EIGHTEEN-9

EIGHTEEN-9

Tluang takin exam kan zo a, reilote chiah chawlh kan nei. School kal lo a nileng a ka puih theih dawn vangin ka nu a lawm khawp a, zin ka sawi ri ngam lo. Khawiah mah zin peih ngai lo leh exam zawh a lenchhuah nachang hre ngai lovin zin ka tih thut chuan min manchhuak rang lutuk ang. Msa chanchin a hre ve vek tho bawk si. 

"Ka dil duh ta lo mai. A phal dawn chuang lova, nakinah lo zin na hun a awm mai ang" tiin Msa ka hrilh ve. Ka nu phone ka hmang tawh bik lo va, ţhiante nen zirlai pawimawh vel inhrilh ţhin angin ka nu hnenah ka sawi a, ka pa phone hlui min hman tir hlauh. 

"Ka lokal ang. A phal ka ring lo sa hrim hrim a, Tommy ka be tawh a, kan in a ka haw duh loh chuan an inah ka awm thei dawn a" a tih chuan ka hlim takzet. Nitin a inzui ţhin kha kan inhmu lo rei tawh sia, ka ngai tawh. 

"Nia lo haw mai rawh. Bike i keng si lo va, engin nge ilo haw ang?"

"Fiona nen" ţi dek a a tih chuan ka sa leh phat. Kan inbiak apiangin thawm a lo nei ve a, Msa te inah hian a awm ve chawt ni berin ka hria. 

"Eng nge a rawn tih ve dawn?"

"Api te an awm a, a tlawh ve duh aniang. Ngati nge Fiona hi i nin viau a?" tiin min la zawt ta deuh deuh. A ni paw'n mipa dang ka hmuh a duh bik lo va, thil min pek lah puar chung chungin a rukin a lo ei zo vek duh. Amah ang tho ka ni tih a ngaihtuah pha lo hrim hrim. 

"A vil chawt che in ka hria"

"Ka ţhian anih hi. Ka nauten an ngai bawk a, lo len a tum loh pawn an va sawm ţhin. I ngaih ang a ni lo, a fel lutuk" a tih phei chuan kan inbiakna chu tih tawp daih ka duh leh rum rum tawh mahse ka ngai ve tho bawk si. 

"Bialnu inei tih a hria em?"

"Hre lo" thawk ka la halh a, ka bul hnai a ka dah reng ţhin a diary min pek leh ka phone ken lai chu nghet zetin ka hum ngawt ngawt. 

"Zantin i biak ţhin hi mipa emaw a ti a ni maw?" ka ti chang fak a, ka lawm lohna hi a hrethiam ve em ang chu. 

"Ţhiante ah a ngai ang. A hre ru maithei a ka hre lo le. A hranpa in ka hrilh lem lo a"

"In inkawmngeih hle sia i hrilh ka lo ring a" 

"Mi zawng zawngin an hriat kher a ngai lo" a ti a, min hmu thei lo mahse ka bu nghat nghat. A nute khua a han zin ka chak lehzual a, ka nu in a phal dawn lo nasa mai sia, Aizawl a rawnkal chuan hmuh ve ngei erawh ka tum. 

"Nih chuan i rawn haw hunah midang hriat theih loh dan tur berin awm ang che. Midangin an hriat ka duh bik lo a nia" ka ngei lutuk vangin ka ti ve a, hmeichhia kawm lo turin ka tia, a intiam vek a, nitin zantin an inhmu tho si. 

"I ngai kawi anih kha" a ti dek dek a, "Fiona hriat i duh lo va, keipawn midangin an hriat ka duh bik lo. Khanu kha i hlau anih kha" ka ti vin hlar. Ka hmuh hma hauh hian ka ngei hlur a ni tawp mai. A aw leh nui ri ka hre ve ziah te hi ka hne. 

"Chutiang a i ngaih tlat dawn chuan ka lo hrilh ang. Awm ve ziah mahse zantin ka biak ziah zawk chu nangmah i nia, ka ngai che a ka hrilh ziah bawk che a, kan inbiak dan aţang hian a hre vek tawh ang" ti mahse ka lung a la awi thei chuang lo. 

"A haw hunah kan inbe leh dawn nia, a thawm kha ka hre peih tawh lo" ka ti a, ngai viau mah ila ka dah hmak. A tihziah danin min rawn call nawn leh mai ang ka ti rilru a mahse a ni pawh a reh ve hmak tho. Thupha chawina thu takngial pawh ka dawng lo. Chu chuan min ti thinrim lehzual. 

