THROUGH THICK AND THIN-10

THROUGH THICK AND THIN-10

KIMKIMI

"Ka lut tawp hreh e...mipa zawk te in a kal ringawt pawh a nawm tawh loh nak laiin a tello a kal ngat phei chu" tawi hret hret chungin biak bik pawh nei lovin keimahin ka phun sep sep reng. 

"Kal rawh ka luhpui ang che. Biak hran i duh hunah ka in la hrang a, a reh hmak chhan hi zawt hrim hrim rawh. Rilru hrehawm deuh chunga awm mawl tawp aiin a ţha hrim hrim" ka thusawi kha lo hre phain Didiki chuan min lo fuih sauh sauh a, gate lianpuiah kan lut tlang tawh a, an inkawt zawl zau tak maiah chuan kan ding dun ran. 

"Min hmu duh lo tlat ta se nih loh paw'n min lo be duh lo ta se la" ka la ti niah niah.

"Ta se tih reng a ngai lo. I mut ţhat theih loh vangin i hmelchhiat tawh em kha, dawih dei dui viau suh" dawhthei lo zet hian a ti leh a, ka banah vuanin min pawt dawr dawr. 

Lut chhuah an awm reng vangin kawngkapui an khar ngai mang lo va, awlsam fe in kan lut tlang. Hahdam hmel zet a lo ţhu Dinpuia nu chuan mak min lo tih hmel khawp mai. Min biak na chang a hre mai lo. Ka aiawhin Didiki chuan "Ka pi, Dinpuia a awm em?" tiin pangai takin a zawt a, chhanna kan dawn har tak em vangin ka inthlahrung lutuk chu let leh mai tumin hnunglamah ka tawlh hret a, mahse Didiki chuan nghet zetin min vuan lui tlat. 

"Dinpuia a awm em?" a ti nawn leh a, awm ve dang ten thawm nei reng mahse Didiki ţawng chu a hre pha tho ang. 

"Aw awm e..mahse nizan a leng chhuak zingah a lo haw chauh a, a mu maithei" ban charh hian a ti ta nge nge. 

Leng chhuak ngai mang tawh lo chung a a lengchhuak leh te chu ka rilru a na ru hle. A chhan ka hre kiau a, ka sawi chhuak ngam rih si lo a ni. 

"Biak duhna pawimawh deuh kan nei a, min koh sak thei angem?" Didiki bawk chuan a ti leh a, "Khawngaihin" a ti zui sap. Keichu ka lo ngawi reng a, len chhuah a hrat leh tawh anih phei chuan min hmu duh kher lo vang. 

"Liani, Dinpuia han ko lawk teh" Dinpuia nu chuan a ti lang lang a, nidang angin min lawm huam tawh lo va, ţhat a chhuah der thei tawh lo a nia nge ţhu tur takngial paw'n min sawm eih lo. 

Rei fe kan din hnuah Liani an tih chu rawn letin "Lo chho mai rawh u a ti" ti a min hrilh chuan zawi tein ka lo thaw huai. Keimah ka nih a ring ngei ang a, min hmu duh ringawt pawh chu ka lawm a ni. 

Didiki bawk chu che hmasa zawkah ţangin min kai chho det det a, Dinpuia pindan awmna lai tak ka lo hrilh a, kan lut dun zel dawn emaw ka tih laiin "Nangmahin lut la keichu corridor ah hian ka lo awm ang" a ti ta daih. 

"Ngai lo keimah ringawt chuan ka hreh ve tho a, min luh pui zuai la" ngen ngawl zetin ti mah ila "Hreh na chhan tur pakhatmah a awm lo. Va chhuah chhal la, huaisen chhuahin va hau vak vak rawh. I bul ţan anih loh hi. A chhan chu engpawh lo ni se i thiam loh a ni dawn lo tih ka chiang" a tih hnuah kawngkhar tlem a nawr kau a, ka luh dawn thlengin ka bulah a awm. 

