THROUGH THICK AND THIN-1

THROUGH THICK AND THIN-1

"Min thlah rawh, min ti na a nia" zawi te a tih pahin ka kut lak let ka tum a, a hmer nghet sauh sauh a, a rui em em mai bawk si, zan a ni lehzel bawk nen ka hlau lek lek. 

"Eng maw i rawn sawi kha? Inţhen i duh maw?" a ti a, min ngaihnep hmel zet hian a nui zui a.

Class-12 ka nih lai aţanga inkawp kan ni a, Dinpuia a ni. Kei aiin kum5 laiin a upa, college ka kal hnu thleng hian kan la inzui. School kan kal lai kha chuan ţhianho in kan star ve thei hle. Kan inngaihzawn tirh paw'n nuam ka ti mahse kum a vei a, a danglamna a lantir zel a, kum2 chuang meuh kan inzui hnuah phei chuan hrehawm ti deuh a min siam chang a ngah. Ka rual a star ve ţhin ho ka ţhiante khan hre vek ta se min awt tawh lo viau ang. Ruihhlo hian a tibuai nasa a,  hmeichhe dang dang be lawr dun ang hian an sawi zeuh zeuh bawk a, ţhen ka tumin a duh ngai der bawk si lo. A pawi ber chu ka thianghlimna leh ka zahawmna ka lo kawl tir hman kha a ni. 

"U Mawitei i nei tho a, bakah i awmdan hi ka hne tawh hrim hrim. Chhungten min zilh zeuh zeuh tawh a, tih tawp vek ka duh tawh" ka ti ve ta nge nge a, ka aw ki erawh ka la san chuang lo. 

"Min en teh" ti vin hlukin ka khabe ruh kualah na zetin a hmer a, chil ka lem khawlh a, ka hlauh rukzia erawh ka ti lang duh lo. Ka chungah thil ţha lo a ti dawn e ka tihna ni lovin ruihhlo in mihring a thunun tawh hi chuan duh miah loh a tih ve theih.

"Ka neih loh che chuan tuman an nei bik lo vang che. Chu chu hrereng rawh, i ngam chuan i tum chhin dawn nia" a ti a, a harhfim lo bawk nen ka thilsawi chuan a ti thinur takzet. Zan a ni tawh chungin khawlai a eng inchhi chuan chiang takin min chhun pha a, a mitmeng rum leh hriam hrak te chuan diktak chuan min ti hlau a ni. 

"Inţhen duh chai si lo hmeichhe dang kawp zut reng mah ta che" thinrim zet hian ka ti ve a, chu thil ka sawi zo chu min hmer na lehzual. 

"Finfiahna i nei em? Hmeichhia dang ka kawp chiang em tih finfiahna min hmuh tir la" a ti leh khur khur a, mi sawi ka hriat bak finfiahna ka nei der si lo. 

"La nei lo" ka ti sep a, finfiahna nei lo mah ila min hrilh tu apiang thusawi ka awih zel. A awmdanin a zir lo miau a, rin na ka neih tlem phah. 

"Finfiahna ineih phawt chuan i duh duh i ti dawn nia" a ti hmuk a, min thlah hmain ka hmuiah a fawp hram. Nuam tihna ka nei lo va, ka chhang let hauh lo. Min thlah hnuah a kutphah hnung lam a a hmui tuaiin a nui suk a, a tih dik loh ni a ka ngaih ka sawichhuah apiang a a thinrim zawk ziah chu ka haw hle. Engkim ka lo pek vek tawh vangin ţhen harsa ka ti ve tho si. 

"Zan dangah min ko chhuak tawh miah suh, kan inkawtah lehnghal" zawi te tho hian ka ti leh a, ka thawm hre pha dawn lo mah se la ka chhungte duh loh dan a ka awm miau vangin ka fimkhur hle. 

"Nih leh lut ila" ti a kal mai a tum chu rang zetin a banah ka vuan bet a, a nui chhuak ta hawk a. 

"A tlai tawh. Haw phawt la zan dangah i lo leng zawk dawn nia" hlauthawng zet a ti chungin a ban a vuan reng chungin a hnungah ka nam dawr dawr a, a ţang bik lo. A bike dahna kan thlen hnuah ka thlah ve chauh. 

"In chhungkua hi infel bik e, misual inleng induh mang si lo" min tih el tum zet a a tih te chu ka hre lo der hmak. Ka chhungten min hmu thut thei reng a, kal vat vat se ka duh ber. 