FIONA

"A hau che ni maw? I ţhut ngui bur tawh chuan in inhau tihna?" an naupangber kum4 mi lek Felfeli ka pua a, rit viau mahse a ngen tlat sia. Fiam ve bawk mah ila a ţhu ngui bur reng tho. 

"Aizawl kan kal vat dawn a, in sawifel thei mai ang. Nangmah a i sawifel theih loh chuan ka sawipui dawn che nia lungngai suh" ka ti leh luam. Bialnu a nei tih ka hria a, a duh zia lah ka hai lo. Engkimah a dah hmasa ber tawp a, a bialnu tan chuan a nuam ngawt ang ka lo ti ţhin. 

"A thik che" a ti hmuk a, ka nui vak thung. Hmeichhe duh deuh chu nei lo se ka star ve maithei. A nihna ang ang hian a lang tawp a, a landanah fel hmel vak lo mahse a rilru a ţha phian. Mahse bialnu nei lai ngaizawng tur em chuan ka la indah chhin ngai lo. 

"Kan infiamna bulah kher phone i hmang ţhin anih kha"

"Ka nu in Rintea nen room min inţawm tir a, khawiah  nge phone ka hman chuan ang a" vin zet hian a ti a, a thinrimna ka chungah bawk a leih baw leh dawn aniang. 

"Nih leh phone i hman dawn chuan i naute ho ka chhuah pui ziah tawh ang. Naupang ho nen a kan infiam ri a hre zeuh zeuh chauh awm sia, a thik ka ring lo a" inthlahrung tak hian ka ti a, bialnu chu nei lo se ka star ve hrim hrim ang ka tih rual khan a bialnu nen a pawh ţhen duhna pawh ka nei chuang lo. Thil ţha lo kan tih chuan kan chungah a let ve ţhin. Chu chu hman aţangin ka hre tawh. 

"Hey i ţap ang e aw. Ka thlem peih lo che a nia" tiin min fiam a, a thinrim viau emaw ka tih laia chutianga min fiam leh thei chu mak ka ti kher mai. Mahse ka inthlahrung takzet a, lem ka chang lo. Chu chu a hre thei anih ka ring. 

"Ka ţap ngai lo ka tih tawh kha"

"Tak tak maw?" a ti a, ngam leh ngam lova ka melh laiin a nui suk a, ka rilru a na hma in mittui ka ngah hle tih a hrechiang. 

"I chhe emai. Felfeli ka paw mu tawh bawk a ka haw tawh dawn. Aizawl ka kal chak tawh sia, zanin aţangin ka insiam ţan dawn" phur zet hian ka ti a, ka pi te hmuh ka chak tawh. Min duat bawk si, ka ngai ţhin takzet. An hnen a awm ka chak ţhin a, mahse hmeichhe awmchhun leh naupangber ka nih vang hian ka nu in min lo ngai ve tho si. An hnenah awm thei lo mah ila school chawlh apiangin ka tlawh tho ţhin. 

"Ka lo thlah ang che" a tih chuan ka hnial duh bik lo a, anu in a hranpa a chhuah a phal vak lo a, min thlah hi chhuah chhuanlamah a hmang ţhin. Reilote chhung chauh pawh nise zan boruak han hip vang vang hi a tan chuan a hlu lutuk tlat. 

"Nu Tei, Felfeli hi a muhil tawh" ka ti lang lang a, a thingpui no dawm lai chu dah vatin Felfeli chu min laksak a, thingpui min in tir a tum viau na a ka ngainat loh em vangin ka hnial tluan parh. 

"Naktuk lo leng leh rawh aw. Chhunah cake kan siam dawn nia, naupang ilo awm a, min pui nasa ţhin sia tui deuhin ka siam sak ang che u" a ti siam siam a, Nu Tei hi chu a nelawm ve thlawt. 

"Awle i siam chhungin nau ka lo awm leh ang a" ka ti a, zan dang ang bawkin hlim deuhin kan inthlah. Ka nu nen an inkawmngeih bawk a, an in a ka len hi chu ka nu leh pate pawh hian an phal vek. 

Inchhung lut mai lovin kan inkawtah kan ţhu dun a, tunlai tak chu zan boruak a nuam thei khawp mai. 

"Hman zan a kan chhuah ruk kha" nui hak hak chung hian ka ti a, hlauthawng viau mah ila a nuam takzet. 

"Kan ti ziah dawn nia. Aizawl thleng i u in min thlah thei dawn maw?"

