EIGHTEEN-LAST

EIGHTEEN-LAST

"I va la har ve" ka ti nghal tawng. Ka call ngat ngat a, a la thei miah lo. Vawi eng emaw zat ka tih nawn hnuah a la ve hram. 

"Fiona a pum a na thut a, hospital ah kan kalpui lawk a, phone hi inah ka dah daih a" inthlahrun hmel tak hian a rawn ti a, thawk ka la hrawk. Ka ning zo zai tawh khawp mai. 

"Hruai tu tur chhungte a nei na nge?" ka ti hrawk a, a lo pawt peng ve sek hi ka hne em a ni. 

"Nei e. A nu leh a u nen kan kal. Kan in a a lo len lai a ni sia, kal ve loh a mawi si lo a" a ti leh a, ka ngaihdan a ni dawn lo tih a hre sa aniang a ţawng huai ngam lo emai. 

"Fiona nge keimah i duh zawk?" ka ti ta nge nge. An let dun hnu khan nitin kan inbia a, a hma aiin Fiona chanchin leh a thawm te ka hre khat deuh mahse ka hre zeuh zeuh tho. An inah a la leng ngun hle tih ka hria a, an awmdan an la thlak danglam lo. Ka ţhian a ni ti mah sela ka bialpa anih chhung chu ka thik reng dawn tho. Ka duh aiin an inpawh mah mah tlat a ni. 

"Ka duh zawk che a langsar deuh a ka kawp che hi" ti ve bawk mahse ka rilru a nuam tawh chuang lo. Kan inhmu thei lo va, an awmdan ka hmu kilh kelh lo a, hei vang tak hian ka thikthu a chhiat lehzual phah ţhin. 

"Ka duhzawk che iti reng a, Fiona ngawt i buaipui reng tho si" tiin ka vui a, ngaihţha deuh a awm turin min hrilh reng na a ka thei miah lo. Hmeichhe dang nen in pawh zet a an awm laiin kuangkuahin ka ţhu mai mai thei bik lo. 

"A damlo anih hi. Khatiang zawng a thu i lak leh dawn ai chuan dah mai rawh. In be lo mai ang" a ti hmuk a, ka ngei kher mai. Kan awmdun laiin kan inhau ngai miah lo va, kan awm hrang leh chiah a, zantin deuh thaw kan inhau leh tawh. 

"A thlavang hauh i pe na sawt hle mai. Min biak loh te i tum phah a" ka ti leh a, Fiona vang hian ka chungah a thinrim fo a, a ţan hlur reng mai ni. Ka tan chuan lungawina tur a vang hle. 

"A ninawm tawh. Ho te te ah i thinrim a, ka hrilhfiah ziah che. Ka sawi ngai ka sawi ngun tawh. Min la ring thei lo cheu a nih chuan i thu thu. I thinrim loh hunah kan inbe dawn nia" a ti a, phone dah hmasa zawkah a ţang. 

Ka awm a tawt up up a, ka thinrim lutuk chu ka lum pup pup hialin ka hria. Engkim tih tawp nghal vek mai ka duh rum rum laiin nakin a inchhir ka hlau ve tho si. Mahse ti lo thei lo hian min la siam tho ka ring. 

Lehkhazir pahin phone ka ngaichang reng a, a reh vang vang. Ka lehkha chhiar lai bulah ka dah vang a, a khat tawkin ka la kang leh ţhin. Biak hmasak leh ka tlawmngai ve ting tang tawh bawk si, bakah ka thinrim a la reh lo a, a aw ka hriat rualin ka thinrimna hi a zual leh tho ang. Ka zirlai chu rilru ah a lut mawh kher mai, duh ber te nen a intih thiam loh hi chuan thil dang a ngaihtuah hleih theih loh. Kan inbiak fuh chang hi chuan nuam ti takin ka zir thei a, a fuh loh erawh chuan zir luih pawh tum ila a theih loh. 