"Kal mai mai teh, kan inbe dawn nia. U Mawitei rawn rim tawh lo la a ni mai. Nula i rim dawn a nih pawhin in vengah rim mai rawh" ka ti hlak hlak a, kan veng a inhnaih bakah mi hian a chanchin an sawi duh laklawh a, kan vengah hria an tam mai. 

"Ka rim ngai lo ve" ti hluk chung hian bike a ţhu a, a la kal mai chuang lo. 

"Kal ta che" ka lo ti leh hmanhmawh. 

"Ka la ngai ve che a nih hi, hlik hlek che hian" a tih chuan ka lo chek hlak. 

"Ka rawn bia ang che ka tih mawlh mawlh kha. Zalen deuh a rawn len iduh chuan fel deuh a awm tum ve mai rawh. A nih loh chuan engtikahmah ka chhungte hian an lawm lo ang che" 

"I pathian angah min ngai rawh itia, ka pathian angah ka ngai che a, ka sual zawng zawng nen ka rawn pan che a, min hnar leh tho sia" a ti fiamthu a, thutak ka tum viau na a ka nui veleh nge nge. 

"I over lutuk Laldinpui. Miin an sawi tawh chu a dikna lai a awm ţhin. U Mawitei nen a inchungchang pawh ka ngaihven lehzual tawh ang" 

"Ngaihven rawh. I duh leh FIR theh lut la, chhui zung zung rawh" a ti a, hetiang zawng hian min ţawng el ziah. 

"Tehreng mai, ka lo ti vek ang" cho zet hian ka ti a, a mize dang a lantir leh ta bawk a, ka hlauhna ten min kian san tawh. 

"Ka kal aw naktukah thlah i ngaih dawn chuan min lo hrilh dawn nia" a ti ţha veleh mai bawk a, kan inhau hrep dawn maw ka tih laiin ţha deuhin kan inthlah leh ang lawi a, he ti reng hi kan ni. 

Ka nu leh pa te sawrkar hnathawk an ni bawk a, Pathian zarah inţha deuh kan nei ve. Dinpuia hmu tur hian gate pawnah ka chhuak a, a kal liam hnu a luh leh mai ka tum lai chuan zai ri ka hria, kan ţhenawm chiah aţangin. Ka ngaithla chiang a, ka nui sak. Haw tlang lovin aw lo chhuahna kan ţhenawm chu ka pan ta zawk a, gate an siam ve tho na a, kan gate angin an ti lian ve lem lo. 

Gate pawnah dingin aw ka thian kharh a, a hre mai lo. Minute hnih thum vel ka din hnuah a rawn hawichhuak a, min hmu thut chu mak a tih hmel khawp lehnghal a. 

An veranda eng laiah ţhuin a tihziah danin guitar a perh a, lunglen hmel fe in a lo zai leh tawh. 

"I rawn lut duh em?" ti a min zawh chuan nui chung hian ka lo bu nghat nghat a, Dinpuia nen khawlaia kan awm reng lai khan zai thawm kan hre miah si lo. 

Gate min hawnsak a, kan inzui lut a, a hma a a ţhut naah bawk khan ţhu lehin keipawh a bul chiahah ka ţhu ve. Ka ke bulah meizial bung tawi te a let tap a, meizial pangngai mai mai a ni lo tih ka hre ru ran. Weed hi a kawl ve reng a, zu a in thei miah lo thung. 

Timothy a ni. College kan kal dun ţhin a, kan pian ve hma aţanga inţhenawm tawh kan ni. Kan ţhianhoah hian keini aia inhrechiang an awm kher lo ang. Ţhian dang chhar chho zelin kan inkawm khawm a, whatsapp ah te group neiin kan inpawhin kan inngaina hle hlawm. Timothy nen hian veng khatah kan awm a, midang chu an hrang vek. Timothy te hi unau pathum niin a naupang ber a, mipa awmchhun a nih bawk vang hian an duat a, an hau phal meuh lo. A hmelchhe hran lo a, sa pan lam lu buk ve thei tak a ni. 

"Dinpuia a lokal a, U Mawitei nen a an chungchang kha ka sawi a, mahse a pha nasa. A thinrim zawk zawkah a ţang a, a haw dawn hnaihah lah ţha deuhin min bia a, min fiam a, a thinrimna kha a ti lang leh duh tawh miah lo va, hepa hi engtia tih chi nge ka hre tawh lo" tiin ka hrilh zung zung a, ka sawi zo chu ka thaw halh. Thil hriatchian chak ka neih phah reng a, ka hah ţhin. 