Parda chhah tak a la inzar khup vangin a thim ruai a, amah tak pawh ka hmu mai lo. Sofa sei pakhat a awm ve, chutah chuan ka bag dahin tukverh lam ka pan hmasa a, parda inzar chu a vaiin ka keu sawk sawk. Pindan chhungah eng a luh tak hnu chuan ka hawi let a, khum a Dinpuia mu ka hmu chiah bawk. 

Min lo en ran a, a mit ko inbel var va chu ka hmu hmasa ber a, zawh buai ngai lovin buaina a tawk tih ka hre mai. Ka ngaihbel nge a mit a bel var va na lam zawk chu a vung deuh hlekin ka hmu a, a mut nasat vang te pawh a ni maithei. 

Ngam leh ngam lovin khumah chuan ka ţhu thla a, min rawn hnaihin ka malah a bawk zui zat. Ka rilru hahna inchhek khawm tawh te leh tun a a awmdan ka hmuh dan leh a nu hnen aţanga ka thu hriat vang a ka rilru natna te, a nu in min endan dang ta lutuk te avang te chuan ka ţah a chhuak ţun a, ka hmui hnuai lam khur der der pet fan fan chungin a samah ka chul a, ka kut thleng chuan a khur vek hialin ka hria. 

"Ngati nge i lokal?" ti a min zawh chuan inbengdaih tumin thawk ka la te te phawt a, chumi hnuah "Min be duh si lo va" zawi te, tham chhal hian ka ti a, ka hnuk a la ulh ţeuh reng tho. 

"A chhan i hriat kha" a ti nghut a, ka patea leh ka chhungte vang a nih ka ring reng a ni. 

"Mahse tihsual ka nei ve hleinem" aw khur der der hian ka ti a, ka ţah mai hlauin ka kut lehlamin ka hmui ka hup ta ringawt.

"I ţap a law?" ti sup chungin min melh chho a, eng hmel nge ka put hre lo mah ila ka hmel a hmuh rual chuan a tho rang hle. 

"Ngati nge?" ti a min zawt lehin min hnaih sauh a, a bul a ka awm reng chung pawh a ka la ngaih tho vangin ka hmui hup na la thlain nghet zetin ka lo kuah. 

"Hetianga i awm chuan i ti harsa lehzual sawt ang" a ti a, zawi tein ka chhip aţangin ka hnungzang thlengin a chul thla. 

"Engmaw ka tih harsat ang? Min hmuh tawh loh i tum tak tak em ni?" ti a ka zawh lai chuan ka mittui a luangthla riai riai a, a awm a ka la bei reng vangin a hmu thei lo va, chu ti chung chuan a hmu ang tih hlauin ka hru sawk sawk tho. 

"A har khawp mai" zawi te a ti supin ka chhipah a fawp a, duat takin min kuah let ve tawh bawk. 

"A har chuan ti lui lo mai la, min lo biak loh chuan ka ngaih a ţha lo ţhin a, zanah ka muhil thei ngai lo reng reng. Phone ka en sek a, beisei nei deuhin en ţhin mah ila beidawnna hlir. Ka call chein i la duh ngai bawk si lo, thil thlen dan tumah ka hrilh ngam bawk si lo va, keimahin ka tuar char char zel a, diktak chuan a hrehawm takzet. Ka chhungte chuan min hau bawrh bawrh mahse ka tuar thei vek, kut min thlak pawh ni se ka tuar thei tho ang. Mahse ka biak loh che chuan hrehawm ka ti ţhin" ka ti sep sep a, hetianga ka kuah chiah phei chuan ka ngai lehzual. 

"Tuman kut an thlak lovang che" nghet charh hian a ti a, midangin a min tih nat phal miah lo tu hian min hliam reng tho si. 

"Eng nge an hrilh che? An vau che em ni?" nghet zet a la kuah reng chung hian ka ti a, chhan ţha tak awm lova min hlat tawp ka ring lo a ni. 

