawr a puitu tur iduh hunah i ko bawk ang a, i duh dan a an awm loh chuan min vin ang chiah chiah hian vin ve vak vak ang che" a ti bawrh bawrh a, a tawp lam phei chu vin tak a ni. Thinrim a ka hau tan tan ţhin hi a rukin a lo haw ve deuh a ni maithei. 

"Min ngaihtuah lutuk anih kha"

"Ngaihtuah che e. Puipuii mai maiin a duh duhin a ti kual che a, khatianga a tih leh che chuan hmeichhe insual a ngai lo i hnek pawp tawh dawn nia aw" ala ti ţalh tho a, kha thil kha a vei run reng mai. A thusawi naupangchhia tak tak vang chuan kan nui dun leh hak hak ţhin. Amah leh amah pawh mawl a intih thu fiamthu a a sawi phei chuan kan chawlhna dawr neitu pawh a lo nui ve tawp. Kan hnaih a a din lai tak a ni kher bawk sia, a lo hre pha ve a ni. 

"Min ngaih ve loh chuan i chak lo ngawt ang" ti te in min vau thul. A ti lang duh lo na a a kal tur chu a huphurh ve takzet. Kan infiam bawrh bawrh laiin a nu a rawn lut ve ta nge nge a, kan hmaah ţhu in min nuih var var a, a nelawm hmel zek. 

"In ţhiandun chu in inngai viau dawn a ni maw? Hun a kal chak a lawm, in inhmu leh vat mai ang" a ti ve nghal luam a, a awki a damin ngaihthlak a nuam a, nu zaidam tak a ni ngei ang. 

"Exam zawh a ilo zin dawn kha aw. I lo zin loh chuan keimah ka lokal dawn tho a nia" Msa bawk a ni. Kan hmaah a nu a ţhu a, ka inthlahrung kher mai. 

"Ka tum ang ka ti ringawt anih kha. Hma lam hun a hriat theih loh" a lam ka hawi a, ţawng pahin ka mitmei ru a, a hrethiam lehpek chuang lo. 

"Dam chuan a theih vek. Keipawh bike la tur a rawnkal leh vat a ngai hrim hrim a, duh leh exam zawh ka nghak ang a, bike in kan kal rual ang a" tiin rem a ruat a, a nu chu awm lo ang hmakah a ngai. 

"Nakinah kan sawi leh dawn nia" ka ti ra ringawt. A nu a nia, a mitmeng a veng lo a nih pawn ka tan a nuam tlat lo. 

"Ni e ilo la zin ve dawn nia. A nuam teh ania, cham hlen i chak et et mai ang" Msa nu in a lo tih ve takah chuan tlemin ka awm a nuam deuh na a boruak chu uap ka la ti tho. 

"Bike chu lak leh i phal ang tiraw?" ti a a nu a zawh chuan a nu chhan na tur ka lo ngaichang ve reng a, a landanah ringawt chuan a remtih loh hmel. 

"Hman na tur vak a awm lo. Class-12 hi zo phawt la kan ngaihtuah ţha leh zawk dawn mi?" a ti ta chiah reng bawk a, pawi ka lo ti lo nasa, ka sawichhuak lo mai mai. 

"Chutiang a ngai lo. Helamah--" a ti hman chauh tihah a nu chuan lo pawt chatin "Iduh phawt chuan ipa bike i ţawm dawn nia, sawi tawh rih suh. A hranpa in kan sawi zawk dawn nia" a ti a, a hnial lui ţawng ţawng bik lo. 

A nu chhuah hnuah phur lo deuhin kan inzui chhuak ve a, "Vawiin aţang chuan keimah chauhin school ka kal tawh ang a" ka ti a, thawk ka la zui halh. 

"Ka ţhiante an awm a, i khuahar lo ang. Kan thlen veleh ka rawn bia ang che"

"Awle..thuawih la, vawiin a kan awmdan hian nakin zel a kan awmdan tur thui tak a hril ve nia" ka ti a, ka nu min hrilh ţhin ka hrilh ve. 

"Vawiinah motor ka chuang nileng dawn a, nakin zelah driver ka ni mai dawn tihna mi?"

"Uang reng suh" ka ti hlak a, a nuih a zat viau laiin ka nui ve hleithei tawh lo. 

"Ka kal dawn. Ka rawn be ziah ang che. Nangpawn i duh duh hunah min rawn be dawn nia, zing dar4 velah pawh ka tho peih aw" a ti a, huphurh angin a la awm duh chuang lo va, a hlim lo hmel min hmuh tir duh lo mahse a hlim tak tak bik lo tih ka hria.

"Awle..ka tho hma ziah a, zing dar4 ah ka lo kaitho ve ziah ang che" car a a luh laiin ka lo ti ve hram a, ka kut a vuan a, amah zahpui chuang si lovin ka zak. 

"Tun a sawi chi loh ka sawi chak deuh deuh ho nakinah ka hrilh ang che" a tih chuan kan nui hak hak a, a nu pawh a bang bik lo. 

Ngai viau mah ila sana a kal muang duh si lo va, hmun dang a awm turin a kal ta nge nge. Keimahin muangchangin ka haw a, Msa chiah ka rilru ah a awm. Ka ruak huai ni hian ka hria a, ka bul a awm reng ţhin a reh vang vang tawh tur chuan ka ţah a ti chhuak thei hial. 

A changin min tihlim a, a changin ka huat turin a awm a, puih ka ngaih changin min tlanchhiatsan ngai lo va, englai pawn ka tan a awm reng ţhin a, ka ngai takzet. A lak a ka rilru put hmang ka hre ngai lo va, mahse tunah chuan ka hre tawh. Ţhian ang chauh chuan ka en tawh bik lo. Mahse mipa aiin ka zirna ka dah pawimawh thung. Lunglen mai mai hi chu ka tuar ang a, a la reh ve mai ang. Ka ţhian a la ni dawn tho alawm. 

CONT..