Lehkhabu ka khup thawk a, ka mu ta daih. Phone ka la ngaichang reng tho a, a rik hlekin hmanhmawh deuhin ka en vut zel a, Msa a ni lo zel.  

[Inţhen ang] tih zawng ka thawn a, min rawn hnial ang a, min rawn biak phah ka beisei vang a ni. A chhan chu min duh a, min ngaihsak a, a hlimna ber ni ve in ka inhria. Min atchilh ti ila a dik ber ang. Hetianga thu tawp ka siam tawh chuan a buai chung ţhin. A induh ve vel a, rilru nuam deuh a awm tir ka tum bik lo. 

[Awle] min rawn chhan dan teh tawp chu ka lawm lo kher mai. Ka rilru tur ngaihtuah miah lovin ka thikthu ka lantir apiangin a thinrim zawkah a ţang a, a hma kha chuan inţhen ka sawiin a hlauthawng a, min biak a tum ngat ngat ţhin. Mahse kha hmeichhia khan a thlak danglam vek tawh. Msa ka hriat ţhin kha a ang tawh lo. 

Ka be duh ta bik miah lo a, a phone number delete in pangngai deuh a awm ka tum lui tlat. A ţhiante hmuh lai phei chuan hrehawm ti ang a lan ka tum lo lehzual. A chanchin min zawhin ka hriat loh thu ka sawi mai a, kan inţhen thu nen. Kan inţhenna hian keimah a nghawng a neih loh zia lantir ka tum char char zawk ţhin. 

Msa leh kan boruak vel te rilru ah dah lo luiin lehkha ka zir ngawt ngawt a, rilru nuam a a awm ka rin bik lohna chuan ka awm a ti nuam deuh. 

Exam naah a ti ţha ber ka ni char char a, ţhian ka kawm lo a, Msa ţhiante takngial pawh ka hlat tawh lutuk. Kum tawp kan hnaih tawh a, Msa chanchin leh a thawm hrim hrim hriat ka la nei lo. Min biak tum miah lo leh ka tello a awm thei na na na chu biak luih ka tum bik lo. 

Tlai khat ka school bang ka haw chuan Msa ka hmu hlawl a, ka awih lo lek lek. Danglamna a la nei em em lo va, kan inkawtah lo ţhu in min hmuh veleh ngainatawm zetin min lo nuih a, ka theihnghilh vek thei ţep tawh a sin le. 

"Inu i pui na nge?" ti a min lo zawh chuan lu ka thing. 

"Kimpuii a awm a, ka haw hma. Lehkhazir ka ngai a, ka pui tawh ngai lo" ka ti a, ţha deuhin ka chhang ve mai. 

"Ka nu ţhiannu ber a boral a, ka nu ka rawn hruai a" ti a a rawnkal chhan a sawi chuan lu ka bu leh tawp a, kan inah a rawn kal ve vang vang sia a mawiah lut turin ka sawm ve a, sawm a awl em em lehnghal. 

Choka ah kan ţhu dun ran a,a vawh deuh tawh vangin thingpui ka lum a, dawhkanah dahin chhang ka chhawp leh a, ka rilţamin ka thil chhawp ka ei mai laiin a ni chuan a khawih ve miah lo. Thingpui no a dawm a, a in mai chuang lo. 

"I damţha zel maw?" tiin min zawt leh a, a ni pawh kan inţhenna khan a nghawng vak lo aniang a landan a ngai reng. 

"Aw dam ve zel? Nang zawk?" 

"Dam anih hi" nui chung hian a ti a, a hma aiin ka hmu ţha zawk mah. 

"Tommy hnen aţangin i chanchin tlem a zawng ka hre ţhin a, ila ti ţha chhunzawm zel a a lawmawm" tih pahin min rawn melh a, ka lai lek lek. Ho lutuk a inţhen hnu a inhmuh leh chu a nuam chiah lo. 

"Nia ka zir nasa a. Fiona eng nge a an zel?" ka ti a, in ngaizawng tawh lo mah ila ka la thik tho. 

"A ţha"

"In la inkawm reng em?"

