FATED TO LOVE YOU-LAST

FATED TO LOVE YOU-LAST

Ka bul a min si chet a ka fapa ngei thlamuang leh tui tak a a muhil chu ka en ning thei lo. Ka pa in remti lo viau mahse ka nu chuan a hming atan Zothansanga a ti lui ţalh a, ka pa tih loh chuan kan hnial chuang lo. A pa hming chhawm tir an phal hi ka lawm lutuk zawk. 

Ka nau neihna hliam vel dam vek tawh mah sela ka nu in chet a la phal tlat lo a, naute nen hian kan in awm nileng ţhak zel. Ka pa pawhin a lawm ve khawp a, nidang a min be ţha ngai hlei lo ţha deuh deuhin min be ve tawh a, ka chhungte pawh an rawn lang ngun. Ka pai tirhin duh lo hlawm viau mah sela a pian meuh chuan pawm an inchuh sap sap reng a, an vaiin an lawm em em vek. 

Engmah la sawithei lo mahse ka en ringawt pawh hian ka hlim a, a muhil lai te hi hmuhnawm ti deuhin ka thlir reng ţhin. Zothana chunna lai a ngah a, la dam se la chuan a hlim ve viau ang. Hma lam pan tawh mah ila a pian zan kha chuan ka mittui ka dang zo leh chuang lo va, Florence ka ti mangang hle a nih kha. A duh ang ngeiin min awmpui a, ka chet ţhat theih miau loh vangin ţul ang ang a ti vek. Kan inhmu mawh reng dawn emaw ka tih laiin ţhianţha tak kan ni der tawh a, hospital aţanga ka chhuah hnuah pawh min rawn tlawh reng tho. Keimah zawk hian ngaiah ka nei thei lawk lo a, thil thleng tawh zawng zawng te kha hre miah lo angin min kawm lui bawrh bawrh a, ka nel ve viau tawh. Thil duhawm lo tak tak ka tawn ţeuh tawh vangin hlauhthawnna tlem ka la nei a, ka inveng ru ţeuh reng tho mahse rintlak a nih zia a lantir zel a, a sawi ang khan a awm tak tak a, Zodina a endan danglam tawh zia pawh ka hmu. 

"Ala muhil char char a ni maw?" ka bulah rawn ţhuin ka piah a naute muhil mek chu a thlir ve reng a, ka fapa hian midang a tih hlim ang bawkin Zodina pawh a ti hlim a, ka atchilh ang tho in a atchilh ve. A bul a mut kan duh ve ve vangin kan inkarah kan muttir a, delh palh a hlau lutuk hi a mut tlem phah ţhin. Keiin ka ngaihsak ai mah hian a ngaihsak zawk emaw tih tur a ni. 

"Mut a duh hlauh a ka hahdam phah deuh a nih hi" ka lo ti a, a biangah dimtein a khawih a, a lungawi hmel hliah hliah. 

"Ngati nge a tet viau le?" ti a amaha a phun sup lai chuan ka lo nui hawk a, a puan zun huh ka thlak lai te hian a ke te a lo khawih ve a, mihring ve si ava te ve tih chang a ngah mai. Lehkha a thiamin lehkhabu hrang hrang chhiar a peih a, naute chungchang chu a hriat ka ring tho. A mithmuh a a awm reng takah leh a fapa a nih takah chuan mak a ti tawp thei lo. Duhawm a ti lutuk ang a ţawngkam dangin a fak thiam thlawt lo niah ka ngai mai. 

"Nangpawh i sen laiin i te ve tho ang chu" ka lo ti veleh na a hria angin a awm lo. Naute ringawtah a rilru a pe a, a ti harh leh nge nge dawn tih ka chiang khawp mai. A pawm chak hian a khawih neuh neuh a, a harh veleh chet pawh ka chet ve hman hmain a pawm nalh zel. 

"Lian thei lo se hetiang tiat lek hi ni reng mai se la ţha tur" tih pahin min rawn en a, a chau hmel a lang lo a, a mitmeng a nung sar a, lo ti tla ila chuan tun ang hian kan hlim kher lo ang. 

"Keichu ţawng thei tawh tal se la ka ti. Kum4 vel ni reng thei se la ka ti zawk" tih pah a naute ka en lo a hnar hmawr leh khabe a lo khawih tawn leh sek tawh a, hetianga a tih hi chuan a harh ngei ngei tun a a rawn harh ang chiah hian. A tal bat bat a, rin ang ngeii Zodina chuan "A harh a nih hi a mu nghet tawh lo in ka hre reng a" tih pahin a pawm a, ka hauh a hlau hian chhuanlam fahrah te te a siam ţhin. Ala sen em vangin fimkhur takin a pawm a, a dim thiam ve ţhin lutuk. 

