EIGHTEEN-8

EIGHTEEN-8

School ah Msa hmuh tur a awm ve tawh ngai lo va, a reh tlawk tlawk a ni ber. A insawi ang chiahin min lo be ziah a, ka ngaih turin a awm thiam viau lehnghal. Ka ngai a, ka hmuh phakah la awm reng se ka ti. 

Tommy leh Msa ţhian dangte an felin min kawm hlim an tum hram hram a, an ţhianpa nen a ni tawh ang maiah min ngai a, a bialnu hmuhin min hmu vek tawh. Hriata nen kan inbe ngai ta miah lo thung. Kalkawng a kan intawh chang pawhin min be lovin min kal pel mai zel. Puipuii nen a ruk a an inhmuh ruk ţhin te leh min lo bum reng vang khan ngaihdam min la dil miah lo. 

"School eng nge a an?" khumah ka bawk a, a diary min pek bawk kha ka hmaah ka chhawp ran. Ka phone ka ti chhe palh hlauh mai a, ka nu phone ka hman sak rih a ni.

"A nuam a ni mai. Bsa leh a bialnu ve deuh te nen kan thil pai kan eikhawm a, an ngai che a niang an sawi reng mai che. I awm loh chuan a reh an tia, hmun dang a i awm tirh aţangin tun thlengin nitin an la sawi che" ka ti siam siam a, thla khat dawn a ni tawh a, an la sawi bang thei lo. 

"A ţhat chu. Hei ka ţhiannu thar a lo leng a" a tih rualin "Tunge? Tunge?" ti ser ser ri ka hre zui zat. Hmeichhia ţhian a nei mai chu mak ka ti a, hmeichhia a hnaih ngai lo va, a haw hran lo na a ţhian atana a neih ka hre ngai lo keimah tih loh chu. 

"Lo ţawng suh Fiona..tunge an tih che hian kan nihna hi sawidan tur ka hre ngai lo, tun a henu min zawh ang chiah hian" a rawn ti zel a, hmeichhe nui vak vak ri ka hre zui zat bawk. (Fiona hi he story ni lo an puitlin tak tak hun story thar hlak kan ziak thut anih chuan a la pawimawh viau ang haha) 

"I duh duhin sawi rawh. Mipa i kawi khawm dul ka rin laiin hmeichhia berkher i kawm a, i van inhmeh lo" ka ti a, ka nui lui vel a, zahzel a ka nuih luih mai loh chuan ka nuih a za tak tak si lo va. 

"Ehh..i thik a mi?" ti a min fiam chuan lu ka thing nawk nawk. Min hmu thei lo tih ka hre leh a, rang fahran hian "Teuh lo mai" ka ti a, ka uar khawp mai. 

"Min zar reng a ka kawm ve hram hram a nih hi" a tih laiin hmeichhe aw bawk hian "I zakthei lo Malsawmkim, min kawm chak em a ka kawm che anih hi aw" a lo ti veleh hman. 

"Kan pastor fanu ania" chu nu thusawi ngai pawimawh lem lo chuan ka hriat duh tur a a rin chu a rawn sawi a, tlem te chuan ka thik ve deuhin ka hria. 

"Ţhian ineih chuan a ţha lawm. I khuahar lo deuh ang a"

"Ka ngai ber tho tho che" 

"Ka hria min lo ngai ber char char ang che" zak deuh chung hian ka ti ve ngei a, ka thusawi chu a ni pawn a awih lo ngawt ang. 

"Vawiinah buaina i tawk em?"

"Tawk lo e..i ţhiante an awm a, bakah class khat a awm ho vek kan nia, tuman buaina an siam reng hleinem, kan inkawm khawm vek alawm" ka ti luam. Buaina tawk reng turah min ngai a, Puipuii nen a kan inchhal a hriat ruk hnu phei kha chuan min ngaihtuah lehzual. 

"An vai khan i duhna apiangah lo chhawr rawh aw. Fiona hi ka thlah lawk ang a ka rawn be leh ang che" a ti a, a tawp hmak. Ka chhanna a nghak hman lo. Nidang a ka thusawi ngaithla char char zawk ţhin si tunah chuan min ngaipawimawh lo deuhin a ti tawp hmak thei tawh. 

