FATED TO LOVE YOU-16

FATED TO LOVE YOU-16

"Ulcer mai mai mawle, zanah khan a na em a tlemin ka hlauthawng deuh a, mahse a zia tawh lutuk" a ti bawrh bawrh a, zingkarah Florence a rawn lang hlawl. Ka pasal bialnu hlui angin a lokal ngai lo va, an chhungkaw ţhian ang chauhin a lokal ţhin mahse midang aia min endan a danglam bik ţhinna hi ka hmuh hmaih ngai lo. Ka mit hmuhah hian kei aia Zodina a hmangaih zawkna lantir a tum ţhin niin ka hria. 

Eitur eng eng emaw a rawn keng lehpek a, ka nu leh pa te an lawm thiam viau. 

"Nuam lo chung chung chuan kan eitur te mai mai siam duh rih miah loh tur alawm" ka pa chuan a ti luam a, a nui pah hawk hawk bawk. 

"Ei siam hi chu nuam ka ti ve hrim hrim a, tui deuh pakhat ka siam chhuah hi chuan a dang siam ka thiam chak nghal zel. A thiam zawk te siam ka en nasa a, hmanrua a awm ve zel tawh bawk a ka siam ve char char zel mai" Florence chuan a ti a, choka dawhkanah a chhawp chhuak ruih a, a thil lo ken ho siam tur chuan beih rei a ngai viau ang. Kei phei chuan ka siam thiam lo hrim hrim. Ka tuina a ni ve tlat lo a, a pangngai mizo in a kan ei tlanglawn awlsam deuh hlek ho ka thiam a ni mai. 

"A tui dawn hlawm lutuk ringawt. Chaw ei ve nghal daih mai ta che" ka nu ve thung a ni. Nui sang chung a a enkual hnuah keimah min rawn enin "Nunu nangpawn chaw i eitui phah deuh hlek ang a tiraw?" a tih hnuah "Eitur ţha ka hmuh hi chuan Nunui ei atan ka it ve ţhin a" a ti leh a, hrilh bik a nei lo. A duhthusam a sawichhuak satliah a ni mai. 

"A va rimtui ve" Zodina paw'n a rawn ti lut ve tho. A landanin mit a la a, a rimin ril a ti ţam a, ei a chakawm a ni tawp mai. Florence a hmuh chuan mak a tih hmel deuh na a a insiam ţha vat. 

"I rawn ken em ni?" a ti leh ta zawk a. 

"Aw ni e..tih tur dang a awm chuang lo va, hunawl ah ka siam a, Nunui ei ve theih vekin ka siam. Nau a pai sia, thil a eiţhat loh i hlau thei bawk a" a ti zung zung a, lem a chang mai mai nge a rilru diktak a sawichhuak tih hriat a har khawp mai.

"A ţhat chu, na chang i hre khawp alawm. Intih fel vel chhung ka lo han inbual ang e" a ti a, choka aţangin a chhuak lehnghal daih. Florence chuan a ruak chhuak zung zung a, a lo kenna vel sil turah a dah ruih. Ka nu leh pate chu ţhu chawl turin a kal tir daih a, keimah nen chauh kan ti fel. Ngawi rengin kan che dun mawp mawp a,sil tur a a dah sil ka tum laiin ka kut a lo vuan a, message min thawn aţang khan ka ţih ru riau tawh bawk nen ka phu nasa khawp mai. 

"Ka lo ti mai ang. Dawhkanah tihfel tur dang a tam tho a, sil tur hi a tam emai keiman ka lo sil vek ang, ka rawn ken a nia,i hah phah lutuk ang" a ti a, midang an awm leh awm loh endikin ka hawi kual a tumah ka hmu lo. Kan thusawi ngaithla ru tu an awm ang a lem a chang mai mai anih ka ring ber. 

"Tumah an awm lo ania min haw chung chung chuan min ngaihsak der duh suh. Min huat theihna tur chhan ţha tak i nei a, min be duh miah lo mahla ka dem lo che" ka ti ve kher.

"Nunu hmangaihna hi ngeiawm iti ve ţhin em?" ka thusawi zawh chiah mil lo lutukin zawhna min zawt daih. 