Naute a pawm ta bawk a keipawh ka ţhu chhuak ve vat. Ka bulah a rawn ţhut pui a, kan fapa chuan chiang deuh a min hmu thei ang mai hian min en ve reng. Fa pakhat ka neihna chauh anih vangin ka la zei vak bik lo hle a, min hmuchiang nge hmu chiang lo rindan ka thiam lo. Kan pawm laia a men ve reng phei hi chuan a lawmawm lehzual. 

"A duhzawng te sawi thei tawh sela a lawmawm lehzual ang" tih pahin Zodina darah ka khabe ka nghat a, naute bawk chu hmuhnawm ti em emin ka thlir zui leh. 

"A chhun che a a hmelţha tual tual mai ang" a tih chuan ka nui hak. Tun a a landan ringawtah chuan min chhunna a nei tlem zawk a, chu chu kan hre ve ve. 

"Tupawh chhun se ka fa anih chhung chu hmelţha ka ti ber reng ang a, engtinpawn awm se ka hmangaih reng bawk ang" ka ti a, fa ka neih chiah hian nu hmangaihna nasat zia ka hriatchian phah lehzual. Ka nu hian min lo van hmangaih awm ti te in ka ngaihtuah ve rauh rauh ţhin a, a rilru natna tur zawng a ka awm theih ka ring tawh lo. Keimah vang a ka nu hah ţhin tur zia thlengin ka chhut thiam. 

"Eitur hlir duh se thau hmuk se a ţha a ni mai" a ti teh tlat a, ka pai laiin ka in uluk lo va, chaw ka nghei ngun bawk nen, rilru hah reng rengin hun ka hmang a, ka ţap reng a, ka inla hrang tlat a, ka naute kha ka hrechang mang tawh lo. Chuti chung chuan him dam takin a piang a, Pathianin min ven nasat zia ka hriat phah. Mahse en mai chuan nakin zelah pawh a thau hmuk hmel loh khawp mai. 

"A la thau ve mai ang. Thau lo mahse a hriselna a la ţha rih tal a, hei ringawt pawh hi a lawmawm" ka ti a, a mut a chhuak ngang aniang a muhil leh tawh.

Zodina a lo haw tawh bawk a, a remti lo chung ka nu rawngbawl ka pui a, ka thiam ang ang ka lo ti ve. 

"Nau awm tu a lo thleng ta bawk a, i tih tur hre lo in tih tur i rawn zawng a ni maw?" nui chung hian a ti a, "Zodina hi naupang lawm vak lo chi a nia. An bul a awm hrehawm a ti lo na a an bula awmdan a thiam lo. Kan hmelhriat ţha te leh kan chhungte naupang nen a an rawn len chang te hian a en tawp a, a chhaih ngai miah lo va, biak pawh a be ngai lo. Mahse engtin pawn awm se, ninhlei viau mah sela a hau ngai lo va, bengchheng chiam mah sela a ngaithei phian zel thung a" atih zawm leh a, hman aţang tawh khan naupang a lawm ka ring lo sa hrim hrim. Inkhung hrang chawt chi a nia, ţhian siam pawh a thiam lo. A awm awm hian a awm ve tawp a, a ţawng tam lovin mi a ti luam ngai lo va, a sawisel ngai miah lo bawk. Midang a en liam tawp theih ang hian mi hian en liam ve tawp sela a duh ber niin ka hre ţhin. 

"A muhil a kaihthawh leh tawh kha" ti a ka hrilh chuan a nuih a za ve hle. 

"Amah hrechiang deuh tu te ho hian a fa neih hnuah hian rawn hmu se la chuan an nuih a za ve ngawt ang. Tun aia a len deuh hlek hunah zirtirtu ho hi chaw eiah sawm ila a ţha ang" la nui reng chung hian a ti a, Zothana thih hnu khan a ngui riai reng a, hlim ang a lan a tum lui hram hram ţhin. Naute kan neih hnu hi chuan ka nu pawh a nui ve tak tak thei tawh a, a nun a hlim sawt khawp mai. Kan pindan te pawh a kal pel mai thei lo ţhin a, rawn luh tawp a inthlahrung ve tho nen, a hnuaiah an mu na a zanrei a a harh chang te hian a rawn chho a, kan pindan a la en ut hi chuan a rawn kik det det a, naute a rawn en zuai a, mu turin a kal leh mai zel. Kan vai hian kan atchilh a ni ber e. 

"A thawhpuite ho sawm ila maw, nitin a hmu ţhin tu te leh a zia hrechiang tu te an nia, an rawnkal dawnah naute i hmeh bel chawt ang a, a hnial dawn der si lo. Mak ti deuh chungin an nui ru tet tet tho ang" a ti a, Zodina a sawisa zui a kan nui leh hak hak ţhin a, choka aţang pawhin hlim nui ri a chhuak veleh ta fo mai. 

