FATED TO LOVE YOU-15

FATED TO LOVE YOU-15

"I muhil thei na nge?" ka awm nuam lo khumah ka let ka let a, a lehkhabu chhiar laiah a rilru a pe viau emaw ka tih laiin ka danglamna a lo hmu leh hman. Ka tibuai reng mai zawng a nih hi. 

"Ka kawng a na deuh hlek a, dawr a ka chet nasat vang mai mai. Nau ka pai hma paw'n ka chet nasat leh puan than ka zai hnem chuan ka awm ziah a" saisir a mu a kawng dawm ran chung hian ka ti a, ka melh zawk a, min ngaihtuah hmel takzet.

"Ka enkual ve nual ţhin a, naupai hua hi chuan insawiselna an ngah anih hmel. Hmeichhia ni lo mah ila ka hre ve nel nual" a ti a, a thusawi tawp lam a zah hmel fe a a nui lai chu ka lo hmu fuh lehpek. 

"Ka haw lem lo aniang. Nawr liam theih loh khawp a na ve deuh chu tun chiah hi ka la nei" ka ti a, ka inthlahrun vang a ni. Min buaipui ngun tawh zia ka hre ve kar. Khum bul chhuatah ţhuin a lehkhabu chhiar lai khumah a dah a, muangchangin ka kawng a rawn ban de de a, ka sawisel lem loh vangin ka kawng dawmna kut chu a rawn vuan a, ka en kar a, chet mai nachang ka hre lo. 

"I kut hi la rawh, dimtein ka lo hmet ang a, i nuam deuh maithei asin" amah zawkin a tih takah chuan rang zetin ka kut ka la sawn a, tleirawl te ngaihzawng nei hlimin rin loh deuhin an bialpa te an tawk thut a, an zak lutuk sa pap pap ţhin ang chiah hian keipawh ka lum pup pup a, ka biang te chu a sa ve pap pap niin ka hria.  

"A zia deuh em?" ti a min zawh chuan "Aw" ka lo ti vat a, ka aw a ţial ruai lehnghal. Zak tak chungin aw ka thian zui kharh kharh. Tui lum ten dep ila a nawm deuh ka ring na a ka sawi ngam loh bakah a ţhat ka ring lo. A hmet na lo bawk a dah tawp ai chuan a nuam ve lutuk tho. 

Mutthilh tum a mit ka chhin laiin a phone a ri ral ral a, rawn biak tum tu pawh rindan ka nei. An inbiak danah ka rin lawk dik zia ka hre bawk. Phone a biak zawh hnuah a ngaiah bawk rawn ţhu lehin "Florence pawh a damlo anih hmel" a ti a, a hmelah leh a mitmeng thlengin danglamna hmuh theih tur a lantir lo. 

"Eng nge na a?" tiin ka lo zawt ve. In ngaina tehchiam lo mah ila damlohna kher kher hi chu mihringin a kan thunun theih a ni tlat lo a. 

"A pum a na a, casualty ah api nen an kal a, naktukah test neuh neuh ti ve a ngai ang" 

"Casualty a kalpui rum rum a ngaih chuan a na viau a ni ang" ka tih hnuah "I kan ve dawn lo mi?" tih bawkin ka zawt leh. 

"Aih a tlai tawh emai bakah i nuam lo ve tho a" a ti a, ka mutthilh tak tak hma chu min kalsan tawh lo maithei. Keimah min ngaihtuah rualin ka naupai lai thlengin a ngaihtuah a, tun dinhmunah chuan khawiahmah a kal rih lo ang.

"Nia duh leh naktuk lamah te i kal thei tho alawm. I ţhiannu ber a ni sia i ngaihtuah takin ka ti mai mai mawle" ka ti bah nawk a, a ţhiannu damlo chung chungin min ngaihsak zawk tho a, chu chuan min ti lawm ru hle. 

"Ka hna ah ka buai leh ang a, api nen an ti vek thei tho a, chanchin min rawn hrilh reng ang a, a nat viau tak leh ka kal chauh ang" a ti leh mai a, a nupui ka nih rual khan a mawhphurh naah min dah tawp a, ka chungah thil ţha lo deuh te lo thleng ta thut sela a thiam lohah a ngai ngei ang. Chuvang tak chuan keipawh ka fimkhur sawt ve tawh viau. 