"Nghak lawk rawh. Ka nghah rei tir lovang che, thiam fe fe an tam tawh a, sumdawnna hlawk tak a kalpui a harsa rih dawn tih hre mah ila ka nghah rei tir lovang che. Bul ka ţan phawt ang a, i lokal ngai tawh lovin keimah zawk ka rawnkal ang" tiin min hrilhfiah mahse lu ka thing nawk nawk. 

"Ka pui zawk ang che. Ka zir chawp zel ang a ka thiam ve mai ang. Nitin ka rawn pui char char ţhin che ang a, inhlat hmasa kher lovin kan ti dun thei vek alawm" ka ti zui bawrh bawrh. 

"I hrethiam lo anih kha" beidawn hmel zet hian a ti a, ka patea hian eng ber nge a hrilh ang le? tiin ka ngaihtuah daih. Dinpuia hnen aţangin hre lo mah ila ka zawt chhuak tho ang. Vawiin la la hian, ka thil ngaihtuah vang chuan ka insehruh ţeuh a, dawihzep viau mah ila ka hlim na tur anih phawt chuan huaisen ka chhuah ve mai ang. 

"Ka hrethiam vek, i rin ai daihin ka hrethiam ang. Eizawnna harsat zia ka hria a, i chhungten ti rethei che mahse sum leh pai leh i mamawh zawng zawng tlakchham i nei ngai lo. I pian hlim hlawt aţangin i duh apiang i nei nghal char char thei a, rinchhan tur nei char char chung a seilian inih vangin mahni a bul han ţan ve thut chu a harsa dawn tih ka hria alawm. Mahse taima leh ţhahnemngai te chu Pathianin mal a sawm ţhin. Inu leh pa te hnen aţanga i pawisa dawn zawng zawng hmanrua leh mamawh ţul zual lei nan hmang la, hman chawp tur ineih chuan a tawk. Tun a mi hausa tak tak te hi rethei deuh a bul ţan an tam a nia" ka ti dap dap a, mipa hi mipa an nih vang maiin an chhel reng thei bik lo va, bul a ţan hma hauh a a hnual ka hlau a ni. 

"Min hnaih luih zel chuan i rethei lutuk ang. Keimah a ka sual chhuah hunah ka rawn pan vang vang ang che" a tih chuan "Ka duh lo" ka lo ti vat. Ka kuahna thlahin ka ţhu ţha a, kan inhmachhawn ta ran mai. A uluk ve em em ţhin a sam hnawk niaih a, a mitmeng dul raih leh chauh hmel em em ka hmuh te chuan ka lainat ngaih ngawih. Ka hriat ve atana a duh loh harsatna eng emaw a tawk chiang a ni. 

"I dinhmun hniam lai ber leh harsatna i hmachhawn nasat lai ber a ka tlanchhiatsan che anih chuan ka dam chhungin ka inzahpui ngawih ngawih tawh ang. I dinhmun a san lai leh i chan ţhat lai chauh a i bul a awm tum ka ni lo. Eng dinhmunah pawh ding la, neih engmah nei lo mah la i bulah ka awm tlat tho ang. Engtikahmah ka hlat dawn lo che a, chuvang chuan min tirh chhuah phet tum tawh suh. Ka hmangaih che ka tih tawh kha, kan hmangaih te hi an dinhmun ţhat lai chauhin em ni kan hmangaih dawn? Hmangaihna hian dinhmun a thliar hleinem. Hmangaihna in phu loh a nei lo an tih ţhin kha. Chhungte rinchhan a nung leh thawh chhuah nei lo ka ni ve tho a, diktak chuan ka rethei ve tho asin. Thawhchhuah ka neih hma chu ka pualin engmah ka la nei bik lo. Lo nei pawh ni ila ka thawhchhuah a ka lei anih miau loh chuan hausa ka inti chuang lo. Bakah hausakna hi pawisa ah ka teh ve lo hrim hrim. Rilru hrisel leh thianghlim kan put a, hlim tak a kan awm hian kan hausa a ni mai. In lian leh ţha pui pui a awm thei, an duh apiang lei thei chung a rethei an tam a sin. Min hlat tum tawh lo la, min hnawt kiang lui tawh lo la, engpawh sual dawn la i rualin ka sual ve ang. Nitin inhlawh lawp lawp mah la, i hnathawh vangin i kut te durhin thap hruap mahse, thawmhnaw nalh tak tak inbel reng thei lo mah la ka hmangaih tho ang che. Mi hausa te chauh hi hmangaih phu an ni hleinem, kan dinhmun a ţha emaw a chhia deuh hlek a ni emaw, tupawh hian hmangaih kan phu vek" tiin ka thiam dan tawkin ka kalsan loh tur thu ka hrilh ve a, a harsatna tawh apiang a rualin ka tuar ve zel ang. 