"Zodina hi i hmangaih em?" tiin min zawt thut a, ka inring lawk lo bawk nen ka hamhaih viau reng a ni. 

"Hmangaih e. Ka chan a chhiat ber lai pawh a min tuam hlawm tu a nia, ka dam theih nan theih tawp a chhuah a, hmalam ka pan theih nan min pui char char a, mahni intheihnghilh ţhakin ka tan a inpumpek a, ţhatna in min hneh a, a dawhtheih em em bawk a, hmangaih lo thei lo in min siam ka ti mai" zak tak chungin ka ti a, hetiang lampang hi nu leh pa te hnen a sawi a nuam miah lo. Tleirawl ka ni tawh lo va, ka upa ve deuh tawh chung pawh hian nuam ka la ti chuang lo. Timna hi a la awm tlat. 

"I vannei ngawt mai. A hmangaih lutuk che hi mak tiin a chhan ka zawt fo a, min hrilh duh ngai si lo. A hmangaihna che a rei tawh anih ka ring ngawt a. Ka fapa anih vang a fakah min ngai lo la, Zodina hi chu sawiselna tur ka hre mang ngai lo. Thuawih chi a nia, a ţawngtam lo na a a pa nen hian kan thlamuanpui ve ţhin. A rilru a nghet a, nangpawn i hria ang. A umzui che a, a enkawl che a, i ţhatna turin theih tawp a chhuah a, bul a ţan tawh chuan a tawp thlen ngei ngei a duh ţhin. Ani ang a hmangaih tu che hi an vang ngawtin ka ring" a tih chuan ka lo pawmpui thlap. Zodina ang a min hmangaih tu ka tawn ka ring tawh lo. 

"Thlamuang deuhin awm tawh la, nupa chu thu inhmuh loh a inhnial bap bap chang te, inhauh chang te a awm ţhin a, chutiang chu in tawk ve anih pawhin inţhen chungchang sawi ri tel miah lo ula, i duh lo a i chhuahsan anih chuan tih ngaihna a awm lo a, a ko dawn miah lo bawk che a, mahse i ţhen hmasak loh chuan a ţhen miah lo ang che. Nangman i chhuahsan tawp te anih loh chuan a kalsan miah lo ang che" ti a min hrilh te chuan uluk deuhin ka lo ngaithla. A fapa a nia, a zia hrechiang ber pawl a ni. A fanu ang chiah a min en vangin ka chung a thil ţha lo a thlen leh a duh tawh lo va, kan pahnih chauh a kan awm chang chuan ka tan a ţangkai tur min hrilh malh malh ţhin. 

Kuangkuah chungin tukverh bulah pawn lam thlirin ka ding a, ka mutthilh theih loh chang chuan tukverh bulah hian ka ding ziah a, ngaiah ka nei tawh. A reh ruih tawh ţhin a, a thawventhlak phian. 

"I muhil thei na nge?" ti a min zawh pahin ka darah min kuah a, a lo thawh ve lai ka hre miah lo. Ka rilru ka kawm melh melh tawh hi chuan thawm dang ka hre mang ngai lo ring tak tak a thawm an chhuah anih loh chuan. 

"Ka muhil sek a, ka harh leh a ka muhil leh thei tawh rih lo a" tih pahin ka ngheng a, khua a nawm loh vangin arsi a lang lo va, chuti chung chuan zan boruak chu a nuam em em tho. 

"Eng nge ilo ngaihtuah?" 

"Thil hrang hrang ka ngaihtuah. Bul kan ţan dan buai nuaih te leh kan thil tawn hrang hrang te ka ngaihtuah let a, awm lo la chu ka dam tawh miah lo ang tih thlengin" tiin ka phun sep sep a, hun kal tawh ka ngaihtuah nasa ţhin a, duh lo mah ila ka hriat naah a bet tlat tawh a, keimah chauh a ka awm chang chuan ka ngaihtuah chhuak leh nge nge ţhin.

"Bul kan ţan chiahah ka lo ngai zawk a" a tih chuan hrethiam lo tak chungin ka melh chho a, min kuah nghet sauhin ka chalah a fawp a.

"Nitin zing ka thawh phat aţang hian bul ţan chiahah ka inngai ţhin a, inlaichinna ah chuan a bul ţanna hi a nuam tlangpui a, hlim deuh a kan awmreng theih nan bul ţan chauh angah ka indah ţhin" a tih leh hnuah ka hrethiam ve chauh. 