"Aw thei dawn e. Thil pawimawh a kal a ngai tho a, chumi pah chuan a remchang em a. I va phur tawh awm ve" ti a ka chhaih chuan a lo nui ve hawk a, ka rilru a nuam sawt. 

"I hmu ve chak em?"

"Hmu chak e. I mood ti danglam zung zung thei, i atchilh bur bawk si hi eng ang hmeichhia nge anih ka hre chak. A hmelţha em? Eng ang mizia nge?" ka ti nghal mawlh mawlh a, kan inang lo viau ang tih ka ring. 

"Hmelţha e, mit a inang lo a, ka mitah chuan khawvel zawng zawngah a hmelţha ber" a ti a, thla eng hnuaiah ringawt chuan a hmel ka hmu chiang thei lo mahse sawi nuam a ti tih ka hria, ka ţhianpa in a duhtak a tawng hi ka lawmpui takzet a, a bialnu chu vannei ka ti bawk. Hetiang mipa hi hlut nachang a hre lo ang tih ka hlau a ni. 

"A mizia chu nangmah letling thawk a ni mai"

"A ni maw?" ka ti vat a, sawizawm vat vat turin ka hrilh bawk. 

"Umm..ţhian a kawm vak lo va, nau a awm ve ngai lo va, naupangin an hlau ang" a ti a, kan han nui dun leh rih ţhin. 

"A chhel a, nang angin a ţap ve mai mai ngai lo" 

"Ka ţap reng bik chuang hleinem. Vawikhat kha chu ka rilru a na a, dawtin min puh anih kha. Vawikhat dang leh kha chu ka thin a rim a" ti a ka lo insawi thiam ve zat zat chuan a nuih ka ti za khawp mai. 

"A ni pawh dawtin an puh a, an bum bawk a mahse a ţap lo. Midang puihna mamawh a inti ngai lo va, mahse puih a ngai ziah tho sia" a ti a, keipawh ka lo nui leh hak hak. 

"Chhel deuh itih khan a hlauhawm viau dawn maw ka tia mahse a lawmawm em chu" ka lo ti a, a vannei bawk ka ti rilru leh hram. 

"Hlauh a neihin hlau angin a awm duh lo a, amah a engkim tih theih a tum a, mahse a ti thei vek lo. Amah a ti thei ang a a inngaih theih nan a rukin ka pui ţhin"

"Ehh...in pe zo hle mai" uang thuang tak hian ka ti a, ka nghawngah min kuai a, a nat hma in a hnungah ka chum zawt zawt. 

"Amah chauhin a tlei thei a, naupanlai aţangin ka hre tawh a, midang hmuh laiin vawithum chiah a la ţap. Vawihnih chu tereuhte kan nih laiin a nia, vawikhat chu a pa thihin" 

"Naupanlai aţanga i hriat tawh vang anih chu i rilru a a tlak nat lehzual" ka ti a, midang chanchin ka hnen a a sawi vawikhatna a ni. A inhawng lo va, inkawm nasa viau mah ila eng thil mah ka zawt chhuak thei ngai lo. 

"Ni ve pakhat ang. Nangpawh ka ţhian inia ka ngaihtuah tho che. An hauh che chuan ka chhan ve ziah tho ang che" inti huai zet hian a ti vel a, ka lo nui ţiah ţiah. 

"Vanlalpeka nen in insual leh dawn mi? Chhungte an ko leh mai tur a sin" nui reng chung hian ka ti a, min chhaih a, mawi lo tak takin min fiam a, a nin tawpah ka thlavang a hauh a, Vanlalpeka lah ţawngkam aia thahrui hmang ţangkai duh chi a lo ni bawk nen an insual phah a, a chhungte hial an koh phah a, khami ţum a nuam lo ka tih zia kha. 

"Kan insual lai chiah i sawi a, a hneh lo che ti tel ve la" a ti a, kan awmdun hi chuan kan nui dun reng zel. A bialnu nen a an inbiak ţhat vak loh ţum hi chuan ka chungah a thinrimna a hrithla ţhin a, min hau a, nuam lo ti deuhin min siam ţhin. Mahse zingah school kan kal rual leh tho zel. 

"I bialnu chuan a lo nghakhlel tawh viau ang che. A hmu lo rei tawh che sia, a pa a boral tawh phei chuan a khuahar viau ang ţhian a kawm tam lo iti bawk sia" 

"Kawm vak lo. A thik tlat che a, a la hmuh loh vang che niang. Hmu che se la chuan midang ang tho in a ngaina ve hrim hrim ang che. I fel a, an ngaina vek che a" a tih chiah chuan ka lawm bawk si, zak deuh bawk si chu ka sa pap pap mai. 