Min lo biak leh ngei ka ring a, chumi hma chu lehkhazir ka tum a, ka zir hleithei der lo. Msa bawk ka ngaihtuah leh ţhin a, hmeichhia kha eng ang mi nge ni ang tiin ka ngaihtuah tel nasa hle bawk. Pastor fanu anih thu chiah ka hria a, a mizia leh thil dang hriat ka la nei lo. Keimah min ngaihven ang a ngaihven tur te leh min puih ziah ang a a pui ve tur ang te in ka ngaihtuah chhin vel a, a hma ai khan ka thik lehzual. Ţhian ang chiahin ka en tawh bik lo ka tih tawh kha mahse bialpa neih em chu ka ngam rih si lo. Ka zirna ka tihchhiat phah ka hlau a, ka nu ka hlau tel bawk. 

Thil dang dahţha in lehkha ka zir lui a, zan dang aiin ka thiam tel. Ka thiam sa ka en nawn a, a thar tlem ka thiam belh bawk. Zir loh ngawt ai chuan zankhat a pakhat lek thiam belh pawh hi a hlawkthlak. 

Dar10 velah min rawn call leh chauh. Vawi10 ai tam sana ka lo en hman thung. 

"Hello" zawi sepin ka ti a, ka ţawng thawm midangin an hriat ka hlau a, zanrei lam a min lo biak chuan ka ţawng ring ngam lo. 

"Ka va thlah a, a chhungten leng ve turin min ti tlat a, ka rawn biak har phah che" inthlahrun ve hmel zet hian a rawn ti a.

"A ţha lawm tikhan hmelhriat ineih belh zel a, school khatah in lut dun a mi? Engtin nge in inkawm nawlh theih a?" tiin ka lo zawt vat. Ka duhthu ka hrilh ve duh chuang si lo va, ka sual ve ngawt mai.

"Aw lut dun e. Kan inhlat lo a, chhungte an inpawh chuan kan inhre ve mai" ngaihsam zet hian a ti a, ka lo dawnsawn dan tur a thlir thiam leh miah lovang. 

"Chu nuam iva ti tawh awm ve"

"Rin aiin a hrehawm loh. School a nuam a, kan inpawh a, an fel bawk a" a ti duah a, a tlangnel vat a nuam a tih leh vat ka ring reng a ni. A nu hnenah a awm tawh lehnghal. 

"Helam chu i ngai tawh vak lo a ni maw?"

"Ngai e. Duhthlang thei ila chu nangmah hmu thei a awm ka thlang tho ang" a tih chuan ka ţhen sak a, lawm ang a awm ka duh loh vangin ka nui ri duh miah lo. 

"Nihchuan lo awm leh daih la"  

"Ka thu rih lo a, a theih veleh ka lo awm ang"

"I duh tak tak lo aniang" ka la ti tlat. Mahni hmasial zet ang a ka awm ta mai hi mak ka intih rualin ka ngai em a, hmeichhe dang nen an inpawh hmel em em lehnghal a, ka inthiam thei tho. 

"Duh tak tak e, a theih loh dan chu i hriat tawh kha. Ka pa bul a ka awm reng chuan ka nuhrawn in min ngaina lo zel ang a, ka pa khan a hmangaih a, a thusawi apiang a ring vek zel a, ka pa nen a kan inkar a ţhat reng nan ka awm hrang rih phawt anih hi. Ka nu in tihdan tur a hre zel mai ang. Tunah chuan ka nu remruat dan angin ka awm rih" ti a min hrilhfiah lai chuan thawk ka la hrawk a, chhungkaw buai bik reng a nei hi chu ka lo hne ve ţhin. Chhungkhat laina hnai inhmangaihna an nei bawk si lo. Hausa mahse an awh awm hlawl lo. 

"Inu hnenah Aizawl a in luah dil la, school dangah i lut tho ang a, ipa te chuan an hre chuang nang" ka la ti lui ţalh tho. Rawn let leh daih se ka duh tawh zawk. Ka rin aiin nuam a ti hma a, ka awm loh naa nuam ti deuh a a awm hian ka ngaih a ţha lo, hmeichhe dang vang anih phei chuan nuam tih lohna ka nei. 