"I tlin lovang" a ti dek dek a "Ngati nge min rin theih miah loh?" ka lo ti vin hlar. 

"Engkim ka huam vek ka tih kha, ka hnaih lut tlat che vanga ka chhungten min duh lo anih pawhin i hnenah ka cheng ve mai ang. College ka zawh hmain ka nei mai ang che. Chhungkua chu thisen inzawm kan nia, a inţhen hran theih tak tak lo. Ka zui che vanga min hua anih pawhin engtik ni ah emaw chuan min ngaidam leh mai ang. Der dep viau angin lang mah ila chakna ruk ka nei ve tho a, i tih theih ang chu ka ti ve thei vek" ka ti zui bawrh bawrh. 

"Ka ngaihtuah vang zawk che a ni. Nangmahni in ngeiah nuamsa deuhin lehkha zir rih zawk rawh" a tih lehzel takah phei chuan ka thinrim ţun tawh. 

"Ka zawng chhuak zel tho ang che. Min hnar lui thei chuang lovang. Min la hmangaih ve a ni tih ka hriat chhung chu ka umzui zel ang che" ka ti nghat nghat a, ka thutak zia a hre ngei ang. 

"I luhlul ve reuh sia" ti supin a nui zui hawk a, min hnar ngaihna a hre tawh bik lo. Didiki thu ang a ka awm chu ka lawm kher mai. In a mahni chiah a rilru tih hah ngawt ngawt khan awmzia a lo nei lo. Huaisen kan chhuah a ţul hun a awm ve. Min duh lovin midang min neihsan daih se chuan ka umzui bik hauh lo vang. Min duh reng chunga ka hrehawm tawrh a hlauh vang mai a min hlat anih chuan hrehawm tawrh huamin ka hnaih lui zel tho ang. Taksa hah mai mai te chu rilru na aiin ka thlang daih zawk. 

"Engmah sawi lovin min be lo tawp tawh lo la a ni mai. Keimah vang a nih ngat phei chuan ti tawh lo lehzual rawh. Tun a i nu awmdan aţang ringawt pawhin kan chhungte ho an inbe kual ang tih a hriat a, kan ţhatna tur ti ni a in ngai chungin natna min siam sak zawk a, tih tak takah chuan hmeichhia hi mipa aiin a chang chuan kan tawh a khirhin kan luhlul zawk a nia. Chuvang chuan engpawh ka tuar ve vek thei tih hre reng la, ka puih che rem ti zawk rawh. Inbiak loh reng kha chu ka kham lutuk tawh" ka ti a, ka ipikna tih reh tumin ka sawi zawh rual chuan ka thaw halh. 

"Bul ţanna pawisa ka nei mang dawn lo. Hna dil mai tur ka hre lo va, ti ţha zual zing a tello pawl ka nih ziah vangin ka tan hna a vang. Engpawh ti dawn ila bulţan nan pawisa hlawm a ngai ţeuh zel vek a, mi ang a bakery lian leh hriat tham neih ka duh ve mahse tunah bul ţan mah ila ka hlawhtling anih pawhin kum tam tak hnuah chauh aniang" a ti ve mual mual a, a rilru hah ve tur zia ka hriatpui. A nu leh ka patea ten pek an tum thu min hrilh kha ka la hre ve ran a, sawi danglam an nei a ni maithei. Chuvang tak chuan a ni ka patea ka biak duh ni. Mahse ril a rah fa te kut beng a chhuah tir duh an awm ka ring lo. Ka patean a en tawp thei anih pawhin a nu hi chuan ngawi rengin a en liam rei thei hauh lo vang. 