"Kal tir tumna ila nei chuang lo mi?" tiin min zawt let ve a, a ţawng a zawi viau na a ka hrechiang thei viau. 

"Thinlungin a la vawn tlat hi chuan kal tir mai a harsa ve ţhin a" ka ti a, ka nui hul hak. Ka ţhiante hian min hriatpui ve vek a, a chang chuan nep ka in tiin ka zak ţhin. 

"A chang chuan tawpna kha hi kha reh thei miah lo aiin a ţha zawk. Tunah na mahla reh hun a nei dawn hrim hrim. A nun a sim lo chung a i kawp reng chuan i na a reh thei lo ang. Mahse i thu thu le" a ti a, a guitar chu duat hmel tak hian a kuah a, a nun a a neih hlu ber a ni miau a, college ah pawh a keng ziah. 

"A dik alawm mahse a la insiamţha ve mai ang ka ti ţhin a, thlak danglam theih ka inring a, ka hretawh bik lo le" beidawng zet a tih pah hian a darah lu ka nghat a, kan ngawi zui vang vang. 

Ţhen tak tak tum a rilru ka siam chang hian khawngaihna ka nei leh ţhin a, an chhungkua an buai ve bawk nen, min ti na reng chung hian thil dang vang a a natna belhchhah tu nih ka hlau leh ţhin. A landan ringawt en chuan a ngainatawm lem loh. Palian ve tak a ni a, a mitmeng a rumin a meng no tehchiam lo mahse a mithmul a sei nalh viau thung. A hnar ngul a sang vah a, tunlai mipa tam takin an tih ţhin angin a khabe hmul a zuah ve. A ngo lutuk hran lo va, mahse mipa ngo hluak ai chuan ka duh zawk daih. School ban apiangin ka hmu ţhin a, a rukin ka star ţhin hle. Amah zawkin min be hmasa a, kan veng a inhnaih bawk nen amah star ve tu ka ţhiante aiin ka hmu tam thei deuh. Phone number te inpe in kan inbe nel chho zel a, a ţawng duh a, fiamthu a duh bawk a, ka ngainat nachhan a ni ţhin. En tawp a nelawm loh viau siin a rilru a ţha tih ka hria. 

Ka sawi tawh ang khan hrehawm tih chang ka ngah a, a rui a, hmeichhe dang a be thul mahse min ţhen duh tlat lo. A hma a sialin a nawmna chauh a ngaihtuah ni a ngaih chang ka neih ve fo rualin harsatna a tawh hnem zia ka hre tel leh ţhin. Hnathawh a la nei lo va, an chhungkua hian bakery lar tak an nei thung. Unau pali an ni a, Timothy ang tho in mipa awmchhun ve tho a ni. Mahse a upa ber dawttu a ni thung. An upa ber a pian hnu hian a pa hi hna vangin khaw hranah a awm a, a nu in ngaihzawng dang neiin Dinpuia hi a pa awm loh laiin a pai a, a pa chuan a nu chu a ngaidam thei mahse Dinpuia a en hrang hle. A nu tihsual a tuar a nih ber chu. An chhungkaw chanchin hi thui tak min hrilh lem lo a, vawihnih vel an inah ka kal ve tawh a, an inchhung boruak rih zia ka hria a, ka hmuh pui bawk. A pi leh puten an lawm lo a, awm lo ang hmak a ni. A nu hian a pa diktak hi sawichhuak duh se a zia deuh maithei. Chhungte hmangaihna a dawng lo lutuk hi ka khawngaih ţhin a, chutih rual chuan amah zawk huat ngawih ngawih chang ka nei bawk. Kan inkar hi a buai a ni tawp mai. Sawi chhuah ngaihna vak ka hre lo va, midang hnen a hrilhfiah dan ka thiam lo. 

"Dinpuia hi chu a puitling lo chi a ni bawk sia, chhungrila a thinrimna a lanchhuah tir dan lah hi a ţha lo zawng hlir a ni bawk a, min demin min hau bawrh bawrh mah ula ka haw ngam miah lo ang" tiin ka phun sep sep a, ka chhipah na vak lo in a beng det det a, min hnem ve ţhin dan a ni. 

"Hau lo e. Kan mi hmangaih tur te kan thlang chat chat thei hleinem. Siami te hi Dinpuia i hmangaih angin hmangaih ta ila min sawisa hrep duh ang chu" min tih nuih tum hrim hrim hian a ti a, a hlawhtling reng bawk. 