"Aw kawm ve zel e" a ti a, lu ka bu nghat nghat. Inţhen miah lo tur kan inţhen phah chung paw'n a la thlah chuang lo tih na a nih chu.

"A ţha lawm, ţhian hi an hlu a, keipawh ţhian ţha deuh chu nei ila ka bialpa aiin ka thlang zawk hrim hrim ang" meinei deuh hian ka ti ve a, kan inţhen hlimchhawn a ka thinrimna kha ka la anchhuahpui lo a, ka la pai reng. 

"Ka thlang zawk a ni lo. Diktak chuan a ninawm em a" a ti nuah nuah a, sawi nuam a ti chiah lo niin a lang. 

"Nia ka thinrim reng a, ka thikthu a chhia a, kei aia ngaihsak i neih ka duh lo a, ning mah la a awm lutuk" ka lo ti leh zat zat. Min hrechiang ber tu a ni chung a dawhtheih a tlem te tal pawh a nei lo kha mak ka ti. 

"Insawifiah reng ka ning a, inhauh reng te, i thinrim thlem reng te kha nin chang ka nei a" tiin tlang takin min hrilh ve bawk. 

"Ka rintlak zia ka hrilh che a, ka thiam ang ang a ka lantir ve chungin min ringhlel reng tho a, inţhen mai kha a ţhat zawk ka rin na a rei tawh" a tihzawm leh a, ngaihthlak erawh a nuam chiah lo. 

"Nia ţhian kan nih laia kan inmil tehreng nen kan nih hnu khan kan inhau reng a" fiamthu ti tak deuh hian ka lo ti veleh a. 

"Umm..dik chiah. Ţhian kan nih khan a nuam zawk. Ka hmanhmawh a, kan puitlin tak tak hmain ka duhna che ka ti lang thawt thawt a, ka thiam loh a nih kha. Ka la duh reng che a, hma hun sawi thei lo mah ila ka duh ber reng tho ang che. Mahse inţhen rih hi a ţha zawk" a ti deuh duah a, pawm pui chiah lo mah ila pawm pui thlap angin ka awm tho. 

"I thiam loh bik a ni hleinem. Ka hrilh ve tho che kha. Ka thikthu a chhe bawk sia, nitin inhmu thei ila chuan khatiang khan ka awm bik miah lo ang. Mahse kan inhmu thei lo a, hmeichhe dang i buaipui reng bawk si. Kha khan min ti thinrim ţhin a, a hmasaber ka ni tawh lo ah ka ngai ţhin a" zak chung chungin ka ti a, kan inhriatna rei tawh viau mahse hetiang lam kan sawi hi chuan ka la zak tlat zel. 

"Ţhian ka ngai hlu a, Fiona phei chu ka ţhian chiah ni lo in kan chhungkaw ţhian a nia, i ngaih ang mizia kha a ni lo. A fel a, a fak zawk ziah che. Sual deuh tur ang a i ngai ţhin kha ka hua a, a thlavang ka hauh a, a lam ţang zawk angah min ngai daih zel sia" a ti a, a nuih a zat hmel hle bawk. Kei ve chu nuih luih tum mah ila ka thei lo ang. 

"Let leh thei ila chuan i bialnu nih ka duh tawh miah lo ang" ka ti chang fak a, a thu tak veleh tawh chuang lo. A bialnu ka ni kher kher kha ka inchhir hluah hluah. Vawi leh khatah ka theihnghilh tawp thei tawh bik si lo. 

"Ka thiam loh a nih kha" a ti leh ringawt a, min hmu tur chauhin a lokal a, ka nun a lo let tumna a nei tawh lo. Chu chu chiang takin ka hmu tlang vek. 

"Nia inchhir char char rawh. Naupang ka la inti chung chungin min nawr lui tlat a, ka nu thuawih lo in a rukin ka kawp che a,hmeichhe dang vangin kan inţhen leh a, min tibuai vek. I inchhir loh chuan mak ka ti zawk ngawt ang. Tikhan inchhir deuhin awm char char rawh" ka ti tan tan a, Lucy tv en lai a ring hlauh a, ni lo se chuan ka ţawng a hre pha ngei ngei ang. 