"Siam dan i thiam tawh em?" 

"Tlem chiah. A awlsam chin chiah" inrintawk loh hmel zet hian a ti a.

"Chu chu eng chin nge? Eng ber nge i siam thiam tawh?" ka lo ti leh.

"Ka thiam nual a har lo chin chu" a ti sup a, min chhan dan a ngai reng. Ka thlek ha laiin zah hmel zet a a beng khawp nuap nuap chungin a ţhen sak. 

"Zawrh chhuah pawh a hralh nuam tur, hralh nghal mai theih chin ang kha thiam phawt la, pawisa i neih loh chuan tumah i chhawr thei rih dawn lo va, kan inkhawl ngah hunah vai chhawr tur te kan zawng ve mai dawn alawm" ka lo ti awlsam et. 

"Nia tumah a chhawr theih rih loh ang" bu nghat nghat chungin a ti ve a, nuam sa leh hahdam takin bul a ţan thei lo tawp ang. Mahse a puitlin phah hlauh maithei asin. Pathian hian kan ţhatna tur zelin ro a rel ţhin. 

"Nizanah khaw nge i kal?" ka ti ta daih a, ka zawh chakna a rei tawh. Kan boruak a ţhat vak loh chuan ka sawi lo vang ka ti rilru a, kan inbe ţha deuh ni a ka ngaih hnu chuan ka ngawih bo pui thei lo. Inthlahrun hmel zet a min melh ralh lai chuan "Tu nge i sual pui?" tih leh pahin a mit ko inbelna lai chu na zetin ka nem pah kher. Na tih vanga ner suk chungin a hup bet a, a sual luat vang a pem mai maiah te chuan ţhen tlawk tlawk mahse ka khawngaih bik ţhak lo. 

"Zu ka in a, ka thin a chhia a" en pawh min en lovin a phun bul bul a, ka khawih sak leh mai hlauin a mit ko a la hup tlat. 

"Engvangin?" 

"Aww..ka ngai che. Eng dang nge ni se i tih?" a ti hluai a, ka thaw hawk. 

"Min ngaih chuan rui chung a chhuak duk duk lovin min hrilh mai ta che mawla" ka ti hlar a, min ngaihtuah vang a ni tih hrereng mah ila ka thinrim a reh phah chuang lo. Muhil hleithei lovin min biak hun ka ngaichang reng ţhin a, min ngaihtuah tak tak anih chuan engpawh huamin min hnaih lui zel se la ka duh zawk. 

"Ka hrilh tawh ang che, ka thiam loh a nih kha" ti ve bawk mah se ka la melh ram ram reng tho a, a nui tawi tak ringawt. 

"Ti tawh miah suh, lungngaih vang a khawvel a tlan reng reng ti fuh an awm lo. Kalna tur ber hre lovin an bo thuk tial tial a, bo hlen an tam lutuk. Thiam lo chung chung pawhin ţawngţai zawk la, 'min pui rawh' ti ringawt mahla Pathian chuan a lo ngaithla tho ang. Keimah vang a nih ngat phei chuan ka duh lo lehzual. Ka ţhen che a ni lo va, engkim a pui tur chein ka inpeih reng a, kan chhungte chu nakinah an la nem ve mai ang" tiin ka ngaihdan diktak ka hrilh. 