"Ti lo e..a ropui ka ti" ka ti sep a, mihring hmangaihna chauh thlir chuan a ngeiawm chang a tam ang a, mahse thil dang daih ngaihtuah tel chuan a ropui tlawt a ni. Pathian hmangaihna ngat phei chu mihringin a ropui zia kan sawichhuak thiam lo zawk ang. 

"Nizanah Zodina nen kan inbia a?" zawi te hian a ti a, tlem a awn deuh hlek a dingin fridge a ngheng a, a sam a hui thuak hnuah "I vannei takzet" min ti a, ka bang bo kher mai. 

"Eng nge in sawi?"

"Eng dinhmunah pawh ding la, hrehawm nasa tak tuar mahla hmangaih tu inei zel a, hmangaihna i dawng reng bawk a, i tan chuan hmangaihna chu a ropui khawp ang. Ka tan erawh a ngeiawm viau thung a" a ti a, a nui sen sen a, a nupui tur a Florence aia kei min thlang hi mak ka la ti. 

"Ka chungchang insawi dun tihna ni maw?" tiin ka zawt leh a, ka chungchang hlir a ni vek a, nuam ka tih loh phah ţhin. 

"Nitin hian a hmangaih zia che ka hriat belh zel. A lantir thiam lo a, a sawichhuak thiam lo anih pawhin ringhlel duh suh. A hmangaih takzet che, a hmangaih em che vang hian ka tel luih ve reng chuan ka na lutuk ang. Thil thleng tawh zawng zawng ka ngaihtuah kual hian ka inhnuhdawh vat loh chuan tun ai hian ka na zawk ang" ti a thutak zet  a min hrilh tak mawlh mawlhah chuan mak ka ti kher mai. A tum a ruhin beidawng mai mai chi niin ka hre si lo. 

"Ngati nge chutiang thil chu i ngaihtuah teh thut a? I seh tawh thlah mai mai chi i ni si lo" ka ti chhuak phawng a, thil ţha lo deuh te a lo ngaihtuah ang tih ka hlau a ni. Thinlung a hliam a a nat tak tak hi chuan taksa na aimahin tawrh a hrehawm zawk hial maithei. Kan khaw hawi a tawi tup a, khua a harin bei a dawng ngawih ngawih a, Pathian kan vawn tlat reng loh phei chuan a ti tawp thei ni a kan ngaih mahni nunna lak mai te a chakawm rum rum ţhin. 

"Zodina chu nang pawhin i hriatchian kha. A rilru a siam fel tawh anih chuan a sawh sawn tir theih tawh loh. A thinlung a pe tawh che a, khawngaih ngenin dil let ngawng ngawng mah ila min pe ve thei tawh lovang. 'Ka inthat mai ang' tiin vau mah ila min pe ve chuang lo vang. A hmangaihna ka dawn ve theih nan engpawh ti vek mah ila keichuan i dawn ang hi ka dawng ve dawn lo hrim hrim. Mi thinlung hi 'Ka duh min pe rawh' tih ngawt theih a lo ni miah lo. Kan hmangaih em em ten midang an hmangaih daih a, min hmangaih tu kan hmangaih theih miah loh an awm bawk a, mihring nun hi chu a buai nuaih a ni ber mai. Pathian remruat vek a ni awm sia tiraw? Mihring ten Pathian an dem ţhin hi awm lo ka ti hran lo. A hunlai chuan hriatthiam a har ţhin em a, kan nat a phal chhan hre turin hun rei tak a duh ţhin a, kei ngei pawh hian chu hun chu ka nghah ve mai a ngaiin ka hria. Ka chung a thil thleng zawng zawng hi ka ţhatna tur zawk anih ka ring lui tlat ang a, tlemin ka tuar thiam thei deuhin ka ring. Ka tawrh ang hi tuar ve an awm nualin ka ring. Hmangaih mah ila keini aia hmangaih an neih zawk miau vangin hmeichhe dang nupuiah a nei zawk a, keimah chiahin ka tawrh bik ka ring lo va, chungte mai mai chuan ka inhnem ţhin. Nizan aţang kha chuan thil ho te te pawh inhnem nan ka hmang vek tawh ang tiin ka inhrilh a, a tuar ve te hre lo mah ila keimah chiah ka ni dawn lo tih erawh ka hria" a ti a, a mitmeng a dul raih a, a hmui hnuai lam khur der der chu ka hmuh hlau ni awm takin a pet a, a ţah a chhuak hle ni tur a ni. 