Siami hi kan ţhian ho zing a mi tho a ni a, pa thung chi a ni. A anpui a kawp ngai lo na a ngaihzawng a la nei miah lo va, a landanin mipa a hip hran lo bawk. Mipa incheina a lawm a, a chezia leh engkim hi a pa a ni tawp mai. Kawm a nuamin a fel a, a zaithiam hle bawk. Mipa ngaizawng tur a kan tih chang hian chhanna mumal min pe ngai miah lo va, fiamthu a hmeichhia kan sawihmuh chang chuan a duh loh thu a sawi ţhin. A awmzel dan tur chu kei a lo sawi theih a ni lo. Hunin a la hril ang chu. 

"Kan hmangaih tur te kan duh apiang kan thlang thei lo ang bawkin mi ţha famkim an ni thei kher lo bawk a, khawvel hi chu a hahthlak a nih hi" ka ti a, a taksa a chet dan hmangah hmu lo mah ila a nui tih ka hre mai. 

"Ka pa in gospel camping ah lut rawh min tia" a tih chuan kan nui dun hak hak a, an hau vak phal si lo. A thil tih ţhin an hre ve tho si hian siamţhat dan an ngaihtuah ve reng a, lehlam zawng chuan an khawngaihthlak. Ruih laia awmdan a hriat chak vangin a zu ve chhin a, a lo nuam phian sia, a zuk chhunzawm ta reng a, hetiang hian aman min hrilh. 

"Chutianga luh ngai lo chuan sim ve mai la, i duh chuan i thei awm tho sia" 

"Thei e mahse a nuam ve a" a ti tawi tak. Chhanna mumal hmu lo a ka inngaih tlat vangin "Ngati nge hetiang itih reng reng. Dinpuia ang hian buaina hrang hrang theihnghilh tum a rui ilo ni ve lo maw?" tiin ka zawt ta nge nge a. 

"I hriat tawh ang kha a ni mai"

"Ka awih lo thildang a awm ang. Buai ruk deuhna inei a ni lo maw?" ka la ti ţalh a, keimah ka nih chhung chuan ning viau mahse a thinrim lo vang. 

"Nei nang aw..nuam ka tia, ka hman lutuk vang te a ni bawk ang a, a zuar tu te pawisa neih loh ka hlauh vangin ka leisak a ni thei bawk ang a, a tam mai. Engvang pawhin zu ila a thawh dan a ngai, a nuam vek" a tih hnu chuan ka ţhu ţha sawk sawk a, thinrim awm tak a ka melh takah chuan a ţhen sak. A inthlahrung leh si ni ngei tur a ni. 

"Zawi zawiin sim tum rawh anih loh chuan i â huih mai ang. Ka haw tlai lutuk chuan min lo hauh ka hlau sia ka haw mai ang. I pindan aţangin zai la ka lo ngaithla ang" tih pahin ka ding hluai a, kan in hi a inhnaih a, a chhawng ve ve a ni bawk. Kan pindan awmna a inzawn chiah a, tukverh kan hawn ve ve chuan chiang takin kan inhmu thei. 

"Lutuk..ka chho nghal" ban a vai zeuh chuan phur fahranin ka ban ka lo vai ve a, ka tlan haw nghal dawr dawr. Rin ang ngeiin chhungten ka kalna min lo zawt ngei a, Dinpuia hmu turah min ngai vek a ang. Timothy nen an kawtlaia kan ţhut thu ka hrilh a, min hauh loh phah. 

"I chhuak dawn a nih chuan tu emaw ber hnenah sawi hmasa tawh rawh. Ngawi rengin an chhuak daih ngai lo" ka nu in a ti hram. Ka aw liam puat a, ka ţhianpa zai ngaithla turin ka pindan ka pan a. 

Tukverh ka hawng a, Timothy a la awm lo. A pindan a la thim ţhap a, ka sawi ang a a tih ka rin tho vangin light ka off a ngaihţha deuhin ka mu. Tukverh awmna hi a sang bawk a, tumah an rawn lawn theih ka ring hran lo bawk a tukverh hawng a mut chang ka ngah. Dinpuia chanchin hriat tumin phone ka en a, a message ka la hmu lo. Status a neih leh neih loh ka en leh a, engmah a awm lo. Status hi a nei vak ngai lo hrim hrim. Thinrim tur zawk ka ni bawk a, chanchin hre chak viau mah ila biak hmasak ka tum bik ţhak lo. La tih tauh rih ka duh a, ka unaute leh midang Dinpuia nen a kan inkar hre ve tu te sawi kha hriatchian ngei ka tum bawk. Phone chu silent in lukham hnuaiah ka dah a, ngaihven loh luih ka tum a ni. 