Zingah kan chhuak rual a, a sawi ang ngeiin hna ah a kal tlang. Florence hnen aţangin eng thu mah ka la dawng leh rih lo a, lehlam zawng chuan a thawventhlak phian. 

Ka rilruah Zodina a awm leh ţhin a, school ah a awm nileng ang nge Florence hmu turin a kal zawk ang tih te thlengin ka ngaihtuah kual a, Zothana chauh kha ka mipa hmangaih awmchhun ni tur a ka ngaih laiin Zodina leh hmeichhe dang kan suihzawm chhin vel hi chuan nuam tih lohna ka nei tho. Min ngaihsak ang chiah a hmeichhe dang a ngaihsak ve ka duh lo nge ka endan a danglam deuh tawh? Kei ngei pawh hian ka chhang thei lo. 

Rilru lak pen nan ka indah buai lui a, ţhui hmanhmawhthlak vak loh te pawh ţhui mai theih turin ka dah vek. Ka dawr a thawk te pawhin mak min tih hmel viau na a ka thil tawn zawng zawng hre ve tu te an ni a, an hnen aţangin zawhna ka dawng lo. Ngaihdan an siam thiam vek ang. 

Chhun thil ei hun awm velah min rawn bia a, thil ei tum a kan ţhut khawm lai tak a ni. Ka theih ang a tam ei turin min rawn hrilh a, Florence chanchin ka lo zawt ve thung. A la hriat bik loh thu min hrilh rualin a ngaihtuahawm a rin loh thu a sawi tel bawk a, hmu turin a kal lo a nih hmel. Chumai bakah Zodina mizia ka hmuh dan ka sawi ngun tawh a, ka belhchian hnu hian ka hriat belh leh zel a, a nupui ka ni a, a mawhphurh naah min ngai ka tih tawh kha. Keichu ka chanchin min zawtin ka ei loh leh ka damloh te a hlau em em reng a, mahse midang an nih phawt chuan a ţhiante pawh ni se a be hmasa ngai mang lo. Zothana chiah ka hmuh theih ţhin lai khan Zodina hi ka tan chuan awm ve lo leh hmuh theih loh ang mai a ni ţhin a, khatih lai khan a kiangah Florence a awm ţhin. A khawhar lai ber leh puitu a mamawh ruk ţhin lai berin Florence kha a awm reng a, a hlim phah ngei pawn ka ring. Chutiang a ni chung chuan Zodina hian a be hmasa ngai mang lo ţul tawpah lo chuan. A ţul ah chuan tupawh nise a be hmasa hreh lo a, thil pawimawh a awm anih loh chuan tumah a be hmasa ngai lo. Mahse keichu ho te te ah min be fo a, hna a ngah loh ţum leh ka buai loh lai a in nan fuh phei chuan min be reng ţhin. Puar khawp a thil ka ei loh te a hlau a, na ka neih a hlau em em bawk. 

"I pasal hi a fel e, i vannei tawp" ka ngaihtuahna hria ni awm takin ka dawr a thawk ve Mapuii chuan a rawn ti khauh a, ka lo khi ve suk. 

"A thiam dan danin ţhat a chhuah ve a, nang ni pawh pasal ţha deuh in la nei ve mai ang" ka tih chuan an indem kual a, fiamthu hmang a inkapin an inpuan sap sap a, kan nui leh dar dar ţhin. Zothana thih hnu a kan vaia kan nuih ho leh theihna hmasaber a ni hial ang. 

"Hausa, fel leh hlawhtling, kawppui te duat thiam bawk si leh hmelţha tel lehnghal phei chu nula zawng zawngin a an duh leh neih theih si loh an nia" Rotei'n a ti veleh a.

"Dikchiah a vai hian mi pakhatin a neih kim vek theih pawh ka ring lo" Mapuii pawhin a lo ti leh vat. 