"Kan inthiam lo mahse kan inţhen chhanah hian thiam lohna ka neih ka hre lo. Nangman min ţhen a, ka lo pawm a, ka rinawm loh lai ka hre lo a, inţhen na tham thil ka tih awm ka hre lo" a ti ve tlat. Min tih hrehawmna zawng zawng a haider leh vek tawh. 

"Mi pathum chu kan leng lo ka tih kha. Tommy, Bsa leh Sawmpuia, an pathumin ka kawm vek. Mahse ka inrawlh thuk tir ve lo. Phone ka biak laiin ka bulah ka awm tir lo a, englai pawn ka zui ve reng lo. Tumah ram ri ka pelh tir ve lo a, i ngaihţhat lohna tur a ka awm ve ngai loh vangin i hrethiam lo a nih kha. Ka thikthu a chhe deuh a ni maithei. A ninawm chang a tam ang mahse ka insum thei bik ţhin lo anih kha" ka ti a, rawn let leh tumna a nei lo chung chung hian ka sawi vek tho. Zahthlak ve viau mahse hmaichhan ngei a sawi hian a chiang bik. 

"Ţhian kan la ni thei tho a, khang zawng zawng kha a thleng lo ah ngai mai ang" awlsam fe hian a ti a, mak ka ti zawk. Theihnghilh nghal mai thei tur a min ngai leh a thleng miah lo ang a ngai thei tur ang a min ngai chu mak ka ti takzet. Tunah chuan a hma ang khan ka pawh tak tak thei tawh lo ang. Ţhian ni leh mah ila kan inkawmngeih tak tak thei tawh dawn lo, chu chu chiang takin ka hre tel. 

"Kan inhmu tawh dawn chuang lo a, theihngilh vek ka lo tum ang. Mahse ţhian ka mamawh ve em em lo" ka ti hmak a, min duhna a nei tawh lo a ni maithei keichuan ka la duh reng a, ka thikthu thlengin a la chhia, ka luhlulna leh induh tawkna vang hian ka ti lang duh lo mai mai zawk. Rilru na ang a lan phei chu ka duh lo lehzual. 

"Inhmu khat tawh ang. Class-12 ka zawh chuan Mizoram ah ka awm loh hmel sia, ka hmu thei lo vang vang ang che. Mahse ka rawn be ţhin dawn che nia" a ti a, ka awih lo kher mai. Hmun dangah a zir zawm a ni thei, ka chanchin a ngaihven zui peih ka ring lo. Min biak reng ka ring lo bur. 

"Ka hlawhtlin hunah chiah kan inhmu leh dawn nia. Hmeichhe dang ang a nalh deuh a ka inchei ve theih hunah, inhmuh apianga restaurant chhung a thil kan hmui rim ka nam tawh dawn loh hunah leh keima pual a lirthei ka neih ve theih hunah" ka ti a, min phatsan miah lo mahse phatsan ah ka in ngai tho. Midang a inrawlh tir ve sek leh dan a tum miah lo te hi min phatsan naah ka ngai. 

"I nihna ang ang khan ka duh ţhin che. I duh ang chuan i hlawhtlin hma chu ka biru char char ang" a ti a, a nui mai mai te chu min nuihzat ah ka ngai tlat tawh. Thil zawng zawng hi ka la kawi laklawh vek tawh. 

"Nupui lo la nei lo la, in inneih hunah nalh deuhin ka lokal duh a nia" ka ti a, za vak lo chuan ka nui ve. 

"Nei lo ang. Ka nupui tur te pawh ila ni leh khut thei a" a tih fiamthu lai chuan ka ner nang nang a, inţhen tawh mah ila kan inkawm lai ang a fiamthu nan a min hman sek ka duh tawh bik lo. 