"Kan in a i lo len a rem lo va, ka ngaih viau chang che pawhin--" ka tih lai mek chuan dimdawih takin ka hmuiah min fawp a, ka tukhumah dawmin min pawt hnai a, ka lo chhan let ve rualin a thuk lehzual zawt a, hnunglama muangchanga ka awn riai riai lai a a thaw rang tial tial chu chiang takin ka hre thei a, keipawh ka bang bik lo. Ka hmui mai duhtawk lova ka nghawng thleng a a fawh lai chuan zawi tein ka thaw hlawp hlawp a, a kut pakhat chu ka kawrah zen lutin muangchangin ka hnung a chul a, tun a ka ti tawp lo anih chuan thil ţha lo zawkah min hruai lut leh dawn tih ka hria. Kan thlen thui hmain a awmah ka nawm a, na lo tein nem mah ila a thil tih lai chu a tawp ve mai. In la hrang hlekin ka mitah tak min en a, kan thil tih lai mek chu chhunzawm ka duh lohna lantir nan lu ka thing a, min fawp chhunzawm lo na a ka awmah hmai phumin a thaw lum ham ham a, chutianga rei tak kan awm hnu chuan a inla hrang ta nge nge a, mit chhingin zangthalin a mu a, keichu ţhu chhuak sawk sawkin ka sam ka tuai zui thuak thuak. Ka piah lawk a la mu reng chung chuan ka kawrah bawk a zen lut leh a, ka kawp a hmet niap niap. 

"Engin nge i lokal? Thlah i ngai dawn em?" ti a min zawh chuan a mu lai chu ka en a, min lo melh ve ran. 

"Scooty ka keng alawm. Didiki nen kan lokal a, hrehawm ka tuar nasa deuhin a hria aniang hreh viau mah ila hmu tur chein min nawr lui a, ka tisual hran lo anih hi" ka tih chuan a lo nui suk a, a sawi zui lem lo. 

"A tlai tak tak hma a haw ka duh. Kawt thleng tal min thlah ang chu" keimah zawk chuan ka ti leh a, "Rei lo te lo mu ve phawt rawh" a ti leh tlat. Hnial ţang ţang mah ila ka mu veleh tho. A ban lehlam ka lukham a, ka lam hawi a saisir pahin lehlamin min kuah. 

"Didiki'n min nghak reng a, ka rei hman tawh lo tak tak a nia" 

"Ka hria..a ninawm sek" a lo ti hluk a, ka nui ta vel mai mai. In ngeih deuh a kan awm a, hetianga inhnaih tak a kan awm hian nuam ka ti ţhin. 

"Khawmaw a pem lai hi ka lo enchhin hrim hrim" tih pahin a mit ko belna ka khawih a, min dang tawh lem lo. Dimte in ka pawt kau a, a pem nasa lo hlauh. 

"Vung phui luk khawpin an hnek lo che a i vannei khawp a lawm. Pem hlek ringawt pawh na iti em em a, i mut nilen pui ţhak a nia" ka ti nghal hlak hlak.

"Mu ni leng lo. Khawvar hnuah ka haw chauh a, ka intih fai hnuah inzir pahin hnathawk ho ka pui leh a, ka hah ve deuh a tlai lamah khan ka mu chiah. Ka mutthilh hmain i rawnkal leh a" ka kal thu a sawi lai chuan a nui ruh ruh a, ka haw hran lo. Inzir nan a hnathawk ho puih duhna a nei tawh ringawt pawh a lawmawm. 

"Hre ringawt lovin ziak chhuak zel la, an tihdan i en rualin i lo ziak zel ang a, nakin zelah i buai lo mai dawn alawm. Kan pahnih phei chuan kan buai lo dawn chiang sa" nui ver ver chung hian ka lo ti a. 

"Buai vak tawh lo vang. Min puih i inhuam takzet maw?" tiin thutak fe in min zawt leh a, ka peih loh san a hlau ni berin ka hria. 

"Tehreng mai ka sawi vek tawh kha. Ka sawi ang chiah chiah khan ka awm bawk ang" phur zetin ka lo chhang vat. 