Reivak lo hnuah Timothy-a zai ri ka hria a, ka nui ver ver. Kan ţhenawm lawkah leh ka koh phak mai a ka ţhianţha tak a awm hian ka thla a ti muang ţhin. Ţhianţha neih hlut zia min hriat nawn tir fo a, kan inkawm aţangin vawikhatmah min la phatsan lo va, ka thin a la ti ur chhin eih lo. A rui ţhin tih ka hriat tirh khan ka hau hrep a, min chhang lo va, a thinrim lo va, a sim phah lo bawk. Ka be duh lo ve ngei na a rei ka daih leh chuang lo. Mi tam takin kan inngaihzawn daih an ring a, min dem fiam fo. Chutiang a thlen chang te chuan kei aiin awm lo a ti zawk a, a thlen loh tur thu a sawi ţhin. Ţhian chiah kan ni a, ţhian chin bak pelh kan tum ngai lo. Hmangaihna tih vel hi a ngai ho hle a, mipa leh hmeichhe inkar a hmangaihna awm ţhin ai chuan ţhian inhmangaihna a dah sangin a ngai hlu daih zawk. Hmeichhia aiin a guitar a kuah ngunin a chul hnem zawk a, hmangaihna lam hla thu te ziah ve ţhin mah sela a awih loh thu bawk a sawi leh ţhin. Min ngaihtuah ang bawkin ka ngaihtuah ve a, kan inveng tawn a, kan thlavang kan inhauh tawn sak tlat a, midang bul a min sawichhiat ka la hre lo. Mipa a nih vang te pawh a niang mahse keichuan ţhianţha diktak anih vangah ka ngai zawk. Ka hlimna turin engkim a ti vek a, ka tan a a tih loh awmchhun chu min ngaizawng miah lo hi a ni mai. 'Min ngaizawng la chu ka kawm tawh lo ang che' tiin fiamthu ti takin min hrilh ţhin. Hmangaihna hi a ngai ho tak tak nge hmangaihna a tluk luh a hlau ka hriatpui lem lo va, hetiang thil hi min sawi pui tam lem lo. 

Zingah hma takah ka harh a, ka nu in thawh tlai a phal lo hrim hrim. Timothy-a zai ngaithla in ka lo muhil daih chu niin. Lukham hnuai ban rak rakin phone ka phawrh a, Dinpuia message a lo awm vang. 

[Ka haw chiah] tih zawng a lo ni a, a la tho dawn chuang lo bawk a ka chhang let rih lo. Ka ţawngţai leh te te a, ka tihziah danin Dinpuia hming ka lam tel. Mu hnem viau mah ila mut kham lo ang maiin ka mut a la chhuak a, mut leh ka chak viau na a mu zawi tawh lovin ka tho a, ka nu ka pui a, a thil chhuan ka vil mek laiin "Ngaihzawng hi thlan fimkhur tur a nia, miin 'A ni hi chu a fel lo khawp a' an tih ang hi chu ngaihzawn loh reng reng tur. Pasal a tan an tlak miah loh a nia" a ti a, min zilh leh pek ka ring reng a. 

"Ninawm ve sek, pasal nei rual ka la nih loh hi. Bialpa mai mai te chu a ho" ka ti hlak hlak a, ka pa awm loh lai chuan ka chhang huai ngam ve lutuk. 

"Tunah inei dawn ka ti hleinem. Mahse nakinah pasal ila nei dawn a, ngaihzawng i thlan fimkhur loh chuan pasal i nei fu lo ang. A rui ve zeuh zeuh na a a pa e tih ringawt a ni lo. Rui ve zeuh zeuh chung a a pa pauh leh a hrehawm ting a ni mai. Mi puitling leh fel zawn hram hram tur" a tih lai chuan tum burin a bai siam chu ka chawk sawk sawk a, thingpui so hun nghak a ding ve reng ka u chiah Tetea nuih ka ti za khawp mai. 

"Dinpuia phei hi chu nei chiah la chuan thla hnih khat hnuah ilo haw leh ngei ngei ang" a tih chuan thinrim zet hian "Sawi ve ziah suh. Nitin i sawi a ka ning tlat. Ka thil tih i ti tui lo vek zel" ka lo ti hlar a, a hma aiin ka tum lian tawh zawk. 