"Ka nei thlawt lo ang che. Mahse ka hriat loh a nupui i lo neih vaih chuan ka tibuai vak dawn cheu nia" fiamthu bawkin ka ti veleh ang lawi a, hun rei tak hnuah kan nui dun veleh. Kan awmdun hi chuan inhau ve bawk ţhin mah ila kan inmil veleh mai zel a, naupang rilru kan la paih lo bawk a, a nawm chang a tam ve ţhin. 

"Midangin min lo neih tawh pawhin min neih let leh tum tlat ang che" a tih chuan thutak deuhin "Tak tak maw?" ka lo ti vat a, min chhang lovin a nui ringawt. 

"A neitu che a zir a niang chu. Hna zahpuiawm loh tawk ka neih hun hunah inringtawk deuhin ka hmu leh ngei ngei ang che" ka ti a, ka thutiam a ni nghal bawk. Ţhian ho zing a nei lo ber leh chhungkaw khawsak ţha lo ber ka ni reng a, mahse nakinah an zing a hna ţha ber nei tu ka la ni thung ang. Chutiang hunah chuan ka duh duh ka ti ve thei tawh ang. 

"Min rawn hmu dawn nia, ka lo nghak ang che" a ti a, engtiangin nge min lo nghah dawn hriat a chakawm khawp mai mahse ka zawt duh lo. Hre lawk lo ila hrechak deuhin awm reng ila ka duh zawk. Ţhian ni tur bawkin min lo nghak maithei a, nupui fanau a nei tawh maithei bawk. Engtin pawn lo awm dawn se la ka la hmu leh ang. Ka ti ang ka tih chu ka ti ngei ngei ţhin. Ka luhlulna vang chauh a tun thleng a pakhatna a la awm reng thei ka ni. Ka pa boral kha ka in tih chhiat tir duh lo va, Msa nen a kan inţhenna kha ka zirlaiah nghawng ka neih tir lo bawk. Hlawhtlin ka tum tlat a, ka inti chak a, hrehawm ka tuar a, ka tuar zel ang a, ka la tuarchhuak ve khawp mai. Tun a chhungte thlazar hnuai a nuamsa tak a awm ho ai hian ka la nuam sa ve ang. 

An khuaa a let leh hnuah min rawn be zeuh zeuh a, kan nih lai ang em chuan kan inbe tam lo. Ţhian pel a inbiak leh zeuh chang nei ţhin mah ila a theih tawh tak tak loh. Ka tui tawh hlawl lo a, chutiang chiah chuan Msa pawh a awm. Ţhian pel a kan inbiak chuan min be tui ngai lo. Tlai deuh deuhah min chhang a, min ngaihven tak tak tawh lo. 

Tommy hnen aţangin an chanchin hre ngai lo mah ila zep nei lo zawk Bsa hnen aţangin ka hre ţeuh tho zel. Fiona nen an rawn zin leh tih te thlengin ka hria a, inhmuh ka duh tawh loh thu ka sawi chiang bawk a, min hmu turin a rawnkal leh ta lo. Fiona erawh ka la haw hlur a, min tih ang chiah a tih ve chak mah ila hun a la awm lo. Msa nen an inngaizawng tlat lo a. 

Bsa hnen aţanga bialnu a la neih loh thu ka hriat te chuan ka rilru a nuam huai ţhin a, inkawp tak tak thei tawh lo mah ila hmeichhe dang ta a la ni bik lo tih ka hriat chuan ka awm a nawm phah ţhin. 

"Engtik hunah pawh exam ila iti ţha ber reng dawn tho a, khawi college ah nge zawm i tum?" thil ka ziah mawlh mawlh laiin ka hmaah Tommy a rawn ţhu a, Msa ang tho a ni. A thiam aiin a thiam loh a tam zawk a, a thawveng em em reng tho. 

Lehkhabu chungah pen ka dah te te a, phur fe hian "Ka putea nen kan inbia a, Shillong ah an bulah ka awm maithei" ka lo ti a, hmun dang a awm ka in beisei ngai lo hrim hrim a, ka putea te nupa in min lo biak takah chuan a hma zawng aiin ka phur thar leh. 