"Awm chu an awm ang. Mizo kher ni lo hnamdang zingah phei chuan an tam ngawt ang" an ti kual leh vel a, an star an han sawi tak tak chu an duh deuh deuh te chu Korean deuh vek. An la upa lo hlawm a, a awm ve tho mai. 

"U Nunui chu i pasal a hmelchhe lo a, a fel bawk sia, in lo inţhen hlauh ang e aw. Hnawhchhuah che a tum pawn kawngkharah invuan tang tlat ang che" an ti a, an nui uarh uarh bawk. Ka zia deuh tawhin an hria nge min fiam leh bawrh bawrh ngam tawh. 

A dan ngaiin tlaiah min lam turin Zodina a rawn kal leh a, ka hnathawhna bul a a ţhut ziah naah bawk a ţhu leh. Mapuii te ho in nilengin min fiam zeuh zeuh reng bawk a Zodina an hmuh chuan ngeiawm si lo hian an nui tet tet a, mitmeiin thil min hrilh tum ang deuhin an awm ţhin a, keilahin ka hrethiam ţhin si lo, min nuih liam leh ta vel mai mai. 

Ka chet hmain Rotei'n min chet khalin Zodina chu thingpui a lo pe vat a, an pek fel takah chuan an thil min hrilh tum kha ka hrethiam ve chauh. Thingpui lum sak vat turin min duh a lo ni. A inhriatthiam loh theih khawp mai. 

A bul a ka ţhut hnu deuh lawkah thingpui min rawn pe veleh a, nidang aiin ka in hnem tawh zawk. Khua a chhe bawk a, a lum lutuk lo bawk nen, kan lum mawlh mawlh reng mai. 

"Florence eng nge a an zel?" tiin ka zawt vat a, Florence hian ţhian bakin la en tlat mah sela Zodina chuan ţhian ang chauhin a en tawh. Mahni pasalte ţhian te chu kan ngaihsakna kan lan tir ve turah ka ngai. 

"Min rawn hrilh si lo va a ţha turah ka ngai" a ti mai a, a vei vak hmel loh. 

"I zawt lo anih chu. Hna i kal tih a hre sia a chanchin rawn sawi reng a inthlahrung aniang" ti a ka hrilh hnu pawhin "Inthlahrung lo ang a na vak lo niang" a ti lui ţalh tho. 

Dawr khar hmain ţhui mai theih turin pakhat ka zai leh a, ka tih chhung hian min nghah pahin lehkhabu a lo chhiar lehpek. A hunawlah hi chuan a chhiar ve reng mai, school a ngaihsak bakah naupang thlengin a ngaihtuah a, a hma aţang tawh khan nu leh pa te lam paw'n an fak ve ţhin khawp mai. 

In kan thlen chuan a thim lek lek tawh a, ka tum dan leh chhut dan aiin ka ti rei a, laklawh deuh a kalsan chi niin ka hre si lo. Kan tlai duai phah ta reng bawk a. 

"In va tlai ve" ka pa in a lo tih chuan ka chhan hmain Zodina zawkin "Rawn haw dawn a ruaiah customer a nei leh nual a, dawr pangngai ang a an thil duh pek a pawisa lak tawp theih a ni si lo va, duh aiin kan rei phah anih hi" a ti zung zung a, nui chhuak ngam si lo nuihza ve deuh siin ka awm. Min chhan nan chuan tih hreh a nei miah lo, a pa dawt hrilh thlengin. Mahse dawt pawi lutuk a sawi lo bawk a, nuihzatthlak lamah a kal daih. 

"Anih chu mawle, chhungkua kan tlem a, chaw in eisan tham pawh kan awm lo va, nidangah chuan tun aia haw hma a pawi miah lo. Upat lamah hi chuab rilţam kan tuar thei vak tawh si lo" a ti deuh duah a, "Ka tlai tawh lo ang" ka ti ve na a ka dawr ang hi chu a sawi lawk theih loh. 

"Zodin, inthlak zo la inu leh Nunui'n chaw ei an siam chhung kan ti ti lawk dawn mi?" a ti lehpek. Eng em em nge a sawi pui ţhin ang le ka ti fo. Nitin deuh thaw hian a ko hrang a, ka ngaih a ţha lo ziah lehnghal. 