"Hetiang dinhmun a ka dah che hi pawi ka ti. Naute ka hum theih nan hian engpawh ka tih a ngai a, ka fa venhim ka tum lutuk na lamah ka hliam che a, ka sawisa che a ni ber a, min hmuh apiangin i natna tawrh leh a thlen tu hrechhuak zel dawn mahla ka awm chhung chu i mallo tih i hre dawn nia. I tawrh ang chiah hi ka tuar ve tawh a, kei phei chu mi â ang maiin ka khawsa anih kha. I thusawi zawng zawng kha ka hriatthiampui vek che a, a nat zia ka hriatpui bawk che. Zodina i hmangaih ang chiah a hmangaih tu che i phu a, ila hmuh ngei ka ring tlat bawk" ka ti ve duah a, ka lo ring sual niin ka hria. Kha message ka dawn hnu leh ka dawn hma ngei pawhin ka chhiatna duh deuh tu ah ka ngai a, min tibuai reng dawn emaw ka ti reng bawk a, mahse a lo ni hauh lo. Nupa pawt ţhen tawp tur hi chuan nasat ve thawkhat a ngai a, rilru sual put a ngai bawk. A tum ve viau na a a ngam leh ngang lo niin ka hria. Mi nupa pawt ţhen tur em chuan a sual tawk lo a, a thinlung a khauh tawk lo. A tawp khawkah chuan amah a tawrh mai a thlang leh ta zawk a ni.

"Ka hlauh ber ka tlanchhiatsan reng chuan hma ka sawn thei nang. Ka hlauhna ka tih bo a, ka hmachhawn ngam a ngai. Ka lo lan ve chang pawn min hmu mawh lo la, tun aţang chuan ka kut ka sil tawh a ni tih min hriatsak dawn nia" a ti a, mi tupawhin hmu ve se mawi an tih ve em em tur a nui hmel a lantir leh thei ta, ka lawm ru kher mai. 

Kan ti ti rei lutuk chuan an ngaih a ţhat loh hlauin ka nu leh pa te kan ko a, hun remchang a awm veleh dawr a sawi dun leh kan remti ve ve. Zodina pawh insiam sa vekin a rawn tel ve tawh a, Florence chu ţha deuhin a be bawrh bawrh. Ţhat a chhuah nasat pauh leh Florence a na lehzual dawn niin ka lo ngai a, mipa a ni bawk a Zodina erawh chuan a hrethiam ve hauh lo. Ţhat a chhuah a, a ngaihsak hian a na lo turah a ngai ngei ang. Ţhat a chhuah vang chauh a dam ka ni si a, Florence nen hian na kan tuar ve ve a, kan dinhmun erawh a hrang hlak thung.

Hun a kal ve bek bek a, Florence nen a kan inpawh sawt lutuk hi a awihawm loh zawk. Nau ka neih hun a thleng ve ţep tawh a, heipawh hi thil mak a ni. Ka hriatchhuahna kha a la reilo viau ah ka lo ngai a, dam hi chuan hun hi a lo kal chak khawp mai. Florence chuan nau ka neih hun a min riah pui a tum tlat a, ka remtih thlap ni a a hlim zia te kha, naupang thil thar nei ang mai a ni. Ka nu leh pa te, Zothana nu leh pa te a ngam tlak zawng a hmuh apiangte hnenah a sawi a, a vawikhat tihna tur a nih vangin a phur tawh hle. 

Ka pasal a fimkhur uchuak a, dawr kal a khap bur. In ah nilengin ka awm a, ka nu nen kan inkawm ţhin. A fel em vang hian ka nu tak tak ang maiah ka ngai a, min duat ang chiahin kei pawhin ka duat ve. Ka pa zawk hian Zodina nupui ka nihna hi a la pawm thei chiah lo a, Zodina a la ko hrang zeuh zeuh. Mahse ka pasal mizia ka hrechiang a, thlamuang deuhin ka awm thei. Naute nen a kan inţhen hran a phal dawn lo va, min veng tlat reng dawn tih ka hria. 