"Zanin hi eng nge i hriat a?" a ti a, a nui zui hawk na a mak a ti ve deuh anih hmel. 

"Zandang aiin ka danglam chuang a mi? Midang vang a kan inbiakna i tih tawp hmasak berna. Nangmah alawm danglam zawk chu" 

"Min duh ve angin i awm a, i sawi duh chuang si lo a" a ti nuah nuah. Inbiakna chuangchang chu a sawi duh miah lo. 

"Ka dah ve thung mai ang" ka ti a, ka sawizawh rualin ka hmet tawp ve daih. A rawn call nawn char char a, ka la duh tawh bik lo. Rilru buai deuhin awm ve reng reng se, thil dang ngaihtuah thei miah lovin a rilru hah ve sela ka ti, zanin a lehkha ka zir ţha thei bik lo ang chiah khan. 

Darkar khat vel chu min biak tumin a rawn call nawn peih. A awihawm loh zawk, ka switch off duh miah lo va, menrei phah mah ila a buai chung chu nuam ka ti. Darkar khat hnuah chuan a reh ta vang vang a, min rawn call leh hun ka nghah mek laiin a message a lo thleng ve thung. 

[Ka rawn be tawh lovang che. Min rawn biak chuan ka lo chhang peih reng che a, mahse i duh lo chung chu ka ti lui lovang che. I inpeih hunah min rawn be mai dawn nia]

Ka beisei loh lutuk a rawn thawn. Ngaihdam min dilna a nih ka rin laia chutiang ka dawng chu ka thinrim rualin hrehawm ka ti kher mai. Ka reply duh lo va, a dang dawn ka la in beisei cheu. Ka nghak ngat ngat a, ka lo mutthilhsan. Zing ka harh rualin phone ka en vat a, message dang a lo la awm chuang lo. Biak hmasak ka tum bik lo va, a insawi ang a min duh tak tak anih chuan min rawn biak ve leh mai ka ring.

Ni khat a ral a, ni hnih, nithum...kar khat a liam leh hnu pawhin luhlul a la chhuah tlat. Exam a hnai tawh a, lehkhazir nasat a ngaih tehlul nen Msa chuan ka rilru a la peng a, nidang angin nuam ti deuhin lehkha ka zir thei lo. Amah chiah ka rilru a a awm reng chu ka thin a rim hlur zel.

"Nang hi i tum kawh luau reng mai. Engin nge tibuai che a" Tommy chuan min thlek vang vang a, pawn lam ka hawi daih. 

"In inţhen a mi?"

"Kan ni ngai lo hrim hrim" amah pawh en chuang lo hian ka lo ti bung hmuk. 

"Sawi la i thep huai mai ang"

"I thawl hawk mai ang ti ta che mawla. Ka ning i thusawi dik lo thei lutuk hi" vin zet hian ka lo ti leh a, mak min ti deuh nge a nui tawp. 

"A inang reng lo mi? Han sawi teh, bialnu dang a neih chuan kan ni der ve daih dawn nia" a ti fiamthu a, ka hmaah ka lam hawiin a ţhu a, ka sawichhuah hun nghakin ka dawhkanah a bawk ran. 

Fiona chanchin vel leh Msa nen a kan inbiak dan zawng zawng chu ka hrilh ta vek a, a nuih a za kher mai. 

"Darkar khat lai a rawn call peih chuan Fiona aiin i pawimawh hrim hrim. Intithei la ţha deuhin be zawk ta che" min ti a, min vui pui ka rin laiin a lawm zawk mah. 

"An inpawh hmel lutuk. Kan inbiak lai pawn a lo ţawng char char ka tih kha" 

"In inbiak laia a awm ve phei chuan a ngaihţhat thlak lehzual anih chu. I duh ve chuan inpawm mai la, i innghah tir reng a, hmeichhe dang a hnaih i phal chuang si lo va, a fair lo iti ve lo mi?" 

"Msa lamah i ţang tihna a mi?"

"Aw tun ţumah hi chuan"

"Aniang i ţhianpa ania, i ţan zawk em em ang. Hmeichhe dang tam tawk be kual duah mah sela i ţan tho ang" ka ti tan tan. 