Ka intihfai zawh hnuah ka nu ka pui a, awm mai mai turin min ti na a nuam ka ti lo. Ka nu thung hi chu sawiselna ka hre rih miah lo. Engkimah hian min hrethiam em em reng a, a bul a awm a nuam bik hle. 

"In naupan lai aţang tawh khan Zothana nen in inkawp chawt a, in infiam dun a, engkim in ti dun vek a, Zodina hi tel ve chak ţhin viau mahse a zakzum em a, ral aţang hian a lo thlir ţhin cheu a, ka fapa a ni ve tho bawk a, pakhat hlim viau mahse pakhatin tel ve chak tho si a ral aţanga a lo thlir ve reng kha chuan nu ka nihna angin ka lo khawngaih ţhin" a tih a, nui ver ver chungin min en a, a nuih ngat phei chuan a ngainatawm lehzual. 

"Nia kan â thei ngawt mai. Lo sawm ve ţhin tur kan nia, kan hrechang tawh ţhin si lo va, hrehawm a ti ve ţhin ngawt ang. Ti daih ila, ka pa nen hian hna chungchang em ni an sawi dun ţhin?" ka ti ta nge nge. A awm hran pui kher hian ngaih a ti ţha seng tawh lo va, ka nu talin a hriatpui takin tiin ka zawt phawng ringawt. 

"Hre miah lo, ipa pawh hi ka zawt fo a, hmeichhe inrawlhna chi a ni lo a ti zel a, ka zawt chhuak thei lo. A rilru put hmang hi a la hmanlai khawp a, mipa tih ang kan ti ve thei deuh vek tawh zawk ania" a ti nang nang a, a hriat loh hmel tak tak bawk a ka zawt zui duh ta bik lo. Chaw ei kan siam peih hnuah "Va ko lawk mai rawh" min ti a, ka kal nghal vat. 

Ka pa in office ang deuh a a neih lehkhabu zawng zawng kan dahkhawmna hmun chu ka pan a, kawngkhar an lo khar phui lo hlauh. Luh tum a ka hawn zau dawn lai velin Zodina'n ka hming a lam ri ka hria a, ka ding chawt. Kawngkhar ka khawih che ngam tawh lo na a kawngkhar bulah an thawm hre phakin ka ding ran. 

"Ka ţhen lo ang. Naute induh chuan naute nu pawh induh tur a ni. A nu ber induh tel loh chuan an pahnihin ka chhuah pui mai ang. Pathian hmaah thu ka tiampui tawh a, a uire a min chhuahsan te anih loh chuan ka ţhen lovang" nghet charh hian a ti a, ka lawm viau rualin ka ngaihţhat loh rukna kha a dik niah ka ngai. 

"I luhlul i chhuah dawn tih ka hriat lawk vang ania remti vak lo chung a ka neih tir che. A naupai lai hi Zothana fa a ni a, naute hi chu kan kawl theih dan ka ngaihtuah mai ang ka tih ru ran ţhin a, nupui atan a i nei ringawt te hi kan mualpho tawh viau asin" ka pa chuan a ti a, a thusawi chu ngaihthlak a hrehawm hle. Zodina nupui atan a min duh vak lo na a a ţul vangin ţhat a chhuah lui tih ka hre ta. 

"Khawvelah hian thil thleng thei lo a awm loh zia kan lantir a ni mai lawm. Mualpho chhung a rei lo. Miin min sawi a min nuih anih paw'n a pawi lo. Ka rilru ka siam fel tawh chuan eng thil mahin min thlak thleng tir thei tawh lo. Midang mitmei ven vang mai maiin ka kal tir lovang. Naute leh a nu pawh hi ka ţhen hrang dawn lo, pi leh pu leh pa ai chuan nu a mamawhna a nasa zawk ang. Hetiang thil hi chu min sawipui tawh suh. Ka chhan dan che a ngai reng dawn tho" a ti a, a thusawi a tih tak zia kei ngei pawhin ka hre thei. Ka pa in ka hnual rawihna tur thil a sawi leh takin tiin ka ngaithla zui ngam tawh lo va, an thusawi hre lo ang maiin kawngkhar ka kik. Lut tur a min tih hnu pawhin ka lut duh bik lo va, chaw ei ka peih thu hrilh turin ka dak zuai ringawt a, ka kal lehnghal nal nal. 