"Mihring kan nia, englai paw'n kan hlim reng thei lo. Hlim chang kan nei a, lungngaih avanga kun tlawk tlawk chang kan nei bawk a, hei hi ania ka ngaihtuah ţhin. Tunah chuan ka hlim veleh tawh a, nunhlui hrereng chungin a tak takin ka nui leh thei tawh. Vawi tam tak ka hnar che a, luhlul chhuahin ka hriselna leh ka naupai lai ngei pawh ka ngaihthah lui a, khang hunlai khan min vuan lui tlat a, nitin thihna in min hnaih telh telh niin ka hre ţhin. Mahse Pathianin ka thih hun a la ti lo a, ka hmangaih ka chan vang mai a ka nunna tih tawp  ve kher a lo tum miah lo va, thil ţha dangin min lo hmuak reng zawk a, engkim a lo ruat lawk vek. Ka chungchang a thutlukna ilo siam tawh ho ah hian inchhirna  nei tawh ()em?" tiin zawi te in ka zawt leh a, zan a reiin a reh ruih tawh a, tunang hunah hi chuan inhawng takin kan ti ti thei ţhin. Midang an ni ve em ka hre lo va, ka pasal nen hi chuan kan mut theih loh chang chuan inhawng leh inpawh takin kan ti ti melh melh ţhin a, kan inlaichinna ti ţha tu pakhat a ni. 

"Thutlukna ka siam hmain ngun deuhin ka ngaihtuah hmasa ţhin a, ka inchhir lehna tur thutlukna ka siam ngai lo. Hmeichhe dang ka ngaihven thei ngai lo va, nang bak ngaihtuah ka nei ngai lo. Ka duh ber chu damchhung a awmdun a ni mai. Mipa dang angin ka lantir ve thiam lo va, sawichhuah phei chu ka thiam lo lehzual mahse ka sawi ziah tawh ang khan ka thil tih zawng zawng kha ka hmangaih vang che a ti ka ni" ti a min hrilh chuan ka nui sak a, a thiam dan danin a lantir a, ţawngkam thiam lo tak chungin min hmangaih zia leh min ngaihtuah zia te, ka tan a a awm reng tur thu thlengin min hrilh ziah ţhin. 

"Lan tir thiam lo mahla ka hrethiam vek tho. I thil tih zawng zawng kha min hmangaih takzet tu tan lo chuan tih theih a ni lo. Hman a i sawi kha a dik chiah. Hmangaih tur che a duan lawk ka nih ka ring ve tawh a, min hmangaihna hi a nasa em a, min hmangaihna ang em a thuk chuan ka hmangaih ve rih lo che a ni maithei mahse pasal dang ka duh tawh lo va, hmangaihna tlem ka la neih ve hi midang hnen a hlan tumna ka nei lo" ka ti a, ka hmangaih ber ka chan khan ka thinlung a kehchhe hneh hle a, mu leh mal nei lovin rei tak chhung ka awm anih kha. Mahse Pathianin hmangaihtu min pe a, ka chung a thleng zawng zawng hi Pathian hnenah ka dil ngai lo. Chuti chung chuan engkim a ruat lawk vek a, mihring remruat a tih danglam theihzia ka thil tawn aţang hian chiang takin a hriat theih. 

"Hun lo la awm turah eng nge lo thleng dawn ka sawithei lo va, mahse ka damchhung chuan ka kalsan lo vang che. Hmun hla takah ka kal lova nga hmeichhe dang hnenah ka kal lo bawk ang a, inat tawh loh nan theihtawp ka chhuah chhunzawm zel ang" ti a min hrilh hnu lawkah naute a ţap a, min tlan khalhin a pawm hmasa tu zawkah a ţang lehpek. 

A duhzawng a zawt mawlh mawlh a, pakhat lah a ţap uar telh telh mai si. A tih ngaihna hre lo chuan min pe ta ringawt a, hnute ka pek hnu chuan a ţap bang ve mai. Chhunah a fel viau a, zan lai a ţah zeuh zeuh a ching. 

"Hnute heh deuh hi an thau duh an ti tlat" a ti a, a fiamthu emaw tiin nui ţhaw chungin ka melh a, a thutak nasa mai. 

"Tu sawi nge i hriat a? Bakah ngati nge thau tur a i duh em em?" ka ti ta hluai a, a thau loh a hlau em alawm.

"Ka hriatna ber ka hre leh tawh lo. Naupang thau chu an lawmawm zual a, khat hmuk mai se la ka duh ber" a la ti lehzel a, ka nui ve ta tawp. 

Naute nen hian a inzat chiah a min hmangaih thu a sawi fo a, kan inneih dan hian mi tam tak te mak tih la hlawh reng mah sela nupa hlim tak kan ni tho. Ka hunkal tawh a ka hriatreng duh lai bik te thai bo turin min ti lui ngai lo va, min ngaihsak em em reng chung hian ngaihsak let ve a phut ve ţung ngai lo. A dawhtheiin min dawm thiam a, nitin ka vanneih zia ka hre thar leh ţhin. 

END...