"A va ţha ve. Awm ngei ngei rawh i zir peih a, i thiam thei bawk a, a ti ţha pawl i ni reng tho ang. I putea te chu an chhungkua in mi an awm?" tiin min lo zawt vat vat a, min phur pui hmel khawp mai. 

"An nupa in an awm. Fa an nei thei lo a, an khawngaihthlak tak tak" 

"Nih phei chuan an duat lehzual dawn che a nih chu. Min lo be ziah ang che aw" a ti a, nui ver ver chung hian ka bu nghat nghat. 

"Chanchin ka lo hrilh ziah ang che. Nang eng nge itih zel ang?" 

"Ka la hre lo. Nih tum ka nei bawk si lo, lehkhazir ka peih vak si lo a, college kal ve hram chu ka tum a, ka pa in pawisa a sen phal chuan dawr ka hawng hluai maithei" a ti a, pawisa ah an buai lo a, fapa mal ania, an duat ve bawk si. A eizawn ve theihna tur ang chu an tihsak em em ang. 

"A ţha lawm. Tun a i tum chu tum char char la, i hawng hluai ang a, ka hausak hunah ka lo dawr ţhin ang che" 

"Kei aia i hausak chuan min nei daih rawh aw" a tih veleh lehkhabu ka la lawk a, a lu ah na takin ka vua a, a haw lem lo bawk a kan nui dun zui bawk bawk a. Msa leh Fiona te chungchang min hrilh duh miah lo mahse ka ţhianţha tak a ni tho tho. 

"Lehkha thiam theih loh sa nak laiin ka lu ah kher kher chuan min vaw tawh suh. Ka sumdawng thei lo mai ang" a ti nang nang a, lei ka lo chhuah zeuh ringawt. 

"Nangmah hmu tur hrim hrimin Shillong ah ka lo zin ţhin ang?" 

"Tak tak maw?"

"Aw i awm phawt chuan" thutak zet hian a ti a, keipawh ka awm hma hauhin ka phur nghal takzet. 

"A nuam dawn. Ţhian siam ka thiam vak si lo a, ka awm dawn chuan lo awm ve thei la ţha tur" a ban a dawm pah hian ka ti a, a nui ve vur vur. 

"Ka awm ve reng peih kher lo min star daih palh ang" 

"I over emai nangmah chauh mipa awm mah la ka star lo ang che" nuihza deuh chungin ka ti ve ngat tho a, a sang ve tho a, Msa aiin tlemin a cher a, a ngo deuh zawk bawk. A hmelchhe hran lo, a mitmeng a fiahin a hnar ngul a sang vah a, a khabe kual leh a hnar ngul a inchawih e kan tih ang chi kha a ni. Hmeichhe ţhenkhat chuan an star ve ngawt ang mahse Msa chiah ka ngaihven ţhin a, Tommy hi chu ţhian bakin ka la enchhin ngai lo. 

"Khawmaw i kut min lo pe teh" ka ti hluai a, mi sawi ka hriat ka endik ve chhin chak. 

"Ka ban i vuan reng a la ve mai la" tih pahin a ban a ti che zeuh a, a ban chu thlahin a kut ka vuan ve thung. Lek kang va in ka thlek vang vang a, ka thil tih chu eng nge a nih chiah hriat tumin a ngaichang ve ran. 

A kut ţang a sei sang a, hmeichhe ţhenkhat kut ai chuan a nalh hrim hrim. Star miah lo mah ila a kut nalh ka tih thu erawh ka hrilh ve fo. 

"Kut ţang sei deuh hi thil siam an thiam duh an tia, thil siam i thiam ngawt ang. Workshop te hawng la, nih loh pawn chhang siam daih la" ka ti dek dek a, rang zetin a kut a la let. 

"Ho leh si ve" ti nuap nuap chungin a kut a nuai nawk nawk a, a nuih a za viau bawk. 