"Ka sawi ziah a i zawm chuang lo. I nu ka nia, i ţhatna tur bak ka sawi ngai lo. I thinrim let a, thu i awih loh chuan ila inchhir khawp ang" a ti a, a awki a san ve hret na a ka nu hi chu ka hlau em em lo. 

"Nakin a sawiah kher rawh nu. Zingkar a nih hi, in inhau hma emai" Tetea lo inrawlh ve chu ka lawm kher mai. Thingpui ka siam sak a, midang an lo tho ve zel a, thingpui lum tu ber ka ni. 

Kan chhungkua hi paruk kan ni a, unau pali kan ni. Naupang ber dawttu ka ni a, kan upa ber hi hmeichhia niin Tetea hian a dawt a, kan naupang ber hi mipa a ni leh. Kan upa ber Rintei hi doctor a ni a, midang chuan kan la zir vek. Tetea nen hian an chhang a khat deuh a, nula senior a ni ve tawh. Pasal neih a la tum hnai lo nge ni bialpa ti a han sawi tur a neih pawh ka hre lo. Kan unau hi kan zia a inang lo ve hlawm a, kan tet deuh hlek lai phei chuan kan inhau ve nasa ţhin. Kan upa deuh a, kan inmil ta phian a, chhungkua chu a lungrual reng theih loh a, inhnial bap bap chang kan nei ve ţhin. Mahse thil pakhatah erawh an inlungrual ţhap, ka bialpa Dinpuia an duh lo vek. 

Chhungkua a awmkhawm hunlai chu chaw ei lai hi a ni deuh mai a, chaw ei lai a nih loh chuan a ţhen hna an kal a, a ţhen pindanah kan inkhung a, ka nu in min zilh chak tlat chang a chaw ei laia Dinpuia a sawichhuah hian nuam lo ka ti ber ţhin. Ka chhang chak a, ka chhang ngam ngai si lo. Ka huat ber lai pawhin midangin an sawisel chuan ka ţan tho zel. Tukin chu vanneihthlak takin a sawi lo hlauh a, a sawi hlauin ka ei sawk sawk a, ka kham vat tho. 

College kal tur a ka insiam zo darthlalang a la in en ran chungin Dinpuia ka call a, a haw tlai nen min lo chhang vat tho. Min lam turin ka hrilh a, a phur vak lo tih ka hria mahse min hnial ngam bik lo. Kan inpiahah ka lo nghak a, kan inbulah chuan ka nghak ngam lo hrim hrim. Ka nu in min hmuh vaih chuan a sermon rei leh dawn lutuk tlat. 

Rei ka ngah hmain a rawn thleng ve mai a, a la phak kher mai. Tshirt leh kekawrbul nen a rawnkal a, a mit a sen rum bawk. Ka lo melh khui khui lai chuan "Hmanhmawh teh" a ti hluk a, a landan a lungawi zan lo chung chuan a hnungah ka lawn tharh a, a tlan chhuah rualin a kawngah ka kuah a, ka kun hnai deuh bawk. 

"Nizan i va lengrei ve. Haw hun pangngaiah haw ve ţhin ta che. U Mawitei chungchang te kha ka la sawi zo miah lo a nia, nula senior lehnghal engatan nge itih?" ring leng lawng hian ka ti a, ka ţawng rin loh chuan a hre thei dawn si lo a. 

"Johny-a te inah ka lo muhil a, Mawitei kha chu amah zawt mai rawh" a ti awlsam et a, hau vak dawn ila Mawitei chungchangah finfiahna ka la nei mai si lo va, hauh ka chak tho si. 

"Ka duh lo chung min fawp tawh lo bawk la, khatiang kha ka duh miah lo a nia, hmeichhia hian zah kan phu aw" ka ti ta ringawt a, ka inchhir chawpchilh nghal. Ka zak leh deuh si a. Dinpuia pawh a nui ve ta ringawt. 

Kan college awmna hmun kan thlen chuan a ding dawt a, ka inring hman lo bawk nen, ka kang awk a, helmet ah ka intauh chawrh. 

"A na em?" lo ti vatin min ngaihtuah awm tak a awm a tum vel a, chhang duh lovin a hnungah ka beng a, ka chhuk zui nghal. Nui ruh ruh chungin min lo en a, keichuan ka tauhna lai ka la dawm. 

"Khawmaw ka lo en chhin" tih pah a a kut a rawn lek chhuak chu ka lo beng per lawp a, a ti lui tih ka chiang ve em. 