"A lawmawm, i bialnu pawh a fel hmel em chu. Hmun khatah in awm lo va, a thikthu a chhiat deuh pawn hrethiam hram hram rawh. Aizawlah awm la chuan a thikthu a chhe bik nang. In hriatthiamna tello chuan in laichinna hian hna a thawk thei lo" ka ti ve luam a, midang ngaihdan ka hre lo va, hei chu ka ngaihdan mai mai. 

"I haw lo a a tih zia. I hmuh chuan a ni pawh i ngaina ang"

"Huat nachhan tur ka nei hleinem"

"Hmeichhe dang bulah i bialpa awm se i thik ve angem?" a ti ve khauh a, zawhna mawl mang tak tak a nei lo anih chuan Msa a nilo tihna a ni mai. 

"Thik maithei mahse ka bialpa kha rintawk phawt ka tum ang a, ka lak a a rinawm tlat chuan hmeichhe dang chu a hnar thei em em ang. Thil awmdan hriatchian ka tum hmasa ang a, a nih dan tur pel a an awm anih chuan ka thik khawp ang. Min bum anih phei chuan ka ring leh tawh lo vang" ka ti a, a bialnu ka huat vang a sawi ka ni lo va, ka bialpa a rintlak tih ka hriat chuan thikthu tih lan dan chintawk ka thiam ka ring. 

"Be leh ta ila eng nge ka sawi ang?" 

"I duh duh i sawi ang. Tak tak a i rintlak zia hrilh la, keichu i ţhian ka nih hma aţangin i naute ţhian ka ni tawh a, i nau ka awm ziah thu hrilh la, kan thawm kha kan duh vang a hriattir kan ni lo a, a rin loh che chuan duh leh ka nu phone number lo pe la min lo biak tir la, i rinawm zia hrilh la hmuh tir bawk la, i bialnu a ni tih ka hriat vek thu hrilh bawk la, chuan ka duh lo che tih hrilh ang che" ka ti a, mi bialpa chu ka duh lo tak tak alawm. Mi bialpa ni lo se chu ka rilru ka thlak maithei a, mahse mi inkawp rem lai tihbuai phet tum chu a luck loh thlak emai. 

"Ka lo hrilh vek a, phone ila nei lo hi a buaithlak" a ti hluk a, zan a kan chhuah ruk dawn pawh khan phone nei ila chu kha aia awlsam khan kan chhuak ru thei ang. 

"Ka pa in a phal tlat lo a lawm. Ka lut tawh dawn. Ka haw tlai chuan len an phal tawh lo ang. Nangpawh haw la i bialnu chu be vat vat rawh nih loh chuan a ngai lo tial tial mai ang che" tiin ka sawi ţhaih a, kan inthlah ve thei hram. 

Inchhung ka luh chuan ka chhungten tv an lo la en a, dar9 a ri thuak tawh. Min hauh ka rin nen an thei ei lai min lo pe ve sawk sawk zawk a. Kan chhungkuain kan tihziah angin mut dawnah chhung inkhawm kan hmang a, chumi zawhah chuan kan tho sang sang. 

"Mami naktuk tuk leh a inkal dawn chuan naktukah thlai lei tur zawng kual ang aw. Ipi ten an lo beisei takin" ka nu in a tih chuan ka phur lem lo kher mai. 

"Nu Tei nen cake siam kan tum asin. Mahse pawi lo chawhma lamah anih loh chuan chawhnu lamah ka leipui che ang a" ka ti zung zung a, ka nu ka hnial ţang ţang chuan ka pa in min hauh ka hlau. 

"Chawhnu lamah kan kal dawn nia. I zin daih chuan inu Tei khua a har dawn ni mai. Rintea damlo eng nge a an?"

"A khuasik tawh lo zanin pawh kan infiam ho vek a, a harh tawh lutuk" phur tak hian ka ti a, a damloh kha chuan ka nu leh pa te paw'n an ngaihtuah hle. Kan chhungkaw hnih hian kan inpawh a, an khuaa kan awm tirh hian upa te tih loh a min ngaihsak ber tu te an ni. Kei chauh ni lo ka ute ho pawn an ngaina hle. 