"Vawiin eng nge ilo tih?" ti a min biakna ka hriat chuan hnung lam ka hawi a, hlim hmel pu reng chungin ka hnung lamah a lo ding. Darthlalang hmaah ţhuin ka sam ka khuih a, ka ngaihtuahna a kal ding lehpek aniang ka lo hmu miah lo va, a thawm takngial pawh ka hre lo. 

"Ilo luh lai ka lo hre miah lo va, ka nu nen a ţul ţul kan ti. Kawmthlangah khuan huan tè siam ve ila kan tia, a hmun a rem tho a, awm mai mai chuan ni a rei duh emai. Tak a i chau em?" ka ti zung zung a, a nuih a za em em lehnghal. 

"Chau lo e, in duh chuan siam rawh u a zawl nuam tho a, nangpawh i kal ve reng thei ang chu. Naktukah thlai chi vel ka zawn sak ang che u" a ti a, min phur pui lehpek. Ka chetsual a hlauh vangin dawr kal phallo mah sela ka tuina zawng in lam a ka tih chu a phal leh lutuk tho. Ka thil tih tum leh tih mek te hi min phur pui thiam a, heivang hian ka tan chuan a ngaihawmin a hlu lehzual. 

"Nia ka nu zawt la lei tur awm chu a hre zawk ang. Tun ang hun a ţha duh deuh hlek te a hria ang a, a fai hun tho sia, hman ţangkai loh chu a uihawm mai mai" ka ti a, a pawm zawng tak a lo ni leh. 

"Hmeichhia hi chuan tih tur inhria mawle. Inpeih phawt chuan ka leisak ngei ngei ang che u. Mahse hah lutuk lo la, hun reilote chiah a ngai tawh a, indim hram hram rih rawh" a ti leh ta tho a, ka nat a hlau ţhin hle. Dawr ka kal lo chung pawh hian min rawn be reng tho a, ka ţhat leh ţhat loh te, na ka neih leh neih loh te min zawt reng ţhin a, ka nu lawmah a tla a, a nuih a za hle ţhin. Tam tak chu nise ninawm an ti maithei mahse Zothana thih hlim a ka awmdan te, nau ka pai tirh a ka awmdan te leh ka tawrhna zawng zawng hrevek tu a ni a, ka thi ve lo chauh a ni ber a, khang zawng zawngah khan min pui vek a, a hlauhna a la reh lo a ni ber. 

"Indim dawn e bakah ka hnaihah ka nu a awm reng ţhin a, ka ngaihtuahawm loh lutuk. Hahdam deuhin awm ve ţhin rawh" nui chung hian ka ti a, kan inkar pawh a hma ai mahin a ţha tawh a, kan inpawh viau tawh. 

"Thla hnih khat liam leh se la ka hahdam ve mai ang" a ti fiamthu a, thla hnih a liam leh chuan naute ka nei tawh ang. Chumi hun a sawina chu a nih hmel. 

Inbual tur a a kal hlanin ka ţhi awrh lai ka phelh a, Zothana min pek a ni nghe nghe. Ka tan engmah anih tawh loh vang a phelh ka ni lo va, hriatrengna thai bo ka tum vang lam a ni lo. Ka la hmangaih reng a, Zothana ka hmangaih angin tumah ka hmangaih thei tawh kher lovang mahse Zodina rilru ka ngaihtuah ve a ka ven ve a ngai a, ka tan thui tak thleng a inhuam a, a fa ni miah lo ka pai chung hian min hmangaihin min ngaihsak reng tho a, ka tan hian a hlu takzet. A awm ti nuam lo thei tur ang chu dah bo ve ka duh a ni. A sawisel dawn hauh lo va, mahse nuam lo a ti ru ve thei. Ka ti ri ral phal bik chuang lo va, ka tlereuh bawmah uluk deuhin ka dahţha. Zothana ka dahţha tel ve lo a, ka thinlungah hian englai pawn a awm reng tho ang. Ka pasal tur atana Pathianin min ruat sak a ni lo ah ka pawm thiam tawh a, ka vui tawh ngai lo. Kan fa venhim ka tumna lam a ka thil tih zawng zawng hi hrevek mahse min dem bikin ka ring lo. Amah ka chan tawh a, a fa lo piang mai tur hi chu chan leh ka duh tawh lo. Ka dah bo tak daihah chuan ka ruak ve huai a, mahse ngaiah ka nei leh thei mai ang. Zodina ai a min hmangaih tu ka tawng tawh kher lo ang a, chuvang tak chuan a nupui tak tak ang a awm ka duh tawh a ni.Zothana theihnghilh ngai dawn lo mah ila kan hnenah a awm tawh miau loh avangin hma lam ka pan tak tak a hun tawh. Ka damchhung zawng a ka sun reng anih chuan kei mai bakah ka bul a awm te leh ka chenpui te ka ti hrehawm mai mai ang. 