"A dik alawm, i bialpa a ni tlat lo a, duh leh 100 pawh a bia ang chu, a hmuh phawt chuan" a tih chuan ka ngei tawk a tling takzet. 

"Ţan zawk tur si ngati nge min zawh luih tlat?"

"A dik zawk zawk ka ţan. Ka ţhian in ni ve ve a, ka enhrang lo ve ve che u. Mahse i duh chuan hrilh mai la, i hrilh duh lo anih chuan midang thik tawh suh. Thik theihna dan i nei lo. I bialpa nih tir duh si lo va i tan chauh a i duh tho anih chuan i hma i sial hle tihna a ni mai. I hriat miah loh hian i tan a ţha tur thil tih a ngah lutuk. I hriat chin hi chu tlem te chauh a nih hi" a ti a, a thusawi chu ka ngaihven thar leh. 

"Eng thil nge a tih?" ka ti hu a, ka hriat lohah ka tan a a thil lo tih tur a awm lo tlat alawm. 

"A tam mai. In naupan laiin ka awm ve lo a, mahse Lalrinmawia hnen aţangin hriat ka nei nual. A tihbuai ziah chhan che pawh Msa mangang a hmuh chak vang a ni ber. I pen hman nasat ber ţhin a lak ruk sak che a, i zawng nasa. Ngati nge Msa khan a lo chhar daih? A chhar lai khan Lalrinmawia'n ala kawl reng tho sia. Khami ţum khan a pen a pe che a" a ti a, keipawn ka la hria. Class7 kan ni tawh a, pen man to chi ka neih ve chhun a nih vangin ka ui hle anih kha. 

"Nikum a kan class ho zinchhuah kan tih te khan a ti ţha zual ho tan khan principal in pawisa a thawh sak lo che u. I kal ve a duh vangin Msa bawkin a thawh kep che anih kha. Dawt sawi lo ta se, i bulah ka lo thawh kep ang che rawn ti ta se min hmusit ilo ti leh awm sia, a pa nen an inremsiam thei hram a, pawisa chawi miah lo in i kal ve thei a, Hriata leh Puipuii hi rin aiin an lo sual a, Msa hian a star che a, naupan tet aţangin school inkal dun a, chuvang chuan a ngaipawimawh che in i ţhatna tur chiah a duh tih an hriatna a rei tawh. Duh miah lo che pawh nise i tan a theih ang ang a ti tho ang. Tiang khawp chuan a ngai pawimawh che. Msa rilru tih hrehawm an duh vang hrim hrimin i ţhiannu sawn Hriata a ngaihzawn luih tir che a, a ruk a an inhmu kan hmu fo tho si. Hriata i star ţhin zia lah kan hre vek" a ti a, a nui ruh ruh a ka lo melh hrawk. 

"I rilru an tina ang tih hlauin kan ţhianho in kan hnawih huk che a, mahse Msa, kei leh Rinmawia chauhin a chhan kan hria. Ilo fing hlauh a, Hriata aiin zirna i dah pawimawh a, an awmdun lai i hmu ve ta chiah bawk a, zan a Msa sawisak rawn tu te i hmuh ho kha keini aia naupang lehchhawng sang thlawn deuh deuh ho an nih kha. I naute class a mi"

"Kimpuii ţhianten ngati nge an khawih rawn kher ang a, awih awm loh lutuk" ka lo ti vat. 

"An zing a pakhat khan i nau a ngaizawng a, class10 lekin hmeichhia ka duh e a ti anih chu" ten hmek zet hian a ti a, tun thlengin a ni pawh hi ala single. 

"Naupang te si kha an rui a, in in a rawn len luih an tum a, Kimpuii mangangin i phone in Msa a bia anih kha. In ah i phone i dah daih kha ila hria em?" ti a min zawh chuan lu ka bu nghat a, school bang ka pi te inah ka tlang a, phone ka pai lo. 

"Ipa dinhmun a hria a, inu hah ţhin zia nen. Khatiang inleng inneih chuan an hah zual dawn tih a hre ve aniang, a thluak thawl viau mahse chutiang ngaihtuah nachang chu a hre ve. Nang ngei pawh hian hrehawm itih a hlau a, khang ho kha a lo dang a, rui mahse an tam angreng sia, a hneh lo anih kha. Khami zan aţang chiah khan Kimpuii hming ka hre ve a, a hmel ka la hmu lo. Amah vangin Msa an sawi sak hrep phah a, a chhe lo reuh a nih ka ring. Nakinah min la tihpui ve rawh aw" a ti fiamthu a, na vak lovin ka lo beng. 