Ka thu hriat zawng zawng avang te khan ka chaw ei a tui lutuk lo va, chhun lam a thil ka ei ve ţeuh vang a ni tel bawk ang. Zodina ngaihţhat nan tui ti awm deuhin ka ei lui vel mai mai. Ka pa in amah chauh a a ti ti pui ţhin aţanga ka thlavang a hauh char char tawh anih chuan a rilru a hah ve thei ngawtin ka ring. Ka tawrhna ringawt ka ngaihtuahin keimah ka inhrem ngat ngat a, keimah chiahin ka tuar emaw ka tih laiin Zodina paw'n a lo tuar ve tho. A buaina leh harsatna tawh te ka lo hmuh sak lo mai mai zawk a ni. 

Ka nu a ti ti siam siam reng a, ka pa leh Zodina erawh an ţawng tam vak lo. Zodina zawk chuan ka eitui loh pawh a taksa ţhatna tur tal a ei lui turin min ti lehpek a, ka pa in naute hrisel theih nan a ka in enkawl uluk a ngaih thu a sawi ve thung. 

Ka awmdan teh thut vang khan an thusawi ka hriat ruk a ring mai thei a, mahse kan nupa chauh a kan pindan a kan awm hnu pawhin engmah min zawt lo. 

"Vawiin i ţhu chawl khat sia i chau viau lo maw?" tiin min zawt ta zawk a, khum a ţhu chungin phone ka khawih a, ka ke lamah a rawn ţhu ve. 

"Chau lo e..ka ngaihtuahawm tawh lo lutuk, Mapuii te ho rualin thil ka ei ve ziah thei tawh a, ka damţhat lai a ka eizat ang chiah ka ei leh thei tawh" ka ti a, rilru hahna sang pek belh ka duh tawh lo. School enkawlin a buai a, keiin ka tibuai ve sek bawk a, tunah lah ka pa a ni veleh zel a, kei tal chu a hlimna tur chauhin awm ila ka duh. Zothana vanga a rilru na a la reh dawn bik lo va, tuar na kan intih viau lai hian keini aiin a tuar na daih ang. Chuti chung chuan phur rit a neih belh zel a, a phur rit belhchhah tu zingah ka tel ve duh tawh lo. 

"Ei ţeuh ţeuh zel rawh. Naute nen hian in pawimawh dan a inang reng a, naute tan chauh ni loin nangma tan zawk khan in enkawl ţha rawh" ti a min hrilh lai chuan ka lo nui ver ver. Chaw ei laia ka pa thusawi vang khan ka na ang tih a hlau pek aniang nge an thusawi ka hriat phak a ring tak tak zawk? Zawt mah ila chhanna mumal ka dawng dawn chuang lova ka zawt duh ta bik lo. 

"Naktuk thawh hma a ngai leh awm sia mut hma tum rawh" ti a min hrilh hnu a thawh mai a tum chu "A vai hian a tak tak vek a nia aw" ka lo ti a, a hriatthiam loh hmel khawp mai. 

"Kan inneihna te leh thil dang kan pahnih inkar a thleng zawng zawng hi a tak tak vek" ti a ka hrilh leh hnu chuan a nui suk a, ka sawi tum a hrethiam ta anih hmel. 

"Nangmah chiah hmangaih tur a ruat sa ka nia, tui deuhin mu rawh. Hmeichhe pakhat bak hmangaih ka tum lo a, nupui pakhat chiah ka nei bawk ang. Florence leh ka pa hi chu en liam rawh" a ti a, chhan lawk nachang ka hre lo bawk nen ka chhan hmain a chhuak nghal daih bawk. Ka pa nen a an inbiakna kha ka hriat ruk a ring tihna a ni mai. Chu mai bakah Florence vang hian rilru nuam zan lo in ka awm fo tih thlengin a hrevek aniang, keiin ka rin leh hriat chin ai daih a min lo ngaihsak zia ka hriat phah ve thung. 

CONT.