Mu turin ka pindanah ka lut a, ka khum bul chiahah hian tukverh awmin heta ţang hian kan kawt zawlah a chhuah mai theih a, chhuah ruk awlsam na ber a ni. Quarter hi a chhawng anih loh vang hian a hmalam tukverh hi chu a sang lo hlawm a, a zia phian. 

Ka mutchhuak lo lutuk chu tukverh ah dakin pawn lam ka thlir a, Msa nen a kan ţhutna pawh a lang thei vek. He khuaah hian kum hnih vel chiah kan la awm a, Nu Tei te inah chiah ka leng ţhin bawk a hmelhriat ka la nei tam bik lo. Nu Tei hnen aţanga a fapa an hnen a a awm ve tur thu ka hriat khan hetianga dan bawhchhiat pawi ti lo chi hi anih ka ring lo a, Nu Tei a fel em vangin mi fel tak, dam duam mai leh thuawih deuh anih ka ring a, mahse a let ling thawk. Fel viau mahse dan bawhchhiat nuam a ti a, lehkha a zir ţha peih lo va, ka la tih ngai miah loh tam tak min tih pui tawh. School tlan bo te, zan a chhuah ruk te thlengin. Mahse a rilru ţhatna erawh ka hmuh hmaih bik lo. Ka te lo chung hian mipa na na na chu kei aiin a la sang tho a, school dan a zawm lo deuh vek a, test tur kan neih chuan a rukin Nu Tei ka hrilh ţhin a, a zir luih tir a, a pass veleh khurh ţhin. Teacher ten min check dawn ni chuan school a kal tlai lui mai zel a, an chhungkua an lo hausa ve bawk nen, mi hausa ngaichang pawl hi an awm ve zel bawk sia, engtin tin emaw a fihlim leh mai zel. Meizial a zu ru ţhin a, ka lo veng ţhin. La awm rei lutuk lo mah se kan inzui nasa a, kan inkawmngeih hle. Vanlalpeka te nen an inkawm mai ka hlau a, ka veng tlat zel. Insual buan buan tawh mahse mipa annih chuan an inkawm leh thei mai ang. Lehkha zir luih pui chang ka nei a, a thiam loh ka hrilh a, zirdan awlsam te ka thiam ang angin ka hrilh ţhin. 

A bialnu a biak hlan chuan a naute ka lo infiam pui ţhin a, a biak zawhah kan zir leh ţhin a, class-12 hi a zo thei lo ang tih ka hlau. Kum tir lam chiah a la ni bawk a, ţhahnem ka ngaih pui chuan hun a la nei tih ka hria a, theih tawp ka chhuah ţhin. A bialnu nen an inbiak fuh loh hi chuan zir luih pui a har ţhin a, keimah vang a thinrim a ni tlangpui zel bawk nen min haw hlur ni mai hian ka hre ţhin. 

Mahse keimah vang a ni vek bik lo a, keimah vang anih loh chang chuan an inhauh chhan ka hre ngai lo. Ka chungah engmah a lantir ngai lo tlat a. Ho te te ah an inhnial ve fo in ka hria mahse kan kum a la naupang tlang a, a awm ve tho mai. 

Nuam a tih zawng ka tihpui reng rualin lehkha ka zirpui pah ţhin bawk a, amahin zir a tum bawk si lo, a vei thlawt lo a, a pa school angah a la ngai a ni maithei. Zir nuam a tih theih nan ţanpui ka tum tlat ţhin. 

Nu Tei cake siam ei tur chuan ka kal ta ngei a, zan ka mengrei bawk a ka rit bur lehnghal. Msa phone ah Rintea nen game kan khel a, a bialnu in a lo call. 

"Naa..ka khel tui" tih nang nang pah a hmeh tawp mai a tum chu phal lo in "Ngai lo ngai lo" ka tih mawlh mawlh hnuah Msa ka ko vak vak a, a rawn thlen hma in a tawp hman hram. Vanneihthlak takin a lo call leh hlauh a, an inhau tawh lo em ang chu. 

"Rebecca a niang maw?" nui ver ver chungin Nu Tei'n min lo zawt. A cake siamna bulah ka awm ve a, naupang chuan tv an en ţhap. An duh zawng tak a lang a, a vanneihthlak. 

"Aw a lo call ve tehmial a, Msa chu a lawm leh vur vur ang chu aw" nui chung hian ka ti a, a ni pawh a lo nui ve mai. 

"Ka hmu tawh a" a ti a, a chawl daih a, a sawi zawm hun nghakin ka lo en ran. 