"Thil dang pawh a tam. Ka sawivek seng lo a, ka hre vek lo bawk. A awm loh hnuah i chhiahhlawh a ţang turin kan vaiin min hrilh a, pui tur che chuan kan intiam a mahse chhiahhlawh nih em chu kan duh lo vek. Hriata kha kut a thlak lo a, kha kha chu Hriata buaina a ni tawh ang. Msa a puh a dawt a hrilh che anih kha. Mahni ta ni miah lo neih a tum tlat a, hepa pawh hi hremhmun a paih daih tlak mawle" a tih chuan ka nui ve ta nge nge. 

"I sawi vek a ngai kher lo. Ka hre ţeuh tawh alawm. Msa i ţan ang hian min mi bulah min ţan ve tlat ang che" ka tih chuan "Naupangchhia emai" a lo ti hluk. 

Exam a hnai tawh a, ka nu in dawr a pui turin min phut lo bawk a school bang ka haw tlang ve mial. Ka naute an lo inhnial leh tawh a, Kimpuii chu vawiin a ka thil hriat kha ka zawt duh lem lo. A zah ka hlau a, bakah bialpa a nei lo tih ka chiang bawk.  

Ka nu lo haw ve hma chu phone ka hmang thei si lo va, Msa ka be chak tawh. Ngaihdam dil ka duh a, mi ngaihdam dil hi harsa viau mahse kan thiamlohna a ngaihdam kan dil hian kan tlawm vang a ni lo va, kan huaisen vang a ni zawk. Tommy thusawi kha a dik vek. A bialnu ka nih phawt loh chuan ka thu in ka dah thei lo va, a bialnu ka nih chuan ka duh loh zawng chu kawm ka phallo thei tawh ang. 

Tommy hnen aţanga eng eng emaw ka hriat leh hnu khan thil tam tak ka hriatchhuah belh zut zut a, ka huat ber ţhin lai te ka rilru ah a lo lang leh. Ka homework min chhuhsak daih ţhin lai te, ka tih sa a tih ang a a sawi daih ţhin lai te, a ţhiante nen an infiam ka enthlak vang mai a ka sam a min keh hunlai te, a duhzawng ka pai fuh chang a min eizawh sak vek ţhin lai te kha. Ka bag min thuhruk sak ţhin lai te, mam tak a ka nu in sam min ţawnsak thlap hnu a ka sam ţawnna pawt thla a a tlanchhiatpui daih ţhin hunlai te kha, khang hunlai kha chuan ka va han haw ţhin tak. Ka um a, ka umpha ţhin si lo. 

Mahse ka huat chhung a rei ngai lo. Ka ice cream miin min sut thlak sak palhin a ei ai min pe a, min fiam dan ang chiah a midangin min fiamin min chhan ziah a, ka naupanlai kha chuan a thil tih vang khan ka ngainat phahin a ţhian nih ka chak phah ţhin. High school kan kal ve hnuah pawh a thil tih dan ţhin a bansan chuang lo. Nihliap ka pai theihnghilh changin a nihliap min pe a, a bag khumin a tlan haw ţhin. Ka nu in ka kawr lum suk a lo seng theihnghilh ţum te khan vawt tiin ka ţhu khawr reng a, khatih lai pawh khan phal takin a kawrlum min hak hawh tir. Thlasik lai a ni a, vawt a ti lo bik miah lo ang. Higher kan ni chho a, lehkhabu ka ken theihnghilh ţum a min hremin ka zah hlauin a theihnghilh der ve a, na ka neihin min ngaihven vat a, ka nin deuh hlek ka bulah an awmin min lak hran sak a, ka thlavang a hauh hlur a, keimahin eng thil mah ka hmachhawn ngai lo. Ka lo inhre lo mai mai zawk a, a hma aţang khan ka lo duh daih tawh zawk. Nitin ka kiang a awm turin ka duh a, harsatna ka tawhin ka hrechhuak hmasa ber ziah tawh a, ka hlim chang lahin ka hlimna min ţawmpui turin ka duh a, ka thil tih ţhat reng reng a hriat ve loh ka hlau a ni. Nitinin ka duh zual zel emaw tih mai tur a ni. Mahse tleirawl te chauh ka la ni a, lo inkawp ta ila rei kan hnaih lo maithei. Ţhian takngial pawh ni thei tawh lovin hmelma ah kan inchhuah ngai angem? Ka nu phei chuan min pawm pui dawn lo chiang sa. Msa a duh loh vang ni lovin bialpa neih a la phalloh vang zawkin. 