"I nih tum ila hre si lo a ka en sak che a nih kha"

"Dawr hawn tum tlat rawh itih tawh kha, nachin aţang khan ka la tum tlat" intithei zet hian a lo ti ve khauh a, zir san vak a tum lem lo. A zir peih chuang lo bawk a, hetiang reng a nih chuan zir vak lo se a pawi lo daih zawk ang. 

"Anih chuan ka hausak hun a ka lei ve theih tur chi zuar ţeuh ang che" 

"Dawr ka hawn a i duhzawng ka zawrh phawt chuan lei ngai lo in ka pe ve ţhin dawn che nia" 

"Ka hrereng dawn nia aw"

"I haw veleh diary ah i ziak lut nghal dawn nia" a ti a, sawi tur hi chu a haihchham lo ve chiang a nia. 

"Ka ziak ngei ngei ang. Shillong a ka awm phawt chuan lo zin i tum a, chu chu ka ziak tel bawk ang a" zangkhai vah hian ka ti a, nidang a kan inkawm ţhin aiin nuam ka ti zawk. Ka hma hun a ka awmdan tur ka duan lawk min phur pui em vang te pawh a niang. 

"Awle ka lokal ang a, kan bazar dun ang a, zu te kan in ang a" a ti dek dek a, "Zu ka in dawn lo chiang lutuk" ka lo ti vat. 

"Ila in miah lo tak tiraw? Keichu hmanah ka patea ta ka in ru tawh. Ka muhil char char" a ti a, kan nui dun leh rih ţhin. 

"Rui la engtin nge i awm ve ang aw? I rui lai ka hmu chak ta riau mai" a ti a, nui ruh ruh chungin min thlek vang vang. 

"Hmuh inring lo law law la a ni mai. Ka rui ve dawn lo. Ka hlawhtlinna tur min dal thei tur thil ka ti tawh dawn lo" ka ti a, ka thusawi tawp lam chu a zawi khawp mai. Ka kun daih lehnghal. Pen bawk ka la leh a, lehkhabu hnung lamah ho mai mai ka ziak. 

"Ila hlawhtling mai ang. Bul i ţan dawn chauh alawm. I tum a ruh bawk a, hna ţha deuh ila neih ka ring tlat" kan ngawih vang vang hnu a a rawn ţawng chhuah leh takah chuan muangchangin ka dak chhuak a, Msa a hriatchhuah ve tho ka ring. 

"Kum18 chiah ila nih kha Rebecca. Bul i ţan chiah, i thi anih loh chuan hlawhtlin theihna hun ila ngah lutum. Ka nu hian hringnun hi a kal tluang purh reng lo a ti ţhin a, mihring inia, i tlu ve bawk ang chu. Tluk ringawt ai chuan thawh leh theih kha a pawimawh. Hun kal tawh dahţha la, a vaiin. Tun aţang chuan hun lo la awm tur chiah ngaihtuah rawh" a ti ve duah a, a thutak ve zek lehnghal. 

"Thu awmze nei i sawi ka vawikhat hriatna" ka lo ti vat a, fiamthu a ka lo laksak chu a hrilhhai hmel letling zawk. 

Ni e, ka la tlai lo. Kum18 chhung hian thil tam tak chu ka tawng ngei a, bialpa neiin rilru natna thlengin ka hrethiam hman vek. Mahse insiamţhatna hun ka la nei a, hmalam pan na hun ka la nei. Kum18 chiah ka la nia, rilru ka neih phawt chuan ka thil tum hlenchhuah theihna hun ka la nei. 

END....(A tawp hma ka hria😁 mahse a hnu zel a la awm dawn. An puitlin hun thawnthu kal zel hi nakinah kan la ziak ang. Mahse ka tichhuak har deuh maithei. Story dang neih leh nghal ka tum rualin an puitlin hun hi chu tunah ka la ziak rih lo ang, ka la duang rih lo a, nghah rei a ngai lo turah ngai ang. Eighteen lo chhiar a, comment min pe ţhin tu te chungah ka lawm takzet😇)