Haw tum a ka thawh vek tawh hnu a a mit a hnawih tur damdawi min hmeh bel chawt a, khumah bawk chuan ka ţhu leh. A bel na sa nghet vak tawh lo chu ka oawt thla a, "Duh vangin iti pem a, damdawi i ngaihtuah leh chuk chuk tho si" ti hlak hlak chungin ka hmet chhuak a, tah nghal mai ka tum laiin ka banrekah lo vuanin "Dim deuh rawh aw" a lo ti a, a na dawn der si lo. Ka tih nat luih a hlau a ni mahna. A hlauh ang chiahin a thleng bawk. 

"Damdawi hnawih kher a ngai hleinem, hei ai hian kak thuk se la, ser thluah se la i sim ve deuh ang chu" tih pahin ka khawih sawk sawk a, na ti viau mahse ka tawp duh der lo. A la thar lam a, dim lo zet a khawih chuan a na ve ang. A pem lai ka bel bo leh lai chuan "Ka lei lo keichuan, ka ţhianten an lo lei a, ka hmang ve mai mai" a ti liam satliah a, a phu ve rengah a in ngai tawh bawk a, ka khawihna na vel a sawisel ta bik lo. 

Pindan kan chhuahsan dawn lai chuan a tawp nan ti ni awm takin min fawp leh hram a, inkai rialin kan chhuak dun. Didiki ka ko a, kan pathum a inhnuai kan pan lai pawhin Dinpuia chuan ka kut a thlah miah lo. Rin ang ngeiin a nu chuan min lo melh no hran lo va, ka chhungte pawh hetiang hi an nih ve tho vangin hriatthiamna chin ka nei a, ka ngai mawh em em lo bawk. 

Pawn a kan chhuah hnu chuan hnathawk pakhatin lo ti dingin "Dinpui i hman chuan rawn tel veleh tawh la, tihfel zawh hnuah duh leh i thil min lo hawn kha--" a ti hman chauh tihin Dinpuia chuan "Nangmahin ei rawh a thur emai ka ei peih tawh lo" a lo ti sawk sawk a, zu bak an in hawn sak ka ring lo. 

"I pui leh dawn anih chuan pui tawp la, zu in tawh miah suh. Hun awl ineih hunah kan inbe dawn nia, i duh lo chung chung chu min nawr chhuah tum lui tawh suh ang che" tiin kan haw dawnah ka chah thlap a, min ţhen theih bik loh zia ka hre ve a ni. 

Ka hmuh phak loh a a awm chiah chu ka ngai nghal vawng vawng. Kan inhmu khat a, kan inhmuh chhunah lah rei lo te te bak kan inhmu hman ngai lo va, a ngaihawm ve ţhin. Didiki hnenah chuan phur takin a ţhat vek tawh thu leh kan rem ruat dan te ka sawi siam siam a, ani pawn min lawmpui khawp mai. 

"Tikhan a fel vek mai alawm. Kal lo ila chuan rilru hah deuhin i ngaihtuahna i kawm leh vak vak ang a, awmze nei lo zetin i inti lungngai leh vak ang a, khatianga chinfel theih zel kha a ţha ber. Hmeichhe dang vangin i ti tau ve fo a, mahse Dinpuia hi ka chik chet chet hian lerh vak chi niin a lang lo" ti a min hrilh phei chuan nuam ka ti takzet. 

"Tak tak maw? A lerh i ring lo tak tak maw?" lawm ru viau mah ila a sawi zel tur hrechakin zawhna ka siam sak ta tho.

"Ring lo rapthlak. A hmangaih ve tak tak chein ka hria, mihring chu a fel famkim theih loh a, a thil tih leh awmdan sawiselna lai nei ve ţhin mahla hmeichhe lamah kher kher chuan a fihlim ang" hriatchian hmel fahran hian a sawifiah nghauh nghauh a, intih thiam loh chang pawh a awm thei lo hmasa zawk a ni ţhin reng a ni. 