"I hmelţha zawk" a ti leh daih a, ri miah lo a nui chungin hmui ka hup a, fiamthu mah nise hmelţha intih chu a nuam hrim hrim. 

"Lehkha a thiam a, a fel bawk a, a hmelţha tho bawk a, chu bak bak a awm lo. Mo ţha deuh ila nei maithei sin" 

"Nangpawh mo ţha deuh ila ka ring. Kei chuan ka duh zawk daih che"

"Msa nen kan induh lo tawn ve ve a, i neih tur ka ni bawk si lo a" ka ti a, fiamthu hlir a inkap tawn reng chungin nidang ang bawkin kan hlim dun kher mai. Kan nui dun bawk bawk a, cake a siam zo a, keiin thingpui ka lum ve thung.

"Msa va ko rawh rawn in ve lawk rawh se" a tih chuan Msa leh Rintea room inţawmah ka lut a, ring leng lawng a a hming a ka koh chuan a hmuiah a kut a lo dah vat a, ka chip hmak. An lo la inbe reng chu niin. Hmui phunin "Thingpui" ka ti hram a, a hrethiam a ni chek ang chu a bu nghat nghat a, ka chhuahsan veleh mai. 

"A lokal dawn. Hey nangni ho kha thingpui lo in rawh u" naupang ho ţhutna lam a hawi pahin ka au leh lang lang. Rintea, Emily leh Felfeli te pawh cake an eichakna a rei tawh bawk a, an lo tlan khawm rang kher mai. Msa pahrawn erawh doctor a ni a, hospital ah a awm thung. Heta kan awm hlim kha chuan a hna vang hian khaw dangah a awm daih. A fel a, Msa pawh a duat. A fa tak a ni lo tih a hriat loh hrim hrim. Msa a rawn awm dawn te khan Nu Tei aiin a phur zawk a, a room tur pawh a hranpa a siam sak a ti na a, Nu Tei hian a fapa mizia a hrechiang aniang Rintea nen a inţawm tir. Bike kawl thlengin a phal a, mahse remti lo tu chu Nu bawk a ni. An inah hian ka kal ngun a, pahrawn a nihna a lang ngai lo hrim hrim. Ka fak khawp mai. 

Msa thingpui rawn in ve chu Nu Tei'n "In inbe nasa lutuk. In inhne thuai ang, thil dang tih tur a tam a, zan a in inbiak hi duhtawk rawh u" a lo ti hlak hlak a, a nui ruh ruh ringawt a, a chhang lo va, a ngaipawimawh lem lo. 

"A ţha vek em?" zawi te hian ka lo ti sep a.

"A ti tau leh tawh" a tih chuan ka lo chek tlak. An induh na an lantir thiam lo ah ka ngai tawh mai ang. 

Ka u rualin Msa nen chuan Aizawl lam kan pan ta ngei a, a phur khawp mai. A ţhianpa in a lo hmuah tur thu a sawi a, kan ti ti char char a, ka u chu a lo tel ve zeuh zeuh ringawt. Ka u a awm ve vangin a zah hlauin a bialnu chungchang ka sawipui lo va, ka pi phone number ka pe a, a bialnu chu min la hmuh pui ve turin ka hrilh. 

A ţhianpa chuan a lo hmuak ngei a, an han inhmu chiah chu nuam an ti ham ham khawp mai. Ka hming a hrilh a, a ţhianpa chu Tommy a nih thu a sawi. Kan in chibai a, a bungrua a lak fel hnu ah ka u nen ka pi te in lam panin kan kal a, kan inhmuh hunah chuan thik chi ka nih loh zia a hriatthiam ka beisei. Ka ţhianpa a nia, a ţha ber ka duh pui a, a hlimna tur pawh. An pahnih tan a pawi tur eng thil mah ka ti lo vang. Pastor fanu ka ni a, ka nunah hian miin entawn tur hmu se ka ti ţhin. Ka pa angin Pathian thu ka sawi ve thiam lo va, mahse ka pa thusawi changin biakin ah ka zai ve zeuh zeuh. Midang te tan a thil ţha tih ka duh a, puih ngai puih zel ka duh. Chu chu ka pa ka puih ve theihna a ni. Ţhianţha tak nih ka duh a, ţhiante natna thlen tu nih ka duh lo. Star ve dawn viau mah ila hmeichhe biak ţhin a nei tih ka hriat aţang khan a ruk tho in ka star lo hmak. A bul a awm nuam ka ti a, mahse bialnu a neih chhung chu a ţhian ang chauhin ka awm reng ang. 

CONT...