"Fiamthu hun a awm. Bakah fiamthu thawhna tur ka ni lo. Ka tho fu lo ropui lehnghal a, i ţhing si kal leh vat rawh" ka ti nghal zat zat. 

"Tan tan che hian, min rawn biak khan ka tho a ka lokal nghal. I van pawimawh tak aw" a ti leh vel a, ka nui duh miah lo. Kan han inhnial leh rih a, U Mawitei bawk ka sawichhuah leh takah chuan "A ninawm sek" a ti hluk a, ţawngkam ţha pawh a min thlah lovin a kal daih. 

"Kimkim ka awm peih tawh lo" ţap ţuau a Didiki'n a lo tih chuan a ngaihna ka hre lo hle. A awmna chhungkua bawk a nih ka ring na a hetiang hian nidangah a awm ngai der si lo. Induh ve tawk tak leh a chak lohna lantir duh ngai miah lo a ni a, hrehawm tawpkhawk a chungah thleng mahse a lanchhuah tir mai mai lo ang. Mahse gate chhung ka luh rual a min rawn pawhin hetiang hian a awm a, ka hamhaih zo vek. 

"Lo kal rawh hmun dangah sawi ang" ka ti a, a banah kaiin hmun reh deuh lai ka pan pui a, ka kalna apiangah min zui det det a, ka dinpui chiah chu a ţap nghal hlawp hlawp. Hmun him a thleng tawhah a inngai aniang insum lovin a ţap a, tihngaihna dang awm hek lo, a hnungah dimtein ka chul. 

A ţahchhan ber ka la hre bawk si lo, sawi tur mai ka hre lo va, a ţah chhung chu ngawi rengin ka lo awm ve tlawk tlawk. Kan dinna hmun a balh leh balh loh ngaihtuah miah lovin a ţhu sawp hnawk a, a kut pahnihin a hmai a hup. A bulah ţhu tung ve in a hnung bawk ka chul leh. 

Ka nghah vang vang hnuah inbengdai ve hramin a mit leh a biang a mittui luanna hnu a tuai nawk a, a ţap rei bawk a, a mit a sen ram a, a bui luk bawk. A insuk hrawk a, a hnar pawh a sen deuh. A hmui hnuai lam a khur der der a, a ţah a la chhuak hle a nih hmel. 

"Eng thil chiah nge thleng a?" mangang zet hian ka lo ti a, amah leh amah inhlauh ţhak a ka hmu mai hi a mak ka ti.

"Ka awm peih tawh lo. Ka awm lui thei tawh thlawt lo. Ka peih tawh lo" ţap ţuau hian a ti mawlh mawlh a, thil awmdan ka ngaihruat thiam ruai ruai. 

"Nizanah rui deuh angin a rawn haw a, a zia a chhuah dawn lo a nih hi tiin thlamuang deuhin ka mu. Mahse zanreiah ka pindanah lo lutin min zut kual vel a, ka ten lutuk" a ti a, lu a thing nawk nawk. 

"A thleng leh ta a ni maw?" ka ti sep a, pawi ka tiin ka thin a rim takzet. 

Didiki hi thingtlang khaw lian vak lo aţanga rawnkal a ni. A nu leh pa te hi lo nei a eizawng an ni a, an unauah a upa ber. A naute an hautak ve si, lehkha zirtir an duh ve bawk si chuan Aizawlah a patea te hnenah an dah a, pawl12  kan nih lai aţanga inhre tawh kan ni. Kan inkawp chawt a, a awmna te chhungkaw chanchin hi ka hre thui viau. Amah beisei tlat tu hi a patea fapa khawlo zet mai Lalawma an tih mai ţhin a ni. A patea nupui fanau te hi Didiki chungah hian an ţha tehchiam lo. An hmusit a, Didiki lah rethei viau e ti lo chuan mahni i duhtawk tak chi a ni ve tlat. 

"Nizan khan eng thil nge ka ngaihtuah ka hre lo. Ka lo thlamuang lutuk nge ni ka pindan ka kalh theihnghilh a, chu chu remchangah la in min khawih a tum leh a, ka ngaihtuah zawng ringawt pawh hian ka ten hluah hluah" a ti a, a khup tawmin a kuah bet a, a en ngai a en zui tlawk tlawk. 

"Inveng reng a awm i ngai tihna a nih chu. Rui chhe viau mahse i pindan kalh tlat zel la, i tawrh theih loh tawpah i patea  i hrilh tawh mai dawn nia" tiin thurawn ka pe a, a melh ngai la melh tlawk tlawk chungin muangchangin lu a thing. 