An inkawtah a chhuk a, ani pawh a hmel a hlimin a mitmeng a nung ve sarh mai. A zalen thei ţep tawh a, ka lawmpui takzet. 

"Naktuk chu iduh leh Dinpuia i sawm ve ang a, tihdan tur vel chu zanah group ah kan sawi ho dawn nia" ti a min hrilh chuan lu ka lo bu nghat nghat a, Dinpuia a lo tel ve theih dawn phei chuan ka phur lehzual. Rilru a vei dang nei reng chungin phur lo deuh a puih a ngai dawn emaw ka ti hman a, kan chingfel thei hlauh hi a lawmawm thlawt. 

Didiki nen kan in mangţha hnu chuan keimahin ka tlan haw vawk vawk a, in a haw tlang lovin ka patea te inah ka kal kual. An nupa in tv an lo en a, min hmuh an inbeisei loh hmel kher mai. 

"Pate, Dinpuia hnenah eng nge i sawi ve? Keimah kha min zilh vak ringawt a, Dinpuia hnenah sawi i nei tel ve em?" ka ti nghal phawng a, Nu Hlimi hmai ka zah zo tawh lo. 

"Ani pawh kan zilh ve tho. In thlah hmak thei ula kan duh ber" ka patea chuan pangai takin min lo chhang mial. Mahse Nu Hlimi zawk chuan nem vak lem lo hian "I thlah loh chuan pawisa kan pek tum che pawh kan pe lo ang che tih hialin a vau a, Dinpuia lah rilru lian chi a ni bawk nen, a thlah che a an hriat hnuah a tan a pawisa an lo khawl sak bawk kha an sawipui leh a, a la duh ta chuang lo anih kha. Pawisa chungchang i hnenah a sawi anih chuan awih duh suh. Tunah ka sawi hi thudik a ni e. I patea'n pek a tum a, Dinpuia'n a la duh lo. A thlah hnu che pawh a a lak duh miau loh chuan tih theih kan nei tawh lo" a ti hmarh hmarh a, pawisa dawng se chuan thlaphanna tur a nei miah lo va, eng emaw a thleng anih ka ring reng a ni. 

"Engmah a sawi loh vang zawk a nia ka patea ka lo zawh" ka ti ve deuh kher a, rin aiin ka hriat duh ka hre hma. 

"A lak duh loh vang zawk a nia, a sawi ngam kher lovang. Anu in mawhphurhna a la vek tawh a, duh leh anu'n tihsak rawh se. Insawn chhuah kher pawh a ţullo mawle, fel takin awm se chuan tupaw'n an ngaithei vek ang" thil hrechiang ber awm ang zia zangin a ţawng leh bawrh bawrh. 

"A chanchin ţha lo lam hriat tur a awm zeuh zeuh a, a insiamţhat theih nan anu chuan awm hrang se pawi a ti lo va, ka enkawl anih loh vangin sawitheih ka nei ve lo va, a awm ang ang a en tawp hi ka tih theih tawh a ni rih" ka patea chuan a lo ti ve thung. 

"An inah sawn mikual ang maiin a awm a, tuman an be ţha duh ngai si lo va, keipawh ni ila awm na tur dang ka dap ve tho ang" tiin a thlavang ka hauh a, Nu Hlimi a meng rang nasa mai. 

"Awm ţha duh hek lo. Dinpuia ang a buaipui ngai tumah an awm lo va, mipa awmchhun a nia, awm ţha duh se a vanneih dawn teh lul nen. Anu hian a naupanlai khan chuh tlat lo se chu hetiang hi a ni lo tawp ang" Nu Hlimi bawk a ni. Dinpuia leh anu a demna hlir a sawi zui bawrh bawrh a, ka patea chuan thu tam a sawi lo. Thil awmdan diktak a sawi rualin thlah turin min hrilh mawlh mawlh reng bawk. Rei pawh awm lovin in lamah ka haw a, eng thu lawmawm mahin min lo hmuak leh ta chuang lo. 

CONT...