Kan tih ziah danin zanah mut pahin kan ti ti mai mai a, naute pian hun tur te kan sawi a, a hming tur erawh kan sawi lang lo. Ka nu in a hauhna a rei tawh a, ka nu thu thu a ni tawh. 

"Min hmangaih tur a ruat leh din ini maithei a, keipawh chutiang chiah chu ka ni. I nupui tur atan a Pathianin a lo ruat lawk sa ka nih ka ring. Mihring chuan duh thu han sam ve ţhin mah ila kan thu em a, hmalam hun kan hre lawk lo ang hian thuneihna engmah kan nei lo. I ta tur chiahin Pathian hian min siam aniang" ka sawi zawh rualin ka nui hul hak a, ka nui lui miah lo. Zah zel a ni zawk mah. 

"Mi te ang a Kristian ţha leh Pathian thu tuipui hluai chi ni lo mah ila Pathian remruat itih kha ka pawm thlap. Kei aia piangthar ţha zawk te aiin Pathianin ka tan a a ruat hi a ţha zawk a" a ti fiamthu a, eng eng emaw sawiin kan nui dun leh hak hak ţhin. Kan boruak a zangkhai sawt khawp mai. 

"Pathian rorel dan hi hriatthiam har viau ţhin mahse kan tan a ţha tur zawk a nihna kan hrechhuak leh tho zel. Ka nui ve tawh ngai dawn lo emaw ka tih hnuah nangmah vangin ka nui ve reng thei tawh a, engkimah min ţawiawmin min hmangaih tlat a, min vawnna i thlah miah loh vang hian keipawhin ka dam chhungin ka vuan ve tawh ang che" ka ti a, ka huaisenna zawng zawng sawmkhawm a sawichhuak ka ni. Zodina chu awm lo se ka thi ve daih tawh maithei a sin. 

"Thlah che a theihnghilh che ka tum ţhin. Ka rilru put hmang kha a dik loh zia ka hria mahse ka inthunun thei tlat lo a, tum mah ila ka hlawhchham ţhak zel. Tunah ka nupui i ni tawh a, ka nupui i nih hma a i hun hman tawh leh i thil lo tawn tawh che ka sawichhuah sak lo ang che. Thil dang ka thunun thei lo va, sawi tur leh sawi loh tur erawh ka thliar hrang thiam. I hun kal tawh hre ve miah lo ah min ngai thei ang. Ka hmangaih zia che ka hrechiang a, chu chiah chu ka hre thei. Kan upa ve zel ang a, i taksa leh mizia te, a danglam vek hunah pawh nangmah inih chhung chu ka hmangaih ang che" a ti a, a lo ngaihtuah thui ve khawp mai. Hmeichhia chuan fa kan neih hnu a nalh loh leh pasalten min iai te kan hlau a, kan pasalte aia lan upat kan hlau chung hian pasal te aia lang upa an tam lutuk tho. Ka rilru nawmna tur chiah sawi a tum ţhin a, tun ţum pawh hian hmeichhia ka nihna ang a ka tan a ngaihthlak nuam tur a sawi leh tho. Ka kiang a a awm dan ţhin hi hman a Zodina ka lo hriat ţhin nen kha chuan a hrang hlak. Ka lo belhchian ngai loh vang te pawh a ni mahna. Ka belchiang a, pasal ţha tak ka nei a ni tih ka hre tam tial tial. Pathian hian kan nat reng a phal miah lo reng a ni. 

CONT..(Hman chuan naktuk zanah last ka rawn dah lehnghal dawn nia)