"Ka nutei hnenah ka sawi tawh a, ka lepchiah vangah puhin keimah zawk min hau hrep. Ka patea hi a hmin hneh bawk si, tlan bo daih mai ka duh" tiin a phun sep sep a, ka khawngaih kher mai. Puih chak viau mah ila chhungte ring a nung ka la ni ve tho si. 

"Tuar hram hram rawh. Tluang deuh a college kan kal chhuak ve thei a nih te chuan hna kan zawng ve ang a, nangmahin i inenkawl thei vat mai ang. Pawisa ka ngah bik vak lo a, sumin pui thei lo che mah ila englai paw'n i tan ka awm reng aw" ka ti a, thil ţha lo deuh a tih palh te ka hlau a ni. 

"Tukinah lah ni se a bazar in a fate thil a hawnsak vek a, keive thung chu a pheikhawk hlui nutling deuh chhe tawh zet min pek a tum a, class kal naa bun turin min la hrilh zui. A fate nui tet tet ka hmuh te khan ka te hluah hluah. Inbual zo se bathroom an chhuahsan tawp a, an sulhnu chhui vek a ngai. An kawrhnuai thlengin ka su vek. Lehkhazir ve dawn lahin min tir kat dawr dawr a, engkim ka ti vek chung hian an lawm chuang lo. Lalawma lahin min beisei reng a, a ruih lai aiin a ruih vak loh chang hian a hlauhawm lehzual. Kim keichu ka nun hman dan leh ka awmna hi ka hne ngawih ngawih. Ka thinrimna ka up beh zawng zawng hi puak chhuakin tual ka that mai ang tih te ka hlau ţhin. A sual a chhuah a, min beisei sek a min tihbuai reng chang hi chuan thi daih se tih chang ka ngah" zawi te in a ţawng a, a thinrimzia erawh a awki ah a hriat. A mitmeng vawt raih chuan min rawn melh a, ka ţhian ka hriatchian chu ni lo se min ti hlau ve ngei ang. 

"Chutiang chu thlen tir miah suh. A rui i nin viau a, a beisei reng che a nih pawhin thil ţha leh ţha lo thliar thiam turin i rilru leh hriatna te dah fim kar reng la, kan himna tur ber kan inchhung ngei a inven ngai reng a awm chu a hrehawm ka ring, mahse i hma hun ngaihtuah la, Lalawma vang mai maiin ti chhe miah suh" ka ti mawlh mawlh a, a thinrim tawpkhawkah chuan pawisak a nei dawn lo tih ka hrechiang a, nidangah pawh ka bengdai hram hram ţhin. 

"I ţhiante kan awm a, i lam kan ţang vek. Kan pui hreh lo vek che a, engtikahmah kan phatsan miah lo ang che. Ţhian kan nihna lanchhuah tir a ţul hunah tumah kan tlanchhe lovang, lungngai reng reng suh" ka ti a, a kun leh tlat tawh a, keipawhin a hnungah bawk ka chul leh. 

Ţhian chu a ţul hun a inpui tawn tur kan nia, kan dinhmun a chhiat a, a hniam lai ber hi ţhianţha lanchhuahna a ni ţhin. Chutiang hun a lo thlen chang chuan kan ţhianho hi tumah kan inphatsan ngai lo. Kan hlimna leh lungngaihna kan inţawmpui vek ţhin a, chu chuan thlamuanna min neih tir ţhin. 

"Hey nangni pahnih kha kan zawng nasa lutuk che u" Siami aw ring leng lawng lo chhuahna lam chu ka hawi vat a, Didiki erawh a la che eih lo. An vaiin an lo awm tawh a, kan awmdan an hmuh chuan an ngaih a ţhat loh hmel hlawm hle. Min lo pan hnaiin min hual ta ţhup a. 

CONT...(Through thick and thin hi min lo chhiar sak leh ţheuh ula, love story ngawr ngawr ni lovin ţhian hlutna tam tak a lang tel ang. Min lo chhiarsak a, like leh comment min pek ţhin vang hian story ka la ziak ve zel thei a, nangmahni vang liau liau a ni. Ka lawm lutuk e)

Whatsapp group:

https://chat.whatsapp.com/I6qUxY6prAmKo85pBXlcPN

https://chat.whatsapp.com/LaAMPSvMmJm8Gv6P2tQvaJ

https://chat.whatsapp.com/K6HoP6HNsfU6mWeB8taHc5