Ka nu rawn haw veleh phone ka chhuh sak a, room ah tlan lutin Msa chu ka call ta ngei. Min lo nghak ve reng ni tur a ni min chhang rang emai. 

"Hmanzan khan ka mood a fu lo lutuk a, ho te te ka huat phah a nih kha" tiin bul ka ţan a, sawi zel tur ka hre leh chuang lo. 

"I mu tlem anih chu" 

"Ka thusawi leh mut tlem a inzawm a mi?"

"Aw ka chhiar a, i danglam thut chhan kha ka en kual a, ho te te i huat chuan mut tlem vang anih hmel" 

"Ka tihpalh anih kha. Chuan i thil min zawh kha, ka ngaihtuah chiang a, ka duh ve che aniang" phone ka dah daih. Ka zak lutuk a a sawi ve tur ka ngaithla ngam rih lo. Khumah bawk thlawrhin ka tal vak vak a, ka sawi kher kher kha ka inchhir nghal ut ut. A rawn call nawn leh ngei a, aw ka then kharh kharh hnuah ka la ve hram a, "I zak a ni maw?" tiin zawt a, a nui tih ka hria. Awmdun phei ila chu min fiam nasa teh ang chu. 

"Min chhaih nan a i hman chuan ka rilru ka thlak leh a ni mai" ka ti khur khur a, tunah chuan ka duh ang takin a awm thei tawh ang. 

"Chhaih lo ang. Awm dun thei lo mah ila a thlamuanthlak deuh" a tih chuan "Mahse duh dan ka nei" ka lo ti vat. 

"Sawi la"

"Hmeichhe dang biak awih loh" ka ti sep a, zak chung chungin ka sawi. 

"A dang zel"

"Chuzawng chu. A dang leh chu ţha deuhin lehkha zir la a ni mai. I duh dan min hrilh ve thei bawk" ka ti zat zat a, a thu zawk ka nih duh hmel. 

"I awmdan ngai khan awm reng la a tawk a ni mai" 

"Mipa chungchangah?"

"Veng tur che an tam kha" a tih chuan a ţhiante ka hrechhuak zawk a, ka bulah sawi lo mah sela a ţhiante hnenah thu a chah nual ka ring. 

"Min veng hneh ngawt ang. Nangpawh ka duh dan ang khan awm ang che" ka tih laiin hmeichhe nui ri ka hre leh a, keimah min nuih ni chuan a lang lo. 

"In awmdun reng mai mi?" ka ti hlak. 

"A lo leng ţhin a, an awmna ala rei lo a, ţhian ala nei vak bik lo a" a ti a, a inthlahrung ve deuh niin a lang. 

"Nang meuh a kawm nel nghal theih che chuan ţhian a siam zung zung thei ang chu"

"Nia ţhian ka lo zawnpui ang" a ti liam puat a, hmeichhia chu ngawi turin a hrilh zui. Tommy thusawi kha hrerengin ka be lui ve char char a, reitak chhung kan inbia. 

Lehkha pawh ka zir phur leh tawh a, bialpa neih vang a zir ţhat loh phah ka tum lo. Ka zirlai tihchhiat phah ka tum lo a, bialpa nei chunga ţha deuh a pass ka tum zawk. Tleirawl ka nih chhung hi nuam deuhin ka hmang ang a, lehkha ka zir pah zel bawk ang. 

Mut dawnah min rawn be leh a, nuam ka ti veng veng. Exam zawh a zin ka tumruh zual hle a, hma hun ka ngaihtuah buai duh rih lo. Tun hun hi ţha leh nuam tak a ka hman chuan ka duh tawk. 

CONT...